CHH.txt

daz puech haizt christz hort.
got geschûf unt tichte
elliu dinch von niht,
er hieze mit worten werden
paidiu himel und erden.
got geschûf an allen orten
elliu dinch mit worten.
daz tuet uns diu schrift chunt:
dixit et facta sunt.
zehant als er daz wort gesprach,
nach sinem willen ez geschach.
die wunnechlichen engel clar
geschûf got mit worten gar,
daz liez er im gevallen.
under den engeln allen
do geschuf er ein so wuennechlich,
des schone was nicht geliche.
den nant er do lucifer,
daz sprichet tiusche< ain liechttrager>.
der erhub sich von der schone sein.
< ich setze nordent den stuel mein,>
sprach er,< unt wil sein gelich
dem hohistem got wuennechlich.>
als er des gedachte,
e danne erz vol prachte,
von himel er verstozen wart
umb die ubrigen hohvart
unt mit im maniger engel schar
die seines trachtens namen war
unt im des gestuenden zu,
die wurden mit im verstozen du. hie geschûf got adam.
als der val du geschach,
got du wider sich selben sprach,
du diser val alsus ergie:
< nu mach wir ein mensch hie
nach unserm pilde unt uns gelich.>
den macht er du gar wuennechlich
ouz der erden mit seiner hant
unt plîs in in zehant
den gaist des lebens an der stat,
der gab im sinnes vollen rat;
er macht in schoene unt wîs
unt satzt in in daz paradis. hie schuef er evam.
er sprach:< der mensch ist nicht ein wol,
ain helfer man im machen shol
der im gelich von arte si
unt geselleclichen won pei.>
den macht er du zehande;
ein slaf er adam sande
unt prach im an den zieten
ein riep ouz siener sieten
mit fleisch unt mit plût.
dar ouz machet der gût
ein maget gar wuennechlich,
diu wol eim menschen was gelîch,
schoen mit wiplicher gestalt
unt mit tûgenden manicvalt;
die weist er zu adam paz.
er sprach zu im:< wer ist daz?>
er antwurt mit sinne:
< ez ist ein mæninne.>
er antwurt von recht, want si von art
ouz ir manne gemachet wart.
die gab er im du ze einer ê,
daz si solten immer mê
sein ein herze unt ein lip
paidiu man unt wip.
swer die minne vercheret
unt sich selben uneret
daz er schande sûchet,
den hat got verfluchet.
in daz paradise
satzte got der weise
adam unt even die paide
in die wuennewaide
unt gab in der wollust genûkt
unt erloubt in alle die frucht,
wan einen paum er ouz nam.
< ich gepiut ew pi der gehorsam,>
sprach er,< daz ir sien ezzet icht;
lat ir daz, so sterbt ir nicht.
ist ab daz ir ez ezzet
unt mein also vergezzet,
so gebt ir iu dem tode,
ez chûmt iuch an mit sode.
hapt uber daz ander obz wal,
daz nemt selbe an zal.>
der tivel daz du sere neit,
even er du an streit.
er sprach:< eva, nu nim war:
izzestu daz obze, so wirstu gar
dem wuennechlichen got gelich
unt wirst aller chunst reich,
du wirst erchennent ubel unt gût,
die ougen ez dir ouf tut.>
du antwurt im dew tumbe:
< wir sterben liecht dar umbe
ob wir daz obz ezzen
unt gotes gebot vergezzen.>
do si so zweiflichen sprach
und er sei in dem wanche sach,
zehant er sei bechort,
du er den zweivel horte.
leviathan der sunden list
roumt ir zu untz an die frist
biz daz si daz obz az
unt potz adam, der tet ouch daz.
du si daz obz gazen
unt gotes gebot vergazzen,
du sahen si sich an ander an:
ir ietwederz sich schamen began
unt prachen fur sich ein laup,
scham unt vorht machet siu toup:
si purgen du ir scham.
got sprach:< wa pistu nu, adam?> -
< herre, ich horte die stimme dein
unt verparg mich vor dir, herre mein:
daz weip die du mir hast geben,
diu hat verraten mir daz leben,
von dem weip ez mir geschach.>
diu eva schuldigiu du sprach:
< diu nater mich von sinnen schiet,
diu mir ditz umpilde riet.>
got si da nicht lenger liez,
ein engel si fûr die porten stiez.
got fluechte adam, des gie im not,
daz er in seim swaiz sien prot
immer gewinnen mueste,
unt swenne er pout die wueste,
daz im distel unt dorn
wuehse swa er sæte chorn.
der frowen flûht er do zwir:
der gut alsust flûcht ir
unt daz si under den mannen muest immer sein
unt smerzen lit unt pin,
unt daz si chint gebaere
mit smerzen unt mit swaere.
der fluch wert bis an disen tack
unt die schulde diu ouf uns gelack
du von dem himel viel lucifer.
durch den val verriet er
even unt adam,
da si die gift nam.
sein val unser val gerîet,
dar um got adam schiet
von dem paradise.
eva diu unwiese
aller erste diente den ersten pan,
daz erste weip den ersten man
allererst in schaden prachte,
da von der tode uns nachte.
von dem valle sei wir noch
in dem ellende doh.
der val wert wol fuemf tousent jar,
daz niemen was volchomen gar;
als in der tot nicht wolde sparn
lenger, so mûst diu sel varn
gegen helle alzehant.
diu minne den val uns hat erwant,
diu minne mit der gothait
begunde rounen, want ir was lait
daz rounen daz leviathan
het mit even getan.
daz wolt si wider rounen:
des begund ir slounen.
ir rounen unt ir ringen
chunde die gothait betwingen
daz er sich erpitten liez
daz er enphie daz er wart nie,
unt belaib daz er was ê,
und ist daz er was, immer me.
got vater, herre, ich nîge dir,
nu scheffe ein rainez herze mir,
erniu in mir deinen gaist,
want du mein gepresten wol waist,
daz ich pin siech unt chranch.
mein herz tuet manigen wank
von dir, suezer herre,
daz mich dir machet verre.
nu nahen mich dir, sûzer got,
daz ich iht werde des tiuvels spot;
des pitte ich inerchlichen dich:
nicht verwirfe, herre, mich
von deinem antlûtze liecht,
emphroemde mir deinen gaist niht,
gib mir die vreude deines hailes wider
unt leg mir suntleich trouren nider
unt la mich dir erbarmen,
mich gundachern vil armen.
von judenburch pin ich geborn;
sei iemen mein geticht zorn,
der tichte selbe ein anderz paz,
daz laz ich gar ane haz.
die wiele sol er sein spoten sparn
hiz wir daz sein recht ervarn,
ob ez so durchleutich sei
daz ez gar sei gespotes vrei.
swer von tieffer materi sol
sprechen, der bedarffe wol
genade unde sinne
unt gotlicher minne.
umb dise materi ez also stat:
swer nicht gûte sinne hat
unt genade von got,
daz der wol mak verdienen spot.
daz fürcht ich suendhafter man,
wand ich nicht gueter sinne han,
und ist diu materi sinnereiche
unt so gar ernstliche
daz da niht horet gespotes zû.
swer aber ez daruber tue
daz er spotes sich bewegt
unt der maze alsus verphlegt,
der spote dehaines andern man,
heb an im selbem des ersten an:
an im selbem ist gespotes vil,
ob er ez zerechte wegen wil.
swer geistilich gedinge
spot, ob dem gelinge,
daz enhan ih da fur nicht.
swer sich selben an sicht,
der spot furpaz nicht mêre;
im git gewis lere
sein selbs gewizzen.
wie er sich hat gevlizen
paidiu ouf ubel unt ouf gût,
diu gewizen im daz chûnt tût.
owe, suezer jesu christ,
wie verre mir dein gnad ist!
daz ist von den schulden mein
daz ich die gnade dein
nie zereht gesuecht an dich;
du pist so gût daz du mich
gnaden dick hetst gewert
ob ich ir chûnde hete gegert.
des gib ich mich dir schuldich.
nu wis gegen mir gedultik!
durch dein groz guete
sterche mir mein gemuete,
daz ich an disem getihte
dein lob mit lob berichte.
dein chraft mir des verhenge,
dein minne mich des enphenge
unt erleuht mir den sin,
want ich so wizick nicht enpin
daz ich dich loben chuenne.
mein trost unt mein wuenne
pistu, lieber herre mein.
nu tû mir deiner gnade schein,
daz ich dich loben muege,
daz ez deinen eren tuege.
ich man dich got almaechtich,
du drei unt doch aingaehtich,
daz diu minne mit dir ranc,
diu dich ouf menschliech hail bedwanc
daz du den himel entslûze
unt her nider fluze;
do enphieng du die menschait
in unser armen forme chlait.
durch unsern val choem du her nider,
( daz du uns da von lostes wider),
den uns oûf pracht adam
mit seiner ungehorsam;
daran uns allen mislanc.
des valles der erst val uns twanc,
da von der flûch ouf uns gelac.
diu minne des fluches uns gewac,
des schul wir lob der minne sagen
daz si uns des hat uber tragen.
von der minne unt von got
wart herab gesant ain pot
durch den grozen val der sel,
der engel sant gabriel,
in die stat zenazaret
ze der maid die man enphestent het
ainem manne, der was yoseph genant,
von davides geslecht erchant.
maria deu magt hiez:
der engel des due nith enliez,
da er die magt sitzen sach,
er gie zu ir in unt sprach:
< ave gracia plena,
wis gegruzet,> sprichet daz da,
< volle genade du pist,
unser herre mit dir ist,
gesegent seistu uber elliu wiep.>
von dem wort wart ir lîp
betrubet unt gedacht:< waz
gruezes mack wesen daz?>
der engel sprach unt nant sei da:
< fürchte dir nicht, maria,
du hast genad fûnden
zegot an disen stûnden;
sih, du enphæhst unde gebirst
einen sun, des mûter du wirst:
den soltu nennen jesum;
der wirt hoch unt frûm,
des obristen sun wirt er genant,
got geit im den stuel zehant
seines vater davides,
er wirt frid ewiges nîdes
unt wirt rihsent ewichlich
in jacobs hous unt sin reich
daz gewinnet ende niht.>
maria sprach ze dem engel liecht:
< wie chumt daz denne,
want ich mannes nicht erchenne?>
der engel antwurt unt sprach zu ir:
< der heilige gaist chumt uf von dir,
des obristen tuegent beschetwet dich
unt dar um, frowe, sich,
ein vrie ros, ain sunder dorn,
daz von dir wirt geborn,
gotes sun wirt er genennet;
wol im der in erchennet!
unt sich: elspêt, diu niftel dein hie,
ein sun in ir alter enphie
unt was ir zal doch ûz der chraft
daz si nu hiez unberhaft,
want got ist nicht unmuegliech.>
do sprach maria:< nu sich,>
zu dem engel,< ich pin ein dirn gots,
gehorsam alls seines gebôts:
nach deinem worte ez mir ergê.>
zehant wart inir sunder we
ein ganzer mensch unt warer got
von der minne gebot. hie wart got mensh.
ich man dih, suezer jesu christ,
daz du durch mich mensch worden pist.
nu behuet mich, lieber herre mein,
durch die rainen menschaeit dein
daz mich meins broeden flaisches gîr,
herre mein, niht verre dir.
ich man dich, aller engel lob,
abrahames, isaac, jacob,
daz du hie ouf der erden
geborn woldest werden
von marien der meide,
diu dich an scham unt an leide
magt enphie und magt genas;
als durch daz ganze geworhte glaz
scheinet diu sunne clar,
zeglicher wise si dich gebar
an scham unt ane we.
ich man dich den noch me,
gewaltich chaiser reiche,
daz du so smæheliche
woldest ligen uf einem haeu,
da du wer under streu
des esels und des rindes.
so werdes stalgesindes
wart nie nicht funden zedehainer ceit,
an dem so volle ere leit;
doch chant der esel und daz rint
an dir des waren gotes chint,
da dich die vihirt funden,
da du laeg ingebunden
in swachiu chlainiu tuechelin.
des ewigen vater schein
unt aller engel vreude
unt des frides ein bescheude,
hilf mir durch deiner gebuert chraft
daz in mir werde berhaft
des niwen leben saelicheit,
daz mein sel da mit werd gechleit,
daz ich von sunden werde geborn,
daz mich mueze iht dein zorn
am jungistem tage schaiden
von den lieben zu den laiden. da ist got besnitten.
ich man dich nach der schrifte sage
daz man dich am achtem tage
nach der alten ê besneit,
da du mit grozer senfticheit
verguzze dein vil raines pluet
durch mich, herre guet.
des gæb du die harre an mir,
des solt ich immer danchen dir
ob ich wære so witzich.
nu pin ich inhizich
von sunden maniger hande,
der ich mich laider nie erchande.
zerechte nu pitte ich dich
daz du rûchest erhoren mich
durch diene besneidunge,
daz ich mein gerunge
also besnîden muez
daz mir immer unsueze
allerhande unchiusche sei;
des wis mir helfechlichen pei. amen.
ich man dich daz diu mûter dien
dich souget ûz ir pruestelin
unt dich vil dicke chueste
do du ir laege ouf ir prueste.
des la mich geniezen
unt laz in mien sel fliezen
die milch diner menscheit
unt daz honik diner gothait,
daz ich gefûret werde damit
mit suzem vaterlichem sit. da wart unserm herren opfert.
ich man dich aller engel cir
daz du die heiden enphie zu dir,
gewaltichlich hoher chunige drie
von saba unt von arabi,
die dir ir opher prachten.
zehant si des gedachten,
do si den stern sahen,
do begunden si zu dir nahen.
zejerusalem pracht si der stern,
dich unt dein mueter si sahen gern;
in daz hous si giengen,
mit opfer si dich enphiengen.
si vielen fur dich ûf iriu chnie,
ditz opfer si prachten dir hie:
golt, wîroh unt mirren
( des mochte siu niemen verirren):
daz golt als dem chunik grôz,
der willich eren genoz;
daz wîroh als dem warem got
( si waren gehorsam dienem gebot);
die mirren ze eren dienem begraben.
die gab die araben unt die saben
willichlichen prachten dir.
nu hilfe helfechlichen mir
daz ich dir ouch mueze pringen
mein opfer an disen drigen dingen:
daz golt der waren minne,
daz diu in mir enbrinne,
die andacht des wirochs,
des sûzisten rouches,
unt die mirren der bûze,
daz ich mich selben unsuze
chestige um alle mein sunde
mit rechter puze urchunde. hie wart got in tempel pracht.
ich man dich, herre gûter,
daz dich dien liebeu mueter
zu dem tempel pracht nach der ê
unt ander deiner vreunde me.
simeon ouch dar cham,
ûf die arme er dich nam.
do dich der alt an sach,
er lopt dich hohe unt sprach:
< du solt mich niht lenger sparen,
la dinen chnecht ze gemache varen,
want meiniu ougen habent gesehen
an dir des waren liechtes brehen,
daz durchliuchtichlichen gar
erleuchtet alle die werlt fur war.>
mariam er do an sach,
er wiessagt ir unt sprach:
< dein sel sien swert durch vert,
da von dir smerze wirt beschert.>
hie mit wurd du, herre, pracht
in den tempel mit andacht,
mit dir zwei turtelteubelin
ze eren got dem vater dien.
nu hilfe mir durch dine guete
daz ich mit louterm gemuete
mich dir opfern mueze.
des gewer mich, herre, sueze. amen. hie floh unser frowe in egipt.
ich man dich, suzer herre,
daz dien mûter verre
mit dir in egipten floch,
diu dih mit ir milch zoch,
in die stat ze ereinpolim,
als ichz von der schrift nim;
darinne du siben jar belibe
unt elliu apgot herouz vertribe.
da waer du mit vil grozer gedult,
daz des wiessagen wort wurde erfult
der von dir schriebt also:
< ich han ouz egipto
minen lieben sun geladen.>
gerûche mir die wege phaden
ouf den ich minen veinden enphar,
der werlt unt dem tivel gar
unt mir selbem wider stê,
daz ich der werlt nith nach ge. amen.
ich man dich, suezer jesu clar,
daz du uber siben jar
wider fuer zejuda
unt belibe in galilea
in der stat zenazareth,
als da geschriben stet:
< er wirt nazareus
gehaizen,> daz bediutet sich sus:
ein pluem von pluemen wirt er genant;
also tuet uns diu schrift bechant.
nu pringe mich, suezer herre, wider
( want ich lig in sunden nider),
nu hilf mir uz der sunden phat,
daz ich chom in der pluemen stat
unt dar inne werde gezogen,
want mich diu werlt hat betrogen. hie lert got die juden.
ich man dich, herre, mere
daz du mit suezer lere
daz volch in deiner chinthait
lertest rechte wîshait.
ez geschach zeainer hohceît,
als uns diu schrift urchunde gît,
daz die juden alle
ze jerusalem mit schalle
chomen nach ir gewonhait,
als in uf was gelait.
dein mueter und der vater dein
chomen ouch dar mit dir, herre mein;
da verlurn si paide dich.
maria diu verwænte sich
du wærest pei joseben da:
joseph vant, maria
het dich pei ir in phlege.
alsus giengen si uf dem wege
von danne in dem wane,
doch waren si dein ane
ganzer tage drei.
joseph unt marei
dich suechen begunden,
indem tempel si dich funden,
da du daz volch lertest,
daran du dein vleiz chertest.
du dich dien mueter an sach,
guetlichen si zu dir sprach:
< sun, wie tæte du uns also?
ich unt dein vater sien unvro
suechent gewesen um dich.> -
< was ist daz ir suechet mich?
west ir nicht daz ich mueze sîn
an dem geschaefte des vater mein?>
hie gie du mit in dan
unt wer in paiden undertan.
swer dich noch verlorn hat,
der suech dich, daz ist mein rat,
da zechirchen vint er dich schîr
ob zesuechen stet sien gir.
owe herre hoh geborn,
wie dichke ich dich han verlorn
mit meinen sunden! daz ich
wider vinden mueze dich,
als dich din liebeu muter tet!
nu erhore, herre, mein gebet
unt gib mir die lere
das ich dich, jesum, nimmer mere
verliese mit den sunden mein!
nu la mich, herre, wesen dein! amen. hie wart got getouft.
ich man dich, herre lieht gevar,
daz du uber drizech jar
den toûfe woldest enphahen;
du dir begunde nahen
johannes baptista,
der zaiget dich mit vinger da:
< sêcht, daz ist gotes lamp, daz trait
der werlde sunde unt lait.>
do toufet dich in dem jordan
johannes, der vil hailig man;
die himel stuenden offen ob dir,
des vater stimme hort man da schir:
< ditz ist mein sun, an dem ich mir
pin wol gevallen, dem schult ir
horen,> sus der vater sprach;
in der menschait man dich sach;
da wart gesehen der hailig gaist
in touben wies: mit vollaist
sih al hie diu trinitat
vil wuennechlich gesamt hat.
nu hilf mir, herre, durch dienen tofe
daz ich deines raines plûtes chouf
an mir nicht werde verlorn.
mich stichet reht als ein dorn
daz ich sundhafter man
meinen touf so dick gemailet han
mit manigen sunden posen:
von den rûch mich erlosen! hie vast unser herre.
nu man ich, suezer herre, dich
daz du gevastest hast fur mich
vierzich tage unt vierzich nacht;
due hungert dich nach menschen aht,
dar an du menschen brode waist.
do fûrt dich der hailig gaist
in die wuest mit im dan,
da dich der tivel versuechen began.
er gie zu dir da er dich sach,
listechlich er zu dir sprach,
also versûchte der pose dich:
< seistuz gotes sun, so sprich
daz dise steine werden prot!>
din munt im suezliche rede bot,
du sprêch als uns diu schrift gîth:
< der mensh lebt alaine nicht
von dem prôt suenderbar,
wan von gotes worten gar!>
do fuerte dich der sathanat
in die hailigen stat
uf ein hohes palas,
daz hoehist daz in der stat was.
er sprach zu dir:< la dih hin nider,
du chumst wol gesunt wider;
ich han gebotten den engeln dien
daz si din huetunde sien
daz dir icht gewerre.>
du antwurst im, herre:
< ez ist geschriben: « dune solt nicht
dienen herren, dienen got versuechen an iht. »>
du fuerte er dich, du daz geschach,
ûf einen hohen perch unt sprach:
< ich gib dir al diu reiche
ob du diemuetichliche
fur mich vellest und petest mich an.>
du spraech du nu:< var hin, sathan!
du solt wan ein got anbeten
unt dem dienen an allen steten,
als da stet geschriben.>
du hiet du in schir vertriben,
du liez er dich, du cham dir schir
die engel unt dienten dir.
nu hilf, helferiche,
daz ouch ich gewaltichliche
der werlt, dem tivel an gesig
unt mir selbe ob gelig
unt der bechorunge,
durch dine barmunge,
die mich in sunden dicke
prachten unt in stricke,
daz ich wart gar unfuerick,
da von mein sel muerick
ist dick in sunden worden;
die sah man mich îe horden
nah allem meinen geluste gar.
da von ward ich nebelvar,
daz mir lutzel liechtes shein,
unt hertes herzen als ein stain
gegen dir, suezer herre mein:
want daz diu barmunge dein
mich ouf gehabt hat,
mein wer nimmer worden rat;
swie ez mir noch shuel ergen,
daz muez da zedinen genaden sten. da gie got der werlt predigen
ich man dich daz du hast erlitten
groz armuet mit senften sitten
do du hie predigen gie
unt die junger zu dir enphie,
die zwelf potten unt die junger,
die durst unt hunger
durch dich litten gern hie
unt swaz siu not an gie.
du erwelts ûz aller der werlde gar,
daz si waren sunderbar
uber allez menschlich geslæht
richter nach recht.
suezer herre, nu enphahe ouch mich
ze ainem junger, daz ouch ich
dir immer gehorsam
unt dinem wuennechlichen nam
stête immer gehugde trage
unt mich der werld gar entzage.
ich man dich, herre gût,
daz du so groz armuet
in dirre werlt erlitten hast
unt so dick armer gast
bistu gewesen gewillichlich
unt du doch uber elliu rich
gewaltich chunich unt herre pist
und allez undertan ist
swaz chriuchet, fliuzet, fleuget
oder pain ze der erde peuget,
unt liez dich doch, hohen fursten,
hie hungern unt dursten
unt auch durch mich friesen.
daz woldest du dar umb chiesen
daz du daz verlorn schaefelin
wider prechtest an die fûre sien.
mach mich, lieber herre, fruet
und gib mir willige armuet;
mach mich armes mûtes,
daz ich dehaines guetes
immer icht gedenche
daz mein sel chrenche.
durch dine groze guete
nider mir mein gemuete,
daz ie nah der werlde stuent.
ich tet noch als die toren tuent,
mir was mit hohvart wol,
diu mir armuet nidern sol. amen. hie wart got zehous geladen.
ich man dich, suezer herre, me,
do du ze bethanie
chom in gegangen;
da wurde du schone enphangen
von ainem der was symon genant
unt was ouzezich bechant,
mit dem æz du alle da.
maria magdalena,
ein hohe suenderinne,
diu wart dein da inne;
si hueb sich alzehant
da si dich in dem hous vant,
zu dir si paltlich gie
unt viel fur dich ouf iriu chnie,
groze reuwe si bescheinte,
uf die fueze si weinte;
ir zæher gaben so grozen val
daz die fûze uber al
da mit entwûch diu clar
unt trûchent mit ir har.
ir hercen riwe diu was groz:
ouf dein houbet si dir goz
eine salben, diu smacht so wol
daz daz hous wart so vol
des suzisten gesmaches.
< owe des ungemaches,>
sprachen die junger,< was flust ist daz!
wær daz nicht verchauft paz
um drihundert phenninge unt me
unt wer den armen gegeben ê
danne disiu wer geschehen?>
da gegen din munt begunde jehen:
< diu frowe hat nicht ubel getan,
ir muegt ze allen zeiten han
die armen, des muegt ir mich nicht:
ez ist geschehen ze ainer geschit,
si hat ez getan ze hugde mir,
darumb sprecht nicht ubel ir.>
symon der wirt gedacht,
dem ditz ouch versmaht:
< wær dirre ain wissage, als man seit,
so het er wol die weisseit
daz er bechande ditz sundic wîp,
diu da rueret sinen lîp.>
do antwurst du, herre min,
zehant den gedanchen sien:
< symon, ich han dir zesagen.> -
< maister, sprich, so wil ich dagen,
ich hoer gern dien mære.> -
< ez waren zwene schuldigære,
die solten gelten und heten nicht,
als noch dick geschit,
einem richem porgære;
ez was in paiden swære:
der ain solt niht ringe
want fuemf hundert phenninge;
er daz in dem herzen wac,
want er sorgen drumbe phlag.
der ander solt wan fuemzich dar.
du liez er in paiden gar.
sag, welher solt in lieber han?> -
< der, als ich mich verstan,
dem er me schueld verlie.> -
< nu hast recht, nu sich hie:
ditz weip chom her in
unt du gewunne nie den sin
daz du mir in dem house dien
gæbest wazzer zu den fuezen mein;
die hat si mit ir zæher entwagen.
ich wil dir furpaz sagen:
du chust mich nie an minen munt:
si hat mine fueze al stunt
chussens nie geloûbet.
du silbe mir nicht mein houbet:
mit oel hat si mein fueze
gesalbet mit salbe sueze.>
da mit, herre, chêrst du dich
gegen ir unt spræch:< maria, nu sich:
dine sunt sint dir gar vergeben.
ginc, du solt mit frid leben,
want du so sere minnest,
da von du frid gewinnest.>
sust wart si aller ir sunde erlost.
christ herre, der sunder trost,
la mich genaden vinden,
nu rûch ouch mich enpinden
von meiner hohen sunden pant
unt tu mir dîn frid bechant,
want ich zelange geslaffen han
in sunden, da mich niemen chan
von zerlosen wan du alein.
daz wol an der frowen schein
die du so gahes trostes
unt von siben veinden erlostes.
den gedingen han ouch ich
daz ouch du losest mich.
nu sende mir durch din triwe
so gar volchomen riwe
daz ich als diu sueze
min suend bewainen mueze
mit als reuwigen hercen
daz si mich also muezen smercen
daz mein ovgen wazzers unde
vergiezzen umb die sunde,
unt swaz ich, herre, han getan,
des la mich hie zepuze stan! hie erschain got pi dem mer.
ich man dich, herre lobesam,
daz dir was gehorsam
swaz iemens sin bevahen mach
unt des wilden meres wac,
ouf dem du gieng, herre mein,
eins nahts zu den jungern din,
da in tet maniges windes stoz
ouf dem scheffe vorhte groz.
du gie also ouf dem lande,
dehain junger dich bechande.
du si dich sahen zu gen,
siu begunde groze vorhte besten,
daz si schriren loute.
din stimme in bedoute,
du spræch:< niht furht iu, ich pinz christ.>
sande peter sprach:< ob du ez pist,
so haiz mich ûf daz wazzer zu dir
gen.> du spræch:< chum her zu mir.>
du gie er alzehant da hin.
du chom ein grozer wint gegen in,
du chom in groziu vorht an,
zehant er sincken pegan.
du rueft er unt mant dich,
er sprach:< herre, nu lose mih.>
du begrif du in pei der hant
unt zueg in ouz alzehant;
du spræch du:< chranckes gelouben pist du,
war umb hast du zwivelt nu?>
du gie zu in, du gelack der wint.
< du pist des waren gotes chint,>
also sprachen die junger du.
nu tue mir, herre, ouch also
unt rek mir helflichen din hant
unt tue mir din helfe bechant.
von disem wage mich erheb,
want ich jamerlichen sweb
ûf disem wûtendem mer.
din genad mich erner:
mich tribent die winde entwer,
îezu hin, îezu her,
da von ich dicke sincke.
hilf ê ich ertrincke,
ginc in daz schiffelin zu mir,
so geligent die winde schier,
ich mein der sunde winde,
die mich dicke swinde
ûf der werlde mers wage
tribent in veindes lage
mit posen gedancken.
du waist mich, herre, so chrancken
daz ich den niht mack wider sten
du wellest zu mir inz schifel gen,
ich main in meins herzen grunt,
so sten ih ûf unt pin gesunt. amen. hie spiset unser herre fumf tousent mensh
ich man dich, herre wîse,
daz du mit luetzel spîse,
als ich daz gelesen han,
spisest fümf tousent man
ane wîp unt ane chint,
die nicht in der zal sint,
der ouch vil an der stat
von der spise wurden sat,
von fûmf proten girstein
( die het ain der junger dien)
unt ouch von vischen zwein,
daran din gothait schain,
du si alle gazzen genueck,
daz man dennoch von in trueck
der prosem zwelf choerbe vol,
unt heten doch gaz alle wol.
nu ruech mich, herre, spisen
mich armen un wîsen
mit den prosem, des ist mir not,
wand ich han der genaden prot
laider dicke verworcht,
du sund ich unervorht.
nu ruech mir genade geben,
daz ich ouch muz leben
mit rainem gemuete
durch deine vaeterliche guete! amen. hie gie unser herre uf den perch ze tabor.
ich man dich, lieber herre mein,
daz du mit drin jungern dien
gie ûf den perc ze tabor peten,
als du tæte an manigen steten:
peter was der aine,
der ander johannes der raine,
der drite johans pruder jacob,
die dir dicke sagten lob.
du ir chomet oben ouf den perck,
du erzeigst du gotlichiu werck:
du verwandelst du dich vor in,
daz nicht bevahen mocht ir sin.
dein antlutz gab nah sunnen schin,
da wart daz gewant dien
licht unt wiz als ein sne.
da geschach dennoch noch me:
da erschain, als ich ez las,
moyses unt helias,
die reten mit dir da;
do sprach sand peter sa:
< wir muegen wol hie genesen,
uns ist gut hie das wesen;
ich gesach so wuennechlich stat nie,
mach wir driu gezelt hie:
dir einez, daz ander moyse
unt daz drit helie.>
ouz einer liechten wolcken sprach
des vater stimme, do daz geschach:
< ditz ist mein sun, an dem ich mir
pin wol gevallen, dem schult ir
willichlichen hoeren.>
diu vorhte begund toeren
die junger, daz si vielen nider;
du rûf si unt troestest si wider:
< wol uf, wir schulen hinne gen!>
du sahen si da niemen sten
wan dich, jesum, aleine.
du spræch du, herre reine:
< ir shult der geschit gedagen
unt niemen nichtes da von sagen
untz des menschen sun erstê
von dem tode unt nicht ê.>
nu erleuht mir, lieber herre gût,
mein valschen wanckeln muet
unt erschien mir in dem herzen mien
mit der genade sunne dien,
verwandel durch dine guete
min vil unstaetes gemuete
ze ewiger staeticheit,
daz ich dir dienstes sî bereit
alle nacht unt alle tage
unt nimmer lobes dines gedage. amen. hie hiez got drei toten uf sten.
ich man dich, herre tuegenthaft,
daz du mit goetlicher chraft
dri toten hiez ûf sten.
zu dem ersten woldest du gen
in daz hous, daz was ein magt,
eins fursten tochter, als man sagt,
von der sinagoga;
di hiez du ersten al da
unt gerûchst dem vater wider geben. -
dem andern gæbe du daz leben
zejerusalem an der porte;
der was, als ich ez horte,
einer sun der muter sin,
diu um in tet groze chlage schin.
du du gegen dir sæhe tragen,
unt du vernaeme grozez chlagen,
du gie du gegen im an der stat.
diu muter dich genaden pat;
gegen der bare begunde du gen
unt hiez den jungelinc uf sten.
du er saz der ê was tot,
du wart geringet der mûter not,
want si von alle ir laide schied.
dar um lobt dich elliu diet. -
den driten hiez du ersten alsus,
daz was din vreunt lazarus,
der da nach der schrift sage
dri tag in dem grabe lage;
du gie du zu dem grabe
unt hiez den stain nemen ab;
daz geschach, man tet in hin.
du wainst du unt rûfst dar in:
< lazare, stand ûf unt chum her!>
alcehant erstuend er
mit gepunden fuezen unt handen.
da von sich erchanden
der juden vil unt gelaupten an dich. -
nu erbarme dich, herre, uber mich;
dise dri toede ligent an mir,
des gib ich mich shuldik dir:
ich han mit gedancken,
den poesen, den chrancken,
mein sel dicke ertoetet
unt sunden vil genoetet.
hilfe mir, herre, daz ich erstê
von disem toet, als du tæt ê
in dem house die magt.
mir hat mein munt den tot bejagt,
den andern vor der porten:
mit sundichen worten
han ich die sel dicke ermort.
nu chûm, herre, aller tugent hort,
erloese mich von den toeden wider
in den ich lige von vorchten nider.
zedem dritem mal han ich erslagen
die sel min( daz muz ich clagen)
mit maniger suntlicher tat,
diu mir die sel erfuelt hat
mit der sunde sôde;
des ist si in dem toede
leider al zelange gelegen.
nu rûch mich von dem tode wegen,
daz ich loblich erstê,
daz ich gesunde nimmer mê. amen. hie maht got plinten sehen.
ich man dich, herre, darunder
aller deiner wunder
die du hie hast getan,
machtest manigen plinten man
gesehent unt teat ouch da pei
maniges siechtumes vrei
paidiu man unt weip.
den chrumpen gæbe du gerechten leip,
die ousezen machest du gesunt,
die toeren gehoerent, der stummen munt
mahst du, herre, sprechent wol,
des manic herze wart vreuden vol;
die behaften du erlostest
die armen du trostest.
du hast getan hie zaichen vil,
von den ich nîmer sprechen wil,
want diu rede wurd zelanc;
ouch ist mien sin gar cechranch
daz ich ez wol den leuten
gar muege pedeuten;
da von muz ich ez lazen
unt mich der rede mazen.
du hast hie manigen sundære
bechert von siner swære;
daz ist ouch besunder
ainz der grozisten wunder
die du ie begie unt noch begast,
want du selbe gesprochen hast:
< aller engel vreude wirt gemert
so sih ein sunter bechert.>
nu bechêr mich, herre, des pit ich dich,
leg deiner wunder ainz an mih
unt becher mich gænzlichen,
das in dem himelriche
die engel gevreut werden von mir,
unt erzunde mein herze schier
mit dinem minnefiwer
unt mah mir sunde tiwer. amen. hie rait got ze jerusalem in die stat am palmtag.
ich man dich, lieber herre gût,
diner grozen diemuet,
daz du ain esel hast geritten
mit so gar diemuetigen sitten.
do du, hoher chaiser riche,
so gar diemuetliche
rite gegen jerusalem der stat,
sûmlich streuten ir wat
gegen dir ouf den weck zehant;
die ander trugen in der hant
von palmen este unt streutens dar;
von chinden chom ein michel schar
mit lob gegen dir zeder selben vrist:
< gelopt sei der da chomen ist
in unsers herren namen da her,
gelopt seist du immer mer!>
alsus die schar jungen
din lob mit lobe sungen
unt sprachen:< tu uns sælic schir
in der hohe bi dir!
lob unt ere, suezer christ,
si dir gesungen, want du pist
unser chunich unt wil ouch sin
ein loser des volckes din.>
von dem tage trachten si ouf dich
die juden unt besprachen sich
wie si an gewunnen dir daz leben;
si jahen daz si dir wolten geben
holtz in dinem prôte,
daz man dich alsus tôte.
ein pischolf zeden ceiten was,
der was gehaizen cayphas;
der wîssagt daz,
er sprach:< ez ist michels paz
unt ist nutzer daz ain man
( als ich iu beschaiden chan)
fur alle die werlt lied den tot,
denne daz immer wernde not
alle diu werlt muese leiden.>
nu hueb sich grozes nîden
von den juden gegen dir.
suezer christ, nu hilfe ouch mir,
so du, herre, chumftic pist,
daz ich dir zeder selben vrist
loblich begegen also
daz ich da von werde vro,
als dich diu chint enphiengen
diu loblich gegen dir giengen. amen. da wart got verraten.
ich man dich, herre, du daz geschach,
daz du churzlich darnach
wurde verraten.
we in die daz tâten! da begie got mandat.
ich man dich, herre sueze,
daz du der junger fueze
diemûtlich twuege,
ein tuech um dich du trûge,
da mit dus zeflîze
trûckents, daz was weize.
do du chom zepetern hin,
er sprach:< ich han wol den sin
daz daz nimmer mag gesin
daz du mir twahest die fuze mein.> -
< unt twahe ich nicht die fueze dir,
so gewinnest du nimmer taile mit mir
noch dehainer slaht phliht.> -
< herre, ich spriche die fueze nicht,
sunder haupt und hende,
das wasche wis an daz ende.>
du spræch du, herre, offenbær:
< ir seit rein unt doch nicht gar.>
du chantst in wol an der stet
der dich under in verraten het.
da von spræch du:< ir seit rein.>
want judas was bi in gemain.
da mit du, herre, sæze,
mit den jungern du eze,
mit in begie du dîe mandat.
< under iu mich einer verraten hat,>
spræch du; do fragt ieslicher dich
< herre maister, mainst du mich?> -
< der mit mir die hant sin
peutet in die schuzel min.> -
< maister,> sprach judas,< pin ichz der
der dich verriet, oder wer?> -
< ja, du hast ez erraten;
nu shuel wir mandaten.>
du segenst ob dem tische daz prot
daz in dein hant guetlichen pôt:
< nemt hin, ditz ist mein lîchnam.>
diu spise den dein wol gezam.
da mit segenst du den wein:
< hie pi shult ir gehugen min,>
spræch du,< nu trinchet mein pluet;
als oft als ir daz tût,
so gehuget mein da pi,
daz ich iwer loser sei.>
juda pôt du ein sniten,
die az er gar unvermitten.
mit der fuer der tivel in in,
du wart vercheret al sein sin.
do gie er dannen al zehant
unt chom da er die juden vant.
er sprach:< was welt ir geben mir?
ich antwurt iu gevangen schier
jesum.> des waren die juden vrô.
sus chomen si zegedinge do:
um driezic phenninge verchouft er dich, suezer christ.
owe, was noch judas ist,
die dienen liechnamen unt din pluet
verchaufent dicke um minner guet.
genade, herre, erbarme dich
genædilichen uber mich!
ob ih dich ie verchauft hab,
des la mich hie chomen ab,
daz ez mir hin nicht werd gespart,
want ich mich nie han bewart
gar rain an miner gewizzen;
ih han mich ie geflîzen
daz ich der werlt diener was,
unt han dich dicke als judas
verchauft an den christen
mit poesen hinderlisten
unt nam also dinen lichnam,
da von mir nie wol gezam
diu gotlichiu spise;
da von pin ich unwîse
worden, herre gût;
an dir, an dinem plût
pin ich worden schueldic.
herre, wis gedultic
gegen mir vil armem suntær
unt ring mir meiner gewizzen swær. da tet got sein not chunt.
ich man dich, herre, do dir chom diu cît
( als uns diu schrift urchunde gît)
daz du die marter soldest
leiden als du woldest:
do gie du mit den jungern dien
in ein garten, want ez solt sien.
du sagest in al din not:
< mein sel ist trouric untz in den tot;
seit hie unt waht mit mir!
ir wert alle flutic schier
unt beginnet von mir fliehen
so ir mich hin seht ziehen.>
du sprach sand peter zehant:
< ich tuen dir mein willen bechant,
des ich nimmer wil abgesten:
ich hin bereit mit dir ce gen
in charcher und in den tot,
des wendet mich dehain not;
ob in allen diu flûht geschicht,
ich fleuhe benamen von dir nicht.>
do spræch du, suzer jesu christ clar:
< peter, ih sag dir fur war,
daz solt du gelauben mir:
ê heint der han chræt zwir,
du hast drîstunt verlaugent mien.> -
< herre, des mag nicht sein,
ich wil ê lîden den tot
mit dir unt der marter not;
ich verlaugen din niht,
swaz halt anders mir geschit.>
do spræch du, herre, zu in:
< nu wacht und pittet, ich wil da hin.>
du gie ein lutzel dan
unt hûb daz erste gepet wider an:
< vater min von himelrich,
ich pitte dich( unt sei ez pettlich)
daz ich uf der erde
der marter uber werde;
doch ergê der wille din,
herre vater, unt nicht der min.>
do gie du an den stunden
da du die junger funde.
die sliefen alle; do spræch du:
< symon. slêfste du nu?
mochst du nicht eine weile mit mir
wachen? sih, er chumt schîr,
er nahet sich der mein leben
hat in der sundær hende geben.
nu pittet unt waht
daz ich nicht werde verswacht.>
du gie aber pitten me
unt spræch daz erste gepet als ê.
du gie du zu den jungern wider;
die lagen aber im slaf nider,
ir ougen waren betrûbet
unt siu uf sorgen ûbet.
do gie du sa zeder dritten stunt
mit gestrackter venie. uns tût chunt
diu schrift daz du an der stet
lenger spræch din gepet;
do wart din angest also groz
daz plutic swaiz von dir floz,
daz din suzer lip clar
mit pluet was zeflozen gar,
daz diu erde durch din gewant
wart wol feutich zehant.
der grozen angest man ich dich;
nu pitte ich, herre, daz du mich
behuetest vor angestlicher nôt,
daz ich immer wernden tôt
iht verdîne in disem leben;
unt gerûch mir andaht geben
ze minem gebet, suezer christ,
durch daz gepet daz du ze der vrist
mit plutigem swaiz teat,
unt mach mich so stæt
daz ich nimmer mêre
gewenck von diner lere. amen. da ward got verchouft.
ich man dich, du man dih verriet,
wie man den juden um dich beschiet.
judas sprach zu den juden:< nu nemt war:
den ich da chusse an der schar,
den schult ir vahen, daz ist er;
unt habt in vast unt dennoch mer
fuert in gewerliche,
daz er iu niht entweiche.>
du besampten die juden sich
als si wolten vahen dich;
daz geschach zemitter nacht.
do het du daz gepet vol pracht,
du gie du, lieber herre mein,
wider zu den jungern din.
die sliefen aber, do spræch du:
< nu slâft unt ruwet nu,
er nahent, der mich verraten hat;
nu stet ûf unt ge wir, daz ist min rat.>
an dem wort chom judas
...
unt mit im ein menige groz
mit stecken unt mit feusten ploz.
judas do nicht soumt sich,
er gie zu dir unt grûzt dich
( sein gaist was ungesuezet):
< maister, wis gegruezet,>
sus sprach er( han ich vernomen). -
< vreunt, war umbe pist du chomen?
geist du des menschen sun hin
mit chussen? das ist nicht sin.>
also spræch du, herre gût;
erstainet was der juden muet.
do fragtens ze der selben vrist:
< wa ist nu jesus christ?>
do spræch du, sueze:< daz pin ich.>
zehant vielen si hinder sich
ûf die erden ver tote algelich.
do spræch du aber gar minnechlich:
< ich sagt iuz ê daz ich ez pin;
ob ir mih sûchet, so lat hin
dise junger mit fride gan.>
peter daz swert fûren began
unt slûg des fursten chnehte
sin or ab, daz rehte.
do spræch du:< stoz in din swert!
waist du nicht, het ich gegert
ze meinem vater, er het mir gesant
vil engel, die daz heten erwant.>
du hailest im daz ôre wider an
sam ez wunden nie gewan.
du gaben die junger alle die fluht
unt die juden erzaigten ir unzuht
an dir an den stunden:
die hent si dir punden
unt fûrten dich gevangen
mit schalle gegen der schrangen.
peter volget dir verre nach
untz er rechte besach
was si mit dir taten
die dich gevangen haten.
nu man ich, herre, diner vancnust dich,
daz du mir helfest, herre, swa ich
in tivels vancnusse sei,
daz ich da von schîr werde vrei,
od swa mich dew werlt bevangen hab,
da gerûch ouch mir helfen ab,
oder min lîp pose:
da von mich, herre, lôse
durch die vancnusse din
unt hilfe mir daz ich muz sin
meines leibes maister wol,
unt mach mich deiner minne vol,
daz ich dir nicht entrinne,
unt pint mich mit deiner minne! amen. hie sagt nichodemus wie got wart gemartert.
allererste wil ich tichten
unt die leut berichten
von diner marter, suezer christ,
wie ez allez dort ergangen ist,
also schreipt uns nichodemus,
der berichtet uns da von sus
wie ez alles ergie unt wie ez geschach,
want er ez allez horte unt sach;
da von chund erz gesagen.
ab ich muz min maister chlagen
daz ich dem so fru entran.
ob ich ez nith wol berichten chan,
als ez der materie zimt,
min gût wille ez mir nicht benimt,
benem mirz nicht min unchunst.
da bedarf ich gueter leute gunst,
daz ir mir got helfet pitten
daz er mit væterlichen sitten
mir die sinne also berichte
daz ich ez also getichte
daz er da von ge eret sei
unt ich pleibe gespotes vrei. amen. diu materie hebt sih an.
der romær wirde hie bevor
so hohe swept mit wird enpor
daz in was lutzel iemen wider
paidiu ouf unt nider.
die fursten namen ir rechte alda
ze jerusalem unt anders wa,
in manigen landen wieten.
nu was pei jesu christi ceiten
ein chunich zegalilea
dem die fuersten warten alle da;
der was herodes genant.
der het leut unt lant
und scepter unt chrône
von roemischem chaiser schône;
dem mues er undertænick wesen,
als ich ez an der schrift han gelesen.
du was pilatus pi der ceit
rihter unt het des streit
daz erz gerichte nicht wolde han
von herode unt den pan.
du fûr er gegen rome dan,
von dem chaiser erz gewan.
herodes was umbe daz
pilato veint unt gehaz;
der haz wert lange under in,
daz ir itwederz sin
dem anderm was gevære.
ditze bechant mære
tût uns um ir veintschaft chunt;
diu wert so lange untz an die stunt
daz gevangen wart jesus.
den sande do pilatus
herode, do wurden si gar
versûnet. nu nemt war:
swer noch hiute veintschaft hat
unt gotes lichnamen dar um lat,
der ist poeser sunder wan
dan dise poese zwene man;
die wurden versunet cehande
du in einer dem anderm sande.
nu leg wir die rede nider
unt griffen an die materi wider;
wie ez umb christes marter ergie,
daz wil ich iu chunden hie;
die rechten warhait ich ew sage.
nah christes marter am vierden tage
du sagt allererste nichodemus
wie gemartert wart jesus,
unt hiez daz schreiben ebrayschen an,
da von wirz in latin han;
von der latin han ich ez praht
zetiusche in die andaht
daz got da von werde
gelopt ûf der erde.
ez ist geschehen zeware
an dem neunzehentem jare
pi romîschem chaiser tiberio
unt an dem neuncehentem jare do
herodes het daz chunchrich
zegalilea gwaltichlich;
unt du pilatus richtær was
unt johannes unt cayphas,
die fursten, priester waren
zejerusalem pei den jaren
( als uns diu schrift urchund geit)
in des abrullen zeit
des manoed am ahtem tage:
do geschach ditz, als ich iu sage,
daz jesus wart gevangen.
do chomen die juden gegangen
zu pylato dem rihtære
unt sagten im diu mære
um woe si in heten pracht dar.
si sprachen:< pylato, nu nim war
was wir hin ze im zesprechen han:
er hat sich des ouz getan
er sei chunich, damit er
hat geswacht den chaiser her,
unt giht ouch da pei
daz er gotes sun sei.
swer daz tût, daz hab wir wol,
daz man den dar um toeten shol.
dar zu pricht er unser ê
unt tût dennoch me:
den samztage er zeprochen hat;
daz lebn er pilleichen dar umbe lat.
er chan sich mit zouberlisten
unt mit zaichen fristen;
die ousezen macht er gesunt
unt entsleuzet der stummen munt,
die plinten macht er gesehent;
da von si im hailichait jehent.>
an disen dingen ruegten si in.
du sande pilatus da hin
sein leufel, ein stolzen chnaben,
der sich wol chunde an tugenden haben;
er trueg tuech reine wize
umb sinen hals mit fleyze,
als man noch enhalb meres phleget:
ieslicher sich der chost beweget:
al dar nach unt er ist gestalt,
er si junch oder alt,
dar nach und er daz tuech trait.
do gie der chnap gemait
da er den suezen jesum vant,
unt prait daz tûch under in cehant
fur in ûf di erden
unt hiez dar uf den werden
gen in die schrangen werdechlichen,
den hohen chunich reichen.
do daz die juden sahen,
si begunden in harte versmahen
daz er so erberlich solde gen:
si begunden pilatum besten
mit grozem chradem dar umbe:
< war umb hat der tumbe
disen so schone her in pracht?
wes ist da mit gedaht?
er solt mit schergen stimme
praht sin unt mit grimme,>
sprachen die juden,< daz wær recht.>
pilatus fragt do den chneht:
< war umbe hast du daz getan?
daz solt du mich wizzen lan.>
du sprach er:< herre, daz tûn ich;
du sandest ze alexandern mih,
ze jerusalem sah ich daz
daz er uf ainem esel saz
unt rait in die stat alsus,
dirre hohe herre jesus.
die ebraischen chint alle dar
chomen al unt namen sein war;
gegen im si lobeleich giengen,
mit gesang si in enphiengen;
si trugen plvemen unt este
von olpaum aller peste
unt streuntens under in zehant
unt dar zu ir gewant,
unt sungen in loblicher wîs:
« osanna in excelsis. »
des chund ich mich nicht verstan,
wand ich pin ein haindnischer man.
du pat ich siez ze bedeuten mir.
« tu uns sælich pi dir
in der hohe, » sprichet daz.
da von het ich in gern paz
unt schoner gewîset;
ich deuht michz gepreiset
mocht ich ez paz haben getan.>
alsus sprach der hofsche man.
do pilatus daz erhorte,
ein tail er von dem worte
erschract, do er ims verjach;
zu im er guetlichen sprach:
< nu wies in mit dir hin wider fûr
und nach diner wille chûr
unt du in wis her wider in
als dich lere dines hercen sin.>
des was der chnap gemait,
er was des dienstes im berait,
er weist in schoner nu denne ê,
daz tet den juden von hercen we.
daz tuech er under in prait,
dar uf er in in lait,
als er da vor het getan.
du nigen diu chriuce unt die man
die der chriuce phlagen.
do begunden die juden pagen,
daz si nigen gegen christ.
< ditz sint zouber liste,>
sprachen die juden gegen in.
doch heten si genigen im da hin,
dem suezem jesu zeeren.
do begunden sich meren
der juden haz unt ir geschrai:
< owe, heya unt hay!
pilatus, zwiu gestatest du des?>
er sprach:< ir herren, nu sagt mir wes?> -
< daz ditz umpild hie geschit,
daz man dise nigen siht
gegen jesu dem trugnære.
la dir ez wesen swære
ob du hast mit dem chaiser phliht!>
pilatus sprach:< lobt ir des niht
daz diu nîgent gegen im?
dar an ich iwern haz vernim;
ew solten diu zaichen
pillichen ewer herce erwaichen.>
da mit chærter sich dannen
unt redt mit den mannen
die der chriuce phlegten,
war umb si sich wegten
unt in diu houpt so nider sigen
daz si jesu zeeren nigen.
si sprachen:< daz ist ain wunder;
ir wizet wol besunder
daz wir sein haiden alle drei
unt sein der gewizen vri
daz wir jesum nicht peten an;
ez ist an unsern danck getan.
wir mochten uns nicht haben wider,
diu chriuce uns mit in zugen nider,
daz wir muesten nîgen dar.>
do wurden die juden betruebet gar;
pilatus von dem worte
erschricte, du er daz horte.
do giengen si ouz der schrangen dan
unt erwelten zwelf ebraisch man,
die sterchisten die si haten.
si pûtten unt paten
daz si der chriuce phlægen also
daz si dar umbe ith wurden unvro;
si sprachen:< daz gelaubet:
man sleht iu ab dew haubet
ob ir iu indert naiget
unt im dehain er erzaiget.>
des ieslichem chriuce viere
wurden gestalt schiere
die ir phlegen solden;
dar an si ervinden wolden
was an disen dingen wære war.
nu hiezen si jesum aber dar
ze dem drittem mal in weisen.
der chnap ist wol zepreisen,
daz er shone mit im gie
( durch dehain vorcht er daz lie);
er weist in shône als ê hin.
do begunden aber wider in
deu chriuce unt die zwelf man
nîgen, als jene heten getan,
shone alle geliche
dem chunige von himelriche,
der da tet groze diumuet schein;
er gie dar als ain læmplein
daz man da fuert zu der flaischpanch.
pylatus von dem stuele spranch
er schracht von disen dingen.
du sah man in dringen
ein potten, der warf mit sinnen,
von pilati wirtinnen
was der pote dar gesant,
diu was procula genant.
der pote sprach zu pilato:
< dir enpeutet dein housfrowe also:
« du solt dich dehain gerith an
nemen um disen rechten man;
ich han heint in jamers sitten
grozen ungemach erlitten
in dem troum von im,
da von dih von der rede nim. »>
du schriren die juden alle
mit ungefuegem schalle:
< daz hat er aber mit zauber getan
daz ir getromet ist da von,
ez ist von zauber chomen.>
pilatus sprach:< hast du vernomen
was dise gegen dir sprechent?
ich enwaiz was si an dir rechent;
ir chlage ist gegen dir mancvalt.> -
< ain ieslich man hat wol gewalt
ze sprechen ubel unt gût;
da sehe er zu der daz tût,>
alsus antwurt im christ
gedultichlichen ze der vrist.
< was?> sprachen die juden do,
< wir wizen wol daz dem ist so
daz du von unê pist geborn>
- daz was sumelichen under in zorn -
< um die unschuldigen chint,
diu durch dich elliu erslagen sint
( von dir diu geschit geschach),
dar umb man fliehen sach
den vater unt die mueter dein
inegipte, dar an wart schein
daz si hie nicht mochten wesen
noh pei ir volck wolden genesen.>
daz was genûgen under in lait
der juden unt sprachen mit semftichait
er enwer geborn von unê;
ez tet sumelichen under in we
da si so unbeschaidenlichen
gegen im schriren alle geliche.
du pilatus siu nicht mochte
pezern als ez im toehte,
daz si ez heten lazen
( si wolden siz nicht mazen),
er sprach zejesu:< was tuen ich gegen dir?> -
< daz dir enpholhen ist gegen mir,>
sprach jesus aber gedultichliche,
der hoher chunich von himelriche.
< moyses unt die propheten
lange vor heten
gesprochen von der marter mein
( da von sol ez also sein)
unt von meiner urstende.> -
< nu hoere die missewende,>
sprachen die juden an der stat,
< war selbe verjehen hat!
was bedurf wir gezeuge me?
du solt uns richten nach der ê.>
vil der juden wainten,
dar mit si wol beschainten
daz in dar an nicht lieb geschach.
du daz wainnen gesach
der richter pilatus,
er unt nichodemus
versuehten ir chunst und ir list
ob si mochten jesum christ
mit dehainen dingen
von den juden pringen.
die alten daz widersprachen,
die ir haz an im rachen.
do stuend ainer ouf unt sprach:
< siechen man mich ligen sach
aht unt drizik jar,
do macht mich gesunt gar
jesus da ich lag erlamt.>
also taten die andern alsamt
die er gemachet het gesûnt;
die stuenden ouf an der stûnt
unt sagten dem richtære
diu bechanten mære
waz er genaden het getan
an vil manigem siechem man,
unt taten im ouch daz chunt
daz lazarus von im erstuent,
der untz an den vierden tak
toter in dem grabe lak.
der goetlichen ere
erschrachte pilatus vil sêre
unt wolt in haben lazen.
do schriren si lout unmazen
die juden unt erzaigten ir haz:
< benamen unt tuest du daz,
so wiz wir wol daz du niht pist
des chaisers vriunt, und læst du christ.>
das was pylato vil swære
unt wart den juden gevære;
er sprach:< ir wart stritick ie
wider got, der iuch hie
mit gewaltiger hant
fûrt ouz egipten lant
unt almitten durch daz mer
unt trancte pharaonis her;
durch iuwern willen daz geschach,
wider in man iu ie streben sach.
er gab iu inheremo
daz wazzer ouz dem stain do
unt regent iu himelprot her nider.
dennoch wart ir im wider
( ewer triwe was ie gegen im lam)
unt wart ouch ungehorsam
ewerm maister moysi;
sus was ew ie valscheit bi,
ir ampet fur got ain chalp
( alsus triugt iu der alp),
ir wart ie aller triwe vri;
da geht ir daz ich si
des chaisers veint ob ich hie
jesum laz, den ir nie
mit redlichen sachen
schuldik mocht gemachen.>
damit er uz der schrangen
mit zorn wolt sein gegangen.
daz was den juden ungemach,
si schriren im lout hin nach:
< nu richt uns durch die guete din,
want gotes sun er giht sich sin
unt giht daz er chunik sei,
dar umbe daz im die chunige drî
ir opfer prachten; umbe daz
wurden diu chint ouf sin haz
von herode erslagen.>
do begund pilatus dagen
unt erchom da von ein tail;
er sprach:< sagt mir durch iwer hail:
ist erz den herodes da
suechte?> si sprachen:< ja.>
du saz er anz geriht nider,
do chomen si alle fur in wider
unt chlagten uber in als ê
unt machtens michels me
dan si da vor taten;
vaste si in umtraten.
pilatus fragt urtail uber in;
die juden sprachen:< nu fûr in hin
unt chreutz in, er ist des toedes wert.> -
< nu tût im selhe des ir gert,
nemt in unt riht nach ewer ê,
als es an ewerm orden stê!>
also sprach der rihtær;
daz was den juden swær.
si sprachen:< daz enzimt uns nicht,
unser ê uns des nicht giht
daz wir iemen shûlen toeten,
du solt uns ouch nicht noeten.>
du sluegen si zeder selhen vrîst
ûf sein hals den vil suezen christ
unt bespeiten in gar;
sin wuennechlich antlutz clar,
das al engel gerent an zesehen,
dem ist da smæchlichen geschehen:
sein schone gar bedeckt hat
maniger spaichel unflat.
nu was herodes in den tagen
in der stat, daz hort ich sagen.
pilatus du erhueb sih dan
unt lait jesu ain purper an
unt sand in herode hin;
er sach groezlich gern in
unt was sein innechlichen vro
unt wart sein vreunt dar umbe do
daz er in im het gesant.
herodes was chunick uber daz lant;
do was pilatus rihtær da
in der stat unt niht ander swa.
herodes zaichen wolt han gesehen
von jesu; des mocht nicht geshehen,
want er nie wort zu im gesprach.
daz was herode ungemach;
in douhte er het sin un ere
daz ern versmæhet so sere:
er lait im an ein wiz gewant
unt wart pilato wider gesant.
an daz gerichte er aver saz
unt sprach zu jesu:< nu sag mir daz
ob du der juden chuenick pist.>
do antwurt im jesus an der vrist:
< spriechest du selb von dir selben gegen mir
oder hatz iemen gesagt dir?> -
< nu pin ich doch ein jud nicht,>
sprach pilatus,< dein volck sein giht.>
do sprach do jesus gedultichliche:
< ezenist hie niht min reiche
in dirre werlt; wer ab ez hie,
so het ouch ich wol leut hie
die mich von den juden nerten
unt ir gewaltes erwerten.
dester grôzer ist sin mistat
der mich dir geantwurt hat.>
pilatus sprach:< des nim war:
din volck, dein fûrsten gar
dich prachten mir gevangen;
was hast du begangen?
des solt du mich nicht verdagen.>
jesus sprach:< ich wil dir sagen:
ich pin dar umbe her chômen
daz diu warheit werd vernomen;
der warhait ich ein gezeug pin.>
do sprach pilatus wider in:
< waz ist diu warhait?
daz hort ich ob mir daz wurd gesait.>
da mit gie er von im zehant
da er die juden stente vant;
zu den sprach er gar swinde:
< dehain sah ich an im vinde
dar umb er leiden sol den tot
unt dehainer marter not.
ich haiz in zuchtigen wol:
da mit man in lazen sol.>
do sprachen die juden alle gelich:
< du solt in toeten piterlich!
nu chriuze in, nu chriuze in,
daz wirt vom chaiser dein gewin.> -
< nu waz er ubels hat getan,
daz shult ir mich wizen lan.> -
< du sold daz wizzen daz wir
in nicht heten geantwurt dir
unt wer er nicht ain umpilliech man.>
do gie pilatus wider dan
unt sprach zu jesu:
< von wan pist du?>
jesus gab im ein antwurt niht.
des lasters nam pilatus phlicht;
er sprach:< redst du niht mit mir?
daz ist wunderlich an dir;
unt waist du nicht daz ich
han wol gewalt ce lazen dich
unt ouch zetoeten ob ih wil?>
der red was im gar zevil.
jesus gedultichlichen sprach,
want er sich mit worten niht rach
( sein tugent diu was manicvalt),
er sprach:< du hetest dehain gewalt
uber mih noch uber mein leben
want als vil als dir ist geben.
da von ich dir chûnde
dester groezer sunde;
die mich dir gevangen haben pracht,
wê in daz ir ie wart gedacht!>
die juden uz der schrangen
waren do gegangen,
daz si iht wurden gemeilet
so jesu wurde vertailet;
si douht in wer ubel geschehen
oh si in solten an sehen.
ez ist noch manges mannes sit
daz er sich rainen wil da mit
daz er daz ungern an siht
swa uber îemens leben urteil geschit.
peter chom gegangen hin nach,
ûf daz ende er geren sach,
wie ez umb jesum solt ergen;
zu dem fiwer er begunde sten,
want ez was unmazen chalt.
do chom gegangen ein dirn palt;
al si petern ansach,
zu im si paltlichen sprach:
< du pist ouch von galilee
jesus junger, man het dich ê
dicke pi im gesehen.>
peter wolt ir des niht verjehen
unt verlaugent sein cehant
unt swur er hiet in nie erchant.
alsus laugent er mit eiden
dreistunt umbescheiden.
do sach jesus petern an:
do gie er ouz, wainen er began;
wan er gedacht wol dar nach
daz jesus vor zu im sprach:
< ê den der han chræt zwir
heint, daz gelaube mir,
du hast dristunt verlaugent mein.>
daz was sines hercen pin.
pylatus zu den juden gie,
sin rede er wislich an vie,
er sprach:< was tûn ich jesu christ,
der ewer herre chunick ist?>
die juden sprachen offenbær:
< wir haben dehainen chunik furwar,
wan ein chaiser haben wir.>
pilatus sprach:< nu sagt mir:
sol ich iu einen lazen
der iu chumpt zemazen
ze iuren ostern, daz sei jesus.>
die juden sprachen:< nicht alsus.
hahe in unt laz uns barraban,
so hast du unsern willen getan.>
da schæin ir neit, want barrabas
ain morder unt ain æhter was
unt het manslaht begangen,
dar umbe was er gevangen.
pylatus liez in alle jar
ain gevangen, daz ist war,
zeir ostern. da mit ert er si;
des waren si ê gewesen vrî:
ez getet dehain richtær vor im nie.
dar umb er in barraban lie,
seit daz si sein hæten gegert.
er sprach:< wes ist nu jesus wert?>
< des toedes!> sprachen die juden cehant.
pilatus sprach:< ir seit geschant
sol ich iwern chunick chriucen.>
da beginnet diu rede sich spreucen.
von den juden er do gie,
jesum christum er do vieng,
er hiez in entnachten gar.
ze einer seule gepunten bar
da wart der hohe chaiser riche
geslagen so gar piterliche
daz sin suzer leip alda
wart paidiu rôt unt pla.
von starcken gaiselen daz geschach
daz niemen nichtes ganzez an im sach,
ez was cerhowen unt cerslagen;
daz wart gedultichlich vertragen.
uber al sin plût von im flôz,
daz ez in unt die seule begoz.
dar nach wart im sein houbet
gar pitterlich betoubet:
da wart im gedruckt in
ein scharfe chrone durnen
durch flaisch, durch pain, durch hirns march.
dise pitter marter starck
twanck im ouz dem houpt daz plût,
daz ez dem suezem christ gût
uber diu ougen floz zetal
unt in daz har uber al.
dar nach wart im angelait
von purper ein spoetlich chleit,
unt furt in gegen den juden dan.
do si in sahen zu gan,
si sprachen:< va, war her gat
der den tenpel ceprochen hat
unt in an dem drittem tag
hat wider pracht, daz was sin sag.>
die juden cherten allen irn fleiz
an spot unt an itwiez.
si viengen ouch durch jesum
symonem cireneum,
der alexanders vater was
des rôten, als ich ez las,
unt twungen in daz er mûs tragen
daz chriuce. nu hoert ich sagen
daz er gahes dar under lac,
want er guetes alters phlack:
im was ceswær des chriuces soum.
du laiten si den swæren poum
jesu ûf die achsel sein;
des ewigen vater schein
gedultichlich dar under gie
dar man in læsterlich an hie.
er trueg ez untz an die stat
( als mich diu schrif beweiset hat)
da er lait der marter nôt,
als im diu minne gebôt.
er wart an daz chriuce gestrackt
unt also pitterlich gerackt
daz man siniu lid gar
het wol gezalt sunderbar.
ez wart der raine sueze
durch hent und durch fueze
durch slagen mit drien nageln groz,
daz sein rainez plût floz
dar ouz den wunden gelich,
daz sueze plût goltvarwe rieche.
sus wart er erhangen, der gût,
der sere am chriuce pluet.
zwene shachær im beneben
erhangen wurden, die ir leben
heten mit umpilde
verworht ûf straze unt in vilde.
zwischen den hienck mitten
jesus begunde pitten
sein vater umb die
die in marternt hie.
der schæcher, der zeder winstern hant,
der was jesmas genant,
der was niht wol geloubhaft;
er sprach:< jesus, hast du die chraft
daz du gotes sun pist,
so loes dih unt uns an dirre vrist.>
der ander straft in dar umbe;
er sprach:< du armer tumbe,
daz du doch niht furhtest got!
was touckt dir in der not der spot?
wir leiden pillich den tôt,
wir haben wol verdienet al die nôt;
ab dirre herre nie ubel getet.>
do hueb er an sein gebet,
er rûft jesum mit andaht an:
< herre, gedenche armes man,
so chumst in dein reiche!>
christ sprach:< ich sag dir wærliche:
du bist heute mit mir
im paradise, daz sag ich dir.>
pilatus uber daz chriuce schraib
daz in gehugde piz her ab belaib.
< ditz ist jesus von nazareth,
der juden chunic, der hie stet.>
daz schraib man nach dem willen sein
ebraish, chriechis und latein.
die juden sprachen:< nicht schreib also:
« der juden chunic »; wir seins unvro.
du solt schreîben daz er sin jah.>
da engegen do pilatus sprach:
< daz ich geschriben han, daz ist geschriben.>
sus waren die juden vertrîben
daz si dar umbe reten mer.
die schrif las man hin unt her,
leut da genûge;
daz douht die juden ungefuge. hie enphal got sein mûter sand johanns unt sand johan sand mareien.
pi dem chriuce stuenden da
johannes unt maria,
mit vil grozem hercen laide
stuenden si da paide.
als si jesus stende sach,
zu in paiden er do sprach
von dem getriwem hercen sein:
< muter, sich: der sun dein;
johannes, sich: din mûter.>
die nam er do unt hûter
in sien phleg alcehant,
der suezen er sich underwant.
die juden chomen ouch aldar
unt namen seiner geberde war;
si sprachen zu im alsus:
< pist du gotes sun, jesus,
so ginck ab dem chriuce her,
so gelaub wir an dich immer mer.>
si spoten sein manigen ende,
si rakten gegen im die hende,
vaste si sich rachen;
si chnieten nider unt sprachen:
< got gruze dich!>
jesus daran niht chêrte sich
swie er wart gehandelt.
diu sunne sich verwandelt,
von siner not si iren schein park,
sich chluben die stainwende stark;
diu erde ouch an der stunde
vaste pittwen begunde,
sich zart des tempels umbehanc;
die liute erschracten und wurden chranc.
der sunnen schein wart gar verdacht.
iz wart vinster als diu nacht
von sext untz hin ze noncît.
die juden gewunnen grozen neit
von dem volk uber al,
ez hub gegen in vil grozen schal:
< benam der was ein rehter man.
was umpildes ist an im getan!>
die juden sprachen:< iz ist also chomen:
der man hat der sunnen genomen
ir schein, ez ist eclipsis
unt anders nicht, des gewis.>
jesus rûft lout ze none
under einer durnein chrone,
er rûft also:< hely, heli,
lamazabactani.>
daz pediutet sich sunder spot,
iz sprichet also:< mein got, mein got,
war umbe hast du verlazen mich?>
du sahen die juden hinder sich
unt wurden an sinnen unt an chreften lam;
si sprachen:< diser rueft heliam.>
swas dirre widerwarten was,
die jahen ob helias
nu chom unt in loese hie.
also jahen dise unt die.
jesus sprach:< mich durstet.>
swier doch was gefurstet
uber elliu chunic riche,
man pôt im pitterlich
ezzeich unt gallen;
daz mûs im missevallen.
als er do bechorte daz,
do tranc er sin nicht furpaz,
er sprach:< consummatum est.>
swen man daz an dem passen lest
daz sprichet:< daz ist geendet.>
des wortes mich ellendet,
daz ouch ich nicht geendet han
daz ich pillich het getan
nah dem pilde des herren mein,
des durchleuhtic prehender schein
wart durch mich so missevar
an sinem antlûtz clar. hie enphal got seinen gaist in seins vater hende
er sprach:< ich enphilhe dir, vater mein,
den gaist mein in die hende din.>
mit geneigtem houpt er do lie
seinen gaist. zu im her do gie
ain reter mit ainem sper,
daz was groz; da mit stach er
jesu durch die seiten
ein tîefe wunden weite
an der stat der hailichait.
daz sper al durch daz herze snait
unt macht durch da ein witen roum,
da von ain zwivaltic phloum
floz ouz sinem hercen guet,
der ain wazzer, der ander plueût.
daz geschach du er was tôt;
nu was vol der marter not. hie chlagt unser frowe underm chriuce irs chints tot.
maria disen smerzen sach,
der marter swert ir sel durch stach,
als ir ê sagt symeon
daz ir vraude jamers lon
prachte mit gesûche wider;
ir vreude sluech der jamer nider.
ir vræude do mit vollen was
du si christes genas:
swas si hiet vreuden an der geburt,
diu fur alle hie durch jamers furt
du si zu dem chriuce gie,
da jesus pluetic vor ir hie.
die jamærliche pliche
die erwachten ir herceschricke;
die marter die si an im laid,
rechte als ain swert durch sei snaid,
sein marter ir daz herze prach.
nu horet wie diu sueze sprach:
< owe mich, meins hercen troest,
was mich vræuden hat erloest
diu vil pitterliche marter dien!
owe, vil lieber sun mein,
wie hangest du so, herre gût,
daz dein schoene hat pedact din plût!
wie pist du erplichen,
dein schoene ist dir entwichen!
vil liebz chreuce, nu pit ich dich:
hab dich her nider unt la mich
zwischen meinen sun unt dir
daz er rûwen muz ouf mir,
ouf meinen prûsten, daz ist mein ger;
durch dein guete mich des gewer!>
der pet wart si gar entwert,
swie sis so innechlichen het gegert.
do pat si aver furpaz,
si sprach:< owe, wer geit mir daz
daz ih sterben mug fûr dih?
owe, lieber sun, nu sprich
war ich mich ellende
in minem laide nu wende;
want minem laid ist nicht gelich.
owe, sun, wie jæmerlich
du pluetic vor mir hangest!
nie grozer angest
gewan dehain mûter um ir chint.
alle frowen die nu sint,
die helfen chlagen mine not
um mines lieben chindes tot.
der mir ist vil innechlichen liep,
der hangt vor mir als ein diep
zwischen schæchern da zwein.
din schoen uber elliu schone schain.>
alsus chlagt diu vil sûze;
si chust sine fûze,
si chert sich hin unt dar
unt nam der wunden vil recht war,
si chlagt ieslich besunder.
ir sten daz was wunder,
daz si vor laide nicht viel.
daz wazzer ir ouz den ougen wiel,
die haizen zæher begûzen si;
ir herce was do vriuden vri,
grozen jamer si bescheinte,
von hercen si do weinte. hie chom joseph von arimatia unt nam unsern herren und begruben.
joseph von arimathia
sah jesum jæmerlichen da
an des chriuces galgen hangen;
do chom er gegangen
ze pilato an der stat,
umb den lichnam er in pat,
daz er in liz nemen ab;
pilatus josepen do gab.
der edel decurio
nam in ab dem chriuce do.
nu merchet an dem vil gueten
daz sine wunden plûten
do er wart genomen ab.
joseph lait in in sein grab:
daz was niw unt rain,
erhowen uz ainem stain,
darin nie mensche wart gelait.
joseph het sich wol berait
mit schoenen lilachen;
dar in hiez er in machen.
er bestat in schoen nach der ê
unt lait im mirren unt aloe
zu im hundert phunt dar in,
er chert zedienst im alle sein sin.
die juden daz grab bedachten
so si peste machten,
mit ainem stain, der was groz;
daz grab man vaste besloz.
die juden gedachten ouch dar an
wie in von pilato gewan
joseph unt wie er in
begrub. si sprachen:< den gewin
den er gewunnen hat,
der mûz im helfen an die stat
daz er beseuften mûz die zit;
den leip er uns dar umbe gît.
joseph mit nichodemo
muezen paid werden unvro.>
si ahten daz sis wolden
toeten unt jesus holden,
swas si der begriffen da.
joseph von arimathia
si do geviengen unt furten in hin,
in ein gewelbe wurffen si in,
daz was vinster unt starck.
si sprachen:< jesus wart nie so charck
daz er in hie muege gewinnen
mit allen seinen sinnen.>
die tûr si ser verslûzen,
rigel da fur si shûzen,
die waren isnein unt groz;
die rigel man fur shoz.
an diu sloz wurden gedrucht
insigel, diu nicht wurden verruckt.
annas unt caiphas
der sluzel phlagen, swas der was.
si wolten in nach ir hohcêit
er tôtet haben durch ir neît.
swie vast er was beslozen doch,
si schûfen im hûte dannoch,
die for der tûr lagen
und des gewelbs phlagen. hie shuefen die juden dem grab hût.
der juden fursten giengen do
zu dem richter pilato;
si sprachen:< wir haben dar nach
der wort die der trugnær sprach,
jesus, do er noch lept,
der ie wider uns strept.
er jach: « ich wil am drittem tag
ersten vom tod. » daz was sein sag.
da engegen schâf uns hûte
( und sprich gegen uns in gute,
swas du wellest, daz tue wir,
daz sich wol gefûget dir,)
daz in sein junger hie icht steln
unt sin tot da mit heln
unt jehent er sei erstanden
von des todes panden.
so wurde groz der christen schal
unde wurt der jungest irsal
vil ser den der erste,
unt ist islicher der herste
der giht: « ich han in gesehen.
daz enmac niht geschehen. »>
pilatus sprach:< nu hûtet wol,
als ir wizzet unt man sol
hûten; waz sol des mê?
hutet als ez iu an ge.
mine reter nemet gût,
von den daz grab wiert behût.>
die juden dingten mit in cehant,
silber phenninge unt gewant
gaben si den retern dar,
daz si des grabes næmen war.
si paten hueten flizchlichen:
< dar umb mach wir iuch riche.>
daz grabe si sus behûten.
nu hoeret an christ, dem gûtem,
wie loblich der erstûnt,
als uns da von chunt tûnt
die heiligen ewangelisten,
die wol die warhait wisten. hie erstuend got vom tod und fur zehel.
jesus, der vollen tugende reich,
fur ze helle gewaltichlich
unt prach der hellen porten.
er sprach mit starchen worten:
< ir hellefursten, tût uf diu tor,
der eren chunich ist hie vor!> -
< wer ist der eren chunich, wer?>
jesus sprach:< daz ist der,
der starck und der gewaltick
der herre an dem urliug sîg.>
da mit er die helle prach.
als in du adam an sach:
< ich sih die hant diu mich beschûf,>
alsus was gegen im sein rûf.
jesus die sein furte dan,
die sin willen heten getan;
die andern liez er dort fur war
pi den hellenschergen gar. hie erlost got josepen von dem charcher.
jesus fur du cehant
da er sin chnecht josepen vant
in dem charcher verporgen.
dar inne lag er mit sorgen.
durchliuchtichlich er im erschain
unt fûrt in drouz daz nie chain stain
an dem charcher wart verruckt;
von danne er loblich wart gezuckt
unt satz in arimathia,
da er belaib sorgen vri.
daz tet er gewaltige christ;
swie ez doch nicht geschriben ist
an dem ewangelio,
so ist ez doch benam also.
ez ist endlichen war
daz ern mit der gevangen schar
lost, daz was pilliech;
iz ist der warhait wol geleich,
wand er durch in gevangen was;
pilleich er von im ouch genas
des ersten er lobliche erschæin.
daz ist zwivel dehain
daz daz diu rechtiu warheit sei:
daz mugt ir versten da pey
daz er in loste zemitter nacht,
e die juden mit ir macht
chomen fur den chærcher,
den si des morgens funden lere. hie chom der engel zem grab.
ein engel chom von himelriche,
des chlait schien sne gelich
gaben, der gieng zu dem grab,
den grozen stain wielger ab
und saz oben uf den stain.
sin amplichk lieht vorhtlichen schain,
ez was durchliuchtick clar,
daz die hueter verzagten gar,
daz si fûr tôt vielen hin
ane chraft und ane sin. hie chomen frowen zem grab unt suechten unsern herren.
drei frowen chomen gegangen,
den engel sahen si verhangen
mit ainer schônen stole wiez;
ze sûchen was der frowen fliez.
si erschracten von der angesicht.
der engel sprach:< furht iu niht!
ir sûchet den gechriutzten christ:
wizzet daz er hie nicht ist;
er ist erstanden loblich.
nu get her allegelich
unt seht selben da er wart gelait.>
des waren die frowen du berait
unt giengen doch mit forhten dar
unt sahen drin: do was ez war.
er sprach:< ir frowen, nu get hin
zesein jungern unt sagt in
unt petern und den sein
daz er in welle erschein
in galilea wærlich.>
die drî frowen schieden sich:
die zwo giengen, diu dritte pelaib
want sei diu minne uf sûchen traib:
maria magdalena
pelaib pi dem grabe da.
wie offte si in daz grabe sach!
mit seuftundem hercen si sprach:
< owe, daz grab ist lære!
we mines hercen swære!
sûzer herre, wa vind ich dich?
owe, wer sol nu troesten mich?>
von hercen si do chlagte.
æin lutzel ez do tagte,
du erschain ir jesus der hæilere,
als er wer æin gartnære.
er sprach:< um weu wainest du, wiep,
wen sûchet so innechlichen din liep?>
du in maria an sach,
si chant sein niht, zu im si sprach:
< sag mir, hast du in ûf erhaben,
wa hast du in begraben?
zaig mir wa læist du in nider?
herre, nu gib mir in wider.>
pei namen er sei do nande,
sa ze hant si in bechande.
er sprach zu ir:< maria!>
do bechant si in sa;
diu vil ræiniu sûze
viel im fur die fûze.
do trat jesus hin dan:
< du solt mich niht ruren an,>
sprach er,< wand ich noch niht pin
zu meinem vater chomen hin.
du ginc zu meinen pruedern dar
unt sag in von mir daz ich var
ze meinem vater.> cehant si gie;
du widerfueren ir zwene hie
ûf der wekschaide,
johannes unt peter, die paide.
si sprachen:< was hast du gesehen,
maria? des solt du uns verjehen.>
si sprach:< gern, daz tûn ich,
wand er hat getrôstet mich.
ich sach des lebentigen christes grab,
da was der stain genomen ab.
ich sach da dennoch mêr,
des erstanden christes er
ich da nach minem willen sach;
der gûte guetlichen mit mir sprach.>
die junger sprachen:< wir schuelen ir daz
gelauben wol, si waiz ez paz
den die juden lughaft;
an ir mæren leit diu chraft.>
zehant schieden si von ir
unt liefen enwek als diu tir.
si chomen uf daz rechte spor;
johannes lief petern verre vor
und chom zu dem grabe ê hin,
er stûnd da vor unt chom niht drin.
der ander der hin nach da lîef,
den douht daz grab nicht zetîef
ern stige zehant hin ab
unt ersûchet daz grab;
unt vant da niht mer
wand diu tuech, diu zaigt er,
da christ was in gepunten;
niht anders wart da funden.
er sprach:< seht, ir gesellen,
alle die ez sehen wellen:
hîr in was gebunden christ;
daz grab noch also offen ist,
der lichname ist da funden nicht;
daz grab man offen stente sicht:
er ist loblich erstanden
von des todes panden.>
hie von si chraft geviengen,
von danne si do giengen.
darnach in vil churzer vrist
do erschain in der vil suzer christ:
petern, da er was aine,
( in troest der sûze raine),
loblich er ouch erschain
den drien frowen gemain;
die wolten in gern behapt han,
do mocht ez also nicht ergan. hie wolten die juden josepen uz dem charcher nemen; do funden si in nicht.
diu naht hiet ende, der tack was chomen,
do wolten die juden haben genomen
ouz dem charcher
josepen durch marter swær.
si sprachen:< er muz leiden den tôt
unt alls christ der marter not.>
die tûr si vunden vast verspart
unt mit hûte wol bewart,
sloz und rigel
unt diu insigel
die si heten dran gedrucht,
die waren nindert verruckt.
diu sloz si do entslûzen,
die tur si ouf schuzen,
in daz gewelb si drungen;
si wanten in wær wol gelungen.
do sahen si ainen prunnen da,
dær was entsprungen alda,
der was da nie geschen me;
dar in wart nach christen ê
josep getouft von christes hant
ê er in von vancnusse enpant.
die juden an den stunden
josepen da niht funden;
des erschrackten si vil sere:
< owe aller unser ere!
ditz ist mit zouber geschehen.>
des begunden si do jehen.
si schouten daz gewelbe gar
unt namen sein umb und um war
ob ez inder wær verschart.
do was ez allez wol bewart,
daz im niht enwar als umb ain grouz;
in het jesus gefurt dar ouz
durch ganze mower, durch versparte tûr,
het in gewaltichlichen hin fûr
gefûrt in arimathia.
der juden chrædem groz wart alda;
si gedahten in vil maniger liste
wie siz entsagten christe,
daz ez von nichte wære chomen.
< er ist mit zouberliste genomen,>
also jahen si alle.
si underslûgen ez mit schalle,
dem volk siz undersaiten,
mit listen siz ablaiten,
daz si wanten im wear also;
die weisen hæimlich wurden unvro. hie chomen die juden mit zorn unt sûchten unsern herren; du was er erstanden.
nu was ez wol chomen ûf den tack,
daz grab ouch umbehuet lak.
do daz die juden vernamen,
mit zorn si dar chamen;
daz grab si offen sahen.
do begunden si gahen
zu den huetæren:
< sagt an: wie ist den mæren?
wer hat uns jesum hie verstoln?
das hapt ir wan durch gût verholn;
ir hapt in geben um gût.>
des wurden die hûtær ungemût.
si sprachen:< im ist also nicht.
von himel chom ein engel licht;
des amplick gab so prehenten schein
daz wir von der vorhte sein
alle vielen fûr tôt nider;
des chund wir uns niht erholn wider:
wir lagen als wir wæren tôt;
wir chômen nie in solhe not.
drî vrowen chomen gegangen,
die wolten wir haben gevangen;
do chund wir uns gerûren nie;
swer da stûnt oder gîe,
dem moht wir noh enchunden
geschaden an den stunden
als chlain als umb ain per:
so chrank was unser aller wer.
der engel sagt den frowen
die jesum wolten schâwen,
daz er erstanden wære
von des tôdes swære.
daz hort wir unt sahen.>
die juden alle jahen:
< wie mocht ersten ein toter man,
dem allez daz ist getan
daz man toten liuten tût?
ir hapt in wan verchauft umb gût.>
du sprachen die hûtære:
< daz wæren fremdeu mære
ob irz gelauben nu soldet,
want ir im e nicht woldet
gelauben, du er pi iu was
unt vil manik sieche von im genas;
unt swas liut mit dem tyvel was behaft,
die wurden ledik von siner chraft.
er hiez die toten ûf stan
unt liez iu daz sehen an;
unt wolt im doh gelauben nicht.
ir saht ouch wol die grozen geschiht
diu an lazaro ergîe,
den er erchuckt von dem tode hie,
daz er biz an den vierden tac
tôter in dem grabe lac;
dannoch was iwer gelaub chranck.
nu sagt uns( unt hapt immer danch)
rehte wenne oder wie
ew si angewunnen îe
joseph euwer gevangen,
den ir wolt haben erhangen
und gemartert durch jesum christ.
zaigt ir uns den, wa der ist,
wir wellen iu jesum zaigen,
ir den lebentigen, wir den vaigen;
zaigt uns jennen, wir zaigen ew disen.
unt wer wir alle gewesen als die risen,
so mochte wir nicht gestanden sein,
so vorchtsam was des engels schein
der von himel chom hernider,
von des vorchten wir vielen nider.>
die juden sprachen:< daz tû wir;
josepen den zaig wir iu schir,
der ist ze arimathia.>
< so ist jesus in galilea,>
sprachen die huetær zehant,
< daz ist uns wærlich bechant,
daz hort wir den engel sagen;
heute lange ê ez begunde tagen,
do sagt erz den frowen
die in da wolten schawen;
er sprah: « christ ist erstanden
unt hat von hellepanden
manick tousent sel erloest;
er ist aller werlt æin trost. »>
do daz die juden horten,
die rede si zestorten;
si namen si besunder
und puten in gûtes wunder
daz si ez verdagten
unt niemen niht da von sagten:
< unt jeht daz er sei verstoln,
so wirt ez allez wol verholn;
dar umb geb wir iu swez ir gert.>
si sprachen:< des wert ir entwert,
daz wir der warheit nicht jehen;
des schol nimmer geschehen
daz wir daz umpilde began.
nu sprechet: wie stuend uns daz an
daz wir die leut alsus betrûgen
und uns selben an lûgen?
wir wizen wol daz jesus christ
von dem tôde erstanden ist;
des wiz wir wol die warhæit.>
diu red was den juden læit;
si sprachen:< ir seit gar unfrût;
wir geben iu so starches gût
daz ir immer getiwert sit.>
daz tribens untz an die zeit
daz si in putten so vil
daz si sis brachten an daz zil
daz si ir willen tæten
und jahen swes si si paten.
also verchert wart ir mût;
daz macht daz ubriges gût,
daz noch verchert manigen man
der ûf hovart nie mût gewan;
den hat daz gût verchêret schir
daz er gewinnet vil pôse gir.
alsus ceuhet diu mîete cehelle:
der sele gevelle
ist unrecht gewunnen gût.
owe, wie maniger ez noh tût
daz er sele unt er gît
umb gût in diser churzer zeit!
dem ist nach gût alwe,
der wænt daz er immer me
in diser wollust schul leben;
dem ist mit dem gut vergeben.
nu leg wir nu die rede hin
unt griffen an den ersten sin,
wie offte der sûze jesus christ
nach siner urstende erschin ist.
uns tunt die ewangelisten chûnt
er erschin hie wan cehenstûnt;
sumelich hailigen hort man jehen
daz ez ofter sei geschehen. hie erschain unser herre sand jacoben.
jesus pruder, jacob,
der got sprach ze allen cîten lob,
der het alle spîse versworren
daz er der nicht wold bechorn
er gesæhe jesum ê,
er wolt ê vasten immer mê.
do chom jesus zu im
und sprach:< pruder jacob, vernim:
« nu izze! ich pin dir selbe chomen. »
du daz jacob hete vernomen,
du wart er irrechlichen vro;
er sprach zu seinem herren do:
allererste ist nu ezzen zît;
din urstend mir vil freuden geit.>
jesus do von im verswant,
jacob du ezzen gie cehant,
der untz an den dritten tack
gevastet het, daz er nicht ezzens phlak. hie erschain got seinen jungern do si giengen von jerusalem.
jesus sein jungern zwein
uf dem weg lobliche erschein,
da si giengen von jerusalem;
er scied si da von zwiefels lem:
du ers in zwiefel sach,
er gie zu in und sprach:
< waz ret ir mit einander, waz,
unt seit gar trourick? und sagt mir daz
waz diu red mûg gesein.>
< du pist ein einec pilgreim
in jerusalem und waist des niht,>
sprachen die,< umb die geschiht
diu da ist in disen tagen
geschehen?> -< die schult ir mir sagen,>
sprach jesus,< nu sagt an!>
< um jesum, den hohen man,
der ein hoher wiessag was,>
sprach lucas und cleophas,
< von werchen gar gewaltik
und tugende manicvaltik,
den die juden viengen
und an das chriuce hiengen;
des ist nu der dritte tak
daz daz alda geschach.
wir wanten daz er wære
der werlt loesære.
wir haben ouch hiute vernomen
das sumliche frowen zu dem grabe sein chomen
von unserm orden, die habent gejehen
daz si in lebentigen haben gesehen;
die habnt uns erschreckt
unt an uns erweckt
ain zwievelhaften mût.>
jesus sprach:< ir seit unfrût;
hey, wie tump, wie træg ir seit
an dem gelauben iwer zeit,
an aller der warhait
die die wissagen habent gesait!
mûs das nicht also sîn
daz christ lit der marter pin
unt also in sein ere chomen?
daz hapt ir ê wol vernomen.>
alsus er siu trôst;
die schrift er in zerloste,
er hub von moyse an untz her,
er sagt in nach ir hercen ger,
der schrift zerlost er in genûk.
der wek zu eim castelle siu trûck,
daz was gehaizen emaus.
do erpot sich furpaz jesus.
< herre, pelibe mit uns hie!>
sprachen die junger,< nu sich wie
diu sunne sich hat genaiget
diu uns den abent erzaiget.>
si viengen unt twungen in
unt zugen in mit hin.
do si zetische sazen
unt mit ein ander azen,
jesus segent in daz prot,
vil guetechlich er in daz pôt:
allererste wart er in bechant;
vor ir ougen er verswant.
si sprachen:< wie ist uns nu geschehen?
wir mugen des wol zeunhail jehen
daz wir in niht erchanten ê.
nu was sol der rede me?
daz herce in unserm leibe pran
do er die schrift cerlosen began.>
ze jerusalem giengen si cehant,
si wolten diu mære tûn bechant
den jungern an den stunden.
si giengen da si siu funden
unt sagten in diu mære
wie in christ erschin wære;
si sagten in ir ungewin
wie si allererste erchanten in
pi dem prot prechen.
si begunden alle sprechen:
< erstanden ist nu jesu christ,
wand er symon erschin ist.> hie erschain got sein jungern in verspartem gadem unt gab in sein vrid.
in einem gadem waren verspart
der junger cehen, wol bewart
was diu tur mit slozzen;
da waren fûr geschozzen
rigel stark unt grôz.
jesus die tur niht entsloz
unt gie zu den sein hinfûr,
daz nicht entslozzen wart diu tûr;
mitten under in er stuend.
er sprach:< ich tuen iu fride chund,
ich pinz, jesus, furcht iu nicht.>
die junger von der ansiht
sere do schracten,
fur jesum si in niht ahten;
si verwanten sich aller maist
si sehen wan ain gaist.
jesus wol ir zwiefel sah,
gegen ir gedanchen er do sprach:
< seht mein fûze unt mein hende!
ich han( daz ist unwende)
paidiu flaisch unt pain;
des enhat nicht der gaist dehain.>
da mit zaigt in der sûze
paidiu hent unt fûze.
< seit glaubhaft unt getriu!>
sprach er,< hapt ir icht spise pi iu?>
do heten si( daz was ir hail)
aines gepraten visches ain tail
und honik; diu paidiu truegen si dar,
si namen sin vil fleyzchlichen war.
zu in er do nider saz,
mit in der vil minnechlicher az.
du si du gazen
unt obdem tische sazen,
er nam die prosem und gab in die:
< daz sint meiniu wort diu ich hie
mit iu ret du ih iu was pi;
der ewig frid mit iu si.>
du tet er in uf den sin
unt verswant do von in.
< stoz deine hant her
in die seiten, die daz spær
hat durhstochen pitterlich,>
sprach jesus der tugend riche,
< unt wis nicht ungelaubhaft,
hab dich an des gelauben chraft.>
du viel fur in nider thomas,
er graif und sah daz er ez was;
er sprach:< mein herre, mein got du pist.>
des antwurt im der suze christ:
< pruder thomas, ich sag dir:
want du die warhait sihst an mir,
nu gelaubez endlich;
daz tut dih gar selden reiche.
si sint sælic die mich nîe
gesahen unt gelaubent ez die.> hie erschain got sein jungern da si vishten pey dem mer, und chom zu in.
ez fûren vischen nach ir weis
uf dem mer tiberiadis
siben der christes junger;
si taten ez leicht vor hunger
daz si vischen begunden,
wand si ez wol chunden.
doh viengen si des nahtes nicht,
als dicke vischæren noch geschiht.
do begund jesus zu in gen,
an dem stade sahen si in sten;
er sprach zu in, der wiese:
< chint, hapt ir iht spise?>
si sprachen:< niht, das ist uns lait.
uns ist unser arbait
heint ubel ergangen:
wir haben nie nicht gevangen;
des hat uns ungeluk erwant.>
< lat daz netz zeder rechten hant,>
sprach jesus,< so vindet ir.>
des volgeten die junger schir.
do chom so vil vische drin
daz siz choum prachten hin,
want sich daz netz zart ein tail.
johannes sprach:< wir haben hail;
ditz ist unser herre.>
er was ein teil noh verre;
peter sich indaz wazzer lie
unt chom also zu jesu hie;
die andern chomen zeschife dar
unt prachten mit in die vische gar.
do si chomen an daz lant,
si schûtens ouz ze hant.
do was der grozen vish uber al
drei unt fumzik an der zal
unt darzu ain hundert.
ir dehain da nicht wundert,
wer er wære, si fragtens ouch nicht;
si waren vro der geschiht
daz si in sahen, daz tet in wol.
nu lag da pei ein gluend chol;
dar ûf so was ain visch gelait
unt prot was ouch berait.
jesus sprach:< choemt her zu mir
unt tragt der visch mit ew die ir
hapt gevangen zediser zeit.>
daz taten si gar an striet;
si truegen dar unt prieten,
des ezzens si sich berieten,
zu im si nider sazen,
vroeliche si mit ein ander azen.
du er aller peste mit in sprach,
do verswant er, daz in niemen sach.
do was er in ze der selben stûnt
recht erschin siben stunt. hie sûchten die junger johannes und petrus ir pruder wider.
die junger giengen uf unt nider
unt sûhten ir prueder wider
unt giengen hinze galilee
( da waren si dicke gewesen ê),
uf den perchk ze thabor,
da in christ was erschin vor.
do chom aber zu in jesus christ
unt erschain in in der vrist
und vertraib irn ungelouben,
den begunde er in touben,
unt ir hercen herte
er in mit sûze werte.
daz geschach in galilea,
guetlichen erschain er in da. hie erschain aver unser herre sein jungern und gebot in daz si giengen predigen.
nach seiner marter am vierzigstem tage
do erschain nah der schrifte sage
jesus christ gar minnechlich
unt az mit in, der tugentriech,
zejerusalem in der stat.
er gebot und pat
daz si ez wol an viengen
unt in die werlt giengen
predigen unt leren
unt den gelauben mêren:
< ir shult predigen untower
aller creatower.
furcht iu nicht, mit ew ich pin
unt gib ew chraft und sin.
swer den gelauben nimt an sich
und getoufet wirt durch mich,
dem ist volle sælicheit
unt das himelrich berait;
swer aver nicht getoufet wirt
und den gelauben verwirt,
der wirt verdampnet umb daz
unt erwirbet wernden haz.
ich var da hin, nu chomet schir
uf den olperch nah mir.>
daz geschach ze sextzit,
die junger vorhten der juden nît:
si besammeten alle die christenhait,
diu was in churhzlich berait,
noch chlain was ir schar.
si furen mit ein ander dar,
als in got geboten het,
hinz montolivet.
nu was ez wol zenone,
do erschain er in aber schône,
jesus der sûze gûte,
unt sterchtes an ir mûte;
vil suzlich er si lerte,
ir chraft, ir sin er merte.
er sprach zu in:< hapt ir vernomen?
von jerusalem schult ir niht chomen;
wart da meiner potshaft,
diu gît iu sin unt chraft.
ich var uf zu minem vater
und zu iurem vater,
daz sol sein: zu minem unt zu iurem got;
her wider chumt iu schir mein pot,
der gaist der waren warhait,
der ist iu helfechlichen berait,
er ist iwer chraft ain ursprinch
unt chan euch leren elliu dinch.>
do fur er zesiht
mit handen ufgeriht;
ein wolche vor ir ougen hie
inden himel in entphie.
sus fur der suze loblich
in jubilo gegen himelrich
mit maniger vrolichen schar,
die er mit im prachte dar.
die junger hin nah sahen;
do stuenden da pi nahen
in wizen chleidern zwene man;
die sprachen:< sagt uns: wes chaft ir in an
so tiwer? jesus christ hin nah
er chumt her wider als er sprach,
reht als er ouf gevaren ist,
alsus chumt er wider in churcer vrist.>
die junger wolten niht lenger pitten,
si giengen an den ceiten
gegen jerusalem durch warten.
vaste si sich versparten
in einem house, si vorhten in;
diu cit gieng in mit sorgen hin. hie sant unser herre sein jungern sein gaist da si pi ein ander waren.
do diu ceit erfullet wart
nach unsers herren ufvart,
als ez an der zal lach
und ez chom uf den phinztak,
do waren die junger mit sorgen
indem hous verporgen,
want sie die verworhten
juden sere vorhten.
si waren ensamnt da alle.
in gæhes gaistes valle
chom von himel ein grozer sous
unt erfulte gar daz hous
da die junger sazen;
ir selber si vergazzen.
der hailig gaist besunder saz
uf ieslichen, wizzet daz.
in fiwers zunge wart in gesant
der hailig gaist, alzehant
si sin und chraft geviengen,
si stuenden ûf und giengen
und predigten gotes wort;
daz was ê von in nie gehort.
si waren des hailigen gaistes vol,
si hueben an unt sprachen wol
swas in alda zesprechen gab
der hailig gaist, ir urhab.
ireu wort waren fiurein.
iglicher da die spræche sien
hort, in der er was geborn;
daz was den juden zorn.
dar umb si ez niht liezen:
diu wort begunden fliezen
uz ir munde fiwerhaft
und gaben manigem hercen chraft,
die gern ir predige horten;
den ungelauben si zestorten.
do daz volck daz vernam,
groze menige dar qwam
unt horten daz wunder.
si vernamen besunder
alle ir zunge von art,
da islicher mit gezogen wart.
si sprachen gemaine:< waz wunders ist daz?
si sprechent unser spræche paz
denne wir selben oder unser chint,
und wizzen wol daz si sint
geborn uz galilea;
weder hie noch anders wa
hab wir von menschen zungen
von alten noch von jungen
nie gehort der wort chraft.
hie ist maniger hande haidenschaft
die alle ir sprache wol vernemt;
den zweifel si uns da mit benemnt.
si bewærent iriu wort mit zaichen,
des mûzen die juden erplaichen.
hie sint parthy und medi,
die alle wol vernement si;
hie sint elamite alsam
und die von mesopotamiam;
hie sint die von juda
unt ouch die von capadocia,
von pontu unt von azia
und von frigia unt von panfilia,
von egipte und von libie
unt von dem lande cirene;
ez wont disem volcke pi
cretes unt arabi,
juden unt proseliten,
die wonent under in mitten,
unt die chomen romære.
ditze vroemde mære
man immer sagen sol
daz wir alle vernemen wol
unser sprache von in.
ein starker got git in den sin
der si lerte alle sprache.>
die juden gedachten rache
gegen den gotes chnechten;
die wolten in widervechten,
si jahen ir predige wer gelogen,
diu werlt wer mit in betrogen:
si gelaubten an ain toten man,
wer gelauben solt dar an.
die junger predigten do vroelich;
si sprachen:< nu hoert allegelich:
ir schult gelouben an jesum christ,
der durch ew gechriucet ist;
der chom darum von himel her nider,
daz er uns losen wolt wider;
von dem ewigem valle
lost er uns und iuch alle;
dar um laid er den tot
daz er uns lost von wernder not,
unt ist loblich erstanden
von des todes panden.
des sei wir gezeuge:
niemen dar an triuge,
wir haben in wærlich gesehen
und ist daz dicke geschehen
da wir mit im haben gaz.
fur war sag wir iu daz:
wir sahen in loblich
varen gegen himelreich
unt sitzet uf dem trone
zu seines vater zeswen schone,
im eben gewaltick unt eben her;
her wider am jungstem tag chûmt er
ze richten nah rechte
uber alles mensch geslæchte,
uber lebentige unt uber tote.>
daz predigten si vil genote,
die juden si unerten.
des volckes si vil an sich cherten;
der wart getouft ain michel teil.
die juden sprachen:< wir haben unhail
daz wir disen daz vertragen,
wir schuln inz alsus undersagen,
ob si ez immer getûn,
daz wir dehainer slaht sûn
mit in nimmer wellen han;
ez mûz in an daz leben gan
ob siz nicht wellen lazen
unt sich der predige mazen.>
hin unt her si trahten,
si sprachen:< wir shuln ahten
wie wirz mugen under sten.>
si begunden zerate gen;
sûmlich daz rieten
man solt in gût pieten.
daz geviel in allen wol,
si sprachen:< nah in man senden sol.>
daz geschach cehande,
potten man nah in sande.
si namen si besunder
unt putten in gutes wunder;
daz was in als ein foul gras,
want in ungenaem was
alles ir gût unt ir hab.
si sprachen:< ir herren, tût iuch ab
ewers ungelauben groz.>
die juden sere des verdroz,
si droten unt paten;
ie me unt me si ez taten:
si achten ûf pet noch oûf dro,
si predigten dem volcke do
den gelauben recht als ê;
daz tet den juden von hercen we.
do daz allez was geschehen,
hin und her begunden jehen
die juden maniger hande:
< wir chunnen dise schande
uber winden nimmer mêr.>
nu chom zu in von galile
finees und adras
und der priester egeas.
finees, ain grozer ewart,
sagt von christes ufvart;
adras ain gebieter was
und der diaken egeas;
die alle drei sagten daz
daz christ pei seinen jungern saz
unt si mit suzer lere
chreftiget sere:
< er sant siu predigen in diu lant
daz si den leuten tæten bechant:
swer den touf enphienge,
daz ez im wol ergienge,
im wer berait daz himelreich;
wir sahen daz der vil tugend reich
loblich gegen himel fûr.>
islicher des mit aiden swûr
daz er ez wærlichen sach.
daz was den juden ungemach
unt straftens dar umbe;
si sprachen:< ir seit tumbe
daz ir des geturt jehen
daz doch nimmer mack geschehen;
zwar ir gesaht ez nie.>
nichodemus zu den juden gie
unt nam si an ein rat;
er sprach:< ich wæn, ein ende hat
ewer chunt unt ewer sin:
wa ist der verswunden hin?
welt ir mit disen chriegen,
daz mag ew wol betriegen;
want si sint gar gelaubhaft
unt habent iriu wort so groz chraft
daz si den leuten wol behagent
und gelaubt in wol swas si sagent:
si habent ez pi dem aid gesait,
ez gelichet sich wol der warheit.
welt ir nu ewer er bewaren,
so seht ob ir ez muegt undervaren
mit gut, daz rat ich wol.>
< pilleich man dir volgen shol,>
sprachen die juden an der stat,
wand in geviel wol sein rat;
si taten als er in gerîet:
den drin man vil gûtes beschiet
und santens wider hinze galile
unt patens daz siz nimmer mê
iemen zu gewuegen
unt ez undersluegen,
swa si die rede horten,
daz si die zestorten.
die juden do verzagten,
hin unt her si sagten
wie si tun solden.
zwene si troesten wolden,
annas unt caiphas,
der islicher ain furste was;
si sprachen:< ir helde, gehapt iuch wol,
iwer mût sih niht vercheren sol;
wizet, ez ist also chomen:
die hûtær habent ouh gût genomen
von den jungern unt habent in hin geben
unt jehent daz er noch schul leben;
si habent in als uns getan,
anders ist ez niht ergan.
wer solt den hûtæren
gelauben und irn mæren?> von nichodemo.
nichodemus der weise sprach:
< gedenckt was hie vor geschach
do elias unt enoch gezuchkt wart
du er gegen paradise die vart
fûr von den jungern sin
uf einem wagen fiurin:
du hiez man sûchen
uf velden unt in prûchchen
ob er gevallen wer her nider,
daz in wolten holn wider
dew chint der propheten,
diu in gern pei in heten.
also schult ir tun jesu:
haizet in sûchen nu
ûf gepirge unt in gevilde,
uf acker unt inwilde,
ob er leicht entphallen ist
dem gaist, so vint ir christ.
so schul wir zepûze stan
swas wir haben missetan.>
do geviel in allen wol der rat.
si gewunnen suecher an der stat,
die wurden allez des bewart
des si bedorften uf die vart,
des wurden si wol berûht
unt wart von in gesûcht
jesus ouf perge unt in tal.
si sûchten in uber al,
doch chunden si in nicht vinden;
si wolten nicht erwinden
si sûchten uf acker unt in wisen,
si begunden umbe pisen,
des chund siu nicht betragen
die weile si suechens phlagen.
si chomen hin ze arimatia,
josepen funden si alle da;
des waren si innechlichen vro.
gegen jerusalem si giengen do
unt sagten den juden mære
wie ez ergangen wære,
daz si jesum niht funden:
< wir haben an disen stunden
einen funden nach unser ger.>
die juden sprachen:< wer ist er?> -
< joseph von arimathia.> -
< hapt ir den funden?> si sprachen:< ja.>
des vreuten die juden alle sich,
islicher sprach:< nu wol mich!
nu wil sich unser ere
hohen immer mere.
nu rat uns allen wie wir in laden
daz er lasters unt schaden
vergezze die wir im taten;
daz schult ir nu raten:
die uns und im cepoten gezemen
und im sein angest chunnen benemen,
daz er sich an uns gelazen muege,
wer uns dar zu tuge
unt wer daz aller peste tu:
nichodemus, sprich du dar zu!>
er sprach:< gern daz tun ich,
des han ich schir beraten mich.
daz schuln tun siben man,
die tiuristen die wir under uns inder han
und die in doch an winden
die schul wir under uns vinden,
die gegen seiner red dort
chunnen sprechen so iriu wort
daz er sich dar an laze,
die choment uns zemaze.>
do wurden siben man erwelt
die im zesippe wurden gezelt;
die waren weise unt wol gezogen,
an rechter fûr niht betrogen,
uf elliu dinc beschaiden.
die hiez man shone chleiden
und uf die vart beraiten wol
als man erbær potten sol.
si waren berait und fûren da hin
und chomen da si funden in.
si giengen mit zuhten fûr in stan,
die red si hueben weislichen an:
si begunden urlaubs gern,
des chund er si zuhtlichen geweren:
< sprecht daz ew gevalle,>
sprach er,< unt sitzet alle.>
si sprachen:< des sol nicht ergan,
wir schuln pillich vor dir stan
untz unser potschaft geschiht;
wir sitzen ê vor dir nicht.>
einer fur die andern sprach
dem man zucht unt weishait jach:
< herre, ob ich nu sprechen mûz:
dir enpietent dienst und grûz
die tiuristen vriunde dien,
der potten wir hie vor dir sien.
von jerusalem die pesten
die chlagent den gepresten
sere den si taten dir,
daz si dich viengen, daz gelaube mir,
unt pittent dich innechlichen
daz du rûchest entweichen
deinem ungemuete
durch dein groze gûte;
si ergebent sich gar dir schuldich.
nu wis gegen in gedultic:
ir angeworne triwe
si jaget ûf herce riwe
daz si daz îe getaten.>
< nu schult ir mir raten,>
joseph sprach,< des ist nu zeit,
wand ir mir triuwen schuldic seit:
ir seit die pesten vriunde mein;
nu tût mir iwer triwe schein.
swas nu ir mir ratet, daz tun ich,
nach iurem rate riht ich mich.
sagt mir wes ir an mich gert;
des wert ir schir gewert.>
si sprachen:< herre, daz tu wir;
uns habent gesant nah dir
die fursten, daz du zu in varst
und dein raise niht lange sparst.
ir sicherhait hab wir genomen
und sein also her chomen
daz wir dich nemen ûf unsern ait
unt tûn die al die sicherhait
der su selbe an uns gerst,
ob du uns der rais gewerst.
wir siben als wir hie sein,
benemen dir alle die angest dein:
var hin, wir sein fur dich hie.>
joseph sprach:< nu ratet mir wie
ich mit eren da hin var.
ir muzt mit samt mir varen dar,
ich laz iu beleiben nicht;
iwer triwe mir des giht
daz ich mich wol laze an iu,
ich waiz wol daz ir sit getriu,
mir ist iwer triwe wol bechant.>
nu fur er mit in zehant,
er was schir berait,
nu fur er mit in an sicherhait,
also wol getrout er in;
si fûren mit ein ander hin.
zejerusalem si quamen;
do daz die juden vernamen,
du chomen si dar alle
mit wunnechlichem schalle.
si giengen gegen im schone
mit einer processione
unt enphiengen in werdichlichen unt wol,
als man liebe vrieund sol.
si putten im hohe ere
nach der weisen lere:
fur in si nider chnieten.
daz begund er in verpîeten;
er pat daz siz nicht tæten
und daz si in sus pæten,
swas si wolten, daz wer geschehen;
er begund in stæter suene jehen,
er vergab in an der stat
swelher hant mistat
si gegen im heten getan;
daz was in louterlich verlan.
die hohen die in umbstuenden,
mit im si sich suenden
wol nach sinen eren,
si begunden im verchêren
allen seinen unmût;
si sprachen:< josep, uns dunchet gût
daz wir an haimlicher stat
gen.> er tet als man in pat.
nichodemus zu im do sprach,
du er den neven sein an sach:
< joseph, wis got willechomen unt mir!
ich sich vræuden vil an dir.
wol mich, daz ich dich han gesehen!
dar an ist mir lieb geschehen.>
ir ietweder vreut des ander sich.
sein grûz was getriulich,
er was seiner chumft vro.
nichodemus sprach zu im do:
< du solt cehous mit mir gan.>
< gern,> sprach er,< daz sey getan.>
pi henden si sich viengen,
in sein hous si giengen,
zu ein ander si sazen,
ir laides si vergazzen.
si reten mit ein ander vil,
des ich allez nicht sagen wil;
ouch ist mir ein tail unchunt.
nu giengen zu in an der stunt
die hohen juden sitzen,
die reten mit im mit witzen.
nichodemus ein furste was,
also was annas unt caiphas;
da waren priesterfursten genuec,
der aller red was da chluch.
si sprachen:< josep, schul wir dih
mit urlaup vragen, vreunt, nu sprich!>
er sprach:< ir shult mich vragen wol
swes ein vreunt den andern sol;
zweu ew iwer wille trag,
des vragt, gern ich ew daz sag;
daz hapt uf den triwen mein.> -
< so sag durch die gûte din
wie du sunder swære
chome uz dem charchere
da wir dich inne heten verspart;
wir wanten wir hieten dich wol bewart,
daz ez nimmer toechte
der dich drouz pringen moehte.>
josep sprach:< ich sag iu gar
wie ez rechte chom aldar,
dar an ich iu die warhait sag:
do ir mich am charvrîtag
indaz gewelwe bespartet
und ir die tur wol bewartet
als ir peste mohtet,
und uf mich wart getrahtet
wie ir mich woltet toeten,
du was ich mit noeten;
in sorgen ich du lag
untz an den samztag.
diu vorhte mir vil angest tet,
ich sprach mit andaht mein gepet.
du ich was mit andaht,
do chom reht ze mitter nacht
in daz gadem so groz ain liecht
daz ich gesehen mochte nicht
von dem wider glaste.
daz liecht schain so vaste
daz allez daz gadem erlouhte,
daz mich des bedouhte
ez wer volles sunnen.
vil schir chom mit wunnen
jesus christ gegangen
da ich lag gevangen;
des amplic gab so liechten shein
daz in nicht diu ougen mein
vor shoene mochten an sehen,
so durchleutich was sein prehen,
sein gewant noch weizer denne ein sne;
ich gesach so wunnchleiches nie mê
als der suze jesus was.
von seiner helfe ich genas.
er sprach: « vreunt, chum her! »
einen prunnen den hiez er
indem charcher werden,
den enspranct er ouz der erden,
da mit toufte er mich do;
ich was seiner chumft vro.
snelle er mich ouz pracht,
ê ich mirs gedahte,
du chom wir ouz, ich weiz wie.
mit im ich zu dem grabe gie
da ich in het gelegt in;
du furt er mich mit im hin.
wir funden offen sten daz grab,
der stain was genomen ab;
do sah ich drin unt vant niht mê
wan diu tuch da ich in ê
selbe het ingepunten,
diu vant ich an den stunden
und vand anders nicht alda.
in arimatia
furt mich der sûze christ
unt satz mich in churzer vrist
in mein hous und sprach zu mir:
« der ware frid sei mit dir!
du solt uz disem hous nicht chomen
bis vierzic tage end habent genomen.
ich wil zu meinen jungern gen,
du solt an angest hie bestên. »
alsus der suze von mir schied.
swas er gebôt unt mir gerîet,
daz han ich wol behalten,
sein vrid muz mein noch walten.>
die juden do erschacten,
daz wunder si betrahten
in ir herce manic valt:
< wir werden in churcen jaren alt
von disen wundermæren.>
daz begund si beswæren.
si santen potten alcehant
nah den drîn da man die vant,
die von jesu sagten:
nah den si potten jagten.
finees unt andras
und der diaken egeas
aber zu in quamen;
islichen si besunder namen
unt beswueren si gar tiwer,
si sprachen< wir gerten iwer,
daz ir uns an dirre stunt
tût niwan die warheit chunt;
daz dien wir immer gegen iu.
wir wizzen wol ir seit getriu,
ir seit uf elliu dinc gereht
unt sint iurew wort so sleht
daz ir uns nith betrîget
unt durch niemen lîeget,>
sprach anna und caiphas:
< sagt uns durch got was daz was
da ir jesum sahet;
wart ir im so genahet
daz ir in moht erchennen,
oder hort in sus nennen?
was ob ir leicht betrogen seit?
an iu so vil eren leit
daz ir wan die warhait sait.>
des teten si in sicherhait.
finees, der hohe priester sprach:
< ir shult wizzen daz ich in sach
pei sein jungern sitzen,
und ret uz hohen witzen,
er lerte da die junger sein,
sein magenchraft wart uns da schein,
wir sahen daz er gewaltichlich
fur von uns gegen himelrich;
dar umb swur ich iu ê.
welt ir iht, ich swer ew aber me
daz ez mir wizenthlichen ist chunt,
unt swur iu dar um tousent stunt.>
also sagtens alle dri.
des wurden di juden vreuden vrî
unt verzagten von der rede gar:
< ditz wunder tût uns vreuden bar,
daz wunder ist wol wunderlich,
dem wunder wart nie nicht gelich.>
josep do zu den juden sprach
du er sach ir ungemach:
< ir herren, merchet besunder
ain vil grozes wunder:
daz vom tôde jesus christ
ain nicht erstanden ist,
vil toten ist mit im erstan,
die ir alle seht gan
inder stat hin und her.
daz ist noch wunder mer:
du erstund jesus christ,
do erstunden mit im zeder selben vrist
zwene die ich ew zaigen sol,
dir ir alle erchennet wol;
die sint in arimatia,
an ir gepet sint si da,
zeniemen si sprechent nicht,
niwan peten man siu sith,
ir wart da man siu begrûb
und ped indaz grap hûb;
die sint genant alsus:
karicius und leucius.
die paide pey uns hie sint,
die waren simeons chint,
des hohen fursten der jesum truech
in dem tempel. iwer genûc
sint hie die daz sahen.>
cehant si im des jahen
daz ez also wære.
er bericht siu der mære
umbe dise zwene piderbe man:
< ir grab siht man noch offen stan,>
sprach joseph zu den juden do.
des wurden si von hercen vro
daz in diu selde was geschehen
daz sis lebentige solten sehen.
si giengen an den stunden,
diu grab si offen fûnden,
als in joseph het gesait,
des fûnden si di warhait.
josep sprach:< nu seht ir doch
manic grab sten offen noch
da genûg sint ouz erstanden;
wie mugt ir iu enplanden
daz ir so ungelaubehaft seit?
iu wil fûgen iwer strît
benamen endlosen schaden,
ir schult dise zwene laden
daz si chomen her zu iu.>
< josep, du wer ie getriw,>
sprachen die juden al cehant.
do wart nah potten umb gesant,
potten die wurden gewunnen
die wol waren versunnen,
die chunden der schrift genuc,
die waren wies unt chlûch.
joseph sprach:< hapt ir rechten sin
und chomt si iu, so gelaupt in;
si sint gewesen dort und hie
unt sagent iu reht wa unt wie
daz allez ist geschehen.
si habent reht dort und hie gesehen,
si sagent iu wand die warhait.>
du waren die potten ouch berait
die man wolde senden dar,
die namen ir gevertes war
gegen arimatia,
si fûren uf der rechten sla.
do si chomen in die stat,
niemen si cehous pat,
si vragten von mæren ce mæren
wa die zwene wæren,
karicius und leucius;
die zaigt man in, die funden si sus
mit andacht an ir gepet,
als in josep gesaget het.
si wurben ir potschaft
gegen disen zwaien endhaft;
gegen ir aller red si stille swigen
wan daz si mit zuhten nigen.
die potten paten siu durch got
unt durch den namen sabaoth
daz si mit in ruechten varen,
si sprachen:< wir chunnen eu wol bewaren
vor aller hande mistat;
der suze got geb ew den rat
daz ir uns niht lat ungewert:
die fursten habent iwer gert
die uns nah iu habent gesant.
nu seit innechlichen gemant
pei der waren minne
da ir nu wont inne.>
so tiwer sis beswuren
daz si mit in fûren;
si furen mit in geraite
an aller hande gelait,
gegen jerusalem si gahten.
do si der stat nahten,
du putten siz den juden hin;
si machten sich alle uf gegen in,
schone si gegen in giengen,
mit eren siz enphiengen.
gegen ir gruze si stille swigen,
si taten nicht wan daz si nigen
shone unt zuchtichliche.
die juden paten alle gelih
in den tempel mit in gan;
daz taten so die zwene man.
mit in giengen wan die hohen hin in
unt taten den tenpel zu nach in,
die tûr si vaste versparten;
ir zuht si wol bewarten,
si giengen mit zuhten fur siu stan,
ir red si hûben zuhtichliche an.
si sprachen:< ir herren, sagt uns durch got
( pi der ê unt pi dem gebot
man wir iu daz ir uns sagt
dar nach uns unser wille jagt,
daz ir uns machet zweifels vrî)
was an disen mæren si,
als man sagt, ob jesus christ
von dem tod erstanden ist;
daz wizt ir wol ob daz ist war,
daz schult ir uns chunden gar.>
in antwurt ietweder nicht
( daz douht die juden ain groz geschiht),
mit niemen si reden wolten;
die juden sprachen:< wir solden
dar um pitten nichodemum:
sol uns iemen wesen frûm,
daz mûz er tûn und niemen mer,
ez tut niemen so wol so er.>
des chomen si alle uber ein
und patten in dar umbe gemain.
si sprachen:< nichodeme, ginc dar
unt nim durch dein gute war
ob du mit dehaînen sachen
si redent mugst machen;
sol dehaine sælde uns dar an geschehen,
des muz wir dienen tugenden jehen.>
nichodemus sprach:< daz tun ich,
ich wil wol dar an versuchen mich.>
er gieng fur siu gezogenliche.
er sprach:< ir herren sælden riche,
ob ez mit urloup muge sein,
so hoert durch got die rede mein:
ich han vil tugent von iu vernomen,
uf genade pin ich her chomen,
ich man iu pi dem namen gotes
( als ir hutet seines gebotes)
daz ir uns recht tuet bechant
durch der wæren minne bant,
diu iu hat gebunden
zegot an disen stunden,
des wir iu haben gevraget,
ob iuch nicht betragt.>
die herren sprachen mit sinnen:
< nu haizet uns gewinnen
schreibgezeug, wir wellen iw
alles schreiben um diu,
wand wir geturren so vil nicht
gereden, wir wellen iu die geschit
schreiben als ez ist geschehen
unt als wirs haben gesehen.>
nichodemus sprach:< daz geschiht,
damit wert ir gesoumet nicht.>
zu den juden gieng er dô
und sagt in daz, des warens vrô.
nach dem schreibgezeug wart gesant,
daz pracht man do cehant
und trûg ez dar in paiden.
du wurden si geschaiden
von ein ander; do daz geschach
daz ir îetweder den andern nicht ensach
( si wolten siz erwert han),
ir schrift si alsus huben an:
< wir pitten dich, herre jesu christ,
( wan du ein trost der armen pist
unt der toten urstende),
dein genade uns sende;
du wær îe slecht den rechten,
du hast uns, dein chnechten,
geboten daz wir ez verdagen
unt niemen niht sagen
der haimlichen werck der gothait dein,
die du in weizen uns tæt schein:
do wart uns dein genade chunt.
nu hat man uns cediser stunt
so tiwer pi deinem namen besworen;
nu senfte, herr, deinen zorn
unt gerûch unz vertragen
daz wir inz mit der schrift sagen,
daz laz in deinen hulden wesen
daz siz dar an muzen lesen.> hie sagten karicius und leucius die tougen die sei unser herre liez sehen in weizen.
an dem tage du christ erstund,
du wart uns ellenden chunt
trost unt vreudenhort
du wir in den weizen dort
pi den vætern waren,
da wir in mangen jaren
nie heten trost enphangen,
do begund uns belangen.
do erschain ein sunne guldein,
des durchleutich brehender schein
was so gar vol wunnen
daz von der vreuden sunnen
chan niemen wol vol sprechen;
sein schein begunde ûf uns prechen,
hin in ûf uns aldurch die want.
di væter unt adam sprachen cehant:
< daz ist das liecht, des seit gewis,
lumen veri auctoris;
von dem ditz liecht gat,
daz ist der der mich beschaffen hat,
der aller dinge orthab ist.>
< ez ist daz liecht da man von list,>
als der chunnik david jach,
< von dem ich an dem salter sprach:
« exortum est in tenebris
lumen rectis,
inder vinster ist uf gegan
ein liecht den rechten sunder wan. »
des liechtes ich gernde was.>
du sprach isaias:
< daz liecht ist da nu betagt,
von dem ich vor han gesagt:
« habitantibus in regione umbre mortis
lux orta est eis,
die in dem jamers lande lebent
und under des todes shaten swebent,
den ist nu erschin ein liecht. »
daz ist daz liecht daz man sicht.>
do sprach der alt simeon:
< ez ist daz lieht da ich sprach von,
marien sun, der suze christ,
der daz ware liht ist,
den ich in dem tempel truck,
daz des volckes sach genuck
unt ouch wol hort was ich sprach,
da ich daz chindel an sach,
der magde sun, daz liecht jesum:
« lumen ad revelacionem gencium,
daz ist das liecht daz fûr war
erleuchtet alle die werlt gar. »>
du sprach johannes baptista:
< daz ist der den ich zaigte da
mit dem vinger, den ih han
getoufet indem jordan,
der ist mit disem chomen.>
do daz die væter heten vernomen,
die vreuten do alle sich;
adam sprach:< seth, chum her fur mih
unt sag durch dein gute mir,
was mir vom paradis pi dir
wart enpotten, daz sag mir gar,
do ich dich nach dem ôle dar
der barmunge hete gesant.>
do sprach seth zehant:
< vater, do ich von dir schiet,
einen weck ich gerîet
uf pi dem phloume;
hart und choume
gie ich dichk an manger stat,
wand mir het al daz phat
niemen mer vor getreten
...
uber stain unt uber ron
muz ich ungevertes won.
daz hab uf meiner sicherhait
daz ich mit grozer arbait
alsus gie vil manigen tack
daz ich lutzel rûwe phlack,
untz mir der speis abgie;
davon ich zweifel gevie.
ich az wan laup unt graz
und ob da iht obsez was,
da mit ich mich nerte
indem ungeverte.
alsus gie ich ane trôst,
ich want ich wer des lebns erloest.
du ich also gie, du chom schîr
ein vil suzer wint gegen mir,
da von ich nu chraft gewan.
gegen dem winde begunde ich gan:
ie paz und paz ich mochte;
so suze der wind smahte
daz ich da von wart chreftick gar.
du chom der erz engel clar,
sande michel, und hiez mich stan
und lie mich nicht furpaz gan.
du sagte ich im diu mære
war umb ich chomen wære.
do enpot er dir pi mir,
daz ich alsus sagte dir:
« swenne fumf tousent jar
ergiengen unt fûmfe hundert gar,
so chumt der poum der da trait
daz oel der barmherzichait. »>
do seth gesagt het also,
do zalten die vater alle du
die zeit von anegenge untz dar
unde funden daz diu zal gar
het an dem tage ent genomen
unt daz in loesunge solte chomen.
also zaltens uns uber al
daz nu gar was ouz diu zal.
...
als die gêier und die arn
die ander tivel warten
die di sel charten.
er sprach:< helle, beraite dih,
ich pring dir( des wart uf mich)
den man christ nennet, der chumt her;
ich han geschaffen wol daz er
ist von den juden gevangen
und an daz chriuz erhangen,
er ist in den tot gevallen,
mit ezih und mit gallen
habent in die juden getrenchet
unt in den tôd gesenchet.>
diu helle sprach:< sol der nu chomen
der mir vil sel hat genomen,
lazarum und ander vil,
daz ist wol daz ich wil.
nu huetet daz er gewærlichen var,
daz er uns iht beraube gar
aller unser sele hie.>
zehant sich jesus sehen lie,
er hueb an ein vil sûz gesanc,
daran den sein wol gelanc:
< ir hellenfursten, tût uf die tor,
der eren chunick ist hie vor!>
drîstunt rûft er also.
des antwurten im di tivel do,
als an dem salter sprach david
vor christes geburd vil manige zit:
< wer ist der eren chunick, wer?>
jesus sprach:< daz ist er
der stark unt der gewaltich
an dem urliug sig,
der herre aller tugende gar,
der ist der eren chunich fur war.>
du er daz dristunt gesprach,
da mit er die helle prach:
er stiez uf diu tor cehant,
lucifern er do pant
und warf in in der helle grûnt;
da leit er noch der hellenhunt.
zu adam er do gie,
pi der hant er in gevie,
er sprach zu im:< frid sei mir dir
und ouch allen den meinen die mir
sint gewesen gehorsam.>
du sprach unser vater adam:
< ich sih die hant diu mich hat
geschaffen, nu wirt unser rat.>
die erwelten die sungen do alle
mit ougenregens valle,
mit weinunder stimme si sungen,
zu im si vroelichen drungen:
< wol uns, daz du chomen pist!
want wir dein ê gerten, suzer christ,
in diser vancnusse hie.>
mit in er fur die porten gie.
du enphal er alle die sele
sand michele.
du nam der erzengel clar
dise wunnechliche schar,
dan furt sei der weise
gegen dem paradise.
gegen im du giengen
die si schone enphiengen,
ped elias unt enoch.
si sprachen:< wir schulen beleiben noh
bis uns chumt der antichrist
( als lange ist uns gegeben frist),
mit dem wir schuln streiten;
der tût pi sein zeiten
zaichen vil unt wunder
unt sleht uns dar under.
ze jerusalem werd wir erslagen
unt werden fur die vogel getragen:
dehein vogel uns geniezen mac;
sus lig wir vierdhalb tac.
dar nach so werd wir loblich
gefurt in daz himelreich,
daz wir inder wunne
beliben pi unserm chunne.>
nu si des gesagten genuc,
du sah wir ain, der gienc und truc
ein chriuce uber die ahsel sein,
an dem er het der marter pein
erlitten mit jesu christo.
der gienc zu uns unt sprach also
daz in jesus het dar gesant;
daz gelaupt man im cehant.
ein engel des paradises phlac,
an dem schone wieshait lac;
der versagt im nicht, er liez in in,
want er wieshait het und sin:
< nu peite hie und beleib pi mir,
want uns chumt da her schir
der uns pringet suze mære,
aller dinge shephære
mit sein erwelten chinden,
der sol uns hie vinden.>
daz sint diu goetlichen wunder,
die wir iuch besunder
schriben; ich caricius
unt mein pruder leucius
haben ez scheinberlich gesehen,
als ez dort ist geschehen;
der uns daz sehen liez,
tiwer er unz verswigen hiez,
daz wir ez niemen sagten
und ez gar verdagten;
er hiez uns varen in die stat
zejerusalem, das was sein rat.
er sprach:< die weil ir da seit,
so beget der oster hohceit
dri tage volchliche
zegehugde dem chaiser reich
und seiner urstende,
dar umb ich iu dar sende.
dar nach schult ir enphan
den touf in dem jordan;
so werdent iu wizeu chlait gegeben
uf daz immer wernde leben.> -
do si daz geschriben gar,
do chom algahens ein liecht so clar,
in dem sie an den stunden
vor ir ougen verswunden,
daz si da niemen mer gesach.
alz ditz wunder geschach,
die prief die si heten geschriben
( die waren an ir stat beliben),
die las man do cehant;
die waren als si het ein hant
geschriben; so gelich diu schrift was.
do chôs ieslîcher der si las:
ir ietweder het eins pûnts nicht mer,
unt swas dirre het, daz het ouch der.
des wundert die juden sere do,
si schracten unt wurden unvro,
si sprachen:< ir heren, sprechet dar zu
wie man mit dem volcke nu getu
unt wie wir inz undersagen mûgen
daz si ez nimmer gehugen.>
josep unt nichodemus
die gewurben alsus,
want si wieshait wielten:
die priefe si behilten
und giengen ouz an der stunt
und taten ez pilato chunt
und zaigten im die prîeve dar.
du er der mære wart gewar,
du hiez er im die prieve lesen,
er sprach:< ir heren, nu wil ich wesen
immer iwer dienstman
daz ir ditz hapt getan.
nu gept mir die prieve her,
daz wil ich dienen immer mer.>
du wart er seiner gepet gewert,
si taten des er het gegert.
des dankt in fleizchliche
pilatus der rîche.
er gewan potten zehande,
die prieve er do sande
ze rome dem chunich claudio;
der sant si neroni do
du mans ime gelas.
nero zerome ouch gewaltic was.
dem erschein des nachtes jesus christ,
vor dem nicht verporgen ist;
der erschain im an den stunden
mit plûtigen wunden,
er sprach zu im:< ich pinz jesus,
von dem dir hat pilatus
enpotten; nu stand uf und sag
vespasiano daz er trag
die rach in sinem hercen
um meiner marter smercen;
er shol rechen mein plût
an den juden, daz wirt im gût.>
nero lait vil grozen ungemâch
von dem troume der im geschach.
du er do erwahte,
gar swarlich er trahte,
er gie zevespasiano
unt sagt im von pylato
wie er im het enpotten dar.
er sprach zu zim:< nu nim war
die prieve die her sint gesant,
die uns die warhait tunt bechant;
dar zu erschain mir heint jesus
in dem troum unt pot dir sus
daz du rechen solt sein plût
an den juden, daz wer dir gût.>
des wart vespasianus vil vrô,
er antwurt im mit zuchten do:
< ich wil daz immer zechen
daz ich in wil gern rechen;
uber vierzich jar daz geschiht
daz man mich in rechen siht.>
als diu zal erfullet wart,
du prueft vespasianus her vart;
got lie den juden zaichen e sehen,
der er manigez lie geschehen, daz ist das erst zaichen.
e in ir ungemach geschach:
ein niwen stern man schein sach
ce jerusalem ein ganzez jar,
der was liecht und clar;
des sternes lauf was nider vil
denne der ander stern zil. daz ander zaichen.
ein ander zaichen ergie dar nach
( ze ir ostern daz geschach):
do erschain ein ander so durchlouchtik liecht
daz si gesehen mochten nicht
du si in dem tempel waren,
si ne wessen wie gebæren.
daz liecht den alter umbe vie,
untz mitten uber daz tempel gie;
daz geschach pi einer naht.
die juden heten in ir aht
daz ez wær ein liechter tah,
si verstunden niht was uf in lac. daz dritte zaichen.
dar nach ze der næhsten hoceit
( als uns die schrift urchund geit),
do geschach ein zaichen daz man wol
fur ein wunder prueven sol, -
ich han ez fur ein wunder meinhalp -:
do die juden daz rote chalp
opferten als ez solde sein,
du erwarf daz chalp ein læmpelin
under der diaken handen;
daz geschach in cehanden
nith anders man ez beschiet
do ir opfer sus geriet. das vierde zaichen.
ze einer andern hohceit geschach furpaz,
do ergie ein zaichen, nu merchkt daz,
daz die juden cemitter naht
in dem tempel sazen mit ir maht:
du prast uf diu isnein tûr
unt die rigel die da fur
vaste geschozzen waren,
die prasten in den gebaren
sam si nie isen gewunen;
des sih wundern begunden
die juden da si sazen,
ir selben si vergazen. daz fûmft zaichen.
dar nah aver zaichen geschahen,
des si fur wunder jahen,
zeandern hochzeiten;
da sahen si in lueften reiten
groz ungefuge her,
mit wægen unt mit starcher wer
uber al daz lant zejuda
sah man dicke reiten da;
des wundert sere die juden do
unt wurden des vil unvro. das sechste zaichen.
ze ir phinxten ouch ein zaichen geschach:
durch den tempel man gende sach
des nachtes manigen ewart,
die taten manige durch vart
in dem tempel her und hin
und rueften ein froemden sin;
si rûften alle:< migremus hinc!>
daz waren harte vremdiu dinc;
daz rûftens dristund îe loute.
daz tun ich iu chunt ze diute,
ez sprichet:< wir shulen hinnen.>
die juden von ir sinnen
waren chomen unt von den wundern nach,
islicher zu dem anderm sprach:
< got unser ere nu enden wil;
daz ist ein ende unt ein zil
seit diser wunder so vil geschiht.
got tût sein umsus nicht,
ez ist ein urchunde
unser houptsunde.> daz sibent zaichen.
gegen herbest in der hohcît
diu indem sibentem mane leit,
als die juden under den huten sint
man, wip unt chint,
daz wir loubvelle nennen,
da pei wir si erchennen:
du gie anyen sun, jesus,
in alle die straze unt rûft alsus:
< tôt, chum uber die juden her
unt uber den tempel!> alsus rueft er;
< unt uber jerusalem, des ist not,
von den vier winden chumt her der tot.>
daz was den juden ungemach,
an in man daz geschrai rach,
mit gaiseln ward er sere geslagen,
daz er ez choume mohte tragen;
du ruft er ie me und me:
< we den jerosolimiten, we!>
do diu zaichen ergiengen gar,
du sant got den sein dar
den weisagen achamabagun
und hiez in daz chunt tun
daz paidiu wip unt man
furen uber den jordan.
du roumten si die stat cehant,
als inz der wiesag tet bechant,
ir rais si nicht wolten sparn,
si begunden uber den jordan varn. nu horet wie veronica unser herren antlutz uber mer pracht zerome. pilatus verderbt.
nu laze wir die rede hie
unt hoert wie ez pilato ergie;
daz sag ich iu als man mirs las,
daz von im geschriben was.
ir hapt da von wol vernomen
wie er zejerusalem was chomen
unt richtær wart inder stat
und wie er da gerichtet hat;
er was unguetic al sein ceit,
er wesse wol daz die juden durch ir neit
jesum heten verraten,
unt swas si im ubels taten,
daz wesse wol pilatus
daz si daz taten um sus.
doch rihter durch siu uber in,
dar an betraug in sein sin
daz er durch der juden pêt
unrecht gericht uber in tet.
des chom er seit in riwe,
nicht durch sein untriwe
noch durch sein groz mistat,
die er dar an begangen hat,
ez gerau in durch die sunde nicht,
niwan durh die geschiht
daz er des leibs vorhte,
diu angest im riwe worhte.
er was im selbe dar umbe gram
du er rechte vernam
daz jesus was erstanden
von des todes banden
und zehimel was gevaren;
er sprach:< wie sol ich bewaren
mein leip unt mein ere?
der mir geb nu die lære,
dem wolt ich immer wesen holt.
ich han vil pillich unsæld versolt,
mein sorge ist manicvaltic:
jesus ist so gewaltic
noch hiute an den werchen sien,
daz fueget meinem hercen pein.
so ist daz mein ander chlag
daz sein junger noch alle tage
so grozez wunder mit zaichen tûnt.
dehainem man ez gestûnt
so sorgsam als ez mir nu tût.
mich hat verlaitet mein ubermût;
unt gevraischent disiu mær
der chaiser und die romær,
so han ich verlorn den leip.
het ich getan als mir mein weip
riet, so het ich reht getan,
daz ich mich nicht het genomen an
dehain gerith uber jesum christ,
so mochte ih noch leben manige vrist;
ich han mir selbe vergeben,
ich mûz mit sorgen leben.>
hin und her er trachte,
zejungest er daz ahte:
er wolt zerome senten
poten, die das enten
swaz man gegen im sprach alda,
daz si daz underreten sa
mit gefuegen worten weislich.
< der pot sol sein sinreich,>
sprach er,< den ich sende dar.>
er nam allenthalben war
wer im dar zu toehte,
den er darsenden moehte.
da gewan er ainen weisen man,
der was gehaizen adrian,
der was weis unt chluck
unt chund der pûch genuc;
den berait er shon unt wol
als man werde potten schol,
die man hohen herren
senten wil von verren.
chlainod maniger slacht,
die pesten die er mochte
vinden in dem lande,
dem chaiser er pi im sande,
und den fursten da genuc
sand er ouch chlainode genuc.
do der pot ouf die vart
alles des beraitet wart
daz er haben solde
unt swas er selbe wolde:
pilatus warp mit sinnen,
er hiez ein schef gewinnen,
daz pest daz man indert vant,
daz wart gewunnen alcehant;
er vorhte den chûmftigen schaden,
er hiez daz schef mit flize laden
mit gôte unt mit spise.
der pôte der was wêise;
der hiez tragen dar an
allez daz er solde han;
marnær die pesten
daz shef hiez er vesten,
segel unt maspoum
nam er vil goûm
daz die waren starck und gût;
uf recht gevert stuend sein mût,
er fur mit vil grozer weishait.
do ez allez was berait,
urloup si namen unt fûren da hin.
gelange in wol, daz haben in.
die segel si do uf zugen,
si furen hin sam si flugen
wol ain tagweide.
dar nach geschach in vil laide:
nu chomen gegen in vil swinde
starck sturmwinde
unt sluegen sei verre uf daz mer
von der straze sunder wer;
da von si gar verzagten,
vil tiwer si do chlagten
daz si ie waren chomen dar,
si wanten si heten verchoufet gar.
sus furen si lange an trost,
si wanten si wæren erloest
leybes und gûtes,
si waren swæres mûtes,
grozen ungemah sie litten,
si chlagten mit jamers sitten
paidiu weip unt chint.
dar nach slûg siu der wint
verre in galitze;
heten si nu gûte witze,
der bedorften si nie so wol.
ir herz waren jamers vol;
allererste ez an ir chumer gie,
nu hoeret und merchet wie.
des landes sit was sus getan
( als ich iu nu wol sagen chan):
swer sus chom gevaren dar
an gelait, der het gar
verlorn leip unt gût,
sus stuend des landes herren mût,
den under in niemen weste:
die ellende geste,
do si daz lant sahen,
da engegen begunden si gahen;
in die hab si stiezen,
die marner do nicht liezen
si ancherten cehant.
do in diu hab wart bechant,
si douhte si wæren zegemache chomen.
do heten si dannoch nicht vernomen
wie des landes sit was.
si giengen ouz an daz graz
unt waren vro der lieben stunt
daz in daz lant was worden chunt
und dem wage waren entrunnen,
des waren si mit wuennen
biz si chomen zu den leuten;
die begunden im bediuten
wie dem sit da wære.
do erschracten si der mære.
der weise pot adrian
sa die besten vragen began
wa er an der stunde
den hohen chunich fûnde.
den begunden si im zaigen,
si sprachen:< ir seit die vaigen:
war umb fragt ir fur in?
ir sult ez lazen, hapt ir sin.>
adrian der was frut,
er sprach zu in:< und wer daz gût,
wir mugen iu doch entrinnen nicht,
wir muzen leiden swaz uns geschiht.>
si sprachen alle:< er sagt war.>
si zaigten im gegen dem chunige dar,
der was vespasianus genant,
sein namen was da von bechant
( als tut uns diu schrift gewis)
daz im die wurme vespis
heten durchslofen die nasen sein,
daz er da von laid grozen pien.
si was im ungefûge groz,
daz in seins lebens da von verdroz,
von dem wurme der also hiez.
adrian des niht enliez
er gie fur den chunich stan.
sein red hub er weislichen an,
er sprach:< genade, herre mein,
tû an mir genade schein
unt senfte deinen mût,
ich pin mit leip unt mit gût
dein aigen: nu tû an mir
genade, herre, ich neig dir.>
der chunic alcehant sprach
do er den potten an sach:
< von wan pist du oder wer
oder wie pist du chomen her?
daz solt du mich wizen lan.>
do sprach der pot:< daz sei getan:
von jerusalem pin ich.>
der chunic sprach:< so solt du mich
gesunt machen an diser stunt,
seit mir verjehen hat dein munt
daz du von dem lande pist
der weisen, so chanst du den list
daz du mich macht machen wol
gesunt, des ich dir danchen sol
die weil ich geleben mac,
unt chumt mir helfelicher tac
von dir, des must du geeret sein.> -
< genade, lieber herre mein!
ich chan von erzenie nicht
swaz halt anders mir geschiht,
ich pin aller der chunst vrî
swaz der ist von erzenîe.>
< so must du leiden den tot
du enhelfest mir von meiner not,>
sprah der chunic ouz zorne,
< du pist der verlorne
wil du mich widerstreiten;
in manigen landen weiten
sûchet man die weishait
die da dem lande sint berait.>
des antwurt er im vorhtliche:
< hoh edel chunich reiche,
tu mir swaz dein genade sei!
mir wont nicht solhe gnade pei
daz ich dir gehelfen mûge
also daz ez dir tûge.
zejerusalem was ein man
von dem ich dir zesagen han,
der was ein hoher weisage,
der was alle sien tage
an wercken gewaltic,
der tugenden manicvaltic;
der hat wunders vil getan:
die toeten hiez er ûf stan
in dem lande alumbe,
ousetzen, die plinten, die chrumbe
maht er gesunt unt berait,
so groz was sein hailicheit.>
der chunic sprach:< nu sag mir mer
durch deine triwe: wa ist der
( daz solt du mich wizen lan)
der solhe wunder hat getan?>
er sprach:< herre, daz sag ich dir,
daz ist wol gewizzen mir:
die valshen juden in viengen,
an daz chriuce si in hiengen;
dar an laid er den vil pittern tôt
von der werld wernde not
unde erstund am drittem tage
von dem tôde; daz ich dir sage,
daz ist endlichen war,
ich leug dir nicht umbe ein har.>
der chunic sprach:< unt lept er noh,
getroust du ob er mir helfe noch?> -
< ja, fur war gelaube daz,
er hilfet noch unt niemen paz,
ob du gelaubhaft wesen wil;
wand er hat noch genaden vil.>
du sprach der chunic an der stat:
< ist der gelaube warez phat
gegen meiner sælichait,
dar zu mich mein wille trait
daz mein gelaube ist an in groz
der dem plinten sein ougen entsloz
und die toeten hiez ouf stan,
daz er mich wol entsachen chan
allez meines smercen;
der gelaub ist meinem hercen
mit rechten triwen pei
unt pin dar gar zweifels vrei,
ob er wil, er mag ez wol:
in dem gelauben ich sterben sol.>
mit rehter andacht er daz sprach.
die wurme man do vallen sach
alle ouz seiner nasen nider;
do riht sich daz flaish hin wider
als ez gewunne nie mail dehain,
unt wart slêcht und raine,
diu nase shône unt wol gestalt.
do wart sein vreud manicvalt,
alle die sein vreuten sich;
er sprach:< got der hat erhoeret mich,
des ich im immer dancken wil
biz an meines endez zil.>
er sprach zu dem potten:< gehab dih wol!
pilleich ich dir dancken sol
deiner vil suzen mære,
daz mih meiner swære
vil wunnechlichen habent entladen;
du solt an aller hand schaden
varen haim celande.>
an spêis und an gewande
hiez er in beraiten wol,
als man lieben vreunt sol;
man pûzt im swes im da geprast.
indaz land chom nie dehain gast
dem ez da wurde enpotten paz.
er schied von danne an allen haz
unt fur cehant vrôlich.
do berait ouch sich der chunic reich,
gegen rome er da mit willen fûr,
dem suzem jesu er des swur
daz er wolde rechen in,
uf rechen stuende al sein sin.
du waren ouh zerome mær chomen,
von jesu wart alda vernomen
daz der vil suze wære
ein hoher hailære,
und was er wunders tæte;
umb sweu man in pæte,
swelher hand siechait
der mensch an sel und leip lait,
den man pracht fur in
unt het er gelaubhaften sin,
so wart er cehant erloest.
er ist der chumberhaften trôst;
des wart der chaiser harte vro.
umbe den stuend ez also
daz er vil grozen siechtum lait
von der posen ousezichait;
tyberius was der chaiser genant.
do im diu mære wurden bechant,
do sant er vil drate
nah allem seinem rate,
der was aller schir chomen.
er sprach:< ir herren, habt ir vernomen
von jesu, dem hohem man,
der solheu wunder hat getan
zejerusalem in dem lande?
wen ich nah dem sande,
da sult ir mir raten zu,
wer daz aller peste tu
daz er mir in pringe,
ob er mir geringe
meiner grozen swære.
swem mein hail liep wære,
der prechte mir in snellichliche.>
sus sprach der hohe chaiser riche.
des antwurten im die fursten do:
< wir sein alle deines hailes vro:
swie du mohtest werden gesunt,
daz wer unsers hailes funt,
unt swie wir daz gefugen mugen
unt swelher hant leut dir tûgen
zu der potschefte dein,
dar an wirt unser triwe dir schien
daz wir daz gern fûgen
daz sein dich muz genuegen.>
si sazen nider unt trachten,
um ein potten si achten
der daz wol werben mochte
daz ez dem chaiser tôchte.
< daz shol, herre, wol geschehen,>
begunde einer under in jehen,
< ich waiz ainen werden man,
der ist gehaizen columban;
der ist ûf elleu dinch reht,
getriw, weise unt slêcht,
gefûge an allen dingen,
den sol man im pringen.>
der geviel in allen wol.
< pilleich man in loben sol,>
sprachen si alle,< wand er ist sein wert,
der chaiser hat gar des er gert
an im: er wirbet die potshaft
endleich und redhaft.>
si giengen und laiten ez dem chaiser fur:
< wir haben nach deiner willenchur
ainen potten an disen stunden
zu deinen noten funden.>
der chaiser sprach:< nu nennet mir in!> -
< daz ist columban.> - do erchant er in
zehant als er wart genant,
wand er was vil wol bechant;
daz het er mit seiner werdechait
dar zu pracht von chinthait
daz man in wol erchante
in allem dem lande.
der chaiser wart der mære vro,
er sant im erbær potten do
daz er cehove chæme
zehant als er vernæme.
columban der was wise,
sein zuht, sien triu ich prîse
daz er so erberlich sich hielt;
der triwe vil tûgend wielt.
als er die potschaft vernam,
zehant er cehove cham,
fur den chaiser gieng er hin
unt stund mit zuchten fur in.
der enphienge in wol unt shoen gar,
er sprach:< columban, nu var
durch meinen willen uber mer;
pi der chrone ich dir swer
daz du sein mûst immer genîezen
( des chan mich niht verdriezen),
pringest du mir jesum her,
des wil ich dir immer mer
danchen al die weil ich leb
paidiu mit lehen unt mit geb.>
columban sprach:< herre mein,
ich ervolle gern den willen dein.>
der chaiser sprach:< des lon dir got
daz du so gerne mein gebot
laistes, des wil ich danchen dir;
und sag pylato von mir
daz er mir jesum sende
oder ez sei sein ende.>
do sprach der weise columban:
< ich pin dir gern undertan
allez des du gepeutest mir.
nu haiz mir beraiten schir,
ich pin dir willic der vart.>
zehant er berait wart
swes er haben solde,
mit silber unt mit golde
wurden seiniu soumschrin
geladen nah dem willen sein.
alles des er gerte,
vil shôn man in des gewerte;
swes er bedorfte dar zu,
die wurden alle beraitet du.
er wart shôn unt wol gechlait.
do er alles des wart berait
daz er selbe solde han,
do nam er urloup unt fûr dan.
gegen dem mer er cherte,
sein wille in daz lerte
daz er cehant schîffueng gewan,
unt schift sich vrôliche an.
sus furen si mit vreuden hin,
si heten witz und sin,
gar eben giengen die winde,
gût weter unde linde
heten si uf al der vart,
dehain sturm in chunt wart.
do si chomen uber an daz lant,
du fragt der weise alcehant
wa er pilatum fûnde.
den zaigt man im an der stunde;
einer der in wol west,
er sach wol daz die geste
vil hohe potten waren;
ir willen begunde er varen,
er weist si rechte des endes hin
da si schir funden in.
der weis pot columban
gie fur pilatum stan
unt warp des chaisers potschaft
redlich und vil endhaft.
pilatus du nicht lenger swaig,
vil tief er gegen der potshaft naig;
er hiez in willechomen sein,
er sprach:< nu sitzet, herre mein,
durch iwer zuht zu mir nider.>
daz tet er nicht langer wider;
do er zu im nider saz,
er sprach:< pylatus, nu merck daz:
der chaiser hat enpotten dir
daz du sendest im pei mir.
an underlaz in churzer vrist
den hohen hailære jesum christ.
unt wiz, unt tust tu des niht,
daz dir da von ubel geschiht:
er nimt dir leip und gût.>
pilatus was vil charch und frût
und gedaht wie er mit listen
die red mohte vristen;
er schract harte sere,
er sprach:< durch iwer ere
gebt mir vrist vierzehen tage,
in der ich iu sage
waz ih dar an tun mac.>
columban vil grozer triwe phlac,
er tet als der getriwe tût,
er chert dar nach gar seinen mût
daz er gût pot wære;
da mit des chaisers swære
wurde gar verswendet,
daz het er gern verendet.
er sprach zu pylato:
< sich daz du ez shæfst also
daz ez geschehe inder zeit,
oder du wizze daz ez uf dir læit
des vil pittern todes joch;
die zît wil ich dir peiten noch,
niht lenger ich gepeiten mac,
biz an den vierzehenten tac
wil ich beleihen hie durch dich,
daz du danne vertigest mich
wol mit jesu christe.
alle deine liste
choment dir zehelfe nicht
ob ez denne nicht geschiht.>
er nam urlaup unt fur cehant
da er sein herberge vant;
diu was dem werdem berait
wol nach seiner wærdichait.
pilatus begunde sorgen doch,
sein pot was niht chomen noch
den er zerome het gesant,
wand, wie ez um den was gewant,
des enwesse er dennoch nicht,
im was unchunt diu geschiht
daz in der wint het verslagen,
im chund niemen niht gesagen
wa er hin chomen wære;
er beite seiner mære,
die er von rome im præchte dar,
da mit was er versoumet gar,
wand er was nie dar chomen;
er het dannoch niht vernomen
wie es umb in was gestalt,
des was sein sorge manicvalt.
dar uf gab er dem poten vrist,
doh half im dehain list.
der weis pot columban
hin und her vragen began
in der stat der mære
war der suze jesus chomen wære,
< aller tugent ein ursprinch,
wie ist chomen das dinch?>
daz getorst im niemen sagen,
si mûsten ez alle durch not verdagen;
die juden unt pilatus
die heten daz geboten sus
daz niemen getorst gedenchen sin;
daz was vil maniges hercen pin,
die gern von im heten geret,
den ez gar unsanfte tet.
der pote daz schire het ervaren,
sein zucht er dar an chund bewaren
daz er offenlich iht mer
dar um vragt; du gieng er
den mæren heimlichen nach.
ein gût man zu im sprach:
< herre, welt ir mich vristen
mit al iwern listen,
daz mir icht gewerre,
ich zaige iu hie nith verre
ein vil gut frowen,
die mugt ir gern showen,
diu sagt iu wie ez um jesum stat,
wand er sei ofte getrostet hat.>
do sprach der weise columban
wider den vil gûten man:
< du solt sein an angest gar
daz dir iemen iht getar
paidiu sprechen unt tun,
du hast pi mir vrid unt sun.
sag mir reth: wer pistu unt wer ist diu?>
er sprach:< herre, die zaig ich iu;
si ist gehaizen veronica.>
der pote sprach:< nu zaig mir wa
ich die vrowen vinde.>
von allem seinem gesinde
huebe er sich mit im da hin;
unz in ir hous weist er in.
columban indaz hous do gie,
diu vrowe in vil minnechlich enphie,
als ir hailichait gezam.
cehant als er ir rede vernam
( diu geviel im ouz der maze wol),
< frowe,> sprach er,< ob ich nu sol
ew mit urloup vragen
( des lat iuch nicht betragen
durch iwer zuht), so sagt mir
( wand mich dar nach jagt alle mein gir),
wa ist der vil werde suze christ?>
du ersoufte si tiwer ander vrist
und begunde haiz wainnen
do er nant den vil rainen;
si sprach:< nu saget mir, herre gût,
recht war umb ir daz tût
daz ir so fleizichlichen
um den tugentreichen
vraget, des berichtet mich.>
er sprach:< vrowe, daz tun ich.
da bedorft ich grozlichen wol sein:
ich und ouch der herre mein.
er ist bevangen mit siecheit,
dem ist so vil von im gesait
daz er die siechen macht gesunt;
den zaiget mir an diser stunt,
daz dient mein herre um iuch also
des iwer wird stiget ho.>
diu frowe sprach:< nu sagt mir
wer iwer herre sei oder ir.> -
< gern, frowe, daz sei getan:
er ist ein so gewaltic man
daz alle werlt im dient dar
dishalb mers und enhalp gar,
von rome der hohe chaiser.>
der vrowen stimme diu was haiser
von dem wainnen worden;
vil tugende chunde si orden,
von wainen si choum sprach,
gûtlich si in an sach.
si sprach:< mein suzer herre
ist nu laider verre
unt wont den sein doch stæte bî;
mit genaden unt tût si vrî
endloser swære.
der sûze ist minnebære,
sin armiu dienærin ich pin;
allez mein trourn waer da hin
unt solt ich pey dem vil suzem sien.
mein lieber gast, der herre mein
ist jesus, den ir da sûchet.
ob er sein geruchet
do er noch hie in erde gie,
do was er dicke pi mir hie,
zu mir hiet er zuvart;
seines todes nie mensch so laid wart
an sein muter alsam ich.> -
< owe, ir hapt verwundet mich;
sælic frowe, wie tut ir so!
ir hapt gemachet mich unvro,
sprechet ir daz er sei tot;
owe der chlag bernde not!
wie shol mein herre danne genesen,
muz er an sein helfe wesen?
nu stuend an im aller sein trôst.
wie sol er nu werden erloest
von seiner grozen siecheit?
daz ist immer meins hercen lait,
beleibet er in seinen noten.
wer mohte den ertoten,
der aller ding gewaltic was
unt von dem manic siech genas,
mocht sich der gewaltes nicht erwern
unt von dem tod ernern,
der ander toten hiez uf stan?
sag mir wie ist ez umb in ergan?>
diu frowe vil zuchtichlich sprach:
< do daz also geschach
daz eva diu unweise
in dem paradise
von ir ungehorsam
den apfel von der nater nam
( dar umbe si verstozen wart,
da von die hellechlichen vart
fûren alle ir nach chomen,
als ir e hapt vernomen,
da von der val ouf uns gelac
immer mer untz uf den tac
daz got die menshait enphie
in menshlichem pilde hie):
du mûst daz also sein
daz der suze herre mein
hie uf der erden
gemartert mûse werden.
mit seinem tode er erlost
uns von der hellen roste.>
columban sprach:< nu sagt an:
wer hat im den tôt getan?> -
< daz chan ich iu vil wol sagen;
daz was vor manigen tagen
den juden vor geweissagt
daz gebern solt ein magt
ein chint, daz von der werlt nôt
leiden solde den tot.
do daz geschach alsus
daz geboren wart jesus
von der magd marien,
der suzen valshes vrien,
ane scham und ane we
unt wont hie drizich jar und me,
vil schone zaichen er begie
unt predigete hie
der werlde offenliche
wie man daz himelrich
mochte gewinnen
unt wie man got solt minnen.
die juden daz do sere nîten,
wider in si ce allen ceiten strîten,
si gedahten wie si in verrieten;
ein sein junger si mîeten,
der was gehaizen judas
( der zwelf poten er einer was),
der gab den suezen jesum hin,
umb drizich phenning gab er in in
daz in die juden viengen.
mit im die valschen giengen
fur pilatum, den richtær;
dem was ein tail ir rede swær,
die si gegen im sprachen,
er wesse wol daz si sich rachen
an im nicht anders wan durch nît.
nu was ouch chomen diu cît
daz er die marter solde
leiden als er wolde;
an daz chriuce genagelt wart
untz in den tot sein lip verschart
pitterlichen unt vil sere
mit drin nageln unt mit dem spere,
dar an er menshlichen starp;
sein sterben uns ewic hail erwarp.
josep von arimathia
sach in alsus hangen da.
er gie zu pilato an der stat,
um den lichnamen er in pat;
willichlichen er im in gab.
josep nam in do ab
und begrueb in durch sein triwe
in ein grab alniwe;
dar inne der vil suze lac
niwer untz an den driten tac.
dar nach er vil loblich erstuend.
die vier ewangelisten uns daz chunt tûnt
daz er nach seiner urstende
wont in disem ellende
vierzick tage und vierzick nacht.
do diu cît wart vol pracht,
du fur der liebe herre mein
ze sichte der junger sein
loblich gegen himelrich.
da sitzet er vil gewaltichlich
uf seins vater throne
ze seiner zeswen shone,
im eben gewaltic unt her.
am jungistem tage so sol er chomen her
durch daz gestrenge gerihte hernider,
da wir alle muzen wider
mit leib und mit sel ersten
unt fur in zegericht gen.>
der wise pot columban
sach sei fleizchlichen an;
ir rede er gern horte,
want si im zwivel storte,
gar wol si im behagte.
er gelaupt ir als swaz si im sagte,
er sprach:< durch got nu sagt mir
durch iwer zucht( daz ist mein gir)
wie ich nu sol gebaren;
ich muz in churzen jaren
alten von disen dingen
unt sol ich jesum niht pringen
meinem herren. nu gebt mir rat,
seit ez um in also stat,
wie ich meinem dinge tû,
da bedarf ich iwers rates zu.>
si sprach:< iwer herre mac wol genesen
welt ir und er gelaubhaft wesen.>
er sprach:< ich gelaub swas ir welt
unt swas ir mir vor gezelt,
daz gelaub ich gern und wol,
seit der gelaub mich sol
setzen an die sælichait
da von verswendet wirt mein lait
daz ich um meinen herren han;
swaz ir nu welt, daz sei getan.>
diu frowe sprach:< ist daz also,
so zaig ich ew des ir wert vro:
ich han sein antlutz hie,
daz er ze trost mir lie,
der suze lieb herre mein,
daz ich da pei gedenche sein.
ich pat daz er hiez machen mir
ein antlutz( daz waz mein gir),
daz seinem antlutz wer gelich;
du sprach der suze tugent reich:
« des wil ich selbe sein dein gewer;
nu raich mir ein weizes tuch her,
dar an male ich dir nutze
mein selbes antlutze,
da pei du mein gedenchen maht. »
daz tuch het ich im schir pracht
und gab im daz in die hant.
daz nam der suze alcehant,
an sein antlutz er ez druchte
daz sich nie verruchte.
du stund dar an nach seiner wal
sein antlutz liecht gemal;
daz gab mir der suze do.
des was ich innechlichen vro,
wand ez mir in die ougen schein
so geleich als ez wer ein;
daz selb antlutz ich han.>
do sprach aver columban:
< durch got lat mir die sælde geschehen
daz ich ez an muze gesehen.>
diu frowe sprach:< daz tun ich:
welt ir halt mit fride mich
her wider pringen, ich fur ez mit ew;
seit ir gelaubhaft unt getriu
unt iwer her, unt sicht erz an
mit rechtem gelauben, so ist zergan
aller sein siechtum,
als ob er an sehe jesum.>
< daz hapt uf meiner sicherheit,>
sprach er,< daz iu nimmer leit
widervert uf diser vart
( ir wert schon unt wol bewart
an allem iwer dinge)
unt ich iu wider pringe
an aller hande ungemach.>
diu frowe zuchtichlichen sprach:
< herre, des hapt ir ere;
nu tût nach meiner lere
unt seit nu mit andaht berait
recht durch iwer sælichait.>
von im si cehant gie,
daz antlutz si in sehen lie,
mit grozer andaht trueg si ez dar;
ez was so wunnechlich gevar,
du ez gesach der vil werde,
du viel er uf die erde
gegen im mit andaht uf diu chnie:
< ich gesah so wunnechliches nie
seit ich geborn ie wart;
wol mih der vil sælichlichen vart
daz ih ie pin chomen her!
ich pin nu sælich immer mer.
ir hapt mir vil rechte gesait,
mich enriwet nicht mein arbait.
frowe, nu sagt mir iwern mut:
welt ir dar um nemen gût
daz irz dem chaiser gept?
ich gib iu dar um die weil ir lebt,
daz irz getiwert immer seit.> -
< herre, wær daz an streit
daz al diu werlt diente dar
( daz wizzet recht fur war),
dar umbe wær ez nith vaile.
ez chom mir ce unhaile
ob ich verchauft die hailichait,
so prueft ich mir selber leit;
umb ditz dinck ez nith also stat,
wand swaz der himel bedecht hat,
da mit wer ez vergolten nicht.
ich var mit ew; als daz geschiht
daz ir welt sein gelaubhaft
unt getrowen gotes chraft,
so wert ir allez des gewert
des ir mit rechter andaht gert.
man solz nicht chaufen um gût,
des enhapt dehain mût.
ich wil wan durch got mit ew varen,
chunt ir iu dar an bewaren
daz ir diemutichlichen vart
und iu an hohvart bewart.> -
< gern, wan daz tun ich,
swie ir beweiset mich.>
der vrowen er sich do underwant
unt chom da er sein gesinde vand;
dem sagt er vil liebeu mære
wie ez ergangen wære.
do furen si an den stunden
da si ir schef funden
unt schiften sich vrolich an.
sus fur der wais columban,
mit freuden stund des heldes mût;
ir geverte wart lind und gût,
der wint nach allem ir willen gie,
so snelle chomen leut nîe
uber mer als dise tæten.
do si an daz lant traten,
si giengen zu der frowen,
daz antlutz begunden si schawen:
daz was so wunnechliche gestalt,
ir vreude diu wart manicvalt
du si ez gesahen.
gemeinlich si jahen
daz si got der reich
het so snellichlichen
durch daz antlûtz uber pracht
mit seiner gotlichen macht.
columban zehande
nach seinem phearhd sande;
die waren im snellichlichen chomen.
nu wurden ab dem scheffe genomen
ir chlaider unt diu soum schrein,
si wolten da nicht lenger sein.
den marnæren wart gelonet wol,
als man noch gûtem geverte sol;
si machten sich uf unt furen hin,
gegen rome stuende ir sin.
columban nam uf dem wege
die frowen in sein phlege
unt churzt ir die stunde
so er aller peste chunde,
biz daz si der stat so nahen
chomen daz si die sahen;
diu was groz unt weît.
si chomen dar zevesper cît;
durch die stat si shone riten,
alle hohvart si vermitten.
daz volck allegeliche
enphienge sei minnechliche,
do si in erchanden,
mit vreuden si in nanden.
die frowen furt er, do daz geschach,
in sein hous an ir gemach
er sprach zu ir:< frowe mein,
ir schult gebieterinne sein
uber al meine hab.>
selbe hub er sei ab,
diu her housfrowe gegen ir du gie,
mit grozen eren si sei enphie,
unt ouch daz gesinde gar
nam ir fleizchlichen war
unt erputten ir groz ere
nah des wirtes lere;
alles des si gerte,
des wart si als gewerte,
man phlag ir innechlichen wol,
als man werdes vreundes sol.
des morgens do der tack erschain,
du wart der wirt des inein
daz er gegen hove rait;
gar diemuethliche was sein chlait.
uf dem hove erbaizt er nider,
daz gesind uf und nider
chom allez gelaufen dar
unt enphiengen in minnechlichen gar.
vor dem chaiser wart vernomen
daz columban wære chomen,
des vreut er innechlichen sich,
er sprach:< nu haizt in chomen fur mich.>
nach im pald wart gesant.
do chom er fur in alcehant;
als er in verrist an sach,
gar lieplich er im zu sprach:
< nu wis got willichomen unt mir!
hastu jesum pracht mit dir,
so enwart nie man so seldenreich.>
do sprach columban zuhtichlich:
< neine, herre, ich pringe sein nicht.> -
< owe, so muz ich jamers phlicht
immer chlægelichen han;
wie sol ez mir denne ergan?
owe, wie sol nu rat werden mein?> -
< herre, welt ir gelaubhaft sein,
so mugt ir noch wol genesen.
ir sult mit rechter andaht wesen:
ich han iu pracht ain frovwen,
die mugt ir gern schavwen,
diu hat ein antlutz mit ir praht;
seht ir daz an mit andacht,
so chomt ir von aller iwer not.
wizet daz jesus ist tot;
ditz ist seines antlutzes schein.>
der chaiser sprach:< nu wenne sol daz sein
daz ich die frowen muge sehen?
daz la snellichlichen geschehen.>
columban sprach:< daz tun ich.>
von dem chaiser urlaupt er sich
und fur nah der frowen cehant,
die er an ir andacht vant.
do pat er die vil gûten,
er sprach:< getar ich gemûten,
so geruecht mit mir cehove varen.>
diu frowe ir zucht wol chund bewaren,
daz si laist swes er sei pat,
si fur mit im an der stat.
als si uf den hove quam
und do daz der chaiser vernam
ab dem gesidel er do spranc,
sein not in zu dem gelauben betwanch
daz er ab zoch sein gewant,
sein chaiserlich chlaider cehant
unt hiez im mit sinnen
ein grawes tuech gewinnen.
dar inne er gegen der frowen gie,
die er gar diemuetichlich enphie.
daz antlutz zaigt si im do,
des wart er vil innechlichen vro;
er viel fur ez an der stunt:
do wart er an der stat gesunt,
sein leib wart shone unt rain,
als ein newgeborn chint er schain.
du im diu sælichait geschach
daz man in wol gesunten sach,
des lopt er innechlichen got.
er sprach:< nu wil ich dein gebot
laisten die weil ich mac geleben,
seit du mir wider hast geben
mein gesunt unt vreuden vil,
dar umb ich dir immer wil
dienen untz an mein ende,>
unt ract uf sein hende
gegen himelriche;
daz volck algeliche
dancht got der eren
unt begunden sein lob mæren.
der chaiser die frowen pat
daz si belibe inder stat,
er wold ir leihen und geben,
ob si tousent jar solde leben,
daz si immer het genûk.
ir wille sei dar zu nicht trûk,
si sprach zem chaiser:< herre mein,
ich mack hie nu nicht sein,
ich wil mit iwern hulden varen,
jesus christ muz iu bewaren.>
der chaiser sprach:< nu sagt mir
durch iwer zucht( daz ist mein gir)
von wem jesus ertotet ist,
daz sagt mir an diser vrist.>
daz sagt si im und columban
allez wie ez was ergan
und daz des allez wære
pylatus richtære.
da sprach der chaiser ouz zorne:
< nu ist verlorne
pilatus, hat er den erslagen
( daz wirt im nimmer vertragen)
der mich unt vil manigen siechen man
hat siechtumes an getan.>
zu der frowen er vil gûtlichen sprach:
< durch got nu shaft iu gemach;
allez des ir gernd seit
und swaz an iwerm willen leit,
dar an shult ir gebieten mir.
columban, nim sei zu dir
und phleg ir schone unt wol,
des ich dir immer danchen sol;
swaz si gepiete uber al mein reich,
daz sol du laisten willichlich.>
diu frowe mit im zeherberge gie,
daz antlutz si pi dem chaiser lie,
des er mit grozen triwen phlag,
sein heilichait er hohe wac.
nach allen den fursten er sande,
die chomen alcehande
und waren vro der mære
daz er von seiner swære
wær alsus enbunden,
und daz si in gesunden
solden sehen, des waren si alle vro.
manic stoerie hueb sich do
mit vreuden unt mit schalle.
die fursten chomen alle
ouf den hof gepuniret,
maniger sich het gezîret
so er beste mohte.
dem chaiser daz niht tôhte,
er gebot den fursten uber al
daz si liezen den schal
und zerate giengen.
den chaiser si enphiengen
als ob er wær erstanden
von des toedes panden.
nu was vespasianus nu chomen;
diu mær er schir het vernomen
daz der chaiser was worten gesunt,
er mach sich uf an der stunt
unt fur cehove unt wolt besehen
von wem daz wunder wær geshehen.
wie schôn er uf den hove rait
wol nach seiner werdichait!
er erbaizt nider und gie
da hin gegen dem chaiser. er enphie
in minnechlichen und vil schone,
als ez gezam der chrone.
von fursten was da groz gedranck,
der maniger gegen im uf spranch
unt in mit zuchten enphiengen
und shon gegen im giengen.
zem chaiser vespasianus sprach,
do er in wol gesunten sach:
< o wol mich, herre, des hailes dein,
hoh gelopter herre mein!
daz ich dich alsus sehen sol,
daz tut mir innechlichen wol.>
der chaiser sprach:< ich vræud ouch mich
daz man sicht gesunten dich,
daz ende hat dein swære groz,
der wol des meinen was genoz.>
ir itweder sagt dem andern do
wa von ir dinch wer chomen also
daz si von nôten wæren chomen.
nu was zerome noch nicht vernomen
wie vespasiano was geschehen.
nu begund er in jehen
wie ez allez dar chomen was
unt wie er von gelouben genas;
er sprach:< einer haizet jesus christ;
ich enwaiz nicht leider wær er ist,
wand der geloub ist mir pei
daz er gar gewaltich sei
himels unt erde und aller geschaft,
daz nu wol scheinet an seiner chraft.
er hat gesunt gemachet mich.
pilato einen potten ich
vieng in meinem lande,
der in vil wol erchande,
der sagt mir von im wunder.
do fragt ich in dar under
von im al der mære
wie er ertôtet wære.
daz sagt er mir unwende,
daz anegenge und ende
er mir vil rechte sagte,
dar an er nicht verdagte
wie in verchoufte judas
unt wie des pilatus richter was,
daz in die juden verrieten durch nît,
daz sagt er mir und ouch die zît
wenne unt wie ez allez geschach.
zu im ich gûtlichen sprach
unt fragt in aver furbaz:
« gut man, nu sag mir daz:
lept er noch, troustu ob er mich
gesunt mach, helt, daz sprich! »
du sprach der potte: « fur war,
wil duz gelauben, er macht dih gar
an allen deinen liden gesunt
und tût daz in churcer stûnt. »
ich gelaupt daz er mir sagte,
da von mir hail betagte,
mein gelaube an jesum christ
mir sælichleich chomen ist.
ich ensach noch enhort nicht,
daz was ein wunderlich geschiht;
ich gelaupt daz er mir vor sprach,
cehant man mich gesunten sach.>
do daz der chaiser horte,
do sprach er an dem worte:
< zeglicher weise ouch mir geschach:
do ich sein antlutz an sach,
daz wan nach im entworfen ist,
do wart ich an der selben vrist
gar wol gesunt und hail
unt shônes leibes sunder mail.>
do wundert diser mære
alle die romære,
die fursten sprachen allegelich:
< er mack wol sein genaden reich
der so manige groze tat
mit zaichen hie begangen hat.>
der chaiser sprach:< nu ratet mir,
ir edel fursten( daz ist mein gir),
wie ich gebære um den man
der ditz mort hat getan
an jesu dem hailer,
der mich von meiner swaere
und vil manigen erloest hat;
dar umbe so gept mir iwern rat.>
vespasianus do sprach
( dem was mit zorn gegen im gah):
< du solt uber mer senten
und den morder schenden,
haiz in gevangen pringen her.>
du sprach diser und der,
fursten und chnechte:
er het geraten rechte.
der chaiser do cehande
potten uber sande
und hiez pylatum vahen.
die potten begunden gahen,
zu der verte was in not,
si taten daz ir herre gebot.
du si uber mer quamen
und si verre vernamen
wa pilatus wære,
dem si da waren vil ummære,
do giengen si hin unt viengen in
unt furten in gegen rome hin.
do si zerome quamen
und ez die leute vernamen,
der chomen vil geloufen dar
unt namen des wutreichs war
als ob er wære wilde;
durch daz vil groze umpilde
des er vil het getan,
durch daz wunder sahen si in an.
cehove man in prachte;
dem chaiser daz versmahte
daz er in sæhe.
er hiez in gar smæhe
in einen starchen charcher legen
unt hiez sein hertechlichen phlegen.
niemen sprach sein wort da wol,
der hof wart schir von leuten vol,
die truegen im alle grozen haz.
der chaiser an daz gerith saz;
man gebot dar alten unt jungen,
der vil cehove drungen,
vil der chunige und ir chnechte unt ir chrone
sah man da sitzen shone,
manigen fursten man sach.
der chaiser zu in allen sprach:
< ir chunige, ir fursten als ir hie seit,
des hoves er an iu leit:
gebt iwer urtail uber den man
der ditz mort hat getan
an dem so volle sælichait
fur alle die werlt ist berait.>
die fursten an ein ander sahen,
ir deheiner sich nicht wolt vergahen
daz er die urtail tæte,
swie sis der chaiser pæte:
si douchte ein tail swære.
vespasiano was ez ummære;
er sprach:< mein urtail ih tûn:
si gewinnent nimmer frid noh sûn
die an jesus schuldic sint;
die selben, iriu weip unt iriu chint
muzen von mir leiden not
unt vil pitterlichen tot.
ir herren, hoert durch iwer hail:
ditz ist mein urtail:
swer den hoehisten man hat
ertotet, daz ist mein rat
( unt getar ez auch ertailen wol),
daz man den pillich toeten sol
des smæhisten todes des îeman
inder werlt erdenchen chan.
pei vrômrecht ertail ich daz.>
der chaiser vragt furpaz
die fursten ob si douhte recht.
si sprachen al si wer slechte,
si wolten der urtail volgen;
si waren ir nicht erbolgen.
der chaiser sprach:< nu sagt mir da pey
welhes der schentlihst tôte sei
da mit errochen wurde christ.>
die fursten sprachen:< nu gebt uns vrist
in disen næsten siben tagen,
so wel wir dir den tot sagen.>
si sazen dar uber zerate.
nu gie von danne drate
von hove ein juncherre;
der charcher was nicht verre,
da gie er durch seinen mût.
pilatus sprach:< juncher gût,
ginc ein tail her naher paz,
durchnecht sag mir daz
waz man cehove red von mir.> -
< da hat man vertailt dir.>
er sprach:< war um ist daz getan?> -
< daz du jesum den hohen man
hast ertotet um sus.>
du sprach aver pilatus:
< nu wie sol man toten mich?> -
< des posisten todes sol man dich
ertôten des ieman erdenchen chan unt mac.>
pylatus eren sich bewac;
er sprach zu dem juncherren: unt ist daz war?
mit im ein mezer pracht er dar,
da mit er sich zetode stach,
daz ez der juncher an sach.
der lief zu den fursten alcehant
und tet in diu mære bechant
wie pilatus hete gevaren.
got muz uns da vor bewaren
daz wir die sele icht senchen sus
als der valant pilatus. amen. von got ein gût gepet.
got herre, gip mir daz ich dich
muze erchennen unt ouch mich!
herre, ich han gesundet dir.
durch dein gute so gib mir
rechten gelauben unt ware rewe,
durch dein væterliche triwe
vergibe mir mein misetat,
durch deyne erbærmde unt durch deiner genaden rat,
durch alle deine namen here,
durch deiner muter ere,
durch allez himelische her:
hilf mir daz ich die sel erner.
tû ez, herre, durch allez daz gepet
daz ie mensch zu dir getet.
la mich geniezen, herre christ,
daz dich lopt allez daz der ist;
durch deyne geschephde alle
ner mih vor des tivels valle,
durch elliu wunder diu du hast
begangen und ouch noch begast:
so lose mich ouz aller not
durch deinen menschlichen tot;
und la dir uf die genade dein
die christenhait enpholhen sein,
si sein lebentic oder tot:
so hilf in uz aller not. amen.