BRF.txt

von biterolfe und sînem sune dietleibe.
ob uns hie ieman wese bî
sô vertiurtes muotes frî,
den des kunde gezemen
daz er möhte vernemen
ditze fremde maere,
( daz ist sô redebaere
daz ez wol von rehte
ritter unde knehte,
dar zuo wîp unde man
wol für guot mügen hân),
den sage ich endelîche
von einem künege rîche,
wie der waere genant
ode wâ er boute sîniu lant,
sîne bürge unde stete.
nu ruochet hoeren mîne bete
daz ir swîget dar zuo,
daz ich iu daz kunt getuo.
von sînen alten mâgen
darf mich nieman frâgen:
wie die schuofen ir leben,
des kan ich iu niht ende geben.
der dise rede tihte,
der liez uns unberihte,
und ist doch übele beliben.
haete er iht dâ von geschriben,
daz lieze wir iuch unverdeit:
uns hât des nieman niht geseit.
von dem man hie gesprochen hât,
des wil ich niht haben rât
ich enkünde iu sînen namen.
er endörfte es sich niht schamen,
ob er noch lebendic waere.
er was sô lobebaere
und hete sô êre gernden muot,
daz biderben liuten sanfte tuot
swâ man saget von einem man,
der wol nâch êren werben kan.
bitrolf sô hiez der selbe degen.
der herre hete sich gar bewegen
unzuht unde schande;
het er iht rîcher lande,
daz gelt daz wart alsô verzert
daz noch sîn lop vil wîten vert.
er schuof vil ritterlîch sîn leben
und kunde ouch sô ze wunsche geben,
swâ im ze gebenne geschach,
daz man im niuwan êren jach.
sîn muot der was alsô gestalt,
si waeren junc oder alt,
si waeren tump oder wîs,
si mohten haben wol für prîs,
ritter unde knehte,
den sînen lop ze rehte.
der selbe recke hete ein wîp
daz man sô werder frouwen lîp
bî ir beider stunden
unsanfte haete funden.
ir name hiez frou dietlint:
vil dicke ist ir gejehen sint,
swâ man vernam daz maere,
daz si ze loben waere.
si was von hôher art erborn.
diu schoene diu was niht verlorn
die si an ir lîbe truoc.
si was ze lobenne genuoc,
dâ si sô wunschlîchen
bî edelen fürsten rîchen
gekroenet in ir lande gie.
man vernam in der werlde nie
von tumben noch von wîsen
ein frouwen baz geprîsen.
der fürste hete sîner man,
swenne er ritter wolde hân,
ahte tûsent oder baz
in der houbetstat dâ er saz:
tôlêt sô was diu genant,
dar inne dienten im diu lant.
ein berc lît nâhen dâ bî
dâ der list nigrômanzî
von êrste wart erfunden,
den man bî unsern stunden
noch vaste üebet unde liset;
swie ir vil wênic iht geniset
die sich dran hânt geflizzen,
swie wol si doch daz wizzen
daz si dâ mite sîn verlorn.
der edel künic wol geborn
der was herre ob in dâ.
sît geschuof er anderswâ
sîn dinc sô fürstenlîchen,
daz man in allen rîchen
sagte von im maere
daz er ein degen waere.
sîn êre hôhe stuont genuoc:
swâ man der besten ie gewuoc,
dâ was er einer neben in.
sîniu jâr diu giengen hin
alsô lobelîchen
daz man nie alsô rîchen
sô senftes willen selten vant.
swie sîn ellen und sîn hant
dicke wunder hete getân,
swâ ieman kunde iht des begân
dâ von man recken loben sol,
daz kunde er vlîziclîchen wol.
ich enweiz von wanne ez waere komen
ode wâ ez hete der helt genomen,
er hete daz beste wîcgewant
daz man deheinez lützel vant
sô rehte staeticlîchen guot.
dâ von gehoehet was sîn muot,
swaz er ie stürme drinne streit,
daz in doch wâfen nie versneit.
er hete ein swert, daz was guot,
daz im den sin und den muot
vil dicke tiurte sêre.
sîn lop und ouch sîn êre,
des half daz wâfen alle zît:
er kam in neheinen strît,
ez engestüende im ie alsô
daz sîn der recke waere frô.
schrit was daz swert genant.
diu maere tuon ich iu bekant.
an einem buoche hôrte ich sagen,
der swerte wurden driu geslagen
von einem smidemeister guot,
der beide sin unde muot
dar an wande sêre,
daz man in den landen mêre
sô staetes niht enfunde;
wand er den list wol kunde
baz danne anders ieman dâ.
er saz in azzarîâ,
von tôlêt zweinzic mîle:
er hete ouch ê der wîle
der swerte mêre geslagen.
sînen namen wil ich iu sagen,
er hiez mime der alte:
sîn kunst vil manegen valte
der lenger waere wol genesen
und des tôdes muoste wesen
von der swerte krefte.
ze sîner meisterschefte
ich nieman kan gelîchen
in allen fürsten rîchen,
ân einen den ich iu nenne,
daz man in dar bî erkenne:
der was hertrîch genant
und saz in wasconje lant.
durch ir sinne kraft
sô heten si geselleschaft
an werke und allen dingen:
si mohten wol volbringen
swaz in ze tuonne geschah.
swie vil man starker liste jach
wielande der dâ worhte
ein swert daz unervorhte
witege der helt truoc,
und einen helm guot genuoc
der dâ limme was genant:
ouch worhte er allez daz gewant
daz zuo dem swerte wol gezam,
witege truoc ez âne scham,
der êren ingesinde:
er hete ez sînem kinde
geworht so er beste mohte;
dannoch im niht tohte
daz er an disem maere
sô wol gelobet waere,
als mime unde hertrîch:
ir kunst was vil ungelîch.
die rede bescheide ich iu:
der swerte wâren zwelviu,
diu sluogen dise zwêne man,
als ich iu kunt getân;
daz driuzehende wielant,
daz was mimminc genant.
daz buoch hoeren wir sagen,
diu swert entorste nieman tragen
er enwaere fürste od fürsten kint.
bitrolf und frou dietlint,
si beide zugen einen degen,
der wart sô hôhe sît bewegen
an lobe und ouch an êre,
daz man ir keinen mêre
hôhers lobes nie vernam.
als ez ir êren wol gezam,
so erzôch man ir beider kint:
der helt der wart getiuret sint
in allen fürsten landen
für einen ûz erkanden.
dietleip alsô was er genant:
der helt was des ungeschant,
sîn muoter hiez frou dietlint,
diu was eins rîchen küneges kint;
in erbte an êre deste baz.
daz buoch hât uns gesaget daz,
wie in sînen landen
mit guoten wîganden
biterolf der rîche
saz werdiclîche.
uns kündet ouch daz maere
in welhem alter waere
der vil junge wîgant,
dô sîn vater sîniu lant
rûmte unde dannen reit:
als uns daz maere hât geseit,
dô was der junge degen balt
niuwan zweier jâr alt.
von einem maere daz geschach,
daz der küene vor im sach
einen alten wîsen
witzic unde grîsen
vil verre dar gegangen.
der wart dâ wol enphangen
von biterolf dem rîchen
vil harte vlîziclîchen.
dô er in zuo im komen sach,
der künec vil güetlîchen sprach
< herre, sît mir willekomen:
ich haete gerne daz vernomen,
von wanne ir wallet in daz lant.
ir traget krücken an der hant
und palme über herte,
ich waen daz iur geverte
in sorgen dicke sî gewesen;
er muoz vil angestlîch genesen
der bouwet sô diu rîche.>
dô sprach vil witziclîche
der alte man< daz ist wâr,
ich hân vil nâhen hundert jâr
gelebt in sorgen mîne tage,
daz ich vil selten ieman klage,
niuwan daz gote diu wîle mîn
und ich bevolhen müeze sîn.>
biterolf der wîgant
sprach ze sînem gaste zehant
< bruoder, ir sult sitzen gân.
ich mac des niht rât hân,
ich enmüeze iuch frâgen.
des enlât iuch niht betrâgen,
ir tuot mir kunt diu maere
der ich unsanfte enbaere.>
dô nu gesezzen was der gast,
( an dem herren niht gebrast,
er kunde vil wol wirt gesîn,)
dô hiez er schenken sînen wîn
dem alten balteniere:
den brâhte man im schiere.
vor im sâzen sîne man:
der herre frâgen dô began
den alten umb diu maere,
wâ gewallet waere
dirre wâre gotes degen,
und wâ er ûf den sînen wegen
die besten haete gesehen:
ob er im kunde des verjehen,
des bat er vlîziclîche.
in sînem witzen rîche
antwurten dô begunde
der alte zuo der stunde.
er sprach< herre, ich wil des jehen,
ich hân wunders vil gesehen
in stürmen und in strîten
bî mînen jungen zîten:
mit sorgen bin ich her gewesen
und in grôzer nôt genesen.
nu wolde ich gote ze buoze stân
des ich in jugende hân getân;
des vleiz ich mich vil sêre.
in hôhem prîse und êre
erkenne ich manegen wîgant,
ich hân ervarn manic lant
under kristen unde heiden.
in den namen beiden
sô hôchgelobten ich nie vant,
der alsô manic rîch lant
mit kreften hete ertwungen,
dem sô vil der zungen
von guoten recken waere bî,
( des weiz ich al gemeine frî
daz nu künege sint genant,)
âne den - von - hiunen lant,
etzelen den vil rîchen,
der lebet wol wunschlîchen.
swaz man von salomône seit,
swie der sîn liep und ouch sîn leit
mit einander kunde tragen,
der, herre, waen bî sînen tagen
sô manegen ritter nie gewan
sô ich ein zît gesehen hân
bî etzelen dem rîchen:
im kan sich niht gelîchen.
man saget von nibelôte daz,
wie er ze bârýse saz
in einem rîchen lande;
den ich vil wol erkande.
der machte himele guldîn,
selbe wolde er got sîn,
mit kraft er tôte tûsent her;
ez mohte nieman keine wer
wider in gefüeren,
ez getorste ouch gerüeren
mit strîte nieman sîniu lant.
swie hôhes namen was genant
von babilône mercîân,
er kunde nimmer widerstân
dem - von - hiunen rîchen
noch sich im gelîchen.
sol er des haben êre,
sô nenne ich ir iu mêre
die im genôzsam solden sîn:
antfuhs von gabelîn,
und baligân von lybîâ.
der hete ûz persîâ
wol ahzic tûsent heiden:
swie der unbescheiden
ie taete waz er wolde,
ob er nu strîten solde
mit etzelen dem rîchen,
er taete ez angestlîchen.
sît ir iu maere bitet sagen,
sô sol ich iuch niht verdagen
wie ez umb den künic stât.
swenne er ze tische gât,
sô tragent im ir krône bî
zehen künige unde drî;
swaz ander recken bî im ist,
die enmöhte ich in sô kurzer frist
gesagen noch gezellen,
die durch ir hôhes ellen
zuo im rîtent in sîn lant.
dar zuo hân ich bî im erkant
ein daz aller beste wîp
diu in der werlde noch den lîp
in frouwen zühten ie getruoc.
ze sagen haete ich iu genuoc
wie hôhe ir grôziu wirde stât
und waz si hôher tugende hât.
helche so ist genant ir name.
kristenlîche âne schame
solde noch diu frouwe leben:
dô wolde ez etzel nie begeben
unz daz mans im ze wîbe erwarp.
dâ von der touf an ir verdarp,
niuwan eine ir staeter muot,
daz si sô kristenlîche tuot
daz si kan nieman niht versagen.
des muoz si bî ir werden tagen
tragen lop mit êre.
tûsent stunde mêre
kumet ir geste, danne im tuo.
den gewalt hât si wol dar zuo
daz si gebe swem si wil,
sîn sî lützel oder vil.
des siht man zallen zîten
ûf vil hertez strîten
schirmen lêren dâ diu kint:
die kristen mit den heiden sint
mit zühten in dem hove dâ.
swie vil ich künige anderswâ
her bî mînen stunden
gewaltic habe erfunden,
sô ist allez gar ein wint
wider daz botelunges kint.>
dô sprach des edeln fürsten wîp
< nu riuwet mich der helchen lîp,
daz diu künegin rîche
sô rehte jaemerlîche
sol gescheiden sîn von ir ê;
daz tuot mir inniclîche wê.
bruoder, kunnet ir gesagen
( die frâge kan ich niht verdagen),
kam iht mêre kristen dar,
dô si die heiden mit ir schar
von ir vater fuorten dan?>
< daz ist mir niht kunt getân,>
antwurte er ir schiere,
< wan kristenlîche ziere
siht man allenthalben dâ.
ich enweiz wie ez darumbe stâ,
wer mit ir kam in die heidenschaft:
ich gesach von kristen nie die kraft
die bî ir zallen zîten sint,
beidiu die alten und diu kint.>
dâ mit hiez er in ruowen gân.
der künec wolt nieman wizzen lân,
wie drumbe stüende sîn muot.
dô tete er, als ein wîser tuot,
der sîn dinc sô tougen treit:
er vorhte, und wurde daz geseit
des er darumbe hete muot,
daz ez nieman diuhte guot.
vil rîch er selbe wiste sich.
er gedâhte< ich wânde über mich
mit lobe nieman waere komen:
nu hân ich wunder hie vernomen.
mîn herze in dem gedingen stât
daz mich nimê geruowen lât,
ichn versuoche wer er sî.
wont im sô vil der recken bî,
als ich hân von im vernomen,
sô wil ich gerne zuo im komen
schouwen dâ die ritterschaft,
wie ir ellen unde ir kraft
sô hôhe ob uns in lufte swebet
daz er sô werdiclîchen lebet.>
ditz hal er liute und ouch sîn wîp
und die bekanten sînen lîp.
dô er sinnen dar began,
nieman wolde er wizzen lân,
wenne daz geschaehe
daz er etzelen saehe
und helchen die vil rîchen.
des gedâhte er tägelîchen
unz er die muoze doch gewan.
sînen mâgn und sînen man
schuof er dô vogete under in.
dô sprach sîn wîp diu künigin
< nu welt ir doch noch selbe leben.
zwiu solde ich mîn gerihte geben
jenen, haete ichz selbe baz?
herre, lât mich hoeren daz,
warumbe beriht ir sô diu lant?>
< dâ ist mir, frouwe, daz bekant,
der hiute wol gesunder gât
daz man des morgen niht enhât.
ob er denne stirbet niht,
unde im lîhte sus geschiht
daz er von siecheit wirdet kranc,
sô diuhte manegen gar ze lanc
wenn ich im rihte alsam ê.
daz bîten taete dem armen wê,
und müesten unbereitet varn.
daz wil ich hie mite bewarn.>
der künec zer küniginne sprach
< frouwe, du solt ouch dîn gemach
in dîner kemenâten
füegen unde berâten
daz dir des nimmer abe gê.
wer vor dînem tische stê
beidiu spâte unde fruo
und dir der liebest sî dar zuo,
den wele dir, frouwe, hie zehant.
waz ob ich rûmen muoz daz lant
durch unser beider êre,
daz ich her wider iht mêre,
frouwe, sorge umbe dich,
swie ich behüete selbe mich,
daz ich des gar ân angest sî,
du sîst vor ungemache frî.>
sich selben hiez er sô vertreten
daz in dem lande und in den steten
sîn daz liut vil wol enbar.
er liez ouch tougenlîchen gar
würken daz er wolde dan
selbe zwelfter sîner man
füeren in diu fremdiu lant.
die besten recken die er vant
die welte biterolf dar zuo.
er gedâht< swie hie mîn volc getuo,
ez ensî dazz nimmer müge geschehen,
ich wil der hiunen künic sehen.>
doch wart er geirret, daz ist wâr,
sîner verte siben jâr
mit strîte und mit hervart
daz ie bî ime ze tuonne wart
daz er niht kunde komen dan.
sô manegen sige der künec gewan
daz fride nu heten sîniu lant.
niwe gewaefen unde gewant,
daz was den zwelven nu bereit,
harnasch ros und ouch diu kleit
gap man in volliclîchen
bî biterolf dem rîchen:
si muosten sîniu wâfen tragen.
nâch einen wînahten tagen
der herre von den bergen reit.
sîn vart was alle die verdeit
die im die naehsten wâren bî,
sît er die sorgen niht liez frî
diu dicke sorge mit im truoc:
er tete ir leides genuoc.
sît man iuz rehte sagen sol,
ez geviel den frouwen ouch niht wol
der friedel mit im dannen riten.
mich dunket daz si langer biten
dann ez ir wille waere.
man saget uns an dem maere
daz dô minnete nieman wîp,
er enhaete danne ir lîp
ze sîner rehten ê genomen.
nu ist ez ûz den zühten komen:
ob einer möhte drîzic hân.
er wolt sich niht genüegen lân,
er hete ir dannoch gerne mê.
dirre frevel tuot der sêle wê
und ist dem lîbe lasterlîch
und stêt den tugenden ungelîch,
ez sî man oder wîp,
der minnet mêr dann einen lîp.
ez was doch unbescheidenheit
daz der helt sus dannen reit
und ez nieman wolde sagen.
des wânden si in allen tagen,
er waere in noch sô nâhen bî
( des wâren si gewaltes frî),
ob er sich gerne lieze sehen,
daz möhte zaller zît geschehen.
man warte sîn ze siben tagen:
ir bat diu küniginne sagen
ob ieman waere daz bekant
daz er in dehein ander lant
teidinc hete gesprochen.
ir senfte wart zebrochen
die si sô volliclîchen truoc:
leides hete si nu genuoc,
dô er sô lange von ir reit.
daz was ir herzenlîchen leit.
der herre fuor sô dannen
mit sînen zwelf mannen,
dô er von hûse sich verstal,
daz er sich allen den verhal
die den helt erkanden
von landen ze landen.
swie vil dâ heime klage ergie,
darumbe er doch daz niht lie,
er fuor als er ê hete gedâht.
er hete in arbeite brâht
sich und sîner manne lîp.
des muoste ir etelîches wîp
dâ von werden ungemuot,
swâ sô man den degen guot
ûf sînen strâzen an gereit,
daz er sich ie dâ von erstreit
daz im doch nieman niht ennam.
der recke fuor âne scham
alsô vermezzenlîche
unz in hiunen rîche.
der knaben wont in der mâze bî
daz si der sorgen wâren frî,
ir rosse wurde wol gephlegen.
dâ zôch man mit in ûf den wegen
drî soumaere
geladen harte swaere
mit sô guotem golde,
swaz man koufen solde,
daz in dar an niht gebrast.
swâ noch füere alsam ein gast,
und haete er dar zuo wîsen muot,
die nahtselde möhten werden guot.
iedoch sô hoere wir daz sagen,
swaz tûsent soumaer möhten tragen
daz wart im allez samt genomen,
waer er niht baz von hûse komen
denne man doch waenen wil.
sîn lîp der hete sterke vil,
dar zuo er manlîch ellen truoc.
er fuorte ein wâfen guot genuoc,
welsunc sô was daz genant.
sîn vil ellenthaftiu hant
diu kunde ez alsô wol getragen
daz mans maere hôrte sagen.
ez was scharf und ouch vil breit.
ze pârîs durch die stat gereit
biterolf der wîgant.
uns ist niht rehte daz genant,
wâ sich ein fürste hete genomen
ode welhe ende er dar bekomen
waere durch diu rîche:
er fuor dem wol gelîche,
sam er haete sînen lîp
gezieret durch diu stolzen wîp.
walthêr sô was er genant:
er was der künec von spanjelant.
der was von hiunen her bekomen,
als ir wol habt ê vernomen.
daz bitrolf gerne waere dâ
...
dem jungen helde was geseit
daz hie mit zwelf gesellen reit
in rehter mâze ein alter man.
im wart ouch kunt daz getân
daz si âne helme niht enriten.
einen garzûn hiez er si des biten,
daz si im enbuten maere
war ir geverte waere.
dô sprach biterolf der degen
< der mich frâget, wie ich ûf den wegen
rîte und die gesellen mîn,
dem saget daz wir geste sîn
und wellen rîten durch diu lant,
ich tuon im anders niht bekant.>
der garzûn sagte dem künege daz
< herre, ich weiz niht umbe waz
er iu anders niht enbôt:
âne ertwungenlîche nôt
rite er swar in dunket guot.
er hât sô hêrlîchen muot
unde ouch die gebaere,
sam ez im zorn waere,
daz ich in gefrâget hân.>
dô sprach der künic< daz lât stân.
ich wil in gerne selbe sehen,
in swelher fuoge ez mac geschehen,
sît im mîn name ist unbekant.
und füere er alsô durch diu lant,
des müese ich immer laster hân.
nu wil ich in daz sehen lân:
wirt noch nâch maeren zim gesant,
er enbiut mirs heim in mîniu lant.>
sîne man er dâ belîben hiez.
der fürste dô daz niht enliez,
er hielt gên im ûf den wegen.
dô sach ouch biterolf der degen
an dem schilde guot genuoc
bî dem wâpen daz er truoc,
daz er was von spanjelant.
dô gedâhte er sâ zehant
daz wider komen waere
walthêr der degen maere
ûz hiunischen rîchen,
im selben angestlîchen
und den sînen niht ze guote.
in bêden in ir muote
herter wille was gestalt:
des wurden ûf daz gras gevalt
sît ir maere beider.
den gesten wart nie leider
und ouch den walthêres man.
der alte sît dâ von gewan
einen grimmigen muot:
dô spranc er an den helt guot,
an walthêrn den jungen.
dô sluoc er welsungen
durch einen helmen rîchen
harte krefticlîchen
unz ûf ein hiubel guldîn.
daz im genas der lîp sîn,
daz hât man noch für wunder.
dô truoc ouch dâ besunder
walthêr ein wâfen an der hant,
daz vil wîten was erkant
zeinem dem aller besten
daz si dô inder westen.
ze strîte kunde er als ein degen:
er hete senfte sich bewegen.
den künec von bergen er dô sluoc
daz ûz der sarwaete truoc
diu ecke heiz fiuwer rôt.
dem fürsten witze daz gebôt
unde ouch sîn bescheidenheit:
dô er sô hêrlîchen streit,
dô bat den zorn lân
der alte disen jungen man:
< waz hulfe, ob ich slüege dich
ode ob du houbetlôsen mich
taetest mit der dînen kraft?
unser bêder meisterschaft
waere ringe hie gelegen.
bist duz walthêr der degen,
sô hou ûf mich niht mêre.
ez ist ein kleiniu êre,
der den andern sô bestât,
daz der schulde niht enhât.>
er sprach< ir habt mich rehte erkant:
ich bin walthêr genant.>
dô sprach biterolf der degen
< sô sol man senfte mir gewegen:
mîn swester was diu muoter dîn,
und ob du vor den handen mîn
alsô ze tôde waerst erslagen,
sô möhte ich nimmer dich verklagen.>
dô sprach der kindische man
< sô ist mir liep daz niht gewan
iuwer lîp dervon diu meil,
und ist ouch unser beider heil:
wan habt ir welsungen hie,
so genas als zeichenlîchen nie
in der werlt nehein man,
dann ich vor iuwer hân getân.
oeheim, sît mir willekomen.
mir ist liep daz ich hân vernomen
daz ir noch sît sô wol gesunt.>
ir liuten winkten si zestunt,
den vil liebe dâ geschah,
dô man die staeten suone sach.
dô si heten daz vernomen
wie diu suone was bekomen,
dem fürsten nigen al zehant
die guoten helde ûz spanjelant.
walthêr dô biterolfen bat
daz er ze pârîs in die stat
wider rite hinder sich;
dô sprach der degen< nein ich.
ze pârîs ich nu niht enwil:
ich hân ze reden mit iu vil,
des sult ir mich niht verdagen.>
er sprach< ich wil iu gesagen
swes ir mich hie gefrâget,
wan mich des niht betrâget.>
si sâzen nider ûf den plân.
den recken frâgen er began
von hiunischen rîchen.
vil bescheidenlîchen
sagt er im daz im was erkant,
der heiden site und wie daz lant
berihtet mit ir herren was,
und daz vil lützel der genas
die er in sîne aehte nam,
und wie der küniginne zam
ir leben in hiunischen - rîchen,
und wie rehte wünniclîchen
die recken lebten dar enlant,
und wie sich des heldes hant
hete ervohten an dem rîn.
des smielte sâ der neve sîn.
walthêr dô herbergen hiez,
die geste er von im niht enliez,
man enschüefe in rouwe unde gemach.
der junge helt zem alten sprach
< friunt und lieber oeheim mîn,
ir sult durch kurzwîle sîn
bî uns hie doch drîzic tage,
unz ich iu allez daz gesage
daz ich mit iu ze reden hân;
daz kan sô gâhes niht ergân,
alsô ir des habt gedâht.
mich hât mîn ellende brâht
ûf sô grôzen ungewin
daz ich im immer vîent bin.>
die hütten hiez er ûf daz velt
spannen unde diu gezelt
dâ si under solden ligen.
diu sunne diu was nu gesigen
den bergen alsô nâhen,
dô si gerihtet sâhen
gesidele ûf einem anger wît.
der mit liebem gaste sît
ze tische wirdiclîchen saz,
die koste gap er âne haz:
vor dem er kûme ernerte den lîp,
der bevalch im lant und ouch sîn wîp.
die helde sliefen deste min,
diu naht gienc in alsô hin:
ê daz si sâhen aber den tac,
der helt mit frâge bî im lac
wie stüende rüedegêres leben
ode waz im hete der künec gegeben
wider arâbî daz lant.
er sprach< dâ stêt in sîner hant
allez daz der künic hât.
er hât urliuges rât
nâch sînem erbe an sînem tôt.
daz etzelen golt rôt
mac er geben swem er wil.
er haet mir ouch wol alsô vil
gegeben unde mêre;
helche diu hêre,
diu bôt mir tugentlîche
krône und lant rîche.
sô bedâhte ich mich baz:
ich wiste âne zwîvel daz,
daz ich selbe hete lant.
etzelen unde helchen hant
heten mir und hildegunde
verlihen in der stunde
swes wir heten dâ gegert.
von etzelen wir nâmen swert,
bêde ich unde hagene.
umb uns ellende degene
liez sichz der künic hêre
kosten michels mêre,
ze tûsent marken oder baz,
und tete vil williclîchen daz.>
dô sprach bitrolf der wîgant
< ich wil ouch hiunischiu - lant
und die recken schouwen
und helchen die frouwen
von der ich wunder hoere sagen.
wie si in ir hôhen tagen
lebe und in ir zîten,
daz si âne widerstrîten
sî daz miltiste küneges wîp,
diu noch ie gewan den lîp.
nu solt du, walthêr, neve mîn,
fridemeister mînes landes sîn.
lâ dir bevolhen sîn mîn guot,
sô friunt dem andern dicke tuot.
ich wil bevelhen dir mîn wîp
und lâz ouch mîner recken lîp,
vil lieber friunt der guote,
sîn in dîner huote.>
er sprach< got müeze iuch dort bewarn,
ir sult hie heime wol gevarn:
an aller hande dingen
sô sol iu wol gelingen.> âventiure wie biterolf zen hiunen êrste kom.
urloup nam er von im dan.
dô sâhen wol des fürsten man
daz vil friuntlîch scheiden
geschach dô von in beiden.
biterolf der kêrte dan,
walthêr und die sîne man
ze pârîs kêrten in die stat.
wol leiste er des er in gebat:
ez hete der degen guote
sîn lant in friundes huote.
der fürste von den bergen reit,
daz er mit nieman dâ enstreit,
ze burgonje durch daz lant.
wart er sît iht an gerant,
daz werte sô sîn ellen
und sîner hergesellen
daz im nieman niht ennam:
si riten daz sis âne scham
kômen durch daz rîche.
doch wart ez williclîche
an si versuochet manege stunt.
ir ellen wart die mâze kunt
daz man si muose rîten lân.
geleites er und sîne man
gerten harte selten;
in dorfte nieman schelten
ir ellen daz si durch diu lant
brâhte, dâ der künic vant
hôchvart und michel übermuot.
jâ muoste sît der helt guot
mit guoten helden strîten:
haet man in lâzen rîten,
daz waere in selben wol bekomen.
in wart dâ nihtes niht genomen.
uns ist der maere niht geseit
wie der küene helt reit
ode wâ er nahtselde nam.
er fuor, als im wol gezam,
in koste harte rîche.
er reit wol dem gelîche
daz unkunt waeren im diu lant.
alsô kam der wîgant
zuo der tuonouwe fluot:
dâ sâzen helde vil guot
ze beiern in dem lande.
do enbôt dem wîgande
der vil küene gelfrât
daz si des dâ haben wolden rât
daz ieman füere durch ir lant,
swie er waere genant,
ritter oder koufman,
ern solde billîchen hân
geleite durch ir marke.
dô bitrolf der vil starke
hete vernomen gar ir muot,
er sprach< ich füere kein guot
dâ von man mûte süle gern.
ir seht mich rîten hie mit spern,
swie lützel wir der schilde hân.
âne kouf ich mich begân
etewenne ein langez jâr.
nu saget den helden für wâr,
wir sîn ritter als si sint,
und bitet des alten elsen kint
daz si uns des geniezen lân.
wir haben in nihtes niht getân.>
den jungen helden ûz erkorn
wart des gastes rede zorn.
dô nâmens ir schilde
und suochten daz gevilde
dâ si die wîte funden;
si waen niht phlegen kunden
güetlîche dâ ir geste.
gelfrât der nôtveste
der reit biterolfen an,
dâ von er selbe dô gewan
sînes lîbes arbeit;
der tiure degen vil gemeit
ze gâhes gar ernande
daz er in an gerande.
der alte fuorte vor sîn
einen schaft hurnîn
geneiget harte sêre.
der an im warp iht êre,
diu kam in vil tiure an.
gelphrâte bresten dô began
sîn schaft, sô dicke schefte tuont:
der biterolfes der gestuont.
des stach er nider ûf daz gras
der sîn dâ wartende was
mit rosse mitalle.
sich erbôt nâch dem valle
gelphrât der wîgant:
an lief er in zehant.
der fürste was ouch nider komen:
des swertes hete er genomen
einen swanc vil wîten.
der herre kunde strîten:
den schilt er an daz ende sluoc
durch herte gespenge guot genuoc:
da erreichte er ouch die ringe.
nu wart dem getelinge
des gastes ellen wol erkant:
der helt geloubte sichs zehant.
nu was else ouch komen.
den schilt hete für sich genomen
ein der biterolfes man;
dâ von else dô gewan
ein spertiefe wunden:
er stach in bî den stunden
daz im nider flôz daz bluot.
vier und drîzic ritter guot
die wâren dâ mit in komen.
den gesten wart dâ niht genomen,
wan daz si wunden kunden wern
beidiu mit swerten und mit spern:
die geste sluogen siben man.
< ich wil die ritter die ich hân
noch gesunt>, sprach gelphrât,
< niht vliesen, sît dise hât
der tiuvel gesendet in mîn lant.
si slüege wol des einen hant,
der mir verhouwen hat die wât.
solher mûte>, sprach gelphrât,
< wir werden selten rîche,
die man uns volliclîche
mit swerten mizzet über rant.
ich wil in>, sprach der wîgant,
< weder strâze noch die wege,
weder brücken noch die stege
nimmer für geriten.>
daz lantvolc wolde strîten:
dô verbôt ez gelphrât.
< sît man uns sô gemûtet hât,
sô sult ir strîtes iuch bewegen.
swer ez wil in sîn kamere legen
swaz er in sô gewinnet an,
mînes teiles ich im gan
ze haben immer âne strît.>
alsô schieden si sich sît.
si riten nider durch daz lant
daz si sît nie mannes hant
geruort mit strîten ûf den wegen,
unz daz biterolf der degen
die burc ze bechelâren sach.
zuo den sînen er dô sprach
< ir helde, rihtet alsam ê,
ob man durch mûte iuch bestê,
daz wir in teilen unser golt
daz si uns werden nimmer holt.>
si tâten als er in gebôt:
doch was in guoter witze nôt.
ir einen sanden si dô dan,
der vant zwêne wartman
vor im ûf der marke:
si heten sorge starke
daz si wurden an gerant.
die zwêne frâgte er zehant
daz si im sagten maere
wes diu burc dâ waere.
si sagten âne vâren
< si heizet bechelâren,
ir herre heizet rüedegêr.
uns hât diu marcgrâvinne hêr
hiute her vil fruo gesant
daz wir behüeten ditze lant.>
der wartman sprach< nu saget mir daz,
( ir vart lîhte deste baz),
wer sint die nâch iu rîtent hie?>
er sprach< die sint vil selten ie
kumen her in ditze lant.
wir haeten gerne daz bekant
ob waer hie heime er rüedegêr,
ob uns der marcgrâve hêr
enthielte unz an den morgen.>
< des sît ân alle sorgen>
sprach der eine wartman;
< sît wir daz vernomen hân
daz ir nahtselde gert,
der werdet ir vil wol gewert.>
dô sagte daz gesinde
der schoenen gotelinde,
dâ waeren komen geste.
hûsfrowe diu beste
diu ie fürsten hûs besaz
gebôt dem ingesinde daz,
daz man ir schône solde phlegen.
dô kam biterolf der degen
daz in diu marcgraevinne sach:
von sînen zühten daz geschach
daz si sich êre an im versan;
dâ von ze friunt er si gewan.
dô man in und ouch sîn volc enphie,
diu marcgrâvinne daz niht lie,
si bat in für sich bringen
mit sînen jungelingen.
dô hete man ir daz geseit
daz ir liehten schilden breit
von den swerten waeren schart.
dô nu der gast enphangen wart
von ir und ouch ir wîben,
dô liez si niht belîben,
sin frâgte in umbe sîne vart,
diu si vil vlîziclîche wart
und ir gesinde gar verholn.
jâ hete er sich sô ûz verstoln
daz ez dâ heime was verdeit:
zwiu solde erz hân hie geseit?
er verdagte ez gotelinde
und allem ir gesinde.
doch dient man im mit vollen wol:
swer guoter wirde danken sol,
alse ouch im dâ was geschehen,
dem wirte er sol genâden jehen:
alsam tâten ouch si duo.
dô in der naehste morgen fruo
was getaget in daz lant,
den recken hiez man ir gewant
ûf die soumaere tragen.
ich enkan iu daz niht vol gesagen
wie schône si in und sîne man
von in scheiden liezen dan.
dô er urloup hete genomen,
si sprach< daz mîn geleite komen
sol mit im vol durch daz lant.
ze medelicke ist unbekant
wie wir si hie gegrüezet hân:
si sullen rüedegêres man
vil wol vermîden ûf den wegen.>
dannen reit der küene degen
nider in daz ôsterlant.
vil seine wart er an gerant,
wan man daz geleite sach:
nieman in dâ abe enbrach.
dâ mite si fuoren wol behuot.
in sprach dâ nieman wane guot.
der herre kam in ôsterlant,
dâ er eine burc ouch vant,
diu hiez ze - mûtâren,
dâ ritter ûf wâren
die besten ûf ertrîche.
die helde lobelîche
der geste wurden gewar.
dô huoben sich ir drîzic dar
und wolden nemen in ir guot,
sô man noch dicke den gesten tuot.
der herren zwêne mit in riten.
wart an den gesten iht erstriten,
daz müeste âne ir danc geschehen.
swie dicke man daz hete gesehen
daz den helden jungen
an strîte was gelungen,
wolfrâte und astolden,
die hie werben wolden
mit strîte guot und êre:
si muosten deste mêre
dar nâch ungemüetes hân.
die geste frâgen man began,
wer si geleite durch daz lant.
biterolf sprach< unser hant
und unser degenlîcher muot
gît uns geleite vaste guot.>
wolfrât der neigte sâ den schaft:
do geschuof diu biterolfes kraft,
er gesaz als ein steinwant.
dô hete der helt an sîner hant
ein sper geneiget sêre,
er dolte ungerne unêre:
wolfrâten stach er dar nider,
daz ros lief zuo der bürge wider.
darumbe enliez er niht den strît,
er versuochte ez anders sît
hie mit biterolfe spiln.
der kunde ritterschaft sô ziln
daz er im lützel iht vertruoc:
durch schilt und ringe er in sluoc
daz diu brünne meil gewan;
dâ von geloubte sichs der man.
dô sîn bruoder daz ersach,
astolt ir einen nider stach,
den andern er ze tôde sluoc.
dô wart zornic genuoc
bitrolf der küene wîgant:
dô vertrat des heldes hant
sich unde ouch sîne man.
die etzel noch nie gewan
im ze friunde bî ir tagen,
in beiden wart von im geslagen
wunden durch die sarwât.
dô sprach der küene wolfrât
< ich gesach nie grimmer einen man:
möhte er etzelen golt hân,
daz beleite er wol eine.
der mînen al deheine
sol sîner nieman rüeren an:
mir ist leit daz ich niht ê gewan
künd ê ich hete hie gestrîten;
ich enhaete in nimmer an geriten.
swie ich ie strîtes hete muot,
ich lieze in immer mêr sîn guot
füeren daz ichs gerte niht.
swaz im durch ôsterlant geschiht,
daz wil ich im gelten gar,
ob sîn niht wirdet gewar
eine der vil küene degen:
vermîdet in der ûf den wegen,
für wâr mac ich des wizzen niht;
âne aleine ob in gesiht
von kriechenlande sintram.
sît mir des siges niht gezam,
sô mac in nemen der krieche,
von dem manec edel sieche
ist worden in den rîchen.>
si rieten friuntlîchen
sich von den gesten scheiden.
geleite von den beiden
sider biterolf gewan
daz er mit urloube dan
von den guoten recken reit;
si wurden dienstes im bereit
für wiene unz in ungerlant,
da er sît der hiunen künic vant.
des enhân ich niht vernomen,
ist er âne strît komen
hinz etzelburc der rîchen,
dô er sô friuntlîchen
wart geleitet durch die marke.
bitrolf der vil starke
hôrte sagen diu maere
daz dâ heime waere
der künec von hiunen rîche
mit helden lobelîche:
der hete er ein vil michel kraft.
dô freute sich der ritterschaft
biterolf, dô daz geschach
daz er si bî dem künige sach.
do er nu ze etzelburc was komen,
dô wart sîn vaste war genomen.
swie vil dâ ritter waere,
man hiez den degen maere
herbergen nâch gewonheit:
swer ie ze sküneges hove gereit,
der wart vil wênic übersehen.
alsô muoste ouch im geschehen.
wol behalten wart ir wât.
durch den biterolfes rât
si legten bezzer kleider an.
dem künege wart dô kunt getân
daz dâ ritter waeren komen:
swâ si haeten sich genomen,
si füerten dürkel schilde schart.
dâ von ir wol gegoumet wart.
der künec hiez dô besehen hin:
< hânt si iht herren under in,
daz sol man mich wizzen lân.>
der bote sach ir herren an:
der truoc wât von abalîn,
dar under hiute vischîn
ze bezoge wâren wol genât:
swaz sîner helde bî im stât,
die truogen ouch die besten wât
die ieman noch gesehen hât:
daz wâren phelle ûz alzabê,
samît grüene alsam der klê
gesniten wîte und ouch vil lanc.
dar under wîzer danne blanc
rîche vedern hermîn
daz si niht bezzer mohten sîn.
der ie ritter gerne sach,
von des boten daz geschach
daz si ze hove muosten komen.
die daz heten ê vernomen
daz fremde wîgande
waeren in dem lande,
die îltens al gelîche sehen.
bî ir gruoze mohte er jehen,
si truogen den recken holden muot.
dise helde vil guot
kômen dâ der künic saz:
der wirt sîn selbes dô vergaz
daz er von sedele niht enspranc.
des sagte im deste seiner danc
bitrolf und die sînen man
des gruozes des im wart getân.
si nigen im, er hiez si sider
zuo ime sitzen nider
und hiez in schenken sînen wîn.
wie kunde er ungefrâget sîn
dâ von dirre maere,
von wanne komen waere
der recke unde ouch sîne man!
der künec versûmen des began,
daz der eine ir aller phlac
an dem diu hoehste zuht lac.
der künec von bergen sprach duo
dem sune botelunges zuo
< etzel, tiurlîcher degen,
wir haben uns ûf den fremden wegen
gearbeit harte sêre
daz wir die grôzen êre
hie zen hiunen wolden sehen;
und waer doch anders niht geschehen,
wan daz uns vînde hânt vertriben,
und waern ouch anderswâ beliben,
wan durch dînen lop den rîchen,
den man vil volliclîchen
saget in ander künege lant;
und wirt uns des iht erkant,
sô var wir immer deste baz.>
der künec dô langer niht ensaz,
von dem sedele er balde spranc
und sagte im der reise danc
die si dâ riten in sîn lant.
er sprach< mîn golt, mîn gewant,
silber ros und ouch mîn wât
und allez daz mîn kamere hât,
daz sol mit iu geteilet sîn.>
er tete in guoten willen schîn
und bevalch die geste alzehant
râmunge ûz der wlâchen lant.
vil dringens muoste dâ geschehen
von den die ez niht heten gesehen
wie si der hiunen künec enphie.
dô sach man rüedegêren hie
und gotelen den rîchen,
die enphiengen vlîziclîchen
die fremden wîgande
in hiunischen landen.
si nigen als si solden.
die andern die dâ wolden
ouch mit gruoze si enphân,
die sach man zuo den gesten gân:
gibeche unde hornboge,
von pôlân der herzoge,
der was in vancnüsse dâ,
zuo den gesten gienc er sâ;
alsô tete ouch schrûtân,
der herzoge von merân,
von dürengen der wîgant
der was irnfrit genant;
dar gienc ouch otte der degen
des prîs vil hôhe was gewegen;
îrinc unde ouch hâwart,
von den vil wol gegrüezet wart
der fremde gast in hiunen lant.
dar nâch enphienc in sâ zehant
vil vlîziclîchen rüedegêr.
dô dankete im der degen hêr
der guoten nahtselden
die er mit sînen helden
ze bechelâren nâmen,
dô si dar kâmen,
von der marcgraevinne:
< diu erbôt uns die minne,
daz uns nie baz erboten wart
an unser langen ûzvart.>
< daz wolde got>, sprach dô der degen,
< daz iuwer waere alsô gephlegen
als ich iu des gunde.
gelebe ab ich die stunde,
daz ir rîtet durch daz lant,
iu wirt mîn wille baz erkant.>
si sâzen nider alsam ê.
dô was der küniginne wê,
wenne daz geschaehe
daz si die geste saehe.
si was guoten recken holt:
dâ mite hete si daz versolt
daz man ir maneger tugent jach.
swâ daz von frouwen sît geschach,
die valschen hetenz niht für guot:
si jehent noch daz in ir muot
stê ûf valsche minne.
dem site der küniginne
niht ze rehte wâren kunt,
er mohte irz velschen manege stunt.
swenne ab ez der künec vernam,
er wart ir nimmer drumbe gram
daz siz den helden schône erbôt.
si half vil manegem ûz der nôt,
die er vil ofte hete lân
bî im vil unberâten gân:
si habte im ûf sîn êre,
und daz er rüedegêre
hete gegeben den gewalt
daz der snelle degen balt
die armen wol beruochte,
swaz ir sîn lant besuochte.
froun helchen antfanc niht geschach
wan dô si den helt sach
sît an dem dritten morgen.
diu frouwe was in sorgen
wie si die helde enphienge alsô
daz sîn die geste waeren frô
und daz sis ouch haete êre:
des vleiz si sich vil sêre.
der dritte morgen der was komen,
dô hete der helt wol vernomen
daz in diu frouwe wolde sehen.
des enkunde ouch anders niht geschehen
wan dâ si bî dem künige saz.
der helt liez ungezürnet daz
daz si von dem sedele stuont,
sô frouwen noch in zühten tuont.
biterolf dô zuo ir gie:
sô vlîziclîch si in enphie
daz si dâ von wart rôsenvar.
si blicte harte dicke dar:
ez was ein wol gestalter man.
frou helche in biten dô began
daz er sich niht verdriezen dâ
lieze, und hete er anderswâ
bezzer friunt danne an in,
dâ woldens immer dienen hin
daz er in eine waere holt:
< mînes herren lant und unser golt,
daz sol mit iu geteilet sîn:
lât iu durch den willen mîn
versmâhen niht des küneges guot.
ob ir iu schaden iht getuot
durch iuwern gebresten,>
alsô sprach si zen gesten,
< daz waere unwîslîcher muot:
der künec sô gerne gît sîn guot
daz ez nieman kan gesagen.
vil gerne hoeren wir die klagen
die unser gâbe ruochent
und ez an uns versuochent.>
der gast sprach mit guoten siten
< frouwe, swen man hoeret biten,
ob der denne wirt gewert,
sô ist getân des er dâ gert.
ich diene iu gerne swaz ich mac:
des ie der hiunen künic phlac,
vil wol versihe ich mich dar zuo,
swaz ich im mîner dienste tuo,
er lône mirs in einem tage.>
sît wart daz frouwen helchen klage
daz er niht von in beiden nam.
swenn aber den künic des gezam
daz er herverten reit,
der gast vor sînen recken streit
sam er ervehten wolt diu lant:
die besten die man bî im vant,
sô was er einer drunder
unde iedoch besunder
der beste den man dô vant.
den sige warp ie des heldes hant
vil dicke lobelîchen
vor etzeln deme rîchen.
daz treip der fürste, daz ist wâr,
vil nâhen in daz dritte jâr
daz im der dienste nie gebrast:
darumbe diente dâ der gast
daz er die recken gerne sach.
zem künege man vil ofte sprach
< seht disen, der möhte künic sîn.
er tuot sô degenlîche schîn
und ouch sô ritterlîche tât:
swiez umbe sîn geslehte stât,
der recke ist alsô gemuot
daz ir und allez iuwer guot
kundet niht verenden,
daz er mit sînen henden
tuot in manegen zîten
in ieslîchen strîten.>
dô sprach der künec< ich weiz vil wol
wie ich den helt versolden sol:
iedoch hân ich des immer scham
daz er nie niht von mir genam.
mîne gâbe hiete genomen,
waere er mir sô nâhen komen,
baligân der vil rîche,
der vil gewalticlîche
ist ob den heiden alse ich bin.
ê er âne gâbe kaeme hin,
jâ gibe ich im ê zehen lant.>
sît wart biterolf gesant
dâ sich ander helde werten
in stürmen alsô herten:
etzele unde sîne man
michel êre dâ gewan.
biterolf und rüedegêr
und schrûtân der degen hêr
die tâten swaz si kunden.
si heten in ir stunden
etzelen gedienet alsô
daz ers ê was vil dicke frô:
nu muoste er sîn trûric wesen.
sîner liute wênic was genesen
vor einer stat dâ man streit.
als uns daz buoch hât geseit,
diu stat diu lac durch priuzen lant:
si was gamalî genant.
vil türne hete se unz in daz mer.
des wart daz hiunische her
getwungen vil sêre,
unz daz mit rüedegêre
biterolf der helt truoc
ein zeichen rîche genuoc
zem aller hoehsten bürgetor.
die in des solden wesen vor,
durch list wichen in hindan:
biterolf und sîne man
und rüedegêres ingesinden,
die muoste man dô vinden
innerhalp der bürge tor.
vil manic ketene was dâ vor
mit swerten ûf gehouwen:
wie mohtens des getrouwen
daz si wurden sît gevangen?
si heten sich vergangen
ein gazzen ze verre.
biterolf der herre,
der helt vil unverdrozzen,
mit würfen und geschozzen
wart er des ertwungen
daz er kam gesprungen
an einen turn vesten.
den werten dâ den gesten
die stolzen burgaere:
des wart der schade maere.
dô wart gevangen rüedegêr
und biterolf der degen hêr
wol mit ahzic mannen.
die andern muosten dannen
harte schedelîchen komen.
den sige heten dâ genomen
die stolzen burgaere.
daz wart harte swaere
etzelen deme rîchen;
helchen sicherlîchen
truobte ez sêre den muot
daz sô manegen helt guot
etzelen weste von in tôt:
noch was daz ein groezer nôt
daz dise gevangen lâgen hie.
swaz er des sînen schaden ie
von sînen vînden gewan,
sô klagte er nie sîne man
sô bitterlîchen sêre.
hundert tûsent oder mêre
möhten dar under ligen tôt,
ê daz si koemen ûz der nôt.
herverten dô began
der künic selbe und sîne man.
helche diu hêre
klagte die grôzen êre
diu an den helden was gelegen.
swie etzel hete manegen degen,
si muosten sider, daz ist wâr,
gevangen ligen wol vier jâr
in der stat ze gamalîn,
daz er mit al den recken sîn
si nie kunde ervehten;
wan daz den guoten knehten
ein gelücke sît geschach
daz durch einen turn brach
diu biterolfes wîsheit;
als uns daz maere ist her geseit,
dar ûf ruowiclîchen lac
des landes herre manegen tac,
er und diu küniginne,
und sliefen nahtes drinne;
dâ von si sît daz lant verlurn.
biterolf durch einen turn
in den andern hete gegraben:
jâ wolde er dâ niht langer haben
quâle alsô gevangen.
waer des niht ergangen,
etzele und alle sîne man
die kunden niht ervorhten hân
ûz der selben veste
die vil werden geste.
bodislau der künic hiez.
daz in ie genesen liez
biterolf, dâ er in vant,
darumbe lie des heldes hant
den künic sînes tôdes frî,
daz im lac beneben bî
daz aller schoenste windisch wîp,
diu ie gewan den ir lîp
ûf al dem ertrîche.
er schiet in baldeclîche
von der küniginne dan.
den künec besliezen er began,
als er beslozzen selbe lac.
mit ir handen manegen slac
diu frouwe zuo ir brusten sluoc:
leide sô was ir genuoc,
jâ vorhte si ir mannes tôt.
der gast ir schrîen sâ verbôt,
si getorste ninder werden lût.
do bevalch der dietlinde trût
den künic rüedegêre:
er lie bî im niht mêre,
wane zehen sîner man.
vil tougenlîche kam er dan,
nâch volgeten im wol sibenzec man.
zuo der porte er kam gegân,
er vant den portenaere:
des wart sît freuden laere
gamalî diu guote stat.
des slüzzels er niht langer bat,
daz houbet er im abe gesluoc.
sorgen hete er dô genuoc
wie erz den hiunen möhte gesagen,
daz er niht selbe wurde erslagen:
des muoste er eine frist hân.
daz sîn gesinde hete er lân
innerhalp der porte ligen;
des mohte deste baz gesigen
dô daz hiunische her.
an dem lande und ûf dem mer
hiez man behüeten dô die stat.
ir spil dem was sô nâhen mat,
des si heten ê gephlegen:
biterolf der ziere degen
allenthalben schâch bôt.
der priuzen künec kam in die nôt,
und möhte er etzeln selbe hân,
daz er in gerne hete lân.
der hiunen gast der was nu komen.
etzele hete nie vernomen
sô rehte liebiu maere:
mit helden lobebaere
huop er sich zuo dem bürgetor.
sân ze strîte sich dâ vor
rihten nu der hiunen man.
in der stat sich des versan
der bürge hüetaere,
und was in vil unmaere.
der beste, die der künic dar
brâhte, wart schône gar
vor dem tage tûsent man.
biterolf der gie von dan,
sam der helt waere
des nahtes zirkaere.
er kam hin wider dâ im ê
vil dicke was gewesen wê:
dâ von si lant und stete vlurn.
dô sande er ûf den einen turn
einen hervanen breit,
sehzic helde vil gemeit
die liez er durch daz loch dar in.
dô gie er aber wider hin
dâ er den wirt gevangen vant:
der muoste rüedegêres hant
dulden, alse er in ê.
drîzic frouwen oder mê
sach er bî im weinende stân:
ob si in leben wolden lân,
des bat der wirt die geste.
degene aller beste
sprâchen< ir ersterbet niht;
swaz halt anders hie geschiht,
ir geniezet iuwers wîbes
mêr danne iuwers lîbes.>
dô wart der etzelen van
von dem rüedegêres man
an einen schaft gebunden.
den stiezen sie ze stunden
vil hôhe ûz einer zinne.
dô vlêgt diu küniginne
daz man ir lieze ir liut genesen.
< daz muoz an etzeln gnâde wesen>
sprach biterolf der wîgant.
< iedoch gewiget iu wol mîn hant,
iu und den frouwen die hie sint,
daz man der guoten ritter kint
füeret mit uns lebendic hin.
iedoch ist etzel nu her in.>
dô wert diu naht niht mêre.
der hiunen künec vil hêre
liez sîniu horn erschellen
daz sîne wîcgesellen
im hulfen stürmen zuo der stete.
daz liut gemächlîchen tete
daz ez nu an die were gie.
vil übele nâchgebûren hie
heten si dar inne.
mit strîtgerendem sinne
der künec den schilt nam zuo der hant:
dâ von sô hete er hiunen lant
lebendic nimmer mêr gesehen:
sô herte muoste ez noch geschehen
von strîte bî im drinne.
si sâhen ûz der zinne
noch des zeichens niht wagen:
der hiunen künic waer erslagen,
wan von lütringe îrinc,
dem vil hôhe sîniu dinc
ze manegem strîte wâren komen,
der hete hinder sich genomen
etzeln den vil rîchen.
man mohte wol gelîchen
die lassteine kaltem snê
den si vil dicke sâhen ê
von winden undr einander gân:
alsô dicke wurden lân
die schüzze nider ûf sie.
ouch wart von slingen würfen hie
erdoezet manic helmvaz.
waz half der hiunen künic daz,
daz er selbe drinne was?
mit grôzer nôt er dâ genas.
ze siben torn sich huop der strît;
dâ was der etzelen nît
vaste under si bekomen:
waere er noch niht danne komen,
sô waere er von den steinen tôt.
nu gie den burgaeren nôt
ob in gezwîvelt der muot;
wan si ein zeichen harte guot
sâhen ûf dem turne wagen.
wer möhte in daz ze gloube sagen
daz ir künec gevangen lac?
der wirt in dâ mit dô gewac
daz er in selbe fride schuof:
man hôrte lûte sînen ruof
daz erz ir künic waere.
dô sach man ouch strîtbaere
daz volc dort unde hie.
der porte man deheine lie,
man versuochte ez unz dar an:
des manegen verchwunden man
gewan der künec von hiunen lant.
dâ tete selbe des fürsten hant
daz ez vil lange wart geseit.
swie hêrlîchen bî im streit
der künic von den bergen,
sît muoste er fride werben.
in der gewalte er ê dâ was,
vil maneger sît von im genas
der des tôdes müeste wesen.
man mohte fuodermaeze lesen
die phîle vor der mûre ligen.
senfte muoste sîn verzigen:
man fuort den wirt gevangen dan,
sîn schoene wîp tet man alsan.
die stolzen burgaere,
mich dunket daz ir waere
vil maneger dâ von ungemuot,
dô si die vesten türne guot
der hiunen künege muosten geben,
ob si iht langer wolden leben.
mit nôt gedingte rüedegêr
von priuzen lant dem künege hêr.
die hiunen brâchen nu hie vor
vil manege tür unde tor.
den liuten was gedinges nôt,
daz sis niht alle sluogen tôt
die si dar inne funden.
doch sach man manegen wunden,
dem sîn was vil ungedâht.
swie dicke der hiunen künic brâht
hete dar diu grôzen her,
si wârn im ie alsô ze wer
daz er und alle sîne man
mit schaden muosten scheiden dan.
diu stat waer immer frî gelegen,
niuwan durch den einen degen,
der lôst sich selben ûz der nôt.
der priuzen lac dâ maneger tôt,
dâ von daz er den turn durchbrach.
vil gewaltic man dô sach
etzeln den vil rîchen:
nie wolde er entwîchen
unz man im den künec gap bî der hant,
der muose im liute und ouch sîn lant
antwurten und sîn selbes lîp.
schiere hiez er im sîn wîp
zuo sînem stuole wîsen:
sol man unkristen prîsen,
sô mohte ouch si ze prîse wesen.
an einen buoche hôrte ich lesen
ze einem wâren maere
daz neheiniu schoener waere
von windischer diete.
der si bî ir hiete,
der mohte man dâ schouwen
sehs und ahzic frouwen,
wîp unde ouch meide.
nu bâten dise beide,
der gast und her rüedegêr,
daz er der kamere keine mêr
in der stete lieze brechen:
wold er sich schône rechen,
sô solde er mit im füeren dan
die küniginne unde ir man,
und daz er berihte daz lant
und die stete nâch sîner hant.
dô volgete er vil drâte
nâch der helde râte.
er nam sô vil der gîsel sider
daz er mit im fuorte wider
vier hundert ritter oder baz.
der künic tete ez umbe daz,
daz man ez sagte ze maere
daz sîn hofgesinde waere
der künec von priuzen landen.
in die stat si sanden
und suochten drûz die besten
die si dar inne westen,
ez waere frouwe oder meit.
grôzen schaz und rîchiu kleit
fuorten si dô mit in dan.
als ich iu gesaget hân,
sô rihten si sich sâ zehant
mit verte zuo der hiunen lant.
nâch dirre grôzen arbeit
mit urloube von in reit
der marcgrâve rîche.
er hete vil müelîche
erbiten daz ez geschaehe
wie er bechelâren saehe
unde ouch gotelint sîn wîp:
diu hete ir minniclîchen lîp
nâch im verklaget sêre.
dem guoten rüedegêre
die wege wâren wol bekant.
dô kêrte er von der priuzen lant
gâhende vil starke
ze bêheim durch die marke:
ich waen er schône enphangen wart
nâch sîner langen ûzvart,
dô er gesunder wider reit.
wirn wizzen niht der wârheit
wie er sîn dinc dâ heime vant.
beidiu liute und ouch sîn lant,
daz mohte allez deste baz,
do er nu ze bechelâren saz.
ich wil gelouben und des jehen
daz sîn antfanc was geschehen
mit guote in sînem lande.
dem edeln wîgande
wâren sîne recken holt.
daz hete er wol an in versolt.
waz er nu dâ ze tuonne habe,
der maere muoz ich kumen abe,
ich wil iu von den fürsten sagen.
si kâmen kûme in vierzic tagen
zuo der tuonouwe an die fluot.
si fuorten manegen ritter guot,
etelîche wol gesunde,
sumelîch vil sêre wunde,
und heten dort in strîtes nôt
ir vil manegen lâzen tôt.
ze etzelburc der rîchen
kam vil froelîchen
der künic dâ er helchen vant.
die liute über al sîn lant
der künfte wurden wol gemuot.
sîn wîp diu küniginne guot
diu gienc für einen palas:
der künec von sînem rosse was
gestanden nâhen bî der tür.
mit helchen giengen dô dar für
die dâ bî ir solden sîn.
< willekomen, herre mîn,>
sprach daz tugenthafte wîp,
< mir ist liep daz ich dînen lîp
sô wol gesunden hân gesehen:
des wil ich mir gelückes jehen.>
ir gruozes dankte er ir gar wol,
als man friunde danken sol.
mit armen er si umbeslôz,
er sprach< mîn dienest ist sô grôz
daz du mirs gerne danken solt.
ich bin dir inniclîchen holt
und hân dir mêr gesindes brâht.
dâ mit hân ich an dich gedâht
in sturme dâ ich angest leit.
manege frouwen unde meit,
die solt du heizen für dich gân,
die ich ze gîsel mit mir hân
gefüeret her in ditze lant.
frouwe, daz sî dir bekant,
ich hân der priuzen künic hie.>
froelîchen si dô mit im gie.
abe zôch er sîn gewant,
zuo ir saz er sâ zehant
und sagte ir diu maere
wie im dort gelungen waere.
ir heile danken si began
daz er die selben stat gewan
diu im sô lange widerstreit,
und daz diu rüedegêres leit
heten ende sô genomen.
dô sprach er< daz ist allez komen
von unserm küenen gaste.
landes hundert raste
hete verdienet wol sîn hant.
ich enhete die stat noch daz lant
âne in niht betwungen.
daz uns ist gelungen,
daz ist von sînem ellen komen.>
dô si hete daz vernomen,
dô sprach vil güetlîche
diu küniginne rîche
< dâ sul wir denken wol dar zuo
daz man nâch sînem willen tuo
allez daz er selbe wil.
möhten wir im alsô vil
geben sam wir lande hân,
daz solde allez sîn getân.>
dar nâch, dô si daz gesprach,
der künec die frouwen ir gemach
schaffen mit ir meiden liez.
bat er im bereiten hiez:
si badeten harnaschrâm von in.
von priuzen lant die künigin,
die hiez man dô ze hove komen.
si hete ê wunders vil vernomen
von frouwen helchen rîcheit:
vil frouwen unde manic meit
mit ir ze hove muosten komen.
der wart sô schône war genomen
daz siz für minne muosten hân.
dô sach man in engegen gân
des künic etzelen wîp.
maneger schoenen frouwen lîp
hete si dâ vor dicke erkant:
sô schoeniu in der hiunen lant
was bî ir zîten nie bekomen,
sô die der künic hete genomen
in der stat ze gamalîn.
hundert und zwelf magedîn
sach man bî der frouwen gân,
ritterwîp vil wol getân
vierzic unde viere.
in ir zühten schiere
frou helche den ir gruoz bôt.
mich dunket daz si noch der nôt
darumb niht âne waeren.
si heten nâch den maeren
sich einander hie gesehen:
was ie hôher gruoz geschehen,
den tete frou helche ir gesten;
iedoch sach man in bresten
ir senfte: des wurden naz
ir wange trahene, ich gloube daz.
doch trôste si des wirtes wîp,
vil wol gehandelt wart ir lîp.
frou helche boten sande dan,
zem künege si urloup des gewan
ob si ir geste solde
küssen, ob er wolde
haben daz für guot.
dô sprach er< swaz si gerne tuot,
dâ ist ouch wol mîn wille bî.
swie si mit in gerne sî,
des sol ich si irren niht.
swaz man der klagehaften siht,
waz wirret, machet si die frô?>
daz enbôt ir der künic dô.
dô si daz urloup gewan,
vor liebe lachen si began:
die künegin si dô kuste,
vor liebe si des luste.
den andern si ez wol erbôt.
dâ mit schiet si si von der nôt,
diu in was klagende nâhen bî.
funfzic wochen unde drî
si wâren sît gesinde dâ.
si waeren ninder anderswâ
gewesen sanfter in der stunt:
den konewîben tete man kunt,
si solden ligen bî ir man.
dô man in daz urloup gewan,
ir ieslîchen dûhte ez guot.
man phlac ir, sô man gîsel tuot,
der alten und der jungen.
mit guoter vestenunge
und daz si giengen âne bant,
des muoste dâ der besten hant
mit gestabten eiden swern.
do endorfte in ouch daz nieman wern,
si riten ûz oder în.
des priuzen wîp diu künigîn
was nie baz berâten,
in ir selber kemenâten
ir gesinde hete ez guot.
deste sanfter stuont ir muot
hin wider in ir herren lant.
nâch einem gaste wart gesant,
den bat man hin ze hove gân,
von des schulden was getân
daz man brach der priuzen stat.
frou helche diu küniginne bat
daz er des lôn solde enphân,
des er ze dienste hete getân
etzelen dem rîchen:
des bat si vlîziclîchen.
dô er hin ze hove gie,
diu frouwen in vlîziclîche enphie.
sît frâgte si in maere
wie er geheizen waere.
daz hete er nieman dâ geseit.
do gedâht der degen vil gemeit
< swie ez doch recken niht entüge.
nu muoz ich mich mit einer lüge
mit rede von ir enbinden
daz>...
...
dô er vor der frouwen saz,
er gedâhte im eines namen:
er dorfte sichs niht enschamen;
der in von wâren schulden truoc,
biderbe was er genuoc:
er was ein recke ûz tenelant,
fruote sô was er genant.
dô sprach der degen guote
< frouwe, ich heize fruote.>
daz hete der künec ouch ê vernomen
daz ein recke waere komen
mit jenem künege in daz lant,
der ouch fruote was genant.
diu frouwe sprach< ez tuot mir wol
daz ich doch daz wizzen sol,
wan ich iuch gerne nennen wil.
wir hân dar nâch gefrâget vil
daz ich et nie kunde ervarn.>
er sprach< dâ von muose ichz bewarn:
ich bin ein ellender man,
durch vînde haz ichz verlân.>
dem künege wart ez ouch geseit.
dô gie der degen vil gemeit
zuo helchen der vil rîchen:
si beide güetlîchen
buten im ein fürsten lant,
der sich dâ hete fruote genant,
des hoehster name von - bergen hiez,
da er rîchiu lant und krône liez.
dô si in buten an ir guot,
dô sprach der recke wol gemuot
< her künec, nu lât michs âne sîn
unz daz ez baz die hende mîn
verdienen, als ich willen hân.
ich hân noch solhes niht getân
darumbe ich krône süle enphân,>
sprach der vil werde man.
< gediene ichz, sô lîhet mir:
die wîle ichs alles wol enbir,
daz niht ensprechen iuwer man,
diu gebe sî umbe sus getân.>
der künec ersmielte, ez was im zorn:
< sô hete ich manege gâbe vlorn,>
sprach der botelunges suon;
< solde ich nieman liebez tuon,
wan als ir wille waere,
sô möhte mir mit swaere
dienen ein ieslîcher man.>
der gast der sprach< die wîle ich hân
des ich dâ brâhte in iuwer lant,
sô nime ich schaz noch gewant.>
die rede liezenz alsô stân.
do begunde ein iegelîcher gân
dar in dô sîn wille truoc.
si funden dâ ze hove genuoc
der kurzwîle der man phlac:
dâ mite vertriben si den tac.
daz jâr nam doch ende sint.
des künic ôserîches kint
hete ir gîsel baz unt baz.
daz buoch hât uns verholn daz,
wes dô die hiunen muosten phlegen,
und wie ouch fruote der degen
truoc sîne degenheit.
ein ander maere ist uns geseit:
möht ich daz vol ze ende sagen,
sô wolde ich iuch niht verdagen.
des ist uns ende niht gegeben
wie die hiunen dô ir leben
schuofen dâ in ir landen,
ode waz den wîganden
der künec erbôt zen êren.
nu müezen wir verkêren
die rede die wir gesprochen hân.
nu wil ich iuch hoeren lân
umb einen den küenesten degen:
dâ man ze prîse solde wegen
tûsent künege rîche,
man funde im niht gelîche.
der kom sît in hiunen lant:
dâ von er wîten wart erkant,
dô man in bî den recken sach.
ob man im iht der êren jach
die tumber degen werben sol,
die kunde er ouch verdienen wol. âventiure wie dietleip zen hiunen sînen vater suochte.
von dem ich iu wil nu sagen,
der wuohs in sînen jungen tagen
in einem rîchen lande.
den zugen wîgande,
wan er was eines küneges kint.
diu küniginne dietlint
diu hiez sîn phlegen schône,
darumbe daz er krône
ob rîchen landen solde tragen,
daz daz ieman kunde sagen,
gelebte er daz und naeme swert,
daz er niht waere krône wert:
daz waere sîner muoter leit.
ir name der ist uns ouch geseit:
si was frou dietlint genant,
ir dienten siben fürsten lant;
dâ hiez ir sun her dietleip.
der ditze maere an schreip,
der wolde es niht vergezzen.
er wart ein helt vermezzen
vil tiure und vil rîche:
dem tete er wol gelîche,
wan er in sîner jugende
phlac vil maneger tugende
und vleiz sich maneger êre.
waz sol ich sprechen mêre?
die in heten under in erzogen,
von den er ûf den regenbogen
vil selten wart gesetzet.
si wolden sich ergetzet
ir herren mit dem kinde hân.
allez daz wart wol getân.
swie man im gap die lêre,
des wuohs er nâch ir êre.
si zugen in vlîziclîche:
sînem vater vol gelîche
gebâren er begunde.
( des was vil manege stunde
daz si ir herren heten vlorn.)
den jungen recken wol geborn
bî helden dô man wesen hiez:
vil gerne er sich scheiden liez
von ammen die sîn phlâgen ê.
dem kinde tete daz dicke wê:
swa er ander kindel bî im sach,
ir etelîchez< vater> sprach;
sô frâgte er ie der maere
wâ sîn vater waere.
sîn muoter weinende sprach
< daz ist lanc daz ich den sach,
der dir ze vater was genant.
des lop was sô wîte erkant
daz wir den gerne möhten hân.
nu ist mîn vlust alsô getân
daz ich nâch im hân immer leit:
wir enwizzen wie er uns entreit,
dô ich in guoten freuden saz
und sach ouch an dem künege daz,
daz im vil hôhe stuont der muot.
vil manegen edeln ritter guot
er mir hie ze dienste lie.
dô er nu jungest von mir gie,
dô kuste er mich an mînen munt
und bât, mich friste got gesunt:
daz was do ich in ze leste sach.
ob ie wîbe leit geschach,
sô ist ouch mir vil leit geschehen.>
dô sprach daz kint< hôrt ieman jehen
war er hin gekêret sî?>
si sprach< der frâge ich selten frî
bin gewesen zehen jâr,
ob ieman sagte mir für wâr,
dem dîn vater waere erkant,
ob er in ander fürsten lant
geriten sî durch minne,>
als sprach diu küniginne,
< oder durch sîn degenheit.
nu ist mir anders niht geseit,
wan daz ich sîn âne bin.
dâ von gêt mir mîn wîle hin
vil dicke jaemerlîchen.
nie fürsten alsô rîchen
gesach ich sô diemüete.
sîn zuht und ouch sîn güete,
die riuwent mich vil sêre:
dar zuo ich keinen mêre
ninder miltern hân gesehen,
sô wir die besten hoeren jehen.>
dô sprach der junge helt gemeit
< muoter, und waere ez iu niht leit,
ellende ich immer wolde sîn,
ich enfunde danne den vater mîn.>
si sprach< friunt und lieber suon,
warumbe woldest du daz tuon?
waer er uns lebendic nâhen bî,
sô lieze er uns des selten frî
ern saehe uns under stunden.
ich hân niht anders funden,
ich waene des, er sî et tôt.
sô waer daz alsô grôz ein nôt,
sold ich dîn, liebez kint, enbern.
du solt die muoter dîn gewern
daz du nimmer von ir kumest;
dâ mite ouch du dir selben frumest.
du suochest dîner lande reht.
ob dir daz ritter unde kneht
râten wolden, liebez kint,
und die mit dir vergîselt sint,
die trôstes an dir solden leben,
einen rât wil ich dir geben:
du wirst ze künege hie genant,
du solt behalten dîniu lant,
als ir dîn vater hie vor phlac.
si sint nu vil manegen tac
in dîner helde hant gewesen.
der frumen lützel waere genesen,
waer der von kärlingen niht:
swaz ie den liuten dîn geschiht,
walthêr ez heizet widertuon.
der ist dîner basen suon.>
dô sprach der kindische degen
< got den lâze wir sîn phlegen,
nu wir sîns lebens niht enhân.
frouwe, ich wil bî iu bestân.>
diu rede freute ir al den sin.
doch gedâhte er zallen zîten hin,
wa er sînen vater funde.
so er tougenlîchest kunde,
sô nam er helde kleider war,
unz daz er erkunte gar
wie man gên strîte harnasch truoc.
niemanne er des zuo gewuoc.
er lernte rîten umbe daz,
ûf frevele ros er dicke saz;
schilde nam er an die hant,
die tjost er kündelîche ervant.
sîn muoter sîn dô hüeten hiez
daz man in ze rehte rîten liez.
wâ von? ez dûhte si ze fruo.
dô greif ab er sô kindisch zuo
daz von sîner tumben hant
vil der schefte wart verswant.
swaz er die wîsen sach begân,
des enwolde er niht verlân.
ern lernete ez sâ zehant.
swâ er die schirmmeister vant
mit schilde und buckelaeren,
er hiez im ie bewaeren
die kunst bescheidenlîche.
den jungen künic rîche
ein meister lêrte ûz îrlant,
daz diu kunst des heldes hant
über alle schirmaere truoc:
dar zuo was er starc genuoc.
vil ellenthafte stuont sîn muot.
der junge starke degen guot
vant ein gewaefen rîche
daz ê vil ritterlîche
sîn vater dicke hete getragen,
und einen helm wol geslagen
von gesmîdigem stâle:
der wünniclîchen mâle
vil manegez man dar ûfe vant,
diu des smides meisterhant
hete gestreut in den glanz;
siben helmelîsten ganz
in heten umbevangen.
dâ bî sach er ouch hangen
ein wâfen scharf unde breit.
ez waere sîner muoter leit.
solde si ez wizzen,
daz der helt vermezzen
daz wâfen alsô gerne sach.
vil heimlîche daz geschach
daz er ez von der scheide nam.
dô sprach daz kint vil lobesam
< solde ich dich nâch willen tragen,
hât dich ie heldes hant geslagen,
daz wirt eriteniuwet dir.
kumest du nu ze mâze mir,
ze ringe noch ze swaere,
wie frô ich des waere.>
er schutte ez als ein schirmswert.
eins herren was ez wol gewert:
ez was zuo im bestatet sô
daz er sîn was selbe frô,
dô er die güete dran versan.
er hal ez alle sîne man,
dar zuo meide und ouch diu wîp.
dô wâfente er sîn selbes lîp,
daz er doch übele kunde.
baz danne drî stunde
schutt er den halsberc ane sich,
der junge degen lobelich
( wie sêre in des luste!)
daz er gên der bruste
daz hinder teil ie kêrte.
diu arbeit in lêrte
daz er ez sît ze rehte truoc.
haele hete er des genuoc
daz er daz wâfen drüber bant;
den schilt nam er an die hant.
dô bant er ûf den helmhuot:
nâch ritterschefte stuont sîn muot.
von nagele huop er einen schaft,
dar an versuochte er sîne kraft,
der was von helfenbeine:
ob er den alters eine
alsô tumber solde tragen,
daz möhte man für wunder sagen.
von drîen stücken was der schaft
von des selben heldes kraft,
der manege tjost dâ mite reit.
von kalîe ein sper vil breit
was vorne an daz ort geslagen.
swaz man von spiegelvarwe sagen
möhte deheiniu maere,
swaz es noch liehter waere
danne ie dehein glas gewan,
der selbe helme wol getân
der mohte gelîchen wol dar zuo.
der nu in beiden rehte tuo,
der sol si ninder füeren
ern welle tjoste rüeren.
entwâfen er sich began.
dô brâhte ez der vil tumbe man
hin wider dâ erz ligende vant.
in dûht wie wâfen unde gewant
im allez rehte solde komen:
haet sîn muoter daz vernomen,
si hete ez lîhte baz behuot.
vil vlîzic was der degen guot,
ob er der küniginnen
immer möhte entrinnen.
mit rittern reit er ûf den plân,
( daz hete er selten ê getân,)
dâ er die valkenaere vant.
nieman liez er sîn erkant
waz sîn wille waere.
der junge helt vil maere,
sus wolde er sich steln dan:
sîn muoter biten er began
daz si im gunnen solde,
swenne er rîten wolde,
beizen mit den helden
ûz sînes vater selden.
den urloup er von ir gewan.
dô schicte er drî knaben dan,
wâ im die solden komen zuo
an dem naehsten morgen fruo.
vil kûme er beit, daz began,
sît er rîten wolde dan,
dem tage diu naht den schîn benemen.
ez enmohte im anders niht gezemen
daz er sich hete alsô verholn.
sîner muoter wart verstoln
sînes lieben vater wîcgewant:
er liez ez mit sîn selbes hant
die mûre durch ein venster nider;
ez nâmen sîne knaben sider
und brâhten ez dâ er si hiez.
vil selten man in slâfen liez
ninder wan dâ lâgen wîp
und stolzer juncfrouwen lîp:
kunde er minne hân gephlegen,
sô waere er sanfte dâ gelegen.
dô was im minne unerkant,
dâ von vil selten si sîn hant
hete gerüeret inder an.
swaz im dâ liebes was getân,
des wart in niene habedanc:
in dûht daz wesen bî in lanc.
dô er den tac alrêste ersach,
ze sîner muoter er dô sprach
< frouwe, ich wil nu beizen varn.>
si sprach< got müeze dich bewarn.>
< muoter, als tuo er ouch dich,
nu du ungestrâfet lâzest mich
von dîner kemenâten gân.>
er sprach< du hâst mir liep getân.
ich kürze hiute mir den tac,
sô ich aller beste mac,
mit den valkenaeren mîn.
got hüete, liebe muoter, dîn.>
von sînem rosse ist uns geseit,
daz er ûz der bürge reit,
belche sô waz daz genant
ir lützel man dekeinez vant
bezzer in al dem rîche,
im enwaere daz gelîche
daz her dietrîch der degen reit.
doch ist uns daz für wâr geseit,
ez was der selben stüete.
sîner sterke und sîner güete
bedorfte wol der junge man.
vil ungeselliclîche getân
was von hove sîn reise.
des landes manic weise
nâch im weinen sît began.
nu vant der kindische man
sîne knaben und die wât:
dô wolde er des niht haben rât,
ern schutte an sich daz liehte gewant.
dô rûmte er sînes vater lant,
ê es inne wurde dietlint.
in fuorten sîne knaben sint
ze tôlêt für die guoten stat.
wie vaste er sich dâ heln bat!
sam tâtens ouch sîn selbes sît.
den schilt von golde spannen wît,
den bedahten si sô gar
daz des dâ nieman wart gewar.
der schaft der was ouch überzogen
( daz maere daz ist ungelogen)
mit einem phelle tusenvar,
daz des nieman wart gewar
daz er von helfenbeine schein:
si fuorten in alle viere enein.
den helm er ouch tougen truoc.
von dublêt guot genuoc
ein hulft ob sînem satele lac:
darumbe daz der schîn niht wac
wider dem schilde wol getân,
er kunde keiner slahte man
vermelden daz siz waeren.
er liez in manegen swaeren
sîn volc über al daz lant.
dô sînen recken wart erkant
daz er niht beizen was geriten,
sîn muoter begunde biten
mit weinen daz man suochte'n helt,
< habt ir ze valkenaere erwelt
den mînen einigen suon,
sô moht ir nimmer wirs getuon.>
dô suochten si in ûf dem plân
beidiu wider unde dan,
in kunde et nieman vinden.
der frouwen ingesinden
in die kamern wâren komen:
dô was der harnasch genomen
dâ er ê alle zîte lac.
mit henden manegen brustslac
frou dietlint dô ir selber sluoc:
dô wart ir leide genuoc
und allem ir ingesinde
nâch ir vil lieben kinde.
si klagt daz si ie wart geborn:
< ê hete ich mînen trôst verlorn,
mîn freude ist nu geriten hin.
owê, wie ich verweiset bin.
ob mir mîn man und ouch mîn kint
beide alsô verlorn sint,
owê, wie möhte ich die verklagen?
mîn ungelücke in mînen tagen
daz muoz sîn verwâzen.
wem hât mich nu lâzen
der friden solde disiu lant?
nu tregt mîn houbet noch mîn hant
vor leide nimmer mêre golt.
diu ungenâde ist mir sô holt
daz si mich nimmer wil verlân;
des muoz ich nu vil trûric stân.>
waz half ir weinen unde ir klagen?
er fremdete si ze manegen tagen
daz er si lange niht gesach:
von einen schulden daz geschach,
daz er ir gar ze verre reit.
der junge degen vil gemeit
begunde frâgen durch diu lant:
vil gerne hete er daz erkant
wa er sînen vater solde
suochen, den er wolde
vil gerne und williclîchen sehen:
daz mohte sanfte niht geschehen.
swâ si ie die state funden,
wie übele si dâ kunden
werben nâch der spîse.
doch wâren si sô wîse,
si wehselten umb silber golt.
der ieman wolde wesen holt
durch sînen kintlîchen muot,
den möhte ir leben dunken guot.
ich weiz ir nahtselden niht:
wie in an ir vart geschiht,
daz ist mir rehte niht bekant.
wan ze burgonde lant
dar begundens frâgen.
die strâze in allen lâgen
nâhen vil gelîche:
si heten fremdiu rîche
dâ vor selten ie bekant.
in der burgonde lant
fuoren si âne ungemach.
durch daz mans ungewâfent sach,
dâ von nieman mit in streit.
sus fuorten si vil guotiu kleit,
diu rîchiu kint wol mohten tragen.
dô hôrten si vil schiere sagen
von einer bürge diu was guot,
dar ûf sâzen vil hôchgemuot
vierzic ritter oder baz;
die hiezen frâgen umbe daz,
von wanne füeren disiu kint.
man sagte in von der bürge sint
daz diu tronje was genant:
daz hûs und ouch daz guote lant
was allez hagenen undertân.
dô disiu frâge was ergân,
von den knaben die hie riten
antwurten in vil hôhen siten
sô mohte man in vinden.
des wart ouch den kinden
misseboten dâ etewaz.
niht tâten âne schulde daz
von tronje die burgaere:
durch daz si nieman maere
mit antwurte wolden sagen,
si wânden prîs an in bejagen.
sehse ir balde zuo in riten.
sît dô wart an in erstrîten
vil kleiner lop und êre.
waer ir gewesen mêre,
des gesindes daz dâ reit,
si heten deste groezer leit
erworben an den gesten.
den jungen nôtvesten
wâfenten dô die drî man.
vil balde er des began,
er wolde wern sîne wât.
dô wolden si niht haben rât,
si wolden mit im strîten:
si möhten gerne bîten
noch hin nâch disem siben tage.
ob ieman waetlîch prîs bejage,
sô mohte man in prîsen baz
dô er ûf sînem rosse saz.
zehant dô reit in einer an,
den stach er von dem satele dan
wol drîer sperschefte lanc.
der hinder satelboge spranc
vil verre mit dem manne nider.
ich waen in luste des iht sider
daz er strîte mit im mê;
der einic stich tet im sô wê
daz er dort sinnelôser lac.
der ander schaden sich bewac,
mit zorne reit er in dô an.
dâ von kunde im niht gestân
übergurt und fürbüege:
der gast was ungefüege,
er frumte ez allez mit im hin.
der rede ich sô berihtet bin:
waere an sînem schafte sper,
in selben mit unsenfte her
heten si im gevolget dar.
si waeren noch sô sinne bar,
daz in der dritte sâ bestuont,
als noch gelfe liute tuont.
den zwein den was niht wol geschehen:
der dritte hete sich versehen,
er gewunne michel êre an im.
< ich enweiz ob ichs iht schaden nim,>
sprach er zuo den gesellen duo.
< ich waen, er dem gelîche tuo
daz er ir tûsent steche nider.>
unwerdiclîch gelac er sider
vor des jungen recken hant:
sich selben er vil verre vant
hinderm rosse ûf dem plân.
alrêrste wart des war getân
daz sîn schaft was âne sper.
dô sprâchen si< ir sît uns her
ein teil vil lasterlîchen komen.
hât iu daz iuwer zuht benomen,>
sprâchen dô die wîsen,
< daz ir des speres îsen
niht enstiezet an den schaft?>
< ich ensach der ritterschaft
niht der ich hie solde phlegen;
ez ist noch alsô guot gelegen
stille bî dem helme mîn,
des muoz ez ungeschiftet sîn.
ich enweiz an iu niht disen haz.>
die ungevallen sprâchen daz
< swaz wir nu ritter möhten hân,
sô wellen wir iuch rîten lân.>
er sprach< daz vergelte iu krist,
nu mir niht mêr geschehen ist
wan daz ich versuochet bin.>
iedoch si sanden boten hin
gegen metzen durch den nît:
den kom er alsô nâhen sît
daz in wol gesâhen die.
ortwînes witwe hete hie
wol hundert ritter oder baz.
ich weiz niht endelîchen daz,
in welher zît er dar gerite.
ez was ie der boesen site
daz man die frumen hazzen tuo.
ez reit der junge recke duo
gegen metze sîne strâze dan.
durch daz ez in was kunt getân,
sô heten sich ir zwelve dar
( ez was ouch groezer niht ir schar)
nâch im gerihtet ûf die slâ:
si wânden an im ertwingen dâ
allez daz si dûhte guot.
der junge degen hôchgemuot
zuo den sînen knaben sprach,
do er dise nâch im rîten sach
< sol ich si slahen oder lân,
ob die ritter mich bestân?>
dô sprach der wîsest under in
< slaht ir si, wie kome wir hin
von dirre alsô grôzen stete?
welt ir mich wern mîner bete,
si enwolden iuch ze tôde slân,
ir sult si unverwundet lân.>
ein garzûn wart zuo in gesant:
von wanne er füere durch daz lant,
daz solde er si wizzen lân.
si erkanden waz er hete getân
dô er dort für tronje reit:
ez was in allez wol geseit.
den garzûn grüezen er began.
dô dankete er dem jungen man
und sprach vil balde wider in
< von guoten rittern her ich bin
ein bote, die hânt mich iu gesant:
von wanne ir rîtet durch daz lant,
daz sult ir si wizzen lân.>
dô sprach der vil junge man
< ich rîte von sô maneger stete,
ich kan si weren niht ir bete
daz ich inz halbez müge sagen.
dar zuo muoz ich si des verdagen
war mir ze rîten stêt mîn sin:
ich selbe enweiz wâ ich wil hin.>
der garzûn lief und sagte in daz.
dô sprach ir einer< deste baz,
sît er ûf strîtes willen vert,
sul wir versuochen wie sich wert
des vil guoten heldes hant.>
vil schiere wart er an gerant
von einem dem besten under in.
den stach er flügelingen hin
( wie guot sîn wille an im erschein!)
daz er als ein swaerer stein
viel hinderm rosse ûf daz gras.
dô der satel laere was,
einen knaben er ez nemen hiez.
der ander ez dô niht enliez,
er wolde ez noch versuochen baz.
dô tete er dem selben daz:
ich waen, er lîhte an im erstrite.
alsam er ungegurtet rite
sîn ros, sô schiet er in der von.
si wâren des vil ungewon
daz ez in waere ie geschehen.
noch liez in der dritte sehen
waz künste stüende in sîner hant.
des gelf der wart von im gesant
vil verre, daz er sich versan
daz si an dem jungen man
möhten werben frumen niht.
der vierde sprach< deist ein geschiht
uns allen harte lasterlîch.
waere er inder im gelîch,
sô solden wir in dar für hân,
der valsche site nie gewan,
baltram ûz alexandrîn;
niuwan daz der lîp sin
kûme halp als er gewahsen ist.
dar zuo hân ich keinen list
wer der vil guote ritter sî.
im wonet niht ritterschefte bî
alsô grôz als umbe ein hâr.>
heten si gewist für wâr
daz er waere noch ein kneht,
si selbe diuhte gar unreht
daz si in heten an gerant.
si sprâchen< ir mugt durch daz lant
rîten swâ iuch dunket guot.
wir heten des vil staeten muot,
wir solden iuch betwungen hân.>
der knabe sprach< ir sult ez lân
durch iuwer selber êre.
muotet ir iht mêre
danne daz ir twinget mich,
ist ez niht schame, daz tuon ich
sô ich aller schierest kan.
helde ich künde nie gewan
die durch sô gar vergeben nît
an ieman hüeben keinen strît,
als ich umbe iuch hân versolt.
ir guoten ritter, sît mir holt.
wirde ich ritter, als ir sît,
sô sol ich nieman keinen nît
ûf ritterlîchen sin getragen,
ich enmöhte prîs an im bejagen.>
dô si heten daz vernomen
daz er was knehtes wîse komen,
dô was ez in allen leit.
si sprâchen< swenne ir ritters kleit
bî dem namen füeret an,
man sol iuch unbetwungen lân,>
ir einer sprach zuo ime sider
< wie stüende uns ob wir naemen wider
die ros diu bî iu ledic stânt?
ich wil daz sis iuch füeren lânt,
und gebet si swem iuch dunket guot.>
er sprach< jâ hân ich niht den muot
daz ich ieman iht des neme
des mir ze haben niht enzeme.>
in metzen si dô mit im riten.
nâch vil friuntlîchen siten,
sô gâbens im die koste dâ.
dâ mite erfuoren si in sâ,
war sîn gedinge waere.
dô sprach der degen maere,
ob si inder westen keiniu lant
dar inne in waere bekant
mit vollen werdiu ritterschaft.
si sprâchen< ja, vil michel kraft
habe wir hie helde nâhen bî.
junger fürsten der sint drî
vogete über ditze lant.
wormez ist ein stat genant
dâ diu dancrâtes kint
mit grôzer ritterschefte sint.
ouch liez ein gesinde dâ
gibeche, daz man anderswâ
bezzer ritter selten vant.
si bêde heten ditze lant:
nu ist ez an die jungen komen.>
er frâgte< habt ir iht vernomen,
ob inder bî in sî ein man
der ze guoter mâze kan
ritterschaft, swanne er die siht?>
si sprâchen< dan ist fremder niht,>
und frâgten in der maere
in welher mâze er waere.
< des enhân ich niht vernomen.
iedoch ist er ze stete komen,
gewahsen ebenmaeze ein man,
dar zuo ich daz vernomen hân
daz im grâwe nu der bart.
ob ir inder sîne vart
habt erfunden durch daz lant,
gerne haete ich daz erkant.>
si kundens sagen niht für wâr.
doch zeigte im ir einer dar,
ob er in vinden wolde,
daz er in suochen solde
in hiunischen rîchen:
sich enkunde niht gelîchen
zuo der grôzen überkraft
die der künec mit ritterschaft
hete zallen zîten
mit schimphen und mit strîten;
< des hât er zallen zîten vil.
freude und ernstlîchiu spil,
der ist verre mêre dâ
denn in den landen anderswâ.>
dô sprach daz kint< dar muoz ich varn.
got der sol iuch bewarn
und vergelte iu disen wîn.
nâch dem ungemache mîn
habt ir mich gehalten wol.
des ich iu immer danken sol.>
von in schiet er âne haz.
si tâten williclîchen daz,
daz si im zeigten durch daz lant:
ir huote wart mit im gesant
von metzen siben mîle dan.
ob er sît arbeit gewan,
ê er ze rîne waere komen,
des enhân ich niht vernomen.
ir bote der fuor mit im dan.
dô heten si gemach getân
ir guoten maeren die si riten.
noch wart allez hie gestriten
mit rede, ez waere baltram,
von dem man manegen prîs vernam,
der sider künec ze pülle wart.
die knaben schuofen dô ir vart,
dô si ir geleite heten lân;
durch lütringen si dô dan
riten an den wasgenwalt.
dô sprach der junge degen balt
< nu reichet mir den helm her
unde schiftet mir daz sper
wider an den mînen schaft.
ez sint lîhte hie mit kraft
schâchaere in disem tiefen tan:
an den kan nieman lop begân,
wan swaz man ir slüege tôt,
daz waere lande und liuten nôt.>
belche mahticlîchen gie.
âne huote er daz niht lie,
einen knaben hiez er vor im dan
durch huote rîten in den tan,
dâ si dâ durch solden varn,
und daz er solde wol bewarn
daz er iht wurde an gerant,
er entaete imz ê bekant.
si riten dan, dô daz geschach.
der knabe niemen füeren sach
weder helm noch îsenwât.
sît er mit fride geriten hât
sô schône durch den wasgenwalt,
dô hiez ab der degen balt
von dem schafte nemen daz sper.
dô riten liute zuo im her:
die selben frâgen er began,
ob der künec und sîne man
dâ ze wormze waeren.
dô hôrte er an den maeren,
daz si waeren ûz geriten
und heten einen strît gestriten
in der sahsen landen,
und daz si wider sanden
ir volc nu allez an den rîn.
er sprach zuo den gesellen sîn
< wie sul wir danne über komen,
daz uns iht werde hie benomen
des wir dâ her gefüeret hân?>
er sprach< diuht iuch daz guot getân
daz wir wormez vermiten
und anderswâ zem rîne riten
dâ wir möhten über komen?
sît wir haben daz vernomen
daz hie ist volkes solhiu kraft.
wir enmügen ir ritterschaft
mit unser kraft gestrîten niht.
ob aber ez danne alsô geschiht
daz uns ieman rîtet an,
ich tuon als ich ê hân getân.>
nâch dem râte si dô riten
dâ si wormez vermiten:
die liezen si zer zeswen hant.
ein stat ist oppenheim genant,
dâ fuorten man si über rîn.
si wolden dâ niht langer sîn,
durch daz si vorhten ungemach.
der junge helt dô selbe sach
daz liute fuoren gegen im dan.
der künic hete lützel lân
hinder im der sînen schar:
sîne recken wâren gar
ze wormez in die stat nu komen.
dô hete der künic zim genomen
gêrnôten unde hagenen;
er sprach mit den degenen
dâ er ûf der strâzen reit.
under einem schilde breit
si sâhen rîten einen man.
der künic goumen des began,
die andern füeren bî im blôz.
der fürsten freude diu was grôz
daz er mit sige von sahsen reit:
des was er stolz und ouch gemeit.
er sprach< hagen, nu mugt ir sehen
dort von einem schilde brehen
eine buckel rîche.
ez ist gewislîche
nieman der mînen.
swâ halt er der sînen
iht mêre habe lâzen,
er rîtet ûf der strâzen
sam er ûz strîte sî bekomen.
gerne hete ich daz vernomen
war sîn wille waere.
muget ir der maere
frâgen, hagen der neve mîn,
ob ez mit fuoge möhte sîn,
so erkande ich gerne sînen muot.>
< daz tuon ich>, sprach der degen guot.
dô reit hagene nâch im dan;
den helm er binden ûf began.
durch daz er in gewâfent sach,
sîner knaben einer sprach
< dort rîtet einer nâch uns her
under schilde und füeret sper.>
dô sprach der kindische man
< sô schiftet ouch mir mînez an.>
der künec sîn bîten wolde hie.
daz hagenen ros vil balde gie:
dietleip umbe warf daz sîn;
dô wolde dâ daz kindelîn
bîten des der nâch im reit.
im wurden maere nie verseit
unsanfter denne er dâ vernam.
dem knehte daz von nieman zam
daz er strâfe solde doln.
sîn gewaefen und den voln
hagene brüeven dô began:
schiere er sich dô versan,
der sîn ze koufen hete gegert,
ez waere tûsent marke wert.
hagene gruozte in über rant.
im neic der knabe sâ zehant:
dô wând der degen maere
daz ez ein ritter waere.
< ich sol iuch frâgen, daz ist reht.
mich hât gesendet, guote kneht,
ein rîcher künec herumbe daz
daz ir im kündet âne haz
von wanne ir rîtet durch diu lant,
ode ob iuch ieman habe gesant
durch âventiure ûf ritterschaft.
sich gelîchet grôzer kraft
der iuwer schaft von helfenbein.
iwers helmes varwe ist niht enein,
diu ist von vier stücken gar:
lâsûrblâ und silbervar,
daz ein teil swarz alsam ein kol,
daz stêt gên der blenke wol;
daz vierde rôt alsam ein bluot
von rôtem golde harte guot.
sîn gespenge ist sô lobelîch
daz in ein edel keiser rîch
mit grôzen êren möhte tragen.
welt ir mir niht der maere sagen
diu ich dem künege sagen sol?>
er sprach< wold ich, ich sagte iu wol
von wanne ich rîte od war ich wil.
sô müese ich muoze haben vil,
solde ichz alle hoeren lân
für die ich her geriten hân.>
er sprach< sô lât doch daz vernemen
wie iu sô jungem mac gezemen
daz harnasch daz ir füeret an
und iuwer ros sô wol getân
und daz sper lieht spiegelvar.
und waere roemisch künec sô gar
gewâfent unz ûf sîn reht,
ez lobte im ritter unde kneht.>
dô sprach der kindische degen
< ir habt ê lîhte ûf iuwern wegen
gewâfent liute wol gesehen:
als ist iu ouch an mir geschehen.>
dô sprach von tronje der helt
< sît ir enbieten niht enwelt
gunthêr dem künege rîchen,
sô tuot ir billîchen
daz ir selbe rîtet dar.
ir seht uns alle drî gar,
wir sîn ouch von strîte komen.>
er sprach< daz habt ir wol vernomen
daz ich darumbe enfrâge niht.
ich enruoche ob immer mich gesiht
der künec und alle sîne man.>
hagene sprach< ich müese hân
ein spotten von dem herren mîn,
lieze ich ez nu alsô sîn
daz ich im braehte maere niht.>
dô sprach der knabe< und welt ir iht
an mir ertwingen, deist unsin:
ine weiz selbe wer ich bin.>
hagene zornic wart gemuot.
< nu muoz ich>, sprach der degen guot,
< iuch des twingen, ob ich kan,
daz ir den künec sult hoeren lân
diu maere diu ir mich verdeit.>
ûf den knaben er dô reit:
dâ von im dürkel wart sîn rant.
dô hete ouch des kindes hant
geneiget ûf den küenen man
und stach in sô daz im began
bresten vil der ringe.
swie hôhe sîn gedinge
dem - von - tronje waere,
in frumt der gast vil maere
in sîner brünne bluotvar.
hagenen was sîn schaft gar
ze stücken worden vor der hant.
dô zucte der wîgant
ein schoene swert daz sêre sneit:
der junge helt was ouch bereit.
wie dô erklungen in diu swert!
dô wart hagene gewert
aber einer wunden.
do gezucte er an den stunden
...
... sînem herten sinne
daz des kindes swert unmâzen sneit.
er sprach< ir habt mir geseit
daz mich des mac betrâgen,
sol ich iuch mêre frâgen.>
der helt was in die brust wunt.
dô kêrte er umbe sâ zestunt:
bezzer waere ez ê geschehen.
dô in der künec begunde sehen
alsô kumen bluotes naz,
gernôt der sprach daz
< diu maere sint uns noch verdeit.
mir ist unmaezlîchen leit,
ich sihe hagenen rîten wunt.>
schiere tet in der degen kunt
swaz im jener hete geseit.
gêrnôt sprach< ez wirt im leit,
mirn gebreste mîner kraft.>
vil schiere er schilt unde schaft
zucte zornic gemuot.
dô gâhte der helt guot
dâ er den unkunden vant.
von im wart er an gerant,
als ein recke degene tuot.
dô was ouch niht ze wol gemuot
der vil junge wîgant:
durch ir ietweders rant
begunden bresten diu sper.
vil kûme gesaz er
der hagenen rechen wolde:
wan daz er noch niht solde
sterben in sô kurzen tagen,
der gast in anders haete erslagen.
diu swert si beide in nîde zugen.
die schilde si des niht entrugen,
si muosten beide werden schart.
gêrnôt dô verhouwen wart
ein teil durch liehtez sîn gewant,
und hete der gast an sîner hant
erhaben hôher iht daz swert,
sô waer des tôdes dâ gewert
der tiure degen gêrnôt.
des heldes sin im daz verbôt,
nie mêre sluoc er ûf den gast:
guoter site niht gebrast
dem knaben daz er ez liez sîn.
der recke ouch bluotvarwen schîn
brâhte dâ sîn bruoder reit.
dem künege wart von schulden leit,
dô er den schaden hete ersehen.
er sprach< ich hân gehoeret jehen,
daz schade nâch gelücke kumet.
wie lützel iuch daz bêde frumet
daz ir recken sît genant!
nu sol versuochen daz mîn hant
wie ich und ouch der gast gevar.>
der künic kêrte schiere dar.
dô wolde er des getrouwen wol,
durch daz man fürsten fürhten sol,
er müese im volgen in die stat.
wie balde er im daz sagen bat,
warumbe er haete daz getân,
daz er im den sînen man
verwundete und den bruoder sîn.
er sprach< si wolden bêde mîn
gewaltic sîn, ine weiz durch waz.
sît irz der künec, sô saget mir daz
ob ir mich wellet rîten lân:
hân ich iht wider iuch getân,
daz ist âne mîne schult geschehen.>
dô sprach der helt< ich muoz gesehen
ob ich hân küniclîchez reht.>
alsô balde sprach der kneht
< swie tump ich mînes muotes sî,
sô sît ir als ich sinnes frî,
ob ir darumbe mich bestât
daz sich mîn hant errettet hât.>
der künic was ein küene man:
sâ zehant reit er in an.
der knabe enblient dem rose daz
( mit sporn ruorte erz deste baz)
daz ez deste wîter spranc.
er stach den künec daz im erklanc
sîn schiltgespenge sêre.
er haete nimmer mêre
deheinen gast bestanden sider,
wan daz im daz ros nider
des stiches strûchte ûf daz gras:
dâ von gunthêr dô genas.
des küneges schaft zestoup vil gar.
der junge helt wol wart gewar,
er taete im schaden, möhte ez sîn.
ir helme truogen fiuwers schîn
vil schiere von ir beider slegen.
des wart dô gunthêr der degen
verwundet von des gastes hant
durch sîn liehtez stahelgewant.
wol sach er daz er waere starc.
von im warf er dô daz marc,
daz swert vorhte er sêre.
er bat in durch sîn êre
daz er im sagte maere
ob er ein fürste waere.
er sprach< wie möhte ich fürste sîn?
ja gewan ich bî den tagen mîn
deheiner lande nie gewalt.
ich getruoc ouch>, sprach der degen balt,
< weder schilt noch wâfen nie.
ich bin ein kneht und rîte hie;
den schilt füer ich niuwan durch nôt,
sît mir got des niht gebôt
daz ich in ritter solde tragen.
haet ir helde mich erslagen,
sô wolt ir mîn ze ritter jehen.>
dô sprach der künec< ich hân gesehen
sô küener knaben niene mê.
mir tuont daz inniclîchen wê
daz ich iuch ie bestanden hân.
welt ir, sô sol ich daz niht lân,
ich versüene ez als ich beste mac.
daz ist mir ein leider tac
daz ich iuch hiute hân gesehen.>
dô sprach der gast< ich mac niht jehen
daz iu sî mîn swaere leit.
haet ich mit ungewizzenheit
iuwern zorn verdienet hie,
so getete man knehte rehter nie.>
der künec sprach< über mînen schaden
sô wil ich iuch ze hûse laden:
nu geruochet mit mir rîten hin,
swie ich selbe verwundet bin.>
dô sprach der junge< ich enwil.
haet ich der jâre noch sô vil
als ich der noch ze lebenne hân,
ich wil ez nimmer tac verlân
ich enreche daz mir ist geschehen.>
wol mohte er an dem künege sehen
daz im vil trüebe was der sin.
nu wolde er von im rîten hin.
er sprach< geselle, wizzet daz,
ob ich iu waere sô gehaz,
und möht ir tûsent lîbe hân,
ich hân sô manegen küenen man
daz ir in vil kurzer stunt
verliesen müeset den gesunt.>
die helde schieden sich dô sâ.
swie ez dem knaben anderswâ
sît gefuor ûf sînen wegen,
dô kêrte gunthêr der degen
ze wormez bî den stunden:
er brâht sich selben wunden
unde ouch gêrnôten
vil sêre verschrôten
unde ouch hagenen den degen.
dô begunden under wegen
reden die hergesellen
von des knaben ellen:
dô sprach hagne< ich wil des jehen,
waer ez iu selben niht geschehen,
sô zalt ir mirz ze schanden.
got enlâze mich ze handen
solhem knehte niemer komen.
er haete mir den lîp benomen,
haete ich lâzen niht den strît.
her künec, daz irs gewarnet sît:
sol bitrolf inder erben hân,
sô sippet der vil junge man
an walthêr den wîgant,
den recken ûzer spanjelant.>
dô sprach der künec< desn weiz ich niht.
ich ahte wol daz im geschiht
niht leides von den mînen man.>
< sît ich im arges niene gan,>
sprach dô der starke gêrnôt,
< warumbe füegte ich im den tôt?
daz mir mîn brünne ist bluotes naz,
von hagenen schulden ist mir daz
komen, daz er an gereit
den jungen degen vil gemeit.>
hagene sprach< ich wil iu sagen,
er kumt lîhte noch nâch disen tagen:
mac er von ieman helfe hân,
sô werden wir von im bestân.
sô waere bezzer daz wir in
sô frî niht liezen rîten hin.>
dô sprach der voget von rîne
< mir ist ungruoz der sîne
daz leit daz ich verdienet hân;
nu müezen wir ez lâzen gân.
haet ich sîn zehen tôt geslagen,
man möht dâ von niht anders sagen
wan daz ez waere ein kneht.
ez ist keines fürsten reht
daz imer gerüere den sîn hant.>
dô riten ze wormez ûf den sant
die drî helde bluotvar:
die liute nâmen alle war
ob den fürsten unde ir man
der tiuvel haete daz getân.
die besten liefen gegen in
< herre, waz mac ditze sîn?
ûz sturme ir kâmet wol gesunt:
wâ sît ir sô worden wunt?>
der künec daz wolde nieman sagen:
si bêde bat erz ouch verdagen,
sînen bruoder unde hagenen:
dô hâlen siz die degene.
ez was den burgonden leit:
ze strîte schiere was bereit
vier hundert ritter oder baz.
der künic der verbôt daz,
daz si im schadeten ûf den wegen,
und ob si saehen nu den degen,
er müese es wol genozzen stân.
dô hiez er alle sîne man
ziehen abe die sarwât:
der râche wolde er haben rât.
ich enweiz, sît si wâren wunt,
wie si wurden nu gesunt.
diu maere enwil ich niht verdagen,
ich muoz iu von dem kinde sagen,
welhe wege er dô geriet,
dô er von wormze geschiet.
dem lande reit er nâher baz.
dô rieten im die knaben daz,
wolde er strîtes haben rât,
sô züge im abe die sarwât:
er möhte in niht gestrîten
die im widerrîten
vil dicke müesen ûf den wegen;
daz in gunthêr der degen,
bêde hagene und gêrnôt,
die helde niht slüegen tôt
daz waere ein grôziu saelekeit.
dô zôch er abe diu strîtes kleit
nâch der knaben râte
...
darumbe daz die helde
gewunnen nahtselde.
die fremden dô nâch geste siten
für sich in ôsterfranken riten,
dâ noch ein wazzer nider gât:
möun ez den namen hât.
dô kom in daz ze heile
daz si dâ funden veile
des si bedorften in ir nôt,
vische fleisch unde brôt,
und guoten fränkischen wîn.
der ir wirt dâ solde sîn,
der schuof in ruowe unde gemach.
der biterolfes sun sprach
< müge wir mit fride bî iu wesen?>
der wirt sprach< ir sult wol genesen
bî uns unze morgen fruo.>
dô griffen sîne knaben zuo
unde engurten diu marc:
jâ kuolten si die voln starc.
den rossen man ir spîse truoc.
der wirt gap in des genuoc
des si des nahtes solden hân.
dô dâ ruowen began
der edelen dietlinde kint,
den sînen wirt frâgte sint
der junge degen maere,
welch der site waere
der liute in dem lande.
dô sprach er sâ zehande
< ir mügt hie guoten fride hân.
ich wil iuch daz wizzen lân:
überrîtet ir die marke,
man roubet alsô starke
ze beiern ime lande;
ez enwaer daz man erkande
geleite daz ir möhtet hân,
vil dicke werdet ir bestân.>
er sprach< nu râtet, wirt mîn,
waz daz geleite möhte sîn
dâ mit wir kumen durch daz lant.>
er sprach< dâ nemet an iuwer hant
eines lôrboumes zwî:
si waenent alle dazz iu sî
gegeben von dem rîche;
sô vart ir wîsliche.>
dô in nu komen was der tac,
daz edel ingesinde lac
langer an den betten niht;
alsô gesten noch geschiht,
si muosten deste früejer sîn
daz si liezen hinder in
der fremden lande deste mêr.
dô was dem jungen recken hêr
sîn imbîz worden wol bereit.
dem wirte wart ouch niht verseit,
swie hôhe er siz gelten bat.
dô rûmten si die selben stat
und schieden güetlîchen dan.
ir wirt zeigen in began
die rehten strâzen durch daz lant.
dô nam ir einer an die hant
ein rîs als in der wirt geriet,
dô er von sînen gesten schiet.
dô muoste ir fride staete sîn.
sît brâhten si daz kindelîn
sô nâhen in der beier lant
daz im daz wol wart erkant,
wâ diu tuonouwe hine flôz.
vil manegen beier daz verdrôz
der si ir fride füeren sach;
vil maneger doch dar under sprach
< soldens âne geleite sîn,
swaz die füernt daz waere mîn.>
heten abe si daz erkant
daz übele von im was gewant
etelîcher sô gemuot,
haete er aller künege guot,
daz sis im haeten niht genomen,
sô waere ouch ûz ir munde komen
der tumben rede niht sô vil.
daz hete er für ein kindes spil.
swie si nieman wîste dâ,
er fuor iedoch die rehten slâ
dâ ouch sîn vater ê hine reit,
alsô daz nieman mit in streit,
unz in daz hiunische lant.
swem daz lôrzwî wart erkant,
der weste vil wol daz er lân
die liute solde fride hân:
ez was von altem rehte komen.
si haeten sîn doch niht genomen,
haete siz der wirt verdeit:
si müesten michel arbeit
haben der tage manege stunt.
wâren si ê niht worden wunt,
si waern ze hove unsanfte komen,
si müesten schaden hân genomen.
dô si nâch ir tumben siten
zuo der etzeln bürge riten,
si suochten herberge sâ.
vil der heiden goumte ir dâ
wie ir geverte waere gewant:
daz heten ouch vil gerne erkant
etelîche kristen.
genuoge gerne wisten,
waer ieman ritter under in.
schiere zeigte man in hin
dâ des küneges marschalc saz:
ir einer im dô sagte daz,
si waeren geste in hiunen lant.
dô hiez er si sâ zehant
herbergen in die stat.
vil vlîziclîchen er si bat
zen hiunen willekomen sîn.
guot gemach diu kindelîn
die naht gewunnen unze fruo.
knaben schuof aldâ dar zuo
sunderbâr der marschalch,
den er die tumben geste enphalch.
er hiez ir güetlîchen phlegen,
diu ros wol füetern, sanfte legen.
wie si kômen in daz lant,
dem künege tete erz noch erkant
ê daz der slâfen wolde gân.
dô sprach der übermüete man
< si suln mir willekomen sîn,
dem liute und ouch dem lande mîn,
ob si wellen hie bestân:
si sullen morgen für mich gân
ê daz si enbizzen sint.>
der rede wîste man diu kint,
diu daz heten wol vernomen,
daz si ze hove solden komen.
die jungen knaben in der stat
bereiten hiezen in ein bat:
si legten frischiu kleider an
sô guot daz nieman kunde hân
bezzer knabenwaete niht.
die hetens, als daz maere giht,
gefüeret von ir lande dar.
die drî wâren wol gevar,
nâch edelen liuten wol gestalt:
dô was der vierde degen balt:
niht halp gewahsen zeinem man.
daz volc dô merken began:
swie helche diu rîche
schoene und minniclîche
hete vil der meide,
noch süezer ougenweide
laege an disem jungen man;
die schoensten die si ie gewan,
ez waere maget oder wîp,
noch schoener waer des heldes lîp.
er truoc ouch hâr alsam ein maget,
der junge degen unverzaget,
daz für den swertvezzel hie:
swanne erz ungebunden lie,
vor regene mohte er sich dâ mite
decken nâch der valken site;
vil schône goltvar ez schein.
der liute wunsch was niht enein
die in vor in sâhen
stênde bî in nâhen:
der wunschte sînes lîbes,
der alsô schoenes wîbes
daz er die immer solde hân;
der wünsche wart dâ vil getân.
si muostens alle hân verlorn.
dô stuont der degen hôch geborn,
dâ man den kristen messe sanc.
michel sô wart der gedranc,
si heten in nie mê gesehen.
dô diu wîle was geschehen
daz man gote gediente hie,
daz volc für einen palas gie.
dô gienc ouch vor den sînen man
der künec mit guoten recken dan:
zehant er vor den fürsten saz.
dô liez ouch niht der knabe daz,
er kam dar man in komen bat.
der künic saz an sîner stat.
mit dem marschalke er dô gie,
da er sich die helde sehen lie,
für den künic rîchen.
do enphienc in minniclîchen
des fürsten botelunges suon,
als er daz gerne mohte tuon.
vil helde stuont bedrungen dâ:
dâ vor hetens anderswâ
sô schoenen knaben nie gesehen.
des küneges gruoz nu was geschehen,
dô frâgte er in der maere
wâ hin sîn wille waere
ode ob er wolde dâ bestân.
dô sprach der kindische man
< herre, ich waere gerne hie,
wan ich des hôrte jehen ie
daz ich nu selbe hân gesehen,
ez waere künege nie geschehen
dem mêre recken wonte bî.
ob ez in iuwern hulden sî,
her künec, sô wil ich hie bestân.>
dô hiez er in dar nâher gân
und lobte im daz an sîne hant,
swie schiere im ledic wurde ein lant,
er endörft sichs niht verzîhen,
daz wolde er im lîhen.
sîn vater saz ouch dâ zehant.
der knabe was im unbekant,
ouch erkande er sînes vater niht.
swâ ieman sippefriunt siht,
wart ers mit künde niht gewar,
in treit iedoch daz herze dar.
mit vlîze in manic recke enphie.
diu küniginne daz niht lie,
si hiez den knaben betagen ir:
si sprach< nu heizet her ze mir
des küneges jungen gast komen.>
si hete der maere wol vernomen
daz an im waere jugende schîn.
ez giengen sküneges kindelîn
zwei dar dâ der knabe gie:
ort unde erpfe wâren die.
der vierde daz was nuodunc,
der edel marcgrâve junc,
der schoenen gotelinde kint:
der gie mit im ze hove sint.
man hete ir maere vil geseit:
frou helche durch gezogenheit
vil balde von ir sedele stuont;
swiez küniginne niht entuont
daz si ûf gegen knehten stân,
iedoch wart ez von ir getân.
si enphienc in unde sprach alsô
< ich und der künic sîn des frô,
ir jeht ir welt hie bî uns sîn.>
dô sprach daz edel kindelîn
< möht ich iu beiden dienen iht,
sô kume ich gâhes hinnen niht.>
diu frouwe sprach dô under in
< iuwer zît sol komen hin
bî mînen sünen beiden.
lât iu hie niht leiden,
daz wil ich iu wol râten.
in mîner kemenâten
sult ir sîn unde nuodunc.>
dô nigen die zwêne fürsten junc
helchen der rîchen
vil gezogenlîchen.
mit zühten brâhtens in daz an
daz er ir dienen began
allez daz man im gebôt.
tiurres knaben was unnôt
daz den ieman funde.
künden sich begunde
der recke meiden unde man,
dâ von er friunde vil gewan.
geste erfüllet was daz lant
dâ von daz man den willen vant
an etzeln zallen zîten,
daz er sunder strîten
in allen teilte mit sîn guot.
des was daz volc vil hôchgemuot,
daz man dicke bî im vant.
dem jungen knaben wart erkant
ze hove kurzwîle vil.
er sach dâ maneger hande spil
von helden mit vil grôzer kraft:
dicke schuzzen si den schaft,
dâ bî wurfen si den stein.
dô was under in dehein
der ez tete für den gast.
solher krefte im niht gebrast,
si liefen oder sprungen,
die alten zuo den jungen:
sô verre brach er in diu zil,
ir waere lützel oder vil,
daz man im prîses muoste jehen.
frouwen mohtenz dicke sehen
durch diu venster da ez geschach.
der künec ze sînem wîbe sprach
< wir suln den gast ze kinde hân,
ob er wil hie bî uns bestân.>
< des volge ich iu>, sô sprach si duo.
< er grîft sô degenlîchen zuo,
sîn wirt getiuret unser lant.
swie lützel er uns sî bekant,
er ist von guotem künne komen,
swâ sich der degen habe genomen.>
der frouwen rede diu was wâr.
ê sich verante daz jâr,
der künic herverten reit.
in drîen stürmen, dâ streit,
dâ entete ez nieman baz
( die recken sâhen alle daz)
denne der gast in sînem lant,
der sich dâ diete hete genant.
swaz ir in urliuge rite,
da enfuor nieman gerner mite
denne ouch haete getân,
von dem ich iu gesaget hân,
der tumbe und der vil werde gast.
an im des willen niht gebrast:
swâ man strîtes solde phlegen,
vil gerne waere dâ der degen,
wan daz in der künec niht lie.
dar nâch ez in die rede ergie
daz man in doch in strîte sach.
ich enweiz wâ von daz geschach,
der künec ein ungetriuwen man
het, den fürsten ûz pôlân:
dar schuof er sîne hervart.
des heres leitaere wart
rüedegêr der rîche,
der tete daz vlîziclîche.
der künic der hiez rîten dar
aht tûsent ritter wol gar.
swaz er degene mohte hân,
der liez er nieman dâ bestân.
do bevalch er besundert
ritter zweinzic hundert
ûzer lütringen
dem küenen îringen.
hâwart unde ouch irnfrit,
die zwêne helde riten mit:
alsô tete ouch diete.
die besten die er hiete,
die schiet er an die hervart.
der priuzen künec dô lâzen wart
daz er trüege mit im haz.
ein teil tet er ungerne daz,
wan er ir nâchgebûre hiez.
der künec ins niht darumbe erliez
daz er im hiete geswarn:
er muoste ûf sîne vînde varn.
dem edelen gîsel kam ein her.
die pôlân satzten sich ze wer.
dô hiez der künic rîten dan
die sînen erbaeren man,
die stolzen helde unde junc
hornboge und râmunc,
und sigehêr der frîe,
der helt von turkîe,
die fuorten sunder ritterschaft.
der junge gast der liute kraft
unmüezic mit gewaefen vant.
dô wolde er mit in in daz lant
dâ si dâ strîtes solden phlegen.
ze hove gie der junge degen
dâ er den künic sitzen sach.
der junge recke zuo im sprach
< ich sihe daz volc sich allez scharn:
herre, mit wem sol ich nu varn
in des dienste ich dâ sî?>
der künic sprach< du maht niht bî
recken sîn dâ strît geschiht.
ichn liez dichs unbegrüezet niht
ob ich saehe an dir die kraft:
ich hân sô vil der ritterschaft
daz man dâ kinde hât wol rât.
geselle, ich sage dir wie ez stât.
swer fremden gast wil übersehen,
dem mac vil lîhte ein schade geschehen.
du solt hie heime bî mir wesen,
du maht hie vil baz genesen
danne dort in sturmes nôt,
dâ vil der recken nimet der tôt.>
dem knaben dô vil leide wart
daz in der künec die hervart
niht varn mit den recken lie.
in sîne herberge er dô gie.
dar under hete er einen sin,
er dâhte< ich muoz et doch dâ hin.>
der priuzen künec der wolde dan.
sîn wîp die liez er dâ bestân
bî helchen der rîchen:
diu phlac ir minniclîchen.
des küneges zeichen man ûf bant.
rüedegêr der wîgant
und gotele der marcman.
daz her si wîsten dô von dan.
die recken giengen in den sal,
urloup nâmens über al
von etzelen dem rîchen.
der bevalch dô vlîziclîchen
die recken sîne geste
den hoehsten die er weste,
an den gar sîn êre lac.
wol wiste er daz ir schône phlac
rüedegêr der rîche
und ouch vil williclîche.
dô er von dem künege gie,
dô hiez er vaste hüeten hie
des knaben daz er iht von dan
rite mit den sînen man:
wan er daz wol an im ersach
daz im vil leide dran geschach,
daz er in rîten niht enlie.
dâ von hiez er sîn hüeten hie.
diu huote werte zwêne tage,
daz was des jungen heldes klage;
iedoch bereite er sich dar zuo
vil harte tougenlîchen duo.
sînen knaben den tete er kunt
daz er in vil kurzer stunt
nâch den andern wolde varn,
swie sêre ez etzel hiez bewarn. âventiure wie dietleip in einem sturme mit sînem vater streit.
der knabe sîn gewaefen nam.
er îlte, alse im dô gezam,
daz der degen guote
kom ûz der hiunen huote
vil fruo an einem morgen.
doch was er in den sorgen
daz er in dem lande
der wege niht erkande.
er kom zer tuonouwe dan:
dâ lônte er einem schefman,
daz er in über brâhte.
wie balde er dô gâhte
von dem urvare dâ!
schiere kam er ûf die slâ
dâ daz her hine reit:
des war er frô unde gemeit.
sus gâhte der helt balt,
ez waere wazzer oder walt,
unz er dâ ein flieze sach,
dâ den liuten geschach
ungemach vil groezlîch:
dar kom der junge degen rîch,
dâ er sach die ünde.
er gedâhte< ob ich niht gründe,
so enweiz ich wie ich über sol.>
doch gefuogte sich im wol
daz er ein urvar dâ vant
ein wênic hôher ûf daz lant:
dô wâren etzelen man
vil nâch vor im geriten dan,
dâ er die übervart dâ vant.
daz wazzer schiet dâ diu lant:
ez heizet noch der priuzenwâc.
vil maneger sach dâ sînen mâc
in vil grôzer arbeit.
der junge helt dô balde reit
unz er zuo dem here kam,
daz sîn nieman war genam.
der zîte, sô man uns seit,
wâren drî schâr breit
geriten ûf die pôlân:
die priuzen heten daz getân,
wan ez in etzele gebôt.
nu wârens andershalp in nôt
von dem hofgesinde.
vil maneger muoter kinde
mohte ez wol ze schaden komen.
sich heten vaste für genomen
die guoten wîgande
von hiunischem - lande,
gotele unde rüedegêr
und diete der degen hêr,
mit vier tûsent mannen
vor den andern dannen
kômens an die pôlân.
dô man des strîtes began,
sô muoste ez werden herte.
der herzoge werte
vil grimme sîne marke.
biterolf der starke,
eine gazzen er durchsluoc
lanc unde wît genuoc
al durch der pôlâne her,
swie vaste im waere ze wer
der herzoge herman.
dâ von vil maneger gewan
tiefe wunden unde wît.
der gast der durchsluoc sît
daz her unz an ein ende:
vor des heldes hende
lac ir alsô vil gestreut,
daz lant was des ungefreut.
swaz halt die etzelen man
in strîte kunden dâ begân,
daz was wider in ein wint.
dô kom daz dietlinde kint
vaste her gedrungen.
bêdenthalben klungen
den recken an den handen
diu wâfen ûf den randen.
sîn ellen brâhte in zuo in dar.
do begunde toumen diu schar
von dem heizen bluote:
dô muosten helde guote
sterben von des kindes hant;
und ob er eine daz lant
ze pôlân solde erstrîten,
sô kunde er in den zîten
nimmer baz gevehten.
von alsô guoten knehten
dâ wart vil maneger harte wunt.
von morgen an den âbunt
daz wal si bouten sêre.
der junge degen hêre
der hete sich verdrungen,
daz alte noch die jungen
westen niht der maere
wer der degen waere.
swâ man sach den helt guot,
dâ kôs man vaste daz bluot
riechen von den wunden.
sich hete ouch vor den stunden
her diete vergangen
einen sweif langen
durch der vîande schar:
si kunden sküneges vanen dar
nâch dem helde niht getragen.
dô hete der junge durchslagen
eine gazzen wîte:
er versan sich in dem strîte
daz er der zeichen niht ensach.
dâ von sô muoste er ungemach
hân von schüzzen und von slegen.
dô widergienc im jener degen.
er wânde ez waer sîn vîant:
den er durch vil manegiu lant
hete gesuochet anderswâ,
den sach er hêrlîchen dâ
vor im strîten in der schar.
vil balde spranc der helt dar
und sluoc im einen solhen slac
daz fiuwers vanken gelac
vil gestreut über rant.
dô sluoc des elteren hant
ûf den helm stähelîn,
daz der junge vor sîn
strûhte nider in daz bluot.
dô was der fride niht ze guot.
vor im lac vil der siechen.
er kôs für einen kriechen
den vil kindischen man:
dô kôs für einen pôlân
der junge den alten.
er hete vil nâch gehalten
dar an im selben den tôt,
irte in niht daz bluot rôt,
sô haete er vil wol erkant
des heldes wâfen an der hant.
dô sluoc der degen junge
den guoten welsunge
sô starke ûf den vater sîn
daz der fiuwerrôte schîn
lougete ûz den ringen.
diu swert hôrten klingen
die helde ûz hiunen rîche.
dô kom vil baltlîche
mit dem etzelen van
rüedegêr der helt dan.
do erkande er bî dem schilde
der vor in daz gevilde
hete gemachet bluotnaz.
vil ungerne sach er daz,
daz dirre degen vor im stuont:
er vant si, sô noch helde tuont,
ûf helme houwen sêre.
dô wart von rüedegêre
ein michel dringen dâ getân:
er woldes in dem strîte lân
niht einander slahen tôt.
des jungen ellen daz gebôt,
daz der alte kûme genas.
in beiden vil unkunde was,
ez was ein vater und sîn kint.
vil kûme ez understuont sint
rüedegêr der rîche
harte angestlîche.
der marcgrâve vil wol sach,
dô ez im scheiden geschach
under disen küenen man
daz er sich vil wol versan,
daz ez waere daz kint,
swie er nâch in kaeme sint,
den si zen hiunen heten lân.
der alte sich dô wol versan,
dô er gehôrte den klanc
des swertes scharf unde lanc,
deme gelîche getân
daz er dâ heime hete lân,
an ir beider klange.
swie er waere lange
gewesen von sînem lande,
und swier doch niht erkande
den helt der daz swert truoc,
dô was im ande genuoc.
dô nu an disen beiden
den strît hete gescheiden
der marcgrâve rüedegêr,
der lêrte den jungen degen hêr
daz er des vanen naeme war,
swenn er gebraeche durch die schar.
er brâhte dô ze rehte
die vil guoten knehte
under etzelen vanen.
lîhte mohte er si manen
daz die küenen degene
den vînden hin begegene
mit einander giengen.
des râtes schaden geviengen
die fürsten ûzer pôlân.
der herzoge von merân
der tete wol daz sîne:
daz tete et dâ ze schîne
der vil küene schrûtân,
unde ouch ander etzeln man.
hornboge unde râmunc
die valten manegen helt junc.
alsô tet ouch her rüedegêr,
der frumte manegen verchsêr
in dem selben strîte
mit maneger wunden wîte.
irnfrit unde hâwart,
die frumten manegen rinc schart
mit den scharfen swerten.
niht bezzers si dô gerten
wan daz si alle slüegen tôt.
nieman tete sô grôze nôt
dem fürsten ûzer pôlân,
sô der unkunde man
der sich dâ diete hete genant.
dô worhte des jungen heldes hant
noch mêre dar under
der vînde besunder,
danne viere der besten
die si inder bî in westen.
sît muoste ez doch ende hân.
dô der schade was getân
von etzelen mannen,
und daz si wolden dannen,
dô muoste ouch volgen mit in dan
der herzoge ûz pôlân,
wan er den sige dâ hete vlorn.
die guoten ritter ûz erkorn
die hiez man zuo einander komen,
die in heten dâ genomen.
dô man si bî einander sach,
rüedegêr der helt dô sprach
< nu bewart iuwer wunden
und lât si die gesunden
wider füeren in daz lant,
und heizet ouch hie zehant
suochen die tôten,
die sêre verschrôten,
swâ die ligen ûf dem wal,
daz wir wizzen die zal
waz wir haben hie verlorn
durch der vîande zorn.>
dô sprach der degen râmunc
< si sîn alt oder junc,
wol driu tûsent oder baz
die ligent in dem bluote naz,
die wir hiute hân verlorn
durch der küenen riuzen zorn
unde ouch von den pôlân.>
dô sprach der etzelen man
rüedgêr der tugentrîche
< sô tuot als wîslîche,
schüttets ûz der sarwât.
swaz der tôten hie bestât,
die suln wir alle begraben,
daz si die wolve und die raben
iht ziehen an daz gevilde.
ir wâfen unde ir schilde
sul wir allez füeren wider,>
vil wol geleisten si daz sider
daz in rüedegêr gebôt.
si brâhten manegen rinc rôt
der erslagenen wîgande
zuo dem etzeln lande.
ûf die wagen hiez dô legen
hornboge und râmunc der degen
ir schilde unde ir sarwât:
den was niht arbeite rât
ê si alle wurden begraben.
die liute heten sich erhaben
gegen hiunischen landen.
den guoten wîganden
gebrast wol tûsent manne,
dô si schieden danne.
rüedegêr der guote
het vaste in sîner huote
die vil werden geste:
an den tet er daz beste.
dô si nu fuoren über lant
und man in vancnüsse vant
den herzogen von pôlân,
die priuzen heten ouch getân
daz beste daz si kunden.
etzele in sînen stunden
vil ritter mit ir mâgen twanc.
swer gediente sînen habedanc,
der dûht sich saelic geborn:
dâ von wart liute vil verlorn,
wan er was guotes rîche
und gap daz williclîche.
ir boten sanden si dô dan
mit den dem künege kunt getân
wurden disiu maere
wie in gelungen waere.
der maere wart der künic frô.
man hôrte ir etelîche dô
ir gedinge hôhe tragen:
den aber ir friunt dort erslagen
ûf dem wale lâgen,
die beweinten hie ir mâgen.
der künic frâgen dô began
< wie habent die geste mîn getân,
die küenen hergesellen?
ist aber uns ir ellen
ze frumen iht gestanden?
wir haben in den landen
verlorn einen jungelinc,
daz mir alliu mîniu dinc
niht sint sô swaere,
ob er geriten niht waere
ân urloup von uns hinnen.>
der bote sprach mit sinnen
< nu lât iu wesen niht ze leit:
swaz allez iuwer her gestreit,
daz was wider in ein wint.
sô wol gestriten hât daz kint
daz manz immer wol mac sagen.
ouch hât dâ liute vil erslagen
der dâ diete ist genant.
man füeret wider in daz lant
sehzic und hundert bâre,
ouch bringet man iu zwâre
den fürsten ûzer pôlân.
gibeche unde schrûtân,
die tâtenz in dem sturme guot:
des was froelîche gemuot
rüedegêr der wîgant.
jâ enmac ichs hie zehant
besunder niht genennen,
an den ir muget erkennen
daz si sîn degenlîche gemuot.>
< ich weiz wol>, sprach der künic guot,
< lîhte mac man mir daz sagen,
wie si mîn êre künnen tragen.
des danke ich in als ich sol:
si mugen mir gelouben wol,
ich teile in allez daz ich hân.>
dô diu rede was getân,
dô sach man soumaere
geladen harte swaere
hin ze hove bringen.
den stolzen jungelingen
den wart sît gedanket wol,
sô man nâch arbeite sol
danken iegelîchem man.
den pôlâne voget hete dan
mit im gefüeret rüedegêr:
den sach nu der künic hêr.
vil liebe was im ze muote,
daz er in sîner huote
alsô verre was nu komen.
frou helche hete ez ouch vernomen:
dô lobte si die hervart,
daz niene wart gespart
daz si beide mohten hân.
enphangen wart der pôlân
von in in der mâze dô
daz ers niht was ze frô.
der künec ein teil in zorne sprach
< ir sult mir mînen ungemach
gelten und die mînen man,
die ich von iu verlorn hân.>
dô sprach der gast, ez waere reht:
< ez sî ritter oder kneht,
swaz ir liget erslagen tôt,
die sol ich büezen mit der nôt
als ich darumbe gîsel bin.>
und waere niht diu künigin,
sô hete er sîn houbet vlorn
durch den etzelen zorn.
dem helde des tôdes si gewac.
in des küneges hande er dô lac
wol mit hundert sîner man.
den frou helche sît gewan
des rîchen küneges hulde
nâch ir vil grôzen schulde.
der künec was frô unde gemeit.
gegen sînen gesten er dô reit
dâ si dâ fuoren ûf den wegen:
einen ieslîchen degen
gruozt er nâch sînem rehte.
ritter unde knehte
wurden dâ von wol gemuot.
dô sach er disen degen guot
der âne urloup von im reit:
iedoch was im sîn gruoz bereit.
der knabe neic im unde sprach
< êre enfüeget niht gemach,
unsenfte hât nâch êren strît.
her künec, habt ir gezürnet sît,
dêst mir leit. ich enmohte hie
belîben niht, dô daz ergie
daz si alle riten dâ hin:
dar nâch stuont ouch mir der sin.
swaz ich ze tuonne solde hân,
mich dûhte, und waere ich hie bestân,
ich waer niht einer bône wert.
dâ sô manic helt sîn swert
versuochet hât ûf sarwât,
ze sehenne hete ich des niht rât.>
der künic smielen des began.
dô kêrte er mit im wider dan
dâ er die recken alle enphie:
die helde er ninder von im lie.
dô si nu wâren komen in,
dô gienc diu edel künigin
zuo im ûf den palas.
swaz herter dinge geschehen was,
diu hiez der künic scheiden
mit rede vor in beiden.
dô sagt dem künege vil hêr
von bechelâren rüedegêr
von disen wîganden,
waz si an den vîanden
wunders haeten getân,
und wie si einander bestân
haeten in dem gedingen
daz si einander twingen
für zwêne vînde solden;
< ob wir si alle wolden
gerne dâ gescheiden hân,
wir hetenz müelîche getân.>
alsô sagte im rüedegêr
< dô kam ich dâ die recken hêr
zeinander truogen herten haz.
vil kûme ich fuogte in bêden daz,
daz ich in sagte maere
dazz ein gesinde waere.
dô gerihten si sich sît
nâch den vanen in den strît.
dâ von hôrte man dô schal
von swerten diezen über al,
unz daz dirre junge man
in strîte hete alsô getân,
daz si alle wurden wîchhaft.
ir beleip dô vil von sîner kraft
do er den pôlâne voget vie:
dâ von ist er gîsel hie.>
der künic danken dô began
dem alten und dem jungen man
und andern guoten knehten.
ze dienste er im gerehten
mit gâbe machte manegen man.
frou helche ouch danken began
den jungen zuo den alten:
si kunde tugende walten.
die wunden hete man în getragen.
der künic hiez in niht versagen
swes si bedorften zuo ir nôt:
den gesunden man ez wol erbôt.
wie si gefuoren nâch der zît?
vil wol gedingen mohte sît
der fürste von pôlân.
urloup von dan gewan
der priuzen künic in sîn lant.
frou helche golt und ouch gewant
gap meiden unde wîben,
dô si bî ir belîben
langer niene mehten.
dô gab den guoten knehten
etzele der vil rîche
sîn guot vil williclîche.
frou helche si mit zühten lie,
dô ir ûzreise ergie,
scheiden von den landen.
von etzelen handen
muos er sîn lant enphâhen,
verren unde nâhen
die guoten bürge unde stete.
dô half der küniginne bete
dem herzogen von pôlân
daz er unde ouch sîne man
mit gedinge riten in ir lant.
sît dô muose ir beider hant
etzeln dienen manegen strît.
der wunden vil geheilte sît,
doch mohtens alle niht genesen.
wie mohte tugenthafter wesen
helche diu vil rîche!
weinende güetlîche
lie si von ir scheiden dan
beidiu wîp unde man:
ouch heten si daz wol erkant,
daz sis dâ ze hiunen lant
immer lieze mit ir man.
nu wart ouch als vor getân
in dem hove ze manegen stunden.
der künec wart ofte funden
in froelîchem muote,
und sîne recken guote.
sider nâch den zîten
dient im in siben strîten
alsô des küenen gastes hant
der sich dâ diete hete genant,
daz man im êre muoste jehen.
dâ bî man dicke mohte sehen
disen kindischen man
der ouch vil hôhen prîs gewan:
der ervaht etzelen sît ein lant,
daz ist pomerân genant.
swie ofte man imz werte,
die wîge grimme herte
vor des küneges volke er vaht.
dô sunnen tage unde ouch naht
der künic unde sîn wîp
wie si im behielten den lîp
ir landen ze êren.
vil manegen degen hêren
hete der künec in sînen phlegen:
dâ für muost man in einen wegen
an maneger hande dingen.
ez muoste im wol gelingen.
vil freude man ze hove vant:
ob si alle selbe heten lant,
sin kunden nimmer baz gevarn.
der künic hiez daz wol bewarn
daz er den sînen gesten
iht lieze gebresten.
guot ritterschaft man dâ sach:
durch êre heten ungemach
die werden und die wîsen.
den künec man mohte prîsen
daz ers in allen wol gestuont.
fürsten ez nu selten tuont
die ez in lâzen sô behagen.
swie man von im hôrte sagen
daz er ein heide waere,
man saget vil wîten maere
von im unz an den lesten tac,
daz sîn wirde nie gelac
unz an sînes lîbes tôt.
hete ein künec nu goldes rôt
groezer danne waere ein berc,
si taeten niht als miltiu werc.
der fürsten lop und êre,
daz swindet leider sêre.
daz wuohs ê von tage ze tage.
daz muoz nu sîn der wîsen klage
daz ez sô gar ist komen abe:
daz ist der guoten ungehabe.
fürsten zugen ê kint,
daz wurden ouch edele fürsten sint.
dâ man nu fürsten erben siht,
wie grôzer schanden man den giht! âventiure wie dietleip sînen vater vant.
dise rede sul wir belîben lân,
swaz si tuon od hân getân,
und sagen ein ander maere
wie bî dem künege waere
vil manic ritter unerkant,
der golt bürge noch lant
an im erdienen wolde niht.
als was ouch, sô man uns des giht,
bî etzeln unde helchen sint
der schoenen dietlinde kint,
daz sich bitrolf und sîn suon
nie mohten kunt getuon,
ez enhaete ir herze daz geseit
den küenen recken vil gemeit
dazs einander solden wesen holt.
swie siz niht haeten versolt,
si wehselten doch dicke
vil güetlîche blicke.
in hete sîn vater doch erkant,
wan daz der junge sîn gewant
hete gemachet sturmvar:
helm und brünne, daz was gar
besprungen mit dem bluote.
ouch hete der degen guote
sînen helfenbeinînen schaft
geverwet sô in strîtes kraft
daz er nieman was erkant,
wan im selben in der hant.
ir beider nam vil ofte war,
der ouch von fremden landen dar
was mit arbeiten komen:
swie er sîn niht hete vernomen,
sich versan der degen maere
daz ez sîn künne waere.
ouch muoste daz dâ von geschehen
daz er den alten ê gesehen
hete vor den zîten
dicke in herten strîten
ze arâbî in dem lande,
swie er sîn niht erkande,
dâ ofte der künic streit,
ê daz der degen vil gemeit
dannen muoste entwîchen
vor im zen hiunen rîchen.
er gedâhte< ich wil mich wol versehen
daz si mirs gerne niht verjehen,
sint si einander kunde.
swie ab ichz erfunde,
so erfreute ez harte mir den muot.>
dô gienc er zuo dem degene guot
der sich dâ diete hete genant.
er underreite ez sâ zehant
umbe den helt vil maere
daz im niht leit enwaere,
in solde ouch niht betrâgen
des er in wolde frâgen.
er sprach, er hôrte ez wol für guot:
< swaz frâge ir an mich getuont,
die wil ich nimmer iuch verdagen,
ich wils iu williclîchen sagen.>
der marcgrâve sprach zehant
< ir sît biterolf genant.
swie ez nu darumbe stêt,
ir sâzet ê ze tôlêt,
dar zuo diente iu al daz lant.
ich hân iuch allez her erkant,
unde enmohte iu doch niht jehen
daz ich iuch hete hie vor gesehen.
des hât mich gejâmert immer sint.
diu küniginne dietlint
hât krône bî iu her getragen.
nu hôrte ich iuch daz gerne sagen,
ob ez iuch niht beswaeret,
wie ir gescheiden waeret
von siben rîchen landen
dâ ir guoten wîganden
gâbet ros unde wât.
nu wiste ich gerne wie stât
frouwen dietlinde,
dem diethêres kinde,
wie ir gescheiden sît dâ von.
ich was ie vil ungewon,
swie vil mir recken sî genant,
daz ich keinen bezzern habe erkant.>
vor leide blûwec wart der man.
antwurten im iedoch began
der herre von den bergen
< ob getouften noch getwergen,
der bêder künic wart ich nie.
warumbe waere ich denne hie,
möhte ich haben eigen lant?
ich bin ouch bitrolf niht genant.>
dô sprach der marcgrâve hêr
< lougent ir mirs immermêr,
ir sîtz vor dem ich z' arîas
in strîte noetlîche genas.
welt ir mirs friuntlîche verjehen,
ich zeige iu hie, welt ir in sehen,
gesipten friunt alsô guot
daz ez iu troestet wol den muot.>
si bêde stuonden alsô hie
daz man von in gehôrte nie
swaz dâ spraeche ir beider munt.
er jach, er taete im gerne kunt,
< ob irz sô tougen kundet tragen
daz ir ez nieman woldet sagen.>
dô sprach der gotelinde man
< mînen eit sult ir ze phande hân,
daz ich ez alsô kan verdagen
daz ich ez immer wil gesagen
manne noch wîbe.
daz habt ûf mînem lîbe:
ir hoeret es ê ân mich verjehen.
daz lâze ich iuch wol gesehen.>
der voget dô von den bergen sprach
< wirt ez mir ein ungemach,
sô haet ir an mir wol versolt
daz ich iu nimmer wurde holt.
ich bin biterolf genant.
vil guoten fride hete mîn lant
dô ich nu naehste danne reit.
marcgrâve, daz si iu geseit,
wol gesunt liez ich mîn wîp.
geurbort hân ich mînen lîp
bî den guoten recken hie:
ich getorst mich iu gemelden nie,
und hân iuch lange her bekant.
wes jehet ir mir ze hiunen lant,
den ich ze friunt hie müge hân?
den sult ir mich sehen lân.>
dô sprach der marcgrâve rüedegêr
< nu lât mich wizzen, künic hêr,
ob ir und frouwe dietlint
ie gewunnet mit einander kint.>
< jâ wir>, sprach der küene degen;
< ich liez dâ heime in gotes phlegen
zwei vil kleiniu kindelîn,
einen sun und ouch ein tohterlîn.
mînem sune was niht mêr gezalt,
wan drithalp jâr was er alt,
der zît dô ich von danne reit.>
< lât ez iu niht wesen leit,>
sprach rüedegêr der rîche:
< er mac gewalticlîche
vil guoten knehten widerstân,
swie kleine ir in dort habt verlân.>
der marcgrâve von im dô gie.
den jungen helt den vant er hie
spilnde bî den kinden.
von den hofgesinden
hiez er den knaben zuo im gân.
sît wart im wol kunt getân
wie der degen was genant:
mit grôzer fuoge er daz ervant.
heimlîchen frâgen er began
< wie lange welt ir, junger man,
iuwer geslehte vor uns heln?
waenet ir etzeln an versteln
wie iuwer name sî genant?
ich weiz wol wâ ir habet lant
und liute vil darinne.>
der tumbe sprach mit sinne
< möhte ich liut und lant gehân,
ir saeht mich niht sus eine stân.>
er sprach< zwiu helt ir mich nu daz?
ir sult ez lâzen âne haz
daz mîn und der marcgraevîn kint
iu vil nâhen sippe sint.
ir sult iuch melden âne schame:
diethêr hiez iuwers anen name,
iuwer muoter hiez dietlint,
ir sît daz biterolfes kint.
den sach ich, des ist niht lanc.
waer iuwer witze niht sô kranc,
sô solde iuch niht betrâgen,
ir solt mich drumbe frâgen.>
der helt sich fröuwen dô began.
do gedâhte im des der junge man
< er manet mich eines wîbes;
des ir vil werden lîbes
des bin ich immer ungeschant.
sô hât ouch er mir hie genant
mînen vater>, gedâhte der degen:
< er enwelle untugende phlegen,
er sol michs wîsen fürbaz.
ich wil mich melden umbe daz,
daz er mir zeige den vater mîn:
sô wil ich frô ie mêre sîn.>
dô er der rede vil getreip,
dô sprach der junge dietleip
< her rüedgêr, tugentlîcher degen,
nu sult ir iuwer zühte phlegen,
sît daz iuwer beider kint
sô nâhen mir sippe sint,
als ir mir selbe habt geseit.
nu sol ez werden nicht verdeit,
ich wilz iu ûf genâde sagen
daz ich lange tougen hân getragen:
mîn muoter heizet dietlint,
des alten diethêres kint.
mîn vater ist biterolf genant.
nu sult ir mir daz tuon bekant
wâ ir den recken habt gesehen.
mirn kunde liebers niht geschehen,
wiste ich wâ der waere.>
nâch dem selben maere
nam er den degen bî der hant
und gienc da'r sînen vater vant.
der knabe vor in beiden stuont,
als noch kint vor den helden tuont,
da enwas ouch ander nieman mêr.
dô sprach der guote rüedegêr
< haet ich sô lange in niht gesehen,
von mir sô müese ein kus geschehen
dem knaben der hie vor uns stêt.
daz irm begegene niht engêt,
her biterolf, des wundert mich.
jâ hât der junge degen sich
nâch êrn verriten verre.>
biterolf der herre
frâgte dô der maere
wie er genant waere.
er sprach< er heizet dietleip.
daz in ze disen landen treip,
daz tete diu sorge nâch iu dan.>
dô sprach der kindische man
< sît ir biterolf genant,
sô hân ich in der hiunen lant
durch iuwer liebe her geriten.>
mit rehte friuntlîchen siten
einander si enphiengen:
sunder si dô giengen
unz er im allez des verjach
wie er gerûmet hete daz lant.
rüedegêr der wîgant
hete niht tûsent marc genomen,
si enwaeren bêde dar bekomen.
dô frâgt von sînen landen
und von den wîganden
biterolf der maere,
ob noch gesunt waere
diu küniginne dietlint.
dô sprach daz biterolfes kint
< ir sult gelouben mir für wâr,
sîn ist lützel über ein jâr
daz ich von dem lande reit.
dô wâren frô unde gemeit
die liute in dem lande.
nâch iu was mir ande:
nu ist mir liep daran geschehen
daz ich iuch lebendic hân gesehen.>
si dankten bêde sêre
der triuwen rüedegêre
die er hete an in begân.
dô sprach der etzelen man
< ich tuonz noch gerne, ob ich mac.
des ist nu vil manegen tac,
daz ich nie wart sô frô gemuot.
hei wiste ez der künic guot,
die êre diu im ist geschehen,
sô solde er iuch vil schiere sehen
und von êrste iuch enphâhen.>
swie er waere bî in nâhen,
iedoch entorste ez rüedegêr
vermelden niht dem künege hêr.
er bat si schaffen ir gemach.
dâ er die küniginne sach,
dar gie der gotelinde win
vil gezogenlîchen hin.
dô sprach diu küniginne hêr
< sît willekomen, rüedegêr.
sagt ir iht fremder maere?>
dô sprach der lobebaere
< ich hân niht fremder maere erkant.
wist aber ich>, sprach der wîgant,
< ieman guotiu maere sagen,
diu wolde ich iuch vil gar verdagen,
dar zuo iuwer werdiu wîp.
ze phande stêt des mîn lîp
und daz ich alle sküneges man
haele daz ich vernomen hân.
nu ichz alsô sol verdagen,
sô wil ichz einer meide sagen;
daz ist mîn frouwe herrât.
ich wil dazz heimlîche ergât
dâ si diu maere hoeren sol.>
daz hûs saz edeler frouwen vol:
die hal erz algemeine
wan dise maget aleine.
dô si diu maere rehte vernam,
vor liebe lachen ir gezam.
do verstuont si wol sînen muot
warumbe ez tete der helt guot.
dô gie gezogenlîche
diu junge maget rîche
dâ si vant die künigin.
< ich wils niht âne lôn gesîn,>
sprach diu schoene herrât.
< umb disiu maere ez alsô stât
daz ichz billîchen sol verdagen.>
si sprach< du solt mirz doch sagen,
ob du mir ie wurdest holt:
darumbe gibe ich dir mîn golt.>
si sprach< sô hoeret, edel wîp,
wie getiuret iuwer lîp
und ouch mînes herren, sküneges, sî.
iu zwein wonet mit dienste bî
die besten wîgande
die ze hiunischen lande
bî iuwern zîten sint bekomen:
daz hân ich wol vernomen.
die habent sich lange hie verholn
und ouch ir edelkeit verstoln
vor dem künege in sînen landen
und vor sînen wîganden.>
si frâgte wâ die waeren.
< man saget mir an den maeren,>
sprach diu frouwe herrât,
< ich sage iu wiez darumbe stât.
der sich dâ diete hât genant,
des name ist biterolf erkant,
sîn wîp heizet dietlint.
der knabe ist ir beider kint,
der hie sô wol gedienet hât.
ir dinc nâch hôhem wunsche stât,
si habent bürge und rîchiu lant.
nu hât der junge wîgant
funden sînen vater hie.
ir gewunnet werder geste nie.>
dô sprach diu küniginne guot
( vil trûric was ir muot)
< ouwê, wie wir ervaeret sîn,
ich und ouch der herre mîn!
daz mac uns êren letzen.
wir kunnens niht ergetzen
sô swacher handelunge,
die der alte und der junge
hie zen hiunen habent genomen.
wir suln zuo ir hulden komen,
sô wir nu aller beste mügen.
mîn herre sol des wol gehügen
daz ez im selben ist geschehen,
wil er der wârheite jehen.>
frou helche bat dô drâte
zuo ir kemenâte
etzelen den vil rîchen
komen heimlîchen.
dô er zer küniginne gie,
diu frouwe in weinende enphie.
dô wunderte in der maere,
waz ir geschehen waere.
si bat in sitzen sâ zestunt:
mit maeren tete si im dô kunt
wie in beiden waere geschehen,
< des hât rüedegêr verjehen
mîner nifteln herrâte.>
zuo helchen kemenâte
hiez er si drî dô bringen.
die boten îlten springen
und hiezen hin ze hove gân
der schoenen gotelinde man
und die vil werden geste.
ir deweder dô niht weste
daz si vermeldet waeren
ze hove mit den maeren.
dô bitrolf in daz hûs gie,
küneges geste wurden nie
ze hove baz enphangen.
der künec lie sich belangen
niht, er gie engegen in:
alsô tet ouch diu künigin.
sô hôhe enphiengen si si hie
sam ob sis gesaehen nie
vordes in hiunen rîchen.
dô dankte vlîziclîchen
her biterolf und ouch sîn kint
dem künege und ouch froun helchen sint.
si bâtens sitzen neben in.
der knabe niht hete den sin
daz er sitzen solde.
der künec dô niht enwolde
enbern erne saeze nider.
zuo in beiden sprach er sider
< nu waz hete ich iu getân
daz ir mich niht habt wizzen lân
wie ir waeret genant?
haet ich iuch bêde rehte erkant,
ez waere iu verre baz erboten.
ich gedanke es nimmer mînen goten
daz ez mir her verholn ist.
nu hân ich keiner slahte list
wie ich mich wider iuch erhol,
daz ichs iuch ergetze wol.>
dô sprach der alte man
< herre, uns ist hie niht getân
wan guot unde êre.
ich nam von rüedegêre
darumbe sîne sicherheit
dazz nimmer wurde geseit
weder wîbe noch man:
nu ist uns dar an missegân,
daz beswaeret iu und uns den muot.>
dô sprach rüedgêr der degen guot
< die rede wil ich iu bescheiden:
haetet ir ez mich vor meiden
heizen heln sam vor wîben,
sô hete ichz müezen lân belîben.>
der künec dô lachende sprach
< mir ist liep daz ez geschach
daz ich iuwer beider künde hân.
nu wirt des nimmer niht verlân
darnâch ringet iuwer sin:
allez des ich gewaltic bin,
daz sî iu undertân.
swâ wir uns versûmet hân,
ich und ouch diu frouwe mîn,
daz sol iu wol gebüezet sîn.>
diu küniginne rîche
sprach gezogenlîche
< ich verschame mich sô gâhes niht,
swie ez halt anders nu geschiht,
daz ich si niht gehandelt hân
als ich von rehte solde hân.>
in bôt der künic rîchiu lant.
dô sprach her biterolf zehant
< ich hân noch selbe lande driu,
der knabe bouwe vieriu
ob er diu gerne haben wil.
dar inne ist guoter helde vil,
die dienent tägelîchen mir.
der hiunen künec, got lône dir
daz du mir biutest dîniu lant.
nu bin ich biterolf genant,
vor was diete mîn name.
der dinge ich mich nimer geschame
daz ir mir bietet iuwer lant:
hab iht gedienet unser hant,
her künec, des lônet, sô wirs gern.>
dô sprach frou helche< ir sult gewern
mich und ouch den herren mîn:
iuwer sun sol ritter sîn.
uns enbreste des wir bêdiu hân,
daz sol in kurzer zît ergân.>
der helt ir neic unde sprach
< jâ muoz ich einen ungemach,
liebe frowe, verenden ê,
ê daz ich under krône stê
ode ritterlîche enphâhe swert.
ir beidiu habt an mich gegert
daz ich von iu enphâhe lant:
nu tuon ich iu daz bekant
daz ich ein teil gehoenet bin.
muget ir mich des bringen in
daz ich des niht laster hân,
swaz ir danne welt, daz sî getân.
daz wil ich zeiner gâbe nemen,
ob ez uns beiden mac gezemen,
daz ir mir helfet mîniu leit
rechen diu mîn herze treit.>
der künec dô fragte maere
waz im geschehen waere.
er sprach< dâ reit ich über rîn,
do ich suochen wolde den vater mîn
hie in iuwerm lande:
gunthêr mich an rande
und ouch die sînen mâge.
die riten mir sô ze lâge
daz ich mit nôt vor in genas.
swie ich vil gar unschuldic was,
si wolden mich betwungen hân
daz ich hete durch si getân
daz ich mit in rite zeiner stete.
dô ich niht werte si ir bete,
alrêst bestuont mich hagene.
do erwerte ich mich dem degene
als mîn gelücke daz gebôt.
zehant kam ouch gêrnôt:
mîn kintheit half mir von im dan
daz er mich muose rîten lân,
wan er wart ein lützel wunt.
dô kam der künic sâ zestunt
und rant mich übellîchen an.
daz ich fride von dem gewan,
daz was gelücke und ouch mîn heil.
doch fuorte er mîner tjoste teil,
swie ich sî ein kneht, mit im dâ hin.
dâ von gescheide ich mînen sin
nimmer, ez enwerde in leit.>
dô sprach der künec< ich bin bereit
mîner helfe wol darzuo,
daz man in einen slac getuo.
ich schicke iu her daz mîne
daz gunthêr noch die sîne
erwernt nimmer des ir lant,
ir enstiftet roup unde brant.
ûf in und ouch sîne man
wil ich iu mîne helfe lân
mit vierzic tûsent hinnen:
swaz die schaden gewinnen
ode swaz man leides den getuot,
dâ mac verrücket werden huot
swenne ez kumet an den strît.
ob ir des in zwîvel sît,
mugt ir si twingen niht dâ mite,
( si habent hôchvertigen site,)
sô wil ich iu mîner man
ze drîen vollen stürmen lân
ie ahzic tûsent oder baz.>
der helt neic im umbe daz.
dô sprach bitrolf der wîgant
< wir muoten in der fürsten lant
niht wan zweinzic tûsent man.
disen knaben sullen sehen lân
sîner muoter künne,
ob getriuwe sippe iht wünne
sî ieman in dem rîche.
sîme neven dietrîche
sol er boten senden:
deste minner mac man wenden
im sîne reise an den rîn,
wil er im bîgestendic sîn.
sô bite ouch ermenrîche.
der tuot ez billîche:
sîn vater und frou dietlint
wâren zweier bruoder kint.
sô sende ouch danne sâ zehant
in der harlunge lant,
frîtelen unde imbrecken,
ob die küenen recken
im helfe wellen bî gestân,
als ez von schulden ist getân.
sô lâze ouch sich niht wenden,
er sol ze meilân senden;
ob die berkêres kint
bî ermenrîche niht ensint,
sô sol manz dâ heime wizzen lân
die fürsten von meilân.>
dô sprach diu edele künigîn
< des mac iu wol ze râte sîn
daz ir ninder mêr ensendet,
sît ez wol eine verendet
der hiunen künec mit sînem her.
an vier enden unz an daz mer
möht iuch der künec wol bringen,
daz iuch nieman dringen
sô lobe ich hie zestunde,
ob ir welt mîne helfe hân:
ich wil iu zehen tûsent lân
die ich iu sende ûf mînen solt.
wir sîn iu beiden wol sô holt,
ich und der künic hêre,
welt ir noch recken mêre,
dann ir bedurfet an den rîn,
die müezen iu vil bereite sîn.>
dô dankten vlîziclîche
die helde dem künege rîche
und ouch der küniginne hêr.
al balde sprach dô rüedegêr
< jâ durfet ir mêr helfe niht,
swenn iuwer reise dar geschiht,
danne mînes herren man.
wil iu danne ir helfe lân
helche mîn frouwe,
ir muget, als ich wol trouwe,
ân allez widerstrîten
unz an den roten rîten;
und lât iu daz niht versmâhen,
beidiu verre unde nâhen
füere ich iu der mînen man,
der besten die ich inder hân,
fünf hundert wîgande
ze gunthêres lande.
ich wil dar selbe rîten:
spiln oder strîten,
swes ich danne kan phlegen,
des wil ich helfen>, sprach der degen.
si dankten schône beide.
froun helchen was niht leide
daz si den dienest wolden nemen.
< nu tuot als ez uns mac gezemen,>
sprach biterolf der wîgant.
< gebet unz boten in daz lant
die von dem künege widersagen,
und ahten daz in welhen tagen
wir mugen rîten an den rîn.
sô sint ouch die friunde sîn
dem jungen dietleibe komen:
swer ez danne hât vernomen,
den iht beswaeret unser leit,
der ist uns helfe dar bereit.>
dô sprach rüedegêr der degen
< lât mich der botschefte phlegen,
die wil ich senden an den rîn.
diu hervart mac niht ê sîn,
als ir sîn beide habt gedâht
daz die zesamene werden brâht
die mit iu gerne rîten dar.
unz ir diu velt seht bluomenvar,
zen naehsten sunewenden,
sô mugen ouch wirz verenden;
sô sint berâten wol diu lant.
die wîle habt ir iuch besant
mit den iuch selben dunket guot.
swâ man widersagen tuot
künegen alsô rîchen,
daz tuo sô zîtlîchen
daz ez iemanne laster sî.
ê sich verenden tage drî,
die boten senden wir dâ hin.
durch iuch ich des vlîzic bin
daz man der hervart sô getuo
daz helde sprechen wol dar zuo.>
man liez an rüedegêre daz.
dô muoste in zogen deste baz,
die den boten kleider sniten,
daz si bezîte danne riten.
zwelve wurden der bereit:
guotiu phärt und rîchiu kleit,
daz wart in schiere gegeben.
mit koste schuof man ouch ir leben,
beidiu dar unde dan.
rüedegêr der küene man
vil wol bedenken kunde daz.
der hiunen künic sînen haz
durch dietleip an den rîn enbôt:
des waere in guoter witze nôt,
ob si daz kunden understân.
der künic hiez si wizzen lân
daz er zuo ir lande
drîzic tûsent sande
durch einen kindischen degen:
den heten si ûf sînen wegen
beswaeret âne schulde;
des enheten sîner hulde
niht die burgondaere.
dô hiez ouch sagen ir maere
helche diu vil rîche
daz si unhazlîche
den recken allez waere holt;
si müese ir silber unde ir golt
ze solde geben ûf ir leit:
ir hete ein jungelinc gekleit
waz si heten im getân;
dem wolde si ir helfe lân
mit zehen tûsent mannen,
daz im die volgeten dannen.
< man sol ouch daz niht verdagen,
man sol von bloedelîne sagen:
der füeret dar besundert
drî und drîzic hundert.
von allen den fürsten die hie sîn
bî iu und ouch der frouwen mîn,
die'z urliuge mit iu wellen tragen,
von den sol man in widersagen
und in dort alle nennen
daz sis mugen erkennen.>
dô sprach der guote rüedegêr
< ir saget den fürsten alsô hêr
daz in mîn herre sî gehaz.
wellen si im büezen daz.
sô heize er ûf si rîten niht:
ob des danne niht geschiht,
sô müese er senden an den rîn
die in wol schade mügen sîn,
und welle in ir lande
rechen die schande
diu sînem gaste sî geschehen.
daz si lân vil balde sehen
ob siz wellen enden.
zen naehsten sunewenden,
sô wirt mit urliuge in getân
daz si sîn schaden müezen hân.> der schâch von wormez wie der widersaget wart.
die boten man dô sande
von hiunischem lande
hin ze wormez an den rîn
gunthêre und den mâgen sîn.
dô sande ouch anderthalben dan
die boten die der helt gewan,
biterolf der rîche,
dem herre dietrîche.
er sande ouch hin ze rabene
ze ermenrîche dem degene.
er hiez ouch si daz wizzen lân,
ob si die helde ûz meilân
bî ermenrîche funden,
dazs in diu maere kunden:
wurd ez in dâ niht kunt getân,
sô riten hin ze meilân.
er hiez ouch berthunge biten
daz er nâch friuntlîchen siten
dem helde helfen solde,
ob er daz wizzen wolde
daz er sîn künne waere;
und bat ouch disiu maere
sagen den harlungen,
den edelen fürsten jungen,
frîtelen und imbrecken,
< ob wizzen daz die recken
umb frouwen dietlinde kint,
swes si dem helde schuldic sint.
ir sultz ouch wahsmuote sagen
und ouch dem alten regentagen,
eckeharten und rimsteinen.
verdaget irz ir keinen,
daz si ir triuwe lâzen sehen:
ir helfe sî uns nôt geschehen.>
die boten wurden dô gesant
daz si sich teilten in diu lant:
si wurben umbe ritterschaft,
die etzeln von sîner kraft
widersâzen sêre.
waz sol ich sprechen mêre?
si gâhten vaste an den rîn.
ir fride muoste guot sîn.
swâ si riten durch diu lant,
diu etzeln hêrschaft was erkant.
darumbe man in êre bôt:
geleites was in ninder nôt.
als wir diu maere hoeren sagen,
inner sehzehen tagen
kômens ze wormez an den rîn.
nâch siten des hoves sîn
sach man die boten kleider tragen.
die jungen fürsten hôrten sagen
daz in geste waeren komen:
swâ sich die haeten genomen,
si trüegen in der mâze kleit
als hagen dô er von hiunen reit:
< als ist gestalt ir gewant,
als er dô brâhte ûz hiunen lant.>
der künec hiez ir dô nemen war:
sîn marschalc gâhte balde dar
und herbergete si zestunt.
hagenen wart ez schiere kunt:
der kom dâ er die boten sach.
zem künege er harte balde sprach
< si riten ûz der hiunen lant.
ich waen, ez habe nâch mir gesant
der künec und ouch sîn werdez wîp:
si wellent daz ich mînen lîp
aber zen hiunen lâze sehen.
daz sol nimmer mêr geschehen.
man sol in dienstes sîn bereit;
si tragent mîner frouwen kleit
diu in ir kamere sint gesniten.
warumbe si sîn her geriten,
daz sint vil starkiu maere.>
der fürste lobebaere
hiez in schaffen guot gemach,
unz er gehôrte unde sach
waz si wolden an den rîn.
dô kom zuo den kunden sîn
hagene der wîgant:
umbe den künic und daz lant
die boten frâgen er began.
schiere wart im kunt getân
daz sich der künic rîche
gehabte froelîche.
< nu saget mir von der frouwen mîn.>
< si kunde stolzer niht gesîn,>
sprach ir einer drunder.
< si beide hât des wunder,
waz iu bî in sî geschehen
daz ir iuch sô selten lâzet sehen
in hiunischem lande.
nâch iu ist in vil ande.>
dô sprach hagene der degen
< mir ist niht gâch zuo den wegen
die ich zen hiunen rîte.
got lâze si ir zîte
mit freude wol hine bringen.
ich hân des niht gedingen,
swie wol si heten gnâde mîn,
daz ich mêr dâ welle recke sîn.>
hiunisch er dô zuo in sprach
daz si schüefen ir gemach:
des gunde in der künic wol.
als man herren boten sol,
alsô wart ir dâ gephlegen.
hin wider hagene der degen
kam dâ er den künic vant:
< wie sint si kumen in daz lant?
wizzet ir iht der maere?>
dô sprach der redebaere
< wan daz ich si hân gesehen,
si habent mir anders niht verjehen.>
dem künege sagte er daz duo
< si wellen für iuch morgen fruo:
alsô hôrte ich si jehen.>
dô sprach der künec< daz sî geschehen.>
alsô liezen si daz stân
unz daz zem münster wolde gân
der künic an dem morgen fruo.
die boten wâren komen duo
und stuonden für in an den wegen.
aldâ gruozte si der degen.
si nigen unde begunden gern
ob er si wolde des gewern,
daz si sîn urloup solden hân,
sô wolden si in wizzen lân
waz si wurben in sîn lant.
daz urloup gap er in zehant.
dô sprach ein ritter under in
< iu tregt vil hazlîchen sin
der künec von hiunen rîche:
er hiez iu endiclîche
sînen dienest widersagen.
ouch sul wir iuchz niht verdagen
warumbe er iu sî gehaz.>
dô sagte er im allez daz,
alse im dâ vor was geseit.
daz was den burgonden leit,
ez muote den künec vil vaste.
< welt aber ir sînem gaste
büezen sîne schande,
diu im in iuwerm lande
von iu herren ist getân,
sô sult ir guoten fride hân.>
gunthêr sprach< er mac wol jehen
daz im hie schade sî geschehen:
doch hân ich schaden mêre.
ich schônte es durch mîn êre
daz man in ze tôde niht ensluoc:
heres hete ich im genuoc;
dô liez ich in doch riten.
wil er an uns erstrîten
mit den hiunen sînen prîs,
si sîn tumbe oder wîs,
lieze im etzel drîzic her,
den allen satzte ich mich ze wer,
ê ich im buoze sande
ze hiunischem lande.>
< so enbiutet iu der jungelinc,
der dâ brüevet ditze dinc,
daz er iu êrste widerseit.
ouch sol iuch werden niht verdeit,
sîn vater tuot iu alsam.
biterolf ist des nam,
der knabe heizet dietleip.
nieman hinder uns beleip
in der hiunen lande
der guoten wîgande,
si hiezen iu alle widersagen.
der künic wil iu niht vertragen
sînes gastes ungemüete.
nu seht wie manz behüete:
iuwer lant muoz drumbe brinnen.
waz muget irs frumen gewinnen,
ode wâ naemet ir die wer?
der künec im sendet her ein her
mit vierzic tûsent sîner man.
sô sol ich iuch daz wizzen lân:
mîn frouwe hiez iu widersagen,
dô si den recken hôrte klagen.
ellenden liuten ist si holt:
ûz ir kamere gibet si golt
wol zehen tûsent mannen,
die rîtent mit im dannen.
noch sult ir hoeren mêre,
ir guoten degen hêre,
von recken die zen hiunen sint.
vil maneger werder muoter kint,
diu habent iu heizen widersagen.
der sol ich einen niht verdagen,
die dâ fürsten sint genant,
die iuch von der hiunen lant
wellent suochen an den rîn.
des küneges bruoder bloedelîn,
der füert dâ her besundert
drî und drîzic hundert.
dâ mit rîtet ouch râmunc
und hornboge der helt junc.
gibeche unde schrûtân,
der herzoge von merân,
die hânt iu bêde widerseit,
( daz mac iu helden wesen leit,)
und sigehêr der frîe,
der helt ûz turkîe.
gotele der rîche
widersaget iu vlîziclîche.
als hât ouch rüedegêr getân,
der künic etzelen man,
der von bechelâren.
dô si ze hove wâren,
hôrt ich die guoten knehte jehen
daz si sich wolden lâzen sehen
hie in disem lande.
die guoten wîgande,
hâwart der starke,
der helt ûz tenemarke,
und irnfrit der wîgant,
der fürste ûz düringe lant,
und ouch der degen îrinc
und manic stolzer jungelinc
ûz hiunischem rîche,
die koment iu schedelîche.>
dô sprach von troneje hagene
< haet er nu al die degene
die er ie gefuorte hervart,
sît daz er êrste künic wart,
wolden die ûf uns rîten,
der müest wir hie erbîten.>
dô sprach der recke gêrnôt
< swie gewalticlîche er her enbôt,
daz man von disem lande
zen hiunen gîsel sande,
dem künege wir niemêre
erbieten solhe êre.>
der künec ze sînem tische saz:
er hiez der boten umbe daz
niht wirs gên einem hâre phlegen.
dô nu enbizzen was der degen.
dô hiez er balde springen:
gâbe hiez er bringen
boten der vîande sîn.
die sô starke an den rîn
widersagten offenlîche,
die hiez er vil hêrlîche
beleiten wider in ir lant.
dô sprach ir einer unerkant
< wizzet daz uns der künec gebôt,
ob ir uns gaebet berge rôt
von liehtem golde gar guot,
sô haeten wirs deheinen muot
ze nemen umb einen phenninc.
sô hohe stêt des küneges dinc.
wir tuonz niht durch versmâhen,
wir getürrens niht enphâhen.>
die boten schieden dô von dan.
der künic gie mit sînen man
sunder sich berâten
waz si darumbe tâten.
des vereinte sich zehant
der voget von burgonde lant.
dô sprach aber hagene
< wâ naemen wir die degene
dâ mite wir werten daz lant?
haeten wir alle die besant
die wir ze friunde mügen hân,
wir kunden nimmer widerstân
etzelen dem rîchen.
ich râte iu wîslîchen,
welt ir die hervart wenden,
ir sult nâch fürsten senden
und ladet die zeiner wirtschaft,
daz si komen mit ir kraft
und niht lân belîben
si enkomen mit ir wîben
ieslîcher her zer hôchzît,
reht alse ir des bewîset sît
daz man iuch welle suochen hie;
die man ze hôhem dingen ie
prîset in allen enden,
daz si zen sunewenden
zuo iu rîten an den rîn,
und hie bî der hôchzîte sîn
mit den besten die si hân
ûf guoter ritterschefte wân:
die suln hie bî uns schouwen
mâge und edele frouwen.
und enbietet den wîganden,
swaz si ir zuo den landen
immer mügen bringen,
daz si des haben gedingen,
in sî des ungebrosten,
ir welt si gar verkosten.
sît ir mit fride gerne,
sô sendet gên palerne
ze dem der voget ist überz lant:
der ist stuotfuhs genant;
ich erkenne wol sîn übermuot,
sô kumet iu der helt guot.
habt ir ze wer gedingen,
sô sult ir ze hûse bringen
den starken liudegêre,
der ist ein degen hêre.
der künec von tenemarke,
des helfe frumet iu starke
wider ir grôzen übermuot;
und bitet ouch den helt guot,
den küenen liudegaste,
der gezaeme iu wol ze gaste,
wolde er komen an den rîn
mit dem nâchgebûren sîn;
und ouch die wîgande
dâ her von ôsterlande,
die ie nâch prîse wurben,
die durenge und die surben.
iuwer boten werden ouch gesant
ze bêheim unde in beier lant:
ze witzlân dem vil rîchen,
der kumet iu sicherlîchen,
und poytân von wuscherât:
die besten ritter die er hât,
die bringet er iu an den rîn.
ir sult ouch des genant sîn
daz iu kome von beier lant
gelphrât der wîgant
und else der marcman.
man sol ouch niht belîben lân
von regensburc nantwîn,
der sol zer hôchzîte sîn,
den heizet iu ouch bringen:
wie möht ir baz gedingen?
bitet fridleip ûz swâben komen:
daz habt ir selbe wol vernomen,
der ist ein vil guot wîgant.
herleip ist iu ouch erkant
von westvâle dem lande,
der ist ein helt zer hande.
von elsâzen grâve berhtolt,
der naeme dâ für kein golt
ern saehe ouch hie die ritterschaft.
sô kumet iu ouch mit sîner kraft
der fürste dâ von spanjelant,
walthêr der wîgant;
der lobte, ob daz geschaehe
swenn man in gerne saehe
ze wormez bî dem rîne,
daz er und al die sîne
iu ze dienste wolden komen:
daz habet ir selbe wol vernomen.
wer mac iuch danne twingen?
her bringet von kärlingen
der künec alle sîne man,
die sint im dienstes undertân:
arragûn und nâvarren lant,
daz stêt gar in sîner hant;
dâ von er bringet helde
her in iuwer selde.
ir sult ouch sîfride biten,
daz er in friuntlîchen siten
ze wormez rîte an den rîn,
daz er die triutinne sîn
mit im dannen füere.
vil wol ich des geswüere,
kumet er her in ditze lant,
sô hilfet uns des recken hant
daz wir dem etzelen her
sîn al deste baz ze wer.>
nâch dem hagenen râte
si frumten boten drâte
in der selben fürsten lant,
die ich iu habe vor genant,
und hiezen den fürsten allen sagen
daz si nâch den phingesttagen
alle koemen an den rîn:
die dâ fürsten möhten sîn,
die braehten alle dar ir wîp.
des wart der edelen frouwen lîp
getiuret harte sêre:
beidiu zuht und êre
mohte man dâ vinden,
an in und ir gesinden.
dô man die boten rîten liez,
die wîle der künec bereiten hiez
gestüele gên den gesten.
die stat heiz er ouch vesten
bêdiu mit mûre und mit graben:
vil werkes wart von in erhaben:
des si alles haeten niht getân,
haet sis der hiunen künec erlân;
der machte in dise swaere.
nu merket ouch diu maere
wie etzeln boten kômen wider,
waz si ze hove sagten sider
von gunthêre und sînen mâgen,
dô si begunde frâgen
der künec< waz habt ir dort vernomen?>
< dâ wellent sî niht abe komen
deheiner ritterlîcher wer.
ob ir in sendet tûsent her,
durch nieman rûment si ir lant;
ez wil ouch ir keines hant
iu zinsen sînes vater guot.
si wellent, swaz man in getuot,
zuo in warten an den rîn.>
dô sprach der künec< nu muoz ez sîn.
si gelfent nie sô vaste,
ich wil ez mînem gaste
volbringen an sîn êre.
ir boten, saget mir mêre:
was hagene bî den künegen dâ
ode was er inder anderswâ?>
die boten sprâchen alzehant
< als wir kômen in daz lant,
er was der êrste der uns sach.
vil harte güetlîche er sprach
von iu und mîner frouwen.>
< ich wil des wol getrouwen,>
sprach der künic rîche,
< daz mîn vil friuntlîche
gedâhte der helt guot,
lieze er wan sîn übermuot.>
dô sprach ir einer under in
< ich hôrte in wol den êrsten sîn
der den künegen riet die wer.
er hete doch der hiunen her
in langen zîten niht gesehen.>
dô sprach der künec< des man im jehen
lange hôrte, deist an im.
swaz ich nu rede von im vernim,
sô ist ez doch der wirste man,
des ich künde ie gewan.>
die dâ wâren ê gesant
in der amelunge lant
dem fürsten dietrîchen,
die kômen unsorclîchen,
wan si heten wol vernomen
daz in gerne wolde komen
vil williclîche er dietrîch:
aht tûsent helde lobelîch,
die wolde er in bringen.
sich freuten des gedingen
die ellenthaften geste.
den helden nôtveste
ir aller dienest wart geseit,
und daz in waere vil bereit
ermenrîch der maere
mit manegem rabenaere.
den jungen berhtungen
von den amelungen,
den wolde er in senden,
daz kunde nieman wenden.
sîn helfe wart niht kleine,
wan witege unde heime
die kômen bêde an sîner schar:
ouch sande er liutwaren dar
und sabenen den vil rîchen,
die im williclîchen,
alse ez ermenrîch gebôt,
gestuonden zaller sîner nôt,
mit zehen tûsent mannen:
die fuoren mit im dannen.
< sô heizent iu die zwêne sagen
( daz sol ich iuch niht verdagen)
rienolt unde randolt,
si sîn iu bêde wol sô holt,
si füeren iu ûz meilân
driu tûsent küener man
in ringen stâlherte;
si wellen ir geverte
durch iuch schaffen an den rîn
und in dem urliuge sîn.
die zwêne fürsten junge,
die küenen harlunge,
die enbietent iu ir staeten muot,
friuntschaft unde allez guot,
daz si iu willic sîn genuoc.
dô man der maere gewuoc,
dô freuten si sich sêre,
und jehent swaz se iuwer êre
mit ir wîganden
mügen füegen in den landen,
si wellens nimmer abe gestân,
si komen selbe mit ir man;
der bringens iu gesundert
sibenzehen hundert.
vil vaste riet ez wahsmuot
und eckehart der helt guot,
herdegen unde hâche,
die jâhen, iuwer râche
müese deste baz geschehen,
daz man si bî iu solde sehen.>
die küenen bernaere,
die wâren durch diu maere
harte froelîche gemuot.
wolfhart der helt guot,
der sprach:< dâ werdent helme - schart,
und gefüeget sich diu hervart.>
der bote sprach< ich sach dâ stân
wol zwelve dietrîches man,
der ieslîch sînes râtes phlac.
ez was in ein freudehafter tac,
dô si diu maere hôrten sagen
daz si iu helfe solden tragen,
beidiu prîs und êre:
des freuten si sich sêre.
der eine daz was hildebrant
und helpferîch der wîgant,
gêrbart unde wîchart,
sigehêr und ritschart,
wolfbrant unde wolfwîn,
und sigestap der neve sîn,
und ouch der küene wolfhart:
si freuten sich der hervart
daz des erlachte er dietrîch.>
dô sprach etzele der künic rîch
< swaz mir sîn künege undertân,
ich möht die helfe nimmer hân
diu iu ist hie vor genant.
ir möhtet wol durch alliu lant
rîten unbetwungen
vor alten und vor jungen.> âventiure wie si ze wormeze mit rüedegêre in herverte fuoren.
es was nu an die zîte komen,
als ir wol ê habt vernomen,
daz si sich samenen solden
die mit den gesten wolden
herverten an den rîn.
daz kunde langer niht gesîn,
si schicten dô ir hervart.
ieslîcher ingesinde wart
bereitet nâch ir rehte,
ritter unde knehte.
dô bevalch der künic hêre
dem marcgrâven rüedegêre
sîn gesinde und sîne man,
daz er si solde füeren dan
und ouch ir leitaere
in der herverte waere.
< vil gerne>, sprach dô rüedegêr,
< bring ich si, edel künic hêr,
nâch iuwern grôzen êren,
dâ si wol mügen besêren
dietleibes vîande
ze rîne in dem lande.>
dô sprach diu edel künigîn
< so bevilhe ich daz gesinde mîn
îringen von lütringen:
des hân ich gedingen
daz si der ellenthafte man
nâch êren wol geleiten kan.
dâ mite rîte ouch hâwart,
sô füeget sich diu hervart,
und irnfrit der wîgant.
die muosen doch ir selber lant
rûmen durch ir vînde haz.
ez zimet in lîhte deste baz
ob ir in dem strîte
deheiner widerrîte.>
der künec in sînem lande
nâch sînen helden sande,
daz die recken vil gemeit
schiere waeren bereit,
die er wolde senden dan.
drîzic tûsent er gewan,
die muosten swern herevart.
rüedgêr ir aller venre wart
von hiunischem lande.
sîn selbes wîgande
schuof er fünf hundert duo
dem küenen dietleibe zuo,
swie si gefüeren ûf den wegen,
daz si des heldes solden phlegen.
biterolfe bevalch er bî der hant
vil manegen stolzen wîgant,
daz er der helde solde phlegen.
er wiste wol, ez waere ein degen.
der helt si ûf sîn triuwe enphie:
der recke froelîchen gie
sitzen wider ûf sîne banc.
diu wîle was dô niht lanc
daz rüedgêr sîn gesinde
sande gotelinde
hin ze bechelaeren,
daz die bereite waeren,
swenne er füere über lant,
daz si im koemen al zehant.
die wîsen ouch daz rieten hie,
die sînes râtes phlâgen ie,
wie er die geste senden
solde, daz imz erwenden
übele nieman kunde,
und swâ manz erfunde,
daz ers geêret waere.
tûsent helde maere
hiez er dô disen beiden
von den andern ûz bescheiden,
die wâren kristen als sie:
er bevalch in vlîziclîchen die.
dô rieten si daz under in,
wâ si die samenunge hin
der küenen hiunen solden legen,
ode wâ si nâch den naehsten wegen
solden komen an den rîn.
< daz heizet ungesorget sîn,>
sprach dô rüedegêr der degen.
< ich kan iuch wol ûf allen wegen
füeren durch diu rîche.>
si sprâchen al gelîche
< nu volgen rüedegêre.>
dô riet der degen hêre
die êrsten samenunge,
daz alte unde junge
hin ze blodelingen riten,
und der andern denne biten
dâ bî in dem lande.
die küenen wîgande
heten an den stunden
diu zeichen ane gebunden
und sibenzehen hervanen.
der künec begunde sie manen
daz den helden vil guot
niht beswârte den muot,
ob er bestüende in hiunen lant.
an genuogen was im daz bekant,
si leisten swaz in diuhte guot:
si waeren tumbe oder fruot,
si liten alle arbeit.
der künec mit sînen mannen reit
unze an der lîtâ stat.
frou helche ir gesinde bat
varn deme gelîche,
als si waere rîche.
urloup wol mit minne
von der küniginne
die recken heten nu genomen:
dô si an die wîte wâren komen,
dô sach man dâ besundert
sehstehalp hundert
und fünfzic tûsent manne,
die mit den gesten danne
riten hêrlîche
ûz hiunischem - rîche.
dô daz her vil starke
ab hiunischer marke
zuo der lîtâ gereit,
dô was frô unde gemeit
etzele der vil rîche.
er liez dô güetlîche
scheiden bloedelîne
von im und die sîne.
si erbeizten nider zuo der fluot:
die helde küene unde guot
des nahtes wolden dâ sîn.
si bedorften under in
wahte noch der huote.
vil manege hütte guote
sach man ûf gespannen.
urloup nam ouch dannen
der marcgrâve rîche
von dem künege güetlîche.
dô reit er naht unde tac
daz er ruowe niht enphlac
gegen bechelâren.
die sîne die dâ wâren,
die hiez er rîten mit dem her.
die helde nuzzen âne wer
swaz erbouwen hete daz lant.
ûf der tuonouwe sant
huoben sich den morgen
die hiunen âne sorgen.
gegen wiene si dô riten:
die schaffaere niht vermiten,
si muosten des unmuoze hân
ê daz si alsô manegen man
bereiten dâ die spîse.
sigehêr was wîse
der ir al die wîle phlac
daz nâch unz an den fünften tac,
unz si aber sach rüedegêr:
si liez der marcgrâve hêr
ninder unberâten varn.
daz hiez der helt wol bewarn
daz er niht sparte sküneges golt.
des wâren si im alle holt
die den helt erkanden
ûz ieslîchen landen.
als ich diu maere hân vernomen,
die dritten naht si wâren komen
zer treisem an die wîte
vor âbendes zîte.
die dâ ze mûtâren
gewaltic wirte wâren,
wolfrât unde astolt,
die sprâchen, ob in wolde holt
biterolf der degen sîn,
si riten mit im an den rîn.
dô si ir wurden dâ gewar,
dô sanden si ir boten dar
daz si in erfüeren maere
waz ir wille waere.
dô die biterolf ersach,
der helt gezogenlîchen sprach
< si habent mir des niht getân,
ich enwelle ir dienest gerne hân.
ir sult in mîn dienest sagen:
ich wil in gerne daz vertragen
daz si mich ê riten an.
daz selbe hete ich in getân
ob si sô riten durch mîn lant.
ich was in niht sô wol erkant
daz ichz in iht unprîse.>
bitrolf der was wîse.
in fride der etzelen man
riten von mûtâren dan
die zwêne wîgande,
dâ si ûf der treisem sande
bî den hiunen recken funden
biterolfen bî den stunden.
dô si nu kumen wâren,
die ir ê îlten vâren,
die giengen dô begegene
astolde dem degene
unde ouch wolfrâten.
den antfanc si tâten
als ez von rehte solde sîn.
vil wol enphienc si bloedelîn.
für eine hütte ûf den plân
was her biterolf gegân
mit dietleibe sînem suon:
sô si von rehte solden tuon,
enphiengen si die zwêne man.
dô giengen mit in sitzen dan
die zwêne wîgande:
die recken ûz erkande,
einander sagten si ir muot.
dô sprach astold der helt guot
< ich wânde ich hete daz versolt
daz ir mir nimmer wurdet holt.
dô ich iuch hete an gerant,
dô wart von iu sô hin gesant
mîn wille und ouch mîn übermuot
daz ich iuch, maere helt guot,
dâ von sol immer prîsen.
ich weiz mich nu sô wîsen
daz ichz immer mêr sol lân,
daz ich ir keinen bestân
der sô gelîche recken vert.
mir was der tôt vil nâch beschert.>
biterolf der sprach duo
< swaz der man mit sorgen tuo,
man solz im wîzen deste min.
iuwer friunt ich nu sô staeter bin,
möht ich ervehten iu ein lant,
daz müese dienen iuwer hant.>
si nigen im beide umbe daz.
friuntschaft âne allen haz
rieten si dô under in.
si wolden von in scheiden hin,
dô sprach der starke wolfrât
< swaz astolt unde ame hât,
daz sol mit iu geteilet sîn.
hânt iht beslozzen mîniu schrîn,
ez sî silber oder golt,
daz sol wesen iuwer solt
ze geben, ûz erwelter helt,
allen den ir gerne welt.>
dô si sich wolden scheiden,
dô lobten si den beiden
ze füeren mit in danne
sehzic küener manne.
si nâmen urloup von in dan.
guot gemach dô wart getân
den helden durch der recken rât.
swaz ein rîchiu burc hât,
daz muost mit in geteilet sîn:
fleisch visch brôt unt wîn,
des kom in dar vil swaere
geladen soumaere.
dô ez dietleip ersach,
ze sînem vater er dô sprach
< der sô friunt verdienet ûf den wegen,
der solde nimmer sich gelegen.>
bitrolf smielen des began.
dô teilte er mit etzelen man
daz si in heten dar gesant.
in was allen wol erkant
wie si gescheiden wâren,
dô si ir begunden vâren.
dô in aber kam der tac,
der daz her dâ wîsen phlac,
der hiez si sich ûf machen.
man hôrt dâ lûte erkrachen
pusûnen die hellen.
dô rihten sich die snellen
von hiunischen rîchen
zer verte krefticlîchen.
ûf gegen medelicke dan
fuoren die etzelen man
die rehten lantstrâze.
dienest âne mâze
den - von - hiunen rîche
bôt vil minniclîche
rüedegêr der helt guot
vor der sînen heimuot.
dô si dâ gêret wâren,
ûf für bechelâren
si riten hôher in daz lant:
rüedegêr der wîgant
aber leiten si began.
uns ist daz niht kunt getân
wâ die vil küenen helde
nâmen nahtselde,
ode wie si mit ir dingen
kômen ze blodelingen
an der samenunge stat.
rüedegêr der helt bat
bitrolfe und dietleibe
daz si riten beide
zuo frouwen gotelinde.
dô liezens ir gesinde
mit den andern ûf den wegen.
danne fuorte si der degen
dâ si die frouwen solden sehen.
ir was vil liebe geschehen:
si gie in hin engegene
und enphienc dô die degene
mit kusse minniclîchen,
bitrolf den muotes rîchen
und sînen sun den jungen.
mit rede was ersprungen
daz ir der degen maere
vil nâhen sippe waere.
dô sprach diu schoene gotelint
< sît ir daz dietlinde kint,
der lieben vetern tohter mîn,
unser zweier kindelîn
sint iuwer sippez künne.
ich hân des immer wünne
daz ich iuch bêde hân gesehen.
möhte ez immer geschehen
daz ir uns waeret nâhen,
sô solde iu niht versmâhen
des marcgrâven dienest unde mîn.>
dô sprach der degen< wir sullen sîn
bî einander über zehen lant.
nuodunge tuon ich daz bekant
daz ich im immer bî gestân
die wîle und ich daz leben hân.>
si bêde dô dem helde nigen,
dâ wart danken niht verswigen.
der marcgrâve unde gotelint
liezen minniclîchen sint
die tugentrîche helde
scheiden ûz ir selde:
zuo dem her si riten dan.
dâ heten bloedelînes man
nu ir stat gevangen.
wîten unde langen
einen anger si dô funden:
si wolden an den stunden
der recken bîten mêre.
der marcgrâve hêre
der schuof ir imbîzes stat:
âne schaden er si bat
ligen in dem lande.
die guoten wîgande
heten alle die genuhtsam
diu guoten recken wol gezam.
ze blodelingen si drî tage
lâgen, alse ich iu nu sage,
unz si kômen alle dar,
den si dâ warten, mit ir schar
von ieslîchem lande.
die guoten wîgande
ze râte wurden under in
wâ si möhten kêren hin,
dâ si die wîte möhten hân.
dô sprach der etzelen man
rüedegêr der rîche
< ich füere iuch senfticlîche
( mir sint die wege wol erkant,)
gên swâben durch der beier lant.
ich leite iuch nâch der wîte
und dâ wir alle zîte
guote herberge hân,
und dâ ein ieslîcher man
vindet sîne lîpnar.>
die helde schikten ir schar
ûf durch der beier lant.
rüedegêr der wîgant
schuof dâ die nâchhuote:
dô was in wol ze muote.
waz mac ich mêre dâ sagen?
ich enweiz in wie manegen tagen
si kômen an daz lechvelt.
manic hütte unde gezelt
si sâhen dar abe schînen,
dâ her dietrîch mit den sînen
lac ûf dem gevilde.
vil helme unde schilde
sach man von danne glesten
und manegen schaft vesten,
dô si heten ûf gebunden
ir baniere an den stunden.
ich hân der maere niht vernomen,
wie er von berne waere komen,
und ob den tiurlîchen degen
haet iht gemüet ûf den wegen.
ahte tûsent sîner man
het er mit im gefüeret dan:
die hete geleitet hildebrant
an daz lech in beier lant.
dâ vor an dem naehsten tage
dô wâren komen, als ich iu sage,
die zwêne künege junge,
die küenen harlunge,
fritele und imbrecke.
den hete manic recke
dar gevolget in daz lant.
wahsmuot der wîgant,
der was ir leitaere.
driu tûsent helde maere
brâhten die recken junge
zuo der samenunge.
nu was ouch komen berhtunc,
der tiurlîche helt junc:
von rabene der veste
helde aller beste
het er gefüeret in daz lant,
die ermrîch hete dar gesant:
geriten wâren mit in dan
zehen tûsent sîner man.
her witege unde ouch heime,
die kâmen ouch niht eine,
die brâhten dar gesundert
ir recken vier hundert.
sabene unde liutwar,
die hulfen ermenrîches schar
leiten gegen rîne.
rienolt und ouch die sîne
wâren kumen in daz lant:
swaz sîn und randoldes hant
in mohte dienen mit ir schar,
des wâren si bereit gar:
nâch wunsche stuont in gar ir dinc.
dâ was ir ieslîches rinc
vil wîte gevangen.
dô daz was ergangen,
dô kâmen die etzelen man.
vor den helden riten dan
biterolf und sîn suon.
waz mohten bezzers dô getuon
die ellenthafte geste,
degene aller beste?
diu ros si hiezen bringen
den küenen getelingen:
die stolzen rabenaere
westen wol diu maere
daz waere komen in daz lant,
der nâch in dâ hete gesant.
dô hôrte ez ouch her dietrîch.
mit sînen helden lobelîch
was er komen ûf diu marc.
dô wart daz dringen starc
von den - ûzer - berne.
die helde sâhen gerne
den si dâ dienen solden.
dâ sis enphâhen wolden,
dâ kôs man michel dringen:
man hôrte ouch lûte erklingen
vil manegen buckel rîche,
dâ si vil ritterlîche
den buhurt zuo in riten dan.
her dietrîch unde sîne man
enphiengen dise geste sô
daz si von schulden wâren frô.
sînen neven triuten er began.
wahsmuot brâhte zuo in dan
die zwêne künege junge,
die küenen harlunge.
dô kômen ouch zwêne man,
die fürsten ûz meilân,
randolt unde rienolt;
den gesten wâren si vil holt.
hâchen unde regentagen,
jâ kunde iu nieman gesagen,
wie si enphie her rüedegêr
und ander manic recke hêr
ûz hiunischem rîche.
den herren dietrîche
und alle ermenrîches man
bêdiu wider unde dan
sach man grüezende gân.
sus wart der antfanc getân
vil harte lobelîchen
daz ez mohte rîchen
der edelen dietlinde kint.
die helde sprâchen daz sint,
in kunde nimmer baz geschehen,
daz er haete gesehen
sô manegen friunt guoten.
die hiunen sach man muoten
wie si überz lech solden komen.
herberge hete in dô genomen
der marschalc bî dem gunzenlê:
weder sider noch ê
kom nie als manic wîgant
hin ze swâben in daz lant.
die geste schuofen ir gemach
unz ir ieslîcher sach
sîn volc zuo im allez komen.
dô hete ouch sich nu für genomen
rüedegêr der rîche,
der wolde volliclîche
die hiunen bringen an den rîn.
des wolde gestrîte sîn
ûzer berne hildebrant,
daz die - von - amelunge lant
solden ze vordest rîten.
dâ mit si muosten bîten
an den herren dietrîch.
der sprach dô vil zühticlîch
< jâ sol mîn herre nuodunc,
der tiurlîche helt junc,
sîn vanlêhen vliesen niht.
swaz im êren geschiht,
dem helde ich es vil wol gan.>
mit den etzelen man
reit dô ze vordest rüedegêr,
unz si der marcgrâve hêr
brâhte durch der swâbe lant.
dar nâch fuoren si zehant
ze elsâzen über rîn.
aldâ muosten si dô sîn
zwelif tage unde baz:
mit arbeite geschach daz
daz si über kâmen in daz lant.
gunthêr der wîgant,
der hete sô vil der geste
ze wormez in der veste
daz er ân angest wolde sîn,
swâ si koemen an den rîn,
daz si deheinen herbrant
möhten bringen in sîn lant.
der trôst was im nuo benomen,
wan si über wâren komen.
ze tal den rîn si dô riten
mit vil hôchvertigen siten
hin für hagenouwe.
in dem rîngouwe
dâ gelegten si sich sît
in ein gevilde, daz was wît.
dâ schuofen die helde guote
ir her vil grôze huote,
von ieslîches fürsten schar
sehzic ritter wol gar,
dâ si gemach wolden hân
daz von den gunthêres man
die geste in dem lande
nieman an gerande.
die helde spienen ûf daz velt
hütten unde ouch gezelt.
ir snüere wâren sîdîn,
wan si heten under in
vil manegen ûz erwelten degen,
die hiezen des heres wol phlegen.
si westen übele gemuot
gunthêren den helt guot.
si wârn im nu sô nâhen
daz si den ruoch wol sâhen
dâ bî in sehs mîlen.
vil boten sach man îlen
die dem künege sagten maere,
daz gar erfüllet waere
sîn lant mit fremden gesten.
den sînen nôtvesten
der künic sagte dô daz:
an einen rinc er gesaz
mit helden ze râte,
die fruo unde spâte
truogen gar sîn êre.
dô frâgte der künic hêre
waz im daz beste waere,
ob er den helden maere
möhte widerrîten.
< wir süln ir hie erbîten,>
sprach von troneje hagene,
< unz wir hoeren, wen si degene
zuo uns füeren in daz lant.
ich râte>, sprach der wîgant,
< daz wir behalten die stete.>
der künic nâch des recken bete
volgete sînem râte:
dô sande er boten drâte
und hiez ervarn des maere,
wer fürsten bî in waere.
sîn bote kam vil balde dar.
dô frâgte er in der schar
nâch in al besunder:
dâ was helde ein wunder.
alsô er daz hete vernomen,
dô îlte er schiere wider komen
und sagte dem künege maere
wie vil dâ fürsten waere,
und waz si manne möhten hân.
schiere wart im kunt getân,
dâ er vil heimlîche saz,
ir waer fünfzic tûsent oder baz.
dô sprach der künec< daz lâzet sîn.
ich hân der geste und ouch der mîn
niuwan zweinzic tûsent man:
dâ mite ich wol geschaffen kan
daz si geriuwet her diu vart,
daz ir ie gedâht wart
daz si ie kômen an den rîn.>
gunthêr hete der geste sîn
siben künege rîche
ze hûse lobelîche,
dar zuo ir ieslîches wîp.
jâ was ir deheines lîp
durch strîten zuo im niht komen:
iedoch hân ich wol vernomen,
er hete die besten degene
die gedâhten ie ze lebene.
die hal er disiu maere.
mit dienste lobebaere
sô hete er sîne geste.
si hulfen sîne veste
sît dem künege rîche
wern vil lobelîche.
der künec vil tougen an truoc.
ze tuonne hete er des genuoc,
dâ mite er friden solt sîn lant.
herte stürme unde brant,
der hete er doch den vollen niht.
von überdrô noch geschiht,
daz gemüet vil manegen man.
nu wil ich iuch daz hoeren lân
wie die fremden wîgande
in des fürsten lande
ir boten wolden senden,
ob er daz wolde wenden
daz si iht wuosten im sîn lant.
die besten man dâ zehant
des heres vier enden
îlte gar besenden.
die helde sâzn an einen rinc:
si begunden ahten al ir dinc,
waz in daz beste waere
ode wer der helde maere
braehte gunthêren an:
der solde sîn sô wîse ein man
daz sîn die wîgande
dar nâch iht heten schande.
si rieten wer der waere.
hildebrant der maere,
der riet an rüedegêre,
ob si den degen hêre
mit vil güetlîchen siten
der dienste möhten erbiten
daz er ir botschaft dannen
den künegen unde ir mannen
ze wormez braehte in die stat.
her dietrîch aller êrste bat
den marcgrâven rîchen
der reise vlîziclîchen.
in bâtens al die besten
die si under in dâ westen
unz inz gelobte rüedegêr.
man beschiet dem marcgrâven hêr,
er solde ir einen niht verdagen
von den man solde widersagen.
daz lobte dô der wîgant.
er hiez sich kleiden al zehant
fünf hundert sîner manne,
si fuorte mit im danne
der marcgrâve rîche
vil behagenlîche.
dô si nu riten gên der stat
die man diu maere ervinden bat,
dô sâhens ûzen vor den graben
mit gezimber hôhe ûf erhaben
pheteraere und mangen
und manegen swenkel langen.
des künic etzelen man,
ein hiune, reden dô began
daz er der genaehe
nie baz gezimbert saehe
deheine burc noch stat:
den marcgrâven er im sagen bat
wem dâ diente daz lant.
daz sagte im rüedegêr zehant. âventiure wie rüedegêr sîn boteschaft warp.
dô sach man die geste
ze wormez gên der veste
vil wünniclîchen rîten.
niht langer wolden bîten
die der mûre stuonden nâhen:
si begunden zuo in gâhen,
wan sis enphâhen wolden
als si von rehte solden.
die geste vor dem graben sint
spiln sâhen dâ diu kint,
si heten freude überkraft.
ir genuoge schuzzen den schaft,
diu kurzwîle was niht klein,
sumelîche wurfen den stein:
die alten mit den jungen
liefen unde sprungen.
dô si die geste sâhen
der stete nu sô nâhen,
die brücken wurden nider lân,
die porten wîte ûf getân.
dô fuorte der marcgrâve hêr
einen schaft âne sper,
daz man dâ bî gesaehe
daz man in frides jaehe.
an tumben unde an wîsen
mohte man dô prîsen
den gruoz vil minniclîchen
gên rüedegêr dem rîchen.
durch die porten si dô riten.
si fuorten kleider sô gesniten,
die franken enwolden lüge jehen,
si heten solhes niht gesehen
daz guoten helden zaeme baz.
der marschalc hete gesehen daz
wie si ze hove wâren komen:
er hete es vil wol war genomen.
si erbeizten für den palas.
alsô von im enphangen was
der gast und sîn gesinde.
von maneger muoter kinde
hete er ê wol vernomen
wie si in daz lant waeren komen.
erbeizet wârens alle dâ.
der marschalc herbergen sâ
wolde dô die geste.
dô sprach der muotes veste,
des künic etzelen man
< lât uns diu ros stân:
wir mugen hie niht bîten,
wir müezen schiere rîten.
ich hôrte des gerne maere
wâ der künic waere,
ob daz möhte geschehen,
daz ich den kunde gesehen.>
dô sprach ein gêrnôtes man
< daz wil ich iuch wizzen lân.
gêt ûf den palas,
dâ ich vil niulîchen was,
ich waen, man in dâ vinde
bî sînem gesinde.>
dô hete ouch nu der künec vernomen
daz im geste waeren komen.
frâgen er begunde
ob ieman wizzen kunde
der im sagte maere
wer daz gesinde waere.
daz enkunde im nieman sagen.
dô begunde er tougen klagen
von metzen ortwînen,
den lieben neven sînen:
der starp ze fruo in sînen tagen.
er gedâhte des, der solde im sagen
von fremden wîganden
ûz ieslîchen landen.
dâ was ein ander ortwîn:
der was der vetern sun sîn,
der was dâ zen sahsen
von kintheit gewahsen.
der kam dâ er den künic sach:
vil wol hôrte er swaz er sprach.
dô sprach der junge wîgant
< si sint ûz verrer künege lant
her bekomen an den rîn.
nu habet des den rât mîn,
sendet hin nâch hagenen:
hât ieman von den degenen
vernomen deheiniu maere,
iu mac der tronejaere
der maere schiere hân verjehen,
ob er si ê habe gesehen.>
die boten îlten dâ er was.
dô stuont er vor dem palas,
man hiez in zuo dem künege gân.
der fürste frâgte sînen man
ob der helt erkande
die fremden wîgande,
wannen si kaemen in sîn lant.
dô blicte der küene wîgant
nider für den palas
dâ der marcgrâve was:
dô hagene rüedegêren sach,
daz wort er lachende sprach
< nu wol dich, künic hêre,
dirre vil grôzer êre
diu dînem lande ist geschehen,
daz du hie hâst gesehen
den aller tiuresten man,
der ie urbor gewan
ode ie geboute fürsten lant,
und ouch der ie mit degenes hant
deheinen swertslac gesluoc.
milter degene ist genuoc,
doch gewan nie milter daz leben:
den wunsch hât im got gegeben.>
er frâgte wer er waere.
dô sprach der degen maere
< ez ist der milte rüedegêr
den ir, edel künic hêr,
dort vor den andern sehet stân.
nu sult ir mich geniezen lân
ob ich iu triuwe künne phlegen.
ich wil mich hiute>, sprach der degen,
< des landes mîn verzîhen,
daz sult ir, herre, lîhen
dem edelen rüdegêre.
etzele der künic hêre
hât in waerlîche vertriben:
er waere immer dort beliben
daz er niht koeme an den rîn.>
dô sprach der künic< daz sol sîn.
sît ir sîn muotet hagene,
sô wil ich dem degene
gerne lîhen iuwer lant.>
der tiurlîche wîgant
lief dô zuo rüedegêre:
des gruozes hete er êre.
hagene enphâhen dô began
den herren unde sîne man
< willekomen ir wîgande
zuo mîner herren lande,
und der marcgrâve ze vorderôst.
ich hân des ie gehabt trôst,
swenne daz geschaehe,
daz ich den helt hie saehe.
nu ist ez alsô bekomen;
des ist mir trüeber muot benomen,
daz er ist komen an den rîn.
nu sol ich im sînen wîn
wol gelten und die spîse
die er mich in friundes wîse
vil dicke ane geboten hât.
gelücke deist der gotes rât:
des mac ich dar wol jehen
daz ich in hie hân gesehen.
zen hiunen waere ich ofte tôt,
dô mirz nieman wol erbôt,
wan des fürsten gêren kint,
diu marcgraevinne gotelint,
unde ouch rüedegêr der degen:
mîn wart dâ vil wol gephlegen
von in im ellende.
swer mir nu daz wende
ob ichs im wol gedanke hie,
der gewan getriuwe site nie.>
dô disiu rede von im geschach,
den künec man zuo im gâhen sach:
der enphienc dô vlîziclîche
den helt von hiunen rîche
und sîne helde guote
mit willigem muote.
des dankte im dô der wîgant.
der künic nam in bî der hant
und wîste in ûf den palas
dâ er ê gewesen was:
in einem sedele rîche
der fürste in güetlîche
hiez sitzen neben sîn.
dô schankt man im den besten wîn
den man dâ ze hove vant.
der künic sagte im al zehant
wie sich hagen verzîhen wolde,
< daz ich iu lîhen solde
daz sîn herzogentuom,
darumbe daz ich haete ruom
daz ir woldet hie bestân.
nu sult ir mich daz wizzen lân
ob ir welt belîben hie;
sô gap iu der künic nie
von hiunen landen alsô vil:
für wâr ich iu daz sagen wil,
ich gibe iu drîstunt mêre.
daz wizzet, degen hêre.>
< got lâz mich>, sprach dô rüedegêr,
< gedanken, edel künic hêr,
iu beiden güetlîchen,
sît ir mich woldet rîchen
mit alsô grôzem guote.
sît iu des ist ze muote,
dâ von bin ich iu bêden holt.
jâ niuze ich der hiunen golt
swie vil unde ich selbe wil.
ich hân gedient unz an daz zil
etzelen mînem herren:
mir kan daz lützel werren,
wirt er iht zornic gemuot,
wand er vil selten iht getuot,
daz wider mînen willen sî.
des sol ich immer wesen bî
botelunges kinde
und heizen sîn gesinde.>
dô sprach der milte rüedegêr
< ich wil iuch biten, künic hêr,
daz daz mit urloube sî,
und mich hazzes lâzet frî
daz ich iu sage diu maere,
iu helden lobebaere,
warumbe ich zuo iu bin gesant
ode waz ich wirbe in ditze lant.
sol ich des iuwern urloup hân,
sô habet ir mir liebe getân.>
dô sprach der voget von rîne
< ich und die bruoder mîne
hazzen niht des ir saget.
swelch bote daz verdaget
daz man fürsten sagen sol,
der ist niht küneges bote wol.>
der voget von bechelâren
mit den die bî im wâren,
von dem sedele er dô stuont:
do gebârte er sô die recken tuont.
sus sprach der edel wîgant
< mich hât her zuo iu gesant
her biterolf und ouch sîn suon,
und sol iu daz kunt tuon
wie si zuo iu sîn gemuot.
liebe und aller hande guot
widerbietent si iu beide.
ich enweiz wenn ir ze leide
dem jungen helde habet geriten:
irn ergetzet in nâch friundes siten,
er naeme iu, möhte er, wol den tac.
der wille nie an im gelac
sît im beswaeret wart der muot.
ouch enbiut iu>, sprach der helt guot,
< künec etzel, mîn herre,
swaz sînem gaste werre,
des welle er immer vor im sîn.
er hât mit im an den rîn
gesendet fünfzic tûsent man
und heizet iuch daz wizzen lân,
irn wellet mit im süenen,
sô sullen iu die küenen
gerîten sô deiz iu wirt leit
daz erz dem künege hât gekleit.>
der fürste von dem rîne sprach
< mîn zorn und mîn ungemach,
der ist noch groezer denne der sîn.
mac ich mit den friunden mîn
erwern die bürge und mîn lant,
daz tuon ich im vil schiere bekant.
ich schaffe im ouch der gîsel niht,
daz er daz selbe wol besiht
daz ich niht frides koufen wil.
haet er nu tûsentstunt sô vil
helde sam ir her etzel hât,
ich wil gewaltes haben rât.>
dô sprach der guote rüedegêr
< sô hoeret, edel künic hêr,
von wem ich iu sol widersagen.>
der fürste bat in noch stille dagen
unz er der wîgande
durch rât mêr besande.
dô bat der künic springen
und vil balde bringen
sînen bruoder gêrnôten
und gîselhern den guoten.
er hiez ouch sîfride komen
der im ze trûte hete genomen
sîn swester krîmhilte:
der küene und ouch der milte,
langer er daz niht enlie,
vil balde er hin ze hove gie.
der wirt hiez gâhen sâ zehant
dâ man stuotfuhse vant,
den voget von palerne:
des rât hôrte er gerne.
dar nâch hiez er springen
und walthêren bringen,
den helt ûzer spanjelant.
mit dem kômen al zehant
sîner undertânen drî
künege die im stuonden bî.
dar nâch hiez er ouch gân
nâch dem êrbaeren man
daz herbort der starke,
der helt ûz tenemarke,
hin ze hove ouch kaeme
und die rede vernaeme,
wie man im hete widerseit.
er bat die degene vil gemeit,
liudegaste und liudegêre,
daz man die recken hêre
ze hove solde bringen.
er hete ouch des gedingen,
ez solde hoeren witzlân
und ouch sîn bruoder poytân.
den herzogen von beier lant,
vil schiere hete er den besant,
den küenen nantwînen
mit den nâchgebûren sînen,
elsen und gelfrâten:
daz wart im gerâten
daz er nâch den sande,
daz waeren wîgande.
dô die ze hove wâren komen,
die botschaft hete ouch dô vernomen
der swâbe herzoge herman.
mit im reit ze hove dan
von elsâzen grâve berhtolt:
die wâren ie dem künege holt.
dar nâch komen al zehant
von mîssen und düringe lant
die fürsten lobelîche;
dar kâmen ouch ritterlîche
von lütringen unde brâbant
die ze herren wâren dâ genant,
und al die grâven umbe sie
die in dort unde hie
wâren bî gesezzen:
der wart dô niht vergezzen.
den boten mohte wol betrâgen.
dô der künec nâch sînen mâgen
hiez alsô îlende gân.
nu kômen mâge unde man.
swelher ie ze hove gie,
wie rehte minniclîche enphie
ieslîcher rüedegêre!
der tiure degen hêre
was mit grôzen êren dar bekomen,
daz hetens lange wol vernomen.
her walthêr lachende gie
dâ er den marcman enphie:
er gedâhte an diu maere
wie er gescheiden waere
von hiunischem - rîche:
si redeten schimphlîche.
er frâgte an der stunde
nâch der schoenen hildegunde.
dô sprach walthêr der degen
< diu ist hie in gunthêres phlegen.
welt ir, daz mac vil wol geschehen,
daz ich iuch lâze die gesehen.>
den boten wunderte sêre
wie hildegunt diu hêre
zuo dem rîne was bekomen:
der helt hete noch niht vernomen
der unglouplîchen maere
daz ir dâ mêre waere.
im sagte der helt von spanjelant
< gunthêr hât nâch uns gesant:
die dâ heizent küneges kint,
daz unser vierzehen sint,
der habent siben hie ir wîp:
des ist der hildegunde lîp
bî den andern hie gesehen.
wir hôrten sîne boten jehen,
wir solden zeiner hôchzît.
nu riuwet mich daz immer sît
daz ich sô smâhe her gereit,
und ist mir doch ze mâzen leit.
sul wir wern im sîn lant,
sô sol dienen hie mîn hant
sô wol sîn brôt und ouch den wîn
daz si mir holt müezen sîn.>
die herren wâren alle komen,
von den ir ê habet vernomen,
die küenen getelinge.
si brâhte zeinem ringe
her gunthêr unde gêrnôt,
als in ir wîsheit gebôt.
daz riet von troneje hagene:
jâ solde man die degene
hoeren lân diu maere,
waz in enboten waere.
dô sprach der edel künec hêr
< nu lât uns hoeren, rüedegêr,
wer die helde mügen sîn
die uns dâ suochent an den rîn;
die mir dâ heizent widersagen,
der sult ir einen niht verdagen
vor disen wîganden,
die mir und mînen landen
dröuwent alsô sêre.>
dô sprach der bote hêre
< sô nenne ich iu den êrsten
und under in den hêrsten,
daz ist der künec von hiunen lant.
der hiez sîner recken hant
rechen sînes gastes leit:
manegen degen vil gemeit
hât er ûf den schaden dîn
her gesendet an den rîn.
helche diu vil rîche,
diu hât im waerlîche
lâzen zehen tûsent man:
die liez si rîten mit im dan
daz im die dienen ûf ir golt:
si ist im durch sîn tugende holt.
sô widersaget iu bloedelîn
mit aht tûsent helden sîn,
und die recken ûz hiunen lant.
swie die fürsten sîn genant,
der wil ich einen niht verdagen.
dâ bî heizet iu widersagen
von berne der fürste dietrîch:
zehen tûsent helde lobelîch
hât er von sînem lande brâht
die iuwers schaden hânt gedâht.
die leitet zuo iu in daz lant
von berne meister hildebrant.
gêrbart unde wîchart,
sigehêr und ritschart,
sigestap und wîcnant,
die helde ûz amelunge lant,
wolfbrant unde wolfwîn
und wolfhart der neve sîn,
die küenen wülfinge,
die sint in dem gedinge,
ez enwer guoter recken hant,
ir müezet in rûmen iuwer lant.
man widersaget iu hôchlîche
von dem künege ermenrîche
und ouch von sînen mannen,
der er sande dannen
zweinzic tûsent oder baz.
ir sult für wâr wizzen daz,
daz die leitet berhtunc
und witege der helt junc
und heime, madelgêres kint,
die doch des küneges venre sint.
dâ mite rîtet liutwar,
der leitet berhtunges schar,
und sabene der junge,
der der amelunge
bediewet hât vil manege kraft
daz si im nu sint zinshaft.
man widersaget iu mêre
von den fürsten hêre,
den küenen harlungen:
der alten und der jungen
hât in mite volget dan
driu tûsent küener man.
die leitet der helt wahsmuot
und hâche, der helt guot,
herdegen unde eckehart,
die vil manegen helm schart
mit ir handen hânt geslagen.
sô heizent iu ouch widersagen
die fürsten dâ von meilân:
die habent zwei tûsent man
iu helden schedelîchen brâht;
in ist des vil wol gedâht
daz si recken hie ir hant
ê daz si rûmen ditze lant.>
dô sprach der künic rîche
vil gezogenlîche
< nu wil ich iuch frâgen,
die fremden zuo den mâgen,
waz iuch bedunke guot getân,
des wir hie vernomen hân.>
dô sprach daz sigelinde kint
wider gunthêren sint,
sîfrit der wîgant
< ich hilfe iu wern iuwer lant
daz her dietrîch und die sîne
mügen bî dem rîne
deste min gewalt gefüeren.
ob si iuch mit brande rüeren
man sol ouch mich bî in sehen.
jâ hoeret man ir keinem jehen
sô gremelîches muotes,
der iuch iuwers guotes
mit sînem ellen sô beher
ern vinde im etewen ze wer.
ezn ist dehein dietrîch
sô starc und sô freislîch,
sol ich mit im zesamene komen,
im enwerde lîhte benomen
sîn übermuot den er hât,
ob mir daz wâfen mîn gestât.>
dô sprach ûzer spanjelant
walthêr der wîgant
< her künec, haet ir mich wizzen lân,
dô ich mit juncfrouwen dan
von spanje her zem rîne reit,
wie sêre iu sî hie widerseit,
sîn möhte dannoch werden rât.
ob man iuch mit strîte bestât,
ich braehte niun tûsent man:
die wîle und ich der einen hân
und ouch ich selbe lebendic bin,
ûf iuwer helfe stêt mîn sin.>
des sagte im dô der künic danc.
dô sprach âne widerwanc
der voget ûz palerne
< herre, ich wil iu gerne
helfen alles des ich kan,
wil mir diu stange mîn gestân
und ouch mîn starker wâfen breit.
in mac ir suochen werden leit
her in der burgonde lant.
ich wil daz si den heres brant
hie füeren maeziclîchen,
und ouch daz si entwîchen
ein teil von ir übermuot.
daz râte ich>, sprach der helt guot.
der rede im dankte sêre
gunthêr der recke hêre.
dô sprach der küene wîgant
herbort ûz tenelant
< und weiz uns hie her dietrîch,
sô dunket mich unbillîch
daz er und die amelunge,
die alten und die jungen,
sô frevellîchen widersagen:
ez möhten sumelîche verdagen.
nu ist im doch wol gewizzen>,
sprach der helt vermezzen,
< wie ich von ormanîe reit,
und wie mîn ellen dâ erstreit
des künic ludewîges kint.
jâ fuorte ich die maget sint
ûz ormanie rîche
vil gewalticlîche,
dâ mich hiete bestân
hartmuot unde sîne man
und ludewîc, der vater sîn.
ich und ouch daz magedîn,
wir heten nieman mêre
die ludewîc der hêre
nie kunde betwingen;
dem muose misselingen
von mîn einiges hant.
alsô reit ich über lant,
und hete wunden doch mîn lîp.
dô hôrte ich man unde wîp
jehen dirre maere
daz ein rise waere
hagel al der lande.
in muote was mir ande
unz ich den vâlant ersach:
daz lantvolc ich an im gerach,
ich sluoc in waerlîchen tôt.
swie doch heten von im nôt
ludewîc und alle sîne man,
die getorsten in doch nie bestân:
von dem gerûmte ich in daz lant.
dô hete ich>, sprach der wîgant,
< goltwart und sêwart erslagen.
daz sult ir dietrîche sagen
ob er daz hoere gerne.
sît kam ich hin ze berne:
mit welher arbeit daz geschach
daz mich her dietrîch dâ gesach
und ouch sîn alter hildebrant!
dô ich mîn frouwen über lant
fuorte wan einiger man,
ze stete randen si mich an.
waere ez in alsô dô komen,
si heten gerne mir benomen
hildeburgen die vil rîchen.
sît liezens in entwîchen
der ir vil grôzen übermuot.
ich brâht si>, sprach der helt guot,
< ungevangen durch daz lant;
daz weiz wol meister hildebrant.
des ist diu frouwe mîne
noch hie bî mir ze rîne.>
dô sprach ein junger wîgant,
boppe ûz tenelant,
herbortes swesterkint
< ez ist allez ein wint
swaz wir mit helden hân gespilt.
uns ist ûf ritterschaft gezilt
hie ze wormez an den rîn:
nu sol ouch ich die hant mîn
gerecken hie mit ritterschaft.
ob nu von aller künege kraft
unserm wirte waere widerseit,
im sol mîn dienest sîn bereit:
ich hilfe im alles des ich kan.>
dô sprach der fürste witzlân
< ez waere iu frume und êre,
haete ich ritter mêre
mit mir gefüeret in daz lant.
nu diu rede ist sô gewant
daz wir hie strîtes sullen phlegen:
ob wir niht kumen>, sprach der degen,
< mit gleven und buckelaeren,
doch mügen wir satele laeren
mit flatschen wol snîdunden.
die tiefen verchwunden
sul wir mit swerten houwen hie.
ja gestreit ich williclîcher nie,
beide ich und ouch die mîne.
etzele unde al die sîne,
die habent vînde undr uns hie.
er wolde mich des twingen ie
daz wir im waeren undertân,
ich und mîn bruoder poytân.>
des erlachte rüedegêr,
der edel marcgrâve hêr
< mich naeme des untûre,
( ich bin guot nâchgebûre),
daz iuch ertwinge sîn gewalt.
wir lâzen>, sprach der helt balt,
< an iuch noch unversuochet niht.
daz man iuch sô ledic siht,
daz swaeret dicke mir den muot,
als harte als ez den künec tuot.>
der antwurte im witzlân
< genuogiu swaere die ich hân,
diust iuwer schult, her rüedegêr.>
dô sprach der marcgrâve hêr
< mîn habe ist des küneges guot.
al daz sîn gewalt dâ tuot,
( dâ von bin ich rîche,)
des hilfe ich billîche.>
liudegêr niht langer liez
der zuo den sahsen herre hiez,
und liudegast der herre guot,
dem wirte sagten si ir muot
< wir haben her von sahsen,
ze strîte wol gewahsen:
ir ellen ist vil wol bekant.
ez sol von in und mîner hant
geprüevet werden helme klanc,
wil iemanne dienstes sagen danc
der wirt, und ist der sô gemuot,
daz erz uns williclîchen tuot.>
die dürenge und von mîssenlant,
swaz ich ir ê hân genant,
die wâren guotes willen gâr.
dô trat vil manlîchen dar
von beier lande nantwîn,
er sprach< got sol gelobet sîn!
ich und ouch die mâge mîn
( daz ist doch dicke worden schîn)
hân niht geroubet unde genomen:
nu ist ez an die zîte komen
daz wir füllen unser schrîn;
wan witege der oeheim mîn
mit mir doch strîtet umb daz lant.
kume ich in sîn wîcgewant,
ich füere immer deste baz.>
dô sprach der marcgrâve daz,
rüedgêr der tugentrîche,
vil gezogenlîche
< friunt sol friunde bî gestân.
mir ist liep daz ich niht hân
friunt, als ich iuch hoere jehen,
die wider mîn willen wolden sehen
in ir gewalt mîn sarwât:
der neven hân ich gerne rât.>
dô daz von im gesprochen was,
über al des küneges palas
daz volc lachen des began.
dô sprach aber der edel man
< sô wir nu rîten durch iur lant,
und haet ir allez daz gewant
daz ir noch ie habet gesehen,
und mac iu danne der prîs geschehen
daz wir rouben von iu doln,
sô muget ir iuch noch baz erholn,
daz ez aber alsô waere komen
daz ir haetet genomen
daz tûsent wagene möhten tragen;
daz wil ich iu für wâr sagen.>
dô sprach der küene gelfrât
< daz uns sô vil genomen hât
etzele und ouch sîne man,
vil übele ich ims ze haben gan,
ich und else der bruoder mîn.>
< sô wir nu rîten über rîn,>
sprach aber der guote rüedegêr,
< sô nemet uns drîstunde mêr
denne wir iu genomen hân,
und habet daz wol widertân.>
vil hôhe rede hôrt man dâ.
liute ninder anderswâ
hân ich sô frevellîch vernomen.
ist ez von alten siten komen,
sô habent sîn noch die beier reht.
von strîte redet dâ mêr ein kneht
dan drîzic ritter anderswâ.
der site muoz immer wesen dâ,
giuden unde schallen
muoz in wol gevallen.
daz kunnens alsô sêre,
si wellen des hân êre
daz maneger ê erhangen wirt
ê daz er den roup verbirt.
sam snel sô die bertûne
wârn die von arragûne:
von nâvarre was dâ manic degen,
dâ man strîtes solde phlegen,
unde ouch von francrîche.
die sagten im al gelîche,
si wolden im strîtes bî gestân.
dô sprach der etzelen man
< ich hân dicke her vernomen
maere diu mir sanfter komen
sint in hiunen rîchen.
möht ich dem gelfe entwîchen,
daz taete ich>, sprach dô rüedegêr.
< nu hoeret, edel künec hêr,
ich hân von gesten widerseit
und hân mich selben noch verdeit.
swie vil ich hoere der übermuot,
ûf boten reht>, sprach der helt guot,
< sô sol iu wesen widerseit.
in harnasch ritterlîch gekleit
fünf hundert mîner man,
mit den wil ich bî gestân
hern biterolfes kinde:
mînem sune und gotelinde
er ist sippe alsô nâhen,
und lât er imz niht versmâhen
ich diene im allez daz ich sol.>
dô sprach der künec< ir möhtet wol
verdaget hân daz widersagen:
ir müezt die sorge mit mir tragen
und müezet mîn gevangen sîn,
daz ir sô gâhes umbe den rîn
iht brennet, ir und iuwer man.
swaz mir schaden hie wirt getân
von etzeln und sînen kunden,
des hân ich bürgen funden.>
dô sprach der bote hêre
< so getorste ouch nimmer mêre
bî mînes herren zîten
keines küneges bote gerîten
der iemanne torste widersagen,
mich enhelfe daz ich hân getragen
den schaft hie selbe an mîner hant,
dâ bî mîn fride sol sîn bekant.>
dô sprach der küene hagene
ze gunthêre dem degene
< wir bedurfen sîn ze gîsel niht.
swaz von den andern hie geschiht,
daz vertragen ouch rüedegêre.
haet mir der degen hêre
troneje nu gebrochen nider,
ich hulfe im fridelîchen wider.>
dô sprach der künic< daz lâ sîn.
swie vaste er ûf den schaden mîn
rîtet mit den sînen man,
ich wil in friuntlîchen lân
von uns hinnen scheiden.
nu sol im von uns beiden,
von mir und gêrnôte,
der unser bouge rôte
ze gebe niht versmâhen.>
dô hiez er balde gâhen
zer kameren dâ sîn golt lac:
ûf einen schilt man es dâ wac
swaz sîn viere mohten tragen,
und dar zuo, als wir hoeren sagen,
man brâhte im hundert ritterkleit.
ein ros daz selbe der künic reit
zôch man mit andern zwelven dar.
vierzic helme silbervar
truoc man ouch dem boten wert,
unde als manic schoenez swert
und alsô manege brünne wîz.
dar an kêrte er sînen vlîz
wie er im möhte alsô geben
daz ers gedaehte al sîn leben.
vil manic helt die gâbe sach.
der künec ze rüedegêre sprach
< vil lieber friunt, ir sult enphân
daz ich iu ze gebenne hân,
und daz ir hie habet gesehen.
sît ich iu des hoere jehen
daz habe gegeben iuwer hant,
und haet er drîzic künege lant
daz ir niht milter möhtet sîn,
nemet ditze durch den willen mîn.>
dô sprach der helt mit zühtegen siten
< man muoz versagen dâ man biten
hoeret niht ze rehte.
ritter unde knehte,
die schulden mich darumbe,
waere ichz nu der tumbe,
ob ich nu naeme in dirre nôt
iuwer silber unde golt rôt,
ros und iuwer sarwât.
her künec, des wil ich haben rât.
daz sult ir lâzen âne haz,
und gebet ez die ez dienen baz
mügen an disen stunden.
wurd ich in sturme funden,
so gediente ich iuwer gâbe alsô
daz irs vil selten wurdet frô.
und wizzet endelîchen:
mînen herrn weiz ich sô rîchen
daz ich bî mîner stunde
ez niht vergeben kunde
daz ich von im ze geben hân.
herre, ir sult mich rîten lân.>
dô sprach der starke gêrnôt,
als im sîn tugent daz gebôt,
< er tuot ez niht durch versmâhen.
doch sol er von mir enphâhen,
ob ez uns bêden mac gezemen,
daz ein rîcher keiser möhte nemen.>
er frâgte waz daz waere.
dô sprach der vil maere
< ich wils urloup zen künegen hân
und wil iuch hiute sehen lân,
sît ir gewunnet ritters lîp,
daz ir sô manic schoenez wîp
noch nie zer werlde habt gesehen,
des ir mir danne müezet jehen.
ich wil ouch sîfride biten
daz erz vertrage in friundes siten
und iuch küssen lâze sîn wîp.>
< keinen mînes mâges lîp
wold ich si gerner küssen lân,>
alsô sprach der krîmhilde man,
< danne iuch rüedegêre.>
daz was ein hôhiu êre
dem etzeln wîgande
von hiunischem - lande.
dem boten an der hovevart
êren mêr erboten wart.
dô sprach der künic rîche
< so erloube ich friuntlîche
küssen rüedegêr mîn wîp,
sît daz im sîn werder lîp
die werdekeit verdienet hât.>
walthêr sprach< sô ist niht rât
ern küsse ouch hildegunde
diu in in vil langer stunde
mit mir zen hiunen hât erkant.>
des neic er im dô zehant. âventiure wie der marcgrâve ze wormeze die frouwen schouwete.
der marcgrâve vor in allen sprach
< sô waen ez boten nie geschach
daz mir hiute widervert.
sît mir diu êre ist hie beschert,
die gâbe wil ich gerne enphân.>
gêrnôt hiez gîselhêren gân
dâ er die frouwen sitzende vant.
daz kindelîn tet ir bekant
wes die helde haeten muot,
daz rüedegêr, der helt guot,
mit fünf hundert sîner man
zuo den frouwen solde gân.
dô daz vernam des wirtes wîp,
dô wart vil maneger frouwen lîp
gezâfet verre deste baz.
ir sult ouch wol gelouben daz,
daz vil ûz valde wart genomen
daz selten was her für komen.
der junge knabe vil gemeit
hete den frouwen ouch geseit
daz küssen im erloubet wart.
ich waen daz im dâ vor verspart
ir munt deheiniu haete
diu ez ân angest taete.
diu künigin unde ir geste,
in einen palas veste
hiezen si ir meide gân,
und ob daz möhte sîn getân
daz ez alle künege solden sehen,
sô kunde man in niht gejehen
daz si gegen deheinen maeren
ie baz gekleidet waeren.
vil wol gezieret was ir lîp.
dâ sâzen siben künege wîp
ûf gesidele harte rîche,
daz man waerlîche
zen heiden bî den stunden
niht bezzers hete funden.
der küniginne palas
von guotem umbevange was
verdecket an daz ende:
der estrîch und die wende,
des envant man lützel blôz.
in ir werden zühten grôz
gesâzen nu die frouwen,
die si dâ solden schouwen.
dô kam der helt von hiunen lant,
den hete genomen bî der hant
gêrnôt der küene degen.
man sach si bêde ir tugende phlegen
sô si aller beste kunden.
sich hete ouch an den stunden
der bote geneiget in die tür:
dâ hiengen zenzelaere für
von sîden harte rîche.
dô wâren zühticlîche
von sedele gestanden
ûz ieslîchen landen
der vil edelen fürsten wîp.
wie möhte deheines fürsten lîp
immer baz getriutet sîn?
brünhilt diu künigîn
vil gezogenlîch dô gie
dâ si den marcgrâven enphie
enmitten in dem palas,
wan ez ir erloubet was.
dô kuste in gunthêres wîp,
des was getiuret wol sîn lîp.
in kuste ouch sîfrides win.
ich weiz, ninder ir sîn sin
nâher stuont danne dâ.
sô schoene munde er anderswâ
ze küssen ê vil selten vant.
dô gienc ouch dar von spanjelant
diu minniclîche hildegunt:
ir süezen rôsenrôten munt
bôt si in minniclîchen an.
der andern grüezen wart getân
mit sprüchen minniclîchen.
den marcgrâven rîchen
nam diu wirtinne bî der hant
und gienc dâ si ir sedel vant:
dâ erloubtes im dô sider
zuo in beiden sitzen nider,
zwischen ir und krîmhilten.
man gesach nie man sô milten,
der im daz grüezen hete getân,
ern möhte ez gerne enphangen hân.
do gesâzen in den palas
swaz meide und wîbe drinne was.
brünhilt wider den helt balt
sprach< her marcgrâve, mîn gewalt
sol iu hie enbieten êre.
haet ir noch ritter mêre,
den erloube ich zuo den frouwen mîn,
daz ir deheiner hie sol sîn
ez ensitze hie bî im ein meit.
dem bî den sî ze wesen leit,
der lâze uns daz schouwen
und sitze bî den frouwen.>
ir neic der bote rîche
der wirde vlîziclîche.
die ritter sâzen under in:
wol gienc in diu wîle hin,
si gedâhten des si dûhte guot.
ir deheiner sînen muot
kunde aldâ verenden:
drücken an wîzen henden
unde güetlîch sehen an,
des wart dâ harte vil getân.
frou hildegunt dô frâgen
von helchen unde ir mâgen
den edelen gast begunde.
er sagte ir swaz er kunde
wizzen guoter maere.
dô sprach diu freudenbaere
brünhilt diu vil rîche
vil gezogenlîche
< nu lât uns hoeren, rüedegêr,
ob helche diu küniginne hêr
von schulden daz verdienet hât
daz ir lop sô hôhe stât
vor andern fürsten wîben:
sô solde ir leben belîben
unz an den jungesten tac.>
< mit wârheit ich wol jehen mac,>
sprach der marcgrâve rîche,
< si hât sô vlîziclîche
ir lop verdienet manege zît,
daz man ir von prîse gît.
daz nime ich ûf die triuwe mîn
daz et deheiner frouwen sin
baz niht wesen möhte.
ob einer daz getöhte
daz ir dienten alliu lant,
sô wart nie milter herze erkant
daz ie frouwen lîp getruoc.
tugentrîch ist si genuoc.>
< nu lône iu got>, sprach brünhilt,
< daz iuch des an ir niht bevilt,
ob iuch iht arbeiten tuot
ir tugent und ouch ir werder muot.>
dô sprach der helt< daz kan ich tragen,
daz ez ir wol muoz behagen.>
dô sprach aber des küneges wîp
< immer saelic sî ir lîp
daz si hât daz mit tugende brâht
daz ir wirt dicke wol gedâht.
nu saget mir, edel rüedegêr,
dô gunthêr der künic hêr
iu sîne gâbe bôt,
dô machtet ir in schamerôt.
helt, warumbe tât ir daz?
iu gezaeme ûf mîn triuwe baz
von im ze nemen ouch sîn guot,
( alsô stêt des heldes muot,)
denn von etelîchen man
der tugent niht bedenken kan,
sô gunthêr der rîche:
der tuot vil williclîche
swaz durch êre verenden mac.
daz ist sîn site nu manegen tac.>
< daz weiz ich vil wol>, sprach der degen,
< daz er milte kan gephlegen.
doch stüende ez bôslîche:
wan ich bin selbe als rîche,
daz etelîcher krône hât,
daz mir mîn dinc schôner stât.>
dô sprach krîmhilt wider in
< iuwer und froun helchen sin,
die varnt einander bî:
des sît ir immer schanden frî
unz an iuwer beider tôt.>
< nu machet mich niht schamerôt,>
sprach des edelen küneges wîp:
< sich dunket gêret des mîn lîp,
( lât iu niht versmâhen,)
geruochet ir iht enphâhen
daz ich iu ze geben hân.>
dô sprach der etzelen man
< frouwe, lât ez âne nît.
etewaz daz man mir gît
daz nime ich billîchen,
doch wil ich mich niht rîchen
mit fremder liute guote.>
dô hiez diu hôchgemuote
zwêne gêrnôtes man
nâch rîcher fürsten gâbe gân.
ê daz geschehen was,
dô hete man in dem palas
geschenket drîstunde.
sô er gâhest kunde,
der bote der dâ was gesant,
der eine truoc ûf sîner hant
einen habechmûzaere,
der ander degen maere
mit dem andern bî im gie.
bî den habechen zôch man hie
daz aller beste wintspil,
daz kurzwîle alsô vil
nieman zer werlde gewan.
sô man die habechen hete lân,
ietweder sach gerne zaller stunt
swenne im helfen solt der hunt.
er stoubte ofte kranechen vil,
elbiz wâren gar sîn spil,
trappen und die vasân:
swaz ieman mit habeche solde vân,
des liezen si vil wênic hin.
die boten wâren komen in
stênde für rüedegêre.
diu küniginne hêre
ûf von dem sedele trat,
die gâbe si in nemen bat:
des bat ouch sîfrides wîp
daz sîn vil tugentlîcher lîp
die gâbe ruochte ab in enphân.
er sprach< frowe, daz sî getân.>
si nam der marcgrâve hêr.
nâch danke sprach dô rüedegêr
zuo der küniginne
< zwiu solde ich füeren hinnen
ditze schoene vederspil?
bî rîne ist guoter beize vil:
zer hiunen lant dâ sint diu mos
sô tief daz ofte guotiu ros
in dem bruoche ligent dâ.
diu beize zimet baz anderswâ
dâ man gerîten müge derbî.
wiste ich iuch nu zornes frî,
gâbe diu tuot mir sô wol
daz ich ir niht behalten sol.>
si erloubte im allen sînen muot.
dô gap er die habeche guot
den zwein gêrnôtes man:
mit in danken dô began
gêrnôt der tugentrîche
harte zühticlîche.
< nu weiz got wol>, sô sprach der degen,
< daz ich nie niht dâ wider wegen
kunde mîner frouwen
daz si mich mîner trouwen
wolde lân geniezen,
unz mich begunde verdriezen
daz ich nâch den habechen bat.
sich hât gefüeget mir diu stat
daz si mir sint zen handen komen:
nu ist hie geben unde genomen.>
als sprach der herre gêrnôt.
ein teil wart ir varwe rôt
der küniginne rîche;
si schamt sichs inniclîche.
dô sprach diu küniginne hêr
< swie ungerne rüedegêr
arbeite sich mit vederspil,
einez ich im noch geben wil.>
dô hiez si balde hine gân
zwô juncfrouwen wol getân.
die bêde brâhten sâ zestunt
einen sparwaere unde ein vogelhunt:
den truoc man für den edelen man,
er moht wol zehen mûze hân.
hie sult ir hoeren maere
wie dem gevazzede waere
daz an dem sparwaere lac.
swie ringe ez si ze geben wac,
doch was diu gâbe rîche.
der vezzel vlîziclîche
geworht was in karadîn.
niemanne was der lîp sîn
sô siech, der in umbe truoc
ern wurde wol gesunt genuoc:
ûz ieslîchem würfel schein
mit solher kraft ein edel stein
dâ man wol buozte sühte mite.
si hete ze geben werde site.
nu hoert ouch umb den vogelhunt.
von machsamî was ê der stunt
diu halse komen die er dâ truoc.
dar inne steine ouch guot genuoc
ahzic lâgen unde drî.
ein edel borte ûz arâbî
was des vogelhundes seil.
der gebe was worden doch sîn teil
dem marcgrâven rîchen:
daz wizzet sicherlîchen,
swer ir ze koufen hete gegert,
diu gebe waer tûsent marke wert.
der helt neic vlîziclîche
der küniginne rîche.
< genâde, vil edel wîp.
nu sol unmüezic sîn mîn lîp,
kume ich wider in hiunen lant.
ein bou ist hyrse dâ genant,
dâ sint wahtel inne:
mîner frouwen der küniginne,
lât siz ir niht versmâhen,
sol ich ir vil gevâhen.>
für schimph man im daz verstuont,
als die kargen alle tuont:
doch gelônte im sît des küneges wîp,
des schimphes hete vil nâch den lîp
verlorn der guote rüedegêr.
daz schuof diu küniginne hêr.
dô hiez si ir balde bringen dar
einen schaft, was lâsûrvar,
vil starc und zaehe hurnîn.
jâ was im an dem orte sîn
von rôtem golde ein tülle, dran
ein sper geschift von angran.
von dem sper unz ûf die hant
einen vanen man gewunden vant
mit einem borten wol dar an.
dô sprach si zuo dem küenen man
< den vanen nemet, her rüedegêr,
edel marcgrâve hêr,
und füert in durch die liebe mîn
und aller frouwen die hie sîn.>
dô sprach der gotelinde man
< von gâbe ich nie die nôt gewan,
als man mir hie mit gâbe tuot.
nu verkêret sich mîn muot:
sît sîn niht mac wesen rât,
nu mîn frouwe sô gesprochen hât,
durch diu vil edeln muoterkint,
die werden frouwen, die hie sint,
sô wolde ich kiesen den tôt.>
dô si in den vanen ane bôt,
alle sprâchen si dar zuo.
des enphie in der helt duo.
nâch der gâbe ir wart genigen,
swie er si hete verzigen
daz er niht nemen solde.
si frâgte in ob er wolde
durch diu vil minniclîchen wîp
urborn dâ sîn selbes lîp,
swâ sô si in gebaeten hin.
dô sprach er< ob ich ritter bin,
daz enwirt iu niht verseit.>
dô bat in wîp unde meit
< sô sult ir disen vanen tragen,
daz wirs iu immer danc sagen,
hie ze wormez an daz bürgetor.
ob ir ieman habet dâ vor
der iu nütze sî dar zuo
der iu sô guote helfe tuo;
und lât ir uns daz gesehen,
sô wellen wir iu immer jehen
daz ir mit prîse habt bejaget
daz lange ist her von iu gesaget.>
dô sprach der helt< ich hân dar zuo
reht daz ich ez gerne tuo,
allez daz frouwen wille sî:
dem muote bin ich immer bî.>
der vane wart alsô genomen:
er jach, sold er ze ende komen
sînes lebens ze vollen siben tagen,
er müese werden sô getragen
daz man sîn sagte maere
wie er ze wormez waere.
urloup er dô von in genam.
der wunsch den frouwen wol gezam:
si bâten al gelîche,
beide arme und rîche,
daz er mit heile müese varn.
iedoch kund er daz niht bewarn,
man truoc im dar under haz.
jâ hete unverdienet daz
der marcgrâve rîche.
dô schiet er vil froelîche
von den minniclîchen frouwen.
im lônte der alten trouwen
der vil küene hagene:
dô reit er mit dem degene
eine mîle oder baz;
vil williclîchen tete er daz.
urloup er von den fürsten nam.
als sîner hôchvart gezam,
sprach herbort von tenelant,
der ûzerwelte wîgant
< sît uns genaedic, rüedegêr.
daz etzele der künec hêr
alsô vil ze geben hât,
dâ von ez uns sorclîchen stât.>
dô sprach der edel rüedegêr
< etzele der künec hêr
der mac wol geben swem er wil:
ûf tugent und ritterlîchiu spil
tuot der vil lobebaere
sîn kamere dicke laere.>
mit urloube er dô danne reit.
dô wâren frô unde gemeit
ir etelîche drunder,
die dicke manegiu wunder
von den gesten hôrten sagen,
daz sis in sô kurzen tagen
ze wormez alle solden sehen;
dâ was vil liebe an geschehen
den die truogen tumben muot.
dâ muoste ouch manic helt guot
vil michel angest under hân.
der wirt dô frâgen began,
gunthêr der vil rîche,
der sprach dô wîslîche
< nu râtet, mîne geste:
waer diu stat sô veste
daz man in hielte vor diu tor,
wir sullen zuo in dâ vor
rîten ê der stunde,
ê ir keiner daz erfunde
wie wormez waere gestalt.
si mugen doch ir gewalt
niht sô verre bringen,
als si des habent gedingen.>
dô sprach in grôzer übermuot
sîfrit der helt guot
< swie grôze kraft si mügen hân,
wir haeten ritterschaft getân
mit in ûzer hiunen lant
unz her ze wormez ûf den sant.>
stuotfuhs dô den künic bat
< ungemüet sît mit der stat
von deheinen vestenungen.
daz lant ist unbetwungen,
ob ir die halbe möhtet hân
die ie seht hie bî iu stân.>
iedoch enliezen si daz niht,
alse ez lihte noch geschiht
den die sorgen müezen tragen,
si rieten alle einander sagen
daz si sich huoten umbe ir haz,
ir dinc gefüere deste baz.
die wîle was ouch hagene
mit rüedegêr dem degene
geriten von der stete dan.
swaz die zwêne küene man
einander sagten ûf den wegen,
der marcgrâve und der küene degen,
daz hât uns nieman noch geseit.
einander heten si gekleit
ir arbeit, bedunket mich.
dô sprach der helt vil lobelich
< hüet ir iuch, her rüedegêr,
tiurlîcher degen hêr:
ir sult dem krîmhilde man
in strîte ninder vor gestân,
sîfride dem jungen;
der treit balmungen,
des alten nibelunges swert.
er wirt vil übele gewert,
über den der helt von niderlant
in sturme strecket sîne hant.>
< nu lône iu got, her hagene,>
alsô sprach er zem degene;
< friuntschefte habt ir an mich reht.
ez muoz immer ebensleht
vil staete an uns beiden sîn
iuwer triuwe und ouch diu mîn.>
dô schieden si sich sâ zehant.
hagene kêrte in daz lant,
rüedegêr hin wider reit
dâ er manegen degen gemeit
nâch ime varnden vant,
die gerne heten daz bekant
swaz er hete dort vernomen.
vil schiere sâhen si in komen:
genuoge liefen gegen in.
ûf frâgen stuont ir aller sin,
die gerne wisten maere
wie er dan gescheiden waere. âventiure wie der marcgrâve von wormeze wider komen was.
in sîn herberge er gereit,
ab zugen si diu reiskleit.
den fürsten bat er sagen daz,
si waeren bî einander baz
dann er in sunder solde sagen,
des er si niht möhte verdagen.
dô rietens undr einander daz,
ez gezaeme ninder baz
dan under einer hütten wît:
dâ sameneten si sich sît.
die besten kômen alle dar.
dâ sach man an einer schar
wol vier und drîzic fürsten stân.
dô sagte der etzelen man,
der bote vil redebaere,
den helden sîniu maere
alse er hete dort vernomen,
und wer ze helfe waere komen
dem vogete ûz burgonde lant.
sich begunde nidern al zehant
etelîches tumber muot,
dô si von disen recken guot
vernâmen diu wâren maere
wer bî in dâ waere.
für die ander sprach dô wolfhart
< sô solde mich diu hervart
niht harte müen in ditze lant,
wurden mir die hie bekant
die ich doch gerne hete gesehen:
sô waer mir immer wol geschehen.
ich wolde roubes doch enbern.
mir ist liep ob si gewern
uns wellen hie mit ritterschaft,
daz ich ir etelîches kraft
in strîte solde hie gesehen,
der ich doch hôrte von in jehen.>
< wes freut ir iuch?> sprach hildebrant.
< sî hât der tiuvel her gesant
von den uns saget her rüedegêr.
jâ gehôrte ich noch nie mêr
sô manegen edelen wîgant
durch hoves wer komen in ein lant.>
dietleip sprach duo
< hât gunthêr willen iht dar zuo
ob er ergetzen welle mich,
sicherlîchen und solt ich
gewinnen nimmer küneges lant,
und mac ich, im getuot mîn hant
daz im vil schedelîchen kumet.
wir gesehen wol waz im gefrumet
der junge künec, her sîfrit.
ir helde, tuot des ich iuch bit
und râtet mir als ir hie stât.
sît er daz versmâhet hât
daz er mir niht büezen wil,
wir haben hie guoter helde vil
daz wir dâ mite gerîten sô
daz er der rede werde unfrô,
daz ich sô guote friunde hân.
daz wart in hôchvart getân.
wan râten ûf den strît.>
her biterolf sprach< des ist zît.
nu ist ez kumen ûf daz zil
daz ich mîme gelücke wil
danken und der saelekeit
daz mit gesten nie gereit
ûf strît mê sô manic man,
als mit uns bêden hât getân.>
dô sprach der herre dietrîch
< ez waere niht unbillîch
daz wir hie rieten zehant
wie wir die stete und ouch daz lant
allez wüeste liezen ligen,
ode wie wir möhten sô geligen
daz wir in und ouch die geste sîn
besaezen sô daz in der rîn
wênic spîse trüege zuo.>
her witege der sprach duo
< ich waene wol und dunket mich,
unde ist ouch vil waetlich,
daz hie gesezzes niht geschiht,
daz man vil wol gesiht
si rîten zuo uns mit ir schar.
swer dan helde sehen getar,
der wese frô und zeige daz.>
daz sprach er ûf gunthêres haz.
dô sprach aber rüedegêr
< ir helde, sûmet iuch niht mêr.
haet ir gehoeret, als ich hân,
sô hôhe rede von manegem man,
ir liezet iu zogen deste baz.
ich râte iu sicherlîchen daz,
daz ir der reise alsô getuot
daz wir êre unde guot
iht verliesen hie ze lande.
ez ist schade unde ouch schande,
der hôhe rede gên strîte hât,
ob er ez denne nider lât.
welt ir zuo in rîten dar,
sô sult ir schicken iuwer schar.
wir sullen des râtgeben hân:
ob si uns morgen niht bestân,
sô herbergen nâher für die stat.>
berhtunc der helt bat,
man lieze an hildebrande daz:
die schar enschicte nieman baz.
dô sprach der alte hildebrant
< hoere ich daz siz hie zehant
alle gerne hânt verguot,
sô bin ichz derz mit willen tuot.>
nieman daz dô widersprach.
dô er aller willen sach,
do begunde ahten hildebrant
wier si scharte in daz lant.
< iedoch wil ich hoeren lân,>
sprach dô der gotelinde man,
< wie ich gescheiden bin von in.
der künec wand allen sînen sin
dar an wier gaebe mir sîn guot:
dô hete aber ich keinen muot
ze nemen daz er mir gebôt.
sînes silbers und sîn golt rôt,
des wart sô vil für mich getragen
daz ich iuz niht rehte kan gesagen.
ros wâfen unde wât,
als ein künec von rehte hât,
des bôt er mir alsô vil
daz ich ims immer danken wil.
dar zuo ist êren mir geschehen,
wesset irz, ir möhtet jehen
daz ich in saelde koeme dar.
dô des gêrnôt wart gewar
daz ich niht gâbe wolde enphân,
dô wolde er mich des niht erlân,
ich muoste im doch der gâbe jehen
daz mich der... hiez sehen
siben rîcher künege wîp.
sô maneger stolzen frouwen lîp
ich nie noch bî einander vant.
selbe nam mich bî der hant
frou brünhilt diu rîche,
als tete ouch minniclîche
des starken sîfrides wîp:
ob nie niht êren haet mîn lîp
mêr bejaget wane die,
sô bin ich wol gewesen hie.
wie moht man mirz erbieten baz?
do ich zwischen zwein den hoehsten saz,
die man nu sihet krône tragen
ode von ieman hoeret sagen,
dô heizens under mîne man
ir ingesinde wol getân
sich teilen in dem palas
daz kein mîn recke dâ was,
ern saeze zwischen magedîn.
ouch hât durch alten dienest mîn
mir êre erboten hildegunt:
mich kusten an den mînen munt
edeler küniginne drî.
swaz boten mêr geschehen sî
von frouwen êre, der habe im daz:
daz lâze ich immer âne haz.
dar zuo bôt mir des wirtes wîp
rîche gebe daz ir mîn lîp
darumbe tregt vil holden muot.
si gap mir zwêne habeche guot
und dar zuo einen beizwint.
dâ mite bôt ich êre sint
zwein gêrnôtes man
daz mir des danken began
gêrnôt als wol alse sie.
noch hân ich mêre gâbe hie,
die wil ich iuch sehen lân.>
dô hiez balde hine gân
rüedegêr der maere
nâch dem sparwaere:
dô brâht man ouch den vogelhunt.
si sprâchen alle sâ zestunt,
die guoten wîgande,
er saeze ob keinem lande
kein künic alsô rîche,
er enmöhte werdiclîche
dise gâbe enphâhen
mit êren âne smâhen.
< jâ zeige ich iu noch mêre,>
sprach aber der bote hêre,
< daz ir von schulden müezet jehen
daz ir vil selten habet gesehen
gâbe sô lobelîche,
diu iu als angestlîche
genomen wurde noch von man
als ich die gâbe enphangen hân;
als ir mir danne müezet jehen,
sô ir die gâbe habet gesehen.>
< die sult ir uns sehen lân.>
nâch dem vanen hiez dô gân
der marcgrâve rîche.
den brâht man snelliclîche.
dô man den vanen ûf gewant,
den schaft den nam an die hant
randolt ûz meilân.
von vier stücken wol getân
was er geworht von golde rôt,
alsô des meisters sin gebôt:
die andern viere hurnîn
daz si niht bezzer dorften sîn:
daz niunde stücke helfenbein
daz wîz alsam ein veder schein.
mit einem sper geschiftet was
ein stücke alsam ein gras
ze aller vorderst dar an,
wol geworht von angran.
ein ritter mohte in gerne tragen.
nu hoeret von dem vanen sagen.
daz was ein phelle ûz ninivê
sô maneger bilde daz man ê
schoener lützel keiniu vant:
von meisterschefte künstic hant
hete dâ wunder in geweben,
tier alsam si solden leben.
daz werc daz was sô ûz erkant
und grôzer sin dar an gewant
von vogele und von tiere:
alsô rîchiu geziere
unde als maneger hande
waen ieman mêr bekande.
man schouwete in durch wunder:
ieglîch tier besunder,
daz was nâch sîner ahte gevar,
unde ouch underscheiden gar
mit golde und mit gesteine.
manege perle kleine
sach man verwieret dar în,
saphîr smâragde sardîn
jâchande balase rubîne:
man mohte von ir schîne
ûz dem golde gerne sehen
daz ir vil wünniclîche brehen.
er wart dicke geschouwet sider.
ûzen gar die ende nider
dâ lâgen stücke rîche
geworht vil meisterlîche
von oben alumbe unz ûf die hant
dâ man in zuo dem schafte bant.
sô sich inder ruorte der wint,
sô was dâ weder alt noch kint
der in möhte wol getragen:
sô vil was goldes drin geslagen
und der vil edelen steine,
bêdiu grôz und kleine;
und was ouch, als uns ist geseit,
wol vierdehalbe klâfter breit.
die besten die in sâhen
algemeine des jâhen,
swer sîn ze koufen hete gegert,
er waer wol tûsent marke wert.
ze rüedegêre sprach dô wolfhart
< ich rite immer hervart,
der taete alsolhe gâbe mir.>
der marcgrâve sprach< nu lieze ich dir
mînen teil des frumen dran,
als ich den vanen enphangen hân,
daz du in als ich soldest tragen.>
dô bâten inz die recken sagen,
< lât hoeren wie irn habt genomen.>
< jâ muoz mir ze helfe komen
aller mîner friunde kraft,
od ich muoz mîner ritterschaft
vil lasterlîchen abe gestân.
den vanen ich sô genomen hân
von der küniginne hant,
ê ich gerûme ditze lant,
daz ich in an die mûre trage.
ûf genâde ich iu daz sage
daz ir mir helfet sô dar zuo
daz ichz nâch mînen êren tuo.
jâ mac ich sîn geweigern niht,
swaz sô mir dâ von geschiht:
ich müeste es anders immer sîn
gunêrt unz an daz ende mîn.
von frouwen wart ich umbetreten:
si habent umb anders niht gebeten
wan daz si iuch recken wellent sehen
wem si des prîses mügen jehen.>
dô sprach der herre dietleip
< ich waene, selten noch beleip
in der werlde ie kein frum man,
dâ man iht des solde begân
daz frouwen solden hân für guot,
ern kêrte dar an sînen muot.
alsô mac ouch hie geschehen.
her marcgrâve, ir sult gesehen,
hie ist sô manic ritter guot
daz irz mit vollen staten tuot.>
dô sprach der herre dietrîch
< saget uns, marcgrâve rîch,
sol ez âne sturm gestên,
sît ir zer mûre wellet gên,
ode sol man mit ganzer ritterschaft
versuochen dâ der helde kraft?>
der marcgrâve sprach< ich sol
der maere erbîten, daz ich wol
der frouwen willen dran ervar,
wie ich den vanen bringe dar.>
der recken was deheine,
sine spraechen algemeine,
die er in dem here bî im vant
< jâ sol guot wille und friunde hant
in den vanen sô helfen tragen
daz man ez lange müeze sagen.>
des dankete in dô rüedegêr.
er gewan dâ helfe verre mêr
von helden denne err wolde hân
do er an die mûre solde gân.
des wart ez allenthalben guot.
der sînen wân und sînen muot
mit triuwen wande dar an
daz er ieslîchen man
ze friunde gerne hiete,
im wurde daz ze miete
daz maneger wâgt durch in daz leben,
sô ein ander müeste drumbe geben
sîn und sîner friunde habe,
und stüende im lîhte der dienst doch abe. âventiure wie meister hildebrant die recken scharte.
nu wil ich iuch hoeren lân
wie die fürsten unde ir man
hin nâher riten in daz lant,
und wie der alte hildebrant
twelte, daz der geste schar
gegen hertem strîte wurde gar.
der maere helt der sprach duo
< wir müezen ligen unze fruo.
als ez êrste beginne tagen,
niht mêr erwartet iemans sagen,
sô sult ir alle sîn bereit
in iuwer wîclîchiu kleit.
sô schaffe ich>, sprach hildebrant,
< daz unser venre wîcnant
ein hornblâsen schelle,
daz der dôz erhelle:
sô sult ir niht langer bîten
unde sult gên wormze rîten,
unde gedenket wol dar zuo
ob ieman dem gelîche tuo
daz er uns welle bestân,
daz wir des iht belîben lân.
ir volget mîner lêre,
sô müget ir frume und êre
deste baz erwerben,
und deste min ersterben
mac der guoten knehte.
ich wîse iuch helde rehte,
einen ieslîchen man
wie wir die vînde suln bestân.
ist aber daz man des niht entuot
( lîhte lâzent siz durch kargen muot
daz wir niht werden bestân),
dunkt ez iuch danne guot getân,
sô herberget für die stat.
ich schar iuch, sô man mich des bat,
sô ich aller beste kan.
sîfride den sol bestân
mîn herre, der fürste dietrîch.
umb nieman ist sô billîch
daz er gewalte widerstât
sô umb den der ouch die sterke hât.
sîfride>, sprach her hildebrant,
< dunket daz er alliu lant
mit sîner kraft ertwinge wol:
ist ieman der daz nidern sol,
sô tuot ez ouch der herre mîn.
des wil ich âne zwîvel sîn.
sul wir strîtes mit in phlegen,
sô sol her dietleip der degen
den wirt hie selbe bestân,
von dem wir die arbeit hân.
sô sol von burgonde lant
gêrnôte den küenen wîgant
der fürste biterolf bestân:
sô wil ich gên den zwein lân,
liudegaste und liudegêre,
die stolzen künege hêre,
die küenen harlunge,
zwêne fürsten junge,
frîtelen unde imbrecken:
sô sol bloedelîn der recke
den küenen witzlân bestân
und sînen bruoder poytân.
des helfe sigehêr der frîe,
der helt ûz turkîe.
so bestê den helt maere,
stuotfuhs den püllaere,
rienolt unde randolt,
die doch einander nimmer holt
werdent an ir bêder tôt.
sô sol daz etzeln golt rôt
dienen der helt rüedegêr:
von spanjelant den küenen hêr
sol er mit sîner hant bestân.
daz er froun hildegunden dan
enphuorte helchen der rîchen,
er richet ez ouch billîchen.>
vor zorne rôten dô began
des rîchen künic etzeln man,
rüedgêr der vil rîche,
der sprach dô schimphlîche
< waz wîzet ir mir, hildebrant?
waer iu walthêr alsô wol bekant
als mir der küene degen,
ir haet mich nimmer im gewegen
ze einem widerstrîten.
jâ lieze ich in noch rîten,
und naeme er mir die tohter mîn,
sô solde er ungevangen sîn
immer von der mînen hant.
er rûmte mînes herren lant
gar âne alle schande
daz ich sô rehte erkande
sîne site, des jungen man:
des muoste ich in dô rîten lân.>
dô sprach aber her hildebrant
< vil tiurlîcher wîgant,
ich hânz darumbe niht getân,
ich envinde in wol der in bestân
getürre hie ûf strîtes haz,
und lâze iuch wol gesehen daz.>
< des gestate ich niht>, sprach rüedegêr.
< haet er nu drîzic sterke mêr
über mich dann ich ir hân,
dannoch sô wolde ich in bestân.>
daz lobte im manic wîgant,
daz man in an dem willen vant
daz im gezwîvelt niht der muot:
daz dûht si al gelîche guot.
dô sprach aber her hildebrant:
< die zwêne helde ûz österlant,
wolfrât unde astolt,
an den etzelen golt
kunde nie niht vervân,
die suln mit strîte bestân
die ie daz beste tâten,
elsen und gelfrâten.
sô sullen des niht abe gestân
des künic ermenrîches man,
witege und heime der helt guot,
si bestên durch ir übermuot
künic gunthêres holden,
hagenen unde rûmolden.
sô schaffe ich berhtungen,
dem edelen degen jungen,
den stolzen und den maeren
und den vil lobebaeren,
den jungen ortwîne
daz an in bêden schîne
ir vil degenlîcher sin:
in guotem willen ich des bin.
sô schaffe ich wahsmuoten
herborte dem degene guoten,
dem fürsten ûz tenelant.
eckehart der wîgant,
der strîte wider boppen,
den kindischen knappen,
den herbortes swestersuon,
den man unsanfte nider tuon
mac sîner grôzen hôchmuot,>
alsô sprach der helt guot,
< der er nu lange hât gephlegen.
sô sol sigestap der degen
bestên nantwîne,
den witege und ouch die sîne
kunde nie ertwingen.
den herzogen ûz lütringen,
den sol her îrinc bestân,
von dem in aehte wart getân
der etzeln recke ûz hiunen lant.
irnfride den wîgant,
den schaffe ich billîchen
dem lantgrâven rîchen,
von dem der helt wart doch vertriben
und ellende ist ouch beliben
in hiunischen landen
bî etzeln wîganden.
sô schaffe ich hâwarte,
der nie den lîp gesparte
in keiner angestlîchen nôt,
swie wol er saehe den tôt
ob er dâ sterben solde,
dem fürsten berhtolde
von der swâbe lande.
mich alten hildebrande
wil ich niht lâzen under wegen
dâ wir strîtes sullen phlegen:
sindolt wil ich bestân,
einen den küenesten man,
den die burgondaere,
die stolzen helde maere,
ir gewunnen bî ir tagen.
von einem hân ich hoeren sagen,
daz ist der junge hûnolt,
der daz gunthêres golt
dienet wol nâch êren
an den künegen hêren,
wellent siz bedenken
daz alsô küenen schenken
künec noch keiser nie gewan.
der herzoge râmunc sol bestân
dâ von arragûn den degen.
sô sol gotele strîtes phlegen
wider den von nâvarren lant.
sabene der wîgant
und der küene liutwar,
die bêde haben eine schar
wider den - von - francrîche.>
dô sprach wolfhart vil zorniclîche
< oeheim, ir habt mich wol bewart:
ze welhem tiufl bin ich geschart?>
des smielte ein teil her dietrîch,
diu rede in dûhte gamelîch,
die andern lachten über al.
dâ wart von rede michel schal.
dô sprach aber hildebrant
< einer von burgonde lant,
den hân ich dir behalten.
maht du der krefte walten
daz dich vor im daz ellen dîn
ernert, sô mahtu, neve mîn,
dînem gelücke sagen danc,
tuostu gesunde widerwanc.>
er frâgte wer der waere.
dô sprach der helt maere
< er ist geheizen gêre.
darumb daz du iht mêre
mich sehest als übellîchen an,
wil ich dich mit im strîten lân.>
dô sprach aber wolfhart
< zwiu sol der in hervart
von dem man niht ze reden hât?
swie angestlîche ez umbe in stât,
sol ich sîn strîtgeselle sîn,
ich erwer wol den kotzen mîn.>
< die guoten friunt die ich noch hân,>
sprach der dietrîches man,
< wolfbrant unde wolfwîn,
die suln daz lâzen werden schîn
wie si die nâchhuote hân.
mînes herren dietrîches man
wîchart unde wîchêr
und wîcnant der degen hêr,
helpfrîch und ritschart,
die gedenken wie diu hervart
mit êren wider wenden tuo:
dâ habent si michel reht zuo.>
dô er die schar geschihte,
zir aller angesihte
saz noch der herre dietrîch.
swie dicke er hete erwert sich
maneger angestlîchen nôt,
dise sorge im daz gebôt
daz er dar an gedâhte,
wie man in ze rede brâhte
sîfride dem degene guot:
dâ von gezwîvelt im der muot,
daz man im sagte maere
daz der recke waere
komen in ein rîche lant
dâ er zwên edele künege vant
bî manegem stolzen ritter guot,
als man noch vil dicke tuot;
die wolden dâ geteilet hân
daz in ir vater hete lân.
einer hiez nibelunc
und sîn bruoder schilbunc,
alsus was er bî namen genant.
ditz maere was dietrîche bekant
daz er die künege bêde sluoc.
si heten doch bî in genuoc
die ez gewert solden hân,
bêde ir mâge und ouch ir man,
fünf hundert ritter oder baz.
man sagte im sicherlîchen daz,
die sluoc er unz an drîzic man:
die entrunnen von dem helde dan.
dannoch wâren zwelve dâ
die den künegen anderswâ
erstrîten heten fürsten lant:
von den tete man uns bekant,
si waern wol risenmaezic,
der werlde widersaezic.
der einer brâhte in in den zorn,
dâ von die andern wurden vlorn.
er twanc ouch alberîchen,
den vil lobelîchen,
mit sterke und ouch mit meisterschaft.
der hete wol zweinzic manne kraft,
von grôzem ellen im daz kam.
ein tarnkappen er dem nam:
daz was im gar ein kindes spil,
swie ungerne manz gelouben wil.
dô nam der degen hôchgemuot
der küenen nibelunge guot,
dar zuo er ein lant erstreit.
der wunder was im sô vil geseit
daz im gedâhte er dietrich
< bestên ich in unde er mich,
wie kan ich dan vor im genesen?
möht ichs mit êren abe wesen,
daz si mich schüefen anderswar,
ê bestüende ich drî schar,
ê den sigemundes suon.
nune kan ichz in niht kunt getuon
mit deheiner mîner êre.
daz müet mich harte sêre.>
in dem gedanke er alsô saz.
dem helde was umbe daz
sêre gezwîvelt der muot,
swaz ieman wider den recken guot
sprach, daz ers von der nôt
nieman antwürte bôt.
alsô saz her dietrîch.
wolfhart, der degen lobelîch,
der begunde reden wider in.
er liez in alsô scheiden hin
daz er nihtes ensprach.
er gienc da'r hildebrande sach:
< jarâ jâ>, sprach dô wolfhart,
< daz wir die hervart
ie geriten an den rîn!
von dem getroestet solden sîn
die küenen amelunge,>
sprach wolfhart der junge,
< dem ist gezwîvelt sô der muot
daz er>, sprach der degen guot,
< niht nützer waere danne ein wîp,
dâ wir die êre und den lîp
suln wâgen ûf ritterschaft,
daz uns sîn helfe und sîn kraft
ze kleinen staten dâ gestât.
ich hôrte ie sagen, der niht hât
geleites, der mac missevarn.
wie sul wir uns dâ vor bewarn,
vil lieber oeheim hildebrant?>
< wen meint ir?> sprach der wîgant.
< mînen herren dietrîchen,>
sprach er vil zorniclîchen,
< der istz den ich gemeinet hân.>
mit unguote antwurten im began
zehant meister hildebrant
< daz râtet dir der vâlant
daz du in zîhest zageheit.
wirt ez dem recken geseit,
sô fürhte ich harte sêre,
ez gê dir an dîn êre.
nu swîc und rede niht mêr dâ von.
ich bin an im vil ungewon
daz im verzagte ie der muot.
jâ wil ich den degen guot
heimlîche frâgen waz im sî.
dâ sol nieman wesen bî.>
dô gienc der alte hildebrant
dâ er sînen herren vant
und frâgte den fürsten rîchen
vil gezogenlîchen
< herre, waz ist iu geschehen?
man hât iuch disen tac gesehen
niuwan übele gemuot.
ist iu>, sprach der degen guot,
< von ieman iht gesprochen,
daz wirt schiere gerochen,
und waere vil kurzlîche ergân.>
< mir hât nieman niht getân,>
sprach der herre dietrîch.
hildebrant, der degen rîch,
hiez in von dem sedele stân:
< wir sullen rîten dâ wir hân
sprâche heimlîche.>
den helden lobelîche
zôch man diu phärt dar.
< ir sult gewâfent werden gar,>
sprach aber meister hildebrant.
< ich wil ouch mînes schildes rant
füeren und den mînen schaft,
ob wir von iemannes kraft
lîhte werden an gerant,
daz ouch wir sâ zehant
den ze wer sîn bereit.>
dô wart vil schiere gekleit
in sîn strîtlîch gewant
der helt von amelunge lant.
hildebrant in dô verbôt
und sprach, ez waere kein nôt
daz ieman nâch in zwein rite.
müelîche in sîner ungebite
liez ez der küene wolfhart.
si riten eine danvart
daz nieman von dem here sach
ob in liep oder leit geschach.
wolfhart kunde ez doch niht lân,
ern rite nâch in beiden dan:
er wolde wizzen wâ si hin
haeten willen unde sin.
si wâren nu sô verre komen
daz si niht möhten hân vernomen
ein horn von dem her herdan.
dô sprach der sinnehafte man,
von berne meister hildebrant
< wie nu, vil tiure wîgant,
maere helt dietrîch?
si wânden daz ich haete dich
ze êren dînen man erzogen:
mich selben hân ich dran getrogen.
von dir und dînem künne
solt wir haben wünne,
nu sehen wir niuwan arbeit.
mir muoz immer wesen leit
daz ich mich sus versûmet hân.
diu zuht diech an iu hân getân,
diu mac uns niht ze staten komen.
ich hân daz hiute wol vernomen
daz wir niht anders küneges hân.
ist iuwer wille sô getân,
als mir ist von iu gesaget,
daz ir an manheit sît verzaget,
des scheiden wir von êren.
sol ich von êrste iuch lêren
als ein zwelfjaeric kint,
des mugen sich fröuwen die uns sint
alle ir zît her gehaz.
sô zimet uns bêden daz,
daz wir uns müezen scheiden ê,
dan ez uns lasterlîche ergê.>
dô sprach der von amelunge lant
< waz wîzt ir mir, her hildebrant?
iuwer rede diu ist mir leit.
hât iu ieman iht geseit,
des ich lîhte unschuldic bin,
sô möht ir haben wol den sin,
und solt mich ungestrâfet lân.>
< ez mac als sanfte niht ergân,>
sprach aber meister hildebrant.
< iuwer vater gap iuwer hant
durch triuwe in die mîne,
daz ich iuch und al die sîne
in mîner phlege solde hân.
dâ bî stuont vil manic man,
bêde tiutsch unde ouch walch,
dô er mir allez daz bevalch
daz er nâch tôde hie verlie.
alsô balde und daz ergie,
dô wande ich herze unde sin
wie ich iuch mit êren braehte hin:
nu bin ich alsô gar betrogen,
sam ich iuch nie tac het erzogen.
nu müezt ir strîtes mit mir phlegen,>
alsô sprach hildebrant der degen,
< und wizzet daz ichs niht enber,
ich wil sehen wie daz sper
geneiget werde von iur hant.
daz mîne>, sprach her hildebrant,
< muoz ûf iuch geneiget sîn;
und habet daz ûf die triuwe mîn,
( des willen ist unbelougen,)
durch die brust ode ûz diu ougen
stiche ich iu mit mîner hant,
ir enwert ez>, sprach der wîgant.
dô sprach der herre dietrîch
< dem sî wir bêde ungelîch
gewâfent, ich unde ouch ir,
dâ von ichz billîch verbir.
ich füere al mîne sarwât:
swie man mich zeinem zagen hât,
ûf swen geneiget wirt mîn schaft,
der muoz enphinden mîner kraft.
sô füert ir, maere wîgant,
niuwan den schilt an der hant
und traget ein hemde sîdîn.
ich wold iuwer gerne âne sîn.
swie hertez strâfen ir mich tuot,
ich sol ez mîden, sêgich guot.>
dô sprach aber der grîse
< ich weiz iuch sô wîse
noch iuwer ellen alsô grôz.
ez schadet mir kleine, bin ich blôz,
swie sêre ir stechet ûf mich.>
dô zurnde der herre dietrich.
vil balde warf er umb daz marc
und neigte einen schaft starc:
daz selbe tete ouch dietrîch.
dem helde vil lobelîch
er sînen stich dô abe gesluoc,
( wîse sô was er genuoc
und starc, daz dietmâres kint,)
daz im daz fürbüege sint
verre von dem rosse spranc:
des muoste er âne sînen danc
hinderz marc ûf daz gras.
alsô daz geschehen was,
dô zurnde der herre dietrîch:
an den helt vil tobelîch
lief er mit dem swerte.
hin engegenwerte
spranc im der alte hildebrant.
nu hete ouch im den schildes rant
erreicht der helt von berne:
er haete in alsô gerne
sam einen riuzen erslagen.
kund er den schilt niht baz getragen,
sô möhte er nimmer sîn genesen.
der ander slac muose wesen
meister hildebrandes:
sînes herren schiltrandes
wol ellen breit er hin gesluoc.
dô erdente balde genuoc
den dritten slac her dietrich.
wol verstuont der helt sich
daz er al durch daz spenge sluoc
ûf einen buckel guot genuoc.
der alte spranc dô hinder sich
< maere helt, nu entêre dich
niht an dem besten friunde dîn.
jâ hân ichz ûf die triuwe mîn
dir ze vâre niht getân,
daz ich dich sô versuochet hân.
helt, nu lâ mich genesen:
ez sol vil staeter fride wesen
zwischen uns, degen hêre.>
dô sluoc der künec niht mêre.
dô sprach der dietmâres suon
< wolde ich immer iht getuon
wider triuwe und die êre mîn,
sô müeset ir des tôdes sîn.>
< waz hulfe iu daz?> sprach hildebrant:
< iedoch tet einer mir bekant,
iu waer verzaget gar der muot.>
< den nennet mir>, sprach der helt guot.
< den tuon ich niht>, sprach er zehant,
< daz er iu wurde bekant,
ich enmüge ûf iuwer triuwe hân
daz irz ze guote wellet hân.>
< daz lobe ich>, sprach her dietrîch.
dô sach der degen waetlîch
einen wol gewâfenden man
verre rîten ûf dem plân:
si wundert wer der waere.
hildebrant der maere
sprach,< ez ist wolfhart.>
er winkte im an der selben vart
mit dem swerte zuo zim dar.
des wart der helt vil wol gewar.
schiere kam der degen junc
dâ er den küenen amelunc
bî meister hildebrande vant:
dô gruozten si den wîgant.
er erbeizte nider zuo in sân.
sîn herre frâgen in began
wâ er waere hin geriten.
er antwurte in zornes siten
< ich reit unde nam des war
ob ir inder zuo der schar
waert geriten und woldet tuon
des ir êre unde ruon
bêde möhtet wol gehân.
waere ez danne alsô getân
daz ir waeret bestanden,
sô wolde ich iu wîganden
mit êrn zehelfe sîn bekomen.>
dô si heten daz vernomen,
si sâzen wider ûf diu marc.
hildebrant, der degen starc,
reit zen herbergen dan.
aber frâgen began
der tugenthafte dietrich
< her hildebrant, noch habet ir mich
verholn jeniu maere.>
dô sprach der redebaere
< ez was mîn neve wolfhart.>
vil rôt der helt von berne wart
und sach in zorniclîchen an:
den recken frâgen er began
< her wolfhart, wer hât iu gesaget
daz ich dâ von wart verzaget
dô man mich gên sîfride maz?>
der helt sprach,< ich wiste daz,
wan iu was diu varwe
erblîchen albegarwe.
ir nennet mir deheinen man,
lât man mich in sehen an,
ich weiz wol>, sprach der degen balt,
< wie sîn gemüete sî gestalt,
er sî küene od sî ein zage,
daz ichz bescheidenlîchen sage.>
dô sprach der herre dietrîch
< daz ist ein kunst sô lobelîch
daz ich si gerne wolde hân
woldest du mich die lernen lân.
alse du mir hâst geseit,
sô bist du für die zageheit
der aller beste arzât,
den zer werlde ieman hât.>
dô sprach meister hildebrant
< was aber ez im rehte erkant?>
< ja entriuwen>, sprach her dietrîch,
< mîn muot was sô zagelîch,
dô ich gedâhte an den man,
waz er wunders hete begân
dô er die nibelunge sluoc
und ouch ander degene genuoc,
dâ er den grôzen hort gewan:
dâ von ich zwîveln began.
mir ist aber erwarmet nu daz bluot,
swaz ir deheiner uns getuot,
daz in vergebene niht gestât.
ez hilfet wol daz mich sô hât
gestrâfet meister hildebrant.>
...
si riten hin wider sâ zehant
dâ er sîn ingesinde vant,
der herre dâ von berne.
dô heten ouch si vil gerne
von im vernomen maere
war er geriten waere.
die drî rieten daz verdagen.
wolfhart dô begunde klagen
wie lange si dâ wolden ligen
ode wem si möhten an gesigen
mit senfte und mit gemache.
< ez waere ein fremdiu sache,>
sprach der küene wolfbrant,
< ob ein fürste sîniu lant
darumbe rûmen wolde,
ob er daz hoeren solde
daz man im dröute sêre,
man entaete im mêre.>
dô sprach aber wolfhart
< ich gesach halt nie hervart
dâ ritter kurzwîlten min.
jâ gênt uns die tage hin
als den vil bloeden wîben.
sol ez alsô belîben
daz wir ze tuonne niene hân?>
dô sprach der ermenrîches man,
der herzoge berhtunc
< hie ist manic alt unde junc
der ez als gerne saehe
ob ritterschaft geschaehe
ûf disem velde alsô breit.>
dô sprach der küene dietleip
< wâmit möht man iu, wolfhart,
lieben dise hervart?>
dô sprach der degen unverzaget
< mir ist lange her gesaget
daz gunthêr und die sîne,
die recken von dem rîne,
alle zît phlegen ritterspil
und wie si turnieren vil,
bêdiu ûf vlust und ouch gewin:
dâ mite gênt ir jâr hin.
wold unser voget von berne,
daz saehe ouch wir vil gerne.
mich müet>, sprach aber wolfhart,
< daz ich neheine hervart
versaz in lamparten lant,
und mir daz nie wart erkant
daz si heizent turnieren,
sî ez sol ritter zieren.>
her witege frâgen dô began
ob ez si dûhte guot getân.
dô jâhen die helde guote,
es waere in wol ze muote.
her biterolf der wîgant
sprach< mir ist daz wol erkant,
si versagent uns dehein spil,
si habent guoter ritter vil.
haeten wir einen boten dar,
ir wurdet schiere des gewar
daz ir sîn wurdet wol gewert,
sît ir turnierens gert.>
dô sprach rienolt von meilân
< solde wolfhart mîn neve hân
sô dicke geturniert alsô ich,
sô wil ich gelouben daz er sich
vil lützel müete alhie dermite.
sît aber daz der helt sîn bite,
sô helfet, guote wîgande,
daz wir ûf des rînes sande
geprüeven gên des fürsten man
daz man ze reden müge hân.>
die tumben dô des bâten:
die alten giengen râten,
wer der bote waere
so gefüege der diu maere
den helden werben kunde,
ob sînen gesten gunde
gunthêr der künic rîch,
( ez waere an helden lobelîch),
daz si phlaegen ritterspil.
dô wart vingerzeiget vil
ûf den gotelinde man
daz si den wolden senden dan.
dô sprach der stolze dietleip
< sît mich ungelücke treip
in disiu fremden fürsten lant,
sô wil ich>, sprach der wîgant,
< daz ellendes mich geniezen lân
sol der gotelinde man,
rüedegêr der rîche,
sô tuot er vil friuntlîche.
wir möhten wol ander boten dar
senden, wan daz nieman gar
gereden kan die bescheidenheit,
daz werde hin und her geseit
ob si turnierens wellen phlegen,
wie hô si an der vlüste wegen
der gevangen werde hin,
ode waz der schade und der gewin
bêdenthalben müge sîn,
oder waz wir gegen in
gewâfent sullen bringen dar,
ode wie man uns dâ vor bewar,
dâ wir mit helden strîten,
daz uns in den zîten
die kipper niht enbrechen abe;
daz unser lop und unser habe
iht bî dem rîne hie bestê,
ez ensî daz ez von schulde ergê.>
rüedegêr der sweic duo.
bloedelîn der sprach im zuo
< nu rîtâ, edel rüedegêr.
wir hiunen sâhen doch nie mêr
wie turnieren sî getân:
die priuzen und die pôlân
habent sîn selten iht gephlegen.>
dô sprach der tiurlîcher degen
< ich rîte dar, ist ez iu guot.
doch râte ich daz ir einez tuot:
wir rîten nâher in daz lant.
werde wir dan niht an gerant,
sô sitzent si ze burcwer.
sô sul ouch wir unser her
in gelegen alsô nâhen
daz ez in mac versmâhen.>
si volgeten al gemeine
rüedegêren eine
des er daz hergesinde bat:
si riten nâher zuo der stat
daz ez in nieman missebôt.
durch deheiner slahte nôt
haet ez dâ maneger niht verlân:
haeten si ez niht getân
durch des wirtes êre,
sô haeten siz vil sêre
versuochet an die geste.
ze wormez für die veste
riten die wîgande.
dô si von den ûz dem lande
niht ritterschefte mohten hân,
si herbergeten ûf den plân
und allenthalben ûf den sant.
dort inne man vil manegen vant
dem ez beswârte dô den muot,
und der deheiner slahte guot
darumbe niht hete genomen,
ern waere für die porte komen
und haete ouch ritterschaft getân:
dô muosten siz belîben lân
durch den künic rîchen,
der riet in wîslichen. âventiure wie der turnei vor wormeze geschach.
die helde schuofen ir gemach.
wie manege hütten man dâ sach
und manic hêrlîch gezelt!
der was erfüllet gar daz velt
wol raste breit vor der stat.
dô tete des man in ê bat
rüedegêr der rîche.
vil harte vlîziclîche
wart er schiere wol gekleit
mit zwelif recken gemeit.
als er riten wolde dan,
der helt dô râten began
< ir maeren helde guote,
nu schaffet iuwer huote
allenthalben umb daz her.
vindet man iuch âne wer,
daz ist schade und schämelich.
des lât iuch, helde, ane mich:
hagene ist ein nâchranc man.
si heten uns anders nimmer lân
der stete komen sô nâhen.
iu sol daz niht versmâhen,
ir volget mîner lêre.
ich wil noch reden mêre
wider iuch, wîgande.
lât iu niht wesen ande
wie ich nime die ritterschaft.
zwâre si habent wol die kraft
daz si uns nimmer wirt verseit.
ez waere iu helden lîhte leit,
lobt ich verliesen iuch diu marc:
sô wurde der schade al ze starc.
under uns ist diu sarwât,
daz er immer drumbe rât
möhte turnierens hân,
ê er si hie müese lân.
des bedenket iuch, helde guote.
wes ist iu nu ze muote,
waz man für iegelîchen man
sol ze ledigunge hân
der gevangen wirt hin in?
lât mich hoeren iuwern sin
waz iuch nu, helde, dunke guot.
die liute habent niht einen muot.>
dô sprach der bernaere
< daz ist uns vil unmaere
ob si turnieren âne fride.
sô sul wir rüeren sô diu lide
daz uns diu sarwât bestê.>
wolfhart sprach< jâ wolde ich ê
sicherlîchen nacket hinne gân,
ê daz sis wurden erlân.>
der marcgrâve hin zer stete reit.
dô nam der degen vil gemeit
sînen sparwaere ûf die hant:
dâ bî tete er in bekant
daz er fride wolde hân.
dô sprach der fürste witzlân
dem künic gunthêre zuo
< ich versihe mich daz uns aber nuo
maere bringe er rüedegêr,
sît daz der marcgrâve hêr
füeret den sparwaere.>
durch liebe der maere
gunthêr der vil edele
spranc von sînem sedele
und gienc dâ er den helt sach.
der künic lachende sprach
< sît willekumen, her rüedegêr.
waz welt ir, marcgrâve hêr,
mit disem urkunde?
wie gerne ich daz erfunde.>
< ich sage iu>, sprach der marcman,
< warumbe ich her geriten hân.
iu enbietent die wîgande
von ieslîchem lande
die iuch dâ suochent an den rîn,
ob ez mit fuoge möhte sîn
daz man in brüevte ritterschaft.
ir habet liute wol die kraft:
welt ir turnierens phlegen?
si wundert daz uns ûf den wegen
mit strîte in disen landen
noch nieman hât bestanden.
nu wolden die - von - hiunen lant
daz man in taete daz bekant
waz geturnieret waere.>
gunthêr der helt maere
ein teil smielen des began,
er sprach< ich wil ez wizzen lân
die recken, mîne geste.
swaz si dunke daz beste,
des volge ich bîllîchen.>
zuo den fürsten rîchen
si giengen ûf den palas,
dâ manic kurzwîle was.
dô liefens al engegene
rüedegêre dem degene,
der wart vil wol enphangen.
dô daz was ergangen,
der künec sagt in diu maere
wie er dar komen waere;
< nu hoeret, ir wîgande,
daz die - von - hiunen lande
uns bietent turnieren an.
waz dunket iuch des guot getân?
ir edelen fürsten rîche,
nu lât uns kurzlîche
darumbe hoeren iuwern muot.>
dô sprach sîfrit der helt guot
< ê ez in werde verseit,
ich wolde ê ros unde kleit
die hiunen füeren lâzen hin.
in dem willen unde ich bin,
den wil ich iu vil schiere sagen:
swaz si verliesen ode bejagen,
sô wil ich hundert mîner man
dâ zer vesperîe hân.>
dô sprach der künic rîche
< sô sende ich sicherlîche
ouch hundert dar der mînen.>
< sô wil ich lâzen schînen,>
sprach walthêr von spanjelant,
< daz uns turnieren ist bekant:
ich wil ouch lâzen hundert dar.
si werdent schiere wol gewar
wie wir turnierens kunnen phlegen.>
dô sprach witzlân der degen
< ich wil der mînen senden
der graben zuo den enden
hundert helde maere.
in sol niht wesen swaere
ob si niht sper enfüeren:
si sulnz mit flatschen rüeren
den helden ûf den renden.
jâ siht man von ir henden
durch zoume selten geslagen:
ûf haben unde nâch jagen,
des kunnen si daz minnist.
si habent anders keinen list,
wan dazs an guoten knehten
immer mugen ervehten,
dar an ist ir sin gewant.
der site ist in bêheimlant.>
gemêrt wart dô diu ritterschar.
gêrnôt sande ouch hundert dar,
als tete der künec von tenelant:
von dem wurden dar gesant
ouch hundert ritter waetlich.
stuotfuhs der hete sich
dar zuo vil schiere bedâht,
er sprach< der ich her hân brâht.
der sende ich hundert ritter dar.
ich wil ouch selbe an die schar
bî mînen helden rîten.
si spiln oder strîten,
des sol helfen dâ mîn hant.>
dô sprach von arragûne lant
der wirt< ich wil ouch dâ hân
gewâfent hundert mîner man.>
liudegast und liudegêr,
zwei hundert ritter vil hêr
lobten si dar ze senden.
< welt ir ez verenden,>
sprach rüedegêr der rîche,
< daz tuot vil baldeclîche.>
dô sprach von metzen ortwîn
< ich wil mit hundert helden mîn
bî den gesten wesen ûf dem plân.>
< jâ dunket mich daz guot getân,>
sprach von troneje hagene:
< sendet tûsent degene
zuo zin an diu hâmît,
obe ir des gewis sît
daz iuz verbürget rüedegêr,
daz si deheinen ritter mêr
gegen in enfüeren.
die lât ez hiute rüeren,
swaz halt morgen hie geschehe.
dem man gelückes danne jehe,
der danke sîner saelekeit.>
dô sprach der bote vil gemeit
< der fride sî iu von mir gegeben:
ir sult unangestlîchen leben.
ê daz dâ schaden iht ergê,
ich wolde iuch selbe warnen ê.>
dô nam der künic hêre
den fride von rüedegêre,
er gap ouch fride dem gaste
bestaetet alsô vaste
daz erz dem fürsten lobte duo.
der marcgrâve sprach im zuo
< nu sult ir mich hoeren lân
wie der turnei sol gestân
am fride und ame guote.
wes iu sî ze muote,
daz saget mir>, sprach her rüedegêr.
dô sprach sîfrit der künic hêr
< man mac in wol in fride hân
und daz ein ieglîcher man,
der alte und ouch der junge,
gebe ze ledigunge
tûsent marke ungewegen.
dâ mite ein ieslîcher degen
sich loese und ouch sîn wîcgewant.>
daz widerrede sâ zehant
der junge degen nantwîn
< zwiu sol dem man daz gwaete sîn
ern genieze es etewaz?
wan lât ez gelten allez daz
swaz man ze velde bringe;
wand mir mîn gedinge
ûf witegen helm vil hôhe stât
und ûf daz swert daz er hât:
koeme mir daz ze mînen phlegen,
mir kunde ez nieman widerwegen,>
sprach der herzoge hêr.
des erlachte rüedegêr.
dô sprach der etzelen man
< ir muget sîn vil wol muot hân,
ez mac ab müelîche geschehen.
ich enwolde im danne lüge jehen,
daz nime ich ûf die triuwe mîn,
und waere lamparten sîn,
er lieze ez ê die sarwât
und ouch daz swert daz er hât.
ich sag iu diu rehten maere:
der herten turnieraere
habe wir vil manegen funden.
ich gesach bî mînen stunden
neheinen alsô herten,
der sich sô freislîch werte:
des sult ir, junger wîgant,
niht gâhen mit der iuwern hant
nâch dem witegen zoume.
sam in einem troume
mugt ir si wol verliesen.
daz lâze ichs alle kiesen
die in in sturme habent gesehen,
daz ich der wârheit hân verjehen.>
her sîfrit sprach aber duo
< er kom ir etelîchen zuo,
da er sînen mimmingen
ze nutze mohte bringen.>
< wie lâzen wir ez nu gestân?>
sprach rüedegêr der marcman.
dô sprach sîfrit der starke
< dâ stên ie tûsent marke.>
dô sprach der nôtveste
< jâ, künic, sî wir geste
und haben niht nibelunges golt.
ahzic tûsent versolt
haet ich in einem halben tage,
und möhte ich haben iuwer habe.
ich râte iu baz>, sprach rüedegêr:
< etzelen, des küneges hêr,
treskamer ist mir ze verre:
mich lôste wol mîn herre
und ieslîchen sînen man.
wir suln den turnei lâzen stân
für allez daz der man hât,
beidiu ros und sarwât,
driu hundert marke und niht min.>
daz lobten si dô under in.
< wie schaffet irz>, sprach rüedegêr,
< daz lât mich hoeren, künic hêr,
sol ez âne kipper sîn?>
< jâ bî rehten triuwen mîn,>
sprach gunthêr der rîche,
< daz lobe ich endelîche.
swelhen ritter rüeret kippers hant,
er sî knabe oder sarjant,
den des turneis niht bestê,
daz ez im an die hant gê.>
der fride was alsô genomen.
dô muost mit rüedegêre komen
der edel ritter gêrnôt,
dem rüedgêr sînen fride bôt
dâ si sider diu hâmît
stacten kurz oder wît,
swie si dûhte guot getân.
dar reit mit drîzic sîner man
gêrnôt der tiurlîche degen.
dô der turnei was gewegen,
dô reit er gegen der stat dan.
dâ ze wormez tûsent man,
die gâhten in die ringe:
vil hô stuont ir gedinge
die der ritterschefte solden phlegen.
dô was ouch rüedegêr der degen
hin wider zuo den sînen komen.
schiere heten si vernomen
von im diu rehten maere,
und weiz verbürget waere
umb si und ouch die von der stat.
ê daz er si behalten bat
sîn gelübde und sînen eit,
ze harnasch harte wol bereit
wârn vier tûsent oder baz.
leit was rüedegêre daz.
er sprach< swer brichet mînen fride,
ob man mich hienge an ein wide,
holt wirde ich im nimmer mêr.
verbietetz>, sprach der recke hêr,
< iuwerm volke, er dietrich,
od ich enbinde schiere mich:
ich warne si ze guoter zît.
daz si deheiner slahte nît
an in erfüllen mügen wol,
daz understân ich alse ich sol.>
ein ieslîch fürste sîne man
muose vor im sehen stân
daz si rüedegêre,
dem boten vil hêre,
dâ niht brâchen sînen eit.
den sarjanden was vil leit
diu staete vestenunge:
swie halt in gelunge,
si haetenz doch versuochet dar.
ir tûsent ritter wol gar
wâren nu ze rossen komen.
ir wart vil vaste war genomen
durch ir liehte sarwât:
waen man geturnieret hât
sît bî rîne manegen tac,
daz ez nie sô hôhe wac.
vil maneger drunder wart erslagen.
dô sach man vor den helden wagen
zehen schoeniu baniere,
bî den kôs man schiere
gewâfent hundert küener man.
ir helme glesten verre dan
gegen wormez der wîten.
dar nâch in kurzen zîten
sach man die porten offen stân.
dô was frou brünhilt gegân
mit frouwen in die zinne,
selp sibende küniginne:
die vil minniclîchen frouwen,
daz spil si wolden schouwen,
und die meide schanden frîe
die vil werden vesperîe.
dô si gesezzen wâren nider,
vil lûte hôrten si dâ sider
manic horn erschellen,
holre blâsen vor den snellen,
unde maneger trumben dôz,
sumber slahen alsô grôz
daz erwagen mohte der palas,
ê daz hofgesinde was
ûz komen mit ortwîne
den gesten ze schîne.
man hôrte in brünhilde sal
her engegene den schal
von den unkunden.
man hôrte an den stunden
vil garzûne vor der schar:
mit grôiern si leiten dar
die fremden gên der veste,
degene aller beste.
der burgaere reit nu einer hie
sô gewâfent daz man nie
ritter baz gezieret vant:
der was von burgonde lant
und was geheizen ortwîn;
ez erbte in von den mâgen sîn
daz er ouch von - metzen hiez.
diu ougen gên im dô wenken liez
wolfhart, der dietrîches man.
der helt denken des began,
ez waer gunthêr oder gêrnôt,
durch daz er einen helm rôt
fuorte von liehtem golde var.
sînen gesellen zeigte er dar
daz si kêrten dâ er in sach.
in der zît, dô daz geschach,
dô muote ouch gên im ortwîn,
durch daz von zimier liehten schîn
fuorte der starke wolfhart.
dô sprach der junge degen zart
< daz mac wol sîn her dietrîch.
ir helde, helft, von dem wil ich
hie die êrsten tjoste nemen.>
dem jungen helde muose zemen
ein puneiz lanc unde wît.
wolfhart der geneigte sît
sîn sper ûf ortwînen.
si liezen bêde schînen
wol ir ellenthaften muot.
sît gestrûhte daz ros guot
under dem dietrîches man:
ortwîn ûz dem satele dan
stach in nider mit sîner kraft.
doch brast der wolfhartes schaft
ze stücken vor der sînen hant.
ûf spranc dô der wîgant,
schiere was er in dem satele sîn.
dô hete aber ortwîn
gewendet daz vil guote marc.
ir bêder ellen daz was starc.
dô schamte sich wolfhart der degen
daz er dar nider was gelegen,
er zucte ein swert daz was guot.
ortwînes ellenthafter muot
versuochte ez aber an den man:
in beiden diezen dô began
beidiu wâfen unde rant.
dô kam ûz amelunge lant
diu helfe wolfharten.
si jâhen, die des warten,
daz dâ wurde wol geriten:
dâ wurden schilde versniten,
dar under brâsten ringe
vil manegem getelinge.
ûz sîner schar kam gerant
stuotfuhs ûz püllelant:
ûf den geneigte râmunc.
dâ sach man alt unde junc
slahen unde stechen,
vil lûte schefte brechen
in den scharn über al.
ob dâ deheiner slahte schal
waere wan von scheften,
man möhte von den kreften
den palas hoeren diezen.
des muosten ouch geniezen
die vil minniclîchen frouwen,
die ez gerne wolden schouwen:
die mohten hoeren grôzen klanc.
râmunc wider ûf gespranc,
wan er nider ûf daz gras
von stuotfuhse gevellet was;
der wolde in hân gefüeret dan.
dô kam der vil grimme man,
von lütringen îrinc.
vil manic halsberges rinc
sach man dâ bresten von den slegen,
ê daz der tiurlîche degen
errette râmungen.
diu swert vil lûte erklungen,
dô er in füeren wolde dan:
mit schar beschutten si den man
daz er in der sider rîten lie.
man sach dort unde hie
dringen vil groezlîchen:
noch wolde nie entwîchen
ortwîn der vil küene man
wolfharte, der in gerne dan
gefüeret haete an sîner schar.
dô kam ein ingesinde dar
der stolzen harlunge,
hundert ritter junge
ze helfe wolfharten.
wer kunde dâ gewarten
den wâfen an ir henden?
gên den sach man dô wenden
hundert walthêres man.
dô begunde enstete stân
dâ daz ritterlîche spil
für diu hâmît an ir zil.
vil schiere komen wâren
die - von - bechelâren
gegen den - von - spanjelant,
den ze helfe man dô vant
die - von - arragûne lande.
dô was ouch der - vom - sande
ze velde hundert ritter komen:
der heten vil wol war genomen
hundert hadebrandes man,
die dietleip der helt dan
hete gesendet zuo dem spil.
dâ hôrt man klanges harte vil
von sahsen und des swâbe lant:
mit hurte durch die schar gerant
kam vil manic gelfer man
der sît schiet müelîchen dan.
von den - von - francrîche
sach man diu swert erblîchen:
ob dem herten stâle
der liehten goltmâle
vil lützel dâ geschônet wart.
ez wart nie turnei sô hart
sô des si dâ begunden,
wan sîn niht enkunden
die helde ûz hiunen rîchen,
und wolden doch niht wîchen.
dâ sach man nantwînes man
wenden wider unde dan,
dâ von beier lande
die guoten wîgande
heten êre gerne genomen.
dô was in zegegene komen
von meilân daz gesinde.
die fiuwerrôten winde
sach man von helmen ûf gân:
sich wolden rienoldes man
nieman zoumen lâzen.
mit hurte ân alle mâzen
kômen die rabenaere,
der berhtunc der maere
hete hundert dar gesant:
diu swert man in an der hant
sach glesten gên dem herten spil.
für wâr ich iu daz sagen wil,
swâ si halt heten sich genomen,
zuo einander wâren komen
zweinzic baniere.
ûf helme diu geziere
mit swerten gar zerfüeret wart,
dar under wurden ringe schart
von ir etelîches hant;
man sach dâ maneges schildes rant
dürkel unde zerhouwen.
für den palas dâ die frouwen
ûf durch sehen wâren komen,
dâ wart der helde war genomen
ze wormez vor der veste,
wer dâ taete daz beste.
der wirt saz selbe an den graben
( darumbe sô wart ez erhaben)
und ander helde ein michel kraft,
und sâhen dâ die ritterschaft.
dâ wart gedrungen unde gestriten,
nâch gewinne selten geriten.
dô sach der pülloysaere,
stuotfuhs der degen maere,
hie houwen unde dringen
und hôrt vil lûte erklingen
diu swert den helden an der hant:
nâch fiure blicken man dâ vant
vil ofte bluotvarwen schîn.
stuotfuhs und die gesellen sîn
die drungen die - von - berne:
daz sach wolfhart ungerne.
sîn wille was, er wolde in dan
zoumen von den sînen man,
den vil kreftigen degen.
dô werte sich mit solhen slegen
der tiurlîche wîgant
daz im der helm und der rant
von fiure gap den widerschîn.
wolfharte kunde daz ros sîn
von der sterke niht gestân,
die der vil übermüete man
in bêden sînen armen truoc.
alsô freislîche er sluoc
daz bêdiu ros unde man
muosten nider ûf den plân.
swie sô die - von - berne
geholfen haeten gerne
daz wolfhart wider waere komen,
dô hete in alsô für genomen
von palerne der starke degen
daz er ûz bitterlîchen slegen
sich kunde nie gerihten.
zir aller angesihte
zucte in hin ûf daz marc
stuotfuhs der degen starc.
swaz ieman sluoc oder dranc
ode swaz dâ wolfhart geranc,
iedoch muose er mit im dan.
dô sprach dâ manic küene man
< wâfen, welch ein vâlant!>
vil wol sach ez hildebrant,
der ouch dâ schouwende reit.
im wart nie turnei sô leit
daz er im dâ ze stunde
gehelfen niht enkunde:
er sagte ez dietrîche.
dô wunschten al gelîche
die tiuren degene maere
daz ez âne fride waere.
des mohte aber niht gesîn.
dô tete er sîner sterke schîn,
der voget ûz palerne;
daz sach der wirt vil gerne.
er brâhte im wolfharten dan.
dô wundert vil manegen man
daz ez alsô was geschehen.
ditze heten ouch gesehen
die - von - bechelâren.
wie vlîzic si des wâren
dô, die rüedegêres man,
daz si ahte zoumten dan
der - von - tenelande!
dô wart der - vome - sande
vil hende in zoume geslagen.
die dâ wânden prîs bejagen,
vil manegen dô misselanc.
wîle, du habest undanc,
daz ez ie geprüevet wart!
nu was der küene wolfhart
vol gefuort unz an den graben.
dâ wolden in die knehte haben
unbescheidenlîche entwâfenôt:
dô sluoc er dâ vil schiere tôt
zwêne mit der fiuste nider.
gunthêr der künic sprach dô sider
< wes mac ich anders verjehen,
wan daz in ist vil rehte geschehen?>
den helm lôste man dô sider,
der künic hiez in sitzen nider.
dô man im daz swert abe gebant,
die - von - burgonde lant
frâgten in der maere
wie er genennet waere.
dô lougent sîn der wîgant,
er sprach< ich bin von hiunen lant,
gotele ist mîn toufname.>
er wolde des haben schame
daz man in dâ gevangen sach.
gêrnôt der recke sprach
< ir sît uns anders bekant,
jâ sît ir wolfhart genant.>
lougen er des niht mohte,
wan ez im niht entohte.
dô sprach der küene wolfhart
< mir ist leit daz ich der hervart
ie gevolgte in ditze lant:
mich gevienc nie mannes hant
unze hiute an disen tac,
daz ich iemer mêr wol klagen mac
daz ich turnierens ie began.>
der künic und die sînen man,
die erlachten des dô er ez sprach.
wie dicke er wülvischen sach
dô man diu wâfen bî im truoc!
er gedâhte es ofte genuoc
wie er danne möhte komen.
ich sage iu, als ichz hân vernomen,
dâ wart gevangen manic man.
die hiunen gîsel zoumten dan
zehen wîgande,
daz wârn der vome sande.
die geste tâten si wol in.
rüedegêres helde zoumten hin
zwelif ritter unde drî,
swie selten turnieren bî
waere dâ ze rîne
rüedgêr und die sîne;
daz was von ir kunst geschehen
daz siz heten ê gesehen
z' arâbî in dem lande.
walthêres wîgande,
sibene fuorten sie sît
der rüedgêres durch diu hâmît.
die berhtunges zoumten dan
zweinzic nantwînes man.
den was ê ûf gewin ze gâch:
vil ofte ist ez unnâch
swaz man waenet haben in der hant.
die sahsn und die - von - dürenge lant,
die kunden wol daz selbe spil:
des wart der geste von in vil
gevangen unde gefüeret dan.
swes dâ ieman began,
daz was hildebrande leit.
zuo sînem herren er dô reit,
jâ sprach er williclîche
zem fürsten dietrîche
< ouwê, lieber herre mîn,
wie grôzer schade uns daz muoz sîn,
ob morgen hie der strît geschiht,
daz man bî uns niht ensiht
wolfharten den neven mîn!
in lât gunthêr und die sîn
mit willen nimmer von in komen
...>
< waz danne?> sprach her dietrîch.
< sô tuont si rehte alsam ich.
hiet ich gevangen einen man
des ich schaden möhte hân,
den lieze ich ungerne.>
sô sprach der - von - berne
< ir habet daz selbe wol gesehen,
ez ist vil manegem hie geschehen
und muoz ouch noch ê'z ende hât.>
hildebrant sprach< ez ist mîn rât,
swie wir loesen noch den man,
wir suln niht under wegen lân
wolfharten mîner swester kint.
aller die bî iu hie sint,
der deheiner iu niht baz gestât.
ez waere hildebrandes rât
daz man turnierte âne fride.
sô wurden etelîches lide
mit slegen hinte sô gebert.
swie alter mir turnieren wert,
doch muoz ich zuo zin dar in:
ich hilfe mînem neven hin
mit bürgen ode mit ritterschaft.
jâ frumet uns morgen sô sîn kraft,
uns êrt man iemer deste baz.>
dô riet er vlîziclîchen daz,
daz si den wîganden
den fride wider sanden.
vor wormez ûf dem sande
wart von helde hande
ûf die helme sô gebert
daz man in nu lîhte hete gewert
daz si daz spil heten lân.
in diu hâmît getân
wurden die helde dicke:
als manec küener recke
gezoumet in den fride wart,
sam der reit die widervart.
wol hundert ritter unde baz
( gunthêr der sach daz),
die zôch man wider unde dan.
her dietrîch biten dô began
den edelen rüedegêre
ob ez der degen hêre
mit ihte gefüegen kunde,
daz in der selben stunde
der fride wurde widerseit.
dô sprach der helt,< ich bin bereit
swes ir gebiet, her dietrîch.>
dietleip den degen lobelîch
frâgen si begunden
ob siz ahten kunden
daz ez sîn wille waere.
< jâ>, sprach der helt vil maere,
< swaz ich schaden gerâten kan,
ungerne scheide ich mich her dan.>
der marcgrâve dô danne reit.
si sâhen daz daz velt breit
mit den wunden was bestreut,
des was hagene gefreut.
an des wirtes veste
degen aller beste
reit dâ er den künic vant.
gunthêr der wîgant
nam des heldes wol war:
maere brâhte er in dar
diu manegen kômen zunstaten.
als in der künec ersach, der baten
daz er im sagte maere,
waz sîn gewerp dar waere.
rüedegêr lachen began
den küenen wolfharten an
dâ er bî den andern saz:
wol markte der helt daz.
wie schiere er winken began
des künic etzelen man,
daz er solde verdagen
ob er im iht wolde sagen:
wol versweic ez rüedegêr.
dô sprach der marcgrâve hêr
< her künic, mich habent her gesant
die iuwern geste in daz lant.
die dunkt ir ruowe ze vil:
si waern ouch gerne bî dem spil
ob ez mit fuoge möhte ergân.
wolt ir den fride abe lân
des iu gap sicherheit mîn hant,
darumbe bin ich her gesant
daz ez in liep waere.>
dô sprach der helt maere
< gerâtent daz die geste mîn,
ich lâze ez âne fride sîn.>
sîfriden frâgen man began
und ouch den hildegunden man,
walthêren von spanjelant.
dô sprach der recke sâ zehant
< wes frâget ir mich eine?>
dô sprâchens al gemeine
< wie lâzenz alsô hine gân,
nu si niht frides wellen hân.>
dem künege neic dô rüedegêr.
wolfhart vernam nie gerner mêr
deheiner hande maere:
ich geloube daz er waere
ungerne innerhalp der graben.
sî dô wart ein spil erhaben.
daz geschadete manegen man.
der bote gâhen began
und sagte ez gâhlîchen
dem fürsten dietrîchen
und den andern über al.
von gâhen wart grôzer schal
der küenen getelinge:
der slouf in die ringe
wil vier tûsent oder baz,
wan si wâren gehaz
ein teil den burgaeren.
dô îlten des die maeren
wie si in ze schaden möhten komen.
alêrste hete sich für genomen
her dietrîch mit den sînen:
er lie daz vaste schînen
daz im daz liep waere
ob wolfhart der maere
ledic wurde âne golt:
die helde wâren niht ze holt
stuotfuhse und sînen man.
vil lûte erdiezen dô began
der küenen burgaere schal,
für den brünhilde sal
sach man in kurzen zîten
wol fünf tûsent rîten.
ze velde was her dietrîch komen.
swer ie hiete vernomen
von deheinem swerten klanc,
der mohte im wol sagen danc
und sînen wîganden.
ja enblienden siz ir handen,
als ez ir ellen wol gezam.
si mohten wîchen âne scham
die im dâ habten engegene:
er unde sîne degene
kêrten umbe vier schar.
daz velt wart allez blôz gar
von den sarjanden:
sô die helde erkanden,
die rûmten daz gevilde.
si fuoren, sam si wilde
waeren, die - von - berne.
daz wolden in ungerne
die - von - francrîche vertragen:
dô wart gehurt unde geslagen
von vil maneges hende
daz des sales wende
erduzzen von dem schalle.
si wâren komen alle
die ritterschaft dâ wolden phlegen.
des wille und tât was gelegen,
dem gestrûhte dâ daz marc.
ir înrîten was sô starc
daz nieman schaden war nam.
dâ von ez niht missezam,
sach man dâ ieman wunden.
vil maneger wart dâ funden
in ritterlîchem prîse.
hildebrant der wîse
reit drîstunde durch die schar:
er tete staeticlîchen war
des - von - püllelanden,
ob ieman sînen anden
an im rechen kunde.
jâ hete er in der stunde
gemachet manegen verchwunt.
man tuot uns an dem maere kunt
und hoeret ez noch von im sagen,
daz stuotfuhs niht mohte tragen
nehein ros einer mîle breit,
ez entaetz mit grôzer arbeit.
nu was ouch kumen hagene,
er unde sîne degene.
dô hôrt man schefte krachen
nâch ritterlîchen sachen:
si wurben vaste umb êre.
dâ von wart deste mêre
der recken unde ir rosse wunt.
vil maneger gaebe dâ zestunt
tûsent marc, möht er si hân,
daz man in dannen hete lân.
nieman fürsten man dô sach,
wan, als ich iu ê verjach,
stuotfuhs und her dietrîch,
die küenen helde lobelîch,
und ouch von metzen ortwîn,
und hagene der neve sîn,
und ouch der alte hildebrant
der mit dietrîche în gerant
was vil zorniclîche,
und râmunc der rîche:
die selben striten sêre.
dâ kam ouch hin niht mêre
der fürsten von den landen.
mit sînen wîganden
sach man hie stuotfuhse haben:
si bedorften schranken noch graben
dâ si wîchen solden in.
wie dicke wolfhart wunschte hin
daz er bî in waere!
hildebrant der maere,
der hete nu durchdrungen
mit den amelungen
der vesperîe veste.
hie sâhen si die geste,
die recken ûz palerne:
hern dietrîche ûz berne
dô zeigte er den - von - püllelant.
er sprach< seht, wâ der vâlant
hie habet, der wolfhart nider sluoc
und in mit sîner kraft truoc
zuo ime ûf daz marc.>
dô wart ein dringen harte starc
von dietrîche und sînen man.
vil lützel wichen im von dan
die stolzen püllaere:
des wart der schade maere
daz si ûf einander dâ geriten.
dâ habte in hôchvertigen siten
der voget ûz palerne,
der beit ir dâ gerne.
dô hurte der fürste dietrîch
ûf den helt vil lobelîch,
alsô daz in vor handen
abe den schildes randen
drâte daz gespenge:
breite und die lenge
die steine sprungen ûf daz gras.
her dietrîch sô gemuot was,
er wolde sînen gîsel hân
erloeset hie mit disem man.
dô sluoc der herre dietrîch
vil manegen slac freislîch;
daz vergalt im wol der man:
die arme strecken er began
mit einem swerte vil breit,
daz vil freislîchen sneit.
sîn ellen was vil groezlîch.
daz ros, dar ûf her dietrîch
hete gehurt ûf den degen,
daz was nâch nider gelegen.
swie wol ez was gelobet ie,
jâ kam ez nider ûf beidiu knie;
ouch genicte der man.
dô der slac was ergân,
dô erholte sich daz marc.
mit einer krefte sô starc
sluoc er ûf hiltgrîmen.
der helm begunde erschînen
sam der helt aller brunne.
dô hete ouch sich diu sunne
geneiget an den âbunt.
er waere worden tôtwunt
von des pülloysaeres hant,
niuwan sîn lieht wîcgewant
daz ernerte den degen.
im muoste entwîchen ûz den slegen
her dieterîch von berne.
daz sâhen die sîne ungerne.
lûte rief dô wîcnant
< stüenden an mir alliu lant,
ich wilz versuochen an den degen,
ob mîn gelücke sînen slegen
hie lîhte widerstât.>
< des sult ir, neve, haben rât,>
sprach der alte hildebrant:
< er verhouwet iu daz wîcgewant
und wundet iuch sô sêre
daz er uns nimmer mêre
den schaden vol gebüezen kan.>
iedoch drungen ûf den man
wîchêr unde ouch wîcnant.
dô gedâhte im des< ich bin geschant>
der fürste von berne
und sach ez vil ungerne:
für si gedranc her dietrîch.
mit manegem slage freislîch
enphienc in der - von - püllelant.
vil krefticlîche an sîner hant
huop dietrîch daz alte sahs:
daz sneit die helme als ein wahs,
daz weich gebert waere.
ouch was der helt vil maere
erzürnt ûf den - von - püllelant:
zwischen helm unde rant
het in erlanget daz swert;
daz houbet spranc im hinwert,
daz ros in houbetlôsen truoc.
dô was liebe genuoc
geschehen hildebrande:
in dûhte wie sîn ande
gar gerochen waere.
die stolzen püllaere
ir herren sâhen tôt erslagen:
nu kan iu nieman gesagen
wie si ir schaden râchen.
si sluogen unde stâchen
ûf die - von - amelunge lant
daz den helden an der hant
begunden bresten diu swert.
si wâren übele gewert
von dietrîche und sînen man.
ir banier in dô abe gewan
der vil küene wîcnant:
dô muosten die - von - püllelant
vil schedelîche entwîchen
dem herren dietrîchen.
hildebrant der sprach duo
dem sune dietmâres zuo
< nu wol dir, edel dietrich,
maere helt, du hâst mich
errochen nâch den êren dîn.
fürste, nim daz swert mîn,
und wilt du witze walten,
die slegen solt du behalten
zuo dem strîte morgen fruo.>
des gevolgete er im duo.
dô hildebrant daz swert gewan,
dô hiez er mit der banier dan
kêren gên den schranken:
die swâbe und ouch die franken
die wichen beidenthalben hin.
wolfhart der sach ûz unt in
wenden die - von - berne:
er waer bî in vil gerne.
swie er doch âne helm saz,
dô gedâhte er ane daz,
< swie der künec tuo und die sîne,
gesehent mich die mîne,
die helde helfent mir hindan,
sît ich gesichert niht enhân.>
einen tobelîchen muot
gewan dô der helt guot.
von dem sedele er gespranc.
dô wart im der arm lanc:
der sîn dâ huote al den tac,
dem gap er einen fûstslac
daz er vor im nider schôz.
dô wart ir nâchîlen grôz,
die bî dem künege wâren.
mit übelem gebâren
brach der edel wîgant
ein swert einem ûz der hant:
dâ mite er an den stunden
sluoc vil manege wunden,
diu wol vermiten waere
ob der helt maere
den helm haete getragen.
er spranc, als wir hoeren sagen,
als ein wilder liebart.
dô sach der küene gêrbart
daz wolfhartes dan komen:
dô er den schal hete vernomen,
dô sach er loufen den man.
dô rief er dietrîchen an,
der îlte im dô engegenwert
...
vil hôhe ûf an der hant.
hagene ûz burgonde lant
vil nâhen an in was komen:
er wolde in gerne hân genomen.
daz irten die amelunge.
wolfhart der junge
über die schrancboume spranc
daz diu brünne an im erklanc.
dô kam sîn oeheim wolfwîn,
der brâhte dô dem neven sîn
ein ros und einen helm guot:
dô wolde alêrste sînen muot
erküelet haben wolfhart.
dâ waen iht zoumens site wart
nâch vesperîe rehte,
wan daz die guoten knehte
vil gemeinlîchen sît
vâhten alle einen strît.
diu sunne was sô nider komen
daz ir den schîn hete benomen
der wolken trüebe gên der naht.
dô man sô ernestlîchen vaht,
dô hiez diu küniginne
die frouwen ûz der zinne
hin wider in den sal gân:
do begunde man den frideban
ruofen, der dâ wolde
haben oder solde
deheiniu ritterlîchiu reht,
ez waere ritter oder kneht,
daz si rûmten den plân.
sus was der fride dâ getân:
daz kunde der helt maere,
des küneges ruofaere.
die geste riten über sant:
mit den - von - burgonde lant
kêrten die ander wider in.
von pülle diu künigin
vernam dô êrste maere
dar ir man erslagen waere.
si erschrei und sprach sâ zehant
< wê daz in burgonde lant
diu hôchzît ie wart betaget.
jâ wirt von mir niht verklaget
gar ze mînen lesten tagen,
daz mir hie lît erslagen
der trôst und ouch der herre mîn.
wie möhte ez geschehen sîn
daz ich sô ungefröuwet bin,
wan daz unser ungewin
uns rîten riet her an den rîn.
ich wânde daz der herre mîn
voget waere in allen landen
ob guoten wîganden:
nu ist des leider niht geschehen.>
von ir weinen muos man sehen
trûren vil manic schoene wîp.
iedoch getrôste si den lîp,
sô sît vil manegiu hât getân.
der wirt hiez suochen ûf dem plân
sîn liute und sîner geste:
sîn fride was sô veste
daz man den tôten an der hant
diu wâfen dannoch ligen vant:
in hete nieman niht genomen.
mit fünf hundert liehten komen
die burgaere wâren.
die tôten hiez man bâren,
die wunden fuort man sus von dan.
stuotfuhs, den küenen man,
den lie die frouwen nieman sehen.
diu vesperîe was geschehen
ze schaden und nieman ze frumen.
swer noch schefte solde verdrumen
sô vil mit ritters henden,
wer kunde ouch daz verenden?
der wirt rihte sich dar zuo
wie er an dem naehsten morgen fruo
erwerte lant und ouch die stete.
si tâten wol nâch sîner bete
die er ze gaste hete aldâ:
die bat er zeiner sprâche sâ
komen ûf den palas.
er sagt swes im ze muote was,
er wolde wern sîniu lant.
ir deheinen er dô vant,
sîn wolden im alle bî gestân.
< den schaden den wir genomen hân,>
sprach der künic rîche,
< den dulten güetlîche;
dar nâch geschaffe wir ez baz.
ich râte iu doch allen daz,
daz iuwer keiner durch sîn kraft
sunder suoche ritterschaft:
si habent von manegem lande
die besten wîgande,
die ie gevolgeten einem her.>
< si vindent antwurte unde wer,>
sprach herbort ûz tenelant,
< geseht ir roup oder brant
immer bî dem rîne.
ich wil daz houbet mîne
darumbe lâzen wette sîn,
si habent ninder under in
bezzer degene denn wir hân.
nu merket, sô wir hie bestân,
tuont si uns zen porten in.
dâ bî sô hoeret mînen sin:
sô fürhte ich ir keines kraft,
ich enwelle in geben ritterschaft.>
dô sprach boppe ûz tenelant
< swelhes ir eines hant
mir verrücke mînen huot,
den habet für einen helt guot.>
dô sprach von troneje hagene
< got gebe daz ir degene
morgen umbe dise zît
ze hove nâch mînem willen sît;
sô habe wir frumen und êre.
uns gebristet helfe sêre
an dem - ûz - püllerîche:
der waere uns sicherlîche
morgen sô gestanden,
daz unser aller ande
deste baz gerochen waere.>
dô sprach sîfrit der maere
< der uns den schaden hât getân,
und sol ich mînen lîp hân,
ich sol im itewîzen daz
daz ich vor etzelen saz
und redete in mîner kintheit;
dô im daz wart geseit,
zehant dô suochte er mich.
jâ hiete der helt sich
ze strîte alsô wol bewart,
ich enkunde nie machen schart
sînen helm noch die ringe.
nu freut mich der gedinge:
ich bin gewahsen zeinem man,
ich versuoche ob ich genidern kan
den sînen hôchvertigen muot,
darumbe daz der helt guot
mich fuorte in hiunen rîche
vil gewalticlîche
und wolt mit mir gedinget hân
darumbe daz er hete getân
dem küenege ûz hiunen landen.
ich wil mînen anden
morgen rechen ob ich kan,>
alsô sprach der krîmhilde man.
si redeten daz si dûhte guot.
bî in nâhen sînen muot
truoc der helt von berne.
der wirt weste gerne
ein ende solher ritterschaft:
der vînde hete er grôze kraft.
ez was nu an die zîte komen
daz von manegen wart vernomen
wie si strîtes wolden phlegen.
dô sprach hildebrant der degen
< ir wizzet wol wie ir iuch schart.
daz sî vil wol von iu bewart
daz ir anders niht getuot.
ir aller sin und ouch ir muot
stêt uns vil vaste engegene:
ez lebet niht küener degene
daz wir bî in vinden dâ.>
wolfhart sprach dô sâ
< ir einer mir ze küene was,
vor dem ich mit nôt genas:
er hete ouch lîhte mich erslagen.
jâ begunde er mich tragen
als ein ar tuot ein huon.
ich sol in strîte alsô tuon,
ich wolde ê under d'erde
ê ich mêr gevangen werde.
got lôn dir, edel dietrich,
daz nieman vordert umbe mich
swaz man sol ze ledigunge hân.
du hâst ze mir alsô getân
daz ich ez immer dienen wil
unz an mînes endes zil.>
ir maere hôrte man si sagen
( die tôten hôrt man lützel klagen):
des wart von in vil vernomen.
si wâren zuo einander komen
in ein gezelt daz was wît,
dar inne sprâchen si sît.
dâ hôrte man si reden vil
von des turnierens spil,
ir waere genuoc versêrôt
unde ouch etelîche tôt.
durch daz si heten herban,
die knehte sanden si dô dan
daz si die helde guote
suochten ûz dem bluote.
ich waen, si nieman funden
wan manegen sô wunden
daz si mohten rîten noch gân.
ir knaben truogen ir swert dan
unde ouch al ir wîcgewant,
daz man bî in ligende vant,
und liezen dâ die wâren tôt.
her dietrîch bat unde gebôt
den sînen ze herbergen gân,
< ez sol ein ieslîcher man
dem lîbe schaffen hînte gemach.>
alsô daz der helt gesprach,
heime der maere
der hiez die rabenaere
zuo den herbergen varn,
< sô wir uns morgen wellen scharn,
wer sol uns künden die zît?>
alle rieten si daz sît
an rüedegêren eine.
daz widerredete keine
daz er hiete vernomen,
daz si ze velde solden komen
swenn in der recke kunde daz.
mit urloube si âne haz
schieden von einander duo:
etelîch unz an den morgen fruo
slief niht einer hande breit.
von einem garzûn wart geseit
sît swaz ir ieslîcher sprach.
dô kam er da'r sitzende sach
der besten zwelf dort inne
die von allem ir sinne
rieten wern des küneges lant.
walthêr der wîgant
sprach< lât iur sorge under wegen.
hie sol ein ieslîcher degen
wane mir volgen mite.
ich wil daz man si lîhte erbite
daz si den vînden sîn ze wer.
und gesiget hie der hiunen her,
ich weiz die helde alsô gemuot,
wir haetenz alle gelîche guot.
dâ von sol ein ieslîch man
hie strîten als er beste kan.>
walthêr redete mêre sider
< ê si mich zen hiunen wider
fuorten âne mînen danc,
ich lieze se zehen lande lanc
noch herverten fürbaz;
wan etzel wolde sînen haz
allen rechen ane mir.
edel künec, ich râte dir
daz wir mit gelîchen scharn
âne sorgen zuo in varn.>
dô sprach der künec< daz sol geschehen.
si suln dâ heime selten jehen
daz si uns werlôs funden hie.
swer nâch lobe geworben ie
habe, der lâz daz werden schîn,
so belîbent mir diu erbe mîn.>
ir rât si truogen alle enein:
ir wille sît sô wol erschein
daz man inz prîste manegen tac.
ir ieglîcher sich bewac
ûf êre gên der ritterschaft.
< und hetens al der werlde kraft,>
sprach sîfrit ûz niderlant,
< wir sullen sehen waz ir hant
hie ze wormze mac bejagen.
solde wir dâ von verzagen
daz si ie wider einen man
wol drîzic oder mêre hân,
daz waere ein lasterlîcher muot.
eines frumen heldes hant getuot
daz erfürhten muoz ein wîtez her.
her wirt, ir sît sô wol ze wer,
ir muget ân angest slâfen gân.
ich wil iuch morgen sehen lân,
ê sich verende vol der tac,
daz ich iu niht baz gedienen mac.>
mit urloube schieden si sich duo.
si rieten alle wol dar zuo
daz si über halben wec gên in
riten von der stete hin
denn daz si nâher solden komen.
dô diu rede was vernomen,
si giengen dan an ir gemach.
ir etelîches slâf geschach
niht âne troumen gên dem tage.
nu hoeret rehte waz ich sage:
dô nu der liehte morgen schein
in des sales eckestein,
dô hôrt man manegen sumber dôz,
pusûnen hellen daz wart grôz,
dô si sich ûz machten.
ir etelîche erwachten
unsanfter danne in was gedâht:
zuo einander wurden brâht
wol zweinzic vanen rîche.
vil harte vlîziclîche
daz her sich mahte für die stat.
von pülle daz gesinde bat,
man gaebe in einen houbetman:
si wolden, möhte daz ergân,
des tages rechen gerne
ir voget von palerne.
der künec bat gêren si bewarn,
den herzogen, daz er mit in varn
solde gên des strîtes nôt.
er tete daz im der künec gebôt,
und was ein sô küener degen
daz er ir kunde wol gephlegen:
ir guot gedinge wart niht vlorn.
si wurden ûz den bürgetorn
alsô vlîziclîche geschart,
si liezen ouch niht unbewart
die si in ir huote solden hân.
die porten hiez offen lân
der wirt durch sînen hôhen muot.
vil manegen liehten helm guot
man dâ ûf gebunden sach.
vil maneger frouwen ungemach
sich uobte diu noch slâfes phlac.
ez was nu komen an den tac:
si wâgten êre und ouch den lîp,
dâ von meide und ouch diu wîp
muosten ungemüetes phlegen;
ez kam in sorgen manic degen.
der wirt die sîne gerne bat,
dô si sich huoben von der stat,
daz si braechen niht die schar
und daz si mit einander dar
füeren dâ si wolden phlegen
strîtes, der in gewegen
ouch ze rehte niht enwas:
und maneger doch vil wol genas
des herze noch vil angest truoc.
ir vînde sâhen si genuoc
sich vaste rihten gegen in.
vil sanfte sach man staphen hin
den künic unde sîne man
dâ si den strît solden hân. âventiure wie die recken mit strîte alle zesamene kâmen.
nu hoert von den - von - hiunen lant.
vil balde rüedgêr ûf gebant
den etzelen hervanen:
die hiunen begunde er manen
daz si mit strîte taeten
als si gelobet haeten
etzelen dem vil rîchen.
er sprach vil friuntlîchen
< mîn herre si iu bevolhen hât
der dinc in grôzen sorgen stât:
bî den sult ir ez hie bejagen
des si iu immer danc sagen
und dem künege ûz hiunen lande.>
dô schuof er dâ zehande
für die etzelen man
fünf hundert guoter helde sân
der sînen ingesinden.
er sprach< man muoz iuch vinden
bî mînes herren vanen hie.
ob ich hân gestrîten ie,
daz wizzet>, sprach her rüedegêr,
< etzele der künic hêr
dankt es iu immer deste baz.
ir wizzet vil wol selbe daz,
daz ich zallen sînen strîten
muoz ze vorderst rîten.
ze naehste mînes herren man
gibeche unde schrûtân
leiten bloedelînes vanen.
ich sol ouch billîche manen
irnfride den wîgant
und hâwart von tenelant
und îringen den küenen degen
daz si mit vlîze hiute phlegen
mîner frouwen ingesinde.
vil maneger muoter kinde
ist zuo dem tôde alhie gedâht.
die zwêne fürsten habent brâht
driu tûsent wîgande
dâ her von vlâchen lande,
hornboge unde râmunc:
sigehêr, der helt junc,
der wirt uns vor den nütze.
die valwen ir geschütze
sullen hiute teilen hie,
daz die rînfranken nie
in groezer angest sîn bekomen:
der habe wir her mit uns genomen
wol driu tûsent oder baz.
den franken ist unkünde daz
daz wir in wol gesigen an,
gunthêren und den sînen man.
her wolfrât und her astolt,
nu dienet daz iu immer holt
der künec und ouch mîn frouwe sî,
unde gestêt ir alsô bî
daz si iu's immer sage danc;
und lebet ir tûsent jâre lanc,
si werdent iu nimmer gehaz.>
die zwêne recken lobten daz.
dô sprach biterolf der degen
< ob sich nieman tar bewegen
ûf den krîmhilde man?
ez ist lîhte alsô getân,
als vil ofte ist her geschehen,
daz man etelîchen hât gesehen
eintweder tôt od starke wunt
und daz der ander von der stunt
des selben vînde für gestât,
und lîhte dar nâch sô ergât
daz sîn gestrîte wurde erslagen:
sô solde man dem danc sagen
der jenen bestüende sâ zehant,>
sprach biterolf der wîgant.
< sam taete ich gerne, und möhte ez sîn,
haete ich einen der sich mîn
mit huote underwunde.
an der êrsten stunde
und ich saehe den - von - niderlant,
sô versuochte an im mîn hant
wie starc des recken ellen sî.>
heime stuont dâ nâhen bî,
der sprach biterolfe zuo
< swaz halt ander ieman tuo,
ich bin der iuch niht übersiht
ob strît von iu und im geschiht.>
witege ruofen dô began
< wie rîtent mînes herren man
zuo sînem van sô seine?
nu ensûme sich der keine
der dienen welle sînen gruoz:
ich bin der von im dulden muoz
zürnen ob des iht geschiht
des man uns niht für êre giht.>
sabene und ouch liutwar,
die zwêne helde schône gar,
habten vor des küneges van:
berhtunc der hiez si dan
nâch dem zeichen rîten.
niht langer wolden bîten
die stolzen bernaere.
wolfhart der maere
ein horn blâsen dô began.
her dietrîch unde sîne man,
gedrücket unde gedrungen
der - von - den - amelungen
hetens eine veste schar:
in einem vanen blâvar
sach man einen lewen wagen,
ûz golde von sîden wol getragen;
dem volgeten die wîgande
von der amelunge lande,
dô heten die - von - meilân
ze rosse brâht vil manegen man
under einen vanen der was breit.
wahsmuot der helt gemeit
reit vor den harlungen dan:
klêgrüene was ir van,
von einem samît rîche.
si hôrten krefticlîche
die vînde komen gegen in.
frîtele sprach< nu sol dâ hin
unser aller sorge sîn.
ob dietleip, der neve mîn,
roemisch künic waere,
sô möhte der helt maere
niht füeren schoener ritterschaft.>
dô hôrte man von schalle kraft
bêdenthalben vor dem her:
ez kam nie künic baz ze wer
dan gunthêr der wîgant.
swaz man von schalle gebrâhtes vant,
des hiez witege gar gedagen.
nu sach er einen vanen tragen
mit einer burczinne,
diu lac gesniten drinne:
den fuort hagene und sîne man.
dargegen er rihten sich began.
der vil muotgrimme degen
weste wol daz im gewegen
der helt von troneje waere.
dô sach der helt vil maere,
der tugentrîche dietrîch,
einen vanen hêrlîch:
ein krône gesniten was dar in,
als ez meisterlîcher sin
vil wol geprüeven kunde.
der helt sprach sâ zestunde
< dort halt daz sigelinde kint,
dem alle sîne sache sint
wan ûf hôchvart gewant.>
dô sprach meister hildebrant
< swie vil er übermüete hât,
der mac hie wol werden rât.>
dô sach bitrolf der wîgant
ob den - von - burgonde lant
sweben einen vanen breit:
er was gefüege der in sneit.
ez was ein phelle tusenvar;
swer des wolde nemen war,
von wîzem silber drin geslagen
sach man einen eber wagen
sam er lebendic waere.
rüedegêr der maere
der zeigte dietleibe dar,
er sprach< daz ist des küneges schar.>
der helt sprach< des bin ich frô.
sît er niemannes drô
durch sîne sterke fürhten wil,
wir bringenz ûz dem kindes spil
gunthêre und den sînen man
mit den friunden die ich hân.>
dô sprach der degen rüedegêr
< nu goumt ir, junge künege hêr,
jenes vanen den man dort hât:
daz ist ein phelle driblât.
ein hirz lît dar inne
geworht mit guotem sinne,
sîn gehürne daz ist guldîn:
des gestrîte sult ir sîn.
daz bringet uns von tenelant
herbort der wîgant.>
dô sprach der küene wahsmuot
< uns tumben helden ist daz guot
daz uns bewîset rüedegêr,
der edel marcgrâve hêr.>
der etzeln venre dô began
ruofen den - von - meilân
< bekennet, ir wîgande,
her von püllelande
daz zeichen dort die helde tragen
den ir herre ist erslagen:
ein rat von golde drinne stât.
swen in der künec geschaffet hât,
si sint niht âne houbetman.>
dô sprach rienolt von meilân
< ich hân dort einen schilt gesehen,
der gibet von vier stücken brehen:
den tregt von burgonde lant
gêre der wîgant,
der mac leiten wol ir schar.
swie ez anders uns gevar,
jâ wirt ir hie vergezzen niht.>
< ich weiz, vil wol uns geschiht,>
sprach eckehart der guote degen,
< den wir in strîte sîn gewegen,
wir werden sô von in geslagen
daz man des maere hoeret sagen.>
des erlachte imbrecke.
regentage der recke
der nam daz zeichen an die hant.
rüedegêr der wîgant
der sprach< ir sult noch rîten niht,
unz iegelîcher sich besiht
wâ er süle wenden hin.>
sîn rât und ouch sîn wîser sin
behielt aldâ vil maneges leben.
nu sach er einen vanen sweben,
ein lützel ruorte den der wint.
< hie kumet daz alpkêres kint,>
sprach der marcgrâve rîche,
< mit spangen snêgelîche,
im volget her von spanjelant.
die êrsten tjost sol mîn hant
tuon vor der hiunen her:
dar nâch sich ze wer
die hiunen. swie man hie getuo,
sô muoz ich walthêre zuo,
sît mich des wolde niht erlân
des fürsten dietrîches man.>
dô sprach der recke dietleip
< mir ist doch lange her geseit,
und hôrte in selbe des verjehen,
dô ich in naehste hân gesehen
dô ich reit zuo der hiunen lant,
daz walthêr der wîgant
waere mîner basen kint.>
der maere verjach im sint
biterolf der vater sîn
< sîn muoter was diu swester mîn.
wie sich daz verkêret hât
daz er nu gunthêre gestât!
er füert ein kreftige schar.
wir solden einen boten dar
senden der im kunde gesagen
daz wir im holden willen tragen,
swie halt uns der helt getuo.>
rüedegêr der gap duo
eines lôrboumes zwî
einem garzûn, der stuont dâ bî
und hôrte gar diu maere
waz hin enboten waere:
der lief dô balde vor in dar.
walthêr hielt vor sîner schar
sam er nu strîtes wolde phlegen
der hiunen, unde sach der degen
den boten tragen an der hant.
daz er im waere dar gesant,
des verdâhte er sich duo:
er sprach dem boten balde zuo
< saget an, waz maere bringet ir?>
er sprach< herre, zeiget mir
hie den künec von spanjelant.
dem habent die zwêne mich gesant,
bitrolf und dietleip der degen,
durch wen er welle sich bewegen
sô guoter friunde sô si sint.>
dô sprach daz alpkêres kint
< ich bin walthêr genant.>
< sô sî iu daz bekant
daz si bêde klagent daz,
daz ir in alsô sît gehaz
daz ir durch ieman si bestât
und die verchsippe lât
zwischen iu und sînem kinde.
die helde und ir gesinde,
die waeren iu vil gerne bî:
daz ir si liezet schaden frî,
daz wolden si ze liebe hân.>
dô sprach der tugenthafte man
< sô braeche ich mîn sicherheit.
wurde ez nimmer in geseit,
mînem oeheim und dem sune sîn,
sô leiste ich in die triuwe mîn
die wîle ichz leben mac gehân.
wie wolde er sînen wirt verlân
der im schankte sînen wîn?
ich hete die nahtselde sîn
vil undegenlîche genomen,
wold ich im niht ze helfe komen.>
zuo dem boten er dô sprach
< ich leiste des ich im verjach,
dô ich nu jungest von im reit.
im sol daz niht wesen leit
swa er hoere von iemannes sage
daz ich lop unde krône trage.
geselle, got gesegene dich,
und bite daz niht zürnen mich
mîn neve und ouch der vater sîn.
dar under si suln hüeten mîn
swâ wir uns samenen in den scharn:
daz in mîn kraft iht widerstê;
ja bestüende ich einen kriechen ê.>
der bote brâht diu maere dan,
als er im hete kunt getân.
dô dûhte dise helde guot
walthêres sin und ouch sîn muot.
der hiunen venre zuo in sprach
dô er si widerrîten sach
< ir helde, habt noch langer hie.
an den ich guoten willen nie
erwerben kunde in mînen tagen,
ob den sih ich ein zeichen wagen:
daz ist ûz bêheim witzlân
und ouch sîn bruoder poytân.
daz wizzet, helde maere,
vil guote sturmaere
sint die helde ûz bêheimlant.
dem si niht sint bekant,
der warte an jeniu linden rîs,
dar under si versuochent prîs.
daz ir zeichen waet der wint:
daz si übele nâchgebûren sint,
daz hân ich ofte wol gesehen.>
< wâfen, waz sol hie geschehen?>
sprach der küene wolfhart.
< ez mac niht heizen hervart
dâ nieman diu gelîche tuot
daz im der sin und der muot
inder gegen strîte stê.
mir tuot daz haben alsô wê
sam ob ich vaehte disen tac.>
sîn oeheim hin ze im zornes phlac.
dô sprach der alte hildebrant
< lebte der helt von püllelant,
ir sliefet sanfter noch drî tage
dann ir gâhtet gegen sînem slage.
swie gâch iu sî zer vînde schar,
nu hüetet des daz wir gewar
iht werden iuwers wîchens dan.>
dô sprach der grimmige man
< nu enwelle got daz daz geschehe
dazz mannes ouge immer sehe.>
rüedegêr der degen guot
sprach< ich waene, keinen muot
die helde haben dazs uns bestân.
darumbe sul wirz niht lân,
wir rîten zuo in nâher baz.>
als in der helt geriet daz,
dô kômens alle ûf diu marc.
sindolt der helt vil starc
der burgonde zeichen truoc:
dô ruofte er lûte genuoc
< wol ûf, ir wîgande,
an maneger helde hande
sihe ich schefte mit den spern.
die ich ze strîte ie hôrte gern,
daz mugen si wol vinden hie.>
sîfrit dô daz niht enlie,
er zucte den schilt für sîne hant.
von iegelîcher fürsten lant
die recken tâten alle sam.
ein bote des wol war genam
und sagte brünhilde daz:
in diu venster aber gesaz
diu wirtinne unde manic wîp,
wan der küniginne lîp
von pülle: der was alsô geschehen
daz si niht strîtes wolde sehen.
swelhiu dâ friunde mohte hân.
die haete ungerne daz verlân
sin haete in gewünschet dô
daz si wider koemen frô.
nu riten, als ich iu hân geseit.
die küenen recken vil gemeit
zuo einander mit ir schar.
rüedegêr wart wol gewar
wâ gunthêr der künic reit
under einem schilde breit
verre vor sîner schar:
dô zeigte er dietleibe dar.
dô sprach der marcgrâve wîs
< hie sol prîs wider prîs
versuochen der guoten helde hant.>
dô hete ouch sînes schildes rant
für sich gedrücket gêrnôt.
ein adelar von golde rôt
dietleibe dem jungen
für die brust betwungen.
zehant dô hiu er daz marc.
biterolf der helt starc
erkande wol den sînen:
gunthêr liez dô schînen,
und ouch sîn bruoder gêrnôt,
dô man si tjoste ane bôt,
daz siz wol holn kunden.
die viere wurden funden
in beweger ritterschaft,
daz man von der helde kraft
die stiche hôrte erhellen.
sich gesamente nâch den snellen
ir volc mit einer grôzen kraft.
dô ir ietweders schaft
ze stücken wart über sie,
dô bertens ir gesmîde hie
mit alsô ritterlîchen slegen
als die wol strîtes kunden phlegen.
her dietrîch hete wol gesehen,
waz von den helden was geschehen:
dô nam er sîfrides war.
der helt was ûz sîner schar
von den andern geriten:
dô kam in hôchvertigen siten
gên im daz sigelinde kint.
alsam ez waete der wint,
sô balde truogen si diu marc.
ir tjoste wurden alsô starc
daz ez als ein doner hal.
dar nâch sach man in vil gezal
diu swert erwagen an der hant.
dô kam von amelunge lant
daz dietrîches gesinde,
dem sune sigelinde
kâmen ouch die sîne man.
swaz man strîtes ie began,
daz was wider disen ein wint.
dô sach daz alpkêres kint
der marcgrâve rüedegêr:
die etzeln helde liez er
unde reit walthêren an.
dô hete ouch sîn der junge man
vor den hiunen war genomen:
si muosten zuo einander komen
als ez den helden wol gezam.
daz dâ den tôt niht ennam
der marcgrâve hêre,
des wundert mich vil sêre.
ouch kom im ze heile daz,
daz ûf dem rosse gesaz
der marcgrâve rîche.
ze helfe im snelliclîche
kômen dô die sîne man:
haet er den niderwanc getân,
sô kunde er nimmer sîn genesen.
wie mohte ez grimmer gewesen,
dô ez diu rüedegêres hant
versuochte an den - von - spanjelant.
witege unde ouch hagene,
die übermüeten degene,
die wâren zuo einander komen.
wart ie tjoste war genomen,
sô mohte man die gerne sehen
diu von in beiden was geschehen.
heime unde rûmolt
einander niht wâren holt:
von ir beider krefte
wurden der helde schefte
gebrochen dâ ze stücken gar.
dô wart rienolt gewar
der helde ûz püllelanden:
die fürsten an ir handen
bêde geneigten dô ir sper.
dô kam gevarn gên in her
von burgonden gêre.
ob stuotfuhs der hêre
noch gesunde waere,
sô möhten die helde maere
nimmer baz zesamene komen.
gêre die tjoste hete genomen
von rienolde dem rîchen:
ûf randolt hêrlîchen
het einer ûz püllelant
den schaft geneiget an der hant,
in beiden strûhten diu marc.
dô wart ein strît vil starc
den nieman kunde gescheiden.
dô kômen zuo den beiden,
liudegaste und liudegêre,
die jungen künege hêre
von den harlungen.
die buckel lûte erklungen
dô si geneigten diu sper.
nâch ir ieglîches ger
verstâchen si ir schefte.
eckehart mit sîner krefte
einen sô dâ nider stach
daz er nimmer wort ensprach.
hâche unde herdegen,
mit stiche und mit swertes slegen
bestuonden si die sahsen:
von swerten wol gewahsen
hôrt man slege erhellen,
ouch werten sich die snellen.
dar was ouch nu bloedel komen:
jâ hete man vil wol vernomen
daz er ein recke waere.
witzlân der maere
der hielt im hie begegene.
si bêde unde ir degene
zuo einander wâren komen;
dâ wart schaden vil genomen
von flatschen die vil sêre sniten.
die vlâchen kâmen in geriten
mit manegem hurnînen bogen,
die wâren hôhe ûf gezogen
ze schuzze: manege phîle
die sach man an der wîle
sô dicke von der senewen gân
sam ofte der snê hât getân,
dâ den trîbet der wint.
des muost vil maneger muoter kint
mit schaden rûmen diu marc,
des wart der schade harte starc.
als si des heten dâ gedâht,
wahsmuot hete in brâht
die stolzen harlunge.
dô sach der degen junge
herbort von tenelant
und boppen den wîgant,
dar gâhte er unde eckehart:
< ich sihe ir einen der mir wart
gewegen hie ze teile.
nu ist an dînem heile
daz boppe rîtet neben im:
swenne ich mit der tjoste nim
den voget ûzer tenelant,
sô habe dir disen wîgant:
dar gâhe degenlîche ûf in.
dar under habe dînen sin:
ez sint zwêne die küenesten man
der ich noch künde ie gewan.>
als daz wahsmuot gesprach,
über schildes rant er gesach
als er ein lewe waere.
er und eckehart der maere
sprancten mit ir beider man
die - von - tenelanden an,
die heten ouch geneiget.
ir wille wart erzeiget
an den guoten helden sider:
boppe stach eckeharten nider.
von den schulden daz geschach
daz ruschen daz fürbüege brach:
alsô was sîn ros genant.
herbort der wîgant
stach ûf wahsmuoten,
einen helt vil guoten,
daz mit dem hindern satelbogen,
als er waere dar geflogen,
der helt zer erden gespranc.
vil manic swert ob im erklanc:
man wolt si hân gevangen.
daz möhte sîn ergangen:
dar kam der alte regentac,
der manegen hêrlîchen slac
bî sîner bruoder kinden sluoc.
des was den helden nôt genuoc.
dô hâche eckeharten sach
daz im sîner helfe nôt geschach,
dô kam er sînem kinde
mit stolzem ingesinde,
mit tûsent harlunge man.
diu ros man widere gewan
eckeharten und wahsmuoten:
vil manegen helm guoten
sach man von slegen bresten,
dâ si mit scharn vesten
ûf einander wâren komen.
des wart lützel frume genomen;
wol mohte schade dâ geschehen.
nu hete ouch berhtunc gesehen
den küenen ortwînen.
er und al die sînen
drungen vaste zuo in dar:
die helme wurden fiuwervar
dô si zesamene wâren komen,
als man wol dicke hât vernomen
daz si küene wâren beide.
nu sach ouch im niht leide
sigestap an nantwînen:
den widerwinnen sînen
sach er vor im in der schar.
vil schiere kom der helt dar:
zuo einander was in ger.
verstochen heten si diu sper
in alsô kurzer stunde
daz man niht kiesen kunde
wie si in kômen von der hant.
sigestap der wîgant
ûf nantwînen sluoc,
der im vil wênic vertruoc,
der bruoder volcwînes,
der nieman niht des sînes
vergebene wolde lâzen.
mit kreften âne mâzen
hôrte man erklingen
ir swert ûf den ringen,
des was dô dehein rât.
astolt unde wolfrât,
die widerriten dô zehant
den helden ûz beier lant,
elsen und gelfrâten;
mit willen si daz tâten,
wan sî wurden zin gewegen.
dâ vaht astolt der degen
sam er erstrîten wolde ein lant:
daz werte gelfrâtes hant
sô er beste kunde.
wolfrât ouch zuo der stunde
ûf elsen den helt reit.
dô hôrte man diu swert gereit
durch die schar erdiezen:
engelten unde geniezen
mohte man ir beider kraft.
dô kam mit stolzer ritterschaft
îrinc unde hâwart
die frou helche in die hervart
bat mit den gesten rîten.
dô sâhens gên in bîten
den helt von lütringen,
( dô huop sich michel dringen,)
dem half von swâben berhtolt.
der küniginne helchen golt
dienten die wîgande
von hiunischem lande.
dâ wart schaden niht bewart.
die dâ ê wâren wol geschart,
der veste wart durchbrochen.
vil manic rinc entlochen
wart mit stichen unde slegen:
manegen strîtvarwen degen
sach man allenthalben dâ.
die schützen heten nider sâ
sich von den rossen getân,
von bogen und armbrusten gân
sach man in der wîle
vil der scharfen phîle.
dô rief von berne wîcnant
< wie nu, veter hildebrant,
ich sihe sindolden hie.
tâtet ir degenes werc ie,
daz lâzet ouch nu schînen.
her sîfrit hât den sînen
an unserm vogete funden.
hânt si niht tiefer wunden,
vil michel wunder mich des hât:
ir ietweders swert gât
nider sam der schûrstein.
helpferîch mîn oeheim
hât den vanen an der hant.>
< waz mac ich des>, sprach hildebrant,
< wie mîn herre dietrich
mit sîfride begêt nu sich?
ez ergê ze schaden ode ze frumen,
ich muoz ze sindolde kumen
den ich mir dô selbe nam.
ich gemache mir in zam
od er sleht mir die wunden,
daz daz wol wirt erfunden
daz ich verrer niht enkan.>
do ernande der dietrîches man,
ûzer berne hildebrant,
ûf sindolt den wîgant
dâ er dô habte in der schar.
der luft der wart dô nebelvar
dô si ûf einander drungen,
diu swert vil lûte erklungen
der zweier fürsten holden.
hildebrant sluoc sindolden
daz er strûchen began;
dô half wider ûf dem man
sîn neve, der junge hûnolt.
sich hete der truhsaeze erholt:
dô lief er hildebranden an,
des fürsten dietrîches man,
daz alte unde junge,
die küenen amelunge,
des gewis wolden wesen
er kunde nimmer genesen.
dô sprach der küene wîcnant
< seht ir, bruoder wolfbrant,
wie mîn veter hildebrant
vor der sindoldes hant
gên uns her gewichen hât?>
< des mac werden guot rât,>
sprach der küene ritschart:
< wir machen eine durchvart
daz in gedünnet ir schar.>
zehant kêrten sie dar,
die küenen wîgande
von amelunge lande,
wîchêr unde wîchart,
sigehêr und ritschart,
wolfwîn unde wolfbrant,
adelhart der wîgant,
und ouch der starke helferîch.
für si was her dietrîch
gesprungen zuo der vînde schar:
dô wart ez allez loucvar
von der guoten helde hant.
dô heten die - von - tenelant
die schützen alsô în getân
daz die etzelen man
von vlâchen den landen
mit schaden fürder wanden.
ouch was der schade von in sô starc:
manegen man unde marc
heten si gescheiden,
dâ von man an den beiden
geschozzen manege wunden vant.
dô heten die - von - spanjelant,
als wir diu maere hoeren sagen,
daz danne tûsent erslagen
der hiunischen schützen.
swie wol si kunden nützen
ir hornbogen bî der schar,
ir kocher wâren laere gar:
der was geschozzen von ir hant
sô vil daz der - von - spanjelant
vil maneger tôt was beliben.
des heten si sô vil getriben
daz von den wunden rossen sider
muose vil manic helt nider
ûf die füeze in die schar.
des hete wol genomen war
der marcgrâve rüedegêr,
daz walthêr der degen hêr
mit den sînen ûfez gras
von den rossen kumen was.
swaz dô der edel wîgant
der küenen hiunen bî im vant,
die mante er wol ze strîte.
siben schar vil wîte,
die volgeten rüedegêre.
bloedelîn der hêre,
der erbeizte nider neben sîn.
dô truobte der sunnen schîn
der nebel von der helde hant.
dô kam der helt von hiunen lant
dâ er walthêren sach.
der guote marcgrâve sprach
< nâher alle die ich hân.
kumet der hildegunde man
ûz der gunthêres schar,
sô müezen uns die andern gar
bieten hiute ir sicherheit.>
dô rüedegêr der helt gestreit
daz er wart walthêre bekant,
dô sprach der herre ûz spanjelant
< hie kumet der gotelinde man:
möhte ich mich mit êren dan
von dem helde gescheiden,
man gesaehe von uns beiden
tâlanc deheinen swertes swanc.
hildebrant der habe undanc
der mich zuo im gemezzen hât:
wir hetens bêde gerne rât.
ich schiet alsô von hiunen lant
daz mir der maere wîgant
nie beswârte mînen muot:
nu muoz ich den helt guot
under mînen danc bestân.
swaz er mir liebes hât getân,
des wolde ich im nu lônen,
und kunde er mîn geschônen,
sô wurde schaden deste min.
er lât mich nu niht komen hin,
sît mich der küene hât gesehen,
sô muoz under uns geschehen
des ich vil gerne enbaere
ob ez mir êre waere.>
nu was ouch komen rüedegêr.
dô sprach der marcgrâve hêr
< got weiz, her künec von spanjelant,
hie muoz unser eines hant
bejagen schaden oder frumen.>
vil manic swert sach man drumen
und bî in beiden bresten,
dô man die nôtvesten
sach zuo einander springen.
dô hôrt man lûte erklingen
ir beider wâfen an der hant.
dô wurden die - von - spanjelant
umbe gekêret mit ir schar.
ez was vil degenlîche dar
komen der guote rüedegêr.
do versûmte sich der künic hêr
daz diu rüedegêres hant
den helt erreichte über rant.
er sluoc in durch den helm guot
daz im gezwîvelt der muot,
und sich wunden dâ versan
von dem etzelen man.
walthêr der küene wîgant
huop dô hôher an der hant
ein schoenez swert daz er truoc:
dem marcgrâven er daz sluoc
durch schilt und durch sarwât,
do er des niht mohte haben rât,
daz sêre sweizen began
des künic etzelen man.
ouch was walthêr worden wunt.
dô kam in vil gâher stunt
der herzoge râmunc
und ander manic helt junc,
die drungen rüedegêre
von dem künege hêre:
dô weich der hildegunde man
von etzelen schar dan.
bloedelîn was ouch nu komen,
des hete sîn vînt war genomen,
irnfrit und her îrinc:
vil maneger halsberge rinc
si frumten dâ verhouwen.
do genôz sîner trouwen
der marcgrâve rîche:
si hulfen vil friuntlîche
dem guoten recken ûz der schar.
sîn wât was alliu bluotvar.
sîn wunde wart gebunden.
mit den wol gesunden
îlte er wider in den strît.
tief lanc unde wît
wart sît maneger geslagen:
ez wolden nieman niht vertragen
die helde ûz burgonde lant.
wie dicke ez dietleibes hant
versuochte bî dietrîche!
si gestuonden friuntlîche
in dem strîte einander bî.
swie man welle daz niht sî
ieman küener dâ gewesen,
si liezen manegen dâ genesen,
die ellen truogen ouch als sie:
der sach man dort unde hie
vil manegen küenen wîgant.
die helde ûz lamparten lant
die wâren in die schar komen:
wart grôzes klanges iht vernomen,
ich waen, man den dâ vinde.
ermrîches ingesinden
truogen schilde noch enhant.
unmüezic man die knehte vant:
diu ros si zugen von in dan
allenthalben ûf dem plân.
die ritter wâren nider komen
und heten für ir brust genomen
die schilde gên dem strîte.
des heres die vier sîte
daz volc was gemischet gar.
durch der püllaere schar
brach witege unde berhtunc,
dô muose alt unde junc
sterben von ir ecken
und veige gelicken.
dâ gelac vil manic man.
ouch kômen die - von - meilân,
die herzogen beide,
die tâten vil der leide
den gunthêres gesten.
vil manegen rinc vesten
die helde dô durchsluogen,
diu swertes ecke truogen
nâch in daz fliezende bluot.
heime der helt guot
der tete mit nagelringen
daz man vil ofte erklingen
hôrt daz swert an sîner hant.
er kam dâ er rûmolden vant,
ûf den was im gerâten:
die helde dez beste tâten
daz si an den zîten kunden.
in grôzer wer wart funden
der gunthêres ambetman,
vil lützel prîs im an gewan
heime der wîgant:
von des kuchenmeisters hant
wart er wol berâten.
er gap dâ für die brâten
die verchtiefen wunden.
swie dicke heime funden
wurde in heldes mâzen,
er hete nu gerne lâzen
den kuchenmeister under wegen.
waere witege der degen
im ze helfe niht komen,
sô waen im hete den lîp benomen
der maere degen rûmolt:
er diente dez gêrnôtes golt
so ez guoten knehten wol gezam.
witege im heimen benam
mit vil ungefüegen slegen.
daz sach hagene der degen:
er und der küene ortwîn
und hûnolt der neve sîn
dar nâher balde sprungen.
mit hûnolde dem jungen
was ouch sindolt dar komen;
si wolden gerne hân benomen
witegen sîne übermuot.
hagene der helt guot,
zuo dem recken er dô spranc,
manegen stich unde swanc
frumte der gunthêres man.
swie dicke witege hete getân
daz man für wunder hât geseit,
si muosten mit ir schare breit
wider wîchen hinder sich,
die recken alsô lobelîch,
witege unde berhtunc,
heime der helt junc,
randolt unde rienolt:
wan der küene rûmolt
grôze helfe dô gewan.
dô spranc ouch nâher zuo in dan
gunthêr unde gêrnôt.
sich werten, wan des gienc in nôt,
die übermüeten recken:
vil manegen schilt decken
sach man dâ mit fiure;
der strît wart ungehiure.
dô sach der küene wolfhart
vil manegen guoten helm schart
von des kuchenmeisters hant.
einen ruozvarwen rant
sach er den selben helt tragen:
er begunde ez sînen friunden sagen
< seht ir daz, her hildebrant?
dort ist einem ûf den rant
zinment als der kraphen streut:
ich waen ez lützel uns gefreut.
ein kröuwel obene dar an stât
den einez in der hant hât
nâch menschlîchem bilde.
ich waen ein lewe wilde
alsô grimme nie gestreit.
daz im got gebe leit!
wie wir sîn berâten
von sînen rouwen brâten!>
dô sprach zehant der wülfinc
< mir liebent vaste disiu dinc
daz daz hiute ist geschehen
daz ich wîchen hân gesehen
witegen und heimen den degen.
ich hôrt si ie sich selben wegen
wider ein breitez her:
nu sint si kûme mit ir wer
von dem kuchenmeister komen
daz si niht schaden hânt genomen.>
lûte sprach dô hildebrant
< der helt ûz amelunge lant
sol si widerbringen
des hôhen ir gedingen
mit den guoten wîganden
ûz sînes vater landen.>
des volgete im dô dietrîch:
mit einer schar vil lobelîch
des fürsten dietmâres suon
begunde vaste nider tuon
die edelen wîgande
von burgonde lande.
in den strît spranc hildebrant
und wolfhart der wîgant,
sigehêr und ritschart,
und ouch der küene adelhart,
wîchêr unde wîcnant,
wolfwîn unde wolfbrant,
helpherîch und helmnôt.
dâ mohte vil wol der tôt
erbouwen sîne strâze.
mit sterke âne mâze
sigestap und gêrbart,
die truogen bêde ungespart
diu guoten swert an der hant.
der herre ûz amelunge lant,
der stuont vor in als ein berc.
dâ sach man ellenthaftiu werc
( dô kam der degen dietleip.
der ditze maere êrste schreip,
dem muose ez wesen wol bekant.
hei wie biterolfes hant
half dâ sînem kinde!
ja waen man inder vinde
an deheinem maere
dâ sô vil recken waere
von maneger fürsten landen
sô mit disen wîganden.)
von den harlungen.
frîtelen dem jungen
unde ouch imbrecken,
den volgeten die recken
wahsmuot unde rimstein.
ez waen der tac nie beschein
bezzer wîgande.
von harlunge lande
hâche unde eckehart,
die tâten vil der ringe schart.
nu was ouch herbort dar komen,
der hete diu maere wol vernomen
daz gunthêr umbestanden
von den besten wîganden
ûz al dem her waere.
dô hôrte ouch disiu maere
sîfrit ûz niderlant:
ûf geworfen an der hant
daz swert er vil hôhe truoc:
er machte im rûmes genuoc
beidenthalp der hende.
vil manegen an den ende
liez er hinder im bestân.
von im wart grôz helfe getân
den sînen konemâgen:
jâ dorften si niht frâgen
bezzers friundes danne er was.
hei wie lützel ir genas
die er begreif mit den slegen!
sô ritterlîche kom der degen
gunthêre dem vil rîchen.
gên strîte lobelîchen
vant er die fürsten bêde stân.
dô hete der künic witzlân
sîns wirtes angest vernomen;
mit al den sînen was er komen
die si ze helfe mohten hân,
er und sîn bruoder poytân,
si brâchen durch vil manege schar.
si kômen sô krefticlîchen dar
daz si der künic gerne sach.
alsô balde und daz geschach,
dô kâmen die vil küenen man,
von den ouch wunder wart getân,
wolfrât unde astolt:
die dorften etzelen golt
niht darumbe hân genommen
daz von in beiden waere komen
sô maneger ûf den ende.
si truogen an ir hende
diu scharfen snîdende swert,
si drungen vaste darewert
dâ si an den stunden
dietleiben funden
stênde vil hêrlîche
bî dem herren dietrîche.
dô kômen die wîgande
von hiunischem lande
gotele unde sigehêr.
waere diu gunthêres wer
deste groezer niht gewesen,
sô kunden nimmer sîn genesen
die - von - burgonde lant.
mit gedrenge man dô vant
elsen und gelphrâten:
mit willen si daz tâten
daz si verenden kunden;
die tiefen verchwunden
frumten die wîgande
von beiern deme lande.
ûz regensburc nantwîn,
er und die gesellen sîn
wâren ûz der rede komen,
swaz ie in roube wart genomen,
daz si nu des gerten niht.
von schaden kôs man dô geschiht
allenthalben in der schar.
die sahsen und die swâbe dar
ze strîte drungen unervorht,
dâ wart grôz wunder geworht
von der guoten recken hant.
von stîrmarke hadebrant
der sluoc vil manege wunden.
an den selben stunden
gâhte dar her liudegêr:
des vant man manegen degen hêr
bî in ligen in der schar.
si brâhten manegen ritter dar,
er und sîn bruoder liudegast.
si truogen alle den last
der sorge über rücke,
si hiewen manege lücke
mit swerten dô durch unt durch.
von bluote dâ manic furch
sach man fliezen den tac:
slac wider slage gelac.
ouch wart vil manic helm schart,
dô mit gedrenge brâht wart
der swâbe herre berhtolt.
düringe, hessen âne solt
vâhten als si kunden.
in strîte wurden funden
die stolzen mîssenaere:
von surben helde maere
und die - von - elsâzen,
über schildes rant si mâzen
manege wunde vil wît.
ouch kam von francrîche sît
vil manic tiurlîcher degen:
dâ was in walthêres phlegen
von arragûn manec helt guot.
nâvarren heten übelen muot:
si fundenz rûhez vor in dâ,
si waeren sanfter anderswâ.
dô man sach in widerwer
alsô maneger fürsten her,
dô hôrt man allenthalben klanc
über kurz und über lanc.
alsô wît vant man die schar,
jene her und dise dar,
alsô phlâgen sis den tac:
vil lützel ieman des bewac,
daz velt lac der tôten vol.
ez stüende den künegen wol
daz si müesten gîsel geben,
daz man deheine lieze leben.
biterolf der helt ersach
daz michel wunder hie geschach
von sigemundes kinde:
er gedâhte im harte swinde
daz er in lobte ê bestân.
dô was ouch heime gegân
dâ helpherîch den vanen truoc:
im sagte schiere genuoc
biterolf der wîgant
daz er den - von - niderlant
alzehant wolde bestân.
deste nâher wolde er gân,
sprach der ermenrîches degen,
< ob ich iu schaden müge gewegen.>
in hazlîchem zorne
zucte ûf daz einhorne
biterolf der wîgant;
dâ mit was im der schildes rant
verdact, swâ in der helt truoc.
dô dranc er vaste genuoc
dâ er sîfride vant.
dô sach der künec von niderlant,
er waere übele gemuot:
dô warp der helt guot
mit erbürtem schilde,
dar ûz daz fiuwer wilde
sêre stieben began.
biterolf der küene man
ûf sîfriden sluoc,
daz man louges genuoc
brehen ob dem schilde vant.
sîfrit der küene wîgant
sluoc im durch daz einhorne
daz von des küenen recken zorne
der schilt erliuhten began.
biterolf der vil küene man
versuochte ez aber mêre:
der stolze degen hêre
durch sîfrides krône sluoc
daz edeler steine genuoc
draete gegen dem ecke,
lûter âne flecke.
daz swert was lanc unde breit.
daz er den helt niht versneit,
des zurnde biterolf der degen.
dô hete hôhe ûf erwegen
sîfrit der degen junge
den starken balmunge:
er sluoc den kreftigen man
daz er niht mohte vor gestân
dem sigemundes kinde.
daz etzeln ingesinde
mohte scheiden niht den haz:
heime der gesach daz,
des künic ermenrîches man,
daz harte wîchen began
biterolf der maere.
in zorne vreidebaere
was heime der küene degen;
mit vil ungefüegen slegen
sô lief er sîfriden an.
dô stuont der êrbaere man
geneiget übers schildes rant:
heime der wîgant
sluoc ûf den degen maere.
daz swert daz was vil swaere
daz er truoc an der hant:
ez hete der küene wîgant
vil schiere dürkel getân
sînen schilt wolgetân
mit vil kreftigen slegen.
doch schirmte im der küene degen,
sîfrit, daz er vernaeme
ob im daz ellen zaeme.
in unmuoze frâgen er began
< ir sult mich künde lâzen hân,
recke, wie sît ir genant?
gerne haete ich daz erkant.>
< ich heize heime>, sprach der degen.
< sô sol vor den iuwern slegen,>
sprach der krîmhilde man,
< in sorgen nimmer künec gestân.
wan iu ist gewizzen,>
sprach der helt vermezzen,
< der von arde ein künic sî,
dem sult ir wan slege drî
bieten und deheinen mêr;
wan ir sît>, sprach der fürste hêr,
< eines küneges eigen man,
ir sult von mir wîchen dan.
slaht ir ûf mich iht mêre,
ir verlieset lîp und êre.>
dô sprach heime der degen
< der ungefüege ich hân gephlegen
bî guoten helden manegen tac,
daz dicke mîn nîtslac
ûf rîchen künegen ist gelegen,
daz mich deheiner>, sprach der degen,
< gesmâhte nie sô sêre:
nu sol ich deste mêre
der ungefüege hie begân.>
daz werte der krîmhilde man
und sluoc daz madelgêres kint
daz er als ein rat sint
vor dem helde umbe gie.
heime dâht< jâ sol ich hie
nu niht langer bî im wesen,
ob ich gerne welle genesen.>
von im dan kêrte der degen,
dô er den sîfrides slegen
niht entroute vor gestân.
dô sprach der dietrîches man,
der vil küene wolfhart
< nu schouwet wie die widervart
heime hât gewunnen.
im ist ein teil zerrunnen
der sînen grôzen hôchmuot.>
daz erhôrte der helt guot,
zehant dô lief er wider an
der schoenen krîmhilde man
mit manegen kreftigen slegen:
wol wiste sîfrit der degen,
nagelrinc sneit sêre.
sîfrit der vil hêre
heimen warten dô began.
dô er daz wâfen wol getân
hôhe erburte an der hant,
dô sluoc im der wîgant
einen solhen widerswanc
daz heimen daz swert spranc
von dem slage ûz der hant.
sô starc was der wîgant
daz ez diu kraft ûf truoc,
( daz sâhen helde dâ genuoc,)
daz ez von im draete,
als ez der wint waete,
in dem lufte lange.
von des swertes klange
wart es hildebrant gewar.
er zeigte den andern allen dar,
er sprach< seht, herre dietrîch,
nu tuot uns allen freuden wîch
heimen übermüeter zorn.
wie wunderlîche er hât verlorn
den guoten nagelringen!
daz hôrte ich lûte erklingen,
ez sluoc im ûz der sînen hant
der recke dâ von niderlant:
ez flouc wol über drî schar.
werdent sîn die vînde gewar,
ich lâze iuch daz wol kiesen
daz wir den sige verliesen.
wan wirt ez gêrnôten,
sô kunnen wir die tôten
gâhes nimmer begraben,
die wir danne von im haben;
begrîft ez aber gunthêr,
sô wirt daz volc âne wer
daz im danne vor gestât.
ir helde, habet des mînen rât
und gâhet hinewerte
alle nâch dem swerte;
ich kêre umbe mit der schar.>
dô truoc man den vanen dar
des fürsten von berne:
si tâten alle gerne
daz in hildebrant gebôt.
lougende fiuwer rôt
sach man dicke erschînen,
dô dietrich mit den sînen
nâch dem swerte gienc von dan.
dô was der ermenrîches man
vil kûme von sîfride komen
daz er den tôt niht hete genomen.
dô brach der grimme wîgant
einem ein wâfen von der hant
der vor im dar nider lac.
manegen kreftigen slac
sluoc der madelgêres suon.
des begunde war tuon
witege der wîgant;
er sprach< der heimen schildes rant,
der wart nie schart sô sêre,
ich hân in ouch nie mêre
noch sô tobendigen gesehen.
waz dem helde sî geschehen,
daz wiste ich harte gerne.
ich sihe ouch die - von - berne
mit swerten ûf geworfen gân:
des künic ermenrîches man,
nu kêren alle zuo in.>
dô hiez er liutwaren hin
daz ermenrîches zeichen tragen:
die schar wurden durchslagen.
berhtunc der wîgant,
der helt von lamparten lant,
und sibechen sun sabene,
die gunden wol ze habene
ir herren michel êre;
si drungen harte sêre
mit zweinzic hundert mannen
durch den kreiz von dannen.
gunthêr nam es vil wol war,
witege wîste sie dar.
dô wânde des der wîgant,
wand er den helt von spanjelant
hie vor dietrîche sach,
daz durch sînen ungemach
alle wolden komen dar.
er hiez der burgonde schar
alle kêren zuo in hin:
< nu helft walthêren von in,
sô rehte liep ich iu sî:
wan gestüende wir im niht bî,
sô slüegen in die geste.
seht wie der sturmveste
vor den andern allen stât,
daz er des lützel sin hât
daz er wîche von in dan.>
alle gunthêres man
huoben schilde in henden.
wer möhte daz verenden?
si kômen in den herten strît:
zesamene brâhten sie sît
vierzehener künege hervanen.
dô mohte man si lîhte ermanen
daz grimmer strît von in geschach,
dâ iegelîch den sînen sach
zuo deme er was gezalt.
si waeren junc oder alt,
si kâmen zuo einander gar:
sô dôz ez über al die schar,
sam ez nâch doners blicke tuot.
wie dicke sich die recken guot
mit slegen underliefen!
genuoge< wê, wê> riefen:
die andern sprâchen< nâher dar!>
sich heten alle die schar
gesamenet dâ daz swert lac:
vil maneges jungester tac
was im unz dar gespart.
daz velt über al dô wart
geverwet mit dem bluote:
dâ sturben helde guote.
waz mac ich mêre dâ von sagen?
wart ie frouwen trôst erslagen,
der was maneger dâ gelegen,
wan si der bluotige regen
vaste nider hete getân.
dô was ûf daz swert gegân
her dietrîch unde sîne man,
und wolden gerne tragen dan
den guoten nagelringen.
dâ hôrt man lûte erklingen
den vesten balmungen
von sîfrîde dem jungen,
der hete dietrîch ersehen.
swaz ê von in was geschehen,
daz was allez nu ein niht.
gên der toetlîchen phliht
heten vaste die gewant.
sô die helde ûz niderlant
von dem swerte drungen.
von sîfride dem jungen
her dietrîch wart bestanden;
den sînen wîganden
was niuwan schouwen dâ geschehen.
ez gehôrte nieman jehen
von strîte sô angestlîchen.
ir deweder dem andern entwîchen
wolde niht eins fuozes breit.
ir ietweders swert sneit
den guoten helden an der hant
alsô daz ietweder lant
dâ mite möhte ertwingen.
vil sêre sach man dringen
den starken sîfriden dan
einen in den küenesten man
den man in strîte ie bevant,
daz was von amelunge lant
der tugentlîche dietrîch:
vaste muoste er hinder sich
vor dem starken sîfride gân.
er und alle sîne man,
die wurden sô gedrungen
daz ez den amelungen
bî ir zîten nie geschach.
swie helflîch man bî in sach
die - von - lamparten lant,
swie lûte man an witegen hant
oft hôrte erklingen
den guoten mimmingen,
doch muoste er dringen von in doln.
sich enkunde nie erholn
sabene unde berhtunc,
und liutwar der helt junc,
si muosten rûmen den kreiz.
ez wart vil angestlîchen heiz
den recken ûz berne:
si tâtenz vil ungerne
daz si sô muosten wîchen
mit dem herren dietrîchen.
man sach toumende stân
des fürsten dietrîches man:
swaz si ie siges heten genomen,
ez was in dar zuo nu komen
daz si müete diu rînvart,
daz ir ie gedâht wart.
< jarîâ>, sprach wolfhart,
< und haete ich die widervart
mit mînen êren nu getân,
rôme unde latrân
gaeb ich darumbe, und waere ez mîn.
ich waene daz wir solden sîn
unserthalp des heres trôst,
ir aller ze vorderôst.
ach, ach, daz ez ie geschach:
ez gênt sam krebzen ûz dem bach
mîn herre und alle sîne man
von slegen rückelingen dan.
schamt iuch, fürste dietrîch!
ez was ie unlobelîch
swâ helde in strîte erblichen
und undegenlîche entwîchen.>
diu rede tete im niht ze wol.
dietrîch rouch sam ein kol,
dô ditze wolfhart gesprach.
swie sêre man sîfride sach
ûf sîne vînde dringen,
sînen hôhgedingen
muose der helt nu nider lân.
wie grimme zürnen began
des künic dietmâres kint!
den heizen fiuwerrôten wint
sach man erlougen sâ zehant:
dô her dietrîch wart ermant
von der wolfhartes zihte dâ,
dô wolde er von der schame sâ
scheiden ob er kunde.
sich wolde dâ zestunde
des erholn her dietrîch:
sîfriden den helt vil lobelîch,
den begunde der degen hêre
dringen alsô sêre
als er von im gedrungen wart;
er muose ouch die widervart
nâch der krebze site gân.
swaz ie in strîte wart getân,
sô kunde nieman des gejehen,
der den von wormez hete gesehen,
daz man bî iemens stunden
hertern hete funden
dan von helden dâ geschach.
hagene witegen stên sach
vor andern ermenrîches man:
dô lief er den helt an
in zornigem muote.
witege der unguote,
hôhe bôt er im den rant:
dô sluoc hagene der wîgant
einen sô krefticlîchen swanc
daz er im den schilt lanc
unz ûf den slangen versneit.
waer hagenen tôt niht sô leit
dô gewesen ortwîne,
sô het witege swert daz sîne
durch hagenen houbet geslagen
und hete daz swert dan getragen
mit im in dem schilde,
wan ez der muotes wilde
ein teil ze tiefe gesluoc:
starker zucke genuoc
muose tuon dô hagene,
ê erz nam dem degene.
des half im dô ortwîn
daz hagene daz swert sîn
mit nôt wider dâ gewan.
noch sach man bî einander stân
sîfride und dietrîche,
in bêden angestlîche.
nu was ouch komen dietleip.
dâ von unmüezic beleip
gunthêr der künic rîche:
zesamene hezziclîche
die zwêne helde sprungen.
dietleip den jungen
sach man strîten sô, den degen:
haet im mit künste niht gewegen
gunthêr, sô hete er in erslagen.
hie muget ir wunder hoeren sagen:
bitrolf zuo gêrnôte spranc,
helme diezn unt swerte klanc
hôrt man von in beiden sâ.
walthêr von spanje was ouch dâ:
zuo dem spranc ouch rüedegêr,
swie im ê der künic hêr
ein wunden haete geslagen.
swer ez sach, der mohte wol sagen
daz der degen maere
vil unverzaget waere.
die harlunge wâren komen
dâ man wolde hân genomen
daz heimen swert ûf dem plân.
darumbe ouch wâren dar gegân
liudegêr und liudegast,
dâ von vil manic helm brast:
zuo den sach man dringen,
des huop sich swerte klingen,
frîtelen und imbrecken:
ja bestuonden dâ die recken
mit nîde einander in der schar.
der küene herbort kam ouch dar
und boppe ûz tenelant:
iegelîch den sînen vant
der im in sturme was gezalt.
swie si wâren gestalt,
si kâmen zuo einander dâ:
ir deheiner hete nie anderswâ
sô starken veltstrît funden.
man sach bî den stunden
vierzehen künege zeichen tragen
sô nâhen dazs anander wagen
muosten in dem gedrenge.
daz velt wart in ze enge:
die gerne wîchen wolden,
die enwisten war si solden.
nu was der herre dietrîch
durch sînen muot gremlîch
erhertet in den sinnen
daz er mit unminnen
vil guoten rûm wolde hân,
swâ si giengen ûf den plân.
als wir daz maere hân vernomen,
dô was her sîfrit komen
dâ nagelrinc daz swert lac.
daz erz niht ûz dem bluote wac,
daz machte dazz der wîgant
dâ vor hete niht erkant:
er was im doch sô nâhen komen
daz er ez hete wol genomen.
dô wârn ouch allen enden dar
die recken kumen mit ir schar.
dâ wart sô vil swerte erlôst
daz ir keiner hete trôst,
ern möhte tôter dâ bestân.
dô wart der krîmhilde man
wider ab dem swerte gedrungen,
daz tete mit den amelungen
ûzer berne dietrîch.
hildebrant der degen lobelîch
der sach in bluote ligen naz
wol hundert wâfen oder baz.
war ir herren wâren komen,
des enhân ich niht vernomen.
dô sach meister hildebrant
daz swert daz ûz der heimen hant
mit grôzer krefte wart geslagen.
daz begunde er dô sagen
sînem herren dietrîche.
dô sprach der fürste rîche
< zeiget mirz, her hildebrant.>
sâ dô winkte er mit der hant
dem dietmâres kinde.
der herre und der gesinde
begunden überz swert gân.
dô erz genomen wolde hân,
daz werte im aber sîfrit
mit vil ungefüegen sit:
der sluoc im alsô manegen slac,
dâ daz swert vor in lac,
daz sich an der stunde
nie geneigen kunde
her dietrîch vor der selben nôt.
wolfhart lac sît alsô tôt
daz im leider nie geschach
alsô dô er sînen herren sach
sô dicke dringen wider dan.
der helt dô klagen began
daz er ze wormez ie gereit.
dô ruofte in die schar breit
ûzer berne hildebrant
< ir helde ûz amelunge lant,
ir sûmt iuch gar ze sêre.
nu helfet, recken hêre,
mînem herren dietrîchen
daz wir lobelîchen
tragen nagelringen hin.
jâ sult ir, helde, zuo in
bî den amelungen stân;
so geschaffet fride mir der man
daz ich ez nime mit mîner hant.>
die helde begunden alle sant
dringen mit dietrîchen:
dô muoste ûf hôher wîchen
manec ritter sturmveste.
der wirt und sîne geste
wârn alle bî einander dâ.
dieterîch der helt sâ
daz swert ze beiden handen truoc,
die vesten schar er gar durchsluoc
unz daz meister hildebrant
den guoten nagelringen vant,
daz ez der helt guote
gezuct dâ ûz dem bluote.
des half im wol her dietrîch
mit manegen slegen freislîch.
dô der dietrîches man
nagelringen wider gewan,
er warf ez hôhe ûf in der hant:
sus sprach der alte hildebrant
< nu lône iu got, her dietrîch,
ez wart nie strît sô lobelîch
gestriten alsô wol ze rehte
vor sô manegem guotem knehte.>
daz swert hildebrant dô truoc
und gap ez balde genuoc
sînem neven wolfharten:
vil manegen helm scharten
frumte dô ir beider hant.
daz wart in sturme wol erkant
dâ si diu swert truogen.
swie vil si ir gesluogen,
doch tete man anderhalben sam:
sîn lant daz werte âne scham
gunthêr der lobelîche.
ze strîte sô hêrlîche
gesach man nie zer werlde mêr.
brünhilt diu küniginne hêr
ein teil ir übermuot vergaz
dâ si in den venstern saz
mit andern schoenen frouwen.
swie sis niht mohten trouwen,
sô sêre toumte daz bluot
daz ob den helden vil guot
der sunnen truobte der schîn.
gunthêr mit den friunden sîn,
die wâren vil nâch în getân,
wan von den übermüeten man
walthêre und herborten:
in der mitte und an den orten
streit alsô der helde hant
daz her dietrîch und sîn hildebrant
nie bezzers iht getâten.
vil engiu phat si trâten
die dâ heten recken namen:
sich endorfte ir keiner schamen
itewîze der in dâ geschach.
ûz den venstern man dô sach
die edelen küniginne gân,
si sprach< wir suln belîben lân
daz schouwen des uns was gedâht:
ich waen, ez habe in angest brâht
vil manegen tiurlîchen helt.
die uns ze vogete sint erwelt,
die habentz in, nu wizzet daz,
enblanden verre deste baz
daz wir hie gesezzen sîn,
ich und ouch die friunt mîn.
ein teil hân wir sîn frume genomen:
ob ez ieman sî ze schaden komen,
daz ich klage deste min;
ich waen daz si sô scheiden hin
daz uns belîben noch diu lant.>
die frouwen giengen sâ zehant
ûz den venstern in den palas.
ob iht frouwen von in was,
daz müese tougen geschehen,
daz si die helde möhten sehen.
âne lop wart niht getân.
swaz dâ ir iegelîcher man
hete begân in sturmes nôt
dâ sô vil lac der helde tôt,
sô wir daz maere hoeren jehen,
sô grôzer dinge niht gesehen
hete ir aller keiniu ê.
ich waen ouch nimmer mêr ergê
daz under helden daz geschehe
daz man sô manegen recken sehe
sîns lîbes in der freide,
daz im diu tageweide
des tôdes als nâhen mohte komen.
wâ solde man daz hân vernomen,
daz ez ie waere geschehen,
des man mit wârheit möhte jehen,
sturm oder veltstrît?
ez ist ouch nâch den tagen sît
vil selten ergangen.
si moht des wol belangen
die an deme morgen fruo
griffen strîtlîchen zuo:
an den ez werte den langen tac
daz in dâ nie niht gelac
ir wille noch ir ellens muot.
die maeren helde vil guot
striten unz inz diu naht benam
daz in ruowe niht gezam.
si wâren zuo einander komen,
von den ir ê habet vernomen,
die armen und die rîchen.
sich kunde niht gelîchen
der nôt sô dâ die helde liten,
ê si den tac vollen striten,
unz inz benam diu vinster naht.
dietleip niht anders ane vaht
wan daz zwischenn heren beiden
der strît wart gescheiden
mit vil grôzen sorgen.
unz an den dritten morgen
wart der haz dannoch niht lân.
swaz si dâ heten alle getân,
des gap man ir ieglîchem prîs.
dô riten die dâ wâren wîs
daz siz liezen gestân,
möht ez an einen fride gân
ode an staete süene:
daz lobten helde küene,
daz ez wol mit êren waere.
swie halt wolfhart der maere
nie waere komen an die stat
dâ er vehtens wurde sat,
doch was ermüedet sô sîn hant
daz der maere wîgant
vil gerne frides jaehe,
swie halt der geschaehe.
diu naht gap dô dem strîte fride,
daz in diu houbet und diu lide
geruotn unz aber morgen fruo.
doch gehôrt dâ vestenunge zuo
daz den wîganden
von iegelîchen landen
nieman niht entaete.
diu naht beleip vil staete,
wan in der künic selbe gebôt;
den gesten wart ouch nie sô nôt,
daz in die strîtes frechen
des nahtes torsten brechen.
den fride hetens über al.
dô hiez man suochen ûf dem wal
die tôten und die wunden.
swâ si die dâ funden,
wie lützel man der ligen lie!
daz bluot über die sporn gie
den die suochten in dem wal.
für den brünhilde sal
( für wâr sult ir haben daz)
von bluot rôt unde naz
fuort man dar wol tûsent man:
doch muost man ir dort mêre lân
die gar ze tôde wârn erslagen.
nu hoeret ouch diu maere sagen,
wie dô taete rüedegêr.
durch etzelen den künic hêr
bat er die sîne gesunden
daz si der tôtwunden
naemen güetlîchen war.
dô wurden brâht zuo in dar
der recken ûz hiunen lant
verhouwen von der helde hant
wil zweinzic hundert oder baz.
der edel marcgrâve schuof daz,
swaz man ir kunde fristen
mit erzenîe listen,
daz daz muoste geschehen.
si heten alle wol gesehen
wie der künic werte sîn lant.
vil manegen man gesunden vant
ligende sam er waere tôt:
vor müede liten si die nôt.
swie man geschuof der wunden dinc,
die gesunden heten ir gerinc
gegen dem fride nu lâzen:
schade âne mâzen
was bêdenthalp dâ geschehen.
do begunde gunthêr verjehen,
er wolde ez gerne süenen.
daz tete er durch die küenen.
nu kam ez an den morgen:
des willen unverborgen
man noch vil manegen helt vant.
dô sprach von der hiunen lant
rüedegêr der rîche
< ich schiede ez müelîche.
ê sol ich hie sehen lân,
ê staeter fride wirt getân,
swaz ich gelobte den frouwen.
si dorften mir getrouwen
êren anders nimmer niht,
ob niht volliclîche geschiht
daz ich in geheizen hân.
von frouwen was ich umbestân,
dâ si mich bâten al gemeine:
diu bete was niht ze kleine
die ich gên in gelobet hân;
und solde ich der hie abe gestân,
sô waere ich immer mêr geschant.
nu sît ir vaste des gemant,
und helfet daz daz geschehe
daz man zuo der porte gesehe
mich tragen brünhilde van;
und wizzet âne zwîvels wân,
swer mir nu hilfet dar zuo
daz ich den vanen morgen fruo
vol bringe, als ich gelobet hân,
dem wil ich nimmer abe gestân
triuwen und der êren,
swar ich beginne kêren.> âventiure wie rüedegêr den vanen an die porten truoc.
alsô gienc der wîgant
dâ er dietleibe vant,
durch den er dar was komen.
der hete vil schiere vernomen
daz er sîn gerte in einen strît:
daz lobte im güetlîchen sît
der schoenen dietlinde kint.
biterolf der sprach sint
< habt ir den vanen sô genomen,
sô müezen zuo einander komen
al die besten die wir hân,
die sult ir ez wizzen lân.>
rüedegêr dô selbe reit,
dô ez nu kûme was bereit,
dâ er an ir gemache vant
die im dâ volgeten in daz lant,
swanne si wâren dar komen.
die besten wurden dô genomen
an ein sprâche kleine.
er sagte in dô gemeine
swes in frou brünhilt ê bat,
daz erz ir lobte an der stat:
< daz machten edeler fürsten wîp.
swer mir nu hilfet daz mîn lîp
ungeschendet hinnen vert,
ode sî mir hie der tôt beschert
daz daz kurzlîche geschehe,
ich wil daz man daz hie gesehe,
wer sô getriuwen willen hât
der mir ze mîner nôt gestât.
die rede ich iu bescheiden sol:
ez êret alle ritter wol
der dienest den man mir hie tuot.
ez sol des nieman keinen muot
haben der niht fürste sî
daz er dem vanen wese bî,
sô ich den an die porte trage.
vernemet, ir helde, daz ich sage:
hât er bürge und fürsten lant,
sô sol helfen mir sîn hant.
der sol ich sehs und ahzic hân
die mit mir an die porte gân;
sô hân ich immer mêre
beidiu lop und êre.>
dô sprach her dietrîch sâ zehant
< ich tuon iu mînen willn bekant:
durch gotelint die niftel mîn
sô wil ich bî dem vanen sîn
selbezehende mîner man,
den ich diu lant gelihen hân,
herzogen und marcgrâven kint,
die alle in fürsten namen sint,
und sage iu wie die sint genant.
der êrste daz ist hildebrant,
der hilfet iu vil gerne,
und sigestap von berne:
der dritte sî wîchart
und sîn bruoder gêrbart
und der marcgrâve wîchêr
und wîcnant der degen hêr,
der sibende daz sî wolfbrant,
der helt von amelunge lant,
der ahte daz sî wolfwîn
und ritschart der bruoder sîn,
der zehende daz sî helferîch.
ich troute wol>, sprach dietrîch,
< vorm rîche daz bewaeren
dazs alle fürsten waeren.>
< nu erbarmes got>, sprach wolfhart,
< daz mîn ungelücke wart
ie sô grôz bî mînen tagen
daz man mich niht kan gesagen
ze landes herrn für wârheit
( daz muoz mir waerlîch wesen leit)
daz ich die reise müese bestân.
und möhte ich hiute ein lant hân,
darumb wold ichs ze wüeste jehen
daz man mich dâ müese sehen.>
des erlachte er dietrîch.
dô sprach der fürste lobelîch
< und haete ich niuwan ein lant,
daz wolde ich teilen hie zehant,
lieber friunt her wolfhart,
ir müezet mit uns an die vart.>
sigestap der sprach duo
dem herren dietrîchen zuo
< der zweier lande, der ich hân,
der wil ich einez ledic lân
und wil mich des verzîhen:
ir sult ez hiute lîhen
wolfharten dem neven mîn,
er muoz ein fürste mit uns sîn.>
dô neic der küene wolfhart,
er sprach< mich sol diu hervart
geriuwen nuo deste min.>
si giengen mit einander hin.
als sich ir sigestap verzêch,
dietrîch einz wolfharten lêch
mit siben vanen rîchen.
er dientez ouch hêrlîchen.
dô sprach der küene dietleip
< dâ zuo den bergen beleip
mînes vater helfe und diu mîn.
doch wil ich selbe dritte sîn
bî dem vanen, rüedegêr.
wir haben hie niht fürsten mêr,
ez entaeten die - von - hiunen lande
die frou helche mit uns sande:
ich meine râmungen
und hornbogen den jungen
und irnfrit von dürenge lant
und hâwart den wîgant
und îrinc von lütringen;
und ob sich dar liezen bringen
wolfrât unde astolt,
ich wolde in immer wesen holt,
sô hete wir zwelf an der schar
die wir mit fürsten namen dar
braehten volliclîchen
für brünhilt die rîchen.>
man fragt die helde maere,
waz ir wille waere:
dô sprach in zühticlîchen sit
der tiure degen irnfrit
< wir wellen rüedegêrs gedagen:
jâ wolden wir ez niht versagen
einem dem lîhtisten man
der ritters namen ie gewan.>
dô sprach der küene berhtunc
< wir haben alt und junc,
die fürsten namen sint genant,
gefuort ûz lamparten lant
zwelif ritter oder baz.
ich gelobe iu für si alle daz,
daz si gerne koment dar.>
der fürsten hete er zuo der schar,
der marcgrâve rüedegêr,
wol sehs und drîzic oder mêr.
im lobten die harlunge,
die edelen fürsten junge,
ietweder selpsehste an die schar
komen in fürsten namen dar.
dô lobten die - von - meilân
daz si im komen mit sehs man
daz landes herren möhten sîn.
dô sprach der fürste bloedelîn
< ich bringe iu ahte mîner man
die diu lant mit mir hân
von etzelen dem rîchen
enphangen fürstlîchen.
dar zuo sol iu bî gestân
ieglîcher mit vier sîner man,
gotele unde sigehêr.
die andern suoche rüedegêr,
der marcgrâve rîche,
der tuot ez billîche.>
swâ si rüedegêr sît nam,
dem ieglîch wol der name zam
daz er fürste hieze,
ich waene er des niht lieze,
er hete in kurzen stunden
sehs und ahzic funden
die im wolden niht versagen.
si lobten alle mit im tragen
den vanen an die mûre:
sît wart ez in vil sûre,
die sîn darumbe verjâhen
daz si gerne frouwen sâhen.
der marcgrâve dô sande
einen boten von hiunen lande
gunthêre dem rîchen
und hiez bescheidenlîchen
im künden disiu maere,
waz dort gelobet waere:
daz er belîben liez sîn her,
und daz er rihte sich ze wer
mit als manegem wîgande,
der iegelîch ob lande
ze herren waere genant
ode anders sus waere erkant
daz si hiezen fürsten kint.
gunthêr der sprach sint
< der waen wir inder drîzic hân.>
dô sprach der hildegunde man,
walthêr von spanjelant
< nu bin ich eine doch genant
über zehen künege rîche:
ich wil iu sicherlîche
bî mir zeigen zweinzic man
die lant und fürsten namen hân.>
dô sprach der herre sîfrit
in einem hôchvertigen sit
< ich boute ê eine grâfschaft,
ê wir des wurden lügehaft,
wirn gewunnen sam manegen man.
driu künicrîche diu ich hân
müezen werden zwelf herzentuom,
ê daz si haeten den ruom
daz wir gestrîten möhten niht.
swaz halt anders hie geschiht,
man sol uns bî einander sehen.
hoert wes iu die andern jehen,
die ouch fürsten sint genant.>
der wirt sande sâ zehant
nâch helden die er hete dâ:
swâ die wâren anderswâ,
die hiez er im bringen.
er sagte in den gedingen
den rüedegêr hete ûf ritterschaft.
witzlân sprach< wir hân wol kraft
mit fürsten ouch alsô sie,
oder wir hân mêre hie.
ich sage iu wen ich bringe dar,
swie ez halt anders hie gevar,
die mit mir müezen ûz dem tor.
da ist ladislau und ratebor,
schirn unde sytomer:
ez gefuorten künege nie her,
si entorsten wol gerîten in.
stoyne muoz ouch dâ hin.
ich und mîn bruoder poytân,
mit zwelven den unsern man
sô wern wir den hôhen muot.>
alsô sprach der helt guot.
dô kam der helt von tenelant.
herbort sprach sâ zehant
< ich gestreit sô gerne nie.>
ouch stuonden bî dem künege hie
liudegast und liudegêr.
si jâhen daz si heten mêr
wol hundert recken oder baz
( der wirt vil gerne hôrte daz)
die fürsten waeren wol genant,
die solden wern im sîn lant.
die benande man dô gar.
dô hiez der wirt der sînen schar
einen vanen ane binden:
si wolden niht erwinden,
sin taeten des er si gebat.
der bote huop sich von der stat
und sagte rüedegêre,
dem marcgrâven hêre,
daz er koeme sô in diuhte guot.
die geste wurden hôchgemuot,
dô sprach der marcgrâve rîch
< ir maeren helde lobelîch,
von schulden ich iuch frâgen sol:
an wem gevellet iu daz wol
dêr den vanen vor uns trage?
ich wil daz mans im danc sage.>
dô sprach der herre dietrîch
< daz tuo mîn friunt helpferîch.
swâ müede der degen junc.
dâ neme in danne berhtunc,
des lesten trage in rüedegêr.>
dô sprach der marcgrâve hêr
< daz ist ein friuntlîcher rât,
wan mich sîn harter bestât
dann ander hie deheinen man.
dâ von daz ich in genomen hân
von brünhilde der rîchen,
des trage ich in billîchen.>
si kômen al besunder.
die andern hete wunder
daz ez alsô gelobet wart:
genuoge waeren an die vart
gerne mit in, möhte ez sîn.
< ich hân des den eit mîn
geboten>, sprach dô rüedegêr,
< daz unser keiner wurde mêr
wan sehs unde ahzic man,
die mit dem vanen solden gân
gên dem palas an daz tor.
man enweiz uns niht hie vor:
des wirz von schulden müezen lân.>
dô sprach der dietrîches man,
der ungemuote wolfhart
< swie ich getuo die widervart,
mîn wille der stêt alsô dar
daz si des werdent wol gewar.>
witege der sprach duo
dem herren dietrîchen zuo
< heime der helt guot
der wil daz ir sînen muot,
fürste, senfte dâ mite,
und tuot des iuch der helt bite
ob daz fuoge möhte hân:
swie mit grôzer nôt dan
hildebrant sîn swert truoc
daz im sîfrit ûz der hende sluoc,
daz hete gerne nu der degen:
sô möhte er deste baz gewegen
sînem lîbe wunden,
swâ in die vînde funden.>
dô sprach der herre hildebrant
< ich solz tragen an mîner hant
unz daz urliuge ein ende hât,
swie ez halt dar nâch ergât.
verteilent ez die recken mir,
daz swert gibe ich danne dir:
ê kumet ez niht von mîner hant
unz wir rûmen ditze lant.>
swaz ieman dô darumbe gesprach,
swie her dietrîch des verjach
daz ez ein gesinde waere,
hildebrant der maere
der liez ez alsô hine gân.
der künic ermenrîches man
der kam dô mit in in den strît
wol und ritterlîchen sît.
ez wart in kurzen stunden
an einen schaft gebunden
der vane vaster dennoch ê.
dô sûmten si sich niht mê,
si schuofen daz man schefte
ir iegelîches krefte
nâch sîner mâze fuorte mite:
der gerner mit dem swerte strite,
si fundens wol die state aldâ.
vor ir hütten sach man sâ
gesatelt ziehen in diu marc.
gesach ie mannes ouge starc
ritterschaft in keinen landen
von guoten wîganden,
daz mohte ouch dâ wol geschehen.
als ir mich ê hôrtet jehen,
helpferîch der wîgant
der nam den vanen in die hant:
si riten kurzlîchen dan.
daz wart schiere kunt getân
brünhilt der vil rîchen.
diu hiez dô snelliclîchen
die frouwen nemen ir guotiu kleit:
als ir daz maere wart geseit,
wie schiere si in diu venster saz!
mit stolzen frouwen tete si daz:
siben edeler künege wîp
und maneger juncfrouwen lîp
sâzen dâ in rîcher wât.
des was dô niht langer rât,
der wirt muose für daz tor.
jâ vant er ritterschaft dâ vor,
der hoehsten der er ie gephlac
unz an sînen lesten tac.
ûf diu ros si wâren komen:
dô hete ouch ortwîn genomen
des küneges vanen in die hant.
ir einer möhte wol ein lant
zieren, waer er dar inne.
mit meisterlîchem sinne
riten sehs und ahzic man
gewâfent von der porte dan.
si westen wol deiz müeste sîn:
bêdenthalben hinder in
liezen si vil manegen degen,
der die selben solde wegen,
daz man bî den stunden
als küenen hete funden
sam der für die porte reit:
ez was ir etelîchem leit
daz er muoste dâ bestân.
dô sprach der krîmhilde man
< lâzet offen uns diu tor.
si suln uns vinden sô hie vor
( daz ist der mîn gedinge),
daz rüedegêr nimmer bringe
den vanen mit êren hine wider.>
iedoch sô hulfen im des sider
die - von - amelunge lant
daz in der helt an sîner hant
mit gewalte unz in die porte truoc.
versuochet wart ez genuoc
ob siz erwern kunden.
ir ieglîch hete funden
an dem gejeide sînen bern,
die sich mit swerte und mit spern
unverre liezen dringen.
nu hôrt man aber erklingen
maneger hande lûten krach.
vil manic crôjieraere sprach
nâch sîner herren lant.
man pruovte ir helm unde ir rant,
dar zuo ir ritterlîchen muot.
dâ habte manic degen guot,
der ez als gerne hete getân
ob er es fuoge möhte hân.
witegen rücken ûf geschach
den helm, daz er daz gesach
wie hagene in dem satele saz:
schiere kôs der degen daz,
er hete rîcher tjoste muot.
eins wales einen schaft guot
fuorte der degen vischîn:
aber der übermüete sîn
wolde der gunthêres man
witegen gerne geletzet hân.
heimen den unguoten,
gên dem begunde muoten
der truhsaeze sindolt;
dô hete der küene rûmolt
ouch den sînen dâ erkorn.
ûz helme blicken niht verlorn
hete der krîmhilde man,
er sach ungüetlîchen an
den fürsten dâ von berne:
dô hete ouch in vil gerne
geletzet sîner êre
dietrîch der degen hêre.
gunthêr dô dietleibe ersach,
wider ortwîne er sprach
< hie kumet dietlinde kint.
al die mîne friunt sint,
die helfen>, sprach der degen starc,
< ob er mir rûme daz marc
daz uns daz ros alhie bestê.>
ich waen daz im der helt ê
het gerûmet sînes vater lant.
walthêr der wîgant,
der sach rüedegêren an:
dô sprach der hildegunde man
< des weiz got wol die wârheit,
mir ist inniclîchen leit
daz ich dem helde gewegen bin.
füert er nu den prîs hin,
des hân ich lützel êre:
slah aber ich rüedegêre,
sô hât der alte friunt mîn
übel bestatet den sînen wîn
den ich ze bechelâren tranc:
sô habe diu wîle undanc
daz des spils ie wart gedâht.
sîn tugent hât mich dar zuo brâht
daz ich ofte den lîp mîn
wâgte durch den willen sîn.>
sus wârens bêdenthalben gar,
gelîche geschart als ein har
her gunthêr und die sîne,
die recken von dem rîne:
in der mâze kam ouch dar
dietleip mit sîner schar,
die leite dô her rüedegêr.
dô hiez der marcgrâve hêr
den küenen helpherîchen
ûf ortwîn den rîchen
mit dem vanen wenden:
der fuorte an sînen henden
des künic gunthêres vanen.
man mohte in lîhte gemanen,
er was doch grimme gemuot.
helpherîch der degen guot
neigte daz zeichen hêrlîch:
dô daz gesach her dietrîch,
dô neigtens al gemeine;
dâ was ir deheine
der vergaeze an der hant,
dem wart ritterschaft erkant,
sîner baniere.
ûf einander schiere
wârn die vanenmeister komen.
ze rehter tjoste hete genomen
dietleip gunthêre,
geneiget hete der hêre
sînen schaft helfenbeinîn:
alsô hete gunthêr den sîn
ûf den tugenthaften man.
ir beider ros muosten gân
ûf die hähsen in daz gras.
belche schiere ûf was,
daz ros daz dietleip dâ reit:
gunthêr der helt vil gemeit
ouch sîn selbes niht vergaz,
baz er in den satel saz.
her dietrîch und her sîfrit
in einem nîtlîchen sit
wâren zuo einander komen.
sper brechen wart vernomen
daz ez als ein doner dôz.
sô rîchiu tjost und alsô grôz
was lange her nie geschehen,
sô diu aldâ wart gesehen
von guoten wîganden,
dô bêdenthalp ir handen
geneigten sehs und ahzic man.
die trunzen sach man hôhe gân,
durch schilde stâchen diu sper:
dirre viel, dort gesaz der
vor stiche ungefüege;
dem brach das fürbüege,
sô gestrûhte dem daz marc:
ir etelîchez was sô starc
daz ez nâch stiche dan truoc
sînen herren verre genuoc.
sît wart michel der gedranc.
man hôrte groezlîchen klanc
ûf manegen buckel rîche.
dô sach man helpherîche
mit dem vanen gên dem tor:
des was man dâ mit strîte vor
den ellenthaften gesten.
vil manegen helm vesten
sach man von slegen schînen.
dô gunthêr mit den sînen
wert daz lant und ouch die stat,
dô mohte ir etelîchem mat
werden aller sîner spil.
dô was dôzes harte vil
von sperbruche nu gelegen:
gehôrt man wunder ie von slegen,
daz mohte man ouch wol vernemen.
ez muose im übele gezemen
dem hûnolt schankte dâ den wîn,
und dem zer anrihte sîn
rûmolt gap die brâten.
die wurden dô berâten
von biulen lanc und armgrôz.
dem bluot von wunden dâ niht flôz,
der wart aber sus alsô geslagen
daz ez ir etelîcher klagen
mohte envollen wol daz jâr.
ez wâren zuo einander gar
komen die nôtvesten,
die êrsten mit den besten.
swaz ander ieman dâ begie,
ûz sînen slegen nie verlie
her sîfrit dietrîchen.
der helt vil lobelîche
liez ouch daz niht under wegen,
man sach von den sînen slegen
den sîfrides schildes rant
von der dietrîches hant
wol verhouwen und zerslagen.
daz wunder kunde iu nieman sagen
daz witege und hagene begie:
jâ bezzer ritter wurden nie
baz in strîte funden,
denn an den selben stunden
an den von rabene dâ geschach.
dâ heten kleinen gemach
randolt unde rienolt:
ob si der nibelunge golt
des tages ervohten solden hân,
ez enmöhte in angestlîchen stân.
sabene unde berhtunc,
die helde küene unde junc,
vor ir widerstanden
in erwagten an den handen
harte dicke diu swert.
zeinander wâren wol gewert
bitrolf und her gêrnôt.
gegen in hete der tôt
sînes hûses tür entlochen.
vil swinde wart gerochen
des jungen dietleibes zorn.
gunthêr der degen ûz erkorn,
der wont bî im in arbeit.
man sach daz hêrlîche streit
herbort dâ von tenelant
und boppe der wîgant,
herbortes swesterkint.
er brâhte fiuwerrôten wint
dicke ûz schildes renden
den helden vor den henden.
walthêr unde ouch rüedegêr,
die versuochtenz deste mêr
daz si wîten wârn erkant.
ez möhte walthêres hant
veste türne brechen nider,
doch erwerte sich im sider
des künic etzeln wîgant.
die zwêne recken man ouch vant,
liudegast und liudegêre,
dâ man die helde hêre
mit strîte wol bedrungen vant.
dâ streit ouch von der hiunen lant
bloedel und die sîne man.
swaz degenheit dâ wart getân,
volzuc des vaste wâren
die helde von mûtâren.
dâ muoste brechen manic rinc,
dâ hâwart unde îrinc
zuo dem vanen drungen.
hornbogen und râmungen
sach man vil williclîchen dâ:
wâ solt man suochen anderswâ
irnfride den rîchen?
man sach dâ krefticlîchen
die harlunge strîten.
bî niemannes zîten
vant man guote ritter baz.
man sach bescheidenlîchen daz,
daz witzlân und die sîne
dem vogete von dem rîne
stuonden williclîchen bî.
dâ was deheiner alsô frî
ern haet dâ ungemaches vil
in dem herten nîtspil,
des dâ von in begunnen was.
ein wunder ist daz dâ genas
der dritte under in.
helphrîch brâhte den vanen hin
mit ungefüeger arbeit,
dâ der degen vil gemeit
erbeizte vor den schranken nider.
der geste venre der wart sider
bî dem vanen nider geslagen
( des mac man wunder hoeren sagen),
swie bî im stüenden dâ ze tal
die geste, die den herten schal
pruovten dâ mit heldes hant.
helpherîch der wîgant
was ein teil worden wunt:
den vanen zucte dâ zestunt
der tiurlîche berhtunc.
dô was vil manic helt junc
bî im nider dâ gestanden.
von burgonde landen
gunthêr mit al den friunden sîn
erbeizten nider gegen in,
daz mans im mohte danken.
die swâbe zuo den franken
gestuonden angestlîcher nie,
dô berhtunc der helt hie
daz zeichen in die schranken truoc.
man sach dâ helme genuoc
erschînen unde erglesten,
dô die sturmvesten
wâren zuo einander komen.
ir habet ê vil wol vernomen
beidenthalben von ir kraft:
man mohte werde ritterschaft
kiesen an ir handen
von maneger fürsten landen.
nâch prîse was in allen ger.
witege der lief jenenher
sam ein wildez eberswîn,
hagenen den vînt sîn
dranc er mit slegen hinder sich.
die liute dûhte unbillich
unde ouch wunderlîche genuoc,
daz ietweder den andern niht sluoc.
heime und witege hulfen dan
des künic ermenrîches man,
dem stolzen berhtungen.
mit im wart sô gedrungen
daz manz für wunder mac gesagen
wie der vane wart getragen
von der berhtunges hant.
sîfrit ûz niderlant
hete gerne daz gewert:
ez wart mit hamere nie gebert
sô sêre ûf anebôze.
sîn wolden schame grôze
hân gunthêr und die sîne,
die recken von dem rîne,
und ouch ir küenen geste.
wer dâ taete daz beste,
daz kunde nieman gespehen.
ez mohte leide vil wol sehen
brünhilt diu künigin,
dô man her unde hin
ir friedel mit den slegen dranc:
si mohte sagen wol undanc
ir milte, diu alsô geschach
daz man sô manegen helt sach
in angest sînes lîbes stân.
daz siz haete verlân,
daz naemens alle für guot.
kein frouwe was sô hôchgemuot,
diu ir gesellen sach aldâ,
si wiste in gerner anderswâ.
mit erhaben schilden hôhe genuoc
die man dâ vor handen truoc
sach man die werden geste gân.
dâ wart ein hûswer getân
diu nie von helden mêr geschach,
dô man berhtungen sach
den edelen und den rîchen
dâ von im muosten wîchen
die - von - lamparten lant.
dâ tete diu sîfrides hant
daz man immer saget ze maere,
wie er ze helfe waere
sînen konemâgen bî.
ob si beliben schaden frî,
des half in wol des recken hant.
berhtungen den wîgant
er underm vanen nider sluoc.
dar sprungen schiere genuoc
witege und ouch her dietrîch
mit ir helden lobelîch,
die küenen bernaere,
berhtungen den helt maere
brâhtens harte kûme dan.
den vanen aber sâ gewan
rüedegêr an sîne hant.
walthêr von spanjelant
unde ouch herbort der degen,
mit den aller meisten slegen
der ie gephlâgen küneges kint,
dâ mit si von der porten sint
drungen dietrîchen
daz er in muoste entwîchen.
ein teil wart wahsmuot dâ wunt.
sîn veter hâche sâ zestunt
für den maeren helt spranc:
daz eckehartes swert erklanc
dem recken lûte an sîner hant.
jâ sach man diu helmbant
vil starke vor in bresten,
manegen schilt vesten
sach man dâ gar zerhouwen.
vor dem palas bî den frouwen
waz ez wol sô nâhen
dazs ir aller ellen sâhen,
ob sis erkennen kunden.
man sach dâ schiere wunden
den fürsten wîchêre:
else der vil hêre
den recken in die brust sluoc
underm schilde den er truoc.
dô wart von wolfbrandes hant
gelphrât ûz beier lant
durch die brünne bluotvar.
nantwîn nam des war,
von beier lant der herzoge:
swie nu einem helde gezoge,
dô lief er hildebranden an,
des fürsten dietrîches man.
hildebrant sluoc nantwîne,
daz sînes helmes schîne
der sunnen gap den widerglast
und daz im der helm brast,
dem witegen swesterkinde.
ich waen man immer vinde,
noch enhât alher getân,
sô manegem rehte küenen man,
sô man dô bî einander sach.
etlîchem der bluotvarwe bach
hete durchflozzen sîne wât,
als ez noch in strîte stât;
etlîch gienc dâ ouch wol gesunt.
dô wart von rûmolde wunt
schiere der grimme wolfhart.
deste mê helme schart
muoste werden bî in hie.
froun helchen ingesinde gie
vaste rüedegêre bî.
wie bloedel an dem strîte sî,
daz hoeret an dem maere sagen.
man dörfte es für einen zagen
bî andern guoten recken jehen
hete man dâ bevor gesehen
inder sîne degenheit.
daz was ouch niht verdeit,
man gedâhte es under stunden:
sô biderben hete man in funden.
nu hôrt man ouch hie sunder wîle
daz vil guote hornbîle,
daz biterolf der helt truoc.
man hôrte ouch klanges genuoc
von dem starken welsunge,
daz dietleip der junge
vil dicke hêrlîchen sluoc.
dâ was ouch dôzes genuoc
dâ daz alte sahs erschal,
daz dicke ûf unde ze tal
gie an dietrîches hant.
under in was wol erkant
swâ man mimmingen sluoc
daz witege der helt truoc.
man hôrte ouch nagelringen
ûf helme dicke erklingen.
dar under diezen man vernam,
sô sîfriden wol gezam,
den guoten balmungen:
man sach den helt jungen
stênde enmitten under in.
dâ was ouch hagene komen hin:
des künic gunthêres man
hete ez dâ vil guot getân.
walthêr von spanjelant
der truoc wasgen an der hant,
der kam dar gesprungen.
die burgaere gedrungen
heten wider die geste
ze wormez von der veste,
daz si sich schamen begunden
daz si nie enkunden
an die porten vollen komen.
rüedegêre hete der strît benomen
vil der sînen krefte.
dô sprach der nôthafte
< helfet, edel îrinc,
daz ich alliu iuwer dinc
mit iu über rücke trage,
daz der küniginne vane wage
ze wormez innerhalp dem tor.
swaz wir ie tâten hie bevor,
daz ist wider ditze ein wint.>
îrinc truoc den vanen sint
alsô vor rüedegêre
daz ez gemüete sêre
alle die dâ wâren.
ê der - von - bechelâren
vollen in die porte gedranc,
vil manic swert ob im erklanc.
dô gie der herre dietrîch
als der degen lobelîch
dicke hete vor getân.
under die porten kam gegân
dietleip und biterolf der degen.
solch wunder hôrt man nie von slegen
daz dô diu gunthêres hant
frumte: dâ von er daz lant
behabte vor den gesten.
sîfrides des nôtvesten
genuzzen die burgondaere.
herbort der helt maere
der tete ellens grôzen schîn.
wie möhte ez herter gesîn,
dô liudegêr und witzlân
und liudegast niht understân
enmohten daz die helde
drungen in die selde.
dô was rüedgêr hine komen:
des wart vil wol war genomen.
dô der degen alsô stolz
begunde sîniu spiegelholz
ûz der porte houwen;
dô hete er den frouwen
gedienet übele unde wol.
für wâr ich iu daz sagen sol,
ez waern och bezzer beliben
denn wider ûz der porte getriben
von der küenen recken handen
die helde ûz fremden landen.
do enbuten von der zinne
der recken triutinne
daz man schiede den strît.
wol vernâmen ez sît
dietleip und her dietrîch:
dise helde hinder sich
si hiezen gên der porte stân,
< wir sullen eine wîle lân
daz urliuge scheiden,
gevellet ez den beiden,
gunthêre und gêrnôten.>
etlîchen bluotes rôten
hôrt man ez dô râten.
wie balde si daz tâten!
den fride gâben si dô dar.
ez was noch niht verendet gar,
unz ez sô wart gescheiden
under ir friunden beiden
daz man dietleibe prîses jach,
und daz man volliclîche sprach
den lop ouch rüedegêre,
daz ê noch sît nie mêre
ein vane wurde baz getragen:
woldens im die danc sagen
durch die erz haete getân,
sô müese er gar daz lop hân.
dâ was keiner under in
( des ich vil gewis bin),
im enwaern sô müede diu lide
daz si beidenthalp den fride
rieten unde ouch süene.
gunthêr der vil küene,
swaz ander ieman dâ gesprach,
des prîses er dietleibe jach.
dâ mite was gesenftôt
dâ der guoten helde nôt.
si wolden rîten von der stat:
gunthêr dô die helde bat
daz si sich ze hûse liezen laden,
er wolt si schône heizen baden
unde in schenken sînen wîn.
daz rieten sie under in
daz si ez naemen wol für guot.
ir keiner was sô wol behuot,
der under in niht wunden truoc,
ern haet doch biulen sus genuoc.
dô engarten sich die geste,
degene aller beste,
fünf hundert ritter oder baz.
mit des wirtes willen tete man daz,
daz man die porten offen lie.
man schuof in den gemach hie
daz man si dô baden hiez.
vil ungerne sehen liez
wolfhart sînen rügge blôz:
swarz lanc unde grôz
striche lâgen vil dar an,
sam mit brenden der man
hinden bestrichen waere,
und waer der helt maere
sô wol gewâfent niht gewesen,
er kunde nimmer sîn genesen.
in fride und staeter süene
riet gunthêr der küene
daz in die geste gunden
daz si an den stunden
mit brunnen badeten abe den râm.
etelîchem derz vernam
was vil leit daz ers bat.
die geste riten in die stat:
die landes herren zuo in dar
kômen, dâ si harnaschvar
vil manegen ritter funden.
etlîchen an den stunden
si anders niht erkanden,
wan daz den wîganden
alsô lûten diu wort,
dâ von daz si nâch êren hort
gestriten heten sêre.
sehs und ahzic oder mêre
gesâzen zeinem bade hie,
dâ gunthêr selbe hine gie
mit dem herren dietrîche.
der recken lobelîche
wart anderthalben alsô vil,
der man vil manegen âne zil
geraemet in dem strîte vant.
von iegelîcher fürsten lant
fünf hundert recken oder baz
gemeinlîch dâ zem bade saz:
mit gedinge daz geschach,
daz man von edelen frouwen sach
vil badelachen dar gesant.
rüedegêr von hiunen lant
daz sîne hete gedienet sô
daz er sîn mohte wesen frô,
er und alle sîne man.
swaz ieman lobes dâ gewan,
des wart im dâ der beste teil.
wolfhart sprach< der liute heil
ist ungewegen und sinewel.
ich hân ez>, sprach der degen snel,
< versuocht als ouch her rüedegêr.>
dietrîch sprach dô< dîn sper
wart niht geneiget als daz sîn,
dô walthêren den friunt mîn
stach der hiunische gast
daz im daz fürbüege brast.>
wolfhart sprach< nu seht mich an:
welt ir wol zerblouwen einen man
kiesen inder, daz bin ich.>
her dietrîch sprach< jâ hân ich
von der sîfrides hant
sô vil der biulen daz man vant
an helde lîbe ir mêre nie.
swie vaste ich im begegene gie,
sô brâhte mich ie von im dan
alsô der krîmhilde man
( daz sult ir wizzen wol für wâr),
daz ich sanfter zehen jâr
waere wol von im gewesen
( mit solher nôt ich bin genesen),
dann bî im einen halben tac.>
der helde schimph dô nie gelac.
der sprach hin, sô sprach der her.
sus gienc ez under in entwer
mit lachenlîchem muote.
man sach dâ helde guote
tragen ingebunden hant,
dâ man doch wunden niht envant.
ich enweiz wâ der schimph gelac.
den gesten man dô êre phlac
bieten als ez in gezam.
swer der frouwen kleinât nam,
der muoste hin ze hove komen.
ze hûse hete si sô genomen
gunthêr der künic rîche
daz si sît friuntlîche
von rîne rûmten daz lant.
den frouwen was daz wol erkant,
wem gesendet war ir wât.
der wirt hete des niht rât,
er brâhtes ûf den palas,
dâ in vil wol gesidelt was
zer aller besten spîse
die wirt in küneges wîse
iemanne kunde bieten:
dô gap in ze miete
gunthêr der tiurlîche degen
sînen wîn nâch grôzen slegen.
sît geschuof der degen daz,
daz manic werder gast gesaz
für die vil minniclîchen wîp.
dâ wart mit ougen ritters lîp
getriutet durch ir degenheit.
dâ was vil frouwen unde meit
die si vil wol enphiengen
dô si ze hove giengen.
man enbôt in michel êre.
der helde enwas niht mêre
für die frouwen gegân
wan die mit dem vanen dan
unz in die porten sich erstriten.
mit vil züchticlîchen siten
man hôrte itewizzen
den helden vermezzen,
wie die degene maere
waeren sô gevaere
dem wirte und dem lande.
des antwurte sâ zehande
der edel fürste dietrîch
brünhilde der küniginne rîch
< jâ haete er mich ze vînde niht,
wan daz dicke geschiht
daz friunt friunde gestât:
er ist saelic der in hât
sô ez im gât an die nôt.
dô mir mîn neve daz enbôt,
dietleip der degen maere,
daz er beswaeret waere
hie in disem lande,
des müese ich haben schande
daz ich in hete dô verlân.
swaz wir hie haben getân,
daz kumet nu wol ze suone.
ouch zimet im wol ze tuone,
gunthêre dem vil rîchen,
daz er minniclîchen
ergetze mîner basen kint.>
daz gelobten sie sint
mit vil staetem muote.
krîmhilt diu vil guote
diu sprach dietrîche zuo
< ich wil daz man den fride tuo
sô staete und ouch die süene
daz ir, degen küene,
sô iht hazzet mînen man.
herre, waz hete wir iu getân?
swes ander ieman hie phlac,
ich sach daz iuwer nît gelac
ûf mînem friunt sô verre
daz sîfrit mîn herre
des hât vil wol enphunden.
hât er von iu niht wunden,
er ist aber sus zerslagen
daz ich daz muoz von schulden klagen,
daz ich iuch ze wormeze ie gesach.>
dietrîch der helt sprach
< nieman klaget den schaden mîn,
der ist noch groezer danne der sîn.
ir klaget danne den schildes rant,
sô hât im anders hie mîn hant
in disem strîte niht getân,
wan daz ich den zerhouwen hân.
sô kûme ich bin vor im genesen,
ich wil iuch bitende wesen,
mac ez in iuwern gnâden sîn,
daz er mich vor den friunden mîn
immer mêr gedringe,
daz mir mîn hôhgedinge
sô nidere von im mêre kume.
dar zuo wil ich daz mich frume
iuwer vil tugentlîcher muot.>
< mîn helfe sol iu wesen guot,>
alsô sprach daz sîfrides wîp:
< ouch sult ir mînes herren lîp
durch mînen willen lân gesunt.>
her dietrîch lobte ir sâ zestunt,
ern müese ez tuon durch grôze nôt,
daz er ûf des heldes tôt
gerite nimmer mîle breit.
dô sprach der ritter vil gemeit
sîfrit schimphlîch ouch dar zuo
< got lône im der die suone tuo,
der mir des hazzes sô gewege,
daz ich hern dietrîches slege
immer mêr enphinde:
wan die sint sô swinde
daz si niht gâhes mugen verswern.
swer sînen stichen und den spern
sol zegegene rîten,
der mac vil wol erbîten
sînes endes ûf dem wal.>
des erlachten über al
ritter unde frouwen.
ich wil des wol getrouwen,
der schimph was noch ungelegen.
dô sprach rüedegêr der degen
ze brünhilt der rîchen
< wie rehte senfticlîchen
mir iuwer gâbe ist bekomen!
swaz ich des frume habe genomen.
der tiuvel habe im mînen teil.
ich waen mîn rücke iht werde heil
in einem halben jâre.>
< ich tete ez âne vâre>
sprach des edelen küneges wîp.
< sîn müese trûric sîn mîn lîp,
und waere sîn niht geschehen.
her rüedegêr, ir sult niht jehen
daz ich ez taete ûf iemans haz.
ich tete ez niuwan umbe daz,
als ez doch ist hie geschehen,
daz wir die recken hân gesehen
von den wir wunder hôrten sagen.
hie ist keiner sô geslagen,
ich waen mir werde ez mêre
ê gunthêr der vil hêre
vol versüenet ane mich.
die sorge hân ich,
swaz swerns ûf sînem rücke lît,
daz er mirs die selben mâze gît.>
dô sprach der edel rüedegêr
< des wolde ich immer wesen hêr,
der mir kunde daz gesagen
daz ir wurdet wol zerslagen:
dâ waer mir deste sanfter mite.
ir wârt in iuwer alte site
komen der ir phlâget ê:
des tuot manegem der rücke wê
daz ir sô gerne sehet strît.>
des erlachte aber sît
vil manic ritter unde maget.
hildegunt sprach< nu ir alle klaget,
nu klage ouch ich den mînen man.
dem hât der marcgrâve getân
daz an im wol ze kiesen ist.
waer sîn ellen und sîn list
ûf rehtez strîten niht gewant,
mich hete des marcgrâven hant
von freuden nâch gescheiden gar.
des bin ich worden wol gewar,
der helt gedâhte ninder mîn,
wie ich im schankte mînen wîn,
dô ich von den hiunen reit,
den ich vil ellende meit
etzelen und sînen recken truoc.>
des wart gelachet ouch genuoc
vor der küniginne:
ir sâzen dar inne
vierzehen unde mêre
die bî dem - künege hêre
lâgen in der trunkenheit.
dô si diu maere hete geseit,
des wart gelachet über al
in dem gunthêres sal.
dô sprach der guote rüedegêr
< ob ir, küniginne hêr,
mich überhüebet der scham,
mich hât gemachet im sô zam
der degen ûz spanjelant:
haet ir hie twalm an der hant,
den trunke ich, unde gebüte er daz.
ez was nôt daz âne haz
uns der wirt sô hât gelabet.
mich hât alsô ze hûse gehabet
der schoenen hildegunde man
daz ichs vergezzen niene kan.>
brünhilt diu sprach duo
dem edelen dietleibe zuo
< wir haeten nâch vil sêre
engolten daz iur êre
sô hôhe an guoten friunden stât.
ich wolde noch niht haben rât,
swie uns hie doch sî geschehen,
ich enhete wolfharte gesehen.>
dô sprach gezogenlîche
gunthêr der künic rîche
< des mac iuch nemen untûre.
solt aber ir vor der mûre
sîne slege enphangen hân,
ir haet in alsô gerne lân
belîben dâ ze berne.>
si sprach< ich sach daz gerne,
dô er sô gremlîchen saz
und man im daz helmvaz
abe lôste und im daz swert nam:
er was ein wênic worden zam,>
sprach diu küniginne.
wolfhart sprach< hier inne
ist nu der schimph gar gelegen.
haet ichs getrouwet>, sprach der degen,
< daz ez solde alsô geschehen,
ir haet mich jârlanc nie gesehen.>
er lachte und tete im doch niht wol.
alsô ein begozzen kol
begunde riechen dô der man.
diu frouwe biten in began
daz er ez lieze âne haz.
her witege der sprach daz
< wie hete her gunthêr daz erdâht
daz im ze lantwer wurden brâht
alsô werde geste?
helde sô nôtveste
bî deheinen stunden
bî einander wurden funden.
ich solde im nimmer werden holt,
wan mich hât her rûmolt
mit kraphen und mit brâten
in strîte alsô berâten
daz mir diu lide müezen swern.
swelch schiltkneht an in wil gern
in zorne sîne spîse,
der dunket mich niht wîse.>
her heime der sprach duo
dem helde hûnolde zuo
< ich wolde ê ungetrunken sîn,
ê er mir gaebe solhen wîn
den mir dâ schankte iuwer hant.>
dô sprach hûnolt der wîgant
< her heime, ir möht den spot wol lân.
ich hete es gerne mêr getân,
waer ez niht schade an êre.
iuwer wâfen sneit sô sêre
daz ich schankte niht den wîn
bevollen nâch dem willen mîn.>
dô sprach der wirt< ez vert sus baz.>
der künec von tenelande saz
und smielte der rede die er vernam:
er was dar under niht sô zam,
er hete daz sîne ouch wol getân.
witzlân unde poytân
mit rede sprâchen ouch dar zuo.
der künec von bêheim sprach duo
< swaz man mîn hie vergezzen hât,
des ist niht vil; doch hân ich rât
vil gerne der geselleschaft
diu mir von guoter helde kraft
in strîte hie gekündet ist.
ich hete ze etelîcher frist
eines alten wîbes fride genomen,
möht er mir sîn ze staten komen.>
dô sprach der fürste ûz tenelant
< mir wart nie hôchzît erkant
dar ich sô friuntlîche geladen
wart, dâ ich sô grôzen schaden
möhte wol gewunnen hân.
swaz ich noch her gestriten hân,
ez kam mir ûf die angest nie.
man hete mîn niht funden hie,
solde ich sîn getrouwet hân.
nu ez aber sô wol ist ergân,
sô sol der wirt den dienest mîn
verdulten in den zühten sîn.>
dô sprach gunthêr der degen
< mir kunde nieman hân gewegen
für schaden und für missetât.
dô frumte mich der hagenen rât:
der riet mir daz wir sanden
nâch iu edelen wîganden,
alse ir ê habet vernomen.
alsô sint si her bekomen
und habent errettet mîniu lant.>
dô sprach rienolt zehant
< her künec, des muget ir wol jehen,
ich hân sô ringen solt gesehen
zer werlde nie gedienen baz.>
allez daz dâ helde gesaz,
die redeten sunder dô ir muot.
des wirtes wîn der was sô guot
daz maneger gämelîchen sprach.
her gêrnôt schiere daz gesach,
si wolden urloup dannen hân.
von dem sedele was gestân
her bitrolf unde ouch dietleip.
der helde nieman dô beleip,
si stuonden von dem sedele.
vil manege frouwen edele
man daz gestüele rûmen sach.
der biterolfes sun dô sprach
< her künic, lât uns urloup hân.
swaz wir einander hân getân,
daz sol gar verkorn sîn.>
dô sprach diu edel künigîn
< sô küsset ir iuch beide,
daz manz dâ mit sô scheide,
daz ir iht äveret den haz.>
die helde rieten alle daz,
als ez gesprach des küneges wîp.
vil maneges küenen ritters lîp
mit zühten urloup genam.
gefüegiu rede dâ wol gezam
den rittern mit den meiden
dô si sich wolden scheiden.
dô sprach diu küniginne hêr
< edel marcgrâve rüedegêr,
ir sult froun helchen daz sagen,
daz wir in zühten wol vertragen
daz si ir volc hât her gesant.
uns sint diu maere wol bekant
wie si her dietleip bestât,
dâ von daz ir gedienet hât
er und her biterolf der degen.
ich wünsche ir daz der gotes segen
iedoch bî ir gelücke sî.
si sol immer hazzes frî
darumbe gar vor uns bestân:
sît si ie'z beste hât getân,
dô tete si wol daz si den degen
niht wolde lâzen under wegen.>
dô sprach diu schoene hildegunt
< wiste wir nu hie zestunt
waz wir rüedegêre
möhten bieten êre
nâch friuntlîcher minne,
er und diu marcgrâvinne
hânt uns sô dicke liep getân,
wir kunden niht sô guotes hân
wir enteilten ez im gerne mite.>
dô sprach er< frouwe, des ich bite,
des gewert mich, vil edel wîp.
swie mir verhouwen sî der lîp
von des küenen recken hant,
sô wil ich von iu beiden sant
in friuntschefte urloup hân.>
dô sprach hildegunde man
< got phlege iuwer, rüedegêr.>
dô sûmten si sich niht mêr,
si nâmen urloup über al.
die recken rûmten dô den sal,
si riten ze wormez ûf den sant.
her sîfrit von niderlant
der reit geselliclîche
mit dem herren dietrîche,
sam si wurden nie gehaz.
ouch êrte den wirt daz,
daz er die wîgande
lie von sînem lande
scheiden vil minniclîchen:
die in ê wânden rîchen
mit schaden und mit sêre,
den bôt er michel êre. âventiure, wie sich daz her ze lande schiet.
die hiunen kêrten in ir lant.
dietleip der wîgant
volgete in wider über rîn
und biterolf der vater sîn
hin wider unz an den gunzenlê
dâ si zesamene kômen ê.
dâ schiet sich dô her dietrîch
in siten harte friuntlîch
von sîner muomen kinde.
daz ermrîches gesinde
nam urloup ouch von in dan.
her berhtunc unde sîne man
und witege der wîgant,
si kêrten in ir herren lant,
und ander ir gesellen.
dô hete ir starkez ellen
gedienet vlîziclîchen
dietleibe dem rîchen.
die fürsten ûz meilân
kêrten ouch froelîchen dan,
den dankte vil güetlîchen sint
der schoenen dietlinde kint.
ez scheiden ouch die beide
ûf der selben heide,
die küenen harlunge,
die zwêne degene junge,
frîtele unde imbrecke,
und ander manic recke
die im gedienet heten dar.
alsô schieden si sich gar,
die guoten wîgande
und kêrten heim ze lande.
hie sult ir hoeren waz geschach.
heime der helt sprach
zem herren dietrîchen
< nu tuot sô friuntlîchen
( dâ mite hoehet mîniu dinc),
und helfet mir daz nagelrinc
wider kome in mîne phlege,
daz mir die sîfrides slege
sô verre brâhten von der hant.>
dô sprach der alte hildebrant
< vil gerne gaebe ich iu daz swert,
und waere ez eines landes wert:
haet ir wan daz eine verlân
daz ir niht haetet bestân
sîfride den vil rîchen
vor mînem herrn dietrîchen:
daz was ein grôz übermuot.
wol west ir daz der helt guot
gegen im gewegen waere.
ez ist mir immer swaere
daz ir den gelf habet begân.
ir sult daz rehte verstân:
ich wolde ê rûmen berne,
ê ich iu immer gerne
daz swert ze handen bringe.
wie ahte iuch sô ringe
mîn voget, der fürste dietrîch?
iu enkumet daz wâfen lobelîch
nimmer wider in iuwer hant,
irn erstrîtet ez>, sprach hildebrant.
dô sprach der küene heime
< sô bin ichz der eine
der alsô wol gestrîten tar,
einwîc ode in volkes schar,
sam deheines fürsten man.
möht ich daz wâfen wider hân,
der rede waere allez mîn.>
wolfhart sprach dô wider in
< oeheim, gebetz im an die hant.>
er sprach< und solden alliu lant
verweisen an dem lîbe mîn,
ich versuoche wol daz ellen sîn.>
< des gestate ich niht>, sprach dietrîch:
< ob der helt vergâhte sich,
doch sul wir unser zühte phlegen.>
dô sprach witege der degen
< swâ erz füeret durch diu lant,
iu dient iedoch des heldes hant.>
her dietrîch dô hilbrande bat
< gebt im daz swert an der stat
durch ermenrîch den veter mîn.>
< herre, daz enmac niht sîn,
ez enwerde mir alsô benomen.
daz muoz von iuwern schulden komen
ob ich ez niht behalten kan.
man weiz vil wol wie ichz gewan:
dâ solde erz selbe hân genomen.>
sît muosten si zesamene komen,
heime und ouch her hildebrant.
an in wart sît wol erkant
ir nît unde ouch strîtes haz.
her dietrîch erloubte in daz,
dô erz niht scheiden kunde:
swelhem diu êrste wunde
vom andern wurde geslagen,
jener solde den prîs tragen.
dô sprach der helt wolfwîn
< sold er hildebrant der veter mîn
gegen nagelringe stân,
er enmöhte ein als guot wâfen hân,
sô waere ez ungelîche.>
dem fürsten dietrîche
si rieten daz erz teile baz,
dô si niht kunden den haz
zwischen in gescheiden.
sît vant man in beiden
zwei swert wol ebenmaezic
und vil widersaezic.
daz eine der truoc gêrbârt,
dâ mite er manegen schilt schart
vil dicke hiete geslagen;
daz ander truoc, hôrte ich sagen,
der vil starke wolfbrant:
daz wart heimen an die hant.
mit übelem gebâren
schiere gewâfent wâren
die zwêne wîgande.
der helde ûz sînem lande
einen rinc bestalte dietrîch.
den schilt gezucte für sich
der vil genende wîgant,
heime ûz lamparten lant
lief dô hildebranden an:
dô schirmte im dietrîches man,
daz si bêde wol kunden.
dô sluoc eine wunden
heime dem meister hildebrant.
als der helt der enphant,
dô sluoc er madelgêres kint,
daz beidiu bluot und fiuwers wint
ûz den ringen draete
sam ez der luft dâ waete.
dar nâher spranc her dietrîch,
der tiure degen lobelîch,
er gestatte ins dô niht mêre.
si wâren beide in êre
des strîtes noch bestanden:
doch muost man hildebranden
den prîs dâ für heimen wegen.
alsô behabte der küene degen
den guoten nagelringen,
die aller besten klingen.
her dietrîch schiet ez under in:
heime fuorte daz swert hin
von hern dietrîches bete.
hildebrant ez ungerne tete
daz er daz wâfen muoste lân.
her dietrîch unde sîne man,
die kêrten gegen berne.
dô fuoren alsô gerne
die degene aller beste
ze rabene in die veste.
nu wolden rûmen ouch daz lant
die ê hiete besant
gunthêr der tiurlîche degen:
sich rihte dô zuo den wegen
manec man ze sîner heimuot.
der wirt hete sîn guot
mit in geteilet gerne dô:
solher helfe was er frô
die er hete von in gesehen.
dô hôrte er ir deheinen jehen
der sîne gâbe wolde enphân.
dô kam für den künec gegân
walthêr und frou hildegunt:
urloup si nâmen an der stunt.
als tete der herre ûz tenelant,
ze hove brâhte er an der hant
hildeburc die vil rîchen.
dô kom ouch baltlîchen
ûz bêheime witzlân:
des wîp was vil wol getân,
diu gienc dem helde an sîner hant.
er kam dâ er brünhilde vant.
liudegêr von sahsen lande,
dem küenen wîgande,
dem was ouch urloubes muot.
liudegast, der helt guot,
der kam ouch mit der sînen:
von stolzen magedînen
sach man gesinde nâch im gân.
dâ wolde ouch langer niht bestân
des fürsten stuotfuhses wîp.
swaz freuden hete deheiner lîp,
daz frumte si vil kleine.
si liezen ir deheine
scheiden güetlîcher dan,
dô si daz urloup gewan.
dô si zesamene wâren komen,
und urloup mit kusse wart genomen
von den die sich nie mêre
durch freude noch durch sêre
gesamenten sider anderswâ
als si gesamenet wâren dâ:
swaz der künec und sîn wîp dô sprach
und swaz dankens dâ geschach,
daz kunde iu nieman vol gesagen.
swer êren welle vil bejagen,
der tuo'z an dem der êren phlege.
in vier enden die wege
vil enmüezic man dô vant.
die fürsten gunthêres lant
rûmten wol nâch ir êre.
ouch urborten sich vil sêre
die stolzen burgondaere
al ir zît ûf werdiu maere.
alsô ante sich der schâch.
swes si phlâgen sît hie nâch,
des ist mir lützel iht bekant,
wan wie zuo der hiunen lant
riten dô die etzelen man.
die leite rüedegêr von dan,
als er si brâhte an den rîn.
helchen und dem herren sîn
het er erworben êre:
dô muoten ouch niht mêre
etzele und daz edel wîp.
sît wart der guoten ritter lîp
enphangen vlîziclîchen
in hiunischen rîchen.
bloedel, als uns ist geseit,
mit den sînen er dô reit
dâ der fürste hete lant:
vlâchen sô was daz genant.
rüedegêr der helt guot
dâ heime in sîner heimuot
ze bechelâren niht bestuont.
er tete als die getriuwen tuont:
der helt gesach wan sîn wîp
unde arbeite sînen lîp
mit den gesten wider in daz lant.
dô rüedegêr der wîgant
nu für mûtâren reit,
die stolzen ritter vil gemeit,
wolfrât unde astolt,
dô nâmen danc für den solt.
des wart in dâ genuoc getân.
dô sprâchen dise zwêne man,
her bitrolf und her dietleip,
ob si des twungen keiniu leit
daz in ir helfe wurde nôt,
si riten mit in in den tôt.
sus schieden, die dâ wâren,
von den - von - mûtâren.
ze tal bî tuonouwe fluot
rüedegêr der helt guot
fuorte in hiunischiu lant
vil manegen stolzen wîgant,
die etzele der rîche
im vil vlîziclîche
bevalch in die hervart.
daz maere für gesant wart
dem künege und der künigîn
daz daz ingesinde sîn
koeme wol von rîne.
der künec frâgt umb die sîne,
wie si waeren geriten
und wie si haeten gestriten.
daz wart im allez wol geseit.
sîn botenbrôt wart vil bereit:
des gap man dô behande
zwei hundert bisande.
als uns diu maere sint geseit,
daz edel ingesinde reit
ze etzelburc der rîchen.
si wurden froelîchen
von dem künege enphangen.
den palas übergangen
hete er hin engegene
biterolfe dem degene:
vil wol enphienc er sînen suon,
als er daz gerne mohte tuon.
der künic saz dô zwischen in
und frâgte wie ir wîle hin
gegân waer in ir strîtes tagen.
do begundens im genâde sagen
sô hôher dienste sîner man,
daz des froelîche site gewan
des fürsten botelunges kint.
diu küniginne mohte sint
erbîten niht der maere.
dô gienc diu erbaere
dâ si den künec sitzende sach:
diu frouwe froelîchen sprach
< willekomen, ir recken edele.>
wie balde von dem sedele
die alten zuo den jungen
ir hin engegene sprungen!
dô si die recken alle enphie,
diu küniginne sitzen gie
dem künege an sîne sîte:
mit müelîcher bîte
warte si der maere.
rüedegêr der lobebaere,
in den palas er dô gie.
der künic in froelîche enphie,
alsô tet ouch diu künigîn.
< waz maere ich bringe über rîn,
diu vernemet, künic rîche.
iu enbiutet vil friuntlîche
her gunthêr und her gêrnôt,
die maeren helde vil guot,
ir dienest unde ir friuntschaft.
si wânden niht daz iuwer kraft
mit here si solde twingen.
sîn hete ouch niht gedingen
hagene der wîgant;
der sprach, ez hete in hiunen lant
sîn hant umb iuch verdienet niht.
swaz schaden in von iu geschiht,
daz muget ir wol volbringen.
er hât ouch den gedingen,
swenn ez mit fuoge mac geschehen,
daz er iuch gerne welle sehen
in hiunischen rîchen.
mit dienste friuntlîchen
er enbôt ouch mîner frouwen daz,
daz er ir immer âne haz
aller triuwen wil gestân.>
vil wol danken im began
helche diu tugentrîche.
dô sprach gezogenlîche
aber der küene marcman
< frouwe, ich sol iuch hoeren lân,
waz iu frou brünhilt enbôt.
si wünschet des daz iuwer tôt
ir nimmer werde für geseit,
und daz ir âne herzen leit
belîbet unz an daz ende.
ân alle missewende
bat si iu ir dienest sagen:
solt si iu wünschen zuo den tagen
wie lange iu werte daz leben,
iu wurden tûsent jâr gegeben.>
< nu lône in got>, sprach helche dô,
< daz si sint alle sô frô,
swaz mir wonet gelückes bî.
got hüete ir êren swâ si sî.>
dô sprach der tiurlîche degen
< frouwe, ich hân in mînen phlegen
gâbe diu iu ist gesant.>
vil schiere ir wart bekant,
waz diu gâbe waere.
man brâhte den sparwaere
und ouch den guoten vogelhunt.
ir deheiner vor der stunt
het im gelîches niht gesehen.
dô si begunden rehte spehen
des vogelhundes leitseil,
vil maneger wunschte daz er teil
der edelen steine solde hân.
lancvezzel alsô wol getân
wart nie an vederspil gesehen,
reht alse ich iu ê hân verjehen,
wie rîcher koste er waere.
den gap diu êrbaere
einer ir gesinde,
dem nîtkêres kinde,
einer meide hêrlîch.
helche sprach< du solt mich
mit dir beizen rîten lân.
sô mîn herre und sîne man,
etzele der maere
und sîne valkenaere,
wellen kurzwîle hân,
sô sullen ouch wir niht lân,
wir suln ir beizen schouwen,
ich und mîne frouwen.>
rüedegêr der wîgant
hiez im bringen sâ zehant
den sînen vanen rîchen,
den er vil angestlîchen
ze wormez in die porte truoc.
der wart geschouwet dâ genuoc
von etzeln unde al sînen man.
vil maneger lachen des began,
swer ie vernam diu maere,
wie er im gegeben waere.
des gewan dô rüedegêre
beidiu lop und êre.
der helt dô begunde biten
den künec in zühticlîchen siten
und helchen die vil rîchen,
daz si vlîziclîchen
den recken danken solden,
ob si in guotes wolden
gunnen unde ouch êre.
dô frâgte der künic hêre,
wer die recken waere:
er zeigt die lobebaeren.
den wart gedanket allen wol
daz siz heten gar für vol.
nu schuofens alle ir gemach.
etzele der künic sprach
< man sol in geben des si gern.>
do begunde manz gesinde wern
waete harte rîche.
er lônte vlîziclîche
allen den gesten
und liez in niht gebresten
alles des si solden hân.
ze lande muoten dô began
her biterolf der wîgant.
dô bôt im liut unde lant
etzele der rîche:
des dankte im groezlîche
die zwêne wîgande.
ob vil rîchem lande
si wâren beide herren:
swie si wâren verren
von ir urbore komen,
ungerne haetens iht genomen
von deheines küneges hant.
biterolf der wîgant
den künic biten dô began,
daz er si solde rîten lân
mit friuntlîchem muote
und helche diu vil guote.
dô sprach daz botelunges kint
wider die guoten recken sint
< ir sult mich niht verzîhen.
ich mac iu niht gelîhen,
ir enwellet ouch von mir enphân:
für eigen sult ir von mir hân
des jungen nuodunges lant.
daz erstate ich hie zehant
dem rüedegêres kinde.>
allez etzeln gesinde
daz sprach güetlîche derzuo.
biterolf der jach duo,
warumbe er solde nemen lant:
ze lîhen hete sîn selbes hant
sô vil den wîganden,
< ob ûz der hiunen landen
ieman wurde vetriben,
der waere ninder baz beliben
dann in den landen mînen.>
etzele mit al den sînen
biterolf den rîchen
vil gemeinlîchen
bâten daz er naeme,
daz im doch wol gezaeme
zeim jeithove stîrelant.
für eigen gap erz sâ zehant
dem edelen fürsten rîchen.
im dankte vlîziclîchen
biterolf und sîn suon,
als si wol mohten tuon.
helche diu küniginne
mit friuntlîcher minne
si bêde biten des began,
ê daz si schieden von in dan,
daz si in lobten offenbâre
daz zeiner zît in dem jâre
ir einer koeme in hiunen lant
ob si niht möhten bêde sant,
< daz uns ze liebe daz geschehe
daz man iuwer einen hie gesehe.>
daz lobten in die helde sân
ê daz si schieden von in dan.
des landes er si wîsen hiez,
und ouch die bürge die er liez
in dienen eigenlîchen.
nie gejeithof alsô rîchen
gap deheines küneges hant.
dô biterolf hete bekant
diu urbor rehte und ouch ersach,
ze sînem sune der helt dô sprach
< ez lît ze kurzwîle hie
baz danne lant ie
noch gelac ze ritterspil.
hie ist weide und waldes vil,
diu wazzer habent vische genuoc,
kein ertrîche nie getruoc
baz korn unde wîn:
wie möhte uns baz gegeben sîn?
siben golterze ez hât.
lützel hie kein berc stât
man envinde silber drinne.
ze guotem gewinne
lît daz lant über al,
beidiu ûf unde ze tal:
wilt zam und vederspil,
des mac man hie haben vil.
hal sint ouch dar inne.
wir handelnz wol mit sinne,
und daz ichz lîhe swem ich wil.
ez hât edeler ritter vil
und vil edele dienestman.
ez wart etzelen undertân
von sîner grôzen hêrschaft.
wir gewinnen lîhte noch die kraft
daz wir erbouwen sô daz lant
daz unser ellen unde hant
vor allen künegen ez wol wer.
zwischen der elbe und dem mer
stênt ninder bezzer burcstal.>
bî der stîre ze tal
wîste in dô her hadebrant.
der selbe edel wîgant
daz lant von biterolfe nam
durch die grôze genuhtsam.
dar nâch in kurzer stunde
bouwen begunde
der helt vil lobebaere
stîre die burc maere,
diu sît vil wîten wart erkant,
dar nâch diu marke wart genant
daz si staete stîre hiez.
wol zwelf jâr er si liez
dem küenen hadebrande.
sît geliebte in dem lande
biterolfe deme rîchen
daz man in staeticlîchen
hiez den stîraere,
swie daz der helt vil maere
hete siben fürsten lant,
daz man in doch dicke vant
dâ unde in hiunen rîche,
den helt vil tugentlîche.
frou helche diu erwarp daz sint
daz bitrolf und frou dietlint
nider zuo tuonouwe riten.
mit vil hêrlîchen siten
diu künegin in daz an gewan.
si sprach ze etzelen ir man,
er mües immer schaden wesen frî,
sô si im waeren gerne bî,
von andern wîganden
ûz rîcher künege landen.
der künic sprach, ez waere wâr.
dar nâch daz allez naehste jâr
si hiezen bouwen in daz lant,
die man sît ofte rîche vant,
ein burc diu treisenmûre hiez.
in beiden si dô daz gehiez,
ob siz geleben solde,
daz si dâ sehen wolde
die schoenen dietlinde
unde ouch ir gesinde
und daz rüedegêres wîp.
wie möhte tugenthafter lîp
in der werlde sîn bekant?
der frouwen sin was gewant
ûf hôhen lop und êre.
etzele der künic hêre,
swie er ein heiden waere,
ir lop, daz wîten maere,
daz fuogte er zaller stunde
sô er beste kunde.
und taete ez noch ein kristen,
der mit sô guoten listen
erwurbe prîs und êre,
der endorfte niht sô sêre
erfürhten die hellevart.
ich enweiz warumb der kristen wart
od zwiu er toufe hât genomen,
vil maneger, der ze helle ist komen
niuwan durch girlîchen muot
und ninder kristenlîchen tuot,
niuwan horden unde sparn;
der mac noch baz ze helle varn
dann etzele der maere,
swie er ein heiden waere.
dise rede lân under wegen.
dô reit biterolf der degen
hin widere in daz lant
dâ er etzelen vant
und helchen die rîchen.
er dankte in vlîziclîchen
da im der maere wîgant
ze eigen gap daz rîche lant,
als er ez hete dô gesehen.
der künic nu begunde jehen,
er wolde im immer teilen mite.
frou helche nâch ir alten site
bôt in wirde und êre.
doch wolden dâ niht mêre
belîben die wîgande,
si kêrten heim ze lande.
urloup heten si genomen,
dô was daz ingesinde komen:
von den schieden si dô hie
daz fremde recken mêre nie
baz gerûmten fürsten lant.
si griffen des in helchen hant
daz sis dicke wolden sehen.
bezzer botschaft geschehen
was selten fürsten wîbe,
denn bî ir mannes lîbe
frou helche dietlinde enbôt.
geleites was ouch gar unnôt
den vil guoten recken.
doch heten die vil kecken
ze dienste rüedegêre.
der marcgrâve hêre
si brâhte durch ir eigen lant.
dô riet er und hadebrant
daz si mit in fuorten dan
vierzic waetlîcher man,
wol gekleit und wol geriten,
und doch nâch hiunischen siten.
sus volgeten in ze lande
die vil guoten wîgande.
sît hât uns nieman daz geseit,
mit wie getâner senfte reit
her biterolf unz in sîn lant.
iedoch ist uns daz sît erkant,
daz er vil wol enphangen wart
nâch sîner langen heimvart.
er moht dâ heime in sînen tagen
vil menegiu maere sît gesagen,
wie er waere geriten
und waz er haete gestriten.
swaz er in fremden landen
hete mit sînen handen
erworben, daz wart wol erkant.
ouch sagte der edel wîgant,
swaz helche dietlinde enbôt:
ir wurde noch nie niht sô nôt
alsô daz si si gesaehe;
si enwânde niht dazz geschaehe
od immer kunde wol ergân.
vil hôhez danken wart getân
von biterolfes wîbe
der schoenen helchen lîbe.
in freuden hôhe stuont ir muot,
daz die helde vil guot
kâmen alsô wol gesunt.
er rihte nâch der selben stunt
swaz im ze rihtenne geschach.
er schuof im sît vil guot gemach
nâch maneger grôzen arbeit.
er hete dâ heime nuo geseit,
wie im ein lant was gegeben:
dâ hin er pruovte sît sîn leben
mit geheimem râte
bêdiu fruo und spâte.
dâ von dem helde daz geschach,
daz er sît vil dicke sach
den künec von hiunen landen
mit sînen wîganden.
frou helche und ir gesinde
von frouwen dietlinde
redete zaller stunde
daz beste daz si kunde.
sît gefuogte sich ouch daz,
daz biterolf der helt besaz
daz lant ze stîremarke,
und dietleip der starke,
und sîn muoter dietlint:
ze stîre brâhten sie sint
ir volc und ir gesinde gar.
dar nâch muose in dienen dar
der gelt von ir lande,
und stolze wîgande,
sô er bedorfte, der kam im vil.
sus lebte er an sîn endes zil
bî etzelen dem rîchen
sîne tage vil hêrlîchen,
und dietleip der starke:
in diente stîremarke
wol nâch grôzen êren;
und dietlint der hêren
enbôt helche diu rîche
ir botschaft friuntlîche.
ouch muoste ofte daz geschehen
daz bî helchen gesehen
wart diu frouwe dietlint
mit vil grôzen freuden sint.
ez phlac wol nâch êren
dietlinde der vil hêren
helche diu vil rîche.
des hete diu tugentlîche
lop unz an ir endes tac,
daz ir lop nie gelac.