BAR.txt

alphâ et ô, künec sâbâôt,
got, des gewaltes kraft gebôt
leben ân urhap, dîn kunst
ân anegenges begunst
was ie, dîn gotlîchiu kraft
lebende in werder meisterschaft.
dîn hôhiu kunst, dîn wîser rât
beflozzen und bestricket hât
daz angenge und daz ende;
sunder missewende
bist dû der urhap genant,
daz ende stât in dîner hant;
der beider name waer dû ie,
doch gewunne dû sie nie
und müezen dem gewalte dîn
versaget unde vremede sîn.
dîner lebenden gotheit
wart anevanc nie angeleit;
dîn kraft gewinnet niemer ort,
dîn gewalt, dîn geist, dîn wort,
got vater mensche unde kint
gewaltes ungescheiden sint,
als ie ân anegenge was
dîn einic drîvalt unitas.
dir sich biegent älliu knie
ze himel und ûf der erde hie
biz durch der helle künde.
vor dir daz abgründe
bibent unde in vorhten swebet.
von dînem süezen geiste lebet
swaz lebelîche sich verstât
unde lebende sinne hât.
erde, viur, wazzer, luft,
kelte, regen, hitze, tuft
getempert hât dîn eines kraft
in gotlîcher meisterschaft.
dîn eines vürdaehtlîch gewalt
hât genennet unde gezalt
der sternen menege unde genant
ir aller namen unde erkant
ir umbelouf ir umbevart,
und wie sie nâch ir rehter art
natûrent aller dinge leben,
den dû wilt lebende sinne geben.
ouch muoz in sînem loufe gân,
als ez dîn kraft hât angelân,
daz firmament unz an daz zil,
als ez gebôt und als ez wil
diu gotlîche witze dîn.
alsô hât sich der sunnen schîn
entliuhtet unde gerihtet;
von nihte hât getihtet
dîn wîser gotlîcher list
swaz sihtic unde unsihtic ist.
dîn wort ist aller dinge slôz.
den dunre und diu blicschôz
von viurînem lufte lât
dîn kraft, diu sie getempert hât.
dir ist niht verborgen vor,
dû sihst durch aller herzen tor
in menschlîcher sinne grunt;
dir sint älliu herzen kunt.
got vater nâch der gotheit,
dînes sunes name treit
die menscheit, in der er leit
den tôt durch unser broedekeit,
der megede schepfer unde ir kint,
an dem die drîe namen sint:
vater, sun, heiliger geist,
dû hâst in wîser volleist
allen herzen gegeben
sin, verstân, vernunstlîch leben
mit mislîches teiles gunst.
dîn geist berihtet al die kunst,
die menschlîchez leben treit:
einem gît er wîsheit,
bî witzen wîslîchiu wort;
dem andern kunstrîchen hort,
der doch an im verborgen ist;
dem dritten manegerhande list;
er gît dem bescheidenheit;
gnuogen machet er bereit
mit triuwen tugende rîche site.
er teilet ouch genuogen mite
gesunden lîp, vroelîchen muot.
älliu leben hât behuot
dîn vil heiliger geist
nâch ir sinne volleist.
swie kleine doch sîn wîser rât
der künste mir geteilet hât,
krist herre got, sô sage ich dir
lop der gnâden, daz dû mir
geruochtest sinneclîche geben
gelouben unde kristen leben,
daz ich von sinnen mich verstân,
waz ich gnâden von dir hân;
daz dîn geloube mir gît trôst;
daz dû mich armen hâst erlôst
von der êweclîchen nôt,
und daz ich weiz, daz ich den tôt
niht vürhten sol der sêle mîn,
ob ich bejage die hulde dîn.
durch die gnâde bite ich dich,
daz dû geruochest hoeren mich
und mir in mîne sinne
des heilegen geistes minne
ze lêre geruochest senden,
daz ich wol müge verenden,
des ich mit kranken sinnen
alhie wil beginnen
ze sprechenne von einem man,
wie des lêre dir gewan
vil der heidenischen diet,
wie er von ungelouben schiet
mit dîner lêre liute, lant
und den glouben tet erkant
in dînem namen, süezer krist.
sît dû daz anegenge bist
und daz ende hâst erkant,
sô biut mir dîner helfe hant
und wis nû mînen sinnen bî.
in nomine dominî,
hilf, herre got, verenden mir,
des ich beginnen wil mit dir.
jôhannes hiez ein herre guot,
der truoc ze gote staeten muot:
von damascô was er genant,
der diz selbe maere vant
in kriecheschem getihte.
ze latîne erz rihte
durch got und durch alsolhe site,
daz sich die liute bezzern mite.
des selben hân ouch ich gedâht.
mag ez werden vollebrâht,
daz mir got der sinne gan,
daz ich ez vollebringen kan,
sô weiz ich wol, diz maere gît
den liuten ze etlîcher zît
an kristenlîcher êre
vorbilde in guoter lêre,
swen durch got des wol gezimt.
daz er diz maere alhie vernimt,
als ich ez geschriben vant.
ez brâhte her in tiuschiu lant
des ordens von zîtels ein man,
von dem ichz von êrste gewan:
von kapelle abbet wîde.
vil kûme ich daz vermîde,
ich müeze ez iu ze tiute sagen.
ich hân dâ her in mînen tagen
leider dicke vil gelogen
und die liute betrogen
mit trügelîchen maeren:
ze trôste uns sündaeren
wil ich diz maere tihten,
durch got in tiusche berihten,
und bite, swer diz maere lese,
daz er sich bezzernde wese
mit staete an dem glouben sîn,
und durch got gedenke mîn
vil armen sündaeres.
der urhap dises maeres
wil ich in tiuscher zungen wesen,
als ich die wârheit hân gelesen.
hie vor in der gnâden zît,
als uns diu schrift urkünde gît,
dô got nâch der menscheit
den tôt durch unser schulde leit,
und von dem tôde erstanden was
der durch uns starp und doch genas,
und der vil reinen megede barn
was zuo der gotheit gevarn,
diu in hâte her gesant
von himel in irdischiu lant
der kristenheit ze trôste,
die von der helle rôste
von iemer wernder klagender nôt
erlôste sîn vil strenger tôt,
und nâch der boten lêre
begunde wahsen sêre
der gloube unde gotes wort
in den landen hie unt dort:
dô began vil liute geben
umb daz êwige leben
durch got ir groesten rîcheit,
die in vil maneger arbeit
gar mit kumberlîchen siten
in gote manege swaere liten,
die sîn lop ze allen stunden
hôhten, swâ sie kunden,
die weltlîch guot verswuoren
und in die wüeste vuoren.
genuoge münecheten sich.
diz reine leben gotlich
wuohs und wart vil wîte erkant
hin und her in vremdiu lant.
nû was dô bî den selben tagen,
als ich die wârheit hoere sagen,
in indîâ ein künic wîs,
der gar an dirre welte pris
sîn gemüete kêrte:
in vremeden landen mêrte
sîn tugent sîne werdekeit.
er hâte sich dar zuo bereit
mit tugentlîchen dingen,
daz man sîn lop sach dringen
vür ander künege wirde grôz.
niender lebete sîn genôz
an milte, an hôhem muote.
er truog in sîner huote
swaz dirre welte wol gezam:
er was den vîentlîchen gram,
den er vîent solte sîn;
ouch tet er vriuntlîche schîn
den liuten vriuntschaft genuoc,
den er holdez herze truoc:
sô gebar der zît nie wîp
alsô minneclîchen lîp
mit rehtem gelimphe.
ze erneste und ze schimphe
was er zem besten ûz erkant:
der was avenier genant.
er phlac gewalteclîche aldâ
in dem lande ze indîâ
des landes und der krône
vil wirdeclîche schône.
avenier der künic was
sô gar der welte ein spiegelglas,
daz dem hôch gelobeten man
sin rîcheit wahsen began
von witzen unde rîcher wer.
er betwanc mit manegem her
der lande vil in sîn gebot.
swes geloube jach an got,
der muoste dulten sînen zorn
und sâ daz leben hân verlorn
in sînem künecrîche.
er lebete heidenlîche:
durch des tiuvels gebot
kêrt er sich an diu abgot,
den er vil manegen dienest tet
und alle stunde sîn gebet
in ze lobe nâch helfe sprach,
wan er sich helfe an sie versach.
swâ man über al sîn lant
iender kristenliute vant,
die muosten lîden sâ den tôt,
als im des tiuvels rât gebôt,
den er vil selten übergie.
nâch sînem willen was im ie
der welte wunsch an rîcheit
bereit und niender verseit.
diu groeste swaere, der er phlac,
daz was, daz er sô manegen tac
solt âne rehten erben sîn.
daz leit gap im sô hôhen pîn,
daz ez im sorge brâhte,
swenn er an kint gedâhte
und im niht kinde was geborn.
den namen haeter gerne erkorn,
daz er ein vater hieze
und sînem lande lieze
den erben, dem sîn rîcheit
nâch sînem lîbe waere bereit.
des küneges drôlîch vorhte
in sînem lande entworhte
die gotlîchen minne.
swer kêrte sîne sinne
ze kristenlîcher lêre aldâ,
der muoste von dem lande sâ,
ob er niht wolte ersterben
und schäntlîche verderben.
nû hâter einen râtgeben,
der was im allez sîn leben
der liebeste âne wandel ie.
dô der daz gotes wort enphie,
ez wart an ime wuocherhaft.
got sante sîne hôhe kraft
mit staete in sîn gemüete.
des heilegen geistes güete
sîn herze alsô gar besaz,
daz er durch got vil gar vergaz
dirre welte muotes
und zergänclîches guotes.
dise arme wünne er sêre vlôch,
in einen walt er sich zôch
und wart ein riuwesaere.
daz was dem künege swaere
und hiez in suochen balde
in disem selben walde,
dâ der guot einsidel was.
er az dâ krût unde gras,
unz er den lîp in grôze nôt
durch die gotes minne bôt.
dô kâmen die in suochten dâ.
sie viengen in und brâhten sâ
dem künege disen guoten man.
als in gesach der künic an,
gelîchsende er im dô bôt
nâch süezer rede unsenften tôt:
kêrte er sich iht mêre
an kristenlîche lêre.
< war hâst dû dînen sin getân,
daz dû hâst durch niht verlân
beidiu lîp, êr und guot?
waz riet dir disen tumben muot?
dû treist daz scherpheste gewant,
daz mir ie mê wart erkant;
dû waere doch ie der êrste,
der werdeste und der hêrste
in mînem künicrîche,>
sprach dô vil zornlîche
avenier der rîche heiden;
< daz solt dû mir bescheiden.>
er sprach:< des wil ich wîsen dich.
ob dû wilt rehte hoeren mich,
sô heiz von dînem râte
scheiden hinnan drâte
zwêne vînde, die dû hâst,
die dû doch vil kûme lâst.>
dô sprach der künic,< wer sint die?>
< daz wil ich dir sagen hie:
zorn und gîtlîch âkust.
daz eine vüeget den gelust,
der wider gotes willen strebet.
swer nâch der welte willen lebet,
dem vüeget ir ger vil gîtekeit.
sô gar ze samene wirt geleit
der welte hort, in stoeret zorn.
der welte volger sint verlorn.
diu beidiu solt dû von dir jagen.
wil dû reht bî wîsheit tragen,
sô kan ich bewîsen dich
des dû hâst gevrâget mich.>
< nû sie beidiu sîn verjaget!>
sprach der künic unverzaget.
< nû sage, waz riet dir den muot,
dô dû haetest sô grôz guot,
daz dû ez lieze umb einen wân?
sich, durch waz hâstûz getân?>
< herre, daz wil ich dir sagen.
ich was hie vor in mînen tagen
verdrücket in den sünden.
dô hôrtich mir künden
ein wort, daz in mîn herze brach,
durch des lêre ich versprach
dirre welte genuht.
daz selbe wort hât sîne vruht
gewurzet an mir sêre.
diz was des wortes lêre:
der tumben sin ist sô getân,
ûf dise welt stêt gar ir wân;
sie hânt des waenlîchen muot,
daz diz zergänclîche guot
iemer wer, des doch niht ist.
daz iemer wert ân endes vrist,
daz dunket sie gar trügelîch;
hie mite triegent sie sich.
hie vor hâtich den selben sin,
den hân ich verlâzen, er sî hin!
dô mich unser herre got
wîsen wolte in sîn gebot,
do begunde er sterken mînen muot,
sô daz ich übel unde guot
ze rehte erkennen kunde.
dô lôster sâ ze stunde
mich von der welte üppekeit,
die si in süezem sûre treit.
daz mich got von ir lôste
nâch sînem hôhen trôste,
wil ich der welte unlenge
daz strenge phat vil enge
mit arbeitlîchen dingen
zuo mînem schepher dringen
und lâzen dirre welte muot
umb daz iemer wernde guot,
daz iemer wert und niht zergât,
daz dir dîn lebn gevremdet hât
und allen, den diz süeze guot
benimt der welte unstaeter muot.
der welte unstaetekeit ist vil.
niemen kan an halbez zil
genennen ir unstaete grôz.
si lât in nacket unde blôz
mit jaemerlîcher armuot.
swer ir willen gerne tuot
dem gît si sûres endes zil,
dâ von ich sî nû lâzen wil,
wan ich hân den ze vriunde erkorn,
von des gebote ich bin geborn.
der vriunde sol ich mich begeben,
die man siht mit nîde leben
und in der welte armekeit.
mînen vriunden ist verseit
vîentlîches zornes nît.
sie lebent in vreuden zaller zît.
des liehtes lieht entzündet in
mit vreuden muot, sêl und sin,
die ich ze mâgen hân erkorn.>
dô wart dem künege zorn.
er sprach:< dû vil tumbez wiht,
haete ich dir geheizen niht,
daz ich lieze mînen zorn,
sô müesest dû hân verlorn
den lîp durch dîn unnütze spel.
dîn zunge ist worden dir ze snel.
dû hâst sô vil getoubet mich,
benamen, ich hieze brennen dich,
haetich ez niht verlobet ê.
dû tuost mînen ougen wê;
nû balde enwec, vil tumber man!>
dô schiet er trûreclîche dan,
daz er dâ niht gemartert wart.
er huop sich ûf sîne vart
in sînen walt, dâ er ê was.
swie er der marter dort genas,
er was doch marteraere genôz.
des küneges zorn der wart sô grôz,
daz er der niht genesen lie,
swaz er der liute gevie,
die kristen wâren worden.
nâch heidenlîchem orden
êrte er sîniu abgot.
daz was des tiuvels gebot.
disiu vorhte wîte erschal;
die kristen vluhen überal
von ir lîbes sorgen.
sie lâgen verborgen
in manegem holn steine
weltlîcher vreuden eine.
dô vuogte sich nâch dirre zît,
daz des küneges grôzer nît
wahsen sêre begunde
den kristen. sâ ze stunde
ie harter man in wüeten sach.
wâ von aber daz geschach,
daz lât iu sagen, als ich ez weiz.
ein sîn vürste sich des vleiz
( der hiez bârachîas,
der im der liebeste ie was),
daz er in sînen sinnen
began die lêre minnen
der heiligen kristenheit.
der was, als uns daz maere seit,
getriuwe, kiusche, milte.
sîn herze nie bevilte,
im waer mit triuwen niuwe
an staete manlîch triuwe.
in des glouben blüete
bluot er mit rehter güete.
ze gote was sîn minne starc,
daz er doch angestlîche barc.
vor dem lieben herren sîn
tet er den willen selten schîn:
er getorste imz nie gesagen.
nû reit er mit dem künege jagen
eines tages in den walt.
dirre stolze degen balt
vil gar vereinen began.
dô vant er ligende einen man.
dem was wol herzeriuwe kunt.
in hâte ein tier sô sêre verwunt,
daz im was daz gân verseit
von der wunden arbeit.
dô er vür wolte kêren,
er hôrte disen sêren
nâch im schrîen verre:
< kêr her, vil lieber herre!
und lâ durch rehte güete mich
armen man erbarmen dich:
vüere mich an etslich gemach.
swie mir sî daz leben swach,
ich wirde noch ze rehter stunt
dir lîhte ein saeleclîcher vunt.>
dô kêrte er dêmüetlîche dan
zuo dem selben wunden man.
er dâhte helfen im durch got:
doch durch der vorhte gebot
versweig er got mit rede gar
und kêrte zuo dem wunden dar.
er sprach:< dû erbarmest mich.
ich wil hinnan vüeren dich;
durch guoter natûre wân
wirt dir gemach von mir getân.>
got getorst er nennen niht.
der wunde man sprach:< der geschiht,
daz dû mich armen wunden
alsus hie hâst vunden,
des maht dû iemer wesen vrô.>
zuo dem wunden sprach er dô:
< waz vreut an dir mich, wer bistû?>
< daz wil ich dir sagen nû:
ich bin vil wîse, ich hân den sin,
daz ich arzât der worte bin.
den list bin ich gelêret:
wirt ein mîn vriunt versêret
mit worten, von den der hât leit,
dem büeze ich sô die siecheit
mit mîner guoter lêre,
daz er iemer mêre
bî sîner lebelîcher vrist
von dirre swaere genesen ist.>
dâ kêrte sich vil wênic an
der reine gotes dienstman.
der rede geloubt er kleine.
dô vuort er dan aleine
den siechen man an guot gemach,
dâ von im liebe sît geschach.
des küneges avenieres man
begunden sterken in daran
mit valschlîchem geraete,
daz er den übel taete,
die krist ze gote nanden
und diu abgot niht erkanden.
sie kêrten alle enwiderstrît
an disen guoten man ir nît.
sie sprâchen zuo dem künege dô:
< herre guot, wie tuost dû sô,
daz dû sô minnest einen man,
der êren dir noch guotes gan?
dâ von dû schaden gewinnest.
er hazzet, swaz dû minnest.
im ist unmaere dîn gebot.
er minnet ouch der kristen got.
des lêre dich ie ringe wac.>
der künic dô sô sêre erschrac,
daz er sîn selbes nâch vergaz.
er sprach:< nû wie bevinde ich daz?>
dô sprach ir einer under in:
< dû maht vil schiere sînen sin
mit kündekeit bevunden hân.
dû solt in heizen zuo dir gân
und solt im sagen maere,
daz dû ein riuwesaere
wellest iemer mêre sîn
durch krist vür al die sünde dîn;
dû sîst in grôzer riuwe.
mane in aller triuwe,
daz er sîne rîcheit gar
durch dich lâze und mit dir var:
sô weiz ich in alsô gemuot,
daz er ez benamen tuot.
bitestû es in durch krist,
er tuot ez, ob er schuldic ist.>
den edeln vürsten rîche
minte alsô herzeclîche
avenier der künic hêr,
daz er vür ein herzesêr
dise rede nâhen truoc.
daz man sîn ze übele im gewuoc,
er dâhte, daz er waere betrogen,
der vürste waer durch nît verlogen.
des wart im zervarne gâch.
der rede er gie mit vlîze nâch,
daz si im rehte wurde erkant.
der herre schiere wart besant.
als in der künic komen sach,
heinlîche er zuozime sprach:
< lieber vriunt, nû hoere mich.
ich wil ein wênic wider dich
sprechen unde wil dir sagen
ein teil und mîner swaere klagen.
dû weist wol, waz ich leider hân
an guoten liuten missetân,
die kristen sint: daz ist mir leit
nû wil ich die kristenheit
gelouben unde nemen an mich
und wil dich biten, daz dû dich
mit mir in daz selbe leben
zeinem müneche ruochest geben.
den ich vil leides hân getân,
den wil ich sus ze buoze stân,
und wil den heiligen krist
ze gote erkennen, alse er ist.
nû rât mir nâch dirre sage
und sage mir, wie ez dir behage.>
der herre was der rede vrô.
vür wâr verstuont er sich ir dô,
von jâmer weinde er sêre,
< mit saelden iemer mêre
müezestû vroelîch sîn,>
sprach er,< vil lieber herre mîn.
dîn herze dir den besten rât
mit witzen nû gegeben hât.
swie man daz himelrîche
erwerbe kumberlîche,
sô sol man ez doch suochen.
swer es wil geruochen,
der vindet ez, man lât in drin,
ob er sô reinet sînen sin,
daz er der welte werdekeit
durch got lât varn und sî hin leit:
dem gît ân ende iemer mêr
vreude ân allez herzesêr
mîn vil lieber herre krist,
der got ân ende iemer ist,
mit iemer wernder krône.
bî dirre welte lône
merke, wie si zaller zît
wider einem liebe gît
sibenvalte swaere.
ir lôn ist wandelbaere,
der gotes lôn ân ende wert.
swer dirre welte lônes gert,
des lôn wirt anders niht wan klage.>
vil sêre erschrac von dirre sage
der rîche degen wol geborn.
im was diu rede an im vil zorn,
doch brâhte ers in niht innen:
er zurnde in sînen sinnen.
der herre sich dô wol verstuont,
alsô noch die wîsen tuont,
daz er alsus versuochet was.
der künec und bârachîas
schieden von dem râte dô.
des zornes was der guote unvrô.
von sînem herren balde gie
dirre guote vürste hie
mit sorgen in sîn hûs hin hein.
er waere worden gerne enein.
ob er mit witzen kunde,
wie er die liste vunde,
daz er mit wîsen sachen
möhte senfter machen
des küniges haz wider in.
daz kom sô sêre in sînen sin,
daz er dekeines slâfes phlac.
die naht er wol halbe lac
mit gedanken überladen:
er vorhte von dem herren schaden.
an jenen wunden dâhte er dô,
daz er gesprochen haete alsô,
daz er wortarzât waere
und kunde grôze swaere
von worten wol gebüezen
mit erzenîen süezen.
dô hiez er in zuozime komen.
er sprach:< dû hâst dich angenomen,
dû künnest worte arzât sîn.
daz solt dû lâzen werden schîn.>
< daz kan ich wol, ich lougens niht.
ich kan ez, swâ es nôt geschiht.>
< sô rât ze mînen sorgen mir!>
< nû daz tuon ich, waz wirret dir?
sag an! es wirt dir lîhte buoz.>
< dâ hân ich mînes herren gruoz
umb eine kranke schulde
verlorn und sîne hulde.
er sagete mir, er wolde sich
münechen. dô besante er mich
und bat mich, daz ich taete alsô.
des was ich herzeclîche vrô
unde stuont ze sînem gebote,
und begunde sterken in an gote.
einvalteclîche tet ich daz.
daz nam er vür grôzen haz,
daz ich wol waene, daz si sîn zorn
mir habe sînen gruoz verlorn.>
dô sprach aber der wunde man:
< vil wol ich dir gerâten kan,
wie dir wirt der sorgen buoz
und wie dû dînes herren gruoz
als ê noch baz erwerben maht.
dû solt dir an dirre naht
dîn hâr heizen snîden abe,
und solt alle dîne habe
von dir legen und dîniu kleit.
dû solt mit grôzer armekeit
in einem hemede haerîn
gân vür in als ein pilgerîn.
des nimt in michel wunder
und vrâget dich besunder,
waz disiu rede bediute.
sô sprich: ich wil dir hiute
erzeigen, lieber herre mîn,
daz ich dir wil getriuwe sîn.
sag an, bistû noch staete?
des dû mich gester baete,
des wil ich gerne volgen dir.
nû wol ûf! wildû mit mir,
ez sî rûch oder sleht,
ich wil dir alsam ein kneht
und dîn vil getriuwer man
iemer dienen swâ ich kan.
diz dunket in ein grôz geschiht.
als er dîne triuwe ersiht,
er hoehet dir iemêre
mit willen guot und êre,
wan er dir iemer deste baz
getrûwet und lât sînen haz.>
der rât dûht in der beste.
der vürste muotes veste
sîn hâr vil hôhe vürder schriet,
als im dirre man geriet.
er lie belîben sîn gewant.
haerîn kleit leit er zehant
an sich. er gie vil drâte
zedes küneges kemenâte.
als er begunde bôzen dâ,
man liez in vür den künic sâ.
der begunde in vrâgen dô:
< sag an, wie gâstû alsô?
diz hân ich vür ein wunder grôz,
daz dû gêst vür mich sô blôz.
sage mir, ob dir iht werre?>
< nein ez! lieber herre,
wan daz ich dir des willen dîn
gerne wil gehôrsam sîn
mit dienstlîchem gelimphe.
ich half dir ie ze schimphe,
nû hilf ich dir alrgernest,
sît ez gât an den ernest.>
dô wart dem künege niuwe
des werden vürsten triuwe.
er sprach:< dû waere mir verlogen.
sie hânt mich an dir betrogen,
die dich durch ir valschen nît
mir hânt geleidet zaller zît.
ich sol der triuwen lônen dir,
die dû hâst erzeiget mir.
ich wil dich iemer rîchen.
sie müezent mir entwîchen,
die dich sô vil gevelschet hânt
und mich ir leidens niht erlânt.>
den herren er dô êrte,
sîn guot erm vaste mêrte
und vuogte im hôher êren mê,
danne er gewunne bî im ê.
den valschen rât er von im treip.
an sînem zorne er noch beleip
sô staete, daz er dâ vor nie
der kristen groezern haz gevie.
sus genas der gotes degen.
sîn phlac der gotlîche segen,
an des trôst er sich lie,
dô sîn wort sîn herze enphie.
dô des küneges grôzer haz
begunde ie baz unt baz
wahsen gegen der kristenheit
sîn irrekeit wart alsô breit,
daz er der genâden gotes
gar vergaz und sînes gebotes.
dô was unser herre krist
der bezzer, als er iemer ist,
und hiez in sîner güete
mit saeldenrîcher blüete
von dornen rôsen springen,
mit süezer vruht vürdringen
daz honic von der wîden.
man mohte gerne lîden
von gote dise gâbe grôz.
dem selben lande zuo vlôz
der kristenheit ein sunnenglast,
von dem vreudebernden last
der kristen leben ie muoste tragen
mit vreuden gar bî sînen tagen.
der künic was der selbe dorn.
ich hân die heidenschaft erkorn
zuo dirre wîdn ungüete.
der komenden rôsen blüete
und des honeges süeze was
ein kint, des aldâ genas
des küneges avenieres wîp.
ez wart nie kindes schoener lîp
in dem lande mê gesehen,
als ich die schrift hoere jehen,
dan diz vil saelden rîche kint,
von dem diu maere erhaben sint.
der vater was des kindes vrô.
sîne boten sant er dô
den vürsten al gelîche
in sînem künicrîche
und hiez, daz rîche und arme gar
ze sînem opher koemen dar.
dô sach man die lantherren komen,
als in diu botschaft was vernomen.
ir opher brâhten si den goten.
als ez den armen was geboten,
die muosten ouch dâ ze opher gân.
als ieglîcher mohte hân,
darnâch muost er sîn opher geben.
des vreute sich des küneges leben,
als in des kindes liebe twanc.
sînen goten sageter danc,
daz im daz kint ie wart geborn.
er haete des vil wol gesworn,
daz erz solte hân von in.
( wie was ir herze unde ir sin
der zît sô gar betoubet?
waz hâte an in beroubet
beidiu sin, herz unde muot,
daz sie lîp, sêl unde guot
von einem bilde wolten hân,
das als ein tier was getân,
und des nieman gedâhte,
des begunst volbrâhte
mit sîner gotlîcher kraft
himel und erde und alle geschaft?)
des kindes namen schuof man sâ
mit der vürsten lêre aldâ:
jôsaphât wart ez genant.
got leite sîne süeze hant
an daz reine kindelîn
und tet im sîne güete schîn
nâch dirre welte wunsche gar.
nû wâren von dem lande dar
vünf und vünfzic meister komen,
die alle wâren ûz genomen
an kunstlîchem prîse.
sie wâren alsô wîse,
daz in was von listen kunt
astronomîe und alle die stunt,
in den die sternen rihtent sich
in ir louflîchen strich.
die nam der künec an einen rât.
er sprach:< sît iuch gesament hât
mîn saeleclîchiu vreude her,
sô saget mir, daz ist mîn ger,
wie ez dem kinde sül ergân,
daz ich von mînen goten hân.>
dô sprachens alle gelîche:
ez würde saelden rîche
gewaltes unde guotes,
tugende und hôhes muotes;
ez gewunne rîcheit mê
dan alle sîne vordern ê,
und daz im solde sîn bereit
êre, saelde, werdekeit.
dô sprach in einer under in,
der hâte künsterîchen sin
vür die andern alle:
< wie ez dir nû gevalle,
herre, des enweiz ich niht:
als mir der sternen louf vergiht,
als wil ich dich ez wizzen lân,
wie ez dem kinde sol ergân,
daz nû von dir geborn ist.
ez bejaget in sîner jâre vrist
vil saelden zühteclîche.
alhie diz künicrîche
sol im niht werden undertân;
ez sol ez umbe ein anderz lân,
daz tûsentvalte rîcheit
ob disem künicrîche treit.
der zweier guot ist ungelîch:
diz ist ein armuot, jenez rîch,
daz im ze erbenne ist bereit.
dû stôrtest ie die kristenheit,
die wirt er hoehende alle zît.
an kristenleben er sich begît
und wirt der kristen bluome
mit kristenlîchem ruome.
man wirt in kristen sehende
an kristum wirt er jehende
gelouben unde toufes sîn.
sus ist ez umb daz kindelîn.
swer dir iht anders von im seit,
daz ist gar ein unwârheit.>
der künic dô vil sêre erschrac.
diz maere er alsô hôhe wac,
daz im sîn vreude gar zersleif.
des meisters wort im hindergreif
sîner hoehsten vreuden zil.
dô gedâhte er liste vil
mit râte in manegen enden,
wie er diz möhte erwenden.
dô hiez der künic rîche
würken meisterlîche
einen wünneclîchen palas,
dar an sô vil gezierde was,
daz man es vür rîcheit jach.
dô man daz kint gewahsen sach
in der mâze an siben jâr,
in daz selbe hûs vür wâr
wart ez durch huote getân.
der künic hiez zuozim dô gân
liute, die sîn solden phlegen
und an rehter lêre wegen.
die schoensten liute, die man vant
gewahsen über al sîn lant,
die liez er bî dem kinde.
dô hiez er dem gesinde
mit drô gebieten an den lîp,
daz deweder man noch wîp
giengen in den palas,
wan sie, den ez bevohlen was.
dâ bî gebôt er mêre:
swer kristenlîcher lêre
oder kristes im gedaehte,
daz man im den braehte:
der müese lîden sâ den tôt.
der künic ouch dâ bî gebôt,
ob man under in dâ vunde
deheinen, der begunde
dâ bî in siechen, daz man in
ûz jagete von den andern hin
und einen gesunden braehte,
und niemen dâ gedaehte
dem kinde, daz ein ander leben
got der welte möhte geben.
er hiez daz alter in verdagen
und dem jungen kinde sagen,
daz ez solde iemer mêre
leben in solher êre.
er hiez, daz sie dekeine nôt
dem kinde nanden und den tôt
im niemer vürgeleiten
unde im dâ von niht seiten.
nû wart im kunt getân,
man saehe in dem lande gân
kristen, die durch valschen list
ze einem gote nanden krist.
dô hiez er in daz rîche sagen,
swer nâch den naehsten drin tagen
deheinen in dem lande dâ
vunde, er solde in brennen sâ.
diz gebôt er, ez geschach.
eines tages er gesach
zwêne reine müneche guot,
die truogen ouch vil staeten muot
an gotlîcher lêre.
dô zurnder an sie sêre
daz er sie in dem lande vant.
er hiez sie brennen sâ zehant,
dô sie daz urkünde gotes
truogen unde sîns gebotes.
sus tet vil angestlîchiu leit
avenier der kristenheit
vil und mê bî sînen tagen,
danne ich iu hie welle sagen:
er treip sie algelîche
von sînem künicrîche.
als mir daz maere gesaget hât,
der edele guote jôsaphât
in sînes vater huote was
behalten ûf dem palas.
sîne meister lêrten in
zuht und hovelîchen sin,
wol gebâren, kiusche wesen,
mit witzen an den buochen lesen
und reine küneges milte hân,
ungevüege site lân,
unzuht lâzen unde spot.
sîner meister gebot
im sô gar ze herzen kam,
daz er in sîne sinne nam
von sîn selbes muote
die lêre in sîne huote.
sîn angeborniu hôhiu tugent
kund im daz herze in sîner jugent
ze solhen tugenden kêren gar,
daz es die meister nâmen war.
den wart in rîcher wîsheit
von im vil dicke vür geleit
meisterlîcher rede genuoc.
von grôzen sinnen, die er truoc,
lêrt in sîner witze hort
vürbringen sinnerîchiu wort,
mit den sîn wîslîchiu kraft
sîner lêrer meisterschaft
von ir sinnen jagete.
dô man dem künege sagete,
daz im sô hôhiu wîsheit
von rîchen sinnen waere bereit,
es nam in dicke wunder
und die meister al besunder.
sie vreuten sich der wîsheit.
dem künege liep unde leit
was ez und dicke swaere
durch jenes meisters maere.
der künic hiez die meister dô,
daz sie in swaere und aller drô,
diu in möhte beswaeren,
erliezen und verbaeren.
des wâren sie im gehôrsam.
daz kint in sîne sinne nam,
wâ von daz geschaehe,
daz in niemen saehe,
wan dem ez der künec gebôt.
des hâte er ofte manege nôt,
wen er des vrâgen möhte.
er dâhte, daz niht töhte
vrâgen es den vater sîn.
< swaz mir tuot der vater mîn,
daz tuot er niht wan durch guot.
ouch vürhte ich, daz ich sînen muot
vrâgende beswaere,
vrâgich in dirre maere,>
dâhte der junkherre dô.
dâ bî begunde er denken sô:
wer mit sô rîchem werde
des himels und der erde
sô gewaltic möhte sîn,
daz der liehten sunnen schîn
tages schîne und nahtes niht.
in dûhte ein wunderlîch geschiht,
wâ von diu vinster trüebe
sich ie des nahtes hüebe
und ie der tac waer alsô klâr
und beidiu zît, stund unde jâr
sô wehsellîche liefen hin.
daz nam er in sînen sin
und leite sînen meistern vür
wîse vrâge in vremeder kür,
ob der geschephede orden
waer von im selben worden,
oder ob ez waere gemachet sô:
des hâte er manege vrâge dô.
nû was bî im ein wîser man.
dô er des künde êrst gewan,
er nam sîn heinlîcher war
dan ander sîner meister gar.
zuo dem saz er an einem tage.
er sprach:< vil lieber meister, sage
ein wênic, des ich vrâge dich,
durch mich, und bewîses mich.>
< daz tuon ich gerne, lieber man.>
< lieber meister, sô sag an
( daz ich dich iemer mêre
nach dînem willen êre,
ob dû mir seist die wârheit):
durch waz hât an mich geleit
mîn vater söliche huote?
des was mir ie ze muote,
daz ich es haete gerne dich
gevrâget: nû bewîse es mich.>
der vrâge erkom der meister dô.
doch gedâhter im alsô:
< diz kint hât sô grôze tugent,
ez ist in wahsender jugent:
tragich im heinlîchen muot,
daz ist mir iemer mêre guot.
ouch ist der vater im sô holt,
swer sîne vriuntschaft verscholt,
der tuot sînen willen wol:
darumbe ich im ez sagen sol.
beginnet er mir heinlich sîn,
daz vrumt mir an den saelden mîn.>
er sprach:< herre, ich wil dirz sagen.
dîn vater hât bî sînen tagen
gehazzet al die kristenheit,
vil grôzen zorn an sî geleit
durch einen got, der heizet krist,
der ein vil werder got in ist.
sie jehent, daz er der himel phlege
und daz vür alle krefte wege
sîn kraft, sîn hôhiu gotheit,
und daz sîn witze hât bereit
nâch gotlîchem werde
beidiu himel und erde.
diz ist dînem vater zorn.
dô dû wurde geborn
er ladete wîse meister her
von disem lande, die hiez er
an der sternen loufe ersehen,
waz an dir solde nû geschehen.
dô wart im von dir geseit,
daz dû soldest die kristenheit
an dich nemen und den touf,
unde umb iemer wernden kouf
alhie diz künicrîche lân.
dir würde ein lant undertân,
des rîcheit groezer waere.
daz was dem künege swaere
und hiez durch daz behüeten dich.
der liute rede ist mislich.
diz ervorhte er sêre
und dâhte maneger lêre,
wie er die liste erdaehte,
daz er dich hievon braehte.>
do began der junkherre
gedenken harte verre
nâch wâne in sînen sinnen
ze kristenlîcher minnen.
got tet an im genâde schîn:
er sante im in daz herze sîn
des heilegen geistes güete
sô gar, daz sîn gemüete
beleip in reiner staetekeit,
als iu wirt her nâch geseit.
nû kam der vater dicke dar
und nam des junkherren war,
wan er im herzeliebe jach
und in mit willen gerne sach.
an einem tage er zuozim gie.
der junkherre in vil wol enphie:
den rîchen künic alsus bater:
er sprach:< sage mir, lieber vater,
wie tuost dû mir nû lange sô,
daz dû machest mich unvrô,
daz ich in klagender swaere bin?>
erkomenlîche sach an in
der künec. er sprach:< vil liebez kint,
hânt dich beswaeret, die hie sint,
benamen, sun, daz riche ich dir!>
< vater, sie getâten mir
nie niht wan ze guote.
mir tuot dîn strengiu huote
leide zallen stunden.
dû hâst mich sô gebunden
daz ich als ein gevangen lebe
und in vil kleiner wünne swebe.>
< daz tet ich, sun, niht wan durch daz:
die liute tragent grôzen haz,
mit zorne vrevellîche site:
dâ trüebent sie einander mite.
liebez kint, dâ von woltich
gerne wol behüeten dich,
wan ich wil, daz dû iemer mê
belîbest sô, daz dir niht wê
von sorgen ûf der erde
noch von unmuote werde.>
< daz mac niemer sus ergân:
wan ich sô grôze swaere hân
von dirre huote, daz mîn leben
alle vreude muoz begeben.
ich wolde gerne vür diu tor
und sehen, waz dâ waere vor.
mit leide ich bin besezzen
sô daz mir trinken, ezzen
niht gevuoren mac den lîp.
ich wolde man und dar zuo wîp
und ander dinc vil gerne sehen,
möht ez mit dîner gunst geschehen.>
als er der rede gap ein zil,
der künic hâte sorgen vil,
wie er mit vuoge taete
des sîn kint in baete.
er dâhte:< ich vüege im herzeleit,
wirt im diu bete alhie verseit:
sô mac mir wol ze leide ergân,
ob ich ez tuon, daz ist mîn wân.>
er sprach:< sun, ich wil durch dich
diz tuon, sît dû es gerst an mich.>
dô er der bete entwichen was,
dô hiez er vür den palas
schoeniu ors und rîchiu kleit
mit küniclîcher rîcheit
dem junkherren dar bringen.
do began sîn herze twingen
sîn zuht, sîn angeborniu tugent,
die er truoc in süezer jugent,
alsô zühteclîcher site,
daz er sich sô liebte mite,
daz man in wîte prîste
und daz er an sich wîste
der liute vriuntschaft unde gunst.
diu mâze wag im rehte kunst
gên dirre welte und ze gote
nâch des wunsches gebote.
dô reit er her unde dar.
der künic hiez die sîne gar,
die in hâten in ir phlege,
daz sie sîn huoten ûf dem wege,
daz er iemer gesaehe
dekeine sache smaehe
und niemer vür in kaeme,
swaz waere widerzaeme.
swaz schoene was und wolgetân,
daz hiez er in schouwen lân.
er hiez im machen vreuden vil
mit maneger hande seitespil,
daz er bî vreuden waere:
sus huote er sîn vor swaere.
mit disen dingen was behuot
jôsaphât, der knappe guot,
von leide bernder angesiht,
daz er bevunde leides niht,
dâ von im wüehse herzeleit.
eines tages er ûzreit.
dô vuogte sich, daz er gesach
zwêne man, der ungemach
was von hôher siecheit
ein iemer werndez herzeleit.
der eine miselsühtic was,
der ander blint, als ich ez las.
der knappe erschrac und wart unvrô.
zuo den gesellen sprach er dô:
< kêrent her, seht, waz hie gê!
ich hân gesehen, daz ich nie mê
gesach sô leiden aneblic.
des hât mir einen grôzen schric
mit vorhte ir ungetânez leben
von ir angesiht gegeben.
sie sint sô smaehlîche getân:
ich wolte gerne künde hân,
waz in geschehen waere.>
daz was den sînen swaere:
sie wolten im ez hân verseit:
daz er sie sach, daz was in leit.
ir einer under in dô sprach:
< der smaehen siecheit ungemach
genuogen liuten sô geschiht,
daz sich an in tempert niht
ir natûre complexiô.
der übervluz ez vüeget sô,
daz ir natûre verirret wirt.
der übervluz an in gebirt,
daz ir kraft muoz verderben,
und ir matêrje ersterben.
sô vüeget sich diu blintheit
ouch von maneger arbeit.>
der knappe sprach:< ir sult mir jehen,
mac allen liuten diz geschehen?>
< allen liuten? nein ez, niht!
an swem aber diz geschiht,
als ich dir hân hie vor geseit,
an dem wirt diu siecheit.>
< sît ez nû allen liuten niht
geschehen sol: den ez geschiht,
künnen die den tac versehen,
wenne ez an in sol geschehen?>
< nein ez, wan dekein man
rehte vor wizzen kan,
waz im her nâch geschehen mac.
dirre kumberlîche slac
kumt sô verstoln ûf den man,
daz sich nieman behüeten kan.>
der vrâge jôsaphât gesweic.
daz houbet im dô nider seic.
der schric was im ze herzen komen,
dâ von im vreude wart benomen,
daz er an disen beiden sach,
daz herzeleit und ungemach
der welte brichet vreuden vil,
als ez got vüegen wil.
dar nâch dô mit gewonheit
jôsaphât ze velde reit,
daz er mit willen selten lie,
ein alter man im wider gie,
der was unmâzlîchen alt.
daz alter hâte in ungestalt
gemachet, als ez an im schein.
im wâren arme unde bein
swarz, gerumphen. dirre man
truoc in dem munde niender zan.
der alte was von alter grâ;
an sînem lîbe hie unt dâ
muost im diu hût von alter wesen
mit grôzen runzeln überlesen.
swenn er iht sprach deheine stunt,
sô viel zesamene im der munt.
vil nôtlîch er vürbrâhte
daz wort, als ers gedâhte.
dô sprach der junge jôsaphât:
< waz wirret disem, der hie gât?
sô jaemerlich ist er gestalt.>
sie sprâchen alle:< er ist alt.>
< wâ von ist im geschehen daz?>
< von alter gar.>< nû sagent, waz
alter sî.>< daz sagen wir,
vil lieber junkherre, dir.
alter ist genant ein zît,
an dem vil jâre menige lît.
swie des mannes leben stât,
daz alter in niht ledic lât.
den siechen den gesunden
wehset zallen stunden
des alters kraft in sîner maht.
ez sî tac odr ez sî naht,
der man slâfe oder wache
mit senfte, mit ungemache
wehset ie des alters zît.
swem ê der tôt niht endes gît,
der muoz daz alter, daz ist wâr,
dulten, ob er manegiu jâr
lebet, sô drucket ez in nider
und lât in niht komen wider.
ez swendet alle sîne kraft,
biz dan des tôdes meisterschaft
an des alters ende kumt
und den lîp ze nihte drumt.>
< geschiht diz allen liuten?
daz sult ir mir bediuten.>
< jâ, niemen ez erwenden kan,
ez sî wîp oder ez sî man,
wîse rîch oder hêre,
daz ez guot oder êre
schoene, zuht oder tugent
behüeten müge, ie nach der jugent
zergê sîn kraft, sîn lîp werde alt.
dirre welte grôz gewalt
kan daz niemer understân,
daz leben müeze ein ende hân
mit tôde in des alters zît.
diz wizzest âne widerstrît!>
< nû sult ir mich wizzen lân,
sît ez kan niemen understân
mit witzen noch mit hêrschaft,
wie lange mac in sîner kraft
ein man belîben âne nôt,
daz in daz alter und der tôt
von sînen kreften dringe niht?>
< ob einem man sô wol geschiht,
daz er gelebet ahtzic jâr
oder hundert al vürwâr,
sô muoz sîn kraft, sîn lîp, sîn leben
disen beiden sich ergeben.
ir lebet vil wênic an daz zil.
der liute ist leider niht ze vil,
der lebendiu kraft biz dar gestê,
sie müezen leider sterben ê.>
< wie geschiht dem, der stirbet?>
< sîn lîp sô gar verdirbet,
daz er niht wan ein asche wirt.
der site nieman verbirt:
swaz lebet, daz muoz ersterben.
ez muoz ouch gar verderben,
swaz dû sihst oder iemen siht,
daz kan erwenden niemen niht.
hievor kan nieman genesen.
ez ist ein erbe an uns gewesen
von unsern altvordern gar:
die sint gevarn vor uns dar,
wir alle müezen nâch in komen:
des wirt niemen ûzgenomen.>
der knappe wîse unde guot
nam in sînes herzen muot
die rede und ouch die lêre.
er begunde siuften sêre.
er sprach:< owî, owê der nôt,
daz dirre welde gît der tôt
nâch liebe ein endelîchez leit!
diu welt ist gar ein üppekeit.
owê mir armen unde owê!
muoz ich nâch dirre selben ê
mit dem tôde ouch sterben,
wie sol ich danne werben?
owê, swenn ich verdirbe
und an dem lîbe erstirbe,
wer gedenket danne mîn?
owê! sol aber iender sîn
ein ander welt, in der ich lebe,
diu leben mir nâch tôde gebe,
oder sol ich sô verderben
und alsô gar ersterben,
daz von mir niht werde
wan ein blôziu erde?
waz bin ich denne, waz sol ich?>
alsus begunde er klagen sich.
dem tet er niender doch gelîch:
ze allen zîten vreudenrîch
was er, sô ez der vater sach.
diz verborgen ungemach
truoc er sô, dêr niemen vant,
dem erz mohte tuon erkant.
dô bat er aber zuozim gân,
von dem ich ê gesprochen hân,
den heinlîchen meister sîn.
er sprach:< vil lieber meister mîn,
tuo mir eteslîchen rât.
mîn herze grôze swaere hât
dâ von, daz ir mir sagetet ê,
daz dirre welte lîp zergê
mit leitlîches endes zil.
hie von dulte ich sorgen vil.
ist nâch dem tôde ein ander leben
oder wirt dem lîbe ein zil gegeben,
daz sîn gehügede ersterbe,
sîn leben sô gar verderbe,
daz man sîn niemer mêre
gedenke in lebender êre?
daz sage, vil lieber meister, mir.>
< wesse ich ez, ich saget ez dir:
ez ist mich als dich verdaget.
nû hân ich dir doch ê gesaget,
daz dîn vater grôzen haz
treit der kristenheit. durch daz
sie hie von hânt sô vil gesaget,
durch daz hât er sie verjaget,
herumbe er sie verderben hiez,
von disem lande er sie verstiez
durch disiu selben maere.>
dô wart des knappen swaere
gar nâch dirre lêre breit.
in dûhte gar ein üppekheit
dirre weltlîche ruom,
ir leben, ir êre, ir rîchtuom.
diz begunde erbarmen
den got, der uns vil armen
geschuof unde werden hiez.
diz süeze herze er niht verstiez,
daz sîne dêmüete
mit süezer mannes güete
suochte gar unkuntlîche.
des sin daz himelrîche
vorderte, er enwesse wâ:
dem sante er sînen boten sâ,
der in mit der gotes phlege
wîsen solde ûf rehte wege.
wer der waer, daz lât iu sagen.
ez was dô bî den selben tagen
ein guoter riuwesaere,
reht unde unwandelbaere,
der beidiu muot und gedanc
ûf gotes dienest sêre twanc.
diz was ein münich guoter.
wer vater oder muoter
waere, des enweiz ich niht.
daz maere mir von ime giht,
er waere ein guoter man in gote.
sîn herze was in gotes gebote
mit güete dicke erwachet.
er hâte im gemachet
ein zellelîn, dâ er beleip,
dô kristes lêre in vertreip
von dirre welte wünne.
lîp, guot unde künne
liez er allez varn durch got
und was gesîn durch sîn gebot
in einer insel manic jâr:
diu was geheizen sennââr.
dô er in sîner zelle was,
durch got dâ sanc unde las
nâch priesterlîchem rehte,
dem reinen gotes knehte
wart von gote kunt getân,
daz er des niht solde lân,
er vüere in indîâ daz lant,
und taete gotes wort bekant
mit des gelouben râte
dem jungen jôsaphâte.
barlââm was er genant.
der selbe gotes wîgant
hât ê ze manegen stunden
dicke wol bevunden,
daz avenier der rîche
den kristen algelîche
trüege al ze grôzen haz.
ein teil er im die vorhte entsaz
von menschlîcher broedekeit.
sîn orden wart hin geleit,
von des hoehe er nider trat
mit kleide an weltlîche stat.
er gie von sînem walde
zuo einem schiffe balde.
darinne vuor er sâ zehant
hin in avenieres lant
und sagete dâ ze maere,
daz er ein koufman waere
und trüege sînes herren krâm.
dâ was der wîse barlââm
lange, daz er niemen vant,
dem sîn geverte wurde erkant.
nû gienc er vür den palas,
da der junkherre ûffe was;
er gestuont an eine stegen.
der sîn hâte dar gephlegen,
got, der phlac sîn vürbaz.
nâch sînen saelden vuogter, daz
des junkherren meister kam,
zuo dem er zallen zîten nam
heinlîchen rât mit wîsheit,
als ich iu hân hie vor geseit.
er hâte daz ê wol ervarn,
daz jôsaphât, der saelden barn,
deheinem was sô heinlich:
zuozim huop er balde sich.
er sprach:< herre mîn, vernim!>
er stuont stille: er gie zuozim.
< waz wil dû mîn?>< daz sage ich dir.
ich hân brâht dâ her mit mir
krâm, den lieze ich gerne sehen
den junkherren, möhtez geschehen.>
< nû waz krâmes hâst dû hie?>
< einen stein, daz ouge nie
sô edel stein wart erkant.>
dô sprach der meister sâ zehant:
< lâ sehen! wie ist der stein getân?
der steine ich guote künde hân
und kan ir kraft erkennen wol.>
< den stein niemen sehen sol,
des lîp deheinen wandel treit.
er sol vor aller valscheit
sîn herze hân gereinet gar.
swer wil des steines nemen war,
der sol sich wandels hân behuot.
der stein ist bezzer danne guot;
ich nenne ein teil der sîner kraft.
wirt mit dem tiuvel behaft
ieman, den tuot er erlôst.
swer lebet in swaere sunder trôst,
dem gît er vreude und troestet in.
hât ouch iemen touben sin,
dem gît er bî wîser kunst
rîche sinne unde vernunst.
er tuot ouch ûf diu ôren
den ungehoerenden tôren
und gît den stummen wîsiu wort,
den herzen vreuderîchen hort.>
der meister sprach< dîn stein ist guot,
an dir zeiget mir mîn muot,
daz ich wil muoz unde sol
gelouben dînen worten wol:
dû bist geloublich getân.
doch triuget mich ein teil mîn wân,
swie dû sîst geloubhaft:
edel steine in grôzer kraft
und rîche gimme ich hân gesehen,
vil mê dann ich dir welle jehen:
doch hân ich her von kindes jugent
alsô gelebet, daz ich die tugent
vernam von steine nie sô rîch.
im wart nie steines kraft gelîch.
er zaeme wol herren edelkeit,
ist ez als dû hâst geseit.
doch muoz ich in ê gesehen,
ê daz ich iht welle jehen
sîner kraft dem herren mîn.
dû maht wol vil geniezen sîn:
mîn herre in giltet tiure dir,
gevellet er im unde mir.>
barlââm sprach:< dû seist wâr.
dû verendest dîniu jâr,
daz dir niemer krâm dekein
wirt erkant noch bezzer stein.
ez ist an disem steine
ein grôziu kraft, niht kleine:
unkiusche mac in sehen niht.
swer hât gebresten an der gesiht,
siht in der vrävellîchen an,
der kan gescheiden niemer dan,
daz sehn werd im verkrenket,
sîn vreude gar versenket.
die gesiht muoz er verliesen,
wil er in alsus kiesen.
ich sihe wol, dîner ougen glanz
ist volleclîche an dir niht ganz.
des wil ich schuldic werden niht
an dîner ougen gesiht.>
der meister sprach zuozim dô sâ:
< hab dir den stein und lâz in dâ,
wan ez ist als dû nû gihst
unde an mînen ougen sihst.
dar zuo hân ich ouch sünden vil,
dâ von ich in niht sehen wil.
ich tuon in mînem herren kunt,
der hât vil tugent; im ist gesunt
herze, lîp, muot unde gesiht:
an dem wirret ime niht.
gesiht er in, er wirt sîn vrô!>
von barlââme gienc er dô
und seite dort, wie ez ergie,
von dem steine, als ich iu hie.
die rede er weltlich verstuont,
als ie diu kint der welte tuont.
der bezeichenunge hort
erkande er niht. diu selben wort,
als er im seite, diu seit er.
dô was des junkherren ger,
wie er gesaehe disen man.
sînen meister santer dan
nâch dem wîsen barlââme
und nâch dem rîchen krâme.
er gie nâch im, aldâ er was,
und vuorte in ûf den palas.
als in jôsaphât ersach
unde gruozes im verjach,
des heilegen geistes lêre
begreif in alsô sêre,
daz er begunde brinnen
vil sêre in gotes minnen.
den meister hiez er vürder gân.
er sprach:< guoter man, ich hân
gehôrt von dînem steine,
wie edel und wie reine
sî dîn stein, wie rehte guot.
lâ mich in sehen. ich hân den muot,
daz ich in tiure gelten wil,
sît daz er krefte hât sô vil,
als mir ist von im geseit.>
< herre, dîner edelkeit
gezaeme niht, daz ich dich trüge
und an sô grôzen dingen lüge.
süezer man, swenn ich an dir
den muot bevinde, daz dû mir
vernemen wilt die edelkeit,
die er bezeichenlîche treit,
und waz im krefte ist anbehaft,
sô sage ich dir von sîner kraft.
ê daz ich underwîse dich,
wie sîn kraft ist bezeichenlich,
sô dunket ungevuoge dich,
wie er ist bezeichenlich.
mîn herre, der mich hât gesant
mit sînem krâme in ditze lant,
des wort sol ich dir künden,
dich wîsen von den sünden,
ob dû wilt lêre râmen.
er sprach: mit sînem sâmen
gie ein man ûz drâte.
dô er den sâmen sâte,
sîn viel ein teil ûf herten stein.
wan dâ niht bernder vrühte schein,
in âzen vogel und truogn in hin:
alsus verdarp dâ der gewin.
der ander sâme in dorne kam.
der dorne dicke im gar benam
die bernden vruht, daz si verdarp.
des dritten sâmen korn erwarp
hundertvaltes nutzes vruht:
der viel in viuhte genuht
und brâhte hundertvalten hort.
der sâme ist daz gotes wort:
vil wîte man daz saejen siht,
daz ez doch wuochers bringet niht.
der dâ viel ûf herten stein,
daz ist ein herze, daz ie schein
in hertem gemüete
gên rehtes wuochers güete.
die vogel, die ez truogen hin,
daz ist boeser liute sin
und des hellewarten rât,
der guotes niht geschehen lât.
rîcheit, wîp, vriunde, kint
genennet zuo den dornen sint,
von den vil kûme selten iht
guotes iht durch got geschiht.
diu dritte bernde genuht,
diu mit hundertvalter vruht
zehenzicvalten wuocher bar,
daz ist ein herze, daz sich gar
mit guoter werke staetekeit
ûf gotes dienst hât bereit.
vindich an dir den selben muot,
sô saeje ich mînen sâmen guot
mit lêre in daz herze dîn
und tuon bezeichenlîche schîn
dir des steines edelkeit,
von dem ich dir hân geseit.
ist dîn herze steinîn gar
und dornic, ob ich saeje dar
guotes sâmen gewin:
wil dû hân sô kranken sin,
daz dû lîhte maht verzagen
und den sâmen hin lâst tragen
die vogele, die ich hân genant:
sô bin ich sô niht ûz gesant,
daz ich in nâch unwerde
werf in unberhafte erde.
ich hân dir vil gestrichen nâch.
mir was her nâch dir sô gâch,
daz ich mit arbeitlîchen siten
vil kumbers hân durch dich erliten,
daz ich diu dinc dir sagete alhie,
diu dû vernaeme vor mir nie.
ich gedinge an dînem muote,
daz er sich nû ze guote
mit bezzerunge kêre
nâch mîner worte lêre.>
dô sprach der guote jôsaphât:
< mîn herze nû vil lange hât
einen harte vremeden sin,
von dem ich bekumbert bin.
ich hoere willeclîche dich
und dinge, daz dû wîsest mich
eteslîcher maere guot,
dar nâch nû lange ranc mîn muot.
ich wil dir waerlîche sagen,
daz ich nû lange hân getragen
gedanke manege stunde,
von den niemen kunde
ze rehte wol gescheiden mich.
ein viur hât enbrennet sich
sô sêre in mînen sinnen,
daz sîn vil staetez brinnen
an mir niht erwinden wil.
daz vüeget mir gedanke vil,
der niemen mich bescheiden kan.
hôrte ich einen wîsen man,
der guote rede mir seite
und reiniu wort vür leite,
dem wolde ich volgen gerne.
swaz ich von dir gelerne
guotes, des enlâze ich niht:
des mir der muot mit staete giht.
sî dir solher rede iht kunt,
der wîse mich alhie zestunt
durch dînes herren willen nû.
dô mir wart geseit, daz dû
kaeme alher, des was ich vrô,
und dâhte in mînem muote alsô:
dû kundest wol gesagen mir
alle mînes herzen gir,
und hiez durch daz dich zuo mir lân.>
< herre, daz was wol getân,
daz dû niht verschmâhtest mich.
dîn edel herze wîste dich,
daz mich dîn edelkeit, dîn guot
niht verschmâhte durch mîn armuot.
des wil ich dich gelîchen
einem künege rîchen,
der was edel und saelden rîch.
niender lebete sîn gelîch
an milte, an dêmüete.
daz zeigte wol sîn güete,
dô er eines tages reit
mit küniclîcher rîcheit,
als ez gezimet küneges siten.
sîne vürsten mit im riten
in grôzer wirde. dô sach er
ûf der strâze gên dort her
zwêne kumberhafte man,
die truogen ärmeclîchen an
dêmüeteclîchiu krankiu kleit,
niht von hôher rîcheit.
die wâren mager und harte bleich.
des küneges muot von hoehe weich
in senfte dêmüete.
durch sîne grôzen güete
viel er nâch dem gruoze
den beiden dâ ze vuoze.
munt, hende unde vüeze
kust in der herre süeze
durch sîner tugende edelkeit.
er sach wol, daz ir arbeit
was sô grôz durch gotes gebot.
daz was al der sînen spot:
sie sprâchen alle: « ez missezimt,
daz unser herre alsus benimt
der krône sô grôz êre:
daz swachet in vil sêre! »
von in wart solher rede genuoc.
ir ieglîcher nâhe truoc
die selben rede vil tougen.
under des küneges ougen
getorsten sie im die geschiht
verwîzen offenlîche niht.
nû hâter einen bruoder dâ,
den bâten die lantherren sâ
den künic refsen, daz er ie
diz dêmüetlîche dinc begie,
daz im gienge an sîn êre.
des rafst in dô vil sêre
der bruoder, wan der vürsten haz
was gên im vil grôz durch daz
im diu sache was geschehen:
man müeste in zornic hân gesehen,
möht ez mit vuoge sîn getân.
durch unvuoge muoste erz lân.
doch dâht er: ich lône dir,
hâstû vergâhet dich an mir.
nû hâter eine gewonheit:
ob im iemen tet ein leit,
dâ von er solte sîn verlorn,
dem hiez er ein herhorn
des nahtes blâsen vor der tür.
daz er den lîp durch reht verlür,
daz wart gekündet im hie mite.
daz was des selben küneges site.
nû hiez er sînem bruoder dô
künden sînen zorn alsô,
daz er den lîp und daz leben
des andern morgens solte geben
durch jene grôze schulde breit.
dô wuohs dem bruoder herzeleit.
er bereite sich darzuo,
als er des andern morgens vruo
solde hân verlorn den lîp.
kint bereiter unde wîp.
des nahtes gap er in sîn guot,
als man noch gên dem tôde tuot,
sô daz ende nâhen sol.
er was des nahtes leides vol.
vruo an dem andern morgen
kom er mit grôzen sorgen,
mit kinden und mit wîbe.
diu truogen an ir lîbe
mit grôzen riuwen armiu kleit
durch ir trûreclîchez leit
gên des herren ende.
sie wunden sêre ir hende,
vil riuweclîche ir klage was.
vor des küniges palas
wart an deme selben tage
durch den herren grôz diu klage
mit jaemerlîchen dingen.
dô hiez der künic bringen
sînen bruoder dar vür sich.
er sprach: « vil tumber man, sît dich
sô sêre erschrecket hât der tôt,
dô dîn bruoder dir enbôt,
dem dû nie getaete leit,
dir waer des tôdes zil bereit,
dô hâtestû dich schiere bewart
ûf des lîbes hinevart:
dû hâtest vorhtlîche klage.
nû hâst dû bî dir alle tage
gewissen boten umb den tôt.
dîn schepher dir nû lange enbôt
des tôdes zil, und weist des niht,
wenn sîn kraft an dir geschiht.
dar ûf hâstû dich niht bereit:
daz tuot dîn michel tumpheit.
dînen tumplîchen site
hân ich gerefset hie mite
und ouch dîn grôz verkêren,
daz dû mich saehe êren
die rehten boten mînes gotes
und sînes gewissen gebotes,
der vor mir den komenden tôt
mit ir gebaerden enbôt.
ir lîp vil guotes worhte
mit vlîze in gotes vorhte
gên des gewissen tôdes zît,
der allem lebene ende gît.
nû solt dû heim ledic varn
und zallen zîten dich bewarn,
daz dû küneges dêmuot
gerefsest iemer, si ist guot.
vil wol ich ouch gerefsen kan,
die dich gewîset hânt her an. »
der bruoder schiet dô sâ zestunt
wider heim von im gesunt.
dô hiez der künic schiere
machen schrîne viere
durch sînen wîslîchen muot.
zwêne hiez er machen guot
von golde und von gesteine
mit edelem werke reine.
er hiez ûf ietwedern schrîn
vil grôze spangen güldîn
und slôz von golde rîche
würken meisterlîche.
dô diu vaz mit rîcheit
wâren, als er hiez, bereit,
wol bedaht und wol beslagen,
dô hiez er in die schrîne tragen
tôten gebeine,
ervûlet unde unreine.
den was daz âs mit swacher kraft
an daz gebeine behaft,
daz als unreines smackes phlac,
daz den ängestlîchen smac
verdulten niemen mohte,
von siecheit, als ez tohte.
der ander ietweder schrîn
was niht wan einvalt hülzîn,
die man gezierde gar erliez.
mit klebe er sie bestrîchen hiez,
man lie sie gar unwaehe swarz,
er hiez dran legen niht wan harz.
in die selben schrîne dâ
hiez er tragen arômatâ,
mirren, balsem, alôê.
man truoc ouch drin gesteines mê,
von golde groezer rîcheit,
dann ich von jenen hân geseit.
er hiez umb ietwedern schrîn
ein krankez seil haerîn
binden, daz vil ringe was.
dô truoc man ûf den palas
die schrîne zuo einander dar.
dô sante er nâch den vürsten gar.
er sprach: « schouwent mîniu vaz,
welhez gevellet iu hie baz? »
dô jâhens algelîche,
diu vaz waeren sô rîche,
daz man des rîches krône
behielte drinne schône.
( der ander zweier niemen gert,
wan die sint kleiner dinge wert.)
der künic sprach: « diz weste ich wol.
ich weiz iuch solhes willen vol,
daz iuwer grôziu tumpheit
mir anders haete niht geseit.
nû wil ich iuch lâzen sehen,
wie ir diu dinc künnent spehen:
daz seht an disen schrînen! »
dô hiez er von den sînen
die guoten schrîne ûf sliezen,
die solhen smac ûz liezen,
daz von sîner unreine
den liuten algemeine
vil nâch entwichen was ir maht.
sus was der valsche hort bedaht
und diu vil grôze unreine
mit golde und mit gesteine.
dô man die andern schrîne ûf slôz,
dô wart der süeze smac sô grôz,
daz der unreine wâz verswein
in den rîchen schrînen zwein.
der edelen wurze wâze
wuohs in sô süezer mâze,
daz ir lîbes kraft als ê
ze vreuden kam. sô rehte wê
in worden was, sô wol wart in.
« ir herren, iu hât iuwer sin
und iuwer witze gar gelogen.
iuch hât iuwer sin betrogen, »
sprach der künic sâ zestunt.
« iu sint diu dinc niht vürbaz kunt,
wan als iuwer ouge siht
und iu des mannes habe giht.
ir künnent an die lîbe sehen,
des herzen sin unrehte spehen.
ich wil iuch hie bescheiden
von disen dingen beiden.
der guoten schrîne unreiner smac
bezeichent den, des herze ie phlac
und iemer phliget valscheit.
swie der trage rîchiu kleit,
dâ man sie ûzen siht wol,
sô ist doch sîn herze vol
grôzer valscheit drunder.
diz merket al besunder,
arme und dar zuo rîche!
ich wil bezeichenlîche
daz ander sagen ze tiute:
die demüeten liute,
die boesiu kleider tragent an,
der herze niht wan guotez kan,
der sin, der tugenthafter muot
daz beste zallen zîten tuot,
und die mit rehter güete
belîbent dêmüete,
den gelîchet sich der smac,
der in den kranken schrînen lac.
hie bî sult ir sîn gemant,
daz ir des mannes gewant
niht schouwent noch sîn armuot,
sî daz herze innen guot.
ez ist niht guot, swer den man
niht erkennen wil noch kan,
wan als in wîset diu gesiht.
daz zimet rehten liuten niht.
dô ich die guoten liute ersach,
mîn herze in ganzer triuwen jach
baz danne dem, der rîchiu kleit
schône ob valschem herzen treit. »
die sîne er alsus lêrte,
ze dêmuot er sie kêrte.
dem herren guot gelîche ich dich.
daz dû sô wol enphienge mich
ûf guoter gedinge wân,
daz müeze dir ze heile ergân.>
< dû hâst wol nâch bescheidenheit
diz guote bîspel mir geseit;
daz wil gerne nâhe tragen>
sprach jôsaphât.< nû solt dû sagen,
wie dîn herre sî genant,
der dich hât alher gesant,
der dich die rede lêrte
und die ebenmâze kêrte
der worte an des sâmen sin,
als ich von dir gewîset bin.>
der wîse barlââm dô sprach:
< den herren, an den ich ie jach,
wildû den erkennen,
sô wil ich dir in nennen.
und wîsen sînes namen sus:
mîn herre jêsus kristus,
daz einborne gotes kint,
nâch des namen genennet sint
ich und alle kristen,
der hôhe ob allen listen
aller wîsheit urhap treit
mit endelôser wîsheit,
in drin namen eine,
heilic, eine, reine,
gewaltic eine lebende,
ân ende leben gebende.
aller künege ein keiser grôz,
âne gelîchen genôz,
aller herren ein gewalt,
den eine in einer drîvalt
diu menscheit anbeten sol;
bî güete ist er gnâden vol.
ich bin niht der einer
vermeinsam unde unreiner,
die dise gote betent an,
der dekeiner sprechen kan.
die golt unde silber sint.
steine, kupher; sie sint blint:
die hoerent noch gesehent niht.
die sint toub an ir gesiht.
âne sêle, sunder sin.
gotes knehte ich einer bin:
ich sol niht gelouben
den trügehaften touben.
einen got vil lobesamen
geloube ich, einen in drin namen,
den vater eine, eine daz kint,
den heilegen geist. die drîe sint
ein got, eine ân endes tac,
der âne anegenge ie phlac
alles, des dû maht gesehen,
und des ouch niemen kan verjehen:
unsihtic, unverkêret,
guot, reht, eine, gêret;
sîn kraft unzalhaft unvürbrâht,
sîn hôhiu witze unüberdâht;
der alliu dinc von nihte
geschuof und gar berihte.
zem êrsten geschuof sîn meisterschaft
himel und aller himele kraft
und ungeborner engel geist
ze sînes amptes volleist.
dar nâch geschuof diu witze sîn
sternen, mânen, sunnenschîn
ze einem liehte werde
dem himel. er schuof die erde
in mislîcher underscheit,
die si mit maneger varwe treit;
dâ bî mer und wazzers trân.
dô trouc ein tumplîcher wân
den liehten engel lucifer
sô grôzer hôhvart, daz er
im wolte sich gelîchen.
dô muoste er im entwîchen
von der unrehten sünde
in daz endelôse abgründe,
und alle, die im truogen gunst.
dô geschuof diu gotes kunst
niht wan mit des wortes kraft
gar dirre welte geschaft.
er sprach daz wort, dô was bereit
aller geschephede underscheit.
dar nâch geschuof er adâmes lîp
von der erde, und im ein wîp
von sînem rippe, daz sîn hant
von im nam, diu was genant
unser aller muoter evâ.
den beiden gap sîn witze sâ
rehte wîsheit unde sin.
vernunstic leben gap er in
und machte sie von künste wîs.
in des wunsches paradîs,
gebôt er, daz sie waeren,
und hiez, daz sie verbaeren
niht wan daz obez der wîsheit
( daz ander waere in unverseit),
und iemer leben solden
mit willen, swie sie wolden.
diz began der engel nîden.
er kunde niht erlîden,
daz in sîn vreude was erkorn,
die er muoste hân verlorn,
dô er von himele wart gesant,
unde ein tiuvel wart genant.
der selbe tiuvel lucifer,
vil hôher sünden ein gewer,
von vreuden disiu beidiu schiet.
dô er dem wîbe geriet,
daz si daz obez aeze
und ir schephers gar vergaeze.
des slangen und des wîbes rât
vuogten dô mit missetât,
daz dirre beider schulde
verworhte in gotes hulde.
des himelrîches wünne
verworhten sie ir künne.
ir schulde vuogte in solhe nôt,
daz sie vervielen in den tôt.
owê, daz ez ie geschach!
owê leider, owê, ach!
daz uns sô jaemerlîchez leben
ir grôziu schulde hât gegeben!
dô ir sünde sie verstiez,
als in der gotes zorn gehiez,
sie gewunnen kinde genuoc.
ir einer sun den andern sluoc.
die dâ lebeten an ir zil,
die gewunnen kinde vil.
die liute dô begunden
wahsen an den stunden.
mit schulden süntlîcher sin
begunde wahsen ouch an in.
des dulte gotes zorn niht mê.
ein guoter man hiez nôê,
der tet vür al daz künne sîn
rehtiu werc mit staete schîn.
durch der liute sünde
verdarp in wazzers ünde,
swaz in der welte lebende was.
in einer arke dô genas
nôê und sîner süne drî,
den ir wîp genâsen bî.
aller lebenden dinge kint,
swie sie uns genennet sint
beliben in der arke sâ
gezweiet unde genâsen dâ.
dô wart aber liute mê,
dan in den vordern zîten ê
gewuohsen. ir wart schiere vil.
dô began des tiuvels spil
verkêren aber der liute sin
und ougen sîne kraft an in.
sîn lêre ir sinne gar besaz
und vuogte mit den liuten, daz
sie gotes gar vergâzen
und sie begunden lâzen
die gotlîchen lêre.
nâch sînes râtes kêre
ir sin began in zwîvel sîn:
sie betten an des mânen schîn
und gên dem sunnenglaste.
sie êrten alze vaste
vür den rehten schephaere
die geschaft. sie sündaere
erkurn manigerhande got
und jâhen durch des tiuvels spot,
daz alliu dinc von eigenschaft
trüegen lebelîche kraft,
als rehter schephaere
nie wurde und niht waere.
ouch was daz genuoger wân.
sie solden von gelücke hân,
swaz in guotes ie geschach.
swaz ieglîcher gerne sach,
was er im holt, ez was sîn got.
durch der liebe gebot
macht er im sâ ein bilde.
ez waere zam oder wilde,
tier, vogel, menschenlîp,
ez waere man oder wîp,
steine, wurze, böume, gras,
swaz dem menschen liep was.
daz wart im sâ ze gote erkant,
swie sîn name was genant.
disiu grôze tobeheit
wart in den landen alsô breit,
daz niemen got erkande
noch zeinem gote nande.
der rehten werke liehter schîn
muoste gar verdorben sîn.
der site wuohs sô sêre
nâch des tiuvels lêre,
daz mit des ungelouben naht
reht geloube wart bedaht.
nû wuohs bî der zît ein man,
des sin erkennen began,
daz disiu welt und ir geschaft
niht von eigenlîcher kraft
alsô belîben mohte,
daz ez mit kraft iht tohte.
in sînen muot er dicke las,
daz niht in dirre welte was,
wan daz geschephede was genant
von eines schephaeres hant.
von herzen und von sinnen
begunde er sêre minnen
den, der rehter schephaere
gar dirre welte waere.
den suohter, biz daz er in vant.
abraham was er genant,
des vleischlich ouge sich lie sehen
und bezeichenlîche spehen
drîvalten mit der gesiht,
den sîn lop und sîn vergiht
dâ zeinem gote nanden,
swie sie in drîvalt erkanden,
der got, des gotlîcher rât
elliu dinc geschaffen hât.
abraham, der reine man,
in sînen sinnen dô began
got minnen alsô sêre,
daz er im durch sîn êre
sîn kint und sînes kindes leben
wolte ze opher hân gegeben.
unser herre im dô gehiez,
daz er im als des meres griez
wolde mêren sunder zal
sîn geslähte überal,
und manegen nâchkomenden mâc,
sîn sun, der guote îsââc,
einen reinen sun gewan,
jâcoben, den guoten man.
die drîe patrîarchen sint
über aller menschen kint
hüetaere gewalteclîche
ze dem himelrîche,
die got dar zuo hât erkorn,
daz sie im ze kinden sint geborn.
jâcob zwelf süne dô gebar,
von den daz geslähte gar
kam der israhêlschen diet.
der andern süne nît verriet
ir einen, was joseph genant.
daz in egyptum daz lant
verkouften sîne bruoder in.
dô vuogte im got den gewin,
daz er dâ vil gewaltes phlac.
sider über manegen tac
vuoren sîne bruoder gar
zuozim ûf genâde dar.
von der zwelf gebruoder art
israhêl daz künne wart.
die begunden in egyptô
vil krefteclîche wahsen sô,
daz sie vulten dâ daz lant.
dô wart ze vogete in gesant
moyses der vil guote,
der ir mit witzen huote.
von ir geslähte er was geborn.
nû wart überz lant erkorn
ein künec, der hiez phârâô,
der began sie drucken dô.
sie wuohsen sunder sînen danc:
swie grôzer arbeit er sie twanc,
ir wart doch mê unde ie mê.
daz tet deme lande wê.
durch der israhêlschen schar
sante got mit zorne dar
zehen arbeitlîchiu leit
mit kumberlîcher arbeit;
dâ von wuohs des landes nôt.
dô tet, als ime got gebôt,
moyses, der reine man:
er vuorte von dem lande dan
daz guote israhêlsche her.
dô tet sich ûf daz rôte - mer
in wuohs ein trucken strâze
gelîch in solher mâze,
rehte als ez waere ein mûre.
des wazzers natûre
vergaz der vliezenden kraft.
unde wart der geselleschaft
ein mûre an beiden sîten.
dô wolte nâch in rîten
mit den sînen phârâô;
die verdurben alle dô
in dem rôten - wilden - mer.
dô huop daz israhêlsche her
ze gote lobelîchen dôn.
moyses unde aârôn
vuorten sie dô, daz ist wâr,
in der wüeste vierzic jâr.
got huot ir vor aller nôt.
er regent in daz himelbrôt:
sîn grôz gewalt sie nerte.
in gap des steines herte
die liehtsüezen brunnen kalt.
sîn helfe was in manicvalt,
diu was in ie mit staete bî.
er gab in monte - sînâî
moysî der ê gebot,
doch machten sie diu apgot
unde sprâchen den ir gebet,
swaz in got ie gnâden tet.
daz vergap er in sît gar.
die ê gelernte diu schar,
als moyses sî las.
sît dô er verdorben was
unde ouch aârôn erstarp,
got den sînen schiere erwarp
einen lêrer, als er wolte
der sie vüeren solte
hin in daz honicmaeze lant,
daz in von gote was benant:
er hâte ez in geheizen ê.
daz was der guote jôsûê,
der sie dar volle brâhte.
swer leides in gedâhte,
dem wart von im sîn tôt erkant.
og ein künic was genant,
ein rîcher heiden von basân,
und al diu rîche in kanâân,
oreb, zeb, zebeê, salmanâ,
dise künege muosten sâ
lîden von der schar den tôt.
sie überwunden alle nôt
mit der gotlîchen kraft.
dô sazte sich diu heidenschaft
mit grôzen kreften wider sie,
daz sie vil wênic doch vervie.
in wurden undertân diu lant.
sie betwungen mit ir hant
vil heidenischer rîche.
sie wuohsen krefteclîche:
swer under in got êrte,
sîne kraft er mêrte.
jeptê unde gêdêôn,
mânûê und samsôn
und einer, was genant samgar,
die wâren rihter dirre schar.
got was in mit helfe bî.
ein êwarte hiez helî,
dem sîner kinde schulde
verworhten gotes hulde.
nû wuohs aldâ in israhêl
ein wîsage, hiez sâmûêl,
der ir mit witzen manegen tac
an gotlîcher lêre phlac,
biz daz sie durch ir tumben sin
hieschen einen künec an in.
den gab er in sâ zehant:
saul der selbe was genant.
niht wol er gotes gebot behielt,
unz er in von der krône schielt
und über in ze künege nam,
dem diu krône baz gezam:
daz was der guote dâvît,
der sît mit saelden lange zît
ein künec und ein prophête was.
sîn wîsiu kunst in künftic las,
des menscheit uns lôste sît;
den seiter künftic bî der zît
mit sînen worten überlût.
dâvît, der reine gotes trût,
al sîne vînde überwant.
sîn sun was salomôn genant,
der nâch im truoc die krône.
got zeiget an salomône
die groesten wîsheit, die ie man
sît adâmes zît gewan.
der prophezierte sîne kunft,
der des todes sigenunft
sît ertôte und den tôt
der iemer endelôser nôt.
rôbôâm und âbyâ,
jôatham und âsâ
achas und ezechîas,
jôram unde jôsîas
phlâgen ouch der selben schar,
biz von der liute sünde gar
got über sie die nôt verlie,
daz sie der babilôn gevie,
dâ sie mit noeten wâren
in den sibenzic jâren.
dô gar ir nôt verendet was,
dô phlac ir jechonîas,
dar nâch sîn sun salathîêl,
nâch dem des sun zorobabêl
der jerûsalêm bûte wider,
daz ê was gebrochen nider:
daz tet nâbuchodônosor,
dô er sie gevie dâ vor.
diz was der starke babilôn.
daz gotes hûs, daz salomôn
dâ vor machte, daz brach er.
daz wider machte allez der,
den ich hân hie vor genant.
mit gewalteclîcher hant
phlâgen dirre schar nâch im
abîût unde elîachim
und manic ander grôzer man,
den ich niht nennen wil noch kan.
noch wil ich dir der nennen mê,
die dô in der alten ê
daz guote israhêlsche her
beschirmden mit ir hôher wer.
ein gotes degen, der hiez alsus
jûdas machabêus,
und des vater matathîas,
von dem er geborn was,
und ander vier bruoder sîn:
den wart von gote helfe schîn,
biz daz ir werlîchiu hant
die gotes vînde überwant.
wer die waeren, des wil ich
mit kurzen worten wîsen dich.
der künic nâbuchodônosor,
den truoc sîn muot ze hôhe enbor:
der gedâhte in sîner kraft,
wie er im eine hêrschaft
gemachte in babilônîâ,
dâ bî man sîner krefte dâ
vür gotes namen gedaehte.
wie er daz volbraehte,
dâ kêrter sîne wîsheit an.
dô wart der übermüete man
von gotes gebote schiere
verwandelt zeinem tiere.
siben mânôde er daz was.
in rou sîn sünde: dô genas
er wider in die menscheit,
sîn gedanc was hin geleit.
dô jach er gewaltes gote
und sînem hôhen gebote.
den überwant diu gotes kraft
alsus und sîne hêrschaft.
ein sîn genanne hiez alsam,
dem was erkorn der selbe nam.
nâbuchodônosor er hiez,
den ouch sîn hôhvart niht erliez,
er wolde wesen und heizen got
durch des tiuvels gebot,
dem ouch sîn grôziu hôhvart
geswendet und genidert wart.
des gewalt was wîte erkant:
im was assyrîâ daz lant
undertân und nînivê.
noch nenne ich gotes vînde mê
mit kuntlîchen worten hie,
an den ouch gotes kraft ergie.
olofernes was genant
ein vürste, der mit sîner hant
betwanc vil künicrîche,
daz die liute algelîche
gotes namen varn liezen
und disen got alle hiezen,
von dem ich ê hân geseit.
sîn kraft und al sîn rîcheit
touc im niht noch al sîn her:
in sluog ân alle mannes wer
jûdît, ein vil krankez wîp,
diu nam im leben unde lîp
mit gotes helfe, als achior
im hâte ê geseit dâ vor:
daz niemen möhte wider got
gesîn noch wider sîn gebot.
sus was ouch antjochus,
sêron und apollonius,
demetrius und gorgias:
ietweder gotes vîent was
und ander vürsten genuoc,
die jûdas machabêus sluoc.
dô der urliugen began,
dô hâter niht wan tûsent man,
mit den er sîn ê werte.
diu gotes gnâde in nerte,
daz er und sîner bruoder kraft
die vervluochten heidenschaft
von gotes helfe überstriten
und âne wer gar überriten.
swer gotes helfe ie verkôs,
der muoste werden sigelôs;
swer aber in mit staetekeit
ie suochte, dem was er bereit,
daz in sîn güete werte,
swes er mit rehte gerte.
ir deheiner nie genas,
swaz der gotes vînde was
unde ein stoerer sîner ê:
der was vil und dannoch mê,
danne ich dir an dirre stunt
welle machen von in kunt.
in allen disen selben tagen
wâren die gotes wîssagen.
die wil ich dir nennen.
dû solt ir wort erkennen,
wan sie got in ir herzen grunt
gap und sprach sie durch ir munt.
îsajas unde ezechîêl,
jerêmjas unde danîêl,
amos unde aggêus,
elîas und elysêus,
oseê, nathan und jônas,
abakuc und esdras,
und einer, heizet michêas,
nâûm und sophonjas,
jôêl unde abýas,
zacharjas und malachýas.
ouch sprach ûz tiefer sinne vurt
ein man von kristes geburt,
der was bâlââm genant:
« von jâcobe wirt erkant
ein sterne, der hât liehtez prehen.
von jerûsalêm wirt gesehen
ein mensche, daz dâ sol ûf stân.
daz sol gewalt ân ende hân. »
wie sich daz verendet hât
mit gewârhafter getât,
des wirt dir diu wârheit
her nâch wol von mir geseit.
swaz alle dise wîssagen
ie gesprâchen bî ir tagen.
daz hât unser herre got
ervüllet unde sîn gebot.
des sage ich dir ein teil alhie,
daz merke wol. nû hoere wie.
wan der tôt der menscheit
was von dem menschen bereit,
dô muoste uns aber wider geben
diu gotes menscheit daz leben.
wan der vleischlîch gelust
mit broedeclîcher âkust
uns armen brâhte den tôt,
dô muoste uns loesen von der nôt
diu süeze gotes menscheit.
sît dem menschen was verseit
daz leben durch sîne missetât,
dô sante uns der gotes rât
ze helfe und ouch ze trôste
ein mensche, daz uns lôste.
daz was sîn reinez wort vil grôz,
daz ie was in des vater schôz,
im ebenglîch gewaltic,
mit dem er ist drîvaltic.
daz wort er uns ze trôste gap:
daz was ie sunder urhap
mit im in der gotheit,
der komendez ende ist gar verseit.
diz wort von himele wart gesant
durch uns in irdischiu lant.
durch adâmes geschiht
nam got an sich, des er was niht,
unde bleip vil staete doch,
daz er ie was unde ist noch
und iemer sol sîn: staete wil
belîben got ân endes zil.
dô wart der gnâden zît
erhaben, des gewisheit gît
diu kunst der reinen wîssagen.
ez was ervüllet in den tagen
ein reinez dâvîdes wort,
daz er hât gesprochen dort:
« ez stuont ze der zeswen dîn
ein umbevangen künigîn
mit waehelîcher rîcheit
von golde, unde wol bekleit. »
von der schrîbet vürbaz
dâvît und sprichet aber daz:
« tohter, neige dîn ôre dar!
sich dar an und nim des war,
daz dîn der künic hât gegert:
bî dem soltû belîben wert.
dîn antlütze anbeten sol
diu rîche diet, daz zimt dir wol. »
der dâvît der wirde jach,
daz was ein maget, von der sît sprach
der wîse künic salomôn.
sî kroenet sînes mundes dôn
mit wîslîchem sinne.
er sprach: « mîn vriundinne
muoz vür ander tohter sîn,
alsam der schoenen liljen schîn
minneclîche schoene hât,
dâ si in den dornen stât. »
ezechîêl, der sach ein tor
ôstert stân, daz wart dâ vor
noch nie sider ûf getân.
dâ sach er in und her ûz gân
den keiser, der mit werdekheit
aller keiser krône treit.
diz bîspel muoste ervüllet sîn
an dirre selben künigîn.
von dirre küneclîchen maget
hât îsaîas sus gesaget
wîslîche in der alten ê:
« diu reine wurze von jessê
eine ruote noch gebirt,
ûf der ein süezer bluome wirt,
dar ûffe der heilige geist
in sibenvalter volleist
mit siben tugenden ruowen sol,
der sîn name sîn lêre ist vol:
der geist der wîsheit der vernunst,
der güete der sterke und der kunst,
des râtes und der vorhte,
diu got mit künste worhte. »
wer disiu maget waere,
des hoere gewaeriu maere:
si was marîâ genant,
sô reine und alsô kiusche erkant,
daz älliu disiu erde nie
sô reinen lîp von wîbe enphie.
des heiligen geistes rât
an ir süezem lîbe hât
ervüllet dise siben tugent:
si hâte ir lîp, ir reine jugent,
ir muot, ir kiusche, ir sin, ir leben
an got mit staeter kiusche ergeben.
si bezeichent ouch die ruote,
diu aârône bluote,
diu was dürre und brâhte ir vruht.
dirre megede reiniu zuht,
sô saeldenrîch, sô lobelich
gelîchet jener stûden sich,
die moyses der guote man
sach, daz si sô sêre bran
und doch beleip gar unverschart.
diz bezeichent, daz bewart
vor aller missewende was
aller megde ein spiegelglas
marîâ, diu reine maget,
von der dir ist und wirt gesaget.
ir wart ein himelischer bote
gesant, der sagte ir von gote,
daz si solde gebern:
ir wolde dâ ze muoter gern
got, der ir schephaere
und al der welte waere.
dô riet ir magtuomlîcher name,
daz sêre erschrac ir reiniu schame.
diz was der engel gabrîêl.
er saget ir, daz emanûêl
( daz « got mit uns » waere genant)
ir ze kinde wurde erkant.
der reine bote gewârhaft
saget ir, daz des hoehsten kraft
sî beschatwen wolde,
und daz si gebern solde
von des heilegen geistes kunft,
der durch ir kiusche sigenunft
in ir herze wolde komen.
als ir diu botschaft was vernomen,
si sprach mit zühteclîcher gir:
« nû werde gotes wille an mir! »
des wart si gewert aldâ:
kindes wart si swanger sâ.
dâ bewârte sich ein wort,
daz îsaîas sprichet dort:
« ein maget wirt swanger. diu gebirt
einen sun, der geheizen wirt
emanûêl: mit uns got. »
mit saelden gar daz gotes gebot
an ir tugende ervüllet was.
ouch sprichet jêremîas:
« got wil mit niuwen sachen
ûf der erde machen
ein dinc, daz niuwe heizet wol:
ein maget umbevâhen sol
einen man, des name ist grôz,
vil nâhen in ir lîbes schôz.
der wirt dar nâch vil werde
gesehen ûf der erde
mensche in menschlîcher tât,
den man vür alle gote hât. »
diz wart an ir bewaeret hie:
mit armen si den umbevie,
der al der welte schepher ist:
diz was der heilige krist.
si truoc in menschlîche gar.
dar nâch diu reine maget gebar
got, ir schepher unde ir kint,
des aller himele tugende sint.
bâlââmes sternen schîn
erschein an der gebürte sîn,
daz mensch wart in jerûsalêm,
der herzoge kam von betlehêm,
der von der sünde arbeiten
sîn liut solte leiten,
als michêas im gehiez.
diu gotes kraft sich schouwen liez
abakuc, dem wîssagen,
der ê sprach vor manigen tagen:
« herre, die gehoerde dîn
hôrt ich. mîner ougen schîn
mir vil grôzer vorhte jach,
dô ich dîne kraft ersach,
diu zwischen zwein vihen lac;
von der geschiht mîn herze erschrac. »
daz bewârte alhie diz kint:
vür den esel und vür daz rint
bezeichenlîche wart geleit
diu gotlîche menscheit,
von der got durch dâvîdes munt
die geburt sus machte kunt
mit worten, diu der menscheit
sint von der gotheit geseit.
der herre sprach: « dû bist mîn kint!
in der schônheit, die heilic sint,
hân ich ze kinde dich geborn.
dû waere ze kinde mir erkorn,
ê lucifer und elliu geschaft
gewunnen ie deheine kraft. »
diu geburt bewaeret dâ
einen spruch in îsaîâ:
« uns ist ein kleinez kint geborn,
ein sun gegeben, dem ist erkorn
ein name unde ist im erkant:
der wunderlîche ist er genant,
der râtgebe, der starke got,
des vrides vürste. sîn gebot,
sîn rîche ân ende, sîn gewalt
ûf sîner ahsel ist gezalt.
ein vater künftiger welt
vür sîn erweltez gezelt
alsam ein briutegome er gât. »
diz wort sich verendet hât
an kristes gebürte zît.
diz sprach der wîse dâvît.
danîêl hât ouch geseit
von der geburt mit wârheit,
als ich dir sage und er uns giht.
er sprach: « in der naht gesiht
began ich warten. ich vernam
des menschen kint. dô kam,
dem ist gegeben daz rîche.
im suln gewalteclîche
alle zungen sîn bereit
dienstlîcher staetekeit
und allez künne ie mêre
durch sînes gewaltes êre. »
diz ist an kriste vollevarn:
jêsum, der reinen megede barn,
der naht diu reine maget gebar.
des gît uns urkünde gar
diu schrift, der wîssagen wort.
ez stêt dâ von geschriben dort,
als ein prophête hât enbart:
« dô diu naht ir halbe vart
hât in ir loufe hin getriben
und elliu dinc stille bliben
in ir halben ruowe enmiten,
dô kam mit zeichenlîchen siten
von keiserlîcher stüele kraft
dîn hoehste wort. » vil wârhaft
wart disiu prophezîe hie,
dô got die menscheit enphie.
nâch der geburt, als ich dir sage,
wart er über siben tage
in der alten ê besniten.
im wart nâch den alten siten
sîn name rehte vunden sus,
man hiez in jêsus kristus.
von tharsîs, von arâbîâ
brâhten drîe künege sâ
golt, mirren, wîrouch.
die bezeichenten ouch
sînen gewalt mit golde;
mit wîrouch, daz er solde
ein êwart sîn der wârheit;
mit mirren, daz er würde geleit
uns ze trôste in ein grap.
diz zeichen ein urkünde gap
einem worte, daz dâvît
hievon sprach vor maniger zît:
« von arâbîe und und von tharsîs,
von sabâ die künege wîs
bringent im ir gâbe hin.
ze gote anbetent sie in. »
diz wart des tages vollebrâht,
als es dâ vor was gedâht.
dar nâch man in zem tempel truoc,
als malachîas ê gewuoc.
got sprach ûz dem munde sîn:
« ich sende dir den engel mîn,
der machet dînen wec vor dir.
zehant sô kumet iu, den ir
gerne suochet unde welt,
der iu ze herscher ist gezelt
und ein engel der urkünde,
in sîn tempel. » âne sünde
wart dort in dem templô
diz süeze wort ervüllet dô.
dar nâch er den touf enphie,
dâ mite er ein vorbilde lie
allen, die im gloubic sint.
über krist, daz gotes kint,
erschal ein stimme, diu sprach sus:
« hic est filius meus!
mîn sun, an dem ich mir wol
behagete, den man hoeren sol. »
dô tet er nâch des toufes zil
grôzer zeichen harte vil:
er hiez die tôten ûf stân,
die armen krumben rehte gân,
stummen sprechen, blinden sehen,
swem er sach miselsühte jehen,
der wart sâ von im gesunt.
er tet mit sîner lêre kunt
der êwigen gnâden wec.
âne süntlîchen vlec
was er âne sünde hie,
sô daz er sünde nie begie.
die kristenheit er lêrte:
sîn lêre an sich bekêrte
vil liute, den der touf gezam.
zwelf junger er dô nam,
die sîn wort, sîn lêre
sît vestenten vil sêre.
alsus was er, daz ist wâr,
drîzic unde vierdehalp jâr
ein mensche gesant von gote
und gotlîcher werke bote,
und ervulte der gnâden tage
nâch der wîssagen sage.
nû wuohs der juden grôzer nît
gên kristes lêre zaller zît:
sie leiten im lâge vil.
dô muoster beiten ûf daz zil,
daz im diu gotheit gebôt,
ê daz er naeme an sich den tôt.
dô er sîn menschlîchez leben
umbe uns armen wolte geben,
gên jerûsalêm er reit
mit dêmüetlîcher armekeit
ein vil krankez esellîn.
sus zeiget uns diu lêre sîn,
daz wir nâch sîner güete
nâch im sîn dêmüete.
ein wort ervulte er aldâ,
daz stêt in zacharîâ.
ez sprichet sînes mundes dôn:
« louf ûz, tohter von sîôn!
dir kumt mit dêmüetlîchen siten
jêsus, dîn êwarte geriten
ein vil swachez esellîn.
louf ûz! enphâch den künic dîn!
durch sîne dêmuot er antreit
versmaehet ärmeclîchez kleit. »
durch sîne grôzen süeze
twuog er der junger vüeze
und lêrte uns, daz wir taeten sô.
durch sîne güete liez er dô
slâfen ûf den brüsten sîn
ein sîn trût und tet im schîn
der himel tugende, die er sach,
als uns mit schriften sît verjach
er selbe, dem ez wart erkant.
der was jôhannes genant,
des gewaere urkünde uns seit
die gotlîchen wârheit.
dô sîn stunde komen was,
ein sîn junger, jûdas,
durch drîzec phenninge in verriet.
daz schuof diu verworhte diet,
wan sie niht wizzen wolten
die wârheit, als sie solten.
die sint noch tumber danne kint
und mit gesehenden ougen blint.
an in bewaeret sich ein wort,
daz jêremîas sprichet dort:
« herre, blende ir herze sin,
daz sie niht sehn, daz ich an in
mîne erbärmede iht begê
und daz ich sie iemer mê
an mich lâze wider komen. »
den vluoch ir leben hât genomen,
vil tumpheit sie mit witzen hânt,
daz sie niht rehte sich verstânt
der endehaften wârheit,
die in ir ê hât vür geleit.
sie wizzen der wârheit geschiht
und wellent ir doch wizzen niht.
waz sprich et ich nû von in hie?
dô sie ir valscheit niht erlie,
sie spraechen bââl ir gebet,
dô in got allerbeste tet:
und dort, dâ er in himelbrôt
regente vür des hungers nôt,
daz sie dô durch des tiuvels spot
betten an diu abgot:
sît siez dort niht mohten lân,
dô muostez hie alsam ergân.
von der juden vürsten sâ
wart jêsus gevangen dâ.
ir rihter brâhten sie in dô
pontîô pilâtô,
von dem er verteilet wart.
sîn reiner lîp was ungespart
vil maneger grôzer arbeit,
die er umb unser sünde leit.
er truoc durch uns vil hôhen pîn.
ein rûhe krône dürnîn
sach man in uns ze saelden tragen.
dar nâch er sêre wart geslagen.
mit geiseln sie in vilten,
vil spotlîchen sie spilten
mit im: kleine er spoten wac.
sie sluogen in ûf den nac,
ir ieglîcher in anspê.
noch tâten sie im spotes mê:
sie vielen vür in ûf diu knie;
ir gruoz in küneclîche enphie
spotlîche unde in spote gar.
des nam er zühteclîche war,
durch uns leit er diz ungemach.
er ervulte, daz dâvît dort sprach:
« ich bin ein wurm, ein mensche niht,
ein itwîz menschen gesiht,
der diet ein hinwerf: dêst geschehen.
alle, die mich hânt gesehen,
die hânt gar versmaehet mich.
ir munt redet; ez wegete sich
ir houbet gên mir durch ir spot. »
diz ervulte an in dâ got,
und aber ein wort der wîsheit,
daz salomôn der wîse seit:
« die übeln durch ir übeln sin
sprâchen alsus under in:
wir suln den rehten umbe gân
und nâch sînem roube lân
durch den gewin ein lôz.
sîn widersatz ist gên uns grôz:
er giht und hât des sînen roum,
er habe den gotes wîstuom.
den gotes sun er nennet sich. »
ir übel sin vil tumplich
die wîsheit hazzet unde ir wort.
sie hânt in iemer wernden hort
mit sêre ân ende geleit.
von dem gedanke ist in bereit
von ir schulden grôziu nôt,
wan sie den schantlîchen tôt
mit ir rede gehiezen
got, und des niht enliezen.
sie wurfen dâ ûf sîn gewant
ein lôz under in zehant
und teilten ez einander hie.
ein wort sich aber schouwen lie,
daz dâvît gesprochen hât:
« sie teilten in mîne wât
und liezen lôz ûf mîn gewant. »
daz wart mit wârheit dâ bekant.
dar nâch vuorten sie in sâ
gegen deme opher dâ.
ein opher wart er dô brâht
dem vater, als es was gedâht
und âne urhap geordent was.
hie von seit îsaîas:
« man vüeret in zem opher sîn
alsam ein krankez schaefelîn,
daz er niht ûf getuot den munt. »
er seit ouch von dirre stunt:
« zwâr, unsern siechtoum er treit,
unser sünde ist im bereit;
sîn angest machet uns gesunt. »
krist wart an der selben stunt
genagelet vil vaste
zuo des kriuzes aste.
hie von hât gotes wîsheit
durch dâvîdes munt geseit
uns von kristes ende:
« vüeze und dar zuo hende
hânt sie durchgraben, mîniu bein
mir gar gezelt. » diz wort hie schein
an kriste dem vil süezen
an henden unde an vüezen,
die wurden im durchstochen.
hie von hât ouch gesprochen
danîêl bî sînen tagen.
der gotes geist hiez in sagen:
« dar nâch wirt ertoetet krist.
swer lougende sîn danne ist,
der mac sîn liut geheizen niht. »
hie wart ervüllet diu geschiht,
wan man in dâ toeten sach.
jêremîas aber sprach:
« alle, die die wege gânt,
gedenkent, sehent und verstânt,
ob mînem kumber grôzen
iemen müge genôzen
gelîch leit mînem sêre. »
zacharias seit hie von mêre:
« sie sehnt, den sie durchstochen hânt.
ir grôzen klage sie niht lânt,
wan sie in sêre klagende sint
als ein einbornez kint. »
hie von hât ouch gesprochen dâ
ein vrouwe, hiez sibillâ:
« sie hânt gote alsus bereit
diz ungemählîche leit. »
dô wurden ertbibe grôz,
manic grap sich ûf slôz;
dar ûz erstuont an dem zil
heiliger lîbe vil,
den ê slief daz gebeine.
dô spielten sich die steine;
der tempel umbehange ganz
muosten dulten manigen schranz.
al disiu welt diu kom in nôt:
alsus nâhte kristes tôt.
sîn heilic sêle von im schiet,
diu brach die helle nâch der diet,
diu in sînem dienste dar
komen was: die lôste er gar,
wan niemen wîze überwart
dâ vor und der hellevart,
swie guot sîn gotes dienest was.
diz bewaeret îsaîas.
daz soltû vernemen wie:
« ein liut, daz in der vinster gie,
daz sach grôzen liehtes schîn.
die in dem lande muosten sîn
des tôtvinstern schaten gar,
die wurden liehtes gewar. »
daz lieht was der süeze krist,
als ez hie bewaeret ist,
daz sie mit vreuden lôste
von des tôdes untrôste.
in ein grap wart er geleit.
erstorben was diu menscheit,
diu menschlich ersterbet wart.
gar âne schaden, unverschart
beleip diu hôhe gotheit
sunder nôt und âne leit
und âne tôtlîche nôt.
diu menscheit diu leit den tôt
durch uns âne gedientez mein.
ein unmâzen grôzer stein
über daz grap wart geleit.
diu erstorbene menscheit
in dem grabe wart bedaht.
zwêne tage und zwô naht
lag er nâch des glouben sage
begraben. an dem dritten tage
erstuont er mensche unde got.
diz was der gotheit gebot,
diu ez durch dâvîdes munt
alsus machte dâ vor kunt:
« ich bin erstanden und bin noch bî dir,
du erkennest mîne urstende an mir. »
diz wort ist bewaeret hie.
manegiu zeichen dô begie
krist nâch der urstende sîn,
diu er tet sînen jungern schîn:
in manige wîs ougt er sich in
unde erlûhte ir herzen sin.
er zeigete in in den vierzic tagen
die schrift der reinen wîssagen:
die offent er in sêre
in bezeichenlîcher lêre
mit der êwangeljen sage.
an dem vierzigestem tage
wolt er von hinnen scheiden sâ
und wolte in monte - sînâ
ervüllen mit der ûfvart
daz von dâvîde gekündet wart.
er sprach in sînen schriften dâ:
« in dem heiligen sînâ
der herre in hoehe vuor zehant;
die gevancnüsse er gevangen bant
und gap den menschen gâbe dâ. »
diz wart von im ervüllet sâ.
nû hoere von im noch vürbaz:
zes vater zeswen dô gesaz
got, der heilige krist.
ze himele er drîvaltic ist
mit drin benemeden ein got.
sîn vil süezez gebot
hiez in dannen künftic sagen
ze rihter an dem suontagen
über aller menschen leben
uns allen lôn nâch werken geben.
dar nâch santer sînen geist
zuo des glouben volleist
allen den jungern sîn
in zungen, wâren viurîn,
dâ von ir vernunst enbran.
ir ieglîcher dô began
dar nâch künden gotes wort,
als erz enphangen hâte dort.
in wâren alle sprâche kunt.
der heilegen zwelfboten munt
starkte des gelouben kraft
den juden und der heidenschaft:
kaldein, armenjen, kriechen.
sie nerten alle siechen,
swaz in arger dinge war,
die wurden mit dem toufe gar
und mit der kristenheit gesunt:
wart in der geloube kunt
mit vesteclîchem muote.
sie hâte in sîner huote
krist, der sie êrste dar zuo vant,
daz sie in kunten in diu lant.
vernim, wie sie geheizen sîn,
und nim in daz herze dîn
ir lêre, ir wort und ir gebot,
diu durch ir munt lêrte got:
petrus unde andrêas,
jôhannes, jâcobus, thômas,
philippus, jâcobus, mathêus,
simôn bartholomêus,
tathêus und mathîas
daz ampt, daz ê jûdas
mit sünden hâte verlorn,
dar zuo wart sîn lêre erkorn.
die teilten sich wît in diu lant
und tâten kristes lêre erkant.
got erkôs im einen sît
nâch der ûfverte zît,
des lêre hât gedienet wol,
daz er ein bote heizen sol:
der was geheizen paulus.
von dem seit diu schrift alsus,
daz er ein durchaehter was
der kristenheit, swâ man sî las,
und sît ein erweltez vaz
von gote wart genant, durch daz
er mit sîner lêre was
der kristenheit ein spiegelglas;
wan swer in sîne lêre siht,
der tuot niemer arges niht.
got hât sîne kristenheit
ûf dise gruntveste geleit
der zwelfboten lêre,
diu ân ende ie mêre
veste und ungewichen stât.
ir lêre, ir lieht erliuhtet hât
die himelischen houbetstat
und uns gebant daz rehte phat
gên dem himelrîche.
sie lêrten kristenlîche
den touf in den namen drin
und des gelouben begin
behalten an daz ende
gar âne missewende.
kristes lêre und sîniu wort
und aller worte hoehster hort
daz sint diu êwangeljâ.
in den vindet man dâ
kristes wandelunge
geschriben und swaz sîn zunge
gelêrte ie nâch der menscheit.
diu hânt vier herren geseit:
jôhannes und mathêus,
lûcas unde ouch marcus.
swaz der lêre habe geseit,
dem volge und habe mit staetekeit
vreude und himelsche êre
mit vreuden iemer mêre.
diz ist daz kristenlîche leben,
daz got der welte hât gegeben.
des uns sîn gotlîcher rât
wirdic nû gemachet hât.
unser vîent leviâtân
mac noch sîn nîden niht verlân;
er kêret an uns grôzen strît,
wie er uns swende zaller zît
guotiu werc und reiniu wort:
wan im sîn wange hât durchbort
des himelischen kindes tôt
unde uns von der helle nôt
durch sîn wange ûzgezogen.
in hât diu menscheit betrogen:
der kerder im den angel bôt
( dô krist durch uns leit den tôt),
den er mit leider staetekeit
unverdout iemer treit,
als er in gebizzen hât.
swer dem mit staete widerstât,
der lebet ân ende iemer mê,
swie ez in dirre welte ergê.
diz ist mîn herre, der gesant
mich hât her zuo dir in diz lant.
wildû hân sîne lêre,
sô wil ich dir noch mêre
mit râte sîner lêre sagen
und dich des tiuvels râte entragen.>
dô barlââm mit wîsheit
die lêre hâte volleseit,
disiu maere und sînen rât
enphie der junge jôsaphât.
des himelischen liehtes schîn
erlûhte gar daz herze sîn:
er nam die lêre in den gedanc.
von grôzen vreuden er ûf spranc,
er hiels den reinen man an sich.
er sprach:< als ich versinne mich,
aller tugende bluomenschîn,
sô mac diz der stein wol sîn,
von deme dû mir hâst geseit,
der sô bezeichenlîche treit
die kraft, als dû hâst verjehen,
den nieman getar angesehen,
er sî vor allem wandel vrî.
nû sage mir, ob daz alsô sî.
wan als ich dîne rede vernam,
ein lieht in mîn herze kam,
daz gît mir alsô liehten schîn,
daz mînes leides hoehster pîn
mit vreude ein ende hât genomen.
mîn zwîvel ist an'z ende komen.
nû sage und triuc mich niht her abe,
ob ich ez rehte errâten habe
oder niht, sô sage vürbaz
von dînem steine etewaz,
und wizzestû bezzers iht,
des solt dû mich verswîgen niht.>
barlââm sprach dô sâ:
< vil süezer herre, jâ dû! jâ,
dû hâst die wârheit vunden.
vor uns zallen stunden
was ez den liuten ie verseit.
die nû daz zil der welte treit,
den ist erkant des steines hort
und diu bezeichenlîchen wort,
des offenunge wart geseit
und den liuten vür geleit
in manige wîs vor manigen tagen
von den reinen wîssagen,
die ez sô verre kunden spehen,
die wolden gerne hân gesehen
des heiles kunft. sie mohten niht
rehte ersehen die geschiht.
nû ist er komen in unser zît,
des lêre uns diz urkünde gît:
swer niht geloubet, der ist verlorn;
swer geloubet, der ist geborn
in daz gotes rîche
ze erbenne êweclîche.>
dô sprach der guote jôsaphât:
< dîne lêre und dînen rât
behalte ich gerne und dîn gebôt,
und wil unzwîvellîche an got
gelouben. nû soltû mir sagen,
wie ich sül in mînen tagen
im dienen nâch den hulden sîn,
und sage mir, lieber meister mîn,
waz der touf sül bediuten
an allen kristenliuten.>
< des gelouben gruntveste,
diu staetist und diu beste,
daz ist des reinen toufes vlôz.
sîn reiniu kraft ist alsô grôz,
daz er die sünde swendet,
ze reinekeit verendet.
ein niubornez kindelîn
mac âne sünde niht gesîn:
sô dem der touf gegeben wirt,
alliu sünde ez gar verbirt.
uns hât unser herre got
gegeben ein alsolich gebot,
daz er müeze sîn verlorn,
swer niht werde widergeborn
mit dem wazzer, mit dem geiste,
und den niht beiden leiste
von herzen werc unde wort.
ein wîssage sprichet dort:
« swennich geheileget an iu bin,
niuwen geist und niuwen sin
gibe ich iu vil werde.
ich samen iuch von der erde
und begiuze iuch algemeine
mit einem wazzer reine,
daz iuch von sünden reinet. »
hie mite ist bescheinet
des reinen toufes reinekeit.
swenn uns der touf wirt angleit,
sô sîn wir anderstunt geborn
und ze kinde gote erkorn
ze sîner süezen schouwe
mit des heilegen geistes touwe,
daz uns reinen unde niuwen
sol gote an staeten triuwen,
daz wir reineclîche
in dem êwigen rîche
mit gote an sînem erbe grôz
mügen heizen erbegnôz.
durch daz bite ich dich durch got,
swenne dû durch sîn gebot
den gelouben nemest an dich,
daz dû durch in und durch mich
mit rehtem herzen gâhest,
den touf an dich enphâhest.
des gewissen tôdes stunt
und sîn kunft diu sint unkunt.
dâ von ist ez vil ängestlîch,
daz dû des toufes sûmest dich;
wan ân den touf hilfest niht
des himelrîches zuoversiht.>
dô vrâget in sus jôsaphât:
< dîn munt mir gesaget hât,
âne touf bederbe niht
alliu mîn zuoversiht:
nû soltû mir rehte sagen,
waz zuoversiht magich bejagen
mit dem toufe, und sage mir mê,
wie ez umb daz ende stê,
dâ von mînem herzen leit
nâhen müge mit trûrekeit,
und sô des tôdes hôhiu kraft
an uns sol werden sigehaft:
werden wir denn nihtes niht
oder ist dehein zuoversiht,
daz nâch dem lîbe ein ander leben
werde in wernder kraft gegeben?
ouch soltû bewîsen mich
mit dîner lêre: wâ sol ich
suochen die gotes lêre?
des wundert mich vil sêre.>
barlââm sprach:< daz tuon ich.
vernim, ich wil es wîsen dich
gar unzwîvellîche.
daz gotes himelrîche
daz ist diu guote zuoversiht.
diu schrift uns alsus vergiht:
ez gehôrte mensche nie,
gedanc es künde nie gevie,
menschen zunge ez nie gesprach,
vleischlîch ouge nie gesach,
daz in got behalten hât,
die in sunder missetât
minnent gar mit staetekeit.
waer ez ze wizzenne uns bereit,
waz waere denne wunders dran?
daz himelrîche niemen kan
gelîchen dirre welte wol,
wan ez niemen glîchen sol.
sô wir mit rîchen vreuden grôz
werden der engel genôz
und wir die reinen namen drî
schouwen suln, sô wont uns bî
manic wîslîcher list,
der uns nû verborgen ist.
her an solt dû sîn gemant:
dir sol rehte sîn erkant,
daz dû niht staetes maht gehân.
dâ von solt dû des niht lân,
dû gâhest vlîzeclîche
zuo dem himelrîche.
wildû ouch, daz diu wârheit
von gote werde dir geseit,
sô solt dû an den buochen
diu êwangeljâ suochen,
an den gar geschriben stât,
swaz got durch uns erliten hât.
umb den tôt sô wîse ich dich:
lîp und sêle scheident sich.
der sêle wirt der lôn gegeben,
den hie verdient des lîbes leben.
der lîp wirt ein erde
und lît dan unwerde
unz an die jungesten zît.
sô got der welte ein ende gît,
sô samnent sich sêl unde lîp.
ez sî man oder wîp,
daz vert als ez gedienet hât.
so der lîp mit der sêle erstât,
diz ist ein zît der arbeit.
her nâch wirt der lôn bereit:
dort snîdet niemen anders niht,
wan als in got hie saejen siht.
swer hie saejet in den tôt,
der snîdet dort des tôdes nôt.
swer aber saejet in daz leben,
dem wirt ein leben dort gegeben,
daz niemer mêre ersterben mac.
ouch hât der tôt niht endes tac.
diz ist der guoten zuoversiht.
der übelen lôn ist anders niht
wan des leiden tôdes slac,
der niemer mêr verenden mac.>
der junkherre sprach aber dô:
< dû seist mir angestlîche drô
und dâ bî vil süezen wân.
nû soltû mich wizzen lân
und an ein ende bringen:
weistû diz von den dingen,
diu man vervarn hât gesehen
oder diu noch süln geschehen,
daz dû sô kuntlîche seist
und sô bescheidenlîche weist
künftic leben? des wîse mich.
wer hât es bewîset dich?
wâ von hâstûs gewisheit?
oder wer hât dirz geseit?
sô der lîp ein erde wirt
und vleisch und bein in gar verbirt,
wie mac denne daz geschehen,
daz er werde als ê gesehen
ein lîp? daz solt dû sagen mir.>
< daz wil ich gerne künden dir.
got geschuof adâmen
ân menschlîchen sâmen
von erde, als ich dir hân geseit.
diu kraft ist im noch bereit,
daz von sîner kraft erstât
ein lîp, den er geschaffen hât.
ouch kan ich künftic dinc ersehen
von dingen, diu ê sint geschehen,
als uns ir lêre hât geseit,
den nie geweich diu wârheit,
den got mit werken zaller stunt
ervulte, swaz gesprach ir munt.
dô got mensche durch uns was
und uns des vater lêre las,
er hiez die tôten ûf stân,
gesunt von dem grabe gân.
nû wil ich dir rehte sagen,
wie ich ez weiz von den tagen,
die vor uns hin vervarn sint.
jêsus, daz reine gotes kint,
diu ungevelschet wârheit,
hât uns ein bîspel geseit
von einem grôz rîchen man.
der truoc ze allen zîten an
von weltlîcher rîcheit
phelle unde rîchiu kleit.
nâch sînem willen brast im niht,
swes man zer welte rîcheit giht.
nû was ein betelaere dô,
der vil selten iemer vrô
von dirre welte wünne wart.
er was von siechlîcher art
zallen zîten eize vol.
im was vil wê und niemer wol.
er haete vürbaz niht gegert:
möht er der brosemen sîn gewert,
die man von jenes tische truoc,
des dûhtin, es waere im gnouc.
die gap im leider niemen dâ.
des rîchen hunde kâmen sâ
und lekten im die eize sîn.
jenes liep, des armen pîn
hâten sich gezweiet sus.
der rîche man und lâzarus
hâten ungelîchez leben,
daz ungelîche in wart gegeben.
der arme was hie arm durch got
und leit durch got der welte spot.
dâ wider stuont des rîchen muot
ze gote niht, wan an sîn guot.
nû muoste nâhen der tac,
daz der arme tôt gelac:
mit des lîbes tôde er starp.
sîn armuot im hie erwarp
die êweclîchen rîcheit,
diu im ze lône was bereit.
in truoc der engel vreude grôz
ze himel in abrahâmes schôz:
dar inne lebet er iemer mêr
ân allerslahte herzesêr.
nû mohte ouch der rîchtuom
und dirre weltlîche ruom
den rîchen dâ vor niht bewarn,
er müeze ûz dirre vreude varn.
er starp, sîn guot beleip alhie.
sînen lôn er ouch enphie:
in daz iemer wernde klagen
wart er ze helle dô getragen;
dâ was im vreude tiure.
in dem endelôsen viure
wart er begraben leider dô.
dar nâch vuogtez sich alsô,
daz er des armen sêle sach
dulten êweclîch gemach:
dem was wol und im vil wê.
an abrahâmen er dô schrê:
« gnâde, abraham, lâ mich
erbarmen, herre vater, dich
und sende lâzarum alher
unde bite in des, daz er
netze den kleinsten vinger
und mir mache ringer
mit einem trophen mînen pîn,
den er troufe an die zungen mîn.
mir ist in disem viure
mit leide vreude tiure. »
abraham der wîse sprach:
« sun, gedenke an daz gemach,
daz dir mit grôzer rîcheit
in jener welte was bereit,
dâ lâzarus mit liebe nie
weltlîche vreude enphie,
der nû mit vreuden iemer mê
vreude hât und dir ist wê.
dâ zuo ist uns diu vart benomen,
von uns hin ziu mac niemen komen
noch von iu her. » unsern vater
abrahâmen alsus bater:
« herre vater, sende in doch
in jene welt, wan ich hân noch
vünf bruoder, den er sage
daz sie sich von dirre klage
in jener welte hüeten wol. »
« diu welt ist wîser lêrer vol.
den volgen, sô sint sie behuot,
daz in disiu nôt niht tuot. »
« nein, herre, kaeme ein tôte dar
und saget in disen kumber gar,
dem geloubten sie baz. »
« nû mac niht geschehen daz.
hoeren der lêre wârheit,
die moyses in hât geseit
und ander guote wîssagen.
welnt sie die niht nâhe tragen,
sie gevolgent niemer niht,
des in ein tôter man vergiht. »
des armen liep, des rîchen leit
hânt iemer wernde staetekeit.
nû merke, wie ir beider leben
in beiden hât ir lôn gegeben.
jêsus, diu reine wârheit,
ein ander bîspel hât geseit,
daz seiter künfteclîche
von dem himelrîche:
wie mit vil rîchen sachen
ein künic wolde machen
eine brûtlouft sînem kinde.
dô hiez er sîn gesinde
von dem rîche laden gar
die liute algelîche dar.
dô schuof der diz, dirre daz.
der liute allermeist vergaz
sîner bete und kâmen niht.
dô hiez er, als diu wârheit giht,
ander liute dar bringen.
mit küneclîchen dingen
wart sîn brûtlouft volbrâht,
als es der künic hâte gedâht.
nû sach der künic einen man,
der truoc niht der kleider an,
als ez gezam den vreuden dâ.
dô vrâget in der künic sâ:
« vriunt, wie bist dû sô her komen,
daz dû niht hâst an dich genomen
ze dirre brûtlouft gastlîch gwant? »
er erstumte, im was unbekant
antwürte nâch unschulden.
von schulden muoster dulden
mit leide vorhtlîche drô:
im hiez der künic binden dô
hende und vüeze an ein bant
und hiez in werfen sâ zehant
in eine vinster, dâ sîn rât
niemer wirt und dâ er hât
weinen, grisgramen der zene.
beide, dise unde jene,
die sîne bete vernâmen
und doch hin zim niht kâmen,
die wil ich dir bescheiden hie.
der dise brûtlouft begie,
daz ist unser schepher got,
der durch der gotheit gebot
mahelte die kristenheit
durch unser süntlîchez leit
kriste, sînem kinde.
ich gelîche dem gesinde
die reinen predigaere.
die guot und vil gewaere
sint, und uns enwiderstrît
ladent an die hôhgezît,
dâ vreude ân ende iemer wert,
dâ got sîner briute gert.
die diz laden vernâmen
und doch dâ hin niht kâmen
von unmüezlîcher arbeit,
daz sint die, den wirt geseit
von dem himelrîche,
und sie vil riuweclîche
ir grôzen sünde sêre klagent
und dar zuo guoten willen tragent,
wie sie ze gotes hulden komen,
und in der wille wirt benomen
von der welte unmüezekeit,
diu in mit unmuoze entreit
den guoten willen und den muot
durch dirre welte krankez guot.
den man dâ zer brûtlouft vant
âne brûtlouftlîch gewant,
daz ist der den gelouben hât
und in sîn kranker sin niht lât
den glouben vollebringen
mit reineclîchen dingen.
geloube âne werc ist tôt.
er verliuset michel nôt,
swer wol âne glouben tuot
dewederz ist ân'z ander guot:
swer einez ân daz ander hât,
dem gebristet dirre wât,
der wirt gebunden sâ zestunt
geworfen in der helle grunt
und ist der wirtschaft wirdic niht,
der got den erwelten giht.
ouch hât uns bîspel gegeben
zehen junger megede leben.
der wâren âne wîsen sin
die halben vünfe under in.
den andern vünfen was bereit
hôher sin bî wîsheit:
die nâmen öle in ir glas.
dô zer brûtlouft künftic was
der briutegome und solte komen,
die tumben hâten niht genomen
öle, des muoste ir liehtes schîn
erloschen und verdorben sîn.
des briutegomen biten sie:
dô wurden slâfric alle die
der kunft dâ solten bîten
in des slâfes zîten.
dô wart hin gên mitter naht
ein michel ruof unde ein braht:
der briutegome waere komen.
die dô hâten öle genomen,
der lieht was klâr, vil schône ez bran.
der briutegome nâhen began.
die tumben wâren vil unvrô.
sie sprâchen zuo den wîsen dô:
« gebt uns iuwers öls ein teil,
wir sîn des trûric, niht ze geil,
daz unser lieht erleschent hie. »
dô disiu bete alsus ergie,
die wîsen sprachen: « gêt ouch ir
koufen: alsô tâten wir.
uns allen gemeine
ist hie des öls ze kleine. »
sie giengen unde wolten
öle koufen, als sie solten,
daz in vil wênic dô gezam:
der briutegome vil balde kam.
die dô hâten sich bewart
dâ gên des herren zuovart,
die kâmen unde enpfiengen in.
er vuorte sie mit im dô hin
zer êwiclîchen wirtschaft.
dô wart nâch im diu tür behaft,
die tumben megede kâmen sâ,
sie bôzten an die tür aldâ,
sie riefen: « herre, lâz uns in! »
dô dûht in gar ze tump ir sin;
« âmen, âmen! diu wârheit
( sprach er) sî iu von mir geseit,
daz ich iuch niht wizzen wil
noch weiz. » dô wart ir leides vil.
ir klagender jâmer wart vil breit,
daz in diu wirtschaft was verseit,
diu iemer mêr ân endes zît
endelôse vreude gît.
die vünf wîsen megede guot
bezeichent den, des staeter muot
ûf sînes lîbes hinevart
mit guoten werken ist bewart.
des tôdes kunft daz ist diu naht,
diu unser sinne hât bedaht,
daz sîn zil und ouch sîn komen
unsern sinnen ist benomen.
daz öle bezeichent guotiu werc,
diu vil swaerer danne ein berc
in unsern kranken herzen sint.
dirre welte tumbiu kint
gelîchent den vünf megeden wol,
den ir ölvaz wâren hol
des öls der rehten werke gar.
bî disem bîspel nim des war,
daz got unser herre krist
der briutegome genennet ist
swer sich niht gên im bewart
und rehtiu werc an'z ende spart,
unz im des tôdes sigenunft
zeiget unsers herren kunft:
wil er danne loufen,
öl rehter werke koufen,
des er biz an die stunt vergaz:
owê! sô lischet daz liehtvaz
und sperret im vil lîhte vor
der edel briutegome sîn tor.
alsus kan ich die wârheit sehen
an dingen, diu ê sint geschehen,
als ich dir bescheiden hân.
nû solt dû vürbaz dich verstân,
wie uns diu gotes wîsheit,
diu daz vervarne hât geseit
ze künfteclîcher lêre,
bescheidet vürbaz mêre
ein dinc, daz noch geschehen sol:
wie got übel unde wol
an dirre welte lônen wil,
swenn er der welte gît ein zil.
daz bescheidet uns alsus
der wîse bote mathêus
und der êwangeliste grôz,
als im die wârheit entslôz
diu reine gotes wârheit, krist,
der rehter wec und wârheit ist,
wie got uns allen lônes giht
mit vorhten und mit zuoversiht:
sô got an dem jungesten zil
an daz gerihte komen wil,
sô wirt vür in gesamenet dar
mit lîbe und ouch mit sêle gar,
swer in der welte ie wart geborn.
die got danne hât erkorn
und sîne erwelten sint genant,
die stânt ze sîner zesewen hant.
die übelen, die verworhten,
die in vil wênic vorhten,
die stânt ze sîner winstern dâ.
er sprichet den erwelten sâ:
« koment her, erwelten mîn!
daz rîche iu sol bereitet sîn,
daz iu an anegenges vrist
geordent und benennet ist.
ir ladetet mich, dô ich was gast
und mir geraetes gebrast.
ich was nackent, sunder kleit,
dô buoztent ir mîn armekeit.
ich was siech, dô kâment ir
und brâhtent iuwer vuore mir.
ich lac in grôzer swaere
in dem tiefen karkaere,
dô sâhent ir mit helfe mich. »
sie sprechent: « wâ sâhn wir dich
in alsô grôzen noeten sîn? »
« swaz ir durch den willen mîn
einem armen hânt getân,
dêst mir geschehn. nû sult ir hân
ze lône êwiclîche
mîns vater himelrîche. »
die werdent sîn erweltiu kint.
die danne ze der winstern sint,
zuo den sprichet er alsô
mit vil ängestlîcher drô:
« vart, vervluochten, in den tôt,
in des helleviures nôt,
daz dem tiuvel ist bereit
mit nôt ân ende in staetekeit,
wan ich in mînen noeten nie
von iu deheinen trôst enphie. »
sô schrîent sie denn alle
mit jaemerlîchem schalle.
sie klagent den endelôsen tôt,
sie sprechent: « wâ hâtest dû nôt,
herre, dâ wir möhten dir
geholfen hân? » - « dâ sâhet ir
einen mîner armen.
dô der iuch solte erbarmen,
ir getâtent im nie guot
und hâtent ie vil herten muot
gên der rehten lêre mîn:
des müezet ir verteilet sîn.
nû var enwec, vervluochtiu schar!
zuo dem helleviure dar,
dâ iu sol wesen iemer mê
bî dem leiden tiuvel wê. »
dâ wirt daz êwiclîche leben
der erwelten diet gegeben.
die übelen müezen sîn verlorn:
den wirt daz helleviur erkorn
und iemer werndiu swaere.
dâ vor dem rihtaere
vervâhet miete kleine.
wir müezen algemeine
selbe umb unser süntlîch leben
vor dem rihter rede ergeben.
dâ vindet niemen veile
vriuntlîch urteile.
ez teilet allez dâ daz reht,
dâ wirt reht ân krümbe sleht.
sô daz gerihte alsus ergât,
mit lîbe und ouch mit sêle erstât
beidiu man und dar zuo wîp
in den tôt oder in den lîp.
sus gloube die urstende.
dâ nimt der tôt ein ende,
wan der verlornen hôhiu nôt,
daz ist der endelôse tôt.
swer dâ stirbet, der ist tôt
in der endelôsen nôt.
swem dâ daz leben wirt gegeben,
der sol iemer mêre leben.
der verlornen hoehster pîn
ist, daz sie müezen iemer sîn
âne gotes angesiht,
daz sie die süln schouwen niht.
dirre tac mit vorhte gît
der welte ein grimmeclîchez zît.
diz ist der ängestlîche tac,
dâ niemen sich behüeten mac,
er müeze dâ von gotes hant
swaz er vor hin hât gesant
enphâhen, leider anders niht:
als îsaîas uns vergiht,
daz im got sante in sînen sin:
« ich weiz ir werc, diu gilte ich in,
ich samene alle diet vür mich,
sie sehent mîne vreude, als ich
niwen himel und niuwe erde
gemache, die vil werde
belîbent iemer mêr vor mir. »
daz sprichet got. noch sîn wir
gewîset von dem selben tage
ein teil, daz seit ein wîssage:
« der gotes tac gît grôzen zorn,
die sünder werdent verlorn,
der himel ingevalten wirt
alsam ein buoch; den tac verbirt
der gewente sunnenschîn.
sîn lieht muoz erloschen sîn.
swaz man himelgezierde siht,
die gebent danne ir liehtes niht.
die sterne vallent sam daz loup,
daz dürre wirt an reben toup. »
der wîssage aber urkünde gît.
von des selben tages zît
untroestet er die sünder mê.
er sprichet: « wê, iu, iemer wê,
die übel guot heizent
und guot ze übele reizent!
wê der vervluochten diete,
die die übeln durch die miete
gar an dem übeln slihtent
und reht unrehte rihtent!
wê in! wê den veigen,
die daz gerihte neigen
mit rouplîchem muote
nâch des armen guote!
owê danne der weisen klage!
war vliehent ir an dem tage?
wer wirt vür iuwer swaere
dâ iuwer helfaere?
wem lânt ir iuwer êre dâ? »
nû sprichet aber anderswâ
der wîssage, als ich dir sage,
von disem vorhtlîchen tage:
« ez ist der tac der armekeit,
der angest, der nôt, der arbeit,
des zornes, der tôtvinstern nôt,
der sûre tac von viure rôt,
dâ der starke kumt in nôt
und dâ niemen vür den tôt
deweder golt noch silber vrumt,
der an den tac mit sünden kumt.
die sünder stânt in grôzer klage
an dem gotes zorntage. »
diz ist, als ich dir hân geseit.
dirre tac wart ûf geleit,
daz got an sînes endes zil
nâch dienste uns allen lônen wil.
wie an der welte ende
geschiht diu urstende,
des hân ich dich verswigen niht.
der vorhte und ouch der zuoversiht,
der al der welte ist bereit,
hân ich dir ein teil geseit,
und von der künftigen welt,
dâ uns ist bereit daz gelt
nâch übel und nâch guote,
daz merke in dînem muote.>
jôsaphât an sich dô las,
swaz im hie vor gesaget was.
des wîsen mannes lêre
erweinde in alsô sêre,
daz er von herzenriuwen grôz
sîn antlütze gar begôz.
sîn riuwe machet in unvrô.
zuo barlââme sprach er dô:
< dû hâst mir liep, vorht unde leit
mit guoter wârheit geseit,
lieber meister, süezer man.
nû solt dû wîsen mich daran,
wie ich der übelen nôt genese
und in der guoten vreude wese.>
barlââm sprach:< daz tuon ich.
mit der schrift wîsich es dich:
diu hât uns geseit alsus,
daz der boten vürste, petrus,
tet die gotes lêre kunt.
dô wart daz liut sâ zestunt
brâht in vil grôze riuwe.
an in wuohs gotes triuwe,
ze buoze stuont ir herzen gir.
sie sprâchen: « nû waz tuon wir? »
« dâ nemt an iuch den reinen touf
umb des himelrîches kouf
und büezent iuwer schulde:
sô sendet gotes hulde
an iuch den heiligen geist. »
des toufes kraft ist aller meist
an saelden gar in troestlich,
die got geladet hât an sich,
als dich der süeze gotes rât
geladet an sich hiute hât.
dû waere im ê vil verre,
nû hât dich unser herre
in sîner diet beschouwet.
sîn geist hât dich betouwet
mit sînem touwe reine.
nû solt dû niht ze seine
gên dem toufe gâhen:
dû solt in gerne enphâhen
und solt dîn kriuze hân enbor:
als ez dir treit dîn schepher vor,
alsô solt dûz nâch im tragen.
ich wil dir diz ze tiute sagen:
krist gap durch dich zer marter sich
und leit vil grôze nôt durch dich:
alsô tuo ouch dû durch in
und kêre allen dînen sin,
wie dû berihtes sô dîn leben,
als er dir bilde hât gegeben.
dû solt durch in arbeit hân,
als er ouch hât durch dich getân,
sô maht dû im wol nâhen;
die gote gar versmâhen,
die dise heiden nennent gote
nâch des tiuvels gebote,
die sint gegozzen unde gesniten.
in allen süntlîchen siten
weiz ich groezer sünde niht,
danne daz in iemen giht
deheiner helflîcher kraft.
mit dem tiuvel sint behaft
diu selben sinnelôsen vaz:
dû solt vür wâr gelouben daz.
ir deheinez sprechen kan,
swie vil man sie geschrîet an:
sie sint gar âne wîsheit.
in ist aller sin verseit,
gân, sprechen, hoeren, sehen.
im muoz ouch alsam geschehen,
swer an ein bilde beten gât,
daz mensche gemachet hât.
got hât ir gar vergezzen.
der tiuvel hât besezzen
diu bilde und ouch der liute sin,
die gelouben jehent in.
sie sint gar vervluochet
von gote und unberuochet
und müezen iemer sîn verlorn,
die sie ze goten hânt erkorn.
swaz in wirt ophers von in brâht,
des ist dem tiuvel gar gedâht.
von den hât dich gotes gebot
brâht an sich. nû solt dû got
gelouben unde minnen
von herzen und von sinnen:
gelouben, daz der reine krist
mensche durch uns worden ist
und durch unser schulde leit
menschlîche broedekeit
unde, als ich dir hân gesaget,
wart geborn von einer maget.
dû solt gelouben, daz sîn tôt
uns lôste von der helle nôt
und daz sîn reine urstende
dem tôde gab ein ende,
der von adâme uns gerbet wart.
dû solt gelouben die ûfvart.
geloube ouch gotes sigenunft
und ûf dise erde sîne kunft
an der welte endes zil,
und danne uns allen lônen wil
nâch aller unser guottât,
als ieglîcher gedienet hât.
dû solt gelouben sunder wân,
daz dû ze jungest solt erstân,
an dem gerihte rede ergeben,
swie dich gewîset hât dîn leben.
dû solt die reinen kristenheit
gelouben, als uns hât geseit
diu botelîche lêre;
vil vesteclîche sêre
gelouben nemen in dînen sin,
daz den gotes namen drin
sundernamen sint gezalt
und doch sint ein und ein gewalt.
dû solt sie sunder nennen,
doch zeinem gote erkennen
und anbeten zeinem gote,
und daz sînem gebote
dienent aller himele kraft
und alliu lebendiu geschaft
mit staete in vorhteclîcher art,
und daz nie niht âne in wart,
swaz uns geschephede ist gegeben
sô was ie an im daz leben
mit dem, an dem ez allez ist:
daz ist der heilige krist,
der himel und erde slôzbant
eine hât in sîner hant.
diz solt dû sunder wanken
mit staete in den gedanken
gelouben unde staete sîn
mit staete an dem gelouben dîn.
durch daz bin ich her gesant,
daz ich mache dir bekant
die lêre, die ich hân getragen
her von mînen kindes tagen.
lâ varn und lâ dir wesen leit,
daz dirre welte rîcheit
ein leitlîchez ende hât
unde jâmerlîche zergât.
si gît dir vroelîch urhap
und leidez zil, ein engez grap:
dâ wirt dîn lîp in geleit
und wirt ein krankiu armekeit.
ob dû wendest dînen muot
vür got an dirre welte guot,
ez lât dich, wan dû sterben muost.
swie ungerne dû ez tuost,
ez sendet dich mit leider klage
an dem jungesten tage
in den êwiclîchen tôt,
der iemer wert mit klagender nôt.
dâ bî lâ dir mêre sagen,
waz dû dâ mite maht bejagen,
ob dû die welt versmâhest
und gotes touf enphâhest:
dû wachest, slâfest, sprechest, gêst,
dû rîtest, ligest oder stêst,
sô ist dir gotes helfe bî:
diu tuot dich aller sorgen vrî.
alliu swaere dich verbirt.
dîn herze dir gevestent wirt
als einem krefterîchen leun.
swaz dir iemen mac gedreun,
daz wirt dir ringer danne ein wint.
krist, daz reine gotes kint,
wert dich aller dîner gir.
ze aller zît ist er bî dir:
als dû ruofest im, er kumt.
in allen noeten er dir vrumt
und tuot dir sîne helfe schîn.
sô muoz dîn groestiu vreude sîn,
daz dû des solt gedingen hân
sunder zwîvellîchen wân,
daz er dir gît êwiclîche
mit im daz himelrîche.
daz hât in geheizen got,
die gerne minnent sîn gebot.
her an soltû mit staete stân,
sô wirdestû der wîze erlân,
diu dem tiuvel ist bereit
mit endelôser arbeit:
dar an merke mînen rât.>
dô sprach der guote jôsaphât:
< nû tuon ich gerne dîn gebot
und wil diu touben apgot
mit hazze gar versmâhen
und kristes touf enpfâhen,
vil gerne werden gotes kneht,
ob er mich durch mîn unreht
niht vertrîben wil von im.
sînen touf ich an mich nim:
ist er sô guot, sô dû mir seist,
sô sendet er mir sînen geist
und tilget mîne sünde.
nû solt dû mir urkünde
mit dîner wîsen lêre geben:
wie sol ich nâch dem toufe leben?
des volge ich dîner lêre.
sol ich tuon vürbaz iht mêre
wan nâch gelouben toufen mich?
ist des genuoc, oder sol ich
iht anders tuon? daz sage mir:
des wil ich gerne volgen dir.>
do sprach barlââm:< daz sage ich dir.
nû merke daz alhie von mir,
wie dû solt nâch dem toufe leben:
dû solt boesiu werc begeben
und minnen ie daz beste,
und ûf die gruntveste,
diu dem gelouben wirt geleit,
soltû mit süezer reinekeit
eine veste bûwen gote
an dir nâch sînem gebote.
ich gihe, daz der geloube sî
verdorben, diu werc sîn dâ bî.
dâ wider man den werken giht,
sie sîn âne glouben niht.
uns lêret geistlîche gân
und dirre welte willen lân
der guote sanctus paulus.
er nennet die houptsünde sus:
weltlîch gelust, unreinekeit,
nît, zorn, haz und meineit,
manslaht, vluoch, untriuwe, hôhvart,
mit vrâzheit trunkenlîchiu art,
gelîchesen, zouber, trügeheit:
swer diu mit staetem willen treit,
der muoz verlorn iemer wesen
an der sêle und ungenesen,
ob er sie bringet an sîn zil,
sô daz er sie niht büezen wil.
des kan niemer werden rât,
ob er sie durch got niht lât.
sô nenne ich dir die reinen vruht
der rehten werke: daz ist zuht,
minne, vreude, vride, güete,
triuwe, milte, lancgemüete,
enthabunge, gedultekeit
gotlîcher arbeit,
und daz man gedenke niht
ze übel der übelen geschiht.
nâch sünden staetiu riuwe,
an gotes buoze ie niuwe,
an guoten werken staeter muot,
diu sint nâch dem toufe guot.
sie gânt alsam ein stege enbor
gên des himelrîches tor.
der solt dû nâch dem toufe phlegen,
jener dinge dich bewegen.
sô diu der touf verswendet,
vertiliget und verendet,
sô solt dû allen dînen muot
von jenen sünden hân behuot.
würden sie dir wider kunt,
sô taetestû alsam ein hunt,
der daz âs von im lât
und danne wider drüber gât.
got hât die boten sus gemant:
« gât unde tuot den touf erkant
und toufet in den namen drin. »
dâ bî gebôt er aber in,
daz sie die diet bekêrten
und nâch dem toufe lêrten
behalten staete sîn gebot.
ouch lêret uns vürbaz got,
der himeltugende vürste,
daz uns hunger unde dürste,
und lîden weltlîchen pîn
alhie durch die hulde sîn
und weinen sünde in disen tagen,
daz wir von im her nâch bejagen
der êwiclîchen vreude zît,
diu vreude und trôst ân ende gît.
ouch lêret uns vürbaz krist
hân erbärmede, als er ist
erbarmherze an güete.
uns lêret sîn dêmüete,
daz wir uns erbarmen
gên den vil reinen armen
und daz wir des naehsten klage
mit im klagen alle tage
und in vridelîchen sachen
vride und gnâde machen,
und daz unreht machen reht
mit rehtem gerihte sleht,
und daz man uns gedultic sehe,
swaz leides uns von im geschehe,
und valschez urkünde lân,
gar gewaere rede hân,
und ieglîches menschen guot
niht nemen âne sînen muot.
er verbiutet ouch die eide
gar unz an die beide:
nein und jâ. die sol man hân,
dâ bî die andern eide lân.
swer dich slahe an dîn wange,
sô sûme dichs niht lange,
dû bietest im daz ander dar.
swer mit dir ze gerihte var
kriegen umbe dîn gewant,
dem solt dûz lâzen zehant.
gip mit zühteclîchem site
swes dich der nôthafte bite.
swes dû beswaerde woldest hân,
des solt dû ander liute erlân.
swaz dir leides iemen tuo,
dâ soltû niht sprechen zuo:
sô richet dîne swaere
dîn rehter schephaere.
dû solt ze rehte rihten sô,
daz dû gerihtes werdest vrô.
swie dîn gerihte wirt getân,
dar nâch muostû gerihte hân.
lâ belîben valschiu wort.
swar dû birgest dînen hort,
dâ kêret ie des herzen sin
mit staeteclîchem muote hin;
durch daz lege dînen schatz,
dâ des diebes widersatz
in müege niemer ûz gegraben
und dâ in swenden niht die schaben:
daz ist daz himelrîche;
dâ wert er êwiclîche.
noch ist daz hoehste gebot,
daz man den naehsten unde got
mit vriuntlîchem sinne
alsam sich selben minne.
dû solt niemer gesorgen
gên dem andern morgen,
waz dû danne sülest ezzen:
got hât des niht vergezzen.
er gap dir lîp unde leben:
sus mac er dir die spîse geben.
die selben kraft hât er noch.
er vuoret daz gevügel doch
und alliu dinc mit sîner kraft,
er nert ouch alle geschaft.
got lêrt ob allen dingen
nâch sînem rîche ringen:
uns wîset sîner lêre spor
dringen an daz enge tor,
dâ uns daz leben wirt erkant.
leider, nû ist uns gebant
des tôdes strâze alze wît.
diu himelstrâze ist alle zît
gar ungebant und eine;
ir volge ist leider kleine.
dise lêre und disen rât
gar ein wort beslozzen hât,
daz sprichet unser herre, krist,
als ez dort geschriben ist:
« swer mir sprichet herre, herre!
ist mir sîn herze verre,
der vert ze himelrîche niht,
ob diz wort âne muot geschiht.
tuo mînes vater willen gar,
welle er, daz er ze himel var.
swem vater, muoter, bruoder, wîp,
kint, guot, diu welt, der lîp
mit staete lieber ist dann ich,
der mac sô niht geminnen mich
daz er mîn wirdic müge sîn. »
diz merke in den sinnen dîn,
daz dir got gebe ze lône
des himelrîches krône.>
dô sprach der guote jôsaphât:
< dîn honicmaeziu zunge hât
mit guote lêre vürgeleit.
ob ich durch mîne unstaetekeit
mac diu gebot behalten niht,
ob daz vil lîhte mir geschiht,
daz ich briche mînem gote
zwei oder einez der gebote:
sol danne diu gedinge mîn
ze gote gar verkrenket sîn?>
< nein ez, herre, süezer man!
ich wil troesten dich her an,
dû solt alsolhe rede lân,
durch got deheinen zwîvel hân.
ob daz alsô solde wesen,
sô möhte nieman genesen.
bî rehte got genâden phligt,
vür daz reht genâde wigt.
dô got mensche wart erkant,
daz er der grôzen sünde bant
braeche, daz der menscheit
von hôhen schulden was bereit.
er gap uns vür die sünde
der gnâden urkünde.
unser leben und den gedanc
sach er ze broede und alze kranc.
durch die selben broedekeit
hât er uns einen trôst geseit:
swenne der sündaere
sîne süntlîchen swaere
von herzen gar beweine,
er sî ir vrî und reine.
der touf die sünde reinet.
swer sîne sünde weinet,
ist im herzenriuwe kunt,
sô toufet er sich anderstunt.
der gotes gnâden ist vil mê,
dan iemen sünden begê.
nieman hât sünden alsô vil,
man vinde ir mit ahte ein zil.
der gotes gnâden ist sô vil,
daz sie niemen an daz zil
gereiten noch verenden kan.
hie soltû gedenken an
und büeze im die sünde dîn,
sô tuot er dir genâden schîn.
unser herre sprach alsô:
« aller engel koere werdent vrô,
sô got den sünder lêret,
daz er von sünden kêret. »
diz merke an einer bîschaft,
diu seit von der grôzen kraft,
die diu gotes erbärmede hât,
sô des reinen herzen rât
wil den sünder bringen
von süntlîchen dingen.
daz tet uns ze trôste kunt
unsers herren kristes munt.
ez was, als noch genuoge sint,
ein rîcher man, der hâte kint:
den teilte sîne habe sîn hant.
dô vuor der eltest in ein lant,
vil verre in vremediu rîche.
gên wîben üppeclîche
kêrte er alsô gar den muot,
daz er mit in vertet sîn guot
sô gar, daz im diu hungers nôt
eine swache vuore bôt,
dâ mite er sich dô nerte
und dem hunger werte.
er buozte alsus den hunger sîn:
ûf dem velde, dâ diu swîn
giengen an der weide,
dâ gienc er ûf die heide.
swâ daz swîn vant eine wurz,
si waere lanc oder kurz,
dâ jagete er ez balde von
und az sî. des was er gewon,
daz er der spîse nerte sich.
diz hungerleben kumberlich
er mit grôzer armekeit.
in manegem grôzen hunger leit.
diz leben machet in unvrô.
er dâhte in sînem muote alsô:
« wie lange wil ich dise nôt
lîden? mînes vater brôt
vuoret alsô manegen man,
der im nâch lône dienen kan.
daz kunde ouch ich. nû wil ich gân
( swie ich an in gesündet hân)
hin zim und wil in des biten,
daz er mit väterlîchen siten
mîne schulde übersehe,
daz ez mir niemer mê geschehe.
ich wil sprechen: vater mîn,
ich hân an die hulde dîn
gesündet, als mîn schulde giht.
ich mac dîn kint geheizen niht.
in den himel unde ouch dir
hân ich gesündet. nû tuo mir
genaedeclîche triuwe schîn.
lâ mich dir bî den knehten dîn
dienen, daz dû vuorest mich. »
mit dem gedanke huob er sich
wider in sînes vater lant.
dô sînem vater wart erkant
sîn kunft, dô lief der herre
gên sînem sune verre.
dem knappen wart dô niuwe
diu väterlîche triuwe.
sîn erbärmeclîcher sin
bewegete sich dô über in:
er kuste in minneclîche dô;
sîner künfte was er vrô.
dô wurden brâht diu besten kleit
und dem knappen angeleit
und diu rîchesten vingerlîn.
dô machet er den vriunden sîn
eine grôze wirtschaft sâ.
mit vreuden kunte er, daz im dâ
sîn kint waere wider geborn:
daz im dâ vor was verlorn,
daz haete im wider sich gegeben.
des hulfen im mit vreuden leben
sîne vriunde durch in gar,
die zuo den vreuden kâmen dar
des mit vorhtlîchen siten
der sun den vater wolte biten,
des wart verzigen sîner schame.
in werte sînes vater name
nâch êren baz dan er in bat.
an sînes lieben kindes stat
phlac er sîn väterlîche
und machte in guotes rîche.
er lie nâch sîner schulde
in haben sîne hulde. -
nâch verlust diz vunden kint
bezeichent, die in sünden sint
und danne ir herzenriuwe
sie gote machet niuwe
an riuweclîcher buoze.
mit minneclîchem gruoze
zeiget er in sîne güete.
ze der rehten heimüete
erbarmet er sich über sie.
swaz sie gên im getâten ie,
daz ist sâ von im verkorn,
und werdent gote als ê geborn
ze sînen lieben kinden gar:
sô vreut sich aller himele schar.
noch wil ich dir künden
ein bîspel von den sünden,
dâ wîste gotes wort mich an:
hundert schâf hâte ein man,
in der wüeste er einez vlôs.
diu niun und niunzic er verkôs,
unz er daz verlorne vant.
als erz vant, er nam zehant
daz verlorne schaefelîn
und truoc ez ûf der ahsel sîn
vroelîche in sîn hûs hin hein.
in grôzen vreuden er schein
und bat sîne vriunde dô,
daz sie mit im waeren vrô,
wan er haete an den stunden
sîn verlornez schâf vunden.
sie vreuten sich dâ durch den vunt.
uns tuot mit ebenmâze kunt
diu gewaere wârheit,
daz groezer vreude sî bereit
ze himele aller engel schar
und aller himel tugende gar,
ob ein grôzer sündaere
wirt gote ein riuwesaere
und sich von sünden kêret,
ir vreude ez vürbaz mêret,
danne ob niun und niunzic man
sich grôzer riuwe naemen an,
die von sünden sint behuot
und ie truogen rehten muot.
petrus, der vil reine bote,
hâte gesündet an gote:
er lougente sîn drîstunt.
des wart im sô grôz riuwe kunt,
daz er vil sêre weinde:
mit riuwe er buoze erscheinde,
biz daz er sîne schulde gote
nâch der riuwe gebote
buozte nâch den hulden gotes:
sît wart er kemphe sînes gebotes.
wir vinden ouch geschriben dâ,
daz marjâ magdalênâ,
der sünderinne vrouwe,
sich mit ir herzen touwe
von ir sünden reinde,
dô si krist anweinde.
als er ir herzen riuwe ersach,
durch ir gelouben triuwe er sprach:
« wîp, dir sî dîn sünde gelân,
die dû hâst biz her getân. »
ob ein man in kamphe stât,
sîn kamphgenôz in niht erlât,
er slahe in lîhte vor im nider.
des sol er sich erholn wider
mit vrümeclîchen dingen.
er sol ûf aber springen
gên sînem vîende in den strît:
waz ob im got die saelde gît,
ob er rehter manheit phligt,
daz er dem andern angesigt.
alsus sol sich der sünder wern,
sehe er sich die sünde bern.
ob in ein sünde drücke nider,
dâ sol er sich setzen wider
und sol got ze helfer hân,
sô wirt er siges niht erlân.>
jôsaphât der guote sprach:
< sît weinen, klage und ungemach,
jâmer, riuwe und arbeit
uns sint ze buoze ûf geleit,
sô dunket mich, ez waere
vreude bezzer danne swaere.
sît man sus sünde sol genesen,
sô woltich vil gerner wesen
âne sünde vreuden bî,
dan in den sünden vreuden vrî.
ich sol des lieben herren mîn
gerner hüetende sîn
vroelich âne sünde,
dan ich an im enzünde
mit sündenvreuden sînen zorn
und mir ze buoze werde erkorn
vür sündenvreude riuwenklage.
swenne ich gar nâch dîner sage
die gotes lêre gelerne,
sô hüete ich vreuden gerne
und bin in vreuden gerner sô,
dannich von sünden werde unvrô.>
barlââm, der meister sîn,
sprach:< vil lieber herre mîn,
des besten hâstû gedâht:
möhte ez werden vollebrâht,
ez waere ouch daz liebeste mir
und unserm herren gote an dir.
dû maht es niht behüeten dich:
ez ist gar unmügelich
bî viure sitzen einen man,
etswenne rieche ez in an.
swer dirre welte unmuoze hât
und ouch ir rîlîchen rât
an lîbe, an guotes rîcheit,
ist al sîn wille im unverseit,
wie mac der die welt und got
behalten gar? wan ir gebot
ist ungelîch gescheiden.
man kan ze rehte in beiden
nâch ir gebote dienen niht,
als uns kristes lêre giht.
er sprach: « nieman zwein herren mac
gedienen sô, daz sîn bejac
müge ir beider lôn bejagen,
man sehe in dem einen tragen
vriuntschaft, dienest oder haz,
danne dem andern. vürbaz
er im den einen minnet,
von dem er lôn gewinnet.
ez lônet ietweders muot,
als man im dienest tuot. »
ouch hât gesprochen anderswâ
jôhannes êwangelistâ:
« ir sult die welt minnen niht;
wan swaz man in der welte siht,
des gert diu vleischlîche gir.
der ougen wünne lît an ir:
diu ist niht von gote komen.
ûz der welte ist si genomen.
der welte wünne gar ververt:
ir gir, ir name wirt verzert,
ir êre, ir rîcheit unde ir guot.
swer aber gotes willen tuot,
dem wirt daz êwiclîche leben
bî gote ân ende gegeben.
den reinen boten unde got. »
des boten lêre, gotes gebot
behielt vil unserr vordern ê.
die liezen in vil dicke wê
durch in sîn, als er gebôt.
sît wir mit also maneger nôt
müezen daz gotes rîche
gedienen kumberlîche,
ir lîp, ir muot wurden bekleit
mit dem kleide der arbeit,
und touften nâch dem toufe sich
mit ir bluote. lobelich
was der touf unserm gote.
in sînem reinen gebote
wart in noete vil bekant.
genuoge wurden verbrant,
versteinet und mit swerte erslagen
sach man manigen bî den tagen,
schinden und radebrechen
und etslîche durchstechen.
vür wildiu tier bant man ir vil.
vür geschütze alsam ein zil
sach man genuoge setzen,
durch got ir leben letzen.
sus liten sie vil manege nôt
und kurn durch got des lîbes tôt
umb der sêle iemerleben,
daz in ze lône wart gegeben.
got zeichen vil an in begie
die wîle daz sie lebeten hie.
swâ ir lîp oder ir gewant
iemen ruorte oder ir hant,
der muoste werden sâ zestunt
von aller siecheit gesunt.
gnuoge sâhen ouch die nôt,
die dirre welte minne bôt.
sie dûhte ein arbeitlîchez leben
dirre welte sich begeben
und doch in der welte wesen
und âne dise welt genesen.
sie liezen varn kint unde wîp,
liute, lant, vriunde, lîp
und arbeiten sich sêre
nâch unsers herren lêre,
des vil wênic sie verdrôz.
mit manegem ungemache grôz
die welt sie gar vermeinden,
in wälden sie vereinden.
in was vil wê, vil selten wol:
sie zugen sich in wildiu hol,
sie liten manige pîne,
sie wurden pilgerîne
und ofte unwerde geste
durch got. ir muot was veste.
krût, eicheln unde gras
in gote ir spîse lange was.
hôhvart, vîentlîcher nît
was in vremede zaller zît,
diu doch den guoten werken bî
gerne sint. vil selten vrî
sint guote liute ir beider.
den guoten was niht leider,
dan der welte rîchtuom
und ir trügelîcher ruom.
sie hâten manege swaere,
sie wurden marteraere
doch von ir grôzen nôt genant
und nâmen von der gotes hant
den balmen und die krône
bi den marteraeren schône.
got die gnâde an in begie,
daz al diu welt ir lêre enphie
und ûf der erde überal
ir wort, ir rede vil wîte erschal.
ir lêre, ir leben lêrte daz
in gotes worte vürbaz.
der sprichet sô: « swennir getuot
werc, diu reht sint unde guot,
und volbringent gotes gebot,
sô sprechent: herre, vater, got,
wir sîn unnütze knehte.
wir tâten niht ze rehte,
daz uns von dir geboten wart.
dêmuot nidert hôhvart. »
der selben lêre phlâgen sie,
ir dêmuot hôhvart nie begie.
nû ist in ein hôhez leben
durch ir dêmuot gegeben.
in hât der hôhe gotes gewalt
die welt vergolten hundertvalt.
ir sêle sint bî gote dort.
diu gotes lêre sint ir wort.
ir heilegez gebeine
guot, edel unde reine,
ist uns ze saelden hie verlân,
dâ von wir manige saelde hân,
swie wir es unwirdic sîn.
ich und die genôze mîn
hân ir leben an uns genomen
und mügen leider doch niht komen
dar sie vor uns sint gevarn.
wir kunnen uns des niht bewarn,
uns drücke diu welt under sich
mit ir gezierde trügelich
und mit ir valschen êre.
des ist der guoten lêre
uns vorhtlîche swaere,
griulich und egebaere.
zwâre, lieber herre mîn,
diu welt solde gehazzet sîn.
des waere si benamen wert,
wan si ze staete nihtes gert.
daz nû ist, dêst niht zehant,
nû jâ, nû niht, dêst ir bekant:
hiute wesen, morne entwesen,
nû stoeren, nû ze samene lesen,
den drucken, disen ûfen,
dort swenden hort, hie hûfen;
nû liep, nû leit, nû leben, nû tôt,
nû grôz gemach, nû leides nôt;
hiute vreude und rîchez guot,
morgen leit und armuot.
si ist ir vriunde vîent:
morgen lûte schrîent
die hiute sêre lachent.
in leide morgen wachent,
die hînaht slâfen giengen,
mit vreuden slâf enphiengen.
swer sich ûf sî slâfen leit,
den wecket si mit arbeit.
swer ir getriuwez herze hât,
mit untriuwen si in lât.
si kan die tumben reizen
mit valschen geheizen,
biz daz ir tumbes herzen muot
ir lêre, ir willen gerne tuot.
swen si sus an sich bringet
und der zir helfe dinget,
den lât si ligen in der nôt:
ir endes lôn ist ie der tôt.
die jenen rehten herren lânt
und disem valschen bî gestânt,
den wirt der tôt vür daz leben
von im ze lône gegeben.
sîn lôn ist niht wan herzeleit,
als ich ein teil dir hân geseit.
die dirre welte volger sint
unde ir dienstlîchiu kint,
die gelîche ich einem man,
der nôt von einem tiere gewan:
daz was ein einhürne grôz.
sîn lüejen alsô lûte dôz,
daz ez den man brâhte in nôt.
er vorhtim unde vlôch den tôt.
ez jaget in âne milte zuht.
dô er was in sorgen vluht
und vor dem einhürnen lief,
in ein abgründe tief
viel er über eine want.
in dem valle ergreif sîn hant
ein boumelîn, dâ hieng er an;
daz vriste disen selben man.
er habete sich vil vaste
ze des boumelînes aste;
die vüeze hâte er gesat
an eine wunderenge stat.
daz was ein kleiner erdewase,
gewurzet âne kraft mit grase:
dar ûf enthielt er sînen val.
diu selbe stat was alsô smal,
daz er dar an niht mohte gestân,
swenn er daz boumel müeste lân.
swier dâ stuont in grôzer nôt,
er wânde, im waere der tôt
mit vride gar benomen dâ.
dô kômen zwô miuse sâ:
einiu was swarz, diu ander wîz,
die kêrten allen ir vlîz
an der stûden wurzel gar.
sie nuogen alsô vaste dar,
biz diu wurz vil nâch sich lie,
von der kraft diu stûde gie.
diz was ein ängestlîch geschiht:
er mohte des erwenden niht,
sie wolten der wurze angesigen.
dô sach er einen trachen ligen
tief under im in dem tal,
der dinget ûf des mannes val.
ez was ein ängestlîcher stric,
er truoc vil leiden aneblic:
diu ougen und der âtem sîn
wâren beidiu viurîn.
er tet vil wîte ûf den munt:
dô dranc daz viur sâ zestunt
mit grôzer flamme, als er sich vleiz,
als ûz einem ovene heiz,
ûz sînem wîtem munde.
vil sêre in der stunde
mit grimme blangen began,
daz er verslunde disen man.
ûf sînen val was er bereit,
ginende, als ich hân geseit,
als er in wolde slinden.
dem man begunde swinden
herzevreude: daz tet nôt,
als im diu vorhte gebôt.
dô der man diz ungemach
under im an dem trachen sach
und den wüetenden einhürnen
ob im sô sêre zürnen,
dô er nâch im lûte schrei,
und daz der stûden wurz enzwei
von den miusen nâch geschaben
was: er dâhte, ob in enthaben
möhte disiu kleiniu stat,
dâ er hâte hin gesat
die vüeze durch des valles vrist.
als er disen kleinen list
in sînen grôzen noeten vant,
er sach des endes sâ zehant.
aldâ moht er sich niht entsagen:
ûz der wende sach er ragen
vier grôzer würme houbet.
vreude er wart betoubet,
wan er des tôdes was gewis.
ein slange heizet aspis,
der vil grôze vrävele hât,
swenne er lebendes iht bestât.
der wurden im dâ vier erkant
bî sînen vüezen in der want,
die den wasen undergruoben
und vlîzeclîche schuoben,
der under sînen vüezen lac
und sîn mit unstaete phlac,
wan er sô sere began
mit helfe entwîchen disem man.
dô disiu viervalte nôt
dem man sô grôze vorhte bôt,
er sach ûz einem aste,
samfte, niht ze vaste,
ein kleine honicseimes gân.
al sîn nôt begunder lân:
er habete sich dar sâ zestunt
und liez im triefen in den munt.
swar er sach, dâ was nôt:
er sach nâhen im den tôt.
swie vorhteclich was diu gesiht,
er lie der honictropfen niht.
ist dînen sinnen iht ze snel
ze merkenne diz bîspel,
sô wil ich dirz ze tuite sagen,
die rehten bîschaft niht verdagen.
diu gruobe, dar in viel der man,
dâ soltû die welt merken an,
diu mit sô maneger arbeit
uns ir stricke hât geleit.
der einhürne dêst der tôt,
der mit ängestlîcher nôt
allez menschenkünne jaget,
biz daz sîn name an im betaget.
daz boumelîn, daz ist daz leben,
daz uns allen ist gegeben,
ieglîchem nâch sîner maht.
der liehte tac, diu trüebe naht
bezeichent dise miuse zwô,
die jene wurzen nuogen sô
daz der stûden kraft zergienc,
dar an der man mit vorhten hienc.
alsus genaget widerstrît
unser leben disiu zît.
ir nagen daz hât endes niht,
ê man si abe genagen siht
unsers lebenes wurzelkraft,
dâ unser leben ist angehaft.
merke ouch in den sinnen dîn,
daz der trache viurîn,
der gên dem man ûf tet den munt,
bezeichent der helle grunt
und des tiuvels angesiht,
diu vorhtlîcher swaere giht.
der vier slangen houbet sint
vier tugende, von den al diu kint,
diu von menschen sint bekomen,
lîp und leben hânt genomen.
der vier êlementen kraft,
von den diu gotes meisterschaft
den lîp al der menscheit
hât ze samene geleit,
daz ist diu ungewisse stat,
ûf die der man hâte gesat
durch vristen sîne vüeze.
der welte unstaetiu süeze
sî dir bî dem honige kunt,
daz jenem trouf in den munt,
und durch daz kleine tröpfelîn
vergaz er al der noete sîn.
hie sî dir bilde bî gegeben,
daz dû dirre welte leben
rehte erkennest, wie si stât.>
dô sprach der guote jôsaphât:
< wol dem süezen munde dîn.
dû müezest iemer saelic sîn
mit vreude ân alle swaere!
wie guot und wie gewaere
diz bîspel ist an lêre!
sage mir der noch mêre,
daz mir ir lêre bîschaft gebe,
wie ich in dirre welte lebe
und welher vriunde ich sül phlegen
und der andern mich bewegen.>
dô sprach der alte wîse man:
< dû solt gedenken wol dar an,
wem dirre broeden welte kint
gelîch an ir lebene sint.
welhe vriunt sie minnent
und wie sie lôn gewinnent
von der vriunde minne,
daz merke in dînem sinne.
ez was ein vil guoter man,
der drîer vriunde nam sich an,
die begunder minnen
von herzenlîchen sinnen.
den zwein er solher minne jach,
daz man in mit staete sach
ie dienen disen beiden.
er was gar ungescheiden
mit staeteclîchem sinne
von dirre beider minne.
den lobet er, unz an sînen tôt
( als ir liebe im dô gebôt)
iemer in ir dienste wesen,
mit in sterben unde genesen.
swenn er den dritten ansach,
vil kûme er im gruozes jach.
trâclîche gruozte er in;
sîn gelîchsender sin
gruozt in von herzen selten ie.
er ougte im herzevriuntschaft nie,
als er ie tet den andern zwein,
in der dienste er ie schein.
der drîer vriunde er alsô phlac
mit solher liebe manigen tac,
daz sie alsus sîn herze schiet.
dô kom ein zornigiu diet
zuo zim gewalteclîche:
die wâren al gelîche
des keisers wîzenaere.
die sagten im ze maere,
daz er solde dô zestunt
umbe zehen tûsent phunt
ze rehte vor dem keiser stân
oder den lîp verlorn hân.
diz maere erschrahte in sêre;
dô dâhte er an die êre,
die er den zwein vriunden ie
mit willen tet. vil balde er gie
zuo dem liebesten vriunde sîn.
er sprach: « vil lieber vriunt mîn,
durch got, wes wil dû helfen mir?
nû stât gar mîn trôst an dir.
mir sint des keisers boten komen:
ich hân von wârheit vernomen,
er welle mich des niht erlân,
ich müeze in noeten vor im stân
umbe zehen tûsent phunt.
nû tuo mir dînen willen kunt,
ob dû iht wellest helfen mir,
als ich wol getrûwe dir.
dû solt des lân geniezen mich,
daz nie geschiet mîn herze sich
von dir mit staeten triuwen gar:
des nim durch got hiut an mir war! »
dô sprach der vriunt sâ zehant:
« man, dû bist mir unbekant.
dû weist niht rehte waz dû sagest
und wen dû ze vriunde jagest.
waz vriundes suochest an mir hie?
jâ, gesach ich dich ê nie.
ander guote vriunde ich hân,
mit den wil ich hiute gân,
in vreuden durch ir willen sîn:
die hân ich nâch dem willen mîn.
sît daz mich dîn tumber sin
ze vriunde ersach, des ich niht bin,
sô wil ich doch des wortes dich
lân geniezen umbe mich.
ich wil dir geben zwei hemdelîn,
diu sint vil boese haerîn,
diu soltû ze stiure hân:
ez mac nû anders niht ergân.
doch helfent sie vil kleine dich,
dû darft niht vürbaz biten mich. »
diu gedinge was verlorn,
die er dâ wânde hân erkorn.
vil trûriclîche gie der man
von sînem trügevriunde dan.
zuo dem andern huop er sich.
er sprach: « vil lieber vriunt, wan ich
dich minnet ie vür alle man,
sît daz ich künde dîn gewan,
als dîn liebe mir gebôt,
sô hân ich alle mîne nôt
hiute an dînen trôst verlân:
ich hân ze dîner helfe wân. »
« waz sol ich tuon, waz wirret dir?
durch waz stêt dîn trôst an mir? »
« dâ lâ mich alles guotes
und dienestlîches muotes
und aller êren geniezen
und lâ dich niht verdriezen,
dû helfest mir von grôzer nôt,
wan ich muoz lîden den tôt,
gib ich niht zehen tûsent phunt.
diu maere sint mir worden kunt,
nû troeste mich ze dirre drô. »
der vriunt antwurte im alsô:
« ich mac dir helfen niht noch wil:
ich hân unmuoze selbe vil,
ich bin in sorgen, als ouch dû,
vil grôzen kumber hân ich nû.
bistû sô tump, geselle,
daz du waenest, daz ich welle
mit dir gân in den tôt?
der wân ist an dir âne nôt.
ouch verzer ich wol mîn guot,
daz ez dir kleine helfe tuot,
wan ich bedarf es selbe wol
âne manigerhande zol.
ich tuon dir wol ein kleine guot,
daz dir doch kleine vrume tuot:
dâ dû solt ze gerihte stân,
dar wil ich hin mit dir gân
unz an des rihtaeres tor.
dâ wil ich belîben vor
und wil tuon, des ich bedarf. »
unwertlich er von im warf
daz ouge. er schiet von dan zehant,
als er aldâ niht trôstes vant.
dô er den kranken trôst enphie,
zuo dem dritten vriunde er gie.
sîn lîp was sorgen rîche.
dô weinder jâmerlîche.
als er den vriunt ane sach,
sîn herze im grôzer riuwe jach:
daz houbet liez er sîgen,
von schame wolter swîgen.
er getorste in niht gebiten
von den schamlîchen siten,
daz er im êre nie gebôt;
er sweic durch schamlîche nôt.
an ein heil liez er ez dô,
schamende sprach er alsô:
« nû hân ich mundes niht ze dir,
daz ich dich bite, daz dû mir
deheiner slahte helfe tuost,
wan dû des gedenken muost,
daz ich in al den sinnen mîn
gevleiz mich nie des willen dîn
und dir gediende nie sô wol,
sô vriunt vriunde dienen sol.
ich hân niht umbe dich verscholt
dekeinen helflîchen solt.
nû hât mich angest unde leit,
kumber, nôt und arbeit
durch grôze gülte ergriffen.
mîn trôst ist gar zersliffen
an den liebesten vriunden mîn.
nû baete ich gerne, möhtez sîn,
etslîcher helfe dich,
daz dû geruochest troesten mich
mit einer kleinen stiure:
mir ist nû vreude tiure.
dû solt mich niht engelten lân,
daz ich dir niht gedienet hân. »
dô sach in der guote man
mit güetlîchen gebaerden an.
er sprach: « triuwen, des ist niht.
mîn herze dir von schulden giht,
daz dû der liebste ie waere mir.
swaz dû wilt, daz diene ich dir:
ich sol niht vergezzen hân
des dû mir liebez hâst getân,
daz sol ich dir hie gelten sô,
daz dû des geltes wirdest vrô.
wis mit vreuden sunder leit!
dîn klage, dîne arbeit
lege ich dir zem künige hin.
nû habe vreudenrîchen sin,
lâ trûreclîche swaere sîn!
ich süene dir die vorhte dîn
alsô, daz dîner vînde rât
nâch dînem willen gar zergât. »
des trôstes wart der man sô vrô,
daz er von herzen weinde dô.
weinende er vil lûte schrê:
« wê mir tumben man! owê!
wê mir! ich muoz von schulden klagen,
daz ich in allen mînen tagen
durch mînen tumblîchen wân
alsô vil gedienet hân
valscher ungetriuwer diet,
diu sich von mîner helfe schiet,
dô ez mir an daz leben gie,
und daz ich dem gediende nie,
des triuwen helflîcher trôst
mich von dem tôde hât erlôst. »>
< meister, daz bescheide mir>
sprach jôsaphât,< daz ist mîn gir.>
< daz tuon ich, merke disiu wort.
rîchtuom, guot und grôzer hort
und dirre welte gewalt
zem êrsten vriunde sint gezalt,
durch diu dem man vil arbeit
in dirre welt muoz sîn bereit.
êre, lîp, sêl unde muot
wâget der man umbe guot,
wie er des gewinne vil.
sô denne kumt des tôdes zil,
der gotes wîzenaere,
sô klaget er sîne swaere
dem guote. er seit im sîne nôt:
sô gît ez im in den tôt
ze stiure ein krankez tüechelîn.
daz sint diu hemede haerîn,
diu jener sînem vriunde gap:
daz gît im sîn guot in daz grap.
ez lougent sîn ze vriunde dâ.
ze vriunde erkiuset ez im sâ
die lebenden unde lât in dort.
den bezeichent sus der hort.
der ander vriunt die mâge sint:
wîp, vater, muoter, bruoder, kint,
durch die der man ze aller zît
got, sêle unde lîp begît.
wie hoerent diu des mannes klage?
wie helfent sie im an dem tage,
sô im der tôt ein ende gît?
vil jâmerlîche er gelît.
sie sehent smâhlîche dar
und nement sîn ungerne war.
sie schouwent leiders niht bî in,
sie kêrent dar an gar ir sin,
wie er kome ir ougen abe.
sie volgent im biz zuo dem grabe:
als er danne wirt geleit,
an ir unmuoze arbeit
gânt sie schaffen hein ir dinc.
sie kêrent allen ir gerinc
an guot und vergezzent sîn;
sie tuont im kleine helfe schîn.
sîn minne ist hin, sô er gelît.
sîn liebe swînet alle zît.
der dritte vriunt unmaere,
der sô leit und sô swaere
was des mannes ougen gar
und sîn doch nam mit triuwen war
und im in des tôdes nôt
mit trôste sîne helfe bôt,
daz sint diu reinen werc vil guot,
diu man durch got alhie tuot:
gebet, almuosen, güete,
geloube, triwe, dêmüete,
gotes und des naehsten minne
mit unvalschlîchem sinne,
der man alsô kleine wart
und doch ir helfe ist ungespart
und ir vil trôstlîcher rât
dort, dâ ez an den ernest gât,
dâ wir müezen rede ergeben,
wie wir leiten unser leben.>
jôsaphât sprach aber dô:
< dû hâst mîne sêle vrô
gemachet, liebester man,
und wol gewîset mich dar an,
wie ich die welt erkennen sol.
des sîst dû vreuden iemer vol
bî gote, dem herren dîn.
nû sage mir durch den willen mîn
von dirre welte üppekeit,
der si alsô manege treit,
noch ein ander ebenmâze
und wie man sî sô lâze,
daz man von ir sicher var
mit unverirten vreuden gar.>
daz tet der alte, als er in bat.
er sprach:< wîlent was ein stat
grôz und guotes rîche,
dâ man vil wunderlîche
vremeder site manigen tac
vil gewonlîche phlac.
iemer aller jaergelich
vlizzen des die burger sich,
daz sie dar brâhten einen man,
der ir ê künde nie gewan
und den daz jâr ze künige dâ
nâmen unde im swuoren sâ.
der hâte aldâ daz eine jâr
sînen willen, daz ist wâr,
daz im nâch sînem muote
mit lîbe noch mit guote
niemen niht versagete
daz jâr, swaz im behagete.
sô er denne lebete alsô
und sîner werdekeit was vrô,
sô dâhte er, daz sîn êre
belîben iemer mêre
solde nâch dem willen sîn:
sô wart im vil balde schîn
sînes gewaltes ende gar.
nâch dem jâre kômen dar
die burger unde viengen in.
durch ir vîentlîchen sin
nâmen sie im die krône,
sie zugen in vil unschône
nackent gar durch al die stat:
sie tâten sînen vreuden mat.
dar nâch wart er schiere gesant
in ein vremedez einlant,
dâ er von hungers nôt verdarp,
von vroste und von unrâte erstarp.
dâ was im nôt und arbeit
ân alle zuoversiht bereit.
dâ muoste er arnen daz gemach,
daz im in der stat geschach.
in dem lande was enwiht
sîn vreude und al sîn zuoversiht,
wan er dâ muoste in leide wesen
und des tôdes ungenesen.
diz was der burgaere site,
dâ lônden sie ir künegen mite,
nieman sie des erliezen.
die ir künege hiezen,
sie muosten lîden solhen pîn
und nâch ir vreude in kumber sîn.
nû wart ein künic dar genomen,
der was sô gar vollekomen,
daz im an tugenden niht gebrast.
er was vor allem wandel gast
nâch dirre welte prîse.
milte, kiusche und wîse
was er mit siten unde guot.
er kêrte dar an gar den muot,
wie er mit sînem guote
nâch wîslîchem muote
sîn dinc ze wîsheit kêrte.
sîn witze in alsô lêrte,
daz er mit ganzer staete
daz beste gerne taete.
nû was bî im ein wîser man,
der gewarnet in dar an,
wie diu gewonheit was getân.
er seit im, daz er müeste lân
vil schiere leitlîche
daz zergänclîche rîche
mit arbeitlîchem ende
und in ein vremde ellende
ze jungest würde gesant.
dô im daz maere wart erkant.
er was dem râtgeben holt.
vil gesteines, silber, golt
sante er vor im in daz lant
bî getriuwer liute hant:
die brâhten ez zer inseln hin,
dâ man in wolte senden in.
dô sîn gewalt ein ende nam,
des jâres zil an'z ende kam,
dô kâmen die burgaere gar
nâch ir gewonheit aldar
und nâmen im sîn êre.
sie sluogen in vil sêre
nackent durch die stat alblôz.
als ê manic sîn genôz
wart er hin in daz einlant
von dem rîche dô gesant.
die ê dar komen wâren
dâ vor in manegen jâren,
die hâten maneger hande leit
von maneges mangels arbeit,
wan sie dar ê niht brâhten
und niht vür sich gedâhten,
dô siez möhten hân getân.
der arbeit wart der künec erlân,
wan er sante vor im dar
die êwiclîchen lîpnar
bî der getriuwen boten hant,
die im sî brâhten in daz lant.
dise trügehafte welt
unde ir trügelîchez gelt
und ir unstaetez rîche
soltû bezeichenlîche
bî dirre stat merken wol:
wan si ist untriuwen vol.
ir künegen ez alsus ergât,
di si ir jâr ze künegen hât.
die burger wil ich nennen.
dû solt daz wol erkennen
daz ez die leiden tiuvel sint,
die unser sinne machent blint,
daz wir der welte unstaetekeit,
ir süezez sûr, ir liebez leit
wol sehen und niht wellen sehen
und unsern sinnen des verjehen,
ir guot daz sî ein staete guot.
sus triuget ir rât unsern muot,
daz wir des haben gewissen wân,
wirt uns vil guotes undertân,
daz ez uns mit staete sî
staete ân ende iemer bî.
sô sie uns sô betriegent
und mit geheizen liegent,
biz daz wir in der selben stat
ze künege werden gesat
( ich meine, in grôze rîcheit):
ez sî uns liep oder leit,
sô wir gewalt waenen hân,
sô müezen wir daz rîche lân,
wan des tôdes endezît
uns den burgaeren gît.
von den werden wir geslagen:
sie beginnent uns verjagen
durch die stat hin in daz lant,
daz der sêle wirt benant.
dâ vinden wir die lîpnar,
die wir vor uns senden dar,
deweder minner noch mê.
dâ ist anders niht wan wê
und iemer leitlîch ungemach,
angest, leit und niht wan ach.
swaz bî gewisser boten hant
in daz rîche wirt gesant,
daz wirt dâ behalten wol
dem, der ez dâ vinden sol.
der râtgebe, daz ist ein man,
der wol mit saelden râten kan
und der die rehten wârheit
dem man mit rehter lêre seit,
als ich bin zuo dir gesant,
daz ich mache dir bekant,
daz ich gelernet selbe hân,
wie disiu welt sol zergân.
die minnet ich unz an die stunt,
daz mir wart ir unstaete kunt,
ir kurzez liep, ir langez leit,
als ich dir hie vor hân geseit.
gedenke, herre, wol dar an:
swer daz lieht treit vor dem man,
daz ez wol ze gesihte kumt,
daz nâchgênde wênic vrumt.
die gesiht man schône hât
vor dem liehte, daz vor gât.
ez vrumet wênic oder niht
in der vinster an der gesiht
daz man nâchgênde treit.
zer êweclîchen staetekeit
vrumt daz vor hin wirt gesant
in daz gediente lônes lant:
dar hân wir eine lange vart.
wir müezen uns wol hân bewart
ûf disen wec mit spîse
in maneger hande wîse,
oder uns wirt diu kraft benomen
ê daz wir hein ze lande komen.
her an gedenke in wîser kür
und sende dîne spîse vür.
wan wildûz an iemen lân,
dû maht ir wol mangel hân.
die minnent dirre welte guot,
die lebent als ein tûbe tuot,
sô sî ein ar besezzen hât,
dâ si ûf einem boume stât:
si vürhtet sêre sînen zorn,
si vert dâ bî in einen dorn
und wider ûf den boum zehant,
von dem in eines steines want
oder in ein ander mûre:
in vliehender natûre
lebet si gên dem vederspil.
alsô tuont, die guotes vil
hânt mit rîcheit manicvalt:
die vürhtent weltlîchen gewalt,
und maneger arbeit überkraft
von ir guote und vîentschaft.
sie vürhtent des und wenkent dar.
sô vliuhet aber anderswar
von vorhte ir angesthafter muot,
wie behalten werde ir guot;
den ist von ir rîcheit wê.
sô hânt die swaere vierstunt mê,
die mit grôzer armuot
sunder danc sint âne guot;
des rîchen zwîvellîchez guot,
des armen klagendiu armuot
sint eine wîle in solher nôt:
doch verendet sî der tôt.
diz ist der welte kumber grôz,
des ze sehene mich verdrôz.
ich gedâhte: haete ich guot,
des vörhte ich, als der rîche tuot.
ouch dâhte ich grôzer swaere,
ob ich es âne waere.
der welte rîcheit unde ir guot
liez ich unde ir armuot
und kêrte an got mînen muot,
wan iemer staete wert sîn guot:
dar nâch dienich ûf sînen trôst.
daz ich bin von der welte erlôst.
des sî im iemer mêre
genâde, lop und êre.>
dô sprach der guote jôsaphât:
< nû gip mir dar zuo dînen rât.
bî wem sol ich senden dar
mîn guot, swenne ich hinnan var,
daz ez mir dort sî bereit
mit vreude, als dû mir hâst geseit,
und daz ich staete vinde dort
den iemer mêre staeten hort?>
< bî gotes dürftigen hant
solt dûz senden in daz lant.
daz almuosen, dêst daz guot,
daz dich dort nert vor armuot,>
sprach des herren lêrer dô.
der behalter sprichet sô:
< gên der sêle huote
von disem übelen guote
sult ir iu vriunde erwerben,
swenn ir müezet verderben.
daz sie iuch niht versmâhen
und iuch danne enpfâhen
in diu êwigen gezelt.
dirre broeden welte gelt
heizet er daz übele guot,
daz uns dort vil gnâden tuot,
dâ uns niht anders wirt gegeben,
wan daz hie koufet unser leben.
got enphâhet zaller zît
swaz man durch in den armen gît.
daz gotlîch urkünde
lêret uns die sünde
mit dem almuosen swenden,
von dirre welte senden
bî kranker dürftigen hant.
wirt dir herzenlîche erkant
diu süeze gotes lêre
ie mêre und aber mêre,
sô wirt dir diu welt ein spot
und liebet dînem herzen got,
swenne dû gedenken muost,
ob dû sînen willen tuost,
daz er dir êwiclîche gît
der êwiclîchen vreuden zît.>
jôsaphât sprach aber dô:
< nû seit mir dîn lêre alsô,
daz ich süln lân der welte guot
und durch got dulten armuot.
gebuten daz die wîssagen
und die boten bî ir tagen?
ist diu lêre von gote brâht
oder hâstû es erdâht
und ander die genôze dîn?
sol ez ein niuwe lêre sîn,
als ungedultige arbeit
lîden, als dû hâst geseit,
und dâ mit ängestlîche
gedienen gotes rîche?>
dô sprach er:< nû enwelle got,
daz ich dich dekein gebot
bewîse an disen stunden,
daz nû sî niuwe vunden.
daz von alter her ist komen,
als ez von gote wart vernomen,
daz lêre ich dich und anders niht,
als uns diu schrift von gote giht.
ein rîcher man der bat krist,
daz er in lêrte solhen list,
mit wie getânen witzen
er solde dort besitzen
des êwiclîchen rîches leben.
nâch der lêre wolder streben
und wolde ir gerne walten
mit werken wol behalten.
« wildû daz tuon? » dô sprach er: « jâ! »
dô sprach unser herre sâ:
« nû ganc und tuo dich dîner habe
gar durch mînen willen abe
und gip sî armen liuten hin,
sô wirt dir hundertvalt gewin
ze himel und iemer staeter hort.
tuo mîne lêre und mîniu wort!
lâ dir nâch mir wesen gâch,
heb ûf dîn kriuze, gâ mir nâch! »
der rîche hâte vil grôz guot,
diu lêre truobte sînen muot.
dô daz unser herre sach,
zuo dem rîchen man er sprach:
« hei! wie kumberlîche
kumt in daz gotes rîche
swer hât der welte rîchez guot,
wan in der weltlîche muot
vil kûme von dem guote lât.
durch einer nâdel oere gât
ein olbende senfteclîcher,
danne ein weltlich rîcher
ze gotes rîche müge komen,
im werde diu bürde abgenomen
des unvertigen guotes
und weltlîches muotes. »
diz lêrte der gewaere got.
dise lêre und ir gebot
durch in vil manic man begie,
der durch sîne lêre lie
die weltlîchen rîcheit,
als dir hie vor ist geseit.>
< wie kumet daz,> sprach jôsaphât,
< daz disiu lêre und ouch der rât
ze alsô grôzen saelden kumt
und iemer êweclîche vrumt,
daz sich als unmanic man
mit rehten werken wendet dran?>
< gnuoge volgent, maneger niht.
der lêre man uns volgen siht
manigen, der dem râte
mit willen volget drâte.
doch ist der michels mêre,
die widerstânt der lêre.
des merke ein ebenmâze:
eine wolgebante strâze
vert man vil baz die lenge,
dan daz man die enge
durch rûhe dorne dringe
und arbeiten sich twinge.
vür der welte grôz gemach
( als got unser herre sprach)
die wîten strâze maneger vert.
den engen stîgen ist beschert
vil wênic iemen, der sie var.
man vert die wîten strâze gar,
diu gên des tôdes porte gât.
der enge stîc verwahsen stât,
wan der vil wênic ist erkant,
von den er werde gebant.
an swen der welte gîtekeit
ze einem mâle wirt geleit,
der muoz ir zallen stunden
alsô sîn angebunden,
daz er ir niht entrinnen mac.
swen sô verhaget der welte hac,
der rihtet kûme sich von ir
und von ir gîteclîchen gir.
swie man ungerne hoere
und michels gerner stoere
die gotlîchen lêre gotes,
sô ist der rât sînes gebotes
reht unde unwandelbaere.
ist er ze tuonne swaere,
sô wirt er doch durch die geschiht
ze unrehte vernihtet niht.
der sunnen schîn ist reine
und der welte algemeine
ein lieht und eines liehtes schîn:
swer birget sô diu ougen sîn,
daz er sich von im kêret
und in dâ mite unêret,
der muoz grîfende gân
und alles liehtes sîn erlân
und lîhte strûchen in den graben
des wirt jener überhaben,
der in dem rehten liehte gât
und sînen schîn im liuhten lât.
sus ist ez umb daz gotes wort:
mit lêre ez manigen man bekort,
der im vil toubez ôre tuot
und kleine bezzert sînen muot.
swer in sînem liehte gât
und im daz lieht entliuhten lât,
der gêt eben, er vallet niht,
sô man jenen strûchen siht,
der ez gar versmâhet hât
und von dem liehte in vinster gât.
alsus verirret maneges muot,
daz er niht nâch der lêre tuot.>
< nû sage mir, lieber meister, daz
und wîse mich noch vürbaz:
ist nû iemen mêre,
der dise selben lêre
sage als dû sî hâst geseit?
des sage mir eine wârheit.
oder seistû die lêre eine,
daz dû mit solhem meine
vermeinet hâst der welte leben,
in dem wir alle gelîche sweben?>
dô sprach der wîse meister:< jâ,
in allen rîchen anderswâ
ist disiu selbe lêre wert,
dâ man ir willeclîche gert.
nû ist niemen mir bekant
über al diz unsaelige lant,
der dise lêre künde hie,
wan dînes vater vorhte nie
dekeinen hie belîben liez,
wan er sie verderben hiez
mit maniger grôzen vreise.
des ist daz rîche weise
der selben süezen lêre.
man minnet sî vil sêre
über manic irdisch lant.
disiu lêre tuot erkant
daz leben und die kristenheit,
als ez die boten hânt geseit.
durch daz bin ich zuo dir gesant,
daz ich dir diz mache erkant.>
< meister, sage mir mêre.
gelernete die lêre
mîn vater ie bî sînen tagen?>
er sprach:< er hôrtez dicke sagen,
doch bescheidenlîche niht.
im ist guotiu lêre enwiht.
würde im übels iht geseit,
dar zuo waere sîn sin bereit.>
< nû wolte ich, daz erz kunde
und daz sîn muot bevunde
dise lêre und dînen rât,>
sprach der guote jôsaphât.
der alte sprach:< jâ, daz woldich.
der welte ist vil unmügelich,
daz gote muoz mügelich sîn.
waz ob dû dem vater dîn,
von dem dû nû bist geborn,
ze vater wirdest noch erkorn?
der rede solt dû dich verstân,
als ich sî gesprochen hân.
in bezeichenlîcher wârheit
hân ich dir sî vürgeleit.
dîn lêre in ze sune gebirt,
ob er von dir behalten wirt.
diu dinc ungelouplich sint,
daz dir dîn vater werde ein kint.
der welte ez ungelouplich ist:
dînes vater kint dû bist,
der wirt ze kinde dir gegeben,
wîsestû in an daz leben.
ich hôrte sagen ein maere,
wie ein rîcher künic waere,
der lebete lobelîche.
vil edel unde rîche
was er ie bî sînen tagen.
man sach in sîne krône tragen
werdeclîche manegen tac:
des landes er mit zühten phlac.
im was gar der wunsch bereit
nâch dirre welte werdekeit.
des einen im doch gebrast:
er was des gelouben gast,
diu apgot er betet an.
nû was bî im ein guoter man,
den hâter zeinem râtgeben.
der hâte ie vil gar sîn leben
gewant an gotes wîsheit.
dem was herzeclîche leit,
daz der künec diu apgot
êrte durch des tiuvels spot.
so ers in gestrâfet wolte hân,
sô muoste erz durch vorhte lân.
nû suochte er manege zît die stun
wenn im diu vuoge würde kunt,
daz er im nâch dem willen sîn
mit guoter lêre taete schîn
von dem gelouben etwaz.
vil lange sûmde sich dô daz.
dô diz sô lange was bewart
und im diu state vor gespart,
im was diu vuoge gar verseit,
daz er von der kristenheit
dem herren niht getorste sagen.
diz begunder sêre klagen,
daz er die rede muoste lân.
der künic sprach: « wir solden gân
durch kurzwîle vür die stat,
ob uns der kurzwîle phat
iht nützer dinge wîse hie. »
mit dem künige er dô gie.
nû sie ergiengen sich alsô,
sich begunde in ougen dô
ein lieht, daz gap vil liehten schîn
durch ein engez löchelîn.
dô sie des wurden gewar,
sie huoben sich vil balde dar,
der künic unde sîne man,
dâ daz lieht sô schône bran.
des nam sie michel wunder.
dô sâhen sie hin under:
in der erde was ein hol,
dar inne sich mit vuoge wol
ein man enthalten mohte,
dem ez ze hûse tohte.
diz was ein gotes armer man,
der truoc diu boesten kleider an,
diu der künic ie gesach,
als er dâ mit der volge jach.
der vor dem selben loche saz.
sîn wîp ir dienstes niht vergaz,
si brâhte im ein liehtez glas,
dar inne im bereitet was
sîn trinken. daz truoc si im hin.
als erz genam, si stuont vür in,
mit vreuden trat si unde spranc,
si sanc den süezesten sanc
vil vroelîch unde schône,
gar in dem besten dône,
den ir dekeiner ie vernam,
der dar mit dem künige kam:
si lobte ir man mit vreuden grôz.
den künic aldâ niht verdrôz,
er naeme es vlîzeclîche war.
sie wundert algelîche gar,
daz disen liuten was bereit
von armuot diu groest armekeit,
diu in dâ vor ie wart erkant,
und daz sie hûs noch gewant
hâten von grôzer armuot,
daz sie sô gar ân allez guot
mit grôzer vreude ir leit vertriben
und alsô rehte vrô beliben
in dem selben hol aldâ.
dô sprach der rîche künic sâ
ze sînem lieben râtgeben:
« sich, wie daz ärmeste leben,
daz dirre welte künde hât,
in den hoehsten vreuden stât!
mir und dir was ie verseit
in mîner grôzen rîcheit
alsô vreuderîchez leben,
sô disen liuten ist gegeben,
die in sô grôzen vreuden lebent
und in der hoehsten armuot swebent,
die ich vernam oder ie gesach. »
dem râtgeben dô verjach
diu zît, daz er dâ solde
wol sprechen, swaz er wolde.
er sprach: « vil lieber herre mîn,
nû sage mir durch die hulde dîn,
wie saget dir von in dîn wân,
daz ir leben sî getân? »
« daz ärmest und daz boeste gar,
des mîn ouge ie wart gewar. »
« jâ, herre, dunket dich alsô? »
sprach der râtgebe dô.
« jâ, wan ich ez hân gesehen. »
« nû lâ mich dir der wârheit jehen.
swes dû an in verwaenest dich,
des verwaenent sie ouch sich
nâch dem selben wâne an dir.
dû solt gelouben, herre, mir,
daz in dîn rîcheit und dîn guot
vürbaz ist ein armuot
danne dir ir armuot sî.
der selbe wân ist staete bî
allen den, der herzen leben
der welte leben hât begeben.
swer schouwet herzenlîche
daz êwige rîche
und die gotlîchen schônheit,
die got mit staete hât bereit
ze iemer werndem lône
mit einer staeten krône,
diu mit vreude ân endes zît
wert und niemer ende gît:
den dunket gar diu welt ein niht
und swaz man ir ze rîcheit giht,
wan dem ein ende wirt gegeben.
sie dingent ûf ein künftic leben.
daz mit vreuden iemer stât
und iemer vreude ân ende hât.
an daz iemer lebende guot
stêt ir gedinge unde ir muot. »
der künic vrâget in vürbaz:
« nû sage mir rehte, wâ ist daz
bezzer leben, dan wir hân?
wer hât daz leben, daz niht zergân
in staeteclîchen vreuden sol? »
« daz kan ich dir gesagen wol:
got, des rîche niht zergât,
dâ rîcheit armuot in niht lât,
dâ vreude trûren ûz verjaget,
dâ leit mit liebe wirt versaget,
dâ minne haz vertrîbet,
dâ vreude und liep belîbet,
dâ niemen sorge vindet,
dâ klagendiu nôt verswindet,
dâ kumber, arbeit, jâmer, zorn,
sint verwâzen und verlorn.
swer in die vreude komen sol,
dem ist ân ende iemer wol.
die sich ûf den gedingen lânt
und des wân mit vreuden hânt,
daz sie her nâch noch komen dar,
die hânt der welte kleine war.
die dunken wir alsam sie dich. »
der künic sprach: « nû wîse mich,
wie diu strâze sî getân,
die man sol des endes gân. »
« got mit gelouben nennen,
mit werken wol erkennen
sîne kraft, und daz krist
ein got in drin namen ist,
gewaltic und gewaere,
aller dinge schephaere. »
des küneges küneclîch vernunst
hâte keiserlîche kunst.
daz wort hât er vil schiere vernomen
und was an den glouben komen.
er sprach: « owê, wer irte dich,
daz dû nû sô lange mich
der guoten rede hâst verholn.
und alsô lange vor verstoln,
daz man hie bejagen mac
ein iemerleben ân endes tac?
mîn herze dirre lêre gert:
si ist mir süeze, niht unwert,
wan ich der welte kurzez leben
wil umb die langen vreude geben.
daz ich hie von vernam niht ê,
daz tuot mînem herzen wê. »
« diz liez ich, herre mîn, durch daz:
ich vorhte, daz ich dînen haz
müeste hân und dînen zorn
und dîne hulde hân verlorn.
ich liez ez niht durch unwert:
ob dîn hôhiu wirde gert,
daz ich dir iht mêre
sage von dirre lêre,
daz tuon ich sunder widerstrît
mit willen gerne zaller zît. »
« jâ, gerne! » sprach der künic dô.
« ze allen zîten bin ich vrô
der lêre und dirre süezen sage.
ich wil niht sprechen alle tage,
ze aller zît und alle stunt
solt dû mir ez machen kunt. »
mit werken wart diu lêre vol.
wir hân vür wâr vernomen wol,
daz er nâch gotes willen ie
gotes gebot nie übergie
und daz sîn reineclîcher muot
gar verkôs der welte guot
umb die êwiclîchen krône,
diu im sît wart ze lône,>
sprâch barlââm der alte dô.
< ez möhte noch ergân alsô
an dem lieben vater dîn,
daz er dir taete volge schîn.
sô diu zît gevüeget sich,
daz er gerne hoeret dich,
waz ob er des tiuvels rât
durch dîne lêre denne lât
und gote wirt ze kinde erkorn
und anderstunt von dir geborn?>
dô sprach aber der junkherre:
< swaz mînem vater werre,
daz büeze im unser herre got,
als ez gebiete sîn gebot.
dem sint, als dû wîsest mich,
älliu dinc vil mügelich,
diu menschlîcher wîsheit
sint unmügelich geseit.
nû hân ich in die sinne mîn
genomen gar die lêre dîn
und weiz die kranken üppekeit,
die dirre welte broede treit,
und hân des vil guoten wân,
daz ich wil bî dir bestân,
biz daz ich nû geleben mac,
unz an mînes endes tac,
daz dirre welte unkiuschiu gir
daz leben iht verliese mir,
dem niht endes wirt genant.
dû taete mir hie vor bekant,
daz got behalten habe ein leben,
daz welle er den sînen geben,
daz sî sô süeze und alsô guot,
daz ez nie menschlîcher muot
noch herzen sin gedâhte
noch ôre vollebrâhte
noch zungen ort vollesprach
noch ougen sehe nie gesach.
mag ich daz gotlîche guot
mit geistlîcher armuot
in dirre welte hie bejagen?
daz solt dû mir mit bîschaft sagen.>
barlââm sprach vürbaz:
< junkherre, wil dû daz?>
< jâ, meister mîn, vil gerne
die bîschaft ich hie lerne
und wil mit willen volgen ir
nâch dîner lêre unde dir.>
< sô muost dû werden gelîch
einem edelen knappen rîch:
der was geborn von hôher art.
sîn geslähte was bewart
vor missewende unz an ir zil.
dar zuo sie hâten guotes vil:
ir lop behielt der welte prîs.
der knappe was guot unde wîs
unde an der hoehsten tugent
ûzgenomen in sîner jugent.
nû dirre knappe wîse
lebet in sô hôhem prîse,
sîn saelde wuohs, sîn lop, sîn lîp.
sîn vater mahelt im ein wîp,
diu lebete ouch in rîcher zuht.
von der hoehsten herren vruht,
die man in dem lande
an edelkeit erkande
und ouch an grôzer rîcheit,
was si geborn. ir was bereit
in schoene wîplîcher prîs.
dô man dem knappen wîs
der gemahelschaft gewuoc,
in sînem muote er nâher truoc
und ouch in sînem sinne
die gotlîchen minne.
dô gedâhter im alsô:
« diz solde sîn, ich waeres vrô
und minte ez in dem muote,
daz ir mit rîchem guote
solde ein armer sîn erkorn,
der waere von edelkeit geborn,
und daz ich ein arme naeme:
gên gote daz gezaeme. »
sus gedâhter sîn verlorn,
ob im solde sîn erkorn
der welte zwîvalter ruom
und zweierhande rîchtuom.
vür diz allez minnet er got
und wolde sîn durch sîn gebot
in dirre welte ein armer man.
von sînem vater er entran,
sîn guot er dort belîben lie.
von sînes vater lande er gie,
ze gote stuont sîn witze.
nû twanc in starkiu hitze,
diu in hâte in heizer phlege,
daz er kêrte von dem wege
gên einer einoede dan.
dâ hâte ein alter armer man
gehûset hin durch sîn gemach.
vor des tür er sitzen sach,
dar er von hitze was verjaget,
eine schoene reine maget,
diu des alten tohter was.
ir munt vil andaehtlîche las
von herzen gote ir gebet.
ir werc si mit den henden tet,
als si es bedorfte gar.
dô nâhte der junkherre dar,
dâ er ir lop hôrt unde sach;
nâch gruoze er zuo der megde sprach:
« liebiu maget, nû wîse mich
ein teil, des ich vrâge dich. »
« nû vrâg an! ich sage dir
swaz dû wizzen wilt von mir. »
« sô sage mir, vrouwe, durch dîn heil,
wes dû von gote sîst sô geil,
daz dû in lobest sô sêre?
dû lobest in vürbaz mêre
in dîner grôzen armuot,
dan ieman, der rîchez guot
unde wunschlîchen rât
nâch dirre welte wunsche hât. »
dô sprach diu sinnerîche maget:
« wart dir nie niht dâ von gesaget,
daz hôher siechtuom dicke rât
von kleiner erzenîe hât?
den man tuot ouch vil ofte erlôst
von hôher swaere ein kleiner trôst.
als ist ez umbe gotes gebot:
teilet unser herre got
iemen kleiner gâbe teil,
der sol es doch wesen geil
und sol es im genâde sagen;
sô mac sîn gedult bejagen
von gote vürbaz groezer gebe,
ez sî nâch tôde oder unz er lebe.
eins alten armen kint ich bin:
umbe disen kleinen gwin,
den mir got gegeben hât,
sô ist mînes herzen rât,
daz ich got iemer loben wil,
wan er gnâden hât sô vil.
dâ des kleinen im gewalt
gegeben ist, dâ ist gezalt
diu groezer gâbe sîner hant.
daz unsern ougen ist erkant
ûzerhalb an der gesiht
daz bestât uns wênic iht:
ich meine der welte rîcheit.
der ir vil ze samene leit,
alse kleine ir im bestât
sô dem, der ir vil wênic hât.
hât der rîche grôzen hort,
waz wahset dem, waz swînet dort
dem armen, der sîn kleine hât,
sît sie niht daz reht erlât,
in müeze ein ende sîn beschert,
des sich niemer lîp erwert?
got hât nâch gotlîchem site
daz groeste mir geteilet mite,
der rehte nôtdürftigen teil,
daz ist daz menschlîche heil.
deweder wîp noch wîser man
die guottât vollesprechen kan,
die ich von gote enphangen hân:
ich bin gelîche getân
dem süezen antlütze gotes;
der gewalt sînes gebotes
hât mir gegeben solhe kunst,
daz ich mit sinnen hân vernunst
und übel unde guot verstân
und daz ich des wol künde hân,
daz der einborne krist
aller dinge schepher ist
und daz sîn vil süezer rât
mich an sich geladet hât,
daz er mir êwiclîche gît
der himelischen gnâden zît,
ob ich ez gediene umb in.
durch disen grôzen gewin
lobich in iemer mêre.
ob ich in sô grôzer êre,
die der arme und der rîche
enphâhent ungelîche,
niht lobete, sô müestich wol toben.
nû wes wolde ich danne loben
mînes schephaeres kraft,
diu mit ir wîsen meisterschaft
mir rehten sin, witz unde leben
nâch sînen witzen hât gegeben? »
dô dem knappen was geseit
alsus ir grôziu wîsheit
mit sinnerîcher lêre,
der witze erschrac er sêre,
daz ein sô jungez herze wielt
sô grôzer witze, als si dâ hielt.
der vater kam gegangen dô.
der junkherre bat in alsô:
« gip mir durch den dienest mîn
ze wîbe hie die tohter dîn,
wan ich hân durch ir güete
und ir grôzen dêmüete
und durch ir sin geminnet sî.
mir ist ir minne staete bî,
mich hât verwunt ir süeziu kunft,
ir witze, ir rede und ir vernunft
und ouch ir saelden rîcher lîp.
ich minne sî vür älliu wîp,
der ich künde ie mê gewan. »
dô antwurt im der alte man.
er sprach: « ez gezaeme niht,
sît man alsô rîche siht
dîne vriunt, den vater dîn,
daz dû die armen tohter mîn
ze einem wîbe soldest nemen.
ein rîchiu mac dir baz gezemen.
dû solt mîn niht spoten sô. »
der knappe guot sprach aber dô:
« benamen, mir ist ernest.
ich minne si aller gernest,
wil dû mir sî niht versagen.
ich mac dich des niht verdagen.
ich sî benamen der liute kint,
die edel unde rîche sint.
mir was gegeben ein werdez wîp,
diu hâte guot, vriunt unde lîp
nâch wunschlîchem muote,
an gebürte, an lobe, an guote.
daz liez ich gar: der tohter dîn
gert an dich daz herze mîn. »
« ich mac sî niht gegeben dir
sô daz dû vüerest sî von mir,
wan ich niht mêr kinde hân.
ich wil dir sî hein niht lân, »
sprach der vil alte grîse.
dô sprach der knappe wîse:
« des hân ouch ich deheinen muot.
wirt si mir, mich dunket guot
daz belîben hie bî dir.
ich wil mit guotem willen mir
dîn arbeit und ouch dîn leben
gar nâch dîner lêre geben. »
sus leit er von im zehant
sîn rîchez vürstlîch gewant
und nam sich grôzer armuot an
bî dem selben alten man.
der liez in alsô bî im dâ.
sîne kunst lêrt er in sâ;
houwen, riuten, stocke tragen
und durch nôt vil ofte klagen
manigerhande armekeit,
die er dienstlîche leit.
er began in sêre arbeiten
und in sîn leben leiten
anders, danne er waere gewon,
daz er nie sînen muot hie von
mit arbeitlîchen dingen
an zwîvel kunde bringen.
er began versuochen in
unde sînen staeten sîn,
daz im ze rehte würde schîn,
ob er kunde staete sîn.
den knappen niht behêrte:
swaz er an in kêrte,
daz dûht in lideclîche guot.
sich stâte sînes herzen muot.
er leit vil gar die arbeit,
diu an in ie wart geleit,
mit lîdeclîchem sinne
durch dirre megede minne.
dô der alte man ersach,
als im des knappen staete jach,
daz er niht durch spotlîchen sin
sîner tohter gerte an in,
und daz er dêmüetlîche leit
bî im sô manige arbeit
durch die sinnerîche maget:
dô dem man was unversaget
des junkherren staetekeit,
der tohter was er vil bereit,
diu wart im sâ gegeben.
des vreute sich ir beider leben:
dem vater und dem kinde
wart er ein liep gesinde.
er minnet sîn wîp und si in,
sie dûhte ein vreuderîch gewin,
daz sie einander solten hân.
sie wârn einander undertân.
der knappe nie den muot verstiez,
er taete, swaz sîn sweher hiez,
unz er sîn herze valschelôs
staete ân allen valsch erkôs.
der sweher zuo dem knappen sprach,
dô er an im die staete ersach,
diu nie mit zühterîcher tugent
betrouc an tugenden kindes jugent:
« reiner sun, vil liebez kint,
sît dir dîne vriunde sint
sô rîch, unwandelbaere
und dîn grôz guot unmaere
durch mîne tohter und durch mich,
sô wil ich ergetzen dich
des guotes, des dû hâst verlorn
( sît dû mir z'erben bist erkorn)
und wil dir guotes mêre geben,
dan dîn vater al sîn leben
und dîne vriunde gewunnen ie,
und guotes mê, dan alle die,
der tohter was geheizen dir. »
er sprach: « vater, swaz dû mir
liebes tuost, des bin ich vrô.
doch getar ich sprechen sô:
dîn munt hât nû geheizen mir,
des ich niht trôste mich an dir.
mîn herze in den gedanken nie
gedanc noch wân noch muot gevie;
mîn ouge hât des niht gesehen,
mîn zunge hât mir niht verjehen,
daz mînen ôren wol gezeme,
daz ich den geheiz verneme,
der mir gehieze sô grôz guot,
daz nie mîn herze noch mîn muot
noch mîn wân noch mîn verjehen
noch mîn gehoerde noch mîn sehen
des wol verjehen kunde,
daz ich gar dâ vunde,
dâ ez mir an dirre vrist
sô groezlîche geheizen ist. »
sîn sweher sprach, der alte man:
« sun, nû ganc mit mir dan,
ich lâze dich die wârheit sehen
und mê, dan ich dir hân verjehen. »
sus vuort er in in sîn gaden.
dâ sach er kisten wol geladen
bî grôzen schrînen ligen vol.
swaz er dar inne hâte hol,
daz sach er algelîche
von edelem golde rîche,
von silber und von gesteine
ervüllet algemeine
mê danne er ie gesaehe
oder im der sweher jaehe.
daz hiez er in allez hân
und machet ez im undertân.
er sprach: « sun, hân ich gelogen,
oder hân ich dich betrogen? »
« nein, vater mîn, ich muoz es jehen.
wan ich die wârheit hân gesehen. »
dô wart er guotes rîcher
und lebete rîlîcher,
dan alle sîne vriunde gar.
hie bî solt dû nemen war,
daz der gotlîche rât
den sînen mê ze gebene hât,
dan iemannes sin verjehe,
zunge, ôren oder ougen sehe
vinden künnen oder verstân,
als ich dir bescheiden hân.
der alte man, der bin ich.
wie, des lâ mich wîsen dich.
wil dû mîne tohter nemen,
diu mac dir niht wol gezemen,
dû volgest mînem râte
vruo und dar zuo spâte.
mîn rât dich lêret arbeit
hân, als mir ê was bereit,
unz ich versuochte dich sô gar,
daz ich bin an dir gewar
worden rehter staetekeit:
sô ist mîn tohter dir bereit.
daz ist diu gotes lêre,
die ich an dich kêre.
sô dich diu geminnet hât
und dînes herzen staeter rât
sî beginnet minnen
von herzeclîchen sinnen,
so ergetze ich dirre welte dich.
dîn erbe wirt sô rîlich
und dîner gülte grôz gewin,
daz ougen sehe noch herzen sin
nie gesach noch nie gedâhte,
noch rede nie ze ôren brâhte
deweder man noch wîbe.
daz ist nâch disem lîbe,
sô dir got machet undertân
swaz ich von im geheizen hân,
und dîner arbeit ende gît,
die dû bî des lîbes zît
durch dînen schepher dulten muost.
ob dû sô mîne lêre tuost,
sô gît er dir daz süeze guot,
daz deweder sin ouch muot
noch weltlich rât noch wîp noch man
der welte geebenmâzen kan,
daz al der welte wîsheit
ist unkunt unde gar verseit.>
dô sprach der gezogenlîche
jôsaphât der saelden rîche:
< genuoc gevuoge rüeret mich
disiu rede, wan des waenich,
daz si gesprochen sî von dir
bezeichenlîche her zuo mir.
nû sage mir, lieber meister guot,
wie wil dû vürbaz mînen muot
versuochen unde mînen sin?
mit willen ich gehôrsam bin
dîner lêre und dîner gir.>
er sprach:< ich lobe got an dir,
daz ich nâch dem willen mîn
dich sihe sô wol gehôrsam sîn.
ich sihe wol, daz dîn herze hât
reinen sin und süezen rât,
ze gote willeclîchen muot,
daz got dîn ende mache guot
nâch den grôzen hulden sîn
und nâch dem anevange dîn.
des biuge ich mînes herzen knie
vür got, mînen schepher, hie
und bite in durch die güete sîn,
daz er in dem herzen dîn
enzünde sînes liehtes glast,
daz dû gesehst, daz dû niht gast
sîst in sîner wünne grôz,
daz dû der boten sîst genôz
und der vil reinen wîssagen
und daz man dich sehe tragen
die krône bî der engel schar
ob menschlîchem künne gar.>
< daz welle got!> sprach jôsaphât,
< in des hant ez allez stât.
von dem sage mir mêre
mit dîner wîsen lêre.
war an sol mir diu gotes kraft
sîn erkant?> -< an der geschaft
sich grôziu wunder manecvalt,
der aller phliget sîn gewalt.
swer wol ein hûs gemeistert hât,
dâ prîset man des meisters rât.
sus merke gotes wîsheit,
diu himel und erde slôz treit.
daz stêt gar in sîner hant,
des ist er schepher genant.
âne in möhte niht gestân;
wolt erz niht geboten hân,
wie möhtez sich enthalten?
wer möhtes alles walten
sô lange ân eine sunderkraft,
ân einege eine meisterschaft,
ân einen wernden gewalt?
geschephede alsô manicvalt
ez besliuzet gar sîn list.
hie merke, ob er gewaltic ist:
ein hûs geraetes vil verbirt,
ist ez âne wîsen wirt;
ungeraete ez gar verbirt
hât ez einen wîsen wirt;
an dem hûsgeraete gar
nimt man ie des wirtes war.
ein schif kan selten rehte gân,
ez müeze wîsen schifman hân.
sus sol der welte geschaft
ougen dir die gotes kraft:
des himels lieht nû lange stât,
daz ez sich niht geselwet hât.
sternen, mâne, sunnenglanz
sint unverwandelt unde ganz.
diu erde niender müede phligt,
swie grôz der berge swaere wigt.
der brunnen ursprinc truckent niht:
swie man elliu wazzer siht
kêren in daz mer ir vlôz,
sîn übervluz wirt niht sô grôz,
daz ez iemer übergê.
noch ist der gotes krefte mê,
noch sô vil mêr, und waere ein munt,
dem alle zungen waeren kunt,
dêr die eine solde tragen,
die man ie gehôrte sagen
und den ie vernunstlîch leben
von anegenge wart gegeben,
der möhte vollesprechen niht
die witze, der man gote giht.
der hât uns ein teil geseit
der wîssagen wîsheit
und die zwelfboten hêre
mit ir vil süezen lêre.
von gotes witzen sprichet sus
der wîse bote paulus:
« oy, diu grôze rîcheit gotes!
der kunst, der wîsheit sîns gebotes!
wie unspüric, wie unbekant
sîne wege sint gebant!
sînes gerihtes meisterschaft
verborgenlich, unzalhaft! »
sît diz der gewaere bote,
der gezucket wart ze gote,
von gotes kraft gesprochen hât,
wie möhte danne unser rât
vürbringen sîne grôze kraft,
wan daz wir bî der meisterschaft
die er hât an die welt geleit,
erkennen sîne wîsheit?
der edel wîssage dâvît
von gote ein sölch urkünde gît:
« gotes güenlîcher gewalt
von den himeln ist gezalt,
sîner hende meisterschaft
zelt des firmamentes kraft. »
sus hât uns manic zunge
mit der bezeichenunge
von gotes wîsheit genant,
swaz sîner kraft uns ist erkant.
sîn kunst ez allez hât gewegen,
mit sunderwitzen kan er phlegen
alles des, daz namen hât
und mit gesiht sich schouwen lât.
er ist erbarmherze;
der sündelîchen smerze
ist er ein bezzeraere
reine und vil gewaere.
der sêle minner ist sîn name.
swer in kündet sunder schame
mit lêre vor den liuten
und sîne kraft wil diuten,
den kündet er vroelîche
ze dem himelrîche.>
< lieber meister, süezer man,>
sprach jôsaphât,< dîn munt wol kan
erkennen aller dinge hort.
dîniu vreudebaeren wort
sint mit solher wîsheit
mîner vrâge alsô bereit:
gedaehtest dû es iemer,
sô möhtestû doch niemer
mit sinnerîchen dingen
rîchern sin vürbringen.
dû hâst got und gotes gewalt
bescheidenlich alsô gezalt,
taet ez diu gotes kraft niht kunt
durch dînen witzerîchen munt,
sô möht ez niemer sîn geschehen,
daz dû es kundest sus verjehen.
nû sage mir, wie alt dû sîst,
daz dû sô wîse lêre gîst.>
barlââm sprach:< sage mir nû,
welhes alters vrâgestû?>
< des, in dem dir dîn leben
sin und leben hât gegeben.>
< sô versinne ich mich vür wâr,
ich habe vünf und vierzic jâr.
diu bin ich noch dâ her gewesen
in einer inseln genesen:
diu ist sennââr genant,
verre in dem mer ein einlant.
dâ was ich sider inne
durch unsers herren minne,
und ander bruoder, die dâ sint,
die gerne waeren gotes kint
und darumb dultent arbeit
bî mir in grôzer armekeit.>
jôsaphât sprach aber dô:
< wie seist dû, lieber meister, sô?
mich dunket des an dir vür wâr,
dû habest über sibenzic jâr.
dû dunkest mich von wârheit
elter, denn dû hâst geseit.>
barlââm sprach:< dû seist wâr:
ich hân wol diu selben jâr,
vrâgestû der jâre gar,
daz mîn muoter mich gebar.
swaz ich bî den zîten mîn
in den sünden bin gesîn,
des zel ich niht ze jâren dir
noch ze rehtem lebene mir.
swaz ich was in den sünden,
des wil ich dir niht künden,
daz ez mir ein leben sî.
mir was der tôt vil nâhen bî:
dô was ich in den sünden tôt,
als diu sünde mir gebôt.
sît dô mir des geistes leben
zeinem lebene wart gegeben.
dô lebet ich: alsô lebe ich sît.
sus wizzest mînes alters zît.
rehte leben daz ist daz leben;
den sünden ist der tôt gegeben.
der tôt ist in den sünden wesen,
reht leben tôdes ist genesen.>
dô antwurt im jôsaphât:
< sît des lîbes leben hât
den namen, daz ez heizet tôt,
ob ez hât von sünden nôt,
sô sol daz tôt ouch heizen niht,
sô man den lîp ersterben siht.>
barlââm, der wîse, sprach:
< mîn herze giht, als ez ie jach:
vindet mich mîn ende in gote,
daz ich bin in gotes gebote,
sô wirt des lîbes ende erkant.
daz ist niht der tôt genant,
ez ist ein scheiden in daz leben,
daz der sêle wirt gegeben.
diz wehsellîche scheiden gît
nâch tôde ein lebelîchez zît,
daz behalten ist von gote.
bezeichenlîche hât der bote
hie von alsus gesprochen:
sô diz hûs wirt zerbrochen,
daz uns daz irdische leben
zeinem hûse hât gegeben,
sô wirt uns ein hûs benant,
daz gar âne mannes hant
ze himele hât gebuwen krist.
mit klage ein siuftehûs diz ist,
jenz ist ein vroelîch staetekeit.
vindet man uns wol bekleit,
niht nackent âne reht gewant,
sô werden wir dâ hin gesant.
den minsten gotes knehte
nenne ich mich von rehte,
wan ich in sünden leider bin.
swie ich daz bin, ich hân den sin,
daz ich niht ûf des lîbes tôt
ahte noch ûf sîne nôt.
der sêle tôt mir nâher gât,
der endelôsez sterben hât.>
dô sprach avenieres kint:
< dîniu süezen maere sint
und dînes lebenes reinekeit
ûf menschlîchez leben geleit.
menschlîch natûre giht,
si müge sich dar genôzen niht,
dar dû bist komen in dîner zît.
vil saelic unde reine ir sît
dû unde die des muotes sint
daz sie werdent gotes kint,
der etelîcher ist bî dir.
meister mîn, nû sage mir
durch got, waz iuwer spîse sî
dir unde den, die dir sint bî
ze dirre wüesten wilde aldâ?>
dô sprach der wîse meister sâ:
< got hât uns dâ gevüeget
spîse, der uns genüeget.
unser koch ist gotes segen.
sunne, tou, hitze, regen
die spîse machent uns bereit,
als sî diu bernde erde treit
mit vil mîslîcher vruht.
mit minnen, gar ân unzuht
nemen wir sus alle zît
unser spîse, sunder nît.
wir leben vroelîche âne urbunst:
ez ist ieglîches gunst,
swie vil ir der eine hât,
dem andern ir genuoc dâ stât,
ob uns die boume entwîchent niht
und man die erde berhaft siht.
nû hân ich rehte dir geseit
die lîpnar, diu uns ist bereit.
diu sol und muoz uns dunken guot.
sô uns got die gnâde tuot,
daz uns bringent in der nôt
guote bruoder dar ir brôt,
die bî uns sint gesezzen,
sô wirt des niht vergezzen,
ez dunke uns reht, ez sî gesant
uns von gote mit ir hant.
wir biten sâ den gotes segen
der liute und ouch der sêlen phlegen
unde enphâhen ez von in
durch got und durch der sêle gwin.
unser kleit ist wüllîn,
rûch, vil herte, haerîn,
daz wir den swachen lîchamen
hie mite villen unde zamen,
des sünde wol gedienet hât
leit, ungemach und unrât
alhie durch kristes hulde
ze buoze vür die schulde,
die er ie tet wider got,
ze sünden wider sîn gebot.
vür die stunt, daz uns daz kleit
an den lîp wirt geleit,
sô tragen wir ez iemer
und getürren niemer
von uns gelegen daz gewant,
ê daz ez wirt als alt erkant
daz ez uns selbe rîset abe.
disiu kumberlîche habe
ist uns in gote ein rîchtuom
unde ein vreuden rîcher ruom,
daz uns werde noch bereit
der êwiclîchen vreuden kleit.>
< nû sage meister, lieber man,
wes ist daz kleit, daz dû treist an?>
< daz gap ein guoter bruoder mir,
dô ich wolte her zuo dir;
wan ich getorste mîn gewant
bringen niht her in diz lant>
sprach der alte wîse dô:
< ich vorhte dînes vater drô.
mich dûhte bezzer, daz ich mich
den liuten unerkantlich
machte, ê daz mîn gewant
mich dînem vater taete erkant.
vremediu kleider nam ich an
als ein listerîcher man,
der hâte einen lieben mâc,
der durch vîentlîchen bâc
was gevangen unde gesant
in sîner vîende lant.
diz beswârte disen man:
er wold im gerne helfen dan
und nam durch eine kündekeit
an sich rehte alsolhiu kleit,
sô die bekleidet giengen,
die sînen neven viengen.
er wart der vînde vriunt genant
durch daz erkantlîche gewant;
dem neven wart er heinlich,
zuo dem heinlîchet er sich,
unz er mit sînem trôste
von der vancnüsse in lôste.
alsô tet ich, herre mîn.
dô mir al daz leben dîn
nâch rehter sage wart erkant,
dô leite ich hin min gewant
und huop mich vremdeclîche
zuo dir her in diz rîche,
daz ich mit gotes râte
dir in dîn herze sâte
den kristenlîchen sâmen
und dich hie lêrte krâmen
den stein, an den geheftet ist
himel und erde, daz ist krist,
als ich dir ê hân geseit.
nû hân ich dir vürgeleit,
wie got die welt geschaffen hât
und wie in sîner hende stât
des himels und der erde kraft
und wie sîn wîsiu meisterschaft
allen dingen hât gegeben
kraft, namen, urhap, leben,
als ez sîn gotlîcher rât
mit wîsheit sunder gordent hât.
die boten und die wîssagen,
swaz die lêrten bî ir tagen,
des ist dir ouch ein teil geseit,
und daz urhap der kristenheit
und wie disiu welt zergât,
wie jaemerlîche ir leben stât.
nû mache dich got sô veste,
daz du minnest daz beste,
wan ich gar daz mîne hân
gên dir mit lêre getân.
nû muoz ich wider kêren.
ich getar dich niht mêr lêren,
mir ist ze sanfte ein teil gesîn
bî dir in dem rîche dîn.
nû muoz ich wider in daz lant,
von dem ich dir wart gesant.
dâ muoz mir aber sîn bereit
mîn gewonlîchez kleit.>
dô bat in dâ jôsaphât
die gewonlîchen wât
zeigen, die der guote man
truoc gewonlîchen an.
der bete was er im bereit:
er zôch ab im daz oberkleit.
dô truoc der reine gotes trût
ze lîche an sîner blôzen hût
ein hertez tuoch, haerîn
halp und halbez wüllîn,
daz vil herte was gedrât.
daz hâte er vaste an sich genât
von dem gürtel an diu knie;
von den ahseln nider gie
des tuoches, des ich hân genant,
ze lîche ein hertez gewant:
daz gie unz an daz under hin.
dô sach jôsaphât an in:
diu hût was im überal
erswarzet gar und worden sal,
er wart veizte an im betrogen,
er schein im, als ez waer gezogen
ein vel, dünn unde kleine,
swarz über ein gebeine.
dô jôsaphâte wart erkant
sîn armer lîp, sîn rûch gewant,
des er ze kestegunge phlac,
von der gesihte er sêre erschrac.
er sprach:< vil reiner man, sît dû
mir sîst ze trôste komen nû,
daz dû von dirre swaere
ûz des tiuvels kerkaere
von der welte loesest mich,
sô wil ich durch got biten dich,
daz dû des wol günnest mir,
daz ich von hinnen var mit dir,
wan ich in den senften tagen
vil unsanfte mac bejagen
daz süeze gotes rîche.
wan dû sô kumberlîche
dînem lîbe hâst gegeben
durch got ein als unsenfte leben,
wie sol ich danne hie genesen,
dâ ich muoz mit senfte wesen?
nû lâ mich durch den willen mîn
mit dir varn und bî dir sîn
und lâ mich iemer mêre
dir volgen dîner lêre,
sô nim ich den touf aldâ.>
< niht, herre!> sprach der meister sâ.
< belîp dû hie, dêst bezzer vil.
ein maere ich dir bescheiden wil,
an dem solt dû dich verstân,
daz diz vil bezzer ist getân.
ez was ein vil rîcher man,
der nam ze kurzewîle sich an,
daz er ein rêchkälbelîn
zôch in dem hove sîn,
unz ez wol gewahsen was.
ûf die heide und an daz gras
lie man ez zallen zîten gân:
dô newolt ez niht erlân
der natûre grôz gewalt,
sîn jâmer würde an im sô balt,
daz ez ie ze walde gie,
des ez nie sîn art erlie.
nû ez diz mohte niht verlân,
an einem tage sach ez gân
ûf einem velde tiere genuoc.
sîn art ez balde zuozin truoc
und gie mit in vil balde
ze velde und ouch ze walde;
doch nâch dem tage ze âbende ie
hin wider hein ez balde gie
und aber an die weide
des morgens ûf die heide.
nâch den tieren was im gâch:
swar sie giengen, ez gie nâch.
des sites wurden dô gewar
des herren amptliute gar
und sîne knehte. ez was in leit,
sie wâren ie dar zuo bereit,
wie sie im leideten die vart,
der ez phlac nâch sîner art.
eines morgens aber ûzgie
daz tier, als ez vil selten lie.
dô sach ez ûf dem velde gân
vil tiere unde ir weide hân.
sîn angeborniu art im rief,
daz ez aber zuozin lief.
dô kômen dar nâch im gerant
des herren liute sâ zehant.
diu tier begunden sie verjagen:
der wart dâ schiere vil erslagen,
diu andern kûme entrunnen.
dô sie ir tier gewunnen,
sie vuorten ez hin wider hein
unde wurden des enein,
ez solde niemer mêr ûz komen:
sus wart sîn wille im gar benomen.
des selben vürhte ich sêre.
dâ von ist mîn lêre,
daz dû belîbest, niender varst
und mit dem toufe dich bewarst,
und wis ein bredigaere gotes
unde ein lêrer sîns gebotes,
wan dûs gar gewaltic bist:
alhie sô kreftic niemen ist,
der wider dir getürre sîn.
daz rât ich, lieber herre mîn:
sô danne got vüege dir
die rehten zît, sô kum ze mir,
daz ich mich dîn geniete.
swie daz got gebiete,
daz wir behalten unser leben,
des suln wir im volge geben,
wan ich gedinge an gotes kraft,
daz uns ein geselleschaft
mit vroelîcher staetekeit
ze himelrîche sî bereit.>
dô weinde sêre jôsaphât.
er sprach:< meister, sît dîn rât
daz belîben râtet mir,
sô wil ich es volgen dir;
swaz danne gotes gnâde tuot
an mir, daz sol mich dunken guot.
dû solt niht mêre sûmen dich,
meister mîn, dû toufest mich,
wan ich sîn herzeclîche ger.
von dannen dû bist komen her,
dar lâzich dich wider varn.
ê solt dû dich vil wol bewarn,
daz dû nemest von mîner hant
silbers, daz dû wol gewant
koufest unde spîse dir.
dû solt nemen hie von mir
sô vil, daz al die bruoder dîn
berâten lange mügen sîn
an spîse und an gewande,
sô dû hein komest ze lande.
dâ bî solt dû biten got,
daz er durch sîn grôz gebot
in sînem lobe staete mich
und daz ich, lieber meister, dich
nâch mînem willen noch gesehe:
des bite got, daz ez geschehe.>
< den gotes touf enphâhen
und sînem zeichen nâhen,
daz sol niemen sîn erwert.
von rehte ist ioch der muot beschert
dir und gotes kinden,
diu sich im welnt gesinden,>
sprach barlââm der wise.
< kleit und rîche spîse
bitestû mich von dir nemen
und waenest, daz sül uns gezemen?
nein ez, lieber herre mîn.
sît wir alsolhes muotes sîn,
daz wir geistlich arm wesen
und âne weltlîch guot genesen,
sô ist uns gar ein armuot
daz arme weltlîche guot.
zer welte ist unser armuot grôz,
wan wir sîn ir guotes blôz:
unser leben hât gegert
der rîcheit, diu ân ende wert.
umbe spîse und umbe kleit
hân wir die sorge hin geleit,
wir horden guot ze aller zît
sunder zorn und âne nît.
des tuont der welte volger niht.
swen man ir guot minnen siht,
der mag ez nû, geloube daz,
âne vîentlîchen haz
ze samene selten bringen
mit vriuntlîchen dingen,
daz doch vür den tôt niht vrumt,
swie vil es ze samene kumt.
sît mîner bruoder vüeze
mit des reinen kristes süeze
des slangen houbet hânt zertreten
und von der welte sich entweten,
sô taete ich übele, daz ich in
verbunde den himelischen gwin,
swenn ich in braehte solich guot,
daz der sêle schaden tuot.
der welte guot ist solher art,
daz ez hoehet hôhvart;
würde in daz von mir gegeben,
sô würde hôhvertic ir leben.
daz ist ein houbetschulde
gên der gotes hulde.
naem ich in sô die rîcheit,
diu in sus iemer ist bereit,
der roup waere ze süntlich,
er beswârte sêre mich;
diz waer mir iemer swaere,
würdich sus ein roubaere.
des guotes wir bedürfen niht
noch der kranken zuoversiht,
des dû uns geheizen hâst.
ob dû mir niht abe gâst
des geheizes, sô wil ich
in gotes namen biten dich,
daz dûz armen liuten gebest
und nâch mîner lêre lebest.
dû solt mit herzenlîcher gir
daz veste gotes wâfen dir
ze einem staeten schirme hân,
sô maht dû vridelîche gân.
dîn halsperc rehtiu güete sî,
diu machet dich von übele vrî.
diu wârheit sî der gürtel dîn,
gotes minne sol dîn helm sîn,
daz gotes wort daz sî dîn schilt.
ob dich der rede niht bevilt,
dû wirdest gote ein kemphe wert.
reht geloube sî dîn swert,
der süezen êwangeljen sage
sî dîn vride alle tage
und dîne vesten îsenhosen.
dû solt ir worte gerne losen.
und ir lêre gerne volgen.
wirt dir danne erbolgen
der welte vîent, sâtân,
der kan dir niemer widerstân;
ob er von dîner hant gelît,
sô gît dir got durch dînen strît
nâch dem sige ze lône
ze himelrîche krône.>
mit sus getâner lêre
wart dô gevestent sêre
dem edelen junkherren guot
beidiu sin, herz unde muot,
daz wol sîn wille erscheinde.
mit vasten er in reinde
gên dem toufe, mit gebete
er guotiu wort mit willen tete.
iemer, sô der tac erschein,
sô wart barlââm enein,
daz er gie ûf den palas,
dâ jôsaphât ûffe was,
und tet im gotes lêre kunt
mit dem gelouben alle stunt.
die wîssagen er im beschiet,
zer kristenheit er im riet.
er leit im in wîser kür
der reinen boten lêre vür.
vil gar lêrter in aldâ
diu reinen êwangeljâ.
der alten und der niuwen ê
verstuont sich barlââm noch mê
dan iemen bî den selben tagen,
als ich die wârheit hoere sagen.
daz wart an jôsaphâte schîn:
er brâhte mit der lêre sîn
daz süeze küneges kint an got,
daz ez leiste sîn gebot
sô gar, daz an dem guoten man
des heilegen geistes viur enbran.
dô er gar zer kristenheit
und gên dem toufe was bereit,
als er in nemen wolte,
dô tet im, als er solte,
barlââm sîn meister dô:
er katheziziert in sô:
< sun> sprach er,< geloubestû
mit vesteclîchen sinnen nû,
daz got ie was und iemer ist
und daz der heilige krist,
der ie was ein wort bî gote,
nâch der gotheit gebote
ûf dise erde wart gesant
und durch uns mensche genant
von sante marjen der maget,
der süeziu kiusche hât bejaget,
daz si den truoc und sîn genas,
der ir kint ist, ir schepher was.
geloubestû daz?> sprach er sâ.
jôsaphât sprach:< jâ ich, jâ,
ich geloube ez rehte gar.>
< und daz si maget in gebar?>
< jâ.>< geloubestû ouch daz
an gotes kinde vürbaz,
daz er nâch den alten siten
wart in der alten ê besniten?>
< jâ.>< geloubestû, daz er enphie
den touf?>< jâ.>< daz er begie
gotlîcher zeichen vil?>
< jâ. gerne ich ez gelouben wil.>
< geloubestû daz al vür wâr,
daz er was vierdehalp jâr
und drîzic ûf der erde hie,
daz er sünde nie begie?>
< jâ, meister, daz geloubich.>
< geloubestû ouch, daz er sich
bereite in menschlîcher nôt
durch uns in menschlîchen tôt.
in broeder menschlîcher maht
vierzec tage und vierzec naht
mit kiuscher vasten?> er sprach:< jâ.>
dô vrâget er in aber sâ:
< geloubestû, daz in verriet
jûdas gên der juden diet?>
< jâ, diz ist der gloube mîn.>
< wil ouch dîn geloube sîn,
daz er durch uns gegeiselt wart
und nâch spotlîcher art
durch uns von in spoten leit
und daz dar nâch diu menscheit
den tôt an dem kriuze leit
mit unverscharter gotheit?>
< jâ, diz geloube ich, als ich sol.>
< geloubestû daz ouch vil wol,
daz sîn geist die helle brach
und man in dannen vüeren sach
die sêlen gar, der lîp alhie
sîn gebot nie über gie,
und von dem hellerôste
sie lôste, von untrôste,
und die noch sînen willen tuont?
geloubestû, daz er erstuont
gewaere mensche unde got,
als ez der gotheit gebot
was nâch der prophêten sage,
dar nâch an dem dritten tage?
geloubestû ouch, daz er hie
gotmensche ûf der erde gie
vierzec naht, sô manigen tac?
daz er mit sîner lêre phlac
den sünden machen ende
mit sîner urstende
und dar nâch ze himele vuor?>
jôsaphâtes herze swuor,
daz er wol geloubte, daz
zuo des vater zeswen gesaz
der gotes sun, der reine krist.
< und daz er dannen künftic ist,
über al der welte leben
gedienten lôn nâch werken geben?>
< jâ, diz geloube ich sunder wân.>
< daz dû solt sterben unde erstân
an der jungesten zît,
sô got der welte ein ende gît?
daz diz ist und sol geschehen,
wil dû des gelouben jehen?>
< jâ, meister saelden rîche,
sô rehte herzeclîche
geloube ich, swaz dû hâst geseit,
daz ichz weiz von wârheit.>
< geloubestû daz kristen leben,
als ez krist hât gegeben
und dû mich hôrtest künden?
geloubestû den sünden
ablâz, ob sie mit triuwen
dich beginnent riuwen?>
< jâ, diz geloube ich gar an got
mit staeten triuwen sunder spot.>
dô barlââm sîn herze sach
sô reine und alsô guot, er sprach:
< nû soltû in dînen sin
daz gotes zeichen nemen hin
und in dem reinen herzen dîn
ein liebez gotshûs iemer sîn
dem heiligen geiste an dir.
der ist dir bî nâch dîner gir,
ob dû mit guotem herzen in
laden wilt in dînen sin.>
sus segenter vor ime aldâ
den reinen touf, er wîhte sâ
dem heiligen geiste ein wesen
ûzerwelt und ûzerlesen,
ein edel goteshûs vil guot,
vor allem wandel wol behuot
an sînem vesten herzen gar.
öl und krisemen streich er dar
und beslôz dem tiuvel vor
sîner sinne herzentor.
er sprach:< vil liebez kint, nû sprich,
wil dû gote toufen dich?>
< jâ gerne, wan ich wil dich biten,
daz dû nâch kristenlîchen siten
mich gotes gnâden koufest,
daz dû mich gote toufest.>
< geloubestû, herre, an den kouf
der gotes gnâden, ob der touf
an dich nâch der kristenheit
kristenlîche wirt geleit?>
< jâ, und mîner sünden wesen
mit des toufes kraft genesen.>
er sprach:< benamen, des sîs gewis.
in nomine dei patris
et filii et spiritus sanctî
bist dû dîner sünden vrî.
in den reinen namen drin
toufe ich dich.> sus touft er in.
barlââm vil balde gie,
dô jôsaphât den touf enphie,
ze sîner herberge nider.
schiere gâhet er her wider
und sanc eine messe dâ
durch got in gotes namen sâ.
daz gotes opher bôt er im,
er sprach:< lieber man, vernim
und lâ dir rehte sagen, wie
und waz dû solt enphâhen hie.
dû solt hie nemen in gotes namen
den reinen gotes lîchamen.
dô got, der heilige krist,
der al der welte loeser ist,
durch uns daz menschlîche leben
an die marter wolte geben,
des tages, dô er morgen leit
den tôt nâch der menscheit,
er az mit den jungern sîn;
beidiu brôt unde wîn
segent er vor in aldâ.
daz brôt gap er den jungern sâ:
« diz ist mîn lîp, nemt ez hin
und ezzet ez. nemt in den sin,
daz ez mîn lîp ist und mîn bluot.
swenn irz in mînem namen tuot,
daz ist in der gehügede mîn,
des sult ir âne zwîvel sîn. »
daz brôt ir iegelîcher az.
« durch aller sünden aplâz »
sprach er, « wirt des lîbes leben
umb iuch in den tôt gegeben,
den lîp bezeichent daz brôt. »
den kelch er in dar nâch bôt,
er sprach: « trinket hie mîn bluot
und habet geloubhaften muot,
daz ez umb iuch vergozzen wirt. »
diz zeichen got an uns gebirt:
sô wir in dem namen sîn
daz brôt segenen und den wîn,
sô nemen wir in gotes namen
daz bluot und ouch den lîchamen,
dâ mite uns allen wirt gegeben
daz iemer êweclîche leben.
swer daz unwertlîche nimt,
sîn name gote niht gezimt;
des schulden wirt gegeben dran
der gotes aehteclîcher ban.
diu selben gotlîchen wort,
mit den ez wart gesegent dort,
diu sprichet hie der priester drobe
bezeichenlîche in gotes lobe.
diz sol vür dîne sünde
vor gote ein urkünde
wesen des gelouben dîn,
des soltû geloubic sîn.>
dirre lêre was er vrô,
daz heilege opher nam er dô.
barlââm, der meister sîn,
sprach:< vil lieber herre mîn,
ez ist dir wol ergangen:
dû hâst nû got enphangen
in dîn herze, er hât ouch dich
enphangen unde brâht an sich.
jôhannes, der heilege bote,
daz der geheizen hât von gote,
daz ist an dir volle komen,
dû hâst den geheiz genomen.
er sprach: « die got enphiengen
und sîn gebot begiengen,
den gap er solhen gewalt,
daz sie im ze kinden sint gezalt,
die an in geloubic sint. »
daz dû solt heizen gotes kint,
der gewalt ist dir gegeben.
nû solt dû reinen im dîn leben,
an reinekeit behalten,
von houbetsünden walten,
daz er dich vinde reine,
bewart vor allem meine.
dû hâst nû der kristenheit
eine gruntveste geleit,
ûf die solt dû machen
mit gotlîchen sachen
ein ungewichen veste gote
mit rehter werke gebote.
dû bist ein niubornez kint,
alsam diu kint, diu redelich sint,
bist dû anderstunt geborn;
got hât ze kinde dich erkorn:
dîn vater ist der reine krist,
diu kristenheit dîn muoter ist,
ûz der brüsten sol dîn jugent
sûgen die milch rehter tugent.
unsers herren liehter schîn
erliuhtet hât daz herze dîn.
nû soltû daz lieht niht lân,
dû solt in dem liehte gân.
daz kan dir gesiht wol geben
in des himelrîches leben.
dir hât ein niuwez reinez kleit
got, dîn schepher, angeleit.
daz soltû behüeten wol,
wan ez niht mâsen haben sol.
triwe, rehte minne, güete,
gedultekeit, dêmüete,
der solt dû hüeten alle vrist,
sît dû zuo im geladet bist.
dû solt jagen ûz dîner brust
allen weltlîchen gelust
mit herzenlîchem muote gar,
sô dîn sêle hinnen var,
daz si gote reine sî,
vor süntlîchen schulden vrî.
dû solt dîn herze hân behuot,
daz ez üppeclîcher muot
und übel werc besitzen iht.
von den werken spriche ich niht:
dû solt üppeclîchen wân
zuo den boesen werken lân.
die reinen gotes namen drî
sint reinem herzen gerne bî.
dâ bî solt dû wizzen ouch:
sam die bine verjaget der rouch,
sus jagent den heiligen geist
übel gedanke allermeist
von den herzen zaller zît,
dâ boeser gedanc inne lît;
ez ist der üppige gedanc
der sünden werke ein anevanc.
swer eine kleine wunden hât,
die wîle er im sî smâhen lât,
si vûlet lîhte unde swirt,
biz er von ir bekumbert wirt
und lîhte von ir tôt gelît.
diu rede ein ebenmâze gît
der kleinen sünde. swer die hât,
ob er sî an im wurzen lât,
si wähset lîhte in solher kraft,
daz si wirt an im sigehaft.
hie von solt dû hân behuot
dîn herze gote und dînen muot.
nû ist dînes herzen tor
beslozzen allen sünden vor
und wont mit vreuden drinne
des heilegen geistes minne;
die solt dû gerne bî dir tragen,
niemer mêr von dir verjagen.
offent ez den sünden sich,
sô viulet aber diu sünde dich.
dû solt mit staeten minnen
an guoten werken brinnen,
biz dû den heiligen geist
mit guoten werken bî dir treist.
swes dû danne bitest got,
des gewert dich sîn gebot.
nû sol diu reine sêle dîn
gote an dir ein spiegel sîn,
sô daz man sich dar inne ersehe
und von dir guoter bilde jehe,
daz dû mit saelden vlîzest dich
guoter werke gotlich.
got ruoche an dir machen
mit gotlîchen sachen,
daz dû sîn wert mügest sîn
von den rehten werken dîn
herre mîn, nû hân ich got
dir vürgeleit und sîn gebot
und hân im getoufet dich.
er hât gewunnen dich an sich,
sîne lêre und sînen rât
er dich mit mir gelêret hât.
dir ist erkant der sünder tôt
und ir endelôsiu nôt
und daz êweclîche leben,
daz got wil den sînen geben.
dîn herze dich behüete gote
reine in sînem gebote.
« ir sult heilegen iuwern sin;
sît heilic, wan ich heilic bin, »
sprichet der heilige krist,
der reine, guot und heilic ist.
sus wil got an dir heilic sîn,
heilegestû daz herze dîn.
des helfe dir durch sîn gebot
al der welte schepher, got.
durch sîner muoter êre
geb er dir solhe lêre,
daz dû in sînen hulden stêst
und dienstes im niht abe gêst
alliu dîniu lebenden jâr.> -
< âmen, daz müeze werden wâr!>
sprâchen sie dô beide hie.
der meister ze herbergen gie.
des küneges amptliute gar
nâmen der heinlîche war:
sie nam des michel wunder,
daz barlââm besunder
sô dicke gie ze râte
mit ir herren jôsaphâte,
daz er im heinlîcher was
dan ieman ûf dem palas.
diz dûhte sie vil wunderlich.
sie besprâchen dicke sich,
waz ez bediuten solde
und wie ez enden wolde.
diz erschrakte sêre ir sin.
nû was einer under in,
der was geheizen zardân.
im jach mit wârheit sunder wân
der künic grôzer triuwen ie.
durch die triuwe er in lie
phlegen jôsaphâtes
und sînes hoehsten râtes:
der hât es die groesten klage.
er gesaz an einem tage
zuo dem junkherren sîn.
er sprach:< vil lieber herre mîn,
weist dû, daz dîn vater mir
getriuwet vürbaz gegen dir
dan allen den, die bî dir sint?
er bevalch dich mir, sîn kint,
und dar zuo sînen hoehsten rât.
diu triuwe gelt von rehte hât.
ich sol gên im triuwe hân,
sît er sich hât an mich verlân.
nû hât mich dicke erschrecket,
in sorgen ûfgewecket,
daz dû sô minnest einen man,
des ich künde nie gewan:
ich vürhte, er ein kristen sî.
dû bist im sô gerne bî.
owê! sol daz alsô wesen,
sô bin ich gar ungenesen,
wan ich muoz unsenften tôt
lîden und des tôdes nôt.
nû tuo ez durch den willen mîn
unde durch die gnâde dîn,
und nim dich mit dem vremeden man
niht sô vil gespraeches an,
sô dû hâst biz her getân,
oder lâ mich von dir gân.
der bete solt dû mich gewern:
dû solt an dînen vater gern,
daz er einen man dir gebe
vür mich, der in den sorgen lebe,
daz mîn triuwe unverkrenket wese
und daz ich von der nôt genese
herre mîn, hie gewer mich an,
sî dirre man ein kristenman,
die avenier gehazzet hât.>
dô sprach der süeze jôsaphât:
< lieber mîn, vriunt zardân,
wildû des mannes künde hân,
sô verbirc heinlîche dich
hinder daz gestüele, dâ ich
bî im ûffe sitzen wil,
sô hoerst dû vremeder rede vil.
dar nâch bescheide ich rehte dir,
wie dû solt tuon. des volge mir.>
nâch dirre lêre wart getân.
der wîse râtgebe zardân
barc sich an ein enge stat,
als in der junkherre bat,
hinder daz gestüele hie.
dô meister barlââm ûf gie,
sie sâzen, dâ sie dâ vor ê
gesezzen wâren dicke mê
durch ir heinlîchen rât.
< meister,> sprach dô jôsaphât,
< dîne lêre vâch mir an,
als ir dîn munt von êrst began,
daz sî mîn sin ergrîfe baz,
ob mir lîhte sî ze laz
der sin, daz ich die kunst behabe,
daz mir dîn rât iht slîfe abe
mit der vestenunge dîn
von der einvalte mîn.>
barlââm sprach:< daz sol wesen.>
dô begunde er im lesen
und tet im von êrst erkant,
wie got von himele wart gesant
und hie den tôt durch uns leit.
er seit im von der kristenheit:
von der êrsten geschaft,
die got geschuof mit sîner kraft,
unz an daz jungeste zil,
sô got die welt verenden wil,
beschiet er im unz an daz ort
alles des gelouben wort,
und was got ûf der erde hie
durch uns wunders ie begie
und wie got wil den rehten geben
ze himel ein endelôsez leben.
ze herbergen wider dan
gie barlââm der guote man,
als er hâte volleseit
die reinen gotes kristenheit.
dô rief an sich zardâne dar
und wolte gerne nemen war,
ob er die lêre minte als er:
durch daz versuochen rief im her
der gotes degen jôsaphât.
er sprach:< nû sich, wie dirre hât
geworfen sîne lêre an mich.
der worte saejer vlîzet sich,
wie er mich müge verkêren
von disen grôzen êren,
und lêret mich ein gebot,
daz ich minne ein vremeden got
und den sül ze gote hân.>
dô sprach der râtgebe zardân:
< vil lieber junkherre guot,
warumbe hâst dû mînen muot
versuochet alsô sêre?
mich dunket, daz diu lêre
dir nâher sî ze herzen komen
dan ich habe von dir vernomen.
dû waerest im sô heinlich niht,
wan daz dir sîn lêre giht,
daz sîniu vremeden maere
dir süeze, unwandelbaere
sint worden in den sinnen:
ich sihe dich sie wol minnen.
dû solt niht mê versuochen mich,
wan ich ze wol erkenne dich.
herzelieber herre mîn,
avenier, der vater dîn,
hât vîentlîchen haz geleit
an die selben kristenheit
und hât von hinnen sî vertriben.
ir lêre ist kleine hie beliben,
der rât alsô süeze dich
dunket und sô lobelich.
sît dû nû dînes vaters haz
sus minnen wilt, sô vüegen daz
die gote, daz ez wol ergê
gên dir! waz sol ich sprechen mê?
owê, der grôzen swaere mîn!
ich muoz mit leide in sorgen sîn.
dâ von bekümbert ist mîn leben,
wie ich im sül antwürte geben,
des ich hân versûmet mich
an mîner huote, sît daz ich
dîn mit triuwen solde phlegen.>
jôsaphât, der gotes degen,
sprach:< mîn lieber vriunt zardân,
ich wânde mich gar hân verlân
an dîner triuwen güete
und wânde dîn gemüete
ze bezzerunge kêren.
durch daz hiez ich mich lêren,
wie man die sêle behalten sol.
ich wânde, daz ich taete wol,
ob ich dir rehte hieze sagen,
wie dû des hulde solt bejagen,
des kunst dich geschaffen hât.
nû sihe ich wol, dîn missetât
hât mînen sin an dir betrogen:
mir hât mîn wân an dir gelogen.
ich hân ze herte gar gesehen
dîn herze dir, des muoz ich jehen:
in übelwillic herze gât
selten wîslîcher rât.
ob dû ioch mînem vater seist
die lêre gar, als dû si weist,
daz vervâhet anders niht,
wan daz ime dîn vergiht
machet angest unde leit,
ob im diz maere wirt geseit.
wil dû in bî vreuden hân,
sô soltû die rede lân,
biz dir ein gevellic zît
der sage rehte vuoge gît.>
sus schiet von dem râte dan
zardân, avenieres man.
er muoste die geschiht verdagen,
er getorst es niht gesagen
von ir beider vorhte dô:
des wart er leidic unde unvrô.
barlââm des morgens kam
ze jôsaphâte er urloup nam,
als er wolte ûf sîne vart.
er sprach:< sun, wis wol bewart
an kristenlîcher staete gar.
ich bite got, daz er bewar
dich, vil lieber herre mîn,
staete an dem gelouben dîn.
des solt dû zallen zîten got
von herzen biten sunder spot.
ich wil ze lande wider varn:
got ruoche dich an im bewarn.>
jôsaphât dô sêre erschrac.
daz urloup er sô hôhe wac,
daz er bî dem guoten man
daz urloup weinen began.
doch was dâ bî sîn hôhez leit:
er vorhte, daz er arbeit
und toetlîch angest müese hân,
würd ez dem vater kunt getân,
daz gienge an des meisters leben.
er entsaz den râtgeben,
daz erz dem vater taete erkant.
dâ von gedâhter im zehant:
< ich muoz durch des zwîvels wân
daz urloup mînem meister lân.>
von jâmers nôt was er unvrô,
weinende sprach er alsô:
< nû lâst dû, lieber vater mîn,
mich in dirre welte sîn
und in ir grôzen üppekeit,
als dû mir hâst von ir geseit,
und wil dû varn hein von mir.
nû getar ich vürbaz dir
gemuoten daz belîben niht.
durch al die triuwe, der mir giht
diu väterlîche triuwe dîn,
sô lâ mich dir bevolhen sîn
und wünsche des von gote mir,
daz ich kome noch ze dir
und nâch dirre welte vluht
bî dîner geistlîchen zuht
gediene reineclîche
mit dir daz himelrîche.
noch lâ dich des durch got gezemen,
daz dû von mir geruochest nemen
dînen bruodern etewaz
und dir. durch got, nû tuo daz.
wellestû niht bringen in
deheiner slahte gewin,
sô nim doch etwaz von mir
durch got ze einer gâbe dir:
kleine zerunge unde gewant.>
dô sprach der alte zehant:
< herre, merke mînen muot.
waer ez almuosen unde guot
und solt ez mit rehte sîn,
daz ich mir und den bruodern mîn
naeme weltlîche habe,
ungerne gienge ich dir des abe;
benamen, ich naem ez von dir
mînen bruodern unde ouch mir.
vil lieber junkherre wert,
sît ich noch ir deheiner gert
mit weltlîcher habe genesen,
sô lâ mit dînem willen wesen,
daz ich dirz nû muoz versagen.>
< sô lâ mich doch von dir tragen,
lieber man, dîn haerîn kleit,
daz ez mir sî ein sicherheit
gên des leiden tiuvels spote
und daz ich dîn gedenke in gote
vür den liebesten man,
des ich künde ie mê gewan,
und nim ein anderz von mir.
swie dû daz wilt, daz gibe ich dir,>
sprach jôsaphât der guote
mit weinlîchem muote.
dô sprach des gotes wîgant:
< daz ich dir gaebe ein alt gewant
und ich ein niuwez naeme,
gên gote ez niht gezaeme.
doch sol gên mir diu bete dîn
alsô niht verkrenket sîn.
heiz ein haerîn hemede mir
suochen( daz tragich von dir),
daz alsô boese schîne
mir, sô dir daz mîne.>
daz suochte man, ez wart dô brâht
dem alten, als es was gedâht.
dô leite der vil guote man
des junkherren hemede an
und er des meisters gewant.
daz was sô rîlich im erkant,
daz ez im was daz beste kleit,
daz im ie wart angeleit.
barlââm was dô bewart.
ez nâhente sîn widervart;
er sprach:< vil lieber jôsaphât,
lieber sun, sît dich mîn rât
gote wider hât geborn,
dem dîn sêle was verlorn,
sô solt dû dich behüeten nû
mit vlîze baz dan ê, wan dû
mîner lêre muost entwesen.
dû solt in dîn herze lesen
diu wort der reinen kristenheit,
als ich dir sie hân geseit.
gedenke, herre, an den tôt,
dem in endelôser nôt
niemer ende wirt gegeben.
gedenke ouch an daz süeze leben,
daz niht von welt in welt zergât,
daz got dir behalten hât,
ob dînes herzen staetekeit
im ungewancte staete treit.
dînem süezen muote
wart nie sô nôt der huote
als ez nû ist. nû hüete dîn
durch got nâch dem râte mîn
und wis an dem süezen gote
staete in sînem gebote.>
< vater mîn,> sprach jôsaphât,
< sît mich dîn süeziu lêre lât,
diu mich dem tiuvel hât entragen,
owê, wer sol mir nû sagen
von der gotes lêre
sô süeze iemer mêre,
als mir dîn reiner munt
daz leben hât gemachet kunt?
owê, vater, wer tuot daz?
owê, nieman. ez ist ze laz
al der liute sin gên dir,
die kunt vor dir ie wurden mir.
owê mir! daz mich dîn rât
alsô wîselôs nû lât,
des muoz ich in dem herzen mîn
durch unser scheiden trûric sîn.
nû ruoche mir got bî gestân,
sît dû mich, süezer man, wilt lân.>
barlââm gewarte dô,
daz jôsaphât was unvrô
durch des scheidennes nôt.
ze himel er die hende bôt,
ze gote sprach er sîn gebet,
vil dêmüetlîchen er daz tet.
er sprach:< herre, vater, got,
sît dîn väterlîch gebot
in dînes sunes namen hât
geschaffen dîne hantgetât
und allem lebene hâst gegeben
mit dînem geiste lebendez leben,
nû tuo gên mîner bete schîn
die vil grôzen güete dîn:
sît daz dû älliu herzen weist,
sô sende dînen reinen geist
dem süezen herzen, daz sich dir
ze kinde hât ergeben mit mir,
und staete daz gemüete sîn
an den vil werden hulden dîn.
zuo dînem opher brâhte ich in;
nû sende im alsô staeten sin,
daz er dich künne minnen
von herzeclîchen sinnen:
lieber got, herre krist,
sît dû der herzen schouwer bist,
ân anegenge und âne drum
in secula seculorum.>
< âmen!> wart gesprochen dâ.
dô kusten sie einander sâ.
sie schieden sich mit jâmer hie.
barlââm von dannen gie.
jôsaphât beleip aldort.
mit jâmer sprach er disiu wort:
< herre got, die lêre dîn
sende dem herzen mîn.
sît ich den niht mac gehân,
von dem ich dir wart undertân,
sô ruoche sîn mîn râtgebe,
daz ich dich, unz ich nû lebe,
mit staetem muote lobende sî.
herre krist, nû wis mir bî
durch dînes namen êre
und gip mir solhe lêre
nâch dîner gotlîchen kunst,
daz sich volende diu begunst,
die mir angevangen hât
des wîsen barlââmes rât.
gip mir nâch dîner meisterschaft
staetes muotes lebende kraft.>
des herzen und des lîbes knie
bouc er vil andaehtlîche hie,
dô er ze gote diz gebet
mit inneclîchem muote tet.
sîn herze in grôzer riuwe swal,
sîn gebet ze gote erschal.
got sîn gebet gewerte
mit güete, des er gerte.
barlââm der lobet ouch got,
daz sîn vil süezez gebot
in solhe lêre lêrte,
daz er an in bekêrte
des selben landes herren namen,
den edelen herren lobesamen.
dô jôsaphât verweiset wart
mit barlââmes hinvart,
dô stuont gar sîn gemüete
ze gote, in rehter güete
begunder sich enthalten
und gotes lêre walten
mit gebete und ouch mit vasten.
er kunde selten rasten:
daz groeste teil des tages er was,
daz er andaehtlîche las
mit guotem herzen sîn gebet.
ân underlâz er daz tet,
swenne ez im niht wart benomen
durch sînes vater staetez komen,
des er hin zim vil ofte phlac.
swenn in versûmde der tac
daz ersazt er mit der naht.
sîn herze staeteclîche vaht
nâch gotes rîche zaller zît,
tac und naht, enwiderstrît.
zardân begunde ez merken dô:
er vorhte sînes herren drô,
diz leit in niht bî vreuden lie
ze sînem hûse er balde gie
und nam sich grôzer siecheit an.
vil sêre er klagen sich began.
dô des der künic wart gewar,
dem junkherren gap er dar
durch phlegen in den palas hin
einen andern man vür in.
dem künege grôzer swaere jach
zardânes siechlîch ungemach:
ze sîner helfe er sande
von allem sînem lande
den besten arzât, den er vant.
dem was mit listen ûzerkant
von physicâ der hoehste list,
der von erzenîe ist.
dô der den siechen man ersach,
sîn urîne im verjach
und sîner kraftâdern slac,
daz sîn dehein siecheit phlac,
wan daz von grôzer swaere
sîn muot betrüebet waere.
dô daz dem künige wart geseit,
er wânde des, daz im ein leit
von jôsaphâte waer geschehen,
des er getörste niht verjehen,
und durch die selben swaere
von im gescheiden waere.
nû hiez er im künden dô,
sîn ungemach taet in unvrô
und daz er an dem andern tage
durch rât, durch vriuntlîche klage
zuozim wolde komen dar
und nemen sîner siecheit war.
als er des boten rede vernam,
der von sînem herren kam,
er sweic und lac mit sorgen
unz an den andern morgen.
dô leiter an sich sîn gewant,
ze hove huop er sich zehant
und gie vür sînen herren hin;
ûf die erde viel er vür in
und ougte klagendez ungemach.
avenier, der künic, sprach:
< zardân, vriunt, bewîse mich,
durch waz hâstû beswaeret dich,
daz dû her kaeme? ich wolte dar,
den liuten ougen, daz ich gar
dich minne und iemer minnen wil
unz an unser beider zil.>
dô sprach der trûrige zardân:
< daz dû diz woltest hân getân,
des müeze al daz gelücke dîn
gehoehet von den goten sîn.
mîn vil lieber herre,
nû hoere, waz mir werre:
mir wirret grôzer siecheit niht,
wan daz mîn klagendez herze giht
sinn und dem lîbe solher nôt,
daz ich bin gar an vreuden tôt,
daz ist gar mîn groeste leit.
nû waere an mir ein tumpheit,
sît ich noch die krefte hân,
daz ich wol mac her zuo dir gân,
daz ich dich lieze gân zuo mir;
ich sol billîcher gân zuo dir,
dan dîn küneclîcher name
dar kaeme: diz ist minner schame.>
dô vrâget in sîner swaere
der künic, waz im waere,
daz er sô vil unvreuden phlac,
durch die er vreuden sich bewac.
< owê! herre,> sprach zardân,
< dâ hân ich gên dir getân
grôzer untriuwen vil,
des ich mich schuldic machen wil:
mîn triuwe hât versûmet sich
an dir. daz sol über mich
von rehte rihten dîn zorn.
ich sol von schulden sîn verlorn
und lîden schäntlîchen tôt,
wan mîn unsaelde mir gebôt,
daz ich des missehüetet hân,
daz an mich was von dir gelân.>
< wâ hâstû dich niht behuot,
daz dir sô wê diu huote tuot?>
< lieber herre, dâ soltich
phlegen, als dû baete mich,
des lieben junkherren mîn,
daz mir gebôt diu bete dîn.
vil güetlîchen ich sîn phlac
mit triuwen unz an einen tac:
dô kom ein zouberaere her,
der schuof mit sîner lüge, daz er
vür mînen junkherren hie
mit mînem urloube gie.
mir leider ze unheile
saget er mir, daz er veile
den besten stein hie trüege,
des man ie mê gewüege.
der ûzerrette mir dô, daz
ich mîner triuwe an dir vergaz
und liez in ûf den palas.
ein verworhter kristen was
der selbe zouberaere:
sîniu zoubermaere
und ouch sîn trügelîcher rât
dîn liebez kint verkêret hât.
dô mîn junkherre wart gewar
sîner lügemaere gar,
ich muoste zallen zîten lân
den zouberaere zuozim gân,
der hât verkêret sînen sin.
dirre sünde ich schuldic bin:
daz rihte, herre, über mich,
swie dir behage: dêst zimelich,
daz laster dulte ich und die schame.>
der künic sprach:< wie ist sîn name?>
< er was geheizen barlââm.
vervluochet müeze sîn der krâm,
dâ mite er mich betrogen hât.
mîn lieber herre jôsaphât
ist gar an sîne lêre komen
und hât sîn leben an sich genomen.>
< möht ich daz ê gewizzen hân,
sîner lêre waere getân
ze lône ein sô grôz êre,
daz er niemer mêre
küneges kint verkêrte
noch solhe lêre lêrte.>
der künic hât ê wol vernomen,
daz in sînen hof was komen
barlââm, der guote,
der ie mit staeter huote
in kumberlîcher arbeit
durch got vil manege swaere leit.
als im der herre vorgelas
gar, als ez ergangen was,
sîn herze alsô sêre erkam,
daz im die hoehsten vreude nam
der schric der leiden maere.
er kom in solhe swaere,
daz er von herzeleide gar
nam deheiner vreude war.
sîn tumpheit hôhes leides phlac;
dâ got mit liebe im saelde wac,
dâ wac sîn hôch unsaelekeit
daz herzeliep vür herzeleit,
von sînem lîbe im waer bereit
ein iemer klagendez herzeleit,
haetez lâzen vollevarn
jôsaphât, der saelden barn.
genuoge sint noch sô gemuot,
daz in ir übel ist ein guot
und ir liep hânt ze leide,
als ich iu nû bescheide.
hât ein man ein liebez kint
( als ie diu kint mit liebe sint),
wil ez den lîp lâzen varn
und die sêle wol bewarn,
daz ist des vater herzleit,
doch sînes lîbes saelikeit
von dem leide hoehe sich.
daz ez sî leit, dêst menschlich;
vil gotlich daz waere,
daz ez niemen swaere.
swer rehter liebe wolde jehen,
der sold ez niht ungerne sehen.
diz geschah an aveniere.
der hiez im bringen schiere
sînen liebesten man,
der sich nam sînes râtes an.
der was et ie der êrste,
der hoehste und der hêrste.
des rât was künsterîche:
er riet im witzeclîche.
der was geheizen arachîs,
von rîcher kunst was er vil wîs.
nû der kom gegangen dar,
der künic sagete im vil gar,
als ich iu hie, die wârheit.
er sprach, dô ez im was geseit:
< gehabe dich wol, herre mîn;
lâ trûreclîche vorhte sîn:
dîn muot bî vreuden wesen sol.
ich weiz von rehter wârheit wol,
ist uns dîn kint verkêret
und unrehte gelêret,
daz er doch volget drâte
mir, swes ich im râte.
swenn er beginnet künde hân,
daz er unrehte hât getân,
sô lât er die irrekeit,
die im der trieger hât geseit
und lebet nâch mîner lêre.
mit väterlîcher êre
mînem râte er volge giht,
des zwîvel ich an ime niht.
dâ bî dunket mich vil guot,
ob ez dich ouch alsam tuot,
daz dû den trügehaften man,
der in gewîset hât her an,
heizest vlîzeclîche
in dînem künicrîche
suochen unde bringen her,
sô twingen wir in des, daz er
offenlîche hie vergiht,
wir haben wâr unde er niht,
und habe dîn kint verkêret;
swaz er in habe gelêret,
daz sî ein valschiu trügeheit:
wir machen wol, daz er daz seit.
ob diz allez niht ergât,
sô vinde ich dan noch einen rât,
daz ist der beste, den ich kan.
ich weiz einen wîsen man,
daz ist ein einsidel guot,
der unser gote willen tuot;
unser leben ist sîn leben,
er hât den goten sich ergeben.
der selbe ist nachor genant.
sîn antlütze ist dâ vür erkant,
daz ez kuntlîche niemen siht,
wan der im âne zwîvel giht,
ez sî der lügenaere,
der uns die grôzen swaere
an dînem sune gemachet hât.
ir lîp alsô gelîche stât,
daz die selben zwêne man
erkennen niemen sunder kan.
wirt der verkêrer vunden niht,
daz man in entrunnen siht,
sô bringe ich disen her zehant;
sô sol man sagen in daz lant,
daz barlââm gevangen sî.
sô heizich in, daz er bî
gestât der valschen kristenheit.
sô solt dû heizen sîn bereit
die meister algelîche,
die sîn in disem rîche:
die suln behüeten unser ê.
sô ez dan an den ernest gê,
sô sol er sigelôs geligen
und unser meister lân gesigen.
sô daz ersiht jôsaphât,
daz er sigelôs gestât
und unsern meistern siges giht
und sîn geloube wirt enwiht,
der in nû ist gelêret:
den muot er wider kêret
und büezet sîne schulde
dir und der gote hulde.
sô wirt im von herzen leit,
daz sîn jungiu kintheit
gevolgete ie sô drâte
des zouberaeres râte.
nachor so wîsen in her abe
und jehe, daz er in verirret habe,
wan er im ist unbekant.
der kristen lüge wird sus geschant.>
der künic was des râtes vrô.
mit sîner volge jach er dô,
der beste rât waer vunden dâ.
vil balde hiez er gâhen sâ
sîne suocher in daz lant,
die den gotes wîgant,
barlââmen, suochen solden,
mit dem sie krenken wolden
des reinen jôsaphâtes sin.
die ranten her, die vuoren hin
in daz lant allenthalben
gên den vil wilden alben.
die zuovart der unkunden wege
nâmen sie gar in ir phlege
und versazten algelîche
die wege von dem rîche,
als ich die wârheit hoere sagen.
sie suochten in den sehs tagen
und begunden râmen,
wâ sie barlââmen,
den gotes degen, vunden:
sie suochten, swâ sie kunden.
von disen grôzen sorgen
was er vil wol verborgen,
dâ sîn got, unser herre, wielt,
der in vor dirre nôt behielt,
mit des kraft er wart versaget
in, von den er wart gejaget.
ûf bezzerunge barc er in
durch sînen gotlîchen sin.
arachîs begunde gâhen,
gên sennââr hin nâhen.
swen er dâ bî gehûset vant,
der im kristen wart erkant,
dem tet er manige swaere,
wâ der verborgen waere,
nâch dem er suochende leit
sô manigerhande arbeit.
dô sie versageten disen man,
er verjagete sie von dan
und tet in leides genuoc.
sîn wec an einen berc in truoc,
ûf des hoehe er stuont enbor.
in einer wüeste dâ vor
sach er vil guoter liute gân.
sîn tobeheit wolt in niht erlân,
er hieze zuozin gâhen,
die guoten liute vâhen.
ir was ein vil michel teil,
sie wurben umb der sêle heil,
ze gote stuont ir herzen sin.
ir abbet, der gie vor in hin,
des herze was vil reine,
der truoc heilic gebeine,
daz si wolten bî in hân,
swâ sie sich wolten niderlân,
ze rehtem heiltuome
nâch kristenlîchem ruome
und nâch der kristenliute site
ir alter wîhen dâ mite.
dô der vürste sie gesach,
sîn munt zornlîche sprach:
< saget an diu rehten maere,
wâ ist der trügenaere,
des verkêrter trügerât
des küniges kint verkêret hât?>
der abbet sprach:< des weiz ich niht.
ob in dîn ouge hie niht siht,
sô suoche in aber anderswâ.>
dô vraget in der vürste sâ:
< weistû in iender?>< jâ ich, wol.>
< wâ ist er oder wâ ist sîn hol?>
< er ist bî iu zaller stunt.>
< er ist dir niht rehte kunt
( sprach der vürste), noch sîn name.>
< jâ, got hoehe sîne schame!
sîn name ist mir vil wol erkant:
er ist der tiuvel genant
( sprach der heilege abbet guot);
er hât besezzen iuwern muot,
wan sîn tiuvellîcher rât
iuwern sin begriffen hât;
der hât iuch verkêret
und sîne kunst gelêret.
mir ist verkêrers niht erkant,
wan den ich dir hân genant.
wil dû den, den vindestû
bî dir und dînen goten nû.>
dô sprach der vürste arachîs:
< er vert in tumbes mannes wîs,
nâch dem ich suochende var;
er ist wîser sinne bar:
barlââm ist er genant.
er kom dâ her in ditze lant
und hât uns hie verrâten
den süezen jôsaphâten
mit sîner valschen trügeheit,
die er mit valscher lêre treit.>
dô sprach der abbet an der vrist:
< in gote er unser bruoder ist;
den erkennen wir vil wol,
sîn lîp ist rehter güete vol.
suochest dû den?>< jâ!> sprach er dô.
< sô soltû niht sprechen sô,
daz er ein trügenaere sî.
vrâge alsô: gêt iu hie bî,
der jôsaphâte hât daz leben
vür den lebenden tôt gegeben?
den künnen wir erkennen,
wildû in rehte nennen.
doch künnen wir dir niht gesagen,
war er vuor vor manigen tagen:
sider war er uns niht schîn.>
< sô zeiget mir die zelle sîn,
wâ diu sî.>< des tuon wir niht.
wolt er an iuwer gesiht,
sô waer er wol selbe komen
und haete sich iu niht benomen.>
dô sach vil zornlîchen an
arachîs den guoten man.
er sprach:< nû zeiget balde!
wâ lît er in dem walde?
wâ wont der trügenaere,
barlââm, der ungewaere?
welt ir in niht zeigen,
ich heize iuch tumben veigen
toeten anders, danne ieman
sînes endes zil gewan.>
der guote man sprach aber dô:
< wir waeren herzeclîche vrô,
würd uns des lîbes tôt gegeben
in gotes namen umb daz leben,
daz uns mit endelôser zît
got âne dînen willen gît.
biz wir in gotes willen leben,
sô mahtû uns niht gegeben
den tôt; wan des lebenes zît,
daz got nâch disem lîbe gît,
hât endelôsen anevanc:
dar nâch ie unser leben ranc.
des ir waenet, des ist niht.
der wille niht an uns geschiht,
des ir hânt an uns gedâht.
an uns wirt niemer vollebrâht
iuwer unrehtiu gir.
swaz ir uns tuot, sô zeigen wir
barlââmes zelle niht
und swen man gote dienen siht.>
< ist iu des tôdes zil enwiht,
daz ir des tôdes vürhtet niht,
sô wil ich mit des tôdes nôt
lêren iuch des lîbes tôt.>
< daz ist, des wir uns troesten.
wir ahtenz gar zem boesten,
ob wir des tôdes nû genesen.
ez muoz doch etswenne wesen:
dâ von lâz ez volle varn,
wir weln uns niht dâ vor bewarn.>
dô hiez sie villen manegen wîs
der tobende vürste arachîs;
dar nâch gevangen twingen
und aveniere bringen.
dô sie der vür in komen sach,
vil zornlîche er zuozin sprach:
< ir trügenaere, saget an,
wâ ist der trügehafte man,
barlââm, der lügenaere,
des lügelîche maere
mîn kint den goten hât benomen?
daz saget: ir sît mir rehte komen.>
sie sprâchen:< herre, wâ er sî,
dâ lâz in sîn. got ist im bî
mit helflîcher staetekeit.
den heiligen geist er treit;
den hât er gelêret
dîn kint und ez bekêret
ze unsers schephers gebote
von des leiden tiuvels spote.>
der künic zurnde sêre.
< phleget ir der selben lêre,
der die kristen sich verstânt,
die mînen sun verkêret hânt?>
dô sprâchens algelîche:< jâ,
wir sîn kristen.> er sprach sâ:
< durch daz wil ich iuwer leben
in daz krenkest ende geben,
des ich kan gedenken:
ir müget mir niht enwenken.>
< des soltû niht sûmen dich.
krist gap durch uns ze marter sich,
daz suln wir gerne tuon durch in:
dar ûf stêt gar unser sin.>
< gebiutet daz iuwer got,
daz ir gebet durch sîn gebot
iuwer leben in den tôt?
sît daz ir durch in minnet nôt,
sô müezet ir sî lîden.>
dô hiez er sie zersnîden
mit mezzern algemeine.
diu lit grôz unde kleine
hiez er besunder gar von in
snîden unde werfen hin.
die wurden in daz gotes lant
ze lieben erben dô gesant,
dar inne sie iemer mêre sint
bî gote lebendiu gotes kint.
durch die got vil zeichen hie
noch begât und dô begie:
die gotes marteraere,
behüeten uns vor swaere.
dô diz alsus geschach,
avenier, der künic sprach:
< arachîs, vil lieber man,
nû rât aber, sich dar an:
swie guot uns was der êrste rât
daz uns der niht vervangen hât.
nû wirp unde bring zehant
nachorn, den dû hâst genant.>
< herre, daz sol sîn getân:
ich mac nâch mînem willen hân
disen man, swennich in wil.>
dar nâch dô diu naht ein zil
mit trüebe gap dem liehten tage,
nâch der rehten wârheit sage
der vürste vuor vil balde
hin gên dem selben walde,
dâ nachor inne was,
an zouberlîchen buochen las
zouberliste grôze.
über alle sîne genôze
was er mit rîcher vernunft
der meister bluome an dirre kunft
und was nâch des tiuvels spote
ein êwart der abgote,
durch der willen er dâ leit
manegerhande arbeit.
sîner zouberliste er phlac
in der wilde manigen tac
und was des gewaeren gotes
widerstrît und sîns gebotes.
als er dem vürsten wart erkant
der selben naht und er in vant,
sie wurden herzenlîche vrô.
dô sprach der selbe herre alsô:
< nachor, lieber vriunt, mich hât
durch den nôtdürftigsten rât,
der uns ie mê wart erkant,
avenier zuo dir gesant.
uns hât ein valscher man betrogen,
des lêre hât an sich gezogen
mînes lieben herren kint;
darumbe in grôzer swaere sint
alle die lantherren.>
< daz mac vil wol gewerren
den liuten algelîche
ze disem künicrîche.>
< daz wirret uns vil kleine,
wildû uns helfen eine.>
< jâ, gerne. nû rât mir dar zuo;
ich tuon swaz dû wilt, daz ich tuo.>
< daz sage ich dir,> sprach arachîs.
< der selbe zouberaere unwîs
dîn antlütze rehte hât:
daz dîne nâch dem sînen stât.
er ist dû, dû bist der man;
nieman iuch rehte erkennen kan
dich vür in noch in vür dich.
morgen her zuo dir kum ich
unde vâhe dich zehant.
ich vrâge, wie dû sîst genant:
sô nim der kristenheit dich an
und sage, dû sîst ein kristenman,
barlââm: der nam sol dîn
uns nâch dîner rede sîn.
sô soltû dich vâhen lân
und solt mit mir ze hove gân:
des wirt mîn lieber herre vrô.
gên dir hât er vil manege drô;
sô gich et dû der kristenheit,
sô tuot er, als ez im sî leit,
er dreut an dîn leben dir.
lieber vriunt, sô volge mir
und wenke an dîner rede niht.
sô man danne komen siht
unser gote hôhgezît,
diu vil schiere nû gelît,
sô sol von dir der kristenheit
schade und laster sîn bereit.
gên dîner rede koment dar
unserr gote êwarte gar,
die suln mit rede dich bestân;
sô solt dû widerrede hân,
dâ mite solt dû vristen
die trügehaften kristen.
ze jungest lâ dir angesigen,
dû solt sigelôs geligen
und solt jehen, dû habest geseit
im ein valsche unwârheit.
sô danne jôsaphât ersiht,
daz in dîn munt der volge giht,
sô zwîvelt er sô sêre,
daz er lât valsche lêre
und volget unsers willen sâ
vor den lantherren dâ.>
diz wart des tages vollebrâht,
als ez des nahtes was gedâht.
arachîs nam sîne man
und huop sich gên dem walde dan.
dô des nachor innen wart,
er vlôch vor im ûf die vart,
als er geheizen was dâ vor.
dô jageten sie nâch ûf sîn spor:
vil schiere viengen sie in
und brâhten in dem vürsten hin.
der vrâgete in der maere,
wie er geheizen waere.
dô nam er sich an zehant:
er waere barlââm genant
und haete sin, sêl unde leben
an kristenlîche lêre ergeben.
der rede wart der vürste vrô.
dem künege brâhte er in dô;
gevangen er hin vür in kam.
dô sîn der künic war genam,
er sprach:< dû trügenaere,
daz ich sô grôze swaere
sol hân von dîner lêre,
daz müejet mich vil sêre.
dû hâst mîn kint verkêret
und irrekeit gelêret,
dâ mite ich versêret bin
und mîn sun hât verlorn den sin.
dîn valscher trügelîcher rât
daz lant und mich getrüebet hât.>
nachor, der zouberaere, sprach:
< herre mîn, swer dir des jach
daz ich ein trügenaere
mich valscher lêre waere,
der hât unrehte dir geseit.
ich sol die reinen kristenheit
minnen, bredien unde sagen:
dû solt des gên mir verdagen,
daz ich ein trügenaere sî.
mir ist diu gotes lêre bî,
wan ich den gewaeren krist
ze gote künde, als er ist:
daz ist dîn sun gelêret.
ich hân in niht verkêret,
wan ich hân im vorgeseit
got und die rehten kristenheit
und hân im valsche gote erwert.
von mîner lêre ist im beschert
nâch disem lîbe ein süeze leben,
daz im got ze erbene wil geben
ân ende vroelîche
in sînem himelrîche.>
des küneges schimphlîcher zorn
wart gên nachore grôz erkorn.
nachors gelîchesen entsaz
des küneges schimphlîchen haz.
< ich wil dich geniezen lân,
daz ich den selben namen hân,
der eines menschen sol wesen,
und wil dich nû lân genesen:
waz ob dû noch ze buoze stâst,
daz dû mîn kint verkêret hâst.
wildû in wider lêren,
wie er die gote sol êren,
sô wil ich dich genesen lân
und wil dîn walten ûf den wân,>
sprach avenier, der rîche,
mit schimphe zornlîche.
schiere wart daz maere breit:
in daz rîche wart geseit,
wie ez was ergangen,
daz barlaâm waer gevangen:
daz wart jôsaphâte kunt.
dô wart im sîn herze wunt
von klagelîcher swaere.
daz sorge bernde maere
sîn gemüete erschrakte.
mit leide ez im erwakte
sîn herze in grôzem sêre.
mit rehter jâmers lêre
brach in sîn groestiu vreude entzwei.
got unsern herren er anschrei:
< herre krist, vil süezer got,
durch dîn väterlîch gebot
nû behüete dînen kneht,
der des tiuvels unreht
mit dir angevohten hât
und der in dînem kamphe stât
mit sîner lêre zaller stunt,
dem tuo genaedeclîche kunt,
herre, die genâde dîn
und loese in von der swaere sîn.
lâz in geniezen, daz er mich
gewîset, herre, hât an dich,
und biut im dîner helfe hant.
tuo dîner armen diet erkant
dîne gotlîche kraft
und loese in von der heidenschaft.>
jôsaphât diz gebet
ze gote herzeclîche tet,
als ie die getriuwen tuont,
unz er von gote sich verstuont,
daz er was erhoeret
und al sîn leit zerstoeret.
der künic sich dô wol versach
( als im sîn herzevreude jach)
den besten rât hân vunden.
er danket an den stunden
dem vürsten, den ich hân genant,
des guoten râtes, den er vant:
mit vreuden liez er sîne klage.
dar nâch über zwêne tage
gienc er ûf den palas,
dâ jôsaphât ûffe was.
sîn kint, der junkherre,
gên sînem vater verre
mit vroelîchem muote gie:
vil minneclîche er in enphie.
nû phlac der vater solher site
( dâ zeiget er die liebe mite,
der er jôsaphâte jach),
er kuste in, swenn er in sach:
disen site liez er dô.
zornic, als er waere unvrô,
bliht er vil unwertlîche dar
und nam des gruozes kûme war.
vür sich gienc er vil drâte
gên einer kemenâte,
diu jôsaphâte was bereit
mit vil grôzer rîcheit.
vil trûreclîche er nidersaz,
als im sîn vreude waere laz.
sînen sun besanter dô.
< sun> sprach er,< wie kumt ez sô,
daz mich diu vreude hât betrogen,
die ich wânde hân erzogen
an dîner süezen kintheit?
mir ist al vür wâr geseit
von dir ein leidez maere,
daz mînes herzen swaere
mit klagenden sorgen mêret
und mich an vreuden sêret.
mîn vreude was sô grôz an dir,
daz mîn hôhgemüete an mir
von dir begunde hoehen sich:
nû hâst dû sô betrüebet mich,
daz mîn vreude ist geneiget,
mîn hôher muot gesweiget.
ich muoz von schulden leider jehen,
daz mir diu vorhte ist geschehen,
der sich mîn zwîvel ie versach,
der mir mit herzenschricken jach
vil vorhte an dir. dêst vollekomen,
ist ez, als ich hân vernomen.
den trôst ich mir selben gap,
dû soldest mînes alters stap
und mîner vreuden sunnenschîn
mit liebe an mînem alter sîn:
daz hâst dû mir verkêret,
die grâwen löcke entêret,
die mit vil grôzen êren gar
sint von alter missevar.>
< vater, waz hân ich getân,
des dû wilt beswaerde hân?
waz ist an mir geschehen dir,
daz dû sô sêre klagest von mir?>
< sun, dâ hâstû mîn leben
vremeden vînden gegeben
gar ze schimphlîchem spote.
dû wilt dich einem vremeden gote
durch valsche lüge nâhen
und unser gote smâhen,
die guot sint unde gewaere.
daz dich ein lügenaere
mit lüge an sich betrogen hât,
und durch den smaehest mînen rât
durch sîne valschen lêre,
daz müet mich an dir sêre.
mich trôste des daz herze mîn,
daz du soldest mîn erbe sîn
in mînem lande, des wând ich.
der wân hât betrogen mich,
wan dû wilt guot und êre lân
durch einen trügelîchen wân
und wilt diz vreuden rîche leben
umb eine kranke armuot geben,
als marîen sun gebôt.
swer dem volget, der muoz nôt
lîden und grôz arbeit:
er minnet niht wan armekeit.
dû bist ein kint, daz schînet wol.
kint tumplîche gebâren sol:
sun, als ist ouch dir geschehen,
dô dû begundest übersehen
mînen väterlîchen rât
und dich durch valsche missetât
vür mich, vür mâge und vür man
naeme valsches râtes an:
daz was vil kintlîche getân.
mich muoz iemer wunder hân,
daz unser gote sint sô guot,
daz sie dînen tumben muot
niht râchen dô ze male
mit einer donrestrâle
und daz dich durch die sünde
daz endelôse abgründe
von ir gebote niht verslant,
dô dir diu schulde wart erkant.
daz dû des niht vorhtest,
dô dû ir heil verworhtest,
daz was vil kintlich an dir.
lieber sun, nû volge mir
und êre an mir den vater dîn!
lâ dir die valschen lêre sîn
unwert unde unmaere gar
und nim mîner lêre war.
gedenke, herzeliebez kint,
daz dise valschen kristen sint
in einer toerschen tobeheit.
ir lêre ein künftic leben seit
und nâch des lîbes ende,
nâch tôde, ein urstende.
nû merke, wie daz möhte ergân,
daz ein lîp dâ möhte erstân,
dâ vleisch noch bein noch âder ist?
dirre trügelîche list
und manic ander valscher rât
von der kristen lêre gât.
des sie dâ jehent, dêst ein niht.
ir geloube ist gar enwiht:
in wonet niht wan valscheit bî.
sît ez ein trügelêre sî,
diu dîne kintheit verirret hât,
sô soltû durch mînen rât
den goten bringen schiere
ze opher hundert stiere,
zam und wildes alsô vil,
sô dîn gemüete selbe wil:
ob wir mit disen sachen
mugen senfter machen
gên uns ir zornlîchen muot.
ich hân doch êre unde guot
von in und ouch daz rîche.
sie hôrten gotlîche
mîn gebet nâch mîner gir
und gâben dich ze kinde mir:
des solt dû sie geniezen lân.
tuo hin den tumplîchen wân,
der dir verkêret hât den muot.
sie sint übel unde guot,
daz stêt allez in ir hant:
der gewalt ist in erkant.
durch daz soltû zir hulden komen:
swâ dir ir hulde hât benomen
diu kintlîche sünde dîn,
daz sol alsus versüenet sîn.>
der junkherre gedagete,
biz daz er vollesagete.
des vater zunge leit im vür
in maneger betlîchen kür
vil süeze rede, die er begie:
mit smeichenne er in umbevie.
der knappe von dem herzen stiez,
swaz sîn vater im gehiez.
sîn herze vestente sich gote
staete in sînem gebote:
daz wart an sînen werken schîn.
er sprach:< vil lieber vater mîn,
daz man mich nû kristen siht,
des wil ich dir lougen niht,
als ez an mir geschehen ist.
ich hân den gewaeren krist
ze einem rehten gote erkant,
wan er hât mit sîner hant
beslozzen aller dinge kraft.
sîn gotlîchiu meisterschaft
geschuof, swaz ie wart erkant
und daz geschephede ist genant.
daz êrste mensche, dem ie leben
unde name wart gegeben,
daz schuof er von der erde
und hiez ez iemer werde
leben in vreuden wîse
in dem süezen paradîse.
daz überhôrte sîn gebot
durch des leiden tiuvels spot;
diu sünde sante an in den tôt:
sus koufter uns des tôdes nôt.
den endelôsen lebenden tôt,
den uns des wîbes schulde bôt,
ertôte krist, dô er leit
den tôt nâch der menscheit.
diu reine maget hât daz leben
uns vür des wîbes tôt gegeben,
dô krist von himele wart gesant
und durch uns mensche genant,
der hirte durch diu schâf erstarp.
des tiuvels kraft an im verdarp:
er gap dem tôde ein ende
mit sîner urstende.
diu himelvart uns goffent ist,
die hât der vil reine krist
uns armen widerkoufet;
dem bin ich getoufet,
an des namen hât mîn leben
mit gelouben sich ergeben,
in sînen süezen namen drin
ze einem gote geloube ich in
wan alle genande geschaft
gemachet hât sîn eines kraft.
allen dingen hât gegeben
geschephede namen unde leben
sîn eines kunst, sîn eines wort:
er ist daz urhap und daz ort.
mîne tôttrüebe naht
hât sînes liehtes schîn bedaht.
daz unreht ich gelâzen hân
und bin dem rehten undertân.
solte ich nû durch dîn gebot
krist, den gewaeren got,
den reinen schephaere, lân
und dînen goten bî gestân?
nû sage mir, vater, vürbaz,
durch welhe rede taete ich daz?
sage mir eine kraft von in
und einen wîslîchen sîn,
sô tuon ich zehant durch dich
swaz dû mit bete heizest mich.
sie sint gegozzen unde gesniten;
waere ein lit an in vermiten,
sie müestens iemer âne wesen;
sie waeren iemer ungenesen
von ir eigenlîcher kraft.
menschlîchiu meisterschaft,
daz von gote sich verstât,
selten got gemachet hât.
nû sage mir, wâ getet ir munt
den liuten rehte lêre ie kunt?
dîne gote stummen sint,
toube tôren, sie sint blint,
swelher stât, vil stille er stât.
von der stat er niender gât.
er sitzet, swar er wirt gesat,
daz er verwandelt niht die stat.
diz ist gar an in geschehen,
des muoz mir dîn volge jehen.
man staele wol durch einen spot
dir den gewaltigesten got
und taet im, swaz man wolde.
waer er sô guot von golde,
man braech in âne sînen danc.
dêswâr, der gote helfe ist kranc.
waer ich dir liep als dîn kint,
als ander kint den liuten sint,
dû soldest an mir wesen geil,
daz mir got ie getet daz heil,
daz ich von sinnen mich verstân,
von wem ich lîp und sêle hân.
daz ich mich des versinnen kan,
daz lêrte mich ein saelic man,
dem ich der lêre volgen wil
unz an mînes lîbes zil,
daz mir got danne gebe daz leben,
dem niemer ende wirt gegeben.
daz hâtich geheizen mir,
den selben muot vundich an dir,
daz dû ein vroelîch ende
gaebest dem ellende,
in dem dû verellendet bist.
sît des mîn muot betrogen ist,
sô wil aber ich staete sîn
mit staete an dem gelouben mîn.
dû rüerst den himel mit der hant,
dir wirt daz tiefe abgründe erkant,
ê daz ich iemer durch dich
der kristenheit geloube mich.
volge dû der lêre mîn,
wellest dû iemer mêre sîn
lebende êwiclîche
ze gotes himelrîche:
ich volge dir benamen niht
biz daz man mich lebende siht.
mîn got ist reine, süeze, guot:
von dem scheide ich niht den muot.>
dô der künic hôrte daz,
er begreif sô grôzen haz,
daz sîn gemüete in zorne bran
und er grisgramen began.
von zorne wart er missevar:
er sach vil zornlîche dar.
mit grimme er zürnende sprach:
< diz grôze leit, diz ungemach
ich von dem guoten willen hân,
daz ich dir baz hân getân,
danne vater kinde ie mê.
daz mir nû ist von dir sô wê,
dâ ist niemen schuldic an,
wan ich vil unsaelic man.
ez ist an dir nû geschehen,
des ich die wîsen hôrte jehen,
dô dû geborn wurde mir:
dô sageten sie mir von dir,
dû woldest übelwillic sîn
und smaehen gar den willen mîn
und dîne vriunt verkiesen,
dâ mite gar verliesen
der vriunde gunst und ouch diz lant:
daz tuot sich balde an dir bekant.
sol ich des vater namen lân
und wil dû mich ze vînde hân,
des gewer ich dich alsô,
daz dûs niemer wirdest vrô,
sô dû mich ze vater lâst
und gerner mich ze vînde hâst.>
jôsaphât mit zühten sprach,
dô er den vater zürnen sach:
< herre, dû hâst dir erkorn
einen al ze grôzen zorn.
dû klagest al ze sêre ein teil
dînes kindes groeste heil.
wil dû dich von zorne schamen,
daz dû mich habest in kindes namen,
sô maht dû vater heizen niht.
swaz anders mir von dir geschiht,
dan kinde von dem vater sol,
daz zimt niht vater namen wol.
mich tuot leidic unde unvrô
dîn unväterlîchiu drô.
ê daz ich die dulde,
sô lâze ich dîne hulde
und rûme dir daz rîche
von hinnen vlühteclîche;
sô schendestû des vater namen,
des mahtû dich sêre schamen.
lâ dîne drôlîche guft!
des vogels vliegen durch den luft
erverst dû sanfter und sîn spor;
des schiffes vart, dar ez vert vor,
vindest dû lîhter durch den wâc,
ê mich dîn vîentlîcher bâc
von dem gelouben scheide dan,
des ich mich hân genomen an,
den mînes herzen staetekeit
von kristenlîcher lêre treit.
noch waer mîn rât alsô getân,
daz dû geruochtest dich verstân,
daz al diu welt unde ir kint
dem dürren heu gelîchet sint
mit allem ir ruome.
reht als ein heubluome
lebet daz mensche, anders niht.
des bluomen wünneclîch gesiht
dorret schiere, er wirt verzert.
alsam ein ringer schate vert
und als ein troumlîcher muot
der liute leben, der welte guot.
sô wert diu gotes lêre
vil staete iemer mêre
und ouch sîn gotlîchez guot.
swer sînen willen gerne tuot,
dem wirt ein wünneclîchez leben
ân ende vroelîche gegeben.
diz leben niht geherten mac,
wan als ein kurzer brâwenslac.
ze helle ist leider riuwe niht,
ze spâte riuwe dâ geschiht:
diz ist diu arbeitlîche zît.
nâch tôde got ze lône gît
swaz hie gedienet wirt umb in.
diz nim in dînes herzen sin
nâch des gelouben vergiht.
got wil an dem sünder niht,
daz er alsô werbe
daz er in sünden sterbe,
wan er sol sünden sich begeben
und iemer mêre ân ende leben.>
der rede und ouch der lêre
geschach vil unde mêre
von dem edeln knappen dâ:
des verdrôz den künic sâ.
vil zornlîche er ûf spranc,
des kindes rede in zornes twanc.
er hâte manegerhande leit,
daz er des sunes wîsheit
niht kunde widersprechen
und niht getorste rechen
durch sîner liebe gebot
an im, daz er diu abgot
versmâhte alsô sêre.
noch muot in vürbaz mêre,
daz er mit bete, noch mit gebote,
noch mit dröuwenne, von gote
kunde erweichen sînen sin.
ouch vorhte er des, ob er in
der rede iht mêre baete,
daz er dâ wider taete
sô wîslîche antwürte schîn,
daz er al der liebe sîn
an im vergezzen müeste gar.
al dirre vorhte nam er war:
er wart ir leidic unde unvrô.
mit zorne manigerhande drô
leit er an jôsaphâten.
ûz dirre kemenâten
schiet avenier, der rîche,
mit zorne trûreclîche.
jôsaphât beleip aldort.
er sprach ze gote disiu wort
von herzen in dem muote:
< krist herre, in dîne huote
ergibe ich armer sünder mich
und bite des von herzen dich,
daz dû geruochest mir gestân,
sît ich niht mê helfe hân,
und sterke an mir dîne kraft,
daz ich belîbe sigehaft
in dîner hulde, herre got,
sît mich nû des tiuvels spot
und sîn trügelîcher rât
sô manege wîs bestanden hât
mit mînes vater listen,
nû ruoche mich dir vristen,
wan des mîn vater vlîzet sich,
daz er wil verkêren mich.
sît daz dû elliu herzen weist,
sô sende den heiligen geist
mir in mîn gemüete,
daz er mich dir behüete.>
diz gebet erhôrte got:
im erzeigte gotes gebot
einen vreuderîchen trôst,
der in von swaere tet erlôst.
sîn herze gar erglüete:
des heilegen geistes güete
sô sêre enzunte disen man,
daz sîn herze dô began
in gotlîchen minnen
vil vesteclîche brinnen.
des küniges muot beswaeret was,
daz er dort ûf dem palas
sô leide widerrede vant.
er besante dar zehant
sînen râtgeben dô.
dem seiter, daz er dort mit drô,
mit bete, noch mit minnen
an sich mohte gewinnen
den reinen jôsaphâten.
< nû lâ mich dir râten>
sprach dirre vürste rîche.
< bit in nû güetlîche;
lâ drôlîche rede sîn!>
< ist daz dîn rât?>< jâ, herre mîn.
kunne uns niht vervâhen daz,
sô denken aber vürbaz,
ob uns danne iht bezzers sî,
dâ von wir werden sorgen vrî,
die wir hân mit solher klage.>
dô gie an dem andern tage
avenier, der rîche man,
ûf den palas wider dan.
sîn kint in minneclîche enphie.
den sun er zuozim umbevie.
im gap mit liebe sâ zestunt
vil manigen süezen kus sîn munt.
sie sâzen beide.< sun> sprach er,
< nû bin ich aber komen her
und wil dich biten, daz dû mich
entwerst niht, des bite ich dich,
darumbe ich ê was zuo dir komen.
dû hâst ein leben an dich genomen,
daz ist niht, wan ein trügeheit;
an daz hâstû den sin geleit,
daz dunket gar dîn herze guot
durch dînen kintlîchen muot.
waer dir anders iht erkant,
dar an waer ouch dîn sin gewant.
nû sol ich dînes herzen sin
( wan ich dîn rehter vater bin)
wol wîsen unde lêren,
ze bezzerunge kêren.
des solt dû, sun, gewern mich,
als ich von herzen bite dich.
daz ist ze lobe, ze saelden guot,
swelch kint des vater willen tuot:
des sol dîn herze sich verstân.
dû solt mich geniezen lân,
daz mir mit grôzer werdekeit
der besten lop ie was bereit.
lebe, als ich gelebet hân,
sô mag ez dir vil wol ergân.
ich hân gehabet êr unde guot,
ich truoc sô hôhe ie mînen muot,
daz sich mit lobe die besten
gên mir ie muosten gesten.
mîn hant mit ritterlîcher tât
vil manegen man betwungen hât,
daz er guot und eigen lant
muoste hân von mîner hant.
ich was ie miltes guotes
und rîche hôhes muotes,
des mich nie ze nôt verdrôz.
des muoz manic mîn genôz
jehn, der mîner manheit
gelîchen prîs nie anerstreit.
sie sint mir alle noch gelegen,
die mir gelîche wolten wegen
ir manheit mînem muote.
mit lîbe noch mit guote
wart ich überlobet nie,
des mir jehent alle die,
den mîn lop ist erkant.
mir hât mîn werlîchiu hant
biz her an disen tac bejaget,
daz an mir ist der prîs betaget,
dem nie mit vîentlîchen siten
schamendez lop wart ûzerstriten
mit hoehers lobes prîse.
sît ich ie was sô wîse,
daz man mich her zem besten wac,
als ich von wârheit sprechen mac:
waenest dû danne, liebez kint,
daz ich der sinne waer sô blint,
westich niht rehte, daz diz leben,
an daz dû dich hâst ergeben,
sô valsch mit trüge waere,
daz ich es danne enbaere?
vil ofte hân ich her besant
die besten meister, die ich vant
gelobet in hôher wîsheit,
die mir hânt vür wâr geseit,
daz ez mit spotlîcher lüge
sî niht wan ein valschiu trüge.
unser gote, die sint guot:
swer in gerne dienest tuot,
den tuot ir helflîcher trôst
von aller sîner nôt erlôst:
des bin ich worden innen.
swes ich wolt ie beginnen,
dâ gelanc mir ie wol an,
schiet ich mit ir hulden dan.
daz ist an mir wol worden schîn,
daz sie gewaltic mugen sîn.
sît ich begunde vristen
ir êre von den kristen,
sît bin ich saeleclîche
mit saelden worden rîche.
dû würde mir sît ûzerkorn
ein kint ze saelden mir geborn,
des soltû die gote unt mich
geniezen lân, des bite ich dich
mit bete und ouch mit lêre.
gedenke, wie grôz êre
dem kinde an saelden ist, wie guot,
ob ez des vater willen tuot.
sun, des lâ geniezen mich!
wis an mir gemant, daz ich
dîn vater bin und dû mîn kint
und lâ den muot varn unde erwint
der trügelîchen valscheit,
die dîn herze nâhen treit.>
jôsaphât mit zühten saz.
sîn herze des niht vergaz,
ez vestende ein gotes wort,
daz got hât gesprochen dort:
swer sich sîn und sînes namen
vor den liuten welle schamen,
des scham er sich êweclîche
ze sînes vater rîche;
und daz got lêret, sîn gebot
mit staete minnen sunder spot
vür vater, muoter, bruoder, wîp,
vür die welt, vür guot, vür lîp.
diz nam er in den gedanc,
als in diu gotes minne twanc.
er sprach:< vater, ez ist guot,
swelch kint des vater willen tuot.
ez lêret ouch diu kristen ê,
daz ein ieglîch kint gestê
ze sînes vater lêre,
vater und muoter êre.
daz kint sol dem vater sîn
tuon alles sînes willen schîn,
unz er ze guote kêre
die väterlîchen lêre.
beginne er die verkêren,
daz kint unrehte lêren,
sô râte ich, daz er kêre
dan an die gotes lêre.
mîn sêle mir vil lieber ist
dan der lîp: daz lêret krist.
daz ich die durch dich verlür
und dich doch niht trüege vür,
wan daz dû waerest ouch verlorn:
sô waere ich bezzer ungeborn.
gebit es niemer mêre mich,
wan diu bete ist unbetelich.
dû hâst mir sô vil geseit
von dîner grôzen manheit:
der ist vil an dir geschehen,
des muoz ich dir der volge jehen.
daz hân ich wol bevunden
vil ofte an manigen stunden,
daz ez mit rehter wârheit mir
dicke wart geseit von dir.
sît nû dîn herze ie was sô grôz,
daz ez nie manheit verdrôz,
daz solt dû lâzen werden schîn,
den prîs der hoehsten wirde dîn
gar kroenen unde zieren
und wunschlîche florieren
mit dem reinen toufe gotes
und mit den werken sîns gebotes.
gelobetes herzen manlîch muot
selten unmanlîche tuot.
got minnet tugende rîchez leben:
daz hât er durch daz gegeben,
daz man nâch sîner lêre
die tugent ze tugenden kêre.
tugende rîch gemüete,
mit manheit manlîch güete
sol man niht lân verderben
und in unmanheit sterben.
got minnen, dêst ein manheit,
diu aller tugende krône treit.
ein zage unde ein boeser wiht
der mac ze gotes rîche niht,
der ist deweder warm noch kalt,
ze sünden noch ze buoze balt.
dû hâst des einen wol gephlegen.
dû bist der welte gar ein degen,
nû wirt ouch gote ein kemphe wert,
der dîn ze einem kemphen gert.
vater, got hât dir gegeben
vernunst unde wîsez leben:
daz hâst dû gar von sîner kraft.
an dich hât sîn meisterschaft
geleit wunschlîcher dinge vil,
daz des dîn muot niht wizzen wil,
dâ krenkestû die witze dîn.
lâ dir ein ebenmâze sîn,
daz ein tumbez vederspil
hât rehter sinne alsô vil,
daz im eines menschen hant
wirt heinlich unde liep erkant,
durch daz ez dâ vindet gar
heinlich liep und lîpnar;
swie sîn geslehte ungerne sî
menschlîchem künne bî,
daz mensche ez niht verbirt,
als ez bî im gezamet wirt.
sus muoz mich iemer wunder hân,
daz dû dich niht wilt verstân,
des dû dich doch wol verstâst,
daz dû von gote enphangen hâst
sêle, lip, guot, êre, leben,
daz dir sîn witze hât gegeben.
daz dû des hant vliuhest sô,
des muost dû iemer sîn unvrô.
daz dû vür got, vür gotes kraft
minnest menschen geschaft,
daz ist ein schamelîcher site:
dâ bejagestû niht mite
wan der sêle wernde nôt,
den iemer sterbenden tôt.
ob dû nû mit dîner hant
alliu rîche und alliu lant
dir einem möhtest twingen
ze dienestlîchen dingen,
unde waer dir danne ein leben
vür aller menschen lîp gegeben,
sô müesestû doch sterben,
an dem zil verderben.
des tiuvels stricke sint geleit
in dirre welte rîcheit.
swer sich an die rîcheit lât
und sî willeclîchen hât,
der muoz sî vil ungerne lân,
sô er sî gerne wolde hân.
dû sihst wol, swaz wir werben,
wir müezen alle sterben.
diu sêle nâch dem lône vert,
der ir von gote ist beschert,
den hie der lîp gedienet hât.
diu sêle mit dem lîbe erstât
an der welte endes zil,
sô got uns allen lônen wil.
dâ siht man gotes erwelten sîn
liehter dan der sunnen schîn.
in wirt geistlîcher armekeit
offenlîche danc geseit
vor al der welte angesiht.
dâ wirt vür wâr vergezzen niht,
man rüege dâ, swaz alhie
des lîbes leben ie begie.
den erwelten wirt ein leben
mit vreude ân allez leit gegeben.
den vervluochten wirt der tôt
benant mit vreudelôser nôt;
wan al diu welt bevindet dâ
mit gotes itewîze sâ,
swaz sie hie gesündet hânt.
in grôzer schame sie dâ stânt:
ir sünden schame, ir missetât
von gote ein schamendez rüegen hât.
ir sünden werdent sie geschant
und in daz helleviur gesant,
dâ sie müezen iemer mê
mit leide hân ach unde wê.
wer waere sô gar âne sin,
daz er den süezen gewin,
dem man iemer lebenes giht,
mit tûsent tôden koufte niht,
ob im der sterben töhte,
daz er sie haben möhte?
ûf die vil süezen rîcheit,
diu dâ den guoten ist bereit,
dultich der welte armekeit,
daz si werde mir bereit.>
dô der künic hôrte, daz
des kindes sin baz unt baz
gevestent was an gotes gebote
und daz er in niht von gote
bringen mohte, daz muot in.
iedoch nam er in den sin,
daz im des kindes wârheit
haete wâr und rehte geseit,
und daz im niht töhte,
daz erz versprechen möhte.
des tiuvels rât behabete in
an sich sô gar, daz er den sin
ze gote niender kêrte.
swie sîn herze in lêrte
des kindes worten volge jehen,
er lie die gewonheit spehen,
daz er gên gote ze aller zît
was des gelouben widerstrît.
< sun> sprach er,< ich sihe an dir,
daz dû niht wilt volgen mir
und daz dîn herze mînen rât
durch valschen rât versmâhet hât:
diu swaere gît mir leides vil.
ein spil ich dir nû teilen wil,
daz ist daz waegeste mir
an dem gelouben unde dir,
und wil niht mêre biten dich,
wan dû sô vil entêrest mich.
ich wil der bete geben ein zil;
vernim, waz ich dir teilen wil.
ez lît in den banden mîn
der trügehafte meister dîn,
des lüge trügelîcher rât
dînen sin verkêret hât.
nû wil ich alle kristen
her ûf die rede vristen,
daz er dîn unde ir kemphe sî:
in stê sîn bestiu rede bî.
sô wil ich, daz die meister mîn
der gote kemphen gên in sîn.
swer dâ gesiget, des lêre ist guot;
dem volgen beide, dêst mîn muot.
gesigt er dâ, sô volge ich dir.
gesigent sie, dû volgest mir.>
< daz ist mir liep> sprach jôsaphât,
< ich minne disen selben rât.
ich weiz wol, daz der gotes gewalt
sô wît ist und sô manicvalt,
daz er niht verderben lât
swer an in suochet sînen rât.
mîn sêle, mînes herzen sin
hânt sich verlâzen gar an in.
sîn reiner wille werde
ze himel und ûf der erde.
swaz got wil, daz sî getân,
daz sol ich an in gerne lân
mit unverzagetem muote.
nû helfe got, der guote,
den sînen nâch den hulden sîn,
daz uns sîn güete werde schîn.>
der künic schiet von dan zehant.
er hiez mit brieven in daz lant
künden, in sîn rîche,
daz die kristen vridelîche
ze disem kamphe kaemen
und rehte dâ vernaemen,
wie ez dem kemphen solde ergân,
den sie ze kemphen solden hân,
den man vür barlââmen wielt
und ûf des kamphes strît behielt.
der kristen man dâ wênic vant:
gerûmet hâten sie daz lant,
der künic sie sô gar vertreip,
daz ir deheiner dâ beleip.
ir wart an den stunden
deheiner niender vunden
in allem sînem lande dâ.
von kaldêâ und von indîâ,
wurden alle meister gar
besant ûf disen kamph aldar
und wîser sternewarter vil
ûf des selben kamphes zil.
nû sie ze samene wurden brâht,
als ez was von in gedâht,
sie wârn in manigem râte
gên dem werden jôsaphâte.
in sînem râte niemen was,
wan got und bârachîas,
den ich hân hie vor genant,
der den wîsen wunden vant,
des rât im sînes herren haz
erwante, den sîn vorhte entsaz.
des tages, dô die meister gar
zuo disem kamphe kômen dar
und vil nâch algelîche
von sînem künicrîche
die armen zuo den rîchen
dar begunden strîchen:
der künec an daz gestüele kam,
sînen lieben sun er nam
und hiez in zuozim sitzen gân.
durch sîne zuht wolt er daz lân,
ûf sînen schamel er gesaz;
in dûhte des, daz stüende im baz.
dô stuonden ûf kamphlîchen strît
die meister an der selben zît.
einhalp dô wart brâht nachor,
als ez gerâten was dâ vor,
der barlââm der ander was;
der stuont und bârachîas
in jôsaphâtes teile
der kristenheit ze heile.
der künic hiez dô swîgen sâ.
daz wart getân. sie swigen dâ.
zuo den meistern kêrter sich,
er sprach:< wizzet ir, daz ich
iuch durch wîsheit hân besant
und durch rât her in diz lant?
ir habent sin, red unde vernunst,
nâch witzerîcher lêre kunst.
dar zuo hât iuwer meisterschaft
der gote namen unde ir kraft
rehte erlesen unde erkant:
des sult ir hiute sîn gemant.
uns hât alhie diu kristenheit
vil grôzen strît vürgeleit:
sie velschent unser lêre
und unser gote sêre.
der kemphen sult ir hiute sîn
alsô nâch dem willen mîn,
daz ich iuch iemer mêre
mit guote an êren êre.
ob ir hiute alsô gesigent,
daz sie sigelôs geligent,
sô mache ich iuwer saelde breit
mit guotes grôzer rîcheit.
siht man iuch sigelôs geligen,
daz ir die kristen lât gesigen,
sô müezet ir verderben
und vil schäntlîcher sterben
dan iemen ie verdurbe,
der lesterlîche sturbe.
als ir gelîdent dise nôt
und den lasterlîchen tôt,
sô machich elliu diu kint,
diu in iuwerm künne sint.
vremeden liuten undertân,
daz sie müezen iemer hân
in dienestlîcher arbeit
angest, nôt mit armekeit:
her an sol iuwer witze sehen.
benamen, des ich hân gejehen,
daz briche ich ûf mîn êre niht,
ob man iu niht des siges giht.>
dô sprach aber jôsaphât:
< vater mîn, dîn zunge hât
des besten gar alhie gedâht.
daz ez werde vollebrâht,
daz ruoche gebieten got.
diz ist ein keiserlîch gebot,
daz vil wol gezimet mir
ze mînem kriege unde ouch dir.
ez sol uns beiden staete sîn,
diz sage ouch ich dem meister mîn.>
gên nachore kêrter dô,
drôlîche sprach er alsô:
< bistû mîn meister barlââm,
der mir bôt sô rîchen krâm,
des kraft der rîcheit krône treit
ob al der welte rîcheit?>
< jâ> sprach er dô,< der bin ich.>
< sô solt dû wol bedenken dich,
in welher rîcheit ich was,
dô dîn zunge mir vorlas,
wie dirre welte rîchtuom
niht wan ein üppeclîcher ruom,
trügelich und wandelbaere
mit kurzen vreuden waere
und wie er mich verleite
in endelôse arbeite
und wie diu welt ein ende hât,
in dem si leitlîche zergât,
und wie der welte rîcheit
niht wan gên dem tôde treit.
des hieze dû gedenken mich
unde riete mir, daz ich
dise rîcheit lieze gar
und einer rîcheit naeme war,
der ende niemer wurde erkant;
an der würde mir benant
ein iemer staete wernde guot.
mit geistlîcher armuot
soltich die rîcheit koufen
und das ich solde toufen
mich durch einen vremeden got.
dû sagetest mir, daz des gebot
al dirre welte geschaft
niht wan mit eines wortes kraft
geschüefe und werden hieze,
daz ich durch den lieze
daz guot, den lîp, weltlîchen muot
umbe ein endelôsez guot.
des hân ich gevolget dir,
dar nâch sô dû riete mir,
und dulte geistlîche nôt
vür den endelôsen tôt
durch dîner lêre gebot
und durch dînen vremeden got.
diz ist mînem vater zorn,
sînen gruoz hân ich verlorn
und dar zuo mâge unde man.
swaz ich vriunde ie gewan,
die zürnent sêre, daz ich hân
die gote und ouch die vriunt gelân.
her an soltû gedenken sô,
daz dich diu lêre iht mache unvrô.
beschirmestû die wârheit,
als dû mir sî hâst geseit,
sô bist dû gar gewaere
der wârheit bredigaere.
daz ist dir saelde und êre,
sô volge ich dîner lêre
und wil in mîner jâre vrist
gelouben iemer mêre an krist.
lâst aber dû dir angesigen
und muost dû sigelôs geligen,
sô muoz dîn lêre sîn ein trüge.
hâstû mich danne in solher lüge
in die kristenheit betrogen,
sô lügelîche mir gelogen,
sô wirdich der welte spot,
sô mac dich dîn valscher got
des behüeten niht vor mir,
ich reche mînen zorn an dir:
ich snîde sâ ze stunde
ûz dînem valschen munde
die valschen zungen, diu mir gap
von êrst des râtes urhap;
dar nâch dîn herze, daz den rât
gegeben dîner zungen hât,
der mich hât überwunden,
die wirfe ich sâ den hunden
und dînen lîp ze spîse,
daz ieglîch gouch unwîse
an dir ein vorbilde neme,
wie wol ime daz gezeme,
daz er mit valscher lêre
küniges kint verkêre.>
dô disiu rede alsus geschach
unde nachor rehte ersach,
daz er dâ vor in allen
in die gruobe was gevallen,
die er der kristenheite gruop,
dô er sich dar durch velschen huop
die reinen gotes kristenheit:
der stric, der dô von im geleit
was und von der heidenschaft,
dâ was er inne behaft.
sîn herze daz was worden wunt
von sîner strâle dô zestunt:
sîn selbes schôz in sêrte,
daz wider an in kêrte.
diu rede im solher vorhte jach,
daz man in sêre bleichen sach:
er waer vil gerne anderswâ.
doch gedâhte er im sâ,
daz im vil bezzer waere,
daz in diu nôt verbaere,
dan ob er müese lîden nôt
und disen lästerlîchen tôt,
des er niemer würde vrî,
ob er dem künege stüende bî.
der nôt gedâhter wol genesen,
wolt er der wârheit kemphe wesen.
diu vorhte got in lêrte,
daz er den sin bekêrte
baz danne es wurde gedâht,
dô er dar wart ze kemphen brâht.
mit vride wart gevestent dort
des küneges und des knappen wort,
diu sie den meistern seiten
und beidenthalp vürleiten.
dâ was gesamnet liute vil
durch des selben kamphes zil,
die verre wâren komen dar
und gerne wolden nemen war,
wer dâ solte dô gesigen
oder sigelôs geligen.
dô wart gesweiget überal
der liute dôz unde ir schal.
in den kamph trâten sâ
gotes und des tiuvels kemphen dâ.
der geist der wîslîchen vernunst,
der lêrer redelîcher kunst
in nachores herze dranc,
sîne zungen er betwanc,
daz si vil anders rette gar,
danne er waere komen dar.
sînen sin, an witzen kranc,
der selbe geist ze wîsheit twanc,
der balââmes esele dort
gap sin und menschlîchiu wort,
der hiez in dem herzen sîn
wahsen sîner sunnen schîn,
daz er dar zuo gesaehe,
wie er aldâ verjaehe
der rehten wârheit, die sîn munt
von gote solte machen kunt.
der kamph wart erhaben dô.
der wîsest under in sprach sô:
< bist dû barlââm genant,
der unser gote hât geschant
und alsô manige trügeheit
von ir helfe hât geseit?>
< jâ, barlââm daz ist mîn name.
ich gihe mir sîn ân alle schame.>
< nû wer riet dînem herzen daz
dich ein sô tumber sin besaz,
daz dû mit valschem râte
getorstest jôsaphâte
sîn rehtez leben verkêren
und ein unrehtez lêren?>
< ich hân in niht verkêret,
ich hân in reht gelêret,
wie er des tôdes sol genesen
und wie er sol behalten wesen.>
< wâ sol er behalten wesen
und des tôdes gar genesen?
niemen ist, er sterbe,
swie witzeclîche er werbe.>
< des lîbes tôt meine ich nicht,
sô man den lîp ersterben siht;
swer danne stirbet, der ist tôt,
ân ende in endelôser nôt.
den tôt hân ich im benomen,
wil er alsô volle komen,
daz er behaltet mînen rât,
als er sîn begunnen hât.>
< diz spel ist gar ein trügeheit,
dâ von dû nû hâst geseit.
dû lêrtest in die hoehsten gote
lâzen gar, in der gebote
die besten von dem rîche lebent,
die sich an ir helfe ergebent.
die gar die liste vunden
vor uns in manigen stunden,
die wâren alle in ir gebote
und hiezen sie gewaere gote.
nû lêrt dîn zunge einen got.
( daz ist gar der wîsen spot),
der heizet krist. des kriuzes tôt
leit er in sterbender nôt:
waz kraft ist dir an dem erkant,
daz dû die gote hâst geschant
durch in? daz ist ein tumpheit,
diu dich ûz wîsen sinnen treit.>
< ez ist benamen wâr, daz krist
got ie was und iemer ist.
durch uns geruochte er sich geben
in broedez menschlîchez leben.
daz starp durch uns; sîn gotheit
slôz himels und der erde treit.
nû weder dunket bezzer dich,
des soltû bewîsen mich:
ein dinc, daz alle sîne kraft
von eines meisters meisterschaft
hât, oder des meisters kraft,
der ez geschuof mit meisterschaft?
des solt dû mir die wârheit sagen.>
< der meister muoz mir baz behagen.>
< ist daz wâr?>< jâ, des gihich.>
< hie bî bedenke vür baz dich,
wie dû dich selben hâst geschant.
sie machte eines mannes hant,
sie sint gar âne wîsheit;
gân, sprechen, sehen ist in verseit,
die ir tumben betet an.
ir soltet billîcher den man
êren baz, des wîsheit
daz bilde gôz oder sneit.
dû sihst wol, iuwer sin ist blint,
iuwer hoehsten gote sint
menschlîchiu hantgetât,
die menschen hant gemachet hât.
dû hâst dich selben übersaget:
sît dir der meister baz behaget,
sô ist dir des menschen hant
kreftiger dan dîn got erkant.>
des wart aldâ der kriec verlân:
im kunde niemen widerstân,
die man dâ gên im kemphen sach.
der valsche meister aber sprach:
< wir hân diu bilde niht ze goten,
uns hât diu liebe geboten,
die wir von den goten hân,
daz wir in sîn undertân.>
nachor antwurte im dô:
< gihstû des, daz sî alsô.
des lâ mich dich wîsen hie,
wâ von sich daz anevie.
driu leben in dirre welte lebent,
diu vil goten sich ergebent,
diu wil ich dir bescheiden:
juden, kristen, heiden.
der eine teil der ist an iu,
der hât geteilet sich in driu:
kaldêî, kriechen, egyptiî.
den ist gar sunderleben bî,
die alle sunder sich verstânt
gelouben sunders, den sie hânt.
wer dâ wol und übel var,
daz wirt hie gekündet gar.
die kaldêî hânt gegeben
sich in ein valschez trügeleben:
sie nâmen sich an der geschaft,
und minten sî vür gotes kraft;
von den wart des begunnen.
dem mânen und der sunnen.
dem himele und der erde
dienten sie vil werde.
viure, wazzer, lufte
nâch toersches herzen gufte
machten sie gezierde vil
den selben goten ze einem spil.
diz was mit des tiuvels spote,
die gedâhten solher gote.>
die meister von kaldêâ
antwurten der rede sâ.
sie sprâchen:< dû vil tumber man,
nimst dû dich der tumpheit an,
daz dû bekumberst dich dâ mite,
daz dû die vil wîsen site
der kaldêjen velschen wilt?
der meisterschaft uns gar bevilt
und ouch der tumben lêre.
daz man den himel êre,
daz maht dû widerreden niht,
sît man von im gezieret siht
al die geschaft, diu namen hât,
diu under sînen kreften stât.
er hât bedaht mit sîner kraft
der geschephede meisterschaft.
sît der von kreften mac gestân,
sô sol er ein bilde hân,
daz man in sînem namen wol
im ze êren êren sol
in sînem hôhen werde.
daz man dâ bî der erde
mache ein bilde, daz ist reht,
wan si krump und dar zuo sleht
ûf ir lât werden unde gebirt.
dû sihst doch wol, daz ûf ir wirt
gezierde vil, rein unde guot,
der glast den ougen sanfte tuot.
si verwet wünneclîche sich:
in maneger varwe wünneclich
mêret si der vreuden vlîz,
gel, grüene, brûn, rôt unde wîz
mit manigerhande blüete.
durch ir vil süezen güete,
der weltlîchiu vreude gert,
ist si wol guotes bildes wert.
daz wazzer so ein bilde hân.
daz siht man wünneclîche gân,
daz ist guot und reine,
daz vuoret algemeine
swaz lebendes in der welte lebet.
in wünneclîchem vlôze ez swebet,
ez wäschet unde reinet gar
swaz man unreines bringet dar,
ez tempert trinken, ezzen;
ez hât sich ouch gemezzen,
daz ez heiz wirt unde kalt.
sîn kraft ist alsô manicvalt,
daz sî kan niemen volle sagen.
ez treit diu dinc und lât sich tragen,
es mac niemen âne wesen,
man muoz mit sîner kraft genesen.
dem sol ein bilde sîn bereit
und dienestlîchiu werdekeit:
daz ist ein berndiu witze. -
des viures grôzer hitze
kan niemen ebenmâze geben.
sîn hitze vuoret unser leben
in manigerhande wîse:
diu menschlîche spîse
bereitet von dem viure wirt.
sîn schîn den ougen lieht gebirt
in der vinster, swâ manz treit.
durch die grôzen edelkeit
sol beidiu wîp unde man
im ein bilde beten an.
man sol den winden machen
ze dienstlîchen sachen
ein bilde, wan ir hôher wer
mac sich wazzer unde mer
ruowe niht gên in bewegen
noch stille gên ir kreften phlegen.
in wîchet, swaz sie rüerent;
swar in behaget, dar vüerent
sie diu schif ûf dem mer
ân der marnaere wer.
waz möhte wünneclîcher sîn,
dan der liehten sunnen schîn,
von der liehter schônheit
ist al der welte ein lieht bereit?
hitze und lieht der sunne hât,
sîn glast den ougen widerstât,
ir hitze und ouch ir liehtes maht
scheident uns tac unde naht.
ir liehtes liehter überlast
leschet alles liehtes glast.
si ist getempert alsô wol,
daz man sî iemer êren sol
mit einem bilde, daz ist guot,
swer ir hât dienestlîchen muot.
sô der tac verendet wirt,
des mânen schîn sîn lieht gebirt;
der naht er liehtes glastes phligt,
der vinstern trüebe er angesigt.
dêr ouch ein bilde haben sol,
daz zimt sînen kreften wol.
dar zuo was manic werder man,
des kraft vor uns den prîs gewan,
daz man im durch sînen namen
hôhen, werden, lobesamen
ze lobelîchen sachen
sol werdiu bilde machen.
disiu bilde êren wir,
als von uns ist gesaget dir.
swer daz widerreden wil,
der hât tumber sinne vil.
ez tuot ouch niemen, wan die sint
unwîse unde an witzen blint.
keiser, künege, vürsten grôz
und manic keisers genôz
minnent disen selben rât.
der rât von ir lêre gât,
die gar der liste erdâhten
und uns den urhap brâhten
menschlîcher wîsheit,
die hânt diz leben ûfgeleit.
daz velschet dîn vil tumber munt
und tuot ein vremedez leben kunt,
daz ist den wîsen gar enwiht.
ez hât ouch rehter wîsheit niht,
im wont gerne niemen bî,
der mit rehten witzen sî.
an diz leben sich ergebent,
die mit valscher trüge lebent.
hie wider sprich, swaz dir behage,
daz merken wir nâch dîner sage.>
nachor vil wîslîchen sprach,
dô disiu rede alsus geschach:
< vernement algelîche,
jung, alte, arme und rîche!
herre künec, daz zimt dir wol,
daz ez dîn sin vernemen sol.
ir tumben wîsen habet geseit
mir von einer wîsheit,
diu kindes tumpheit wol gezimt.
vür witze niemen sî vernimt,
von rehte ist ez der wîsen spot.
ir jehent, der himel sî ein got
durch daz er ob der erden stât
und die geschaft bedecket hât.
swer den himel hât ze gote,
der lebet nâch des tiuvels spote.
sîn kraft ist bewegelich,
nâch sînen kreften weget er sich,
wan er muoz loufende umbe gân,
als in sîn kraft hât angelân,
der sînes namen urhap
von êrst mit anegenge gap.
der himel ist kosmos genant:
der name ist dâ vür erkant,
daz ez genant sî ein geschaft
von eines schephaeres kraft.
anegenge und ende er hât,
nâch sînem rehte er umbe gât,
nâch der natûre gebote,
als im geordent ist von gote.
er muoz ouch helfen reichen
von zeichen in diu zeichen
nâch ir genatûrter art
der sternen louflîch umbevart,
die vür baz noch nâher gânt,
loufent noch stille stânt,
wan als in gordent ist von gote,
der in sînem gebote
ir natûre hât gephlegen,
der in ir mâze hât gewegen.
der himel hât deheinen list,
wan als im vor geordent ist.
er wirt nâch der gotes sage
an dem jungesten tage
alsam ein buoch gevalten.
er mac sich niht enthalten,
sîn kraft müeze ein ende hân.
sîn nam vor gote muoz zergân.
der in von êrste werden hiez
und sîner kraft ein zil ûfstiez,
daz im zer jungesten zît
mit bezzerunge ein ende gît.
sît diz allez an im ist
von gote ân eigenlîchen list,
sô mag er got geheizen niht.
sît man in zergänclich siht,
als ez gebiutet gotes gebot,
wie möhter danne wesen got?
er ist geschephede genant
von des hoehesten hant.
vil tumber sinne wont iu bî,
jeht ir, daz diu erde sî
got. nû sehet ir doch wol,
daz si mit dienestlîcher dol
under allen vüezen swebet.
swaz in dirre welte lebet,
dem ist diu erde undertân.
man siht allez leben hân
( ez sî guot, übel oder swach)
ûf der erde sîn gemach.
ir kraft mit viure erstirbet,
si dorret und verdirbet.
man grebt sî, daz muoz si vertragen;
ir dienest mac si niht versagen
der ärmisten krankeit,
der ie name wart geseit.
diu süntlîchest missetât,
der disiu welt künde hât,
geschiht ûf der erde.
si lît als unwerde,
daz si gesmaehet dicke wirt.
swaz si guoter vruht gebirt,
daz ist dem menschen vil gar
gegeben ze einer lîpnar.
swaz hât als unreinen smac,
daz in nieman verdulten mac,
daz wirt begraben sâ zestunt
durch vlühtsal in der erde grunt.
hie bî merket iuwer lüge:
seht, ob si got geheizen müge.
den gotes namen si niht hât,
ez ist ein gotes hantgetât.
vürbaz habet ir gesprochen mêr,
daz wazzer sî wol alsô hêr,
daz ez sul haben gotes namen.
seht, des möhtet ir iuch schamen!
ez wirt verderbet manegen wîs:
von kelte wirt ez hertez îs,
von hitze wellic unde heiz.
hor und manigerhande sweiz
muoz ez an manigen sachen
vil ofte sûber machen.
von bluote wirt ez missevar,
von übervlôze ez truobet gar.
der liute nutze ez ist beschert,
mit schiffen man ez ouch durchvert.
ez muoz haben sînen val
von der hoehe in daz tal;
ze berge mag ez dringen niht,
wan als man ez twingen siht.
ez ist den liuten undertân:
den muoz ez ze nutze gân.
ez weiz niht, swaz man im tuot.
daz sult ir nemen in den muot,
ob daz ein got heizen sül,
daz man des twinget, daz ein mül
von im nâch ir rehte gê.
man twinget ez wol zeinem sê,
sîn wer hât deheine kraft
gên der liute meisterschaft.
sît ez deheine helfe hât,
wan als ein ander gotes getât,
sô mag ez nicht gesîn ein got:
ez geschuof ouch gotes gebot.
im ist reht witze tiure,
swer giht, daz an dem viure
lige gotlîcher kraft
mê danne an anderr geschaft.
daz viur mac got niht gesîn:
sîn hitze und sîn liehter schîn
von wazzer gar erstirbet,
ez lischet und verdirbet.
sîn kraft al die zît gestât,
biz daz man ez mit ruoche hât.
man treit ez, swâ man ez wil hân;
ez ist den liuten undertân.
dêst niht ein got. der gotes rât
den liuten ez gegeben hât
ze helflîchem râte,
daz ez siede unde brâte
den liuten rehte ir spîse. -
die tumben sint unwîse
und gar an rehten witzen blint,
die iu des jehent, daz der wint
got heize oder wese got:
daz ist ein lasterlîcher spot.
swer suochet helfe und trost an in,
der hât vil tumplîchen sin.
der wint nâch gotes gebote vert;
er ist den schifliuten beschert
ze geleiten ûf dem mer
und daz er bewegende ber
mit sîner snellen draete
boume, gras und saete.
sô daz verstât in sîner zît,
als der ze lange in slâfe lît,
sô sol erz wecken unde wegen,
mit senfteclîchem lufte regen:
dar zuo ist uns der wint gelân.
sît er niht helfe mac gehân,
wan daz man in waejen siht,
sô mag er got geheizen niht;
er ist ein geschephede gotes
und ein urkünde sînes gebotes.
ir leben vil spotlîchen treit
tumbes herzen irrekeit
und sint rehter witze vrî,
die des jehent, diu sunne sî
got, daz niemer mac gesîn.
sich wandelt ir vil liehter schîn,
man siht des morgens sî ûfgân
und wahsende hitze hân;
des âbendes si nider gât,
ir schîn die liehten hitze lât.
ir vart ist ouch bewegelich,
si jaget in diu zeichen sich,
diu ir kunst hât ufgeleit
diu gotlîche wîsheit,
diu sî alsus geschaffen hât.
in ir loufe si umbegât
anders niht, wan als si sol.
wir merken unde sehen wol,
wie si den zîten beiden
ir lieht muoz underscheiden,
des si den sumer in hitze phligt,
und im der winter angesigt
mit kaltes luftes underscheit,
den er bî sinen zîten treit.
ir krefte ist ouch niht gezalt
dehein eigenlîch gewalt.
si hât von gotes meisterschaft
lieht und hitze und alle kraft.
dâ von ist ez ein hantgetât,
die got ouch geschaffen hât.
diz heizet ouch ze rehte niht
ein got, ob man der wârheit giht.
sie sint gar wîsheit âne,
die jehent, daz der mâne
sî got. nein er, daz ist wâr.
die mânôde gar durch daz jâr
siht man in ofte schînen
wahsen unde ouch swînen:
der beider art daz ist sîn site.
hie sult ir merken, daz im mite
wont deheiner helfe trôst;
er mac niemen tuon erlôst.
sîn kraft ist ouch bewegelich:
in sîner rehten verte strich
nimt sîn louf sîn umbevart
nâch sîner genatûrter art.
swaz sîn natûre im krefte giht,
die hât er und anders niht.
im ist noch minner krefte bî
vil, dan ez der sunnen sî.
man wirt dicke an im gewar,
daz er wirt nâch bluote var,
daz an im wirt eclipsîs.
er ist vil toerscher danne wîs,
swer dise gotes hantgetât
vor gote ze einem gote hât.
sîn liehtez lieht verswîne
in sînem besten schîne,
des mag er erwenden niht.
swer den ze einem gote ersiht,
der ist noch tumber danne ein kint.
sîn herze ist wîser sinne blint.
nû saget ir ouch, ir betent an
ein bilde zêren einen man,
dem nâch der welte werdekeit
guot und êre sî bereit.
durch waz helfe tuot ir daz?
menschen helfe, diu ist laz:
daz selbe in hôhen sünden lebet.
nâch üppeclîchen êren strebet.
daz muoz selbe sîn verlorn;
im ist helfe niht erkorn,
sô der lîp an im zergât,
wan als ez gote gedienet hât.
ob iu der bilde hêrschaft
gehelfen mac deheiner kraft,
wie mac dan der bilde trôst
von sünden machen iuch erlôst,
diu tôtstummen blinde sint,
als ir sît selbe, an witzen blint.>
die meister swigen an der zît.
sie liezen den krieclîchen strît:
sie kunden im gantwurten niht
nâch sîner wîslîchen vergiht.
dô sprach nachor:< ich hân geseit
iu die rehten wârheit,
wie ir in üppeclîchez leben
iuwer leben habet gegeben:
des müezet ir verjehen mir.>
sie swigen. er sprach:< wes swîget ir?>
der widerrede sie geswigen,
sie stuonden, liezen in gesigen,
wan sie niht mêre kunden,
niht widerrede sie vunden.
die kaldêjen man erkôs
vor dem künege sigelôs
an disem selben strîte sâ
mit gemeiner volge aldâ.
dô sprach der gotes wîgant
ze dem künege sâ zehant:
< nû sich, wie rehte dise leben.
ir wîslîch rede hât begeben
antwürte gên den worten mîn.
sît daz sie überwunden sîn,
sô habe dich an ir meisterschaft
niemer mêr deheiner kraft.
sît ir gote werdekeit
sî mit ir witzen hingeleit,
und ir kraft müeze siechen,
sô kêren an die kriechen.
lâ mich von in bewîsen dich
wes sie verstên von gote sich.>
dô drungen zuozim von der schar
der kriechen besten meister gar,
die von ir secte hoehsten kraft
truogen wîse meisterschaft.
sie sprâchen:< sage, wes gihstû
von unsern lieben goten nû?
die sint uns gotlîche,
guot und helferîche,
sie sint gewaltic unde wert:
swes herzen bete ir helfe gert,
dem ist ir helfe sâ bereit
helflîcher staetekeit,
als uns ir staetiu triuwe giht.
gên den mahtû gesprechen niht.
ir helfe uns selten ie betrouc,
ir wârheit uns noch nie gelouc:
sie hânt gewalt, witz unde kunst.
swer in treit dienestlîche gunst,
dem lânt sie ungelônet niht:
ir hulde hôhes lônes giht;
des ist unser orden
von in dicke innen worden.>
dô sprach nachor:< nû nennent die
vor uns. nû saget, wie heizent sie?
mir ist ir groestiu kraft erkant;
sô sie werdent mir genant,
ich hoere an ir namen wol,
waz ich von in sagen sol.>
dô wurden sie genant alsus:
< der werde got saturnus
gotlîcher helfe rât
bî helfeclîchen triuwen hât:
er ist gewaltic unde guot;
swer im hât gunstlîchen muot,
des saelden wirt er ein gewer.
dar nâch der guote jupiter,
der hât den himel in sîner hant,
er ist ein hôher got erkant,
der hoehste und der beste,
der süeze, an kreften veste;
der lebet gotelîche,
sîn helfe ist krefte rîche.
vulkânus ist ein hôher got,
des gewalt in sîn gebot
betwungen daz gesmîde hât,
daz sich nâch sînem willen lât
smiden unde giezen.
glüejen unde vliezen
muoz ez sich lâzen, swie er wil.
sô gît wîser rede vil
unser got mercûrîus.
gesuntheit gît asclêpîus,
bî helfe er hôhe witze treit:
nâch siechtuome gesuntheit,
nâch unkreften kreftic leben
kan er helflîche geben.
swer von grôzer überkraft
in noeten ist von ritterschaft
in stürmen oder in strîten,
dem hilfet zallen zîten
mars, der vil gewaere,
der kemphen nôthelfaere.
bachus hât gewaltes vil,
des ich ein teil bescheiden wil:
ez muoz nâch dem gewalte sîn
ûf reben wahsen uns der wîn,
der uns in sîner kraft ûfgât,
dâ bî sîn kraft vil helfe hât.
hercules sol gêret wesen:
swer von zorne wil genesen,
der sol minnen sîn gebot.
apollô, des geschützes got,
ist ouch ze êrenne vil guot.
swer sînen willen gerne tuot,
dem gît er vroelîchen gedanc;
der seiten wîse und süezer klanc
sint in dem besten dône
nâch sînem willen schône.
des windes got, êolus,
der sunnen got, hêr phêbus,
hânt ouch gewaltes vil mit kraft
in gotlîcher meisterschaft.
pollux unde perseus,
kastor unde zîtus
sint ouch die hoehsten gote gar,
die jupiter der got gebar.
adônides und actêôn
hânt ouch gotlîchen lôn
gên dienestlîchem muote;
sie phlegent in ir huote
der tiere gewalteclîche.
die gote helfe rîche,
die besten, sint dir gar genant,
die mit gewalte in ir hant
menschlîcher saelden pflegent
und nâch ir selber muote wegent
den liuten saeleclîche gunst
an guote, an witzen unde an kunst.
wir haben in hôher minne
gewaltige gotinne,
den mit vil grôzer werdekeit
ist gotlîchiu kraft bereit,
der namen kraft hôh ist gezilt.
diu eine ist gotinne überz wilt.
diu lobes rîche diânâ.
diu gotinne medûsâ
hât ouch gotlîchen prîs.
von hôhen witzen ist vil wîs
pallas, diu der wîsheit
urhap unde krône treit;
swer welle rehte wîsheit hân,
der sol ir wesen undertân.
ein gotinne heizet sô,
diu guotes rîche jûnô:
diu ist gotinne überz guot.
swer ir deheinen dienest tuot
mit staeteclîchem muote,
dem lônet si mit guote.
vênus der hoehsten minne phligt.
ir wort an minnen kraft gesigt,
der name ist minne rîche.
si wert uns minneclîche
mit vriuntschaft minne sunder haz.
noch minnen wir vürbaz
eine gotinne guot,
diu ist über al des wâges vluot
gewaltic, des sîs gewis,
diu ist geheizen thêtis.
dâ bî kan mit gewalte phlegen
ein vil gotlîcher degen
der wazzer krefteclîchen sus,
der ist genant neptûnus.
die gote hân ich dir geseit
und die gotinne vürgeleit
und ir kraft und ir gewalt,
wie grôz der ist, wie manicvalt.
die minnent herzenlîche
vil edele künege rîche,
die disen gotlîchen sin
geloubent âne wanc an in.
die besten, die mit wîsheit sint,
ez sî vater oder kint,
die bietent in grôz êre,
sie lebent in ir lêre.
durch waz wil dû vlîzen dich,
des rîche vürsten lobelich
dunket reht und niht bevilt,
daz dû daz widerreden wilt?
daz ist vil sêre missetân:
wie möht ez dir ze guote ergân?>
nachor, der vil gewaere,
der rehte unwandelbaere,
der gotes lêre lêrte,
sich gên dem künege kêrte.
der kriechen rede antwurter dô.
ze dem künege sprach er sô:
< herre, dû hâst wol vernomen,
an welhe gote sie sint komen,
der wân in hôhen witzen swebet,
der leben vil trügelîcher lebet,
dan iemen sich an in versehe,
swie man in des mit volge jehe,
daz sie die liste vunden hânt
und doch unwitze sich verstânt.
sie sint tôrheit rîcher
und lebent unmenschlîcher,
danne die kaldêjen leben,
die sich hie siges hânt begeben.
sie waenent hôhe witze hân,
der ist ir toerscher sin erlân.
dâ von hânt sie sô manige gote
nâch des tiuvels gebote.
wie sich daz lasterlîche spoten
huop an den spotlîchen goten,
daz lâ mich dir künden hie,
als ez geschach. nû merke, wie
der vorbilde waere getân,
die sie ze goten wellent hân.
dû solt in dîn herze nemen,
ob gote ir leben süle gezemen.
urliuge, arbeit unde nôt,
von manslaht manegerhande tôt
huop sich in ir lande
mit roube und ouch mit brande.
swer dô mit zouberlisten
den man kunde gevristen
oder mit gewaltes hant,
der wart in sâ ze gote erkant.
diz werte maniger jâre vrist;
nigromanzîe, der list,
was in algelîche kunt.
sie kunden machen alle stunt
mit listen, daz diu tumbe diet
sich von gotes gelouben schiet,
wan in den niemen seite.
swaz in ir munt vürleite,
des stuonden sie gar zir gebote
und hiezen sie durch daz ir gote.
swaz der man liste vant,
des listes got wart er genant.
dô sie sus mit ir zungen
daz liut an sich betwungen,
swen ieglîcher an sich twanc,
der nam in sînen gedanc,
daz er des volge solde hân,
swie jenes leben was getân,
den er ze gote nande
und zeinem gote erkande.
ir valschez vorbilde gap
den liuten valschen urhap.
ir leben lêrte ir tumben sin
ir lêre volge hân nâch in.
nû habet ir hie geseit alsus,
daz iuwer got saturnus
getriuwe unde gewaltic sî;
der beider ist sîn name vrî.
lebet er wol bî sînen tagen?
nein er, benamen! lât iu sagen,
ob sîn leben waere guot,
dem ir sô grôzen dienest tuot.
er was ein zouberaere:
von im seit iuwer maere,
daz der trügehafte man
bî rêâ kinde vil gewan:
daz was sîn wip, diu manegen tac
zouberlîcher liste phlac.
der lebete gar ân alle zuht,
in twanc diu grôze tobesuht,
daz er an witzen wart sô blint,
daz er gaz sîn eigen kint.
ir saget von im, daz in besnite
nâch eines kappen site
jupiter ân alle wer
und daz er wurfe in daz mer
dar an im gekappet wart.
ir saget nâch lügelîcher art,
daz vênus sî dâ von geborn,
die iuwer tôrheit hât erkorn
ouch zeiner gotinne.
nû seht, wie iuwer sinne
sint noch blinder danne blint,
daz ir dem ophert iuwer kint,
diu man dâ von unsaelec siht:
sie mügen saelec werden niht.
ir tuot von disem gote erkant,
daz in jupiter gebant
und wurfe in in die helle.
nû merke, swer hie welle
hoeren grôze tobeheit,
diu von ir goten ist geseit!
gezimet gote, daz er sî
menschlîcher sinne vrî?
sol er sîn sô vergezzen,
daz er sîn kint sol ezzen
nâch der nateren siten?
sol er ouch werden besniten
alsô gar lasterlîche?
sol er des tiuvels rîche
gebunden ouch besitzen?
nû seht, von welhen witzen
saturnus wesen süle ein got!
merket disen tumben spot,
den die kriechen begânt,
die disen ze einem gote hânt.
wer taete diz, wan toerschiu diet,
die got ie von witzen schiet?
nû saget ir ouch, daz jupiter
gewaltic sî und daz er
der himel phlege mit werdekeit.
der gewalt ist im verseit.
ich wil iu rehte sagen, wie
der selbe müedinc lebete ie.
er was rîch unde gewaltic,
dô was daz liut einvaltic,
daz twanc er in sîn gebot;
durch daz wart er genant ein got,
daz er was krefticlîche
kunst und guotes rîche.
von dem muoz iuwer schrift daz sagen,
daz er in allen sînen tagen
ein valscher minnaere
mit zouberlisten waere.
ir saget von im, daz er den lîp
verkêrte dicke durch diu wîp,
daz er bî den möhte ligen
und in mit zouber angesigen.
swelch wîp er mit zouber twanc,
daz si in minte sunder danc,
durch die kêrt er sich schiere
mit zouber zeinem tiere,
daz er mit vuoge kaeme zir.
iuwer buoch verjehent mir
vil maere, diu sint trügelich,
daz er verwandelte sich
zeinem stiere durch ein wîp,
diu hâte minneclîchen lîp,
diu was eurôpâ genant.
dar nâch tuot ir von im erkant,
er würde einer vrouwen holt,
sô holt, daz er wart ein golt
durch sî, biz daz er zuozir kam
und daz si in ze vriunde nam.
dânâê diu vrouwe hiez,
der er ze kleinoede liez
mit zouberlîchen dingen
alsam ein golt sich bringen,
unz er nâch sînem muote an ir
bejagete sînes herzen gir.
dar nâch saget ir von im sâ,
daz in diu schoene lîdâ
sô herzenlîche twunge,
daz er mit wandelunge
durch ir minne wurde ein swan
und daz der trügehafte man
durch einer vrouwen minnestate
wurde ein wilder waltschrate,
diu was genant antîopê.
ein vrouwe diu hiez sêmelê,
durch die wurde er ze mâle
ein snelliu donrestrâle.
sô saget ir von im anderswâ,
daz in diu schoene alcmênâ
mit minnen triuten began
vür amphitrîôn ir man,
dem er gelîches lîbes was;
und gêtâ was archas,
wie diu mit trügelîcher art
von disem man betrogen wart.
daz zimt gotes namen niht,
ob man der rehten wârheit giht,
ez zaeme baz des tiuvels spil.
ir jeht, er haete kinde vil,
diu alsus wurden im geborn.
diu habt ir ouch dâ vür erkorn
nâch des tiuvels gebote,
daz sie sîn und heizen gote.
die wil ich nennen hie, durch daz
ir sie bekennet deste baz:
liberus und zîtus,
castor, pollux, perseus,
amphîôn und hercules.
wir sîn underwîset des,
daz sîn sun waere apollô.
sîne tohter hiezen sô:
mînôâ und hêlenâ,
radamantis unde arthemîâ,
sarpîdonâ diu vünfte hiez.
der selbe got niun tohter liez,
die heizent ir die sängerîn.
waz möhte toerschers an iu sîn,
danne daz in iuwer muot
nâch helfe staeten dienest tuot?
dise valschen gote sint,
beidiu der vater und diu kint,
urhap aller sünden.
ich muoz daz von in künden,
daz sie gar in ir zîten
wâren sôdômîten,
roubaere und zouberaere
und valsche trügenaere,
ortvrumaere unrehter trüge,
tihtaere schädelîcher lüge.
ir süntlîcher urhap
den liuten ein vorbilde gap:
swelher sünde sich ein man
wolt in den zîten nemen an,
der jach, ez waer daz gotes gebot
und sprach: ez tet vor mir der got.
ir habet ouch gejehen sus,
daz iuwer got vulkânus
gewaltes überz îsen phlege.
wie sich der müedinc alle wege
bejagete, daz ist mir erkant.
mit smidenne gewan sîn hant
die spîse sîner lîpnar;
daz was sîn hoehstiu gülte gar,
diz muoster trîben lange:
mit hamer und mit zange
muost er genern sînen lîp
und dar zuo kint unde wîp.
sîn leben gote niht gezam:
er was an einem beine lam.
nû sehet wie des tiuvels rât
iuch an im betrogen hât.
der was lam und guotes arm,
sîn antwerc tet im ofte warm,
sô der vil arme unwîse
gediende sîne spîse.
sol got haben ein lamez bein
und sol sîn dürftic, als er schein?
niht benamen! ez missezimt,
swer in zeinem gote nimt.
ir jehet, iu sî ze gote liep
mercûrîus, der ie ein diep
was und ein schâchaere.
der kunde manegiu maere
underscheidenlîche sagen,
sô wol, daz in bî sînen tagen
die liute gerne hôrten.
er was mit wîsen worten
ein spaeher kallaere,
dâ bî ein zouberaere:
des sol ouch ein got niht phlegen,
wil er hân helflîchen segen.
asclêpîus ein arzât was.
durch sîne nôtdurft er las
ze arzenîe manege wurz.
ich mac die rede machen kurz:
in aller sîner jâre vrist
nert in von hunger dirre list.
ein blieschôz in ze jungest sluoc.
nû saget rehten gevuoc,
dâ mite ir vüeget, daz er sî
got und im sî helfe bî:
des namen sol im sîn verzigen.
ir jehet, durch strîtlîch gesigen
sult ir êren einen got,
der heizet mars. daz ist ein spot
unde ein tiuvellîcher rât,
swer den ze einem gote hât.
er was ein urliugaere
und tet vil manige swaere
den liuten zallen zîten.
sîn vîentlîchez strîten
beidiu liute unde lant,
mit urliugen überwant.
den gevie vulkânus
und der junge cupidus,
dâ er und vênus lâgen,
ir geselleschefte phlâgen:
sie bunden in vil sêre.
gezimt alsolch unêre
gote? dêst mir unbekant.
daz er dulde alsolhiu bant
und dicke ein urliugaere sî
und lige vremeden wîben bî:
sol daz gote wol gezemen,
sô sol man in ze gote nemen.
bachus in iuwer lant entran,
der was aldâ der êrste man,
der leite unde bûte reben.
vil unvertic was des leben;
er was ein tobender wüeterich,
ze allen zîten vleiz er sich,
daz man in tobetrunken sach,
dâ von diu tumbe diet des jach,
im waer undertân der wîn.
er kêrte ouch daz gemüete sîn
an der naehsten manne wîp.
vil zouberliste phlac sîn lîp,
her an kêrt er gar den sin;
ze jungest dô ersluogen in
titânî durch vîentschaft.
nû seht iuwers gotes kraft!
sol got durch valsch aptrünnic sîn?
sol in von sinnen jagen der wîn?
sol er bî vremeden wîben ligen?
sol im ze jungest angesigen
sîner vîende hant?
waz helfe ist im danne erkant,
der alsolich leben hât,
mit trüge, mit zouber sich begât?
nû seht, vervluochtiu diet, den spot,
wie grôze kraft hât iuwer got!
ein trenker was hercules,
von dem sîn wir bewîset des,
daz er durch tobenden unvuoc
sîn liut und sîn kint ersluoc
und daz der verworhte man
an sînes lîbes zil verbran;
vil jâmerlîchen er verdarp,
in einem viure er erstarp:
swen man sus leben und sterben siht,
der mac got geheizen niht.
apollô, der ungewaere,
der was ein birsaere
durch lôch, durch wälde und durch zîl.
kocher, bogen unde phîl
truoc er nâch der jeger site,
dâ nerter sich vil ofte mite.
dar zuo kunder seitespil,
harphen, swegeln gar sîn zil.
swenn er mit einem niht gewan,
sô nam er sich des andern an.
als in gewin an beiden trouc,
durch lôn er den liuten louc;
den saget er solhiu maere,
daz er ein wîssage waere.
alsolher kunst nam er sich an:
swaz gerne hôrte der man,
daz seit er im künftic gar
durch miete und durch sîn lîpnar.
sît des durch miete phlac alsô
der trügenaere apollô,
sô mac er nicht geheizen got;
ez ist ein tôrlîcher spot,
swer einen got heizet
der birset unde beizet,
durch guot den liuten liuget,
den man durch miete triuget
und sich mit seitespil begât.
swer den ze einem gote hât,
der sol bedenken rehte sich,
ob diz sî reht und gotelich.
sî ez ein gotelîchez leben,
sô sol er sich im ergeben.
adônides des selben phlac,
daz er durch sînen bejac,
durch jagen ze allen stunden
lief er mit sînen hunden,
dâ mite er tiere vie genuoc.
ein eber in ze jungest sluoc,
daz er lac vor ime tôt.
sît dirre durch des hungers nôt
und durch nôtdürfte bejagen
von einem tiere wart erslagen,
wie mac der sîn ein got genant,
dem gotes leben ist unbekant?
sîn dienest hât des tiuvels lôn.
ir jeht des ouch, daz actêôn
vor sînen hunden wurde ein hirz.
nû wizzet daz, geloubet irz,
daz iuwer schrift von ime seit,
daz ist ein süntlîch valscheit
und gar des tiuvels gebot.
swer den müedinc heizet got,
der muoz verlorn iemer sîn,
des gihe ich ûf die triuwe mîn.
nû habet ir hie geseit alsus,
der wazzer phlege neptûnus.
der was mit vîentlîcher wer
ein galiôte ûf dem mer;
sîn bejac an roube lac.
wan er niht wan roubes phlac,
durch daz er roubes ie genas
und des mers gewaltic was,
dô wart er dâ vür erkant,
er waer des wazzers got genant.
phêbus was so schoene erkorn,
daz des haete wol gesworn
diu tumbe diet, er solde sîn
got über al der sunnen schîn.
der ist tôt, der sunnen glanz
schînet noch und ist vil ganz.
ê daz der selbe ie würde erkant,
ê menschen name waer genant,
dô schein diu sunne in gotes gebote.
swer den verworhten hât ze gote,
der muoz mit im sîn verlorn
und dulten endelôsen zorn.
êolus phlac snelheit:
durch daz habet ir geseit,
der wint waeje als er welle.
der ist ouch in der helle
worden nû des tiuvels kint;
wan er ist tôt, noch waet der wint.
ê daz den trügenaere
sîn muoter ie gebaere,
dô wâte ez vor der selben zît:
alsô waete ez iemer sît
und waet unz ûf der welte zil,
als ez got gebieten wil.
nû diz wâren iuwer gote,
die iuch mit lästerlîchem spote
an ir gebot betwungen hânt
unde iuch helfelôs nû lânt.
sie mugen iu niht ze helfe komen,
elliu vreude ist in benomen,
sie sint selbe in grôzer nôt.
der iemer sterbende tôt
ist an in, sie sterbent niht,
swie man sie iemer sterben siht.
nû nennen die gotinne,
die iuwer valschen sinne
über iuch ze goten nennent
und wânlîche erkennent
dâ vür, daz sie gewaltic sîn.
von wîbe ist selten worden schîn
gotlîchiu meisterschaft
oder helflîchiu kraft.
wir hân nâch gote mannes namen.
ir möhtet iuch des iemer schamen,
daz ir welt einem wîbe geben
kraft und gotlîchez leben.
wîp hât kranker sinne lîp:
dem man ist undertân daz wîp.
nû seht, waz krefte mac si hân,
diu mannes namen ist undertân?
nû habet ir gejehen dâ,
diu sinnelôse dîanâ
phlege der wilden tiere gar.
nû sult ir von mir nemen war,
wie ir leben was getân:
man sach sî birsende gân,
sleht, rûch, berg unde tal,
die wilden wüeste über al
durchhessen und durchstreifen,
durchloufende umbesweifen
nâch hirzen und nâch hinden.
swaz si mohte vinden
der wilden walttiere,
diu gevie si schiere.
dirre unwîplîche site
wonte ir unwîplîche mite.
durch den unwîplîchen prîs
hât iuwer tumber sin unwîs
dem wilde sî ze gote erkorn.
ê daz si würde ie geborn
oder mensche genant,
dô was wildes vil erkant.
ouch hât iuwer schrift geseit,
diu gotinne der wîsheit
ein vrouwe sî, hiez pallas,
wan si von künste wîse was.
diu pînte sich vil sêre
ûf hôher künste lêre
mit der gedanke sinne,
daz si wol ein gotinne
möhte sîn von wîsheit.
von ir lêre was bereit
den liuten manic rât ze nôt,
den si mit ir lêre bôt
mit witzen guoter lêre kraft.
von dirre selben meisterschaft,
daz si sô wol den liuten riet,
wart si der vil tumben diet
der witze gotinne genant,
der gotes kunst was unbekant.
dar nâch habt ir geseit alsô,
diu gotinne jûnô
si gewaltic überz guot:
daz ist ein tumplîcher muot.
vil grôz der welte rîcheit schein,
ê dirre gotinne dekein
ie gewünne lebenden lîp.
wâ von iu diz selbe wîp
des guotes gotinne ist genant,
daz ist mir ouch vil wol bekant:
ir rîcheit unde ir edelkeit
wâren nâch der welte bereit.
si was rîches guotes;
ouch phlac si solhes muotes,
daz si mit guote liute vil
brâhte an sich. des tiuvels spil
twanc sie, daz sie jâhen sô,
des guotes phlege jûnô.
dâ bî habet ir gejehen sus,
diu unvertige vênus
si über al die minne
gewaltigiu gotinne.
diu hâte an unvertigez leben
ir sin, ir lebenden muot gegeben.
si lebete unwîplîche gar,
si was schamender kiusche bar,
si nam sich solhes lebenes an,
daz si lie deheinen man,
si gaeb im ir minne solt,
was si sînem lîbe holt.
mars und adônides
und einer, hiez anchîses,
an die hâte sich behaft
ir muot mit staeter trûtschaft,
und dar zuo manic ander man,
der ir minne solt gewan.
swer ir behagete, der was ir,
wîst an in sî ir herzen gir.
si hâte manigen sundertrût
beidiu stille und überlût.
swâ si niht mohte ir willen hân,
dâ mohte si den rât niht lân,
si vuogte aber anderswâ
trûtschaft mit ir râte sâ.
swer ein wîp wolte minnen,
moht er sî niht gewinnen,
ir rât, ir zouberlist sî twanc,
daz si in minte sunder danc.
alsus was ir leben getân.
swer die wil ze gote hân,
der hât die groesten tumpheit,
diu tôren namen ie was bereit.
in alsus getânez leben
hânt die kriechen sich ergeben.
ir tumben tôren sît sô blint,
daz ir sît toerscher danne kint.
noch tuot mir iuwer lêre schîn,
daz dise valschen gote sîn
alsô redelîche gote,
daz ir sult in ir gebote
in dienen ûf ir helfe trôst,
daz sie machen iuch erlôst
von unvertigen sünden,
sô kan ich iu wol künden
vür baz, wie die valschen gote
lebeten in des tiuvels spote.>
die kriechen swigen gên dem man,
sie sâhen alle einander an:
sie dûhten sich dâ sigelôs,
ir strît des kamphes sic verkôs,
sie muosten alle dô gedagen,
sie kunden im niht mê gesagen;
wan swaz er hâte aldâ geseit,
daz nam er von ir wârheit;
wan ir schrift, ir trügeheit
hât sîn rede überseit.
gên sîner rede vürbaz
ir munt antwürte gar vergaz.
sie wurden sigelôs gesehen,
als mit der volge wart gejehen.
an in gesigete gotes degen,
der sînes kamphes solte phlegen.
er sprach:< ir tôren, jehent ir
oder niht des siges mir?>
sie geswigen vor im dâ.
dô jach im diu volge sâ
des siges an der selben zît.
gelâzen wart der kriechen strît.
nachor zuo dem künege sprach,
dô man des siges im verjach:
< nû sich, wie die kemphen dîn
gên mîner rede geswigen sîn!>
merke ir unde ir gote leben,
an die sie sich hânt ergeben
und nû mit volge entwîchent in,
den ouch verjehen hât dîn sin
gewalteclîcher werdekeit.
nû ist ir kraft gar hingeleit.
nû nim war, wie des tiuvels kint
sigelôs gelegen sint!
sich an ir tumbes herzen sin
und wende dînen muot von in!
sît ich an disen stunden
hân redelîch überwunden
der heiden hoehsten zwei leben,
sô sult ir alle hie begeben
der valschen gote lêre
mit dieneste iemer mêre.
nû wil ich künden hie zehant,
wie die von egyptenlant
unsaeliclîcher leben hânt
danne die sigelôs hie stânt.
die von egyptô wâren dâ.
die sprâchen ze nachore sâ:
< wir leben redelîche.
vil gote helferîche
haben wir ze werden goten,
als uns ir name hât geboten:
typhôn unde îsis,
ôrus unde ouch ôsiris
und ander gote wert erkant,
der gewalt wîte ist genant.
hie vor in alten zîten wart
von unserm lande ein hervart,
an der des landes vürsten gar
mit der aller groesten schar,
diu dâ vor ie wart erkant,
rûmden durch strît daz lant;
die alle sturben âne wer
in dem rôten - lebermer.
die dô mit dienestlîcher kunst
bejageten der gote gunst
die genâsen von der nôt,
als ez der gote kraft gebôt.
sît in dô was gewalt gegeben,
daz sie behuoten den ir leben,
der dienstlîchiu staetekeit
in mit dienste was bereit,
sô sint sie krefteclîche
noch grôzer helfe rîche.
wildû der helfe krenken,
sô solt dû dich bedenken,
waz dîn vil tumber sin alhie
welle reden wider sie.
sie sint vil gewaere,
reht unde unwandelbaere,
die wir ze goten hân erkorn.
wir sîn ze dienste in geborn
durch ir helfeclîchen trôst,
der uns von nôt hât ofte erlôst.>
dô zeigete gotes wîgant
eine stille mit der hant,
daz sie gedageten nâch im.
er sprach:< herre künec, vernim
wie dirre gote leben stuont:
sie lebeten, als ir volger tuont.
dô sie zem êrsten vergâzen gotes
und sîner lêre gebotes,
dô betten sie einen man
und sîn wîp ze goten an.
der selbe man hiez ôsiris
und sîn wîp îsis,
diu was sîn swester und sîn wîp.
dem nam sîn bruoder sît den lîp,
der was geheizen typhôn.
durch sîner minne jâmers lôn
vlôch si in byblum insulam.
ir zweier sun mit ir dar kam,
der was ôrus genant.
dô der so kreftic wart erkant,
daz er sît in manegen tagen
von kreften wâfen mohte tragen,
daz man in wol gewahsen sach,
sînes vater tôt er rach
an typhône, dem vetern sîn.
sît ôsiris vür disen pîn
niht gebieten mohte,
daz im ze wer iht tohte,
in slüege sînes bruoder hant,
sô mac er got niht sîn genant.
ein got sol niht ze wîbe hân
sîne swester, dêst mîn wân.
sol man den unvertigen man
ze einem gote beten an?
benamen, nein! ez ist niht guot,
swer im deheinen dienest tuot.
waz helfe mac typhôn gehân,
der des niht mohte understân,
in leite tôt mit sîner hant
ôrus, den ich hân genant?
die zouber, mort und manslaht
uobten tac unde naht,
swer die gote heizen wil,
der hât toerscher tumpheit vil.
herre künec, ez kom alsô,
daz hie vor in egyptô
wuohs diu israhelsche diet,
die got von al der welte ûzschiet
ze sînen trûterwelten gar.
die selben gotes erwelten schar
erlôste got von grôzer nôt,
die in mit beswaerde bôt
ein künic, der hiez phârâô.
einen meister sante dô
got dem israhelschen her,
der ez durch daz rôte - mer
sô trucken strâze vuorte,
daz ir dekeinen ruorte
des wazzers vlôz ûf dem wege:
sie hâte got in sîner phlege.
diz was den lantliuten leit;
sie wâren schiere nâch in bereit
mit ir hoehsten kreften gar.
des landes vürsten mit ir schar
und ouch der künic phârâô
die verdurben alle dô
mit des rîches bester wer
in dem rôten - wilden - mer.
swer dirre selben hervart
in dem lande überwart,
der was es herzeclîche geil
und pruofte ez vür ein michel heil.
swaz dem man die vart benam,
daz er in daz her niht kam,
daz nam er zeinem gote dô.
mit staetem muote jach er sô,
daz ez sîn got solte wesen,
er waer von sîner kraft genesen.
durch daz nam daz liut sich an
daz ez minnen dô began,
swâ von ez überhaben wart
dirre schädelîchen vart.
swer bî sînem phluoge was
und von der unmuoze genas,
dem wart sîn phluoc ein got erkant.
der site wuohs über al daz lant:
durch des tiuvels gebot
erkurn sie vil manegen got.
genuoger got was ein swîn,
etlîcher got ein schaefelîn,
ein kalp nam etslîcher dâ.
sumelîche nâmen sâ
häbche und ander vederspil.
ze goten nâmen ir dâ vil
katzen, wolve, hunde.
der liute vil begunde
gîre und rappen minnen
vür got mit staeten sinnen:
affen wâren maneges gote.
nâch gotes und der welte spote
wirt ir leben noch geschant.
genuogen wurden ouch bekant
ze goten trachen, slangen grôz.
ir was vil, die niht verdrôz,
sie wolden anebeten ouch
ziebollen, krût und knobelouch.
mit dirre grôzen irrekeit
was gotes geloube hingeleit
in dem lande egyptô.
des wart des tiuvels lêre vrô,
wan an in was sîns herzen spil.
siule von golde und bilde vil
machten sie den valschen goten;
daz hât der tiuvel in geboten,
der mit starken banden sie
mit sîner kranken kraft gevie,
daz sie im volge jâhen.
swie sie verderben sâhen
ir gote in alsô maneger nôt,
die manigen spotlîchen tôt
von den liuten muosten hân,
( ir gote wurden niht erlân,
sie muosen vûlen, dorren ouch
als ander krût unde louch,
daz man mit viule dorren siht):
al diu geschiht vervie sie niht,
sie waeren staete an ir begunst
und lerneten des tiuvels kunst.
sie wâren gotes künste vrî.
ir lêrer, ir philosophî
wolten hôher künste phlegen:
der sinnen was unkunst gewegen;
die brâhten daz liut an die site,
daz ez verworhte sich hie mite
und ez die kranken geschaft
minte vür die gotes kraft.
got sol sîn reht unde guot,
gewaere, staete, wol behuot
von wandel, triuwen manicvalt;
ein natûre und ein gewalt,
ein witze, ein name, ein rîche
sol an im gotlîche
mit staeter dêmüete,
mit endelôser güete,
mit unverkêrtem muote stân,
sô mag er gotes namen hân.
sol diz an einem gote sîn?>
sie sprâchen:< jâ!>< diz tâten schîn
iuwer werden gote niht,
wan sie gar mit sunderphliht
nît mit hazze truogen,
dô sie einander sluogen.
sie tâten vîentlîche erkant
einander roup unde brant.
ein got verriet des andern lîp
und nam im dar nâch sîn wîp:
des moht er danne erwenden niht.
swer sich helfe an die versiht,
der mac ir âne wol gestân,
swenn er sie gerne wolde hân.
es muoz mich wunder iemer wesen,
daz dise wîsen hânt gelesen
und sich des künnen wol verstân.
daz disiu sünde ist missetân.
ir witzen ist daz wol erkant,
daz diepstâl, roup unde brant,
zouber, manslaht unde mort
sint der groesten sünden hort
und gruntveste aller missetât:
swer dise schulde an im hât,
daz der ze rehte dulten sol
der ê gerihte in hôher dol.
diz was allez an ir goten.
sît ez den liuten hât verboten
daz reht und der ê gebot,
wie mac der danne heizen got,
der alsô grôze missetât
âne reht begangen hât?
man verteilt in in den tôt,
swer tuot, daz diu ê verbôt.
sît dise gote unz an ir tôt
ie tâten, daz daz reht verbôt,
sô hânt sie verschuldet wol,
daz man an in verteilen sol
den grôzen namen, daz ist reht.
daz reht sî âne krümbe sleht,
daz sie verworhten sîn genant,
wan sie roup und dar zuo brant,
diepstâl, zouber, manslaht triben
und dar an ûf ir zil beliben.
sie suln verteilet iemer wesen:
swaz von ir lebenne ist gelesen,
sol daz sîn bezeichenlich,
sô spellent disiu maere sich,
sô sint ez wort und anders niht.
ob aber des ir schrift vergiht,
daz sie lebende waeren
und diz niht verbaeren,
sô sol ir gotlîcher name
dulten aehtelîche schame.
nû merken alle, die hie sîn,
wie offenlîche ist worden schîn
der heiden grôziu trügeheit,
als ich mit volge hân geseit.
der kaldêjen irrekeit
hân ich iu hie vürgeleit,
der unreht ich mit rehte habe
ir gelimph gebrochen abe,
daz sie den strît hânt gelân.
mit rehte ich überwunden hân
die kriechen unde ir valschen gote
daz toersche leben, daz mit spote
ist an den von egyptô,
daz hân ich gevelschet sô,
daz sie mit volge an dirre zit
lânt und gelâzen hânt den strit.
tuot rehte! lât daz trügeleben,
an daz ir iuch habet ergeben!
daz seht ir wol, daz ist ein niht,
ein valschiu trüge und gar enwiht,
als ir habet von mir vernomen. -
nû suln wir an die juden komen,
und lât uns nâch den schriften sehen.
wes sie von gote wellen jehen.
die juden wâren unde sint
von abraham der vrühte kint.
isaâc, jâcob, die sint der stam,
von den ir vruht den urhap nam.
sie sint der israhelschen diet,
die diu gotes kraft beriet,
dô er sie durch des meres trân
hiez von egyptô gân
und gap in mit moysê
sîn gebot und ouch sîn ê,
den got in ir hungers nôt
gap vierzic jâr daz himelbrôt.
got tet in vil ofte schîn
die vil grôzen güete sîn.
daz was in widerzaeme gar.
sie nâmen es vil kleine war.
ir meister, der sie lêrte,
sô sich der von in kêrte,
sie hâten sîn gebot vür spot
und machten ouch ir apgot,
sît dô wurden sie gesant
in daz geheizen gotes lant.
got überwant in mit kraft
die vîentlîchen heidenschaft:
gots lêre sie doch verworhten.
sô sie die niht vorhten,
die in den selben jâren
von gote ir meister wâren,
sô wart ir sin alsô blint,
daz sie betten an ein rint,
an manic ander apgot.
doch durch ir lêrer gebot,
die got minten in den tagen,
muosten sie die wîssagen
vernemen ir lêre schrîben
und nâch ir lêre belîben.
swaz got an in genâden ie
mit gotlîcher kraft begie.
daz was in widerzaeme.
sie wâren undancnaeme:
sîner reinen wîssagen
wart von in genuoc erslagen.
swenne sie in vürleiten
und solhe rede seiten,
die sie hâten doch vür wâr,
daz vervie niht umbe ein hâr:
sie tâten in vil manege nôt
und leiten ir genuoge tôt.
sus was ir meistic lebende
und gote widerstrebende
in den selben jâren. sît
dô got in der gnâden zît
durch uns mensche wart genant
und uns ze trôste gesant,
sie begunden sîn verlougen.
mit zuo getânen ougen
began sich bergen ir gesiht,
wan sie wolten sehen niht,
daz sie doch wol sâhen
und es künftic verjâhen,
als in ê hâte vorgeseit
der wîssagen wârheit.
sie verteilten kristes leben,
daz menschlîche wart gegeben
ze trôste uns armen, in den tôt,
als ez diu gotheit gebôt.
er gap dem tôde ein ende.
sît nâch der urstende
und nâch der gotes ûfvart,
dô gar an kriste ervüllet wart,
daz got dâ vor in maneger stunt
tet mit den prophêten kunt,
die juden liezen rouben
ir herze des gelouben,
den sie gelouben solden,
ob sie daz wizzen wolden,
daz ir schrift in hâte geseit
mit offenlîcher wârheit.
sie bergent ir herzen gesiht,
daz sie die wârheit sehen iht.
die sie doch wizzen unde sehent
und es doch niemer verjehent.
sie hânt verlorn ir eigen sin;
ir selber vluoch der wert an in,
den sie mit vluoche in veilten.
dô sie krist verteilten.
die wîssagen geloubten sie:
swaz in die gesageten ie,
daz hât vollevüeret krist,
als ez von im geschriben ist.
des bîtet ir verworhtez leben,
swie redelîche habe gegeben
sunder missewende
diu bezeichenunge ein ende
den worten, diu mit wârheit
die wîssagen hânt geseit.
ir bîten ist in zwîvellich;
sie beitent und versehent sich.
ez sül geschehen, daz ist geschehen.
des ir schrift in hât verjehen.
sie hât verteilt und überseit
ir schrift, ir rede. ir wîsheit
geloubet âne witze an got
niht volle gar, daz sîn gebot
hât an kriste vollebrâht,
als ie ân urhap was gedâht.
sie sint gesehende an witzen blint,
dâ von sie verteilet sint,
ûz gotes hulden gar verjaget.
von den sî nû genuoc gesaget.
nû rüeren ouch daz kristenleben,
daz got den kristen hât gegeben:
daz ist reht und guot erkant.
nâch kriste kristen sint genant,
die kristenlîcher lêre phlegent
und valscher lêre sich bewegent:
sie sint ungelouben vrî.
vernement, waz ir geloube sî:
sie geloubent sunder spot
an den almähtigen got,
der ie was und iemer ist,
und an den vil gewaeren krist
und an den heiligen geist.
nâch ir gelouben volleist
geloubet vesteclîche ir sin,
daz den gewaeren namen drin
ein gewalt ân underscheit
mit drin namen sî bereit.
in tuot ir geloube erkant,
daz ûf dis erde wart gesant
daz hoeheste wort von gote
nâch der gotheit gebote
sante marjen, der maget,
der lîp nie anders wart betaget
wan kiusche, guot und reine,
bewart vor allem meine.
diu muoter saelden rîche
truoc in menschlîche:
sunder sêr si sîn genas.
nâch der geburt si maget was
als ê vor der geburt dâ vor.
durch ir reinen ôren tor
wart ir daz gotes wort gesant,
daz von ir mensche wart genant.
die kristen triegent sich niht.
ir geloube in des vergiht,
daz krist ûf der erde hie
mit lêre zeichen vil begie.
des vater lêre er lêrte,
diu apgot er verkêrte.
mit kunst in der gnâden tagen
ervulte er die wîssagen.
durch uns er menschlîche starp;
mit sînem tôde er uns erwarp
ein leben, daz des tôdes nôt
hât ertoetet und den tôt.
diu himelvart uns goffent wart
mit sîner süezen ûfvart.
dar nâch geloubent sie alsus,
daz got jêsus kristus
an dem jungesten tage
nâch der gewaeren gotes sage
al dirre welte gît ein zil
und danne uns allen geben wil,
swaz wir umb in gedienet hân,
und daz wir müezen danne erstân,
mit sêle und mit lîbe nemen
den lôn, der uns dâ sol gezemen:
der wirt uns allen dâ gegeben
in den tôt oder in daz leben.
diz hât krist, diu wârheit,
mit den wîssagen vorgeseit,
als er ervulte selbe hie
swaz sie von im gesageten ie.
zwelf boten er ûzsande
ze manigem vremeden lande.
die begunden strîchen
vil wîte in vremeden rîchen
und lêrten, daz sie lêrte got,
dirre lêre grôz gebot.
der einer her ze lande gie,
der seite in disen rîchen hie
die selben gotes lêre.
dô was daz liut ze sêre
an unsaelden vereinet,
verhertet und versteinet.
die des gewaltes phlâgen gar,
die machten alle ir herze bar
der lêre unsaeleclîche
in disem künicrîche.
diu lêre ist anderswâ vil wert,
dâ man ir vlîzeclîche gert.
nû merket! ist diu lêre guot,
die kristenlîchiu lêre tuot?
jâ si! ûf die triuwe mîn,
ir lêre ist reht und muoz reht sîn,
wan got, der vil reine krist,
der got ie was und iemer ist,
ir lebennes lêraere,
ist guot, reht und vil gewaere,
nâch dem sie daz vorbilde hânt,
nâch im der lêre sich verstânt.
wan er ist reht und ie was guot,
sô lêrte er sie den selben muot.
krist alsolhe lêre gît,
daz man mit staete zaller zît
got und den naehsten minne
von herzeclîchem sinne.
er gebiutet dêmüete,
zuht, milte unde güete
behalten unverkêret.
dar nâch sîn lêre lêret
vriunt, vater, muoter êren,
den armen niender sêren
und schirmen arme weisen
von kumberlîchen vreisen.
ouch verbiutet er dar zuo,
daz nieman dem andern tuo,
des er beswaerde wolde hân.
er lêret valsch urkünde lân;
er lêret herze unde munt
minnen wârheit alle stunt.
ouch lêret krist die kristen
vor allen zouberlisten
ze allen zîten sich bewarn;
mit enthabunge an in sparn
allen weltlîchen gelust,
unde vîentlîche âkust;
mit vriuntlîchen sachen
ze vriunde vînde machen.
er lêret sich erbarmen
über die vil armen;
er lêret niemannes guot
nemen âne sînen muot;
die ellenden wol grüezen,
den armen kumber büezen,
ûf bezzerunge sprechen,
niht leit mit leide rechen,
mit minnen zallen zîten leben,
zorn, nît unde haz begeben.
sît dise lêre lêret krist
und diu lêre nâch im ist
guot, reht und vil gewaere,
rein unde unwandelbaere,
sô gihe ich, daz diu kristenheit
über alliu leben treit
des wunsches bluomen schône
mit rehter saelden krône:
die kristen sus bewaeret sint.
der welte vreude ist als ein wint
genôzet an daz reine leben,
daz got der kristenheit wil geben,
daz âne die reinen kristenheit
al dirre welte muoz sîn verseit.
die krist got, der guote,
mit sînem süezen bluote
lôste von des tôdes nôt
und an in tôte den tôt,
die nimt er von untrôste
ûz der leiden helle rôste
und gît in êweclîche
mit im daz himelrîche,
ob sie nâch dem gelouben sîn
tuont rehtiu werc mit staete schîn:
daz hât gelernet jôsaphât.
sît nû mîn munt bewaeret hât,
daz alliu leben sint mit trüge
erhaben unde in valscher lüge,
sô lâzen im daz rehte leben,
daz im diu wârheit hât gegeben.
heiz dîne trügenaere,
die valsch und ungewaere
sint nâch des tiuvels spote,
swîgen ir verworhten gote,
mit den sie verkêret sint
und iemer sint der helle kint.
ir sult gelouben alle an krist,
sît er mit rehter wârheit ist
ein got mit gotlîcher kraft
und ein schepher aller geschaft.
swer daz niht tuot, der ist verlorn,
der muoz êwiclîchen zorn
mit werndem sêre dulden.
man sol nâch sînen hulden
mit dienestlîchem werde
hie werben ûf der erde.
ze helle riuwe kleine vrumt,
swer dar ungewarnet kumt.
got hât sîn rîche veile
mit endelôsem teile.
swer daz welle koufen,
der sol sich im toufen
unde in sîner lêre leben:
benamen, sô wirt im gegeben
ein rîche, daz niemêr zergât
unde ân ende vreude hât,
des urhap zallen zîten wert,
der vreuden kraft niht endes gert.
dâ lebet diu gots essentiâ
per infinîtâ seculâ.>
die kristen sprâchen âmen dô:
sie wârn der rehten lêre vrô.
jôsaphâte wart gegeben
ein alsô vreuderîchez leben,
daz dem edeln herren guot
lachte sin, herz unde muot.
sîn triuwe an im gehertet was
gote, als ein staeter adamas.
im volleten sîniu ougen
von herzevreuden tougen.
sîn tugende rîch gemüete
got lobete solher güete,
daz er mit dem den vîent sluoc,
der des vîndes wâfen truoc,
und mit dem die wârheit lêrte,
der wârheit ie verkêrte,
und mit dem wîste sîne vart,
dem sîn wec nie kündic wart.
der künic grôzen zorn gevie,
daz nachor die rede niht lie,
swenne er gên im kêrte
mit winkenne unde in lêrte,
daz er belibe sigelôs:
diz gebot er gar verkôs
und kêrte sich an ein gebot,
daz im gebôt der hoehste got,
mit dem er gesigete aldâ.
dô gebôt der künic sâ,
daz sich schiede des kamphes strît:
diz was an der vesperzît.
dô schieden sigelôs von dan
der künic unde sîne man.
< vater> sprach dô jôsaphât,
< daz dîn munt gesprochen hât
hie vor, daz sol staete sîn.
nim dû zuo dir die meister dîn,
mîn meister der sol sîn bî mir;
dîne meister sîn bî dir,
daz vüeget sich vil wol alsô.
mîn meister müeste sîn unvrô,
solder bî den dînen wesen,
sô waere er leides ungenesen.
die dîne müesen vreude hân,
der müeser von dir sîn erlân.
er sol berâten sich mit mir,
wie wir antwürten aber dir.
mit den dînen berât dû dich,
swaz dir behage. daz tuon ouch ich.>
diz muoste ergân, ez geschach.
der künic sich noch wol versach,
daz in nachor gewerte,
des er an in ê gerte.
sîne meister nam er dô,
die schieden dan mit im unvrô,
wan sie der gotes wîgant
mit gotes lêre überwant,
und daz ir grôziu trügeheit
mit sîner rede was hingeleit
und sô gar überwunden,
daz sie aldâ begunden
mit zwîvel al ze sêre
zwîveln an ir lêre.
jôsaphât, der guote man,
nâm sich ouch sînes meisters an:
von sîner hant er in niht lie.
nachor mit im von dannen gie.
als er ûf den palas kam,
den meister er besunder nam
und drukte in güetlîch an sich;
sîn helfen daz was vriuntlich,
daz er im durch sîniu wort
bôt alsô minneclîche dort.
smierende er in anesach,
mit schoenen zühten er dô sprach:
< meister, wândestû, daz ich
solde niht erkennen dich?
dîn name ist mir vil wol erkant,
dû bist niht barlââm genant.
dû waer mir wol erkant hie vor,
dû bist der zouberaer nachor.
nû muoz mich iemer wunder hân,
war ir hâtet den sin getân,
daz ir sus woltet toeren mich,
daz ich verkêrte mich, unt ich
ersaehe in mittes tages schîn
den wolf vür daz lämbelîn.
barlââmes heilekeit
dir ungelîchez leben treit:
daz schînet an iu beiden.
dû bist noch ein heiden
mit zouberlîchen listen
und er ein reiner kristen.
ez waere an mir ein tumber sin,
daz ich ersaehe dich vür in.
dîn list und der heiden rât
sich an mir verkêret hât
nâch mînem willen alsô wol,
daz ich got iemer loben sol.
daz dû von der kristenheit
gewaerlîche hâst geseit,
des sage ich dir und gote danc,
der dich der grôzen saelden twanc,
daz dû durch valsche miete
der gar vervluochten diete
ze liebe seitest anders niht
wan der gewârhaften geschiht:
des muoz diu reine zunge dîn
von gote gêret iemer sîn.
durch zwô sache vleiz ich mich,
daz ich zuo mir naeme dich:
mînes vater grôzen haz
ich vil sêre an dir entsaz;
ich vorhte, er taete dir ein leit,
wan im von dir niht wart geseit,
wan daz in sêre muote an dir.
ouch nam ich dich durch daz zuo mir,
daz ich dir dankte sêre
der gotlîchen lêre,
die dû von gote hâst geseit.
darumbe sol dir sîn bereit
mit iemer werndem lône
ze himel ein rîchiu krône.
ich wil dir hie ze lône geben,
daz ich dich wîse ûf daz leben,
daz iemer wert mit staetekeit,
als dû selbe hâst geseit.
wildû der lêre râmen,
sô maht dû hie wol krâmen
den unzerganclîchen gewin.
nû nim durch got in dînen sin
krist, den gewaeren got,
und toufe dich durch sîn gebot.
kêr an in dîns herzen muot
und lâ der armen welte guot,
daz leider leitlîche zergât
und jaemerlîchez ende hât.
gedenke, tugende rîcher man,
mit vestem muote dar an,
daz dû niht iemer maht geleben;
dîn leben muoz ein ende geben
balder, dan dû dich versehest
oder dînem lîbe jehest.
die bürde süntlîcher gir
wirf durch den guoten got von dir.
dû weist daz wol, wildû sî tragen
in disen zerganclîchen tagen
unz an dînes lîbes zil,
daz sî danne niemen wil.
got wil sî nû. der muotet dir,
daz dû ledegest dich von ir
und im sî ûf gnâde gebest
und iemer mêr mit riuwe lebest.>
nachor erweinde sêre
nâch jôsaphâtes lêre.
< herre künec, vil liebez kint,
dîniu wort gewaere sint>
sprach er.< ich weiz daz selbe wol,
daz ich muoz und sterben sol,
daz got ie was und iemer ist
und daz der heilige krist
mit drin benemeden ist ein got,
des meisterschaft und des gebot
geschuof mit sîner hôhen kraft
al dirre welte geschaft.
swaz kristenman gelouben sol,
daz geloubet ich ie wol,
wan ich an manegen buochen las,
swaz trügelich unde gewaere was.
dô lie mîn gewonheit niht,
si blante an mir die gesiht
sô gar des herzen ougen,
daz ich muoste verlougen
des ich benamen wesse wâr.
ich hân von kinde mîniu jâr
alsô gelebet an disen tac,
daz ich niht gesprechen mac,
daz von mir guotes iht durch got
geschaehe, wan mir als ein spot
diu gotlîche lêre ie was,
swie gewârhaft ich sî las.
waere nû got alsô guot,
daz er mînen tumben muot
verküre und ouch mîn unreht
und mich verworhten sînen kneht
wolde niht versmâhen
und mîne buoze enphâhen,
sô buozte ich sîner hulde
vil gerne mîne schulde.
swenn ich gedenken muoz dar an,
daz ich vil unsaeliger man
in alsô vil gesmaehet hân,
sô hân ich des vil kleinen wân,
daz er in sîne hulde mich
enphâhe: ez ist vil zwîvellich.
waer ich von unkunst gesîn
vlühtic dem herren mîn,
sô wizze mir sîn hulde niht
sô volleclîche die geschiht,
als er sus von rehte tuot,
wan mînes herzen kranker muot
die sinne von im wante.
swie wol ich erkante
sîne gotlîche kraft,
dô kêrte ich mîne meisterschaft
niht wan an valschez trügeleben.
mahtû mir trôst von im gegeben,
daz er die sünde mir vergebe,
ich lebe, swie dû wilt, daz ich lebe.
ich toufe gerne mich durch got
ze leistenne iemer sîn gebot.>
jôsaphât mit vreuden sprach,
als er sînen zwîvel sach:
< dû solt vestez herze hân
und zwîvellîche sinne lân
durch dîn heil, durch got, durch mich.
ich wil von gote troesten dich,
daz er dich versmâhet niht,
swenn er dîn reinez herze siht.
barlââm, der meister mîn,
tet mir mit den schriften schîn,
daz got den sünder nie verstiez,
swenn er im reinekeit gehiez
ze buoze nâch den schulden.
in sînen werden hulden
ist der sünder, swenne er wil.
er machet sîner sünde ein zil,
als es mit riuwe gert an in
in buoze sînes herzen sin.
dû solt dich wenden niht dar an,
daz dû bist ein alter man
worden in den sünden gar:
wirt unser herre got gewar,
daz in dîn herze suochet,
vil gerne er dîn geruochet
und zeiget dir dêmüete
durch sîne reine güete.
dû hâst dich niht versûmet noch;
swie alt dû sîst, dir wirdet doch
ze himele rîchiu krône
nâch arbeiten ze lône
bî den êrsten, die dâ sint,
wil dû werden gotes kint.>
dô nachor die lêre enphie,
sînem herzen nâhe gie
des heilegen geistes minne.
sînes herzen sinne
begunden sêre brinnen
in gotlîchen minnen.
er sprach:< herre jôsaphât,
des got an dir begunnen hât,
dar an solt dû vollevarn,
gote reine dich bewarn,
des helfe dir diu güete sîn.
nû wil ich nâch der lêre dîn
nâch mînem gote gâhen,
daz er geruoche enphâhen
nâch mînen grôzen schulden mich.
swie dû wilt, alsô tuon ich.>
dô sante in der reine man
mit sînem wortzeichen dan
an einen priester, der was guot,
der truoc ze gote staeten muot,
dâ nâhe in einem walde.
zuo dem hiez er in balde
des selben nahtes gâhen,
von im den touf enphâhen.
dô kusten sie einander hie,
nachor von jôsaphâte gie.
sie bâten beidenthalben got,
daz er geruochte sîn gebot
ir ietwedern lêren
und an in ruochte mêren
mit unvalschem sinne
sîn vil süezen minne.
sich schieden gotes degene
mit bruoderlîchem segene.
nachor hin zuo dem priester gie,
vil minneclîche er in enphie.
die kristenheit die lerter in,
er touft in in den namen drin.
der wart ein heiliger man:
die kristenheit er began
nâch kristenlîchen êren
mit rehten werken lêren.
jôsaphât aldort beleip.
swaz iemen kurzewîle treip,
tanz, buhurt oder spil
und anderr kurzewîle vil,
daz was im gar als ein spot.
sîn kurzwîle was, daz er got
sîner genâden bat.
ûz gotes minne er nie getrat
eines halben vuozes breit
in dirre welte unstaetekeit.
swenn er kurzwîle wolte hân,
sô sach man in besunder gân,
vesten in dem muote
mit staetes herzen huote
die gotlîchen lêre.
sîn tagalt was niht mêre,
ez waere daz in sîn gedanc
nâch sînem meister jâmers twanc.
er muoste ouch manige sorge hân,
wie ez dem vater solde ergan,
wan er mit der heidenschaft
was in des tiuvels stric behaft.
dô der ander morgen kam
und der künic wol vernam,
daz nachor, der guote man,
des nahtes was gescheiden dan,
ez was im herzenlîche leit;
wan diu gedinge im was verseit
und der üppeclîche wân,
den er an im wânde hân.
sîn herze in grôzem zorne bran:
sô sêre er zürnen began,
daz er wâr von zorne liez,
daz er den kemphen ê gehiez,
ob sie würden sigelôs.
daz man sie sigelôs erkôs,
durch daz hiez er sie schenden,
geiseln unde blenden,
durch die stat nackent jagen
durch ir unkustlîch verzagen,
daz sie dulten ê dâ vor,
dô den sic erwarp nachor.
des küneges herzen was erkorn
von leide ein alsô grôzer zorn,
swaz er ê vreuden ie gephlac,
daz er die dô vil ringe wac.
sînen hoehesten goten
wart ophers von im niht geboten,
daz er dâ vor selten lie.
die hôhgezîte er niht begie,
die durch der gote werdekeit
von im wâren ûfgeleit.
in disen selben zîten sâ
was künftic in der stat aldâ
den goten ein grôz hôhgezît:
über al daz künicrîche wît
huoben sich zer veste aldar
die liute von dem lande gar
und brâhten ophers vil ir goten,
als in ir secte was geboten.
diu hôhgezît was nâhen dô;
der künic was noch als unvrô,
daz er niht wolte ze opher gân
die hôhgezît, noch vreude hân,
als ê in allen jâren
gewon die liute wâren,
daz er der groesten vreuden phlac,
sô diu hôhgezît gelac.
der gote êwarten klageten daz,
wan sie gêret wurden baz
mit gâbe von des küneges hant,
sô disiu veste wart erkant,
dan ander zît al durch daz jâr.
daz ervorhten sie vür wâr:
sie dorften niht der gâbe gern,
wolt er die hôhgezît niht wern
den goten nâch gewenten siten.
würde diu hôhgezît vermiten,
sô würde ir nutz, ir werdekeit
in mit leide hingeleit.
durch dise vorhte dâhten sie
mit vil manigen listen, wie
sie der witze erdaehten sô;
daz der künec belibe alvrô
gewonlîch zem opher dâ.
sie huoben sich von dannen sâ
in einen walt, dâ inne was
ein zouberaer, hiez thêodas,
dem ie der künic volge jach
nâch sînem râte, als er vorsprach,
und sich an in ie kêrte,
als in sîn lêre lêrte.
von sîner valschen heilekeit
wânder, daz im waer bereit
êre, guot, lîp unde leben
und swaz im saelden was gegeben,
die wânder gar von ime hân
und von den goten sunder wân.
ûf des rât kêrten dar
die valschen êwarten gar
und sageten im ze maere,
wie der künic waere
getrüebet an jôsaphâte
nâch barlââmes râte,
und waz nachor in haete getân,
dô gar an in was gelân
ir sic, ir saelde, ir êre,
und er mit sîner lêre
beleip mit willen sigelos,
dô er der gote wort verkôs.
thêodas vil sêre erkam,
dô er diu maere alsus vernam:
gên hove er balde kêrte.
des tiuvels rât in lêrte,
daz er gên gotes wârheit
mit valscher lüge was bereit.
sîn herze wâfenen began
des tiuvels valscher dienstman
mit ungewisses râtes trüge,
mit valscher ungetriuwer lüge.
alsus huop er sich balde
gên hove ûz sînem walde.
dô dem künege wart geseit
sîn kunft, dô was er sâ bereit:
vil güetlîche er in enphie
vor den lantherren hie.
zuozim hiez er in sitzen gân:
ûf sînen trôstlîchen wân
klageter im sîn ungemach.
thêodas mit vreuden sprach:
< gewalteclîche sî bereit,
herre künec, mit saelekeit
dir iemer vreuderîchez leben,
daz dir die gote ruochen geben.
die hoehsten gote nemen war
dîn mit ir hôhen helfe gar.
dîn küneclîch gemüete
sî mit ir hoehsten güete
ân ende vroelîche bewart.
ûf vroelîcher saelden vart
sîn dînes heiles saelden wege
gebant in ir vil werden phlege!
ich bin durch daz her zuo dir komen:
ich hân ein teil von dir vernomen,
daz jôsaphât, der sun dîn,
welle mit den kristen sîn
unserr gote widerstrît
und daz vor dir in kurzer zît
ein kamph vil lobebaere
gên den kristen waere,
dâ der gote werdekeit
die kristen habe hingeleit,
und wie dû trüegest schône
des hoehsten siges krône.
durch daz bin ich her zuo dir komen,
ob dû hâst werden sic genomen,
daz dû den goten sîst bereit
durch ir vil süezen werdekeit,
und helfest vollebringen
mit küniclîchen dingen
die loberîchen hôhgezît,
diu nû ze dieneste in gelît;
die suln wir vroelîche begân:
stolze junge vrouwen hân
und werde ritter hôhgemuot
und ander hövesche liute guot,
die den goten machen
mit vreuderîchen sachen
die hôhgezît sô lobelich,
daz unser gote vlîzen sich
ûf unser helfe iemer mê.
dû solt nâch lobelîcher ê
bereiten in daz opher dîn;
dâ bî sol in bereitet sîn
der lantliute opher niht ze kranc:
des saget uns ir helfe danc.>
diz riet im der unguote
mit smeichendem muote:
durch smeichen er im siges jach.
in sînem muote er sich versach,
daz im diu rede waere
ein vreuderîchez maere.
er wânde in hân gemachet vrô.
sus antwurt im der künic dô:
< vil lieber man, vriunt ûzerkorn,
wir hân vil leider verlorn
unsern trôstlîchen wân.
die uns geholfen solden hân,
die sint wider uns gesîn.
die tâten mit ir wârheit schîn
eine gewârhafte lüge
und seiten alsô valsche trüge
von den werden goten hie,
daz mich zwîvels niht erlie
mîn herze unde manegen man,
der sêre zwîvelen began.
uns ist vreude gar verzigen:
man sach uns sigelôs geligen.
wir sîn trûrec, sie sint vrô.
maht aber dûz gevüegen sô,
daz sich ir vreude neiget,
und ir ruom wirt gesweiget,
sô tuon ich, als dû lêrest mich,
und wil iemer rîchen dich
und heize dir ân allez spoten,
alsam den helferîchen goten,
anebeten eine sûl
von golde guot, diu niemer vûl
unz an der welte endes tac
in dînem namen werden mac.>
dô vreute sich thêodas,
daz er alsus getroestet was.
er sprach mit vreuden zehant:
< herre, mir ist wol erkant,
wes die von gâlilêâ jehent.
des ir sinne sich versehent,
daz ist ein kintlîch trügeheit,
diu wirt schiere hingeleit,
dâ sinnerîche liute sint.
noch lîhter vil, danne der wint
ein toubez loup werfe hin,
verdrucke ich in ir tumben sin.
dîn ungemüete sî verjaget.
tuo, daz ich dir hân gesaget:
lâ vorhtlîche swaere stân!
dû solt die hôhgezît begân
den goten vroelîche;
sie sint sô helferîche,
daz dû getroestet wirst von in.
dû solt dînes herzen sin
wâfen mir ir güete,
sô wirt dîn gemüete
von ir süezen helfe vrô.>
der künic hiez vil balde dô
gebieten, dise hôhgezît
über al sîn künicrîche wît
mit opher leisten sînen goten.
diu hôhgezît wart dô geboten
allen den lantherren dâ.
die kâmen mit ir opher sâ
nâch heidenlîchen siten gar
und brâhten groezlîch opher dar.
die gote wurden gêret,
als heidensch orden lêret.
als uobten sie die selben tage
sunder leit und âne klage,
als ez ir orden dô gezam.
diu hôhgezît ein ende nam.
dô wart ouch gêret thêodas,
von des lêre komen was
daz avenier der künic hie
die selben hôhgezît begie.
die êwarten lobeten in
durch ir êren gewin,
die in der künec mit sîner hant
vroelîche tet erkant.
nû giengen ûf den palas
der rîche künec und thêodas.
mit vreuden sprach der künec sâ:
< vil lieber vriunt thêodâ,
nû hân ich getân durch dich
swaz dû hieze leisten mich.
ich hân die hôhgezît gewert,
als es dîn bete hât gegert.
nû ist des zît daz ouch dû
dîne wârheit leistest nû,
daz mich dîn wîslîcher trôst
tuo von der irrekeit erlôst,
die mîn sun von der kristenheit
mit irreclîchem muote treit.
swaz ich im tuon daz ist enwiht,
er volget mîner lêre niht.
dreu ich im dêst gar verlorn,
er ahtet kleine ûf mînen zorn.
swenne ich in mit süezen siten
güetlîche beginne biten,
sô verseit er mir alsô,
daz ich leidic unde unvrô
von sîner rede werden muoz.
der swaere wirt mir niemer buoz,
wan nâch dîner lêre.
nû sûme dich niht mêre,
gip mir dînen rât dar zuo,
wie ich lebe und wie ich tuo.>
dô sprach der zouberaere:
< herre, dîne swaere
kan ich dir senfter machen
mit alsô wîsen sachen,
daz mîner lêre jôsaphât
vil unsanfte widerstât.>
< darumbe wil ich iemer dich
rîchen; nû bewîse es mich.>
< herre, daz sol sîn getân.
dû heiz von dînem kinde gân
al die junkherren dîn,
die sîne phleger sulen sîn.
juncvrouwen, schoene und wolgetân,
die solt dû zuozim heizen gân,
die sîn phlegen alle stunt.
wirt ir heinlîche im kunt,
sô kan er sich behüeten niht,
swenn er sie staeteclîche siht,
sie überwinden sînen sin.
kêrent sie ir vlîz an in,
so beginnet er sie minnen
sô gar in sînen sinnen,
daz sie im liebent alle zît.
als er in danne bî gelît,
sô liebet im ir minne alsô
daz er wirt ir bete vrô:
swaz sie gebietent, daz tuot er:
wan junger sinne liebestiu ger
an wîplîcher minne stât.
wîbes nam betwungen hât
manlîche kraft in süezer tugent:
wîp ist ein bluomenkranz der jugent.
wîp liebet junger sinne kraft.
in ir minne meisterschaft
liebet weltlîch werdekeit.
swer muot ze dirre welte treit,
dem liebent minneclîchiu wîp
sinne, muot, leben unde lîp.
der welte muot von wîben nimt,
swaz dirre welte wol gezimt.
swer hât ze dirre welte wân,
der muoz von ir minne hân
die hoehsten vreude, der er gert.
der welte ist wênec iemen wert,
wan der von wîbes minne treit
hôhgemüete und werdekeit.
sie sint der welte hoehster prîs.
ez ist niemen alsô wîs
( er sî junc rîch arm oder alt),
ergît er sich in ir gewalt,
er müeze zir gebote stân,
des wir guot urkünde hân
und als wir ofte hoeren jehen:
her an sol dîn witze sehen.
jôsaphât der ist ein kint.
die älter unde wîser sint,
die sint ze manigen stunden
von wîben überwunden.
beginnet er sie minnen,
ich sende sînen sinnen
einen geist, der dar zuo vrumt.
sô der in sîn gemüete kumt,
er kan in minnen heizen
und ûf ir minne reizen.
sît niemen alsô wîser ist,
in überwinde wîbes list
mit ir minne meisterschaft,
sô mac sich jôsaphâtes kraft
gên ir wer gesetzen niht.
swenne er in heinlîche giht,
sîn natûre lêret in
an sie kêren sînen sin.
gên in wirt âne wer sîn kraft,
des hoere eine bîschaft.
ez was ein werder künic rîch,
der was an werdekeit gelîch
andern sînen genôzen,
rîchen künegen grôzen,
in hôhem prîse, daz ist wâr.
der was lange manegiu jâr,
daz er deheinen sun gewan.
daz was dem lobes rîchen man
von herzen leit und ungemach:
ze grôzem unheile er des jach.
dô wart im ein sun geborn,
ein kint, schoene und ûzerkorn
an kindes lobe: des was er vrô.
dâ wâren wîse meister dô,
mit hôher kunst niht ze laz;
die sageten im von wârheit daz,
ob daz selbe kindelîn
den tac und der sunnen schîn
gesaehe ê über zehen jâr,
ez müese blinden al vür wâr.
der künec erschrac vil sêre.
nâch sîner sinne lêre
hiez er daz kint behalten wol
in einem steine, dâ ein hol
inne was gehouwen,
dâ niemen mohte schouwen
deweder tac noch liehtes schîn:
dâ hiez er daz kint inne sîn
mit ammen, die sîn phlâgen dâ.
sô grôziu vinster anderswâ
vil tiure was, des hoere ich jehen;
sie mohten liehtes niht gesehen,
wan daz von gesteine kam.
dem kinde vreude niht gezam,
wan als ez bî den vrouwen hie
kindes kurzwîle begie.
alsus wart ez unwîs gelân,
wie disiu welt was getân
und ir gezierde manicvalt,
unz ez wart zehen jâr alt.
nâch disen zehen jâren,
dô sie verendet wâren,
der künic sich besande
von allem sînem lande
mit rittern und mit vrouwen,
die solten helfen schouwen
sîn liebez kint, dem anderstunt
geburt solte werden kunt.
dô kam vil manic grôziu schar
durch den selben künic dar
mit edelem kleide rîche
gekleidet wünneclîche
mit küneclîchen dingen.
der künic hiez dar bringen
manegen wünneclîchen lîp,
beidiu man und dar zuo wîp,
wâfen, ors, rîch gewant,
vil tiere wunderlîch erkant
und manigerhande wunder.
an einen rinc besunder
hiez man gân die vrouwen dâ.
dô vrâgete der knappe sâ,
wie iegelîchez waer genant.
dô wart im vil schiere erkant
mit sînem namen diz unt daz.
dô vrâget er aber vürbaz:
« wie heizet diz? »( daz wâren wîp.)
« ez hât den schoenesten lîp,
den ich noch iender hie gesach. »
durch sînen schimph ir einer sprach:
« ez ist der tiuvel, der den man
betriegen und verleiten kan. »
sus wolter hân erschrecket in.
dô betwanc sînen sin
sîn natûre, daz er gar
diu ougen vürbaz wante dar,
danne an deheine schônheit,
diu im dâ wart vürgeleit.
dô diz allez was geschehen
und der knappe hâte ersehen
geschephede, wîp unde man,
zuo sînem vater wider dan
vuorten in die sîne dô.
der künic vrâget in alsô
daz er im rehte sagete,
waz im beste behagete
an allen dingen, diu er sach.
der knappe kintlîche sprach:
« daz tuot der tiuvel, der den man
verleiten und betriegen kan. »
« saehe dû den? » « jâ, vater, jâ! »
« lieber sun, nû sage mir wâ? »
« dort ûf dem hove er ist. »
der künic vrâgete an der vrist,
wie ez ergangen waere.
dô wart im diz maere
gesaget durch einen gelimph,
daz jener sprach durch sînen schimph,
daz wîp der tiuvel waere genant.
diu gämellîche wart zehant
wîte ûf dem hove breit. -
nû sich, wie mannes herze treit
ie ze wîben sînen muot!
dâ von dunket mich vil guot,
wil dû jôsaphâtes sin
an dich bekêren, daz dû in
lâzest sus belîben
bî minneclîchen wîben,
sô wirt er schiere bekêret.
swaz in ir minne lêret,
daz wirt sâ durch sie getân,
als ich dir nû gesaget hân.>
nû lât mich sunder swaere
mit urloube ûz dem maere
ein wênic kêren, des ger ich,
wan es mîn muot betwinget mich.
dô ich an disem maere las,
daz dort durch schimph gesprochen was,
daz wîp der tiuvel waere,
des sin daz niht verbaere,
sîn list verleite den man,
dô gedâhte ich dar an,
wie lebendes mannes vreuden lîp
an vreuden tiurent werdiu wîp,
und nam in mîne sinne
die gêrten wîbes minne
wie diu mit werder güete,
mit lobe, mit hôhgemüete
tuot êre gerndez herze vrô.
mîn herze vrâget ich alsô:
< wes wildû von wîben mir
helfen jehen, des volge ich dir.>
mîn herze ein teil von zorne sprach:
< ruodolf, mir ist ungemach,
ob dû von in iht anders gihst,
wan des dû dich von in versihst:
dû hoerest unde hilfest jehen,
niemen müge baz geschehen,
dan einem êre gernden man,
des reiniu wîp sich nement an,
und im sîn ungemüete
mit wîplîcher güete
ze vreude ûz sorgen kêrent
und sîne vreude mêrent
mit vreuderîcher werdekeit,
die gêrter wîbes name treit.>
sus antwurt ich dem herzen mîn:
< ich wolte dir der lêre dîn
gerne helfen unde jehen:
waer mir von in sô wol geschehen,
daz dû getörstest jehen mir,
daz mir ofter unde ouch dir
waer geschehen baz von in,
sô baete ich gerne mînen sin
die rede versprechen und den namen,
des sich ir kiusche müese schamen.>
dô sprach mîn herze:< gar der pîn,
der dir muoz bereitet sîn
von wîben, der gêt über mich:
durch daz wil ich biten dich
daz dû sie her an rechest
und disen namen versprechest
ûf die gnâde, daz sie dir
der rede lônen unde mir
mîne swaere büezen,
sô daz sie dich wol grüezen.>
< hulfe ez iht, ich taete daz
ûf ir genâde.>< vürbaz
soltû sie mê versuochen,
ob sie des geruochen,
daz in wert dîn dienest sî,
sô wert, daz sie dich machen vrî
von ungemüete unde dich
an vreuden troesten, unde mich
von herzesêre enbinden.>
< möhtich daz an in vinden,
daz sie daz taeten, sô woltich
dir volgen, als dû lêrest mich.>
< nû versuochez, dêst mîn rât.
diu dich nû betwungen hât,
durch die sprich in allen wol
dîn dienest. durch ir güete dol
ir einen dienen, si ist sô guot,
daz si noch hoehet dînen muot.>
dem herzen ich dô volge jach.
disen namen ich versprach.
und jach des ûf die triuwe mîn,
daz wîp ein krône, ein bluomenschîn,
ein wünne berndiu werdekeit,
diu blüejende süeze treit,
an saeldenrîchen vreuden ganz,
und manlîcher vreuden kranz,
ein prîs manlîches muotes,
ein überguot des guotes,
ein lachendiu, spilndiu tugent,
ein spilndiu, lachendiu jugent,
rein, süeze, vreudenbaere
manlîchen vreuden waere.
kiuschiu wîpheit diu ist wert
des besten lobes, des man gert.
wîplich name dêst ein wort,
daz aller worte hoehsten hort
an gotes geschaft wol kroenet;
gebluomet unde geschoenet
ist weltlîchiu vreude an in;
wîbes name ist ein gewin,
der mannes namen und werden man
an herzenvreuden herzen kan.
geherzet herze an wîben nimt,
swaz herzeliebe wol gezimt:
daz ist vil gar an wîben.
wer möhte volleschrîben
wîbes lop unz an daz zil?
mîner meister ist sô vil,
die an ir süezen werdekeit
hânt süezes lobes vil geleit,
daz mîn künstelôser sin
niht niuwes sprechen mac von in.
reiner name, nû wizzest daz:
kundich dir wol gesprechen baz
oder waere ez hie diu zît,
daz ez die liute sunder nît
an disem maere liezen,
mich wolte niht verdriezen,
ich wolte gerne dînen prîs
( waer ich sô künsterîch, sô wîs)
sprechen, hoehen, mêren,
ze hoeherm lobe kêren:
daz hoeret an diz maere niht,
als des maeres urhap giht,
durch daz muoz ich ez hie lân.
swaz ich von dir gesprochen hân,
daz tet ich durch alsolhe site,
daz ich verspraeche dich dâ mite:
hie bî wizzest mînen muot.
swer deheine rede tuot
von dir anders danne er sol,
daz ez mir niht behaget wol,
daz zeigte ich gerne baz, möhtich
ez geniezen umbe dich:
daz stê an den gnâden dîn,
unde an dem gelücke mîn.
tuo mir nâch dînen êren
und lâ mich aber kêren
wider an daz maere hie,
dâ ich die rede hie vor lie,
dô ich urloubes wolte gern:
ich mohte niht der rede enbern.
der künic was des râtes vrô.
mit volge verjach er dô,
er haete sunder missetât
vunden gar den besten rât.
er schiet nâch dem râte
gar von jôsaphâte
swaz bî im ûf dem palas
sîner junkherren was.
juncvrouwen schoene und wol getân
hiez er dar zuozime gân
und gehiez in waerlîche,
daz er sî iemer rîche
mit rîlîchen sachen
vil gerne wolde machen,
swelhiu sô wol sîn phlaege,
daz er bî ir gelaege.
ûf des geheizes lieben wân
hiez er sie zuo dem herren gân,
gestalt sô ritterlîche wol,
daz des niemen wundern sol,
ob ir volge ein junger man,
der sie solde sehen an,
mit sîner volge jaehe
ir willen, als er saehe
bî im sô minneclîchiu wîp
und alsô manegen schoenen lîp.
die schoensten, die man dâ vant
gewahsen über al daz lant,
die hoehsten von gebürte gar
lie man zuo jôsaphâte dar.
die juncvrouwen vil gemeit
wâren stolzlîche bekleit
und an ir lîbe minneclich.
sie begunden vlîzen sich
mit im heinlîcher site,
dâ sie bekêren wolten mite
den reinen gotes degen guot
an sich. sie kêrten gar ir muot
mit heinlîchem sinne
an jôsaphâtes minne.
des geheizes lieber wân,
der in was dâ vor getân,
und des junkherren liehter schîn
vuogte ir herzen grôzen pîn:
sie wolten in vil gerne hân,
wan ez mit vuoge möhte ergân.
dô wart im ofte erzeiget, daz
sie waeren im des niht ze laz.
swes er haete an sie gegert,
benamen, des waer er gewert.
sie wâren mit im alle stunt.
sîn vil tugende rîcher munt
wart von in küssens niht erlân.
ûf sîner minne lieben wân
ir herze in sînen minnen bran.
des wart der gotes dienestman
von in vil ofte innen
mit wîplîchen minnen,
des sie mit vreude in werten,
sô sie ze vriunt sîn gerten.
von dannen huop sich thêodas,
dô der rât gevrumet was.
als er in sîn hol dô kam,
sîniu zouberbuoch er nam:
des tiuvels werder dienestman
mit sînem zouber dô gewan
einen tiuvel, den er twanc,
daz er des junkherren gedanc
und sîne staete sinne
hêrt an der vrouwen minne,
der tiuvel was betwungen
von des zouberaeres zungen
mit nigromanzîe alsô,
daz er sich muoste heben dô
zuo dem süezen jôsaphâte
mit sînem leiden râte.
der vrouwen minne gernden sin
enzunter alsô sêre an in,
daz sie begunden sêre
ie mêre und aber mêre
den junkherren minnen,
in sînen minnen brinnen.
des junkherren gemüete
vil nâch sô sêre erglüete,
daz er ir minnen geltes jach
vil nâch, swenn er sie anesach.
wan daz ze gote herter was
sîn herze danne ein adamas,
sô waer sîn muot verkrenket
und gote an staete entwenket.
nû wart der reine guote
gewar in sînem muote,
daz des hellewarten zorn
wolde gerne an im bekorn
sîner staeten sinne kraft.
doch wart sîn herze sigehaft
von gotlîcher lêre gar.
der nam er vlîzeclîche war:
sîn herze dicke wart ermant,
daz er der sêle gewant,
den lîp, behielte reine
von süntlîchem meine,
daz sîniu brûtlouflîchen kleit,
diu sûber wâren angeleit,
iender mâsen solden hân,
swenn er zer wirtschaft solde gân,
dar des hoehsten keisers kint
alle, die genennet sint,
geladet an sîne brûtlouf hât.
swem dâ gebristet reiner wât,
der muoz in endelôsez klagen
dulten jaemerlîchez jagen.
her an gedâhte jôsaphât.
die vil reinen süezen wât,
diu mit dem toufe erreinet was,
behielt er lûter als ein glas,
reine und niht entreinet,
von sünden niht vermeinet.
des kriuzes segen was im bî,
der machet in von zwîvel vrî.
sîn gebet er ofte sprach
durch des zwîvels ungemach
ze gote in sînem muote:
< krist, herre got, der guote,
lâ mich geniezen, daz dîn trôst
mich armen sünder hât erlôst
von mînen süntlîchen wegen,
und ruoche mîner sinne phlegen
staete in dîner lêre
durch der gnâden êre,
daz dû, vil reiner süezer got,
geruochtest mich in dîn gebot
wîsen nâch den hulden dîn.
nû ruoche dir die kiusche mîn
behalten reine und unverschart,
diu dir von mir benennet wart
kiusche iemer mêre
nâch kristenlîcher lêre:
die ruoche mir behüeten sô,
daz mîne vînde iemer vrô
werden sigender kraft an mir.
mîne kiusche hân ich dir
geophert, herre, süezer krist.
sît dû mit kiusche reine bist,
sô lâ mir daz heil geschehen,
daz dich mîn sêle müge sehen
mit kiusche reineclîche
in dînem himelrîche.
nû ruoche dir behalten mich;
lâ mich geniezen, daz ich dich
geloube zeinem reinen gote
nâch dîner lêre gebote.>
swenn er ze gote sîn gebet
alsus nâch sîner helfe tet,
sô verstuont er sich zehant,
daz gotes helfe im wart erkant
und daz gestaetet wart sîn sin.
nâch dem gebete liezen in
die üppeclîchen sinne
zuo dirre vrouwen minne.
gotes und des gelouben kraft
vertreip des tiuvels meisterschaft.
daz von dem herren unverzaget
des herzen zwîvel wart verjaget.
sus muoste dulten jôsaphât
von dem tiuvel manigen rât,
den er an in ie kêrte,
als in betwungen lêrte
des tiuvels junger, thêodas.
dô er von im gescheiden was.
sîn valscher rât, sîn kündekeit
ze allen zîten was bereit
mit manigem valschen râte
gên dem jungen jôsaphâte.
er wolte mit den vrouwen in
verkêret hân und sînen sin,
als er mit wîbe an sich gewan
âdamen, den êrsten man.
den er betrouc mit êvâ.
die selben liste vant er dâ.
daz er wolte verrâten
den jungen josaphâten.
nû was bî den vrouwen dâ
des küneges kint von syrîâ.
diu was daz schoeneste wîp,
diu den minneclîchesten lîp
dâ hâte in dem lande:
nieman ein wîp erkande
bî der zît sô minneclich.
diu begunde troesten sich
ir schoene, ir lîbes unde ir jugent
an des junkherren tugent.
ûf den lieplîchen wân,
der von dem künege was getân,
und durch sînen stolzen lîp
minnet in daz selbe wîp.
si was aldar gevangen komen;
ir vater hâten sî genomen
dâ vor sîne vînde ê.
daz ellende tet ir wê;
der jâmer nâch ir rîcheit,
diu ir muoste sîn verseit,
twanc sî nâch dem geheize hân
liebes ergetzennes wân,
von dem si würde leides vrî.
si gesaz dem herren bî,
der rede si hin zim began.
er sach sî zühteclîchen an,
er sprach:< vrouwe, saelic wîp,
dîn liehtiu jugent, dîn schoener lîp
hât mir sorgen vil gegeben.
sol dîn minneclîchez leben
in ungelouben sterben?
owê! soltû verderben,
daz got beroubet wirt an dir?
daz gît vil grôze swaere mir.
sol dîn sêle sîn verlorn
und sol der grôze gotes zorn
durch dînen ungelouben dich
verteilen, daz müet iemer mich.
daz wende, saelden rîcher lîp.
gedenke, minneclîchez wîp,
durch rehte wîplîche tugent
an dîne minneclîche jugent,
und nim in dîne sinne
die süezen gotes minne.
toufe dich durch sîn gebot,
wan dir der gewaere got
in dirre welte hât gegeben
ein alsô wünneclîchez leben,
daz dir wirt baz gekroenet
und tûsentvalt geschoenet
in dem himelrîche.
ob dû wilt êwiclîche
ein lebendez leben koufen,
sô soltû dich toufen
und solt an den gewaeren krist
gelouben, der dîn schepher ist,
der dir mit endelôser zît
ein iemer werndez leben gît.>
diu vrouwe sprach:< nû daz tuon ich
ob ich alsus erbarme dich,
als dû gihst, sô soltû
tuon, des ich muote nû.>
< swaz dû wilt, vrouwe, daz tuon ich,
daz dû gote toufest dich
und dich dem tiuvel roubest
unde an got geloubest.>
dô sprach daz minneclîche wîp:
< wil dû gote mînen lîp
und mîne sêle koufen
und sol ich mich toufen,
sô tuo, des ich an dich ger.>
< gerne, vrouwe mîn!> sprach er,
< ich tuon gar den willen dîn.
nû sage mir, waz dû wellest mîn.>
< dâ lâ mich dir angesigen,
daz dû geruochest bî mir ligen
hînaht durch den willen mîn,
daz ich mich geniete dîn
und dû dich mînes lîbes,
des schoenesten wîbes,
diu hie ze lande iender ist.
tuost dû daz, ich wil durch krist
mich morgen toufen unde wil
der heidenschefte geben ein zil.
iuwer ê diu giht alsô:
der engel koere werden vrô,
bekêre ein rehter sünder sich.
durch daz soltû bekêren mich,
daz dû teilhaftic mügest sîn
des toufes, des gelouben mîn.
dû bist sô rehte minneclich,
daz ich dînes lîbes mich
genieten wil, mac ez ergân,
und wil nâch dîner lêre stân
dar nâch ze dînem gebote
und wil gelouben dînem gote.>
dô diu vrouwe diz gesprach,
der herre bî im sitzen sach
einen tiuvel, daz ist wâr,
als einen liehten engel klâr.
der mant in, daz er lôste
von zwîvel, von untrôste
der wolgebornen vrouwen lîp,
und hiez in daz edel wîp
zuo dem gelouben bringen
mit sus getânen dingen
von der unrehten heidenschaft.
sus was in manigen stric behaft
der werde gotes dienstman.
diu juncvrowe in vil sêre began
erbarmen in dem muote.
jôsaphât, der guote,
versach sich des, daz dirre bote
rehte waer gesant von gote.
dô der tiuvel hin verswant,
dô sprach der gotes wîgant:
< vrouwe mîn, dû hâst gegert,
des dû vil kûme hie gewert
von mînem lîbe werden solt:
ich bin dir sus in gote holt.
volge mîner lêre mir!
dirre bete wil ich dir
verzîhen hie, als ich dir sage.
an dem süezen gotes tage,
dô ich den touf wolte
enphâhen, als ich solte,
dô gehiez ich daz gote,
daz ich in sînem gebote
wolde durch die hulde sîn
im die reinen kiusche mîn
behalten staete, reine,
bewart vor allem meine:
daz wil ich im zerbrechen niht,
biz daz man mich leben siht.
ez waer ein süntlîcher kouf,
ob ich dir koufte alsus den touf.
dû solt sus der lêre mîn
volgen durch die sêle dîn.>
diu juncvrowe sprach aber dô:
< herre mîn, wie gihst dû sô,
daz ez sî sô süntlich?
dû solt wol bedenken dich,
waz iuwer ê gebiutet,
des ist mir vil bediutet
von kristenen liuten.
die hôrte ich mir bediuten
in mînes vater rîche,
daz man wol unsüntlîche
von rehte wip solde hân,
daz ez niht waere missetân.
swer ez an iuwern bouchen
wil geschriben suochen,
der vindet, daz die wîssagen,
die patriarchen bî ir tagen
mit gote wîbe phlâgen,
bî den sie kiusche lâgen.
dâ bî saget ir alsus,
der boten vürste, petrus
haete ouch wîp bî sîner zît,
und jeht, daz er doch würde sît
gewaltic unde gewaere
ze himele slüzzelaere.
paulus ez geboten hât
und aller iuwer lêrer rât,
daz man sol wîp ze rehte hân.
dunket dich daz missetân?
ich waene wol, sô zwîvelstû
an der kristenheite nû.
wildû mit irrekeite sîn,
daz krenket mir die lêre dîn.>
jôsaphât antwurte ir dô:
< vrouwe mîn, ez ist alsô,
als dîn munt alhie vergiht;
unser ê diu wert daz niht,
swer wîp wil hân, daz ist vil guot;
ob er daz mit rehte tuot,
der tuot niht wider gotes gebote.
daz aber ich hân geheizen gote,
wie möhte ich im des abe gân?
ich muoz ez im gewaere lân.>
< nû diz sî ouch der wille dîn.
wildû vrô mînes heiles sîn,
sô lige dise naht bî mir,
daz ich geniete mich mit dir
mit minneclîcher liebe kraft
lieplîcher geselleschaft,
sô lobet mîn triuwe wider dich,
daz ich morgen toufe mich.
durch dich wil ich mich toufen;
wildû mich wider koufen
mit dînem schoenen lîbe,
daz dû mich hâst ze wîbe,
sô tuon ich, swaz dû râtest mir,
wirdich gewert der bete an dir.>
jôsaphât, der guote man,
vil sêre zwîveln dô began.
er dâhte, ob erz verbaere,
daz ez vil wirser waere,
dan ober sî sus koufte,
daz si sich gote toufte.
si wegete sîn gemüete mê,
dan ie getet sîn vater ê.
an grôzen zwîvel was er brâht;
als es was dâ vor gedâht,
alsô was ez nâch vollekomen,
dô si hât in an sich genomen,
und in bat mit süezer staete,
des maniger gerne baete,
so er allerbeste kunde,
ein wîp, an der er vunde
sô guote rede, sô schoenen lîp.
swen ein sô minneclîchez wîp
der guoten rede gewerte,
der taete, swes si gerte.
diz wil ich sprechen ouch von mir,
daz ich müese helfen ir
zuo des toufes reinekeit,
als ich hie nû hân geseit.
ich würde überwunden sus,
ob mir sô manigen süezen kus
bute ein alsô schoenez wîp,
daz ich minnete ir werden lîp
ûf die rede, daz si sich
gote ergaebe, des hulfich.
ein solich almuosen waer mîn gir,
ob es geruochte ein wîp von mir.
ich bin wîben alsô holt,
daz ich in durch ir minnen solt
sus wolde güetlîche
koufen daz himelrîche.
ich würde ir trûtgeselle,
möhtich sie von der helle
sus erloesen, dêst mîn muot.
swer in sô gerne taete guot,
dem solde sîn ir danc bereit,
daz zaeme wol ir wîpheit.
nû lâzen die schimphrede stân.
dô disiu bete was getân
und jôsaphât, der guote,
begunde in sînem muote
von zwîvel hân des muotes val,
dô wart ze walde ein michel schal
vür jenez hol, dâ thêodas
der zouberaere inne was.
sie riefen alle:< kêrâ dan!
dirre krefte rîche man,
der unser widersatz was ie,
des muot wir noch erwegeten nie,
den hât an disen stunden
ein wîp gar überwunden.
sîn hôhiu veste neiget sich,
diu ist nû bewegelich.
diu zît nâhet, kêren hin!
under uns drücken wir in.>
sus sante sie des tiuvels man
zuo jôsaphâte wider dan.
der kunde selten rasten
mit gebete und ouch mit vasten,
unz in sîn kestegunge twanc,
daz er vil wênic den gedanc
zuo dirre welte kêrte.
des lîbes nôt in lêrte,
daz sîn gelust sich selten ie
ze dirre welte minne lie;
wan unraetlîchiu armuot
grôze hôhvart selten tuot.
alsus was jôsaphât bewart
von weltlîcher hôhvart
mit kestegunge des lîbes.
diu minneger des wîbes,
ir bete, ir süeziu zunge
twanc in der kestegunge.
dô er alsus betwungen was,
sîn gebet er gote las:
< herre, ich gedinge an dich,
daz dû sô wol behüetest mich,
daz ich ûf dirre erde
geschant iemer werde,
und daz dû mîne sinne mir
behaldest reineclîche dir.>
des gebetes er ie phlac
beidiu naht und den tac
ân underlâz von herzen ie.
vil andâhtlîche ûf sîniu knie
liez er in dem gebete sich
vor im ûf den esterich.
ein slâf begreif in, er entslief,
dô er an gotes helfe rief.
nû sach er, als ich hân vernomen,
egeslîche liute komen.
des dûhte in, daz sie naemen in
ein teil von sînen sinnen hin.
in sînem troume er sich sach
die geiste, von den ich nû sprach,
vüeren an ein schoene velt,
dâ manegerhande vreuden gelt
sînen ougen wart erkant.
daz velt er gebluomet vant
sô wünneclîche, daz er jach,
daz vleischlîch ouge nie gesach
sô wunsches rîchen ougenglast.
wunschlîcher vreuden niht gebrast
ob weltlîchem wunsche alhie,
dâ man daz velt in schouwen lie.
er sach dâ wünneclîche stân
edel boume wolgetân,
die mit süezer genuht
den ougen wünne bernde vruht
gâben an süezer gesiht.
ouch gebrast in des niht,
sie gaeben alsô reinen smac,
daz sîn hôhiu süeze wac
vür al der welte wünne gar.
sô schoene und alsô wolgevar
schein ir loup, ir vruht, ir bluot,
daz allez irdische guot
mohte niht gelîchen sich
der geschaft vil wünneclich.
sô sich von einem winde,
senfte, süeze und linde
der löuber dicke underdranc,
sô wart ein alsô süezer klanc,
daz menschlîcher ôren tor
nie gehôrte ê dâ vor
sô wünneclîch gedoene.
von golde, lieht und schoene,
stuonden liehte stüele dâ.
hie bî ûf disem velde sâ
sach er vil wünneclîche stân
sô rîchiu bette wolgetân,
daz ir vil rîchiu edelkeit
der welte rîcheit ist verseit.
dâ bî vluzzen al vür wâr
liehtiu süeziu wazzer klâr,
der vlôz was wünnebaere.
swer ie gewesen waere
mit leide, er müese sîn genesen,
solter sîn aldâ gewesen.
dô der gotes wîgant
die vreude bernde wünne vant,
die geiste, die in brâhten dar,
die vuorten in schier anderswar
durch daz velt ein reinez phat
gên einer wünneclîchen stat.
diu gap alsô liehten schîn,
daz niht schoener mohte sîn
der sunnen liehter widerglast.
der stat an rîcheit niht gebrast:
beidiu rincmûr unde graben,
die türne hôhe ûferhaben,
von golde, lûter, reine.
daz edelste gesteine,
daz mannes ouge ie gesach,
von dem ie zungen ort gesprach
ze gastlîcher rîcheit,
dâ mite sach er sîn bereit
die türne und ouch die veste gar.
der steine glast den strâzen bar
alsô liehten liehtes schîn,
daz dâ mit staete muoste sîn
tac zallen zîten sunder naht.
dâ was von liehte gar bedaht
der trüeben naht ir trüebe zît.
vroelîche unde enwiderstrît
hôrt er daz süezeste gesanc,
daz mannes ôren ie erklanc:
daz gap vil vreude rîchen schal,
der in der stat vil wîte erhal.
in dem vil süezen dône
hôrt er dâ singen schône
ein engelische stimme guot,
diu wol ervreute sînen muot.
diu stimme in dem dône sprach:
< ein ruowe, ein ewiclîch gemach,
mit vreude, ân ende, sunder leit
ist gotes erwelten hie bereit.
den kiuschen ist gehûset hie:
die gote wol behageten ie
durch ir kiusche reine site,
den wil got hie lônen mite,
biz daz er in ân endes zît
ein endelôsez rîche gît.>
jôsaphât, der guote, sprach,
als er die grôzen vreude sach:
< gnâde, lieben herren mîn,
lât mich in disen vreuden sîn,
und mügez anders niht ergân,
sô lât mich doch alhie bestân
in einem winkel kleine.>
dô sprâchens algemeine:
< vriunt, daz mac nû niht ergân.
dû muost ê vil arbeite hân
und ê vil dicke in gotes gebote
erswitzen. maht dû danne in gote
lîden weltlîch arbeit,
sô wirt dir alhie bereit
ân ende ein vroelîchez guot
in dirre süezen heimuot.
durch daz soltû dich kiusche gar
behalten gote und sünden bar.>
jôsaphât belîben bat
in der gotes erwelten stat,
die in dâ vuorten, dise diet.
vil ungerne er dannen schiet:
dô mohter niht belîben dâ.
die geiste vuorten in dô sâ
hin überz velt von dirre stat
ein vil trûreclîchez phat.
dâ hôrter angest unde leit,
in klägelîcher arbeit
wuofen, schrîen, klagende nôt.
dâ was der sterbende tôt
und angestlîcher aneblic
in einer vinster, diu was dic.
dâ hôrt er niht vreuden mê,
wan ach, leit unde owê.
sie riefen:< wê!> und niemer:< wol!>
diu leide stat was leides vol,
von smacke grôz unreinekeit,
mit jâmer trûreclîchez leit,
wallende viures flammen heiz.
in disem viure sêre beiz
allerhande slangen vruht
die armen sêle sunder zuht.
hagel, bech unde swebel,
ein viur regenender nebel
ûf die vil armen sêlen gôz
wallende hitze grôz.
in was daz leide leben sûr;
der viur giezende schûr
erlie sie selten dirre nôt.
diz was mit nôt ein lebender tôt,
der dâ mit sterbenne geschach
und doch nie starp sîn ungemach.
eine stimme hôrter dô
schrîen ängestlîche alsô:
< diz ist der sündaere pîn.
die man siht in sünden sîn
in ir lebenden stunden,
und alsô werdent vunden,
den muoz iemer sîn bereit
diz klagende leit mit arbeit.
owê, daz er ie wart geborn,
dem disiu nôt muoz sîn erkorn!
owê dem geslähte gar,
von dem sîn muoter in gebar!
owê dem lîbe und niemer wol,
der her die sêle triben sol!
owê dir, unkiuschez leben,
hie wirt dir dîn lôn gegeben!
im wirt bezzers niht beschert,
swer unkiusche ûz der welte vert:
diz ist der sündaere lôn.>
dirre jâmerlîche dôn
was in der vinster grôz aldâ.
jôsaphâten brâhten sâ
wider die gesellen sîn
an sînen sin. als im wart schîn
der rehten vreuderîchez leben,
daz in ze lône wirt gegeben,
und daz vil klagelîche leit,
daz den sündaeren ist bereit,
ein sô grôz jâmer in begreif,
daz al sîn vreude gar zersleif.
der armen sünder lebender tôt
vuogtim alsô grôze nôt,
daz er vil kûme lebete.
sîn jâmer sêre strebete
nâch der vil süezen rîcheit,
die got den sînen hât bereit.
diu vorhte erschracte sînen sin;
dâ bî betwanc der jâmer in,
daz sich der gotes dienstman
hin wider sêre senen began,
dâ er daz lebende gemach
in der stat mit vreuden sach.
der jâmer und der armen nôt
im alsô grôzen kumber bôt,
daz er vil siech den morgen lac
und ungesunt vil sorgen phlac.
dem künege schiere wart geseit
sînes kindes siecheit.
er gâhte zuozim balde dar
und wolte gerne nemen war,
waz im geschehen waere:
sîn leit was im vil swaere.
er kam und wolte in gesehen,
und vrâgete, was im waere geschehen.
dô sprach der guote jôsaphât:
< owê, vater, daz dîn rât
mir mit sô grôzer kündekeit
hât alsô manegen stric geleit!
haete mich got niht behuot,
sô müese ich in der helle gluot
lange wîle sîn gewesen.
daz ich bin der nôt genesen,
des wil ich iemer loben krist,
der aller güete ein urhap ist.
owê, lieber vater mîn,
waz got den erwelten sîn
ze lône vürgehalten hât,
und wie er die verderben lât,
die gên im hinnan schuldic varnt
und sînen willen niht bewarnt!
owê, waz ich gesehen hân!
owê, wie sol ez dir ergân,
wil dû alsô scheiden hin,
daz dû niht bezzerst dînen sin!
owê, waz danne gotes zorn
dir ze lône hât erkorn:
ein tôt, der iemer mêre wert,
ein nôt, diu niht endes gert,
diu muoz dir iemer sîn bereit
ân ende in wernder staetekeit.
ouch hânt dir diu ougen mîn
von gote erspehet die miete dîn,
die dir hât behalten krist,
ob dû im gehôrsam bist:
daz ist ein vreuden rîchez leben,
dem niht endes wirt gegeben.>
alsus seit er unz an daz ort,
waz er haete ersehen dort:
den trôst, daz vorhtlîche leit,
als ich hân hie vor geseit,
leiter sînem vater vür
in maneger drôlîcher kür
und manegen trôst vil trôstlich,
wolder gote bezzern sich.
< ich wil ûf die gnâde gotes,
ûf den wec sînes gebotes
gâhen nâch den hulden sîn.
dâ barlââm, der meister mîn,
wont, dâ wil ich kêren hin:
nâch im senet sich mîn sin.
werstû mir daz, ez ist mîn tôt.
der jâmer gît mir solhe nôt,
der mir wirt niemer mêre buoz,
ob ich sîn entwesen muoz.
stirbich sus von den schulden dîn,
sô muost dû kindes âne sîn
und maht ein vater heizen niht,
sô man dich kindes âne siht>
sprach der gotes erwelte man.
der künec erschrac und sach in an.
im was vil herzeclîche leit
sînes kindes staetekeit.
in dûhte, er waere entsetzet,
an vreuden gar geletzet:
er gie ûf sînen palas.
die tiuvel gar, die thêodas
dâ vor hâte dar gesant,
die kêrten wider an in zehant.
ir geschrei daz was sô grôz,
daz ez ze walde verre dôz.
sie sageten, wie des herren kraft
an in was worden sigehaft,
swenn er sprach gote sîn gebet
und er vor im daz kriuze tet,
wie er sie danne überwant
und sie mit sige tet geschant.
dô sprach aber thêodas,
der des zoubers meister was:
< wie was iuwer kraft sô blint,
daz iuch ein sô jungez kint
sô lîhteclîchen überwant?>
die tiuvel sprâchen sâ zehant:
< dô wir die liste erdâhten
unde an in die brâhten,
mit den adam verleitet wart
nâch unserr meister wîser art,
sô was er ie alsô bereit,
daz wir gar unser arbeit
gên im von kriste verlurn.
unsern sic wir gar verkurn:
als er des kriuzes zeichen ie
vor im in kriuzewîs begie
und danne an kristes helfe schrê,
sô wart uns von viure wê,
daz mit kraft ûf uns zehant
von kristes zorne wart gesant:
daz hât uns dicke wê getân.
wir getürren niemer mê bestân
jôsaphâten, den degen,
sô wol hüetet sîn der segen,
den des kriuzes zeichen hât,
mit dem vil wol besigelet stât
sînes vesten herzen tor.
er hât sich wol bewart dâ vor,
daz er iemer alle vrist
von uns ungewunnen ist.>
dô sus von gote entsetzet was
sînes willen thêodas,
er lebete trûreclîche.
ouch was der künic rîche
mit leide in sorge ergriffen sô,
daz er was trûric unde unvrô.
sîne boten santer sâ
nâch sînem meister thêodâ.
der kam ze hove balde
von sînem wilden walde.
sîn herre gên im verre gie,
vil güetlîche er in enphie.
vil trûreclîche er zuozim sprach:
< meister mîn, daz ungemach,
daz mich getrüebet lange hât,
darumbe ich suochte dînen rât,
daz lenget an mir sêre sich.
daz dû nû jungest lêrtest mich,
daz tet ich, ez vervie mich niht:
der rât ist worden gar enwiht.
nû suoche vür baz mêre,
ob dû deheiner lêre
dich künnest vürbaz verstân,
diu uns ze helfe müge ergân:
die lêre mich. dêst an der zît.
mînes sunes widerstrît
hât mich sô sêre entêret,
daz ich es bin versêret.
nû lêre! swaz dû lêrest mich
ze dirre sache, daz tuon ich.>
dô gerte ûf den palas
zuo jôsaphâte thêodas
ze einem sunderrâte.
dô huop er sich vil drâte
gên jôsaphâte schiere
mit dem künige aveniere.
jôsaphât enphie sie wol,
wan er was reiner güete vol.
dô sie gesâzen an den rât,
dô wart der guote jôsaphât
in maniger itewîze
bestanden dâ mit vlîze,
daz er durch sînen vater nie
niht getet, wan daz er ie
des vater bete entwerte,
des er mit vlîze gerte,
daz er lieze kristenleben,
an daz er sich haete ergeben,
daz wider sînem vater was.
dô sprach hin zime thêodas:
< nû sage mir, lieber jôsaphât,
wer riet dir disen tumben rât,
daz dû die gewaeren gote
alsô gar in dînem spote
mit dîner widerrede hâst
und dû dich doch wol verstâst,
daz sie dir guot, êr unde leben
mit ir gewalte hânt gegeben?
sie gâben dich dem vater dîn.
dem hâst dû daz gemüete sîn
sô dicke an dir beswaeret,
daz dû hâst ervaeret
an ungemüete sînen muot,
daz ist vil übel und niht guot:
dâ mite hâst dû dich behaft
in der lantliute vîentschaft.
dir ist daz kristenleben wert,
des niemen wîser gerne gert.
dîn vater ist sô wolgemuot,
waer daz kristenleben guot,
er haetez ouch genomen an sich
nû soldestû versinnen dich,
daz die besten, die nû lebent,
an die gote sich ergebent:
an daz soltû dich kêren
und dînen vater êren,
wan ez gezimet kinde wol,
daz ez den vater êren sol
und volgen sîner lêre.>
des wart vil und mêre
dem junkherren dâ geseit.
im wart diu reine kristenheit
gevelschet von in beiden:
sie begunden im sî leiden.
des nam er vil kleine war:
sîn herze wart gevestent gar
in reines herzen willen gote,
staete in sînem gebote.
des himelischen keisers kneht
began diz grôze unreht
mit zühten merken: er gesweic.
sîn muot niht wan ze gote steic.
er sprach mit gotes lêre sâ
zuo dem valschen thêodâ:
< swîc, unrehtiu irrekeit!
dîn irrekeit dich hôhe treit.
der welte schande ûz bâbilôn,
dâ rehter sprâche ganzer dôn
gebrochen unde geschendet wart
von unrehter hôhvart
ûf turri - kâlannâicâ,
dîn herze hât gehûset dâ.
der valschen bâbilône rât
der welte rede entrihtet hât.
dû vervluochter alte unwîs,
in gotes vluoche bist dû grîs.
verworhtiu vruht von kânâân,
wer geriet dir den wân,
daz dîner valschen zungen ort
ie getorste valschez wort
gesprechen gên der kristenheit,
diu rehte und redelîche treit
die gewaeren lêre gotes,
den rehten urhap sîns gebotes?
valschiu valscheit, wîse mich,
weder dunket waeger dich:
dienen dem, des wîser rât
elliu dinc geschaffen hât,
oder einem bilde, daz ein hant
gemachet hât und ist genant
von einem menschen ein got
durch des tiuvels gebot?
dîn got, dem dû dich ergîst,
der ist vil junger, dan dû sîst.
dû waer ein mensche geborn,
ê dînem gote ie würde erkorn
dehein erkantlîch geschaft.
merke dînes gotes kraft:
gêt dîn got? niht! er stât.
swâ man in sitzende lât,
stêt er dâ? nein er, niht!
sprichet er? hât er gesiht?
gehoert er? kan er sprechen wol?
nein er, benamen! er ist hol
an rehten witzen unde laz,
als ein gegozzen laerez vaz.
er ist, swie dû machest in,
ein gôz, ân allerslahte sin.
steine, silber, golt sie sint
stummen, âne gehoerde, blint,
in der gebote ir gerne lebet
und den ir iuwer opher gebet.
swaz ir in ophers bringet dar,
daz hât vil hoeher krefte gar
dan die gote, die dû hâst,
ob dû der wârheit dich verstâst.
ein vihe gehoert, ez siht, ez gât,
von gote ez lebende krefte hât:
sô ist dîn got ein geschaft
reht als ein stoc, ân alle kraft.
daz vihe ist gotes hantgetât;
ein mensche gemachet hât
dînen got mit sîner kunst
âne sin, sunder vernunst.
dîn got, dem dû bist sô holt,
ist er silber oder golt,
sô muoz diu staete huote dîn
vor den dieben hüeten sîn.
ist er holz oder lein
oder ein kreftelôser stein
sunder nutz, sô gar unwert,
daz sîn ze nutze niemen gert,
sô hât er krefte wol sô vil,
ob sîn der diep niht steln wil,
daz man in von der stat niht treit.
daz kumt von der krankeit,
daz man sîn niht geniezen mac.
dîn got in einem viure lac,
dô man in smitte unde gôz.
ein holz, ein stein, ein erde blôz
ist er; er wuohs in wilde,
ê daz in zeinem bilde
gemachet eines menschen hant:
wie mac daz sîn ein got genant?
der heizet got, des wîser rât
daz mensche gemachet hât,
daz mit sîner wîsheit
daz bilde gôz oder sneit.
daz dû heizest dînen got,
daz ist gotes und der welte spot.
nû prüeve in den sinnen dîn,
ob daz ein got müge sîn,
daz deheiner slahte kraft
hât wan von der meisterschaft,
die menschlîchiu wîsheit
mit listen an ez hât geleit?
tumber gouch, nû sich dar an,
dîn got leben nie gewan;
er starp ouch nie, wan im daz leben
nie lebelîche wart gegeben.
er wart nie lebende unde ist tôt.
wirt dir eines phandes nôt,
ist er danne güldîn
oder rîche silberîn,
sô tuot sîn helflîcher trôst
dich allerbest von sorge erlôst.
nû merke, tumbez wiht, den spot.
wer mac verpfenden rehten got?
wer mag in verkoufen ouch?
swîc, sinnelôser gouch!
leg dîne hant vür dînen munt.
dir ist niht wan tôrheit kunt.
lâ dîn âkôsen sîn!
ze liebe dem vater mîn
sitzestû hie unde seist
ein trügespel, daz dû niht weist
selbe rehte, war diu wort
kêrent urhap oder ort.
dû bist sô gar der witze erlân.
daz dû niht weist, wie ez sol gân
deweder nâch oder vor.
dû heizest mich ein toubez hor
anebeten und einen stein.
dâ weder vleisch noch bein
noch âder ist noch lebendiu kunst.
niht wan durch mînes vater gunst.
solde ich durch daz smeichen dîn
lâzen den gelouben mîn
und den got lân durch dînen rât,
des witze mir gegeben hât
vernunst und wîslîchen sin?
von dem ich lebende worden bin?
des gotlîchiu wîsheit
daz urhap und daz ende treit
al der dinge, den sîn kraft
namen gît und ouch geschaft?
sîn kraft, sîn gotlîcher rât
alliu dinc gemachet hât.
er tet sîne wârheit kunt
durch der wîssagen munt,
nâch der worten er uns kam.
die menscheit er an sich nam,
wan sich diu menscheit verlôs.
durch die schulde er im erkôs
sô grôze dêmüete,
daz er durch sîne güete
des knehtes bilde an sich nam
und wart alsô gehôrsam,
daz er sich an daz kriuze bôt
und dar an leit durch uns den tôt.
diu menscheit daz sterben leit.
den sunnenschîn diu gotheit
mit ir kraft erlaste
an sînem liehten glaste.
diu menscheit begraben wart,
ze helle vuor die hellevart
sîn heilic sêle, diu sî brach.
die gotheit man loesen sach
die rehten ûz der helle nôt.
vür den endelôsen tôt
hât in diu gotheit daz leben
ân ende vroelîche gegeben.
haete sich unser herre got
durch sîner güete grôz gebot
niht sô gedêmüetet
und alsô sêre gegüetet,
daz er durch sîne güete
mit solher dêmüete
des knehtes bilde naeme an sich,
sô waere daz unzwîvellich,
diu vil kranke menscheit
müest iemer mêr sîn hin geleit:
wan diu krenkest armekeit,
der ie name wart geseit,
daz was diu menscheit dâ vor.
die hât nû vil hôhe enbor
über al der engel stat
diu gotes menscheit gesat.
dô diu menscheit alhie
der gotheit gebot begie
nâch der prophêten sage,
an dem vierzigesten tage
vuor er ze himele aber wider,
von dem er wart gesant hernider
durch adâmes missetât,
die gote nû versüenet hât
kristes reiniu menscheit,
diu den tôt durch uns leit.
zes vater zeswen dâ ist
gesezzen got, der süeze krist.
sus ist got der reine
mit drin namen eine.
swer daz niht gelouben wil,
der muoz ân endelîchez zil
iemer mêre sîn verlorn.
swer ez geloubet, derst geborn
in daz êwiclîche leben,
daz got wil den sînen geben
in dem himelrîche
ân ende vroelîche.
vil tumber man, nû wîse mich,
weder dunket bezzer dich:
gelouben einem reinen gote,
der in sînem gebote
hât in wîser meisterschaft
aller der geschephede kraft,
der reht mit triuwen lêret,
unreht ze rehte kêret,
der guot ist unde gewaere,
rein, reht, unwandelbaere,
der wîse ist unde süeze erkant,
der diu wârheit ist genant,
der milte mit dêmüete phligt,
des kraft vür alle krefte wigt:
oder einem touben apgote,
daz got mit sinnelôsem spote
verteilet mit dem tiuvel hât,
daz sich von sinnen niht verstât
wan als ein toubez oede vaz,
daz laere ist, lebender witze laz?
hie soltû gedenken an
von gote, dû vervluochter man.
benamen! dû solt wizzen daz,
als dîniu sinnelôsen vaz
tôt und âne witze sint,
toup, an rehten sinnen blint,
daz den muoz alsam geschehen,
die in gelouben wellent jehen:
got hât sîn rîche in verboten
allen, die sie hânt ze goten.>
dô sprach der zouberaere:
< nû ist daz offenbaere,
daz rîche künege, vürsten grôz
und manic keisers grôz genôz
und die die liste vunden gar,
ie nâmen unserr lêre war:
die dûhtes algemeine
guot, reht und reine.
die kristenlîchen lêre
die lêret niemen mêre,
wan daz ir zwelve erdâhten,
die sî den liuten brâhten
nû in kurzen jâren.
die selben alle wâren
gebûre und niht von hôher art:
von den diu lêre erhaben wart,
die wâren arme liute gar,
gebürte und wîsheite bar.
wie wil dû daz bewaeren,
daz die unedeln waeren
mit ir lêre gewaere,
und dise lügenaere,
den guot, geburt und wîsheit
mit hôhen witzen was bereit?
die edeln und die wîsen hânt
vil witze, in den sie sich verstânt:
des sol man in der volge jehen.
von den unedeln ist gesehen
selten wîslîch wîsheit,
diu edelr wîsheit ist bereit.>
jôsaphât der sprach dô sâ:
< sinnelôser thêodâ,
dû bist vil lîhte âne vernunst,
ein tumber esel, âne kunst.
dîn einic rede rihtet sich
vür sich allez einen strich
mit tumben touben maeren
und kanst des niht bewaeren
gên endehafter wârheit,
daz dû seist und hâst geseit.
swie vil ich dir bewaere
mit wârheit rehter maere,
sô wil daz tumbe herze dîn
doch allez âne witze sîn.
dû gihst alsô, daz iuwer leben
von wîsen liuten sî gegeben
und von rîcher hêrschaft,
die mit gewalteclîcher kraft
muosten ez beschirmen ie,
sô daz ez niemen übergie.
sît sie es gedâhten mit den goten
und ez hât ir gewalt geboten,
sô ist der rîchen künege kraft
und der listwürken meisterschaft
der gote lêrer überz leben,
an daz ir iuch hânt ergeben.
sol got hân lêraere,
sô ist er selbe laere
gotlîcher wîsheit:
des muoz ich jehen ûf mînen eit.
waz ist gewaltes im gezalt,
sol in menschlîch gewalt
bevriden zallen stunden
von sînen nâchkunden?
hie solt dû rehte merken an,
daz got wunder üeben kan:
dîner gote werdekeit
wart von künegen ûfgeleit,
die mit gewalteclîcher hant
die liute twungen und diu lant
in ir gote lêre.
nû sich, wie der êre
von tage ze tage siget
und jeniu lêre ûfstîget,
die durch armer liute munt
got tet mit rehter lêre kunt.
diu rede ist vil bezeichenlich:
got der dêmuote sich,
daz er hôhte dêmuot,
diu von hôhvart waer behuot,
und valsche hôhvart neigte
und tumbe rede gesweigte,
diu mit gewalte erhaben wart:
der wil die tumben hôhvart
dîner gote neigen
und den gewalt gesweigen
der vürsten, die mit tumpheit sint
an hôhvart dirre welte kint:
die drücket er und hoehet die
mit rehter dêmuot wâren ie.
ze wîser sinne volleist
sante er den heiligen geist
den zwelfboten ze lêre,
die sînes lobes êre
den liuten vürleiten,
in allen sprâchen seiten
wîte in vremeden landen.
des sie ê niht erkanden,
daz wart in schiere wol erkant,
dô gotes geist in wart gesant.
sie sint, von den gesprochen hât
dâvît, als ez geschriben stât:
« in al die welt der erde hie
ir schal, ir dôn vil wîte gie,
unz ûf al der erden ort
erschullen vil wîte ir wort. »
noch sprichet von ir lêre
dâvît aber mêre:
« dû wilt sie setzen werde
ze vürsten über die erde:
sie gedenkent dînes namen. »
die reinen boten lobesamen
hât diu schrift bewaeret sô.
gewalt, vorhte, tôt noch drô
moht ir wort verdrücken niht,
daz man in gote wahsen siht.
die künege und ouch die wîssagen,
die got hie vor in alten tagen
der welte künftic sageten,
die lebeten und betageten
baz und redelîcher:
vil edeler unde rîcher
wâren sie mit wârheit,
dan von den dû hâst geseit.
die leisten rehte gotes gebot.
ir wort hât ervüllet got,
der süeze, der gewaere krist.
als daz geschehen ist,
alsô hât ez der boten munt
gemachet in der welte kunt.
ir wort, daz sint diu gotes wort,
von den hât got gesprochen dort:
« himel und erde diu zergânt,
mîniu wort diu gestânt. »
von gotes kreften sprichet sus
dâvît, psalmîgraphus:
« herre, dû stiftest werde
von anegenge die erde.
die himele sint dîn hantgetât,
der beider kraft vil gar zergât.
sie zergânt, dû gestâst,
wandels dû sie niht erlâst.
an in wirt wandelunge erkant,
sie veraltent als ein gewant,
und als ein decke gar vür wâr
wehselnt sie sich. dîniu jâr
verwandelnt sich niemer.
der eine bist dû iemer,
dîniu jâr verswindent niht. »
dem dâvît der krefte giht,
der ist reht unde gewaere,
der welte schephaere:
gên des kraft soltû gedagen.
nû sage, waz mahtû gesagen
von dînen goten gewaeres,
ze rehte unwandelbaeres?
die iu ze goten sint erkant,
die wâren menschen genant
und wâren mit des tiuvels kraft
ze allen zîten gar behaft.
swaz sie dô liste vunden
in den selben stunden,
des hâte tumbiu diet den wân,
ez haete ein werder got getân.
daz liut sie an sich twungen
mit ir valschen zungen,
daz sie stuonden zir gebote
und hiezen sie gewaere gote:
dô was daz liut an witzen kranc.
ir vreise, ir zouberlist sie twanc,
daz ir wer was gên in blûc.
der êrste was genant serûc,
der apgote gedâhte.
den site er ûzbrâhte
und gap von êrst den urhap,
daz man dem ein bilde gap,
den man ze gote wolte hân,
und was dem bilde undertân,
ûz dem der tiuvel zaller stunt
den liuten tet antwürte kunt.
dâ hâter iuch betrogen mite,
nâch dem behaltent ir den site:
ân allerslahte wîsen sin
tuot ir manegen dienest in.
lâ dir von gote sagen mê:
dô nâch kristenlîcher ê
die boten wurden ûz gesant
hin und her in vremediu lant,
swâ danne mit des tiuvels kraft
wâren diu apgot behaft,
zehant, sô der bote kam,
des tiuvels kraft ein ende nam
und sprach zehant gên im niht mêr.
durch daz reine zeichen hêr,
daz mit des kriuzes kraft ergie,
der tiuvel sîne rede lie:
daz zeichen in beherte,
sînen gewalt ez werte.
die siechen wurden alle stunt
von dem zeichen wol gesunt.
der tiuvel niender mac gestân,
swâ daz zeichen wirt getân.
dû trügenaere, waz sagestû
von dînen valschen goten nû?
heiz dînen witzelôsen sin
geswigen antwürte von in.
dâvît hât bewaeret dort,
daz krist, daz reine gotes wort,
gevestent habe der himele kraft.
diz ist sîn rehtiu bîschaft,
als ez dort geschriben stât:
« daz gotes wort gevestent hât
der himeltugende volleist
und sînes mundes süezer geist. »
daz wort ist krist, daz gotes kint,
mit dem sie gevestent sint.>
dô verstuont sich thêodas,
daz er überwunden was.
der rede er alsô sêre erschrac,
daz er niht widerrede phlac.
daz süeze reine gotes wort
ruorte sînes herzen ort
sô sêre, daz sîn herze brast
und daz im ein vil reiner gast
wart gesant von gote drin.
diu riuwe brâhte im in den sin
des heiligen geistes kunft,
der mit gotes sigenunft
den vîent an im überwant.
als im sîn schulde wart erkant,
si rou in alsô sêre,
daz er die gotes lêre
sô rehte minneclîche enphie,
swaz er sî gehazzete ie
dâ vor in sînen sinnen,
daz began ers wider minnen:
in sînen sin er sî dô las.
sô vîent er ir dâ vor was,
sô holt wart er ir dar nâch.
im was von dem râte gâch:
vür jôsaphâten er dô gie,
vür in viel er ûf sîniu knie.
sîn sünde im tet von herzen wê;
vor dem künege er lûte schrê:
< wir sîn an disen stunden
mit wârheit überwunden,
herzelieber herre mîn.
jôsaphât, der sun dîn,
des heiligen geistes rât
in sînem reinen herzen hât.
got hât an dirre selben stunt
mit uns geredet durch sînen munt.
ay, süezer got, vil werder krist,
welch ein reiner got dû bist,
von dem sîn zunge hât geseit!
ay, süeziu kristenheit,
wie reht und wie gewaer dû bist!
wie grôz, wie ganz dîn leben ist!
nû sage mir, saelden rîchiu tugent,
reiniu gotes erweltiu jugent,
ist got sô dêmuot, daz er sich
geruoche erbarmen über mich,
ob ich ze sînen hulden
nâch mînen grôzen schulden
mit mîner buoze komen wil?
ist sîner güete alsô vil,
daz er mich niht versmâhe
und mîne buoze enphâhe?>
< benamen,> sprach der herre guot,
< sîn güete dir genâde tuot,
swenne es dînes herzen sin
mit rehten triuwen gert an in.
got, diu gewaere wârheit,
gewaere vreude hât geseit
von aller der engel schar,
daz diu sî mit vreuden gar,
sô got den sünder lêret,
daz er von sünden kêret:
des werdent al die engel vrô.
noch sprichet unser herre alsô:
« ich bin niht durch die rehten komen.
die diu sünde hât benomen
deme himelrîche gar,
die sol ich laden wider dar. »
noch troestet uns got anderswâ
sus mit sînem trôste dâ,
den uns alsus sîn lêre bôt:
« ich lebe und wil niht den tôt
des sünders, daz er sterbe;
ich wil, daz er sô werbe,
daz er von sünden kêre
und ersterbe niemer mêre
und ân ende lebende sî. »
hie solt dû rehte merken bî,
daz der gewaere gotes trôst
dich von sünden tuot erlôst:
dar an solt dû zwîveln niht.
als man dich im toufen siht.
sô bestât in dem toufe gar
swaz dû sünden bringest dar,
und wirdest anderstunt geborn
und gote ein reinez kint erkorn.
diz bewaeret gotes wort
mit dem wîssagen dort:
« weschet iuch algemeine
und weset iemer reine!
tuot von den gedanken hin
daz übel und den übeln sin!
lât varn, daz ir übel tuot!
leistet unde lernet guot! »
diz lêret unser herre got.
alsus nim an dich diz gebot:
swenne dû dich im ergîst
und dû durch in getoufet sîst.
sô lebe nâch der lêre sîn
und hüete wol der sêle dîn,
daz si got iemer mêre sî
reine und alles wandels vrî.>
dô der alte thêodas
brâht an den gelouben was.
er gâhte dannen balde
in sîn hol in dem walde.
swaz er dâ zouberbuoche vant,
diu verbranter sâ zehant.
von dannen er dô kêrte,
als jôsaphât in lêrte,
an jenen priester, den nachor
suochte durch den touf dâ vor:
der was in gotes lêre aldâ.
dô er in vant, er gap im sâ
des herren wortzeichen dar.
dô des der priester wart gewar;
er neic im und der reinen hant
diu ez hâte dar gesant.
der priester güetlich an sich nam
den bekêrten thêodam:
zuo dem gelouben wîster in,
er toufte in in den namen drin.
der wart reht unde gewaere
und gote ein predigaere,
ein reiniu sêle, lûter gar.
er machte sich von sünden bar
mit guoter werke staetekeit;
durch got er manege swaere leit:
er kunde selten rasten.
mit gebete und ouch mit vasten
ziert er mit vlîze schône
wol des gelouben krône.
dô diz allez was geschehen
und der künic hâte ersehen,
an swelhen rât er ie was komen,
daz im dar an was benomen
al sîn gedinge, er was unvrô.
sîne man besanter dô,
er sprach:< ir herren, mîne man
und mîne vriunt, nû seht dar an
und gebet mir wîsen rât dar zuo,
wie ich jôsaphâte tuo.>
dô rieten sie vil manege wîs.
dô sprach der vürste arachîs:
< waz suln wir tuon oder lân?
wir haben allez daz getân,
des wir an jôsaphâte
mit lêre und ouch mit râte
zem besten ie gedâhten.
swie wir daz volbrâhten,
daz vervienc uns allez niht:
unser lêre ist im enwiht.
wart im mit scharpher drô gedreut,
wart er mit süezer rede gevreut,
daz was im allez als ein wint.
herre mîn, dîn liebez kint
hât lîhte von natûre den muot,
daz erz von natûre tuot.
daz machet in alsô staete,
swie gerne er anders taete,
daz ers doch niht gevolgen kan.
swaz alsô gerne tuot ein man,
wer mac in dâ von bringen
mit deheinen dingen?
ê daz dû bringest in hie von,
des er von kinde ist her gewon,
sô toetestû benamen in
nû gert ouch vür baz niht sîn sin,
wan daz er durch krist lige tôt.
diz dunket in ein ringiu nôt,
dar an ist er unervorht.
taetest dû daz, sô waer verworht
der väterlîche name an dir.
râtich dir wol, sô volge mir.
sît uns dekein wîser rât
vervâhet noch vervangen hât,
sô volge mîner lêre:
bit in vür baz niht mêre,
teile im väterlîche
en zwei dîn künicrîche.
swelhen teil er danne neme,
der im ze teile wol gezeme,
den solt dû im besunder geben.
lâz in in sînem teile leben,
als im danne beste behage.
gip ein ende dîner klage,
swenn im diu rîcheit zuogât
und in unmuoze niht erlât,
sô vergizzet er vil gar,
des er sus nimt gerne war.
belîbe er kristen, daz lâ sîn,
daz ist ân die schulde dîn.>
des râtes was der künic vrô.
sie jâhen algelîche dô,
dâ waer der beste rât geschehen:
des wart mit volge aldâ verjehen.
dô der ander morgen kam,
der künic sîne vürsten nam
und swaz dâ sîner manne was
und gie hin ûf den palas.
der junge reine gotes kneht,
begie dô sîner zühte reht,
als ie diu edeln herzen tuont.
gên sînem vater er ûfstuont
und gên den andern vürsten dâ.
< sun> sprach der künic sâ,
< nû bin ich aber zuo dir komen,
wan dû dich hâst angenomen,
daz mich dîn munt entwerte
swes ich ze dir ê gerte:
sô bin ich aber alsô hie.
nû solt dû rehte wizzen, wie
und wes ich dich biten wil.
hie gib ich al der bete ein zil,
der ich ie ze dir getete:
diz sî mîn jungestiu bete.
mir ist gerâten, daz ich dich
von mir scheide und daz ich
dir halben teil des rîches gebe
und ich ez halbez, unz ich lebe.
habe und dar nâch lâze dir.
sus wil ich scheiden dich von mir.
wis dû in dem teile dîn
und lâ mich in dem mînen sîn.
dâ lebe, swie dû wellest leben.
ich mac niht mêre mich begeben
sô maniger vreude, als ich nû hân
von dînen schulden her getân.>
dô dâhte aber jôsaphât,
benamen, daz der selbe rât
waer niht geschehen und der teil
wan ûf des wânes unheil,
daz im der welte rîchez guot
von gote drunge sînen muot.
doch dâhter, daz ez waere
guot und lobebaere,
daz ein kint daz taete,
des ez sîn vater baete.
< lieber vater> sprach er dô,
< diz waer mîn wille, ich waer es vrô,
daz ich der bete würde erlân,
wan ich gar versprochen hân
dirre welte krankez guot.
ich hâte des vil guoten muot,
daz ich suochte den, des rât
daz leben mir erzeiget hât,
daz ist der liebe meister mîn.
sît aber mich diu bete dîn
sus ernestlîche und dîn rât
dirre bete niht erlât,
sô wil ich ez tuon durch dich,
sît es dîn bete gert an mich.
sît dû diz wilt, ich bin es geil.
nû teile, ich nim den einen teil,
als dû hie gesprochen hâst,
wan dû mich sîn niht erlâst:
swelher teil mir wirt benant,
den nim ich von dîner hant.>
der künic was der rede vrô.
mit jôsaphâte teilter dô
daz lant und al sîn rîche,
die hêrschaft algelîche.
der bezzer teil über al daz lant
wart jôsaphâte aldâ benant.
dô wart alhie vil schône
mit des künicrîches krône
gekroenet dirre gotes degen,
der des landes solte phlegen.
des rîches vürsten wâren dâ,
die swuoren ime hulde sâ.
der künic sînem kinde hie,
vil grôze hôhgezît begie
mit küneclîchen êren.
dô dannen wolte kêren
der tugende rîche wîgant
von sînem vater in sîn lant,
der künic hiez die vürsten gar,
daz sie mit küneclîcher schar
in vuorten hêrlîche
in sîn benantez rîche.
diz geschach. sie vuorten dan
den edelen tugende rîchen man,
als sie der rîche künic bat.
des landes groestiu houbetstat
in jôsaphâtes teile lac,
diu gar des rîches veste phlac,
dar inne er wesen wolte
mit hûse, als er solte.
nû die burger vernâmen,
daz die vürsten kâmen
und ir vil lieber herre,
sie vuoren gên im verre
und enphiengen in mit vreuden wol.
als man noch enphâhen sol
einen niuwen herren wert,
der sîner hêrschefte gert.
mit vreude enphienc er sâ zehant
die stat, daz rîche und daz lant.
die vürsten er belîben bat
mit im in der selben stat
und bôt in michel êre.
die süezen gotes lêre
von dem himelrîche
seit er in güetlîche.
er lêrte sie daz gotes wort
von anegenge unz an daz ort,
wie got geschuof mit sîner kraft
al der welte geschaft
und wie er mensche dar nâch wart:
die urstende und die ûfvart,
den tôt, des tôdes sigenunft,
die êrsten und die andern kunft,
sô got an der welte zil
dise welt verenden wil.
leiter in mit wîser kür
in maneger wîser lêre vür.
der sünder nôt, die seiter in:
an der behaltenen gewin
und an des himelrîches kouf
riet er in und an den touf.
von stunt ze stunt und tägelich
vleiz er mit süezen worten sich,
wie er daz lant bekêrte
und gotes gelouben lêrte.
ûf die hôhen türne enbor,
ûf al die zinne und ûf diu tor
wurden kriuze vil gesat:
diz zeichen er wol êren bat.
er lêrte sie des kriuzes segen;
des selben zeichens hiez er phlegen,
swâ der man vorht grôze nôt.
den liuten er dar nâch gebôt
diu betehûs, hôhe ûferhaben,
niderbrechen unde graben
die gruntveste ûz der erde:
diu hiez er vil unwerde
ûzbrechen algemeine.
daz golt und daz gesteine,
daz mit grôzer rîcheit
an diu betehûs was geleit,
daz hiez er stoeren unde nemen.
er wolt ez niht lân gezemen
got an ein gotshûs anderswar:
man muostez vürder tragen gar.
die gote er verderben hiez,
dekeinen er belîben liez:
diu bilde wurden gar verbrant.
swâ im ein apgot wart erkant,
den gotes zorn er an im rach:
ir betehûs er gar zerbrach.
nû was kristenliute vil
dâ vor lange manegiu zil
von ir lîbes sorgen
mit vorhten gar verborgen
von sînes vater vorhte,
die er mit vrävele worhte.
dô die diu maere vernâmen,
vil vroelîche sie kâmen
ûz den wüesten wilden gar
zuo dem jungen künege dar.
vil minneclîch er gên in reit
und gruozte sie mit werdekeit
und bôt in manige êre.
die süezen gotes lêre
hiez er sie dô den liuten
vorsagen unde bediuten.
er hiez mit rîlîchen siten
in der selben stat enmiten
gote ein münster machen
mit keiserlîchen sachen
nâch gotlîchem ruome:
daz hiez er mit heiltuome
wol zieren unde wîhen sâ.
nû was ein bischof aldâ,
den sîn vater ê vertreip,
durch daz er kristen beleip,
den hiez er erzebischof wesen
und die gotes lêre lesen:
in dirre selben houbetstat
wart ze erzbischofe gesat
dirre selbe erwelte gotes
und was dâ lêrer sîns gebotes.
der künec hiez in den zîten
in einer apsîten
machen eine toufstat,
die er mit vlîze zieren bat.
dar nâch mit süezen segenen guot
gewîhet wart des toufes vluot.
dô touften sich zem êrsten
die vürsten aller hêrsten,
die edeln und die rîchen.
dar nâch begundez lîchen
den rittern und der andern diet,
als in des küneges lêre riet.
ze allen zîten hiez er dort
die phafheit daz gotes wort
den leien künden unde sagen.
man vant in den selben tagen
niht mêre kurzewîle dâ,
wan diu reinen êwangeljâ
sagen unde bediuten
mit lêre den lantliuten.
er hiez machen alle stunt
die wîsen prophêten kunt,
die vünf buoch von moysê,
die alten und die niuwen ê,
die boten, die epistolas,
den salter, die omêlias
unde swaz dem glouben gap
vestenunge und urhap:
daz wart mit wîser wârheit
den lantliuten vorgeseit.
sus gâhten an der selben zît
vroelîch unde in widerstrît
herhaft unde in maneger schar
die armen und die rîchen dar,
die gotlîche enphiengen dort
den touf und ouch daz gotes wort.
swie sêre siech deheiner was,
in dem toufe er sâ genas:
als im der dâ wart gegeben,
der sêle und ouch des lîbes leben
bezzerte vroelîche sich
an den liuten tägelich.
sô sie von dannen kêrten wider,
diu betehûs sie brâchen nider
und machten niuwe kirchen gote
nâch der kristenheit gebote.
liutkirchen, klôster, bistuom
der wart durch gotlîchen ruom
vil gemachet überz lant.
sich tet diu kristenheit erkant
vil wîte in dem rîche.
den liuten kristenlîche
von dem künege in daz lant
wart guoter phafheit vil besant,
die junge und alte lêrten,
wie sie ze gote kêrten
herze, sin und ouch vernunst.
der rehten schrift lêr unde kunst
wart in von gote in kurzer stunt
und von der phaffen lêre kunt.
got und die gotes lêre
vestent in vil sêre
ein dinc, daz alhie geschach.
swâ man niderbrechen sach
durch der kristenheit gebot
diu betehûs der apgot,
sô hôrten junge und alte dâ
die tiuvel lûte schrîen sâ:
< wê! man wil uns vertrîben!
dâ wir solden blîben
und noch sîn biz her beliben,
dâ müezen wir nû sîn vertriben!>
swenne daz geschrei geschach,
ir iegelîcher rehte sach
der tiuvel her mit vlühte sîn
und klagen disen grôzen pîn.
disiu vil grôze vorhte
wol an den liuten worhte
die kristenlîche lêre.
ie mêre und aber mêre
began daz liut von sinnen
got und von herzen minnen.
ouch kunde in guot vorbilde geben
des küneges reineclîchez leben.
der sô gar mensche engel schein,
daz menschen name an im verswein.
er was engel, mensche niht,
des muotes, als daz maere giht.
sîn menschlîch gemüete
was niht wan engels güete.
nû nam der künic jôsaphât
an der reinen schrift den rât,
den der gotes kneht dâvît
den künegen ûf der erde gît.
er sprichet:< künege, ir sult vernemen,
lât iuch lêre wol gezemen.
die die erde rihten gar,
nemet der gotes lêre war!
dienet gote in vorhten wol,
sît im in vorhten vreuden vol,
daz got deheines zornes phlege
und iuch von dem rehten wege
daz unreht iht bekêre.
sô kürzlîchen vil sêre
enzündet wirt der gotes zorn,
sô werdent sie saelic erkorn,
die wol getriuwent an in.>
diz nam der künec in sînen sin
mit vlîze ûf gotlîchen lôn;
und einen rât, den salomôn
der erde rihtaeren tuot,
den nam vil gar in sînen muot
jôsaphât, der gotes kneht.
diu wîsheit sprichet:< minnet reht,
die gerihtes der erde phlegen!>
den rât behielt der gotes degen
jôsaphât der guote
mit vlîze in sînem muote
und berihte wol sîn rîche
mit saelden zühteclîche.
sus was sîn vorbilde getân.
er kunde reinez leben hân,
er rihte wol ze rehte
dem ritter und dem knehte,
dem rîchen als dem armen.
in muoste sêre erbarmen
der armen arbeit unde nôt.
sîn hant in manege helfe bôt
mit gotlîchem trôste.
vil güetlîche er lôste
der armen vil von swaere,
von manigem karkaere.
swer dem andern tet unreht,
daz machet er mit rehte sleht.
swer umbe gelt gevangen lac,
daz gelt er balde vür in wac.
swaz er guotes ie gewan,
daz sante der vil reine man
ûf endelôsen gewin
bî dürftigen gar vür sich hin
ûf des himelrîches teil.
dar zuo gap im got daz heil,
swer ungesunt hin zime kam,
daz er gesuntheit von im nam:
sêle und lîbes saelekeit
was alle stunt von im bereit.
sîn geistlîch gemüete,
sîn reiniu manlîch güete,
sîn gebaerde und sîn leben
kundim der liute vriuntschaft geben.
gots und des wunsches kinde
begunde sîn gesinde,
sîn guot, sîn lop, sîn êre
mit saelden wahsen sêre.
swie vil er rîch und rîcher wart,
sô was er doch von hôhvart
alsô sêre wol behuot,
daz sîn heiliger muot
ie mit süezer güete
wuohs mit dêmüete:
des wart sîn lop mit saelden breit.
sînes vater werdekeit
begunde swînen tägelich;
sîn lop, sîn êre hôhte sich.
des vater guot gelücke swein;
sîn êre zallen zîten schein
wahsende von tage ze tage.
sîn vreude sînes vater klage
begunde sêre mêren,
ir kraft an wahsen kêren,
als hie vor in alter zît,
dô der wîse künec dâvît
über saulen was erkorn.
dô der gediende gotes zorn
und er sîn rîche verlôs
und got dâvîden erkôs
ze künege in israhêl vür in,
dô wuohs saules ungewin;
dâ wider krefteclîche
wuohs dâvîdes rîche.
saul verliesende starp,
gewinnende dâvît erwarp
ein iemer werndez rîche,
daz wert êwiclîche.
alsus geschach in beiden.
dem kristen und dem heiden
ist ze ebenmâze hie gegeben
dâvîdes unde saules leben.
dâvîde alhie gelîchet stât
der gotes degen jôsaphât;
avenieres unreht gewalt
ist ze saule hie gezalt.
ir maere hânt gelîche teil:
der unheil, der andern heil
gelîch an disem maere sint.
dô avenier sach, daz sîn kint
rehte lebete unde er niht,
er begunde die geschiht
merken in sînem muote,
daz jôsaphât an guote
mit êren rîchte und mit habe
und im gie zallen zîten abe:
diz dûhtin vil bezeichenlich.
dâ bî bedâhter rehte sich,
wie nachor mit wârheit
die heiden hâte überseit
und sîn meister thêodas
in aller sîner künste was
âne wer gar überkomen
und den touf hâte an sich genomen,
an den er was mit rehte brâht.
ouch wart des von im gedâht,
waz im ofte was geseit
gewaeres von der kristenheit.
dar zuo von herzen ofte tet
jôsaphât sîn gebet
über sînes vater leben,
daz im got geruochte geben
ein herze, daz in lêrte
daz er sich zim bekêrte:
diz gebet erhôrte got.
durch sîner dêmuot grôz gebot
sant er mit vreuden schiere
dem künege aveniere
ze lêre in sîne sinne
des heilegen geistes minne.
nâch der vil süezen lêre
rou in sîn sünde sêre
und wolt ir gerne komen wider.
er saz mit sînem râte nider,
mit triuwen suochter an sie rât,
wie er sîne missetât
und sîne grôzen schulde
gebuozte gotes hulde.
des wâren dâ genuoge vrô,
wan ez sich dicke vüeget sô,
daz ein man vil ungerne tuot,
daz in daz muoz dunken guot,
ob ez sîns herren muotwille ist.
sus was dâ maneger, der an krist
gelouben heinlîche jach
und ez doch überlût versprach
ze liebe dem herren sîn.
dô des heilegen geistes schîn
sô sêre in sînem herzen bran,
im gerieten sîne man,
daz er im jôsaphâten,
sîn kint, hieze râten,
wie er ze gotes hulden
kaeme nâch sînen schulden.
dô der ander morgen schein,
dô wart der künic des enein,
daz er sînes herzen nôt
mit brieven jôsaphâte enbôt.
einen brief schreip er im dort,
dar an stuonden disiu wort:
< gesuntheit, saelde und allez guot,
gelücke, vreude rîchen muot
enbiutet dir, ders wünschen muoz,
und dar zuo väterlîchen gruoz
avenier, der vater dîn.
herzelieber sun mîn,
jôsaphât, erweltez kint,
mîn trôst vür alle, die nû sint,
mîn lîp, mîn liep, mîn saelden wân
der hoehsten saelde, der ich hân,
die ich ze herzen nâhest trage,
merke, waz der brief dir sage!
mich hânt gedanke manicvalt
sô genomen in ir gewalt,
daz ich beswaeret sêre bin.
mîn schulde hât mir mînen sin
und mînen muot betrüebet sô,
daz ich von herzen bin unvrô.
sun, ich hân daz wol gesehen,
als ich muoz von wârheit jehen,
daz unser dinc zergänclich ist,
und swer gelouben hât an krist,
daz dem sîn saelde vür sich gât,
als got an uns bewaeret hât.
dû waer ie saelden rîche;
sô lebte ich kumberlîche,
sît daz ich sündehafter man
die kristenheit hazzen began.
swie vil mir rehter wârheit
von gote wart mit dir geseit,
sô was mîn herze doch bedaht
mit sô nebelvinsterr naht
daz mir daz tumbe herze mîn
laschte den gewaeren schîn
der gotes lêre alsô gar,
daz ich des nam deheine war,
daz ich mit maniger wârheit sach,
unde im rehter volge jach.
des ich in mînem muote
von gote ie jach ze guote,
daz widerrette ich überlût,
darumbe ich, vil liebez trût,
dicke hân beswaeret dich.
ich vleiz des ie leider mich,
daz ich dir zornic herze truoc
und manegen reinen kristen sluoc,
die mit gewârhaften siten
gên mir mit gotes helfe striten.
owê der sünden unde owê!
mîner schulde ist leider mê
danne ich nû gesprechen müge.
owê mir armen! wê der trüge!
owê der valscheit, mit der ich
alsô dicke wolte dich
an daz unreht verkêren
und valschez leben lêren!
sun, daz lâ dich erbarmen
und wünsche mir vil armen
nû genâden umbe krist.
mîn herze ein kleine erliuhtet ist;
des ist doch alsô kleine,
daz ich ez nenne seine.
in der naht der sünden mîn
hât sich ein kleiner liehtes schîn
in mînem muote enbrennet,
von des glaste erkennet
daz herze mîn die missetât,
die mîn lîp gevrumet hât.
nû wil ein ander wolken dic
des kleinen liehtes kleinen blic
erleschen unde betouben
und mich des liehtes rouben:
daz ist der zwîvellîche wân,
daz ich sô vil gesündet hân,
daz mîn wân des zwîvel hât,
daz mîn iemer werde rât,
und kriste, dem vil süezen,
iemer müge gebüezen
nâch sîner grôzen hulde
die vil unrehten schulde.
daz ich im aptrünnic ie
was und im genâhte nie,
daz riuwe got; ez riuwet mich.
sun, dû solt niht sûmen dich,
dû helfes mir die lêre geben,
wie ich sül redelîche leben
nâch mînen grôzen sünden.
daz soltû mir künden
mit dîner lêre, sô tuon ich
swaz dû rehtes lêrest mich.>
dô jôsaphât den brief gelas,
sîn herze in grôzen vreuden was.
den süezen tugende rîchen man
vil sêre wundern began,
ob er die rede und die vergiht
solde glouben oder niht:
vil zwîvellîche was er vrô.
von den sînen gienc er dô,
als er des vater schrift ersach,
an sîn heinlîch gemach
in sîne sunder slâfstat.
dâ was ein bilde in gesat,
nâch gote in kriuzewîs gesniten,
vor dem er mit gewenten siten
dicke herzeclîche tet
an got nâch helfe sîn gebet.
als er vür daz bilde gie,
dô viel er nider an sîniu knie.
dô bôt die hende und ouch den muot
ze gote dirre herre guot:
sîner güete lobetin dô
sîn munt, sîn herze. er sprach alsô:
< lop, genâde und êre
sî dir nû und ie mêre
ân ende, in wernder staetekeit
von dîner hantgetât geseit,
durch dîne güete, reiner krist,
wan an dir der urhap ist
der saelde dîner hantgetât,
der leben in dîner krefte stât.
nû wis gelobet, süezer got,
daz dîner güete grôz gebot
daz steinherte gemüete
daz dir ie mit ungüete
gevremedet und versteinet was,
daz der verhertet adamas
in mînes vater herzen ist
dir vorgeweichet, süezer krist.
herre got, des sî dîn name,
der guote, reine, lobesame
ân ende gêret iemer mêr.
krist, aller künege ein keiser hêr,
aller güete ein lebender brunne,
aller witze ein liehter sunne,
aller sorge ein vreudenzil,
rehter tugende ein wünnespil,
ein schepher aller der geschaft,
dîner sterke lebendiu kraft
mac von aller wîsheit
niemer werden volleseit.
daz hât diu genâde dîn
erzeiget an dem vater mîn,
der ie dîn vîent alle zît
was und dîn staeter widerstrît.
daz dich der güete wil gezemen,
daz dû den wilt ze kinde nemen,
des müeze diu genâde dîn
gelobet iemer mêre sîn.
dirre grôzen milte rât
einen trôst gegeben hât
und eine gnâde grôz an dir
dînem armen knehte mir.
diz zeiget, daz dû, herre krist,
aller güete ein krône bist:
diz ist ein trôst der kristenheit.
niemannes sünde ist alsô breit,
swenne er dîner hulde gert
mit buoze, er werde ir sâ gewert.
der genâden man ich dich,
daz dû geruochest hoeren mich
und mîn alsô gedenkest,
daz dû mîn herze trenkest
von der wahsenden wîsheit,
die dîner wîsheit brunne treit.
lâ mir in daz herze mîn
ein vil kleinez rinnelîn,
von dînem brunnen rinnen.
daz ich mit wîsen sinnen
mînen vater lêre,
wie er sich dir bekêre
und dîn gebot im werde kunt
durch mînen sinnenkranken munt,
daz er erkenne dîn gebot
und daz er dich, vil milter got,
mit des gelouben gebote
rehte erkenne zeinem gote.
gib alsolhe lêre mir,
daz ich in ze knehte dir
gewinne nâch den hulden dîn.
geruoche dînes liehtes schîn
in sînem muote enbrennen,
daz er wol künne erkennen,
daz dû got, vil gewaere krist,
ân urhap unde ân ende bist.>
dô diz gebet alsus geschach:
dem jungen jôsaphâte jach
diu gotlîche wîsheit,
sîn bete waere im unverseit,
mit dêmuot würd er gewert,
des er haete an got gegert:
des lobter vlîzeclîche got
mit reinem herzen, âne spot.
von dannen gienc er sâ zehant
hin dâ er sîn gesinde vant
mit rîcher küneclîcher schar.
die hiez er sich bereiten gar
mit im in sînes vater lant.
die bereiten sich zehant
mit im in hôher rîcheit.
der künic jôsaphât dô reit,
mit wirde vil vroelîche
in avenieres rîche.
dô er gevriesch daz er kam,
sîne vürsten er ouch nam;
mit grôzem gesinde
reit er gên sînem kinde
verre ûf sîne zuovart.
vil wênec wart aldâ gespart
ir vriuntschaft mit gruoze.
sie liezen sich ze vuoze;
sie hielsen unde kusten sich.
ir gruoz was vil vriuntlich.
den sie einander tâten dâ.
sie sâzen ûf, sie riten sâ
mit einander beide
mit vreuden, niht mit leide.
dô wart aldâ vil schiere
von dem künege aveniere
gemachet ein grôz hôhgezît.
von sînem künicrîche wît
wâren mit vil grôzer schar
die groesten herren komen dar.
nû nam der künic jôsaphât
sînen vater an einen rât
und seit im des gelouben wort
von anegenge unz an daz ort.
im wart von im vorgeseit
diu gotlîche menscheit,
der touf, daz leben und der tôt,
in den sich got durch uns bôt,
diu urstende und diu ûfvart,
und swaz an kriste ervüllet wart
nâch den reinen wîssagen,
dô got in der gnâden tagen
was mensch unde got genant.
er tet im die kunft erkant,
sô got zer jungesten zît
al dirre welte ein ende gît.
got sante jôsaphâte
den sâmen, den er sâte.
des küneges reinez herze bar
hundertvalten wuocher gar.
dem künege süeze und süezer was,
swaz jôsaphât im vorgelas
der kristenlîchen lêre.
ie mêre und aber mêre
wuohs in dem herzen sîn
des gelouben liehter schîn.
des sunes rede bezzert in.
ieglîch wort ergreif sîn sin;
daz wart mit der gotes kraft
an im alsô berhaft,
daz ez mit bernder genuht
gap zehenvaltes wuochers vruht.
diu lêre im in sîn herze kam.
im wart ûf sînen wilden stam
ein lebendez obez gezwîet,
des süeze in hât gevrîet
von der helle rôste wol.
diu zwî wurden schiere vol
in sînem gemüete
der vruht nâch süezer blüete.
jôsaphât, der reine man,
vienc ie die lêre wider an
und saget im sî sô dicke vor,
daz er sînes herzen tor
gên gotlîcher lêre ûfslôz.
der gotes gnâden tou begôz
sîne versteinden sinne.
des heilegen geistes minne
des tiuvels kraft an im vertreip.
diu gotes minne an im beleip.
im tet von zwîvel gar erlôst
von gote sînes kindes trôst.
in trôste sîn vil süezer rât,
daz got sîner missetât
niemer mêr gewüege,
swenn er den willen trüege.
daz er sî wolde büezen
mit buoze in werken süezen.
dô sich der künec bekêrte,
als jôsaphât in lêrte,
sîner sünden er verjach.
nâch buoze man in reinen sach
gên dem gotes toufe sich:
sîn buoze was vil gotlich.
er lebete gar nâch gotes gebote
und hiez sîne valschen gote
brechen, den er was sô holt,
und hiez daz silber und daz golt,
daz mit vil grôzer rîcheit
an die gote was geleit,
allez armen liuten geben
umb daz êwiclîche leben
in dem himelrîche.
er brediete offenlîche,
daz got mit einer drîvalt
waer ein got und ein gewalt:
drîvalt und ouch reine,
mit drin namen eine,
die gotes drîvalt einekeit,
der drîer namen underscheit,
mit namen underscheiden sus:
pater, filius et spiritus sanctus,
diu eine drîvalt einic ist
ein got, daz ist der reine krist
der sunder hât in sîner hant
swaz ie geschephede wart genant:
die geschuof gar sîn gebot,
ez wart nie dehein ander got.
dise lêre lêrte sus
der gotes kathecuminus
und vestent ez vil sêre
nâch kristenlîcher lêre.
sus wart er ungelouben vrî,
reht geloube was im bî.
diu gotlîche vorhte
in sînem herzen worhte
vil reinez leben, des er phlac.
dô sînes toufes zil gelac,
dô kam mit dêmüetlîchen siten
der erzebischof dar geriten,
von dem ich ê hân geseit.
den gruozten wol mit werdekeit
die beide künege rîche
und enphiengen in güetlîche.
der gotes bredigaere,
der rehte, vil gewaere,
nâch dem gelouben dô began
vrâgen den vil reinen man
den er dâ toufen solde,
ob er gelouben wolde
krist wesende einen got?
des gelouben gebot
jach im, daz er geloubte wol,
swaz kristen man gelouben sol.
als er des gelouben jach,
sîn reht im aldâ geschach:
er kathezizierte in sâ
mit gotlîchem segene aldâ.
dar nâch vil schiere toufter in
vil werde in gotes namen drin.
dô wart ze vater im erkorn
sîn kint, daz von im was geborn;
dâ wart sîn vater und sîn tote
sîn vleischlîch kint in gote.
swaz bî dem künege vürsten dâ
was, die touften sich dô sâ.
dar nâch diu stat und al daz lant
wart geloubic sâ zehant,
in gotes namen getoufet
und gote wider gekoufet.
junge, alte, arme und rîche
touften sich algelîche
durch des hoehsten gotes gebot.
sie brâchen alle ir apgot
und wîhten münster, kirchen gote
nâch der kristenheit gebote.
swaz ir deheinem arges war,
des wart er ledic unde bar,
als im wart der touf gegeben.
dô wuohs daz kristenlîche leben
über al daz künicrîche
mit gote kristenlîche.
sus wuohs mit geistlîcher zuht,
dâ ê der sünden was genuht,
ein übergenuht an güete
in des küniges gemüete:
sîn leben wart vil geistlich,
von stunt ze stunt bezzert er sich.
avenier, der gotes degen,
begunde solher riuwe phlegen
umb sîne êrren missetât,
daz er sînes herzen rât
gar von dirre welte brach.
sîn herze weltlîch guot versprach:
er gap eigenlîche
beidiu sîniu rîche
jôsaphâte und al sîn guot.
er kêrte sô gar sînen muot
an got, daz er niht anders tet,
wan daz er sprach sîn gebet.
vil grôze riuwe er scheinde,
vil gerne er ie vereinde
von sînem gesinde
bî sînem lieben kinde
und tet im sîne riuwe kunt
mit sîner begihte alle stunt.
er was in solher riuwe
ze allen zîten niuwe,
von sîner schulde in solher schame,
daz der gewaere gotes name
alsô grôz im wart erkant,
daz er nie wart von im genant
volleclich durch sînen munt.
swenne im wart sîn sünde kunt,
er begunde sich sô schamen,
daz er von sünden gotes namen
selten ie genande.
sô daz sîn sun erkande,
sô gap er im troestlîchen wân
und hiez in allen zwîvel lân.
alsus lebeter, daz ist wâr,
gedulteclîche vier jâr:
sîn ende nâhen dô began.
der reine gotes dienstman
begunde siechen sêre,
sô sêre, daz er mêre
niht getrûwete genesen
unde in dirre welte wesen.
dô dâhter aber an sîn klagen,
daz er in sînen jungen tagen
alsô grôzer sünden phlac.
in solhen vorhten er gelac,
daz er von herzeriuwen grôz
mit sînen ougen sich begôz.
im tet vil wirs, danne der tôt,
diu vorhte, die sîn sünde im bôt.
mit vorhten er niht anders schrê
wan:< owê mir armen! wê
mîner grôzen missetât!
lât si mîn iemer werden rât?
owê mir armen! waz ich hân
gên mînem gote missetân!>
jôsaphât, der reine, sprach,
als er des vater zwîvel sach:
< vater mîn, gehabe dich wol!
nieman an gote zwîveln sol.
nieman sô grôze missetât
in dirre welte hie begât,
der gotes genâden sî doch mêr.
dû solt dîn zwîvellîchez sêr
ûz dînem herzen gar verjagen,
an gotes gnâden niht verzagen.
niemen vollesagen mac
unz an den jungesten tac
die gotes gnâde. ir ist sô vil:
mit zal ist vunden schiere ein zil
des mannes sünden, die er tuot.
unser herre ist alsô guot,
als er den man in riuwen siht,
daz er in lât verderben niht.
dô got an dem kriuze hienc
und durch uns den tôt enphienc
in sterbender swaere,
den sterbenden schâchaere
enphienc er durch die triuwe,
daz er mit grôzer riuwe
was an des sûren tôdes stat.
als er got genâden bat,
dô was er sâ behalten.
got wil nieman verschalten:
der an in genâden gert,
benamen, der ist sâ gewert,
swes er mit rehte gert an in.
diz solt dû nemen in dînen sin
und lâ den grôzen zwîvel sîn.
got tuot dir sîne güete schîn,
sît dû den gelouben treist
und riuwe dîner schulde weist.
der touf dich gote gereinet hât;
gotes geloube dich niht lât
in dînen sünden sterben.
dir sol dîn riuwe erwerben
der êweclîchen vreuden rât,
diu vreude ân ende iemer hât.>
sus hât in des kindes trôst
von sînem zwîvel schiere erlôst.
gên sînem sune kêrter dô,
weinende sprach er alsô:
< herzelieber sun mîn,
got müeze iemer gêret sîn
des süezen tages und der stunt,
dô dû der welte würde kunt
und ouch ze trôste mir geborn.
dû bist mir niht ze kinde erkorn,
dû bist des hoehsten keisers kint,
des aller himele tugende sint,
als dîn heilic leben giht.
ich waer dîn wert ze kinde niht.
wol mich, sun, daz ich dîn ie
ze kinde künde gevie.
wie sol ich gedanken dir,
daz alsô vil genâde an mir
dîn hôhiu güete erzeiget hât.
mir hât dîn wîslîcher rât
vür den tôt daz rehte leben
erworben unde wider gegeben.
daz ich genas, daz lêrtestû.
ich was ê tôt, ich lebe nû.
dîn lêre mir daz leben bôt,
dô ich was in sünden tôt.
dîn rât mich gote wider gewan,
dô ich abtrünnic im entran.
dû hâst mir versüenet got,
des lône er dir durch sîn gebot:
er kan und mac wol danken dir
des dû begangen hâst an mir.>
alsus nâhet im der tôt.
ze himel er die hende bôt,
als er den gotes lîchamen
enphie mit rehte in gotes namen.
er sprach:< herre vater, krist,
sît dû mîn rehter schepher bist,
so bevilhe ich den genâden dîn
die vil armen sêle mîn.
nû sende mir in dirre nôt
durch dînen heiligen tôt
alsô gnaedeclîchen trôst,
daz ich von noeten werde erlôst!>
dô nam sîn leben ein ende.
von disem ellende
vuor er gedulteclîche.
zuo dem gotes rîche
wart er mit himelvreuden grôz
brâht in abrahâmes schôz:
dâ lebet er iemer mêre.
dôt war er vil sêre
geklaget von den sînen,
die liezen jâmer schînen,
als in der jâmer gebôt
umb ir vil lieben herren tôt.
dô wart der künic angeleit
âne küniclîchiu kleit
mit einem hemede haerîn.
daz tet der liebe sun sîn
in einvaltlîcher güete
durch rehte dêmüete.
dâ was an dem selben tage
von jôsaphâte grôziu klage,
und jaemerlîch gebâren
von allen, die dâ wâren.
mit kristenlîchem rehte
wart von dem gotes knehte
mit jâmer, sunder lôsheit
der künic avenier geleit.
des küneges jâmer was sô grôz,
daz er weinende begôz
sînes lieben vater grap.
die sêle er mit gebete ergap
dem gote, der uns lôste
von der leiden helle rôste.
der edel künic rîche
sprach vil dêmüetlîche:
< herre, ich lobe dich, reiner krist,
daz dû sô genaedic bist
und alsô grôze güete hâst,
daz dû verderben niemen lâst,
der genâden gert an dich.
daz dû hâst erhoeret mich
über den lieben vater mîn,
des müeze dîn name iemer sîn
gelobet, gerüemet, gêret,
daz er von dir bekêret
zuo dînem gelouben wart
und nû ze sîner hinevart
mit solher riuwe hât sîn leben
verendet und sich dir ergeben.
krist, herre, lâz im werden schîn
die endelôsen güete dîn
und ruoche in zuo dir leiten
von der helle arbeiten
zuo dînem himelrîche,
dâ er êwiclîche
dîn reine antlütze schouwe.
mit dînem süezen touwe
geruoche im senften sîne nôt
durch den menschlîchen tôt,
den dû, herre, umb uns erlite.
sô vergiz der alten site,
der er leider manigen tac
mit sündehaftem muote phlac.
swâ sîn sünde sî geschriben
und daz buoch noch ganz beliben,
die schrift heiz alle tilgen abe,
daz im dehein buochstabe
vor dir gebe der sünde vluoch.
heiz in an der lebenden buoch
den rehten schrîber künden.
swâ er mit houbetsünden
habe gedienet dînen zorn,
herre got, daz sî verkorn.
ouch sante dir hie vor sîn swert
manegen reinen erben wert;
die ruoche im ouch mit minnen
ze vriunde gar gewinnen.
herre got, des bite ich dich.
dir ist niht unmügelich,
wan ân erbarmherze sîn.
swer suochet die genâde dîn,
daz dû den von dir verjagest
und dîne hulde im versagest
und über in niht erbarmest dich,
daz ist dir vil unmügelich:
des andern hâst dû gar gewalt.
diz ist unmügelîch gezalt
dîner gotlîchen kraft.
swâ in sîner sünden haft
beheftet habe von schulden,
dâ lâ mit dînen hulden
brechen sîner sünden bant.
herre got, nû wis gemant,
wie er dir in des tôdes nôt
mit riuweclîchem herzen bôt
an die grôzen güete dîn
sînen geist, die sêle sîn:
der ruoche ein lieht, ein ruowic leben
vor dînem antlütze geben,
daz er daz iemer sehende sî.
mach in vor allen noeten vrî;
zeig im, herre, lieber krist,
daz dîn genâde bezzer ist,
danne gên uns sî dîn reht:
des lâ geniezen dînen kneht
und heiz in ruowen iemer mêr
in dînem vride ân allez sêr.>
diz gebet mit grôzer klage
treip er gar die siben tage,
daz er von dem grabe nie
mit sînem willen vuoz gegie.
der jâmer, daz gebet in twanc,
daz er az wênec oder tranc
und beidiu naht unde tac
selten senfter ruowe phlac:
im was niht wan gebetes gâch.
über ahte tage dar nâch,
dô der sibende ergangen was,
dô gie er ûf den palas:
die armen er besande
von allem sînen lande;
den teilter rîlîche dort
sînes vater grôzen hort,
der lange was behalten dar
von sînen altvordern gar.
er lie deheinen âne guot
von im gân mit armuot.
swâ er die edeln armen sach,
den buozter gerne ir ungemach
rîlîche mit sîner habe.
sus nam er im selben abe
die weltlîchen bürde,
swenn er dringende würde
dort durch daz enge tor
daz si in behabete iht dâ vor.
swaz man iender überz lant
armer dürftigen vant,
die machet er wirdeclîche
nâch ir wirde rîche.
nû diz geschehen was alsô,
einen hof gebôt er dô,
daz beidiu rîche und arme gar
von sînem lande kaemen dar.
als er sînem vater hie
den drîzigesten tac begie
mit gehügede, daz er starp
und an dem lîbe verdarp,
als ir habet von mir vernomen,
dô wâren die lantherren komen
mit vil grôzer werdekeit,
als uns daz maere hât geseit,
als ez dem hove wol gezam.
der künec an sich die vürsten nam
und gie mit grôzen witzen
an daz gestüele sitzen,
als er gerihtes wolde phlegen.
mit witzen sprach der gotes degen:
< vernemt, ir herren, hoeret mich,
sehet, wie gar trügelich
dirre welte lôn gestât!
wie jaemerlîche si zergât,
wie kurzlich ir werdekeit
wirt an dem ende hin geleit,
daz ist leider worden schîn
an dem lieben vater mîn,
dem künege aveniere.
seht, wie rehte schiere
sîn lîp, sîn kraft, sîn leben, sîn muot
ein ende hât und ouch sîn guot!
seht, wie schiere ein bote kam,
der im al sîn êre nam
und al die rîcheit, der er phlac!
seht, wie jaemerlîche er lac!
merket, swie rîch er was ie,
daz in der tôt doch niht erlie,
er müese im werden undertân!
diz mohte niemen understân:
guot, noch lîp, noch mâc, noch man,
swaz er des alles ie gewan,
daz was im gar an helfe ein wint,
und ich, sîn vil liebez kint,
mohtin dâ vor niht bewarn,
er müese an daz gerihte varn
und müeze rede aldort ergeben,
wie in gewîset hât sîn leben,
weder wirs, wol oder baz.
im was unser helfe laz;
seht, wir muosten hie bestân,
er mohte niemen mit im hân,
der mit helfe dekein wort
gesprechen müge vür in dort:
wan sô vil, swaz er guotes hie
mit almuosen ie begie,
daz vindet er dort, anders niht.
diu vorhtlîche zuoversiht
ist uns allen vürgeleit.
kunst, geburt noch rîcheit
mac uns dâ vor niht bewarn,
wir müezen alle hinnan varn,
dâ uns wirt der lôn benant,
der von uns wirt hin vürgesant.
nû hoerent alle, die hie sîn,
mâge und man, die vriunde mîn,
daz gotes heilic erbe grôz,
durch die er sîn bluot vergôz,
die kristes tôt erloeset hât
von süntlîcher missetât,
ich darf iu des hie niht sagen,
wie ich hân in mînen tagen
her gelebet an dise stunt:
mîn leben ist iu allen kunt.
ir wizzent daz wol, sît der vrist
daz ich geloubic wart an krist,
daz ich selten ie den muot
kêrte an dirre welte guot,
wan ez sô leitlîche zergât.
nû was ie mînes herzen rât,
daz ich der welte lieze ir trüge
und mich ze gote von ir züge:
des irte mich mîn vater dô.
sît vuogte ez unser herre alsô,
daz in mîn lêre lêrte,
daz er an got sich kêrte
mit gelouben und mit muote.
ouch vuogte got der guote,
daz iu sîn lêre wart erkant
und ir sît sîniu kint genant;
des lêre sult ir staete hân
und niender von dem wege gân
ûz gotes gelouben. minnet got!
als ir erkennet sîn gebot,
dar nâch lebet und anders niht,
wan als iu gotes lêre giht,
daz ir sîn wirdic müget sîn:
daz râte ich ûf die sêle mîn.
ez nâhet nû, daz wizzet ir wol,
daz ich den antheiz leisten sol,
den ich gote hân getân.
ich wil weltlîche wünne lân
und wil gehaben mich an got.
swar mich wîset sîn gebot
dâ wil ich mînes herzen sin
nâch sîner lêre kêren hin,
dâ ich im iemer büezen wil
unz an mînes lîbes zil
mîne schulde, swâ ich hân
gên sînen hulden missetân.
nû müget ir niht alsô genesen,
daz ir sult âne herren wesen:
ein künic muoz iu wol gezemen,
den ir ze rihter müezet nemen,
der des rîches krône trage.
nû seht, wer iu dar zuo behage,
und nemt den, sît im undertân
mit staete, sunder valschen wân.
leistet gerne sîn gebot,
daz minnet krist, des vrides got.
swenn ir mit vride gerne sît,
sô wont iu bî des vrides zît.
iu machet vride êr unde guot:
ob ir sîn reht mit rehte tuot,
sô werdent ir des vrides vrô.>
die herren sprâchen alle dô
mit rehten triuwen, sunder spot:
< herre, niene welle got,
daz wir dich verliesen
und iemer uns erkiesen
deheinen herren, wan dîn.
dû solt die rede lâzen sîn,
daz dû vür dich deheinen gebest
ze herren uns, biz daz dû lebest.>
diz versprâchen sie sô gar,
daz er wart an in gewar,
daz ez der vil werden diet
sunder valsch ir triuwe riet.
er sprach:< nû lât die rede stân,
ich wil mîn rîche selbe hân.>
hie mite entsageter sînen muot.
der edele süeze herre guot,
jôsaphât, der saelden barn,
gap in urloup und lie sie varn
wider ze herbergen dan:
vil sêre er trûren dô began.
dô kom bârachîas,
der ie der kristen kemphe was,
als ich tet hie vor bekant.
den hâte an sich aldar besant
der edel künic jôsaphât.
er gie an einen sunderrât
mit disem vürsten rîche,
besunder, vil heinlîche.
vil güetlîche sprach er zim:
< bârachîâ, vriunt, vernim
ein teil nâch mînes herzen gir
des ich alhie wil sagen dir.
dû weist wol, wie mîn dinc nû stât,
daz des mîn herze willen hât,
daz ich niemer mêre
gewinne weltlîch êre
noch zergenclîchez guot:
dar ûf stêt vil gar mîn muot.
nû behaget mir niemen baz
( vür wâr soltû gelouben daz)
in disem rîche, danne dû.
durch daz wil ich dir bieten nû,
tugende rîcher wîgant,
des landes krône und ouch daz lant,
und bite dich des, daz duz nemest,
sît dû der krône wol gezemest
vür al die vürsten, die hie sint,
wan dû waere ie gotes kint,
dô niemen hie geloubic was.>
dô sprach bârachîas:
< owê, herre, süezer man,
wan gedenkestû dar an,
daz unsers herren kristes rât
mit lêre daz geboten hât,
daz man den naehsten minne
mit herzenlîchem sinne,
nû bin ich ein der naehste dîn,
nû vârestû der saelden mîn.
ob dich daz weltlîche guot
dunket üppic, als ez tuot,
wil dû danne gunnen mir,
des dû wilt selbe erbunnen dir,
sô bist dû mir niht alsô holt,
sô dû nâch gotes lêre solt.
swaz dû dran vürhtest, daz vürhtich.
vürhtestû des, daz ez dich
verliese, sô wirdich verlorn,
wirt ez mir vür dich erkorn:
sô wildû verliesen mich.
wildû dâ von behüeten dich,
sô ganst dû wider gote mir,
des dû niht wilt gunnen dir.>
dô sweic der künic jôsaphât.
er gie von dan und lie den rât.
dô des tages lieht verswein
und diu kunft der naht erschein.
dô hiez sich lâzen eine
jôsaphât der reine:
in sîner kamern er beleip.
mit sîn selbes hant er schreip
einen brief den vürsten dort.
dar an zeigten sîniu wort
den vürsten sînes herzen muot.
er schreip in liep und allez guot,
sînen gruoz und sînen segen
und bat got ir heiles phlegen,
und wie sie leben solden,
ob sie got minnen wolden:
er schreip in gotes lêre gar.
dar nâch schreip er der werden schar,
daz niemen solde ir krône phlegen
wan barachîas, der gotes degen,
der ie von herzen minte got:
diz was sîn bete und sîn gebot.
alsus liez er den brief aldâ;
von dannen huop er sich dô sâ
vil heinlîche ûf sîne vart,
daz es nieman innen wart,
ê daz diu naht ein ende nam
und der ander morgen kam.
dô man den brief und in niht vant.
dô wart ez in êrst erkant.
nû wart von der vürsten schar
ein michel zuolouf aldar.
dô man des brieves schrift gelas
und swaz dar an geschriben was,
dô wart daz geschrei vil grôz.
der jâmerregen in begôz
in klagenden riuwen ir gewant.
sie gebuten sâ zehant
arme und rîche gâhen,
ir lieben herren vâhen
und suochen den gewaeren man.
sie randen hin, her unde dan:
die strâze wurden gar versat.
nû was er komen an eine stat,
dâ er ûf sîner venje lac
und sprach sînen mitten tac,
daz wir heizen sexte zît,
sô der stunde zît gelît,
daz got krist, der süeze,
durch hende und ouch durch vüeze
genagelet an daz kriuze wart.
die zît begie ûf sîner vart
jôsaphât, der herre grôz,
bî einem wazzer, daz dâ vlôz:
dâ wart er an den stunden
von den sînen vunden.
dô sach er, daz sie grôze klage
gehabet hâten an dem tage;
daz sie vunden in alsô,
des wâren sie von herzen vrô.
sie verwizzen im die vluht.
der herre sprach mit schoener zuht,
als im sîn werdiu zuht gebôt:
< ir arbeitet iuch âne nôt,
wan ich benamen unz ûf mîn zil
niemer mêre werden wil
alhie künic überz lant.>
sie vuorten in von dan zehant
ûf sînen palas wider dan.
dô swuor der gotes dienestman,
daz er niemer mêre
wolde weltlîch êre
weltlîche gewinnen,
noch weltlîch guot geminnen.
er sprach:< vil lieben vriunt, ich hân
daz mîne gar gên iu getân:
ir sît nû gote bekêret;
ouch hân ich iuch gelêret
die reinen gotes kristenheit.
ich was iu zaller zît bereit,
swes iu ze lêre tohte,
mit lêre, swâ ich mohte,
sît daz ich gote kristen wart.
nû wil ich leisten eine vart,
der mir ie was ze muote.
dô ich von iuwer huote
wolte entrinnen unde entran,
dô wîste ich iuch an einen man,
der gote und iu gezimt vil wol,
an den ich wil und râten sol.>
dô nam er, den ich hân genant,
bârachîam bî der hant.
er sprach:< diz ist der, den mîn rât
ze herren iu gegeben hât:
der sî iuwer künec vür mich.>
der hêrschaft werte er sêre sich;
doch wart im an der selben stat
ûf sîn houbet dâ gesat
gewalteclîche schône
des künicrîches krône
und ouch des rîches gewant
im angeleit. an sîne hant
stakt im der liebe herre sîn
des künicrîches vingerlîn.
als er ze künege was erkorn,
dô wart im hulde sâ gesworn:
die herren vür in giengen,
ir lêhen sie enphiengen,
ir lant, ir landes geniez,
alsô jôsaphât sie hiez
und sie wîste sîn rât.
der gotes erwelte jôsaphât
viel ûf sîniu blôzen knie
vor den werden vürsten hie:
in guoter andâht er daz tet.
er sprach ze gote sîn gebet
über des niuwen küneges leben,
daz im got heil geruochte geben.
dar nâch bat er über al die schar,
daz sî got behuote gar
von houbethaften schulden
in sînen süezen hulden.
dô diz gebet alsus geschach,
mit zühten er zem künege sprach:
< bruoder, ich wil râten dir:
daz ich dir sage, des volge mir.
got hât gewalteclîche
dich über al diz rîche
zeinem rihtaere gegeben:
nû solt dû rihten wol dîn leben.
dû minnetest got, ê daz dû
gewunnest dise rîcheit nû,
dem solt dû gerner dienen baz
dan ê. lâ sagen dir durch waz.
er hât bevolhen dir sô vil,
daz er an dir versuochen wil,
wie dû phlegest sîner diet.
von al den vürsten er ûzschiet
zuo des rîches krône dich.
nû ist daz vil unzwîvellich,
daz sich der site niht verbirt,
sweme vil bevolhen wirt,
man eische deste mê von im.
lieber bruoder, daz vernim
und sich, daz dû dich sô bewarst,
sô dû ze rechenunge varst
vür dînen schephaere,
daz danne sî gewaere
gên im diu widerrede dîn.
dû solt reht unde gewaere sîn,
guoten vride machen
mit vridelîchen sachen.
dir sî daz vür wâr geseit:
daz urhap aller wîsheit
ist diu grôze vorhte gotes.
dû solt mit vorhte sînes gebotes
zallen zîten hüeten,
dich selben dêmüeten
gote in dînem muote gar:
nim der gotes lêre war!
vür alliu dinc minne got;
erbarmherze ist sîn gebot.
sich, daz dir der welte guot
iht ze hôhe trage den muot,
daz dû ze nider vallest iht:
hôhvart ist vor gote enwiht,
wan lucifer durch hôhvart
von himele hin geworfen wart.
« saelic die dêmüeten sint, »
sprichet krist, daz gotes kint.
wis milte dînes guotes
und dêmüete des muotes.
dû solt dich lân erbarmen
die nôtdürftigen armen.
dîn gerihte sol gelîchen
die armen zuo den rîchen;
ez sol gelîch sîn unde reht,
ebengelîch, in allen sleht.
wis worte und werke kiusche,
mit wârheit âne getiusche!
wis ein widersatz der lüge,
dû solt hazzen valsche trüge!
lâ dir sîn unmaere
spot und die lügenaere;
lâ die bî dem râte dîn,
die reht unde gewaere sîn.
wis staete, an triuwen veste.
noch râte ich dir daz beste,
daz dû der sêle hüetest wol,
wan diu vil leider dulten sol,
swaz der lîp alhie getuot,
ez sî übel oder guot.
diz solt dû gote staete lân,
als ich dir gerâten hân:
daz ist dir guot und saeleclich.
dû solt gerne vlîzen dich
daz dû sô redelîche lebest,
daz dû den guot bilde gebest,
die dir got bevolhen hât,
wan al ir wîsunge an dir stât.>
zuo den vürsten kêrter sich.
er sprach:< ir herren, ouch wil ich
iuch in gotes namen biten,
daz ir mit zühteclîchen siten
gestêt iuwerm künige bî.
swaz in alhie gelêret sî,
daz helfet vollebringen wol,
wan er mit iuwer helfe sol
iuch rihten unde lêren.
ir sult mit triuwen êren
got und in mit staetekeit,
als ich hân iu und im geseit.>
sus viel er ûf sîniu knie
vor den vürsten aber hie
unde bat weinende got
an in staeten diz gebot.
dô weinden herzeclîche
arme und dar zuo rîche,
als ie die getriuwen tuont.
von dem gebete er ûfstuont.
er sprach zuo der getriuwen schar:
< nû nâhet balde, daz ich var.
nû bitent got, daz er sich
geruoche erbarmen über mich
und sîn gebot mir mache kunt.>
den künic kuster an den munt,
dar nâch die getriuwen diet.
mit urloub er dô dannen schiet.
dô volgeten im sîne man
lange weinende dan.
sie sprâchen:< owê, herre krist!
daz dîner güete sô vil ist
und dû nû disem rîche
sus ungenaedeclîche
tuost an dem besten man,
den lant ze herren ie gewan.
owê des ängestlîchen schaden,
der uns nû hât überladen
an unsers lieben herren vlust!>
in lange sehen was ir gelust:
dô was im von in vil gâch.
sie giengen weinende nâch,
biz daz in und ouch die diet
diu naht von einander schiet.
alsus gie vroelîche
von sînem künicrîche
der edele, reine, guote
mit so vroelîchem muote.
sô sêre er vreuen sich began,
rehte als ob ein vremeder man
in herzeclîcher swaere
in dem ellende waere
und daz ellende wolde lân
und vroelîche wider gân
zuo sînen vriunden in sîn lant.
noch wart im groezer vreude erkant:
ez dûhte sînes herzen muot
ein ellende der welte guot;
dem hâte er sich durch daz benomen,
daz er zer heimuot möhte komen,
die got alsô gestaetet hât,
daz si niemer mêr zergât.
owê, wer volget disem man?
owê, wer gêt mit ime dan?
wer wil sîn ellende lân,
mit im hein ze lande gân,
ich meine, ûz sînen schulden
zuo den gotes hulden?
owê, wie eine er dannen gât!
wie eine er diz ellende lât!
wie eine er gert der heimuot!
owê, wie einic er daz tuot!
owê wie sîne vürsten stânt,
daz sie mit im von dan niht gânt!
hie meine ich dirre welte kint,
die mit houbetsünden sint
und in den sô stille stânt
und niht mit dem rehten gânt
ûz den sünden in daz leben,
dem niemer ende wirt gegeben.
owê, war gât nû jôsaphât,
daz manec sîn vriunt sô stille stât,
der ich leider einer bin,
der stille stât und lât in hin
in die rehten heimuot gân?
nû wil ich in niht eine lân
und wil im geselleschaft
mit geselleclîcher kraft
leisten mit dem maere.
der reine unwandelbaere
gie noch mit grôzer rîcheit
küneclîche wol bekleit
mit rîchen kleiden guot genuoc.
an sîner blôzen hût er truoc
daz herte hemede haerîn,
daz im ê gap der meister sîn.
der herberge nôt in treip,
daz er die selben naht beleip
bî einem alten armen man;
der hâte von den liuten dan
an einer einoede eine
gemachet ein hûs kleine.
bî dem was er dâ die naht,
der ie nâch gotes rîche vaht.
dô er des morgens dannen gie,
sîniu kleider er dâ lie
durch got dem armen alten,
der in hâte behalten.
dô diz almuosen gap sîn hant,
ez wart daz leste guot genant,
des er von dirre welte habe
sich tet durch gotes willen abe:
sus truoc er dan sîn haerîn kleit,
von dem ich ê hân geseit.
er truoc vür des hungers nôt
weder kaese, vleisch noch brôt,
noch diz noch daz, wan gotes segen.
der ellenthafte gotes degen
truoc des dürftigen gebet
und maneges armen, dem er tet
durch got mit sînem guote wol.
sîn lîp was reiner güete vol:
ze gote stuont sô gar sîn muot,
daz er als ein glüendiu gluot
begunde in gotes minnen
ie mêre und mêre brinnen.
dô durfte sînen gedanc
ûf des lebenden brunnen tranc,
des süeze niemer mê zergât;
von dem dâvît gesprochen hât,
der gotes wîssage wert:
< als der hirz der wazzer gert,
alsô gert mit rehter gir
mîn sêle, herre got, zuo dir.
ez dürstet mîne sêle gar
zuo dînem lebenden brunnen dar,
wenn ich sül komen unde sehen,
vor gote sîn antlütze spehen.>
alsus durste in gotes gebote
sîne sêle gar nâch gote,
als ouch salomônes wort
von gotes minne sprichet dort:
< zeige mir daz antlütze dîn,
ez hât sô minneclîchen schîn;
vil süeze stimme hât dîn munt:
von dîner minne bin ich wunt.>
mit werken zeiget er disiu wort,
wan er gar der welte hort
und ir vil grôzen rîcheit lie,
dô er von sînem lande gie
und von dem grôzen rîche,
und sô gar ärmeclîche
gerte an der einoede wesen
und âne dise welt genesen.
ze gote schrei er alle stunt:
< herre got, nû tuo mir kunt,
wâ ich den lieben kneht dîn
vinden sül, den meister mîn,
der dîn gebot mich lêrte
und mich zuo dir bekêrte.
herre got, gip mir den muot,
daz mich der armen welte guot
iht jâmers nâch ir twinge,
tuo mir, als ich gedinge,
und hüete mîner sinne
staete in dîner minne.
tuo mich der welte lônes vrî.
wis mir genaedeclîche bî.
sunder süntlîchen vlec
geruoche rihten mînen wec
vür dîne gesiht, herre got,
ûz dirre welte in dîn gebot.
staete daz gemüete mir,
daz ich belîbe staete an dir.>
diz was sîn staetez gebet,
daz er ie in der wüeste tet.
waz sîn spîse waere?
der guote, unwandelbaere,
jôsaphât, der gotes trût,
az niht wan wurzel unde krût.
diu wüeste was sô dürre erkant,
daz er dâ wênec wazzers vant.
den zâdel und die armekeit
er vil dêmüetlîche leit.
diz was dem nîdaere,
dem leiden tiuvel, swaere:
der herren staete in gar verdrôz,
daz diu gên gote was sô grôz
in gotlîcher minne.
er sante in sîne sinne
dicke jâmer in dem muote
nâch sînem grôzen guote.
vil ofte er im vor erschein,
als sîner junkherren ein
unde als ein sîn liebster man
und mant in dicke dar an,
daz er diz ärmeclîche leben
solde lâzen unde begeben
und aber rîlîche
naeme sîn künecrîche.
dar nâch, sô diz alsus geschach,
mit übele er in komen sach
und an in kêren manige drô
dâ wider sazter sich alsô,
daz er mit werlîcher art
niemer überwunden wart.
in manege wîs versuochter in
und sînes herzen staeten sin:
mit swerten er dik ûf in dranc
und wolte krenken den gedanc,
der herter danne ein adamas
gote an rehter staete was.
er dreute, er wolde in slahen nider,
ob er niht schiere kêrte wider.
dâ kêrte sich vil wênic an
jôsaphât, der reine man.
etswenne machete er sich
ze grôzen slangen egeslich,
die gên im kêrten manegen strît.
dar nâch in vil kurzer zît
sô machte sich des tiuvels spil
ze vorhtlîchen tieren vil,
die vil den herren muoten:
sie grinen sêre, sie luoten
mit ängestlîcher stimme
gên im in grôzem grimme.
alsus wart im ze maneger stunt
von im vil hôher vorhte kunt
mit egeslîcher vorhte site:
dâ wolter in verkêren mite.
do diz jôsaphât ersach,
daz ez umb anders niht geschach
wan durch verkêren sînen muot,
dô sprach der gotes degen guot:
< hei, dû trügehaftez wiht!
ich ahte ûf dîne trüge niht.
swie manicvalt dîn vorhte sî,
mir ist diu gotes helfe bî.
dû kêrest ân nôt dînen list
an mich, wan got bî mir ist:
mit dem versmâhe ich dîne drô.>
daz kriuze tet er vor im dô.
als im daz zeichen wart erkant,
des tiuvels spil verswein zehant.
dar nâch was er vor im bewart.
er gie vroelîche ûf sîne vart,
vil lobes gote sagende,
vil dicke alsô betagende,
daz im vil manigerhande nôt
der kumberlîche zâdel bôt.
diz werte lange manegen tac,
daz er vil grôzer arbeit phlac
und im vil manic ungemach
von allerhande nôt geschach,
die er mit maniger armekeit
von gote dêmüetlîche leit.
alsus beleip er, daz ist wâr,
in dirre wüeste zwei jâr,
daz er den gotes wîgant
barlââmen niender vant.
er leit mit grôzer armekeit
hunger, nôt und arbeit;
dâ mite got geruochte,
daz er an im versuochte,
ob er in grôzer swaere
alsô gedultic waere,
daz er mit gedultekeit
kunde weltlîch arbeit
alsô gelîden, daz er got
geminnen möhte und sîn gebot
âne murmels underswanc.
sîn staetekeit in dô betwanc,
daz er sich ie ze aller zît
bezzerte âne valschen nît.
im was ein wünne bernde leben,
swaz im arbeit wart gegeben:
die leiter wol mit willen.
er dâhte, daz diz villen
ein zartlîch zühtegunge
waer sîner vestenunge,
wan im ist sîn kint niht zart,
swer im die ruoten dicke spart
und sîne unzuht niht stillet.
got sîne erwelten villet
in vünf wîs und der welte kint.
der kestegunge vünve sint.
ein kestegunge alsus geschiht,
als uns diu schrift der wârheit giht,
dâ got wil versuochen an
gedultigen muot des man,
ob er gedultic künne wesen.
alse wir von jobe lesen,
den got unser herre
versuochte alsô verre,
daz er mit grôzem sêre
lîp, guot, kint, weltlîch êre
verlôs von gotes gebote gar,
daz er der aller wart sô bar,
daz er niht leit wan ungemach.
in aller sîner nôt er sprach,
swie kumberlich ie wart sîn leben:
< got nimt ez, der ez hât gegeben.>
dem wart von sîner güete sider
sîn guot, sîn êre zwîvalt wider.
ouch ist geschriben anderswâ,
wie got an tobîâ
sîner wunder vil begie.
sô gedultic was der ie,
daz er gar sîn gemüete
an gedulteclîche güete
und niht an anderz kêrte,
als in sîn güete lêrte:
der verlôs guot unde gesiht.
al diu geschiht want in des niht,
er waere gedultic doch in gote.
dem wart ouch sît von gotes gebote
lîp, gesiht, vreud unde guot
durch sîne grôzen dêmuot
mit wunsche wider gar gegeben
und vil gehoehet im sîn leben.
got vüeget manigem kumbers vil,
daz er in sus versuochen wil.
der ander gotes geiselslac
ouch alsô geschehen mac,
daz man unsers herren kraft
sehe und daz sîn meisterschaft
aller dinge hât gewalt
und daz sîn kraft ist manicvalt.
dô got ûf der erde hie
in menschlîchem bilde gie,
dô wart im brâht ein blinde,
der was gesîn von kinde
sô blint daz er nie niht gesach.
diz ungediende ungemach
was an im alsô geschehen,
daz man an im solde sehen,
daz got, der gewaere krist,
über elliu dinc gewaltic ist.
gotes junger in vrâgten dô:
< meister guot, wie kumt daz sô?
waz hât gesündet dirre man,
oder wâ hânt sîne vordern an
gesündet, daz er niht gesiht?>
got sprach:< er hât gesündet niht
noch sîne vordern. gotes kraft
sol an im werden sigehaft.>
den machte got, der reine krist,
gesehende an der selben vrist.
diu kestegunge ouch sus geschiht,
als diu ebenmâze giht.
diu dritte kestegunge
von gote ist ein manunge,
die tuot unser herre schîn,
daz man an dem gelouben sîn
ze allen zîten bezzer sich
mit reinen werken gotlich.
vür krist unsern herren kam
ein armer man, der was lam:
der geloubte wol an in.
ûf bezzerunge gewin
schrei er nâch sîner helfe in an.
dô vrâgete got den selben man,
ob er geloubte? er sprach:< jâ!>
dô sprach unser herre sâ:
< stânt ûf, wan dînes glouben rât
von gote dich behalten hât.>
sus villet got der liute vil,
daz er ir bezzerunge wil.
maneger hât mit arbeit
von gotes kestegunge leit.
daz kumt von sîner missetât,
die er gevrumet lange hât,
und daz er in sîner vrist
verworht von sînen sünden ist.
diz ist diu vierde gotes zuht,
dâ mite er menschlîche vruht
villet in den sünden.
nû wil ich iu künden,
wie diu vünfte ist getân,
des wir guot ebenmâze hân.
swer mit ungelouben lebet
und wider gotes willen strebet,
und zallen zîten sünden wil
âne vorhte und âne zil
und nâch des tiuvels gebote
gar verzwîvelt an gote,
der muoz von sînen schulden
die vünften geiseln dulden;
dem wirt verteilet hie sîn leben,
dem lîbe ein urhap gegeben
des tôdes, der mit lebender nôt
ist iemer ein sterbender tôt,
als an herôde geschach,
an dem got sînen anden rach
und iemer mêre rechende ist,
und als unser herre krist
verdarbte jûlîânum,
und domîcîânum,
antijochum und nêrônem,
olofernem und phâraônem,
pilâtum unde jûdam
der ieglîcher lebender nam
sînes tôdes urhap,
den im got êweclîche gap,
und als ez manigem noch ergât,
den verteilt sîn missetât.
sus suln wir urkünde hân,
swaz uns von gote wirt getân,
von welhen sachen daz geschehe.
unser iegelîcher sehe,
wâ von im weltlîch arbeit
in dirre welte sî bereit,
und merken daz dem menschen niht
âne sache hie geschiht.
sus wart der guote jôsaphât
âne gediende missetât
versuochet unde gevillet.
an im wart gestillet
weltlîchiu hôhvart.
daz er alsus versuochet wart,
daz geschach durch anders niht,
wan durch alsolhe geschiht,
daz got sîne gedultekeit
versuochte. er truoc sîn arbeit
lideclîche in gotes namen
âne weltlîchez schamen.
nâch disen zwein jâren,
dô sie verendet wâren,
er gie suochende; er vant niht.
gote klageter die geschiht
überlût und tougen.
mit weinlîchen ougen
bat er got zeigen im den man,
von dem er künde sîn gewan:
des wart er gewert vil wol.
ze jungest kam er an ein hol,
dâ was gehûset inne
durch gotlîche minne
ein armer einsidel guot,
vor allem wandel wol behuot:
der gruoztin minneclîche.
der guote saelden rîche
mit vlîze vrâgen dô began
nâch dem gotes dienstman.
dô zeigete im der guote
mit vroelîchem muote
des reinen barlââmes hol:
des wart sîn herze vreuden vol.
er lief des endes sâ zehant;
daz hol er beslozzen vant.
dâ bôzte der gotes degen;
er sprach:< gip mir dînen segen,
lieber vater, meister mîn:
ich bin der arme junger dîn.
lâ mich durch got zuo dir dar in;
dîn kint ich in gote bin.>
als in der meister hôrte alhie,
vür daz hol er balde gie:
er offent im des steines tür.
als er kam zuozim hin vür
und er in sach, er erschrac.
im hâte manic übel tac
geselwet sîne varwe gar:
er was swarz, niht wîz gevar.
sîn varwe gar verwandelt schein
als ein varlôser lein.
er was mager und harte bleich.
sîn hertiu kraft was worden weich.
daz minneclîche antlütze sîn
hât allen sînen liehten schîn
verwandelt von der arbeit,
der er alsô manige leit:
nahtes vrost, tages hitzeglast
tet in sîner schoene gast.
sîn liehtez hâr, daz ê was blanc,
was nû vervilzet unde lanc.
dô sîn meister in gesach,
sîn wort erkanter, als er sprach;
sîn lîp was im niht erkant,
wan er in gar verwandelt vant.
sîn meister güetlîch in enphie,
weinende er in umbevie.
er kustin vroelîch unde er in:
güetlîch âne valschen sin
kusten sie einander dô.
sie wâren beide einander vrô.
der meister sprach:< mîn liebez kint,
des aller himel tugende sint,
der sî gelobet des an dir,
daz dir ist erkant von mir
sîn geloube und sîn gebot.
nû gebe dir unser herre got
des iemer wernden erbes teil,
ân ende dîner sêle heil
und daz endelôse guot
durch den dêmüetlîchen muot,
daz dû der welte rîcheit
hâst durch in gar hin geleit.
nû gebe dir got ze lône
des himelrîches krône!>
< âmen!> sie beide sprâchen dâ.
< sun!> sprach dô der meister sâ,
< liebez kint, nû sage mir,
do ich nû jungest schiet von dir,
wie geschach ez umbe dich?
des soltû bewîsen mich.>
dô sprach aber jôsaphât:
< durch gotes und durch mînen rât
mîn vater wart bekêret,
daz lantliut wart gelêret
den glouben und die kristenheit.
diu apgot sint hin geleit;
getoufet hât sich gar diu diet.>
do er von im ze jungest schiet,
wie ez dô hinder im ergie,
des seiter im die wârheit hie.
des lobten sie dô beide krist,
der aller dinge suoner ist,
mit weinenden ougen
in ir gebete tougen.
ietweder herzeclîche tet
unz an den âbent sîn gebet.
dô sprâchen sie daz gotes amt,
die vesper gotlîche samt.
dô giengen sie ze tische:
vleisches unde vische
und kleiner ezzen was dâ niht,
als uns diu wârheit von in giht.
sie âzen niht wan gartenkrût,
daz barlââm, der gotes trût,
den ie valsch gemüete vlôch,
in sînem gärtelîne zôch,
und guoter tateln, doch niht vil.
nâch des ezzennes zil
sie sprâchen aber ir gebet,
daz ietweder gerne tet.
mit solhem getwange
lebten sie beide lange
in gotes vestenunge.
ir reiniu wandelunge
bezzerte sich tägelich.
jôsaphât bezzerte sich
nâch der gotes lêre
sô sêre und alsô sêre,
daz es den meister wunder nam,
daz in sô lîhte ie gezam
sô jungen solher arbeit,
der er alsô manige leit.
in dûhte, daz sîn strenge
sich mêrte sô die lenge,
daz er sîner arbeit
nâch alter gewonheit
niht sô gevolgen möhte,
daz ez ze gote iht töhte.
des lobeter ie von herzen got,
dêr in lêrte diz gebot.
einmüetic mit dêmüete
mit einmüetlîcher güete
begiengen sie daz gotes amt
mit einander lange samt
in der wüeste mit arbeit.
daz sie der welte irrekeit
nâch ir dekeines jâmers twanc,
noch von gotes minnen dranc.
barlââm, der guote man,
vil sêre siechen dô began.
er rief sînem kinde dar,
daz er in gotes lêre gebar.
er sprach:< vil lieber jôsaphât
unser herre got mich hât
an dir, vil liebez kint, gewert
des ich nû lange hân gegert,
daz er dich mir hât gesant,
und daz ich weiz, daz dîn lant
von dîner lêre geloubic ist,
und daz dû mir komen bist:
diz was alsô geordent dir.
liebez kint, nû volge mir.
dû solt gote dich bewarn;
ich muoz schiere von dir varn,
und muoz mînes lîbes leben,
der erde ir erde, wider geben:
ich meine, daz ich sterben sol,
wan ich des tôdes siecheit dol.
sun, sô solt dû mich begraben,
dich selben staete behaben.
dû solt in dirre wüeste sîn
biz daz dû lebest. daz herze dîn
solt dû gote veste hân
und dem tiuvel widerstân.
gedenke, nim in dînen muot
daz künftig endelôse guot,
daz anegênde vreude hât,
ân ende niemer mêr zergât.
nâch der valschen rîcheit,
die dû nû hâst hin geleit,
solt dû dînen jâmer lân,
wan si mit leide muoz zergân.
sun, gedenke wol dar an,
daz der leide tiuvel kan
verkêrter sunderliste vil,
dâ mite er dich verkêren wil;
gên dem sol der geloube dîn
ein widerstrît mit kamphe sîn.
swaz er spotes kêre an dich
mit sînen lügen trügelich,
sô hüete dîn, daz er dich iht
verkêren müge; lâ dich niht
verdriezen dîner arbeit,
diu dir hie muoz sîn bereit.
lâz ouch in dînem muote
den jâmer nâch dem guote,
daz dû gelâzen hâst durch got.
wis gotlich arm durch sîn gebot.
wan er ouch arm wart durch dich.
in rîcher rîcheit armder sich,
daz er dich machte rîche.
dien im gedulteclîche,
wan der weltlîchen arbeit
wirt schiere ein ende ûfgeleit;
der gotlîchen rîcheit
wirt ende niemer angeleit.
dâ bî soltû gedenken mîn,
des vil armen vater dîn,
der dich nâch gote hât geborn.
bit in, daz er sînen zorn
gên mînen sünden lâze,
und mîner sêle mâze
die leiden hellewîze:
des bit got mit vlîze.
wis an dîner arbeit
gedultic, âne herzeleit,
daz dir got mit liebe gebe
ein leben, in dem dîn sêle lebe
ân ende vroelîche:
daz ist daz himelrîche.>
dô der meister diz gesprach,
dô twanc des jâmers ungemach
den jungern, daz er weinde.
er vorhte, als er vereinde,
daz in dan des tiuvels strît
mit vlîze muote zaller zît.
vil herzeclîche jâmert in
nâch sînem lieben meister hin.
in dûhte, er wolde ruowen varn.
dô sprach der reine saelden barn:
< meister, wem lâst dû mich?
ez waere reht und gotlich,
daz dû von herzen gundest mir
des dû wilt selbe günnen dir:
got wil ze ruowe vüeren dich,
des wünsche ouch mir von im, daz ich
dîn geselle werde dar,
daz ich mit dir ze ruowe var.
ich vürhte des vil sêre
daz ich an mîner lêre
ein teil ûf dirre erde
verkrenket eine werde.>
dô sprach der saelden rîche
mit zühten senfteclîche:
< bruoder mîn, vil liebez kint,
diu gotes gerihte tougen sint:
wir suln sînen hulden geben
über tôt und über leben
urloup nâch den gnâden sîn,
daz râte ich, lieber sun mîn.
dû hâst mit arbeitlîchen siten
sô volleclîche niht gestriten,
daz dû noch sülst hinnen varn.
got wil dir eine wîle sparn
des lîbes leben, ein kurzez zît,
daz dîn êhaftiger strît
den lôn neme von gotes hant
ze rehte, der dir ist benant.
ich bin, als ich hân gezalt,
vil nâch wol hundert jâr alt,
der bin ich hie in sennââr
gewesen vünf und sibenzic jâr.
sô lange lebest dû doch hie niht:
biz dir diz leben des lîbes giht,
sô lebe als ich dir hân geseit,
sô wirt dir durch dîn arbeit
ouch alsô rîcher lôn gegeben,
sô den, die man siht langer leben
in gotes lêre maniger zît:
daz wizzest âne widerstrît.
nû louf balde, liebez kint,
ze bruodern, die hie nâhen sint,
und bring des wir bedürfen nû
ze gotes ambt. ich wil, daz dû
dich bewarst, und ich bewar
mich, ê daz ich hinnen var.>
dô lief der gotes dienestman
von sînem meister balde dan.
er vorhte, ê daz er kaeme,
daz er sîn ende naeme.
sus kam er balde wider dar
geloufen unde brâhte gar
darumbe er was ûz gesant.
dô bereite sich zehant
der meister zeiner messe dâ.
daz heilege opher nam er sâ.
sie beide wurden dô bewart:
er ûf des lîbes hinevart,
der ander ûf des schirmes wân,
daz er ze schirme wolte hân
mit im bezeichenlîche got
vür des leiden tiuvels spot.
sante barlââme was
worden baz, unz er gelas
und gar gesanc die messe hie
und gotes ambet gar begie.
ze jôsaphâte sprach er dô:
< sun, nû solt dû wesen vrô!
wis staete an dîner staetekeit:
ez nâhet dîner arbeit
ein lôn, der niemer mêr zergât,
den dir got behalten hât.
wis staete diz vil kurze zil,
daz dir got schiere verenden wil.>
der meister solher rede phlac
unz an den âbent gar den tac.
dar nâch, dô diu trüebe naht
die erde hâte gar bedaht,
der lêre er niht gedagete.
dô ez aber tagete,
dô nâhte balde im der tôt.
sich mêrte sînes herzen nôt
gên sînes lîbes ende;
dô bôt er sîne hende
ze gote mit dêmüete
und lobeten sîner güete.
er sprach:< got herre, ich lobe dich,
daz dû hâst gemachet mich
wirdic der genâden dîn,
daz ich unz an daz ende mîn
gevolget dîner lêre hân.
nû ruoche mich geniezen lân,
daz dû, vil lieber herre krist,
alsô erbarmherze bist,
daz dû nieman verderben lâst,
an dem dû reinekeit verstâst.
nû ruoche durch die güete dîn
beschirmen mir die sêle mîn
von des tiuvels stricken,
von den leiden aneblicken
des grimmen tiuvels. wis mir bî,
tuo mich sîner vorhte vrî,
daz er mîner sêle sich
vremeden müeze. ouch bite ich dich,
daz dû dînen werden namen,
süezen, reinen, lobesamen,
an dîme erwelten êrest
und dîn gebot in lêrest
behalden vesteclîche.
wîs in ze dînem rîche,
sît daz er mit der lêre mîn
hât künde des gelouben dîn.
hilf im in sînen kurzen tagen
daz joch gedulteclîche tragen
dînes gebotes, herre got,
und lêre in staeten dîn gebot.>
alse diz gebet geschach,
ze sînem lieben kinde er sprach:
< nû phlege dîn got der guote
mit sîner süezen huote
reineclîche, biz daz ich
gesehe in sînem rîche dich!>
güetlîchen kuste er in dô.
von jâmer was der herre unvrô,
als im sîn hôhiu triuwe riet.
von sante barlââme schiet
sîn heilic sêle reine.
dô ruowete sîn gebeine;
sîn reiner geist enphangen wart
in sîner süezen hinevart
in daz gotes rîche;
dâ lebet er êwiclîche
mit senfter ruowe, sunder wê.
sich sûmde jôsaphât niht mê:
den lîchamen er inwant
in daz wüllîn tuoch zehant,
daz er im ê hâte gegeben,
do er in wîste in gotes leben.
dô sprach der wandels vrîe
sîne psalmodîe
weinende, âne unzühte braht,
den tac ob im und al die naht
und manic gotlîch gebet.
mit reinem herzen er daz tet;
ze gote er sîn vil gewuoc,
wan er im holdez herze truoc.
dô sich der morgen anehuop,
bî dem hol vil nâhen gruop
der edel jôsaphât ein grap.
der erden er dâ wider gap
ir reht an dem guoten man.
er nam in ûf, er truoc in dan
mit engelischer helfe dar.
von im und al der engel schar
wart sante barlââm geleit,
als uns diu wârheit hât geseit.
im hulfen offenlîche niht
die engel schar an der geschiht:
sie wâren sînen ougen
aldâ verborgen tougen
und wârn in sîne helfe komen;
swie sie waeren im benomen
an der gesiht und unbekant,
ze helfe wârn sie im gesant.
dâ wart ein vreuden rîcher smac,
dâ der gotes erwelte lac.
jôsaphât sich dô lie
bî dem grabe ûf sîniu knie.
er sprach:< herre, süezer got,
durch dîner gotheit gebot
hilf mir unde wis mir bî,
sît daz ich verweiset sî.
mich hât nû mîn geslähte gar
gelân. nû nim mîn, herre, war!
sît ich niemen hân, wan dich,
herre got, sô wîse mich
mit staete in dîne lêre
durch dîner muoter êre
und durch den trût erwelten dîn,
den vil lieben meister mîn.>
dô diz gebet alsus geschach,
als erz vil dêmüetlîche sprach
mit manegem herzesiuften tief,
von müede er bî dem grabe entslief.
dô sach er, als ich hân vernomen,
die selben geiste aber komen,
die im die gotes rîcheit,
von der ich ê hân geseit,
zeigeten und die liehten stat.
die vuorten in daz selbe phat,
daz er ouch ê gevüeret wart.
dô brâhten sie in ûf der vart
in die stat über den plân.
dô sach er gên im schône gân
engel schoene und lieht erkant,
die truogen alle in ir hant
vil wünneclîchen schône
die liehtesten krône,
von den mensche ie vernam.
dô im der engel schar bekam
und er die liehten krône sach,
jôsaphât, der guote, sprach:
< wem suln die liehten krône?>
< dir sol einiu ze lône
( diu hât den liehtesten schîn)
umb den vil lieben vater dîn,
daz dû den bekêrtest
und den gelouben lêrtest,
dar nâch durch maneger sêle leben,
die gote sint von dir gegeben.
diu diu beste dar nâch ist,
diu sol mit staete ân endes vrist
dînem vater sîn bereit,
wan im diu gotes wârheit
mit dîner lêre wart erkant.
dir ist diz himelische lant
behalten, daz wil dir got geben,
wil dû staeten im dîn leben
und der einoede einekeit
durch got dulten âne leit.
dîn und dîns vater rîcheit
sol ein lôn hie sîn bereit,
der niemer mêre mac zergân.
swaz ir habet durch got gelân,
daz wirt getûsentvaltet hie.
niemer wirt, ez wart ouch nie
ende der grôzen rîcheit,
die got iu beiden hât bereit.>
diz seite ein liehter engel dâ.
jôsaphâten dûhte sâ,
daz er in dem gedanke sîn
gedaehte:< sol der vater mîn
mir ebenglîche krône tragen,
und er in alsô kurzen tagen
sich durch got garbeitet hât?>
dô sach der reine jôsaphât
sînen lieben meister dort.
in dûhte, er spraeche disiu wort,
durch strâfen sînen gedanc,
der in ein wênic nîdes twanc:
< jôsaphât, vil liebez kint,
nû sich, wâ dir bewaeret sint
mit endehafter wârheit
diu wort, diu ich dir hân geseit:
würdestû ze rîche,
daz dû gedulteclîche
die rîcheit kundest niht vertragen.
dû soldest billîcher sagen
gote lop und êre,
daz er mit dîner lêre
daz rîche nû besezzen hât,
des rîcheit niemer mê zergât.
dû soldest mit dem vater dîn
vrô durch sîne vreude sîn.>
dô sprach der herre wolgeborn:
< genâde, meister, lâ den zorn,
vergip mir, lieber meister mîn,
die schulde durch die güete dîn.
lieber meister, sage mir,
wâ hât got gegeben dir
dîn belîben, dîn gemach?>
der guote barlââm dô sprach:
< enmiten hie in dirre stat
ein rîcher palas ist gesat,
den al diu welt vergulte niht,
dâ niemer man die naht gesiht,
dâ niemer nôt von sorgen wirt,
dâ niemen leit und angest swirt,
dâ niemen nihtes inne gert,
er werde es tûsentvalt gewert:
dâ sol ich iemer inne wesen,
vor allen noeten gar genesen.>
jôsaphâten dûhte dô,
daz er den meister baete alsô,
daz er in lieze bî im dâ,
und im der meister sagete sâ,
er müeste sich arbeiten ê
durch got in dirre welte mê,
und daz er aber spraeche zim:
< var hin! in dîne lêre nim,
swaz ich dich gelêret hân,
dar an solt dû vollestân,
daz nimt doch ende schiere an dir:
sô solt dû komen her zuo mir,
sô sîn wir lebende iemer mêr
mit einander âne sêr.>
dô jôsaphât erwachet was,
sîn gebet er gote las,
daz er geruochte staeten in
an sînem lobe dar nâch hin:
von gote er dise bete erwarp.
dô sîn vil lieber meister starp,
er nam sîne lêre an sich.
sîn leben was sô gotlich
und sîn reineclîcher site,
daz ez ieman vil kûme erlite:
sîn leben und sîn geverte
was herter danne herte;
ie herter und ie strenger,
ie lenger unde ie lenger
begunder lengen sînen pîn
durch got und ouch den kumber sîn.
er hâte sich an got ergeben
alsô gar, daz sîn leben
engels lebene wol gezam.
der boten lôn sîn leben nam,
wan er sô manigen lêrte,
daz er ze gote kêrte.
mit willeclîcher swaere
was er ein marteraere.
ein reiner begihtaere guot
was er durch sînen süezen muot,
ein maget durch sînen magetuom.
sus was der himelische ruom
in allen gotes orden
an im ervüllet worden:
von kinde er gotes kint was ie.
do er von sînem lande gie,
durch got lie sînen gewalt,
dô was er zweinzic jâr alt,
dar über hâte er vünf jâr.
vünf und drîzic al vür wâr
was der unwandelbaere
gote ein riuwesaere.
got was im zallen zîten mite,
in gote phlac er süezer site,
in gote er inneclîche bran.
got sach er staeteclîchen an
mit sînes herzen ougen;
mit staete, sunder lougen
mêrte sich sîn güete
mit werder dêmüete.
dô der guote jôsaphât,
der heilege âne missetât,
der gotes erwelte reine,
der ie vor allem meine
was reine und unvermeinet,
reine, gote gereinet,
alsô lebete, daz er nie
die gotes lêre übergie,
sît er der welte wünne vlôch
und sich in gotes dienest zôch:
dô begunde im wonen mite
der alte und der niuwe site,
ich meine den gemeinen tôt,
der sîne hervart im gebôt
und der niemen ledic lât:
der guote sante jôsaphât
von dirre welte schiet, er starp.
sîn hinevart im dort erwarp
mit vreuden êweclîche
daz wernde gotes rîche,
des süeze solher süeze giht
daz man niht dar inne siht,
des iemanne schade sî.
swaz in ist dar inne bî
niemen des verdriuzet,
dar in, her ûz niht vliuzet.
hie ûz ist niht, des man drin ger,
drinn ist niht, des man gerne enber:
dâ ist niht anders inne
wan vreude, vride, saelde, minne.
der edel guote reine
lac sîner vriunde al eine,
der irdischen vriunde gar.
die vriunde, die sin nâmen war,
daz was daz himelische her,
daz gên dem tiuvel was sîn wer,
der dâ niht wan schame erwarp,
dâ der gotes erwelte starp.
dô sante jôsaphât lac tôt,
von gote ein stimme dô gebôt
einem guoten bruoder sâ,
der was gesezzen nâhen dâ,
daz er sich balde hüebe,
den guoten man begrüebe.
diz geschach: er lief zehant,
dâ er den lîchamen vant:
ob dem sprach er sîn gebet.
des meisters grap er schône ûf tet
und leit in zuozim dar in.
diz was an im ein rehter sin,
daz er ze samene vuogte die,
die sich geschieden selten hie
und ouch dort, dâ sie gotes kint
mit einander lebende sint
und iemer ungescheiden.
von den heilegen beiden
huop sich dirre guote man
wider von dem grabe dan
und ergap ir sêle gote
nâch der kristenheit gebote.
dem selben man wart kunt getân,
daz er solde balde gân
hin in indîam daz lant,
und daz er solde tuon bekant
disiu selben maere aldâ.
dô kêrt er des endes sâ
und seite aldâ diu maere,
wie von der welte waere
sant jôsaphât gescheiden
und swaz an in beiden
beschehen an ir ende was.
der künic barachîas
weinde sînes herren tôt.
ein gespraeche er dô gebôt
den vürsten algelîche
über al sîn künicrîche,
und seite in disiu maere gar.
dô geriet diu werde schar,
daz man den gotes wîgant
vuorte wider in sîn lant,
daz er aldâ mit werdekeit
würde rîlîche geleit.
sie jâhen des: mit dem daz leben
in redelîche waere gegeben,
solde in der belîben bî,
sie würden ungelückes vrî.
des wurden sie ze râte
gemeinlîche vil drâte.
nû sie wurden des enein,
sie vuoren alle wider hein
und bewarten algelîche
mit huote wol daz rîche
und vuoren mit dem guoten man
nâch dem heilectuome dan
mit grôzer vürsteclîcher schar.
sie vuoren ungevertes dar
manige tageweide
walt und wilde heide
gar mit arbeitlîchen siten.
ze jungest kâmen sie geriten
in sennââr, die wüeste wît,
dâ daz heiltuom bî der zît
in dem jâre begraben was.
der künic barachîas
wart gewîset sâ zehant
hin, dâ er den begraben vant
der im sîn künicrîche gap.
dô hiez er brechen ûf daz grap:
die gotes erwelten er dô vant,
unverwandelt; ir gewant,
ir lide eigenlîche gar,
als sie geleit wurden dar,
ietweder unerwandelt lac.
der süezeste und der beste smac,
des weltlîch man künde ie gevie,
von den lîchamen gie.
dô weinde diu getriuwe diet,
als in des jâmers triuwe riet,
der nâch ir herren was sô grôz,
des sie vil wênic ie verdrôz.
von jâmer was der künec unvrô.
mit sînen handen huop er dô
die lîchamen vil werde
mit jâmer ûz der erde.
er hiez sie wirdeclîche
in guote phelle rîche
mit keiserlîchen sachen
verwinden und vermachen.
daz heilictuom gebaeret wart.
dô huoben sich dan ûf die vart
mit dem künege barachîâ
die vürsten wert von indîâ.
dô sie ze lande kâmen
und die liute vernâmen
ir kunft, dô wart ein michel schal:
mit grôzen scharn über al
die alten zuo den jungen
hêrlîche zuo drungen.
mit lobe und mit gesange,
mit schalle und mit gedrange,
mit gotlîchem ruome
wart gên dem heiltuome
gar mit vroelîchen siten
geloufen wîte unde geriten.
gên des liehtes kinden wart
getragen lieht ûf der vart,
und heiltuom gên heiltuome dâ.
dô kam der erzebischof sâ
mit vil grôzer phafheit
phäflîche vil wol bekleit
mit lobelîchem schalle.
des landes bischov alle
kômen ouch mit grôzer schar
gên dem heiltuome dar.
waz sol ich dâ von sprechen mê?
in daz münster, daz er ê
gemachet hâte in gotes namen,
dar vuorte man die lîchamen.
dâ was mit grôzer rîcheit
ein sarc vil rîlîche bereit:
dar in versigelte man sie;
mit grôzem lobe daz ergie.
nû was dar vil liute komen,
den ir gesuntheit was benomen:
dâ was vil touber tumben,
vil blinden unde krumben,
und tiuvelhafter diet genuoc,
diu leit von dem tiuvel truoc.
die wâren alle sâ zestunt
erlôst, genesen, wol gesunt.
ouch was an dem selben zil
dar komen heiden harte vil.
dô die diu wunder sâhen,
diu dâ von in geschâhen,
in wart der geloube erkant
und touften sich dâ zehant.
dar kam vil heidenischer diet,
diu sich von ungelouben schiet
und gotes rîche kouften
alsô, daz sie sich touften.
dô teilte des küneges hant
ze grôzem heiltuom ir gewant
wîte in vremediu rîche.
dô hiez er gewaerlîche
sante jôsaphâtes leben
schrîben, mit gehügede geben
ze vorbilde den liuten,
mit der schrift bediuten
von anegenge, als ez geschach,
als erz hôrte und als erz sach.
in kriechisch man diz maere schreip.
vil lange ez kriechisch beleip,
unz ez ein reiner kristen vant:
johannes, den ich hân genant,
der schreip ez in latîne dô;
des schrift hât ez bewaeret sô
in latîne, als er ez las.
der künic barachîas
hiez ez schrîben, als erz sach
und alse mit urkünde jach
der guote man, des wârheit
im hâte ir beider tôt geseit.
der zweier unde maniges man
gewaere urkünde was dar an,
von dem zuo dirre wârheit
niht mê noch minner wart geleit,
wan als der heilige munt
tet sante jôsaphâtes kunt
von anegenge unz an daz zil.
nû lebet der liute niht ze vil,
die kriechisch kunnen verstân;
waer ez in kriecheschem gelân,
ich waene wol, sô waere
diz maere der kriechen maere:
sô waere ez manegen man verdaget,
dem ez latîne hât gesaget:
alsus hât ez der phafheit
diu wârheit der geschrift geseit.
dô mir diz maere gekündet was
und ich ez in latîne las,
ich nam daz redelîche leben
von zitels ze râtgeben,
ob ich ez solde tihten
und in tiusche berihten
ûf bezzerunge oder niht,
dô geviel diu geschiht
wol der gewârhaften diet:
von kapelle der abbet riet
und al diu samenunge mir
mit getriuwelîcher gir,
daz ich ez iht verbaere,
ez waere alsô gewaere
an süezer lêre und alsô guot,
daz ez vil lîhte maneges muot
ze bezzerunge kêrte
und bezzerunge lêrte.
ûf die gedinge und ûf den wân
diz maere ich sus getihtet hân,
swer ez hoere oder lese,
daz er sich bezzernde wese
an guoten werken in gote
und in sînem gebote
neme an disem maere
ein vorbilde gewaere.
zuo der gewaeren wârheit
hân ich anders niht geleit
wan des ich geschriben vant.
swaz mir diz maere tet erkant,
daz hân ich iu gar gesaget
und der wârheit niht verdaget.
hab ich ouch iht dar zuo geleit,
daz ist sô gar von wârheit,
daz ich es âne valschen wân
von der schrift urkünde hân:
der lüge muoste ich hie gedagen.
die boten und die wîssagen,
des die geschriben hânt an mich
mit ir lêre, daz hân ich
gesprochen in diz maere,
dâ von ist ez gewaere:
diu rede kleine mich bestât.
des mich diu schrift gewîset hât
mit rehter orthabunge,
daz hât alhie mîn zunge
ze bezzerunge der kristenheit
gewaerlîche vorgeseit.
diz maere ist niht von ritterschaft,
noch von minnen, diu mit kraft
an zwein gelieben geschiht;
ez ist von âventiure niht,
noch von der liehten sumerzît:
ez ist der welte widerstrît
mit ganzer wârheit, âne lüge;
sunder spot und âne trüge
ist ez an tiuscher lêre
der kristenheit ein êre.
swen es deste wirs gezimt
und deste ungerner ez vernimt,
ich waene wol, der sünde sich.
sîn lêre ist reht und gotlich,
sich mac wol wîp unde man
âne boesern bezzern dran.
swem ez niht bezzerunge tuot,
dem boesert ez ouch niht den muot.
ez ist dekein sô wîser man,
der tiusche rede vernemen kan,
wil er diz maere minnen
dicke in sînen sinnen,
ez künne im guote lêre geben,
wolder nâch sîner lêre leben,
nû lât mich vürbaz sprechen mê.
ich hâte mich vermezzen ê,
dô ich daz maere enbarte
von dem guoten gêrharte,
haet ich mich dran versûmet iht,
daz lîhte tumbem man geschiht,
daz ich ze buoze wolde stân,
ob mir würde kunt getân
ein ander maere: dêst geschehen.
nû kan ich des niht verjehen,
ob ich hân iht gebezzert mich:
des weiz ich niht. noch wil ich
mit dirre buoze mich bewarn,
mîn sprechen an ein anderz sparn,
swes ich mich hie versûmet hân.
des bîtet ûf den êrren wân
und wünschet alle mir durch got
mit rehten triuwen, âne spot
heiles und iu mit mir.
wünschet mir und iu, daz wir
ein ander vroelîche
gesehen in sînem rîche.
reiner krist, nû loese mich
von mînen sünden, in den ich
ofte sunte wider dich.
dîn güete ist sô genaedeclich,
ob alle zungen vlizzen sich
lêren dîner verte strich,
für wâr waer in daz zwîvellich.
krist, herre got, durch dînen tôt,
in den dîn menscheit sich bôt,
hilf uns, daz wir von schame rôt
vor dir iht stên und uns der sôt
der helle iht slinde in wernder nôt!
des helf uns daz lebende brôt
alphâ et ô, künec sâbâôt.