CGF.txt

christ hat sich mit dem libe
gelichet einem wibe,
der nimmer wirs mohte wesen,
so si ir kindes muz genesen.
swenne daz wip kindes genesen muz,
so ist daz der erste gruz:
ir tut diu angest so heiz,
daz ir uz bristet der sweiz.
so si grozzer not gewinnet,
daz si citeren beginnet,
so ist ir leides aber me.
zeiungist wirt ir also we,
daz si lute rufende wirt.
swie unsanfte dehein wip gebirt,
noch gebar die christ unsanfter vil,
die er zehimel chronen wil.
sin angest und sin arbeit,
die er gein siner marter leit,
die taten im we und also heiz,
daz er swizte blutigen sweiz.
daz geschach deheinem wibe nie.
do er manigen geisel slac enphie
und manigen scherphen pesem slac,
sin zitern, des er do phlach
- darzu betwanc in grozziu not.
zeiungist twanch in der tot,
do er an dem heiligem cruce stunt,
daz er rief, sam diu wip tunt,
eine stimme, diu was chlægelich.
da mit hat christ gelichet sich
dem wibe, diu also gebirt,
daz ir ane mazze we wirt.