CRO.txt

ejn weis man gesprochen hat,
daz deu red missestat,
diu an witz geschiht;
ouch frumet der sin lutzel iht,
den ein man ein treit.
swer gedenchet vnd niht reit,
daz ist als schadebære,
sam er ein tor wære.
waz mag gefrumen sein chvnst
an red vnd ane gunst?
verborgen schatz vnd wistuom,
die sint ze nutz selten frum.
red mit weistuom frumet.
vil ofte daz chvmet,
daz an der red vælt der sin
vnd stet gar an gewin.
doch, wæn ich, er selten gesigt,
der des alle weg phligt,
daz er sein swert erziehe
vnd da mit wider fliehe,
e er deheinen slak gesleht.
swer den rauhen ziegel tweht,
der sihet ie lenger diker hor.
so er ie lenger fleuhet vor,
so im der sichk ie verrer ist.
da wirt deu gymme in den mist
getretten an gewizzen.
er schol vil wol wizzen,
swer vehten vnd vliehen sol,
der bedarf guoter witz wol,
wan im ze fliehen oft geschiht,
dem zagen, so er swert pleken sicht.
wan chan ein vogel gevliegen,
ob in die vedern leiht triegen
einr vil geheizzen mäht?
jch füer auch wol, ob ich mäht,
von den toren ein teil
vnd spræch gern ane mail,
liez mich mein vnheil.
mir ist ouch diu rede chvnt,
daz dehein menschleicher mvnt
müge gar sunder wandel sein.
jch enger ouch niht, daz der mein
sei gar wandels ane.
nah menschlichem wane
mercht man des mannes sin.
ob ich der sinne poeser pin,
daz schol man mir vertragen.
wan hoert daz ofte sagen,
daz etswenne gevalle
ein swachiu cristalle
nahen ze einem smareise.
auch bevahet niht der weise
gar des reiches chrone.
daz ist war, im ligent schone
ander sein vngenoz bei.
beidiu chupfer vnd plei
wirt mit silber versmit.
ouch wont dem roten golde mit
oft pleicher messinch.
disiv misleichiv dinch
behabent oft genozschaft,
da in gebristet werdes chraft.
als muoz man mir entleiben,
daz ich schül bleiben,
da man lieht stein gesetzet hat.
doch an des saphirs stat
so erleuhtet mich ein rubein,
der seiner tugent liehten schein
an mein tvnchel wendet
vnd mir ein lieht sendet.
daz ist, daz mich sere freut.
ob mich dar vnder iemen steut
niwan durch seinen argen muot,
so ist da pei ein sin vruot.
wirt er zweir zvngen gewar,
den seinen schilt peut er dar
vnd hat in schier wider geslagen,
daz er muoz übertragen
die gift vnd daz warch,
daz er in slangen listen parch
hinden in dem zagel.
so beleibet im der nagel
vil nahen dem slouch.
da muoz er in dem trouch,
als ez seinem namen zam,
swelhen halz vnd lam.
da wirt sein neit sein selbes scham.
der sin, der diu wort zieret
vnd die red florieret,
der ist mir laider tivr.
nv seht an toubem viur,
daz brinnet vnd scheinet nieht;
sam ist ein glas oft lieht,
daz anderre tugent niht enhat,
so im der glantz zergat.
ouch ist ein guot adamas
vnd ditz prehend glas
vil starch vngeleich
an tugend vnd an leich.
wan daz glas geit liehten schein;
so hat die natur sein
jn im der adamas verholn.
jch geleich ouch dem touben choln
verborgen tvgend gantz.
den selben glantz
der guot adamas geit.
dirr zweir wehselstreit
zeiget zweier hande leben,
als ez diu nature hat gegeben,
des tvmben vnd des fruoten,
des valschen vnd des guoten.
diu zwei ziehent niht enein.
eins ia - des andern nein.
wer möht daz so bescheiden,
daz er disen beiden
also gedienen möhte,
daz ez in peiden töhte?
der wær ein vil sælig man!
der red muoz ich abe stan
nah beider lop begarbe.
zwo vngeleich varbe,
ögger vnd lazvre,
di gebent von nature
beide vngleichen glantz.
einr ist stæt vnd gantz,
der ander valsch vnd swach.
dirr zweir obdach
zeiget zweir hande gruoz -
der ein ist valsch, der ander suoz -,
dar zuo zweir hande lon,
diu ziehent nah der werlt chron.
der sol man einz fliehen
vnd zuo dem andern sich ziehen,
daz im daz werd berait.
daz was mein sit von kintheit
vnd muoz mich bringen in daz grab.
der sit ie werdez lop gab
vnd ist der tugend leitstab.
ich bit an disem puoche,
swer ez lesen geruoche,
ob wandel etwa sei,
vnd ob anderthalp da pei
jht von chünst schein,
daz diu arebeit mein
jcht gar werd verlorn
vnd an schulde verchorn
vmb ein vngevüegen spruch.
an einem purper ein bruch
schol in niht gar verswachen.
wan siht oft wachen
vnwitz vnd chvnst slaffen.
swer sich möht gewaffen
wider süezer wort mangel,
den het vntriwen angel
vil selten gemailet,
der sich hat getailet
leider in der guoten schar
vnd nimt alleweg war,
wie er mit valsch hefte dar.
uns ist oft geseit
von manger hand frümcheit,
di artus der chünich begiench.
wa ez sich erste ane viench,
daz ist ein tail vnchunt.
daz wil aber ich ze dirre stunt
ein tail machen chvnder
vnd wil eu doch dar vnder
seiner tugent anegeng sagen,
wie ez in seinen kinttagen
jm alr erst ergienge
vnd wa sich ane vienge
seiner tvgend lobleicher streit,
den im noch diu werlt geit.
mit seiner reinen tugent sage
sich meret sein lob alle tage,
di weil diu werlt vreuden phligt.
er hat mit ern so gesigt,
daz er nie vant seinen gnoz.
des ist sein lop von schulden groz,
wan in sein nie verdroz.
heil was seinr ivgend mit
e vnd seit in tugend sit.
je in sölcher stæter weise
nah lob vnd nah preise
rank er zallen stunden.
jn het ouch niemen vunden
chranch an deheinen eren.
heil müest im meren
von schulden sein werdecheit.
ouch het er sich so geleit
nach tvgentleichem werdem lob,
daz er mit lob lag allen ob.
er het sein leben wol gewant.
mit tugend zaichen man in vant
tägleichen streiten.
von diu pei seinen zeiten
reines lobes er vil erwarp.
leider ob der leip erstarp,
jm lebt doch sein reiner nam
nach der werlt lobesam.
hat er noch lemtigen preis,
an den geist allen weis
tuot er üns lemtigen schein
mit dem erworben lob sein.
jn möht wol diu werlt chlagen
chvmberlichen in disen tagen.
het sich nv leib vnd guot
gewendet an so reinen muot!
ez zimt doch den besten wol
tuon wol, swa man schol.
jmmer svnder widerwanch
haben di poesen vndanch;
triwen di frumen han fruom.
ern preis vnd tugend ruom
tuot in schein an dem druom.
iv wil der tihtær
von chüng artvs ein mær
sagen ze bezzervnge,
daz er in deutscher zvnge
von franzois hat gerihtet,
als er ez getihtet
ze chärlinge geschriben las,
wan er so geleret was,
daz er die sprach chvnde.
der vleiz sich alle stunde,
ob er iht des erfunde,
daz er iv ze chvnde
vnd ze churtzweil bræhte,
da pei man sein gedæhte
vnd da mit er weibes gruoz
verdient, den der haben muoz,
der ze der werlt vroeden gert.
wan an si ist vngewert,
der der werlt leben wil.
liebes vnd vroeden zil
hat sælicheit an sei gewant.
wol im wart, den bechant
mit triwen ir genade hat,
wan an dem mit vollen stat
vroeden wunsch vnd hoher muot.
ditz vnerwordenlichez guot
wil er mit stæt horden
vnd vil gar vnerworden
sein tag dar an sein.
ez ist von dem türlein
heinreich, des zvng nie
weibes gantzen lop verlie,
der vant ditz mære,
wannen geborn wære
künic artvs der guote,
der ie in ritters muote
pei seinen zeiten hat gelebt.
wie er nah eren ie strebt,
daz mügt ir wol hoeren nuo.
er greif so zeitleich zuo
vnd wert an daz ende.
gar sunder missewende
began er sein lop heien.
er wart in dem mayen
geborn, als daz puoch seit.
daz was ein gewonheit,
daz wir da bei erchanden,
daz er an werltschanden
jmmer wurd gemailet,
als im daz zeit ertailet,
dar inne er geborn was.
wan danne bluomen vnd gras
blüent vnd springent,
dar zuo deu hertz ringent,
den her an vreuden gebrast.
swie si twanch chvmbers last,
den geit er vroeden pilde.
daz bezaichent die milde,
der artus phlach sin zeit,
wan üns der maye vroed geit
mer dann alle mane
vnd tuot üns ouch ane
des winters herten twanchsal.
swaz er der heid vindet val,
di niwet er vnd reichet.
von diu sich geleichet
dem maien artuses leben,
wan er chvnd also geben,
daz sein wart manger vro.
daz het im vrawe chloto
so ertailet allen weis,
daz er werltleichen preis
vor alr der werlt truog.
ouch was vil gefuog
vrou lachesis dar an,
daz si den vadem lanch span.
jch chlag aber, daz atropos
disen vaden niht verchos
vnd in so schier ab prach.
da an der werlt geschach
ein vnverträgleicher schad.
nv sitzet ein auf eim rat
an erben vrowe fortune.
ouch chlagt ez diu lvne,
diu in der sælicheit beriet
vnd in von dem maile schiet.
wan hoert von phylosophein sagen,
swaz kindes in den selben tagen
ze der werlt werde geborn,
daz si immer svnder zorn,
senft vnd reines muotes,
guot, vro, reich des guotes,
getriu, milt vnd mitsam.
wan dann der svnnen stram
jn diu zweinliut get
vnd ir zeit dar inne stet.
artus hail von schulden het.
er was niht sehs iar alt,
do got nam in seinen gwalt
seinen vatter, der in ziehen solt,
der ouch den lop het geholt,
den man nv dem svne geit.
den het er wol pei seiner zeit
mit frümcheit erworben,
swie er im sei verdorben,
daz man sein niht bechennet
vnd niht so dik nennet,
sam man nv den svn tuot.
er het doch leib vnd guot
an frümcheit gecheret,
als üns von im leret
seiner tugent lop vron
vnd grozes gewaltes chron,
die er nah im dem svn liez.
da er herre über hiez,
daz was britanie vnd gal,
normandie vnd cornywal
schotte vnd jrlant
waloys vnd engelant
vnd manig hab wilde,
walt, se vnd gevilde,
des het er alles überchraft
vnd was also werhaft,
die weil er der chrone phlach.
swaz landes im an lach,
daz er möht erraichen,
da schein sein herzaichen
jn siges reht an wer.
gar vntz an daz groz mer
betwanch er diu reich mit her.
welch ein sælich chintchlag,
di artus tet an dem tag,
do sein vater verschiet!
daz heil chinden ie geriet
so sælichleich tugende
sam dirr reinen ivgende.
daz mak man für wunder han.
da peidiv mag vnd man
ze gegenwuort waren,
da sach man gebaren
ein kint in mannes muot.
er sprach:< we disem guot
vnd dem reichen gewalt,
des ich von eu walt,
vater vterpandagron!
scepter vnd reiches chron
beidiv seit verfluochet!
daz sein got niht geruochet,
daz er ivch langer solt tragen,
daz sol ich von rehte chlagen.
owe laides vnd we!
cornowaille vnd tintagve,
liuns vnd yascun,
gisors vnd tischun,
jr mügt den herren chlagen wol!
tyntasion vnd karidol,
jv ist übel geschehen!
wan sol ich den tak gesehen,
daz ich ivch gemere?
vervluochet sei diu ere
vnd der sælden stunde,
dar an sich begunde
meins vater sælicheit!
daz er so gar überreit
des preiten mers übervanch,
daz im nie misselanch,
da was sælden helfe schein.
tuorchen vnd sarrazin,
wie wart ir so zagehaft?
war cham der waloys chraft
vnd der parten schiezen,
daz si in ie geliezen
gereiten also verre?
ay, reicher crist herre,
waz taten die franzoys,
do er vnd sein pritanoys
jn namen so reichen zvchk?
war cham der normanne tvchk
vnd der engeloys zagel?
partonope, der veinde hagel,
war chom dein vntriwe?
daz ist mein sendiv riwe,
daz er mich so gereichet hat,
wan mein lop dar an zergat.
wie solt ich mich erzaigen?
diseu lant sint meiniu aigen
von iv, vatter, niht von mir!
so vngleich ziehen wir,
des muoz ich vnwirde,
so ich ze manne wirde,
dulten vnd schande.
pin ich disem lande
durch reht ein lützel wert,
ez enhet betwungen mein swert,
mich preiset chleines lobes wert.>
urow sæld phlag des chindes
vnd ouch des ingesindes
vnd behuot ez vor valschem main,
als iz seit an im schain,
wie si in het gezogen.
er was des gar vnbetrogen.
si tailt im mit vleiz mite
der werlt wert heiles site,
so si best chunde.
daz schein an ir gunde
nach fünftzehen iaren.
do div vervarn waren,
ward er ritter vnd nam weip
vnd wand guot vnd leip
an milt vnd an ere,
als seiner tugende lere
gewissez vrchünd geit.
also lept er immer seit,
daz nie an im vunden
wart ze deheinen stunden
wan reiner tugend stæter hort,
milter muot, süeziv wort,
getriwez hertz, gewisser rat,
sitte svnder missetat,
lind rede, warer mvnt,
sælden chraft, vroeden vunt.
von div suoht in manich man,
der iht ze tuon gewan,
nach helf vnd nah rat.
den gewert er vil drat
vnd bat in da beleiben.
er chvnd in niht vertreiben,
also doch maniger tuot,
der valschez hertz vnd zwischeln muot
erzaiget den gesten.
er wande sich zem besten,
als im vrowe sælde geriet.
des suoht in manig vrömdiu diet,
der iht laides gewar.
er was oft vroedenbar,
daz man in dehein weil mait,
danne ob er die gest chlait,
als div maist menig phliget,
an den div schand so gesiget,
daz er si chlein bewiget.
wan er ie nach vroeden ranch
vnd schanden mailes argen chranch
mit stæter tugent wille floch
vnd sich ie nah lobe zoh
an allerhande sach,
jm moht ze vngemach
niht gewahsen da von.
er was sein so wol gewon,
wan ez im oft geschach.
ein hohtzeit er gesprach
ze gal vnd ze tintagve
jn cornowalle in dem se
ze einen weinnahten.
er begund lützel ahten,
waz er chosten kosten scholde,
nuor daz er wolde,
daz ez vreud uobte,
wan ez in niht truobte.
daz tet er alleweg schein.
er sant die boten sein
allenthalben in div lant,
da sein nam was erchant
nahen vnd weiten,
die ze disen hohzeiten
die lantfürsten laten.
daz si mit willen taten.
ouch sant man anderthalben hin,
als ich sein beweiset bin,
garzavn behende
jn daz lant allen ende.
vil balde si lieffen,
die disen hof rieffen,
als in von hof geboten was.
her key ly senetschas,
der reit gen hyspanie
vnd braht ze britanie
vil manig guot snellez march,
hohez, schonez vnd starch,
daz artus ze hove gab.
wan braht im von halab
vil manigen maul blanchen,
der ze oren vnd lanchen
jn rabes varb was gevar.
gewaffen braht man im dar
reicher kost von france,
des schein von goldes glance
was vnd reicher steine,
erworht von helfenbeine.
dar zuo wart im ouch gesant
jn vermendoys von gant
vil manig lache von gran,
diu in vivres varwe bran.
ez ward ouch niht überdacht,
jm wurden von chriechen braht
maniger varb samit,
purper vnd timit,
paille roez vnd sigelat,
dyasper vnd tribelat,
von gold geworhter plyalt,
von seiden lachen manigvalt,
die man ze chlaidern sneit,
da mit man die ritter chleit
vnd div palas beleit.
im sand ouch zestivre
ein lache, diu was tivr,
div chünigin lenomye
von alexandrie.
da was von golt geworht an,
wie von chriechen entran
mit paris vrov helena.
ouch was geworht anderswa,
wie troye zefüeret lak,
vnd der lamentierlich slach,
der an dydon ergieng,
do si eneam enphieng.
ouch sach man da scheinen
von der schoenen laveinen,
wie si eneas ervaht,
vnd der romær slaht.
div lache den sal vmb gie
vnd in mit staten bevie.
di sant im sein geswei.
jm chom von rvscei
manig veder gra vnd bvnt.
ez chost ouch vil manig phvnt
der zabel vnd der harm.
er dorft niht wesen arm,
der in gelten solt.
jm wart von rotem golt
geworht manig goltvaz,
da man auz tranch vnd az,
jn seiner stat ze lvndres,
dez werches vnchvndres
nie geworht maisters hant.
ouch het gynevern gesant
lonomye, ir swester,
auz ir lant von lecester
vil manig guot chleinot,
lauter vnd von golde rot,
riemen vnd häftelein,
boug vnd vingerlein,
halsgolt vnd lanne.
si sand ir ouch danne
oring vnd risen,
daz man ez wol preisen
moht von seiner tivre.
ditz was ein reichiv stivre,
div schoen was ze schowen.
die teilt si den vrowen,
die dar ze dem hove chamen.
daz preiset wol ir namen
vnd vürdert, die ez namen.
die fürsten begunden reiten
ze disen hohzeiten
mit michelm schalle
jn daz lant ze cornowalle
gen der burch ze tintaguel.
wan bereit in daz castel
vil schier herbergerie
gegen dirr massenie.
daz gebot der sælig artus.
da was lützel dehein hvs,
ez wær wol behangen
mit seidein lachen langen
vnd anders wol beraten.
daz die purgær taten
jr herren ze liebe.
der chunich lanoys von liebe,
der cham erst ze hove
vnd chvnic vrien von love,
mit im fil li roys yder
vnd von beumont jenever
vnd von galor gotegrin
vnd fyl li roys karlin
vnd der schoen jenephus,
der hertzog von angvs,
vnd der chvnich angingerron,
von yrland angiron,
von der land orgoyllos
vnd ouch miliance ly ros
vnd chunic arab li nains
vnd roys yllec a dvre mains,
von dem grüenen werd floys,
fyl li roys eumedis,
von alvern graue blant
vnd der hertzog von yslant.
künic noyrs von ethiopia
was mit grozzem gelfe da,
von bel repeire jorantz
vnd loumedon li granz,
von gornomanz goorz
vnd elyan von montforz,
von selande kunig lak
vnd der printz von arrak
vnd von arragvs graue cis,
roys embelit von lvndis.
ditz waren nuor geste,
die ze artuses veste
kamen, vnd der chvnden vil,
der ich niht nennen wil.
hie hevet sich dez hoves zil.
do dise fürsten alle
mit michelm schalle
ze der hohzeit chamen,
der lant vnd namen
jch iv nv genennet han,
an briton vnd norman,
yrlander vnd waloys,
engeloys vnd franzois,
die ze houe gesinde waren
vnd des wol enbaren,
daz ich ir namen chvnde,
der lop ze tavelrunde
die stat mit tugentreicher tat
an schanden mail erworben hat,
nu was der hof iojær gantz.
wan sach da mangen reichen tantz
von rittern vnd vrowen.
ouch moht man da schowen
schoener chleinod vil,
hvnd vnd vederspil,
daz vil maniger muz was.
wan sach auf dem palas
manigen weis chürtzweile.
toppel vnd meile
sah man in reicher chost da.
so sazen zwen anderswa
vnd spilten zabels auf dem bret.
der ritter iegslicher tet,
swaz er selb wolde.
dise reten von solde,
en von der hohzeit.
dort was von den vrowen streit,
welhe da div beste wær.
so sazen fidelær
mit ir chvnst disen pei.
dort warn vier oder drei,
dise seiten auentivre.
peidiv floiten vnd tambiure
allen gemeinlichen hal
jn der purch vnd in dem sal.
da wont vroed ane zal.
ovch was niden in der stat
von maniger hand parat
reicher chürtzweil genuoch,
do man die mvzære truoch
vnd die schilt ze straz hieng
vnd div örs begieng
vnd den harnasch weit
vnd di helm beleit
mit reichen crinalen.
wan sach ze allen malen
reicher vroeden überchraft.
ez reit disiv ritterschaft
die stat auf vnd ze tal.
div straz anderthalben hal
von den gartzvnen,
die mit ir schantzvnen
durch die stat giengen
vnd di hohzeit enphiengen.
so leuffen vier ennen her,
di truogen schilt vnd sper,
di andern chovertivre,
der man ze iostivre
bedorft an dem morgen.
da muosten not sorgen
die niwen swertdegen.
da was nieman verlegen,
ern uobt sich etesleicher slaht,
daz ir aller andaht
da wart an dem tag schein.
trumben vnd pvsein
hort man da hellen.
so sah man hie snellen
die chnappen vnder in.
dise sluogen den pal hin,
jene schuzen hie den schaft,
so pruoft dirre sin chraft.
mit maniger behendenie
was disiv massenie
vor der ostelie.
ujer gelat scharroten
brahten artuses boten
an den anger von lanzen,
grozzen vnd gantzen,
langen vnd eben.
die hiez er den reken geben,
swaz sis vertuon möhten,
die dar zuo töhten.
gyneuer, div chünigin,
vnd die vrowen vnder in,
di santen den besten
vnder artuses gesten
von dem chastel her ab
von chleinod reich hab
zem tvrnay ze stivre
auf solhe auentivre,
daz si ir ritter hiezen
vnd daz niht enliezen,
si wurden wol verhowen
durch willen ir vrowen.
do dise tvrnierer
vnd beide panierer
hielten auf der praerie,
artuses massenye
vnd di gest dar engegen,
da was beider manich degen
von reicher zimivre.
floitierer vnd tambivre,
die gruozten di reken.
daz begvnd div örs weken,
daz si ensprung giengen.
den muot si geviengen
von der süezen reisenot.
von chippern ein michel rot
mit starchen mazawen,
die hinden nah plawen,
moht man da schawen.
...
sich huob ein vesperie
auf der praerie
hie niden vor der stat,
als sein gawein bat,
an dem andern morgen.
des muost not sorgen
des leibes ein zag,
was er da an dem tag,
da so manig reke
vnd ors mit deke
an den rinch gesament was.
auch stuont so daz palas,
daz gynewer vnd di vrowen
her ab mohten schowen
jr iegleichs tükch.
daz was des gelüch,
dem daz beschert sælicheit,
daz er ritterleich gereit.
da wider was ez ens slak,
an dem ietwederz lak,
vnchvnst vnd verzagter muot,
der ietwederz schaden tuot
dem manne an den eren.
ez chan in geleren,
da von man in vnwirdet
vnd vnsælig wirdet.
ez wart niht lenger gebiten.
für di stat chamen geriten
die gest mit grozer chraft.
artus mit seiner geselleschaft
reit her von dem kastel.
da was von rot vnd von gel
vil manig panier,
deke vnd chropier,
waffenrok vnd crinal
von timeit vnd von zendal
wæhe gebarriert.
da wider was geviert
der gest armivre
von michel feitivre
blanch vnde brvn.
wan hort die gartzvn
oft groieren
vnder disen panieren:
< weich! la iostieren!>
sich huob ein iostiern
von zwein helden ziern,
von belrepeire joranz
vnd quinotfiers de bahanz,
da auf der herte.
der zweier geverte
was von erst so starch,
daz sich ietweders march
auf paug von den stichen.
ze ring cham gestrichen
von beumont jenever.
als er geneiget sein sper
da zem ersten pvnaiz
vnd cham gerant in den chraiz,
sein wart her jwein gewar
vnd puniert gahes dar
mit einr banyer.
disem chom also schier
milianz ze helf da.
sich huob div vesperie sa
mit michelr chreft.
div sper vnd die scheft
bedahten daz gevilde.
wan hort da sprüche wilde
von der garzvn croy.
do sich auf dem turnoy
dise ritter starch drungen,
div swert oft chlungen
auf helm vnd ringe.
< dringa, ritter, dringe,>
di garzvn riefen,
die dar vnder liefen.
dannoch hielt jenephus,
der hertzog von angus,
da vor seinem gezelt.
do er da ze velt
sein gesellen ersach,
jr arbeit was sein vngemach,
vnd chert sam ein ritter dar
mit maniger panyer clar.
do wart div yost reich.
< weicha, herr, weich>,
wart da gegroyieret,
do er punieret.
nv mischten sich di degen
mit stichen vnd mit slegen
al nah riters orden.
si waren vnerworden,
daz sah man an ir siten,
do si gemeinlich riten.
einr sluoch, der ander stach,
der nah sicherunge sprach,
dirre vienc, enr zoch,
einr ieite, der ander vloch,
der disen wider zoumet,
ein anderr hie den rinch roumet.
er was vertan, der sich versoumet.
gineveren, der was starch leit,
daz artus so lange beit
mit den tabelrounden,
do die vnchvnden
ze velde waren chomen
vnd heten ein tyost genomen.
si sprach:< ahy, herre,
wie sint die so verre,
den nie an eren misselanch?>
vnder div zem ringe dranch
erech vil de roy lach
vnd lanzelet von arlach
jn einr gvmpenye.
da wart div vesperye
starch auz der maze.
si hiuwen ein straze
mit yostivr ze end auz.
graue ceis von arragauz
vnd von gornomant goorz
vnd elyan von montforz
dise tyost durch brachen.
si sluogen vnde stachen
wol nah ritters eren.
artus hiez zuo cheren
gawein zuo seinen gesellen hin.
ouch chert er do selbe in
mit reicher yostivre.
da wart div schumphentiure
hart starch vnd groz.
stich, slag vnd boz
hal wider vnd vür an den rinch.
spers chrachen vnd swertez chlinch
sah man vnd horte da.
< fv, vassel, schavelier, za!>
wart da gegroyieret.
do artus tiostieret
vnder dirre sticher schar
vnd sich da mit in bewar
mit einem ritterleichem schehen,
moht man ze velde sehen
vil manig panier lieht,
di dar nah vnlang ieht
jemen deheinen schein baren.
do dise riter waren
vnder ein ander beworren,
daz het in so geworren,
daz si di garzvne
jn manigem trvnzvne
huoben von der erde,
da si in swachem werde
gar zestochen lagen.
niemen darf des vragen,
wer da aller beste gerite.
geleiches werdes gantzer site
volget in gemeinlichen mite.
do der turnoy was ergangen,
wan sant die gevangen
den vrowen auf daz palas.
wan daz ie ir reht was,
so daz tvrnay gelach
vnd der hof an einem tak,
swer da gevangen wurde,
daz er dise purde
von den vrowen solte tragen,
si wolten in denn ledich sagen,
ob siz gerne tæten.
artus behielt stæten
den vrowen disen site,
da liebet er die mite.
nv reit div massenye
wider ze herbergerye
an ir gemach in die stat.
da wart den rittern ein bat
geprüevet über al,
daz in swaiz vnd eisenmal
ab dem leibe twuoge.
daz was vil gevuoge
nah so grozer arebait.
nv was div hohzeit bereit,
als ich da vor han geseit.
nah der aventivr sage,
do an dem weinehten tage
artvs ze tische saz
vnd mit seinen gesten az
nah des hoves gewonheit,
da wart red vil gereit
von disen vnd von ienen,
nuor daz ein senen
si alle samt twanch,
daz nah aventivre ranch.
div red von tisch ze tische gienc
vnd aller willen so gevienc,
daz si ir selber vergazen
vnd vngaz sazen
nuor von disen dingen.
vnder deu hort man singen
ein riter gen dem chastel
einr stimme, div waz hel,
süez und pleine
als einr syreine.
der dar ze hove het gedaht
vnd in aventivre braht,
der erpaizt vor dem palas.
ditz mære chomen was
artvsen ze ware,
daz ein ritter ware
erbaizt vor dem sal,
des vroeten si sich über al.
der riter, der was chomen,
als ich die rede han vernomen,
der schein des leibes starch kranch
vnd was wol als lanch
sam ein chint von sehs iaren.
seiniv chleider waren
wol bewart an dem snit
nah der franzoiser sit.
daz was ein chapp von scharlat;
dar vnder het er reich wat
von einem tivrn plyalt.
sein antlütz was niht gestalt
sam ander anplike.
sein vel, daz was dike
erwachsen von squamen.
mir ist von seinem namen
niht div warheit chvnt.
dik, weit was sein mvnt.
den dachten gran hie vnd da.
seiniv ougen waren eisgra,
groz sam ein strauzes ey.
sein winbra schied entzwai
breit zweir spanne bloz.
div nase was churtz vnd groz,
vorn preit, enmitten flach.
seins houptes obdach
was har sam vischflozen.
jm warn auz gedozen
zwei orn breit vnd hoch.
ein vrömdiv varbe überzoch
swartz, gra vnd ysenvar
hend vnd antlütz gar,
oder swa sein iht des leibes blaht,
daz ez div wat niht daht.
sein ors, daz was wunderleich
vnd was starch vngeleich
an gesiht andern rossen.
nah einr merphossen
was ez vor satel getan.
hoh sam ein kastelan,
hinden als ein delfin.
daz der zagel solte sein,
daz warn lang visches gran.
von langen vlozen was div man
erwahsen vntz auf div chnie.
ein blanch varb übervie
daz ros mit swartzen mailen.
div begvnden sich tailen
so brait als ein pheninch
jn die blench, ein swartzer rinch.
jm warn vüez und pein
allen viern enden enein
rauch von gevider
vntz auf den huof nider
sam eins adelers vlüge.
di strachten sich in die büge
von der adern züge.
do der riter auf den sal giench,
artvs in vil wol enphiench.
daz von den andern ouch geschach.
er stuond mit zühten vnde sprach
dise rede en franzoys:
< artus, chünic der brytanoys,
des chünges kint, vtpandagaron,
durch iwers werdes lobes chron,
div wol weiten ist erchant,
dar vmb hat mich her gesant
aus dem mer künic privre
auf selh auentivre,
daz er iwer künd gevahe
vnd iv niht versmahe
ein gab, die ich bringe
mit sölhem gedinge,
als si iv ist gesendet,
div ivch niht enschendet.
jst, daz iwer werdecheit
mir sölh pet niht verseit,
der ich e an ivch ger,
so pin ich so chomen her,
daz ich iv mer sagen sal.
e muoz ab meinr bete schal
mir bringen stætez ende.
dez ist war, der missewende
kan ich an bet wol enbern,
daz ich ihtes welle gern,
dem schad won oder schande bei,
da vons vmbeteleich sei.
er schol von schulden sein gewert,
der so betlich gert.
da sich die von schaident,
die die bet laident.
daz ist schad vnd schande,
der ivch des willen wande;
der schadet iwerm lande.>
do der bot dise red getet,
jm volget mit ir allr bet,
daz er im die bet gehiez.
des er sich überreden liez
mit willechleichem muot,
wan er sich so huot,
daz in an werlt eren
dehein sit moht vercheren,
da von sein livmt valschhaft
schine von der schanden chraft,
an allen seinen sachen.
daz muost in wert machen.
er sprach:< daz ist war, her guot chneht,
jr schült geren, daz ist reht,
daz schol ich niht zebrechen.
jr mügt wol sprechen,
swaz ir welt, fürbaz,
wan ich dar an nimer laz
ze deheinen stunden wirde,
jch schül alle girde
vil willichleichen laisten
an dem minsten vnd an dem maisten,
dar nah vnd ich sein stat han,
so ich dann beste chan.
des wil ich nimmer wesen vrei.
sagt, waz div rede sei.
mein wille ist iwer bete bei.>
ze dirre rede der bot neic.
dar nah er vnlang sweic.
er seit im gnad vnd danch,
daz im also wol gelanch
an seinr bet nah gewer.
auz seinr gvgel zoh er
ein chopf vnd ein lit,
der was von chünst so gesmit,
daz ich daz bewær,
daz sein geleich wær
niender in dem lande.
er sprach:< herr, iv sande
mein herr ditz chleinot,
daz er iv dar zuo enbot,
daz sag ich, swa ir wellet,
ob ez iv gevellet.
doch hat disiv botschaft
niht gar vol werdes chraft,
sein werd überal vernomen.
also bin ich her chomen.
des muoz si offenbær sein.
daz sag ich iv, herre mein,
vnd dirre massenye.
ez hat von nigromancie
ein meister ze tolet,
der wol die kvnst het
erfvnden von listen,
jn vil manigen fristen
disen choph so geworht,
daz ich des pin vnervorht,
daz er ie wurd gesehen,
dem man der tivr möht iehen
von chvnst vnd von reicheit,
die an in sint gelait,
als ir herren selbe seht.
dar zuo hat er sunder reht,
daz lützel iemen ist bechant,
als in seins meisters hant
wider nature geworht hat.
daz wol ze schriben stat,
wan ez ist ein tivr list.
swes so dirre chopf ist,
der wirt des gar vnbehert,
swa er ist oder vert,
der chopf sei mit wunsche da,
war er halt anderswa.
daz ist sein nature.
die stein vnd diu feitivre,
div wart chaum vunden
von listen vnchvnden,
di man auz den buochen
muoz mit chünste suochen
von geometrie
vnd astronomye,
die habent in ir chunde
himel vnd abgrunde
mit listen gemezen.
swaz die hant besezen,
des ist in niht vergezen.
noch hat er groz tivre
von des listes stivre,
die man gern wizzen mach,
dar an ist vreud vnd slach,
als ich iv beschaide.
er tuot manigem leide,
da er valschez hertz ougent,
daz auzen valsches lougent,
wan in dehein swach man
mach ze vollem dienest han.
swie gemeiltez hertz er treit
oder ob er mit valsche phleit
seinr amyen minne,
jm wirt daz ze gwinne,
beutet er in zem mvnde,
daz er an der stunde
jn mit al begivzet.
div vrowe niht genivzet
dar an weiplicher scham,
jr geschehe auch alsam,
ob si valsches hertzen phligt.
seid ir mir, herre, niht verzigt
vor disen herren meiner bet,
die ich mit gedinge tet,
der wil ich nv wesen gewert,
als ich ir han vor gegert
an meil valscher chrench.
den chopf schol iwer schench
vollen tragen über al
von tisch ze tische in ein sal
rittern vnd vrowen,
so mügt ir wol schowen,
als si da von getrinchent,
welh von valsche sinchent
oder welh sicher bestent,
di üns niht ab gent
vnder gesten vnd chvnden.
wirt iemen da vunden,
den er valsches ledig sag
vnd im vollen dienst trag
vnder mannen vnd weiben,
so schol er iv beleiben.
ob daz aber niht ergat,
jst iemen hie, der mich bestat
vnder dirre massenye
mit ritters behendenye
ze örs mit tyostivre,
gevellet im deu auentivre,
daz er mich entschvmphiert,
des ist der hof geziert
vnd beleibet iv daz goltvaz.
ouch laz ich ez ane haz,
swem vnder üns gelinget baz.>
do der bot dise rede gesprach
vnd artvs den chopf ersach,
dar zuo div reich geselleschaft,
vnd vernamen die botschaft,
di er mit dem chopf braht,
si warn alle verdaht
an dem chopf vnd an dem boten
vnd swuorn bei ir goten,
alte vnd ivnge,
daz si dirr sandvnge
nie geleichen wert gesahen
vnd von listen so wahen.
si baten in vil tivr,
daz er die auentivr
an dem chopf prüefen liez
vnd in füllen hiez
mit einem lautern claret,
als der bot gebeten het,
daz wær vil gefüege,
vnd daz in vmb trüege
der bot in dem palas,
der da mit chomen was.
artus ir bet gehal,
vnd wurden dar in den sal
die vrowen geladen
auf weipleichen schaden.
do die herren gesazen,
ein stat wart verlazen
über gegen artvs
gyneveren in dem hvs,
als ez artvs wolde,
da si sitzen solde
vnd ir vrowen alle.
mit michelm schalle
kam si vür gegangen.
si wart so enphangen.
do si nider gesaz,
der bot nam daz goltvaz
vnd bot ir ez sa.
do hiez siz bei ir da
bieten durch ir zvht
der chvnigin von lantfruht.
div saz ir enneben.
der wart do der chopf gegeben,
daz si trvnch dar auz.
sin west niht vmb ein grauz,
waz er an weiben zaiget.
do si den chopf geneiget,
dev vrowe sich so ser begoz,
daz ein rvns pei ir vloz
starch preit vnd groz.
solher geschiht si sich schamt
vnd dise vrowe alle samt,
wan si ser bewach
ditz vngelüches chrach,
der da was geschehen,
daz ez der hof het ersehen,
vnd wurden allesamt rot.
den chopf aber wider bot
gyneveren der bot.
nv was key vnd sein spot
nah alter gewonheit da bei.
er sprach:< von zin vnd von plei
wær ein centenær
vil chaum also swær,
als dirre leidig chopf ist.
sein müest ein ris haben frist,
ob er erheben solde
disen chopf von golde
mit stein so gewæhet,
vnd der mit staten væhet
claretes einen amen.
wie solde des geramen
ein vrowe, sein wurd begozen?
mein vrowe het des genozen,
wær si stercher ein tail.
krench prüeft oft vnhail,
als si nv hat getan.
vrowe, da lat ivch nv niht an.
jr habt den chopf vast
vnd sagt dem gast
genade, der in braht habe,
vnd erschrichet niht dar abe,
ob den chopf mein vrowe hie
ein tail ze vnreht gevie,
daz der wein übervloz
vnd sich mein vrowe begoz.
daz schült ir bewaren.
jr schült sein da varen,
daz ir in da begreifet,
da er iu niht entsleifet.
so begivzt er ivch niht.
gedencht ir an ir geschiht,
so wirt iwer red enwiht.>
gynever disen chopf nam
sorglich vnd mit scham
vnd bot in zem mvnde.
des trunches er ir gvnde,
vntz si in zoh wider.
do cham dez weines nider
ein tail auf ir schoz
von vnglüches loz,
daz man ez chavm gesach.
kei vor in allen sprach:
< vrowe, ich het ivch wol gelert,
wan daz iuch gacheit verchert
nv an dem ende.
jr habt missewende
vns gezeigt ze angesiht.
jch het mit eu phliht,
solt vnder dirr geselleschaft
die vrowen schiezen den schaft.
swie sich div sterch an iu barch,
jr sit grimme armstarch.>
den chopf bot der bot da bei
einr vrowen, div hiez flori,
meins herren gaweins amyen,
des chüniges gesweien,
div da nah der chünigin
div best was vnder in.
daz chom von ir amys,
hern gawein, daz si den pris
vor den vrowen allen het.
den chopf mit dem claret
vil gahes si zem mvnde bot.
des engie ir niht vnnot,
wart si ein tail schamvar,
wan er begoz ir vil gar
antlütz vnd ougen.
daz da sunder lougen
schein, do si getranch,
daz mail vnd valscher chranch
jn ir hertzen bowet.
key sprach:< herr, schowet
an vrowen groz behendecheit,
wie eben si den chopf treit,
daz er niht mak gewenchen.
getorst ich ez gedenchen,
si solte fürsten schenken.>
artus vnd gawein,
die clagten vnder in zwein
von dirre vngeschihte,
div zir aller gesihte
an ir ameyn ergiench,
da er si ane valsche vienc
vnd beswart si iedoch.
si sprachen:< waz wirt sin noch,
dar sich so snelle üebet?
ez wirt ertrüebet,
der mit gemach wænt sein.>
der kopf wart vroun laudein,
des lewen amyen, gegeben.
den hielt si vol vnd eben,
vntz si in bieten solde.
als si trinchen wolde
dar auz des lautertranches,
der chopf ir vndanches
sich von dem mvnd verreit,
daz si daz trinchen vermeit
vnd begoz ir vorn di wat,
daz was ein reicher sigelat,
daz er gar naz wart.
key sprach:< div erst vart
jst gevarn mit heil.
het ir der chraft ein teil,
div an dem vingerlein was,
da von herr ywein gnaz,
daz im gab vrowe lvnet,
dor iwern man erslagen het,
so het ir wol getrunchen.
heil hat iv gehvnchen.
daz mag ivch wol riwen,
daz ir mit selhen triwen
hern ywein meinet,
als ez der kopf bescheinet.
her ywein weste di triwe wol,
ob man ez allez sagen soll,
do er durch ir gahen zorn
het nah seinen leip verlorn
jn einem walde durch ir minne
jm selben ze vngewinne,
da er verlos die sinne.>
nach ir vrowe enite tranc,
der ouch ein tail misselanc.
do si solde trinchen,
der chopf begunde sinchen
jr nider auz der hant,
daz si sein lützel enphant,
vntz sich daz claret vergoz.
key sprach:< von reht genoz
mein vrowe enite
an der vrowen strite
jr triwe vnd ir schone,
daz ir wart ze lone
der reich sparwære,
swie dar chomen wære
manigiv, div wolt in nemen.
ouch möht wol von reht gezemen
meim herren, chvnic artus,
do si kam her ze hvs,
daz er seins küssens reht
an ir stætem leibe speht,
do im was gevallen
der preis vor üns allen,
daz er ervalt den weizen hirz.
vrowe enite, gloubet mirz,
jr habt den kopf gewunnen,
wan welle iv sein dann enbvnnen
durch etesleichen swachen nit,
da ir mit bevangen sit.>
den kopf nam wider der bot.
disiv red vnd dirre spot
prüeft ein lvt lachen
vnd niwet doch sein swachen
vil manigem, der den schimph nam
mit verborgens hertzen scham.
der sein amyen sach
an stætes hertzen zeichen swach,
daz was wol sein vngemach.
do wart vrowen perchyen,
eins riters amyen,
gegeben ditz goltvaz
vmb daz, daz si saz
ze næhst bei siten
meinr vrowen eniten.
si nam in, daz muoste sein.
als si kopf vnd wein
ze mund bieten solde,
vnd wolt auz dem golde
vil gern getrunchen han,
do missegie ir dar an,
so daz si gar svnder danch
wol vergoz daz lautertranch.
des schamt si sich sere.
key sprach:< niht trinchet mere!
sein ist vil an einem trunche,
ob sein den boten dvnche.
wir haben daz wol ersehen,
daz wir iv preises müezen iehen
vor allen disen vrowen.
stæt hat an iv erbowen
ein hertz mit keusch beslozen.
des hat iwer vreunt genozen.
des mag er wol wesen vro,
daz hier an sein lop so ho
an allen valsch steiget,
daz an den andern seiget.>
dirre red do begunden
die gest mit den chvnden
vnderlachen vil tougen,
daz so gar an lougen
da an den vrowen schein
valsches vnd vnstæt mein
vnd von einem chopf daz ergienc
vnd daz key vndervienc
jr missetat gar mit spot.
den kopf bot aber der bot
bei ir einr vrowen da,
der nam was galayda,
des trugsæzen amye.
div was von landrie
des hertzogen swester.
der val wart verre vester
dann der andern da vor.
daz sah man an ir spor,
daz tief lak vnd niht enbor.
nv hoert, welh ein wunder,
daz dirre kopf besvnder
sei so auz den andern nam.
da galt den spot ir beider scham,
den key, ir vrivnt, geprüefet het.
als man ir bot daz claret
vnd si zuo wolte greiffen,
jr begunden nider sleiffen
die hend auf die schoz zetal,
daz si den kopf vür daz mal
nie moht gerüeren.
si begund ir hende füeren
wider vnde vür ich enweiz waz,
swie oft ir daz goltvaz
dirr riter bot dar.
key wart des schamvar,
als er so reht gesach,
wie seinr amyen geschach,
vnd wolt ez verswigen han.
do sprach greingradvan:
< her key, mich dvnchet, sam mir got,
jr mügt wol lazen den spot
vürbaz mer beleiben,
den ir tuot von weiben,
die iht haben missetreten.
jr habt iwer weip erbeten
den vnsern ze vare,
daz si so geware
von dem kopf getrunchen hat,
daz si ougen noch die wat
mit dem claret besluoch,
vnd tranch ir iedoch genuoch
vnd trunch noh aber baz,
daz si nimmer wurde naz,
swie vol der kopf wære,
daz ez ir nimer bære
dehein missewende
weder erst noch zem ende.
so hat si sich behuot.
der so sælich getuot,
dem erscheinet daz dik ze guot.>
swer daz hor vnd den mist
rüeret, daz ervulet ist,
der vindet niht wan stanch.
ouch gewinnet er sein selten danch,
der durch ein swachen dvz
die wefs vnd den hornvz
von seinem amt stoeret.
swer vngern hoeret
keches hvndes pellen,
der sol im gehellen
vnd sol niht mit der rahen
jn stundelichen wider slahen.
da von meret sich schal.
swer in sleht, daz er bal,
von einem slag er ergillet
vnd doch immer billet,
danne er da vor tæte,
vnd ist daz an stæte,
wan er ist gereizet.
swer den argen heizet
nah werltlicher tugent leben,
dem ist an eiter vergeben,
wan ez nimmer mak gesein.
jr sehet wol, wazer vnd wein,
die gebent vngleichen smach.
sam tuot naht vnde tak.
div gebent vngleichez lieht,
als man alle tage sieht.
swes der vogel wont von neste
vnd swaz wazzers der teste
wider erst gewinnet,
des smaches im zerinnet
nimmer mer vürbaz.
gewonheit wirt nimer laz.
si greiffet vür nature.
swie key wær ein schaure
vnd an allen dingen zuhtlos,
da mit er doch niht verlos
seins adels herschaft,
wan er was so manhaft,
daz er dehein vreise schauhte,
div in ze starch dauhte,
ern getörst sei vil wol bestan,
swie im gelung dar an.
ouch mügt ir wol wizzen,
seit sich so gar gevlizen
artus het an tvgende
vnd sein rein ivgende
selch gesind het erwelt,
daz dehein chrench an valsch entwelt,
sine warens alle svnder,
wie möht er dar vnder
dehein weil sein genesen,
wær er also arch gewesen,
sam maniger von im hat geseit?
ditz ist div warheit,
daz er spotes gerne phlak
vnd sein ze niemen bewak.
daz was an im der maiste slak.
ein vrowe hiez blanscheflor,
di minnet ein ritter per amor,
daz was mein herr parceval.
auch was div vrowe von gal,
als ich ez vernomen han, geborn.
die het er ze amyen erchorn
vnd het si dar ze hove braht.
div vrowe wart niht überdaht,
jr wurde dirre kopf geboten.
den enphie si von dem boten
vnd wolt dar auz getrunchen han.
also snelle wart er wan
des claretes vnd verswant,
daz man sin da lützel vant
jn dem goltvaz,
niuwan ir schoz naz
vnd ander ir claider.
der vrowen wart nie leider,
dann ir an der stund wart.
herr key sprach ein wort
schon spotleich dar zuo:
< vrowe mein, ez ist ze vruo,
obz ivch niht beswæret,
daz ir einen kopf læret
so vollen lautertranches.
vnd tat ir ez danches,
so seit ir zwar niht betrogen.
jr habt ein zvkch gezogen,
der nv was der beste.
er was mit al veste.
ein ame wins dar zuo gehort,
der so vngefuoge chort,
wie ein trinchen smeche.
stæter triwen deke
hat ivch, vrowe, bedacht.
daz ivch her parcefal ervaht,
dest war, daz het er wol gewant.
jwer triwe was im e bechant,
do ir des geruocht,
daz ir in besuocht
des nahtes an dem bette.
do gabt ir im ze wete
jwern leip nach der minne rat
an allerslaht missetat,
vnd daz vor vnd nah gat.>
blanliz vnd pleiden,
disen vrowen beiden,
den geschach ouh alsam,
do ietwederiv den kopf nam
vnd wolten trinchen dar auz.
vrowe layn von jandauz
vnd div chvniginne von persya,
div viel mit den andern da.
sam tet vrowe ysolde,
do si trinchen solde,
vnd div chünigin von cley
vnd morgve, ein reichiv fey,
moret div moerinne
vnd neyn div twerginne,
vrowe belyn von danoys,
tane vnd vrowe gyfloys,
landet vnd gymele,
blantschol vnd vrou yle
vnd div lang amardie,
eins risen amye,
vnd ir swester yare
mit dem guldein hare
vnd yiolet div snelle,
calades von canelle,
chamille mit der weizen keln,
von clameroy ysel
vnd ir swester brayne
von der hohen montayne
vnd elyc div schone,
vrowe blonde von yrone,
cressia vnd vrowe galat
vnd vil manig an der stat,
der ich niht nennen wil,
wan ir wær al ze vil.
jch nand iv ir noch genuoch,
wær ez niht ein vngevuoch.
hie mit si ir ende.
mit dirre missewende
vielen die vrowen alle
mit gemeinlichem valle.
key rüeget si mitalle.
do dehein wart vunden
vnder gestinnen vnd chvnden,
div wol dar zuo tohte,
daz si drauz trinchen mohte,
den kopf truoch der bote dan
vnd giench vür den chunich stan.
er sprach en franzoys alsus:
< edel fürst, chvnig artvs,
der gab ist wol begvnnen.
noch schült ir mir des gvnnen,
daz ich sei vollebringe,
also mein gedinge
jst vnd iwer reht.
künges wort sül wesen sleht.
daz bedarf deheins wanches.
ez schol alles chranches
vil gar wesen ane
nach gar gemeinem wane.
also ist iz her chomen.
jch han ouch von iv vernomen,
daz ir ivch habt so bewart,
daz nie chünges gelüb wart
stæter, dann daz iwer ist.
daz enschol auch ze dirre vrist
niht werden zebrochen.
des wurt ir besprochen.
herr, ir habt wol gesehen,
waz an den vrowen ist geschehen.
waz töht daz mer ze sagen?
noch schol man den kopf tragen
vmb vnder disen herren,
e ez deheinen werren
prüef an meiner bet.>
do sprach artus ze stet:
< jch schol ivch niht betriegen.
valsch geheiz vnd chünigs liegen,
der swachet ietwederz den namen
vnd prüeft lasterleich schamen,
swa man ez hin vernimt,
wan ietwederz missezimt.
des schült ir erlazen sein.
nemt claret alde wein
vnd füllet aber wider in.
swes ich iv schuldich bin,
des sol ich ivch gewern
vnd tuon ez vil gern,
seit irs niht welt enbern.>
der riter wart der rede vro.
disen kopf nam er do
vnd vullet in mit claret.
do er daz getan het,
do gie er vür den chvnich sten
vnd sprach:< herr, ich sol begen,
gebiet ir, mein lantsit,
da ich her bin chomen mit.
des nim ich ze ivwern gnaden vluht,
daz ir mirz niht zvnzvht
mercht, herr, ob ich
dar an übersprech mich.
min reht ist, daz ich vor
meins herren trinchen chor,
e ich im den kopf biet.
wan phligt dirre miet
jn meins herren lande,
vnd ist daz svnder schande.
wær ez aber missetan,
so wolt ich sein wandel han.>
als er die red gesprach,
ein angel, der ze var stach,
der uobet sich da bei.
daz was der trugsætz key,
der undervie ez mit spot.
er sprach:< daz ist reht, daz der bot
zem erst sül schowen,
wie der wirt hab gebrowen.
sölher sit behagt mir wol.
wan so der kopf ist ze vol,
so zimt er übel vürsten hant,
ern werd erlæret vnd erwant,
so möht er sein gewalten.
jr sült den sit behalten.
trincht in gotes namen!
jr chünt wol geramen,
daz ir ivch iht begiezet,
als ir da von gehiezet
den, die schande merchet.
jvch hat wol gesterchet
jn daz alter von der ivgent
an valsch reiniu tvgent,
daz ir svnder sorgen
offen vnd vnverborgen
mügt trinchen hivt oder morgen.>
niht vol er die rede liez,
vntz in die red lazen hiez
künig artus vnd steut in.
er sprach:< vür golt verworfen zin,
saphir vür den rubin!
jr müezt immer sin,
der ir her gewesen seit,
ein stæt haz, ein ewich neit,
ein gift vnd ein eiter,
gein morgenrot heiter
ein vor vngewarnter hagel,
ein scorpenangel, ein slangenzagel,
ein zwisch reizel vnd ein chlobe,
ein besweich an allem lobe,
ein kort vnd ein angelsnuor.
jwer leben vnd iwer fuor
stet gar nah vnpreise.
jr seit ein wek an glatem eise,
dar an man leiht vellet.
sich hat zuo iu gesellet
bispræch vnd achvst,
schanden hort vnd ern vlust.
verfluochet sei iwer bitter galle,
daz si schier überwalle
vnd ivch müez zebrechen.
jr chünnet niht gesprechen
wan den argen alle wege.
jr seit ein schuch vnd ein ege
an allen tugendsachen.
jr chünnet daz wol gemachen,
daz iv niemen holdez hertze treit,
als man den besten phleit.
daz habt ir oft wol verscholt.
jr seit iv niht selben holt.
wer scholt ivch danne minnen?
waz welt ir dar an gewinnen,
daz ir mangen so beswæret?
e ir vngespotet wæret,
jr spot iwer selbes e.
spot tuot nah schaden we.
des sült ir ivch mazen.
jr sült ivch niht lazen,
vrivnt, an disen argen spot.
jwer bet vnd iwer gebot,
dem wil ich entweichen
svnder allez besweichen
wan al ein dar an,
daz ich des ersten trvnches gan
niemen baz danne mir.
welt ir dar nach, so trinchet ir.
dez schült ir mir gvnnen,
dar an werd gewunnen
alde werde an verlorn,
jch han ez mir also erchorn.
daz lat iv niht wesen zorn.>
key daz lützel vreut,
daz in der chvnich het gesteut,
wan daz sein schal groezer wart.
er hatzt aber auf di vart,
sam er da vor het getan,
vnd sprach den chünich selb an.
daz beswart in vil verre.
er sprach:< ay, herre,
jr chünt ouch schelten!
wolt ir mich des lan engelten,
daz ivch der dvrst twinget?
nv beitet, wan bringet
jv vil schier ze trinchen.
daz er müez versinchen,
der daz ezzen so versaltzen habe!
da dürstet ivch so vast abe.
we, herre, wa ist der schenche?
mich wundert, wes er gedenche,
sit man den tisch erhaben hat,
daz er ivch vngetrunchen lat.
seit aber nv niht hie bei
her lvcans der schenche sei,
her bot, so gebet den kopf dar,
e mein herr erdurste gar,
daz er im trinch genuoch.
ez ist ein michel vngevuoch,
daz man einen fürsten
so starch lat erdürsten
mit seinem aigen guot.
daz chvmt von vnvruot.
daz mag iv wol zorn sein.
claret ist bezzer danne wein.
da büezzet iwern durst mit,
herre, vnd habt guoten sit,
als ir da vor tat
vruo vnd spat
nah der tvgend rat.>
also key die red gereit
vnd an den chünig selben leit
disen schimpf vnd sölhen spot,
div gvmpeney vnd der bot,
die begunden lachen tougen.
dise wincten mit den ougen,
jen stiezen mit den ellenbogen.
dirre sprach:< üns hat bezogen
ein toetlicher donrslak,
dem niemen wol entwenchen mach.
wir sein übel her chomen.
üns wirt noch hivt hie benomen
vnser wert vnd vnser ere.
vnser deheiner ist so here,
der im dar zuo betivre -
er ist so vngehivre
an leib vnd an zvnge -,
ob im halt gelvnge,
daz er in vngespotet la.>
so sprach ein ander anderswa:
< div hohzeit wil bosen.
dirre kopf vnd sölich kosen,
daz key von in allen tuot,
daz machet vns vngemuot,
wan der schad ist manigvalt.
ez ist auz der tagalt,
daz wir daz sehen müezen
vnd sein niht mögen gebüezen,
daz wir sein mit dem schaden
so manigvalticlich geladen
an üns vnd vnsern wiben.
wer möht vor keyn beliben
vngespotet nah der missetat,
da er des chünges gespotet hat,
seines herren, an schulde?
niemen ist in seiner hulde
dehein weil also wol,
er vind ein hertz triwen hol
vnd ein leip spotes vol.>
ez was in komen auz dem spil.
dise red vnd ander vil
wart da gereit hin vnd her
vnd ein michel tail mer,
dann ich iv gesagt hab.
sich huob ein groz vngehab
hin vnd her in dem sal
auf, enneben vnt ze tal
vnder dirre massenye.
der graue vnd der vrye,
der chünig mit dem herzogen,
die heten sich ingezogen
gämelich in dise chlag.
waz toug ez, ob ich sag,
wie dirre streit, iener kleit,
der ander sauft vmb daz leit,
vnd wie dort ien gesellen
baten got den selben vellen,
der den kopf ie gemachet,
vnd wie der ander lachet,
daz sein geselle trauret.
disiv klag starch duret,
wan ez was ir vorht,
daz dirre kopf worht
sölch wunder vnder in.
disen gemeinen vngewin
besorgten si alle.
da pei was ein galle,
div iegslichen meilet.
jr gift si vndertailet
vnder si so geleich,
daz sein arm vnd reich
heten mer danne genuoch.
der bot, der den kopf truoch,
stuont vor der tabelrounden,
da von der phalntzrounden
ze næhest mein herr brisaz
bei dem künig artuse saz.
den kopf gab der artuse.
nv wart in dem hvse
ein michel gedranch,
do er aus dem kopf tranch
vnd im niht misselanch.
do artus getrunchen het
vnd den kopf mit dem claret
dirre bot wider nam
vnd artus daz trinchen zam,
so daz er sich niht begoz,
sich huob ein stille, div waz groz,
vber al in dem palas,
daz im so wol gelungen was,
vnd heten es vür wunder.
key sprach dar vnder,
des man wol lachen mohte.
er sprach:< vil wol ez tohte
vreunde vnd vrivndinne,
daz si ir zweir minne
mit stæt vnderbunde,
so daz si niemer kunde
vnstæter chranch enbinden.
sam hat sich von kinden
mein herr vnd mein vrowe,
als ich wol getrowe,
so gärlich her behuot,
daz ein hertz vnd ein muot
si beide merchet svnder mein,
vnd ein ia vnd ein nein.
daz mag man kiesen dar an,
daz mein vrowe vndern vrowen gewan
vnd under üns mein herr den preis
hat gewunnen allen weis.
des ist er sælig vnd weis.>
waz half den chünig, daz im gelanch?
er cham sein doch an wanch
niht hin vor hern key.
disen kopf gab er da pey
einem chünig, der hiez brisaz,
der im do ze næhste saz
von der pfalntzrounde.
den bot er zem mvnde
vnd entranch noch begoz sich niht.
disiv wunderleichiv geschiht,
div kom von einr meide
di er in grozem leide
lie svnder helf an einr stat,
da si seiner helfe bat,
vnd erlost si doch seit.
des enmoht er nv ditz leit
auz dem kopf niht getrinchen.
nv begunde key winchen
vnd sprach im ze vare:
< jr herren, wizzet zware,
mein herr hat guot urhab,
daz er im den chopf gab.
des habt ir genozen,
daz ir trinket unbegozzen
auz dem kopf von dem lide.
wir haben daz ze nide,
daz iu so wol ist geschehen.
des schült ir meinem herren iehen:
ez ist von seiner hantgift.
sælden chint hat sælden stift
vnd vertreibet vnglükes gift.>
ez gab den kopf von der hant
dem boten, der dar was gesant,
wider mein herre brisaz,
daz man in gæb vürbaz.
do gab man in ze næhest da
dem chünig von ethiopia,
daz er trunch nah in.
auf sein selbes vngewin
daz also schier geschach.
ein ünde auz dem kopf brach,
div den herren gar begoz
vnd also gahes wider floz.
sam schier ez was ergangen,
der kopf het vervangen
an im ein starchez tadel.
sein hertz was also wadel
an allen werltsachen,
daz er niht gemachen
moht, daz ez wurde zam.
seinem leib was alsam.
der was in allen enden
vnstæt mit missewenden.
daz wart an dem kopf schein.
< wa moht daz claret sein>,
sprach key,< daz man so verzert
al zürn, vnd der kipper wert?
swaz weins da wart inne,
vnd wær der aller hinne,
der wurd verzert schiere,
solden noh die næhsten viere
trinchen, als ir habt getan.
er chan wol chöpf machen wan.
daz trinchen hat er wol gewent.
ez ist auf in so versent,
e er es biet ze munde,
so wellet sich div vnde
gegen im zaller stunde.>
uber di tavel saz ein degen
artvs dem chünig engegen,
daz was mein herr gawein,
an dem nie tadel erschein
an muot noh an leibe,
wan daz er sich von weibe
vber reht genaden vermaz.
dar an er seinr wirde vergaz.
daz doch in schimphe geschach,
daz er sich so übersprach,
do in gemeinr fauel
die von der runtauel
eins abendes gesazen,
do si ze hove gazen
vnd zalten in auentivre.
daz galt er seit vil tivre
dik an vil manger stat,
daz er also missetrat,
als im der lewe selbe seit,
da er vnd der chünig reit
beide nah auentivr gewin,
do er gesezen was auf in.
kleinr chranch birget grozen wert.
div schand vrones weges gert,
also oft geschieht,
daz ein nebel michel lieht
mit seiner vinster vmbstet,
daz sein schein da von zerget,
vntz er aber brichet auz.
ez birget ein rot goltgrouz
ein swartzer ruoztropfe.
wan bot auz dem kopfe
ze trinchen dem reken.
an im sah man deken
vollez lop swachez mail,
gantz tugend meins tail.
da wachet schand vnd slief daz heil.
ditz seltzan mære,
daz ist doch chlagebære,
daz disen tugendrichen helt
ein chranch spruch so entwelt
wider so groz manheit,
als er lang het beieit,
da man in solt bewæren.
wie getorst den ie beswæren
ein so chlein missetat,
den tugent so bewaret hat.
ditz was ein iamerlicher schlach,
daz dirre spruch überwach
so manik reich tugende,
die er von seiner ivgende
vntz in sein alter begiench.
daz in daz niht verviench,
dar an was reht wilde.
doch haben wir sein bilde,
daz werc von lieht valwet.
ein schoen weip salwet
oft von liehter svnnen.
ein gar lautern brunnen
trüebet ein vil chleinr mist.
so daz ors ie blencher ist,
so ez ie lihter sich besleht.
da wider der die kran tweht,
da von meret sich ir swartzer glantz.
swa valsch ist vnd vnstæt gantz,
da scheint ein chleiniu tugend niht,
sam vil auz dem wazer iht
ein vanch mak gebrinnen.
wie möht div schand gewinnen
dehein so vest obdach,
sin wær ie doch inne swach?
solt ez nah meinem willen varn,
got mües die besten so bewarn
vnd setzen zuo der sælden tür,
daz in nimmer widervüer
niht wan er vnd gevüer.
do gawein so misselanch,
den kopf vnd daz lautertranch
gab der bot sa ze stet
meinem herren lantzelet,
den hiez man von arlach,
der der herren amte phlach,
daz er riter vnd pfaffe was.
swaz er auentiur erlas,
di zeigt er eim gesinde.
daz was her von kinde
je gewesen sein arebeit,
vnd was der erst, der beieit
vor den andern den preis.
sein leben stuont allen weis
je nah hohem werde.
ez enlebt auf der erde
dehein riter so tivr,
dem er ie tiostivr
verseit alde ritterschaft.
ez stuont so vmb sein chraft,
als ez über mitten tak kam,
daz er an sterch zuo nam
alle weg vntz in di naht.
swer di weil mit im vaht,
der muost werden sigelos.
an dem kopf er verlos,
do er solt trinchen, den sich.
daz er geviel in den strich,
daz erarnet er da mit,
daz er über riters sit
gesaz auf einen garren
auf gewizzez nahharren,
do miliantz die chünigin
vber sein willen vuort hin.
wan er sein örs het verlorn,
des enmoht er gedreng vnd dorn
ze fuozen niht erstreichen.
ouch wolt er wider weichen
niht, vntz er vunde,
jn welhem vrchünde
div chünigin bestuonde.
ein sit was in dem lande,
swer verdient di schande,
daz man in solde henchen
ald anders so chrenchen,
daz er verdament wær,
den namen di weitznær
vnd satzten in auf ein wagen,
der muost in al vmb tragen
von steten ze villen
mit alsölhem willen,
swer in auf dem garren sach,
daz er die schand an im rach.
wan auf in was gewant,
swaz er het in der hant,
ez wær holtz oder stein.
so muost er gelten daz main.
nv lantzelet enchvnde
von dez kopfes gvnde
getrinchen des leides,
key, der voller neides
je was vnd bitter galle,
der sprach mit michelm schalle:
< her lantzelet, ez scheinet wol,
daz der kopf ist ze vol.
des möht irn niht enburn.
eins lamberyen oder eins stvrn
möht ir leihter genuog ezzen.
jr seit gar besezzen
jwer kraft an disem morgen.
jr wært des svnder sorgen,
hiet ir in nah mittem tage
vz getrunchen an die sage,
so iwer kraft gewahsen ist.
her bot, gebt der rede vrist,
vntz im kom mitter tak.
so trinchet er, daz man im mak
der rede wol gedanchen.
einen trunch also chranchen,
den möht er vor imbiz,
ob er dar an allen vliz
leit vnd allen seinen muot,
getrinchen, als er nv tuot.
jegleicher sach ist ir zeit guot.>
der bot, der des kopfes phlak,
gab in erech fil de roy lak,
daz er trunch dar nach.
jm wart zem trinchen so gach,
als er disen kopf begreif,
er tranch vast an den reif
des weines im genuoch.
daz im der kopf niht vertruoch.
er begoz in vil sere.
dise starch vnere
da mit er erarnet,
do in enyte warnet
jn dem wald manger vreise,
do si sein gereise
was auf einem walde.
key sprach also balde:
< ay, mein herre erech,
jv ist ze smal dirre wech,
den ir nv seit geriten.
jr hiet leihter gestriten
mit zwelf roubærn,
die alle zagen wærn.
jr schült ivch vil wol gehaben.
künd er baz siechen laben,
des wurdet ir wol inne.
sich het an vnminne
dirre kopf so verlan,
daz er niemen ze vreunt wil han.
des ist lougen dehein.>
den kopf nam her ywein,
wan er was ze naheste da.
er bot in zem munde sa.
er moht ab getrinchen niht.
nv key gesah dis geschiht,
er lachet vnd sprach:
< jwer lewe, der den risen brach
vnd maniger vreis ivch vervie,
wær der nv bei iv hie,
der hiet ivch gerochen.>
also key daz het gesprochen,
disen kopf gab man zehant
meinem herren kalocreant.
dem geschach ouch alsam.
als er daz claret nam,
er begoz sich da mite.
< daz ir an iegslichem trite
juch so wol habt behuot>,
sprach key,< daz ist guot.
daz zeigt ouch der brvnne,
dem ir in heizer svnne
auf den stein gvzzet
vnd des so wol genvzzet.
er mag vil wol vro sein, der so wol genivzet sein.>
parcefal der galoys,
der nam nah dem waloys
den kopf vnd tranch.
der wein aus dem kopf spranch
vnd begoz in mit al.
ditz erwarb her parcefal
an dem armen vischær,
den er in grozer swær
durch zuht vngevraget liez,
als im div magt seit gehiez,
daz in sein zuht so gar verriet,
do er von dem boume schiet,
da er si sitzent vant
vnd des swertes kraft erkant,
daz im gap sein oheim,
do er wolt reiten heim.
sweigen tuot vil dik schaden.
sam wart er da mit geladen.
key sprach:< ir seit verzagt.
vil reht von iv weissagt
dise rede lang vor
cvliantz der tor,
vnd ouch von vrowen leden.
jr sült des in beden
grozen danch sagen,
daz si in ir kinttagen
nie wolt gelachen,
vntz irz muost machen.
jr biten het si wol gewant,
daz si ivch dar zuo bekant
vnd durch ivch ir sweigen brach
vnd zuo iv lachend sprach.
si kvnd wol guot riter spehen.
daz ist guot an iv ze sehen.
dest war, des seit ir wol wert.
des selben ouch der wein gert,
dar iv engegen spilte.
wizzet, daz in bevilte
der weil in dem golde,
daz er biten solde,
vntz ir in zem mvnde
braht an der stunde.
emzigiv trat tuot blozen wech,
ouch get man leiht gewonen stech.
des ist tugend an iv gewon
vnd selwet schande da von.
er wirt gar verswachet,
swes hertz ist vermachet
sam ein ertz vnd ein gunterfeit.
valschen muot div schande ieit
vnd ist triwen tugent leit.>
ich seit iv besunder
daz manigvalt wunder,
daz von dem kopf ergiench,
jn welher weis er geviench
jegslichen vnd begvzze,
wan ich vurht, daz verdrvzze
dirre red eteswen,
so ich nand den vnd den
vnd daz so stark übertribe,
do geviel mir, daz ich belibe
an dem ende hie mite.
wan daz ist der werlde site,
daz si der niwe volget.
vil oft sich besolget,
der niwe wege kivset.
dik ouch man verlivset
groz guot nah cleinem val.
swa zweir dinge div wal,
da nimt man liht daz arge.
als leiht vellet der karge
an chvnst sam der vnvruot,
der ez von vnwitzen tuot.
jch wil iv doch die besten
vnder chunden vnd gesten
sagen vnd nennen,
daz irs mügt bechennen,
die auz dem kopf trunchen,
vnd welh von valsch svnchen
vnd wurdent gvneret,
vnd wie daz key vercheret
ze schanden vnd ze spot,
vnd wie gewert wart der bot
vnder dirre tugentlicher rot.
do getranch mein herr parcefal,
den kopf nam her lanval,
dar nah layz von ardyz,
nah dem miliantz de lyz
vnd maldvz der weise,
dynodes der greise.
nah dem tranch gandalvz
vnd fliez von jandvz,
nah dem der chvnich bryen
vnd von love vryen,
nah im von canabvz ywein
vnd lochenis von onayn,
dar nach her brant riviers
vnd bleos von blieriers,
dar nah senpite brvns
vnd gantiziers von yascuns,
dar nah fiers von ramyde,
der gerner streit, dann er het vride,
nah dem caradvz von caz
vnd cauterovs von solaz,
nah dem ein rech rebedinch
vnd fil li roys qvinedinch
vnd von qvine ein rech quareos,
nah im von montdoyl hysdos
vnd galerez von destraus
vnd ein rech gales ly chaus,
nah im der rot avmagwin,
nah dem graym vnd gotegrin
vnd gradoans vnd caraes
vnd des chünges svn filares,
dar nah tallas vnd gofrey
vnd loes ly fil li rey,
segremors vnd nebedons,
labagides vnd braynons.
nah disem tranch quadoqueneys,
galarantis ly galeis,
nelotrons vnd gronosis,
bauderons de lynis
dar nach markve gormon
vnd elys von clymon,
von treueren maloans,
dar nah der starch gaumerans,
dar nah tranch gvigamiers,
nah im dauelon li fiers
dar nah dauid von tintaguel
vnd gvrnesis li ysnel,
dar nah gartaz von omeret
vnd von qvinoqvoys gomeret
vnd qverquoys daryel
vnd ramel von joventzel,
dar nah bylis vnd dantipades
vnd bryan ly meindres,
glotigoran vnd gligoras.
dar nah tranch her qvinas
vnd ander vil vnd genuoch,
den man disen kopf truoch,
der ich noch hivt gewuoch.
ob ich daz rein gesinde,
daz mit dem sælden kinde,
dem chunig artvs, was,
als ich ez vil ofte las
an ereken, nande,
den von der swaben lande
vns braht ein tihtær,
jch weiz wol, daz ez wær
vberich vnd vnlobelich.
vmb die red so han ich
di vngenanten genant,
di vil leiht vmbechant
meister hartman waren.
oder er wolt bewaren
ein valsch nahred dar an,
daz leiht tæt ein valsch man,
als in sein nature leret,
der niht wan boes meret.
daz chvnd er wol bedenchen.
jn enmoht niht leiht bechrenchen
ein man, der zweir zvngen phlak
vnd der vil bittern nahslach
hinden nah dem manne sleht
vnd im vorn ab di schande twecht.
des was er alles vollechomen.
der got, der üns in hab genomen,
der müez in ze ingesinde haben,
vnd werde nimmer ab geschaben
von des lebens puoch.
der himelisch chünik geruoch,
daz er der sel lone
mit vnverwerter chrone,
vnd müez im mit al vergeben,
swaz er ie in disem leben
getæt wider sein hulde.
wan von der werlt schulde
geviel der sel div missetat,
der der leip gedienet hat
mit tugentreichem sinne.
des hymels chüniginne,
div muoter ist vnde magt,
ze der genaden sei geclagt,
ob der sel iht gewerre.
vater, svn vnd herre,
guot, weistuom vnd gewalt,
got einr in der drivalt,
erhoer vmb in, reicher crist,
div dein tohter vnd dein muoter ist
vnd ein taub ane galle,
daz sein sel iht gevalle
jn deheinen toetlichen last.
wan dv selb gesprochen hast:
swer mein vor der werlt vergiht
vnd an mir verzweiuelt niht,
daz selb im von mir geschiht.
solch chlag vnd ditz gebet,
daz ich daz ie getet,
daz sol man niht vür wunder han.
wan so der rein hartman
mein hertz besitzet,
so chaltez vnd switzet
vnd bristet vnd chrachet.
sein tugent mir daz machet,
der er bei seinr zeit phlak.
owe, toetlicher slach,
wie dv an im hast gesiget,
daz er in touber molte liget,
der ie schein in vreuden schar!
hartmann vnd reimar,
swelch hertz nach werltvreuden ieit -
wan dar nah ir ler streit -,
di müezen si von schulden clagen.
si habent vorgetragen
tugend bilde vnd werdes lere.
swer weibes lop vnd ir ere
so vürder, als si taten,
der ist vnverraten
von mir wider weibes namen.
si chvnden stillen vnd zamen,
swaz von neide valsches vlauk.
swa man weibes güet belouk,
da stuonden dise zwen ze wer
wider der valscher her.
weibes güet, der ist geschehen,
kvndestvz ze rehte spehen,
daz dir nie groezer schad geschach.
dein lop wirt val vnd swach,
wan si valwent leiplos,
an den diu vroed ir reht verlos
vnd weibes vroed aller maist.
ovch muoz ich chlagen den von eist,
den guoten dietmarn,
vnd die andern, di da warn
jr soul vnd ir brvke,
heinrich von ruke
vnd von husen fridereich,
von guotenburch uolreich
vnd der rein haug von saltza.
got, der müez si setzen, da
jr sele genade hab!
vür war si dirre werlde hab
mit sölher zuht powten,
swa si des ie getrouten,
daz si daz beste taten.
daz wart mit selhen staten
so getan, daz dar an in
nie geviel schanden gewin.
wis in, got, als ich in bin!
hie wil ich di rede lan
vnd wil da wider heben an,
da ich die auentivre lie.
do div red also ergie
vnd di riter über al
getrunchen, di in dem sal
al vmb warn gesezen,
daz deheinr wart vergezzen
vnder allr dirre rot,
wan key vnd der bot,
die hielten den kopf vnder in.
key sprach:< der ern gewin
jst chomen an üns zwen.
wir schüln ouch ze buoz sten,
wie wir her haben gelebt.
trincht, her bot, vnd gebt
mir den kopf dar nah.
vmb daz sei iv niht ze gah,
daz ich trinchen welle,
lieber trinchgeselle.
wir tæten anders vnreht,
seit so manig guot chneht
vor üns dar auz getrunchen hat.
sein mak ouch wol werden rat,
seit ez also muoz sein.
kost, wie meins herren wein
smek vnd sein claret.
div rede hövelichen stet,
wan sein hivt ir batet.
daz irz do nien tatet,
dest war, daz beswært mich.
trincht ir, so trinch ouch ich.
daz tuot ir svnder angest.
ja möht ir hivt langest
an mich, her, getrunchen haben.
wan tugend ist in iv begraben
vnd muoz di schande fürder schaben.>
djse red tet key von spot.
hie mit tranch dirre bot
auz dem kopf im genuoch.
sein tugent in da übertruoch,
daz im dar an niht gewar.
er het den wein getrunken gar,
sold erz anders haben getan.
da ist dehein zweivel an.
als schier er vor in getranch,
er sprach:< der wirt hab danch,
daz er so wol geprawen het.
jch getranch disem chlaret
nie niht geleiches,
so tivres vnd so reiches.
trincht ouch ir, ez ist guot.
jch weiz wol, daz ir daz tuot
gar svnder widerstreit.
so seht ir wol, ob ich leit
ze rehte kosten chünne.
ez ist louter vnd dünne,
gesmach vnd ræze,
vnd sint sein wæze
süez vnde starch.
ez muoz chosten manig march
ditz vil edel pigment.
jch wæn, der chünik da mit gwent
hab dar zuo seine geste.
dehein houbet ist so veste,
ez muoz bresten da von,
ezn wær sein vil wol gewon.
da von trinchet chleine
wider erst ze mazen seine.
daz rat ich iv, mein her key,
wan ez swaret sam ein pley
vnd leget sich dem hyrn bey.>
key disen spot verstuont
ze guot, sam di alle tuont,
die ouch gern spotes phlegent
vnd ir zeit dar an legent.
tuot den ouch ein spot we,
den selben überhoernt si e,
dann di sein nie gephlagen.
di muoz sein betragen.
dise sint aber chüener dar an,
dann der sein nie began.
also nv an keyn geschach.
div tugent an der schanden rach,
swaz si ir ie tet ze laide,
also ich iv beschaide,
an ir ingesinde.
daz lon wirt vil geswinde,
daz man gar mit hazze geit,
vnd swa neit wider neit
sich üeben beginnet,
da wirt geunminnet.
einz oder beidiv tail
wirbet dar vnder vnheil.
key muost engelten,
daz er so selten
an spot seiner zvht phlach.
da von der spot vnderlach
hie vnd dichk anderswa.
aus dem kopf wolt er sa
trinchen ane sorgen.
do was dar an verporgen,
dar an er betrogen wart
vnd sein zvhtlos hohvart.
als er nah dem kopf greif,
vil gahes im ze tal sleif
vnwizzend ietweder hant,
daz er sein lützel enphant.
svs ward er geschendet,
daz er dar an dernendet
vnd sein ie begvnde.
von vnheiles gunde
moht er sein niht bringen.
der wein begunde springen
mit vil grozem haz
gen im auz dem vaz
vnd begoz in mit alle.
do gesweich von grozem schalle
key vnd wart vil stille.
daz was ir aller wille,
der er het gespotet vor.
do spranch cvlyanz der tor
vil mangen sprunch weiten.
er rief:< wer wil streiten
mit mir vmb den maisten trunch?
als mich leitet mein dunch,
den chan ich wol gezeigen.
seht, wie key chan neigen
den kopf über houpt!
er hat in beroubt,
daz drinne niht ist beliben.
er was vast bechliben.
daz hat er vil gar vertriben.>
zehant do div rede geschach,
der bot aber ze dem chünig sprach:
< artus, mir ist wol gegeben.
jst, daz mein herre sol leben,
jv wirt sein niht vergezzen.
des getar ich mich vermezzen.
jch schol iv den kopf lan
vnd sol iv einen list dar an
sagen vnd eine behendecheit,
der ich e niemen seit,
wan ich do ensolde
darvmb, daz ich wolde
die warheit dar an ersehen.
daz doch seit ist geschehen,
des ich mich doch niht versah,
wan daz sein mein herre iah,
do er mich her sande:
scholt er iendert in dem lande
jn deheinem hove besten,
daz muoz in disem ergen.
daz ist geschehen also.
des pin ich durch ivch vro.
jr sült in gern behalten.
die weil ir sein welt walten,
so geprüevet er nimer mere
dem dehein vnere,
der e dar auz getrunchen hat,
swie starch sei sein missetat,
ob er dar auz trinchen wil,
swie oft er wil, dann so vil.
ob ein gast chümt her
ze iwerm hove vnd ob er
dar auz trinchen welle,
ob den sein mein velle,
der e nie dar auz getranch,
der vellet sunder seinen danch,
jst, daz ir in prüeven welt.
hie mit sei er iv geselt.
daz ist wol von schulden.
jch wil mit iwern hulden
wider ze lande cheren.
da wil ich immer meren
jwern preis vnd ivch eren.>
do disiv red also ergienc,
key ein trovrn gevienc
vnd daht vil mangen weis,
wie er seinen vnpreis
vnd sein schande
hier an erwande,
die er von dem kopf leit.
wan sein muot dar nah streit,
swa er iemen moht geschenden,
daz enmaht man niht erwenden,
so lag er an der lage.
er satzt sich auf di wage
e wider ein andern man,
e er sich enthielt dar an.
so was er dar an verdaht.
vil oft er sich ze laster braht
von sein selbes muot,
des sich ein ander huot.
sam wolt er schenden disen gast.
dar an im vollechlich gebrast
vnd wart sein laster breiter.
sein hertz was mit aiter
so neitlich bewollen,
daz er sich envollen
niht triwet erzeigen.
wart ieman spotes eigen,
do was er hie vnd da
an im vnd ouch anderswa.
er gie zuo dem boten hin,
da er stuont vnder in,
vnd sprach von valschem mvnde,
als er vil wol chunde:
< ritter, ditz gah scheiden,
daz muoz mir vreude leiden.
wider iwer selbes ere
jr het ze werben mere,
wan ir habt niht so wol,
so doch ein vrvm bote sol,
jwer botschaft erworben.
dar an wær verdorben
jr vnd iwers herren wert.
dar nah vnd ir hivt gert,
enthabt ivch ein weile,
wan iv ist div eile,
destwar, ich wæn, vür niht vrum.
welt ir preis vnd ruom
ze meins herren hof beiagen,
so schült ir mir niht versagen
einr bet, der ich ger.
dar vmb ir doch chomt her,
daz chan iv niht gewerren,
wan irs an meinem herren
hivt dinget, des seit gemant,
ob ir sein niht vergezzen hant.
seht, ob ir sein gedenchet.
vil manich man schenchet
mit vollen auzem houbet,
des hertz ist betoubet
oft vnd sein vnwillich muot,
daz er zaglich tuot.
mein herren ir e batet -
durch wes willen ir ez tatet,
des enweiz ich niht di warheit -,
daz iv von seiner werdecheit,
der lop gruonet schone,
ouch geviel daz ze lone,
so reich aventivre,
daz iv hie tiostivre
jht verzigen wurde.
nv wil ich di burde
wider ivch tragen starch gern.
jr mögt da willechleich gern,
da man ivch niht chan entwern.>
artus sprach:< sweiget, her key,
wan sölch rede div ist vrey
vnd hoeret zem reiche.
nv wizzet sicherliche,
jv möht sam leiht missevarn,
wolt in gelüke bewarn,
sam iv moht gelingen.
wan sol an allen dingen
di rehten maz chvnnen.
jr wolt aber niemen gvnnen
vür ivch deheinr eren.
jr welt noch baz meren,
jch vürht, iwer schande.
so prüeft ir disem lande
vmb süst vil grozen spot.
war an het dirre bot
an iv getan vnreht,
wan daz er sam ein guot chneht
seins herren botschaft erwarb?
swes preis dar vnder verdarb,
daz ergie an sein schulde.
vnd solt er ir hulde
dar vmb verloren han,
hie sitzet manik vrvm man,
dem ouch daz selb ist geschehen,
vnd manger edeln vrowen.
vnd möhten si des trowen,
daz ez kampf dachte,
jr wurd auz der achte
so vil mit im gevohten,
daz si niendert mohten
ergen in einem iar.
jr sült selher var
disen guoten chneht erlazen
vnd sült ivch ebenmazen
einem reken, der nah preise vert.
swie wol ir ivch da erwert -
des bin ich vür ivch vro -,
ditz gefrumt iv niht nadel zwo.>
da sprach key aber do:
< künich vnd herr, mich dvnchet des,
jch engelt ziv ich enweiz wes,
daz ir mir so gehaz seit.
ez ist ein vil chleiner neit,
den ich wider in trage.
vnd ist er niht gar ein zage,
swes er hie hat gebeten,
daz enlat er niht vndertreten,
seid erz wol haben mach
vnd sein bet dar an lach.
swer mich dar vmb schendet
vnd mirz missewendet,
der tuot micheln gewalt.
mir ist sam, der des engalt,
des er nie genoz.
swie ich tuon, so ist ze groz
mein missetat hie vnd da.
von schulden ist der wolf gra,
wan swaz er in der werlt tuot,
ez sei übel oder guot,
wan hat ez doch vür arch.
wer ist so sælich vnd so karch,
der vollechleich bei seinen tagen
allr der werlt mög behagen?
den het vf dirr erde
mit vil reichem werde
vrowe sæld gestivret.
swer mich so vntivret,
der nem bei mir bilde
vnd werd der schanden wilde
vnd zieh sich nah dem besten lobe.
lig ich vnder, er sweb obe
an der sælicheit rade.
wan swa ich mich überlade
mit schanden, daz ist mein schade.>
dirre bot tet sam ein man,
der seinen worten borgen kan
vnd der allr sache vlucht
hat ze obristen zuht.
< her key>, er houelichen sprach,
< ob mir div vnzuht geschach,
daz ich sein han gegert,
so ist div genad lobes wert,
daz ich so snelle gewert bin.
dest war, schied ich also hin,
daz ich sein næm niht -
daz aber nimmer geschiht -,
so wær ich wol ze schelten.
jr schült des niht engelten,
daz ir mir so bereit seit.
daz man so willichleichen geit,
daz mak man gern enphahen.
jch wil mein widergahen
durch ivch lan beleiben.
jr mügt mich niht vertreiben
mit so genædechleichem geheiz,
wan daz got selbe weiz,
daz ez mein selbes wille ist.
waz touch beiten langer vrist,
seit wir des willen sein bereit
vnd vns der süezen arebeit
beide also wol gezimet?
div red vil zeites benimet
vnd mak so nimmer ergan.
jr müezt mich ze ors bestan,
als ir selber hant gedaht.
so ist mit ern vollebraht
allez, des ich hie gebat.
nv tuot mir der rede stat.
jch bin berait, als ich sol,
vnd schol sein ouch mein herr wol
gvnnen vnd daz gesinde,
seid ich ez bereit vinde.>
dirre red vil ergie,
e si der chünich zesamen lye,
wan er ez gern gescheiden het.
do half lützel sein bet,
wan key in seins dienstes mant.
do bat der gast, daz er bechant
jm an der gab sein reht.
do muost div red wesen sleht.
ditz vlouch von ritter ze chneht.
schier chomen chnappen vier
mit reicher zimyer,
die der chamer huoten,
mit zwein covtren guoten
von einem roten samit,
die wurden in den sal geleit
auf ein tuoch seidein,
da div stat solte sein,
da man si waffen wolde.
zwen schilte da von golde,
dar auf swebten zwen adelar,
di braht man vil snelle dar
vnd reichiv covertivr
vnd lanzen von lazvr,
gar wol gemalet
mit rotem, wol gestalet.
ouch wart braht an di stat
ein zier reichiv sarwat
mit diker weizzer meille
vnd di fintaille
reich vnd gewar
vnd goltzen, di niht swar
warn vnd ze groz,
als si ein guot meister sloz,
vnd waffenrok geleiche,
als mans ze franchreiche
pfliget von cendale,
vnd von goltmale
zwen helm sam ein spiegelglas
vnd vest sam ein adamas.
als der harnasch braht wart,
her key ez niht lenger spart,
er guort den lendenier.
dar nah wart er vil schier
jn sein eisenhosen geschuoht.
ein wambeiz wart im gesuoht
von einem bvkeran blanc,
ein spanne von der gürtel lanc
vnder seinen halsperch.
div örs wurden vür den berch
braht an ein eben,
da in div stat wart gegeben
an ein weit gevilde,
vnd sper vnd schilde.
der coifen vnd des coliers,
waffenrokes, helms vnd schilliers,
der ward er vil snell gar.
ez beleip ab der ritter bar,
der mit keyn vehten solt,
wan sein örs wart im geholt
vnd dirre schilt vnd ein sper.
er het gewafens nimer
an der stat, da in beiden
der streit wart beschaiden,
beim graben vor dem palas.
gyneuer mit arthvsen was
dar gegangen mit ir vrowen,
da si ez wolte schowen,
vnd daz gesinde über al
an den graben vür den sal.
vil groz wart der anval.
daz der gast so bloz beleip,
ein schad in dar zuo treip,
den ich iv bescheiden wil.
jnem haus was gewaffens vil,
der im deheinz tohte.
vür war, er enmohte
sich gewaffen in deheinz,
wan dar wart braht einz
mit dem chünig brian.
daz tet bylis, der chlein man,
ein reicher chünich vnd ein twerch.
do was im der halsperch
an der coyphen ze enge.
an der weit vnd an der lenge
was er im nah anders reht.
des muost dirre guot kneht
beleiben an waffen bloz.
ez was aber sein kampf genoz
starch wol bewart.
daz den gast chlein beswart.
nv muoz ir got beider phlegen.
wan siht ir beider teil wegen
vngelich auf der wage.
si hevet sich vil trage
nah wan an des gastes teil,
ezn vnderste vnheil,
wan sein gloet geringer ist.
jch weiz wol, daz dehein list
jn der werlt ist so starch.
swer einhalb ein march
wiget gen einem sætein,
da muoz vil vngeleich sein
jr beider gewige.
jm müez an dem sige
gelüch starch volgen,
wan im ist erbolgen
sein champfgeselle.
gelüch niht des welle,
daz in iht da an gevelle.
beide hielten si ze ringe.
hie dise ivngelinge
auf ir örs gesazen.
des si sich zehant vermazen,
dem ist ez vil nahen bei.
den ein tuot waffen vrei,
so vert der nah gelüke.
jr ietweders tüche
werbent nah des andern schaden.
si hat ein haz so geladen
der beiden mach gewerren.
niht nach den osterherren
disiu tiostiure stuont,
die alle vinde in tuont
mit ritters behendecheit,
als min herre wirnt seit,
swa si sint ze velde.
in hat disiu melde
geschadet vil starch,
wan die von der march,
wurden si sin inne,
si entranten mit unminne vil leiht die gevaterschaft,
her wirnt ist so warhaft,
der ez von in gesagt hat,
und hat ouch solcher witze rat,
daz er wol erkennen kan
vf solchen siten den man,
wan er hat ez dick gesehen
ze veld an ritterlichem schehen:
ze karlingen vnd ze britanie,
ze brie vnd vf tschampanie,
ze gal vnd ze norwein,
ze flandern vnd ze lohrein,
ze normandie vnd ze engellant,
ze hengouwe vnd ze brabant,
ze hessen vnd ze hespelgou,
ze dürngen vnd ze brisgou,
ze swaben vnd ze sachsen
da ist ez niht gewahsen.
daz sal man im gelouben.
got gesegen vor ir rouben
die herren von dem sande
vnd die von westerlande,
westfal vnd franchen,
swie von der gedanchen
von erst ditz spil entsprung.
swa sich ein peier drung
ze velde mit einem osterman,
der wart also in getan,
von siner kunst, im enwage heil,
daz im geviele daz winster teil.
da wider ist uns ditz guot,
daz ir kunst vnd ir muot
hie ze land niht geschiht.
den aber geschiht von in leides iht,
daz sint die von vrigiule,
der garzune mit hiule
wol preisent den turnoy
dort, als der franzoyser croy
tuot mit vns vnd bei dem rein.
wellent si so schedlich sein,
so beschein si nimmer vnser schein.
also lazen wir dise rede sten
vnd hoeren ouch, wie diese zwen
ze örse da gebarten
vnd welher sit si da varten
an der örse banekye
vor dirr massenye
auf einem samen wider vnd vür,
dar vmb daz ietweder kür,
wie im sein örs hancte,
so er ez ersprancte
wider seinen champhgesellen.
ze vahen vnd ze vellen
stuont ir beider gedanch.
vil mangen snellen wanch
jr ietweder da genam,
wan sein div örs wol gezam
vnd ietweders muot.
da was bei guot ander guot:
der reken girde, der örs wille.
ein haz wont dar vnder stille
bei den beiden wol bechant.
wan sah vnder schildes rant
gebærd wol behende,
e dirre kampf ein ende
genæm, destwar, von in.
wan da vlust vnd gewin
sich liezen ze pflihte,
als sich an solher geschihte
enn her phlak ze tuon,
wan ez vride noh suon
gestillen mach dehein weis,
ezn werd girde nah hohem pris
mit willen erzeiget.
jr ietweder neiget
daz sper auf di prust geslagen,
vil vngleich zwein zagen.
nu lazzen schenchel vliegen!
da muosten sper biegen
ald vellen oder bresten.
der gast traf zem besten,
vnd wart an væle sein stich,
daz mein herr key hinder sich
muost ein val von dem örs haben
ze tal in den burchgraben,
e er wider wunde,
daz er sich enchvnde
nie enthalten des valles.
do was im seins schalles
ein tail vergolten.
er lag in der molten,
daz er sich lützel versan,
gestraht sam ein tot man,
der lebenden geist nie gewan.
als er in sach vallen,
do chert er vor in allen
nah im in den purkgraben.
nv het sich key auf erhaben,
als er hinden in wolt sein
geloufen ze einem türlein,
da in niemen het gesehen.
do muost ez anders geschehen,
wan in auf der vart errait
der bot, der e mit im streit,
vnd kom im so nahen,
daz er in nam ze vahen
bei dem helm hinden
vnd begund in nah im winden,
daz er in svnder seinen danch
hinder sich auf daz örs swanch
vnd fuort in hin vnde her.
gnad starch gert er
vnd bat im helfen tivr,
wan dirre schvmpfentivr
verdroz in vil sere,
wan da was vnere
vnd anderthalp schad da bei.
er wand des leibes werden vrei
vonem valle vnd von würgen.
er bot dem riter bürgen,
daz er in liez genesen.
er wolt sein eigen immer wesen
vnd sein gesicherter gevangen.
er liez in doch hangen
bei dem örs ze tal,
vntz daz gesind über al
sein bet da vernam
vnd vür die chüniginn cham.
die begund do key bitten
mit so iæmerchlichen siten
vnd mit so bärmlicher clag,
wan er ein ende seiner tag
wand haben an der stunde,
daz si im des engvnde,
der im den leip nam,
wan ir daz missezam
vnd weipleicher güet,
vntz er ir gemüet
so erwaichet mit bet,
daz si ez übr danch tet,
wan ers so verre gebeten het.
gynevre disen riter bat,
daz er selh missetat
durch sei wolt verchiesen -
daz ensolt er niht verliesen -,
di key het begangen,
vnd ir den gevangen
wider gæb nah ritters reht.
do tet er sam ein guot chneht,
der tuon vnd lazen chan
vnd übermaze nie gewan,
vnd gab in ze ir gebote dar,
so daz er wær ir aigen gar,
wan si im ze helf was chomen
vnd het im den tot benomen.
da mit sich div rede schiet.
artvs vnd dise diet
kerten wider auf den palas.
der bot ouch erbeizet was
vnd giench mit in vf daz hus
sten vür chünich artus
vnd sprach mit zühten schone:
< artvs, dv bist ein chrone
vnd ein spiegel allr eren.
jch wil von hinnen keren,
vnd habt genad vnd danch.
mein wech ist vil starch lanch,
den ich noch reiten muoz.
lat mich haben iwern gruoz,
vrloup vnd hulde,
wan ir ein übergulde
gar allr tugend seit.
daz muoz wesen ane streit,
die weil vnd ich gesprechen mak.
jv hat gefrumet dirre tak
vil gar an iwerm preise,
wan ichs mangen beweise,
der sein e niender west.
da mach ich in so vest,
daz in niemen mak verwerten.
daz lop wil ich so beherten
jv, swa ich landes bin.
daz wirt iwer eren gwin.>
mit dirre rede schied er hin.
do er vrlop het genomen,
nv was key her vür chomen
vnd stuont bei dem gaste.
er sprach:< ir eilt ze vaste.
daz ist niht bescheiden.
jr sült von den maiden
vnd von meinr vrowen e
nemen vrlop, e daz erge,
vnd scheidet dann hinnen.
si hand iv ze minnen
behalten manik guot chleinot
von gimmen vnd ouch von gold rot.
des si in alles hant gedaht,
dar vmb daz ir hant braht
meinem herren disen kopf her,
wan er ist des ir gewer,
daz si cheusch vnd an valsch sint.
des waren wir e alle blint,
vntz ez der kopf erzeiget hat,
wie gar si an missetat
enn her hant gelebt.
ich weiz wol, daz ir ez gebt
von iv deheinem man.
so reichiv kost leit dar an
von tivr vnd von gezierde.
nv wizzet, daz sein girde
brach den anthaiz diogeny
von der guot, war er da by,
der allr hand gezierde vloch
vnd sich nah einem manne zoch,
den er bei einem brvnnen vant,
do er daz wazer mit der hant
warf gen seinem mvnde,
wan er sein niht enchvnde
anders dehein weis gewinnen.
den sit begund er minnen,
daz er silber vnde golt
niht lenger bei im dolt,
vnd ward im starch vnmær.
er iah, daz ez wær
jm gar vnnutz dar nah.
lat iv niht wesen gah,
vntz ir die gab enphahet.
ob ir hinne gahet,
si wanden si iv versmahet.>
dirre red wart vil gelachet,
daz key was so verswachet
vnd noch des spotes niht vergaz.
da pei sült ir wizzen daz,
swer spotes alle weg phliget,
daz den dehein laster bewiget,
swie oft ez im wider vert.
wan er ez also überbert
wider mangem von emzecheit,
dem er spotes ist bereit,
daz ez in niht beswaret,
als erz wol bewaret
hie vnd ouch anderswa.
dise red laz wir beliben da,
vnd sagen von der hohzeit.
da was vroeden vil enstreit
vnd chürtzweil manigvalt,
als si da vor ist gezalt,
vnd noch ir übertivre.
von dirre auentivre,
div nv ze hove chomen was,
der was burch vnd palas
vnd div stat vol über al,
wan ez allenthalben erschal.
swa inder zwen gesazen,
da enwart daz niht verlazen,
da wurd vil von gereit
vnd ir zeit wurd dar an geleit.
süst wert der hof drei tage
mit sölher vroed, als ich sage,
jn vil grozem vollen.
schier vloug ein mær erschollen
von einem garzvne,
daz ein turnay vor yaschvne
über drei tag solde sein.
den het grave rivelein
widern chünch glays genomen.
swer dar zuo wolt chomen,
der vund groz riterschaft
da von der lantschaft
vnd von den vnchunden.
di riter daz begunden
alle treiben vnder in
vnd bereiten sich, daz si da hin
tougen kerten nah lobes gewin.
gaweyn ze dirre rede sprach:
< ez wirt vil starch vngemach
meinem herren, wirt er sein gwar,
vnd lat üns nimer chomen dar.
des schült ir wol gewis sein.
ditz ist der rat mein,
daz wir vil vruo morgen
vor dem chunig verborgen
bereit sein mit waffen,
vnd laz wir in slaffen
vnd riten gemeinlich dan.
komen wir ze brezilian,
e er sein werd innen,
so chomen wir wol hinnen,
daz er üns niht erreiten mach.
wan zwar verslaffet er den tak.
also schier so er erwachet,
jch weiz wol, daz er sich machet
nah üns zehant auf di sla.
vindet er üns danne nahen da,
so müez wir wider cheren.
daz mak mit ünsern eren
nimmer wol ergen,
daz wir dann hie besten,
seit er üns gechündet ist.
swer vnder üns der vrüest ist,
e ez wol beginne tagen,
der sol den andern allen sagen,
daz si sich beraiten.
ditz sol aber niemen breiten
vnder daz gemein gesinde,
daz ez iht ervinde
mein herr, chunich artvs,
wan so ist div red vmb svs,
vnd werden wirs erwendet.>
da mite was ez verendet,
vnd bereiten sich alle dar zuo.
des andern morgens vil vruo
riten si alle gemein,
als in geriet her gawein,
von dem hove di besten,
die chunden mit den gesten,
daz ir beliben nuor drei.
daz was der zuhtlose key,
der ander an der zal was
ein rek gales lyschas,
der drite was avmagwin,
die muosten bei dem chvnig sin,
daz er mit in die zeit vertribe,
seid er so ein belibe,
vnd seinem zorn baz entlibe.
hie mit schieden si alle hin
vnd verliezn den chünich hinder in
ein slaffend ligen.
daz im div reise wart verswigen,
daz muost in ser muowen.
er begunde sich ouch fruowen
mit vil starchen vnsiten
vnd wolt nah in sein geriten,
ob er si möhte vinden.
des muost er erwinden
gar sunder seinen danch,
wan im was der wech ze lanch
vnd div geselleschaft ze chlein,
ern wolt dann alein
gestrichen sein nah in
nuor mit disen drin.
nv des niht moht sin,
er vragt den roten avmagwin,
wes si beginnen wolten,
ob si iagen solten
alder anders iht beginnen,
da von si gewinnen
möhten di weil
etlich chürtzweil,
div ir eren zæme,
vntz daz gesinde wider chæme,
daz si iht verlanget.
diser red verhanget
div geselleschaft über al,
vnd wart ein bot her ze tal
nah den iägern gesant,
daz si gen gornomant
füeren mit den hvnden,
so si snellest chunden.
daz was also ergangen.
div reise wart an gevangen
vnd gen der gavdyn gezogen. da wart der chunik niht betrogen
ez chomen ouch di iäger dar.
ditz ieit vnd disiv var
dem chünig ein teil kvmbers bar.
div zeit was chalt vnd tief der sne,
als ez ist des winders e,
vnd die gewæt starch tief,
da von daz wilt niht verre lief
vnd ez an twale
vil nah ze allem male
hin durch die gewæte brast.
dirr kelten herter last
den chünich vnd sein gesellen entwalt.
da wart gevangen vnd ervalt
da von starch schiere
vil der chleinen tiere,
hasen vnd fühse,
reher vnd lühse.
dort waren si so lange,
daz si in dem twange
der chelten muosten entweichen,
wan in wolt gesweichen
der tak vnd div chraft.
do chert mit seiner geselleschaft
wider heim chunig artvs.
nv was sein selbes muoshaus
beraten vil vntivre
mit einem grozen vivre,
daz heiz was vnd an rouch
von einem holtz, daz ouch
dürre was. des bran ez lieht.
artus versaumet sich des niht,
als er ditz vivr vant,
dar raht er ietweder hant,
e er dar chom, langest e,
wan im tet der vrost we.
daz ist ouch noch gemeinr sit,
so ein man in vrost gerit,
ob er ein fivr vunde,
daz er di hende wunde
vnd but si dar engegen,
wan er want da mit verlegen
seins vrostes etewaz
vnd wænet, daz si daz
mög starche stivren,
vnd mögens niht vertiuren,
swa si nahent fivren.
artus zoch sich dar nah.
jm was zem vivr also gah,
daz er di hende dar bot
vnd wande da mit sein not
an dem vrost vertriben.
ouch wolt er niht beliben,
vntz er dem vivr naher cham.
einen brant er dar abe nam
vnd rach her aus vil der chol,
stuont, saz vnd warmt sich wol.
ditz ersah div chvnigin
zeinem chleinen vester dar in
langest, e er sei ersach,
vnd sprach vil versmah,
als ein weip dike tuot,
div vil gaches ist gemuot
vnd ein teil widerbrvht:
< wer lert ivch dise hovezuht,
her chünich, daz ir iwern leip
so eisiert sam ein weip?
ez mak vil wol gelogen wesen,
daz ich vil ofte horte lesen
jn theorica ein phisicin,
daz daz heizzest weip solte sin
kelter dann der chüelest man.
daz scheinet hie vil übel an.
des getar ich vil wol iehen.
ezn wær von weibe niht geschehen,
des ir habt begvnnen.
solt ir vnder also dvnnen
kleidern oft ligen,
jv wurde der hitz gar verzigen,
also manik vrowe tuot.
vnd wær di gavdin gar ein gluot,
jch wæn, si e zergienge,
e iwer leip gevienge
da von volle hitze.
daz erzeigt wol ditze.
ditz vivr ich widersitze.
ouch seit ir zwar niht so heiz
sam ein ritter, den ich weiz,
des ich niht nennen wil.
er ist aber bechant vil.
wan in eys vnd der sne
niht mer entwelt dann der chle
deheinr seiner reise.
wan im des vrostes vreise
ze deheiner zeit nimer tuot
dann sumers hitz vnd bluomen bluot.
so ist sein leben gestalt:
ez sei warm oder kalt,
so er maist an leit,
er vüert dehein ander chleit,
nuor ein weizez hemed.
ander chleit ist im vremed.
vnd reit ein örs harmblanch.
er singet von minnen süezen sanch
alle näht durh di gavdin
durch den willen der amyen sin
flacher stimme vnd slehter cheln.
sein waffen mak sich niht verheln.
er vüert einen gar weizzen schilt.
sein hertz gar nah vroeden spilt,
als im der minne got gebot.
ein sper von zinober rot
vüert er mit weizzer banyer
an harnasch als ein riter vier
reitet er ane pine
den furt vür noirespine
vnd hebet vil schone
seinen sanch in reichem done.
jch lob, daz man im lone.>
hje mit div chüniginn gesweich.
artus sich nider geneich
vnd erchom von dem wort.
ouch gerow ez sei vil hart,
daz si sich so sere
wider ir selbes ere
do het übersprochen
vnd so gar zebrochen
weibes zvht vnd ir scham.
artvs im dise rede nam
ze vil grozem vnmuot.
ditz prüeft wibes guot,
wan sölh red ze nahen get,
dar an weibes liebe stet,
daz üebet leiht ein sorgen.
da weip niht wellent porgen
jr spruch durch ir hohen pris,
leit hevet sich mangen wis,
als es dem chünig nuo ergienc.
vnvroede sein hertz so bevienc,
daz im vreude da gesweich.
von ir er trourend weich
heimlich an ein stat,
dar sein gesellen bat
vnd tet in an der selben stvnt
begarwe dise red kvnt,
wie sein weip sein gespot hab
vnd vraget rates dar ab
besvnderlichen alle drei.
ze dirre red antwurt key,
des zvng vil selten wol gesprach
vnd des angel ie stach
mit bitterlicher var,
der oft vil vndar
zem besten chvnd sprechen.
des wolt er niht zebrechen
sein reht an der schalcheit.
er sprach nah alter gewonheit
also ze dirre sach:
< jchn weiz niht, waz ez mach,>
sprach er,< daz di vrowen
jn so verre getrowen,
daz si vor deheinem man
jr red wellent hæl han.
daz machent man allez an in.
da wider stet ein swach gewin.
swer weip lat ze verre vür,
der gwinnet sein vil chlein gevüer.
daz ist an meiner vrowen schein.
si scholt in ir chamer sein
vnd liez vns schaffen ünser dinch.
mit ir ist müelich gerinch.
si hat ir willen also vil,
daz si sprichet, swaz si wil.
daz ist ie doch ein swachez spil.>
ein man oft des vraget,
des in vil leiht betraget,
ob er ez horte sagen.
wan solte sölh red verdagen,
div niht üebet danne leit.
daz wær ein groziv weisheit
vnd zer werlt ein nvtzer list.
swem sein weip ze lieb ist,
der vrag lützel von ir,
wan im wahset dann zwir
leit, chvmber vnde chlag
von seinr vrag vnd ienes sag.
also geschach chünig artvs.
was im leid, im wart svs
leider, do er gehort, wie
key im dise red vervie.
doch tet er als ein weis man,
der sich selben getroesten chan
nach vil leidem mære.
swaz dem manne prüeuet swære,
des sol er selb trost nemen.
ez ensolt niht den besten zemen,
daz ein kvmber krench ir leip
sam ein hertzen senend weip.
wan daz ist des weibes e,
daz ir ir leit nahen ge.
da von ist siv getivret.
artus sich selben stivret
wider sein leit da mite.
er sprach:< daz ist ein alter site,
her key, an iv gewesen her.
ez möht iedoch etswer
entrumen iwerm schelten.
jwern sit wandelt ir selten.
wie lang welt ir ez treiben?
beidiv mannen vnd weiben
traget ir geleichen haz,
jrn wizzet selb, vmb waz.
wes mag man iv getrowen,
daz ir von iwer vrowen
ze meinr gehoerde die rede tuot?
jr scholt ir sweigen, wært ir fruot.
jr habt si so ser belogen.
jchn sei gar an ir betrogen,
si ist getriwe vnd wol gezogen.>
uil ofte dise red geschiht,
daz sich ein man verwænet niht
an red übersprechen da,
da erz tuot vnd gewinnet sa
vil starch grozen vndanch.
so wirt sein lon gar ze chranch,
vnd het verre baz geswigen.
maniger hat sein weip bezigen,
daz im vil leit wære,
ob iemen ander swære
wær wider sei gestanden
jm selben ze schanden.
div red betrivget mangen man.
der im niht borget dar an,
ob iemen velschet sein weip,
div im doch sam sein leip
jst vor üns verborgen,
der beginnet auf si borgen
valsch, ob er erfvnde,
mit welhem vrchvnde
sei div werlt hiet.
swen div red verriet,
daz er mit im schulde,
ob er des engulde,
als sin key nu engalt,
des het ienr doch gewalt.
key sein rat übel gedeich.
da von er schier sweich
vnd tet daz von schulden,
wan er von des chünges hulden
het eteswa gesprochen.
daz wart an im gerochen,
als ir selb hant vernomen.
nv was dirre rat chomen
an den chüenen gales.
er sprach:< herr, ich wæn des,
ez wær meiner vrowen spot.
doch west ich gern, ob ez got
wær oder troges bilde.
dehein mensch ist so wilde,
daz sich erzaig in solhen wis.
swen niht entwelt so starchz ys,
jst daz menische, daz suochet pris.>
< herre>, sprach aumagwin,
< ditz ist der rat min,
ob ez iv wol behaget
vnd seid ir preis gern beiaget,
daz wir zem fuort riten
vnd sein al da biten,
ob er chom alde niht.
swer in vnser da gesiht,
der ervar sein geverte.
nimmer wirt ez so herte,
er müez ünser einem sagen,
oder wir werden da erslagen.
wil aber vns got erneren,
wir mügen vns wol erweren,
jst er ein so bloz man,
sam ich von iv vernomen han.>
der rat dauht den chunic guot
vnd wande dar an seinen muot,
daz er di rede tæte.
er machet si aber stæte
vnd vraget si besvnder,
ob iemen wær dar vnder,
der di reise schauhte.
swes si dar vmb dauhte,
nv gehullen si dem rate.
vnd als ez wart iht spate,
do warn si gewaffent.
sein gesinde liez er slaffent,
vnd reit er mit disen drin
schier gahent da hin,
daz si da niht lenger biten.
do si auf dem wege riten,
artvs ze den sein gesellen sprach:
< ein dinch, daz oft geschach
vnd ouch wol geschehen mach,
daz üns wær gar ein slach,
des schül wir üns wol bewarn,
daz üns niht mög missevarn.
vnbesiht, daz wizzet ir wol,
div ist stætes endes hol.
da mit si mangen ierret,
dem daz dar an gewierret.
daz mercht wol, ir herren.
ein dinch möht üns gewerren,
ob wir ensamt lægen,
so daz wir nien phlægen
besvnder der wahte,
er möht üns benahte
hie mit verreiten alle.
ob iv div red gevalle,
so schül wir üns also legen,
daz ieglicher müez phlegen
seinr huot hie al ein.>
daz gelopten si gemein.
hoert, wie er die huot beschein.
do si gelopten den rat,
den artus gegeben hat,
er sprach:< key, ir reitet,
da ir des riters beitet
von algve zwo meil her dan.
kom er, so gedenchet dar an,
daz ir in vraget, wer er sei
vnd waz er suoch hie pei.
des schült ir niht vergezen.>
key sprach:< ich wil mich vermezzen,
daz eintweder müez gesigen
oder eintweder tot geligen,
ersih ich in, chümt er mir.>
< gales,> sprach er,< reitet ir
miten auf di straze!
avmagvin ich ab laze
bei dem vuort auf der sla
der huot aber da.
so rit ich zem alten wege,
da ich mich an die huot lege,
da eteswenn div straz was.
die hat verwahsen daz gras.
ein creutz si aber zeiget.
swa der riter aber hin geneiget,
da muoz er doch vür varn.
daz enmag er niht bewarn,
er vinde den, der in warn.>
do er geteilet die huote,
artvs der sinnen fruote
reit vnlang mit in.
sein straz reit er da hin,
da er den riter wolt versazen.
avmagvin muost ouch lazen
sein gesellen vil schiere.
da muosten sich di viere
tailn an di lage.
daz ditz key betrage,
daz mügt ir wol gelouben.
wan müez im erlauben
daz tzitern an der wahte,
wan elliv sein ahte
stuond nach hitz einen weis,
wan tiefer sne vnd dikes eys
tet im also groze not,
daz er wand wesen tot.
het er die rede gewest,
dor ze tintagvel auf der vest
saz bei dem breisiere
mit gemacher aisiere
vnd tranch da vil guoten wein,
er müest da haim beliben sein.
wie ser key begunde chlagen,
daz möht ich iv übel gesagen,
des nahtes sein marter.
ez gelebt niemen harter
ein naht, dann er tet.
er suoht ruowe von stet ze stet,
ein weil dort, ein weil hie,
vntz in div müede starche gevie,
do er vür vnd wider lief,
daz er in seinem schilt entslief,
vnd daz von müede geschach.
jn het diser vngemach
gemachet gar also chranch,
da er die naht mit ranch,
daz er sich niht moht enthaben.
bei der straz in einem graben
was er nider gesigen.
da vand in der riter ligen,
des er die naht het gebiten.
der chom auf in nv geriten.
er wart von im niht vermiten.
keyn vand er slaffen.
jch sag iv sein waffen.
des was alles nimer
wan schilt, swert vnd sper
vnd ein reichez schappel,
geworht von rotem vnd von gel.
dar an lak vil grozer vleiz.
ein hemed chlein vnd weiz
vuort er an ander cleider.
dirre was er beider,
roches vnd mantels, bar.
zwo hosen durchsniten gar
vuort er von rotem scharlach,
da man div bein durch sach,
dar vmb von golde reich sporn
mit stahel vnderworht vorn
durch scherpf an der spitze.
wær in des augstes hitze
sein reis alsölh gewesen,
möht er vor der chelten sein genesen,
daz müest gar an glüche sten,
er müeste frost vndergen.
ein schanzvn er lute sanc,
daz im div gaudin erchlanch
von vroeden vnd minnen.
nv wart sein key innen
vnd wand, ez wær von trovm.
er het in vil choum,
jch wæn, dennoch vernomen,
vntz er was vür in chomen,
vnd het in nach gar verriten,
wan daz örs began vnsiten,
da von key erwachte.
als er sich auf machte,
do ersah er den riter sa.
er machet sich auf die sla
vnd eilt im nah vil vaste.
er rief nach dem gaste:
< kera, riter, kere
durch riterlich ere!
war eilt ir so vast hin?
seht ir niht, daz ich bin
ein riter, der ivch wil?
jv ist der rede gar ze vil,
daz ir niht wider cheret.
der muot, der ivch daz leret,
der wirdet leicht gvneret.>
den wech er vast vür sich nam,
wan er der red niht vernam,
die im key nach tet.
nv wandelt key sein bet
jn ein schelten vnd in dro.
er sprach:< ir minnet nie so ho,
jch bring ivch wol her nider.
jr kert noch hivt wider,
so irz vil vngern tuot.
jr seit der sinne gar vnfruot,
daz ir nv niht bitet mein.
jr mügt wol ein törper sein,
daz ir vart ze dirre zeit.
jch wæn wol, daz ir seit
ein vil erchenter zag.
jr getrowet nimmer bei dem tag
sam ander riter riten,
wan so müest ir streiten,
ob iv iemen wider rite.
dirre zaglichen site
sült ir enphahen buoz
vnd, daz ir ivch meinem gruoz
heint so vor halet
vnd ivch so vür stalet
vnd mich slaffen liezt.
ob ir des geniezt,
daz laz ich mer vmb daz,
daz man mirz wendet baz
vnd grozer ere da mit beiage,
daz ich iu dar an vertrage
dann, ob ich ez an ivch ræche,
ob man mir niht spræche
dar vmb an mein ere.
jr enseit nie so here -
des seit wol gewarnet -,
jr het ez nv erarnet.
jr wand iuch han vertarnet.>
key was im so nahen chomen,
daz er mit al het vernomen,
swaz er im hinden nah geschalt.
der riter aber die rede galt
mit deheinem widerschelten.
er lie in niht engelten
sölher starch vnvuoge,
als doch genuoge
da wider heten getan.
wan dest ein vnbesprochen man,
der guot wider arch sprichet.
swer sich also richet,
daz er schelten wider schelten geit,
daz heizt man swachen weibes streit.
daz het der riter wol bedaht.
zem gelt er niht sere gaht.
daz chom von sinnen fruot,
wan mit bedahtem muot
er vil hövelichen sprach:
< herr, war ich also swach,
als ir mir selb habt geseit,
daz solt mir immer wesen leit,
son toht ich ze manne niht.
einem ritter dik daz geschiht,
daz er reiten muoz bei der naht,
des sach ouch iv ist verdaht,
der gern bei dem tage rite,
möht er also wol da mite
sein sach gar verenden.
daz enschült ir nimmer wenden
deheinem riter ze schande.
swaz ivch aber des erwande,
daz ir mich dirre missetat
so gar vngebüezet lat,
des wil ich iv gnad sagen.
jr het die red niht vertragen
nuor mir oder einem zagen.>
hoher muot wird leiht betrogen.
so der lewe leit gesmogen
durch vorhten vor den katzen,
da siht man michel chratzen,
grimmen vnd rowen.
sich setzet gen dem howen
vil manich vogel wilde.
ezn ist niht vmbilde
ob div meise des reigers gert,
die weil si niht ab chert
sein sterch vnd sein wer.
ein man slüeg wol ein her,
ob ez ane wer wære.
daz ich leiht bewære.
key div guot red betrouch -
daz mannes muot doh nie touch -,
die im dirre riter bot.
swer sich trivget an not,
wer scholt di swær chlagen,
di er muoz von dem schaden tragen?
sam nv an keyn geschach,
wan er sich starch übersprach.
daz chom von den dingen,
daz er in wande twingen
da mit, swes er wolde.
er sprach:< ich ensolde
niht so lang han gebiten.
do ich ivch erst het erriten,
her guot chneht, do sold ich
hier an han gefürdert mich
vnd solt ivch han gevangen.
seit ditz ist ergangen,
so sagt mir, des ich vrage,
vnd setzet auf di wage
niht iwern leip ze widerstreit,
jwern namen vnd, wer ir seit.
seid ivch gelüke hat ernert,
got hat daz leben iv beschert,
div gnad von im einen vert.>
waz wirret einer starchen aich
ein wind lind vnd weich,
ob er sei vnderwæt?
swa sich ein hagel blæt,
da er niht gewerren mach,
da vertreit man leiht sein slach.
sam stet ez vmb des mannes muot,
der michels me mit der rede tuot,
dann er mit den werchen tuo.
der red antwurt nuo
hern key dirre degen.
er sprach:< swaz mir hat gewegen,
des sol ich iv wizzen danch,
wan der preis wær al ze chranch,
den ir da mit het beiait.
wir heizzen daz niht manheit,
vnd wær ouch vngevüeg,
swer den man e slüeg,
e er im het widersagt.
dehein man ist so verzagt,
ob im halt misselvnge,
ern büt sein sichervnge,
die man dann von reht nimt,
als ez riters reht zimt.
oft prüevet sich ein vehten
zwischen zwein guoten chnehten,
die nah auentivr beid varnt,
vnd hant sich dar zuo gewarnt.
der muoz einr gesigen,
der ander sigelos geligen.
als ist ez her gestanden.
ze so riterlichen schanden
müezen sich die ergeben,
di dirre vuor went leben.
di kerent sich an dro niht.
wil iemen mit in schaffen iht,
daz muoz vil riterleich ergen.
so sich dann dise zwen
gesament ze velde,
so hat sie div melde
vil schier beid genamt,
des sich ietweder schamt,
wan so sint sei beid gezamt.>
oft nimt man nah wan,
daz man ez gern an
wurd, moht man dar nah.
swem ze dehein sachen wirt ze gah,
den mak ez geriwen.
wan ze des anegengs triwen
sol sich niemen verlazen,
ern müg e gemazen,
welh dar nah sein ende sei,
als hie bescheint her key.
disiv red wart im swære.
er sprach:< ir saget mir ein mære,
her riter, von der alten e.
swie ez vmb di red erge,
sagt mir, wie ir heizet,
ald, dest war, ir gereizet
jv selben solhen chvmber,
daz nie man so tumber
jn die werlt wart geborn,
ern het die sinne gar verlorn,
er chvnd in vil wol verbern.
welt ir mich niht gewern,
jch erbites ivch so wol,
daz sein iwer hemede sol,
jch wæn, wol enphinden.
ja sült ir mit kinden
von solhen dingen sprechen,
wan slahen vnde stechen,
daz ist iwer gewisser tot.>
er sprach:< ir trieget ane not
jvch selben hie mit.
welt ir noch nah riters sit
meinen namen ervarn,
so schült irz niht lenger sparn.
anders wirt er iv verswigen.
möht ir mir ze ors angesigen,
e ich mich slahen liez,
jch seit iv, wie ich hiez
vnd swes ir mich vraget.>
keyn der red betraget
vnd sprach:< ob ich mach,
e üns noch hivt chom der tak,
jch bring ez dar an,
wil ich iwer genade han,
daz ich iv leben gvnne,
juch vnd iwer kvnne,
swaz ir des bechennet,
daz ir mir daz nennet.
jwer muot hat ivch verbrennet.>
da wider sprach der riter do:
< solt iemen sterben von dro,
jch hiet niht so lang gelebt.
sölh red, als ir mir gebt,
die han ich selten e vernomen.
seit ir durch ruom her chomen,
so seit ir an mir betrogen.
jr habt heint so vil gelogen,
daz ich ez niht mer mak verdoln.
da mit habt ir mir verstoln
die naht mit iwern wæhen speln.
waz solt ich mich dar an heln?
jr seit vil chleinr ern wert.
div zvng baz sneidet dann daz swert
an iv, daz han ich wol gesehen.
jr mügt von iv selben iehen,
swaz ir welt, so geloub ich
so vil, als sein zimt mich.
nv seit ouch des von mir gewis,
daz ich sein wol vor iu genis,
als ir wænet, daz ir tuot.
han ich ez niht also guot,
so müez mein glük gephlegen
vnd gesegen mich vor iwern slegen,
die den gewissen tot bringent
vnd den man also betwingent.>
key zvrnt die rede sere
vnd sprach:< nv ist mein ere
gar auz der aht geswachet.
daz han ich selb gemachet,
daz ich ivch so lang han gespart.
do mir sein erste stat wart,
jch scholt iv han erzeiget,
wie mein sper vnderneiget,
die im wider wellent wesen.
jr mügt ouch niht mer genesen.
habt auz! iv sei widerseit!>
der riter was der red bereit
vnd hielt auf der heide.
schier chomen si beide
zesamen mit ellen.
ze vahen vnd ze vellen
stuont ietweders danch.
si namen eins wurfes lanch
mit vollen di tyoste,
diu keyn tivr choste,
wan im ze vallen geschach.
der riter in da nider stach,
daz er viel auf daz gras
als lanch, als er was,
vnd vil chavm genas.
sein örs er dannen vuort
ze seinr gegenwuort
vnd lie in in der wende ligen.
jvch schol ouch niht sein verswigen,
wie gales geschah,
e er den riter sah.
jch wil ez iv gar sagen:
er begund di naht alle chlagen,
daz er so lang wær.
ez was im vil swær,
daz er niht chomen wolde,
ob er chomen solde,
ald daz ez schier teite,
wan er vngerne beite
vnd in vil sere muote,
daz er an der huote
muost ligen also lange
jn des frostes betwange.
dar vnder entslief er svnder dank.
div müed in dar zuo betwank,
vnd was doch vnder beiden
von ietwederm gescheiden,
er enslief noh enwachet.
div chelt im daz machet,
div in het gar ervroert.
nv dauht in, wie er hoert
den riter singen.
do wolt er auf springen
vnd wolt gen im reiten
- er wolt sein niht enbeiten -
auf ein rede an der stat,
wan er des gedaht hat,
daz er im mit minnen
daz wolt an gewinnen,
daz er im vil berait
allez sein geverte seit
ald swes er in wolt vragen. ern wolt ez niht wagen,
also key da vor tet,
vntz er besah, wie sein bet
ein ende næme.
swes in dannoch gezæme,
des wolt er im stat tuon,
wolt er streiten oder suon,
swaz er gerner tæte,
als er dann in gebæte.
sein muot bot im di ræte.
als er dirre red gedaht,
der riter starch vür in gaht.
do er daz übersach,
dar an im leide geschach,
vnd begvnd im nah gahen.
schier chom er im so nahen,
daz ern erreit auf der vart
vnd da mit im redent wart.
sein gruoz, der was lobesam.
den der riter hövelichen nam
vnd galten im vil schone.
daz sint zwei gleichiv lone,
swa guot dem guoten widervert.
des doch manger wirt behert,
dem wider guot gevellet arch.
gales was der rede karch
vnd warp nah gevüere;
daz im nv widervüere
guot wider guot, des gert er,
seit guot guotes ist gewer.
er sprach, als ein riter sol,
der riterlichen vnd wol
zallen dingen sprechen chan,
vnd sam ein wol gehoft man:
< rek edel vnd tivre,
jch gesach der aventivre
nie in deheiner weis
geleichen wert vnd gleichen preis,
den ich sih an iwerm leibe.
vnd ist ez von weibe
oder von anderre schulde,
des het ir die hulde
verdienet mit einr naht,
daz ir so bar vnd vnbedaht
jn dirre grozen chalten vart
an chleider so vnbewart.
vmb swen ir dise reise tuot,
er lont sein iv, ist er guot.
seit mir got des gunde,
daz ich nv iwer chunde
heint hie gevahen solde,
ob ez nv got wolde,
daz ir mir baz wært bechant,
so wær mein reis wol bewant.
möht ez nv iemmer gesein,
daz ich iwers leibes schein
bei dem namen müest erchennen,
swa ich ivch hort nennen,
daz ich iv urchunde
gab mit warem mvnde,
ob iv iemen lobes erbunde!>
< genad, riter>, sprach er,
< jch bin so niht chomen her,
daz ich iemen mein namen sag.
daz ich in verholn trag,
daz entuon ich durch übel niht,
wan swie mich der man siht,
also muoz er mich han.
jch sag wol, ich bin ein man,
der auentivr suochet
vnd des niht enruochet,
wederz warm sei oder chalt.
mir ist der snegreise walt
ze reise also mære,
sam ez heiziv svnne wære.
nimmer chan ich iv gesagen,
vnd daz ich in meinen tagen
destwar in nie gesæhe,
dem ich so vil veriæhe,
als ich iv han veriehen.>
gales sprach:< möht daz geschehen,
daz ir mich wizzen liezt
jwer lant vnd wie ir hiezt,
des wolt ich ivch gerne biten,
wan ich dar vmbe han gebiten
jwer dise lange naht,
daz ich mit dirre chelten vaht,
vnd ist mir hie geschehen we.
dor, riter, mir chomt e,
daz ich iv des niht seit,
daz chom von deheiner zaghait,
nuor daz ich wolde
juch dar vmb haben holde,
untz ir mir seit div mære,
wie iwer lant wære
vnd ir selb genamt.
seit ir ivch der vrage schamt,
so wil ich daz gelouben,
daz ir vart durch rouben.
des enwelt ir ivch niht nennen.
jch muoz ivch doch erchennen,
wan des ist dehein rat,
ob ir mich vngewert lat
sölcher bet, als ich bite,
daz ich e mit iv strite,
e ich di vrag vermite.>
er sprach:< streites vindet ir stat.
wizzet ir, daz glüches rat
jst vertig vnd sinewel.
ez wirt mir leiht also snel
zem besten alsam iv.
dest war, riter, vmb div
sült ir mich niht vermainen.
jr müezt wider mich einen
sam ich wider ivch vehten.
ezn zimt niht guoten chnehten,
daz si so vil gedröwen,
wan daz beginnet vröwen
jenen vast vnd sterchen:
wan sol den zagen merchen
bei seinr hohen antwurt.
swelh weidman daz wilt spurt
niht ze reht pei dem spor,
dem get ez vil lange vor,
e ez werd gevangen.
mich muoz wol belangen
jwer also starcher dro,
wan si ist gar ze ho,
vnd tuot ir lützel dar nach.
jv ist ze vehten niht so gah,
so iv ze der red ist.
vnd næm ich so mein genist,
als ir mich habt gezigen,
ez wurd ouch iv niht verswigen,
jr warent sein worden innen,
e ir nv von hinnen
von mir gescheiden wæret.
jch het ez iv so bewæret,
daz irz sagen chvndet,
swem irs ze hoern gvndet.
arch niht wan arch schvndet.>
da wider sprach gales:
< friunt mein, ich wæn des,
jr seit ein teil vnfruot.
destwar, ir enhabt ez niht ze guot,
vnd ist daz gar svnder not,
daz ir mir so starch drot.
jr habt niht an dem leibe,
daz entoht einem weibe.
so bin ich gewaffent wol,
vnd wolt ir al sölhen zol
von mir auf der straze nemen,
daz möht iv starch missezemen,
des sült ir gewisse sein.
ouch muoz sein wol werden schein.
jrn welt mir iwern namen sagen,
jch mak sein nimer vertragen,
wan ez nahet dem tage.
jch pin gewesen wol ein zage,
daz ich di red vertragen han
von einem so blozen man.
nv mach sein niht mer gewesen.
sagt mir, welt ir genesen,
des ich han gevraget,
oder wizzet, daz ir waget
vmb süst gar ze sere
jwern leip vnd iwer ere.
daz möht ir leiht vndersten:
hie enist niemen dann wir zwen,
die ez horten oder sæhen.
wes wir ein ander veriæhen,
des enmeldet vns hie niemen.>
er sprach:< sold ich iemen
mein namen lazen wizzen,
jr habt ivch so gevlizen,
daz ir in ervundet,
daz ich in iv chvndet.
des enmak aber nv niht geschehen.>
gales sprach:< ir müezt sein iehen,
oder eintweder wirt verlorn.>
div örs namen si mit den sporn
vnd vazten di schilte.
auzem boschen anz gevilde
jr ietweder kerte,
als ir chvnst si lerte,
einr hin, der ander her.
vnder üechsen namen si diu sper
vnd ranten si zesamen.
nv wizzet, daz benamen
gales so neitlichen stach,
daz sein sper so gar zerbrach,
da man sein allrmeist vant,
daz was ein spann vor der hant.
dirre riter tet im alsam:
mit sölhem neid er in nam,
daz er in von dem örs warf.
der riter des vil wol bedarf,
daz in ein ander da bei
vrag noh aber, wer er sei:
hie leit gales vnd key.
div örss er zesamen bant
vnd nam si beidiv an die hant
vnd reit sein straze.
da lag auf der saze
avmagvin der rote.
der vrost in ser note
ze noirespine, da er lak.
er bat, daz got seinen slach
über in vil schier slüege,
der dise reis an trüege,
vnd bat, daz in der gavdin
div chüniginn müeste sin
bei im, daz si ervunde,
wie bar riter chvnde
jn seinem hemed genesen;
sölt er dehein weil wesen
jn so chaltem winde,
der im also swinde
vil gar wære an der stat
jn wambeis vnd in sarwat,
er wurde des leibes ane.
nv schein vil schon der mane
über velt lieht weiten.
nv sah er zuo reiten
disen riter an den furt
vnd sah, daz er fuort
zwei örss, vnd enstuont sich des,
si waren keyn vnd gales.
daz beswart in ein tail,
doch liez erz an ein heil
vnd reit im engegen.
er gruozt den degen,
so er beste chvnde.
von red vnd von gvnde
dient er im aufem wege
mit so ritterleicher phlege,
daz in vil chlein betraget,
vntz daz er in vraget
vnd bat, daz er sich nande
vnd von welhem lande
er wær geborn.
ditz was bei dem swartzen dorn.
div rede was dem gast zorn.
hie muost er ze streite gen.
mit zorn ranten dise zwen
zesamen an der stat.
jr ietweder ser lat
sein örs von sporn louffen.
da muost ir einr chouffen,
daz er doch vngerne truoch.
avmagvin den riter sluoch
auf di bukkel an dem schilde
- des slages was er milde -,
daz sein sper gar zebrach.
der riter in dar wider stach,
daz er in den brunnen viel,
der vor im auzem berge wiel.
da von er ubel zeit gewan.
der riter vuort sein örs dan
vnd huob aber sein sanc.
daz avmagvin niht ertranc,
jch wæn, daz gehalf im des,
daz key vnd gales
zehant da vür giengen.
di bechanten in vnd viengen
vnd zvgen in auz dem wazer.
do was er so nazer
nah tot nah dem vrost,
wan daz er glost
ser von der arebeit,
die er von dem degen leit.
anders wær er verdorben.
wie der riter het geworben,
dest war, mit in allen drin,
daz seiten si vnder in
ein ander auf der reise,
jegleicher sein vreise.
wie artvse da ergienc
vnd wie er den riter enphienc,
daz enwirt niht verswigen.
da in vand der riter ligen,
da er seinr huote phlak,
den ouch der arebeit bewak,
daz er da also lange lak.
artvs an der huote
lach mit hohem muote,
wan daz in ser verdroz
vmb den vrost, der was groz,
vnd daz er so lang was,
wan er vil chaum genas
vor der kelten vnd dem sne.
der vrort in vnd tet im we,
dar zuo der harnasch vnd daz eys.
ze losen stuond manigen weys
hin vnd her sein ore.
er sprach:< ich was ein tore,
daz ich durch dehein weip
so verderb meinen leip,
nuor daz man seit,
daz der man von seinr arebeit
groz werdecheit gewinne.
ouch stet der weip sinne
also ze allen zeiten:
si chvnnen niht enbeiten,
swes in ze muot wirdet.
swaz deheiniv vnwirdet,
daz hat si schier berait,
daz sis dehein hæle treit.
ditz übervrävel leben
hat in nature gegeben,
vnd hant herlichz reht.
ez sei chrvmp oder sleht,
des went si han gewalt
ze ernst vnd ze tagalt,
des sint ir schimpf reich.
si tuont wol dem geleich,
als ouch ist, sam an in
ste allr vroeden gewin.
des sol man ir rede vertragen.
wolt ez nv schier tagen,
jch wolt heim cheren,
wan si nie zvneren
mir dise red gesprach.
jch weiz wol, daz geschach
jn schimpf vnd tagalt
mit lauterr einvalt.
waz vmb daz, ob si mich steut?
doch weiz ich wol, daz si sich vreut
mein, so si mich an siht,
vnd daz an valsch geschiht.
wan wær da iht wares an,
so weiz ich wol, daz alzan
der riter chomen wære.
ez ist nuor ein mære,
daz si eteswa hat vernomen,
vnd was ir daz ze mvnd chomen,
do si e sprach wider mich.
vil mangiv weip vleizent sich,
daz si vrivnden freude deken.
wer sol daz erreken,
waz si da mit meinent,
wan daz si bescheinent
hertzlieb, da han ich ez vür.
swer di rede ze leide chür,
sein vreud er dar an verlür.>
do artus dise red gesprach,
er plicht auf und sach
über die montanye.
nv seht, wa auf der planie
der riter chom her geriten,
des der chünich het gebiten,
vnd vuort div örs an der hant.
der chunich diu örs wol bechant,
vnd begund in daz beswæren,
wa die riter wæren,
die er dar auf sande.
daz was im starch ande,
vnd wart im da von leide.
er kert auf di heide,
da der riter her reit
als ein rek vnverzeit,
vnd gruozt in mit guote.
jn dem selben muote
vand er den widergelt,
vnd chert von im auf daz velt
vnd wolt da mit von im sein.
artus sprach:< vrivnt mein,
wa welt ir hin? chert her
vnd sagt mir ein lützel mer!
waz hat die riter entwalt,
den ir disiv örss stalt?
lebent si oder sint si tot?>
er sprach:< ir zeichet an not
mich divplicher dinge,
wan ich daz wol bringe,
daz ir starch hant gelogen.
juch hat ein vilan gezogen,
der ivch dise red lert,
daz ir an die riter kert
dieb vnd nachtroub.
jr sült des han vrloub,
daz ir mich da mit vahet,
seid ir mir des iahet,
daz ich des landes wære
ein nachtroubære,
vnd bringet mich iwerm artvs,
der hie ze lande hat hvs,
daz er über mich rihte.
so seit ir dirre geschihte
getivret immer mere
vnd mügt grozer ere
nimmer vürbaz beiagen,
daz wil ich iv vür war sagen,
ob ez iv wirt vertragen.>
ir habt mir wol erloubet.
< habt ir seu niht geroubet,
so trivget mich mein wan>,
sprach artvs,< den ich han,
vnd chan niht erwinden,
daz ich ivch müg enbinden
mit iht von der schulde.
er müest sein ein wulde,
swem ir so bar bechamet
vnd ims mit tioste namet.
ob er wær gewaffent,
dem müest ir si slaffent
nemen, dest war, oder steln,
jr mögt dar an niht verheln,
wan ir vart im geleiche.
oder seit ir so reiche,
daz ir zuo iwers satels phleg
fier örss vüert alle weg?
oder seit ir iender gesant
ze botschaft in dehein lant,
daz ir müezet eilen
vnd ir ie vnderweilen
jr einz wol ruowen lat,
vntz daz ander sich vermüedet hat?
daz ist ein guot behendecheit.>
der riter sprach:< daz ir seit,
habt ir iv des erdaht,
oder hat ivch iemen ane braht
so tumplich vrage?
laz ich ez an di wage,
ja vnderweis ich ivch des,
her riter, wie vnd wes
jr riter sült vragen.
ez ist des mannes magen
ein wahsend hertzesere,
geschiht in div vnere,
daz ir mag vnd kint
jn so widerbruhtig sint,
daz si ir zvht vliehent
vnd si vil dik ziehent
die vrömden wol vngewar.
div red ist hie an iv gar,
her guot chneht, geschehen.
het ir ie riter gesehen,
jr chvndet si baz handeln.
jr sült den gruoz wandeln,
swa ir dehein riter geseht.
so tuot ir iv selben reht,
wan ez ist vngevuoge,
vnd sint der genuoge,
di ivch dar vmb slüegen
vnd ez iv niht vertrüegen,
als ich ez vertragen han.
disiv örss ich gewan
mit tiost als ein vrvm man.>
da wider seit artvs:
< her riter, gewunnet irs svs,
so sint si wol gewunnen.
jr sült mir des gvnnen,
daz ich sül des selben iehen.
lat mich iwer waffen sehen
vnd waffent ivch hie dar in,
reht als ich gewaffent bin,
vnd tiostiert wider mich.>
der riter seit:< daz lop ich.
jch gewer ivch tiostivre.
mir ist aber tivre
harnasch vnd sarwat,
vnd han sein vil guoten rat,
nuor als ir selbe seht.>
artus sprach:< her guot chneht,
dest war, so ist ze hert
jn dem winder iwer gevert
vnd iwer scherm ze clein,
so ir müezt al ein
ein gewaffenten riter bestan.
von dem mögt ir vndergan,
welt ir ivch also wagen.
des ich welle vragen,
riter, daz sult ir mir sagen,
da mit mügt ir wol beiagen
vil groz vreuntschaft ze mir:
wer ir seit vnd wie ir
heizet vnd iwer lant,
wan daz ist also gewant,
daz ich ez muoz wizzen.
nv seit ir so gewizzen,
daz ir mir di red sagt,
wan ez nv vil nahen tagt,
des muoz ich reiten hinnen.
vnd lat mir mit minnen
div örss wider elliv driv,
div ir vüert mit iv,
daz ich si in wider gebe.>
der riter sprach:< di weil ich lebe,
so ist mein nam vngeseit,
mir gescheh noh al sölhez leit,
da von ich mit al verzag.
div örss ich iv niht versag,
dar vmb daz ir riter seit
vnd daz man ez von rehte geit,
daz man also gewinnet,
der ez an den andern sinnet
vrivntlich vnd ze gibe.
e ichz also lange tribe,
jchn ruoht, wa ir deheinz belibe.>
also disiv red ergienc,
artus in bei dem zoum vienc
vnd baten sagen seinen namen.
< jr möht ivch der rede schamen>,
sprach der riter,< di ir tuot.
div enist iv ze niht guot,
des solt ivch ser verdriezen.
jch heiz, als mich hiezen
mein vreunt vnd mein mage.
jr gewinnet an der vrage
niht anders, daz wizzet,
swie starch ir ivch vlizet,
daz geloubt mir, mit leihter sage.
daz ich die rede vertrage,
daz tuon ich durch mein zvht.
so seit ir so widerbrvht,
daz ir ivch des hie verseht,
als ir dar vmb selber ieht,
daz ich ez iv sagen muoz.
...
...
jch entweich iv nimer ein vuoz,
swes ir welt beginnen
ze minnen oder zvnminnen.
des sült ir gewis sein,
vnd wirt des vil schier schein.
welt ir ivch niht mazzen
der vrag, iv wirt verlazzen,
daz ivch her nah beswæret
vnd sein gern ab wæret.
waz touch iv so swachiv dro?
gedrowen vil vnd reden ho,
daz zimt nuor weiben.
guot riter, lat beliben
so weiplichz bagen!
jr müezt ivch baz wagen,
welt ir iht mer vragen.>
hie enwort niht mere gereit.
jetweder was da bereit,
vnd vazten beid div sper,
einr hin, der ander her,
vnd hielten hinder sich,
daz ietweder seinen stich
dest baz möht gegeben.
zwei sper groz vnd eben
si vnder üehsen sluogen.
div örss mit willen truogen
zesam dise rechken.
da muost div chvnst dechen
jr ietwedern starch wol,
ob er sich behüeten sol,
daz er iht werde geseret,
seit da ietweder cheret
dem andern ze vare.
nv wizzet daz zware,
do si zesamen warn chomen,
daz ein tiost da wart genomen,
div wol zwein rittern zam,
wan ietweders schilt nam
sölh stich von den spern,
daz si niht mohten gewern,
do si auf ein ander drvngen.
so chlein si zesprungen,
daz si in swachen schielen
nider auf den samen vielen
von ietweders druchen.
wan möht auzen stuchen,
swi vleizech man sein wær gewesen,
niht einr hantlanc han gelesen
drümer oder spæn.
als ich mich wol verwæn,
so waren si zerstoben
vnd die schilt zerchloben
beidiv vnden vnd oben.
si chomen ouch so nahen
von ietweders gahen,
da dirre auf disen dranch,
daz daz vivr von dem helm spranch.
so ser si sich stachen,
daz si die sätel brachen
vnd ietweder gar zevuort
verbüeg vnd übergurt
vnd beid doch gesazen.
der swert si niht vergazen,
div wurden degenlichen gezogen.
artvs wart da niht betrogen,
dem sluog der riter einen slak,
daz div barbier gelak
des helmes in dem schilde.
vnd het im christ der milde
niht geholfen von der not,
er wær nämlichen tot,
wan er im ze nahen gienc;
vnd daz ern vndervienc
mit seinem swert ze stet,
als in im der riter tet,
daz half im ouch, daz er genas.
wan der riter bar was,
den slach er im vertruoch
vnd in da wider niht ensluoch,
wan ez dvht in ein schande,
vnd bat in, daz er sich nande,
so liez er in genesen
vnd wolt ditzes sein vrivnt sein gewesen.
da wider sprach der ritter do:
< jr bietet vmb svs di dro
mir dise lange naht.
het ich drauf dehein aht,
so daz ich sei ervorht,
so het ir geworht
vil groz wunder an mir.
jch sag iv wol, vnd welt ir
meinen namen ervarn,
jr müezt mir e erbarn,
wannen ir vart vnd wer ir seit,
oder ir müezt den streit
von allrerst niwen.
jch sag iv entriwen,
ez mag ouch ivch geriwen.>
artus sprach:< her guot chneht,
destwar, ir tuot vnreht,
daz ir des streites niht enbert.
wes triwet ir, ob mein swert
jwer gelestez hemed sneide?>
daz swert vuort er mit neide
vnd sluog in über schildes rant,
daz er den schilt chlovp auf di hant
vnd im anders dehein schad was.
daz er des slages genas,
daz muost chomen von got,
wan er im gar ane spot
den slach het geslagen.
ouch enwolt er ez im niht vertragen,
er sluog in dar wider,
daz vntz auf den fuoz nider
er im den schilt gar zerchloup.
artus wart des slages toup
vnd galt im in dar vnder,
dest war, doch enchvnder
des riters niht gewinnen
mit deheinen seinen sinnen,
di weil in der schilt wert.
des ir ietweder gert,
des het er mer danne vil.
ditz vnwendic neitspil
jetweder so lang treip,
vntz im der schilt niht beleip
so breit sam ein vuoz.
da von der bloz riter muoz
da ligen auf der wage.
artvs seiner vrage
doch enheinen weis vergaz.
der riter sprach:< wes tuot ir daz?
jch ensagez iv noh deheinem man
wan einem, den ich enchan
nv lang niendert vinden,
dem wolt ich ez enbinden,
dar zuo ander rede mer.>
artus sprach:< wer ist der?>
er sprach:< daz ist artvs.
jchn weiz aber niender sein hvs,
wan also ist er genant
vnd ist herre über ditz lant.
anders ist er mir niht bechant.>
swer daz ervindet, des er gert,
den hat fortuna wol gewert,
als si dise reken beid getet,
wan daz was ir beider bet,
daz si einander vunden.
nv muosten si ein ander kvnden,
als ir beider wille stuont,
daz si vil willechlichen tuont.
er sprach:< diu red sol wesen sleht.
jst ez war, als ir ieht,
daz ir artvsen suochet,
so ivch beruochet
vrowe sælde dar an.
jch bin ez selbe der man,
den ir hant gesuochet hie.
artvs hiez man mich ie
vnd ditz landes herren.
nv enchan iv niht gewerren,
daz ir ivch mir nennet,
wan ir mich bechennet
vnd han mich e iv genant,
beidiv namen vnd lant,
so ist daz vil gevüege,
ob ichs nimmer gewüege,
daz ir mir iwern namen seit.>
er sprach:< west ich di warheit,
daz ez also wære,
wie vngern ich es verbære,
jch seit iv, swes ir bætet.
ez enwerd aber mir bestætet
e so sicherleich,
daz ich mich niht besweich
selb an disen dingen,
so kan ichn niht geringen,
jr wellet michs innen bringen.>
div red saumet vns beide.
< als ich iv bescheide>,
sprach artus,< so lat ez sein.
hand ir dehein zeichen mein,
da ir mich bechennet bei,
ob ich ez artvs der rehte sei,
daz mvgt ir an mir schowen,
jch wil des wol getrowen.
jst iv e niht gelogen,
jr wert ouch hie niht betrogen,
des ich mich vil wol versich.
jr vindet hie, des ich iv gih.>
er sprach:< wær ez bei dem tag!
jch han da von gehort sag,
daz artus an der tynne hab
ein wunden bei dem chopf her ab
vil chaum einen vinger.
mein zweivel wurde ringer,
ob ich die ergriffe,
wan er mir entsliffe,
daz wizzet ir vür war.>
artvs bot daz houbet dar
vnd bat den helm enbinden,
ob er möhte vinden
an im ditze zeichen
vnd so möht erweichen
sein muot mit der warheit.
dar nah ir ietweder streit,
daz muoste sich nv enden.
sein vinger begund er wenden
vil reht nah der wunden.
als er die het vunden,
ern moht ez niht mer verdagen,
er sprach:< ich wil iv gern sagen,
kvnig artvs, wer ich bin,
wan mir solher vreuden gewin
erwahsen ist an dirre vrist,
div übel iemen ze sagen ist.
ditz hat geprüevet sælden loz.
gasoein de dragoz
heizent mich di leut.
nv ist ez mir chomen heut,
des ich mich ie vreut.
seit ich iwer bet gevolget habe,
so sol mich niht leiten abe,
jr tuot mir alsam
riterlich vnd an scham.
daz zimt iv wol vnd ist guot.
jch wil, daz ir mir rehte tuot,
dez ich hin ziv ze sprechen han.
mich entrieg dann mein wan,
so getriwe ich iv des selben wol.
daz sag ich iv, ob ich sol
mit iwerm vrloup sagen,
wan ich mag ez niht chlagen
deheinem man, nuor iv,
kunic artus, vmb div
muoz an iv mein trost ligen.>
< des sült ir niht sein verzigen.
jr vindet minne vnd reht,
swes ir her ze mir ieht,
vnd tuon daz mit willen.
seit ich mak gestillen
jwer chlag, di ir traget,
so seit dar an vnverzaget,
jr sagt mir mit alle,
swaz dar an gevalle.>
der red neig er artvse
vnd sprach:< in iwerm hvse
habt ir mein gevangen. vnt sint nv ergangen
mer dann süben iar,
daz si erst chom dar,
vnd geschah daz allrmeist
von iwer eins volleist.
di habt ir svnder mein danch,
vnd vnpreiset ivch der chranch,
wan sein ist gar ze lanch.>
< herr riter>, sprach er,< sagt mir,
waz gevangen meinet ir,
die ich iv hab genomen?
ez sei dann also chomen,
daz ez mir verholn sei,
so bin ich der rede vrei
vnd vnschuldich dar an.
jr mügt wol verhandelt han,
wan ein dar an, daz ich
niemen weiz wan mich,
den man artvsen nenne,
den ich iender bechenne.
des mag ich wol der selb sein.
vnder allem dem gesind mein
enweiz ich riter noch chneht,
dem man geb gevangens reht,
ezn sei seit gestern geschehen,
e enhan ich sein niht gesehen,
daz ich reht müg wizzen.>
< mir ist aber gewizzen,
her chunic>, sprach gasoein,
< daz ir si habt, di ich mein
vnd der ich bin beroubet,
swie ir sein niht geloubet:
daz ist gynever, div chünigin,
der reht amys ich immer bin,
div mir wart bescheiden
von den nahtweiden,
do si erst wart geborn.
div red wart ouch niht verlorn,
wan ez schuof cupido
seit, daz ez geschah also,
als ez ir erteilet wart.
jrn sült dehein hohvart
an meinr rede merchen,
wan ich wil si sterchen
mit sölhem vrchvnde,
da mit ein kint ervunde
an chranch di warheit, als ich di red han geseit, vunt lat ez iv niht wesen leit.
möht daz immer ergen,
daz ir si bræhtet, da wir zwen
bei ein ander wæren,
jch wolt ez iv bewæren
mit ir selben da ze stet.
ditz tuot aber durch mein bet
vnd bringet ir disen riemen -
den bechennet da niemen
wan si vnd gawein vnd ich -,
vnd bittet si, daz si mich
durch mein lieb gespreche vruo
vnd daz an dirre stat tuo.
als si den gürtel ersicht,
so weiz ich wol, daz ir niht
missevellet dar an.
gawein ir den gürtel gewan,
vnd gab si in mir,
do ich nv næhst schiet von ir.
der gürtel hat so groz chraft,
swer in treit, der ist so werhaft,
daz in niemen chan gewinnen.
dar zvo muoz in minnen
beidiv man vnd weip.
sein tugend beidiv vnd leip
wirt da von gerichet.
fortuna den beswichet,
dast war, niemer, der in hat.
jm volget allr sælden rat
vnd allr werlde sache.
er slaff oder wache,
so besorget in daz heil,
daz der sælden gvndes teil
einem man nie mer geviel.
ein reichiv fey, garanphiel,
vnd ir swester worhten in
also nah dirre sælden gewin
jr freund fimbeus von schardin.>
do artvs dise red vernam,
ein vngemüet sein hertze nam
vnd ein chvnber berend last,
da von im sein hertze brast
vnd wuochs vil michel riwe.
seins weibes vntriwe
vür war bar im ditz leit,
dar nah vnd der ritter seit.
also vil manigem geschiht,
der von liebem weib iht
ze missewende vernimt,
daz im daz missezimt
vnd sein hertze trüebet
vnd im dar an üebet
leides groz überchraft.
ez enwart nie gar swarer haft
dem man an seinem leibe,
dann den von liebem weibe
ein werd man tragen muoz.
vil süez ist der weibe gruoz,
ob man ir mit triwen phligt.
an swem aber chvmber gesigt,
den man von lieb weibe hat,
da ist leides also starch rat,
daz sich ir liebe dar an
nimmer wol geleichen chan.
des selben muozen si veriehen,
den ietwederz ist geschehen.
artvs tet dem vngelich:
swie div red wær chvmberlich,
dar an was er weise
vnd wolt mit vnpreise
dehein rede gelten,
noch schelten wider schelten,
wan daz er mit zühten sprach:
< ez solt mir sein vngemach,
dest war, her guot chneht,
daz ir so gar an reht,
nuor wan durch iwern übermuot
dise rede von meinem weibe tuot
vmb süst an schulde gar.
jch weiz wol vür war,
seit ich ir ie gewan chünde,
daz ir laster vnd sünde
dehein man verweizzen mak
- sein si komen an disen tak -,
daz si an allen übeln list
aller manne ledig ist
wan mein vntz an dise vrist.>
< her chünig>, sprach gasoein,
< dise red ich niendert mein
meiner vrowen zvneren.
jch wolt ir e meren
jr preis vnd ir werdecheit,
e ich sei immer angeseit,
des ir laster wære.
ez ist ir erbære,
daz ich von ir geseit han,
wan ich ze reht pin ir man.
so seit ir vnreht mit ir,
wan ir minne gab si mir
jn der ersten stunde,
do si reden begunde.
des het si lang willen vor.
do volendet ez amor;
daz was sunder triegen.
vntz her von der wiegen,
so phlag ich ir immer seit
jn meiner gewer svnder streit,
vntz ir mirs habt genomen.
nv bin ich ab nahen chomen.
daz sol ivch niht beswæren.
jch wil daz bewæren,
daz si des selben sinnet
vnd mich mer minnet,
dann si ivch immer tuo
ennenher vnde nuo,
wan daz ist vil billich.
si sæh ein iar gerner mich,
dann si ivch tuo einen tak.
ez ist ein schedlicher slak
an einem man, der so lebt,
ob er sein hertze so begrebt
vnd versigelt in ein weip,
daz er doch vnd sein leip
jst, als er wesen muoz.
ob si im einen valschen gruoz
bivtet eteswenne,
so wænet er leider denne,
daz er ir vmb daz hertze sei.
da wirt der arm mit dem plei
von der minne sune geschozzen.
doch ist im vor beslozen
von weibe getriwer widergelt.
svst sleht man auf der minne velt
vil manik misselich gezelt.
seit ir des niht geloubet,
daz ir mich hant beroubet
meins hertzen ameyen,
so wil ich an ir vreyen
meins rehtes also vil,
daz ich an ivch gern wil
einr bet, div gevuog hat,
da schad noch missetat
nimmer an mak gesein:
jch wil, daz ir die vrowen mein
noch hivt her bringet,
vnd swem hie gelinget,
daz er die chüniginne
mit ritters tat gewinne,
da mit sei gescheiden,
welt ir, vnder vns beiden
dirre misselicher streit.
vnd wizzet, daz ir gewisse seit,
ob mir geschihet daz heil,
daz si mir wirt ze teil
vnd si mir an behab,
dannoch tuon ich mich ab,
swaz ich an ir rehtes han:
vindet ir deheinen man,
der sich da mit tivre,
daz ers mit tiostivre
mir nem inner iares vrist,
so wizzet, daz si iwer ist
an alle ansprach
vnd daz ir mit rach
nimmer volge vürbaz.
dar zuo sült ir wizzen daz:
ez wirt ouch div guot
bewart mit selher huot,
daz si beleibt valsches bar
von mir daz selbe iar
vnd vor allem main,
vntz daz mir div rein
mit reht gevellet.
swaz ir nv tuon wellet
dar vmb, daz saget mir;
jch won also gar mit ir,
daz ich ir vnsanft enbir.>
artus, der sælden svn,
der ie daz beste chvnde tuon,
dem ez ouch ze rehte zam,
do er dise red vernam,
er sprach gezogenlichen:
< bætet ir betlichen,
so moht ich ivch gewern.
swen man so hoeret gern
vnbetlicher sach,
daz in vngewert mach
daz reht an der gewonheit,
daz ist lang her geseit.
da von habt ir iv verzigen.
hiet ir dise red verswigen,
daz het ich vertragen.
doch wil ich dar vmbe sagen:
seit ir meins weibes ieht
vnd ir minne ze solhem reht,
so wil ich iv hengen.
jr müezt aber lengen
vnder üns dise zeit,
dar an vnser beider streit
lig zeinem endetage,
da sich wol iwer chlage
vnd mein streit verende.
ez wærn missewende
von zwein guoten chnehten,
die ensamt solten vehten,
sin wæren beid geleich gar.
jch bin gar vnd ir bar,
des ist ez vngeteilet.> -
< dest war, ob ivch gemeilet
an dem sige div schande,
swer iv daz laster wande,
daz wær wol vnbillich,
wan da von so wær ich,
der sigelos læge.> -
< ein rat ist vns wæge,
daz wir gehellen dar an.
wir süln ein tak han,
des wir beide biten,
da wil ich selb striten.
behabt irz an mir einem,
so wizzet, daz ir deheinem
mer antwurt vmb sei.
des seit ir von mir immer vrei,
vnd wil ez lazen an neit,
daz ir ir chonman seit.>
der red der riter gehal
vnd nam ouch des zeites wal.
do wart der tak gesprochen
ze karidol über sehs wochen.
daz gelübd wart niht zebrochen.
der riter nam vrlop sa
vnd liez im div örs da
vnd schiet vroelichen dan.
da wider artus gewan
ein vnvro gemüete.
sich mischet mit vngüete
sein hertz in seinem leibe,
daz er von seinem weibe
dise red het vernomen,
vnd wær ir vil gerne chomen
gar an ein ende.
er gedaht:< ich beschende
sei, mag ich, also vil,
ez wirt ir ein hertez spil,
daz si mich so geschendet hat.
sein wirt meinenthalben rat.
ez wirt ir ein swære.
west ich, waz mir wære
daz beste vür di schande,
ob ich sei versande
jn ein wildes einlant
oder si hieng oder brant,
dest war, daz geschach,
ob ich sei erste sah.>
süst nam aber sein gedanch
her wider ein andern wanch,
vnd gedaht:< ob ich daz tæte,
so möht man vnstæte
an meinem muot chiesen,
vnd möht da von verliesen
meinr werdecheit namen
vnd müest mich sein oft schamen,
swa man ez erfüer.
der red ich e geswüer,
daz er si an gelogen hab.
dan bringet mich niemen ab,
si sei getriwe vnd vrum
vnd daz der riter durch ruom
ez gar an schulde tuot.
wan einz roubet mir den muot
dar an vnd mich vnfreut:
daz si mich vmb in steut,
daz machet mich im geloubik,
vnd hat sei der selbe strik
vil gar gemachet schuldik.>
uil mangen muot er gewan.
mit der red reit er dan
vnd nam di örs an di hant,
als er si gebunden vant,
seinen gesellen engegene,
der er vnder wegene
di naht het gebiten.
nv was er vnverre geriten,
vntz er si sach gen im gen.
do heten den einen di zwen
vnder ir arm genomen.
der was von seinr chraft chomen,
daz er vil vnbereit
moht gen an geleit.
ouch gie der zweier iegslich,
alsez mær seit, div geleich,
sam si wol müed waren.
daz was an ir gebaren
vil starch wol ze sehen,
waz in was geschehen.
nv si so nahen chamen,
daz si wol vernamen,
swaz man sprechen wolte,
artus sich erholte
seins vngemüetes mit in.
wan vindet oft trostes gwin
nach vil grozem vngemach.
er lachet tougen vnde sprach:
< her key, sagt vns mære,
ob der riter bei iv wære!
oder wie ist ez ergangen?
habt ir in gevangen?
daz sült ir mir sagen.
hiet ir in erslagen,
des het ir chlein ere.
jchn wil ivch nimmer mere
ze deheinr chürtzweil gesenden,
welt ir mich so schenden,
daz ir einen rechen slaht,
der so gar vmbedaht
mit iv an sarwat
ze örs tiostieret hat.
jr solt in han lan genesen.
da mit wær sein vil gewesen,
daz ir in nider stachet.
jrn west, waz ir rachet
an seinem leib vürbaz.
gepawrs art hat selhen haz,
daz er den man toetet
dann, so er in genoetet
alles, des sein hertze gert.
er ist chrancher ern wert,
der über sichrung reht
mordet einen guoten chneht,
daz ir ouch vil selten seht.>
swer schimpf bivtet vnd nimt,
ob dem schimph missezimt,
daz ist an im ze schelten.
wan hoert vil selten
deheinen schimphær,
daz in schimpf beswær,
swie ser er merchend sei.
als ouch nv geschach key:
den schimpf er von dem künig nam
güetlichen vnd an scham
vnd lachet sein vnd chert in
ze den zwein anderthalben hin,
die möht des wol betragen.
er sprach:< ir sült vragen
dise zwen herren des,
avmagwin vnd gales,
die chünnen ez iv gesagen,
wie der riter sei erslagen.
die sint gar der veint hagel.
jr habt ez an dem zagel
an erhaben mit der vrage.
do er an der ersten lage
mich nider von dem örse stach
vnd mir ab den arm brach,
do wart ich wol gerochen.
er wart ouch gestochen
mit zwein örsen zuo dem meinem,
die er ouch mit dem seinem
vor leide vuorte hin,
so groz wart sein vngewin.
si hant in des wol enzogen,
ob ich dar an niht han gelogen,
daz er dise straze
hinnen vür in vrei laze.
si chümt niht im ze maze.>
also key dise red lie,
do stuonden dise zwen hie
mit zorn bevangen.
si muost wol belangen
des schimpfes vnd der warheit
vnd daz sich key het entseit
vnd sei in di schulde stiez.
artvs sprach:< seit an, wiez
hern gales ergienge
vnd wer den riter vienge
oder sluog vnder iv zwein -
beid samt oder ir ein?
daz ensült ir niht verdagen.
jch muoz in von schulden chlagen,
daz er von iwerm herten zorn
seinen leip also hat verlorn.
daz möht ich e gewest han,
do ich zwen mordig man
ze churtzweil sande,
daz mich dar an schande
jwer ietweders grimmer muot,
der dik mortlichen tuot.
sam ist hier an geschehen.
het ir in heint niht ersehen,
des gvnde ich iv verre baz.
wie zimt meinem namen daz?
swa ez hin wirt vernomen,
jch mak ze vnlivnde chomen
da von vnd mein gesellen.
jn wolt der tievel vellen,
daz ist gar vnwendich.
do er chom in iwern strich,
des enmoht er niht lenger leben.
got müez iv den mort vergeben,
den ir an im begienget,
daz ir in niht envienget
vnd hiet sein sicherheit
vom im genomen vnd den eit;
daz wær reht, swa man daz seit.>
avmagwin mit zühten sprach:
< herre, wir haben vngemach
groz durch iwer er erliten.
wir sein gegangen vnd geriten,
wir waren riter vnd sein chneht.
von div ist ez vnreht,
daz wir iwer gespöt sein.
da scheinet boeses lones schein.
hie bei sich ein ander warn.
jst üns nv missevarn,
daz wir div örs han verlorn
vnd zem tod sein erfrorn,
wil ez got, wir erholn üns wol.
herre, wir nemen vür vol,
daz ir üns vrlop gebt
- niemen also arger lebt,
wir verdien wol gnad vmb in,
des ich vil gar an angest bin -,
wan wir töhten iv ze niht.
den also starch misseschiht,
der hiet ir immer mere
jn iwerm hof vnere.>
swer sich chan enthalten
vnd seiner sprüch walten,
vnd ob iht browet zorns gewalt,
kan er daz ze tagalt
mit schimpf wider bringen,
der beginnet oft ringen
kvmbers swær burde.
swa solich wandel wurde,
des solt man gern sein gevag,
als ich nv von artvsen sag,
der zorn niendert mert
vnd in ie verchert,
swa er möht, ze bezzerung.
sein mvnt noch sein zvng
erwarb im nie spruches meil.
so behuot er sich vnd daz heil,
als im noch giht daz meiste teil.
er sprach:< her avmagwin,
nv lat disen zorn sein,
vnd begebt mir selhen vnsite.
swaz ich iv rede mite,
daz ist in schimpf getan,
des ensült irz niht vür übel han.
dest war, ich bechenn ivch so wol:
swaz ein man erzivgen sol,
dez mügt ir wol bringen.
jr sült an disen dingen
juch niht so sere vergahen.
jr sült mir enpfahen
mein red baz, dann ir tuot.
ez ist an iv mannes muot
mit vollen ennenher erschinen.
wolt ir daz golt überzinen
vnd verwehseln den edeln stein,
daz er mit dem glas gemein
müez auf dem marchet ligen,
so wirt im sein wert verzigen,
den man bivtet im an seiner stat.
ob in verbær valsches schat,
so geliget er nider.
nemt iwer örs wider
vnd kert wider ze huse.>
si namen von artvse
div ors vnd riten von dan.
aufem wege komen si dar an,
daz si besvnder begunden iehen,
wie in allen wær geschehen,
vnd vragten in ouch mære,
wie daz chomen wære,
weder von streit oder von bet,
daz im der riter chunt tet,
waz sein gewerf wær da.
do seit er in die rede sa
vnd wie si wær verendet
vnd der tak wær gelendet
an dem anger vnder karidol
über vierzig tag, als man sol. div red geviel in allen wol,
leit suochet trostes rat
vnd siecher leip den artzat.
swem iht leides widervert,
swa mit er sich des erwert,
daz üebet er mit willen.
sam wolten nv gestillen
jr vngelüch dise drei,
daz in was gewonet bei.
des huob sich nah des chunges sag
ein streit von bet vnd von chlag
gemein vnder disen drin.
si baten gemeinlichen in
alle mit gemeinem mvnde,
daz er ir einem gunde,
daz er den streit væhte,
vnd dar an gedæhte,
wie betlich ez wære,
ob ir allr swære
jr einr müest rechen.
< jch enmag niht zebrechen>,
sprach er,< mein gelüb dar an,
als ich ez genomen han.
des enmag ez niht wol sein.
dirr streit muoz wesen mein,
also han ich in genomen.
wie disiv red sei chomen,
daz sol also sein verdeit,
daz ez nimmer werd verseit
weder mann noh weib,
daz ensei, daz er beleib
vnd den tak niendert suoche.
ob er daz niht beruoche,
so tuon ich doch daz meine.>
den wek vor noirespine
riten si vil balde
gen der burch auz dem walde,
wan in tet der vrost we,
vnd chomen ze tintagve
jn daz kastel vil schier
vnd giengen alle vier,
da der gest kamer was,
jn ein schoen palas.
da was ir gemach starch guot,
sam den der vrost we tuot,
wan si funden keche gluot.
uil chaum ir ieglicher entslief,
vntz daz der wahter rief
vnd chündet in den tak.
artus mit sein gesellen lak
vntz nahen zuo der none.
do was im vil schone
der imbiz bereit
nah des hoves gewonheit.
gyneuer mit ir vrowen saz,
vnd reten vnder in daz,
wa er des nahtes wær gewesen
vnd wie choum er sei genesen
von dem herten gefruste
vnd ob sein vreise ze fluste
stüend oder nah gewinne.
do sprach div chüniginne:
< er mak wol vervælet han,
wan daz chivs ich dar an,
daz sein schilt ist verborgen.
got geb, daz mir ze sorgen
disiv reis iht gevalle,
wan mein gedanch alle,
di varnt in mir ze wage.
jchn weiz, waz mein hertze sage.
daz hat verlazen gewonlich site
vnd wont im ein vnvreud mite,
der ich nie mer enphant.
war mak mein troum sein gewant,
der mich heint so gemüet hat?
got muoz mir senden helf rat,
wan mir vroede missezimt.
mein hertze mangen schrik nimt,
vnd enweiz ich, waz daz machet.
mein munt, der oft lachet,
der ist endelich geswigen,
vnd ist daz lachen mir gedigen
ze seuftlichen hohen zügen,
die in der werlt niemer tügen,
wan grozes leides mitwist
ald einem, dem kvmber chünftig ist.
wis mir gnaedich, herre christ!>
do sich dise red zerliez,
key daz ezzen ruofen hiez
auf der burch in dem palas.
als schier der chünig enbizzen was,
er rief dem truksætzen dar,
daz er die choch vnd di var
gen karidol sande
vnd sich dar nah wande,
als er enbizzen wær,
daz di kamerær
sich bereiten dar zuo,
daz si an dem morgen vruo
alle vüern da hin
vnd er selb rit mit in.
ditz was des chünges gebot.
daz ervorht div geent rot
vnd div vngechleite diet,
div mit micheln sorgen schiet
von den herbergen,
wan ez in den bergen
was grimmechlichen kalt.
di baten, daz man entwalt
den chünik dirre reise
durch des vrostes vreise.
di red er über willen tet,
wan daz er der riter bet
niemer moht verzeihen,
des muost er in verlihen
dirre reis ein wochen.
daz enwart niht zebrochen,
di weil si da bliben.
do diu zeit was vertriben,
do huob sich der chünich dan
vnd besand mag vnd man
nahen vnde verre,
daz dehein sein lantherre
des dehein weis verbære
durh iht, ern wære,
so der hornunch wurde vol,
bei im da ze karidol.
dar chomen si gemeine
dann gawein al eine,
der enchom niht wider seit,
seid er von der hohzeit
ze weinähten schiet.
wa er aber hin geriet,
daz sult ir vernemen,
vnd mag sein iv wol gezemen:
ez chan lang stunde lemen.
er suoht auentivre
zeinem risen vngehivre,
der was gesezzen bei dem mer
vnd was so starch, daz ein her
vber al niendert vorht.
sölh wunder er worht,
daz er des meres übervanch
ein mit seiner chraft betwanch,
daz auz ir selbes landen
jm den cins sanden
zehen chünig iærleich.
der muost im ir iesleich
ein riter dar senden.
daz in allen den enden
sein gleich niendert wære,
daz machet er so gewære,
daz er sein was vnbetrogen.
ein riter het er selb erzogen,
der vil nahen sein mak was
vnd was geheizen galaas,
der was ze örs behendich.
daz was ouch vnwendich,
als im ein riter wart gesant
ze zinse dar in sein lant,
der muost also chomen dar,
daz er ihtes wær bar,
des ein riter haben solde,
als er sich selben wolde
wider manichleich erneren.
er muoste sich vil starch weren,
solt er vor galaas genesen.
wan daz muost zehant wesen
nah dem antvange,
dar nah vil vnlange,
daz galaas mit im strite.
gestreit er im wol mite,
so wart er wol enphangen.
was im aber missegangen,
so muost er wandeln ritters reht
vnd muost immer als ein chneht
dem risen dienen dar nach.
daz doch vil oft geschach,
wan er was so manhaft,
daz er zwelf manne chraft
het an im aleine.
dar zuo was im gemeine,
swaz riterschefte toht,
daz chvnd er vnd moht
mit chunst wol leiten.
zallen arebeiten
vant man in bereiten.
assiles was der ris genant
vnd saz in einem einlant,
daz was starch wilde.
wan seit ein vnbilde
von im vnd selhe site,
daz er di berg überschrite,
vnd anders wunders genuoch.
di berg er ab ir stete truoch,
an swelh stat im geviel.
vil manigen diken schiel
er von den grozen povmen zart,
als im iht zorn wart.
ein stahelbovm truog er ze wer,
so er in meisten bei dem mer
jender moht vinden,
oder ein eichen oder ein linden.
swar er hin ze streite giench,
vür den schilt er hiench
ein dik steinmaure.
er was ein nahgebavre,
des seine vndertane
gern wærn gewesen ane,
wær ez an in gestanden,
wan in allen landen
was dehein dinch so grimmich,
ez ervorht seinen anplich.
als ir nv habt vernomen,
wie ez dar zuo was chomen,
daz im alle div lantschaft
svst waren worden zinshaft
mit ir selbes magen,
des muost si wol betragen,
wan der zins was ze groz,
des der rise dar an genoz.
daz man in so widersaz,
von seinr übel het er daz.
dar an het ez der tievel braht,
swes er im selb gedaht,
dan getorst niemen wider sein,
daz was an der rede schein.
do des zinses zeit wart,
ern wart niht lenger gespart.
dar wurde der best riter gesant,
den man über allez lant
jender möhte vinden.
mit ir selber chinden
muosten si zinsen daz leben,
e er niht wurde gegeben.
also het dirre valant
betwungen mit sein eins hant,
daz dirre zinser was
fünfhvndert, di galaas
auz den andern het erwelt,
wan er was wol ein helt
ze swert vnd ze sper.
der chvnst beider gewer
was galaas der mor,
daz ir im niemen was vor
beidiv ze füezen noh enbor.
dem risen was gesezen
ein chünich vil vermezzen,
der was geheizen floys.
den het ouch der selbe ris
an seinem land verhert,
daz er sich des zinses wert,
swaz er sein moht bestreichen.
nv muost er im entweichen
jn ein lant, daz hiez enfyn,
da lag ein purch, div was sein,
enmiten in dem mer,
da satzt er sich auf ze wer,
div vest was vnd hoch.
daz lantvolch dar zuo zoch,
daz si sich da werten.
ouch chamen di verherten
disem chünig ze helfe dar,
wan si was so vest gar,
daz si dem risen widerriten
vnd im oft mit striten
ze veld vor der veste.
so was aber ir reste
zem kastel, ob von geschiht
jr teil wart boeser iht.
nv het ze den selben zeiten
sich gesetzet ze streiten
vmb den zins der rise
vür die burch wider dise
vnd het des so vil getriben,
daz im nimer was beliben
jr helf nuor hvndert man
vnd daz im vil gar zeran
der speis vnd der leipnar,
vnd allr helf wart er bar,
daz si die verbaren gar.
do floys die helf verlos
vnd so gar beleip sigelos,
er zweivelt, waz er solde tuon,
vnd het ez gern an ein suon
gesprochen, do enwest er wie,
wan si der rise niendert lie
geruowen dehein stunde.
swa er si immer kunde
gemüen, daz tet er.
dar nah was im stark ger.
nv si vor in sahen
den tot also nahen,
vnd daz schier muost wesen,
vnd übel mohten genesen
noh dehein wil gewern,
nv begunden si alle gern
von dem risen einer vrist
jn selben ze gnist
nuor zeinem man.
daz was nach helfe wan
vnd was doch ein vrömder trost.
wurden si vntz daz niht erlost,
si wærn sein gevangen.
nv daz was ergangen,
si sanden einen boten dan
durch den walt ze brezilian,
einen gartzvn behenden
vnd guoten ze senden
zem chünig artvse,
swar man in ze hvse
jn dem land iendert vunde,
der sein vil guot chunde
vnd der massenye het.
der was geheizen jwanet
vnd was vil hofbære.
der solt dise swære
artvs dem chünig chlagen
vnd in biten, daz in zwelf tagen
er helf dar sande
von wälhischem lande,
oder si müesten verderben.
dise botschaft werben
kvnd ywanet starch wol,
als man si ze reht sol,
wan er was aller tugent vol.
ywanet niht mer entwalt,
der lief dan durch den walt
ein steik, den er bechande,
ze britanie gen dem lande,
der in was der næhste
vnd den er allr gæhste
möht in daz lant chomen.
do er die reise het genomen
an sich vnd di botschaft,
nv was div riterschaft,
die gawein auz leit,
jn den walt gar zespreit
nach auentivr besunder.
gawein den wech dar vnder
von wunders geschiht geviench.
do ywanet nv her giench
durch den walt ze presilian,
do chomen si ein ander an
an einem abend spat,
do ywanet vil drat
jn dirre botscheft lief
ein gehowen wech, der was stief,
da er auf gaweinen stiez
vnd in der wek nien liez
dehein andern steich keren hin.
alsvs chom gawein auf in
vnd gruozt in vil schone.
an dem widerlone
galt im ywanet den gruoz,
sam man sol vnd ze rehte muoz.
schier heten si sich bechant.
gawein vragt in zehant,
ob er in botschaft wære
oder waz er frömder mære
west, daz er im div seit.
< herre gawein, mein arebeit>,
sprach er mit gewizzen,
< seit ir di welt wizzen,
die sag ich iv gerne.
jch lauffe von alverne
von dem chunig vzem grüenen wert,
den hat ein rise gar verhert,
vnd hat mich der chünich gesant
ze britanie vnd z'engellant
dem chünig artuse,
oder swar man in ze huse
jender in dem lande vinde,
vnd ouch ze dem gesinde,
daz er in helfe sende,
oder ez hat ein ende
wider in allez sein weren.
er mak sich niht mer erneren
vor disem starchen valant,
wan er hat im verbrant
beidiv pürg vnde stet,
daz er vmb anderz niht tet,
wan daz er niht enwolde
sich setzen ze solde.
vnd hat in so gar vertriben,
daz im nimer ist beliben
wan ein chleiniv veste,
div boest noch div beste,
div leit enmiten in dem mer.
da ist er allez ze wer
vnd hat gedinget dar abe
mit leibe vnd mit habe,
er werd zeinem manen erlost.
da vür hat er deheinen trost.
vnd ist des hivt sehs tage,
daz disiu iamerlich chlage
geschehen ist, di ich sage.>
gawein sprach sa ze stet:
< jch wil dir sagen, ywanet,
dein arbeit ist gar vmb svs.
dv vindest chüng artus
da heim, daz ist vil war.
dv vindest aber in ein gar
aller seinr gesellen,
vnd enweiz, wenn si wellen
wider ze hove sinnen.
jch weiz wol, si sint hinnen
auf auentivr beiach,
vnd ist daz hivt der zwelft tach,
daz sich der hof gar zerlie,
vnd wil dir sagen reht, wie:
ein turnay was gesprochen
jn der weinäht wochen,
der ze jaschune solte sein,
den het graue rivalein
widern chünich glays genomen,
da warn wir alle hin chomen,
vnd wart da vil wol geriten.
nv begunden des di riter biten,
daz wir auf lobes stivre
suohten auentivre.
der red was ich volleist.
jchn weiz, war ir allrmeist
jender an einr stat sei.
wan bei meinem herren drei,
so sint si auz alle.
swaz dir dar vmb gevalle,
daz tuo du, ditz sag ich dir.
dv solt aber e zeigen mir
den allr næhsten wech da hin.
wizze daz, mag ich chomen in,
daz sein iht verierret mich.>
er zeigt im den rechten strich.
da mit so schieden si sich.
zehant streich er da hin
nah solher auentivr gewin,
als er von im het vernomen.
des enmoht er niht wider chomen
von dirre grozen vreise,
wan er auf der reise
manich groz arbeit gewan,
e er chom durch daz tan
vnd durch di wilden chlouse,
da der rise was ze house,
vnd vür di portenær,
da er vil vrömdiv mær
von in allrerst nam.
do er ze der lesten porten cham,
der portenær in niht gahes in liez
vnd im manik leit gehiez
vnd hiez in wider cheren.
er begvnd in vneren
mit scheltworten genuoch,
daz im gawein vertruoch
vnd bat sich in lazen.
do begvnd er in verwazen
dann er e getæt verre baz
vnd enphalh in ze gotes haz
vnd hiez in naher streichen.
gawein wolt im niht entweichen.
swie übel im wær geheizen,
er begund starch meizzen
mit seinem swert daz tor.
dirre sprach:< beleibet da vor!
waz welt ir tvmber man her in?
ez ist hie nuor vngewin.
seid ir sein niht welt enbern,
jch sol sein ivch vil wol gewern.
ez geriwet aber ivch dar nach,
daz iv her in ist so gach.
des biut ich iv mein triwe,
daz iwer afterriwe
nie gewan leides genoz,
si wirt starch vnd groz.>
hie mit er di port entsloz.
ez was der portenære
ein riter erbære,
gewizzen vnd manhaft,
der was dem risen zinshaft
worden durch den seinen gewalt,
vnd het in dar in den walt
gesetzet an die huot
vnd het in an dem guot
vil reichen verlazen,
daz er den zwein strazen
möht gedienen da mit,
vnd vmb daz, swer im gerit,
daz er die in liez
vnd ir wol phlegen hiez.
daz was auf di red getan,
daz er in da mit an gewan
beidiv leib vnd hab.
si leitet ab der riter ab,
swa er iendert chvnde
mit red vnd mit gvnde,
wan er ir vreise west.
swaz er seinr gest
möht immer ab geleiten,
daz si den arbeiten
vnd dem tod entwichen
vnd gahes dannen strichen,
e di zolner chamen
vnd den zol namen,
des vleiz er sich sere.
des erbot er die vnere
gaweinen an dem tor,
daz er beliben wær da uor.
daz half in doch vil chleine.
nv schuof er gaweine
des nahtes alsolhen gemach,
daz im nie bezzer geschach
nach sein selbes wunsche gar.
jm gebrast niht vmb ein har,
swes er haben solde
von silber vnd von golde,
als er es haben wolde.
des nahtes nah dem ezzen,
do si waren gesezzen
mit michelm gemach,
gawein von dirre sach
vil vragen begunde,
ob er im gesagen chvnde,
waz der zol wære
vnd wa di zolnære
warn gehauset.
< her gast>, sprach er,< mir grauset,
daz ich ez iv muoz sagen,
wan ez wær wol ze chlagen,
daz sein ie wart begunnen.
er hat dar an gewunnen
manigem riter sein leben,
der sein niht wolde geben.
dest war, daz ist chlägeleich.
als ein riter iwer gelich
sich in daz lant verreitet her
svnder danch, so muoz er
hie lazzen sein sarwat.
ob erz aber an dem hertzen hat,
daz er getriwet vehten
mit vier guoten chnehten,
die sich des zolles begent
vnd in alle svnder bestent,
ob er in niht gern geit,
vnd sich so endet der streit,
daz er in allen angesiget
vnd niht sigelos geliget,
so lat man in varn.
daz chünnen aber si wol bewarn,
daz ez immer erge.
jm tuot der erst also we,
daz der ander vor im vrei,
jch wæn, wol immer sei,
als ich her han gesehen.
swaz sein noch hie ist geschehen,
son gesigt ir nie deheiner.
swelher dirr ie einer
des streites allrerst began,
der gesigt im ouch an
vnd sluog im daz houbt ab.
leider, gast, iwer hab,
div ist mit al verlorn.
hiet ir geloubet meinem zorn
vnd het wider cheret,
so wurt ir niht gvneret.
do ich sein ivch vil oft bat,
do tæt ir vil boese stat
meinr vrivntlicher bet,
die ich getriulichen tet.>
do sprach gawein ze stet:
< lieber vrivnt vnd herr wirt,
waz, ob der red rat wirt,
die ir mir habt geseit?
daz ir mich so sere chleit,
daz müez iv got vergelten.
dest war, ich bin vil selten
meins harnasches an
von deheinem riter getan.
des bedarf ich selber wol,
daz sein niemen vür den zol
an mich durf geren.
swes ich iemen mak geweren,
daz ez mir an laster ist,
daz tuon ich in churtzer vrist
vnd doch niht über danch.
wan also vorhtechleicher chranch,
der ougent snelle einen zagen.
wan sol geweren vnd versagen
nah eren ze rehte,
daz zimt guotem chnehte,
vnd wese dar an stæte.
swes mich ein man bæte,
ob ez mir so töhte,
daz ichs geweren möhte,
swaz ich dem man wolt loben,
daz wurd niht vürbaz geschoben,
daz gab ich an der stunde,
dem ich der gab gunde,
vnd treibt in niht vürbaz.
lieber wirt, wizzet daz,
div gab ist lützel lobesam
vnd ist doch ietweders scham,
der si nimt vnd der si geit,
ob er si dehein lang zeit
durch argen muot treibet,
wan si nimmer beleibet,
sein kost also vil,
sam er daz lang zil
ze churtzer stunde machet,
vnd wirdet doch verswachet
dar an des mannes milt.
swaz man so chaum erbilt,
dest war, da wær schande bei.
swaz hertem stal weichez bley
mit seiner chraft geschaden mak,
jch wæn, da wirt wunden chrach
vil starch leiht ze heilen.
jch wil mir daz erteilen,
verzag ich von ir schalle,
daz in mit al gevalle
mein leip zuo der sarwat.
so ez dann an di rede gat,
daz ich den zol geben muoz,
jch entweich nimmer einen fuoz,
vntz si gar sint gewert.
jch bivt in schilt vnd swert,
dar nah vnd iegslicher gert.>
ywalin sprach:< lieber gast,
ez ist ein vil swærer last
vnd ein toetlicher slak,
der dem niht entweichen mak,
er müez vier riter besten.
jm mak vil leiht missegen,
wan glüch ist sinewel
vnd ist ze dem argen also snel
leider sam ze dem besten.
ez chan sich wol engesten
mit maniger vnstæt,
vnd sint sein ræt
nah der weil wandelbære.
des ist ez vngewære
dem, der sich alle wege
enphilhet in sein phlege.
jr habt ouch e wol vernomen,
wie ez vil manigem ist bechomen,
den sein hoher muot betrouch,
dazez gelük niht entouch
vnd leit in an di schande,
sam orgoylos de la lande
von parcevalle geschach,
da er den halsslach gerach,
den er im mit neide sluoch
vmb ein chlein vnvuoch,
den er mit red begiench,
do er in minnechleich enphiench.
vnd miliantz daz selbe tet,
do er den herren lantzelet
bestuont durch seinen hohen muot
vmb gynevern an der fluot,
do er si in sein lant braht.
sam het sich lochnys verdaht,
do er als ein boes listich man
gawein sein ors an gewan
vnd wand in gwinnen da mit,
ob er dar nah mit im strit.
do ward er dar an betrogen.
dem habech ist oft enphlogen
der reiger vnd genas,
als ez dann an dem heile was.
her gast, vnd sült ir vehten
mit disen guoten chnehten,
da muoz heil mit wesen,
vnd sült ir vor in genesen.
anders chund ivch niht gewegen,
ezn sei, daz der gotes segen
jwer welle genædichleich phlegen.>
niht mag man den gleren,
der sich selben cheren
kan ze dem besten.
der mak sich gevesten
an allen tugentsachen.
der red begund lachen
gawein, daz man in nant
vnd in niht bechant.
er sprach vil hovelich:
< gelük ist manigem rich,
manigem ist ez arm.
disem machet ez warm,
da wider enem ze kalt.
sein anbet ist manicvalt,
beidiv snel vnd laz.
an im ist minne vnd haz.
ez ist siech vnd gesvnt,
ez ist heil vnd wunt,
vngetan vnd glantz,
durchvellic vnd gantz,
gerecht vnd lam.
sein nam ist manic nam.
ez gesihet vnd ist blint.
ez ist als ein grozer wint,
der wider vnd vür wæt.
niendert ist ez stæt
wan an vnstæt aleine.
ez ist souber vnd vnreine,
ez ist sleht vnd rouch,
auzgewachsen vnd gelouch.
ez vellet vnd steiget,
ez neiget vnd seiget,
ez nidert vnd hoehet,
ez birget vnd floehet,
ez ermet vnd reichet,
ez vürdert vnd besweichet,
ez geit vnd nimt,
dar nah vnd ez gezimt.
ez walget vnd get,
ez loufet vnd stet,
ez släht vnd heilet,
ez chauft vnd veilet,
ez chrümpt vnd slihtet,
ez ruowet vnd vihtet,
ez slæft vnd wachet,
ez zürnt vnd lachet,
ez singet vnd weinet,
ez ligt vnd leinet,
ez zimbert vnd brichet,
ez vertreibet vnd richet,
ez sweiget vnd reit,
ez laget vnd ieit,
ez ratet vnd swellet,
ez gesellet vnd vellet,
ez endet vnd saumet,
ez füllet vnd raumet,
ez roucht vnd ebent.
alle di in der werlt lebent,
di lebent nach seinem willen.
ez chan melden, ez chan stillen,
ez chan vröwen vnd vnvröwen,
ez chan senften, ez chan stöwen,
ez chan volgen, ez chan wenchen.
ez muoz vil gar bedenchen,
wes al div werlt bedarf.
swer glüches helf ie verwarf,
dem muost misselingen.
jch han an allen dingen
alle sein vnstæt ervarn.
nv muoz mich daz heil bewarn,
daz ie gaweins phlak
vnd im zallen noeten wak,
so mak mein wol werden rat.
swie ez doch dar vmb ergat,
jwer rat mich getrostet hat.>
heils rat geit getriwen muot,
guot prüevet nuor guot.
also was an disem wirt schein.
er sprach:< lieber gast mein,
bedenchet ivch der rede baz!
waz mag iv gefrumen daz,
daz gawein ie wol gestreit?
daz chom von seinr manheit
mer danne von dem heil.
gelük ist dem wægen teil
zallen zeiten gern mit,
dar an hat ez stæt sit.
ouch wizzet wol vür war,
ervüert ir di werlt gar,
jr vundet deheinen riter niht,
als all div werlt giht,
der sich gawein geleich,
wan in vil mangiu reich
sein manheit ist bechant.
dor fimbeo, dem weigant,
den gürtel nam vnd genas,
da der selb mit begürt was,
vnd leygormon, der meide,
ze corlurment an der heide
der sælden bluomen ab erbrach,
daz mit grozer freise geschach,
ja was vrowe sælde wider in.
des geviel im da ze vngewin
ein wunden groz, die er
jm stach mit sein selbes sper
durch den fuoz, do in betwanc
der slaf so ser über danc,
daz sich niendert moht enthaben,
do er cham über den graben,
da er den bluomen brechen solt.
vil starchen chumber er ouch dolt
auf einem kastel a lit merveillos,
da er ein ripp verlos
vnd von dem lewen sein schilt,
vnd da er gandroy daz wilt
nam auzem mvnde
vnd da in nie enchvnde
ascurant mit geringen
jn dem hol betwingen.
swer sich nah im haben wil,
der muoz vil manik hertez spil
seinem leib enblanden.
er hat mit seinen handen
manik reichez lob erhawen.
mögt ir iv des getrawen,
daz ivch geluk also ner
mit seinr helfleichen wer,
als ez gaweinen ofte tet,
so hat ein ende mein bet,
vnd muoz an iv einem sten.
eins her sint leider zwen.
wol muoz ez iv ergen!>
zallen dingen hoeret rat.
so ez aber also stat,
daz man in gachlichen geit,
da von niwet sich ein streit.
wan ez ist des weisen reht,
daz daz end e sei erspeht
lang vor dem anegeng.
ez wirt vil ofte streng
daz end an dem rate.
da man also spate
daz end ervindet
vnd sich vnderwindet
des anegenges eine,
da von wirt vil seine
getrostet dehein tumber
vnd gewinnet sein chumber.
swer aber iemen raten wil,
der sol e suochen daz zil
an der sach vnd ienes muot;
behagt ez im ze guot,
so mag er vil leiht erspehen,
daz da von ist vnd mak geschehen
ze guot vnd ze arge.
des chan sich der charge
vil leiht versinnen
nah vliesen vnd nah gewinnen,
des manig niht enchunnen.
schier hat sich versvnnen
an gawein dirr wirt.
swer daz har also nahen schirt,
daz er di haut villet,
dan wirt niht gestillet,
svnder mer geseret.
swer den man leret
beidiv schand vnd schaden,
der het mer auf in geladen,
dann er im hab geringet,
wan im der rat bringet
ein vest warnunge.
nah des rates wandelunge
gawein daz selbe tet.
beidiv rates unde bet
ward er mer enzündet.
swes rat also schündet,
daz wær bezzer verborn.
vrivndes rat birt oft zorn,
daz doch oft ist erchorn.
< ljeber wirt ywalin>,
sprach gawein,< möht ez sin,
daz ir mir mer seit,
ob ze dirre arebeit
her gawein iht töhte
vnd sich da vor möhte
dehein weis ernern,
ob er sich wolt wern,
als er her hat getan
vnd ich von iv vernomen han?
jr preiset in so verre.>
er sprach:< gast vnd herre,
dan kan iv niht ab gesagen,
wan daz er e hat getragen
also swær burde,
e der zol wurde
gevreiet mit vreise
da ze der galeise,
da er groz not erleit,
do er mit zwein risen streit.
daz selb möht ouch hie ergen,
solten in die zolner besten,
als ich wol gewis bin.>
< nv muoz im got helfen hin,
lieber wirt, vnd send im rat,
seit er die vreis versuochet hat:
jch bin ez selb, gawein.>
zehant wart vnder in zwein
ein vreude reich vnd groz,
der ich dehein übergenoz
vil übel moht gezeigen.
solt ich si beide seigen,
disiu wæg so verre vür,
daz ieniv vil gar verlür
wider dise reich wert.
ywalin was wol gewert:
er het, des er ie gert.
erst huob sich ein vrivndes sage
svnder leit vnd an chlage
zwischem wirt vnd dem gast
von arebeit last,
den ietweder het erliten.
also gie mit vroeden siten
der naht hin daz meiste teil.
dest war, da wart an meil
der gast so beruochet,
daz im vil chlein gefluochet
wart an der speise
weder offen noch leise
von dem wirt vnd von dem gesinde,
sam manigen vil swinde
hin nach wirt gesegenet.
swie vngefüeg ez regenet
vnd donert mit blichen,
jch wolt den hagel diken
dann reiten oder gen,
e ich da wolt besten,
da man mein also phlage.
swa ich dannoch belage,
daz vurdert mich verre baz,
dann ob ich lit des wirtes haz
vnd mir hin nah sein gewalt
di speis in den mvnt gezalt.
sölh wirt sein verwazen!
her gawein moht wol lazen
von seinem wirt di sorgen.
nv slaff er vntz morgen,
vnd bewar in got anderswa!
sein dinch stuont mit vollen da.
div bet warn bereit sa.
also vruost der tak schein,
auf machet sich her gawein
vnd waffent sich starch wol,
als er selb disen zol
wolt geben mit ellen.
schier chomen die gesellen
geriten all viere
vnd hiezen in vil schiere
den harnasch ze zolle geben,
oder si namen im sein leben.
daz er der einz nam,
swelhes im gezam,
des möht dehein rat wesen.
er sprach:< sterben oder gnesen,
div sint vil vngeteilet.
swer den tot veilet,
da daz leben vristet guot,
dest war, der wær vnfruot.
jch bin aber niht ein choufman,
derz lant auf gewinnes wan
mit veilem mertz suoche
mit heuten oder mit tuoche,
dar ab ich iv sül zollen.
wær daz, ich gæb mit vollen,
swaz iwer hulde wæren.>
do wart den zolnæren
disiv red vngemach.
gomeranz ze gawein sprach:
< jch sih wol, waz ir welt,
daz ir mir da vor zelt
mit sölhem tratz
jwern liebesten choufschatz.
ez wirt noch hivt gezollet so,
daz ir beleibet sein vnvro.
des mak man iv wol gesweren.
welt ir den leip neren,
so gebt balde iwer hab,
wan sol ichs iv ziehen ab,
daz tuon ich so vngewar,
daz beidiv bart vnd har
mir mit alle volget,
vnd wert da besolget
von mir in churtzer vrist,
da beidiv hor vnd mist
jn der straz allr tiefest ist.>
der nahtegal vnd der kra sanc,
die gebent vnglichen chlanc.
sam tuot der galander,
der hat tvgent ander
dann der withopf
ze zagel vnd ze chopf.
son ist der boes anders niht,
nuor ein vil boesez wiht.
da wider ist der guot
so stæt an seinem muot,
daz er niht gesprechen chan
nuor als ein vrum man,
der seinr eren hüetet.
da schalcheit wüetet,
da ist tugent vnd zuht
jr selber huote vnd vluht.
des was hie beidenthalben schin.
gawein sprach:< got müez mein
vor sölhen vngnaden phlegen.
jch wæn, selten so gelegen
jst riter in der straze.
got mich sein erlaze,
daz ich nimmer so gelige.
jch gevall oder gesige,
jch wil di red scheiden
anders vnder üns beiden,
dann ir mir habt geheizen.
wan siht e sweizen
von blut swert vnd sper,
vntz ich ivch gar gewer,
daz ich iv nimer sol.
so nem ein ander den zol,
dem wil ichs ouch gestaten wol.>
hie mit er auf sein örs gesaz,
des ouch enr niht vergaz
mit gleichem geverte.
da ward ez vil herte,
e ir streit næm ende,
wan chünstig vnd behende
was ietweder genuoch.
dar zuo si der muot truoch
auf ein ander mit zorn.
des wurden div ors mit den sporn
ze seiten groz geseret.
gomeranz her cheret,
als er sper vnd schilt genam.
seinem kampfgesellen was er gram,
daz schein an sein tüchen.
swer ein vivr wil chüchen,
der muoz di brend vüegen e,
daz im div flamme niht enge.
so mak er niht vervælen
vnd touch wol sein wælen,
daz er hinden tuot nach.
gawein was niht ze gach.
sein ors er e erspranchte,
ob ez im also hancte,
daz ez im nv wære
ze dirre tiost gewære.
daz selbe er dem schilte tet.
jn dem satel wol von stet ze stet
versuoht er di veste
vnd ob dehein gebreste
wær an den stegreiffen.
seinen zoum begund er sweiffen
vnd vmb di hant strichen
vnd sich in den satel schiken,
daz er mit vollen chunde,
als er sinem vinde gunde,
geschaden an der stunde.
als er auf den rinch gereit,
da sein sein geselle beit,
sein örs liez er springen.
nv schein er auz den ringen
sam eins engels bilde. -
vnd het in aufem gevilde
mein her parcefal gesehen,
er het sein zeim got geiehen.
des gestat mir her wolfram,
der in von seiner muoter nam
vnd hat in ze hove braht.
des was im selben vngedaht
vnd seinr lieben muoter,
wan er ir vil guoter
jr pawes in dem walde phlak
vnd emzechlich dar ob lak,
daz si da het gereutet.
als sich sein nam deutet,
wan< parce> sprichet durch,
< val> ein tal oder ein furch.
also hat in vnser zvnge
sein nam diu deutvnge. -
beidiv sint si so nahen,
daz div örs vndervahen
vil übel iemen chvnde.
jr ietweder begunde
sein sper vor neigen
vnd dem ors da zeigen
di sporn an dem ende
vnd in di schiltrende
sich chünstechlichen vlechten.
vnder disen guoten chnehten
was minne vil tivre.
ein wunden vngehivre
enphie gomeranz li peluz,
daz daz sper hinden vz
durch den halsperch prach.
gawein im den stich stach.
do muost er von noeten vallen.
daz pluot begunde wallen
so starch von der wunden,
daz in di bruoder vunden
toten vnd vngesvnden.
do si ir pruoder sahen,
jn toten, also nahen,
des wart ir chlag starch groz.
dannoch hielt sein champfgenoz,
her gawein, da pei,
da disen pruoder ien drei
toten aufhuoben.
daz si in niht begruoben,
daz wart dar vmb lazen,
daz si sein vergazen
vnd ouch e enwolden,
si heten in vergolden.
div red was gar vmb sus.
jr einr, belianz li rus,
an gawein rande
vnd wolt di schande
vnd seinen bruoder rechen.
er nam in ze stechen
niderthalb der barbiere.
gawein also schiere
vndervie im den stich,
vnd wante mit kvnst sich,
daz er im daz sper an gewan.
da von wart do belyan
bechümbert vil sere,
wan an der widerchere
erreichet in her gawein,
daz im von seinem swert swein
beidiv harnasch vnd leip,
daz er an wer als ein weip
jn so swachem werde
muost vallen zuo der erde,
daz er den leip gar begab.
do touch im niht wan ein grab.
evmenides vnd bandarab
erzeigten michel leide.
dise bruoder giengen beide
auf ir toten bruoder hin
vnd wuoften irn vngewin
mit grozer vngebare.
beidiv bart vnd hare
vor iamer si zefuorten.
vil dik si si ruorten
mit handen vnd mit vuozen
mit chlagebærn gruozen,
ob iht da lebendes wære.
do sahen si vil lære
jr leip in dem bluot sweben,
als si der geist het begeben.
do huob sich erst ein iamers wuof.
ywalin die weil schuof
hern gawein vil schiere
ein petit mangiere,
da von gewan er groz chraft.
sein ors het ouch wirtschaft
von streichen vnd von ezzen.
da enwart niht vergezen,
daz im ze guot maht geschehen.
daz moht auch er vil gerne sehen,
wan ez im vil durft wart,
swaz er mit ruowe het erspart:
er muost noch varn übel vart.
do div red also ergienc
vnd gawein ein chraft gevienc,
er kert auz dem hause.
nv hielten pei der chlause
dise zwen aufem gevilde
vnd wanden di schilde
ze gleicher tiostivre.
jr muot als ein vivre
auf hern gawein bran.
da gewunnen si vil lützel an:
jn wart so daz gezollet,
daz er in wol ervollet,
swaz er in e da von gehiez.
sein ors er von sporn liez
loufen wider einen,
dem wolt er bescheinen,
waz er möht gefrumen.
da muosten sich drvmen
jr beder sper begarbe
vnd div vil lieht varbe
an den schilten erbleichen,
da si sich erreichen
mohten mit den spern.
des enmoht niht gewern
da von ir vil liehter glantz,
wan si niht beliben gantz,
si wurden durchstochen.
dar nah wurden gebrochen
div swert von den scheiden.
vil manik slak in beiden
wart gelihen vnd vergolten.
doch muost zuo der molten
hern gaweins gestreit.
ein wunden, div was weit,
sluog er im durch den stalhuot,
daz daz verch vnd daz bluot
ze tal durch daz hertze wuot.
als eumenides gesach,
waz von gawein geschach,
seinem bruoder er ze helfe reit,
der dannoch vaht vnd streit,
swie er halber wære tot.
nv het gawein groz not.
des vaht er als ein wilder ber,
der beidiv hin vnd her
sich brichet auz den hvnden,
daz si in bede chvnden
dehein weis gewinnen,
wan er mit grozen sinnen
sich vor in behuote.
ein eber nie gewuote
so ser an geieide,
als di pruoder beide
an gawein vahten,
vntz si in dar an brahten,
daz im der chreft gebrast.
dar vnder vlos der müede gast
sein örs, daz wart im erslagen.
do muost er erst chumber tragen
von disen zwein reken.
nv begund er sich deken
mit dem schilt vor den slegen,
wan er sich het bewegen
von in des leibes vil gar,
vntz er gestuont des schildes bar.
hie mit er sich gespart.
bandarab des ersten wart
von seinen handen ein slak,
der den ersten überwak,
reht in die selben wunden,
da von er überwunden
vnd toter auf die erde seich
vnd nider in den schilt geneich,
daz sein vehten gar gesweich.
evmenides nv ein vaht.
sein grimmer muot da endaht
vil hertzenlich riwe,
di bruoderlich triwe
an bruoder sol suochen.
er begund lützel ruochen,
wie ez gestüend vmb sein leben.
do sein bruoder im enneben
alle drei tot lagen,
da wolt er sich wagen
oder di bruoder rechen.
niemen sol daz versprechen,
der sich auf di wag lat,
ob im dar an missegat.
gawein was vnverzeit,
swie er die grozen arebeit
von in ein het getragen.
ez endorft ouch niemen ein zagen
suochen an evmenide.
sich huob der streit alsam e
mit swerten vnder disen zwein.
da enphie mein her gawein
zwo wunden weit vnd tief,
do er an den reken lief.
des chom er in groz not.
vil oft er daz eke bot
hie vor an seinem swert.
gawein in gewert
einr wunden an der selben stet
durch die brünne vnd des schildes bret,
daz er den sin da von verlos,
vnd da von er also chraftlos
div erd im ze ruowe erkos.
alsus lag er lang vrist,
sam da ein man tot ist,
vnuersvnnen vnd vnverstanden
an füezen vnd an handen
vnd an dem leib anderswa,
vnd lach als lang da,
daz sein gawein verdroz.
mit dem fuoz einen stoz
stiez er im an seinen fuoz.
alsvs manlicher gruoz
bewach den halben toten man.
nv sach er sein pruoder an,
di bei im lagen tot.
dirre iamer in des not,
daz er auf wol snelle spranch.
ein vil iamerlichen wanch
er an im selben begiench.
daz swert er zehant geviench
vnd viel dar auf an daz ort,
daz er des todes bechort.
jn sölher weise rach er sich.
er sprach:< swert mein, nv rich
ditz groz laster an mir,
daz ich enmoht mit dir
gerechen meiner bruoder tot.
nv wil ich selbe di not
mit in von dir leiden.
dv solt mir absneiden
daz hertz von dem leibe,
daz ich nv iht beleibe
ein lemtiger hinder in,
wan ich in des schuldic bin.>
alsus viel er toter hin.
uil starch bewach gawein
dirre iamerlich main,
den er an dem riter sach.
er eilt vnde brach
daz swert auz evmenide.
ouch wart im selben so we,
daz er niht moht gesten,
wan im begunden vergen
div ougen von der vnmaht,
div in also starch bedaht,
daz er ir muost volgen.
er was so erswolgen
vnd des bluotes ersigen,
daz sein chraft was geswigen
den seinen liden allen.
do muost er von noeten vallen,
er moht niht lenger gewern.
ditz sach vil vngern
sein lieber wirt ywalin.
er wande den helt tot sin
vnd lief eilent dar.
eins brunnen ward er gewar
bei im da vil nahen;
des begund er do vahen
ein teil in di hant.
als er im den helm ab pant,
er goz im daz wazer in.
daz tet er auf den gewin,
daz er von dem brvnne
sein chraft wider gewunne
vnd sich sam e versvnne.
dar nach er vil chovm erbeit,
daz er di riemen sneit
vnd di koyfen erlost,
ob er deheins lebens trost
an im möhte vinden.
vil manigen griff linden
versuoht er an dem arm.
den vand er vil warm,
daz het im den trost gegeben,
daz er in do wand leben.
do greif er aber vürbaz,
weder snel oder laz
der ader sleg waren.
da mit solt er bewaren
sein leben baz aber da.
do seit im zefalica
mit ir stætleichem slag,
daz er liez sein chlag,
gawein moht wol genesen.
don wolt er des niht entwesen,
er vraget ouch die medyan,
daz si ir chvnst dar an
jm wol schier tæte kvnt.
do seit si, er wær gesvnt.
do vragt er epaticam,
dest war, div seit alsam.
vil gern er daz geloupt.
nv greif er an daz houpt,
ob ez iender wær heiz.
do seit im der houbtsweiz,
als schier er in verliez,
daz er in danne hiez
vil snellechleich entwaffen,
ez wære nuor ein slaffen,
daz von des toumes nezzen
sein leip het besezen,
daz man den strich von
vnd im mit wælen gedon
ein weil tæte,
vntz er so wol erwæte,
daz er truchen wurde,
so entslif im div burde,
div im an dem hertzen læge,
vnd im wær niht so wæge,
der sein also phlæge.
daz wart allez getan.
gawein dar vnder sich versan
vnd gewan wider sein chraft,
vnd verliez in der swær haft,
der in von der bloede betwanch.
doch was er noch starche chranch,
wan daz er het di sinne.
nv was er worden inne,
daz leut ob im weinten.
waz si da mit meinten,
des enwest er niht über al.
er greif mit einr hant ze tal
nah seinem swert, da ez lak,
vnd sluoc da mit einen slak
nach seinem wirte sa
vnd sprach:< weichet! wer ist da,
der mir nimt mein eisengewant?>
ywalin vie im di hant
vnd sprach:< nv gehabt ivch wol!
swaz ein vreunt frivnden sol,
des wil ich iv gebunden sein.
jch binz, iwer wirt ywalein.
jr sült ivch wol vröwen mein.>
gawein wart der rede vro.
ywalein nam in do
vnd seiner chnappen vier,
vnd brahten in vil schier
ab dem veld ze huse.
do het e azanguse,
div wirtinne, ein phlaster
vil gar ane laster
auz edeln wurtzen gesoten,
als ir der wirt het geboten,
daz si vil wol kvnde,
als ir der kvnst gunde
von irlant ysolde,
da mit si nv wolde
heiln sein wunden.
gesalbet vnd gebunden
wurden si allenthalben
mit dirre guoten salben.
gawein wart vil wol bewart.
gemaches wart im vil gevart
von vrowen vnd von herren,
des enmoht im niht gewerren
von dem gesinde dehein vrbunst.
geleicher wille vnd gleichiv gvnst,
div ist iender selten geschehen,
wan daz man oft hoeret iehen,
daz ouch ich gelouben sol:
heien wizen herren willen wol,
da tuont si vil gerne nach.
dem rinde ist nah der krippe gach,
so vürhtet daz lamp des wolves schah.
nah also vrivntlichen phlegen
was gawein, der küen degen,
vil snelle gärlich genesen.
nv wolt er des niht entwesen,
ern wolt dann reiten.
do wart ein michel streiten
zwischen im vnd seinem wirt,
der in der reise irt,
swa er möht mit bet.
ouch was des wirtes gewet
div edel wirtinne.
da wider bat mit minne
gawein vrlobes von in
ze reiten, da er solte hin,
des möht er niht geraten.
des entoht in niht, swaz si baten.
nv den wirt niht verviench,
swaz er mit vlehen begiench
an seinem lieben gast,
nv enphalh er in vil vast
jn des reichen gotes huot,
seid er von sölhem muot
deheinen weis wolt erwinden,
vnd daz er in muost vinden
ze seiner helf bereiten
an allen arbeiten,
des wunscht er im vil tivre
vnd gab im ze stivre
ein ors starch vnd hoch,
daz er in seinr phlege zoch.
da er zuo wol was gewert
harnasch vnd ein liehtez swert,
daz wol ze beiden eken sneit
vnd deheinen stal vermeit.
mit dirre gab er dannen reit.
gawein einen wek begreif,
eins hohen berges vmbsweif,
den ein vinster tan verbarch;
er muost gereisich vnd karch
sein, der in solt varn,
ob er daz solt bewarn,
daz er da niht enviel.
von manigem grozen schiel
vnd manigem stalpaum,
da von der wek chavm
schein, so was er bestreut,
vnd was von der güsse erfleut
der berch, daz er so glat was
als ein vil wol hælez glas
vnd scharf sam ein scharsach.
also het er den vngemach
vil vollechleichen fünf tag.
do tet er niht sam ein zag,
der sich vmb sein arebeit
vil manic laster an leit
mit vluochen vnd mit schelten
vnd wil im da mit gelten,
daz er sein ie begunde,
vnd sprichet:< ich enchvnde
mir niht sanft geleben.
selb han ich ez mir gegeben,
nv sol ichz ouch von schulden tragen,
wan ich ie hort sagen:
selb tet, selb habe.>
dest war, gawein sich dar abe
mer lopt, dann er sich schulte,
wan er wolt, daz im gulte
solh arebeit hohen preis.
des entwalt in dehein weis
weder boume noch daz eis.
in einer mitwochen
het er sich auz gebrochen
auz disem vngeverte.
nv chom er auf di herte
jn ein schoen ebenz lant,
da ersach der selb weigant
ein haus hoch auf erhaben,
da waren zwen tief graben
al vmb auf geworfen.
von steten vnd von dorfen
was ez gesvndert verre,
vnd stuont ein alt herre
vor dem tor auf der brukke,
der het seinen ruke
gen gawein gekert.
ein reichiv wat in ert
von einem roten scharlat,
daz div werlt niendert hat
deheinz sölher tivr.
sein varwe was als ein vivr,
ze allen zeiten ez bran
von vngevelster gran.
lind was ez an dem griff
vnd gar von dem sliff
sein varwe gescheiden.
sich endorft ouch leiden
sein vadem niht, der was eben,
chlein gespvnnen, dik geweben,
vnd auf den vadem geschorn
div wolle, lauter, auzerchorn.
da het burre chleinen wert,
wan si het gevnert
vil starch seinen liehten schein,
da si im frvm solte sein.
jm was ouch in der varwe niht
verbrant seins leibes iht.
da von ez deheinen tadel het.
an der berhtel vnd an der set
het ez einen mitern glantz.
von allem meil was ez gantz,
ze gant worht ez adanz.
ein veder er dar vnder truoch,
div was reich genuoch,
von lautern pibervellen.
jr tivr moht gehellen
dem zobel vil nahen.
sein dorft niht versmahen
dem cheiser ze tragen.
ein list was da vor geslagen
von zobel maisterlich wol,
breit vnd swartz sam ein chol.
div wat wol dem leibe zam
so reich vnd so lobesam,
wan er was vil wol gestalt.
swie er wær ze mazzen alt,
doch was er dar an behuot,
daz im seinr varwe bluot
daz alter het vndervarn.
natur wolt in so bewarn,
daz alters reht da chavm schein
an im wan an disen zwein,
an bart vnd an hare:
div zwei het zware
ein grawe übergangen,
div was aber bevangen
mit reitziere weiz.
di het er mit vleiz
ze strenen gewunden,
mit golde gebunden.
er stuont niht ein an der stet:
vier chnappen mit brvnet
gechleit vnd mit rose,
dar vnder ein veder als von sne
ein leise niht ze broede,
ze rauch noch ze snoede,
die stuonden vor den herren da.
gawein gen dem hause sa
kert, do ers ersach.
er triwet da haben gemach,
daz ouch vollechleich geschach.
als schier si ersahen
gawein zuo dem hvse gahen,
dirre herr im engegen giench.
als er di bruk geviench,
von seinem ors er nider spranch.
der wirt an valschen chranch
hiez in wilechomen sein.
do was ouch an den chnappen sein
zvhtbærer eren hort,
die buten im vil süezziv wort
vnd enphiengen im sein ors.
der wirt blandochors
hiez seinem gast bringen dar
ein reichen mantel greisvar,
bedacht mit einem mordel,
e ern in daz kastel
an seinen gemach bracht.
des sich niht verdaht
vil leiht ein vngewizzen man.
gawein sich dar an versan,
waz an seinem wirt was.
auf daz haus in ein palas
vuort der wirt seinen gast,
da deheins rates gebrast,
zvo einem fivr liehten,
daz in von dürren viehten
dar auf was enbrant.
da von gawein verswant
sein vrost starch snelle.
div wirtinne amvrelle
sant im ein wargot,
daz er daz durch ir gebot
an sich vür den vrost leit,
daz was von grozer richeit,
von marder vnd von violat,
vnd daz er sein sarwat
ab seinem leibe tæte,
daz er iht durchwæte
von der chelten stæte.
do er nah der vrowen bet
den harnasch ab im tet,
sein wirt bat in mit im gen.
bei den henden viengen si sich zwen
vnd giengen mit ein ander hin,
da div vil edel wirtin
mit ir ivnchvrowen saz
vnd ir tohter sgaypegaz
mit phellen behangen.
er wart so enphangen,
daz sein genüegte,
als ez der wirt vüegte.
als er in di kamer trat,
jetwederiv gie von ir stat
hern gawein engegen
vnd kusten den degen
nah dem ersten gruoz.
dar nah wart im vil suoz
von den ivnchvrowen genigen
vnd ein weil dar nach geswigen.
hie mit si gesazen.
gawein wart verlazen
bei des wirtes tohter
- ein stat, da enmohter
niht vngern sitzen -,
div im mit schoenen witzen
die stat gelieben chvnde,
wan si im wol gvnde,
daz er ir gesedel wære.
vil maniger hande mære
der wirt seinem gaste seit.
daz was im ein teil leit,
wan er gern het gegeben
der mait, div im saz enneben,
wechselrede nach vroede reht.
< weibes gewizzen lieb speht>,
des gedaht gawein, der guot chneht.
seins leides er hie vergaz,
do div schoen sgaypegaz
jm sölh handelung bot,
wan daz im ein stärchiv not
dar nah schier widervuor,
als im ywalin swuor,
da er di vier bruoder sluoch.
hie het er vroede genuoch.
si was aber leider niht ze lanch,
vnd muost sich schier svnder danch
scheiden mit leide
von dirre reinen meide
von wunders geschihte.
do si do all enrihte
jn sölher vroede waren,
jr vroelich gebaren
wart ze vnvreuden vercheret
vnd ir vroed geseret,
vnd sag iv, von wanne:
ein pavm als ein tanne
stuont enmiten in dem kastel,
hoh, groz, sinewel,
von er gegozen,
dar auf was beslozen
ein bilde auf eim rad enbor,
daz was swartz als ein mor
vnd het ein horn an der hant.
dar vmb was ez so gewant:
als ein ritter in daz haus cham
vnd nahtsel da genam,
so blies ez daz guot horn,
daz man ez het wol bechorn
von dannen vier meil,
so westen an der weil
wol die zolnær,
daz ein vrömder riter wær
komen ze ansgivre.
da muost div auentivre
kosten vil tivre.
ditz het gemaistert alsus
ein guot nygromanticvs,
als in dirre rise bat
jn di burch an di stat.
daz wart dar vmb getan,
daz sich da vor dehein man
moht vor disen wider steln,
swie gern ez wolte heln
der wirt vnd daz gesinde,
wan er al da von chinde
betwungen ditz hauses phlak,
daz im ze sölhem gewinne lak.
wie daz chom, daz wil ich sagen:
der rise het dem wirt erslagen
durch den zins alle sein wer,
wan di er noch in seinr gewer
het lebent vnd gevangen.
daz was dar vmb ergangen,
daz er sich des zinses wert.
do er in also verhert,
er muost sich durch not ergeben,
daz er im liez daz leben.
dar über muost er seinen svn
jns risen haus ze eygrvn
vür geisel dar senden,
daz er in hiez blenden
vnd des gewalt hæte,
ob er durch iemens ræte
wider den risen iht tæte.
der vroeden svnne, div gemein
vnder dirre kurtzwil schein,
der gab ein ende ein vinster naht
mit sölher tunchel bedaht,
daz si trüebet ir allr muot.
nv seht, wie ein kertz tuot,
div allen gaches erlischet:
also wart gemischet
jn ir vroede ein hertzen sere.
do div magt here,
div vil schoene sgaypegaz,
jn dirre chürtzweil saz,
daz bilde blies daz groz horn.
nv het gawein wol gesworn,
daz daz haus in dem schalle
vnd di türn mit alle
warn auf di erd gesezen.
her gawein der vermezzen
greif snelle nah dem swert hin.
nv huob sich sa vnder in
ein vil starchez weinen.
waz div rede solt meinen,
des nam in vil michel wunder.
nv enwas niemen dar vnder,
der im ir chlag seite,
wan iegslicher chleite
mit solher vngevüege,
daz vnder in genüege
vil oft we sprachen
vnd ir har auz brachen
mit leid von der swarte.
sam tet von seinem barte
der wirt, daz muot in harte.
gawein sein vroede brach
dirre iamer, den er sach
von dem gesind über al.
von in gie er auzem sal,
daz er niht moht vertragen
also bärmchleichz chlagen
von in in dem werchgadem.
nv hoert ein starchen chradem
von den leuten hie vor
an dem houe vnd von dem tor,
dar begund er starch eilen.
seht, in den selben weilen
blies daz bild aber sa.
dannoch was an dem houe da
gawein vnd sah ez an
vnd wand, daz ez wær ein man,
der auf den povm wær gestigen.
do ez churtz was geswigen,
do blies ez aber alsam e,
vnd dar nach rief ez lout:< we,
her gast, ir müezt sein verlorn!>
hie mit liez ez daz horn
vnd gesweich sa zehant.
do gawein hort, daz ez nant
den gast, do verstuont er sich
vnd gedaht:< so ez meinet mich,
des sol aber werden guot rat.
ob ez mich gemeinet hat,
daz mag ouch wol div chlage sein,
di der wirt vnd div vrowe mein
jn dem hause begent,
wan si sich vil wol verstent,
waz daz blasen bedeut.
daz selb tuont di leut,
di an dem hove ruoffent,
wan si mich ouch wuoffent.
daz sol aber ich wol ervarn.
wil mich got iht lenger sparn,
er mak mich hie wol bewarn.>
swer dem golde mit vivr
wolt velschen sein tivr,
der vlür michel arebait,
die er an daz brennen leit,
wan ez da von ie bezzer wirt.
freise wan dem küenen birt
starchz hertz vnd vesten muot,
also daz golt tivrt di gluot.
gawein was vil vnerschraht,
wan eins lewen muot verdaht
an im eins lambes vel.
div rede dauht in ein spel,
ob si vmb in wære.
nah disem selben mære
gie er wider dar in.
nv was in allr der sin
vor leide so entwichen,
daz si varlos vnd erblichen
waren svs gesezen,
vnd heten ir vergezen
so hart in dem leide
beidiv vrowen vnd meide,
daz sin übersahen,
swer im stüende nahen,
vnd chleiten in mit triwen.
< ja mag vns wol riwen>,
sprach da man vnd wip,
< daz sein watlicher leip
hie sol werden verlorn
von ir vngehivren zorn,
den ez daz pilde hat gesagt.
als ez morgen vrüeste tagt,
so muoz man in toten sehen,
als e von in ist geschehen.
daz enmüg wir nimmer verchlagen.
möht er sich iendert entsagen,
wir wolten kvmber mit im tragen.>
also her gawein ervuor,
daz disiv chläglichiv fuor
an disem wirt vmb in was,
sein muot im die gedanc las,
da mit er si zestorte.
als er di chlag erhorte,
er gie, da div vrowe lach
vnd dirre chlag also pflach
- jn vnmaht gevallen -
mit ir vrowen allen
vnd ir tohter reine.
er vorht vil chleine,
daz ir chlag besorget.
der degen auf sich porget
manig vreis vngenot.
der vrowen er genade bot
mit also süezem danche,
daz man in deheinem chranche
di red mohte merchen,
wan daz er si sterchen
wolt in vroelichem muot.
< vrowe rein vnd guot>,
sprach er mit schoener zvht,
< war zvo sol der chlage vruht,
die ich an iv wahsen sihe?
swaz muotes iv den chriech verlihe,
den solt ir zwar schelten.
waz mag div chlag gelten
oder iemen wol gestiuren
wan boesern vnd vntivren?
daz ist der trost, den si geit.
klag ist der vroeden widerstreit
vnd lieber sælde leider neit.
lieber wirt vnd vrowe mein,
wie ist div red an iv schein,
daz sælden chraft vnd witz rat
jwer leben so gereichet hat
an zvhtbærn eren?
solt ein nahtrab leren
ein adeler hoh vlüg,
da wurden ir beider züg
vngleich an der daure.
swer ouch vür ein movre
ein swachen zavn flæhte,
jch wæn wol, daz im bræhte
div red swaches schermes chraft,
vnd wurd dar an schadehaft.
dise red wizt ir wol,
sam der tumb den weisen sol
ze reht leren, waz er tuo,
da gehoeret sælden helfe zvo,
ob sein rat sol behagen.
waz mag gehelfen iamers chlagen,
da div red vnwendig ist,
wan daz man di selben vrist
vreundes muot dar an erspeht
vnd ratpærs trostes reht
gar da mit verchivset
vnd vroeden wert verliuset,
daz wirt dar an gewunnen.
die sich der rede chvnnen
sam ir ze reht versinnen,
die solten e minnen
trostes rat dann chlage.
ja ist ein gemeiniv sage,
daz da wider stivret niht:
swaz geschehen sol, daz geschiht.
swer mit chlag danne flür
sein zeit, die weil im sælden tür
verlih vroeden invart,
so si danne wirt gespart,
der hat dester mer verlorn.
vnmuot ist bezzer verborn,
dann chlag über reht erchorn.
swie ser ein haus enbrinne,
der im mit guotem sinne
der helf ist bereit,
ern vlivset niht sein arebeit,
die er dar an wendet.>
also gawein nv verendet
sein red wider seinen wirt.
er sprach:< triwe niht wol enbirt,
sein müez chlagen, lieber gast,
swa sölher arebeit last
auf seinem lieben vrivnt leit
vnd im an dem ende geit
ein noh pitter riwe,
da von div chlag niwe
beginnet wachsen alsam e.
als ich wæn, daz ez geste
vmb ivch an dem lesten,
da von muoz mir gebresten
an meinr vroeden chrone,
der ich e vil schone
vntz an dise stunde,
so ich best chvnde,
mit vroedhaftem muot pflak.
ditz ist mein anderr tak,
der mich trouren leret
vnd mein muot vercheret.
leider daz wolt got also.
jch was eteswenne vro,
do ez mir touch vnd sæld gebot.
ditz ist aber mein andreu not,
div mich der vordern ermant,
wan mir ist vil wol bechant,
waz iv noet ist behalten.
got müez sein starch walten
mit gnædechlicher helf rat,
div manigen e beraten hat
mit ir scherms barmvnge,
di vil übel iemens zvnge
möht endechlich errechen.
der chraft muoz ivch hie dechen,
ob daz iemer solt geschehen,
daz ich nah meinem willen sehen
müez an iv vroeden blik.
juch slivzet leider kumbers strich.
got geb iv helfe vnd sich!>
hie mit disiv chlag beleib,
da si zvo ir triwe treib,
vmb ir liebes gastes tot.
ern aht aber niht vmb ein prot,
swaz man im kumbers gehiez.
zeinr hant er ez liez.
swaz im ie geschach,
ez wær gemach oder vngemach,
daz truog er mit gleichem muot.
er tet, als der weise tuot,
der sich liebes niht erhevet
vnd sich leides niht entsevet,
wan in einr maze
ein mitteliche straze
jm auz allen dingen nimt,
daz noch wol dem besten zimt.
gawein ie des siten phlak,
daz in sein kvmber niht bewak,
als er tuot vil mangen man.
da vlos er vil lützel an,
wan vrowe sæld wont im bei.
wan seit ouch, daz ez sei
jr sit, daz si dem argen von
vnd dem guoten mit won.
daz ist ouch vil michel reht,
wan da ist ir helf sleht,
da ir des mannes helfe gestet.
swa er dann des ab get,
jst si ein teil vrömder da,
so daz si in der helf erla,
daz ensol ir niemen wizen.
des sol sich gern vleizen
ein man, daz er rehte tuo
beidiv spat vnd vruo,
so volget im vro sæld dar zuo.
einem leid volget oft liep.
vil oft vælt dar an der diep,
daz er wænet in der hant haben.
waz hilfet in sein ingraben,
da er niht guotes vindet?
klag von troste swindet,
von vestem muot wahset trost.
vivr vnd holtz machet rost.
leit von liebe zergat,
daz vorht vnd leit enzündet hat.
als manik liep, als manik leit.
swelhem leid trost wirt verseit,
daz toetet hertz vnd leip,
ez sei man oder weip,
daz ist sein houpt vnd sein zagel,
wan sein biter, dicher hagel
sein vreud im nider sleht
vnd im die süez abetweht,
div im nach vreuden smaht,
e si der hagel dacht.
die red süln wir lazen. -
do si nv gesazen
nah dirre iamerchlichen chlag,
ez het div naht an dem tag
sam vollechlich gesiget,
sam der dem andern vnderliget.
des was wol ezzens zeit.
manik riht vnd süezez leit
von pigment reichen
gab man im wirtleichen.
hie mit sei der red genuoch.
do man di tisch wider sluoch,
si gesazen bei dem fivre.
vil manig auentivre
wart geseit vnder in.
amvrelle, div wirtin,
vnd ir tohter sgaypegaz,
die waren noch an vroeden laz,
vnd ir ivnchvrowen,
si mohten niht vol trowen,
daz im glük also wak
vnd also vroelicher tak
jn des morgens an lak.
manik vroelichz mære,
daz swand in di swære,
der si sich versahen.
nv was ez vil nahen
gereit an daz slaffen.
gawein sein gewaffen
des nahtes so bereite,
daz ez der arbeite
wol töhte des morgens.
vürhtens vnd sorgens
was an im gewissez ende.
so zäglich gebende
moht sein muot niht verdoln.
an daz bet hiez im holn
der wirt ein slaftrinchen.
nv muost div naht sinchen
hin mit vroeden an ir zil.
des nahtes slief er niht ze vil,
wan ez der tak vnderviench,
der sa zehant auf gienc
vnd im seinen slaf zebrach.
als snelle er den ersach,
er machet sich von der betstat
vnd nam bei im di sarwat
vnd garwet sich vil schiere
vntz hin zem härscheniere.
dar über er den helm bant
vnd gie, da er sein ors vant,
vnd satelt ez mit seiner hant.
als er sich auf machet,
nv was ouch e erwachet
sein wirt was her vür gegan
vnd vand in bei dem ors stan,
als er ez gesatelt het.
nv hort er von dahilet
her über velt micheln schal,
sam da sich auf ein veltwal
gesamt groz manneschraft
oder da sich auf ritterschaft
ein michel schar bewierret,
di leiht gewinnes ierret
ein ponder mit seiner chvnst.
von alsolher vrbunst
wirt da beidenthalben groz
beidiv schal vnd doz.
also gawein den schal vernam,
wan ir gevert was im fram,
er vraget, waz ez wære.
< daz sint di zolnære>,
sprach der wirt,< die also varnt,
da bei seit ouch ir gewarnt.
mit den sült ir vehten.
di choment mit ir chnehten
vnd wellent hie nemen den zol.>
div red was niht gereit vol,
vntz an di purch lieffen
zwen garzoun, di rieffen:
< wa nv, riter, wis bereit!
dich hat dein groziv tumpheit
verleitet ze grozer arebeit.>
die gartzvn hie mit geswigen,
vnd wart ouch in niht verzigen
von gawein, des si baten.
daz tor do auf taten
des wirtes gesinde.
von dem alten ze dem chinde
wart hern gawein dem degen
mit wunsch gegeben der segen,
daz in got bewarte.
div gleich niht gebarte
gawein, daz er im vorhte,
wan muot vnd heil worhte
an im mit gleicher tat.
nv sein örs gesatelt stat,
wes sol er beiten lenger vrist,
vnd er bereit des willen ist?
di red het er wol bedaht,
vnd wart ir daz ende braht.
zovm vnd satel er begreif,
dar in er an stegreif
vil starch snelle spranch,
daz im diu sarwat erchlanch
vnd sich daz ors gebouch.
an dem schilt er sich niht betrouch,
der wart ze hals gehangen,
vnd vnder üechsen gevangen
ein vil starch vellesper.
jn solher weis chert er
über di bruk ze dem tor,
da dise riter hielten vor
mit michelm schalle
vnd freuten sich zem valle,
der an gawein solt ergen,
wan in mit neide dise zwen
an der stat solten besten.
gawein auf dem velde nam,
do er über di bruk cham,
vil manig cherunge.
vnder im gie ze sprunge
sein ors, daz was behende.
nv chert er den ende
mit riters gebær,
da dise zolnær
hielten bei ein ander da.
er sprach:< wa nv, riter, wa,
wer sol den zol enphahen?
jch bin im wol so nahen,
daz er in wol nemen mak.
dar zuo ist ouch dirre tak
wol so chlar vnd so lieht,
daz er des verierret nieht,
er müg in wol schowen.
wan muoz aber in erhowen
e vnder üns hie also,
daz eintweder vil vnvro
stet, des bin ich gewer.>
hie mit neigten si div sper
mit michelm neide,
gawein vnd salmaneide.
da wart niht mer gereit,
wan riters behendecheit
wart da so vil erzeigt,
do div sper wurden geneigt
vnd di schilt gevazzet.
ein muot, der beite hazzet
vnder in beiden tougen,
der muost sich da ougen
svnder allrschlaht lougen.
minne wart vil tivre
auf dirre tiostivre
von beiden, als ich wænen wil,
wan ez was ein neitspil,
des niemen dorft lachen.
div sper hort man chrachen
vnd vil chlein zespringen.
dar nah hort man chlingen
div swert auf hertem stal.
wan sah ouch zallem mal
daz vivr auf flvchen
vnd in vil swachen stuken
di schild auf dem velde ligen.
dar vnder was der ruof geswigen,
des di gartzvn phlagen.
hie was niht wan wagen
vnder beiden guot vnd leip.
riters preis noch div weip,
dern het da dewederz stat.
swem da wart gesprochen mat,
der het nuor den leip verlorn.
der sich ergab in disen zorn,
der moht wol heizen ein kint.
seit si so gram ein ander sint,
so süln si sich starch wern.
jr einr mak leiht verzern,
daz immer vnvergolten stet.
salmaneid sich erwegen het;
daz im div chraft entswichen was,
daz chom da von, daz sein nas
ein wunden het enphangen
vnd het in übergangen
daz bluot mit so grozer chraft,
daz im an dirre riterschaft
also gärlich gebrast,
daz er des leibes ein gast
geviel von des todes last.
als er do auf die erde viel,
der tot ein wort durch sein gyel
mit iamerlicher stimme brach,
daz er zuo seinem bruoder sprach:
< jch bin tot, bruoder, sich,
deinen bruoder, bruoder, rich!>
seiner rede wart da niht me.
als lag er tot auf dem sne.
bruoderlicher triwe schein
tet sein pruoder ansgafein
an seinem pruoder an der stet,
wan in beiamert der bet,
di er von im het vernomen.
di weil was gawein bechomen,
vnd was sein ors geruowet.
leiht hat sich der gefruowet,
des sælden vngeluk phligt.
swie lang er slaffunde ligt,
swaz im ie doch werden sol,
des wirt er gewert wol.
ansgafin geschach alsam:
do er wider gawein genam
durch bruoders bet disen streit,
dannoch chom er wol enzeit.
nv daz also muost ergen,
daz er in wolt besten,
der wirt hiez im bringen dar
ein vesten schilt goltvar
vnd ein sper, daz was groz,
daz er wider seinen champfgnoz
an der stat solt vertuon.
vrid het end vnd suon,
vnd was ietwederm vil ger.
des wurden beidenthalp diu sper
mit kvnst geleitet dar vnd her.
der tiost wart begunnen.
als sich div ors versvnnen
der sporn in der seiten,
si begunden schier weiten
di sprüng auf der heide.
dise kampfgnoz beide
wurden schier zesamen braht.
nv was gawein dar an verdaht,
swer an dem anegenge
sich des ersten so verlenge,
daz er niht wol wirbet,
wie leiht dem verdirbet
dar nah alz sein ertzentuom
vnd wirt im vil chlein vruom
sein gahen vnd sein eyle,
so der siehtuom alle weile
dar an hat gehertet
vnd in hat verwertet.
gawein die rede bewarte:
seins gesellen er da varte,
daz er den stich niht verlos.
nider dez chinne er in chos
gen dem hals mit der lantzen
vnd warf in also gantzen
von dem örs vnverschroten,
daz er von enem toten
an der stet chlein gezoch
vnd daz ors über velt vloch
als ein tier wilde.
hie lag in dem schilde
ansgafin ervallen.
an seinen liden allen
het in der val verseret.
het er nv hie gemeret
sein ser vnd sein schande,
seit er daz wol erchande,
daz er dest mer verlür,
ez wær des mannes vngevüer,
swer zwei leit vür einz chür.
do er in dem schilde lak,
do vorht er des todes slak
von gawein leiden,
ob er salmaneiden,
seinen bruoder, wolt rechen.
do er moht sprechen,
er sprach mit truoben ougen:
< jch enmach des niht verlougen,
riter, ich muoz sein
jwer gevangen; geruocht ir mein,
so wil ich mich iv ergeben.
jr mügt den tot vnd daz leben
mir beidiv geben, ob ir welt.
mit meinem willen bin ich geselt
ze iwer vanchnüsse.
jch ergib mich vnd küsse
jvch als herren, iwer man.
nv seit genædich mir dar an,
daz ir mich enphahet
vnd mich niht versmahet.
waz mag ivch gehelfen daz,
ob ir so starch iwern haz
rechet, daz ir slahet mich?
mich hat erslagen doch der stich
vnd meins lieben pruoder tot,
des ist slahens vnnot
baz, dann ich bin erslagen.>
gawein bewach des riters chlagen,
vnd liez in da von genesen
also, daz er solt wesen
des wirtes gevangen.
do der streit was ergangen,
jn daz haus chert er zehant.
der wirt sich da vnderwant
seins gevangens an der stvnt.
ahy, wie wol er chvnt
den seinen heil beraten!
er moht sich niht verspaten.
den guotes herten, laten!
ein tot den andern begrabe.
wer solt den nemen dar abe?
also si den lemtigen
die lemtigen vnverzigen.
disiv red muost hie geschehen.
wan het vroeden vil gesehen
von dirre masseney hie,
daz gawein so wol ergie.
jn also grozer swære
was dirre zolnære,
der siech vnd gevangen lak:
noch beswart in des bruoder slak
mer dann sein selbes leit.
sgaypegaz, div rein meit,
lost gawein di riemen.
daz het si vür sich niemen
vil vngern lazen getan.
ouch moht vil gern dar an
her gawein sei vertragen.
sölhes dienstes werdent zagen
von vrowen gar erlazen.
hie mit si gesazen,
als er von ir entwafent wart.
nv wart niht lenger gespart,
wan bereit dar ein gramangyer
wol nah des mannes gir.
daz sprichet ein sölh ymbiz,
da guoter ezzen sölher fliz
von dem wirt an geleit was,
daz nien plæt noh enias
vmb daz hertz, der ez az,
noch anders dehein boesen waz
iemer gab von dem mvnde,
daz iemen merchen chvnde,
swie er sein enphvnde.
den tak vnd di selben naht
was da reicher vroeden maht
vnder in vntz an den andern tak,
der man durch seinen willen phlak,
daz er so wol het gestriten.
doch het er niht gar erliten,
daz er leiden solde.
do der wirt ietzuo wolde
mit seinem gesinde ezzen
vnd ze dem tisch was gesezzen
vnd mein her gawein mit in,
jn widervuor ein vngewin,
der ir vroede zerstorte.
auf di pruk vür di porte
kom ein meit wol getan
vnd bat sich in daz haus lan.
da von wart ein michel louf.
die di porten taten auf
vnd sei dar in verliezen,
die chnappen von in stiezen
die tisch vnd liefen dar.
disiv tugentreichiv schar
enphienc si mit eren,
als vil wol geleren
der wirt kvnd, ir herre.
wan sah wol, daz si verre
zem land was gestrichen,
wan dem pfärt warn entwichen
von der goff die praten.
di chnappen si baten,
daz si wolt erbeizen.
daz het der wirt geheizen.
dise red si niht versprach
noh ir zuht dar an zerbrach.
der chnappen bet da geschach.
div meit braht niweu mære.
wie wol si varent wære,
daz wurd übel verswigen.
jr vrowe wurd leiht bezigen,
ob ich ez niht seit,
daz sis so vngechleit
disem wirt auz ir lande
vor armuot sande -
den zweivel wil ich iv benemen:
si möht wol zeinem boten gezemen,
dem div reich warn vndertan,
sölh chleider vuort si an
von golde vnd von phelle.
swer dar an ir geselle
solt sein an dem lesten,
des armuot muost zebresten,
als mir div auentivr giht.
von meinr chost moht ich niht
ein meit so gechleiden.
nv wil ich iv bescheiden,
waz ir chleider waren,
vnd wil dar an varen
niht wan der warheit.
ein oberz chleit vuort div meit,
von scharlat ein chappen guot,
div ze tal auf di erde wuot,
mit zobel gefurriert,
dest war, die vil wol geziert
lauter chleinz weizez vel.
dar vnder was ein sarantel
bleyvar mit gold erweben,
der veder gleich an eben,
was lazen über ein svrcot
von weizen harmen svnder spot.
der rok was ein plyalt,
dar an von golde manichvalt
tyer vnd bild auf erhaben.
jr halsgolt was also ergraben,
daz nie bezzerz wart gesehen.
wan müest der selben meid iehen
preises an gewande,
der ez reht erchande,
allenthalben in dem lande.
bei chleidern so reichen
möht ich sei wol geleichen
einr fey an der schon.
swem si geviel ze lon,
der moht wol an sorgen leben,
wan ir natur het gegeben
ein also süezen anplich,
daz einem engel ein strich
an si wær geleit,
sah er si mit emzecheit.
waz toht von ir mer ze sagen?
sei het ein pfärt dar getragen,
daz was swartz als ein rab,
dar auf lac von reicher hab
ein gereit, daz dem phärt zam
vnd sich vil wol vür nam
von seinr grozen tivr.
ein sämt rot als ein vivr
bedaht den satel über al
vntz auf di erde hin ze tal.
des selben was daz banel,
wan daz ein schoen purper gel
durch gezierde was drüber gezogen.
von silber warn di satelbogen
auz ersniten vil wæhe.
von stein vnd goldes spæhe
was dar vnder er gezieret.
von porten was gefeitieret
der satel vil gevuoge,
surzengel vnd verbuoge.
auz silber warn di stegreif.
swaz gesmeides den zovm begreif,
daz was allez rotez golt,
mit edeln gimmen erbolt,
jch enweiz, waz bezzers wesen solt.
als schier si erbeizet was,
si gie auf daz palas
vür den wirt, da er saz
vnd mit seiner tohter az
vnd her gawein mit in zwein
vnd anderhalb div muoter ein
vnd der gevangen mit ir.
< vrowe, got vnd mir
seit wilchomen>, sprach der wirt.
der also wol enphangen wirt,
der muoz des danchen durh not.
der red si im genad bot,
als si vil wol chvnde.
dar nah si im begunde
mit schoenen zühten neigen
vnd bat, daz man sweigen
ein churtz weil solde.
wie gern er daz wolde,
sprach der wirt wider sei.
dem willen was ir danchen bei.
nv wart ein stille, div was groz.
div magd ein red entsloz,
die man niht gern horte da.
si sprach:< mein vrowe amvrfina,
div schoen von der serre,
blandocors, lieber herre,
div hat mich her zuo iv gesant
vnd bitet, gebivtet vnd mant
svnder widerrede dehein,
daz ir den herren gawein,
disen riter hie, mir gebt,
oder wizzet, daz ir nimmer gelebt
ein manod, ob ir da wider seit.
dan setzet ivch ze cheinem streit,
der wær mit alle gar verlorn.
si hat des ein eit gesworn,
scheid ich von hinnen vngewert,
daz ivch vivr vnd swert
also gar von ir verderbe,
daz allez iwer erbe
daz wilt beginnet bowen.
nv enbietet meinr vrowen
vmb di red, swaz ir welt,
ob ir einz habt erwelt,
daz ir mich niht mer entwelt.>
hie mit was dem wirt geboten.
do sprach her gawein ze dem boten:
< ay, ze iwern hulden bin ich,
vrowe mein, welt ir mich,
bereit, swar ir mir gebietet.
swar ir bæt oder gerietet
- ob got wolt vmb div -
an iwer vrowen von iv,
so solt iv niht sein verseit
mein reis vnd mein arebeit,
ob ir durft ware
von deheiner slaht sware.
swes aber iwer vrowe gert,
des sol si werden wol gewert
minnechleichen ane dro.
jch wil des immer wesen vro,
ob si mein ze ichtiv bedarf.>
daz tischlachen er auf warf
vnd gie von dem tische dan
ze dirre ivncvrowen stan
vnd bat im geben vrloup.
des wart vnvro vnd toup
div vrowe mit dem wirte.
swie er in lang ierte
der reis, doch muost ez sein.
< nv enbeitet niht lenger mein>,
sprach gawein ze der meide,
< wan ich von hinnen scheide,
swar ir mich beleitet,
swie schier ir ivch bereitet.>
schier wurdent div ors braht.
div meit auz dem hause gaht
vnd mein her gawein mit ir.
sein hertz truog in vnd sein gir
ze der reise, daz geloubet mir.
swa zwen sint auf topelspil,
ob ietweder gewinnen wil,
daz dehein weis mak ergen,
an einem muoz div vlust gesten,
so richet den andern guot gwin.
sam geschach hie wider in:
gawein vroelichen vuor,
des wirtes vrowe da wider swuor,
si müest da von verswinden.
also muoz einr vinden,
daz der ander verlos,
daz tet den einen vroedenlos,
den andern vil wol gemuot.
jegslichez dez sein tuot.
gawein vnd disiv magt,
als ich vor han gesagt,
die riten vroelichen dan.
swa nv ein weip vnd ein man
mit ein ander so verre riten,
jch wæn, da wurd niht vermiten
von in beiden vnder wegen,
des vrowe minne heizet phlegen.
daz was ab do von dem site.
einer meit reit ein riter mite
ein iar oder vürbaz,
daz si in chlein widersaz
von deheinr vngevüege.
ez sprachen aber nv genüege,
ob er si so verbære,
daz er boeser stiker wære.
mangen sit hat manik lant.
her gawein des nahtes vant
vil reich nahtselde,
die schuof disem helde
diu magt, sein gereise.
doch gar svnder vreise
beleib er ein sam ein weise.
war si chom, des weiz ich niht,
wan als der tak gab sein lieht,
do was div meit wider chomen
vnd het sein sarwat genomen
vnd truog si gawein dar.
dar in wart er snelle gar.
dann riten si do beide
über ein breit heide
an ein gepirge, daz was groz,
daz ein fürst gar besloz
vmb vnd vmb gemezen. -
einr red het ich vergezzen,
war vmb div meit in daz lant
von ir vrowen wurd gesant
nach gawein dem rechen.
daz wil ich iv endechen,
als sein div auentivr swert.
ein lant hiez forey vert,
daz was erbelos worden,
als ez got wolt orden,
von dem chünig, seinem herren,
den hiez man von der serren.
dem het einen suon verseit
vrowe nature, daz was im leit,
wan zwo tohter, di er liez,
die er des landes phlegen hiez
mit leuten vnd mit guot
vnd liez in ze huot
ein zovm vnd seit in daz:
heten si allr der werlte haz,
die weil si den behielten,
daz si des landes wielten.
nv was div ein elter,
des wolt si sein gewelter,
do der vater vervuor.
gewalt verchert des mannes fuor,
daz ervant ir swester sgoydamuor.
der zovm der eltern bleib,
dar umbe si von ir erbe treib
di ivngern durch ir gewalt.
sgoydamur dar an engalt,
daz ir der zovm niht wart.
vmb dise starch hochvart
kert si von der montanie
den wek gegen britanie,
so si gahest chvnde,
ob si artusen vunde,
daz si im ir leit chleite da,
wie ir swester armvfina
sei ir erbes verstiez
vnd ir niht enliez
dehein gewalt in dem lande,
daz er durch gote sande
mit ir einen kempfen dar.
des wart ir swester gwar.
daz widersaz si sere
vnd vorht, daz si ir ere
da mit gäntzleich verlur,
ob si gawein erchvr,
wan ir vatter ofte seit,
wie er ze serre mit im streit
vor der chlouse ze torrivre,
do er nah auentivre
jn daz lant was gestrichen.
wær er im niht entwichen,
er hiet in an der stet erslagen.
als div nv hort sagen
von im disiv mær,
daz er in dem lande wær,
si besant in mit dem liste,
daz si sich da mit vriste,
wan si ze deheinem andern man
nie dehein sorg gewan.
des wær ez übel verlan. -
gawein vnd sein geselle,
die riten ein gevelle
eins gebirges, daz was wilde,
da niendert weges bilde
an was noh enschein,
wan vil manik grozer stein
den wech het ervallen.
nv hort er vor im wallen
auz dem berge ein flaume,
dar inne kos man kaume
deheinr hant wazzer,
wan manic hauf nazer
da stein über ein ander vloz,
vnd was div fluot also groz,
daz man si mit einem bogen
vil chovm het überzogen.
sein runs sich niht geleichet
einem flavm, der leise streichet,
also div tiefen wazzer tuont.
sein rvns in der leute stuont,
so ez solde vliezen,
daz manz horte diezen
wol über sechs meile.
gawein an der weile
die ivncfrowen vragte,
ob seis niht betragte,
si sagt im, waz die leute,
die si horten, bedeute,
so starch vnd so grimme.
si sprach:< disiv stimme
von steinen ein wazzer geit,
dar innen div burch leit,
da wir heint süln sein,
dar auf ist div vrowe mein,
div nah iv gesant hat.
vnser wirt da vil guot rat.
der red ivch an mich verlat.>
dann riten si mit eile.
vil maniger chürtzweile
mit rede si begunden,
sam die gewizzen chunden,
da si ensampt warn,
mit manger hand marn
die stunde verswenden.
e diu sunne wolt enden
gen dem abent ir schein,
gawein vnd der geselle sein
warn an die torrivrn chomen.
nv het sich e vür genomen
div magt an die fluot.
als ir phärt in gewuot
vntz an di vezel ze tal,
div fluot gestuont über al,
stein vnd wazzer, vnd beit,
vntz ietwederz über gereit,
swie starch ez e fluze.
wes si dar an genvze,
daz ez nv stille stuont,
div red ist mir vnchunt.
do eilt si aber alsam e.
waz tohte da von ze sagen me?
dar nach si vnlang biten.
auf daz haus si do riten,
daz vor in an dem berge lak.
des nahtes seis gastes phlak,
div magt, als ir daz gezam.
do gawein auf daz haus cham,
nv hort er niemen noh ensach
dann ein getwerch, daz zuo im sprach:
< gawein, wis wilchomen her.
dir hat dein schilt vnd dein sper
hie hohen preis erworben,
da maniger von verdorben
jst, der sein hat gert,
vnd bistv der eren wert,
daz er dir gevallen muoz.
meinr vrowen wirt nu leides buoz.>
gawein geviel dirre gruoz.
hie mit tet ez sich ab wege.
nv was in einer reichen phlege
gaweins ors vnd ouch er.
vil schier chom div magt her,
div dar sin geleit was,
vnd vuort in auf ein palas
zeinem vivr, daz da bran,
vnd tet im reichiv chleider an
von einem tivrn sigelat.
da wart im sein sarwat
vil wol behalten von ir.
vil gar nach sein selbes gir
wart sein di selben naht gepfleit,
nuor daz er die schoenen meit,
die chünigin amurfina,
dannoch niht het gesehen da.
daz was sein meister vngemach.
vil oft er ze der meide sprach:
< wenn wil mich mein vrowe sehen,
als ich ivch hivt horte iehen,
div ivch nah mir gesendet het?
swie wol mein dinch anders stet,
jch sæh si vil gerne doch.
möht ich sei gesehen noch,
so het ich wol wirtschaft.>
dirre chriech vnd der haft
gawein des nahtes nie verliez,
vntz im div magt daz gehiez,
daz si in dar bræhte.
dv bringst in die æhte,
minne, der dir gevellet.
wie ist hie gesellet
so gahes man vnd weip,
der ietwederz des andern leip
nie gesach noch begreif!
swer stal an plein ie gesleif,
dem gebrast an dem vmbsweif.
swer mit einem vederspil
gern gahes vahen wil,
dem zeiget man vil dike
den vogel ze blike.
so man ez ze velde bringet,
als er sich dann swinget,
so wirft man ez dar zuo.
als geschach gawein nuo,
do sich allr sein gedanch
nah der schoenen meide swanch.
do was ez vil nahen,
daz daz wilt solte vahen
ein vederspil wol gezamt,
do gawein vnd div magt ensamt
sazen bei dem vivre
vnd er si bat vil tivre,
daz si im wolt bescheinen
di triwe, daz er di reinen
von ir gleit gesæhe
vnd daz daz schier geschæhe.
owi, brode, dv bist ze starch,
daz sich hie vor dir barch
an gawein so herter muot.
jch wæn, ez vrowe minne tuot,
div manigem an hat gesiget,
daz er von ir toter liget.
div het in vnderneiget.
jm wart von ir erzeiget,
wie si gesige, so si vaht.
ez hat ir chraft und ir maht
div werlt vnder sich gezogen.
swaz ir stral von ir bogen
triffet, der ist vngeheilet.
swem si ir gap mitteilet,
der mak immer gern leben.
wils im ir gnad ende geben,
so muoz sein muot in vroeden sweben.
si gert sein vnd er ir,
heil volget gleicher gir.
jetwederz was gevangen.
daz getwerch chom gegangen,
daz gawein enphangen het,
vnd sprach:< wol auf riter, get! mein vrowe hat nah iv gesant.>
div magt nam in an di hant
vnd weist in in di purch ze tal
jn den allr schoensten sal
vnd in daz best gemach,
daz oug ie übersach;
daz moht er gern schowen.
da vand er di vrowen
auf einem bette sitzen
mit weiplichen witzen,
daz was von der erd enbor,
vnd brunnen vier lieht vor
auf cherzstallen von golde.
da mit sein niene wolde
div vrowe haben genuoch.
ein tivrer lieht der kamerer truoch,
von balsem ein vil weitez glas,
daz enmitten in dem palas
von golde an einr ketten hienc.
als gawein in die kamer gienc,
si stuont auf von ir stat,
ein trit si vür daz bete trat
vnd gab im einen sölhen gruoz,
da von ein hertz lang muoz
erzündet vnd geseret wesen.
als ich ez en frantzoys han glesen,
si kust in an der stunde.
wol ir vil süezem mvnde,
waz er im da vroeden bot!
nv het gawein sein not
von dem gruoz überwunden
vnd het an ir erfvnden,
swaz siechen tuot gesvnden.
waz töht ez, ob ich iv seit
von so grozer reicheit,
der niemen ze niht da phlach
vnd gar zvnwerde lak,
von gold vnd von phelle?
swie groz guot man welle
nv ahten dar engegen,
daz hiet ditz überwegen,
da mit div chamer was bestreut.
gawein sich der meide vreut,
daz selb tet si sich sein,
wan ir varwe liehter schein
den liehten ir schein benam.
nature het dehein scham
erworben an ir leibe.
jch wæn, si nie von weibe
niht schoenrs gemachet.
sein het an ir verswachet
niht, dar an wære
dehein gebrest wandelbære
an leib noh an muote.
so het si mit huote
natur gestellet.
sich het an ir gesellet
ein stæt rot in lauter weiz
jn chleinem velle, daz ein fleiz
über marwez vleisch het gedent.
jr ougen warn so verwent
von einem lieht, daz was gra.
die zierten hoh pravn bra,
daz si div hertze staln,
swen si ze deheinen maln
mit güet an gesachen.
jr mvnt gie vil nahen
zesamen vnd ze reht groz,
des man an dem küssen gnoz,
jn rosen varwe gevar.
jr cen chlein, daz ende gar
lylien weiz vnd sleht.
jr nas was allen ende reht,
weder ze nider noch ze hoh.
jr har auf di püge zoh,
reid, val vnd gel.
beidiv kinne vnd kel
weiz vnd sinewel.
ir hals was eben, niht ze lanc,
weder ze groz noch ze chranc,
auf di achsel nider ze tal.
über schulter ze reht smal
sinewel niht ze lang arm,
hend weiz als ein harm,
ze dike noch ze dünne.
sælden wunsches wünne
lag an ir leibe eine.
jr vinger warn chleine,
lanch vnd gedræte.
jr nagel het ein stæte
begriffen einr varwe,
spiegel lauter begarbe.
vorn ze tal vnder dem mandel
da was si svnder wandel,
ze den prüsten gevüege.
jch wil, daz ivch genüege,
daz ich von ir gesagt han.
si het ein wat an,
div wol zam ir schone,
von einem pavilione,
des varwe als eins phavn gleiz,
dem ich niht geleiches weiz,
von gold vnd von seiden,
als ez vil wol erleiden
si an der koste mohte.
ein veder, div ir tohte,
was darvnder härmein,
div gaben beidiv schoen schein,
daz man ez wol preiste.
von zobel was ein leiste
von dem hals vntz auf die erde
jn also reichem werde,
daz man in wol müeste loben.
div tassel vnd di snüer oben
von rotem golde waren.
si truoc ouch einen aren
an einem halsgolde;
ders werchs wünschen solde,
der het ez niht vertivret.
daz werch ein lieht stivret
von einem rvbin, der da schein.
swie bei im lak manig stein,
jr chraft von im einen swein.
ein schappel ir har betwanc,
dast war, daz was niht ze kranc,
von golde vnd von gesteine.
daz werch, daz was chleine,
vil wæh gewieret.
daz het illuminieret
ein smaragd hie vorn,
der behuot si vor zorn
vnd chvnd ir sælicheit geben.
jm lac zeswenhalb enneben
ein paleis, der was lieht,
der liez ir gewerren nieht
deheines übeln leibes neit.
winsterhalben dirre seit
ein edel topazi lak,
der ir vor allem zouber phlak,
des mag er übel vinden.
an ir houpt lag hinden
ein saphir vil heiter,
der behuot si vor eiter
vnd gab ir vil süezen muot,
da vür ist sein kraft guot.
si truok zwen armbouge
so guot, daz dehein ouge
nie dehein bezzer gesach.
der riem was niht ze swach,
des sült ir wol sein gewis.
div ring was ein iaspis
durchsichtig vnd grüen.
des nature ist so chüen,
daz er vür liebes siechtvom
den vrowen allen ist vrum.
der riem was von irlant.
von einem roten iochant
warn div spängel gesliffen.
den riemen het begriffen
ein vil edel ceraunivs.
der was da niht vmb svs.
der was leibes huote,
so daz weter starch wuote
mit blichen vor der fluote.
wan möht der meide schone
nah wars lobes krone
über die göttinne preisen,
vur palladem, di weisen,
vnd ivnonem, die reichen.
jr moht ouch niht geleichen
venvs, div wider paris
vnder in behabt den preis,
div sich nachet erzaigt vnd in damit geneigt,
daz er ir gar preises iach,
vnd durch ein wort, daz si sprach.
wær vnder in gewesen da
div schoen meit amurfina,
si het erleschet ir schein,
daz ir der apfel guldein
vnder in worden wære
von rehtem rihtære.
si saz auf einem bette,
daz ich daz wol verwette,
daz ie bezzerz wurd ersehen,
swie ich grozer tivr horte iehen
einem bet, daz ze salye
het von nygromancye
ein pfaff gemachet,
von listen so gesachet
künig artus muoter,
da guoter noch vnguoter
nimmer möht an geligen,
ez wær gar an im verswigen
beidiv laster vnd schande,
do si mit im von lande
mit grozem schatz wande.
avf disem bet wart ein stat
zuo der meit in den schat
gawein dem held gegeben,
den in beiden bot vil eben
ein so gemeistert schermbret.
daz getwerk vnd aclamet
di schuoffen vmb daz ezzen,
vnd beliben hie gesezzen
bei ein ander vnder in zwein,
amvrfina vnd gawein,
an allr schlaht gesinde.
jr rede div was linde
vnder in vnd lobesam.
vrowe minne het alle scham
jr von dem hertzen gesniten,
si het sein anders niht erliten,
daz si so ein waren.
swie minne wil gebaren,
wer mag ir des wider sein?
des ist manigen ende schein,
da wir sein vinden bilde.
niemen ist so wilde,
si hab in schier gezamt.
sint mit vroeden hie ensamt
disiv zwei, daz wil vrou minne,
wan ir hertz mit einem sinne
jr sloz het gemerchet
vnd het ez so gesterchet
mit alsölher gewarheit,
daz ez dehein cvnterfeit
jemmer mög entsliezen:
des muosten si nv geniezen
vreude beidiv svnder danch.
seit vrou minne disen chranch
hat geworfen dar vnder,
so ist ez niht ein wunder,
daz si sich minnent svnder.
wes si da gedahten, waz weiz ich,
wan div auentivr beweiset mich
jr red vnd ir blike,
die si beidiv vil dike
vil minnechleichen gulten,
di beider hertz vulten
mit also süezem waze,
des süez nieman maze.
wunsch an missewende
vert baz an dem ende
dann an dem anegenge.
jm wart nie so enge,
ern vunde bedenthalben rovm.
disen süezen minne sovm
truogen si mit ringer hant,
wan ir ietwederz vant
den andern da des willen
bereit: daz muoste si stillen,
si heten anders swær getragen.
gawein endarf ez nimmer chlagen,
daz er ein weil bechümbert was,
seit er sein so wol genas.
des danch er vrowen minnen,
div ir daz hertze brinnen
nah im an twal hiez,
vnd in des selben niht erliez.
wer solt ez in beiden weizen?
swer sich nv wolde vleizen,
daz er an ir bespræche
weibes güet vnd zebræche
jr lob als ein arch valsch man,
der velschet sich selben dar an,
wan ez vil gar vrou minne tet.
ez wurde verzigen manig bet,
div vil oft geschiht,
dar an man sich übersiht,
vnd tæt ez vrowe minne niht.
an in behabt minne ir streit.
nv was ez vor der ezzens zeit,
des cham ditz getwerg vnd diu magt,
daz gawein vil starche chlagt
tougen in seinem muot,
daz er vnd div guot
sich mit rede solten scheiden,
swie ez doch in beiden
vil chlein möht geschaden.
si het minne so geladen
auf ein ander mit liebe,
daz ietwederz ze diebe
was worden an des hertzen steln,
daz enmoht sich da niht verheln.
waz het ich iv da von ze sagen,
wie manik riht da wurd getragen
oder waz in wurd geschenchet?
swes ir da von gedenchet,
daz habt iv vür di warheit.
wan so vil seis iv geseit,
daz ir gesindes niemer was,
die vor in auf dem palas
ze dirre weil sazen,
da si ensamt azen,
wan div magt vnd daz getwerc
vnd vrowe minne vnd ir geberc
bei gawein vnd der meide.
beider hertzen ougenweide,
div was vür war div vünfte
ze dises gastes chünfte,
als ez des selben nahtes schein.
jr beider leip was ein,
eins willen, niht vnd ja:
so het vrowe minne erbowen da
jn einr churtzen stvnde.
dem si in sölhem gvnde
dienet, der mak wesen vro.
jr bant lit ich vnd ir dro,
wolt si mir immer lonen so.
seit vrou minne was vnder in,
so muost ir leip vnd ir sin
von schulden sten ze ir gebot,
wan swa sich der minne got
hin ze streit gesetzet,
da wirt der sin ergetzet
allr seinr weisheit,
der er ie hat gephleit,
vnd muoz der minne volgen nah.
tumben ist ez chumbers schach,
ob si in ze reht bestrichet,
wan si in vil leiht niket
ein wadel hertz, daz ez muoz
volgen, swa si kert ir gruoz
ze sælden oder ze vnheile,
der wir an sölhem teile
mügen hart vil ervinden
vnder alten vnd kinden,
da ir gewalt scheinet an.
wie lak der arm totan
vnder beten erdruchet!
wie schier het si enzuchet
dem weisen salomone
des weistuoms chrone,
daz er nah ir gebot lebt!
jr gewalt so ob der werlt swebt,
daz ir iemen mög entrinnen
mit deheinen seinen sinnen,
des si wil geruochen.
si heizet den weisen suochen
jn der gluot mit dem kinde daz ei,
so bricht si im den sin enzwei.
wer mak sich da behüeten vor?
nv was der gast in ir spor
mit dirre meid getreten,
vnder ioch beid geweten
mit vnrlosthafter keten.
do was ez an den slaf gereit.
daz twerc vnd div schoen meit
ein slaftrinchen brachten,
daz si niht überdahten,
als ins amvrfina gebot.
da von gawein in groz not
kam, als er ez getranch,
wan sein leip vnd gedanch
wart im vil gar vercheret
vnd so hertzenlich geseret,
daz im alsölhe wunden
niht alle arzt chvnden
geheiln mit ertznei,
ezn tæt sin amey,
amvrfina, div schone,
die im vrou minne ze lone
gehiez vnd stæt swuor
vür ir swester sgoydamuor:
div moht in wol geheilen.
nv muoste sich zerteilen
daz gesind vnd zerlazen.
bei ein ander da gesazen
amurfina vnd her gawein
vnd vrou minne vnder in zwein;
di andern schuoffen ir gemach.
nv sprechent: was div huot swach,
div ir zweir huote?
jr wænt, daz bei der gluote
daz stro nahen lage,
seit ir vrou minne phlage,
daz het gawein vertragen
niht. ich wil iv mer sagen:
daz enwas da niht leider.
ein huot phlac ir beider,
der gawein niendert weste,
div was also veste,
daz er erlac ze leste.
ob mich des nv verdrvz,
daz ich iv niht entslvz,
waz disiv huot wære,
so dauht ivch leiht daz mære
nuor halbez geseit.
ein swert schoen vnd breit
miten ob ir bete hienc.
daz selb wunder begienc,
daz ez übel ze glouben ist,
daz sölh chvnst vnd ir list
jmmer möht fvnden sein.
ouch nim ich ez auf di triwe mein
niht, daz ez war sei.
swer der meid solt ligen bei
vnd ze deheinr vnstæt
si immer iht gebæt
oder wolt betwingen
mit vngevüegem ringen,
mit willen oder svnder danc,
als er denne mit ir ranc,
so sleif ez auz der scheide
vnd half dirre meide,
daz ir von im niht gewar,
vntz im der muot ze stæte gar
ze ir stuont vnd ze triwen,
daz si in deheinen riwen
von im dar nah iht belibe,
so er wol mit ir getribe
gar seins hertzen girde,
sam maniger sein vnwirde
den weiben noh erzeiget,
als er ir muot geneiget
ze seinem willen, als vrou minne wil.
wan ir güet ist so vil,
daz si leiht sint ze triegen.
swer von minne in wil liegen,
sein chvnnen niht wider kriegen.
hie rat nv ein weiser zuo,
wie gawein seiner sach tuo.
der ist von minne ze verche wunt
vnd mag wol werden gesvnt.
der artzt ist nv nahen.
wolt sein gnad vahen
fortuna an der weile,
minne würchet mit eile
alsolhe temperunge,
div snelle verdrunge
allen seinen siechtuom.
waz ist im allr beste vrum,
seit si sein alle drei gernt
vnd di wunden so starch swernt,
die minne beiden het geslagen,
vnd des niht noch wil vertragen,
daz si da von verderben?
si mögen niht ersterben,
si müezen beidiv gnesen.
swie gawein muoz stæt wesen,
als er was ennenher,
so sint beidiv sein gewer,
amvrfina vnd daz swert,
seit ez nuor stæt gert.
daz bet was gemachet.
vnder disen zwein wachet
vrowe minn, div si schunde
vnd beidiv so enzvnde,
daz ir muot bran enein.
nv wolt mein her gawein
geleist haben minne reht.
do wart sin gird nie so sleht,
als er sich doch versach.
daz swert sein girde zebrach:
als er die vrowen ane greif,
ze tal ez auz der scheide sleif
vnd gurt in enmiten als ein reif.
seinen leip ez so sere twanc,
daz er des leibes wart so kranc,
daz er des wand vür war,
er solt sein bliben bar.
die meit er genaden bat
vnd lie di hende von ir stat
wider auf daz bete seigen.
jm began vil gar gesweigen
sein chraft von der vnmaht,
div daz swert an im endaht.
als lag er sam ein toter man,
nuor daz er sich versan.
er want aber wesen tot,
do im zem ersten niemen bot
dehein helf seinem leibe.
wolt er si ze weibe
jmmer da gewinnen,
er müest von seinen sinnen
sei mit stæt meinen.
wie solt er daz bescheinen?
er hat sich endechleich ergeben,
do er niht lenger wand leben.
er sprach:< sel, nv var hin
vnd wis ir immer, der ich bin,
seit si mich niht mag ernern.
dv solt ir di stæt swern,
der ir der leip schuldic ist,
wan dv ir mit mir bist,
von der ich leit den vngemach.>
als schier er die red gesprach,
daz swert wider von im gevuor.
daz er sölh stæt swuor,
daz was an alle valscheit:
amurfina, div rein meit,
moht si vil gerne nemen.
sin möht si beid wol gezemen,
daz si sich minnen solten.
oft hat si den vergolten,
minne, di ir volgen wolten.
also snelle gawein enphant,
daz sein kvmber da verswant
vnd im den leip daz swert verliez,
vrou minne in vro wesen hiez
vnd enphalh im amvrfinam,
also daz sein stæt lam
an ir niht werden solde.
die selben red er wolde,
do ers zuo sein triwen enphienc.
wie ez im dar nah ergienc,
daz wirt iv hie niht verswigen.
jr minne wart im niht verzigen,
do er ir mit triwen gert,
daz si entweder noch daz swert
jn dar an zehant iert.
nv ist gawein ze wiert
worden, der e weiten
nach vehten vnd nah streiten
daz lant suoht mit vreise.
nv muost er aber gereise
vrowen minnen sein sunder danc,
als er daz posavn getranc,
daz im schenket aclamet,
wan ez in der sinne ane tet.
div red wil ich iu losen baz.
div meit braht ein goltvaz
an daz bet dar in beiden,
als ez ir was bescheiden,
des nahtes, do er mit ir
beidiv willen vnd gir
mit lieb het volendet:
dar an was gewendet
ein also stärchiv meisterschaft,
daz dises posavns chraft
niemen zebrechen chunde.
als schier er ez ze dem munde
jn dem goltvaz bot,
er muost minnen oder den tot
da von zehant kiesen
oder den sin da von verliesen:
der dreir muost einz wesen.
anders moht er niht genesen,
als ich da von han gelesen.
ditz vil starch zouber
tranch gawein vil souber
auz vnd amvrfina,
da von er die sinne da
als endeleich verlos,
daz er vil gar sinnelos
sich selben niht bechande
vnd wand, daz in dem lande
er ie gewesen wær
herr vnd gebietær.
so schier was er sein gewon
vnd wand, si wær sein ekon
gewesen wol dreizech iar.
er het sein so vergezen gar,
daz er sein eigenen nam
weder bechant noch vernam
noch enwest, wer er selbe was.
sein hertz sam ein adamas
nie deheinr manheit gesweich.
daz was nv broed vnd weich
vnd bechant sein selbes niht.
dirre wandelvnge geschiht,
die muost riters nam bechlagen.
da wider muost vreude tragen
div vrowe vnd vrou minne,
den beiden er di sinne
het vnd sich gar geselt.
er het beider da erwelt
vlust zeichen vnd gewin:
er gwan ir minne vnd vlos den sin.
swem div beidiv geteilt sint,
der dauht mich tumber dann ein kint,
der ir daz erger næm.
minne ist genæm,
der vnfruot widerzæm.
der red si vil vnd genuoc.
als schier der tac die naht gesluoc
mit lieht ab seinem ringe,
vier schoen ivnglinge
wol von dreizic iaren,
di riters namen waren,
schoen vnd wol gechleit,
vnd als manic schoeniv meit
vnd ein alter kappelan
giengen vür daz bete stan
vnd hiezen gaweinen wachen,
ob er sich wolte machen
auf ze einr messe.
dar nach chom ein presse
von vrowen, div was starch lanch,
nach den von rittern ein gedranch,
wol gechleit vnd groz,
der iegslicher hvsgenoz
des reiches phalnz möht sein.
die taten wol der rede schein,
daz si sein man waren.
wan moht ouch niht ervaren
an den vrowen wider weibes zuht.
mit dienstwillen gleicher vruht
gruozten si ir herren
vnd nanten in von der serren.
niemen hiez in gawein.
nv was er sinnes also ein,
daz er si wand erchennen,
als er si hort nennen,
vnd wand si ie han gesehen.
daz was des nahtes im geschehen
von einem posvn, als ir habt vernomen.
wie solt er nv dannen chomen,
seit er sich niht bechande?
also was er in dem lande
bei der vrowen verlegen,
daz er lie gar vnder wegen,
des riters name solte phlegen.
seit gawein ist worden wirt,
der di straz nv verbirt,
swer si ie doch bowen muoz,
der saumet mangen süezen gruoz,
der im von im wurd erboten.
nv riten vnd gen boten
di gest laden in sein haus.
hie ist der ander artvs,
der niemen niht versagen chan
vnd mit geleichem willen gan
dem armen vnd dem reichen
seins guotes wirtleichen
gar an afterriwe.
daz borg ich auf mein triwe,
vnd daz man in vil gerne siht,
vnd des wirt gevraget niht,
wie lang er da welle
beleiben hofgeselle,
vnd als er denne scheidet,
daz er niht wirt geleidet
mit deheinem beispræch,
da man mit nah ræch
dise speis vnd daz ezzen,
sam manigem wirt gemezen
hin nach, wie vil er verzert.
ouch wirt ez im niht erwert
so an dem anegenge,
daz man durch in verlenge
daz ezzen, als ez ist bereit,
da man mit manigem verseit,
so manz so lang zivht auf,
vunt er ez dann umb dehein chauf,
er belib zwar niht langer da.
jch rat, daz man anderswa
von sölhen wirten kere
vnd laze si mit vnere
jr guot ein niezen.
die des niht kan verdriezen,
si wechseln guot vmb ere,
daz dar ein man kere,
daz ist mein, heinreiches, rat,
wan er daz niht verlorn hat,
swaz er den vroede machet.
zweir dinge wirt man verswachet,
diu starch mögen gewerren
den gesellen vnd den herren,
da div niht ze reht zement,
swenn in edel herren nement
boes gesellen vnd ein vrvm man
von boesem herren niemer kan
komen vmb den leihten muot,
ob er im ein swachz guot tuot.
den beiden wil ich vmb ir leben
ein war gleichnüs geben
vnd wil in niht liegen.
jn ist sam der vliegen,
di durch swaches glüches suoch
vellet in ein svttuoch,
dar vmb si den leip geit
vnd verbirt den edeln sæmit,
ob er anderthalben leit.
der nv suochet auentivr,
seit minne ir tiostivr
hern gawein enpholhen hat,
nv mak her pover parat
wol di straz powen.
nv werd ouch hie verhowen
von gawein der minne schilt
vnd gezamt daz vngezam wilt,
daz si nv sein arebeit.
swaz er ie vaht vnd streit,
des hat er nv vergezzen.
er muoz mit ellen mezzen
die sleg vnder der minne zelt.
swie kvrtz vnd smal sei ir velt,
er vindet tiostivr vil,
so sein champfgeselle wil
neigen schilt vnde sper.
jch gloub wol, vnd hat er
sein stat an den vellespern,
er vind sein guoten gewern,
swie vil er sein erzivg.
wan disem vrlivg
vliehen verre baz zimt,
dann der im ze ofte nimt
streit; ob er wil gesigen,
der muoz sigelos geligen,
vnd gesigt, der da flivhet.
wan minne den schivhet,
der ir alles vlivhet vor.
swer dann tritet in ir spor,
der enchan sich niht erholn,
wan er muoz alleweg doln
streit vnd doch dar vnder
sigelos vnd wunder
geligen, von vrowen minne
beroubet allr sinne.
daz gevellet im ze gwinne.
nv kern wir zünserm mær.
wie lang er da wær
jn vrowen minne bande,
als mich diu fabel mande,
daz wil ich iv vil rehte sagen.
si seit, ze fünftzehen tagen
was er ir so gebunden.
do wart seinen wunden
geboten sölh artzney,
daz seiniv bant brasten enzwei
vnd wart im ein teil baz.
do er ob seinem tische saz
mit seiner massenie,
amvrfina, sein amye,
hiez tragen auf den tisch dar
ein schüzzel von golde gar
mit zwein tischmezzern,
div niemen verbezzern
kunde von deheinr tivre,
von so gar reicher stivre,
daz niemen bezzerz möht haben.
auf der schüzzel was ergraben
von zwein ritern ein streit
vnd beider namen svnder neit
auf si beid geschriben.
der riter einr was beliben
vorm andern nah sigelos,
vntz er im da ze helf kos
ein wazzer, dar er in geweich,
do im sein chraft gar gesweich.
dar vmb also geschriben was:
vor gawein vil choum genas
von der serre laniure,
so er da ze torrivre
suocht aventivre.
waz dirre streit meinte,
als ez div schrift bescheinte,
daz wil ich ivch wizzen lan,
als ich ez vernomen han.
do dirre vrowen vater lebt,
des hertz also hoh swebt,
daz er durch sein manheit
manigen ende in dem lande streit,
da er aventivr vernam.
eins tages ez von geschihte cham,
daz er gawein ervant,
als er in sein selbes lant
über torrivre wolte sein.
an der stat tet er schein,
wes ie gert sein hoher muot.
an dem furt bei der fluot
mit gerndem neid bestuont er in.
do geviel im der vngewin,
daz er in abem gevilde
treip. daz groz vmbilde
wolt er vor seinen ougen
alle tag svnder lougen
dar nach an seinen tod haben
vnd hiez ez also begraben
auf seinen doplyere,
vnd dar nah also schiere
vor leide gab er auf daz swert.
nv wolt amvrfina den wert
die riter da lazzen sehen,
waz an ir vatter was geschehen
von gawein ir amyse
von riterleichem preise,
swie ir vater wære
ein riter also mære,
daz er wol mit riters tat
lobes vnd preises rat
über alle riter het beiaget,
vnd vor gawein verzaget,
daz er in dest baz behaget.
als si auf den tisch getragen wart,
div vrowe durch ir hochvart
hiez si von tisch ze tische tragen
vnd hiez den rittern allen sagen
besunder ditz mære
vnd vragen, wer in wære
lieber ze einem herren,
daz er bei in ze serren
vürwar immer solte sein,
an dem da schin siges schein
oder an dem div fluht da schin.
si sprachen alle vnder in,
si wolten den ze herren han,
der so manleich het getan,
daz er den andern vertreip
vnd er an dem sig beleip.
do wart in gezeiget der ein
vnt genat, er hiez gawein,
dem ir herre lanivre
entweich in die torrivre,
er sæz bei ir vrowen dort.
do wart ez ein gemeinz wort,
daz si alle got baten,
der sie sein het beraten,
daz er in behuote
vor allem vnguote
vnd in lang lieze leben.
div schüzzel wart her wider gegeben
auf den tisch vür si beide,
jn beiden ze ougenweide.
vil ofte si gawein an sach
vnd marht, waz div schrift sprach.
er verstuont aber der rede niht,
nuor daz er die geschiht
wol marht von den bilden,
wie si sich mit den schilden
dachten vnd mit den swerten
ein ander starch gerten
vnd sleg vil gewerten
den streit sah er so lang an,
vntz er sich do so vil versan,
daz er seinen namen las
vnd gedaht:< der selb ich, wæn, was,
der also was genant.
jch, wæn, aber in erchant,
ob ich sein selbes niht enbin.
jst daz mich trivget mein sin,
so wæn ich, ez sei mir geseit.
vil manig groz arebeit
han ich doch von im gesehen,
swa ez halt sei geschehen.
jch pin leiht eteswenne,
daz ich in so wol bechenne,
gewesen sein geselle.
manik ritterleich velle
sach ich von im auf tvrney,
da er manic sper stach entzwei,
der selb waltswende.
ez habent sein hende
vil mangen ritter entworht.
sein hertz was vnervorht,
swa man manheit prüeven solt.
wer hat so manik vreis verdolt
durch riters preis alsam er?
ez hat sein schilt vnd sein sper
vil manig not bestanden
allenthalben in den landen,
swem seinr helf durft geschach.
weibes leit was sein vngemach.
swar die solte versprechen,
daz getorst er wol rechen.
ob ez mir niht getrovmet ist,
jch sah in in kurtzer vrist,
swaz nv sei sein mitwist.>
also sprach er wider sich:
< wie heiz ich, oder wer bin ich,
oder wannen bin ich chomen her?
nv bechent mich doch eteswer,
der mich e gesehen hat.
jn swelher aht mein dinch stat,
jedoch so bedunchet mich,
daz ich mit spern mangen stich
auf tvrney hab getan
vnd vil oft den preis gewan,
da riter ensamt waren.
je her in meinen iaren
bin ich gevarn riters weis
vnd het vor allen den preis,
den da ze tavelrunde
jr tugend der stat gunde
bei dem chünig artvse.
vil manig wilde chlvse
han ich ein ervohten,
die alle chünig enmohten
mit hers kraft gefreien.
jch behielt vrowen janphyen
jr erbe wider ir swester.
jch sluog von clintester
den risen chalangelle.
jch lost von der kelle
mit zweinzich ritern lohonis.
jch rach die vrowen andochlys,
der jasin ir vrivnt sluog.
jch half zazant, do in truog
ein wurm gegen seinem hol.
jch ranch da zeigangsol
mit der wilden macleide.
ysazanz, der schoenen meide,
half ich von anfroyhin,
do er si e wolde vüeren hin.
jch brach zouber da ze chladet,
da von mein vrivnt, her lantzelet,
vil nah was verbrvnnen,
vnd wær mir niht entrunnen
jn den berch garamphye,
er het daz ris lazen hie,
dar an so grozer wunsch lak.
vbern furt da ze katharach
vuor ich an di wilden hab,
da ich vant di reichen hab,
die parcefal suohte,
do in div meit verfluohte:
daz sper vnd den reichen gral,
daz alle tag ze einem mal
bluotes drei tropfen warf.
jch sluoch ze bleymaradarf
saranden, den valant,
der die svnne bei dem mer slant.
jch schuof des prunnen mangen trunc,
da von man muoz wesen ivnc,
jn dem garten ze yedochel.
kambroyos was nie so snel,
er müest mir iehen sicherhait.
fimbeus bot mir seinen ait,
do ich im den gürtel nam.
edysson tet mir alsam,
do er segremors verriet
vnd von im auz der noet schiet,
do in daz wilde weip geviench.
do daz allez ergiench,
do, wæn, ich gawein hiez.
do nahest sich der hof zeliez,
do was ich da zwar mit in,
ob ich ez gawein pin,
vnd solt ze helf chomen sein
einem chünig, der mit grozer pein
von einem risen ist bevangen.
wie ditz sei ergangen,
des muoz mich verlangen.>
also saz er vngaz,
daz er der red niht vergaz,
vntz er sich reht verdaht.
zehant er nah dem mezzer gaht,
daz vor im auf der schüzzel lach,
vnd tet im selben einen slak
da mit zvo sein selbes hant,
daz ez an der tavel widerwant,
vnd spranch von der tavel auf.
nv wart ein michel zvolauf
von den ritern, di da sazzen.
div vrowe muost ouch lazen
beleiben daz ezzen.
gawein der vermezzen
bat im bringen sein sarwat.
da wider in daz gesinde bat,
daz er sein niht entæte
vnd bei in immer stæte
wær herre zweier lande.
swaz man an in bewande
beidiv fleh vnde bet,
dar vmb er enweder tet
vnd iah, er müeste reiten,
des möht er niht enbeiten
ein tak lenger vürbaz.
er muost aber in geheizen daz,
als er ez dort volendet,
daz er dann wider lendet,
als er snellist möht,
ob ez im also töht.
hie mit er von in vrloup nam
vnd kuste sa amvrfinam,
sein lieb vrivndinne.
mit starch süezer minne
schiet her gawein dan.
da leit in weib vnd man
mit segen in glükes ban.
er von dannen schiede,
daz getwerg garanphiede
braht im ein gab ersam,
ein swert, daz er gerne nam
von seiner amyen,
daz stal sam weichen bleyen
vil wol ze beiden eken sneit
vnd dehein hert vermeit,
vnd einen schilt vesten,
der übel moht zebresten,
der was im ein maure.
sein velt was von lazaure,
dar auf ein sloz von golde,
da bei man wizzen solde,
daz im het vrou minne
beslozen seine sinne
gar in seinem leibe,
ze dienen einem weibe
vnd anders deheinr
mit niht dann ir einr.
hie mit reit er danne,
daz im allr seiner manne
wan daz selbe was sein sit,
einr niht volget mit.
daz er gesellen ie versprach,
daz er ouch hie niht zebrach.
si warn dan mit in geriten,
wolt erz mit in han erliten.
si waren im so willich,
daz si alle in des todes strich
mit im geriten waren.
daz wolten si bewaren
jr herren sam getriwe man,
wolt erz in gestatet han.
des wolt er tuon niht.
ein chleinen trost er ubersiht,
dem oft zarbeiten geschiht.
danne reit er die straze
wol breit in der maze,
daz sich sein örs wol ergienc.
ze winster hant er ab vienc
jn ein vinster tan einen stich.
da kert er in den selben sich
durch den wek, der was guot.
schier chom er zeiner fluot,
da gewan er groz arebeit.
bei dem wazzer er ze tal reit
vnd suoht brvk oder furt,
oder ob in iemen über fuort,
der überz wazzer wolte varn
an barchen oder an varn.
da wolt er gern über sein.
nv sah er verre einen schein
vliezen auf dem flaume.
daz chos er vil chaume,
als ez ein barche wære
ane barchenære.
da kert er gegen hin:
daz tet er auf einen gwin,
daz er dar inne vüere
vber flaumes wüere.
schier was er chomen dar,
nv ward er bei im gewar
von dem wazzer vil nahen da
einr vil wunderlicher sla,
der er niht bechande.
auf die sla er sich wande
durch des spors wunder
vnd woldez vnchvnder
erchennen, ob er kunde.
do was ez einem hunde
vorn zen zehen gelich,
hinden was ez ellich
bloz sam eins mannes leich.
als er daz spor ersach,
zuo im selb er ofte sprach:
< waz hat getreten ditz spor,
daz ez so hoh scheinet enbor
vnd doch also lanch ist?
auf dein genad, herre crist,
wil ich dem tier volgen nach.>
der vert wart im also gach,
daz er sich nie moht enthaben.
den wech gen einem hohen graben
kert er daz ors mit den sporn
durch hak beidiv vnd dorn,
vntz er di sla reht ervant
hoh auf einr stein want,
da ez hin was gecheret,
sein reis er vil starch meret.
als er begreif di rehten sla,
auf dem weg vor im da
vand er einen zopf ligen,
mit weizen börlein wol berigen,
valwen vnd langen,
da wilt hin was gegangen
vnd het in zefüeret gar.
auf huob er daz schoen har,
daz er ez wolte schowen,
vnd sach, daz einr vrowen
oder einr meid gewesen was.
auf dem sne, auf dem gras
spurt er bluotes tropfen drei,
die dem zopf lagen bei,
die warn lauter vnd lieht.
nv enduht in des selben nieht,
ern sæh dar inne
seinr lieben vrivndinne
antlütz, amvrfine,
von dem bluot auf dem sne.
daz tet seinem hertzen we.
avf die sla kert er dar
reht allez nach der var,
das allez vor im hin gienc,
vntz er di steinwant gevienc,
da ez über was gestigen.
nv was der abent zuo gesigen,
daz was im vil starch leit.
dor also wartend reit,
er hort vor im rüeffen,
starch weinen vnd wüeffen,
als ez ein weip wære,
div mit vil grozer swære
wær bevangen an dem leibe.
nah der stimme von dem weibe
began er starch eilen.
jnrhalp zwein meilen
het er si erstrichen.
nv was im entwichen
daz tier auz dem wege
gen einem hol, da sein lege
was ze allen zeiten,
als ez in zuo reiten
sach auf der sla hinden.
ouch nv wolt er niht erwinden,
do erz an sehent wart,
vntz er im di zuovart
jn daz hol gar benam.
waz ditz tier vreissam
was, daz wil ich sagen.
ez het in allen seinen tagen
da gepawen daz hol,
vnd was allenthalben vol
an seinem leibe bevangen
natern vnd slangen,
vnd was ein wilder wazzerman.
dise magt wol getan
het er gezuket svnder wan.
als er im daz hol verreit,
niht lenger er bei im beit,
von im wolt er kern hin:
nv mant div arm magt in,
daz er ir hulf auz der not
oder ir schier gæb den tot,
vnd sei doch so erloste,
seit in got ze troste
nv ir armer dar het gesant.
des was er leiht ermant.
gen dem tievel kert er
vnd stach auf in mit dem sper,
daz ez durch di schulder prach.
den stich er an der meide rach
vnd wolt si zebrochen han,
do sluog er dem wilden man
mit seinem swert einen slak,
daz im der reht arm lak
von den slegen auf dem gras,
da von div meit genas.
di muost er lazen vallen.
sein waltgesellen allen
begund er chlagen sein schaden
vnd dar ze seiner helf laden
mit greuleicher stimme.
nv wart der sturm grimme
von seinen waltgenozen.
die chomen zuo gestozen
mit sölher vngebær,
als ez ein hagel wær
vnd den walt nider valt
mit vil grozem gewalt,
so zarten si di poume.
sein ors er bei dem zoume
haft zeinr linden ast,
der im da niht gebrast:
des twank in der waltgast.
gen dem wald er mit der meide weich.
da disiv schar her streich
mit sölhem vngevert,
do wart der stvrm hert.
do si zuo im liefen,
si gvllen vnd rieffen,
daz der walt allr nach hal,
wan dirre iamerlich gal,
der den arm het verlorn.
mit einem gämelleichen zorn
auf gawein si drungen,
vnd heten die zvngen
alle auz gehangen
vnd iegsleicher gevangen
einen starchen ast in die hant
vnd sluogen auf den weigant
vil mangen bitterleichen slak.
da wider er mit dem schilde phlak
sein selbes vnd der meide,
vntz daz er in ze leide
einen slak möht an gelegen.
süst stuont vnder in der degen,
vntz si so gar versluogen
jr est, die si truogen,
daz in ir vorder hant bleip
so gar swächiv aleip,
daz si im chleinen schaden tet.
daz swert vuort er ze stet
vnd lief an des tievels kint
mit zorn, sam er wær blint,
vnd sluog ir ein mitten enzwei.
do wart ein wuoff vnd ein geschrei
vnd begunden alle fliehen.
swaz er ir moht erziehen,
die muosten alle tot ligen.
schier was er so erwigen,
daz sein chraft was gar geswigen.
do er die tievel uertreip,
daz da ir einr niht beleip,
div müed gie in vast an.
zuo der meid chert er dan,
da er sei het lazen.
als si beidiv gesazen
nider zeinem boume,
er wart von dem toume
des sweizes also chraftlos,
daz er di maht gar verlos
vnd stracht sich dar auf den sne,
wan im tet div hitz we.
div meit sein mit triwen phlak.
dor ein weil so gelak
jn disem starchen twalm,
er vernam ein grimmen galm,
des laut was so eisleich,
daz ir der walt gar geleich
jn einr stimme mit erdoz.
gawein der red uerdroz
vnd began sich auf machen,
daz er ze disen sachen
jht vngewarnt wær.
jm was doch vil swær
sein leip von der vordern not.
als schier er sich ze wer bot,
nv seht, wa ein wildez weip
her lief, der was ir leip
allr rouh von har gar,
hert, groz vnd swartz var,
als sweines porst wol so lanch,
vnd nimer dehein gelanch
wan ein wähsiv igels haut.
vnd wær si des tievels praut,
er het si widersezen.
zwelf eln wol gemezzen
het ir leng besezen.
ir leip was nach der lenge groz.
niht mer het si breit bloz
wan zwischen ougen vnd nas,
div wol also breit was,
daz man si chos chaum dar auz.
si het ougen sam ein strauz,
die brvnnen sam ein fivr.
jr nas was vngehivr,
gviert, breit vnd flach,
dar auz ein sölh stanch brach,
daz in nie dehein liep ersmaht,
er müest vallen in vnmaht.
jr mvnt was dik vnd weit,
beidenthalben svnder streit
auf gezogen an diu oren,
jr har sam einem moren
was ir swartz vnd reit.
vier zen scharph vnde breit
jr auz dem mvnde giengen,
die ein ander verviengen
vier ende sam eim sweine.
ez wær von ir scheine
ein lieht stern verswunden,
als er ir het enphunden.
dirre selben vælinne
hiengen nider auf daz chinne
zwen gerüntzelt kinnebachen.
als eim leitbrachen
hiengen ir div oren ze tal,
dest war, div warn niht ze smal.
si warn als ein wanne,
vnd geschach ie liep manne
von ir lieb, des wundert mich.
si het vor bedechet sich
mit zwein solhen brusten,
da mit man wol berusten
zwen blæspalge mohte,
der ietweder tohte
ze dreizig zentnærn,
ob si ze giezen wærn.
jr arm vnd ir hende
die warn allen ende
starch sam zwo seul.
dar an warn chreul
so lang, starch vnd scharpf,
swa sis ze reht in gewarf,
daz muost ir allez volgen mit.
nider gürtel vmb daz lit
da was si reht geschaffen
gleich bloz einem affen,
vnd so vil wirs, daz div stat
was geschikt sam ein komat,
div dar vnder verborgen lak.
jr leip hie als ein sak
geruntzelt vnd gevalten.
dar vnder warn behalten
ader sam ein wagenseil.
jr nabel was al so geil,
daz er wol ein eln lanch
sich enbor von dem leibe swanch.
div bein vil vnsüeze
warn vnz an die füeze
ze tal geleich envollen,
sam si wærn geswollen.
die füez breit vnd kurtz,
die heten mangen widersturtz
an der heut von der wen.
scharf sam di ebers zen
warn ir kla vnd starch,
di si in di füez barch
ze mal, sam der lewe tuot.
vngetan vnd vnguot
was si, daz geloubet.
nature het si beroubet
vnd allr süez betoubet.
an gawein si vil gah lief,
vnder arm si in swief,
da er stuont gen ir ze wer, vnd nam in in ir gewer,
daz er sein nie wart gewar,
wie si wær chomen dar,
vnd truog in dan in den walt;
daz er sein selbes dehein gewalt
moht han, so habt si in.
gen einr steinwende hin
wolt si in auf ein gebirge tragen,
da si in wolt han erslagen.
daz chom im ze grozen staten.
do si di fluot began waten,
nv gie sei div müed an,
dar vnder gawein gewan
sein swert vnd di zeswen hant,
daz si der red nie enphant,
vnd sluok ir nider in div bein
ein slak, daz div wunde schein
vil nah zweier spanne tief.
da von si vil laute rief,
als si enphant der wunden,
vnd warf in gen den vnden
vnd wolt in han ertrenchet.
si was ouch so gechrenchet,
daz ir daz selbe pein gesweich,
do si gen ir hol weich.
jr gebrast an der verte.
ez wart ir vil herte,
daz si sein ie het gedaht.
her gawein ir nach gaht
vnd begreif si reht an dem hol.
jr dienstes lont er ir vil wol:
er sluoch ir ein bein abe.
mit vil grozer vngehabe
viel si ze tal in daz luoch.
si luote vnd schrei genuoch.
gawein ir chvmber sanfte truoch.
als si in daz luoch geviel,
nv hort er vil mangen giel
laut lüewen da inne
mit dirre vælinne.
daz began er widersitzen,
er stivret sich mit witzen
vnd kert vil balde dan.
nv was div magt wol getan
jm hinden nach geloufen
mit weinen und mit roufen,
da si in spürt auf dem sne
hin, vnd rief vil laute:< we!>
vnd wande des, er wær tot.
do gawein hort der meide not,
do het er wol des gesworn,
daz si aber wær verlorn,
vnd begunde dar gahen.
als si ein ander gesahen,
si wurden bedenthalben fro.
die meit nam er zuo im do,
vnd giengen dannen beide,
auzem walde gen der heide,
da sein ors gepunden stuont.
nv hoert, waz si beide tuont:
die meit nam er vür sich.
gen dem wazzer den rehten strich
kert gawein vil starche
ze dem var, da div barche
aufem wazzer bei dem stade swam.
das ruoder er vil snelle nam
vnd sluoch sein örs vor dar in;
also vuor er über hin,
daz wart seinr sælden gwin.
als snell er über wazzer cham,
ein schal er hinder im vernam
so eislich wüeten,
sam tausent rinder lüeten
den walt her auf der sla.
er gehabt durch daz wunder da,
daz er ez wolte schowen,
vnd sprach ze der ivncfrowen:
< ditz mügen wol die tievel sein.>
< ja>, sprach si,< herre mein,
vnd wær wir uberz wazzer niht,
daz iwer leip schier gesiht,
vnser wærn hundert verlorn
von ir vreislichem zorn.
hie mügens niht wesen schad.>
vnder div liefen ze dem stad
dise tievel alle
mit vil grozem schalle;
jr was ein vil michel her,
vnd truogen maniger hand wer.
si rieffen vnd gvllen,
daz nah ir galm schullen
beidiv berg vnd tal,
vnd ir laut also verre hal,
daz mans zwo meil het vernomen.
der was der erst dar chomen,
dem er genomen het die meit.
der schre laut vnd chleit
sein schaden, der im geschach,
do er sei enhalben sach.
daz er sich niht vergelten
moht, des sweig er selten
mit seinen waltweiden.
si muosten dannen scheiden
an gewin von beiden.
an dem stad er die tievel liez.
die meit er auf sitzen hiez
auf ein phärt, daz er da vant.
daz was gebunden an daz lant,
daz het si selb getan.
si het ez an der stat verlan,
do si überz wazzer was gevarn,
da si dirre tievels barn
jn dem wald het gevangen,
als si dar was gegangen
nah wurtzen in den selben walt,
der si al da manicvalt
het zeinr ertznei gelesen,
div ze wunden guot solt wesen.
der chraft was ir wol chvnt.
jr herre was starch wunt
an einem streit worden;
daz chvnd si also orden,
daz si in wol het ernert,
wærn ir die wurtzen niht erwert.
dan riten si nv beide
von dem walde über ein heide
gen einr burch, div da lak.
nv wehselt ietzuo der tak
mit der naht berhtel vnd lieht.
des enmoht er daz verlazen niht,
er muost dar durch di naht,
div in mit vinster bedaht,
mit dirre meid cheren
vnd ir selben zeren,
daz er ir geleit wære
durch daz vorder mære,
daz ir e widervarn was,
daz si so chavm genas,
do si ir herren wurtzen las.
schier chomen si zem pürgtor.
da hielten si vnlang vor.
daz wart in snelle auf gespart.
gawein vnd div magt wart
vil vreuntlichen enphangen.
beid chomen si gegangen,
da dirre riter wunder
lach vnd vngesunder
auf einem hohen bet erhaben,
dem si di wurtzen solde graben,
vnd sein swester saz vor im,
div hausvrowe belahim,
jn dem sal bei einem fivre
vnd weinet vil tivre.
dar zuo het si michel reht,
wan dirr selbe guot chneht,
der solt ein champf gevohten han
- da lak ein sælich gelübd an,
daz guot galt vnd leip
vnd sein swester, daz guot weip -
wider einen risen vreissam.
daz was der wilde reimambram,
der vil riter het erslagen.
jch wil iv völlechleichen sagen,
warvmb des kamphs glüb was.
reimambram von zadas
het gezuchet die schoenen meit.
als ez dem pruoder was geseit,
er machet der red ein tak,
der in beiden zeinem kampf lak
ze seinem haus zempharab,
da mit ers im wider gab,
vnd sold der wesen morgen.
daz was ir allr sorgen
vmb des edeln riters tot.
der riter vnd div magt bot
jr gruoz vnder dem leide
gawein vnd der meide,
sam di guoten mit willen tuont.
als er vür daz bete stuont,
si baten in sitzen zuo in
vnd chlagten im ir vngwin,
als er selb an im sach.
ouch chlagt div magt den vngemach,
der ir in dem wald geschach.
als der wund riter vernam,
daz im so gar vnhelfsam
disiv magt was chomen wider,
auf daz bet liez er sich nider
vnd starp vor leide sa zehant.
als des sein swester enphant,
si viel auf in vnd schre
vil oft:< lieber bruoder, we!
wan solt ich tot sein vür dich!
wer sol nv morgen loesen mich?
wem hastv mich hie lazen?
so reimambram der verwazen
den tak morgen suochet,
so bin ich vnberuochet,
so nimt er mich svnder danch,
wan ein rise wær im ze chranch,
ob er in solde bestan.
wa fvnd ich dann den man,
der mich ze reht verspræche
vnd an dem tievel ræche
den grozen gwalt, den er begat?
nv wæn ich wol, daz er enlat
den tak nimmer lengen.
welt er doch verhengen,
so vund ich einen kempfen wol
von künic artus ze karidol,
oder vund ich gawein da,
so wurd mein not verendet sa.
da hin rit ich morgen vruo.
ein dinch, wæn ich, daz ich tvo,
daz ist mir nv daz bezzer:
jch han ein scharfz mezzer
verborgen in meiner kisten.
wil er ez niht gefristen,
da mit erstich ich mich e,
e daz immer erge,
daz ich sein weip werde.
jch muoz e der erde
totiv werden ze teil,
er ze meinem vnheil
mir meinen leip gemeil.>
ir chlag volget manik chlage.
si heten sorge zem tage,
wie si solten gebaren.
alle die da waren,
die rouften vnd weinten;
mit triwen si ez meinten:
si machten auf di bare.
ez wart von in zware
der helt mit triwen gechlagt.
zer frowen gie div magt,
die her gawein het erlost,
vnd gab ir vil guoten trost.
si hiez sei mæzlichen chlagen
vnd began ir von dem gaste sagen,
waz riters er wære.
er benæm ir die swære,
ob si ins nuor bæte.
des wolte si ze stæte
ze phand setzen ir leip.
des wart daz chlagent weip
von gar gantzen vroeden vro
vnd vragte dise maget do,
ob er wol hete die chraft
vnd so gar wær manhaft,
daz er in törst besten.
div magt sprach:< wærn ir zwen,
vrowe, er bestüend si beide.>
do danchet si der meide
des trostes, den si het vernomen.
nu was gawein erkomen
der chlag, die div magt tet,
vnd want an si starch bet,
daz si die chlag liez sein.
ern woltz durch dehein pein
lazen, ern wolt wesen,
solt er halt nimmer genesen,
jr kämph, chom der riter dar,
daz si daz west vür war.
des dancht si im vnd div schar.
daz gesind vnd div schoen magt,
daz so iæmerchlich chlagt,
daz freut sich gar dirre gehaiz.
swa man kumbers ende weiz,
daz troestet den man vast.
sam wurden von dem gast
getroestet dise leut da.
bereit wart der riter sa
enpholhen der erde,
dest war, mit michelm werde
vnd mit iæmerlicher chlag.
ein lützel vor mitem tag,
do div leichleit ergangen was,
reimambram von zadas
kom dar vür daz haus geriten,
als er da solt han gestriten
endelichen vmb sei
mit ir bruoder machardei,
vnd erbeizt an dem burkgraben.
di tisch wurden erhaben,
do si den riter sahen,
vnd begunden alle vahen
div swert vnd ander wer
vnd wanden, daz er mit her
vür daz haus chomen wær.
schier sahen si vil lær
von ritern daz gevilde
wan in mit seinem schilde
auf seinem örs balden
alein bi der halden
vnd vordert sein gesellen.
gawein, der ie mit ellen
dehein vreis vermeit,
her gen dem riter er reit,
der dirre auentivre beit.
als reimambram gawein ersah,
ez was im starch vngemach,
daz er in getorst bestan.
dar an betroug in sein wan,
wan er bechand den recken niht.
dem tumben also oft geschiht,
daz er hoh wil vnd nider stat.
jetweder sein örs da hat
ze wende an dem ringe.
dise zwen ivnglinge
div ors zesamen truogen.
mit stichen vngevuogen
wurden beider sper verzert.
jetwedern do sein swert wert,
dar nah vnd man ez wande.
hie beleip an der schande
der starch riter reimambram,
dem gawein seinen helm nam
mit eim slag, den er im sluog,
der auf gen dem kinne truog
vnd die fintaille zekloup,
sam ez wær ein dürrer schoup,
daz im der helm enphiel.
durh di koifen ein starchen schiel
sluog er im ab dem houpt,
da mit er in beroupt
so gar seiner starchen chraft,
daz im an der ritterschaft
maht vnd ellen gebrast
vnd bat gnaden den gast,
daz er in enphienge
vnd niht übergienge
riters reht an seiner bet.
daz gawein auf di rede tet,
daz er mit triwen swüere,
daz er ze hant füere
auf daz haus da mit im
vnd der hausvrowen belahim
gevangen iemer wære,
woldes, in ir kärchære
sunder alle swære.
do der streit was ergangen,
gawein mit dem gevangen
auf daz haus zehant kert.
da ward er erst wol gert
von seiner grozen manheit.
belahym, diu schoen meit,
guot vnd leip in sein gewalt
mit triwen gab vnd salt,
ob ers wolt enphahen.
do muost er dannen gahen,
daz moht er dehein weis verlan.
mit vrlop schied er von dan
da hin, da er het gedaht.
schier was er auf di straz braht
ze der chlause, da galaas,
des risen mak, gesezen was.
ze eygrun gen der veste,
so in immer allr beste
kvnd geleiten sein sin,
da streich er den wech hin
vollechlich zwen tage
da zeinem diken hage,
da ein rouch über schein.
da durch chert her gawein
den wek, der was enge
durch michel gedrenge,
ein schmal wekscheide.
schier chom er auf di heide
durch daz lang dik hag,
da eygrvn, div burch, lag,
der galaas, der starch, phlag.
schier chom ein bot, der seit,
daz gawein di straz reit,
vnd wanden, daz er wær
ein gesander cinsær
von etsleichen landen dar,
vnd namen des vil rehte war,
daz er den baien niht entruoch.
der red wundert si genuoch,
seit er ein cinser was.
her ab machet sich galaas
mit vil grozer hohvart,
wol gewaffent vnd bewart,
zuo gawein auf daz gevilde.
er vuort auf seinem schilde
von swarz ein rouh bernchla
- der schilt was gar anderswa
an dem velde von golde -,
da bei man wizzen solde,
daz er was wilder dann ein ber.
er vuort ein sölh vellesper,
daz wol ein haus valte,
ob man ez mit gewalte
dar auf ze rehte stæche,
e man ez zebræche.
alsus reit dirre degen
gawein auf dem veld engegen
vnd hiez in wilchomen sein.
gawein tet des niendert schein,
daz er wær verzeit.
des gruozes er gnade seit
vnd bat in sprechen vür baz,
jn welher maz er meinte daz,
daz er so gewafent rite,
ob er streiten wolte, wes er bite.
er wolt im gern streiten mite.
< ein sit>, sprach galaas,
< der ie ze disem haus was,
den sül wir niht zebrechen:
her gast, ir müezt stechen
nah riters orden mit mir.
jch sag aber iv, vnd welt ir
dirr tiostivr enbern
vnd welt an mich gnad gern,
so swert mir sam ein chneht
jn die kuchen ze sölhem reht,
daz ir da immer inne seit,
so laz ich disen streit.
der habt beider die wal.>
gawein sprach:< hie streitet der val
wol an ahtzehen ougen.
jch wils iv niht lougen,
dest war, ir dunchet mich ein gouch.
welh riter gedeiht ze chvchen ouch?
des wær dem reich ze vil.
daz ich darvmb tuon wil,
des wert ir schier beweiset.
swer sich lopt vnd preiset,
der hat niemen, der in lob,
wan im leit div schand ob,
als ir tuot ze dirre stunde.
allez lob in eigem mvnde
ervaulet vnd verdirbet.
der als ein ritter wirbet
nah lob mit stæter manheit,
dem wirt ez nimmer verseit.
jch wil iv wol geheizen:
jr müezt ivch ersweizen
vnd elliu ivriu glid rüern,
e ich gescheh ze vüern
jv vnder iwer chvchen knaben.
wes welt ir nv lenger haben?
jch gewer ivch tiostivre.
jv werdent vil tivre
sölh chnaben zuo iwerm fivre.>
hie hielten dise peide
von ein ander auf der heide
wol veldes zweir würf lanch.
jetweders ors mit willen spranch
vil mangen sprunch weiten,
do ez enphant ze der seiten
beidenthalben scharpher sporn.
dise beid mit gleichem zorn
auf ein ander chamen.
als si sich beid namen,
dar an vervalt tweder niht,
also von kvnst geschiht.
si muosten von den stichen,
do beidenthalben entwichen
vürbüeg vnd übergurt,
zer erde suochen den furt,
jn den säteln besezzen.
von in wart niht vergezzen
jn der scheid der swert.
als ietweder gert,
div wurden snell erzogen.
si sprvngen auzem satelpogen
vnd liefen beid ein ander an.
galaas, der starch man,
do si chamen so nahen,
er ramt sein ze vahen
vnd wolt mit im ringen.
do begund von im springen
her gawein, der was snel.
mir seit der auentivr spel,
wie gawein gelunge,
do er im nah sprunge
vnd wolt in begreiffen.
nv began im entsleiffen
ein vuoz, daz er sich erviel
jn ein mos, daz da wiel,
da von er chaum genas.
do wolt gawein galaas
niht so zäglichen gwinnen.
er liez in wol errinnen
des wazzers. do er auf cham,
jetweder ab den schilt nam
vnd samten sich aber sa.
galaas ward ein wunt da
von gawein durch di brust geslagen,
da von begund er verzagen
so hart, daz er im entweich,
vnd wart sein varbe starch pleich,
wan im div chraft dar an entsweich.
als galaas den slak enphiench,
ein vnmaht in an giench
vnd began nider vallen
von seinen liden allen,
wan er moht niht gestan.
genad er suochen began
an gawein vil tivre,
seit div auentivre
jm was gevallen wider in,
vnd zeigt auf daz haus hin
vnd seit, daz da wære
gevangener cinsære,
edeler ritter, fünf hundert,
die er all het gesvndert
vnd mit streit betwungen,
nv im wær misselvngen,
daz er da næm seinen eit,
dar nah ir allr sicherheit,
swaz er in gebut, ze tuon,
da mit daz haus zeygruon,
daz er in liez genesen.
wolt er aber des niht entwesen,
er vüer von dem lande,
swa er in hin gesande,
daz er immer wær gevangen.
hie mit was ergangen
der streit vnder in zwein.
gen dem hause reit her gawein
vnd sein gevangener, galaas.
gen im für daz palas
die gevangen all giengen
vnd in vil wol enphiengen,
wan si heten wol gesehen,
wie im galaas muost iehen,
do er im sicherung swuor.
des warn si in vreuden fuor,
wan ir kumber gar verfuor.
galaas der wunde,
der wart an der stunde
braht an vil guot gemach.
die gevangen all er gesprach
vnd seit in di sicherheit,
die gawein an in het bereit,
vnd wie er sich muost nern.
er hiez si allesamt swern
des selben, daz er het gesworn.
di red het er niht verlorn,
wan si warens alle vro.
gawein swuorn si do
huld vnd manschaft.
grozer vreuden überchraft
hetens alle vnder in.
si vrout der froeden gwin,
den gawein het ervohten,
des si alle gern mohten
vroelich gebaren,
wan si erlost waren
von der vanchnüs banden
vnd wurden zir landen
wider vroelich gesant.
gawein si des nahtes mant
jr triwen vnd ir eides,
daz si sich ir leides
an dem risen erræchen
vnd sich alle des bespræchen,
daz si ze enfyn mit im riten.
des warn si leiht zerbitten.
si taten ez vil gern.
als in der takstern
des morgens braht tages lieht,
der riter was einr nieht,
er wær mit al bereit.
gawein dan mit in reit
vnd braht si gen enfyn.
floys vnd div helf sein
die liezen do ir starchen pein.
swie wol er wurd enphangen,
des müest iuch belangen,
ob ich iv daz solte sagen.
jm het gevangen vnd erslagen
der rise sein helfe gar,
vnd wær er niht chomen dar,
er müest sich ergeben han
vnd mit im sein man
mit leib vnd mit guot.
des was im we ze muot;
vnd solt daz morgen sein gewesen,
er entriwet niht langer genesen.
dest war, er chom an der zeit.
nv muost sich niwen der streit
ab dem haus vnder disen
wider disen starchen risen
vnd wider allez sein her.
gawein hiez an di wer
daz pouel allez vallen
vnd hiez si starch schallen
an den starchen valant hin abe
mit vil grozer vngehabe
vnd iah, er wolt streit haben.
schier chomen an den burkgraben
geloufen spehære
vnd vragten dirre mære,
do si vernamen den schal.
gawein sich hinden auz stal
vnder div mit sein gesellen
vnd kerten mit ellen
auf den risen, da er lak
vnd seins gemaches starch phlak,
wan er vil gar an angest was
vnd wand, ez wær galaas
vnd die gevangen von eygrvn,
do er sach die schilde brvn
vnd dar auf von golde boien
vnd anderthalb di moien,
do si alle zuo sigen
vnd so gemeinlichen swigen.
daz schuof den risen stille ligen.
gawein chert vil rehte dar,
da der rise vnder dirre schar
als ein grozer tvrn lach.
da enphie sein örs vil mangen slach
ze beiden seiten mit dem sporn.
auf in rand er mit zorn
vnd rief:< gawein schavelier!>
hie mit neiget er die panier
vnd stach si auf dem risen entzwei.
hie huob sich ein turney,
der hert was vnd starch.
dar vnder sich manger verbarch,
dem sæld gap, daz er entran.
da wart verhowen manik man,
der nie geseit daz widerspel.
der rise wart des stiches snel,
do ers in dem leib enphant.
nah im greif der valant
vnd wolt in han zebrochen,
daz er in het erstochen.
des ward er wol ergetzet.
er wart da von geletzet,
daz er da muost beleiben.
durch beid chnyescheiben
sluog er im ein wunden,
daz im da von swunden
beidiv chraft vnd sinne.
gawein sein vnminne
gar an in kerte,
vntz er in so serte,
daz er gelach vor im tot.
anderthalb was groeziv not
von disen ritern vnderm her.
swelher ir chom ze deheiner wer,
der het verlorn seinen leip.
si fluhen alsam div weip,
swa si sich mohten ernern.
si mohten sich niht mer erwern,
si wolten dann den leip verhern.
gawein also den risen sluoch.
vnderm her wart ir genuoch
beidiv gevangen vnd erslagen.
wan sah ouch vil mangen zagen
auz dem sturm vliehen,
die man niht moht erziehen,
gem wald vnd gen den bergen,
die sich da wolten bergen.
der sturm het ein ende.
gawein, der waltswende,
kert auf daz haus ze enfyn
wider mit den gesellen sein
mit heilhafter sigenvnft.
wol ervroet sich do seinr chvnft
der verhert chünic floys,
wan er was des wol gewis,
daz er erlost wære.
des muost ir allr swære
ein end haben an der stat.
floys gaweinen mit vleiz bat,
seid er in da het erlost
vnd allez seins landes trost
an im einen nv læge,
daz er sein ouch phlæge
vnd enphieng die chrone.
div solt im wol ze lone
gevallen vmb di manheit.
die red er im widerseit:
ern möht niht reiches phlegen
vnd wolt sich so niht han verlegen,
er müest heim keren.
svs gehalf er wider ze eren
floys vnd cherte dan.
hie wil ich die red lan,
die ich her gesagt han.
uon dirre grozen arbeit,
die gawein vnder wegen leit,
ward er des erwendet,
daz artus nv verendet
an in den hof ze karidol,
als ich iv nv sagen sol.
do die vürsten alle warn chomen,
die den hof heten vernomen,
mit mänlicher hohvart,
wan beitet seinr zuovart
di drei tag alle.
die weil was mit schalle
der hof vnd div hohzeit.
do moht niht langer sein div beit,
wan sin di fürsten verdroz,
daz er in niht entsloz,
war vmb er si het geladet;
div red seinem namen schadet.
do gawein dar niht encham,
künig artus die fürsten nam
jn ein phaltz besvnder.
er sprach:< ivch nimt wunder,
daz ich ivch so lang hil,
waz ich mit dirre rede wil.
jr herren, daz wil ich iv sagen:
jch wand, daz in disen tagen
gawein wider chomen wær,
so wær baz redebær
vnser rat an dirre sach.
nv enweiz ich, waz ez mach,
daz er niht wider chvmt.
ez het vns starch gefrvmt,
wær er hie ze dirre vrist.
seit er aber niht chomen ist,
so ratet mir nv alle,
waz iv dar vmb gevalle,
vnd habt ez vil tougen.
ein dinch, daz ich iv ougen,
daz mir an mein er gat,
da suoh ich vmb iwern rat,
wan ez mir nv also stat.
nv vernemt, mag vnd man,
die ich dar vmb geladet han,
den ich genaden allen wol
getriwe, als ich von rehte sol,
wan ir mir sein schuldic seit:
jch het ein hohzeit
geleit ze tyntagve
ze weinahten zuo dem se,
als ie was mein reht.
dar chom manik guot chneht
vnd heten vreuden genuoch,
wan daz gawein an truoch
mit den ritern verborgen,
daz si an dem vierden morgen
riten suohen aventivre.
nv was so vngehivre
daz weter vnd so chalt.
jch reit ouch pirsen in den walt,
do ich so ein beleip,
da mit ich den tak vertreip.
da entwalt ich dehein weil,
wan daz ich heim mit eil
durch den frost wider reit.
do vand ich schon bereit
ein vivr auf dem palas,
des ich starch vro was,
vnd stuont vnd warmt mich da pei,
als ich wæn, daz der site sei
aller leut gemeine.
nv was div chünigin al eine
zeinem venster gestanden
vnd zalt mirz ze schanden.
si iach, daz ich niht wær
ein sölich minnær
sam einr, den si weste,
der wær also veste,
daz in der sne noch daz eys
des moht betwingen dehein weis,
ze dienst einem weibe,
daz er an seinem leibe
jht vuort wan ein hemede.
div red dauht mich vremede.
ouch enhal si mich daz niht,
ern rit bei des manen lieht
den furt über alle nahte,
da in der swartz dorn dahte.
ein örs rit er harmblanch
vnd sunge von minne einen sanch,
ein flache stimme vnd hel,
vnd fuort ein wæhez schappel
von bluomen süez vnd guot.
aufem houbt vuort er den stalhuot.
schilt, swert vnd sper
jn blancher varbe vuort er,
da bei solt man in bechennen;
si wolten aber niht nennen.
mit dirre red gie si hin.
dar nah begund mein sin
trahten, daz ich vund in.
die red ich meinen gesellen seit.
schier was ez dar an gereit,
daz wir riten in die gavdin
mit harnasch vnd huoten sein
alle vier besunder:
solt er chomen, do enchvnder
vns nimer verreiten.
da muost wir sein peiten,
e er choem, vil lange
jn der chalten getwange.
schier chom er, da key lach,
da er der ersten huot phlach,
dem er sein örs mit tiost nam.
gales dar nah tet er sam,
dez selb tet er avmagvin,
e er chæm durch noirespin.
div driv örs nam er ze sich;
er reit dan vnd vant mich.
div örs ich wol bechande.
die ich aber dar auf sande,
der ensach ich deheinen:
des begund ich mich verseinen.
als schier er mir chom enneben,
jch vragt, wer im het gegeben
div örs, div er fuort.
er was zer antwuort
bereit als ein frum man
vnd seit mir, wie ers gewan;
daz selb ich in an bot.
er sprach, im solt svnder not
ein man dehein streit nemen,
der im möht missezemen.
sein red mir dar an behaget.
jch bat in, daz er mir saget
frivntlich, wie er hiez,
vnd mir wider werden liez
div ors an dem griez.
do liez ich mit genaden in,
swa er wolt, reiten hin.
dez dauht in ein vngevuog,
do ich seins namen gewuog,
vnd begund mir übel reden mit;
daz vertruog ich mit senftem sit.
div örs het er mir zehant
gegeben, wan er niemen vant,
der si da von im næme;
des wærn si im vngenæme.
zehant wolt er von mir sein.
jch bat in durch den dienst mein,
daz er mir seinen namen seit.
des was er mir vnbereit;
do muost ich widersagen.
ez wart gestochen vnd geslagen
von üns, nv wizzet daz,
daz nie von zwein ritern baz,
vntz er gestuont des schildes bar.
don het er niht vmb ein har,
da mit er sich nerte,
wan daz er sich werte,
so er immer best mohte,
die wil vnd daz tohte.
don wolt ich sein scheuhen niht
vnd bat in aber, ob er iht
mir dannoch sagen wolde.
er iah, ern solde,
so lang ich in an sprach,
vntz er ze ivngest mir iach,
sein nam wær immer verholn,
swaz er dar vmb solte doln,
er fvnd dann einen man.
ze ivngest ich im an gewan,
daz er artusen nande
ze britanie von dem lande.
jch seit, daz ichz wære.
er sprach, daz ich verbære
alsus gelogeniv mære.
dirre streit vil lang wert,
vntz er des ze ivngest gert,
daz ich den helm enbunde,
ob er ein zeichen vunde,
daz man im het gezeiget.
mein houbt ich nider neiget
vnd hiez mir enbinden,
ob er ez möht ervinden.
den helm er mir abe bant.
als er daz zeichen ervant
vnd die warheit ersach,
seins namen er mir veriah
vnd bat mich mit stæte,
daz ich im reht tæte,
des het ich michel ere,
vnd iah, er wær vil sere
lang von mir geswachet.
jch vragt, waz daz machet,
seit ich sein niht bechande.
die chünigin er nande
vnd iah, ich hetes im genomen,
vnd er wær aber nach chomen,
daz er daz wolt bewæren,
daz si gevreund wæren,
e ich si ie genæme,
wie mir daz missezæme,
daz ich sein ameyen
jemer solt gevreien.
des müest ich immer laster han.
von vnser red cham ez dar an,
daz er ir het gerüemet sich,
daz ich in kampft vnd er mich,
vnd namen viertzeg tag vrist.
der tak zwar morgen ist,
daz er sol chomen her.
jwers rates ich dar vmb ger,
daz ez mir ie geschach.>
do der chünich di red gesprach,
si sprachen tougen vnd in,
ez wær ein grozer vnsin,
der so immer gewüete,
daz er weibes güet hüete.
er satzt sich auf di glüete.
die herren also taten:
si giengen sich beraten,
als artus der chünic bat,
an ein vil heimlich stat
vnd vunden, daz im wære
niht also erbære,
so daz er seins tages bit.
der wær ouch ein gemeinr sit.
daz ensolt er dehein weis lan
- er wær ein so vrum man -,
ez wær gelogen oder war.
er solt ouch gern biten dar
vnd liez reht schowen.
behielt er da di vrowen
vnd wær si vnschuldich,
so het er vrowen vnd sich;
wærz aber, als er seit,
ez wær ein groziv swacheit
dem reich vnd der chrone.
geschæh im div hone,
div fürsten mak gewinnen,
ob si solt minnen
eins riters leib ze seiner e,
daz müest im immer tuon we.
der chünic volget dem rate.
div mær vlugen drate
von chneht ze riter über al:
da von wart auf vnd ze tal
von dem gesind ein michel kradem.
ginever auz dem werchgadem
sant ein meit her für,
daz si ir ze reht ervüer,
waz dirre schal wære
vnd sölh vngebære.
jr muot was ir swære.
do div magt dise red vernam,
des dauht si schand vnd scham,
ob si irs sagen solde,
ez enwær, ob si wolde
der red deheinen weis enbern
vnd hort di warheit gern.
als div magt wider gienc,
jr houpt si vor nider hienc.
daz begund si swæren.
si sprach:< wie ist den mæren,
div dv da vor vernomen hast,
daz dv siv niht wizen last?
wærn si guot, daz wolt got!>
si sprach:< vrowe, dirre spot
der ist gar von iv chomen,
den ir da vor habt vernomen.>
< war vmb, waz han ich getan?>
< welt ir der red ein ende han,
vrowe, si wirt iv gesagt:
der chünich hat gechlagt
über ivch den fürsten allen
- daz ist da vor daz schallen -,
vnd zeihet ivch, ichn weiz wes.
da stat her key vnd spotet des.>
div red müet di chüniginne
vnd truobt ir vreude vnd sinne,
vnd seuft vil sere.
si sprach:< mein weipleich ere
mir, süezer christ, behüet
mit götlicher güet,
daz mir iht mög gewerren.
ja vürht ich meinen herren
vnd seinen zorn, den er hat.
got send mir gnaden rat,
mein dinch mir angstlichen stat.>
ejn dinch ist ser ze chlagen,
dest war, des mag ich niht verdagen,
dazen weiben oft widervert
vnd mak niht werden erwert,
wan well ez immer treiben:
swaz man von reinen weiben
von einem argen schalk vernimt,
daz ir eren missezimt,
daz treibet man sam einen bal
vnd macht da von grozen schal.
swa iendert zwen samt sint,
di werdent beid also blint,
daz si von weib luge iagent
vnd si vür warheit sagent
ein ander auf weibes haz,
vnd doch vür war wizzen daz,
daz si ein ander liegent
vnd sich selben betriegent,
sam die sich der weibe
rüement vnd ir leibe
vnd wellent da von wesen wert.
swer solher vreude von weibe gert,
dem gan ich seins ruoms wol
- vnd mir, ob ich tougen sol
bei hertzenliebem vriunde ligen,
wirt weibes nam da verswigen.
ouch vindet man genuoge,
die mit ir vngevuoge
weibes güet wellent schelten
vnd gedenchent ir vil selten
jemer ze deheiner güete.
swie sich ein weip behüete,
ob man si beliegen wil,
wan vindet mer dann ze vil,
da mit man si swachet.
wær iemen, der nv wachet
vnd wolt schermen weibes nam,
des lon wurt vil lobesam,
wolt er dar an herten,
vnd vund einen geverten
an mir, vnd geruoht er mein
- jch heiz von dem türlein
der werlt kint heinrich -,
vnd zvg mit im so gelich,
daz er mich niht verwurf.
swes er ze scherm durf,
daz ensuoch niemen anderswa.
jch trag daz waffen bei mir da,
daz valschen man versneidet,
ob er daz niht vermeidet.
ern well vliehen guotiu weip,
jch wag mit im so den leip,
daz eintweder wirt wunt
gar auf des hertzen grunt,
daz er ist immer vngesvnt.
solh red müez wir lazen sein.
als schier des liehten tages schein
die vinstern naht verswant,
artus zeinem münster sant
zem pischolf von grunge,
daz er daz ampt svnge
von dem heiligen geist
seinem kampf ze volleist.
daz hort er da mit andaht.
als daz ampt wart volbraht,
er gie auf sein palas,
da im schon hin bereit was
auf ein gulter sein eisengwant.
dar in schuoht er sich zehant.
er hiez im ouch bereiten
ze disen arebeiten
mit einr deke tivre
ein ors, daz was tivre,
hoh, starch vnd snel,
mit einem sämit gel,
dar an warn schone
über al reich chrone
von einem sigelat gesniten.
ez enwas ouch daz niht vermiten,
sein waffenrok wær alsam.
ein banier vil lobesam
des selben im bereit wart.
daz tet er niht durch hohvart,
div was im vil vnmær.
e er vol bereit wær,
der riter cham geriten her,
der des champfes sein gewer
solt sein, daz ouch geschach.
key in allr erste sach.
der seit ez do über al.
da von huob sich ein michel schal
von den ritern da inne,
vnd lieffen an die zinne
durch des riters minne.
ez ist wol sagebær,
wie der helt wær
bereitet dar ze streit,
als in da calamit,
sein swester, ein reiche fey,
het bereitet von lansgey
mit gewaffen, daz was reich,
dem ich deheinz geleich,
swaz ich ir noh han gesehen.
jch wil der warheit iehen:
jst ez, als div fabel seit,
dest war, so was an in geleit
von reicheit so grozer hort,
der dehein armer kort.
jm was von einem blialt
ein waffen gar einvalt
gesniten sunder zadel,
dar an was dehein tadel,
wan ez von gold was erweben
da mitten vnd enneben,
von lewen, die warn groz.
swaz velt beleip goldes bloz,
da schein ez sam ein phawen zagel.
er was ze veld der veind hagel,
daz schein an seinen tüchen da.
sein harnasch der schein anderswa
ring, weiz vnd guot,
als ein spiegel sein stalhuot.
dar auf was ein chleinot,
als imz vrowe minne gebot:
durch ein hertz ein scharpf stral
von gold vnd von hertem stal.
er vuort ring, chlein hosen
lauter weiz svnder rosen.
sein schilt zam ze halse wol
vnd sein lantz, als si sol.
er vuort zwen behagel sporn.
wart iemen mit waffen geborn,
des het man wol an in versworn.
wan sah an seinem reiten,
daz er sich da ze streiten
wider sein gesellen het bereit.
wan moht groz behendecheit
an seinen waffen da sehen.
von dem winde hort man laut brehen
beidiv panier vnd dek.
ein waffen vuort der rek
an valsch von lazaure
vnd ein lewen, sam in nataure
drauf geworht het von golde
mit gebærn, sam er wolde
di werlt gar verslinden,
vnd von den widerwinden
gab er von listen einen doz,
des stimme was starch groz,
sam er lebt vnd schriuwe da,
vnd het lang scharf chla,
hart verre auzgezogen,
vnd het sich auf div pein gesmogen,
reht sam er stüend ze sprunge,
vnd vuor im div zvnge
enwag in der chewen.
ez het den selben lewen
ein buchel von golde bedaht,
dar inne lak vil maniger slaht
von edelm gestein,
groz vnd chlein.
er reit ein örs harmblanch,
daz wider vnd vür mangen wanch
mit behendigem geverte
da nam auf der herte
von dirre massenie
vntz auf die braerie,
da der champh wesen solt.
artus wart vil schier geholt
sein ors, sper vnd schilt.
sam ein vogel gereiztez wilt
sein hertz gen dem kamphe spilt.
artus auf sein ors gesaz.
einr red er da niht vergaz,
div wol seinen eren zam.
di vürsten er zesamen nam,
dar zuo daz gesinde gar.
< jr herren>, sprach er,< nemt war
meinr eren an dirre sach,
daz mich iemen dar an swach,
swie ez halt vmb mich erge,
an swelhem teil ich beste,
sigelos oder sigehaft
- dar vmb ob ich mannes chraft
hie hab vnd mein geselle niht -,
daz mir wider in vmb iht
jemen helf an disem vehten.
jr gebietet den guoten chnehten,
daz siz mit zühten sehen an,
vnd wizzet, hie ist dehein man,
der mit gewaffen vürz tor
kümt, ersih ich in da vor,
jch benim im leip vnd ere.
daz ir deheinr so here
jst, daz geloubet mir.
dar an so gedenchet ir,
vnd bewart daran ivch vnd mich.
wan ietweder dunchet sich
vnder üns wol so tivr,
daz er ein an stivr
ein andern riter müg besten.
ünser reht mügen wir zwen
an ein ander wol bewærn.
daz sol niemen beswærn,
swem da der sik gevalle.>
die fürsten lopten alle,
daz siz gern tæten,
vnd lopten ez ze stæten
vnderm gesinde nah seinem gebot.
ez was in chomen auzem spot.
an di wer livf diu swach rot.
nah der red er her ab reit,
da sein an der heide beit
vor dem haus sein kampfgenoz,
her gasoein von dragoz,
den er niht vngerne sach.
künic artus mit zühten sprach:
< riter, seit willechomen.>
als er den gruoz het vernomen,
er galt im sam ein hofman.
schier chom ez dar an,
daz si sich muosten scheiden.
ez wart vndr in beiden
wol vier würf lanch daz velt,
daz ietweder vollez gelt
aufen andern moht geborgen,
vnd wolten daz besorgen,
daz an væle wurde
jr tiost vnd div burde
auf dem anderm gelæg,
ob er sein niht enphlæg
mit dem schilde von chunst,
wan beider geleicher vrbunst
auf den andern gelat wart.
swer sein chunst dar vnder spart,
heldes muot vnd chraft,
dem moht wol div riterschaft
gewerren an den eren
vnd ze verhe so geseren,
daz er sein wurd vngesunt.
die weil si ditz hazzes zvnt
auf ein ander hie zvnden
mit alsölhen gunden,
da von chriegt ir beider muot.
da von ist ez beiden guot,
daz si sich wol hüeten,
seit daz haz welle wüeten
also starch vnder in
auf gewin vnd vngewin.
der hielt her, iener hin.
hie lazen schenchel vliegen,
mit weiten sprüngen chriegen
div ors auf dem ringe!
daz ietweder bringe
den andern zem sande,
e er sein sper verswande,
daz was ir beider andaht.
di schilt wurden snel braht
durch scherm vür di bruste.
dar nach si geluste,
daz si div sper neigten
vnd den orsen erzaigten
an dem ende die sporn.
beide mit gleichem zorn
begunden si einander gern.
artus wolt tiost wern
gasoein, swaz ez kost.
do entweich von der tiost
gasoein auf der heide
von der wegscheide
vnd lie den chünich varn vür.
daz er dise tiost verlür,
daz beswart in vil harte.
er chert gen der warte
mit zorn, da gasoein
hielt auf dem ring alein,
als er im entwichen was.
nv wanden auf dem palas
di riter, di da sazen,
daz artus het lazen
den riter gern vür varn
vnd si wolten ein ander sparn
durch ir beider leihtecheit,
vnd zalten ez ze zagheit,
swa ez einr dem andern seit.
artus sein zvht zebrach
wider gasoein vnd sprach:
< riter, wie ist iv so geschehen?
nv han ich von iv gesehen
vil riterlich hantgetat.
mich riwet iwer sarwat,
daz div also guot ist.
weder tat irz durch den list,
daz irm gewæffen entlibet,
oder fürht ir, daz ir belibet
hinderm satel auf der sla
oder auf dem veld anderswa,
ob ir ivch mit mir bewurret?
jch weiz wol, ir geturret
durch disen schilt wol getan
deheinen riter gestechen lan.
er mak wol iv entlihen sein.
der lewe tuot des niender schein,
daz er iwers schiltes phlege,
wan daz sein bilde geit ein ege
dem, der in an siht.
dest war, er ist flühtlich niht,
er entweichet durch dehein not.
sein hertz ist in im tot
an iwerm schild, riter guot.
da vür hat er des hasen muot
gewechselt vnd alle sein art,
der nie vnfliehend wart,
ob in ein maus wolt iagen.
der lewe entouch deheinem zagen:
er sol den hasen vüern.
er lat sich niender rüern,
die weil er mach gevliehen.
mak man in dann erziehen,
vor vorhten er erstirbet.
swer mit zagheit wirbet,
vil oft er verdirbet.>
gasoein sam ein frvm man
der red antwurten began
hoveleich vnd mit zühten.
er sprach:< ich han ze flühten
mich selten gecheret,
da von ich gvneret
je wurd, vntz an disen tak.
ob ich den lewen niht enmak
von meiner zagheit getragen,
dest war, swer mich wolte iagen
vür den hasen, des engult er,
die wil mich ors vnd sper,
harnasch, schilt vnd swert
vnd mein leip dar zuo wert.
als ich ez aber meine
vnd iv schier bescheine,
so möht ez vil wol wesen.
jch getriwe also wol genesen,
her chünic, vor iv sam ir vor mir,
wan daz beidiv, ich vnd ir,
da von in frömden landen
mögen werden ze schanden,
als ez von üns wirt vernomen,
wie ez sei zem kampf chomen.
dann solten wir dar zuo sehen,
ob ez mit eren möht geschehen,
daz wir den kamph liezen.
wir süln des geniezen,
daz ir ein edel chünic seit.
mich hat ouch manik zeit
verre manich vrömdez lant
ze grozem preis erchant.
des ist ez vnbillich.
zwen vilan süln sich
zepleuwen vnd zeslahen
vor geriht mit kampfrahen,
mügen si ir reht anders niht
bewarn vnd ir geschiht.
daz ist fürsten gar enwiht.>
< riter>, sprach artus der chünic,
< jchn bin iv niht so enbünic,
jch gvnne iv al der ern wol,
die ein frum man haben sol,
daz ez an mein laster sei.
jch wurt des champfes gern frei.
gehoer ich deheinen rat,
der mir niht an mein er gat,
des wil ich iv volgen.
jch was iv e erbolgen
ein teil vmb iwer hohvart,
wan sein nie dehein bilde wart,
des ir mein weip hant gezigen.
wie möht ez immer sein verswigen
enneher wol süben iar?
wan wær sein worden gewar,
wær ez war, des ir ieht.
jch getörst wol elliv reht
getuon, div man vinden kan,
daz si die gedanch nie gewan,
daz si ivch minnet vür mich.
destwar, herre, so het si sich
vil übel gehandelt,
so si die e verwandelt
mit vnstæter minne.
so geviel ir zvngewinne
vur stæt ein vnstætecheit,
als mir ie oft ist geseit
von wol gelerten herren.
waz mag iv daz gewerren,
daz wir die rehtes vragen?
die enchan des niht betragen,
si bescheiden ez, als ez ist.
die weil han ich gerne frist.
vnd swie siz bescheiden,
also si vnder üns beiden
gescheiden svnder riwe.
also gib ich mein triwe,
anders wirt der streit niwe.>
als er die red gehort,
er sprach:< so wær ich betort,
ob ich meiner vrivndinne
mich liez, die ich minne,
vmb iht an di pfaffen,
wan die chvnnen schaffen,
daz ein warheit ze lug wirt
vnd daz diu lug schier birt
ein gar gantz warheit.
der list in dyaletige seit
vil an fallantze.
an vngleicher schantze
mit schaden muoz er ligen gar,
daz weiz ich wol vür war,
des si wellent varen.
des enchan sich niemen bewaren.
jch laz mich an der minne got.
swaz drumb sei sein gebot,
daz sei allezsamt getan.
da vindet man niht valsches an,
vmb guot noh vmb er veil
valsch geriht vnd urteil.
dan geturren niht zebrechen
daz reht die vorsprechen;
da ist daz reht ringe.
ez enwirt dehein gedinge
von vrteiln vürbaz
durh vrivntschaft noh durh haz.
oder scheid ez vrouwe venus.>
< her riter>, sprach artvs,
< dar vmb ist mir niht bechant,
wie ez vmb die beid sei gwant,
wan welt ir vehten disen streit,
dar vmb ir her chomen seit,
des tuon ich iv vil guot stat;
vnd swer beleib an dem mat,
der tuo sich der red ab,
vnd daz si der ander hab
mit genaden, daz lob ich.
dar an wil vürdern mich,
daz tuo ouch ietweder sich.>
< ich bin streites iwer gewer.
mich wundert aber>, sprach er,
< auf welhe red ir des gert.
jr seit sein e von mir gewert,
do ez mir vnwæger was,
daz ich doch vor iv genas.
daz was in der gaudin,
do ir selb vierd huotet mein.
jch han noch den selben muot,
da von dunchet mich daz selbe guot,
jr liezt ez anders scheiden.
la wirz mit gesworn eiden
beid an mein vrowen,
seit wir ir beid getrowen
so hertzenlicher vrivntschaft,
daz si diss streites chraft
scheid, swie si welle.
vnd sei er ir geselle
vnd ir rehter amys,
swem vnser gevall der preys,
daz si in auz vns beiden nem,
der ir hertzen best gezem
an valsch vnd svnder dro.
die red lob ich also,
swie ez mir nv erteilt sei,
ob ir ouch dem gelüb bei
welt beleiben mit mir
vnd also, daz ichz vnd ir
vnder üns vertriwen,
obz einen welle riwen
vnd sein wolt wider chomen,
daz ez also sei auz genomen,
daz sein niht geschehen müg,
swie gern er die triwe lüg,
sam oft von afterriwe
ein sach wirdet niwe,
da man vestenung verspætet,
als valschez hertz rætet,
jst si niht wol bestætet.>
< riter>, chünic artus sprach,
< ez ist war, daz ich iach,
jch wær ir lieber dann ir.
seit irz also bietet mir,
so wil ich scheiden den streit
vnd wil ez an si sunder neit
lazen ouch ze meinem teil.
swem ir nv baz gvnne heil,
der müez si mit gnaden han.>
jr streit was da mit ergan,
vnd chert gen dem hause
gasoein mit artuse
ze karidol also schier
mit verwender banier
sam riter, di vrides gerten.
des si sich beid gewerten.
schier vlugen div mære,
daz der milt artus wære
versüenet vnd gasoein.
nv viel daz gesind gemein
an losen vnd an lieben.
jn begunde stark lieben
hier an ir herren gewin.
snell chomen dise zwen hin
geriten an daz pürgtor.
da erbeizten si beide vor
vnd namen ein ander an di hant.
sus beid in ir eysengewant
gen dem hove si giengen,
da si di riter enphiengen,
di warn in gegan engegen.
jr gelübdes niht vnder wegen
bleip von in beiden.
gynever mit ir meiden
wart dar an den hof geladen.
daz muost manigem hertzen schaden,
daz von ir schoen geangelt wart,
daz tougen plik niht enspart,
wann kumber gebirt ougen gart.
als schier si vür den chunich kam
vnd erst seinen gruoz nam,
dar nah ir der riter neik.
artus niht lenger gesweik.
er sprach:< herren, mag vnd man,
die ich her geladet han,
die vernemen mein red wol,
die ich muoz vnd sol
hie offenlich leuten.
jr wist wol, daz ich began treuten
die kunigin, div hie stat,
daz ir mich niht liegen lat,
her wol vor süben iaren,
daz wir ie ensamt waren,
als div e ist gewon,
vnd wand, si wær mein chon.
nv ist dirre riter chomen her
vnd iah, daz sei sein gewer
sei rehter minne wider mich,
vnd bot ze streit dar vmbe sich.
daz ist also gescheiden
vnd gevestent mit eiden,
daz wir di red lazten
vnd beid an si sazten
disen streit nah ir willen.
so sol si den streit stillen
als ich ir schier gesage.
des enmach dehein rat sein:
diss herren oder mein
sol si sich vnderwinden,
so mögen wir ervinden,
waz an der red wares sei.
vrov, ouch sag ich iv da bei,
ob ir ze minnen disen helt
vür mich iv endlich erwelt,
ob er iv baz gevalle,
des helfen wir iv alle,
dest war, des ist er wol wert,
vnd seit ir wol mit im gewert.
welt ir aber mit mir beleiben,
so wart nie vnder weiben
dehein weib baz geeret.
ze swelhem ir nv keret,
dan wert ir niht enteret.>
also disiv red ergie
vnd si gehort, daz man ez lie
vmb si beid an ir wal,
daz hertz ir vor leide swal,
daz ir hertzen kumber braht.
si sweig aber ir gedaht,
div was gar verborgen,
wan daz in grozen sorgen
si was, daz moht man sehen,
daz si solt offenlichen iehen
vor dirre werlt über al,
ob si iht tougenleichen hal.
also stuont si vnder in,
daz ir zweivelt der sin,
waz si tuon solde
oder wen si nemen wolde.
nv begund des verlangen
gasoein, der was bevangen
mit hertzen seneder suhte.
von der vnsüezer zuhte
leit er vil grozen vngemach.
zem chünig er neitlichen sprach:
< her chünic, ir tuot mir gewalt.
jr habt si so vmbestalt,
daz si niender hin mak gegan.
wie lang sol si also stan,
daz ir si niht gen lat,
da ir hertz mit willen stat?
dest war, daz ist ein swacher preis,
daz ir mich ensolhen weis
mit listen welt beschrenchen.
jwers eides sült ir gedenchen
vnd sült mir niht wenchen.>
artus gebot der chunigin,
daz si gieng da hin,
da ir allr liebest wær,
vnd daz niht verbær,
vnd hiez di riter weichen.
nv begund si erbleichen
vnd wart dar nah gahes rot,
wan si verborgen hertzen not
jn dirre wal starch twanch.
jchn weiz, war ir hertz ranch
tougen, nahen oder verre.
si sprach:< chünic herre,
gebt ir mir daz ze lone,
daz ich iv also schone
gedient han enneher,
ob ich nv urloubes ger
von iv, so habt ir,
herr, niht ze wol gelont mir.
der red mag niht geschehen.
jr müezt mich bei iv sehen.
wolt ir, daz ich mit einem man,
des ich nie chünd gewan,
solt nv ze seinem lande
mit also grozer schande
vmb ein iwern zorn varn?
die red chan ich wol bewarn.
wie mag ich im daz erwern,
wil er des tausent eide swern,
daz er mich minne vür elliv weip?
dar vmb ist im doch mein leip
niht dest mer gebunden.>
div red began wunden
gasoein; do ers vernam,
vrlobes er niene nam,
mit zorn er dannen chert.
da mit in artus ert,
daz er selb mit im reit
vnd gebot im gesellechleich geleit.
des er im do dehein gnade seit.
swaz geschehen sol, daz geschiht.
des enmoht sich gynever niht
diss lasters behüeten.
so heil wil wüeten,
so hat vnglük stat,
swa ez sich nider lat,
sam an der chünigin geschach.
wie gar vnglüke brach
da vür der sælden reht!
ez was ein vil guot chneht,
ein graue, geheizen gotegrin.
von galor karlin
was sein vater genant,
ein chunic reich, wol bechant,
erhaft, milter vnd guoter.
von vater vnd von muoter
was er gynevern pruoder.
dirre sach reizluoder
ward in ouch niht verholn.
der het sich tougen dar verstoln
mit viertzich halspergen
vnd hal sich vndern pergen.
do sant er ein boten dan,
der sich starch wol versan,
ein behenden spehær,
daz er im disiv mær
ze reht da ervüer,
als er dar nah swüer,
seit ez lazen wær hin zir,
...
zuo wem ir wille vnd ir gir
...
da stuont allr meist.
dirre spehær, der leist
seins herren willen wol.
daz teidink was er da vol,
vntz er gehort vnd gesah,
waz si tet vnd sprach
vnd wiez allez geschach.
dann huob er sich sa zehant,
da er sein herren snelle vant,
vnd began im div mær sagen,
div im muosten missehagen.
< vnd getorst si han ernendet>,
jah er,< si het gewendet
sich an gasoein de dragoz,
wan daz der chünic des genoz,
daz ez den vürsten allen
wær starch missevallen
vnd daz si sich der schanden
jn wälhischen landen
nimmer moht erholt han.>
als er die red het getan,
mit zorn sprach gotegrin:
< ez muoz zwar ir tot sein,
daz siz tuon getorste>,
vnd kert von dem forste
gegen karidol vil schiere
mit einr baniere.
er eilt starch vnd drabt,
daz er vil lützel auf gehabt,
swaz er von dem örs chvnde
gewinnen alle stvnde,
vntz er kom vür daz palas,
da disiv red gewesen was.
da was gyneuer eine
gestanden auf einem steine,
da si des chünges beite,
vntz er von dem geleite
kom, daz er gasoein bot.
des cham si in groz not.
als si der pruoder ersach,
sein zorn er mit vollen rach.
er vie si bei dem hare
vnd swanch si vngeware
auf sein ors vür sich.
gem wald den rehten strich
kert er dan mit eile
vnd was e ein weile
jn den walt mit ir entrunnen,
e div ors heten gewunnen
die riter, die da waren.
des wolt er do varen,
e ez iemen bedæhte,
daz er si hin bræhte.
si was in seiner æhte.
als er si braht in den walt,
jr vleh, div was manicvalt,
da mit si in versuohte,
daz er ir niht geruohte
dehein widerantwurt geben,
nuor daz er si daz leben
schier wolt an tuon.
anders gehiez er dehein suon,
vnd swuor ir des vil dike.
so warn ir ougen blike
vil hertzenleich hin ze got,
daz ir koem sein bot
jn sölhem leide ze trost
vnd si da von erlost
durch seinr gnaden ere,
vnd bedæht ir hertzen sere
vnd ir vnschulde dar an.
vil mangen muot si gewan.
do si den tot vor ir sach,
vil oft si iamerleichen sprach:
< durch got, bruoder, gnad mir!
ja bin ich versmahet dir
vil gar an mein schulde.
la mich haben dein hulde,
daz ich noch muoz genesen,
vnd la mich dein gevangen wesen
jmmer vntz an meinen tot.>
ze seinen füezen si sich bot
mit weinenden ougen
vnd began im starch lougen.
div red galt elliv niht,
daz er ir darvmb iht
mer entleiben wolde,
swie vil si sich kolde,
nuor daz er lachet.
jr hertz in ir leibe chrachet
von sölhem leid vnd brast,
daz si disen swærn last
mit niht chvnd geringen
vnd sich mit keinen dingen
möht ze seinen hulden bringen.
umb ir bet er chlein liez,
nuor daz er ir gehiez
alleweg den gwissen tot.
nv beweinten dise starch not
da sein gesellen alle
vnd ergaben sich ze valle
von den orsen im ze vuozen,
daz ers liez buozen,
ob si iht het missetan
- daz stüend im redelichen an,
ditz wær im wandelbære -,
vnd gedæht, daz si wære
sein bluot vnd sein swester.
nv ward er ie vester
vnd swuor des vil mangen eit,
daz er durch dehein reicheit
sei dwerhes über naht spart.
beidiv har vnde bart
di riter auz brachen.
gynevern leit si rachen
an ir leib mit triwen.
si muost von schulden riwen
an ir also reiniv ivgent,
der leip ze vnverwerter tugent
so gar was gesellet ie.
daz div in solhem chumber hie
was wider sælden huote,
gynever, div guote,
des was gelük ze schelten,
daz ez so chvnde gelten
manig tugent, die si begieng,
daz si so chlein daz vervieng
vnd nv in solhem zweivel hieng.
do des niht moht wesen,
daz er si wolt lan genesen,
si rief laut und schre
vnd sprach vil oft:< we mir, we!
war vmb sol ich tot ligen,
ob ich von lugen bin bezigen,
des ich schuldic nie wart?
nv stirb ich nuor vmb ein wort,
daz in vreiden geschach,
do ichz widern chünich sprach.
daz laz dich, got, erbarmen
vnd send mir vil armen
dein helf, sein ist zeit,
wan hie der tot ein ende geit
an schuld meinem leibe.>
< owe mir armen weibe!>,
oft si iamerlichen sprach
vnd tiur auf ze got sach,
daz er trost ir sande
vnd ir vnschulde bechande.
disiv not die riter bewach,
auf der erde ze seinen vüezen lach
jeglicher vnd bat in,
daz er durch got di chünigin
vnd durch ir dienst liez leben.
der bet wolt er niht geben
jn anders dehein antwurt,
wan daz er sei von in vuort,
so er verrest moht in daz tan.
do begunden weinent dan
die riter alle gahen,
wan si vngerne sahen
an ir dise barmecheit.
do er ein meil gereit,
er lie si nider an daz gras
an der stat, da er was.
daz swert vuort er vnd want
jr zöpf beid vmb die hant
vnd wolt iezuo slahen dar.
schier wart si der red gewar
vnd began starch wüeffen,
sein genad an rüeffen
so laut, daz der walt erhal
nah ir stimme über al
vnd üebet iamerleichen schal.
ez ist niht allez verlorn,
daz in vreise vnd in zorn
eteswenn betaget.
vil oft sich entsaget
daz zil vor dem bogen
vnd wirt div kunst betrogen,
als nv wart hie schein.
daz merch an gotegrein,
der gynevern het gesalt
gar in des todes gwalt.
der enwart da niht vergezen.
gasoein der vermezzen,
der e vmb sei het gestriten,
der cham in den walt geriten
troureg vnd vnmuotes.
seins leibs vnd seins guotes
het er beider lützel aht.
seinr vreuden schein gar bedaht
ein wolken totvinster,
des was sin vroede winster.
der reit da bei nahen,
ob er iht möht vahen,
daz im töht ze phande
wider dise groz schande.
der was ir nv so nahen chomen,
daz er ir weinen het vernomen
vnd den riter ersehen
vnd bars swertes glast wehen.
ouch hort er si nennen,
da von er sei bechennen
sa zehant begunde,
wan si oft auz ir munde
sprach:< gynever, we dir, we!>,
da si lac auf dem sne.
als schier er sei bechande,
auf gotegrin er rande
mit grozer vngebære
vnd warf in ze wære
von dem ors auf einen ast
mit dem sper, daz im abe brast
der arm vnd daz halspein.
da wart ander rede dehein
zwischen im vnd gasoein.
got het ir gesendet trost.
süst wart gynever erlost.
nv hoert, wie gasoein tet.
er wande flehe vnd bet
an sei, ob si wolde,
ob er sein geren solde,
mit im ze lande keren.
er wolte si mit eren
haben vnd mit triwen
vnd wolt durch si niwen
vil mangen vroelichen tak.
die weil en vnmaht lak
div vrowe vnd erblichen.
jr was vil gar geswichen
die weil chraft vnd maht.
ob ez tag oder naht
wær, des enwest si niht,
also vor vrchunft geschiht,
vnd vernam niht, waz er sprach.
als dise red er ersah,
des listes er im sa erdaht,
da mit er si vil snelle braht
gar an sein gewarheit.
an seinen arm er si leit,
daz si sein nie enphant.
div örs er zesamen bant
vnd vuort si mit im dan
von dem bruoder verre in daz tan.
da lac si, vntz si sich versan.
do si sich versinnen kunde
vnd si aufsehen begunde
auz dirre grozen swære,
waz ir geschehen wære,
si ersach gasoein an
vnd het noch des selben wan,
daz ez wær ir bruoder gotegrin.
nv gevie si einen starchen pin
dar vmb, daz er gewaffent schein.
do sprach zuo ir gasoein:
< vrou mein, gehabt ivch wol.
jch binz, der ivch immer sol
alls iwers leides ergetzen.
lat ivch auf daz ors setzen
vnd kert ze land mit mir,
vrowe gynever, da sült ir
jmmer mer die chron tragen
mit mir in meinen tagen,
vnd süln vroelich leben.
jwern leip han ich iv gegeben,
des sült ir mir wizzen danc.
vnser wesen ist hie ze lanc,
wir süln vns bereiten.
wir mügen hie erbeiten,
da von üns michel schade chvmt
vnd üns anders niht gefrumt,
wirt man vnser hie inne.
jch han durch iwer minne
her getragen chumbers vil.
nv ist ez chomen an daz zil,
daz mir geluke lonen wil.>
ein weinen von ir ougen brach,
dar auf si leidechlichen sprach:
< riter, tuot dise rede hin.
ez ist an eu ein vnsin,
daz ir der red gedenchet.
wie het ich dann gechrenchet
aller weibe werdecheit,
so ich iv des wær bereit,
daz ich meinen man liez
vnd mich also verstiez,
daz ich mit iv ze lande
mich auf sölh vnstæte wande,
daz ich iwer kebs müest wesen.
so het ich vür daz golt gelesen
daz chupfer vnd den messinc.
hat vrouwe sæld meiniv dinch
nv zvnheil gecheret
vnd mein vroede geseret,
div mak mich wol geheilen.
jchn sol nimmer gemeilen,
wil got, weibes stæte,
wan swa ich missetæte,
daz wiz man allen weiben.
jch wil vnd sol beleiben
hie alters ein an dirre stat
vnd wil weg vnde phat
wider ze karidol suochen,
ob der chünic des well geruochen,
daz er mich ze hulden laze.
her riter, iwer straze
reitet hin, daz ist iv guot,
daz iv hie dehein widermuot
bei mir von iemen widervar,
wan wirt man iwer hie gewar,
so seit ir verlorn gar.>
er sprach:< div red ist an not,
wan mein leben vnd den tot,
div liez ich e gleich wegen,
e ich ivch liez vnder wegen,
vrowe mein, daz wizzet ir,
vnd ob elliv div werlt mit mir
vmb ivch vehten solde,
daz ich dar vmb enwolde
meins glübs niht abe stan.
wan muoz mir ledichleichen lan
jwern leip, oder ich erstirbe.
ob ich halt dar an verdirbe,
daz enchleit div sel nimmer.
ja bin ich, der iemer
auf der vert tot liget
oder an iv, vrowe, gesiget.
da von lat di red sein.
nemt daz ors, daz ist mein,
vnd sitzet drauf, so nim ich daz.
wolt ir mir niht lonen baz,
daz ich ivch von dem tode nert,
so wær vil übel an gewert
mein vil stärchiv arebeit,
die ich vmb iwer minne leit.
jr sült si anders gelten.
daz hertze sült ir schelten,
daz iv die red geraten hab,
vnt tuot ivch des chrieges ab,
der zimt weibes güete niht,
dar an man sich gnaden versiht,
ob über willen iht geschiht.>
gynever von der red erschrach
so starch, daz ir muot gelach
vnder dirre red zweivelhaft,
vnd gedaht, daz einer kraft
wider in wær ze swach,
dar zuo sei niemen sach,
der ir hulf wider in.
si chvnd ouch dehein sin
auf dirre red erdenchen,
da mit si im gewenchen
dehein weise möhte,
daz ez nah eren töhte.
ouch vorht si vil sere,
daz ir michel vnere
der chünic bieten hiez
vnd daz si niht enliez
jr bruoder hulde gewinnen.
nv was ouch nah ir minnen
gasoein so starch we,
daz si vorht, daz er e
jn dem walde bei ir læg
vnd ir über maht phlæg,
e er si so liez varn.
ouch enchund si daz niht bewarn.
wolt er sein niht han enborn,
jr wer wær gar verlorn.
ditz allez sei dar zuo twanc,
daz si im da svnder danc
muost volgen, wan sein bet
was gebot, die er tet.
des ensol ez niemen missehagen.
jch wil iv dar vmb sagen,
da warn zwo sach an,
da von ich bewæren chan,
daz ez also muost geschehen.
nature wil niht übersehen,
swaz ir allr beste zimt,
dar nach si die girde nimt,
so ir div vorht gesellet ist,
wan weibes broed vnd genist
an swachen dingen hanget.
natur die gelanget,
swa si iht vroeden enstat,
da sei div huot verlat,
div ir di broed solt wern.
des wil ich vür sie geswern,
daz si im nimmer einen trit
het von der stat gevolget mit,
het er seis niht betwungen.
nv was gasoein gelungen.
auf div ors si sich swungen.
dannen riten si beide
gevildes vnd der heide
jn vil churtzer weile
vier wälhisch meile.
den grauen si da liezen.
den moht wol verdriezen,
wan im starch we was,
vnd lac tobend an dem gras
von dem stich vnd dem valle.
sein gesellen warn alle
nv an der widerchere
vnd weinten vil sere
der reinen chüniginne tot.
sei westen niht vmb di not,
di gotegrin, ir herre, leit.
schier horten si, daz sich kleit
einz vor in nahen.
dar begunden si gahen
vnd wanden des vnder in,
ez wær noch div chünigin.
des wurden si vil starch vro.
als si an di stat chomen, do
jr herren si da vunden
siechen vnd wunden
aufem gras in seinem schilde ligen,
vnd was von vnmaht gesigen
nider auf daz antlütz vor.
der ander leip lach enbor,
sam er gar wær erslagen.
daz begunden si vil starche chlagen
vnd vragten, waz im wær geschehen.
er begund in vil rehte iehen,
daz ez gasoein tæt
vnd daz er im ouch hæt
dar zuo die chvnigin genomen,
vnd enwest, war er wær chomen.
vor chlage si vergazen
- daz er gar wart verlazen -,
daz si im niht riten nach,
wan in was allen also gach,
daz si in dan brahten,
daz si des nie gedahten,
wan si daz leit beswæret.
schier wart er gebæret,
vnd mit michelr kol
brahten si in ze charidol
mit disen mærn auf daz haus.
nv was chünic artus
wider chomen von dem gleit.
als man im die mær seit,
wie ez was ergangen,
nv wart daz volch bevangen
mit vil iamerchleicher chlag.
die fürsten, die da ze dem tag
mit artus waren,
die begunnen so gebaren,
daz ir sit chlage baren.
ein chlag wart so gemein,
daz si besunder vnd alein
was des houes gesinde.
von dem alten vnd dem kinde
wart si da wol erbowen,
wan riter vnd vrowen,
knappen vnd meide
waren mit disem leide
gar senelich gevangen.
jr vroed was zergangen,
daz sah man, vnd moht manz sehen.
weinen, riezen vnde phnehen
was da vil wol veil
von dirre geschiht vnheil.
daz sah man da vnd anders niht,
sam da niht wan leit geschiht.
jamers wüeff vnd brustslege,
oft we vnd leides ege,
verrizzen gewant, zerworfen har,
erblichniu leich vür varwe klar,
hertzen bresten, liden chrachen.
vür weibes zvht, vür vroedenlachen,
vür nüschel vnd vür armbouge
ward ir ougen biter louge
also emzechleich gegeben,
daz disem iamerlichem leben
sich niht chvnd geleichen.
hie muost vroed entweichen,
wan mit gewalt da saz
vnvroed vnd vroeden haz.
groz klagt div chriechisch diet,
do elena mit parys schiet
ze chriechen auzem lande,
dar vmb man troy brande.
swie ditz allez wære
genuoc chlagebære,
wan manger den leip verlos,
e si wurden sigelos,
daz engleicht sich niht dirre chlage.
vnd swie wir hoern manig sage,
da vil iamers geschach,
sam da sich brant vnd stach
vrowe dydo vmb eneam
vnd da her tristrant genam
durch vrou ysalde den tot
vnd da man gralanden sot
vnd ywein wart sinnelos,
do in vrou laudin verchos,
vnd da leander ertranch
vnd ouch medeam ir gedanch
dar zuo leider not,
daz si ir kint tot,
daz nieman kund erreten,
vnd da totan vnder beten
durch lieb erdruchten div weip
vnd da vrov dispe den leip
verlos vnd her piramvs
vnd da der chünic theseus
wart ouch in den tot versant
vnd alexandrum den weigant
daz aiter vnd div gift zebrach
vnd da sich mit dem tode rach
jamerleich adriachnes
vnd der chüen hercules
jn einem hemed verbran
vnd ouch vmb den selben man
vrov yoles tot gelak,
div ir vnd im einen slak
des todes von ir schulden gab,
vnd da deydamia in daz grab
lemtigiv vor leide gienc
vnd da sich phyllis erhienc
vnd da von der leide gart
mirra zeinem poum wart
vnd da sich daffnes ersluoc
vnd daz dirces an truoc,
daz agamennon wart erslagen,
vnd thyesti wart vür getragen
ze ezzen sein selbes kint,
vnd da bei des meres sint
ypolitum die delphyn,
als ez div steufmuoter sein
schuof, allen zebrachen
vnd si an im gerachen,
daz was chlagbær vil.
vür war ich iv sagen wil,
noh was der iamer groezer hie,
der si alle gemeinlich vie
vnd si dehein vroede haben lie.
gasoein sein straz reit.
seins gevertes was er vil gemeit.
vil oft er sei kuste,
wan in sein wol geluste,
da er reit auf dem wege.
er het da in seiner phlege,
des er sich von hertzen vrövt
( da wider ein vnvroede steut
artusen vnd seinen man).
si riten dan durch daz tan,
vntz si ein heid geviengen.
jr gelüb si übergiengen,
dar an erbeizten si zehant,
wan die heid gurt vnd pant
von boumen ein troube
mit wol so dikem loube,
daz si da niemen moht sehen,
sol man der warheit iehen.
ouch twanc in div minne,
div het sein sinne
gesant an die chüniginne.
ejn schoeniv linde stuont da bei,
div het manic schoenez zwei
verre auf die heid gestrechet
vnd het da mit bedechet
der heid ein vil schoene stat.
vnd dirre schoenen linde schat
erbeizt er vnd div chünigin.
div örs haft er von in hin
an dirre linden este,
die dar zuo warn veste.
sein schilt er zuo sich hienc.
einen chriec sein muot gevienc,
daz er sich in ir schoz liez
vnd sein hant vil ofte stiez,
swa er moht, vnder ir gewant.
so erwand si im ie die hant
vnd bat in tivr genuoc,
daz er alsölhen vngevuoc
durch got an ir verbære,
wan ez im laster wære,
daz er mit deheinen sachen
jr leip wolt swachen,
vntz er doch chom ze lande.
dar vnder si in mande
seiner triwen vnd des eides
vnd bat in, ir leides
si ergetzen da mit,
daz er sich al sölher sit
vnd der vnfuoge geloubte.
er bat, daz sei im erloubte
mit flehe ane twale,
daz er wan ze einem male
jr hvff mit seinen henden
mit ir willen müeste wenden
dar vnder ir chleider,
so tæt er ir niht leider.
kriec was ir muot beider.
nv sach si wol, daz er bran
sam ein gar gelustic man.
des wolt si mit listen
sich gern von im vristen,
ob si mit ihtiu chvnde.
mit henden vnd mit munde
began si sich vil starch weren.
da wider begund er ir sweren
tausent triwe vnd mangen eit,
daz er mer dehein törperheit
an ir leibe da erzeiget,
ob si in hie mit gesweiget
vnd im des gestatten wolde,
daz er ir hvffe solde
bar begreiffen vnd rüeren.
so wolt er si vüeren
dann zehant gen seinem lande.
gynever niht bechande,
daz ein burch wirt gewunnen,
so die burgær den veinden gunnen,
daz si mit vrid hie vor
auf sliezen div pürgtor
vnd gehausen in daz hamit.
so ist bedenthalben ir streit
verendet vil schiere.
mit offener baniere
die veint dringent dar in.
so scheinet dann ir vnsin.
da enwirt vride noch suon.
gynever wand daz beste tuon.
do er ir also tivr swuor,
nah seinem willen si gevuor
vnd erloubet, des er het gebeten.
dar an het si missetreten,
wan si in kumber wart geweten.
do si im daz urlop verliez
vnd in seinen willen tuon hiez
vnd da mit snelle hin rite
vnd an der stat niht lenger bite,
vor lieb spranch er an div knie.
vil snelle er sein hende lie
an beide hvff vnd ir gewant.
als er ir leibes enphant,
do muost ez wesen ane vride,
wan minne chras von lide ze lide
vnd began in gar enzünden.
daz chvnd ouch geschünden
daz chüssen vnd ir süezer leip.
solt si nv werden sein weip,
da wær si doch vnschuldic an.
er het daz selb doch getan,
het si imz erloubet niht,
swie ez halt noch geschiht.
als er die hvffe begreif,
sein hant manigen enden sleif,
swa im aller liebest was,
vntz er chom vür daz palas,
des vrowe minne ein phliget
vnd da ir geberc tougen liget:
da began er suochen daz sloz.
jn ir brüel zefuort er daz broz,
daz mit blüete was entsprungen,
wan er chom zuo gedrungen
mit so grozzem gwalte,
daz er sein vil valte,
als ez div glust reizet.
vor dem tor er erbeizet
vnd wolt si han ervohten.
gotes gnaden! don mohten
so snelle von seinem ygel
von dem antwerch di rigel
niht werden wol zebrochen,
da mit si was belochen,
wan si satzt sich ze wer.
ouch was ez so in ir gewer,
dar nach gasoein streit,
seit ez ir was so leit,
daz si imz guot weil entseit.
do im also niht gelanc,
vnder ir bein er sich swanc
vnd woltes so betwungen han.
vnder div reit her durch daz tan
her gawein den walt sich
einen also vertigen stich,
der in reht auf siv bracht
- des er niendert het gedaht,
als er von dem risen reit,
da er die auentivr het beieit -,
vnd vant in mit ir ringen,
als er si wolt betwingen.
dar vmb si starch weint.
sein tvgent er ir bescheint.
als er si weinvnd sach,
er chert dar vnde sprach:
< ritter, waz ist dirre gewalt?
wie wurt ir ie so vrowen balt,
oder wer lert ivch dise vnzuht,
daz ir sölhes gewaltes fruht
an vrowen soldet wenden,
da mit ir ivch schenden
vnd sei vnd riters namen welt?
jr wurdet mit lochneis geselt
vil billichen in die chelle.
jr seit sein geselle
an dirre grozen schande.
wært ir in meinem lande,
jr müest sein buoz enphahen.>
die red begund versmahen
gasoein auz der maze,
vnd hiez in sein straze
vil zornchleichen reiten:
wes er da wolt beiten?
er bedörft sein ze sprach niht,
vnd iah, er wær ein boeswiht,
der in gezogen hat,
daz er an iemens rat
so vngebeten gienge,
da man in so enphienge,
- daz er in des niht erzvge
vnd in dar an also betruge.
gawein die rede widerreit
vnd sprach:< dise törperheit
sült ir eim riter niht zeln -
der auz der werlt wolte weln einen sein genoz, jch wæn, sein arbeit wurde groz, e er in erfunde. jch het gern die chunde der vrowen wer si wær. mich entrieg der spehær, so han ichz e wol bechant. daz ist ouch also gewant, daz ichs muoz gesprechen. vntz müest ir ab brechen
dise sprach durh mich.
wil si denne, so reite ich.>
gasoein der gloubet des ringens sich.
gynever sich vil starch schamt.
des gevie si vorn gar ensamt
jr gewant vnd vielt sich dar in,
dar vmb daz ir laster schin
vor gawein dester chleinr.
der sit ist niht ir einr,
ez ist ein gemeinr weibes sit,
vnd wænent ir laster da mit
vil gärlich bedechen.
si schamt sich vor dem reken
- daz het er schier entstanden -,
daz ers in sölhen schanden
het an der stat vunden
mit dem riter vnchunden.
nv enwolt er si niht seren
an vroeden noh an eren,
daz si vür übel næme
vnd ouch im missezæme,
wan daz er ir naher reit
vnd bat si, daz si im seit
dise geschiht vnd div mære,
ob ez mit ir willen wære,
daz sei der riter hete da.
nv begunde diu chüniginne sa
weinen vnd riezen
vnd die geschiht gar entsliezen,
als ez allez was geschehen,
vnd der warheit iehen,
daz si niht het übersehen.
er sprach:< ist diu rede war,
so seit svnder sorgen gar,
vnd weiz man iwer vnschulde,
jch gewinne iv wol hulde
wider den chunic, mein oeheim.
sitzet auf vnd reitet wider heim
vnd beitet niht lenger,
e die weg werden enger,
wan si schier mit der naht
so gar werdent bedaht,
daz wir sei niendert chiesen;
so mügen wir verliesen
jn dem walde die rehten sla
vnd enwizzen, wie oder wa
wir hin süln cheren.>
div rede began seren
hern gasoein de dragoz,
vnd sprach:< riter, wær ich bloz,
so möht wol div rede sein,
daz ir von mir die vrowen mein
füert hin vngevohten.
dannoch, dieweil mir tohten
ze helfen mein hende
vnd der tot ein ende
niht gab meinem leibe,
so wart nah einem weibe
nie sölh wunder getan.
daz ir sein ie gewunnet wan,
daz ir sei sült vüeren hin,
da ich ze antwurt bin,
daz müest mich wol beswæren,
ob iwer vier wæren.
riter, also ist den mæren.>
< wan swaz mir dar vmbe geschiht>,
sprach gawein,< daz wil ich sehen,
vnd muoz ouch ietzuo geschehen.
wol auf, iv sei widerseit!
ez muoz einr solher sicherheit
ünser einr vergezzen.>
gasoein chom auf gesezzen.
mit grozem vnmuote
sein hertz in im wuote
wider sein kamphgesellen,
vnd began sich so stellen
jn dem satel hin vnd her
vnd also leiten sein sper,
daz er im gern het geschadet,
wan in ein haz auf in ladet.
daz selb er dishalp vant.
nv sint si chomen auf den sant
beide mit gleichem zorn.
des wurden sper vnd sporn
den örssen vnd den schilden
mit snellen stichen milden
da zehant geteilet,
daz si warn vngeheilet,
wan sis mit al zebrachen.
auf der tyost si sich stachen
durch die schilde mit den spern,
daz si vil gar auf den chern
zebrasten vnd zesprungen.
div swert wurden erswungen
zehant von den scheiden.
da mit ward in beiden
so manic bitter slak geslagen.
heten si beid niht übertragen
die schilt vnd die sarwat
vnd dar zuo vrov sælden rat,
si heten vnlang gewert,
wan da ietweders swert
des andern mit willen gert.
in mangen weis erniwet wart
von ietweders hohvart
dirre kampf vnd dirre streit,
wan da wont haz vnd neit
vnder in mit michelr chraft.
des wart disiv riterschaft
von in beiden vil sovre.
nie gewarf dehein schoure
sein hagel also dike,
also der flammen plike
von ir swerten aufsprungen,
da si auf die helm chlungen
vnd die schild verschrieten,
daz si dar zuo gerieten,
daz si der erde gevieln
jn so swachen schieln,
daz ietwederm vor der hant
niht mer bleip wan diu bant,
so warn si verhowen.
dar nah muost man schowen
div swert in beiden handen.
auf ein ander si randen
vnd hiwen ane scherm sich.
da wart slak vnd stich
so manlich an gewert,
daz mich wundert, waz si nert.
ouch geviengen si dar vnder
jetweder da besunder
drei weit tief wunden,
daz daz pluot in starchen vnden
dar auz grimmechleichen brach
vnd began rinnen als ein bach.
da von wart ir chraft swach.
si begunden ruowe suochen
vnd ir wunden beruochen
ein weil, als si mohten,
vntz si aber baz tohten
ze der starchen ritterscheft
vnd daz in die chreft
ein teil gewüechsen baz.
nv het gynever den haz
vil gern vnderchomen
vnd der red ein vrid genomen,
do si ir ernst ersach.
swes si bat oder gesprach,
daz enchvnd niht vervahen,
wan si begunden gahen
beidiv auf ein ander sa.
do wart von in beiden da
so manik bitter slac geslagen,
vntz si nimer mohten getragen
div ors von der lazheit.
dannoch ir ietweder streit,
vntz si gar auf die erde sigen,
wan in div chraft was entswigen.
dar zuo was ez in gedigen.
do stuonden si zen vuozen.
mit micheln vnmuozen
ein ander si gerten
neitlichen mit den swerten.
swa si immer chunden,
vil manic weit wunden
ein ander si sluogen.
vil lützel si vertruogen
jn selben vnd entliben.
so lange si daz triben,
daz gawein dem weigant
sein swert sluoc auz der hant,
daz ez hin auf die heide flouch
vnd sich sam ein sichel povch.
do ward im vil leide.
er lief auf die heide
vnd began sein swert suochen.
nv enwold es niht geruochen
gawein, daz er in slüeg,
seit er niht wer trüeg.
daz het er sanft getan.
als er sein swert wider gewan,
nv lief er an gawein.
aber huop sich vnder in zwein
ein also mörtlichiv slaht,
daz vor müed vnd vor vnmaht
si beid an der walstat
nider gesigen in ir sarwat,
sam si beide tot wæren,
wan si begunden swæren
vnd mohten niht mer gewern.
des enmohten si sein niht enbern.
süst lagen si vil lange
von des chumbers getwange,
e si sich versvnnen.
do si da wider gewunnen
jr chreft eteslichen teil,
si liezen ez beid an ein heil
vnd warn ir chrefte geil.
uon der erde si sich swungen,
ze den swerten si sprungen
wider aber alsam e,
swie in beiden wær we
vnd starch wærn geseret.
gasoein zem ors cheret
vnd wolt dar auf gesezen sein.
do tet div müed an im schein,
waz si mohte bringen:
do er sich wolte swingen
dar auf, do viel er ze tal
ein so chreftigen val,
daz er mit alle chraftlos
durch ruowe im di erd erchos.
gawein im selbe die gruobe gruob:
gasoein er wider auf huob,
wan in daz ser bewac,
do er so chraftlos lac,
vnd im doch niht wolt iehen.
als schier ditz was geschehen,
jn verliez dirre swar haft.
daz im an dirre riterschaft
gebrast der aventivre,
dest war, dez muost vil tivre
daz örs nemen über sich,
also daz mær beweiset mich.
dem sluoc er den hals ab
vnd sprach:< ditz ze lon hab,
daz ich abe dir gevallen bin
hie vor meinr vrivndin.
dvn getreist mich nimer vürbaz.
daz ich ie wart also laz,
daz hastv wol vergolten.
dv muost zuo der molten,
swie ez noch vmb mich erga.>
reht geselleschaft leist im da
gawein. do der daz ersach,
daz er sich an dem ors rach,
sein swert er mit neide nam
vnd tet dem seinen alsam.
daz tet er auf solhen ruom,
daz er beidiv schaden vnd fruom
mit im geleich trüege.
anders wær ez vngevüege,
swer sein örs also slüege.
do si nah meinem wan
der örs beliben an,
nv muosten si ane vride wesen.
swelher vnder in solt genesen,
der muost ze vuozen wider gen.
nv huoben aber dise zwen
alsam e ir altez werch.
da von in chraft vnd verch
muost blougen vnd swinden.
wan mak si aber vinden
schier auf der walstet ligen.
si warn beide so ersigen
der chraft vnd des bluotes
wan. so vil so des muotes
noch was an in beiden,
so warn si gescheiden
von disen zwein also gar,
daz si bloz vnd also bar
vür war dar an waren.
nv begunden si varen
ein ander mit stichen,
da si auf ein ander wichen.
si warn beide also chranch
vor müede, daz si sunder danch
vieln auf div swert beide,
daz in swert vnd scheide
von dem valle brasten vnder in.
ouch wart in kraft vnd sin
von in enpfrömdet verre hin.
do div chünigin ersach
ir beider grozen vngemach,
die helm si in ab bant.
als si ir vnmaht erchant,
si lief ein wazzer suochen,
da mit sis beruochen
gern wolt ir genist.
zeinr meil in vil churtzer vrist
het si ein wazzer vunden,
dar in het si gewunden
wol halben ir stouchen
- wan sis niht moht gelouchen
jn der hant noch besliezen,
si vorht ez vergiezen -
vnd besprancht ir antlütze.
daz ward in also nütze,
daz si da von bechamen
vnd ir chraft wider genamen.
gynever si begunde,
so si aller beste chvnde,
beidiv flegen vnd biten,
daz si beid mit guoten siten
durch sei den kampf liezen
- sie möhts wol verdriezen,
wan ez wær an ere -,
vnd iach, daz ez nimer mere
an lobes gewerp gulte,
nuor daz man sei schulte,
swa ez vernomen wurde,
vnd sæhen an die burde,
da mit ir leip wær geladen:
ez möht in bringen sölhen schaden,
dens niht möhten ab gebaden.
do si der rede beid swigen,
si sahen da ir swert ligen
vnder in mit al zebrochen.
daz wart an in gerochen.
an ein ander si lieffen,
mit den armen si sich swieffen
ze ringen vnd ze lenchen,
mit den vüezen ze schrenchen.
mit den brüsten vil mangen druch,
vil mangen wälhischen tvch
jr ietweder erzeiget.
dirre stuont, ienr neiget,
jener zvht, dirre wancht,
dirre burt, ienr sancht,
jenr auf, dirre nider,
der dar, dirre her wider,
dirre svs, enr so.
der zuht disen do
nv zer gürtel, nv enneben,
nv vngelich, nv vil eben,
nv oben, nv vnder,
nv mit einander, nv besvnder,
nv hie, nv da,
beidiv geleich auf einer sla
erzeigten si vil mangen wanch.
dirre disen hin swanch,
der volget mit willen nach.
da wider was disem gach.
dar vnder sich enr spart,
vntz dirre vil müede wart.
so huop sich aber ein niwer champf.
dirre sich vnder ienen krampf,
so huob der, so swart der,
dirre hin, ienr her,
jenr lomt, dirre dent.
auf den sich der ander spent
mit kunst, als er chunde.
ze lest iedoch gunde
vrowe sæld an disem ringen,
daz gawein muost gelingen
vnd gasoein ze der erde braht.
do si het an in gedaht,
do muost ez also ergan.
nv gie si beide div müede an,
daz sich tweder niht versan.
si warn müede also sat,
daz si lagen auf der walstat,
daz ietweder entslief.
gynever weinvnd lief
über si, da si lagen.
si begunde des betragen
vnd vil starch beswærn.
si wande, daz si wærn
vil gwisleichen beide tot.
dar vmb si vil ofte bot
ze got beide hende
vmb sölhe missewende.
vnder dirre grozen swær
troumt gawein, wie er wær
eins morgens vil vruo
von karlivn gen afluo
geriten in die gaudin.
da chom im zuo ein wildez swein,
daz an sein weid was gegan,
vnd began in starch vehten an.
des gewan er michel arebeit,
wan ez im manig wunden sneit
mit einem zan, der was scharf,
vntz er mit einem spiez warf
durch ez, daz ez tot gelac.
von der arebeit er erschrac,
die er leid in dem trovme.
nv was er von dem toume
des pluotes errunnen.
schier het er sich versvnnen,
do er von dem eber genas,
daz ez im getroumet was.
als schier er erwachet
von dem troum, er lachet
vnd zehant sich auf machet.
gyneuer in bitten began,
daz er rit mit ir dan
vnd gasoein da liez
slaffen an dem griez,
daz moht er vil wol getuon.
waz bedorft er bezzer suon?
div red began im missehagen,
vnd sprach, er wolt e erslagen
werden, e erz getæt,
daz si liez die ræt
vnd ir nimmer gewüeg,
si wæren vngevüeg,
vnd wær ein michel schande,
solt er da an dem sande
den riter slaffen lazzen.
so solt in wol verwazzen
al div werlt vnd verfluochen.
er sprach:< ich wil e suochen,
ob ich iht mög vinden,
da mit ich überwinden
jn müg oder er mich.>
jn daz tan huob er sich
vnd suochte da vil mangen weis.
nv het der frost vnd daz eys
ze der erd gevroert die este,
daz si warn so veste,
swaz er ir dar inne vant,
daz er sei mit tweder hant
von der erde niht gwinnen chunde.
nv er also suochen begunde,
er vant niht, daz im frum
wær, wan div zwei drum
von den spern vnd anders niht.
vil lützel der übersiht,
dem deheinr wer durft geschiht.
avf huob er sich vil balde
vnd gie von dem walde
da hin, da sein geselle lak
vnd noch seins slaffes phlak.
den began er suoz wechen
vnd gab dem selben rechen
daz bezzer drum in die hant.
als er des drums enphant,
er seufte tivr vnd sprach:
< wol im, der mir den slaf brach,
wan ich in grozen angsten was.
mich dauht, wie ich ze garadigas
mit der chunigin in dem troume
wær in dem grozem phlovme
jn einem schoenen kiel.
nv dauht mich, daz viel
auf üns da ein grozez weter starch,
da von ich mich zem ersten barch
vnder die ersten dillen,
ob ez iht welt gestillen.
div red was gar verlorn.
den trost, den ich het erkorn,
der kund mich niht vervahen.
einem velsen kom wir nahen,
da der kiel an getriben wart,
daz er sich von einander zart.
da gie ich in vnd ertranch.
div chünigin sich auf swanch
vnd chom oben auf den stein.>
do sprach mein herre gawein:
< jch hoer bei iwerm troum wol,
daz ich iv an gesigen sol.>
< niht>, sprach er,< es bedeutet daz,
daz ich iv sol erzaigen baz,
waz ich noch mak bringen.>
daz drvm began er swingen
vnd lief an gawein da mit.
jch wæn, er vnlange bit,
ern slüeg auf sein gesellen
vnd wolt in also vellen.
gawein im den willen galt;
sein houpt er im wol geswalt,
vntz im sein trvntzen zebrast.
do twanc si aber der müed last,
daz si beide muosten sitzen,
wan si begunden switzen
vnd chomen von den witzen.
div chunigin gie aber dar.
swa si warn iendert bluotvar,
daz wischet si mit ir stauchen ab
vnd het vil groz vngehab
mit weinen vmb ir chriegen muot,
wan auz ir wunden vloz daz bluot
mit sölher vnmaze,
daz der anger vnd div straze
allez was mit al beströwet.
daz was, daz si vnvröwet.
nv si so lang gesazen,
daz si beide het verlazzen
div vnmaht vnd der we,
si wolten aber alsam e
mit ein ander han gestriten.
do began si weinvnde bitten
div künigin mit listen,
daz si den champf vristen,
vntz si wurden gesunt
- si warn doch so starch wunt,
daz si des niht enwesten,
ob si sein möhten enbresten -,
vnd hiez si gedenchen dar an,
daz alexander, der chüen man,
porum dar vmb verchos,
daz er zu der tyost sin rosz verlosz,
bisz yme ein anders braht wart.
sie sprach:< also tünt zwen hoffwart,
die sich bijszent vmb ein bein!
was taug vnder ùch zwein
ein so verzagter strijt,
da mit ir befangen sijt,
wann er ùch swaches lob git?>
nach der red sprach gasozein:
< wir möchten des werden ein,
das ich volge dem rate.>
er viel also gedrate,
als er die rede gesprach:
von vnmaht das geschach.
davon gesweich gawein die krafft,
das er dorch reht geselleschafft
dem ritter den fal galt,
vnd in der selbe vngewalt
nidder warff auch von leid.
als sie nú widder kamen beid,
gawein sprach:< ritter güt,
jch siehe nü, das ùch tut
den dot schier die vnmaht.
wellent ir des lebens haben aht,
so kerent gein karidol mit mir,
da schaffe ich snell, das ir
von vwerm kumber werdent ernert
vf solche rede, das ir verswert
vnd bietent uwer sicherheit,
was ir hie vf min frauwe seit,
daz das alles ein lùgen sij,
vnd daz sie von ùch wese frij
verre vnd auch da by.>
er sprach:< der rede were zuuiel.
jch sage ùch, was ich tün wil:
jch wil, daz ir hie bestat
vnd mir vil lediclichen lat
das rosz vnd die frauwe min.
ob das also möge gesin,
vnd sij ùch die rede vergeben,
vnd das ich ùch lasze leben,
des mögent ir mir gnade sagen,
wenn ich hett ùch doch erslagen.>
gawein vil höfelichen sprach:
< jch siehe wol, das uwer gemach,
her ritter, ist gar krang.
jch wil es ùch gern sagen dang,
was ir mir tunt zugut.
jr sint aber von dem blüt
vnd von den starcken wonden,
die ùch nit sint gebonden,
der krafft schier ergetzet.
jr werdent vil gar entsetzet
des lebens, glaubent ir mir niht.
es ist ùch so gar ein wiht,
wenn ir mùssent verderben.
jch wil mit uch werben
getrùwlich ein wijse,
da von sich nymmer uwer prijs
mag gemynnren als vmb ein har.
jch wil ùch doch den lip gar
da mit bewaren vnd neren.
jch wil ùch ritters trùwe sweren.
kerent mit mir gein karidol,
da beruoch ich ùch also wol,
das ir vil snelle genesen,
vnd wil, das ir des sicher wesent.
wenn ir werdent gesunt
vnd mir tünt den tag kunt,
jch gewyn ùch rosz vnd sarwot
vnd bringe herwidder an die stat
min frauwe, die kùniginne,
vnd gefellet sie ùch zü gewynne,
jr niessent auch ir mynne.>
also der ritter die rede vernam,
vil wol sie sinem hertzen zam,
vnd sprach:< des wil ich sicherheit
von ùch haben vnd den eyt
vnd auch von miner frauwen;
der wil ich wol getruwen,
daz sie ymmer daran missetuo,
vnd wil ùch gern volgen nú
vnd sùllent das wol wissen:
jch hette mich e laszen zerrijszen
an minem libe gar,
e ich ymmer were kommen dar,
were die gelùbde niht ergan,
die ir mir, frauw, habent getan.>
hie liesz er die rede. zü hant
das rosz er von der linden bant,
da es hing an dem ast,
herr gawein, vnd gurtt es vast
vnd satzte den ritter dar uff.
gynouer usz irem mantel slouff
vnd hulte den ritter dar jn.
er satzte auch die kùnigin
hinder jne, daz sie jne hielte,
wenn er nit wol wilte
siner krafft von der vnmaht,
vnd jne auch vor dem froste dachte.
gawein gie vor vnd zoh sie.
da er zwa mijlen vor gie,
die müde jne hart gefie,
wenn er doch gewapent gie;
das kom von der wonden wen.
da batt er ein wijle geen
die kùnigin, wenn er müde was
vnd an allen vieren krasz
jn dem sne vf dem gras.
also snell er sie des gebat,
sie erbeiszte an der selben stat
vnd satzte jne hinder gasozein
vnd gie nebent jne zwein
vnd pflag ir bi dem zaume.
nu was sie vil kaume
ein mile gegangen,
das sie gar hatt befangen
die müde, vnd erlag.
die naht gar bisz an den tag
muost gawein vnd die kùnigin
beyde tragen den vngewyn:
so ir eins wolt rijden,
so muoste das ander bijden,
bisz das dis die ruoge gefing.
als nü der tag vf ging,
so waren sie also nahen,
das sie karidol sahen.
des wart ir freud vil grosz,
wenn der ritter von dragoz
was des bluotes so errunnen,
das sie jne gar kaum gewonnen
vsz dem sattel, da er jnne sasz,
bisz sie yme ab gehulffen basz.
vf die erde sie jne huoben.
sie wuscheten vnd schuben
das rosz vnd das gereid.
mit groszer arbeit
wart er gereinigt von dem blüt.
nü wart es jnen zü müt,
sitt es was der bùrge so nahe by,
das sie vff das rosz alle drij
gesaszen vnd ritten von dan,
die kùnigin vnd die zwen man,
gein karidol zü dem huse.
schier kamen sie zü der clusen,
da begegente jne ein schöne magt,
die herab von dem huse reit,
die clagte vnd weynte.
mit truwen sie das meynte,
daz sie ir frauwen hett verlorn;
vnd wolte den dot han gekorn
ader wolt iemer sin geritten,
was jamers sie joch solt han erlitten,
sie funde denn ir liebe frauwen.
do enmohte sie des nit getrawen,
daz sie ir frauwen da solt schauwen.
als nú die magt ir frauwen ersah,
den grúsz sie vor liebe sprah
vnd kerte widder vf das husz,
da sie den kùnig artus
vant sitzend und clagend.
sie sprach:< herre ich wil ùch mere sagen,
die ich han vernomen.
jr sollent mir güten wilkomen
geben vmb die nuwe mere.
nü laszent uwer swere
vnd geent an der freuden pfadt:
min frauw ist in der stadt
vnd uwer nefe, her gawein,
vnd haben mit jne gasozein,
verwondt vnd gefangen.
wie es jne sij ergangen,
die rede ist mir vnkunt,
wenn das sie beyde hart wunt
sint, das han ich wol gesehen,
von wem die rede sij geschehen,
vnd rijdent al drij niht me
wenn ein rosz blanck als ein sne.>
als nú artus die bottschafft vernam,
sin hertz in solchen freuden swam,
die nit wol ieman zü sagen ist.
vor liebe entwelte er keine frist.
er ging gegen dem bùrgethor,
da vant er vil ritter vor,
den kay die mere hatt geseit,
als es yme die magt auch hatt geseit.
die kùnigin an die brùcke reit.
da erhuob sich freud, die was grosz.
den ritter von tragoz
hiez gynouer ab heben
vnd darnach gaweynen iren nefen.
her kay hüb gynouern ab
vnd sprach:< das ist ein riche hab,
die min frauw braht hat,
das sie blosz one sarwat
zwen ritter hat bezwungen.
jr ist da gelungen,
da minem herren gebrast,
der nit wolt disen gast
zü velde dorch sie bestan.
sie hat es aber dorch jne getan
vnd hat jne manlich entworcht.
jr hertz ist gar vneruorcht,
sie sal von rehtem gund
die stat zer tafelrund
haben von ir manheit.
deshalb sie hat wol beieit,
das sie ein sit gester
gotegrin vnd auguintester
vnd dise zwen mit tyostùre
zü richer auentùre
hat ritterlich erworben.
da weren verdorben
zwen recken vil lichte
von einer wonden sichte,
der trawet sie vil wol genesen,
ob sie halt tieffer wer gewesen.>
der rede begunden sie alle
sere lachen mit schalle,
wenn artus, dem was es zorn.
den zwein wart ein gemach erkorn,
da man jne ire wonden bùnd,
vnd sante, das man fùnd
einen artzot, der das kùnd.
ein stat wart jne beyden
vber ein wasser bescheyden,
da der lufft gesunt was,
jn einen richen palas;
vnd zwen güt visicine,
so sie nirgent beste mohten sin,
wart jne gewonnen schier
von montaillire,
die ir diete bewarten
vnd solcher essen varten,
die sie zwùngen nach entriben,
vnd doch nit in dem magen blieben,
vnd auch nit weren swinde,
widder erste vil linde,
darnach die vester waren
vnd ire libe kunden leren
von vberigem taume,
vnd iedoch so uil kaume,
das sie von iren krefften kemen icht,
als dem siechen gar licht geschiht,
wedder zü süsze noch zü sure,
das icht ir nature
dise temperierten da von,
bisz sie sin weren gewon.
also lagen sie das gantz iar
siech vnd blöde gar,
bisz glich zü der hochzijt
zü pfingsten, die der mey git,
das sie kaume genasen,
vnd doch bisz an die masen
gar nahe geheilt waren,
nuwen das gaweynen swaren
sine wonden innerthalp:
die waren von der salben
jnnen zü nit züsammen komen,
wenn er hatt sich vbernomen
an der arbeit, da er gie
vnd sinen kampff gesellen rijden lie.
das was yme nuo schade hie.
der ritter was wol genesen.
e dirre hoff solte wesen,
er ging züm kùnige, da er sasz
vnd mit yme karidohrebaz.
er stunt fùr artusen vnd sprach:
< artus, so ein rich gemach
jch hie gehabt han,
wenn ich nye beszers gewan.
des habent gnade vnd dang,
wenn mich vil groszer kumber zwang.
nü hörent, was ich sprechen wil;
daran ich ùch nihts verhiel,
was ware vnd gelogen ist.
jch hatt genomen einen frist
zùschent gawein vnd mir
zu dem tage, vnd wir
beyde weren worden gesunt,
so ich jme ted kunt,
vmb min frauwen, vwer wip,
gesigte ich, daz ich solt iren lip
one ansprach mynnen.
nu wil ich gewynnen
vil gern vwer huld,
wenn ich gar one ir schuld
sie mit wortten belog
vnd ùch mit al bedrog.
das sollent ir mir vergeben.
jch wil von hynnan fùr leben,
kùnig artus, in vwerm gebott
ymer mer sunder spott
mit güt vnd mit libe.
gebietent ir, ich blibe
gesinde vnd hoffgeselle
vnd wil in der kelle
büszen bisz an den tag,
das ich vwer hulde gehaben mag
vnd der vil lieben frauwen min.
vnd wùrt des vil gering schin,
mag es in uwern hulden gesin.>
artus nach siner gesellen rat
vergab yme die missedat.
das selb auch die kùnigin tett
dorch jne vnd dorch der ritter bedt
vnd lehe yme hofes genoszschafft.
nuo wüchs da freuden grosz krafft
vnder dem gesinde vber al.
auch so wúchs die mere vnd der schal
bi gawein, da er sicher lag.
das was yme ein lieber tag
vnd ein liebe mere,
das er aller siner swere
da von endlich vergasz,
wenn er kante den ritter basz,
auch sin krafft vnd sin ellen,
denn sust ieman siner gesellen:
des was er sin also fro.
ein hoff wart gebotten do
nach des kùnigs gewonheit
vnd vff den pfingstdag geleit,
als es denn her gawein batt.
beide kastel vnd stat
wurdent der geste also vol,
das da geherbergen wol
nieman kunde wenn zü vilde.
das was nach sinem willen.
da was aller freuden vil.
die mere ich ùch hernùwen wil,
da von ich vor han geseit:
sgoydamur, die schone meit,
die amurfina die schöne
des lands vnd der krone
verstoszen hatt dorch iren gewalt,
die reit nü veld vnd walt,
vnd hett den hertten wintter gar
gestrichen dorch die lande dar
mit arbeit vnd mit frage,
vnd hatt jren lip zu wage
gesetzt vf solchen trost,
das ir artus ir lant erlost,
mit wem sie das gebete.
sie bekante jne so stete,
das er es vil snelle tete.
nuo an dem pfingstdag morgen
das gesinde began sorgen
vnd reden nach auentùre,
vnd die geste vil tùre
baten, das sie muost geschehen.
dis was reht vor eszen,
vnd was der kùnig gesessen
mit sinen gesten vber al
gein der gaudin vf einem sal,
das sie ir augenweid
hetten vf der breiten heid,
alles nach auentùre wan.
nement war, wa die magt wol getan,
sgoydamur, dorther reit!
des wart der kùnig vil gemeit,
als er sie her rijden sah.
zü sinen gesellen er gar bald sprah:
< vns kompt ein auentùre hie.>
fúr die portten lieff vnd gie
das gesinde von dem palas,
was des gesindes an der stat was.
nü was auch die magt komen.
gynouer, die kùnigin, hatt die mere vernomen:
die kam mit iren frauwen dar,
mit einer rijlichen schar,
das sie sie wolt schauwen.
das gesinde die jumpfrauwen
mit groszen zùhten enpfing,
das gein ir fùr die porten ging.
des sagde sie jne allen dang.
jr zeltar was ein maul blang,
den sie da zü hofe hatt geritten.
jr gereid was vil nahe gesnitten
mit golde wol erschoszen,
wenn eins was sie verdroszen,
das sie one den zaum kam.
jr lip was gar lobsam,
wer er zü freuden gestalt:
sie hatt gar in ir gewalt
ein bitter truren gesalt.
sje gie, da der kùnig sasz,
wie sie were freuden lasz,
vnd neigte yme vil schone.
sie sprach:< die riche krone,
die hymel vnd erde gewalt hat,
jn der magenkrafft es alles stat,
die müsze ùch, kùnig her,
lip, güt vnd ere
beschirmen vnd behalten,
das ir iemer mùszent walten
der richen welt wonne;
vnd wer ùch des vergönne,
dem geschehe also leid,
also mir vil armen meid
von miner swester geschehen ist.
des sùche ich rat vnd genist
an ùch vnd das gesinde,
ob ich ieman hie jnne vinde,
der mir zù solcher swere
ein getruwer kempf were;
dem wolt ich mich erbieten
vnd sin arbeit ermieten
mit mines libes mynne,
ob er mir widder gewùnne
minem zaum, den ich han verlorn,
darvmb ich freude han verkorn.
es ist yme aber ein swerer hafft,
er sij denn sere mannhafft
sal er jne widder gewynnen.
yme mag wol e zerrynnen
der krafft, e er in erfochten hab;
dennoch sal nyeman erschrecken darab,
wenn ich biete yme gar riche hab.
und wil ùch doch dar vmb sagen,
man möhte die auentùre bejagen
vil wol. wer ieman hie jnne,
der sich dorch min mynne
an neme dise reise,
jch wölte yme zü der freise
niht stùwre verzijhen;
jch wolt yme nü verlijhen
minen maul, der ist zü reise snel,
der wijset jne zü einem castel,
da er den zaum findt,
das er nymmer wider windt.>
es stunt der megde zü nehst by
der truchsesz, min herr kay,
der hatt ir bedt vil wol vernomen.
er sprach:< sît ir her komen,
frauwe, dorch solcher rede sitt,
so diene zü dirre hochzijt
minem herren, wer nü welle;
vnd were er in der helle,
des kund mich nit bedragen,
jch wolte mich da wagen,
vmb uwer mynne, frauw min;
vnd lant uwer weynnen sin.
jch wil da hin, kiesent mich!>
sie sprach:< herre, das tuon ich.
als ich minen zaum han,
so wissent, daz ich ùch gan
alles vwers willen wol,
wenn ich dann zü reht sal.>
nuo sie jme des kùssens nit entwehrt.
er nam nicht anders denn sin swert
vnd getorst nit fùrbasz -
wenn sie hatt verwiddert das -
an sie nymmer gemüten.
er nam von der güten
vrlob dan vnd reit,
das er da nit lenger beit,
vor schamm, das sie yme verseit.
als er nuo vf den maul gesasz,
sgoydamur verbot yme das,
das er den maul icht erwande,
zü wasser nach zü lande,
wa er hin wolte keren.
dar nach begund sie meren
jr weynen vnd ir clagen
vnd began es offentlichen sagen,
das sie das vil wol weste,
das die arbeit zü veste
dem druchsessen were,
vnd widder keme lere.
her kay sich vf den weg liez
vnd ted, als jne die magt hiesz:
den maul liesz er selbs gan.
schier kam er zuo einem vinstern tan,
da er dorch muost rijten.
da hatt sich vil wijten
das tier gein sinem wege
gesammelt mit einer lege,
lebart vnd lewen
mit gienender kùwen,
reht da er solte rijten fùr,
das er ein vil enge türe
gein dem wege gefing,
der mitten dorch sie ging.
des vorchte sich der truchsesz vil sere.
das getier ze dem maul die ere
dorch siner frauwen willen erzeigt,
das es sich alles neigte
zuo tale vf die knye vorn
vnd liesz sinen wilden zorn,
wenn es den maul wol kante.
vf einen smalen stig zü hant
vnd vnuerttigen gnüg,
der sie usz dem walde trüg,
der maul sin spore slüg.
den stig kund er wol gan,
wenn er es vor dick hatt getan,
vnd kam da in ein tieffes tal,
das was ynnen zü vber al
so vinster vnd so eyszlich,
das ich nit weisz, das yme glich
jcht were wenn die helle.
sin grunt vnd das gevelle
gab einen dötlichen gesmack,
wann er alle vol lag
jnnen zü krotten vnd slangen;
vnd hette das befangen
zwen grosze lintracken,
die usz iren kynebacken
blieszen wildes fùwre,
da von was vngehùwre
der was, der da von brach.
da von kay so we geschach,
das er vil nahe dot was.
da er vor der freise genasz,
da wart yme aber also heisz,
das yme die hitz vnd der sweisz
vil nahe hette an getan den dot.
als er nü vberwant die starck not,
da began jne aber friesen,
das er da von verliesen
wande den lip fùr war.
jne duchte die clein zijt sin ein jar,
das er dar jnne were gewesen.
als er da vor was genesen,
er kam an ein eben
recht disem tale eneben,
da schein heisz die sunne.
vnd vant da einen bronnen,
luter vnd gesunden,
da hette sich vmb gewunden
ein schöner breiter seuenbaum,
vnd hatt yme einen schönen raum
also verre gereicht sin flaum.
kay bi dem bronnen erbeitzte.
sin maul was ersweiszt,
dem nam er den sattel ab.
da er in der gnaden hab
nach der freise hatt gelendet,
er wande han verendet
hie alles sin vngemach.
der este er von dem baume brach
vnd begie sinen maul wol,
als man müden roszen tün sal,
mit wùschen vnd mit strichen,
das yme gar muoste entwijchen
die mùde vnd bereit wart,
als ob er vil lang were gespart;
vnd liesz jne trincken dar nach.
wann yme zü der reise was gach,
er sattelt widder vff jne
vnd kerte sinen weg hin,
da der maul selb hin ging.
vil schier er einen stig gefing,
der trüg jne zü einer heide,
ein wüste wegscheide.
als er nuo zu einem wasser kam,
dem was sin flusz vnd sin stram
swartz, tieff vnd breit,
was er da by vf gereit
hin vnd her sinen weg,
er vant wedder brùck nach steg
nach barcken zü varn,
nach enspurte keiner mutter barn,
was er ie gereit da by.
so lang reit nü her kay,
bisz er von geschiht vant
einen steck smeler denn ein hant,
der was gar stehelin;
das was an den ecken schin,
die sniten beydenthalben sin.
der maule nam des steges war
vnd kerte reht den weg dar
vnd wolt daruf springen.
kay begund jne widder twingen,
wenn er das wasser widder sasz,
vnd gedohte:< warvmb ted ich das,
das ich mich sold trencken?
wie mochte ich des gedencken?
der steg ist so gar smale,
jch müste vallen zü tale,
so möchte mich nyeman ernern.
entruwen, ich wolt des e swern,
daz ich von mynne nymmer fro
wùrd, e ich ertrùncke so.>
zü hant kerte er hinder sich
widder heym den vil rechten strich,
den jne der mule hatt her getragen.
hie wil ich nit mer sagen.
wenn da die jumpfrauw vernam,
das kay lere widder kam,
sie ging fùr den kùnig stan
vnd sprach jne weynend an,
das er sie nach beriete
eines kempfen nach der miete,
als sie da vor gemeldet hat.
nü wolt her lantzelet
gern ir kempff gewesen sin.
sie sprach:< kùnig, herre min,
wöllent ir nü nach freuden leben,
so sùllent ir mir zü kempffen geben
herrn gawein, vwer swester sún,
den man mir zú anfrun
bi der serre zü torrùre.
der ist ein heltt tùre,
anders wil ich keinen.>
nuo bewegte jne ir weynen,
vnd enbote die rede gaweyn.
wie wol an sinem hertzen schein,
das er vor keiner vare swein!
als yme nü die rede geseit wart,
wie die magt weinte vnd zart
jr kleider ab vnd ir hare,
vnd das sie vnder diser schare
nieman anders zü kempfen wolte han denn jne,
er stunt vf vnd ging hin
zü ir, da sie weynende sasz.
er sprach:< frauw, gehabt ùch basz.
sit ir min zuo einem kempfen begert,
jr sùllent sin werden gewert.
wie frisch mine wonden sint,
jch enlasze dorch keine pijn,
jch bringe ùch vwern zaum widder.>
mit diser rede ging er her nydder,
da er den maul stend vant:
blosz gar, an ysingewant
vnd an schilt vnd sunder sper,
wann ein das swert fúrt er.
darvff sasz er vnd reit von dan.
sgoydamur, die wolgetan,
ted yme nach vil manigen segen.
nach dem maule ted der tegen
vnd liesz yme gar den gewalt.
schier was er kommen in den walt,
da die tiere jnne warn:
die begunden yme varn
vil micheler eren.
von dannan streich er vil sere
dorch das eiszlich tale
vnd kam schier an den vale,
da das tieff wasser flosz.
nuo sah er das var blosz
an aller hand vberfart.
da von yme hart leid wart,
das yme das wasser was verspart.
den maul er alles geen liesz.
bi dem staden vf des waszers griesz
gie er snelle nach dem wege,
bisz er jne brahte zü dem selben stege,
da kay widder was geritten.
der steg wart von gawein nit vermitten:
er ted dem maul einen swang,
das er vf den steg sprang,
so er snellest kund.
dar uff er begund
vil sicherlichen zelten,
wenn vnder wijlen selten,
daz ime der fúsz ab sleiff
vnd kaume halber begreiff.
also kam er vber das wasser hin.
einen weg trúg der maul in,
der was enge vnd smale,
gein einem anger zü tale,
von dem waszer zü einem huse,
das slosz ein selige cluse,
das vor aller welt sicher waz.
die maure was als ein glasz,
berhtel, hoch vnd glad,
vnd was niergent kein stad,
wedder uszen noch jnne,
da an keiner zynne,
sie were mit haubten besteckt,
wann eine, die noch bleckt.
darvmb ging ein tieffer grab
von oben in das tale herab,
mit steinen gemauret,
der ymmer wol turet;
dar jnne ein tieffes wasser ran;
da was ein grosz wonder an,
das es die maure vmb treib,
das sie kein wijle bleib.
sie lieff also snelle
vmb vnd vmb, als ein welle
sie dreib, daz sie nie entwelt,
reht als ein müle, die da melt,
also die auentùre zelt.
als nü gawein das wonder sah,
das an dem huse geschah,
das nam jne grosz wonder,
vnd haette das husz bisonder
jnnen zü sere gern gesehen,
als es doch muoste geschehen.
er karte ùber die brucke dar
vnd nam des vil gnauwe war,
bisz das thore gein yme her vmb kam:
den maul er mit den sporn nam
vnd rante in das bùrgtor
jn so glichem spor,
das er nyrgent an rürt,
wenn das die porte zerfürt
dem maul hinden den zagel:
das kam von einem türnagel,
der halb usz dem slosz hing.
der maul ein strasze ging
jn dem huse zü tale,
bisz er kam zü einem schonen sale;
da by gestunt er zü stet.
gawein der lùte wartet,
ob ieman darjnne were,
den hett er dar nare
vil gern gefraget.
da er also des laget
vnd nyeman vf der straszen was,
er gie vf den palas
dorch schauwen in ein venster stan.
nü kam ein getwerg dorther gegan
vnd hiesz jne wilkom sin.
< gnade>, sprach er,< frùnt min.>
nit me sprach es; darnach
wart yme von dannan also gach,
das es widder kerte von yme sa
jn die burg sin alten sla;
nü bleib er aber eine da.
nuo wonderte es gawein, was das meinte.
an ein venster er sich leinte
vnd wartet widder vnd fùr.
nú sah er usz einer thüre
einen wol schönen man gan,
vnd trúg die besten cleyder an,
die ie kein man gesah.
an dem ein wonder so geschah:
er wart verwandelt zü hant -
beide sin lip vnd sin gewant -
jn solche wandelung,
das keins mannes zung
es nymmer möchte errecken.
sin schöne begund er decken
mit so eiszlicher gehebe,
jch wone, daz icht lebe,
das so vngestalt were.
hie wil ich ùch die mere
nùwen vnd zü end sagen:
von yme was manig man erslagen,
der auentùre da wolt beiagen.
itzunt was er ein pfaff wol gelert,
der sich also hatt verkert.
das hatt er von listen gar:
wie er wolte sin geuar,
das kund er wol geschaffen.
es was von dem pfaffen
manig grosz auentùre ergangen,
des nyeman dorfft belangen,
ob ich das alles sagen wölte.
er hies von michelolde
der hùbsch gansgüter,
mit dem artuses mütter
tougen von brytanien für.
amurfina vnd sgoydamur,
er ir beyder öheim was.
dise burg vnd den palas
hatt er also erbuwen
disen zwein jumpfrauwen,
das es vmb lieff alwegen,
das nyeman vber brùcke noch stege
jn die burg mohte komen.
wart aber ieman da vernomen,
der möhte mit niht genesen.
hie laszen wir dise rede wesen
vnd heben vnser mere an.
als er sich wandeln began,
gawein began des wartten.
ein breit helmbartten
gansgüter vber die achszel ving.
die stegen er vf züm sale ging
vnd stunt fùr gawein, da er sasz,
vnd sprach zü yme one hasz:
< wisz wilkomen, gawein her.>
< vil grosz gnade>, sprach er,
< ob du es meynest jn guot.>
< ja, ich zware! wenn din mút,
das wisse, gawein herre,
dem hastu gar zu verre
gefolget dar an, das wisse crist,
das du her jn komen bist,
wenn din arbeit verlorn ist.
wiltu nü das herfechten,
das manigen güten knehten
jr libe hie an gewonnen hat?
als es denn vmb den zaume stat,
dar vmb du bist komen her:
e denn man dich des lediclichen gewer,
du müst vor hin strijden manigen strijd,
der dir villicht einer den dot git,
gawein, das sage ich dir wol.>
er sprach:< ob ich schon sterben sal
darvmb, so müsz das ergan,
ader ich músz den zaum han.>
hie mit er nit lenger beitet.
als er die rede hatt geseit,
gaweins er sich vnderwant
vnd nam jne so an die hant
vnd fürt jne von dannan in einen sal,
vsz dem ein stegen zü tale.
da vant gawein ein schön gemach:
ein tafel er gerichtet sach
von brot vnd von win
vnd da by anderthalben sin
ein bett, das wol gebettet was.
darob lag ein cyclas
von sydin vnd von golde gar.
gansgüter braht yme gering dar
waszer in zwein beckin.
darnach satzte er den recken
vber die tafel vnd hiesz jne eszen;
vnd also bald er was geseszen,
manigerhand kost er gaweynen dar trüg.
als nuo gawein gasz reht gnüg,
den tisch er von yme stiesz,
vf das bett er jne geen hiesz,
das er dar an lege
vnd siner rúge pflege,
wenn die müde mahte jne trege.
do er da schied von jm,
er sprach:< gawein, frùnt, nim
vnder zwein spielen ein spiel,
die ich dir beyde teilen wil,
vnd das ich das ander hab:
slahe mir ytzunt min haubt ab
mit dirre bartten, die ich trage,
vnd lasz mich morgen bi dem tage
dir ab slahen das din, ader slahe mir morgen ab das min
vnd lasz mich hint slahen e.>
gawein sprach:< wie es ergee,
dwijle sin nit mag wesen rat
vnd es also dar vmb stat,
so wil ich hùtt der erst sin
vnd wil dich morn das min
ab slahen laszen.>
er sprach:< ich sij verwaszen,
gawein, ob ich icht beszers ger.
nü nym hin vnd ge her,
ee du dich gar slaffen legest,
vnd slahe, was du iemer mögest,
vnd fuder mich vnd dich.>
gawein nam die bartten an sich
vnd stalte jne mitten in den sal
vnd slüg jne, das als ein bal
das haubt in dem sale scheib
vnd er haubtlosz da bleib.
als er den slag von yme enpfing,
nach dem haubt er sùchend ging
lang in dem sale, bisz er es vant.
er nam es sa in sin hant
vnd gie von dannan vnd sweig.
die steigen er ab steig.
jch weisz aber nit, wa er hin geneig.
gawein sich nydder slaffen leit.
vnd also bald es morgens teit,
gawein begund wachen
vnd wolt sich vf machen
vnd vmb den zaum schaffen.
nv hörent von dem pfaffen:
der kam in den sal gegan
also gesunt als kein man,
dem er das haubt ab slüg.
die helmbartten er trüg
vber sine ahszel vnd sprach:
< gawein, was hint din gemach
jcht gút, des frauw ich mich.
lieber frùnt, ich manen dich
diner gelùbde, die du tede,
das du die haltest stede,
als du mir nehten verhiesz.>
er sprach:< ob ich das liesz,
was solte mir den ritters nam?
jch tün dir billich alsam,
als du mir hast getan vor.
jch sal geen vf den spor,
den du vor gegangen hast,
dwijle du mich des nit erlast.
wol her! sieh, wa ich bin!>
mit zùchten stunt er fùr jne,
das er sich nyrgent rürt.
die helmbartten fürte
gansgüter vnd ted zwen slege,
das er verfelte al wege
vnd yme den lip verserte niht.
die auentùre jne beyden giht,
das es darvmb geschah,
das er das gern sah,
wie manhafft er were;
wenn dirre zauberere
hette jne vil vngern erslagen;
er hette jne e vbertragen,
wenn er was sin geswye.
amurfina, sin amye,
des pfaffen swester tochter was.
darvmb er vor yme genasz.
da widder was sin muome
ygern, die bluome,
kùnig artus mütter:
die mynnet aber gansgüter,
die er mit fiddeln erwarp,
da vtpandagaron starb;
vnd fürt sie gein madarb.
als nü die red geschah
gawein zü gansgüter sprah:
< dwijle du mich hast laszen leben,
wer sal mir aber den zaum geben,
darvmb ich bin komen her?>
< gawein, lieber frùnt>, sprach er,
< des bringe ich dir wol jnne,
wie man den zaum gewynne,
e vns noch by kum der mittag.
du müst noch vor tuon manigen slag
zü rosz vnd vf der erden,
e dir der zaum werde.
du solt dich wol gerihten,
du müst gar bald vehten
mit zwein lewen wilden.
ob sie mit zehen schilden
zehen ritter solten besteen,
jne möhte wol miszegeen.
du solt aber vor eszen.>
sprach gawein, der vermeszen:
< jch wil vehten zü hant!
nu bestelle mir ysin gewant.
des bedarff ich, das weistu wol.>
gansgüter sprach:< des ist das husz vol,
des gewynne ich vil vnd gnüg.>
gar bald er da fùr jne trúg
wol zehen ritter sarwat,
darusz er jne welen batt,
was yme darvnder behagt,
wenn er sahe jne vnuerzagt. gawein im genade saget.
als nuo gawein sah, der fremd gast,
das yme nihts gebrast,
vnd was bereit als ein ritter gar,
gansgüter truog yme selbs dar
aht schilde, vest vnd starck,
vnd hiesz ine gewar vnd karg
widder sie an dem strijd sin.
ein glauin gar stehelin
broht er zu dem schild hin:
das tet er vf disen syn,
ob yme sin swert geswich,
das er da mit zü stich
stùnde vnd vehte,
bisz er yme ein anders brehte.
da gansguoter das alles getett,
da ging er von gaweinen vf der stett
zuo einer grùben, da er die lewen vant.
jr einen er gering ab bant
vnd zohe jne mit yme her fùr
dar, da gawein vor der türe
vf der straszen stunt vnd beit.
der lewe solche töbikeit
vnd sollich hochfart begie:
da er jne usz der hant lie
vnd er den ritter ersah,
die erde er vff kratzte vnd brah
vnd began sich sere rùhen.
gawein wolt jne nit schùhen
vnd began grymmeclichen zü jme treten.
vor zorn nüg er die klaeten
vnd slúg sich selbs mit dem zagel
vnd lieff an jne vil gezalich,
das er ine widder want,
vnd zartte yme gar von der hant
den schiltt mit zorn so zü hant.
gawein wart vil hart vol zorn,
das er den schilt hatt verlorn.
einen andern er gar gering nam.
an disen lewen freisam
lieff er mit dem swert so
vnd slug yme einen slag da,
das er die ketten schriet enzwey,
da von der lewe lute schrey
mit eiszlicher stymme.
er lieff an den ritter mit grymme,
als ob es were ein wilder hagel,
vnd slüg jn vorn mit dem zagel
vf den schilt, daz er gar zerbrast.
einen andern schilt nam aber der gast
vnd kerte da widder an jne.
der lewe zartte yme den schilt hin
von der hant, daz er gar zerstaub,
da widder yme gawein zerclaub
das haubt so vber vf den giel
das er da von dot viel,
wenn die wond yme zü hertzen gie.
den andern lewen dar lie
gansgüter an sin stat,
wann jne des gawein bat.
als nú der ander lewe dar gelaszen wart,
er begie grosze hochfart
mit lymmen vnd mit grauwen,
mit schrien vnd mit krauwen,
da er den lewen sah toten:
die augen begunden roten
jn dem haubt als ein fùwre.
mit zorn der vngehùwre
an gawein den ritter sprang
vnd nam yme da sünder dang
den schilt, den er zü schirm bot,
vnd tett yme so grosze not,
das er wonde wesen dot.
eynen andern schilt er gefing,
den er fùr sich zü wehr hing
vnd bote jne dem lewen dar.
des nam er gar eben war
vnd lieff an jne vil schier.
aber flosz von dem tier
den dritt schilt her gawein.
nü was kein schilt mer da denn ein.
den ahtsten nam der ritter fùr die hant.
der lewe yme vber schildes rant
den halsperg vor ab zart.
gawein yne nit me spart,
wenn es was vber zijt;
vnder jne zwein endte sich der strijt.
der ritter stach den lewen züm hertzen jn,
das er viel dot da hin.
als nuo der ritter die lewen hatt erslagen,
er batt gansgütern yme zü sagen,
wer yme geb den zaum.
er sprach:< es ist nach ein traum,
da mit du vmb gangen bist.
du siehst gar in kurtzer frist
das bluot tieff by dir sweben,
e dir der zaum werd gegeben,
wenn, wiltu mir glauben,
so geen wir vf die lauben
vnd eszen da ein lùtzel e,
das dir din krafft icht engee,
wenn dir sin schier durfft geschiht.>
des wolt er yme folgen niht.
da wiese er jne mit yme dan
jn ein kammer wol getan,
dar jnn ein verwondeter ritter lag,
der hatt einen tieffen slag
dorch den lip gein dem hertzen
vnd was mit dem smertzen
manigen tag also gelegen,
das sin nieman mohte pflegen,
vnd sage ùch, wenn die rede was,
das er der wonden nit genasz.
es was ein selige gewonheit:
so yme ein ritter gereit,
der dar nach auentùre kam
vnd ritterschafft widder jn genam,
ob er den mochte gezwingen,
der mohte mit niht gedingen,
wenn mit dem haubt eine
( ander sicherung keyne
nam er), das slug er ab -
den lip befalhe er dem grab -
vnd stackte es an ein zynne.
ob er aber an der vnmynne
wart von ir dheynem wunt,
so wart er nymmer nie gesunt,
bisz yme ein ander kam dar:
so wart er so gesunt gar,
das ime ein ader nyrgent swar.
als nù gawein in die kammer ging,
der ritter jne gar frölich enpfing
vnd wart so zuhant heil.
er sprach:< richer salden teil
hat mir noch heil behalten.
jch sal mit freuden alten,
das ir mir her komen sijt.
jr müszent mit mir einen strijt
vehten, vnd des ist nit rat,
wenn es hie also stat.>
des was yme gawein bereit.
zwey rosz groszer behendikeit
braht jne gansgüter dar
da berhardis was worden gar:
daruf sie gesaszen.
der schilte sie nit vergaszen:
sie wùrden zü halse gehangen.
mit zwein spern langen
sie sich vnderstachen
also, daz sie zerbrachen
zùgel vnd sattelbogen,
vnd kamen beyde zü der erden geflogen.
vf sprungen sie beyde
vnd fúrten von der scheyde
die swert mit glichem muot.
da muost von dem bluot
der stael werden miszfare.
sie schrieden von den henden gar
bisz an die hend die schild.
sie waren beide mild
zü borgen vnd zü gelden.
sie entwelten vil selden,
so wagen sie die slege
vnd suchten sie al wege
von morgen bisz zü mittem tage.
da vergalt es gar mit einem slage
gawein, den er dem ritter slug,
das er jne zü der erden trúg
vnd hett des strijdes gnüg.
den helm er yme ab bant,
die coypfen vnd das ysin gewant,
vnd slüg yme ab das haubt.
als er jne des beraubte,
er gab es dem zolnare.
da stunt dennoch ein zynne lere,
da stackte es gansgüter an.
sie gingen frölichen von dan
mit einander vf den palas,
da er des nahtes gelegen was,
vnd entwapente sich an der stat.
gansgütern er aber bat
vmb den zaum, als er vor tet.
antwurte gansgüter:< dise bett
die ist mit al verlorn.
dù müst vor basz bekorn,
wie vbel er zu gewynnen sij.
jch han noch hienahe by
zwen drachen, die sint eiszlich
vnd sint des alters glich
vnd sint so vngehùre,
das sie das wilde fùwre
werffent usz den backen.
mit disen zwein dracken
mústu, gawein, vechten e;
von den geschiht dir vil we.
vnd wil dir fùr war sagen:
du múst zü dem strijd tragen
ein wol vester sarwat,
wenn es dir gar engstlichen stat;
der gewynne ich dir hie vil.
ob du mit jne vechten wilt,
es ist aber dir ein vil harttes spil.>
< gansgüter>, sprach er,< frùnt min,
vnd solten sie nü grùselicher sin
denn die tùfel in der helle,
jch müsz ir geselle
nü wesen an dem strijd.
ein sarwat wijd,
dick vnd darvnder vest,
die hinne sij die beste,
die bringe mir gering her,
wenn ich auch des selben ger.>
gansgüter jne der rede gewert:
harnsch, schilt vnd swert
braht er yme vil gering dar,
das vest was vnd gewar.
dar jn sich gawein gart.
vil bald er bereit wart,
jn die vil liehten ringe.
< frùnt>, sprach er,< nü bringe
der trachen einen vf den ring,
daz ich dise teding
mit yme gering volende,
e ich die zijt verswende,
das ich schier widder lende.>
gansgüter brahte den worm.
da hüb sich vnder jne ein sturm.
als er vf den ring sprang,
gawyn vast gein ym drang
vnd bote zü wehr sinen schilt.
der worm in dem ringe spilt
mit dem zagel vil manige wijse.
darvnder was gawein wijse
vnd satzte sich nuwen zü wehr,
ob er yme keme in sin gewehr,
das er jne möchte gewynnen:
des lagte er mit synnen.
als er nuo des vil getreip,
sinen weddel er züsammen scheib
vnd lieff an gaweynen mit zorn
mit einem eiszlichen horn,
das er vornzuo an dem haubt trüg.
dorch sinen schilt er es slüg,
das es an dem libe widder want.
dem worm slúg er zü hant
das horn von dem haubt,
das er da von beraubt;
vor yme er sigen began,
vnd yme der dot an gewan
den lip von der wonden. da er was vberwonden
er batt auch gansguotern darzú laszen
den andern tarrant verwaszen,
der dises tùfels bruoder was:
der was grün als ein gras
vszen an der hùte decke,
dar jnne rot flecken
von den dicken breiten squamen,
die sich wol fùr namen.
als er jne vf den ring liesz,
vf gaweinen er mit zorn stiesz
vnd wolt jne han zerbrochen.
da mit wolt er gerochen
han sinen notgesellen.
er wolt jne nidder vellen
mit dem weddel, da ving er jn -
das wart zü hant sin vngewyn -,
den slüg er yme suber ab,
wie er were als ein nab.
den schaden er vil gering rach:
das fùwre yme usz dem giele brach,
das bliese er dar vnd brant
den schilt im gar von der hant,
das er mit al verswant.
als er nü gestunt des schiltes blosz
da wart erst sin arbeit grosz,
wenn der worm an jne vaht
vnd hatt jne gantz also bedacht
mit so vngefügem fùwre,
das er kein stùre
moht han, da mit er das leben getruwt zü haben.
er muoste sin antlid haben
vnder den arm vor dem gesmag,
den der eiterige track
an jne mit dem fùwre warff.
darzù waren auch so gar scharff
sine clawen, daz er da zart
von yme die starcke sarwat,
glich als weres ein blödes blat.
da zùschent vorchte er den dot,
wann der drach ted yme grosze not.
des müste er sich wogen.
gawein begunde des logen,
das er jne vngewarnet vant.
er bote yme die lincke hant,
die wolt der trach han verslonden.
da slúg yme gawein ein wonden
dorch des halses kragen,
die jne zü der erden múste tragen
dot, wenn er was erslagen.
uon disem bösen wasze
weyse jne von dan ab der strasze
gansgüter vf einen sale.
darob horte er gar groszen schale,
anders denn daz er nyeman sahe.
des wonderte jne, das er sprah
zü gansguter, was das were.
er sprach:< du solt die mere
gar völliclichen wissen,
e du noch siehest enbijszen:
dis sint alle die meide
die du von jrem groszen leide
alzijt bisz her hast erlost,
vnd haben noch zü dir groszen trost,
wenn du ir aller herre bist.
jr frauwe din amye ist,
amurfina, die schöne,
die dir frauw mynne zü lone
gab zü torrùre,
da du die auentùre
suochtest zü der serre.
sie vorchten dir gewerren
die lewen vnd die wùrme.
nuo du aber disen sturme
so fùr hast gekert,
des hat sich gemert
da von ir freude deste basz,
die vor was blowig vnd lasz.
sie hatten angst vmb dich:
darüber frauwen sie sich.
vnd wil dir me sagen:
das tier, das du hast erslagen,
vnd den ritter, der mit dir streit,
das mag dir wol wesen leit,
wann es gehort dir alles an;
den schaden hastu dir getan
vmb niht dorch din geswijen.
amurfine, diner amyen,
jst sie swester, das glaube mir,
dorch die du solchen schaden dir
hast getan, das weisz ich wol,
wenn ir auch der zaume sol.
sie heiszt sgodiamur die meit.
du hast aber da mit beieit
so rehten loblichen prijsz,
das es dich in dheyne wijse
an dem schaden gar wenig rùwen mag:
das heil an dinem gewerbe lag,
dis wùrt diner freuden tag.
ich sage dir von sgodiamur,
die nach dir zü houe fúr,
vnd amurfinam, diner amyen,
vnd von ir mutter ansgyen,
die was min swester fur war;
die sie beyde gebar,
die hiesz man von ylern.
kùnig artuses mutter, ysgern,
die fuor mit mir von karidol -
das wiszent alle lùte wol -,
die fürte ich gein madarp,
da vtpandagron starb.
gawein, der selb bin ich.
du solt gar eben mercken mich
vnd solt din muome gesehen.
mir möhte ymmer sin geschehen
kein liebe, das mir were
ein so gar süsze mere,
so daz ich dich gesehen han.
du salt auch nùst verliesen dar an:
jch wil dir ein gabe geben,
da von du sicherlichen leben
mahst, dwijle du sie hast,
ob du es nit vnderwegen last,
du kommest zü schastel mervillos,
wenn din mutter ist freuden losz
vmb dich gewesen lang
mit kumbers getwang.
jch sagen dir, was die gabe ist:
- ob du dir selbs so getrùw bist,
das du sie da wilt nemen,
so mag dich sin wol gezemen -,
es ist ein riche sarwat,
der die welt kein so güt hat,
vnd wes ein ritter bedarff,
vnd ein swert also scharff,
das sin eck nit vermijdet
vnd hertten stahel snydet
basz denn das weiche bly.
kum dar, ob es dir lieb sy,
es ist vil nahe hie by.>
dje rede behagte gawein wol.
er hatt sie nit gereit vol,
bisz daz das getwerg zü ging,
das jne zü dem ersten enpfing,
vnd sprach:< gawein, die frauwe min,
die beytet in der kammern din,
din amye amurfina.>
also nam jne gansguter da
vnd ted yme gút cleider an.
er fürte jne dorch den sal hin dan
manig kammer vnd gadem.
da horte er einen starcken kradem
von richem gesinde;
darvnder horte er linde
megde reden vnd singen
vnd grosze freude volbringen.
das began yme sere wol behagen
vnd batt yme gansguter sagen,
was sollich freude betaute
vnd so gar süsze laute.
vnder die was er dar komen,
da er die freude hatt vernomen
von der richen massenye,
da amurfina, sine amye,
jn einem kostlichen palas sasz,
als sie wolte haben gasz,
wann das sie gaweins beyt
vnd was siner zükunft gemeyt.
als nü gawein in den palas trat,
sie wichent alle von ir stat
zuo sammen vnd swiegent.
amurfina von dem gediegen
gie gein yme vnd kuste jne:
also sanckte sich frauw mynne in sinen synn,
bisz das er sie erkant.
das gesinde so jne alles nant
vnd empfing jne mit eren.
also muoste sich freude meren
als denn die liebe wol kan geleren.
grosz freude in dem huse wart,
den vor der weg was verspert
von den zwein eytertracken,
die jnn iren kynbacken
die lùte alle verslunden,
die sie vff den straszen funden;
des lagen sie vor jne verstolen
vnder der erden in den holen
vnd geturstent nyrgent her usz komen.
als sie nuo das hatten vernomen,
das sie gawein hatt erslagen,
des begunden sie gotte gnade vnd dang sagen.
die rede sollen wir laszen!
also bald sie gesaszen,
gawein jne allen sagd,
so bald es am andern morgen tagd,
das sie alle weren bereit,
wol geritten vnd wol gecleit;
er wölte sine frùndin
zuo sinem öheim hin
furen: das müste sin.
als nü der tag sinen schijn
erzeugte des morgens fruo,
sie waren alle bereit darzú,
wol gekleit vnd wol geritten.
der ritter kleyder waren gesnitten
je von zwein pfellern.
mit zwentzig siner gesellen
vnd mit zwölff meyden,
die er wol schüff kleyden,
schied er von dannan vnd amurfina.
die andern liesz er alda,
das sie in dem huse weren.
das enwolt er nit leren.
den zaum er an den mule nam
vnd die schöne amurfinam
vnd zwölff saumere,
die vor die kamerere
vff dem wege hin drieben.
nit lenger sie da blieben,
gein karidol sie strichen,
so das sie nie entwichen
den roszen von jren rucken,
bisz sie kamen vber die brùcke.
was sie mochten getragen,
was sal ich mer da von sagen?
gein karidol kamen sie in dryen tagen.
schon wurden sie enpfangen:
geyn yme kam gegangen,
als die mere kamen dar,
artus vnd das gesinde gar
vber die brùcke an dem burggraben.
gynouer hatt sich auch erhaben
da mit maniger meide,
das der süszen augenweide
vil manigen ritter zam,
die von ir schöne kam,
das manig hertz entzunde.
nü kam an der stund
gawein an die brùcke geritten,
da man sin hette vor gebitten,
mit siner frùndinne.
mit groszer mynne
wurden sie enpfangen da.
nü wart sgoydamur fro,
da sie an dem mule gesah
den zaum, vnd gewan vngemach,
da sie ir swester hatt ersehen,
vnd wonderte, wie es were geschehen,
das sie dar kummen were.
sie enweste nit der mere,
wie es were ergangen vor.
sie kerten gegen dem bùrgetor
mit freuden, die was rijch,
je zwen vnd zwen glich
vnder rittern vnd frauwen.
da mohte man wol schauwen,
wie tugend da hett gebuwen.
der anfang was ersam.
gynouer nam amurfinam
vnd ir massenye
dorch gemaches banchenye
vnd ir swester sgoydamur.
jn wol herlicher fúr
hiesz sie ir da beyder pflegen
vnd liesz des males vnderwegen,
das sie nit zü tisch sasz,
wann sie kund ir pflegen basz,
denn ieman da kunde.
der rede er ir wol gunde,
artus, dorch hern gawein.
nach eszen batt her ywein
gawein sagen die mere,
wie die auentùre were,
da mit er den zaum widder gewan.
als er jne sagen began
so manigerhand freyse
vf dem huse vnd an der reyse,
sie lobten gott vil tùre,
das er die auentùre
so wol hett vberwonden
mit sinen frischen wonden.
da er es alles geseit,
nyeman karte es in ein zagheit
hern kay, da er her widder kerte,
wie man jne vor hin vnert.
als sie den zaum sahen,
vff ir truwen sie des jahen,
jne dùrffte darvmb nyeman versmahen.
als sie die rede volendten,
er batt den kùnig senden
nach gynouer der kùnigin,
das sie keme da zü jne
vnd die frauwen mit jr neme,
der sie mit ir gezeme,
vnd dise swestern beyde
vnd auch ir beyder meyde,
vnd besammelent die ritter ùber al,
das sie kumment vff den sal.
da hin kament sie mit richer schar,
gynouer vnd die ritter gar.
als sie nú alle nydder gesaszen
vnd iglichem wart gelaszen
vf dem sale ein stat,
gawein sie alle swijgen bat.
er sprach:< ir wissent al wol,
mit hulden ich es sprechen sal,
das min liebe jumpfrauw,
der ich aller gnaden getruw,
die nam mich zü einem kempfen hie.
jr wissent auch alle wol, wie:
vff ire mynne vnd vf iren lip,
das sie solt wesen min wijp,
vnd was ich tün wölde
von ir, das ich das tün sölde,
ob ich so wol gefehte,
das ich ir den zaum brehte,
den ich ir nú han braht her.
nù begere ich, daz sie mich gewer
vnd iren lip in mine ger
gar setze one wehr,
ob sie mir der rede giht.>
sie antworte:< ich leugen sin niht:
min lip, der sal vwer sin!>
< nü horent, huszgenosz min,
vnd her kùnig auch, min herr,
daz es mir icht gewerre,
ob sie wölte widder wencken
vnd mich hie nach beschrencken.
sie hat das selb gejehen,
die gelùbde sij also geschehen;
jr sùllent mit mir dar zü sehen.
frauwe, nemment uwern zaum hin,
des ich ùch willig bin,
vnd tünt, als ir habent verheissen mir.>
sgoydamur antwurte:< herre, vnd wöllent ir
mich mynnen, das lob ich,
des bin ich fro und hergib mich.
herre, hant ir ùch des bedoht,
fùr wen ir jne haben bracht,
da volge ich ùch gern an,
jst er nü ein geborner man.
jch wil ùch doch vor sagen:
jr sollent mich nit geben einem zagen,
wenn keyns mag ich genemen,
er möge denn minen eren gezemen;
so lant mich min strasze varn.>
< die bete wil ich bewarn>,
sprach er,< vnd enden den strijt.
herr kùnig, dwijle ir nü hie sijt
des lands richtere,
vnd wir beyde sint clagere,
so sint wir mit dirre rede fùr ùch komen,
als ir denn von vns beyden habent vernomen:
so richtent hie dise clage.
jr sollent wol nach vnser sage
einer vrteil fragen;
des lant ùch nit betragen
dwijle sie sich der rede bekennt hat,
als es nach dem rechten stat.>
nuo wart da erfunden
mit rechten vrkunden,
dwijle sie sich yme hatt ergeben,
so solte sie auch sins willen leben:
die rede were gar eben.
der rede wart gefolget da.
nuo rieff er gasozein sa
vnd sgoydamur zü yme dar
vnd sagde yme die rede gar,
wie es vmb ir swester erging.
mit der hend er sie gefing
vnd sprach:< lieber geselle,
ob sie es selber welle,
so befelhe ich dir dise meit
zü einer solchen stetikeit,
die nymmer zerge,
vnd zuo recht zü diner ee;
vnd gib dir zü ir ein lant,
da du herre ùber werdest genant;
da stet ein castell jnne,
daz das ieman möge gewynnen,
das bedarfftu nit sorgen.
frauwe, ùch sij auch niht verborgen
das er wol ist kùnigs genosz.
er heiszet gasozein de tragoz,
da treit er die crone.>
sie sprach mit zùchten schone:
< herre, sin mynne ich gern wil!
uwer tugend erkenne ich so vil,
daran ir ùch habent gefliszen,
daz ir mit vwerm wissen
vil vngern mich verstoszen.
was ir mich tuont heiszent,
da wil ich nymmer widder sin.>
gynouer gab ein vingerlin
gasozein zü mynne pfant,
das stiesz er ir an die hant
vnd kuszte sie vngemant.
nü wart da ein hochzijt grosz -
wann er was da ein huszgenosz -
von den zwein brutloften.
grosz ere sie da koften
mit gabe an varnder diet:
was ir von dem hofe schiet,
die waren so wol beraten,
das sie es nit wandel haten
von silber nach von gold;
was sin yeman nemen wold,
das gab man der vngewegen.
da zùschent hiesz gynouer pflegen
der geste mit groszen eren:
das endorffte sie nyeman leren.
sie kunde sin so vil,
das sie allen frauwen das ziel
zü den zijten mit miltikeit braht,
wann wem ir helffe durffte geschah,
der wart beraten so zú hant,
das alle sin armüt verswant.
artus das selb ted.
entweders ted er es von ir bed
ader sie dorch die sin,
das sie jn zwischelem schine
beyde trügent so glichen müt;
denn von wem vns kummt alles gut,
von dannan kompt jne auch beyden das.
wöllent ir es nach wissen basz?
das was von wibes güte:
die kan der manne gemùte
zú allen freuden keren
vnd alle tugend meren
vnd bietent solche grüsze,
da von ein eyter süsze
wùrd, wie bitter es were.
es ist mir noch ein mere,
vnd weisz doch die warheit.
es ist mir nit geseit,
jch han es befonden,
wenn ich trage noch die wonden
vngeheilet, sie ist aber gebonden.
hie müsz ich laszen bliben
die rede von den wijben,
der mich nach wol gezeme,
ob es mir nit neme
die zijt vnd die tage,
vnd das es min senende clage
meret dar vnder.
vnd ist das nit wonder,
wenn wer sin leit an sieht,
da von yme ie wirser geschiht?
also ist mir! als ich
zü wijbes lob setze mich
vnd ich gedencke dar an,
wie wijbes güte manigen man
beraten hat, den ich weisz,
der sich ires lobs nye gefleisz,
das derret miner freuden kern,
vnd wil sin doch nit enbern,
jch müsz jne wol sprechen.
hie wil ich es ab brechen
vnd von der hochtzijt sagen:
die werte zü funfftzehen tagen
mit kosperer richeit.
nü wart in orcanye geleit
von den gesellen ein turney
fúr die burg zü monteley.
da mit sich der hoff zerliesz,
wann artus die gesellen hiesz
alle rijden da hyn,
vnd reit er selbs mit yne
gein dem wald auenturos.
gaweyn yme einen sundern weg kosz,
da von er sine gesellen verlosz.
als sie nü in den walt kamen
vnd den weg fúr sich namen,
gawein begunde trahten
vnd vmb die tyost achten,
da er die erste wolt geben.
nü ging ein weg by yme eineben,
der jne von sinen gesellen trùg;
daruff er sin rosz slúg
das er sich des nye verstunt,
also die lùte alle tünt,
so sie in gedencken sint;
da von sint sie schier blint.
den weg er vil gering reit,
er was eben vnd breit
vnd dar zuo hart wol getrieben.
sine gesellen auch nit blieben,
sie strichen vast dorch den walt,
des gawein an der reise engalt,
das sie sin nit namen war.
also kam er von der schar.
sinen weg er fùr sich streich,
das er darab nit entweich
bisz gar nohe an die vesper zijt.
da vernam er einen hertten strijt,
als jne duhte, vil nahe da.
nú satzte er sich vf die sla
vnd began sich erst verstan,
daz er sich hette in dem tan
verritten von sinen gesellen.
als er nuo horte vellen
die spere vnd swert erklingen
vnd vnder jne dringen
die garzunen mit groyren,
er want da turnieren
die von der tauelrunde.
sin mut jne dar zu schùnde
so er aller erst komen kunde.
das rosz nam er in die sporn.
beyde haecken vnd dorn
kerte er dar vil vnerkomen,
da er die ritter hatt vernomen;
darzú was yme hartt gach
so er ie serer iagde nach,
so sie ie ferrer strichen vor.
so lang reit er vf der spür,
bisz yme ein magt engegen reit,
die weinte zú male sere vnd kleit,
vf einem hohen castelan,
das was wijsz als ein swan,
vnd hett an sich gelenet
einen ritter, den sie beweynte,
jn aller siner sarwat,
die ein ritter von recht an ym hat.
nù was der selb ritter dot.
jren grüsz sie her gaweinen weynende bot
vnd das sie jemerlichen sprach:
< wann hett ich dis vngemach
fúr dich an mynem libe!
es geschah nye weltwibe
leyder, denn mir ist geschehen.
süszer got, lasz mich sehen
einen lieben tag an parcifaln!
da er das spere vnd den grol
hersahe zü gornomant,
das er min leit nit enwant
vnd maniger frauwen swere,
da der arm vischere
es jne by der naht sehen hiesz,
das er jne vngefraget liesz,
noch also sere ruwet mich,
das kùnig artus velschet sich
vnd die tugentriche ritterschafft
an dirre tregen geselleschafft,
es entoug nit ir magenkrafft!>
also clagend sie fúr sich reit.
nü hat gawein ir hertzeleit
vernomen vnd nit gesehen.
er begann ir sere nach sehen,
wenn es jne rürende began,
das er sie hett fùr gelan
vngefraget diser mere.
wie willig er sin were,
er kunde sie nye vberrijten
anders, denn das er sie by sijten
den toden ritter füren sahe,
des dot ir schöne freude brahe:
das bedrübte jne uszer masze.
er kerte die selbe strasze
widder vf sinen alten sla.
nuo horte er aber vor yme da
die ritter strijden also e -
vnd ein stymme rüffen we -
gein einander bitterlichen.
nuo began er fast strijchen
dar, als er da die stymme vernam,
wenn es yme zü sehen zam.
vil schier was er komen dar
vnd vant von rittern ein schar
jn der wijse gezimiret,
als da man mit turnieret,
eins gewapens alle glich:
das was vil sùberlich
vnd ùberal wijsz als ein harm;
vnd hatten sich als ein swarm
jn ein ander geflohten,
das sie deste basz mohten
sich mit gewarheit erwehren;
vnd solt ich sin fùr ware sweren,
jr was wol sehs hundert,
der keiner uszgesùndert
von dem andern an dem strijde was,
er lege dot vf dem grase,
ader were aber wonder, daz er icht genasz.
wider dise ritter alle streit
ein swert, das was vil breit,
vnd ein spere, das was lang,
vnd zwei rosz, die warn blang,
darob sie enbore swebten.
wer sie fürte ader wie sie lebten
ader wer mit jnen slüge
ader sie zü strijde trüge,
das enkunde gawein nit ersehen,
wenn manig tyost vnd schehen
sah er sie vber den ring nemen,
vnd beyde wonden vnd lemen
sahe er sie one twale,
das ir zuo iglichem male
wol drijszig vielent vf den sant
dot nach der tyost zü hant
vnd ie nach dem puneiz.
so sah man des blütes sweisz
an dem spere rynnen zü tal,
vnd wurden auch des swertes mal
blütfar vnd rot.
dorch dise jemerliche not
rieffen sie so grymme,
das man ir aller stymme
wol vier mijle hatt vernomen.
schier was es dar an komen,
das dis jemerlich her
gar dot gelag one wehr.
als er den jamer ersah,
der also tougenlich geschah,
des nam jne hart wonder,
das ir nyeman dar vnder
an dem strijde was genesen,
was die rede solte wesen.
nuo ted er mit flijsze war,
das das swert also blüt far
was vnd die lantze gar.
als sie nü alle warn erslagen,
er sah die rosz hin tragen
dis sper vnd das swert.
gawein das mit flijsze begert,
das er die auentùre beieit,
ob er ieman fùnde, der yme seit,
was es betùden sold.
nuo seht, wa er wold
der auentùre iagen nach!
dar zü wart yme snelle gach
vnd satzte sich hinden nach vf die spor,
da die rosze gingen vor,
vnd wolte sie jn dheyne wijse begeben.
vnlang reit er jn eneben,
bisz sich das her entzunde
vnd so brennen begund,
das hinder yme erslagen lag,
das so lieht wart als der tag
die naht von dem fùwre.
dise grosz auentùre
gawein begunde mercken,
vnd begunde jne das zú stercken
dester me vf die nachfart,
das yme dar zü ie lieber wart.
reht vf die slah er sich brah,
da er alles vor yme sah,
heyde, gebirge vnd walt,
daz er sich nye usz ir gewalt
zü keiner ruowe verlie
bisz das der tag vff gie.
da waren sie kommen in ein lant,
das was alles verbrant,
gantz gar vnd wüst.
wer da wesen müst,
der hatt den lip gar bald verlorn.
da wüchsz weder gras noch korn,
nichts anders denn hecken vnd dorn.
dorch das lant müst er strijchen,
dwijle er nit wolt wijchen
von dirre groszen auentùre.
ein gebirge vngehùwre
steig er vff in ein ander lant,
dar jnne er vnderwegen vant
ein auentùre, die was grosz.
er sah ein schöne magt blosz
vnd der cleyder gar one
einen riesen vngetane,
der was mit ketten gebonden,
von sinen frischen wonden
dem gefùgel mit einem klobben wehren
vnd mocht in doch nit erneren:
sie zartten yme das fleisch ab
mit so gijrischer vngehab,
das sie jne dorch slügen
vnd jne bisz vf das hertz nügen
vnd zerteilten sine braden.
der megde sie nùst taden.
nuo batt er niht dise meit,
das sie yme dise auentùre seit.
das liesz er dorch disen list:
er vorchte in der selben frist
die auentùre zü verliesen,
das er icht moht gekiesen,
ob er sich versùmete icht.
er vant ein ander geschicht
nach dirre vil schier:
er sah von einem tier,
das starck vnd eiszlich was
vnd zü male grün als ein gras,
vnd hatt an dem haubt vorn
an der stirn ein scharffes langes horn
vnd zwey bij sijts da neben, die warn hoh vnd eben;
vnd lag vf dem tier
von richer zymier
ein gezùg, was zü male güt,
das zuo tale vf die erd wuot,
vnd was rot als ein blút.
daruf sasz ein altes wijp,
der was uszwendig der lip
von cleidern so gezieret
vnd so rijlich gezimieret,
da von es zü lang were zù sagen.
jr hare hatt sie hinden ab geslagen
zú rùcke allenthalben da;
das was alles ijszgra
vnd gie ir vber die lenden.
sie fúrte kein gebende
denn von golde ein schappel.
vnder den augen was sie geel
vnd gar tötlich getan,
anders denn das sie vnder iren augen bran,
ein schijn als ein fùwre.
sust was ir vil tùwre
alle löbliche anblick.
einen starcken hennffin strich
fùrte sie an der lincken hant,
da mit sie einen moren bant,
der was grùwlich und grosz,
er was auch nackent vnd blosz,
der mit ir bisijts lieff
vnd mit jemerlicher stymme rieff,
wann sie jne vnsanfft ruorte
mit einer geyseln, die sie fürte.
nú ted es gawein so hartt we,
das der more so iemerlichen schre,
vnd were yme gern gewegen,
nuwent das er vnderwegen
nit wol mohte bliben,
vnd wolt sich auch mit wijben mit niht zwar beweren,
wan im moht daz gewerren, vnd sein lop von im verren.
des liesz er sie rijden fùr.
er vorcht auch, daz er verlür
die auentùre, dar nach er reit.
vf dem wege er vast nach ieit,
da er ein auentùre sah,
die nahe by yme geschah.
ein ritter sere gein yme flohe
vf einem rosz, das was hoh.
der was gewapent wol,
vnd was swartz als ein kol
beyde schilt vnd ysin gewant,
vnd fùrt in der rechten hant
mit den zöpfen ein haubt,
des was ein wijp beraubt.
dem jagte nach ein ritter rot,
der jm ritterschafft an bot.
was er yemer mohte herstrijchen
vnd jener moht gewijchen,
das ted er yme fliehen.
so bad yne vf ziehen
der ritter vnd beyten sin,
vnd das er liesz wesen schijn
ob er ein ritter were.
dirre kerte sich an die mere
gar niht, wann das er die strasze
ymer mere fùr sich masze
vnd flohe, so er best kund.
jn einer kurtzen stund
waren sie yme entritten beyd
jn den walt von der heyd.
darjnn ersahe er ir nit me fùrbasz.
vil manigfelticlichen clagte er das
das er nit solte sehen,
was jnen beyden solte geschehen;
das er fùr ware möhte gejehen.
hje kam von sinen augen
das wùnderlich taugen
von dem swert vnd dem sper.
vil vnlang reit er,
bisz er einen groszen walt hergreiff
an eines gebirges vmbsweiff,
das die rosz vor yme vff stiegen.
an dem fùrholtz sah er ligen
einen schilt vnder einem baume,
vnd haffte by sinem zaume
ein gesattelt rosz dar an,
vnd was ein helm wol getan
gehangen an dem sattelbogen
vnd ein swert, usz einer scheide gezogen,
das hing einhalb bar;
vnd was sin stahel luter var;
vnd was ein kostbere sarwat
jn dem schilt an der selben stat
vnd zwa hosen vil gut,
wann das es hatt frisches blüt
mit vollen vbergoszen,
da von was es beroszen.
ein banyer grosz stackte alda,
der varbe was gar bla,
da was oben an gesteckt
ein ritters haubt, daz sie deckt.
darvnder lag ein leithunt,
der was auch zu verhwunt
vnd gar hinden ab geslagen.
dar by horte er sere clagen
zwa stymmen mit leid,
als ob es weren zwa meyd.
er sah aber nyeman da by.
vil schier waren ir worden drij
vnd clagten mit bitterkeit,
das gawein ir hertze leit
von dirre auentùre ieit.
uber das gebirge reit er hin,
darzü yme denn stunt sin synn.
da kam er in ein ander lant,
dar jnne wart yme bekant
ein auentùre, die schöne was.
er sah einen schonen palas
mitten vf einem anger stan,
da was ein mure vmb lan,
die was so schon vnd so hoh,
das ir höhe wol bezoh
zwölf clofftern mit al:
es was ein cristal,
dorchsiehtig vnd dùnne.
dar jnne horte er manigerhand wunne,
die was so süsze vnd so grosz,
das jne ir wenig verdrosz,
von frölichem gesang.
dar nach gar vnlang
sah er usz dem wald schrijden
vber das velt her wijten
einen geburen, der was freysam,
gar swartz als ein ram.
er was wol sehs clofftern lang,
einen slegel er vor yme swang
von einem gar rohen stahel;
den swang er fùr sich allemale
vber velt wol drijszig schridt,
vnd sage fùr war, man hette dar mit
geladen einen starcken wagen,
der jne schone nit bald hett getragen,
der vier rosz bedorffte wol,
ob ich der mere glauben sol.
er lieff nackent vnd bar vber das velt mit wille dar
gein diser frölichen schar.
also zü diser mure
kam gelauffen dirre bure.
den slegel er vber die ahszel reit
vnd slüg mit solcher grùwlicheit
an die mure einen so mehtigen slag,
das sie gantz vnd gar gelag
da von vf der erden vnd bran.
dar jnn die megde wolgetan,
die vorhin der freuden pflagen,
vil still swiegent vnd lagen;
sie begunden alle brennen.
da sich uszen vnd ynnen
das husz des fùwres allessampt enpfing,
der gebure in das fùwre ging
vnd schúrte mit sines slegels stiel
der megde vber einander viel
vber huffen in das fùwre.
nü bekumberte vil tùwre gawein dirre megde tot,
das er jne usz solcher not
mit niht gehelffen kund.
darvnder es begund
nahten an der stund.
dje naht er aber also reid,
das er nyrgent vnderwegen beidt
wedder dorch ruowen nach dorch gemach,
bisz er aber den tag sah.
er tett der auentùre war,
da was er recht vf dem var.
er sahe sie vor yme nahen,
nach ir begund er gahen;
er hatt sie in der augen pflege
auch so ylete er ir nach al wege,
wa sie hin vor yme seig.
vil schier er gein eynem gebirg steig,
das jne in ein lant trüg,
das was wonneclich gnuog
von süszer augenweide.
es was gar ein heyde
mit rosen befangen,
die hatt vbergangen,
was ir da was, begarbe
ein liehte rote varbe;
da von kom so süszer was,
hett er getruncken vnd gasz,
welt ir, aller der welt wirtschafft,
er hette da von so grosze krafft
nit gewonnen, als er gewan.
da jne ging der geruch an
von der heyde vnd der süsze gesmag,
sin vnkrafft yme gar gelag
vnd wart berochen an der stat.
vber die heyde einen vil engen pfat
kerte er nach der auentùre trat.
da sahe er seltzene ding:
da stunt ein schöner jùngeling,
der was gar rijlich gekleidt,
vnd was michel schönheit
von richer kost geleit an jne,
wenn das ein groszer vngewyn
an sinem libe da erschein:
yme was wol ein scharffer zeyn
dorch die augen geschossen,
vnd was vil hartt besloszen
mit zwein ysenketten,
vnd was zü einem bett gewetten
vnd vil hart gebonden
by sinen beynen vnden;
vnd hatt ein wale in der hant,
vmb die was es so gewant,
wenn er die wale rürte,
das er da mit zerfuorte
den rosen iren vil liehten schijn,
wann der wint was fùwrin,
der von der wale wote.
mit dirre wale zù state
er einer jumpfrauwen pflag,
die vor yme an dem bett lag.
nù sagt das büch, sie were dot.
jr decke, die was gantz rot
vnd der rosen farben glich;
es was aber gantz vber al die lijch
glich wijsz als ein harm;
vnd lag an irem rechten arm
ein getwerg, das was clein.
von einem gantzen stein
hatt es ein riche crone.
der cronen schijn luchte schone
vber die heyde wonnesam,
da mit er den rosen benam
vber al iren vil liehten schin,
wenn es was ein rubin,
von nature recht gantz,
des was er lieht vnd glantz.
ein ritter lag die sijte,
der hatt ein wonde wijte
mitten dorch sin hertz vor.
der was swartz als ein mor,
vnd stackte noch das drunzun
mit einer banyer brun
jn yme wol einer elen lang.
gawein gewann vil manigen gedang,
da er sahe dise geschiht.
nuo getorst er sich sùmen niht,
das er da noch hette gefragt,
vnd hett sin niht bedragt,
getorst er es han gewagt.
uon dannan reit er aber fùrbasz,
yedoch er des nit vergasz
vnd marckte es in sinem muot.
schier kam er zü einer flüt,
die was tieff vnd breit.
die rosze, den er nach reyt,
da sie zü dem waszer kamen,
einen weg sie jn namen
dar ùber vnd gingen enzelt,
als ob es were ein eben velt.
da gawein dis wonder sah,
gar sere leidt yme dar an geschah
vnd vorchte, das er sie verlüre,
ob sie yme da kement fùr.
nu reit er vf vnd nydder
an dem wasser fùr vnd widder,
ob er icht des erfùnd,
da er vber kommen kund,
wenn jne zwang dar an der schad.
so lang reit er bi dem staden,
das er wedder fùrtt nach brùcke vant,
bisz yme vor den augen verswant
die rijliche auentùre:
des wart yme freuden tùre.
nü gedohte er jn manigerhand wijse,
wie yme dirre hoh prijsz
daran icht verging
vnd wie er es an gefing,
das er keme vber den flume.
vil hartt faszte er den zaume
vnd kerte das rosz dar an;
er wolte auch gern fonden han
einen fürt, des hett er wan.
als sich nü gawein in das wasser liesz,
er wond da vinden vesten griesz;
da vant er nihts anders denn mür.
mit dem rosz er zü tale fuor
vnd was noh ertruncken.
es was jn gesuncken,
das ime niht anders denn das haubt blahte,
vnd was dar jnne bestaht,
das er sich nye enkunde
gelösen usz dem grunde.
er sanck ie basz vnd ie basz.
gawein mit groszen sorgen sasz,
er kund yme selbs nit gewegen
doch liesz jne nit vnder wegen
das heil, das sin dick pflag.
dwijle er sich anders niht den zü dem tode wag,
siner tugend frauw salde gedoht,
des wart yme lebens trost broht.
ein frauw zü dem wasser reit,
als er dise sorge leit.
sie fürte einen sperwer vf der hant
vnd von sydin ein leitbant
vnd hinder ir einen vogelhunt,
der was rot als ein zund,
halber vnd halber blang,
des stymme als ein fleute klang,
anders denn das er klein was.
darzü fürte sie ein luter glas,
das was jnnen zü nit lere;
was aber dar jnne were,
das sagt uns nit dise mere.
wann da er swebte in der not,
jr helffe sie yme vil snelliclich bot.
were auch das nit gewesen,
so möhte er nit sin genesen.
sie sprach:< her gawein, nit sint ein zage
vnd nement war, was ich ùch sage:
jch wil von dirre not neren vwer leben,
wöllent ir mir ritters trùw geben.
wes ich schierest an ùch ger,
das ir mich des werdent gewer
one aller hand valscheit.>
gawein sprach:< ich bin bereit,
vnd ir sollent sin werden gewert,
was ir hie an mich begert,
das vns beiden nach eren stat
vnd mir nit an min truwe gat.>
die rede nam sie fùr guot.
das glasz warff sie vff die flùt,
das es in manig stùck brast,
da von das wasser erglast
vnd was hertt als ein stein
vber al bisz an gawein,
von dem, das usz dem glase ran.
zü hant reit sie selbs dar an
vnd hiesz jne vf den sattel stan.
sje bot yme das leit seil
vnd hiesz jne, das er es ein teil
dem rosze vmb das haubt leite,
vnd das er jnn dheyner wijse verzeite
vnd sprùnge vf das wasser dar
glich nach des seyles var.
das ted er vnd sprang zü ir.
sie sprach:< nuo ziehen wir
das rosz usz dem grund.>
das wart nü in kurzter stund
gezogen usz dem grund vnd mür
bi diser leit snuor.
das leitseil sie widder nam,
vnd ritten vf des waszers stram
herwidder usz an den stad,
das beyder rosz nit tieffer trad,
denn ob es erd were,
so herrt vnd so gewere
was jne worden der fürt.
gawein an dem staden spurt
blütes einen groszen stock,
vnd sah einen wapenrock
da by vf dem sand ligen,
da was hinden dorch gerigen
ein glauij von gold ergraben,
vnd mit gùldinen büchstaben
jn den valten wol geschrieben:
< jch bin hie von dot blieben.
wer es aus mir wil brechen,
der musz mich auch rechen.
des sal er sich besprechen.>
als er nü die auentùre vant,
er erbeiszte nidder vf das lant
vnd lase die büchstaben
vnd began sich auch segenen darabe.
als er dise buchstaben gelasz
vnd verstunt, was die rede was,
er wolt sie yme usz gezogen han.
des batt sie jne bliben lan,
vnd das er sie ir bedt werte;
da mit er sie auch gewerte:
da liesz er sie gestecken.
nu batt er sie yme entdecken,
was die auentùre were.
sie sprach:< ich getare ùch dise mere
nit völliclichen gesagen,
wann ein ritter ist da mit erslagen -
der hiesz rahin de gart -
dorch sin grosze hochfart,
die er an minem brüder beging,
den er dorch sins erbs willen fing,
vnd betwang es yme an mit gewalt,
das er sollichs ytzo mit dem libe vergalt,
als ir selbs habent gesehen,
vnd ist das hùt geschehen.
vf die red han ich ùch hernert,
vnd han das wol an ùch bewert,
das ir jne nit rechent
vnd an mir nit zerbrechent
die truwe, die ir mir swuorent,
da ich ùch vber furte.
jch heisz gener von kartis,
vnd treit min bruder hohen prijsz
von ritterschafft, humildis.>
als sie die rede vol gereit,
vf beisze wann sie widder ieit,
das sie zü yme nit mer sprach.
als nü gawein hinder sich sah,
da was das wasser vnd der see
widder weich worden als ee
vnd flosze wie vor zü tal
mit glicher flút vber al.
gawein sich vf den weg lie,
der jne zù nehst an gie,
vnd kerte vber die heyde
ein breite wegscheyde,
an der er niht schuhte,
wenn es jne geware duhte.
da reit er den langen tag
bisz yme der abend an lag.
da sah er ein castel,
das was schon synnwel,
mit hohen smalen zynnen
vnd wol herbuwet mit synnen.
vier thürn dar jnn lagen,
die groszer höhe pflagen,
vnd bi iglichem ein palasz.
die burg vngespert was.
dar jn gingen nuo zwey bùrgthor,
die stunden offen, wann da vor
waren zwa brùcken ufgezogen,
die warn an zwein swibogen
mit ketten vast an gehafft
hoher vf denn ein schafft,
vnd was besetzt wol mit graben,
die waren vmb vnd vmb wol erhaben
so wijte vnd so tieff,
das man vil kume darùber rieff,
das man es dort jensijt hett vernomen.
nü was er an die brùcke komen.
die kette sich oben entslosz,
das die brùck nydder schosz:
jch enweisz, wes er da genosz.
gawein des vil fro wart,
das yme also die jnuart
jn das husz was entsloszen.
er kerte vil vnuerdroszen
an die brùcke gein der porte.
als er nü kam an das ort
fùr das bùrgthor, da hielt er
vnd nam war hin vnd her,
ob ieman dar jnne were.
da kam ein portenere
vnd trùg zwen slùszel in der hant.
jch enweisz, wa her jne der portener kant:
er nante jne vnd enpfing jne
vnd fürte jne dorch die burg hin
gein einem schönen sale.
dar gegen stunt ein marstale,
da hiesz er jne erbeiszen vor
vnd wiese jne ein stege enbor
jn einen vil kostlichen palas,
der clüglich wol bestrauwt was
mit bluomen, die frisch warn
vnd süszen gesmack barn.
vf dem sale vant er da
einen altherren, der was gra,
vf einem bett sitzen.
der schein in solchen witzen,
als er wol hette hundert jar,
vnd waren sine cleyder var
glich als ein wijszer snee.
das alter ted yme also wee,
das er nit mohte gelijden,
das er kùnde rijden
herab zü der stat inder,
wenn er moht sich ninder
gerüren, wann so vil als er sasz.
jedoch er des nit vergasz:
als er gaweinen ersah,
mit vil senffter stymme er sprah:
< gawein, sint mir wilkome.>
als er nu den grüsz hatt vernomen,
vil grosz gnade er yme seyte.
by yme er nit lenger beyte
dorch den portener, sin geleyte.
er gie das husz schauwen,
wie es were erbuwen,
das er es gesagen kùnde,
vnd ob er ieman fùnde
ritter dar ynne,
wenn er sich vnmynne
vf dem huse versah,
als es yme dick geschah.
er gie geyn der lincken hant,
da er ein schön cappell vant.
dar jn gie er dorch sin gebett.
da er das ein wijle getett,
er wolt her widder usz sin.
nü verwandelte sich des tages schin
jn ein so dick vinstere gar,
das er da nit vmb ein har
gesah, anders nùwent als er greiff
als yme das lieht so gar entsleiff.
von der thüre er widder gie
vnd viel nydder vf die knye
vnd flehete gott vil tùre.
schier entbrant sich ein fùwre
vnd zunte die kertzen vber al,
vnd kam dorch das gewelbe zü tal
an einer ketten gùldin
ein sarck von einem stein sardin,
dar jnn ein breites swert lag,
alda er sines gebettes pflag,
vf das pflaster fùr jne.
dirre richen auentùre gewyne
jne sere frauwen began.
vil lang sahe er es an
vnd marckte, wie es were getan.
schier began von sinen augen
der sarck verswinden taugen,
das er das gar vber sah;
da von wart sin freude swah.
er stunt vnd begund vmb sehen,
wie yme were geschehen
an gewelb vnd an wende.
da sah er zwa hende,
die usz der mure rahten,
die solche waffen dahten,
als ob sie eins ritters wern.
einen schafft vil swere
habten sie, da was ein stefft
oben von gold an geschefft,
der bluotet vil starck.
vmb vnd vmb in ein marck
von maure zü maure
vil glich herttem schure
ein slag dorch die cappell flüg,
der die lieht gar zü der erden trüg;
vnd erlaschen mit all
von disem groszen schall,
vnd wart vinster als ee.
nü hörte er ein stymme we
mit jamer rieffen dristunt.
yme was aber zwar vnkunt,
welcher hand stymme es were,
wann das sie clagebere
was, das vernam er wol.
sie hatt dennoch nit verendet wol
disen jemerlichen ruoff,
das sich nach ir hüb ein wüff,
der was jemerlich vnd grosz.
sin lude so iemerlichen dosz,
daz er gaweinen so sere bewag,
daz er da von fùr dot lag.
dar vnder was es aber tag.
als der tag in die cappell scheyn,
sich mahte vff her gawein
vnd nam mit al vmb sich war.
nü sah er die cappell bar,
als sie vor was gewesen,
wenn das er dar jnn horte lesen
einen pfaffen, er sahe sin aber niht.
vil wol marckte er dise geschicht
vnd ging usz der cappellen von dan
da hin, da er vor hette verlan
den altherren in dem sal,
vnd gie vf vnd zü tal.
frommer ritter was die burg vol,
die enpfingen jne uszermaszen wol
vnd butten yme kurztwijle viel.
es was aber ein cleynes ziel.
sie gingent zu hant eszen
- wenn die naht hat besessen
mit vollen des tages lieht,
also by naht denn geschiht -
vf das vil schön palas,
daruff denn der altherre was.
da wart das eszen bereit.
mit vil groszer clúgheit
diente man dirre ritterschafft,
man gab jne aller eren krafft.
gawein lobte die wirtschafft.
als sie nü also gesaszen
vnd frölichen aszen,
wenn ein der alt herre,
gawein sah von verre
vier gùldin kertzstal
mit kertzen tragen in den sal
vier jumpfrauwen schöne,
vnd trügen vier cronen
vnd cleider kosperlich,
den ich nit glich.
auch waren sie so gestalt,
das igliche groszen gewalt
mohte haben wol von landen.
sie waren wol von schanden
an aller fùr gescheyden.
nach disen vier meyden
ging ein magt gezieret basz,
die trüg vor ir ein schönes vasz
von einer cristalle,
das was vol mitt alle
vil gar frisches blütes.
rotes goldes vnd gütes
dar jnne ein schöne röre lag,
der auch dise frauwe pflag.
sie habte die röre mit der rechten hant.
vsz einem dyasper sie es want,
da was die röre in gebonden;
den hatt sie gewunden
vmb den halsz vnd herwidder gegeben.
fùr sich gingen sie vil eben,
das sie nyemans war namen,
bisz sie alle funff kamen
zú dem altherren hin;
da knùwete die eyne fùr jn.
dis marckte gaweins synn.
dje andern stundent da by,
oben ein, nydden dry;
die funffte yme die röre bot.
da mit tranck er das bluot rot
vsz der cristallen, die sie trüg.
als nü der alt getranck gnüg,
die magt widder vf stunt
mit zùchten, als die frauwen tunt.
da wart yme von ir genigen.
vsz dem sal sie widder sigen,
von dannen sie waren gegangen.
nú hett gawein wol verfangen,
wann er sin wol ware tett,
wie vil er getruncken hett,
das sin nit vmb ein har,
des er mohte werden gewar,
was da von nyrgent worden,
als es das wunder wolt orden.
das gab gaweinen manigen gedang.
jne duhte die wijle sin sere lang,
das sie so lang aszen,
wann dwijle sie da saszen,
so enwolt er nihts fragen;
er wolt da mit lagen
der stat vnd gemaches varn.
die tisch schnell warn
jn dem sal al vmb erhaben.
das began sin begird laben,
die was in gedencken begraben.
als schier sie hatten gasz,
jr keiner by yme gesasz.
sie gingen al usz dem sal
jn die burg her ab zü tale.
gawein bleib da allein.
er wande, das sie gemein
widder vf den sal solten gan,
so wolt er sie gefraget han
von der auentùre wonder.
nü was nyeman dar vnder,
den er dar affter gesah.
gawein was niht gah,
er kunde an allen dingen
sinen muot so bezwingen,
das er wol aller ding erbeit,
bisz er befant die warheit.
wie er doch mit sinem wijsztüm
einer sache haubt vnd drùm
hett einer kurtzen wijle herspeht,
so enwolt er doch dis reht
an dheyner sach brechen,
als man dick hört sprechen
jn iren sprichwortten die wijsen:
man sal den man prijsen,
der sich also berüchet,
das er die sache versüchet,
ee er mit lichten müt
sich sweche an der hüt,
das er ein ding glaub e,
e denn das end dar an gee.
sust sasz er wol die halb naht
vnd was mit gedencken bedacht,
bisz er das fùrwar befant,
das yme vnnùtzlichen swant
die naht. sie kamen niht.
gaweynen vnfreuwt die geschiht,
wenn es was yme so enwiht.
uf stunt er vnd ging von dan,
da ein kertz lieht bran,
vnd nam es in sin hant.
vier kertzen er da mit enbrant,
die warent vmb das bett besteckt,
vnd wolt, das yme hett entdeckt,
die auentùre der bettriese,
vnd wie es keme vmb diese,
ader wa hyn sie komen weren.
er vant den lip lere
des geistes halp, wann er was dot.
nuo tett es yme nit vnnot,
ob er mit icht da von erschrack,
wenn er sah, das er dot lag.
er gie von dem toden ab dem sal
jn die burg gein dem marstal,
dar jnne er sin rosz lie.
als er in den stal gie,
er vant sin rosz bi dem barn.
dem was wol mit gefarn
von heuw vnd von krefftigem korn,
vnd was yme von weichem storn
hoh gestrauwt bisz an die bùge.
auch ein bett vil gefùge
gaweynen von richer fedderwate
bereit was - jch enweisz, wer das tate.
es was by der muren gemacht
das von nicht was verswacht,
beyde wijte vnd lang.
auch stunden da zwey rosz blang;
da von gewann er manigen gedang.
sinen harnsch er zusammen lasz,
als er entwapent was,
vnd schutt jne vf sinen schilt.
sin hertz gein dem tage spilt
vnd liesz gar sin sorgen.
er wolt an dem morgen
die auentùre herfarn han.
da bedrog jne leyder sin wan.
mit dirre rede er slaffend ging.
der slaffe jne vil snell ving.
also slieff er bisz an den tag,
das yme der slaffe vnhohe wag,
bisz daz die sonne vil hoh schein.
nü begann wachen gawein
vnd sah vmb sich hin vnd her.
nü sahe er nihts wann sin sper
vnd sinen harnsch vf dem schild,
auch ein breides gevild
allenthalben vmb sich.
er sprach:< got gesegen mich,
wie bin ich an das velt komen?
nú hatt mich doch zú huse genomen
abents ein vil from man,
da ich alle kurtzwijle gewan,
wann da was ein michele ritterschafft
vnd hatten alle wirtschafft
vf einem huse, das was güt,
wann das mir ein vnmüt
widderfür, da von verdarp
min freude, wann der wirt starb.
es was aber das gesind verholn.
wie ist mir nú das verstoln?
daran mùsz ich schand doln!>
als er das in yme selbs gesprach,
vsz dem sloffe er sich brach
vnd schúhte sin wapen an.
nú vant er sin rosz stan
ob spijse, die vil güt was,
beyde korn vnd grasz,
vnd was es der starcken sat.
bi yme vant er an der stat
den sattel ligen bi dem zaum,
vnd was gefùchtet von dem taume
von dem tauwe, das nidder gie.
den sattel er zü hant gefie,
vf das rosz er jne warff,
vnd wes man denn me bedarff
daran, das was auch bereit.
den zaum er yme an leit
vnd nam schilt vnd sper.
vf das rosz zü hant sasz er
vnd kerte vf einen alten sla,
den vant er nah by yme da;
der trüg jne in einen walt,
da waren die wege manigfalt,
des gawein genosz vnd engalt.
uf einen sla er sich wand,
der jne widder gein land
zü recht solte han getragen.
er weste wol, das michel clagen
vmb jne zü houe were,
vnd wolt auch die mere
den gesellen han gesagt,
die er sitther hett bejagt.
der weg truog jne in ein lant,
da er grosz arbeit jnne vant.
von eynem steyne kam yme das,
da von hette er vil groszen hasz,
den er usz dem gùrtel slúg,
den fymbeus der reck trug,
da er yne yme zü velde nam.
das was der gùrtel lobsam,
der da hin zü hofe braht wart,
den gyramphiel von gahart
wùrckte fimbeusen von gardin,
das er solte vnbezwongen sin
vf aller slaht ritterschafft.
da hatt aber des gùrttels krafft
vil gar besloszen ein stein,
vnd one jne so was vil clein
der andern tugend vnd maht,
wenn er allein vil gar bedacht
jr krafft, so er by jne lag.
so er ir aber nit enpflag,
so warn die andern steyn krafftlosz.
den stein er usz dem gùrttel verlosz,
da gawein widder jne vaht
einen gantzen tag vnd ein naht.
da von gesigte er yme an,
das er yme den stein an gewan.
mit einem slage, den er tett,
er zerspielt yme das schiltbrett
vnd herreichte mit dem ort vorn
die rincke. da wart verlorn
der stein, wenn er usz sprang.
vnwiszend sonder sinen dang
lieff er gaweinen vnder sinen füsz.
zú hant wart yme da büsz
von siner krafft der müde gar,
vnd wart stercker fùr war,
denne er vor ie wùrde.
da widder gefiel die bùrde
vf disen, vnd wart so krang,
das die müde jne zü dem tode zwang.
da von gawein gelang.
den stein hatt er alwege
bi yme in gewisser pflege,
fùr das er jne yme an gewan
vnd solcher kreffte dar an
von der warheit enpfant.
als er nü kam in das lant,
da fimbeus vnd gyranphiel,
da von der gùrttel yme gefiel,
beyde waren geseszen,
wölte sin da han vergeszen
fortuna, so wer er dot.
sust gewann er vil grosz not.
das er aber so endlich genasz,
die helffe von dem stein was.
sie was ein göttinne
vnd dorch des mannes mynne
hatt sie den gùrttel geworcht,
wann sie nie wart one vorcht,
das er den lip verlüre vor mannheit,
dar nach er ieit vnd streit.
vf solche auentùre
gab ir frauw selde zú stùwre
einen stein, der yme nit schaden liesz,
da von, das sie ir swester hiesz
der der andern steine krafft beslosz.
als er nü bleib des gùrttels blosz,
da muoste er in sinen tagen
auentùre von mynne bejagen;
sie vorcht, er wùrd usze erslagen.
als nü gyramphiel die mere hett vernomen,
wie gawein in das lant were komen,
des frauwete sie sich sere;
sie wolte die vnere
rechen, ob sie kùnde.
jr frùnt sie des schunde,
das er vff die strasz ritte
vnd sin an dem wege bitte
vnd jne da in sin husz ladet,
als sie yme wolt han geschadet.
nach der rede ergie es aber niht.
gawein kam von geschiht
vff das husz hin zu gein gahart
eins tags, da es abend wart,
vff gewisze nahtselde:
die wart dem helde
da vil tùre gezalt.
da er kam in iren gewalt;
vil wol jne gyramphiel empfie,
denn das es nit von hertzen gie,
nùwent in dirre wijse,
ob es zü hohem prijse
jr frùnt möhte bringen
an yme von keynen dingen,
wenn er ir leid hette getan
an fimbeuse, irem lieben man:
da wolt sie gedencken an.
sje mohte yme doch niht geschaden.
er wart aber doch swerlich vberladen
von einem valschen rate.
sie sagde yme, wie zü anfrate
michel auentùre were,
die man gar sonder swere
möhte an ritterschafft bejagen,
wùrd ein clein worm erslagen;
vnd so bald das wer geschehen,
so möhte man frauw salden sehen
jn ir groszen herschafft;
da von gewùnne heiles kraft
der der clusen da hüte.
nü want er von güte
sie die rede han gesprochen.
sie wolt sich aber gerochen
an yme haben da mit.
die naht verswant nach irem sitt,
des gawein kume erbeitet.
des morgens was er bereite,
als es wol begunde tagen,
vnd batt yme dise frauwe sagen,
wa er hin keren sold.
er jah, das er wold
sich versüchen dar an.
von dem huse dorch einen tan
zeigte sie yme einen weg dar.
gawein nam des rehte war
vnd satzte sich vf die strasze.
zü der clusen vnd zuo der sasze,
da dirre worm jnne lag
vnd ir al wege pflag,
kam er bisz mittem tag.
was daugt da von lang sag?
da vant er wedder husz nach herberg.
von einem hohen berge
was ein wildener gestiegen
vnd was den weg geyn yme geniegen,
der trüg ein wild ziegen.
den batt er yme die mere sagen,
wie man da möht bejagen
an der auentùre den wert.
er sprach:< ritter, des ir begert,
das ist ùch der gewisz dot!
es kan vor diser starcken not
gefristen kein mannheit.
jr sollent das endlosz leit,
das rate ich ùch, vil gar verbern
vnd sùllent der auentùre begern,
darzú ùch muot vnd krafft bewege.>
er sprach:< frùnt, al solche ege,
die vörchte ich vil kleine.
zü vorchtlichem meyne
möhte man mir das wol zelen,
solt ich nach uwerm rate welen.
jch muosz versùchen das heil,
welcher arbeit teil
mir gefalle dar vnder,
ob ich licht von wunder
vor der auentùre geniese,
so ich des muotes stete wijse.>
hie mit liesz er die mere.
hyn kerte der wildenere
vnd gawein gein der wartt:
das gerau jne vil hart,
da er die warheit befant.
jn einer hohen steynwant
vant er das tier ligen:
da von wart nye verzigen
der clusen frij dorchvart.
als er es an sehend wart,
das rosz er mit den sporn nam;
ein tyost wol lobsam
nam er hin uff gein dem hol;
die vnderfing das tier wol:
jme gab gawein hohen zol.
der tyost wart mit al verlorn.
das tier mit vnsenfftem zorn
herusz an gaweinen sprang;
ein otem breit vnd lang
bliesz es usz sinem mund,
das sich mit al entzund
gawein da von so zu hant:
schilt, rosz vnd jsingewant,
vnd began alles zú brennen.
vor solcher vnmynne
hett er sich nit gewarnet.
vil hart er herarnet
daran disen hohen prijsz,
nuwent daz er als ein ijsz
was, wie wol der harnsch brunne
vnd wart an yme so dùnne
vnd so gar vntùre
von disem starcken fùwre,
das man jne möhte zerrieben han.
also stunt er vnd bran,
bisz er was gantz blosz,
wann was der gùrttel beslosz,
der vmb die jnnern cleidern was;
darzü er auch selbs genasz:
das kam von dem steine,
des tùgende waren so reyne,
vnd hatt so grosz krafft,
das yme das fùwre schadhafft
nicht an dem libe mohte sin.
da er jn fimbeusz von gardin
nam, da verworcht er jne
vnd trüg jne vf den gewyn:
daran bedroge jne nit sin syn.
als nuo gawein alles blosz bleib,
der wurm jne gein dem hol treib
vnd wolt jne verderbet han.
da von er an der stat gewan
beyde helff vnd rat:
er vant vil manig sarwat
vnd manig swert in dem hol,
der was es einhalb vol,
vnd vil gebeynes da bij,
das alles gar was fleisches frij,
vnd was vil klein benagen.
mir begann die auentùre sagen,
da ich sie begunde lesen,
es weren ritter gewesen,
die von dem tier waren verdorben,
die da wolten han erworben
den prijsz der auentùre,
die es dorch das fùwre
allesampt hin weg trüg
lebendig in den lug.
hie mit sij der rede gnuog!
gaweinen es nit also erging.
ein kluog swert er gefing
vnd kerte widder an das tier.
das swert als ein helt zier
er da zü beyden henden nam.
die hute vnd die dicke squam
spielte er mit dem swert enzwey,
als es were ein gebraten ey.
den slag es mit vollen galt,
es bliese vsz ein fùwre, das der walt
sich gar da von enbrante
vnd yme das swert swante
da mit bisz an das gehöltze.
als er es sah smeltzen,
er weich vil gefuoge
vor dem tier gein dem lúge,
da er die swertt weste.
eins, das was vil veste,
das hergreiff er da von geschiht.
er saumete sich da lenger niht:
an das tier kerte er zü hant,
da er es vor dem hole vant,
als es yme hatt gefolget nach.
yme was an gaweinen so gach,
vnd wolt jne han hin gezogen.
e denn es sich gein yme hatt gebogen
mit sinen scharffen claen
vnd wolt jne vmb fangen han -
so were er gar gewesen dot -,
das swert er yme zü schirme bot.
dar jn ging es als ein swijn:
da von muost es dot sin,
wenn er das tier da mit dorch stach,
das es oben züm rùck usz brach:
da von wart sin krafft swach.
als sich nü gawein an yme rach,
ein michel wonder da geschach:
das swert von dem blüte
vnd von des eyters gebruote
sich glich flucks entzunde
vnd so sere brennen begunde,
als ob es were ein dùrres stro.
dar nach entzundte sich da
der worm auch vnd bran.
gawein manigen müt gewan,
wie er solte gebaren,
wenn yme die cleyder waren
vnd das harnsch verbronnen;
die waren vngewonnen
an der stat, das west er wol.
harnsch was vil in dem hol,
so gebrast yme des andern gar.
also múst er sin alles bar
zú fúszen vf die straszen geen.
er moht nit lenger da gesteen
von dem vnreynen wasze.
er gefing ein strasze
zü nehst bi der cluse.
da kam er zù einem huse,
das gar nohe da by lag
des ein schöne magt pflag;
die was genant von lembil siamerag.
djs was an einem abend spate.
mit michelem rate
wart er da enpfangen,
als er kam gegangen
daruff nackent vnd blosz.
sines namen er da genosz,
der wol wijte was bekant.
harnsch, rosz vnd gewant
bereite sie yme vil schier
mit aller der gezier,
die darzü solte wesen;
vnd das er so was genesen
vor dem worme, des lobte sie gott -
vnd das was sonder spott,
als sie yme erzeigte sit.
sie weste wol, das jne nit
zü der auentùre hette bracht,
wenn sie des strijtes wol gedoht,
den er mit fimbeus streit,
da er den gùrttel beieit,
wann sie was zù ordohorht,
da jne der selben swester worht.
darùber yme die magt bot
ein also köstlich cleynot:
ein richer wapenrock das was,
vest als ein adamas,
von einer slaht sydin,
den nyeman kund versnyden
mit keiner hand stael,
das er ir alle male,
dwijle er jne fùrte, gedeht;
vnd seite yme, das er jne breht
vsz vil groszer not,
da er müste blieben dot,
wa er sin nit trüge,
vnd das jne mit zauber slüge
laamorsz von janfrüge.
der rede er ir gnade seit,
wenn er dirre arbeit
vor yme nit enweste.
er wonde gar zereste
endlich sin komen,
bisz daz er es von ir hatt vernomen.
da fragde er sie fùrbasz,
wie sich solte fügen das,
das laamorz mit yme stritt.
sie antworte yme:< ich sage ùch sinen sitte
vnd wie es vmb ùch ergat.
vch hat ein hasz vnd valscher rat
zü dirre freise geschundet her,
vnd sage ùch, von wem vnd wer:
das hat gyramphiel getan
vmb fimbeus, iren lieben man,
der ùch wart siglosz,
da er den gùrttel verlosz:
des wolt sie ùch verraten haben
vnd hat ùch dise grübe gegraben,
wann sie dise freise weste hie
vnd ùch vnuerzagten ie
an allerhand dingen.
sie wande ùch miszelingen,
als sie ùch zü dem worm sande,
das er ùch verbrande
vnd ir den lip also verlürent;
ob ir nü den dot da nit enkürent,
das ùch denn laamorz erslüge,
als ir zú janfrüge
solten nemmen die fùrvart,
da maniger ie erslagen wart,
wann laamorz das zauber spart.
des sollent ir alles wol genesen,
wöllent ir anders in mynem rate wesen,
als ich ùch mit truwen rate darzü:
jr kumment dar morgens vil frú,
wenn es von lembile
lijt kume vier mile;
vnd ist ein husz starck gút
vnd von zauber so behút,
mit starcken listen gefrumt,
das kein ritter dar kumt
jn einem jare zü allen zijten,
er müsze da strijten
mit laamorz, dem helde;
vnd müsz die nahtselde
da mit verdienen vnd das brot;
der músz auch da bliben dot,
hette er schone driszig manne krafft,
wil er dise ritterschafft
jn dem huse mit yme enden.
das mag nit herwinden
wann der wapenrock allein
vnd der sighafft stein,
da von ir genesen sint.
deswar, sich mùsz aber der strijt
vil sere lang lengen,
wil er ùch gern pfrengen:
das sùllent ir wissen fùr war.
er stritt wol ein gantzes iar,
das er vngewonnen were
vnd gar one swere,
solte der strijt in dem huse sin.
her gawein, lieber frùnt min,
auch möht es ùch nit geschaden,
wie lang ir werent geladen
von yme an dem strijte,
von zijt zü zijte
vehten ir ie basz denn e;
vch ted kein müde we,
noch ensnitte ùch kein swert.
des selben wùrd er auch gewert,
ob der strijt ymmer wert.
darvmb gib ich ùch einen rat:
ein schöne grasige hoffstat
neben dem graben vor dem thor
an einem bergelin enbor,
darhin sollent ir den kampff legen
vnd sollent mynes rates pflegen:
jr gesigent yme für war an,
jr sollent jne aber genesen lan
vnd heiszent ùch das kleu geben,
das jr jne laszent leben,
da mit man vber se vert,
das yme sin swester ylamert
van lanoyer sande.
so komment ir von dem land -
des sind gar vneruorcht -
da mit gein ordohorht,
da frauw salde behuset ist.
jr sollent aber wissen disen list:
es ist darvmb so gewant,
das ir es mit bloszer hant
ymer mögent gerüren.
wellent ir es von dannan füren,
so sollent ir es bewinden
vnd wol zú samen binden
jn disen wapenrock vorn;
anders es were gar verlorn
daran vwer arbeit.
frùnt, das sij ùch geseit:
als ùch denn gelinget
vnd ir es also bringent
zu dem vnfurtten se,
so sollent ir einen vadem e
an vwern finger hefften
vnd das ander mit krefften
vf den se slingen;
so begynnt er sich swingen
vber den se zü end usz;
vnd vörchtent ùch nit vmb ein grusz,
das ùch der se wese schad;
vnd hefftent den vadem an den stad -
das sij ùch nit verborgen -,
vnd rijdent one alle sorgen
vber vnd lant es ligen.
vch enwùrt des vers nit verzigen.
koment ir da herwidder geritten,
jr vindent in den selben sijten
den se, das wùrt nit vermitten.>
der rede wart gawein fro.
die naht verswant vnder jne da
von maniger kurztwijle.
des morgens von lembile
gawein frölich schied.
darnach vnd yme die magt ried,
began er sin ding orden,
das er gar vnerworden
die auentùre beieit,
als yme die magt hatt geseit.
die freude ted jne gering vnd snell.
gein janfrùge dem castell
was er fùr ware snelle komen.
als er dort hatt vernomen,
also vant er es alles da.
vil wol enpfing man jne da,
vnd wart sin rosz gestellet.
der wùrt sich gesellet
mit rede zü dem gaste.
er sprach:< ùch hùngert vast,
wir solten schier anbijszen.
jr sollent mir nihts verwijsen
einer rede, die ich ùch tun wil:
wir zwen sollent ritter spiel
zü rosz e vor imbisz
vben, wann salig flijsz,
der enschendet keinen guten kneht.
darzü ist es min recht:
wer hie wil han die spijse,
der müsz in solcher wijse
sie dem wirt also gelten.
wellent ir nuo den sitten schelten
vnd da von fùr rijten,
so müszent ir ie doch strijten,
ritter, gar sonder dang,
wenn hie mag kein widder wang
von keinem ritter geschehen,
er wölte vor dem kampff iehen
mit solcher sicherung,
das die hende vnd die zung
mir bieten rehte manschafft.
vnd muosz dise ritterschafft
hie in dem huse ergan,
ob ir mich, ritter, wellent bestan,
ader ùch zú minen gnaden lan.>
< herre wirt vnd frunt min,
jch sal nach vwerm willen sin,
dwijle ich in vwerm huse bin>,
sprach gawein,< das ist ein synn;
vnd sollen ie doch wissen,
hette ich hie angebiszen,
jch vergùlte ùch disz hoh gelt,
e ich furch ader velt
ymmer kerte von hynnan.
begerent ir sin mit mynnen,
jch bin wol so gewere,
ob es schon niergent were
vwer recht, als ir jeht.
mich hat maneg güt kneht
zuo rosz bestanden,
deswar, in manigen landen
vnd hat an mir versùchet sich,
das er vor nye an mich
keyner manschafft begert.
auch betzwang mich nye kein swert,
das ich wùrd sin muntman,
als ir nuo mich sùchent an
so lediclich one strijt.
sitt ir aber so gemüt sint,
das ir sollich gelt wöllent in die hant,
deswar, so wil ich kein pfant
vch vor dem eszen bieten.
jch wil ùch gemieten
mit dem gewiszen lon vor
vf dem sand vor dem thor.
her wirt, da nemment vwern zol,
da wil ich ùch gewern wol,
dwijle es also sin sal.>
eyn wijle laamorz da widder was.
er wolt vor dem palas
mit yme gern gestritten haben;
dennoch muoste er ùber den burggraben,
wie vngern er es ted,
wenn gawein wolt den rad
der megde nit vber gaen.
mit roszen kamen dise zwen
vf einen anger grüne.
von disen helden küne
mohte man wonder schauwen.
jglicher wolt drauwen,
das jne icht der ander gewert.
nü sehent, wie ein valk begert
des wildes an der beisze;
also waren in dem kreisze
vf einander dise beyde
ein ander gar zü leyde,
gijtig vnd geuere,
des sie vil vngewere
beyde da enpfunden,
wenn zwen müte schunden
sie vf ein ander gemeyn,
laamorz vnd gawein.
des muosten fliegen schenckel,
vnd gar bisz an die enckel
sporn in die rosz hefften,
vnd die stefte von den schefften
sich von den stichen bigen,
vnd die schilde vf die erden fliegen
vnd an den renfften dorch bresten.
da müste sich engesten
beyde wùrt vnd gast.
jglichem gar wenig gebrast
des mútes; nach des willen
sie enkunden nit gestillen
anders denn eins iglichen vall,
wann dirre hasz jne glich swall
mit einem nijde vber al.
dje sattelbogen wichen
von ir beyden stichen,
vnd losten sich der zùgel band;
die rosze vielen vf den sand
bisz an die hehszen hinden
vnd músten sich winden
vf von den stichen vorn.
sie hatten beyde verlorn
macht vnd krafft
von diser hertten ritterschafft.
als nú die spere waren vertan,
jglicher sin swert gewan
von der scheiden; mit nijde
das eck vnd die snijde
jglicher sinem gesellen bot
vnd wolt yme den gewissen dot
gern da mit haben gegeben,
wenn ir iglichs leben
was in des andern aht;
das ir iglicher braht
vil gern, vnd möhte es sin:
das wart an jnen beyden schin.
die swert hart klungen,
da sie zü sammen drungen
mit alsolchem hasz,
wann beyde usz einem vasz
sie solchen nijdt schanckten.
sich burten vnd wanckten,
sie slúgen vnd stachen,
an einander sie rachen;
jne wúchszent ire hertzensere;
beydesamt vf ir beyder ere
sie rungent vnd vachten;
vil glich sie gedahten,
wann sie beyde ein mút zwang.
als vahte vnd rang
jr iglicher den langen tag,
bisz jne der abent an lag,
das ir iglicher nye keiner ruowe gepflag.
ir iglicher den andern bedrog.
vsz den helmen gar dick flog
die flamme von dem fùwre.
solche mynne was vil tùwre
vnd nye als ethiocles
hatt vnd polimides,
der ieglicher wolt
mit truwen, ob er solt,
fùr den andern sterben.
dirre einer wolt aber herwerben,
das er vil wol genere
vnd dirre dot were
jn disem strijde fùr jne;
dirre gesellen müt vnd syn
stunt vnglich dar an,
wenn einer dem andern gan
dann yme des todes vil basz.
dort was mynne, so was hasz
hie vnder disen zwein,
als denn wol an iren dùcken schein;
die warent beydenthalben arg.
die güte sich gantz vnd gar verbarg
jn dem strijde von jne beyden;
es was vil vngescheyden
vnder jne von keiner mynne.
jr iglicher nach gewynne
an sinem kampffgesellen streyt,
wann ein mút sie beide ieit,
des muosten die schilde
der erden vnd dem geuilde
gar werden zü teil.
nach glùck vnd nach heil
jr iglicher hart vaht,
wann ein müt sie beyde bedacht;
des wart der strijt maniger slaht.
hje vmb sie so lang stritten
mit alsolchen vnsitten,
bisz gawein den sig gewann
jn dem strijde freisam
vnd an jne sicherung begert,
ader das er jne der bedt gewert,
die er an jne wolt gern.
des wolt er nit enbern,
ader er slüge yme das haubt ab.
antworte laamorz:< ritter, was ich hab,
das sij vwer erbeygen:
das wil ich ùch bezeigen,
beyde bùrge vnd lant;
vnd sint dar vnder gemant
ritterlicher trùwe,
das ir mich laszent berùwen
gein ùch min missedat
vnd mich nach genesen lat.
jch swere ùch rehte sicherheit
vnd bin auch alles des bereit,
das ir an mich begern welt,
wenn ich dem tode was zügesellt,
gawein, von vwern handen.
jch sal in allen landen
vwer lob ymmer meren
vnd vwern namen eren:
des sint ir wol von mir gewert,
dwijle ùch die ere ist beschert,
das ir an mir hant gesigt
vnd mit dem prijse mir ob geligt.
die red hett ich wol versworn,
das ie ritter wùrd geborn
jn der welt so gúter
von keiner slahte mütter,
der mir möhte gesigen an.
nú hat mich min dumber wan
bedrogen, den ich gehabt han.>
nach der rede er begund
yme zü wijsen ein orkùnd,
yme vf zü recken die hend.
nü hatt der strijt ein end
vnd enpfing jne gawein zú mann.
also kerten sie beyde von dann
jn das husz vber die brùck.
gawein jne vberrùck
jn sin eigen husz trúg,
wie wol er auch müde was gnüg,
wann das er es taugen hal.
jn einen schönen marstal
wart sin rosz gestalt.
vil guter spijse manigfalt
wart gaweinen da fur geleit.
nieman disen wirt cleit,
wie sere er were wont
vnd also hart vngesont.
der wirt müst sich ruowen legen,
er hiesz aber des gastes in sunderheit pflegen
mit michelem werd.
es enwart vff der erd
ein gast nye gehalten basz.
des was zü mynne worden hasz,
wie wol das vbel mag geschehen,
wann ich die liste höre iehen,
das zwey widderwerttige ding
nit wol in einem ring
sich mögen beyde gewenden,
jr eins müsz schenden
das ander fùr war;
wie wol die agleister ist geuar
beyde swartz vnd wijsz,
wolte ich daran mynen flijsz
legen, ich beschied es wol,
nuwen das ich nit ensal
lenger daran entwelen:
jch muosz die auentùre zelen
vnd der müszigkeit die rede selen.
als es nü tagend began,
laamorz, der küne man,
behielt wol sin trùwe;
gaweinen gab er das klùwe,
als es denn laamorz gelobt hatt.
von dannan schied gawein gein laudelet:
das was der se, der also hiesz.
mit dem segen er den wirt liesz.
schier was er komen zü dem se.
als yme geraten hatt die magt ee,
also ted er nach jrem rate.
nu was er vil gedrate
darùber kommen in das lant,
das ordohorht was genant,
da frauw salde jnne gehuset was.
einen wonneclichen palas
sah er gein yme schijnen,
das was von sardinen
vnd von jochanden
mit listigen handen
erbuwen mit meisterschafft,
vnd von rotes goldes krafft
gemùschet wol darvnder
vil maniger hand wonder
nach der huszfrauwen willen.
dar nach mit pillen
was geleit ein riche lege;
es waren die vier egke
von wol edelen smaraisen;
dar jnn von palaisen,
cristallen vil wijsze,
gefüget wol mit flijsze,
befingen ein masze;
vil edele crisoprasze
da by lagent nahe,
die wolten vnder vahen
topize vil rijch;
nebent den lag glijch
ein zijle von saphijren;
von jaspen von osyen
ein lege dar vnder lag,
der ein onichel pflag.
der ander zile pflagen zwen
onix vnd sardonicen;
an der andern zijle da by
die vil schönen crisoliti
vil rijlichen lagen.
da bi die mure pflagen
die vil groszen turin.
ob der porten von einem rubin
was ein rijche cyborie,
dar uff ein allectorie
was fur berle gebolt
jn rot luter weiches golt,
dar vnder prasem als ein grasz.
die portten waren als ein adamasz
vil stete vnd vest.
an der mure zü lest
vnder disen steinen allen
lagent corallen,
cornial vnd amatisten
mit vil clügen listen
nach des werckmanns rate.
( nü was er vil gedrate.)
achitas vnd achat
lagen nydden by der erd
vil gar zü vnwerd,
calcedon da engegen,
als ob es die woge hett gewegen
vnd sin auch der meister kund gepflegen.
es lagen auch an den zynnen
vszen vnd ynnen
serauin vnd magnet.
der sale ein gewelbe hett,
das was synnwel vnd hoch,
das den sal gar vber zoch
one dheiner ander hand tach.
deszhalb was es nit zü swach
jnnen vnd uszen
von richen goltgruszen
vnd von edelem gestein,
damit es gemeyn
gezieret was vber al
bisz vf die zynnen zuo tal.
des schijn was uszer maszen clar.
dar uff swebte ein adelar,
der was von rotem gold,
als es zam, vnd sold
sin der edelen stein genosz.
er was breit vnd grosz,
kostber vnd tùwre;
er brahte michel fùwre
der sonnen an irem liehten schin;
als sie sich an die glentze sin
an dem morgen frùw wand,
so wart in dem land
von liehte sollich wonne,
als ob es mit al brùnne,
wann die steyn luchtent da mit.
vmb vnd vmb in einem snidt
wol hundert venster warn,
die den tag dem sale barn.
das were gewesen vnnot:
die naht nye kein vinstere bot,
das es yme hett geschadet icht;
die steine gaben so rijches lieht
von nature vnd von art,
das der tag nye liehter wart,
so er sin dunckelkeit hette gespart.
ich glaub es vnd ist min wane,
es were dorch augenweid getan,
wann sie wonneclichen zam,
das sie die siechen ted gesunt.
nü sal ich ùch tún kund
welcherhand die venster wern,
das sal ùch nit beschwern:
sie waren mit schwiebogen
al vmb glich usz gezogen
von einem grawen jochand,
dar zú simszer vnd wand.
darùber von topazien stiesz
deswar, ein vil richer schiesz;
darvnder hatt ein granat
begriffen die vndern stat.
da die sùlen solten steen,
man hatt einen onizen
gesetzet zü den füszen.
mit zwein sùlen süszen
was iglich venster geziert,
an der varbe gehalbiert:
es waren zwen vnglich steine,
ein emetin was der ein,
der ander ein grüner iaspis.
der venster thüre waren gewisz
vest vnd nit dunckel
von einem karfunckel:
da von luchte der palas.
jn dirre wijse al vmb was
der sale gar gemachet.
jst er an icht verswachet,
des wùrt von mir gelachet!
als nü gawein den sal ersahe
vnd der glast gein sinen augen brahe,
er wande, es brùnne das lant,
wann yme vor den augen swant
das lieht von dem glast,
vnd gerauw jne vil vast,
das er ie was komen dar,
bisz er des da wart gewar,
das es was ein richer sal.
bi dem se reit er zü tal
einen weg, der was gemeyn.
da der sale gein yme scheyn,
da began er sehre gahen.
schier kam er yme so nahen,
das er die port begreiff;
da liesz er die stegereiff
vnd sprang vom rosz fùr das thor.
sin rosz band er da vor
vil geringe mit dem zaume
an einen schönen baume,
der was edel cedrin.
das sper vnd den schilt sin
er nidder zü dem baume stackte.
das haubt er gantz endackte
von der goyfen vnd den staelhút,
als ein gewiszer ritter tút;
an den halsz er es hie.
das swert er in die hant vie
vnd gie jn zü der port.
ein stege gein einem ort
gefie er vnd ein thuere,
da gie er nit verre fùr.
jch wene, er icht dar an verlùr.
nü horte er manig stymme da.
jn die thüre ging er sa,
da vand er michel herschafft:
da sasz in ir magenkrafft
vf einem rad hoh erhaben,
von gold geslagen und gegraben,
frauw salde vnd das heil, ir kint.
von ir wate ein winster wint,
der das radt vmb dreib,
darvnder sie doch bleib
an einer statt mit stete.
wenn so der wint wate,
so lieff snelle vmb das radt
vnd wandelten die ir stadt,
die an dem rad hingen;
welche stat sie gefingen,
da muosten sie bliben.
von mannen vnd von wijben
hie ein schare an dem rad;
sin walgern was manigem schad
vnd wart auch vil manigem frum:
welcher kam an das winster drum,
der wart arm vnd blosz,
welcher aber hervmb geschosz,
der wart rijch vnd glantz
vnd an allen dingen gantz.
nü wil ich ùch bescheiden
die rede von jne beyden,
wann die wandelung kam,
das sie solche ende nam.
frauw salde vnd ir kint, das heil,
die waren an dem rechten teil
gezieret von groszer richeit,
beide lip vnd kleit,
vnd was nach freuden gar gestalt.
vf die ander sijte schienen sie alt,
blint, swartz vnd bleich;
von dem selben teil die freude weich,
vnd was jemerlich getan;
sie hatten auch bose cleider an,
zerriszen vnd also swach,
das man den lip dar dorch sach.
ein geisel hatt sie begriffen.
jne was der fúsz entsliffen
von dem rade her zü tale.
der palas was vber al
an der lincken sijten von jne val.
als nü gawein in den sal trat,
da stunt still das rat
vnd wart frauw salde glich geuar
vber al schön vnd clar,
als sie vor züm rechten teil schein.
dar zü dise schar gemein,
jenhalb vnd hie dissijte,
begunden singen widderstrijt
ein lob ir wol schon
mit vil süszem don,
vnd begunden alle neygen.
nü hiesz sie frauw salde swijgen.
da gawein so nahe kam zü ir,
sie sprach zü yme:< wisz mir,
gawein, vnd gotte wilkom!
hastu disen gesang vernomen?
da mit saltu sin geert,
wann jne ir freude ist gemert.
gawein, dorch din ere
sal alle ir sere
dorch dich sin verdrieben.
jr keiner kompt mer geschieben
an das vinster teil an dem rad,
wann ich sie zü minen freuden lad
dorch din zükunfft vnd dorch dich.
lieber frùnt min, sprich,
was du wöllest an mich begern;
dar zú wil ich dich gewern
aller salden von minem teil,
vnd gib dir sig vnd heil
an allen welt sachen,
vnd wil dorch dich machen
dinen öheim, kùnig artus,
sin rich vnd sin husz
so ewig vnd so vest,
das yme icht gebrest.
er hab aller der welt zu geben
vnd muosz ewiglich sweben
nach sinem willen vil eben.>
ir gnaden er dar vmb neig.
vil bald sie der rede gesweig.
sie gab yme ein vingerlin
vnd sprach:< das sal ein zeichen sin
aller dinge selikeit.
dwijle es hat vnd treit
artus, so mag nit zergeen
sin hoff vnd müsz ymer sten
gantz von allen dingen.
du salt es yme bringen,
vnd heisz es jne behalten.
du salt auch selbs walten
an allen dingen wunsches gar.
hie mit ùch beyde gott bewar,
du maht nit lenger wesen hie.>
gawein neigte ir vnd gie
widder zú sinem rosz von dan,
da er es vor hatt gelan,
vnd kerte von dannan widder zü wege.
er reit in frauw salden pflege
widder hin vber den se,
den er was geritten e.
dirre auentùre was er fro.
an ein strasze kerte er da,
die schön was vnd sleht.
da begegente yme ein güt kneht,
der gaweinen in sin husz batt.
von dem wege einen smalen pfat
sie beyde miteinander ritten,
vnd sie auch nit lenger bijten,
wenn des ymbsz zijt nahend was
vnd die sonne nahen ias.
des ileten sie deste basz,
wann die rosz wurden bald nasz:
von dem sweisz das geschah,
der von hitze wegen von jne brah.
gawein schier ein husz ersah.
der ritter fürte jne vf das husz,
das was geheiszen amontsus,
wann es vf einem berge lag.
dirre ritter, der sin pflag,
als vns sagt die mere,
der was da burgere
von frauwe salden vnd nit von yme.
er was geheiszen aanzin
vnd was zü rosz ein ritter güt.
beyde güt vnd muot
wart er nach eren an,
daran er ie mer gewan,
dann er dar an verlüre,
wann yme was salden tùre
alle wege entsloszen;
auch was er vnuerdroszen.
er kund mit eren zeren,
was sie moht vff jne geweren.
es was auch sin gesinde
dar an nit zuo schwinde,
es volgete sinem willen mit.
vil steten wirtlichen sitt
erzeugete er an gawein.
sie hatten vnder jne zwein
des tags kurtzwijle vil.
nit mer ich hie entweben wil,
wann ich han noch vil zü sagen.
als es morgens begund tagen,
gawein vrlop nam.
da geleitet yne vil ersam
aazim gein einem wald
vnd hiesz jne vil bald
dardorch rijden fùr sich
nach der hant den rechten strich;
darnach er yme gebot,
was kumbers vnd not
er hinder yme verneme,
wie hartt es widder zeme,
das er des nit erkame.
darzü er yme nach mer seit,
was yme hinden nach ieit,
das er des wenig neme war,
es möhte yme nit vmb ein har
geschaden nach gewerren;
vnd solt sich nit verwerren
mit keinerhand ritterschafft,
der wùrd yme da vberkrafft
jn dem wald gebotten an;
auch dorch wijb vnd man
kein wijle blibent vnderwegen.
hie mit gab er yme den segen.
da er es yme alles erzalt,
da reit gawein in den walt
vnd liesz jne widder rijden.
er wolt auch nit beyten
lenger an der selben stat.
zü der rehten hant vf einen pfad,
als jne aanzim hiesz,
zü sneller reyse er sich liesz
vnd ylete gering nach dem pfad.
da wüchs hinder yme ein schad:
mit vil groszem schall
sich hergab gar zü vall
der walt vnd began bresten;
von stemmen vnd von esten
vbete sich ein groszer schall.
nü begann der walt vber al
nidder vallen vil dick,
dar zùschent kamen blick
von einem starcken schure,
der was also sure,
das er sneit vnd brant
beyde holtz vnd steyn want,
was er des vor yme vant.
eyn geschrey kam nach dem hagel,
die gawein vil waszen zagel
erzeugte nach vnd bot,
wann er in vil grosze not
da von gar bald gefiel.
von nature der regen wiel
vnd brant so vngehùre,
als ob er von starckem fùwre
mit flijsze were erwellet.
darzü hatt sich gesellet
ein gefelle von steinen,
von groszen vnd cleynen,
die glüten so usz der aht,
das sie hart bedacht
die flamme, das sie weren
dorchsiehtig vnd baren
einen so groszen liehten schin
als ein masze ysenin,
die usz der esze wùrt gezogen.
man was auch des vnbedrogen:
sie enbrannten, als das fùwre tuot.
hette das glùck gaweinen nit behüt,
er möhte da wol sin blieben.
da dise freyse wart verdrieben,
da began es sere snyen:
dem was, als von plyen
die flocken alle waren,
vnd begunden jne hartt sweren;
wa sie jne an rúrten,
sie zerbluweten vnd zerfürten
sinen harnasch vnd den lip gar,
das er yme vil hart swar,
doch nam er es wenig war.
uon dem pfad kam er niht.
von starcker brùnst ein lieht
began sich dar nach eugen.
dar nach sunder lougen
hort er nach yme ein geschrey:
< ritter, haltent usz! stechent entzwey
widder einen ritter uwer sper,
dwijle ir dorch auentùre her
kumment an dis end!
ritter ellend,
fliehent nit so sere!
dorch ritterliche ere
haltent widder! ùch ist so gah.
ja ieit ùch ein ritter nah,
der ùch tyost wolt weren.
ob ir dorch frauwen ie mit speren
keiner mannheit begunnet
ader ie freude gewunnent
von reynes wijbes lijbe,
vnd ob ùch von wijbe
ymmer güt sal geschehen,
das lant an dirre statt sehen,
so wil ich ùch prises jehen.>
gawein reyt yme alles vor,
auch iagte er yme nach vf der spor,
bisz er jne da herreit
vnd manete jne siner mannheit,
das er jne tiostùr gewert.
vnder die, da er des begert
vnd jne des mit flijsze bat,
den walt geyn yme uf den pfat
reit den weg ein schöne magt,
die sere weinte vnd clagt,
vnd was zerrissen ir gewant.
ein haubt fürt sie in der hant
eins ritters, der was erslagen.
das begund sie gawein clagen
mit wol iemerlicher clage.
sie sprach:< gawein, das ich sage,
das lant ùch erbarmen
vnd rechent den ritter armen,
des haubt ich hie in der hant fùre!
ob vch freude ie geschwùre
kein sicherheit von wijben,
vnd lant mich nit bliben
dorch gott vngerochen.
an yme ist zerbrochen
ritters recht vnd trùwe.
da von ist min rûwe,
jch enwerd gerochen nùwe.
her gawein, lant schinen
an disen sorgen minen,
das ie an ùch funden ist.
wer rat vnd helff genist
an ùch versüchen kunde,
wie wol von uwerm gunde
dem von mannheit geschah,
wann wijbes leit ie zerbrach
vwer freude, bisz es gerochen wart.
nú ensij mir nit vor verspart
vwer helffe, die manigen hat
beraten, vnd gnaden rat.
dirre ritter was min amijs
vnd hatt den höhsten prijsz,
den ie kein ritter getrüg,
darvmb jne dirre zage slug,
der von jme begerte ritterschafft.
er tett es aber one krafft,
wann er vnder die slief,
da er vber jne lieff
vnd slüg yme das haubt ab,
das ich hie vor ùch hab;
darvmb ist min vngehab.>
als sie nuo dise rede gesprach,
der hagel von dem walde brach,
als er vor hatt getan.
nü lag yme der ritter an
mit flehen vnd mit scheltten;
auch gesweig sie des selten,
das er den ritter reche.
so batt der ritter, daz er steche
dorch ritterliche ere;
so clagte sie vil sere
vnd schalt sin mannheit,
da er ine beyden verseit
den streit, als aanzim
vor dem wald hett gebotten ym,
vnd reit jne vor vf dem wege.
er kunde aber usz ir pflege
jn dheine wijse entrynnen
nach kein gnade gewynnen
von sinem scheltten vnd ir clage,
wann sie beyde vf jne zu slage
ritten vnd rieffen:< zage!>
darnach erhüb sich ein windszbrut,
die gab ein sollich lud
von donnern vnd von winden,
das gawein began swinden
sin gehörde von den oren,
vnd began jne betoren
so hart dis vngemach,
das er weder horte noch sach.
da von der ritter vnd die meit,
den er den strijt hett verseit,
da zùschent verswonden.
darnach vil schier begunden
die winde alle geligen,
vnd was ein vinstere gestiegen
gein den wolken fùr die sonne,
vnd was ie doch so dùnne,
das man den tag mit vollem kos.
nü kam ein wijp freudelosz
gein yme vf dem wege geritten,
die grosz clage hatt erlitten
vmb ein kint, das was clein:
das was mit einem zeine
geschoszen dorch sin hertz.
des selben kindes smertz
ted dirre frauwen we.
des rieff sie lute vnd schrey:
< owe mir, liebes kint, owe!>
uil hart jamerig was ir wuoff.
nü horte er aber einen rüff
nach yme:< ritter, kere widder!
vnser einer sal geligen nydder,
wie sere ir gahent von mir.
ob ir wöllent, so sollent ir
dorch swachen muot nit verzagen
vnd ritterschafft nit versagen
dorch aller ritter wirdikeit.
ja, bin ich sin vil bereit,
vnd getürent ir mich bestaen;
hie ist nyeman wann wir zwen.
haltent vnd fliehent niht!
ob ùch die ere geschiht,
das ir mir gesigt an,
so sint ir ein selig man
vnd werdent da von wert.
nü lant mich werden gewert
dorch aller frauwen mynne
nach verlust ader nach gewynne.
gawein, vneruorchter tegen,
lasz hie nit vnderwegen,
das man ie an ùch vant.
sint aller mannheit gemant,
das ich so icht scheide hin,
dwijle ich her komen bin
vf sollich auentùre gewin.>
mjt der rede begann jn der ritter bitten,
das er mit yme hette gestritten.
die frauw das kint fúrte,
an dem er den dot spürte,
vnd clagte yme kumberliche not
vnd batt jne rechen den dot,
den er an dem kinde sahe;
vnd wie es geschahe,
das begund sie yme alles zelen.
nü solt er da nit entwelen,
des streich er von jne beyden dan.
jme volgeten nach das wib vnd der man
beyde mit clage vnd mit bedt,
dar vmb er entweder dett
vnd satzte sich vast vf die sla.
nü begunde das wetter aber sa
also vor grùwelichen wüten
vnd steine, die glùwten,
vil dick nidder vallen,
vnd begund ein regen wallen
darvnder vil nasze,
vnd begund sin wasser
brennen vil sere.
zü hant er nit mere
wedder das wijp nach den ritter sah.
jch enweisz, wie es geschah
ader was sie hinden abbrach.
michel not vnd vngemach.
leit er, wenn er one tach
jn disem groszen wetter reit.
hinden nach ein ritter ieit,
der rieff so lute:< ritter, halt!>,
das mit yme der gantz walt
jn einer stymme erdosz.
auch was der ritter selber so gros,
das nye ritter gröszer wart.
des wegs er wenig spart.
schier hatt er jne herritten
vnd began jne mit flijsz bitten,
das er yme tiostùre
vf reht auentùre
dorch ritters prijsz icht verzig.
ob yme das heil an dem sig
vil lichte so gewege,
das er yme ob lege,
des wùrd er wol geert.
gawein sich nùst kert
an jne, was er jne gebatt,
fùr sich hin streich er den pfat,
so er ymmer best kund.
auch begab in kein stund
der ritter, der jne schund.
djs began jne swaren.
ein iamer clagebaren
vernam er nah bi yme da
gegen yme her vf der sla,
den er auch vil schier sah.
gar hart grosz vngemah
ein ritter vnd ein getzwerg leit
vmb ein wol schone meit,
die fürten sie gebart.
jr dot sie beswerte,
das wol an ir clage schein.
als sie nu kamen zu gawein,
sie baten jne mit trùwen,
das er sich liesz rùwen
dirre schönen megde dot
vnd also iemerliche not
nit vngerochen liesz,
wenn es jne tùn hiesz
amurfina, sin frùndin.
zü der rede so wer er jn
zü kempfen geben vf gewin.
uil dick sie jne nanten
vnd clegelichen manten,
daz er dar an nit verzegte.
vf den ritter, der yme nach iegte,
begunden sie yme zeugen,
vnd butten sich yme fùr eigen,
das er ir kempf were
widder also grosze swere,
dwijle er jne were gegeben
zü kempfen ir clagendem leben.
wenn es yme verbotten was,
da leiten sie nydder vf das gras
die magt von der bore
vnd hatten vber ir fùr ware
eine so iemerliche clage,
das - alle die welt - ein zage
sie müste han gerochen.
so hett yme zerbrochen
sin freud ir jemerlicher rüff.
an gawein er das selb schuoff,
wann hin zu hymel reicht ir wuff.
zu dem jamer der ritter schalt:
wie dick er zü einem zagen zalt
gawein, daz er nit enfaht!
des wart sin kumber manigslaht
vnd manigfeltig sin gedang,
wann jne ietweders zwang,
jr clagen vnd sin scheltten.
er wolt es jne gelten,
wer es ime nit verbotten e.
darzü ted yme dis we,
ob er das solt brechen,
das die magt gebot rechen
amurfina, sin amye,
auch der kùnig vnd die massenij
jne zu kempfen dar geben het.
welches er der vbergeet,
das möhte man zu arg zelen;
doch müsz er ir eins welen,
das kùnd er nit gewenden;
er müsz es doch enden,
wenn yetweders möhte jne schenden.
sje strittent beide sampt vf jne:
lobes verlust vnd gewyn.
an ir iglichem er nit verlosz,
welches er ym usz den zwein erkosz,
wenn es zwa tùgende sint,
die alles arges sint blint:
das ist mannheit vnd stete.
vnd sint doch beyder rate
beydenthalben sin glich,
sunder schand tùgentlich.
da von welcher eins er verbar,
das was mit dem andern gar
getan, da er eins getett.
mannheit gefolget bet,
vnd ist doch stete dar an.
auch wil vol stete han
gebott vnd frùndes rat.
vmb mannheit ez also stat,
das sie stetikeit nit mag enbern.
ob er schon der bed wil gewern,
so ist der rat nit verlorn,
wenn eins dem andern ist geborn;
wil er aber den rat behalten,
da by müsz er doch walten
stete vnd mannheit.
nu si zuo eintwederm bereit,
wenn ime entweders lob verseit.
ir iamer jne so hart bewag,
das an dem rate nidder lag
die stete vnd wart verborgen.
ja enwolt er nit sorgen,
wie er keme da von,
das yme der ritter so getan
da ted vnd der megde clage.
jch enweisz, wie es ùch behage:
er wolt mit yme han gestritten.
da kam den walt dorther geritten
an der selben wijle
ein magt mit ijle
vnd rieff jne also bald an:
< was wöllent ir tuon? lant stan,
her gawein, ir vbent schaden,
da mit zü hant wùrd geladen
kùnig artus, vwer öheim,
vnd alle vwer vatter heim.
wöllen ir den ritter besteen,
der kumber müsze von ùch ergeen,
der von parcifal geschah,
das er da niht ensprach!>
es waren geneigt beyde sper,
wann in was da beyder ger
vf ein ander an der ritterschafft.
nuo getruwete die magt tugenthafft
die tyost nit vnderfahen,
dorch daz sie so nahen
vff ein ander beyde hielten
vnd sich in die schilte vilten,
e die tiost were ergangen.
einen kolben vil langen,
den sie in der hend fürte,
zü beyden henden sie jne burte
vnd slüg an einen baum da mit
vf von dem stamm wol einen schritt,
das er vf die este brast
reht als ein faules bast.
da von hüb sich als e
ein schra vnd ein kalter sne,
der beyde frorte vnd brant.
der ritter darvnder verswant
vnd die bore da mit zü hant.
dje magt stunt by yme da.
er satzte sich aber vf ein sla.
wie grosz das wetter were
vnd schein schadbare,
dar vmb liesz er es niht,
wann ein degen licht vber sieht
ein freise, die clein ist,
der gröszer e vil manig frist
hat gehabt vnd erlitten.
nit verre sie beyde ritten,
bisz sie vernomen vor jne
vil nahe dorch den walt hin
von rittern einen groszen strijt:
den sahen sie in kurtzer zijt.
sie waren schier komen dar.
als sie gaweins wurden gewar,
den strijt sie al lieszen
vnd bisonder jne hieszen
alle tiostùre geben,
ob er lenger wolte leben.
des enmöhte kein rat sin.
einer sprach:< er slüg den vatter min,
das sol ich an yme rechen
vnd sal mit yme stechen.
das lasz ich mir nit brechen.>
ein ander aber fùr den sprach:
< sin trùwe er an mir brach,
jch sal mit yme strijten.>
< was sal ich denn bijten?>,
sprach ein ander da bij,
< er sluog miner brüder drij,
des han ich zü yme beszer recht.>
< wie gar ir an mir vberseht!
das ich bin sin rehter gescholl,
das wissent ir herren wol!>,
sprach ein ander aber sa.
so sprach dirre:< wiszent ir, wa
er mich vor einem jar verriet,
da ich von brytanien schiet?
des wan ich beszer reht han.>
< so hat er mir nach me getan,>
sprach aber da ir einer,
< vwer sal mit yme keyner
vechten anders denn ich.
er hat so swerlich gelestert mich
an miner swester, die er beslieff.>
einer fùr den andern rieff
vnd sich gein yme in den schilt swieff.
gawein hatt gar manigen gedang.
fùr sie alle ir einer drang
vf einem rosz, das was rot.
den rittern allen er gebot,
das sie alle stille swiegen.
deswar, das wart ime nit verziegen:
sie swiegen alle still.
er sprach:< nú sij der wil
vwer aller gemeyn,
das ich mit yme allein
strijte fùr ùch alle,
vnd wil, das es ùch gefalle,
wann ich reht han darzú,
vnd schinet das fùr ùch alle nü.
des ist vil vnlaugen.
er fürt vor vwern augen
mit yme min amyen,
die schöne samanidyen.
das tüt er mir zuo schanden,
vnd möhte ich das geanden,
das verneme man in den landen.>
hie mit er den schilt begreiff,
sere vast trat er in die stegereiff,
das sper er vnder die arme slug.
gawein die rede nit vertrüg,
er wolt getan han alsam.
die magt jne von der rede nam
vnd liesz jne nit strijden,
sonder sie hiesz jne fùr sich rijden,
wie vil der ritter gedrot
vnd yme verhiesz den dot
vnd alles nach hinden ieit.
sus reit gawein vnd die meit
fùr sich hin dorch den groszen walt,
vnd das sie yme liesz keinen gewalt
sines muotes nach der krafft,
vnd das er ieman ritterschafft
da gab in dem tan.
von jnen wart yme da sere gebotten an,
e denn sie beyde kamen von dan.
so lang ritten sie beyde,
bisz sie vff die heyde
kamen usz dem walde.
da müst widder vmb balde
die jumpfrauw keren.
mit zùchten vnd mit eren
befalhe sie gawein gott
vnd sagd yme, sie were ein bott:
sie hette frauw salde gesant dar,
das er sicherlicher gar
mit ir dorch den walt ritte,
wann sie sins hertzen sitte
an mannheit bekand,
die verzagliche schand
mit alle ie verbaren
vnd ein gruntfeste waren
tugent vnd state,
vnd das er icht tate
widder aazim, irs bruoder rate:
das were gewesen ein missedat
vnd ein sollich swere,
da von der hoff zergangen were.
hie liesz sie die mere.
under jne wart ein scheyden
an der stat von jne beyden.
jr igliches kert sinen weg.
ein ritter, der hiesz gygamet,
den sah er vor yme gahen,
wann yme was komen nahen,
ein ritter, der jne hart ieit.
er was iedoch nit verzeit,
wann das es yme also stunt:
vil dick lùte dorch gút tunt,
das man jne fùr arg zelt.
jch sage ùch, warvmb dirre helt
disen also sere flohe:
dem ritter, der yme nach zoh,
hette er sinen brüder erslagen.
dar vmb began er jne jagen,
vnd wolt jne erslagen han.
da entweich er yme von dan,
wann er widder jne hett getan.
der ritter, der den andern jeit,
als mir es die auenture seit,
der was aamanz genant.
da von was er nit bekant,
wann ime sinen getaufften nam
ein glichnisz gar benam,
die nach gawein scheyn:
jne hieszen den andern gawein,
alle die jne kanten.
von recht sie jne so nanten
wann er yme was vil glich,
sin mannheit vnd die lih.
da von man sinen namen liez
vnd jne nuwent also hiesz,
als ich da vor gesagt han.
sit dise rede was ergan,
das yme gygamet den brüder slüg,
solchen hasz er yme trüg
vmb den bruder allen tag,
das er nach sines libes bejage
vff rache fleisz, als ich sage.
des hatt er jne gefaszet fùr.
nü des wart es sin gefür,
das er sin verjrret wart.
da er noch vf der vart
jagt mit vil groszem zorn,
yme widder fúr ein ritter vorn,
der jne nit verrer jagen lie,
wann er jne by dem zaume vie
vnd habt jne, bisz er sich verbarg.
sie waren beyde sampt starck,
kùnstenrich vnd mannhafft,
da muoste gliche ritterschafft
sie scheyden vnder jne zwein.
des wart ander rede kein
vnder jne, wann das sie sich
schieden. des verwan ich mich,
das sie das taden vmb das,
das iglicher deste basz
sin sper vertün kund
nach sin selbs gund,
wann beide ein müt schund.
zedoech was er genant
vnd was ein merer wijgant,
an allen tùgenden glich gantz,
der strijden solt mit aamantz,
der der ander gawein was genant.
jne was vil gar beiden sampt,
des wurdent ire spere schier vertan,
vnd behabt iedoch den sig an
aamantzen an zedoech.
die wale er yme yedoch verleh,
als es ritters reht ist,
das er yme vmb sin genist
da schwüre ritters sicherheit.
da wolte zedoech den eit
aamantzen bieten dheyne wijse
dorch den loblichen prijsz,
den er an yme hett bejagt.
als er yme das widder sagt,
das erzùrnete den recken,
vnd began yme entdecken
sin haubt von der sarwat,
vnd was des kein rat,
er múste yme sicherung jehen,
ader schier das an sehen,
das er das haubt verlüre.
das er ime selbs der eins küre,
die zwey leite er yme fùr.
nuo wolt er sicherung
weder mit hant nach mit zung
nie gebieten dorch keine drau.
bi dem hore hergreiff er jn da,
wenn er moht sin nit verdragen
vnd wolt yme han ab geslagen
das haubt. nü kam gawein
geritten zü disen zwein
vnd batt jne, die rede lan.
da sprach er als ein zornig man,
der yme selbs getruwet wol:
< wellent ir mir den selben zol,
her ritter, fùr jne geben,
so wil ich jne laszen leben;
ader getürent ir mich fùr jne besteen
so lasz ich jne aber geen
frijlichen, wa er hin wil.
jr müszent aber das selb spiel
von mir haben an der hant
vnd fùr jne sin min pfant:
so wùrt es dar vmb gewant.>
< des der man getar, des ist vil,
der es von mút tün wil>,
sprach gawein,< des glaubent mir.
deswar, her ritter, dwijle aber ir
mir an gebotten habent den strijt
dorch einen vil cleinen nijt,
den ich mit niht han geholt,
vnd der ritter den kumber dolt
vnd erlöset von mir werden mag,
so sal ich ime disen tag
zü sinem dienst bereit wesen,
dwijle er da von mag genesen,
mir geschehe, was nü mùge.
kommet es mir an die selben zùge,
da es ime was an komen,
e mir der lip werd benomen,
jch gib ùch e sicherheit.
mir were aber sere leit
weres nach daran gereit.>
er sprach:< da widder wil ich swern,
das ich mich nymmer wil hernern
mit sicherung eyd.
e wolt ich vor leyd
danckwillen dot ligen,
vnd solten ir mir an gesigen,
e ich mich nerte da mit,
das ich ùch nach ritters sitt
yemer sicherung swüre.
war ich iemer dann füre,
so hett man mich fùr einen zagen:
so were ich senffter erslagen,
so ich were vngeneme
vnd den lùten widderzeme,
denn ich sust were.
alsolche geumere,
die mögent ir wol bliben lan;
e ich wùrd dheines ritters man,
jch wolt den dot e gewisz han.>
hje mit erhuoben sie den strijt,
der von jne vil lange zijt
wart gefochten mit ellen.
von disen kampff gesellen
möht ich ùch grosz wunder sagen,
wie von jne beyden wart geslagen
zü rosz vnd zü füsze,
wann das von vnmúszen
jch nit mag verenden,
wenn ich müsz mich wenden
vf die auentùre fùr basz.
warzü deugte nu das,
ob ich ir einen swechte
vnd den andern frumm mechte
von spehen wortten mit sage?
enweder dùhte mich sin ein zage
nach der mere vrkund,
wann das frauw salde gund
hern gawein des siges da.
hie mit ich den strijt la,
min müt, der steet anderswa.
da yme nuo gawein an gesigt,
als man zü ritterschafft pfligt,
er begerte sicherung an jn,
wann solcher auentùre gewyn
was yme lieber denn der dot.
aamanz yme ninen bot
wann die bet mit state,
das er yme den dot det.
er wolt yme keinen eyt geben,
vnd wie gern er jne liesz leben,
so wolt er doch genesen niht.
zuo der rede kam von geschiht
gygamet vnd bat,
das er yme an siner stat
aamanz hiesz sweren,
vnd begund vast an jne wern
darvmb flehe vnd bet.
zeodech das selb tet,
vnd butten yme ir manschafft.
vil groszer auentùre krafft
darzü sie yme zeugten,
da mit sie jne geneigten
nach irem willen vil gar.
er enweste nit vmb ein har,
was yme hinzü nu gewar.
hett er den nit gewest,
der beydenthalb so vest
was nach des andern dot,
er hette in solcher not
jn dheyne wijse niht gesellt.
zú manne enpfing sie der helt.
e er von dannan wolt scheyden,
er liesz jne da beyden
disen tegen vberwonden,
so daz sie jne gesunden
zü land rijten lieszen
vnd nuwen hieszen
schweren ritters sicherheit.
mit dirre red er von dannan reit
gein der auentùre sinen weg.
zedoech vnd gygamet
er hie by dem ritter lie.
von gawein lasz ich es hie
vnd sage, wie dise gefuoren:
die truwe, die sie swüren,
die lieszen sie vnderwegen
vnd brachen sie an disem tegen.
des velle sie der gottes segen!
das haubt slugen sie ym ab.
nú was es nahe bi der hab,
da artus sins gejegts pflag,
vnd was die zijt vnd der tag
an den andern tag gefallen,
das er mit den fùrsten allen
den wijszen hirtz solte jagen.
was solt ich mer da von sagen?
jr hant es vor dick vernomen,
wie es dar zü ist komen,
vnd was die hochzijt rehts hat,
vnd wie es darvmb stat,
daz die hochtzijt darvmb geleit was
zú karidagan zú karadas.
da waren sie alle hin komen,
der kùnig vnd die kùnigin,
ritter vnd frauwen,
das sie da wolten schauwen,
wer den wijszen hirtz valte,
vnd welhe man da zalte
dar zuo, das sie were
so reht kuszebere
vnder frauwen vnd megden.
von der rede wil ich ùch bescheyden,
das ensal ùch nit leyden.
als nü der hirtz wart gefalt
vnd dirre freuden tagalt
ein frölich end nam
vnd artus vil ersam
mit gesten vnd mit mannen sasz
zü karadas vnd asz
mit groszen freudenrichen sitten,
nü kam fùr den tisch geritten
her gygamet fùr ware
vnd fürte bi dem hare
des ritters haubt in der hant,
der der ander gawein was genant,
wann das gesiddel an dem hofe was
verre von sinem palas
vf der erden vnder einer linden.
er wolt nit erwinden,
bisz er fùr den kùnig kam.
er sprach daz yme nit enzam
vnd da von zerstört wart
dirre freuden hochfart,
als er jne die rede entspart:
< kùnig artus>, sprach er
< ein auentùre bring ich her
zü dirre groszen hochzijt.
das uch sunder strijt
zü houe dirre tùre
kom kein auentùre,
des begynnent ir mir selber jehen,
als sie nü hie wurt gesehen.
sehent hie das haubt an,
das ich hie in der hant han:
das ist gaweins gewesen;
vor dem bin ich kaum genesen
vnd han yme an gesigen.
von mir er erslagen ligt
von gar glicher ritterschafft,
wenn er sicherung krafft
dorch sin grosz mannheit
mir endlichen gar verseit,
da ich den sig an ime beieit.
da ich das lang vertrüg,
das haubt ich yme ab slüg
vnd wolt in nit genesen lan.
jch weste wol, das kein man
die red hette geglaubt,
vnd hett ich sin haubt
nit her zü houe braht.
man wende anders, das ich hett erdacht
die rede dorch hohen rüm.
jst nü hie ieman so frumm,
der jne getüre rechen,
der mag mich dar vmb besprechen;
da usz vor dem burgtor
da wil ich sin beyten vor
vnd wil jne strijtes gewern.
hie mit, kùnig, wil ich begern
vrlaubs, das ich rijte,
vnd wissent, das ich bijte,
ob ieman mit mir strijte.>
hie mit vor jne allen
liesz er das haubt vallen
vf die tafel fùr den kùnig nydder.
vsz der portten kerte er widder
vnd reit sin strasze.
von gygametten ich lasze
hie die sage fùrbasz.
was gesindes vor dem kùnige sasz
vnd auch der kùnig mit yne,
als nü gygamet reit hyn,
die hetten das wol gesworn,
das er es dorch ettlichen zorn
ader dorch spott hett getan,
vnd begunden ir gelechter han,
wann das haubt was bedeckt,
das es nüst entbleckt
was so vil als vmb ein har.
auch nam sin da nyeman war,
wie es gestalt were,
wann daz dise mere
vnder jne ging vber al.
beyde hoff vnd sal
hatt da von groszen schal.
nuo stunt einhalb da by
der druchsesz, her kay,
vnd sprach:< warzu taugt dirre spott?
wiszent ir, das der ware got
alle ding getün mag?
was ob wir disen slag
mit sùnden vmb jne verdient haben?
maniger yme selbs ein grübe hat gegraben,
deshalb, das er sich dar an
leides gar wenig versan,
bisz er die warheit erfant.
noch ist uns allen vnbekant,
wie es vmb das haubt stat,
wann der ritter, der es braht hat,
der glichet eyme starcken wol,
das sin rede ware wesen sal,
als er es offembar seit.
es enschijnet kein zagheit
an yme, als ir habent gesehen.
vbel mag es sin geschehen,
wann gawein was so mannhafft;
doch so ist widder glùckes krafft
niht, dem es wege ist.
wir erfinden in kurtzer frist
sinen dot ader sin genist.>
uil wart er vmb die red gestauwt,
wann es die fùrsten vnfrauwt
vnd mit al das gesind.
kay jne allen vil geswind
darùber antwort bot,
wann jne ein hertz senende not
fùr sie alle hett gefangen.
fùr den kùnig kam er gegangen,
da das haubt vf der taueln lag,
vnd hat gekert den nack
dem kùnige vnd kay das vorder teil:
des wart auch sin vnheil.
vil leideclich er das dah
ab dem haubt vor jne allen brah,
da mit es gar was bedaht.
als er das haubt hatt enblaht
vnd das antlid ersah,
ein michel jamer da geschah.
vnder sine arm er es gefing
vnd solche not da mit beging
von klagen vnd von weynen
vnd began das so meynen,
das da trùwe müst beschijnen.
er wande, daz es gawein were,
vnd des wurden sine swere
rùwig vnd iamers vol,
als er es bescheinte wol.
zü der erden viel er so zü hant,
beyde hare vnd gewant
zerfùrt er alles darob,
so daz die clage noch truwen lob
wol von der warheit zam.
vil dick er es an den arm nam
vnd kuszte es gar one zale.
je darnach einen schal
hüb er, der zü hymel steig.
als er darvnder gesweig
nach dem kùszen vnd dem trùten,
so began er aber luden
sin clage basz denn e,
vnd von leydes grund we
dick jemerlichen rüffen.
vnder disem starcken wuffen
nach leides sitt ein vnmaht
sin krafft volliclich bedacht,
vnd viel also fùr dot hin.
nü wart ein schall vnder jn,
da jamer vant richen gewyn.
als sie nu den jamer sahen,
sie begunden alle gahen
vnd von tischen springen,
auch gemeinlichen dringen
vber kay hin, da er lag
vnd nahe zü dem tode wag,
aller kreffte beraubt;
vnd hatt dis haubt
getrucket zü dem mund,
als ob er es an der stund
hett gekùsset da vor.
also hatt er es ennbor
so vast begriffen,
vnd wie yme were entsliffen
die krafft vnd der synn,
das es yme da nyeman vnder jne
möht mit ycht gewynnen an,
bisz er sich zü lest versan
vnd sin krafft widder gewann.
alhie was wandelung,
da hertz vnd zung
vor nach freuden dienst rang,
das die so snelle da bezwang
ein also freudeloser last.
freude müst als ein gast
von dannan scheiden, das ruwet mich.
da mit vbete vber al sich
kumber vnd vnfreude da
vil glich vf einer sla,
vnd gesweig manig süsze not;
von kurtzwijle reyner spott
gelag vnd auentùre sage
one allen trost; jamers clage
nam der fleuten süszen gesang;
der fiddeln vnd der harpfen clang
gemeiner wüff vnder fing.
owe, wie gar da zerging
der tamburen süszer schall,
wann die stat vnd der sal
jn welscher stymme hal!
under dis jamers schall,
den gemeinclichen vber al
vbten, die da waren,
her kay begunde varen
einer klage, die so senlich was,
das von ir ein adamas
gar möhte sin zercloben.
des heiszet jne das buoch loben
vnd sin meister cristian
das jne sin müt ie lie began
die tugent vnd die manheit,
wann er mit gantzen truwen kleit
dis edeln ritters dot,
als mir es die auentùre enbot:
des hatt er reht vnd ted yme not.
kay aber clagen begund
vnd zuckte gein dem mund
das haubt vil dick.
vil iemerlicher blicke
er vff nam hin zü gott
vnd sprach:< es was von dinem gebott,
herre gott, das weisz ich wol,
ob ich getar ader sal
die warheit dar vmb sagen,
das der best ritter ist erslagen,
der sper vnd schilt ie getrug,
wann des were gewesen gnüg,
ob es ein here hette getan,
werestu nit schuldig dar an.
die rede ist mir wol bekant.
jch weisz wol, das in diner hant
alle die welt mit gewalt stet;
des mag gewesen kein rat.
gawein des engolten hat.
herre got, ich han gesehen,
das ich vil manigen hort jehen,
das ich nü glauben wil:
der welt kumber ist din spiel,
vnd ist dir lib ir hertzen leit.
was tougt diner gotheit
also meyntater mort?
vnd getùrst ich wol mine wort,
got, hin zü dir errecken
vnd minen mút entdecken
vnd endlich entbinden,
so möhtestu enpfinden,
was min zunge kan gesprechen.
nuo muosz ich leyder brechen,
das ich, herre, nye gebrach,
wann ich ie minen willen sprach,
wa mir denn hin gezam.
so bin ich dir doch taugen gram,
wie ich doch swijge, reiner got.
wer der dot nit din gebott,
den solt ich auch schelten.
wie möhtestu vergelten
von aller diner magenkrafft,
disen recken tugenthafft
der von dir dot ist gelegen?
da du sin nit woltest pflegen,
was woltestu sin da zü slahen?
da von muosz min auge zwahen
mine hùffe von vil manigen trehen.
uon yme hatt ich wirdikeit,
die ist mir nü gar widder seit.
war zü taugt denn min leben?
aller freuden ist nü ein end gegeben
mit sinem tode allein:
wenn gawein, der rein,
was aller ritter ere,
ein bild vnd ein lere
lobes vnd tugend,
ein vaner wijser iugend,
ein jngesigel der trùwe,
der milt stamm sunder rùwe,
ein blüme aller ritterschafft,
der zùchte wurtz vnd krafft,
mannheit vnverwerter kern,
fùr alle freise ein leitstern,
zü aller not ein fùrschilt,
des hertz ie dar uff spilt
mit vngefelscheter stete,
das er ie dar noch tete,
als man jne denn bate.
wibes güte hat verlorn,
was ir zü truwen geborn,
wann er ir aller kempff was.
vor sorgen dick genasz
von yme manig schön wijp,
vnd wart verderbet manig lip
von yme, der das varte,
das er reine wijb beswarte.
wer möhte sin tugend alle zelen?
kùnig artus, ir sollent vf selen
das rich vnd die krone,
vnd gebent yme das zü lone,
das uwer freud an yme stund,
also frùnden frùnde tunt.
was taug vns freud one jne?
legent die richen cleyder hyn
vnd die ritterliche sarwat
darùber! was freuden man hat,
die sij mit alle verborgen,
wann clagen vnd sorgen
sollen wir vf vns borgen.
edele frauwen vnd meide,
jr sollent von dem leide
vwer freude gar laszen
vnd sùllent den tag verwaszen,
den ir hùt habent gesehen,
dar an das leit ist geschehen;
das tünt ir mit recht.
ritter vnd kneht,
sit dirre groszen swere
mine nachfolgere
vnd clagent disen jamers slag,
der alle die welt bewegen mag.
darzü sin die liehten tage
geladen zü diser clage,
das sie laszen iren liehten schin
vnd ymmer mere dunckel sin.
jch bitten ùch, ir bluomen rot,
das ir dises heldes dot
klagent mit mir dar an,
daz ir vwere varbe wolgetan
fùrbasz müezet verberen.
auch wil ich an die vogel begern,
das sie jren vil süszen gesang
laszent vnd habent dang,
wann jne ir kumber ie bezwang.
ir frauen, laszent vwer sitt
an freuden, als ich ùch bitt,
vnd verpflegent ir also gar,
das ir mit al freuden bar
hie jnne fùr alle weg sint
dorch dise jamerliche zijt,
da wir inne sint betagt,
vnd wil, daz ir den recken clagent
mit also groszen eren,
als ich ùch kan geleren.
jr sollent laszen riche wat,
die ùch wijben frölich an stat,
vnd uwere ziere züsammen binden
vnd das stoltz bewinden,
das ir vber vwer hare tút.
vnd lant allen hohen müt!
selwet vwer lihtes fell!
west bleich vnd gel!
rùhent uwer slehte bra
beyde hie vnd da!
sint unfreuden gemant!
nymer werd an ùch bekant
keinerhand freuden zeichen.
vwern munt habent bleichen,
der ie schein nach freuden rot
vnd vil süszes lachen bot,
vnd ùch nyeman mynne ger!
nu geent alle zü mir her
vnd sint der clage min gewer!>
hje mit er hin seig,
als er der rede gesweig,
vnd lag als ein toder man.
artus húb sin clage an
vnd mit yme sin huszgenosz,
vnd namen usz der schosz
das haubt hern kay,
vnd alle, die da stunden by,
die begunden alle mit yme clagen
vnd allen freuden widder sagen,
beyde gesinde vnd geste;
des wart die clage so veste,
das sich vil manig hertz brach,
wann sollich jamer da geschach,
den nyeman gesagen kund,
wan alle mit einem mund
sie gemeinclich rieffen,
vnd manige sufftzen tieffen
von hertzen sie namen.
nit mer denn einen bramen
sie sich dar vnder sparten:
sie zerriszen vnd zarten
beyde cleider vnd lib,
als ein lieb senend wib
ob irem eyngebornen kind
pfligt, die vil geswind
jren lip gar zerbricht
vnd werlichen spricht,
ob ir dar an leit geschicht
das sie es vngern sieht:
also kunden sie sich des gemaszen niht.
nach dirre clage kam gegan
die gùte vnd die wolgetan,
gynouer, vnd die reyne
vnd mit ir gemeyne
die frauwen vnd die meide,
wann dise swestern beyde,
sgoydamur vnd amurfina,
der was ir keine da.
die andern waren sust alle dar
mit gynouern gar freuden bar
komen in den richen sal,
das sich keine da verhal,
die zu der hochtzijt were.
vmb dise grosze swere
einer clage sie begunden,
als sie das haubt funden
vnder dirre massenij ligen.
dem wart von jne nit verzigen:
sie kuszten es bisonder.
von clage michel wonder
horte man dar vnder.
da verlasch manig luter vel,
wann die trehen waren so snel,
die darùber dick rùnnen,
da von ire augen gewonnen
ein röte, die jne nit enzam
vnd jne ein gewones lieht nam,
das so zu freuden was gestalt,
das es wol hatt den gewalt,
wa es mit güte hin schein -
vnd were ein hertz als ein stein
gewesen ader als ein stael -,
das es nyeman zü einem mal
mit rehter gúte an ersah:
alle stat es yme brah,
als vil maniger von yme iah.
ujl gar die rede verkert wart. jre cleider wurden ab gezert vnd verworren ir schönes har. mit al wart verworffen gar, was hie zu hohen freuden taug. jr keyne sich dar an bedrog vnd was er dann nit sere arm
noch der senlichen clage.
enstrijt waren sie bejage
dirre clage mit flijsze:
der wurden ire hend wijsz
vil dick gewonden,
darvnder zu allen stunden
jre brùste hart wol beslagen.
es gehort ie disen clagen
kein man gliches niht.
von recht michel clage geschiht,
wa ein gúter ververt,
der sich an eren hat gewert.
das den der dot niht enschert!
da dise clage gesweig,
amurfina zú seig
vnd sgoydamur, ir swester.
da wart die clage vester,
dann sie was vor.
das haubt sie hub enbor
vnd druckte es vorn an iren lip.
sie sprach:< owe, ich armes wip
vnd du, vil lib seliger man,
das ich din ie kund gewan,
das musze got erbarmen!
owe, wer sal mich armen
trösten hie mine tage,
wann ich von dir einen trage
aller selden wirdikeit!
das ich dich ie in der weltheit
sehen solt, das ist mir leit.>
hje ted mir das büch kunt:
sie kuszte es wol tusent stunt,
e sie sich sin verlaubet,
vnd gab da das haubet
jr swester, die ted nü alsam.
her widder sie es aber nam
vnd begund klagen aber sa:
sie sprach:< we dir, amurfina,
wie hat dich die mynne also bedrogen!
ja nü wart die rede nye belogen,
die man lang hat gesprochen,
vnd wart auch nye zerbrochen:
wa mynne ist nachtgebuwr,
sie werd yme also suwr,
wie man sprech, das sie süsze sij;
da ist ein bitter gall by,
die ir süsze vberzùht.
wol yme, der sie flùht!
dem wùrt mit ir niht vergeben.
da sie mich nach ir hiesz leben,
da bot sie mir die süsze.
solche sint mynnen grùsze!
jch wene sie dauwen müsze.
got, salde vnd frauw mynne,
zú welchem vngewynne
habent ir mich laszen worden,
da ir mir woltent morden
einen man von vwern schulden,
der ie nach uwern hulden
mit aller wirdikeit warb
vnd an dem müt nye verdarb.
er tet ie das best,
wa er kund ader west;
er kund auch vnd west es wol.
owe, das sin enbern sal
jch vnd der tugend wert!
nü hat die schand, des sie begert,
alle der welt, one widder strijt,
dwijle er hie dot lijt,
des dot mir die rùwe git.
gawein, süszer amijs,
was hilfft nuo ieman hoher prijsz,
dwijle du der welt genomen bist!
vatter, geist vnd süßer crist,
was hatt ich armes wijp getan,
das du mir zü leid einen man
der welt hin gezúcket hast
vnd sie freudelosen last
da mit in der rúwe,
die alle tage nùwe
jst vnd müsz iemer wesen.
da du jne nit liesze genesen,
da solt er nye worden sin.
lieber man vnd herre min,
du hast des engolten,
das die lùte nit enwolten,
das ie ritter wùrd geborn,
daran so gar uszerkorn
tugent richer hort lag,
vnd der sin auch pflag
mit so glicher wag.
amor, der mynne kint,
es schinet wol, das du blint
bist vnd so gar one schamm
vnd an aller state lam,
vnd das din strale ist so scharff,
den din boge in min hertz warff:
der hafftet noch dar jnn,
als es din mutter mynn
schüff mit ir vntrùwen.
das mùß mich nú ruwen,
das ich jne so gern enpfing.
da vwer will an mir erging,
da solten ir mir beschirmet han
gawein, mynen lieben man,
als ir eneas tate,
da er nach vwerm rate
vmb die schönen larien,
sine süße amyen,
solte vechten mit turno:
so were ich nü als fro,
als sie beyde waren da.
uerflúchet sij der liehte tag,
daran die wijle ie gelag,
da min frunt ynne ermordet sij.
beyde baume vnd zwij,
die bluomen vnd das grüne grasz,
da der strijt vff was,
der sij mit al verfluocht!
nymmer werd beruocht
von tauwe nach von regen,
da er dot sij gelegen,
die stat nach die erde!
die zijt nymmer werde
jn des jars zale gezalt!
der verlornisz sij gesalt
alles, das da were,
das mines frùndes swere
sah, da er lag dot,
das da nit yme in die not
jr keines sin helff bot!
sele, nu begib mich!
du weist wol, das du vnd ich
gawein, den vil sùszen,
nù mit volgen müszen.
was taugten wir nü hie on jne?>
hie mit entweich ir der syn
vnd sanck vf ir swester nydder,
vnd geswachten sich gar ir glidder,
das sie ir wenig enpfant,
das ir das haubt usz der hant
jr swester sgoydamur brach,
als sie den jamer ersach,
vnd gie da mit usz dem sale.
ein wuoff vff vnd zü tale
wart von erst da hernuwet
vnd sin dot da berùwet,
das ich es vil vbel kund,
ob mir es schon die müsze gund
zú sagen, als das büch seit,
wie bisonder iglicher cleit.
die mere mich fùrbasz ieit.
hie lasz ich die grosze clage
vnd kere widder zü miner sage.
da zedoech vnd gygamet
zú der auentùre den weg
yme gezeugten dorch einen walt
vnd er jne den ritter gesalt,
als jne ir iglicher bad,
er streich hin weg vnd pfad,
walt vnd berge,
das er nyrgent herberge
wedder spurt nach enfant,
anders denn ein gar ödes lant.
darvmb gie ein breiter se.
nü hatt er dick vernomen e
mere von dem selben land.
von wannan er es aber kand
des wil ich ùch kurtzes end geben.
mitten vf dem se sah er sweben
einen wasen breit vnd lang,
der sich gein dem staden swang,
da sin rosz den se trang.
eyner auentùre der wase pflag,
der ich nit verswijgen mag.
es was vmb jn so gestalt,
das er des sewes hatt gewalt:
als man dann da süchte die vberfart,
so hat der wase ein solche art,
das er zü dem staden flosz.
er were nit aller schanden blosz,
der da versùchte das vare,
so muoste er da one wehre
bi dem staden bliben,
vnd begund widder drijben
den wasen die vnde;
ob man aber nit enfunde
kein schand an dem man,
der das ver wolde han,
so wer er yme der vart bereit
vnd fürt jne one alle arbeit
one fuorlon in das lant.
der rede jne der wase mant,
das er das lant da von erkant.
zü dem staden der wase swam.
gawein er vf sich nam,
das er an yme, das ist war,
niht verwiddert vmb ein har,
vnd braht jne sanfft vberhyn.
an dem stade vber liesz er jne,
vnd kerte gawein sinen alten pfad.
da vant er ein stat,
die was clüg vnd grosz,
wann einer sachen was sie blosz:
das er dar jnne nyemant vand
noch vberal in dem land,
das manns bild were.
sie was aber nit lere
der aller schönsten wijbe,
die got ie von libe
vf der erden werden hiesz.
die grosze stat er verliesz
vnd kerte gein eynem castel
enbor, das ein rotsche synnwell,
die vf was gedoszen,
hett vmbe slozzen.
daruff kerte er vnuerdroszen.
als er nuo vff das husz gereit,
er wart mit groszer wirdikeit
von der huszfrauwen enpfangen.
die kam gein yme gegangen
gar noh mit hundert meyden.
sie enwolt yme nit leyden
da by nahtselde;
das erzeugte sie dem helde,
wenn sie jne vil gern sah.
vil mynneclichen sie zu yme sprach:
< gotte wilkom, herre!
wer hat ùch so verre
braht an dis end?
vch sal das ellend
wesen frumm, ob ir welt.
jr dùnckent mich sin ein kúner helt,
das ir zuo mir kommen sijt,
deshalb ich han by miner zijt
lùtzel ritter hie gesehen;
des helffent mir die megde jehen,
die ir da sehent vor ùch stan.
lieber gast, wir sollent gan,
da ir vwer rüwe pflegent
vnd dis harnasch hin legent.
es ist die mùde an ùch schijn.>
er sprach:< gnade, frauwe min!
dwijle ir es wöllent, so sal es sin.>
den gast sie by der hant nam,
lobelich vnd vil ersam,
vnd fürt jne vf einen sal,
der was behenckt vber al
mit einem pfeller, der was rich;
auch was vf dem estrich
ein pfellor ùber al gebreit
vnd daruff gespreitet
von bluomen ein grosze krafft,
als es die frauwe tugenthafft
dorch ir selber er gebot:
lylien vnd rosen rot
dise edele bluomen waren,
darvmb das sie baren
dem sale einen edelen gesmag.
die huszfrauwe des gastes pflag,
deswar, mit groszen eren.
e sie denn wolt keren,
sie gab yme zweyer ding
die wale mit geding.
die gabe was nit zü gering.
solt uch nit werden bekant
beyde bùrge vnd lant,
wie sie geheiszen weren,
so gliche es sich den meren,
die man sagt in schupels wijse;
da von verlúre ich grosze prijse.
beyde frauwe vnd auentùre
wande sie licht by dem fùwre
ader haben fùr ein dorffspiel
zü winder seyten, wann ir kele
vnd jre zungen sint vil gezale
vnd prùfent dick gelechters schale;
des sint sie vngehirme.
als in ein cleyne wirme
gahes in den lip entspringt,
eine sagt, die ander singt
von freuden dorch die hitz
vnd spricht:< ich switz!
mir ist fùr war gar zü heisz.
nement war disen groszen sweisz,
wie er ab mir rynnet!
der mich noch zù reht mynnet,
jch gestritte einer jungen wol.>
der die selben leite in die kol,
er brennte usz ir sweiszes niht,
den man gekiesen möcht vmb icht,
wann sie sint kelter denn der sne.
jr getol tút mir iemer we.
jr mynne der tùfel bestee!
dje rede ich hie laszen wil,
wenn mich ruwet, daz ich so vil
von jne da vor han geseit,
vnd ist mir hùtt vnd yemer leit,
das ich ir hie ie gedoht.
vnd hett mich niht darzü bracht
die red, die ich geseit han,
so hett ich es nit getan,
das ich e die rede liesz.
als ich ùch da von gehiesz,
die wil ich nú vol enden
vnd wil mich wenden
an mine sage also e.
das lant vnd der breyte se,
die warent beyde also genant:
das lant hiesz der megde lant,
aifayes der se was
geheiszen. auch hiesz der wase,
da gawein vf vberfúr,
burgtor, die burg rohur.
die frauw hiesz leuenet.
gawein sie michel ere tet,
deswar gar sunder bet.
als nuo gawein vrlobs gert,
des wart er wol gewert,
das er zweyer eins nam,
welhes yme da aller bast gezam:
das lant vnd ir mynne,
vnd daz er dar jnne
ymmer mere herre were,
ader gar sunder swere
ymmer jung solte leben.
der wolt sie yme eins geben,
welhes yme basz behagt.
der rede er ir gnade sagt
vnd erwelte ime die reine iugent,
das er mit der gantzen tugent
ymer mere leben sold.
ein bùchse von gold,
die was einer sache vol,
die nyman mere wiszen sol,
gab sie yme, daz er da mit
sich baden solt nach dem sit,
als sie jne gelerte.
da mit sie in erte.
hie mit er von dannan kerte.
uon dannan reit er das husz her nydder.
vber den se fuorte jne widder
der wase, als er ted da vor.
vf eines alten weges spor
liesz er sich an der stund.
als er gesehen kund,
so was er gedrieben wol
vnd nuwer huffslege vol,
dar vmb er sich dar uff lie.
ab disem wege kam er nye,
bisz er begreiff einen walt,
der wol nach freuden was gestalt
von bluomen vnd von gruonem cle,
dar vnder auch nach freuden schre
manig vögelin vnd sang.
dis alles gaweinen betzwang,
vnd die sonne, die vil heisz was,
das er erbeiszte vf das grasz
vnder ein schöne linde
vnd begund sin rosz binden
an einen ast hinden.
da verdrosz jne der zijt nit.
ein ritter kam von geschiht
darnach vff jne geritten da,
der auch beuangen hatt die sla;
dem fuort man drù rosz mit.
jch wene aber, nyeman mit yme ritt,
wenn fùnff siner kneht
mit allem dem rechten,
das ein ritter haben sal.
des wapen was als ein kol
swartz, wann die sarwat,
dar an schein michel rat:
die was wijsz vnd guot,
vnd die rosz rot als ein bluot,
vnd waren die knappen wol gekleydt.
als er vf gawein reyt,
vil gering lieff er yme engegen
vnd bat jne sonder ruowe pflegen
by yme, da er were gelegen.
genade er yme der rede bot,
wann yme was der ruowe not;
er hatt gestrichen sere.
auch frauwete jne die ere
vnd die frùntliche bed,
das er es deste gerner ted,
die gawein an jne kerte.
dar gein er jne erte
vnd erbeiszte vf die erd.
mit michelem werd
ein ander sie pflagen;
des kunde sie nit betragen
by einander vmb ein hare,
wann sie mit kurtzwijle gar
da waren vnder jne beyden,
als sie kunden vnderscheyden
jr iglichs gewissenheit,
wann beydenthalben wart geseit,
dwijle sie da lagen,
nach iglichs fragen
von lande vnd von magen.
darvnder batt her gawein,
das er des hele hatt kein
vor yme: er seite,
zü welcher arbeit
er der reise hatt gedocht,
ader von wannan er dar were bracht:
sa wolt er gern wissen.
so sprach der ritter gewissen:
< das sal ich ùch sagen:
jch wolt auentùre bejagen,
die mir bezeiget ist hie by.
man sagt, das ein turney sij
bi einem castell hie nahe,
da wil ich hin gahen,
jch wene, morgen an dem tage,
als ich vernomen han von sage.
den hat graue leygamar
geleit dorch sin tochter dar,
vnd wer da das beste tuot,
dem git er tochter vnd guot,
die ist schön vnd hochgemuot.
wellent ir nü des geruchen,
so das ir jne wöllent suchen,
edeler ritter, mitsampt mir
vnd also, das ich vnd ir
glich gesellen weren?
jch höre an vwern meren
wol vnd siehe es in manige wijse,
das ir rijtent dorch prijse
vnd dorch auentùre beiag.
villicht vnser einer mag
die auentùre behauwen
vnd auch die edelen frauwen,
jst vns glùck waege.
jch bin auch nit so laege,
jch zymme ùch zugesellen wol.
jch heisz von montihs dol
quoytos der britun,
vnd ist senpitebrun
min bruder, der von ritters art,
wann er den lip nye gespart.
hetten ir den recken bekant,
so weren ir des gering gemant,
das ir mir dise sicherheit
vnd geselleschafft nit verseit,
ob vns villicht gelùng.
harnasch vnd zerung,
des han ich me denn zuuiel:
ob ich darùber borgen wil,
so borge ich vber tusent marck.
dar zú so sint die rosz starck,
die ich dar uff gefuoret han.
e wir dar an gestan,
wir haben dar vnder bejagt,
das ein ander villicht den schaden clagt.
die bed mir ritter nit versagt!>
gawein jne der bed gewert,
dwijle er sin mit gantzem flijsz begert.
sie ritten mit einander von dan
den walt vnd den dicken tan,
bisz sie komen vf das velt,
da ir iglicher riches gelt
gab von auentùren,
da mit sie sich stùren
wolten zuo dem langen wege.
jn dirre kurtzwijle pflege
sie gar bisz an den abent ritten.
da began quoykos bitten
gawein, das er jne liesz
wiszen, wie er hiesz.
der bed wart jne nit verziegen,
er antworte:< min nam ist vnuerswiegen,
wann ich mich sin nye geschammt:
gawein bin ich zwar genant,
das weisz die welt allesamt.>
bi disem nammen kant er jne
vnd zalte yme den rijchen gewynn
von frauw salden sin geschehen
vnd frauwete sich sin sere.
darnach ymmer mere
sinen herren er jne nannte,
wann er jne wol kante
an tùgenden vnd an mùt.
mit lib vnd mit guot
diente er yme wol zü reht;
also taden auch sine kneht,
die wijle er was by yme da.
zü dem castel sorgarda
waren sie vil snelle komen,
da der torney hin was genomen.
da waren mit schalle
die lantfùrsten alle,
auch castel vnd stat
beyde vnd trat
befangen, als der wirt bat.
nuo musten fùr das palas,
wann die stat also vol was,
gawein vnd dirre ritten
glich an der selben sijten,
da die frauwen an saszen
zùschent zwein hohen straszen,
fùr ein cappel clein,
die hoch vf einem stein
gein dem palasz was gelegen.
gawein liesz nit vnderwegen
dar an sin alt gewonheit:
wa er fùr ein kirchen reit,
da erbeiszte er fùr vnd sprach
sin gebett, als auch hie geschach.
als er nü fùr die cappel kam,
einen sprung er zù der erden nam;
er nam auch sin swert in die hant,
ab dem haubt er den helm bant
vnd entdackte sich von dem ysin gewand.
hie mit er in die cappel gie.
den ritter er hie vor lie
vnd die knappen vor der tuer.
vsz den venstern hetten sich herfùr
die jumpfrauwen geleint
vnd warttent, was das meint,
das in die cappel gawein
so was gangen allein
vnd dirre was hie vor blieben.
vil rede sie der von drieben
vnder ein ander her vnd hin.
da sprach die jumpfrauw zu jn:
< jch kan ùch wol bescheiden
die warheit von jne beyden,
wenn ich mich ir wol verstan:
es sint zwen kauffman.
sie fúrent schatz vnd michel güt,
vnd ist das ein karger mút,
das sie als ritter varen,
da mit sie sich vor raub bewaren -
sust wöllent sie sin gewarnt.
ir malhen die sint starck vol,
auch siehe ich an den balgen wol,
das sie vol schatzes sint,
vnd mohte dis sehen ein kint,
das es nit ist sarwat,
wann es keinen klanck hat,
als es doch haben sold.
von silber vnd von gold
sint sie wol bestoszen.
maniger bygùrttel groszen
haben sie noch verborgen,
die sie mit groszen sorgen
helent by jne vil taugen,
vnd getùrstent sie sich eugen,
so füren sie nit also.
vwer auge schier gesieht,
was jne hynnacht geschiht.>
als sie die rede gesprach,
gawein gein den venstern sach.
als er widder was gegangen,
er vorchte sin belangen
sinen gesellen, das er eine beit.
vf sasz er widder vnd reit
jn die stat nach einem wirtt.
vnlang er sich jrtt,
bisz er die herberg gewan
da zù einem frommen kauffmann;
der schüff yme rijlich gemach,
daran jne nihts gebrach,
wann dirre bùrger
was so erber,
so frumm vnd so rijch,
das da sin glichen
jn der stat nit was gesessen;
vnd was auch vermeszen;
vnd stunt vnder dem palas
sin husz, das so hoch was,
das man das alles moht gesehen,
was darjnn kund geschehen,
wer es gern wolt spehen.
der jumpfrauwen waren zwa.
die eine marckte vil wol da
an dem libe ein iglichen gast.
jr hertz vmb die rede brast,
die ir swester hat gesprochen,
vnd hett es gern gerochen,
wann iglicher ir behagt.
sie sprach:< swester, das ir sagt,
das ist gar lùgerlich.
die geste sint vil vnglich
an ir fuore kaufflùten.
ja ir mögent wol raten
jr einen mit eren.
als mich noch kan geleren
min synn, so bedùnckt mich,
das ir vil manigen schönen stich
von jnen sollent sehen morgen,
vnd bin ich one sorgen,
den ir do zuo ritter habent erkorn,
ob jne ir einer mit zorn
bestat, er sij verlorn.>
sje sprach:< ich sal schaffen,
das du sollich claffen
von frommen rittern muost enbern.
wie getarstu iemer das begern,
das du noch sùllest sprechen
von tiost vnd von stechen?
wer hat dir das erlaubt?
bi disem minem haubt
wil ich dir werlich swern:
dwijle es dir nit heiszet wehrn
min muoterlin, so sal ich
also des erzùgen dich
mit manigem hertten zwigk
jn dem tage so dick,
bisz ich es an dir vertrijb,
das du mit keynem wijb
dich mere zuo strijde setzest.
du gebillest ader hetzest
mere denn ein frabeler kneht,
vnd ist das nit der meide recht.
die sollen swijgen al wege.
diese meisterlose pflege
jch licht vff dinen rùcken lege.>
< kinde sollent reden also kind>,
sprach sie,< die nit komen sint
noch zù iren vollen jaren.
da widder sollent gebaren
nach ir wijszheit die wijsen.
frauwe, wollent ir einen prijsen
vnd da by den andern scheltten -
das han ich vil selten
von edelen jumpfrauwen vernomen -
so sint ir in die aht komen,
der die spiellùte pflegent,
die sich der eren bewegent
vnd die dorch iren guoten mút
die lùte scheltent vmb ir guot,
des sie anders nit bestat.
jch wene, das ùch nicht getan hat
keiner diser recken.
min schirm muosz sie decken,
wöllent ir nit reden basz.
vwer mynne vnd vwer hasz
mögent mir nit erwehren das.>
dje rede ir swester swere wart
vnd sprach:< also tuot der hoffwart,
der billet ie me, so man jme stauwt,
wann er sich des mit al frauwet,
so er widder mag gebijszen.
also begynnet sich auch flijszen,
das sie steche, die pijn,
so man sie ymmer trijbet hin,
sie belige vf der vertt.
din muot ist nye so hertt,
jch hab dich snelle sin erzogen;
vnd wùrt din hohmuot bedrogen,
laszestu nit din klaffen sin.
es ist dick an dir schin,
das du vorchtlose bist.
dir sal der besem kein frist
noch von dinem rùck komen.
nuo hastu dich an genomen
einer solchen frijheit,
das minem vatter wùrt leit,
das man dir es e nit vnderseit.>
sje sprach:< frauw, den gewalt,
den ir zü mir haben gestalt
dorch vwere grosze herschafft
vnd solcher vngnaden krafft,
han ich mit wortten nye geholt,
wenn das ich das nit verdolt,
das ir ùch vbersprechent.
jch enweisz, was ir rechent
zü einem ritter, der nach prijse vert.
jch sal sehen, ob yme erwert
das velt vwer amijs,
fiers von arramijs,
der ùch morgen behaben sal.
jch wene, das yme werde wol
sin hochfart vergolten.
der, den ir da habent gescholten,
der sal min ritter wesen da.
yme gehilfft des nit sin scharff kla,
er músz vor yme vf den sant,
vnd werdent die griffe verbrant
von sinem fùwre so zú hant.>
dje rede sie ire swester nit vertrúg:
einen orslag sie ir slüg
von zorn, der was also grosz,
das ir von blüt hin gosz
beyde nase vnd munt,
da von sie wol dristunt
nidder viel vf das pflaster.
den schaden vnd das laster
muoste sie von ir dulden,
darvmb sie schulden
frauwen, ritter vnd meide.
dar vmb jr enwas aber nit zú leyde,
wann sie es gern leit.
die mere wart vil schier geseit
jr beyder vatter, loygamar;
der ylete dorch die tohter dar
vnd wolte die rede selber sehen
vnd verhören, warvmb der zorn were geschehen,
wenn er da von nie nihts hett vernomen.
darzùschent was die magt komen
mit dryen wijben herab
mit vil groszer vngehab
zù disem bùrgere
vnd wolte dise swere
hern gaweynen clagen
vnd endlich die red sagen,
das sie dorch sinen willen were geslagen.
byeinander vant die magt die drij,
die zwene vnd den wirt da by,
an einer heimlichen stat.
der wijber eins zü dem wirt trat
vnd bad jne, zu ir frauwen gen.
der wirt vnd dise zwen
snelliclichen vf sprungen,
vnd als sie zuo der túre drungen,
funden sie da vor stan
die reyne magt wolgetan
mit weynenden augen,
vnd verhal das vil taugen.
die enpfingen sie vil schon,
da widder sie zu lone
jr súszes widdergelt bot
vnd wart ie mittes vor schamm rot.
das tett ir nit vnnot.
als sie nuo die magt enpfingen,
miteinander sie gingen
herab in das husz sitzen.
die magt sprach mit witzen:
< ritter, lant ùch sin geklagt,
daz ich vil sere weynende magt
dorch uwern willen vil sere geslagen bin;
vnd ted das fursensephin,
min swester, in einem solchen hasz,
das ich ùch rümete vil sere vnd basz
denne ich jren frùnden ted;
vnd was dar an sted.
des han ich engolten;
vnd hett ich ùch gescholten,
so hett sie mir nuost getan.
nü wolt ich das nit vnderwegen lan,
jch liesz ùch des werden jnne.
jr sollent dorch ir mynne,
des bitt ich ùch vil tùre,
turnoys noch tyostùre
nymmer beginnen.
jch wil ùch gewynnen
hùt mit dem geding,
das ir morgen zü ring
vf auentùre min ritter sit
den turney vnd disen strijt
vnd rechent disen starcken nijt.
gewerent ir mich des, das ich beger,
ein cleinot sende ich ùch her,
so ich es aller best haben mag,
e denn morgens kom der tag.
vnd sint mit flijsze des gemant:
ein ritter kummt vf den sant,
der heiszt fiers von arramijs,
des hertz vert nach hohem prijs
vnd fuort eins grijffens cla.
wùrt er sùchend die sla
hinder dem rosz vber den sattelbogen,
so ist min wone nit bedrogen,
den ich an ùch gewant han.
her ritter, mag min bet fùr gan,
so scheid ich frölich hin
wann nach verlust frauwt sich der gewyn,
mer denn er da vor tù.>
gawein lachte dar zù
vnd sprach:< frauwe, wiszent das:
jch riche gern uwern hasz
nach uwer bet vnd, mag ich, basz.>
under dem als das geschach,
leygamar in das husz brach
hinden jn zü einem tor
vnd het das husz alles vor
bestellt mit huot,
das mit libe nach mit guot
yeman dar usz mohte komen,
es enwere yme alles genomen.
disen rat vnd disen synn
riete yme fursensephin
jre swester zü leid.
mit diser reynen meid
was der wirt vnd sine geste.
jr aller keiner weste,
was die rede were,
bisz das der bùrgere
jn dem hofe da vernam
mit gewapenter hant gemeinsam
sinen herren vnd die sinen;
doch erschein er in der pijne
nit in verzaglichem schijne.
gein dem houe er vast drang.
gawein als ein lewe sprang
vnd was der erst vor der tùre.
die ritter faszte er sich fùr:
mit dem swert, das er trüg,
vsz dem houe er sie slùg,
das er sie nye entwelen liez,
bisz dem wirtt ein frid verhiesz
sin herre graue leygamar.
da seyte er jne, das er dar
dorch niht anders kommen wer,
wann das ein achter
dar jnne were verspecht.
da sprach dirre gut kneht:
< nieman anders ist hie, wann als ir seht.>
als nü der frid vnder jne bestetigt wart,
da gerauhe dise galte vart
leygamarn vil sere
vnd die grosze vnere,
wann er hatt schier ersehen,
das yme vnreht was geschehen,
vnd gie zü her gawein.
er sprach:< ritter, disen mein
vnd die vil grosze vnzúcht,
die ich von gahes muotes frúht
an ùch nuo begangen han,
dar vmb lant mich bestan,
welche büsz ir selber wöllen,
wann ich an ùch, tùrer helt,
miszfarn han vnd nit an mir.
vwer gesell vnd auch ir
warent widder mich verraten,
vnd die, die den rat gaben,
die tadent es vmb einen hasz.
sie möhten mir han geraten basz.>
er vergab yne die rede da.
des wart leygamar fro.
er ging mit jne in das husz
vnd vant dar jnne quebeleplusz,
sin tohter, die cleine magt,
als sie iren kumber hatt geclagt
mit dryen iren wijben,
wann sie muost da blijben;
sie enmohte nit widderkomen,
als sie denn den strijt hatt vernommen,
vnd was also geseszen,
das sie ir hatt vergeszen.
als nuo leygamar sin jung tohter ersah,
er enpfing sie vnd sprach:
< suosze tohter, sage an,
was hastu hie jnne getan,
ader von wannan bistu kommen her?>
der rede wart berihtet er,
vmb welcher hand swere,
sie dar komen were.
da lachte er von der mere.
hje mit wart es gescheyden.
das kint mit jren meyden
widder vmb vf das husz gie.
gaweynen sie jren ermel lie
hie nydden zü einem cleynot;
da by sie bat vnd gebot,
das er by yme neme war
eins ponders in der ersten schar:
fiers hiez er von arramijs
vnd were ir swester amijs,
vmb den sie were geslagen.
wùrde der zu der erden getragen
von einem starcken vellesper,
vnd das er des were gewer,
so were ir cleynot wol gewant,
vnd solt wiszen, zù hant
jr mynne wùrd sin pfant.
also bleib die rede hie mit.
die geste nach ritters sitt
sich bereiten begunden,
so sie aller bast kunden,
vf dis ritterlich spiel,
wann ir was zu male viel,
die dorch der jumpfrauwen willen kamen dar,
dwijle sie ir vatter leygamar
wolte geben nach gemeynen meren
eymme, der der aller best ritter were
sonder alle widderrede.
nach prijse begunden streben
alle, die die mere vernomen
vnd von iren landen da her zú kamen.
zwen edele fùrsten vber mere,
die brahten ein michel here,
zloydas vnd yger.
cauomet von robie
mit richer maszenye
kam zú dem tornoy.
zwen brùder, pelde vnd effroy,
brahtent michel ritterschafft.
darùber kam mit groszer krafft
laamez von babilon,
der das zepter vnd die kron
truog da zu baldag;
vnd der, der da syrien pflag,
siner swester sun, aschalone,
der volgete disen vber mere;
vnd ein jùngling von syrie,
jr beyder mog, der was auch da,
der varuch was genant.
vor dem castel vf den sant
slüg man vff ir aller gezelt,
da mit wart ein michel velt
befangen vnd ein wijter ring,
wann da was manig jùngling,
die da alle an einem ring lagen
vnd einer campanij pflagen
von brudern vnd von magen.
ein vil michel amit,
das da breit was vnd wijt
von schilden vmb die geste
geslagen, das was veste
von wapen, das was miszlich,
vndereinander vil vnglich,
wie es ein gesind were.
cauomet, der more,
zuo wapen einen ancker fuort,
da mit er sùchen wolt den furt
an dirre jumpfrauwen;
so wolte sie erhauwen
mit einem swert melde,
das fuorte er zü velde
dorch ir edele mynne.
effroy nach selden gewynne
furte fortuna vf einem rad,
vnd das wart manigem schad,
wann er ritterlichen reid.
yger dorch bescheydenheid
ein sense fùrt, die was breid.
poydas, der jungeling
brahte auch an den ring
ein wapen, das gelobt wart:
das was ein richer lebart
vf zobel von harm gesnitten;
vnd alle, die mit yme ritten,
das selb wapen leiten.
einen adelar breiten
fuorte laamez von babilon,
der nach der megde mynne lon
mit sinen gesellen was verdaht.
aschalon ein wapen braht,
das was ein poy von gold,
da mit er sich wold
der megde in gefengnisz geben
beyde mit guot vnd mit leben.
varuch fuort ein olifant,
darvmb das sin eigen lant
da von deste basz were bekant.
jn der stat nuo manig ritter lag,
der ich aller nit genennen mag,
von miszlichem land,
die mir alle nit ennand
die fabel an dem buoch.
jedoch ich gesùch
jr etlichen dar usz,
wan man sal die goltgrusz
lesen usz den grieszen:
darvmb ich nit wolt verlieszen,
ob ich der namen nit enseit,
den doch vil grosser manheit
dise auentùre giht
vnd ire namen verswiget niht,
die von verrem dar waren komen,
als sie das hatten vernomen,
wie disem richen gelùbde was:
zwen gesellen von agardas,
hardifius und elymas.
ein wapen furten dise recken,
das ir muot solt entdecken;
sie zu velde brachten:
das was ein einhorn.
wie gar lijcht der wart erzörnt,
das hant ir vernomen e.
der grafe von bigame
vnd sorgarit, sin brüder,
die trugen die ruoder,
wann in dem mere was ir gewalt.
heymet, ein reck balt,
vnd darzu siner gesellen drij,
rayns, greyns vnd engrij,
die truogent alle den lewen.
ein reck guot, von ansgewen
mytarz, vnd cleyr von der voie,
der beyder wapen was der moie.
ein ander reck was auch da,
lorez von yassayda,
mit schoner companije.
baruz vnd enfrie,
mamoret vnd clamorz,
anfoyes vnd forducorz,
ludufis vnd ployborz:
djse waren sine gesellen.
wer nuo horen wölle,
was ir aller wapen were,
den sage ich dise mere,
als ich es in welsch gelesen han:
das was ein gar wijszer swan.
der andern was dennoch ein genuge,
der iglicher sin wapen trùg,
was yme aller bast zam,
wann diese gesellen von aram,
des hertzogen gesinde:
bryans vnd azinde,
anschoes vnd emerit,
roydes vnd meranphit,
fidelaz vnd jambruz,
samoris vnd saruz
skaarez vnd gymaret
clerdenis vnd sagarz,
neiliburz vnd azet,
malpordens vnd karet,
vamgainziers vnd pafort,
susavant vnd stiport,
finc de seminis,
agariz vnd gentis:
dise fuortent alle die flúge.
ob ich daran nit lùge,
was ging mich der mùwe not?
was mir ie die fabel bot,
darvmb wùrd ich nymmer rot.
nuo was es komen dar an,
das sich ein iglich man
zü felde solt bereiden
zù disen arbeyden.
an dem andern morgen
vil gar vnuerborgen
manig helt zufelde san,
der sin hosen schúht an
darùber sin schellier;
ein wammbeiz vnd ein collier
müst er haben dar nach:
hie mit was yme nit gach;
auch so muost ein halsperch wesen da by,
dar nach zwen knapen ader dry,
die yme die coyfen stricten
vnd das wapen also schickten,
das es yme were behend;
darnach an dem end
gehört fùr die brust ein blat;
was er icht an der ritter stat,
deswar, so muost sie da fùr;
des gewann er michel gefür,
ob er wolt stechen.
auch sal er nit zerbrechen,
ein wammes sal darùber sin
ader ein wapenrock sydin,
so fuor er wol in ritters schyn.
er bedorffte auch wol starcke spere.
was yme anders zü tyostiuwre gere,
so wart er versùmet niht;
vnd was sin rosz behende icht,
was darzü sin stael huot
beyde gering vnd guot
vnd gezieret mit einem kleynot,
so enwas niht mer not,
wann das er schild enpfinge
zü halse, vnd hinge
ein swert an den arm.
der kùnste nach des hertzen,
von dem mohte einen smertzen
ein tumber licht geuahen,
wolt er vf jne gahen.
nam er des schiltes jn
gein dem kinn, das were ein synn,
so moht er der erden
mit michelem vnwerde
zü teil gefallen.
nü laszen wir sollich kallen
vnd reden von jne allen.
djse helde zü velde trüg
ein müt, der was klug gnuog:
des waren sie snell bereit.
ein garzun ein mere seit,
ein reck were zú velde komen
vnd hett einen tyost genomen
widder einen stoltzen rabinis;
dem hatt er einen swachen prijs
an dem puneis gegeben:
er liesz jne vf der erden sweben
hinder dem sattel vf der sla,
daz er also hett geglunckert da,
das jne der wint nyrgent fuort,
vnd mit alle den fuort
hett begriffen vf dem sand
vnd vf druckenem land,
e er sin spere verswand.
quoykos, der more,
was jnneclichen swere,
als er die warheit vant.
sinen helm er vf sin haubt bant
vnd stal sich von gawein.
nuo kom ein ritter al ein
geslichen der geste
neben einer foreste;
der hatt geneigt sin spere,
yme was zuo tiostüre gere.
den hett quoykos ersehen.
vber velt ein tougen schehen
snell er gein dem recken nam.
der reck was von aram
des hertzogen geselle.
ein ritterlich vaelle
quoykos an yme schuoff,
das er gein des roszes huoff
vf den sant zù tale flog,
das jne der val also bedrog,
das yme der we sin krafft erlog.
eyn ritter den tiost ersah,
der vil leitlichen sprach:
< einen tiost han ich ersehen;
von wem sie aber sij geschehen,
des enweisz ich nit die warheit,
wann ich han in arbeit
die flug gesehen fùr war.>
nach diser rede kerte er dar,
da er die tiost ersehen hett.
malpardons vnd claret
den recken ersahen
vnd begunden beyde gahen
gein dem selben vber velt.
dar gein vf den selben gelt
kerte er sonder vorchten.
die spere sie entworchten
mit richer tiostùre;
da was mynne tùre
dorch hohes prijses stuwre.
noch enwesten die ritter niht
jn der stat vmb die geschiht,
wann es verholen was ergan.
nü bereiteten sie sich daran,
als ob sie wolten zü velde.
effroy vnd melde
kamen herusz mit glichen spern
vnd begunden tiostùre begern.
gein den was geritten usz
marmoret vnd barusz
von jren gesellen verholn,
vnd hetten sich zü velde verstoln
ob sie yeman da fùnden,
die jne der stat gunden,
da sie möhten an gewern
zwa tiosten vnd die spere verzern;
des funden sie an der stat.
da wart fortuna vnd das rat
vil rijlichen dorch stochen,
da widder wart dorchbrochen
der einhorn marmoret.
baruz auch das selb tet
melden vnd dorch stach das swert,
das jne der stael lùtzel wert.
jglicher vant, des er da begert.
dis vernam fiers von arramis
vnd sprach:< ich sol den hohen pris
an etlichem letzen
vnd sal jne gesetzen
gar gering von miner hant
hinder das rosz vf den sant,
der hie wenet gewynnen
myn frauwen zü mynnen,
der ich lang gedienet han
vnd nach vf dem selben wan
lones von der reynen beger.
so min schilt vnd min sper
wùrt sùchen das velt,
jch geswache etlichs gezelt,
des herre sich vermeszen hat,
wie er mich mit ritters tat
welle zü velde schauwen
vnd mins hertzen frauwen
wölle füren vber mere;
er vindt mich nit one wehre.
wie wijte sweime sin are,
wùrt sin min cla geware,
er zùht jne villicht usz der schare.>
dar vnder lieff ein garzun her.
< wa nuo ritter vnd sper?>,
rief er,< ich han gesehen hie
einen ritter, der ein sper gefie
vnd einen schilt zu halse nam,
jch wene, in einer tiost gezam!
er gebart wol desglichen.
sin are ist so rijlichen,
es ist laamorz von babilon.
wer nuo richer mynne lon
wölle enpfahen, der sùme sich nit.
ein poy rich vnd licht
haltet yme eneben by,
jch wene, das es der recke sij
de syria aschalone.
ein elyphant als ein sne
der schijnet by jne beyden da:
das ist varuch von syria.
wa nú, ritter! wa, wa, wa!>
der swan hatt die rede vernomen
vnd was mit dryen gesellen komen
geyn diesen vieren vf den sant.
ein tiost húb sich so zù hant
vil ritterlichen vnder jne;
sie wart aber ane richen gewyn,
wann die spere wurden vertan.
da kerte zú fride widder den swan,
wann jne wolt der lebart
versatzt han die widderfart:
das was der jung poydas,
der mit einem tropel was
an die lage geritten,
da von sie groszen kumber litten,
wann sie gar vbersahen
jr gesellen, die vil nahen
hielten in einer companije,
wann lydofuz vnd enfrye
pflagent der massenye.
als sie nuo ersahen ir arbeit,
zü helff vf die ponder reit
der einhorn mit zorn.
gein den hatt vberkorn
der ancker ein tiostùre,
cauomet, der reck tùre
von arabie.
mit einer storie
sie zu sammen hurten
die spere sie zerfuorten
an disem richen punaz.
forduchorz vnd ezdeis
erst ir arbeit enpfant;
da wart ir banir gewant
vil reht dar gegen.
da wart mit stichen vnd mit slegen
erhaben ein bataille,
da von die wiszen maile
die spere gar dorchstochen
vnd sich selbs zerbrochen,
vnd cleynod vnd die schilde
wurden zü teil dem geuilde:
des warent sie alle milde.
dar vnder erhuob sich ein rijlicher schall
von garzunen, darzu die floyten hal
lute mit dem tambure,
wann die recken zù dure
sich hatten verlaszen.
die lewen noch versaszen
dis spil vnd die scharffe sense,
wann heymet vnd greinsz,
rayns, egri vnd yger,
die funff hielten zuo wer
vnd zuo huot ir gesellen.
schier sah ein ritter vellen
zuo sonder tyost das swert;
der salden rat des selben gert,
des recken bruoder, effroy.
da muost sich der turnoy
gemeinclichen heben an.
vil maniger arbeit gewan,
e sich das spiel het verlan.
fiers von arramis sprach:
< ein red ist mir vngemach:
jch siehe dort den adeler
sweymen mit gewalte gar
vnd den ancker da by;
jch wene, jne des zu muote sij,
das sie nach tiost wöllen varn;
vnd möchte ich dem arn
beschroden sine wijte flùge,
ob ich jne gahes bezùge,
das gezeme mir von hertzen wol,
das ich auch versùchen sal,
mag ich es so berüchen.
auch sal der encker sùchen
den fùrt vf dem sand;
der poy mit dem elephand,
die sense vnd der lebard,
die werden nit me gespart.
wol dan, wir sollent vf die vart.>
eyn sper er vnder den arm nam.
man rief:< scheuelier aram!
hie kummet, der des aren gert!>
einer tiost wart er da gewert
von caamez, dem aren.
da dise beyde waren
kommen an des frieden end,
da worchten sine hend
den babilon vf den sant,
das der are das trucken lant
yme selbs fùr den luft erkosz.
da von cauomet verlosz
zü hant sinen richen mut:
er warf den ancker vf die flut.
dorch disen starcken widderwint
da enhaffte er niht in dem sint,
wann er was zu gering.
gern vf dem ring
reit fiers von arramis;
cauomet, den rabnis,
er mit dem ancker sand
zù druckem land;
da bleib er an der schand.
de syrie aschalone
tett die grosz schand we,
dem recken mit der poyen;
nitarz mit der moyen
gert er zù tyostùre;
der gewert der auentùre
den recken vil schier.
ein kostlich banier
er vnder den arm gefing;
ein tiost da erging,
die gar bald was geschehen.
da muost man die poyen sehen
gestreckt vf der erden ligen,
ein banyr kam zù gesigen,
die da beschutt den tegen.
fiers von arramis dar gegen
sinen gesellen zü helff reit.
vil groszen prisz er beieit;
das was quoikos leit.
er sprach zù hern gawein:
< sie rijtent alle one ir allein.
recke, warvmb tùnt ir das?
wie wollent ir der megde hasz
widder den helt gerechen?
sehent ir jne dort stechen,
slahen vnd vahen?
er ensal ùch nit versmahen.
er hat manigen da entworcht;
er ist gar vnerforcht
vnd grijffet vast mit sinem scharffen kla
vmb sich beide hie vnd da,
vnd mag nyeman widder jn.
ritter, wollent ir nit da hyn,
so wiszent, daz ich trurig bin.>
gawein ein vellespere begreiff
vnd nam einen vmbsweiff
gein fiers von arramis,
der vnder jne allen den prijsz
hett beiagt mit tiostùre;
vnd welhen er ergreiff, den verbrant er mit dem fùre
von sines speres end,
das dirre waltswend
hùnder dem sattel da bleib
vnd nydder zuo der erden scheib,
dar jnn sin kla die griffe nam.
zwentzig gesellen von aram
beschutten jne mit al,
doch so muoste er von dem vall
hern gaweynen bliben da;
sicherung bot er yme sa.
also wart verhauwen sin kla.
eyn garzun dar vnder lieff
vnd vast nach tiostùre rieff.
varuch mit dem elephant,
den stach nyder vf den sant
gawein an der stund.
darvmb jme nit enzùrnd
den grauen von bygame,
vnd tet yme sin schad we
vnd sinem brúder sorgarid;
der was yme des willen mid.
die beyde die ruoder furten.
zú hant sie jne ruortent
mit zwein wol starcken spern;
da muoste gawein gewern
den einen siner begirden;
vnd quoykos was der vierde;
der nam den eynen fùr sich.
da wart der zweyer ietweders stich
mit groszer kunst wol an geleit.
den prijsz vnd sicherheite
gawein vnd quoikos beiegten.
dje flùge da zú velde flùgen,
die manigen usz dem frieden zugen.
vf dem veld da vber al,
da húb sich ein michel schal
von speren vnd von swertten.
dise hie stechen begerten,
so raumten die zú vahen;
darnach sah man gahen
drij ader zwen da her,
die fürten schild vnd sper;
dar vnder lieffent garzun,
die banyer vnd truntzun
vnd cleinot truogent;
dise hie hart sere sluogent
mit kolben vngefuogen.
mit den sich gawein bewar.
da mit wart steende gar
sunder frid der turnoy.
leygamar von ansgoy
vngewarnet vf gaweinen stiess.
mit einem sper vf den griesz
warff er jn an der stund.
quoykos begunde
nach sicherung nöten;
nuo vorchte er sich zú ertöten
vnd bot sie yme an der stat,
wann clerdenis vnd azet,
die wolten an yme haben teil,
vnd das was yme zù vnheil
gar nohe da ergangen:
des wurden auch gefangen
sie beyde vnd ire gesellen zwen.
da von mochte nit ergeen
der turnoy, des múste er sten.
nuo der swan das erkand,
das der herre von dem land,
leygamar, were hin gezogen,
er kam vil snelle zú veld geflogen
mit zehen siner gesellen.
da sah man ritter fellen,
vahen vnd dringen,
vnd horte die swert klingen
vf schilde vnd vf helm,
vnd sahe den dicken melm
vf mit krefften stieben
vnd die schild zerklieben
von den krefftigen stichen.
dar vnder entwichen
den roszen ir kreffte,
vnd lagen die scheffte
vf dem velde zerstrauwt.
vil maniger wart vnerfrauwt.
e denn sich das spiel zerliez,
vil maniger vf dem griesz
von gaweins henden
nam vnselig gelende.
hie hatt der turnoy ein ende.
als nuo der turnoy zergangen was,
da sagde man vf dem palas
den frauwen die mere,
wie leygamar were
vnd fiers von arramis, der helt,
von einem recken uszerwelt
vf dem turnoy geuangen;
vnd wen er moht erlangen
mit sines speres ortt vorn,
der wer mit al verlorn;
der helt der were vnbekant,
vnd were so vmb jne gewant,
das jne nyeman kund erkennen
vnd auch genennen
an wapen nach an cleynot,
denn das er flamme rot
zú wapen vf swartz fùrt,
das man sie vil wenig spúrt,
vnd zù cleynot einen ermel wijsz;
dar an leyte er groszen flijsz
daz er yme wùrd zerhauwen;
hette er gedienet der frauwen,
die möchte jne gern schauwen.
da dise mere flursensephin
vernam, vor leid sanck sie hin
vmb iren vatter vnd vmb jren amis
vnd verstunt wol, das den prijsz
jr swester ritter hett genomen:
da von was sie so erkomen.
da widder was die clein magt,
von den meren, die man sagt,
gar freudenrich.
die zwa swestern vnglich
sich frauweten an den meren:
das die ein began beschweren,
des frauwete sich die ander dar an.
als nù dise rede was ergan,
gawein zù herberge reit
mit vil groszer richeit,
vnd quoykos der britun.
spiellùte vnd garzun
volgete yme ein menige mitt,
als es ie was ir sitt
dorch den vil richen gewynn.
da hiesz gawein vnder jne
die gewonnen rösz teilen hyn.
dje ritter alle widdervmb ritten
jn die stat nach gemeinem sitten
vnd schuoffent da ir gemach.
nach eszen vnd rede geschach
vmb die gefangen vber al.
von dem castel herab zü tale
kam der wirt grafe leygamar
vnd mit yme ein riche schar,
die gawein al gefangen hett.
als es nach dem recht stet,
wart es da verendet:
die zwen wurdent gesendet,
leygamar vnd fiers von arramis,
der cleynen megde in solcher wijse,
das sie mit jne ted,
wes sie ir hertz bed.
die andern wurdent dem wirt geben,
des muoste er ymmer me leben
one aller armuot,
wann sie yme so groszes guot
gabent da zü losung,
das es kein zung
mohte wol furbringen.
nùwant, als nah ist, gedingen
mit yme moht ir iglich:
was er arm ader rich,
so muost er geben desglichen.
des morgens wart yme die meit
vmb die auentùre geleit;
das was erteilt vil gar.
der vrteil grafe leygamar
volgete, das er gern tet.
da begerte mit reht vnd mit bett
gawein von jnen allen,
das jnen das solte wol gefallen,
das er sinen gesellen,
der wol mit ritters ellen
zú rechter mannheit erschin,
mit irem willen gebe fùr jne;
zü dem were sie wol gewant:
er hette bùrge vnd lant
vnd were stete an einer stat.
gawein des so lang bat,
bisz er sin gewert wart.
da wart mit groszer hochuart
ein hochzijt besprochen,
die werte ein wochen.
das wart nit zerbrochen.
da dis alles was getan,
gawein schied von dan
vnd kerte sin strasze;
das was jne one masze
zú anschoy mit truwen leit.
gawein gein einem wald reit,
der was dick vnd lang;
dar jnne horte er suszen clang
von jegern vnd von hunden.
nuo hette er gern erfunden,
wer da were an dem gejegde.
ein ruhe wegscheide
er yme selbs dorch den walt nam,
bisz er vf die spür kam,
recht da dis wilt was
entworcht vf einem schönen grase.
wol zwentzig ritter vant er da
vnd einen herren, der was gra.
jne hatt nit bedrogen die sla.
geyn gaweinen sie gingen
alle vnd enpfingen,
also bald sie jne ersahen.
nach dem enpfahen
baten sie jne erbeiszen;
des enwolte er jne nit verheiszen,
wan daz er jne gnade seite,
vnd mit der rede von jnen reyt
einen weg, der usz dem wald gie.
an jrem gejegede er sie lie.
schier was er komen vf das velt,
da sah er gar ein schön gezelt
vf einer breiden auwe;
dar jnne was ein frauwe
vnd vier megde schöne,
die hatten von der heyde
frische bluomen darjn getragen,
als ich das buoch horte sagen.
die was dorch den meyen dar
kummen, wann ir leben gar
was zu freuden gestalt,
vnd was gar in ir gewalt
der welt freude mit wonsch gesalt.
dje frauwe ein göttinne was
vnd was kùnig artus base
vnd truog die riche krone
da zü der aualone.
enfeydas was sie genant.
vil schier sie gaweynen kant
von ferren her vf dem veld.
als er nuo von dem gezeld
sinen weg ab kert,
da mit sie jne ert,
sie stund vff yme engegen
vnd enpfing rijlichen den tegen.
von sinem rosze er ab sprang
vnd sagde ir vil groszen dang
des gruoszes, den sie yme bot,
wann er muost iren munt rot
kuszen an der stund
mit willigem gund,
des sie ir hertz schund.
darnach sie nydder gesasz
vnd sprach:< ritter, wissent ir das,
das ir min naher mog sijt?
mich dùnckt gar lang sin die zijt,
das ich ùch je gesah
sitt dem male, daz mir das gros leit geschah
an mynem brùder vtpandagron,
fùr den nuo der sùn die kron
artus zü brytanien treit.
jch sage ùch, ir sint gar verclegt:
sie wenent ùch alle dot sin;
dar vmb hat ein jamers pijn
das gesind vmb vwern willen befangen,
vnd sint abgangen
der kùnig vnd die kùnigin
vnd die gesellen mit jne.
jr freude, die sie solten haben,
die ist so gar begraben,
dwijle ir zuo houe nymme pfligt,
vnd hat die clage so gesigt,
das sie der freuden obgeligt.
darzu wil ich ùch mere sagen:
vch begynnet der weg zù tragen
zuo einem castel nahe hie by,
das ist geheiszen karamphi;
da gewynnen ir vil grosze not,
aber ir geligent dennoch da nit dot
des sint gewarnt von mir.
jch riet ùch aber ee, vnd wolten ir
mir volgen vnd dem rate,
das ir e nach vil spate
suochtent nahtselle anderswa,
e denne ir nach hynaht bliebent da.
wöllent ir anders nit bliben
hie by vns wijben,
wenn ir freyse gewynnet?
vwer hertz aber synnet
zù freise, die es mynnet.>
hje wart nit me gerett.
mit vrlaub gawein von dannan reit
sin alte strasze wie vor.
die vorcht beswerte jne nit me
denne die liebste mere,
ob yme das geseit were,
nuwent dz jne beswerte das,
das beyde nijt vnd hasz
die freude hette beseszen,
die artus, der vermeszen,
mit sinen gesellen vobete ie,
daz er die dar vmb lie.
die freise vorchte er zú niht
vnd die angstlich geschiht,
das yme was geseit vor.
snelle reit er die selb spor,
bisz er zú der brùcken kam an das tor.
da wart er jngelaszen.
oben vor dem thurn saszen
ein getwerg vnd ein meit;
sie spieltent mit behendikeit
schochzabel vf einem brett.
gaweins sie wol war tet,
als man jne in geliesz.
mit groszem flijsze sie jne hiesz
jr da wilkom sin.
darnach tet sie yme schijn,
das ir der grúsz von hertzen ging.
einen samit mantel sie gefing
vnd des selben ein surcot,
der was licht vnd rot,
vnd hiesz sin sarwot
jn ir kammer an ein stat
dis twergelin legen
vnd jr gewarlich pflegen
vnd hie mit kleyden den tegen.
ir gebot müst daran ergan.
mit dirre megde wol getan
er vf fùr den thurn gie,
wann sie jne des nit herlie,
vnd spielt mit yme das selb spiel.
darvnder retten sie viel
vnd gaben rijliche zabbelwort.
nement war in dem walde dort,
als gawein die ritter vant,
vnder jne was einer, der jne wol kant,
der des alten herren suon was:
von karanphi angaras
hiesz er. da er sich bedoht
der rede, er nyemans jnne braht.
er ilete usz dem wald von dan
vnd mit yme sine man,
zwolff ritter, guote helde,
gein dirre nachtselde,
da er sich gaweins versah;
da von gewann er vngemah
vmb altschuld, die da geschah.
eyn alt sprichwort giht:
< alt schult lijt vnd rostet niht.>
das wart hie wol schin,
wann gawein hatt den bruoder sin
jn einem turnoy erslagen.
das was vor hin manige tage
geschehen, da er was ein kint,
vnd wart yme die mere sint,
da er gewuochs ze man, geseit;
darvmb er yme nach ieit
vnd wolt jne gerochen han.
mit frage er sùchend began,
wa er erbeiszet were.
schier sagde man jme die mere,
daz er were zuo karanphij
jn dem huse da by
vnd wolt die naht bliben da.
der rede frauwete er sich sa
vnd satzte sich vf die rehte sla.
uil gering was er komen dar
mit siner ritterlichen schar,
vnd kamen vngewarnet vf jn.
das was gar nohe sin vngewynn
worden, wann die reine meit,
die an der helff nit verzeit.
als sie sie zu lauffen sah,
vil gering sprang sie vf vnd sprah:
< wehrent ùch, ritter, anders ir sint dot!>
zu dem bruder vmb die selbe not
die jumpfrauw zü hant lief,
mit den armen sie jne vmb swief
vnd liesz jne nit von der stet.
nuo herwuschte her gawein das schochzabel brett
vnder dem zü wehre,
wann in der jumpfrauwen gewehre,
was sin swert vnd sin sarwat.
an die ritter er mit al trat
vnd nam sie fùr sich zü slag.
er tet nit als ein zag,
der da flùhet ader schirmes ist geuag.
usz einem palas slug er sie;
darvnder maniger enpfie
bùlen vnd wonden,
den angaras gesund
jn das husz bracht hat.
die jumpfrauw seymeret
die thüre hinnach zú slùg
vnd mahte sie vest gnuog
mit rigeln vnd mit sloszen
vnd liesz jne da nit mer sten.
vf den thorn hiesz sie jne geen,
vnd gie sie mit yme daruff,
wann ein groszer zulauff
wart in dem huse fùr die thùre,
vnd rieffen widder vnd fùr:
< waff vber den mörder!>
als nuo angaras die mere
vmb sins bruoder dot gesagt,
jedoch so was er vnuerzagt.
darzù troste jne auch die magt.
grosze baume sie gefingen,
damit sie alle gingen,
als jne gebot angaras,
an die thùre fùr den palas
vnd woltent sie vf brechen
vnd an dem gast rechen
vil gering jres herrn zorn.
da was die arbeit verlorn,
wann vnder des sin vatter kam.
da er die mere vernam,
des gewan er einen sweren muot,
als ein frommer wirt tuot,
der vmb des huses ere
achtet vil mere,
denn er vf den schaden tü,
vnd der trùwe hat dar zù;
der bedenckt das abents vnd frú.
nuo muost angaras laszen den strijt,
vnd wart der hasz vnd der nijt
also da gescheiden
vnd verendet vnder jne beyden,
so daz er des swùre,
das er yme gar erfüre
jnnerthalb einem jare
gar one alle geuare
das sper vnd den richen grale,
ader da widder zü dem andern male
jn die gefengnisz keme;
das er der eins neme,
welches er der wolte.
dwijle es so wesen solte,
er gelobte es mit truwen.
also began sich da nùwen
richer freuden manig spiel,
vnd wart der gelùbde ziel
zuo iar vnd zü tag geleit.
da geleitet jne ab die reyne meit
seymoret, als ich vor seit.
sin wart da gepflegen wol,
als man lieben gesten sal
tuon von einem frommen man.
des morgens frùw reit er von dan
vnd stalte sich zú wege.
bald kam er, da ein gelege
was gewesen vf einer heyde.
da vand er zwa meyde
ob einer frauwen weynen,
die er vnder jne leynen
sah in ir einer schosze,
vnd hatten marter gros,
wann sie mit al dot schein.
nuo fragde sie her gawein,
was sollich clage were,
vnd bat yme ir swere
zù erlösen vnd zu sagen.
sie sprachent:< ritter, das wir clagen
das bringen wir ùch zü end,
ob vns got ieman sendt,
der sich darnach wendt.
dje frauw, die hie dot lijt,
die was zü einer hochzijt
her komen mit ir amis,
vnd hatt zuo male groszen prijs
hie mit ritterschafft beiagt.
dwijle es hint morgen tagt
bisz nuo an dem lesten,
da kam von den gesten
ein swartzer reck geritten her,
der fuort ein vngewones sper,
das was ein claui breit,
die zü beiden sijten wol sneit,
wann ir stael was spiegeluar.
des wart min herre gewar.
wenn er fridens nit engert,
der tiost er jne gewert,
als er manigem hint hat getan.
da nam jne der swartz man
gein dem hertzen vnd stach dorch jne
vnd hat jne leider also hin
gefurt sonder vnsern dang,
als er jne von dem rosze swang
mit der glauien, die was lang.
uon dem leid ist sie dot gelegen.
nù helffent vns, edeler tegen,
das wir sie heym bringen,
wir mögent gar ùbel ringen
mit einem toden wijbe.
das willen wir mit dem libe
verdienen iemer mere,
vnd wöllent vwer ere
darvmb iemer breiden,
das ir zu den arbeiden
vns wijben helffent so vil,
das ir ein vil kleynes ziel
sie fùrent der heyde.
so geen wir mit ùch beyde
zuo fuosze, die wijle wir mùgen,
wann es vns nye zuo disen zùgen,
edeler ritter, mere kam;
des muoszen wir sin sorgsam.
frùden ist vns und recht freude gram!>
nuo erbarmete jne der megde bet,
darvmb er iren willen tet
vnd nam das dot wijp fùr sich.
gein sinem wege den rechten strich
vber die heyde er gein dem walde kert
vnd hette die reise gern gewert,
hette er getorst.
als er nu kam fùr den forst,
er fragde die meyde
bi einer wegscheyde,
welchen weg er solt keren;
den begunden sie jne leren.
da hin kerte er mit jne,
als jne beste sin synn
den weg beleiten kund.
vnder des sich begund
das dot wijp rùren
vnd vffrichtig fueren
jr lip vnd ir hend;
vnd brach das gebend
von irem haubt vil schier
vnd alle die gezier,
die an iren cleydern vor lag.
gawein da von erschrack,
als man von toden tuon mag.
er liesz sie nydder vf das gras,
da ir clage vil iemerlich was
vnd rieff jne vil dick an;
sie sprach:< gawein, minen man
möchten ir noch rechen wol;
er brynnt dort als ein kol,
vnd habt der ritter by jme da.
dirre weg vnd dirre sla,
die treit ùch reht zu jne.
darzü ich uwer geleit bin,
wellent ir ùch nuo erbarmen
vber mich vil gots armen
vnd ùber disen groszen mort.>
als sie nuo vol gesprach das wort,
sie viel nydder vnd schre
vnd batt ir hart wesen we;
darzü zerreisz sie ir gewant
vnd warff ir beyde hand
gar gering zu irem hare;
mit vil groszer vare
began sie sich rauffen fùr ware.
darzu die zwa meide
mit groszem leide
beyde clagen begunden;
jre hende sie wunden
mit jemerlichem sere
vnd hatten manig kere
vber ir frauwe, da sie lag
vnd dirre groszen clage pflag;
der waren sie beyde ir gewet.
ein clage ietweder ted,
der ir wol was zú prijsen.
kleyder vnd risen
sie von dem libe zarten,
gar wenig sie sparten
jre brùste vor hertten slegen;
es bleib auch nit vnderwegen,
es wùrd ir langes vales hare
vsz der swartten so gar
geraufft vnd vervellet
vnd ir antlid geschwellet
von vngefùgem weynen.
wie sie das kundent gemeinen,
das begunden sie bescheynen.
nü erbarmeten jne die schönen wijbe,
das sie ire mynnecliche libe
so verdarbten vnd kolten
vnd sich des nit enwolten
mit icht gemaszen.
er batt sie es laszen.
das enkund nit verfahen,
dwijle sie jne sahen
daran also strengen,
das er nit wolt hengen
jr bet, der sie baten.
nuo mohte er nit geraten:
er muoste ir bete volgen,
wann er was ie erbolgen
reiner wibe vnselikeit,
vnd was ir leit sins hertzen leit.
wa er das moht verswenden,
dar nach began er wenden
lip, synn vnd muot,
darzuo hab vnd guot,
wann er was noch eren fruot.
wann er des nit moht enbern,
er muoste sie ir bet gewern.
sin mùt jne des nit herliesz.
er gie zù jne vnd hiesz
sie swijgen: er wolde,
wa er möhte ader solde,
jren amis gern rechen,
das sie nuwen wölde sprechen,
wa er die stat fùnd,
da er den ritter kùnd
vf solcher auentùre ersehen,
von dem der mort were geschehen.
des began sie yme mit freuden jehen.
als er nuo die rede hatt getan,
die frauw began ir clage lan
vnd mit ir dise meyde.
da wart von dem leide
nach freuden gestelt ir mùt.
wa salden gunst also tùt,
da ist ir wandelung
mit gar gemeiner zung
zú loben vnd zuo eren;
wa sie beginnet keren
freude an das winster teil,
da hat sie das vnheil
zu nahe gesellet zuo ir.
des müszen vil dicke wir
nach vngnaden enpfinden;
darvmb múszen swinden
mit vnfreuden vnser tag,
vnd leben mit jamer clag,
als ich nú von den frauwen sag:
unfreud verlosz da rijchen gewyn.
vf stunden sie vnd gingen hin
an die stat, da der ritter lag,
vber den dirre mordes slag
was ergangen da vor.
ein ritter swartz als ein mor
hilt ob yme, da er bran.
der selb mor hatt an
ein clein lichtes ysin gewant
vnd hatt in der rechten hant
ein clauie, die was breit
vnd wol zü beyden sijten sneit
als ein wol snydend scharsach.
ein liehter schin da von brah;
luter als ein spiegelglasz
die farwe von dem stael was,
wann er was schon vnd hertt.
des ritters gefert
was noch zorn gar gestalt.
sin wapen was swartz einualt.
gawein nit mer entwalt.
er sprach:< reck, sagent mir,
ob ir wellent, warvmb habt ir
den edelen recken erslagen,
den ich mit truwen höre clagen
die frauwen, die mit mir geent
vnd hie gegenwirttig steent
vnd zijhent ùch mordes daran?
deswar, vnd hant ir das getan,
so haben ir miszefarn,
wann mort vnd schoch sal man sparn
dieben vnd raubarn.
es sal ùch nit beschwern,
ob ich daran niht ware sage,
wann also hat mir die clage
kunt getan von disen frauwen
vnd sich nye verhauwen
mit solchem vngewonem ritters sper
des sint gewesen ir gewer,
sit ir es habent braht her.>
< mort>, sprach er,< her guot knecht,
als ir selbs von mir jeht,
das zeme vbel eime tegen.
des wil ich nymmer gepflegen.
dwijle ich es aber bin angeseit
von der frauwen, die hie kleit,
vnd sie des einen gewiszen kempfen hat,
so wil ich mich der missedat
bereden, als ein ritter sal.
des kan ich vnd mag es wol
volbringen an dem libe,
e ich also blibe
von ir in der inziht.
vil dick kompt von geschiht,
das ein ding miszratet,
wùrt es nit e bestatet
an dem haubt denn an dem drum;
auch wùrd es vil manigem frùm,
ahtet er sin ding mit wijszdum.>
er sprach:< ir hant war gesagt.
jr leit hat sie mir geclagt.
mag ich, das wil ich rechen
vnd wil es nit zerbrechen,
wann ich an ùch han gesehen,
des mordes were nit geschehen,
daz weisz ich nú, von keinem sper,
hetten ir die glauien her
nit braht vf des heldes dot;
da von hat er die grosze not
erlitten; das ist mordes gat!
darvmb sij ùch an der stat
vmb sinen dot widder seit,
wann ich wil die arbeit
dorch das reht vil gern lijden
vnd wil das nit vermyden,
sie músz auch mich zersnyden!>
hie mit múst ein tiost ergeen.
vf ein ander dise zwen
mit groszem zorn ranten.
vil glich sie wanten
die spere vf die rende,
vnd ietweders hende
leiten sie mit vare.
gawein vil vngeware
sinen stich da an leit
von dem kynne zweyer finger breit
herab gein dem rande,
da mit er jne zu dem sande
also dot sande.
ein michel wonder da geschah:
da das blut usz der wonden brah
vnd vf an das spere sprang,
ein flamme sich da von erswang
vnd began mit vil groszer krafft
zú hant brennen der schafft
von so lichtem lauge,
das nye kein auge
keins lichtern enpfant,
bisz vf gaweins hant.
da mit der ritter auch verbran
vnd was er harnaschs ane
hett, vnd sin rosz da mit.
wie wol die glauie schnit,
jr verbran stiel vnd stal
so gar zú dem einem mal,
das sin nit was blieben
vnd das man es moht zertrieben
han als ein dùrres stro.
des wurden dise frauwen fro
vnd danckten yme alle da.
sie begunden sich hart frauwen
der rache vnd mit al stauwen
an ymme alles jamers mút,
als ein fro hertz tuot,
das leides gar vergiszet.
als ir selbs wol wissent,
wie der wandelung ist,
also hett hie in kurtzer frist
sich verwandelt ein iamers last,
das vnfreud ir hertz brast,
vnd wart da ein fremder gast.
gaweinen des michel wonder nam,
daz jne freude nuo so wol zam,
die sie e widder saszen.
er batt sich wiszen laszen
die megde bisonder
dis vil grosz wonder
von dem ritter vnd von jne,
wann es enkund sin sin
mit niht wol erfinden,
das er sah vor yme swinden
die ritter in dem fùwre.
nuo ersùfftzte vil tùre
die frauwe vnd sprach:
< jch sage ùch, von wannan dis vngemach
den rittern von erst geschach:
eyn geschlecht het sich verworcht,
wann es gott nit enuorcht
dorch ir grosze hochfart.
darvmb dis erteilt wart
von götlicher magenkrafft,
das sie mit solcher ritterschafft
solten gar ein end geben
jr gar vbeltetiges leben.
darzuo waren sie geborn
vnd were mit al verlorn
beyde sele vnd lip dar an;
vnd was dirre swartz man
darzù geordent von gott,
das er was sin fronbott
vnd ir aller wissenere;
dem was es gewere
von dirre clauien.
des moht sie nit gefrien
keinerhand helff nach trost,
das sie des wùrden erlost,
sele vnd lip enwùrden eintost,
nùwan, helt, als ich ùch sage;
vnd mohte jne mit speres bejage
kein reck gewinnen
zù velde von vnmynnen,
der des geslechts nit enwere:
so hette die grosze swere
ymer mer ein end.
nuo haben uwer hend
dise selikeit erhauwen.
des wùrt ùch von frauwen
vnd von manigem edeln tegen
gewùnschet der gottes segen,
wann ir hant dis lant,
das ie was des todes pfant,
erlöset mit vwerm lib,
da von mir armen wib
michel lieb ist geschehen,
als ir selbs habent gesehen.
noch wil ich ùch mer jehen:
es was lang gewijsseit,
das dis werende leit
so lang weren solt;
ob das got iemer wolt,
das gawein keme in dis lant,
so wúrd es von siner hant
erloset one allen strijt.
nuo ist es gar manig zijt
jn dem jamer gestanden,
das her usz fremden landen
gar manig recke ist komen,
dem hie der lip ist worden genomen
vnd dem vil gar missegie,
der auentùre suochte hie,
bisz ytzo, das wir nü sint erlost.
vch hett got her zú trost
disem land gesendet;
des ist vns vnser leit gewendet,
vnd hat heil hie gelendet.
ich wil das glauben wol,
was ieman geschehen sal,
das das alles geschiht.
vns enmöhte manig reck niht
erlösen von der arbeit.
nùwan von uwer mannheit
sint wir erlost, das wolt got.
jr sint sin gewiszer bott,
vnd het ùch dar zu erwelt.
jr sint es, gawein, der helt,
das weisz ich nuo fùr war.
mit freuden muszent ir iemer gar
one aller hand kumber leben,
als ir vns freude habent gegeben,
die vns vil lang was herwehrt.
nuo sint wir von ùch ernert
vnd alles leides behert.>
gawein hersùfftzete tùre
dirre groszen auentùre,
die yme da wider fuor
vnd der clegelichen fùr,
die er horte von den wiben.
er mohte nit bliben
by jne lenger an der stat;
von jne er vrlaubs bat
vnd gab jne mynneclichen segen.
sie baten sin got pflegen.
da mit er von den frauwen schied.
vf einen weg er geried,
der jne gein dem wald trúg,
der was geng gnúg.
daruf er die spor sluog.
gar gering kam er in einen walt,
der dick was vnd kalt
von baumen vnd von schatt;
dar jnne fing er einen pfat,
daruf er sich zue hant liesz.
vf einen ritter er gestiesz,
der vnder einer linden lag,
des auch ein jumpfrauw pflag;
jn der schosze lag er.
da was weder schilt noch sper,
wann ein pfert was zú jme gehefft.
jn vil groszer vnkreffte
schein er, als man von uszen sahe,
vnd was dis vngemah
von einer groszen wonden,
die was yme vngebonden.
da von was er ersiegen
des bluotes vnd der krafft verziegen.
also vant er den recken ligen.
ir sollent auch wissen das:
lohenis von rahas
was der ritter genant.
vmb jne was es so gewant,
das er es vf rache ted,
das er da lag an der stedt,
vnd sage ùch, von wannan die red kam:
er was gawein gram
vmb ein cleine sach,
die ich ùch kunt mach
gering an diser stund.
er was zü der tauelrund
huszgenosz vnd geselle;
da verdiente er die kelle
von einer groszen vnzucht,
die er von der mynne frucht
an einer megde beging;
dar vmb jne gawein fing
vnd hiesz dorch die miszedot
nach des gesindes rat
búszen, als der sitt stat.
eyn sitt in dem houe was,
als ich in dem buoch lasz,
der was also veste
vnd was dorch die geste
allermeist herdoht vnd funden
vnd auch dorch die kunden,
als es zame der krone wol.
der was allewege vol
edeler megde vnd frauwen.
wer die wolt schauwen,
heimlich ader taugen,
das was sunder laugen,
wann sie sich wolten ergan,
das wart jne nit verfahen
anders denn zú guot.
wes jne da was zú muot,
das was sonder huot.
und sage ùch me da von:
die megde waren des gewon
vnd was das da noch ir sitt,
das ein magt einem ritter mit
wol ein gantzes jar reit,
das sie kein wirdikeit
da mit an jren eren verlosz.
ob sie ir selber nit enkosz
vnd in ir mynne wert,
ob er ir so begert,
das ir die frùntschafft behagt,
so wart von yme die selbe magt
vber jren willen bezwongen niht.
ob er ir darùber icht
ted von keiner hand zwangsal,
also das die mere von yme erschal,
er wart zuo acht getan,
vnd beyde guot vnd man
wart yme widderteilet,
vnd wart vf jne gefeilet
das rich vnd die kron,
vnd muoste vil vnschon,
so er ymmer begriffen wart,
vmb dise vnmeszige hochfart
jn der kellen sin verspart;
es were auch, ob das erging,
das ein ritter gefing
nach einander one quale,
das er zü keinem male
verfelet niht dar vnder,
zwentzig ritter bisonder,
der jne lösen wölde,
die man der meide zú solde
fùr ir laster solte geben,
das sie mit guot vnd mit leben
solte tuon, wes sie gelùst,
sonder alle akust.
er muosz aber selber das lant
rumen sùben jar zù hant.
so muosz er ir mynne pflegen,
ob sie mynnen wöld den tegen,
yemer mer bisz an iren dot.
fùr der notnunfft not
die buosze kùnig artus gebot.
nue hatt von rahas lohenis
vil hart grosz vnprijs
begangen an einer megde,
die er vf einer heyde,
da sie mit yme reit, bezwang
vber iren willen vnd sunder dang.
die notnunfft die schöne magt
dem kunige da zú hofe clagt,
wann er was gesind da.
da ving jne gawein sa
vnd warff jne in die kelle,
das er der hunde geselle
dorch die vnzuht were.
mit kumber vnd mit swere
was er viertzehen wochen
dar jnne belochen:
das wart nit zerbrochen.
dje ritter hatten alle,
deswar, von sinem valle
vnd dorch die magt wol geborn
zue lohenis hertten zorn
vnd michel vnmynne.
des lag er dar jnne
vnerloset so lang
jn dem hartten gezwang,
bisz jne gawein zuo lest
usz der schanden gruntfeste
loszte, als ich han geseit.
da versprach jne die schöne meit,
von der wegen er leit die schand,
vnd müste von dem land
vnd von dem houe keren
mit michelen vneren.
da wart die huszgenozschafft
yme versagt von der ritterschafft
vnd von des kùnigs magenkrafft.
dis was gewesen sùben jar,
das jne die tugentriche schar
vsz ir geselleschafft verstiesz.
das leit er nymmer mer verliesz
vsz sinem hertzen kummen.
als er nú hatt vernomen,
das gawein da were,
das leit vnd die swere
wolt er an yme gerochen han.
da getorst er sich nit wol daran
keren zuo offenem strijte;
wann ein wunde wijte
hiez er yme mit listen machen,
jch enweisz von welcherhand sachen,
an yme, das sie sinic was,
vnd hiesz sich dar vf das grasz
fueren vnd zuo dem wege legen,
da gawein, der kuene tegen,
hin fùr rijden solde:
dar vmb, daz er wolde
sich rechen, ob er kund.
mit listen er begund
werben an der stund.
als jne her gawein vand,
den recken er nit me enkand,
wie lang er jne hett angesehen;
das was nuo dorch den zauber gar gescheen.
nuo erbarmete jme sin sere
vnd ie doch vil mere
der jumpfrauwen weynen,
die yme began bescheynen,
deswar, vil grosze truwe,
wann sie vil grosze rùwe
erzeigte vmb sin not.
da wande er jne wesen dot
vnd kerte sa zuo yme basz.
lohenis von rahas
zu yme mit vntruwen sprach:
< gawein, mins vngemachs
lant ùch erbarmen dorch got,
wenn ir mich gar sunder spott
vil wagen zú dem tode seht.
nuo tuont als ein guot kneht,
an dem man trùwe speht.
erbeiszent zu miner wonden,
die ist nach vngebonden,
vnd helffent mir sie binden.
ob ich noch mùge enpfinden
dheynes lebens trost an mir,
edeler ritter, so tuont ir,
des ir lon von gott enpfahent,
vnd von dem rosz her nydder gahent.>
als er die rede hatt getan,
sin rosz haffte er by yme an
vnd knùwete vf das grasz fùr jne,
vnd als jne zum besten sin synn
lerte, darnach er jne bant,
vnd wolt da mit so zú hant
sinen weg widder sin geritten.
nuo begund er gaweynen bitten
mit vil iemerlichen sitten.
er sprach:< gawein, tùrer helt,
aller tùgende uszerwelt,
erzeigent mir vwern gewonen sitten
vnd lat der bet, der ich bitt,
mich werden von ùch gewert,
wann wes man ie an ùch gegert,
des haben ir selten ieman verzigen.
jch muosz anders schier dot ligen,
wenn ich enmag nit genesen.
lant ùch dorch got befolhen wesen
die schöne emblien,
min vil liebe amyen,
vnd fùrent sie mit ùch hin,
so bald ich begraben bin.
jch engan ir nyeman also wol,
dwijle ich ir nit haben sal,
deshalb sie ist ùch edel vil;
daran ich ùch nihts hil:
jr vatter was kùnig emil.
eyner andern bed ich auch beger,
sit ùch got hat gesant her
mir zü gnaden vnd zü trost,
dorch gott, der ùch erlost
vnd alle die cristenheit,
das ir mir die icht verseit,
das ich enpfahen muesze
die gottes spise suesze,
sinen waren lichnam,
e mir der dot freisam
min hertz ab brech,
die wijle vnd ich sprech.
wann man sagt, daz hie by
ein einsiddel wonend sij,
vnd der auch ein priester ist.
dar sin wir in kurtzer frist
komen; lijhent mir das rosz dar,
das bringet ùch widder fùr war
min amye, des sint one angst gar.>
gawein als ein gewissen man
der bett yme versagt dar an
mit micheler fuoge,
als doch nú genuoge
vil vngern taten.
< ez mohte mir licht gestaten>,
sprach er,< die rede, die ir tut;
vnd were min rosz so gut,
das nye keins beszer wart,
hette ich geleistet min vart
vnd werent ir denn by mir,
so ted ich gern, was ir
daran zù mir wolte,
als ich von reht solte;
sust ist es vnbetlich.
ein iglich ritter mins glich,
der dorch prijsz suchet die land,
dem tauge nit sin ysin gewand,
als er zü den fuszen sùchet den sand.>
sprach lohenis:< dwijle das nit mag gesin,
so habent daran gnade min -
dorther rijtet ein acker kneht -,
das ir mir dorch das besehent,
ob er mir sin runtzin
welle lijhen dorch uwern pin,
das man mich dar bring;
so ist min geding,
das ich nach vil wol genese,
ob ich von dem einsiddel wese
gespiset vnd gebichtet,
wann vil manigem gelijhtet,
als er die spijse enpfeht,
da mit er sich geneht
gotte dorch die bekerung,
wann es spricht sin zung,
er begere der wandelung.>
als er die rede gesprach,
gawein gar gering vmb sah,
ob die rede also wer.
sehent, wa ein kneht vnder
libes vnd der kleyder
an linder rede der beyder
her reit die hertten strasze!
vnd sage ùch, welcher masze
dirre kneht geschickt was:
sin varwe was als ein gras,
gruen vnd swartz dar vnder,
als ein vnkunder;
sin hare das was wahsz
als einem swyn dahsz;
darusz ein böser tropff drauff,
vnd ragete alles vber sich vf,
der es nast vnd beschüff.
gelest wahe was sin vel.
darvnder dunckel vnd gel
sine augen beyde waren,
die runnen vnd swaren
von warck, vnd von grùben
die heufel sich erhuoben
vil hoh fùr die wintbra.
das antzlit was anderswa,
als ob er hernùwet were
vnd were fleisches lere,
wann das vorhaubt vorn,
das hett sich usz als ein horn
gespitzet vnd hoh erbult;
das was gewunnt vnd erhult
von adern swartz vnd grosz,
der sich in einander slosz
jglich also wahe,
das man fùr war jahe,
ein netze were darùber gezogen.
die oren waren vf gebogen
als einem groszen hoffwart.
nature hat an yme verspart
alle menschlich art.
bra vnd wintbra waren ruh.
sin nase grosz vnd geluh;
bi der stirne man sie kaume sah,
von einer grüben das geschach,
die sie in die stirne zoh;
hie vor was sie sere hoh,
flah, gewunnt vnd breit;
darusz ein lock hares reit
mit michelem geferte,
vnd möhte man von der herte,
man hette jne geflohten wol,
vnd hing auch al zijt vol
tropfen von dem vnflat,
das der lip dorch die nase lat.
sin munt was tùnne vnd wijt;
vber die lefftze brah enstrijt
ein nesze usz dem mund
vber willen zü aller stund,
das er nihts herwehrn kund.
uber bart vnd ùber gran
die nesze yme alzijt ran;
darvnder was die hute geblat.
yme stunt der bart, als er gesat
were vf sin wange;
er was von gedrange
nit nach der dicke gestalt,
man hett jne allen wol gezalt.
darzue was er wol finger lang
vnd hatt nyrgent einen gelang,
niht mere denn ein scharff al.
die zene waren vber al
scherttet vnd ab genagen,
wann vier hetten usz geslagen
gein einander an dem end
wol breit zweyer hend;
die warent rostig vnd swartz
als ein vermischet hartz,
das swartz ist vnd rot;
jr were einem hund not,
der bein negte fùr das brot.
sjn kynn was lang vnd smale,
das haubt grosz vber al,
der halsz mager vnd klein
vnd was bisz vf das kragebein
mit trùsen befangen
vnd groszen adern langen
beyde hùnden vnd vorn,
die waren sùmelich ersworn;
das ander was belochen
von breiten ziterochen.
man moht an yme vinden
beyde vorn vnd hinden
zwen höfer, die waren grosz,
der ietweder nydder schosz
zú tale bisz an das nidder lit.
darùber hie die wampe mit
nach der wasser sùhte sitt.
geblewet was sie vnd gelauch,
vnd da ein end nam der bauch,
da was er so enge,
das er wol ane gedrenge
dorch zwa hende were gezogen.
die arm stunden yme gebogen,
die enkund er nit gerecken
noch von yme gestrecken
dorch keinerhand sin gemach,
wann sie yme widder vnd fùr brach
ein krumb bisz an die hend.
sie warn als zwen brend
die ein fùwre vbergangen hat,
da sie nit bedackte die wat.
als was er an dem libe gar
geruntzelt vnd miszefar
vnd aller schonheit bar.
hende vnd vinger,
die enkost ich nit ringer,
denn sie waren geswollen;
darùber was bewollen
die hant wol zweyer finger breit.
jch wene, er selten besneit
die nageln an den fingern vorn!
dar vnder verwirdic horn
gedrungen vnd geherttet lag.
der nagel wurtz er selten pflag,
die hatten vil gar bedackt
sine negel, daz sie ir niht enblackt
vor ir da mitten vmb icht,
da man sie aller bast sieht,
so sie das fleisch dackte niht.
darzú waren sine beyn
lang, mager vnd kleyn,
da man sie dorch die hosen sach,
krump, sal vnd swach.
die fúsze kurtz vnd breit,
das man kume mit bescheydenheit
die zehen dar an kosz;
die waren gar nagelosz
vnd vnden mit al flach.
die verse hinden usz brach
vnd was geschickt als ein spor,
sie stunden ob der erden en bor.
die cleider, die er an trúg,
die waren böse gnuog
vsz einem harwe gesnitten
vnd hatt michel ruwe erlitten
von steticlichem an tragen.
sie der nutz gar erslagen,
sit ich es alles sol sagen!
da eneben vnd zu ballen
was yme gar dorchfallen
das geschühde an den füszen.
jch enmag iu nit gesùszen
an yme icht als vmb ein har,
sit jne die nature so gar
von ir schulde hett verswachet,
da er von ir gemachet
wart zuo einem vnbild.
sie was yme vil wild,
da sie yme solte wesen gezeme;
reht menscheit sie jm benam
vnd wùrckte jne zú einem conterfeit,
da mantùel vnd menscheit
vil wol moht kiesen an
der menscheit, doch an gewan
yme den sigk ein valscher schin.
nature wolt vnschuldig sin
an yme, als sie selbs iah,
da sie jne von erst an sah.
< jch enworht dich nit>, sie dick sprach.
der selb kneht ein pfert reit,
das vil kaume den weg vberschreit;
das was mùde vnd lasz,
vnd wil ùch sagen, wa von das
kam, das es so trege was:
es hatt weder fuoter nach grasz
nie geszen by sinem leben;
yme wart ein wenig distel geben.
da by muost es bliben
vnd sin zijt da mit verdrijben
auch mit steticlichen slegen,
wann es was vil gar erlegen:
das ted yme nit vnnot,
wann es yme der saddel gebot,
der gar an sinem libe lag
vnd sin garwol mit flisze pflag:
das was yme ein groszer slag.
ich sage ùch, wie es was getan:
sin varbe was als ein swan,
nùwan daz es sich hett beleit,
vnd was die vnreynikeit
dar an gestanden manig jar,
wenn es wart fùr war
nie gestrigelt nach begangen.
es was, als ob es were gehangen
ein gantzes jar fùr ware,
so dùrre vnd vndare.
sin haubt was lang vnd gros
vnd endlich des hares blosz,
als ob es vbergangen hett
die rùde, da von es erget.
sine augen waren yme erglast.
vil kume es so uil gegrast
mit den zenen, das es sich hernert,
wenn es was daran behert
der kreffte, die dem tadel wert.
es was ein vil alter mort.
ein zan stùnt hie, der ander dort,
vnd waren die tùnne vnd lang;
der vnder fùr die andern trang
vsz dem guomen, der wolffs zan.
dar vnder was ym dick gebran
die schuole vnd wange fleisch gesnitten.
es hett auch nit vermitten,
es were aber gewahszen wider.
vnd darzuo alle sine lidder
hatt tadels vil beseszen,
nihts was daran vergeszen,
das nach laster zoch.
es was hùnden sattels hoch,
dargein was es nidder vor,
deshalb enmoht es nit wol enbor
an allen vieren gesteen.
als es wolte geen,
so began es webbeln hin vnd her;
auch was yme fùr war nit zuo ger
zü geen, des bin ich gewer.
ich wane michs minem lukke!
buchstöszig vnd bogenrùcke
was es, vnd hett das curuei.
sin knyeschijben teilten enzwey
beynwahs und spat.
an den huf es nyrgent trat,
es gie vf den ballen.
an sinen fùszen allen
was es hart agenhuf.
die bùge wijte vnder schuoff
die maug vnd das gesprang.
harschlichtig vnd krang,
murdig vnd vngesunt,
es was von allem dem tadel wunt,
das ie roszen missezam:
krump vnd gnigksam,
kellig vnd vnersam.
sitt ich es sal kosten,
so was es gebrosten
nidder hinden vf die lit.
spurholtz was es da mit,
vnsauber vor der nasen,
die yme nit geschorn was,
vnd hatt doch daran nirgent har.
auch wiszent, es was gar bar
des zagels vnd der ysen.
man moht nit geprijsen
des weddels nach der oren vorn,
die hatt die rùde so beschorn,
das man dar an nit hares kos.
wa mit ie rosz sin lob verlosz,
des vant man an yme gnùg.
es mohte wedder wagen nach pfluog
geziehen nach gedenen;
sich endurffte daran nyeman senen,
das er es sin mohte gewenen.
es enzeltet noch endrabt;
vil kaume es sich enthabt,
das es nit zú der erden schosz,
wann es des lebens verdrosz.
es enlieff nach ensprang,
an allen vieren es hang.
es schaufft noch engie,
die múde es vil kaume lie
gesteen vf den beynen.
wa es sich mohte gelenen
ader gestùren mit icht,
daran saumet es sich niht.
yme was ie vil tùre
vf werder tiostùre
sneller spring vnd widder wang.
er mohte gewynnen stund lang,
der es solte rijten
berge ader leiten,
mosz ader strasze.
die rede ich hie lasze,
wann ich scheuh die vnmasze.
eyn gereid vf dem pferd lag,
das wol gein siner tùre wag,
vnd was yme gezame;
böse vnd vngeneme
was es fùr ware vber al.
ein sattel als ein schùszel smal,
der dùrre was als ein beyn
vnd alles ledders al ein,
sonder es was gewirckt von bast
vnd was vil vast
vf ein ander gebonden,
vnd was dar jn gewonden
ein seil vngefuege
fúr das fùrgebùge;
vnd was fùr die stegereiff
jetweder halben ein reiff
gewonden von einer gerte.
die stigledder waren hertt
von dem selben gevertt.
das ich dar an nihts verhele,
so sage ich, daz das panel
von einer matten was gesnitten.
auch was daran nit vermitten:
die geinledder waren
von wijden vil swaren
vsz eychinen ruoten.
des sattels vnden huoten
zingel, gewonden von schauben.
jch wil das wol glauben,
das er lichte vallen mohte,
ob er dar vnder tohte,
das man es rennen solt,
der dar uff sitzen wolt,
wann sich hette vil snell
des dùrren strauwes well
vsz ein ander gelaszen.
nuo sij er verwaszen
mit rosze vnd mit haszen!
ime was zuo einem zaume
von bast vil kaume
ein zeumelin geflohten,
das wol zwa mùse mohten
gar lichteclich zerbiszen han,
ob man sie beyde dar an
gein einander hette gebonden.
dem runzin in dem munt
zù dryen strenen dristunt.
sust reit er die strasze her.
nuo was gawein gar sere beger
dorch das wonder vnd des ritters bet.
gein yme ging er an der stet
vnd fragde jne der mere,
von wannan er geritten were,
ader wa er hin het gedoht,
vnd was not jne her hett braht
vf diesen weg, sit er so gaht.
ine beswerte vnd bedragt,
das jne gawein hett gefragt
dirre mere, von wannan er ritte.
mit vil groszem vnsitte,
als ein arger schalk tuot,
der böse ist vnd vnfruot,
er yme antwortten began
vnd sprach zù yme, was er daran
jne zuo fragend hett, wa er hin wölde.
er wolte nach ensolte
yme niht sagen vmb ein hare,
von wannan er ritte ader war
er hin wolte keren,
vnd began jne vneren
mit scheltwortten hart vil.
das nam gawein als vf fùr ein spiel
vnd begerte siner frage ein ziel.
mit vbel vnd mit guot
kund er jne zuo keinem mut
nie geweichen kein stund,
das er yme zu wissen gund
sin gewerb vnd sin arbeit.
da er es yme lang verseit
vnd nùwan rieff vnd schalt
vnd mit michelem gewalt
an gaweinen erzeigte,
vil sanfft er jne neigte
von dem runzin zu tal,
das er zue der erden den val
von yme da nam so zù hant,
das er sin vnsanfft enpfant;
dar vmb er vil lute rieff
vnd in den walt von yme lieff.
er began jne aber schelten
vnd gesweig dar vnder selten.
das wolt er yme nit gelten.
da das von gawein geschah
vnd es lohenis ersah
vnd die schöne emblie,
sines hertzen amye,
jr pfert sie vil snelle fing,
da es by dem zaume hing.
dar uff sie vil snelle sasz.
lohenis was nit zu lasz:
vil snelle er von der erden sprang;
vf gaweins rosz er sich swang
vnd fuert es her vnd hin,
geyn yme vnd fùr jne,
vnd rief:< schafelier lohenis!
gawein muesz den vnprijsz
vnd schantliche dat
nuo gelten, ob ich iemer mag,
die er one min schuld
widder des gesindes huld
begie dorch sinen groszen gewalt,
das er mich der kelle salt
vnd zue einem meyntat zalt.>
mit diser red er hin reit.
nuo hett sin valscheit
gawein nach nit ersehen,
wann das er hort jehen
vf jne grosze missedat,
als man vor vernomen hat,
bisz er jne sahe von yme jagen
und alles gút widdersagen.
da verstunt er sich des listes wol.
vntruwe, du bist hol
aller tugend vnd eren!
war sal nuo gawein keren
vf disem bösen runzin?
noch wùrt aber an yme schijn,
was sin hertz mag bringen.
er mochte jne nit bezwingen
mit disen valschen dingen.
schier hatt er sich verstanden,
da sie beyde von yme wanden,
die frauw vnd lohenis,
welcher aht vnd welche wijse
er dise rede meinte,
das er jme bescheinte
vil groszes haszes zorn da mit.
darvmb er siner freuden sitt
nit verwandelte vmb ein har,
wann das ist endlich war:
er kund sich aller ding wol
enthalten, als man reht sal.
des wart an disen dingen schin.
er nam es yme zú dheyner pijn,
das er also bedrogen wart,
wann das reht hie die hochfart
das glùck an dem sigk verspart.
als es sit an yme ergie,
das snöde runzin er geuie
zu hant by dem zaume
vnd zohe es vil kaume
zú einem stock by yme nahe.
es enwolte jne nit versmahen,
er wolt sitzen dar uf,
dwijle er vmb sust nach vmb kauff
kein anders haben moht;
wie ùbel es yme doht,
er mohte sin doch enbern niht.
die rede vil dick geschiht,
das es manigem frommen mann
von vngluock kummet dar an,
das er manig ding liep hat,
das er von reyner miszedat
hett wenn dorch vnrat.
iedoch er des nit vergasz,
da er vf das rùnzin gesasz,
er bedoht die vntruwe.
vnd was das sin ruwe,
das man jne also solt sehen,
man weste denn, wie es were geschehen;
so hette er es deste geringer verkleit.
wie sere jne die arbeit
darvnder muote da von,
das er des was vil vngewon,
das er solche pferde ritt
vnd da mit den kumber litt,
darùber hatt er manigen gedang,
da mit er flijszeclichen rang.
vnd was das nit vnbillich,
wann es dem sinen vnglich
was an gúte nach an lib.
als er ein wijle gereit,
der kneht, von dem ich vor seit,
dem er das pfert hatt genomen,
der was yme hinden nach komen.
er rieff gawein nach vnd schalt,
die wijle er vor yme den walt
reit, das er jne da nye
zú keiner wijle verlie,
alles hinden vf dem spor,
was er moht gerijten vor
bisz er an die heyde kam.
sinen weg der kneht widder nam
jn den walt als e,
vber gawein er den raub schre
basz denn vor, vnd treib sin ie me.
des nam gawein gar wenig war,
was der kneht rieff vnd was yme wer.
er reit fùr sich die heyde.
ein schöne augenweide
gawein an der stund vant:
ein castel vnd ein lant,
das schon was vnd güt,
vber ein vil breite flut
vf einem berge, der was hoh.
darvmb ein planij zoh,
die wonneclich zú sehen was.
weisze, korn vnd grasz,
obsz, bluomen vnd rebe,
das was des geuildes gebe,
das vmb das rich castel lag.
dem wijten land da von pflag
sie da bieten sueszen gesmag.
es spricht die auentùre,
das rich vnd tùre,
vest vnd geware
dis castel were,
von velsen vnd von graben,
da es was vberhaben,
gewahsen von nature.
mit tùrnen vnd mit mure
was es al vmb befangen.
mit breyten steinen langen
von marmel geschliffen
was das werck gar begriffen:
von gruen, wijsz vnd bla,
darvnder allenthalben da
gemùschet wol von gold.
gansgueter von michold
das also schaffen wold.
gefenstert vnd gewelbt was
vmb vnd vmb ein palas,
der was wol funff hundert,
vnd warent da gesundert
mit sùlen manigerhand varbe,
vnd waren auch begarbe
da mit al vmb uszgezogen
mit armbrusten vnd mit bogen,
von kunst dar vnder bestalt.
die hatten micheln gewalt:
so man die venster zú tet,
so lieszen sie nydder zu stet
beyde senewen vnd strale.
wenn man es zu keinem male
wolte widder vf tuen,
es were vrlùge ader suon,
sie spienen sich aber so zü hant.
sust was es darvmb gewant,
das wart gawein sitt bekant.
gawein reit mit vngemach,
wann er an dem pferd brach
beyde beyn vnd hend,
e denn er es an das end
halben weg hatt gedrieben.
er was doch vil nahe blieben
des nahtes vf der heyde,
were yme nit zu leyde
eins strijtes dar gedoht,
der yme rijlichen trost braht.
das kam von lohenisz hasz.
einen recken er von rahas
vf gaweins rosz sand,
da er von yme zu land
aller snellest komen kund,
den er mit flijsz schùnd,
das er gawein sluege
vnd yme niht vertrúge
die schande vnd das hertzeleit,
das er von yme zu hofe leit,
als er yme dick hett geseit.
auch seyte er yme die mere dar zu,
wie er jne hette bedrogen nuo,
vnd wie licht er jne gewinnen -
wölte er sich reht versynnen -
möhte vf dise ritterschafft.
er weste wol, das ritters krafft
were zú fuosze vff der erde
gerechent zuo cleinem werde,
wie kuene ein ritter were.
also getaner mere
seyte er yme also vil,
bisz er ime dis hertt spiel
dorch sine liebe gehiez,
das er es auch niht enliez.
ansgù der ritter hiez.
zuo madarb vf der fuert
ansgù zwei sper fuort,
als jne lohenis lert.
gawein auch den weg kert.
er west aber des rates niht,
bisz er jne da von geschiht
nach yme sah vast rennen
vnd jne willeclichen nennen,
vnd batt jne, das er bite
tyostùre nach ritters sitt.
des mohte er jne liht erbitten,
wenn das rùnzin nach dryen tritten
verstunt ie driszig dar nach.
darùber was dem recken gach,
der mit jme wolt strijten.
er mohte jne gar liht herrijten,
sonder sinen danck muost er bijten.
es enwas doch nit sonder dang,
nùwan so vil, das so krang
was das pfert, das er reit;
vmb daz er vngern beyte,
wann gawein sich des uszermaszen sere schamt.
vil schier waren sie beidesamt
vf dem wege zusammen kommen.
da wart ein tiost von jne genommen,
die schad was vnd from.
das angenge vnd das drum
wil ich uch sagen gar:
ansgù bot yme sin sper dar,
wann gaweinen verbronnen was das sin.
da hiélt er das rùnzin
bi dem zaume an der selben stat,
das nye fùrbasz getrat
nach hinder sich einen fuosz,
alsdenn doch ein rosz tuon muosz,
das man zwingt mit sporn.
es hatt hinden vnd auch vorn
den gijren sicherheit gesworn.
also muost er halten.
die schilte sie stalten
nach gewarsamkeit fùr die brùst.
da wart ir begird vnd ir gelust
vf beyder sijten wol versùcht
vnd sere wol beruocht
mit kùnste die stiche,
das jne nit geswiche
schilt, rosz nach das spere.
von siner stat enne here
nam ansgù den puneiz,
des er sich mit alle flijsz,
das er wol wùrd an geleit.
gelùck vnd mannheit
gawein da ernerten,
als sie jne dick werten,
das yme durfft geschah.
ansgùwen er von dem rosz stah
mit sines speres ort vorn,
das er viel in die dorn
vnd alle krafft hett verlorn.
als die tiost ergie,
das rosz gawein snelle vie,
da von er jhenen geworffen hat.
ein ding vil dick ergat,
das die sprùchwort sprechent:
was die lute ab gebrechent
ettwann mit vnrecht,
das es mit lust wùrt gespeht;
was man mit vnreht gewynnt,
das es schier zerrynnt,
sprechent joch die cleinen kind,
die noch gar swaches synnes sind.
das selb an ansgùwen erging.
gawein sin rosz gefing.
des wart er von hertzen fro.
vf das rosz sasz er da
vnd liesz das runzin stan.
er hette es anders nit getan
were es yme nit so ergan.
ansgù wol halb dot lag,
wann yme zu dem tode wag
des stiches krafft vnd der schad;
da mit wart er sere vberladen.
gawein rieff hinùber nach dem ver,
das hatt in siner gewer
ein from ritter karadas,
der bi dem flume gehuset was
vnder disem richen castel.
nach der stymme was er snell
vnd was darùber schier,
vnd siner knappen vier
kamen herusz an den stad.
vsz der newen er da trad,
den verigen lon er yme geben bad.
gawein sprach vil schon:
< was sollent ir zu lon
haben vmb die vberfart?
wie es ùch ie gezollet wart,
des wil ich ùch nit widder sin.>
er sprach:< frùnt vnd herre min,
wer hie die vberfart hat,
der sal mir rosz vnd sarwat
zuo verigen lon bieten,
ader er sal mich gemieten
mit so ritterlichem bejage,
edeler gast, als ich ùch sage:
er sal hie an der wùre,
e denn ich jne vberfuore,
erbeiten tiostûre.
die wùrt yme niht tùre,
der vindt er hie gar snelle vil.
ob jne glùck furdern wil
vnd ob yme denn gelingt,
das er den helt zwingt,
den sal ich haben fùr den zol.
so bin ich gewert wol,
ob ich es ùch sagen sal.>
< der zol ist swer>, sprach er,
< doch zweyer eins ich ùch gewer,
ritter guot, an dirre frist,
sitt es so geteilt ist.
jedoch dort ein ritter lijt.
sitt ir da von gewert sijt,
den habent ùch zù vares recht,
wenn mich der selb guot kneht
gar gern wolt han erslagen.
da lie mich min heil bejagen
an yme ritterlichen sigk,
vnd viel er in des seyles strigk,
den er mir hatt geleit.
sust han ich an yme beieit
dis rosz, das was vor min.
jr lant den ritter vwer sin,
so sint wir beyde gewert.>
gawein wart niht entwert,
das er an dem verigen begert.
des recken er sich vnderwant
vnd fuort sie beyde so zü hant
jn sin husz vber die flut.
da wart beyder gemach gut
von disem tugenthafften tegen.
er hiesz ir mit eren pflegen
zù bett vnd zú tisch.
hùnre vnd visch,
zam vnd wiltpret:
mit michelem rat
hielt er sie mit dem eszen.
jr wart auch nit vergeszen
an dem trincken vmb ein har:
das was luter vnd clar,
súsze vnd dar vnder scharff.
jn dem vasz es sich vf warff,
so man es jn schanckte.
wer es yme nit entwanckte,
dem fullte es die augen.
es was sunder laugen,
das es nit beszer mohte wesen.
es was an der zijt gelesen
vnd mit den vaszen bewart
vnd böser gerben enbart,
da von es nye man beswart.
er pflag ir als ein gùt wirt,
der dar an niht verbirt,
wa mit er mag ader kan
gewirden einen frommen man,
das er das vil gern tut.
guet gemach vnd williger mùt
wart jne von yme erzeuget da.
des abends nach dem eszen sa
ging gawein in einen palas,
der gein der bùrge erhaben was,
da er mit sinem wirte gesasz
darvmb, daz er deste basz
das castel möhte geschauwen.
nú was von jumpfrauwen
vmb vnd vmb an dem sal
das rich palas vber al
jn den venstern beseszen
dorch banchenij nach eszen,
das keins was vergeszen.
sje waren schon vnd wol gecleidt.
dar vnder sasz ein schone meit,
an der nach freuden nihts gebrast.
vnd fragde den wirt der gast,
wie es stund vmb die megde,
die schöne augenweide
gaben von dem sale herab;
vnd wer diser richen hab
frauw ader herre wer,
vnd die magd erber,
die da sasz vnder jn,
an die die nature so richen sin
fùr die andern hette gewant.
da sprach der wirt so zü hant:
< das sal ùch werden bekant.
her gast, die burg, die ir seht,
die erbuwete ein vil gut kneht,
der was gansgüter genant.
er braht her in dis lant
von schatz vil groszen hort,
der ein frauw an gehort,
die die schön bluome ygern hiesz,
die alles ir erb liesz
dorch disz heldes mynne.
die was ein kùniginne
vnd trueg zue britanie krone.
jr man hiesz vtpandagron,
vnd heiszet ir sun artus,
der stat, lant vnd husz
zue brytanien mit gewalt hat
also wijte, so das rich gat,
noch bisz her an dise frist,
als vns dick gesagt ist,
vnd bedrùgt vns nit valscher list.
sie bracht die meide al her.
des was gansguter gewer,
wann es von zauber erging.
dis husz er also hie ving
vnd hiesz es salye.
von nygromancie
hat er es gemaht
vnd mit listen so besaht,
das es nyeman wol gewynnen kan.
darùber mag kein man
vber naht da bliben
vnder disen reynen wijben,
er sij denn der schaunden one,
der noch nach mynem wane
jn der welt nye wart geborn,
der so gar sij uszerkorn,
wann die rose ist hie nit one dorn.
wùrd aber ein ritter funden,
dem sine tugende des gunden,
das er eins nahtes da blieb,
das jne die schand nit verdrieb,
dem geb man die schöne meit
mit so gantzer sicherheit,
das sie were sin amye,
vnd husz vnd maszenije,
lant, lùte vnd gelt,
walt, waszer vnd velt,
mann vnd dienstman;
wann die frauw ist ir an,
der das lant ist vnd wir sin.
von orcanij jascaphin
der reynen megde vatter hiesz.
da von ir mútter verstiesz
jr vetter, das ir vatter liesz.
mer wil ich ùch darvmb sagen:
die auentùre wolte bejagen
vil manig reck ersam,
der bösen lon da von nam,
wann er sinen lip da verlosz,
so er yme die ruowe erkosz
vf einem bett, das da stat,
das ein sollich nature hat:
wer daruf ruowen wil,
der vindt vnruowe vil,
hat schand an yme keinen wert;
wann so wùrt er gewert
des todes an der stund.
yme wùrt vil manig wund
geslagen dorch sinen lip,
das er das lant vnd das wijp
ee yemer mohte verswern,
möhte er sich da mit herwern,
ee er es also wolt ane wern.>
< her wirt>, sprach her gawein,
< jst des zwijfel kein,
die rede sij also war;
wolten ir mich denn geleiten dar?
jch sehe das husz vil gern
vnd die blueme ygern,
darzú die vil reyne magt,
da von ir mir haben gesagt,
vnd die schonen jumpfrauwen,
vnd wie jnnen zú were erbuwen
das husz vnd der rich sal;
vnd wolt es sichern vberal,
das wesen vnd die heinlich.
dwijle es uszwendig ist so wonneclich,
so wolt ich es auch jnnen
gar kunde gewynnen,
e denn ich kerte von hynnen.>
< lieber frùnt vnd herr gast,
es ist ein kùmberlicher last,
das ir solcher sachen begert,
da von ùch weder schilt noch swert
nymer wol herneren mag;
wenn es ist des todes slag
one helffe vnd one rat,
der sin keinen muot hat,
das er die auenture bejag.
vwer bed ich ùch nit versag:
jch bring ùch vf das husz wol.
die red ich aber verdingen sal,
das ir icht blibent da
vnd mit mir widder sa
herab zu huse kerent,
das min leit icht werd gemeret,
das mich dick hat geseret.>
dje red wart hie gelaszen.
nit lenger sie da saszen,
sie gingen slaffen da mit.
die naht verswant nach freuden sitt
vnder dem wirt vnd dem gast.
als nue der tag erglast,
vf mahten sie sich beyde.
nuo sahen sie vber die heyde
ein magt vnd einen ritter dar
sere ylend gein dem vberfar,
vnd rieffen sere nach der ver.
der wirt sprach:< nü sint zu wehr,
her gast, man wil ùch bestan.
des mag ich kein wijse verlan
jch muosz ùch fueren zu jn.
got der geb ùch salden gewin!
bereitent ùch, wir sollent da hyn!>
uil gering er gewapent wart
vnd maht sich dar vf die vart
gein sinem kampffgenoszen.
das schiff wart gestoszen
vber das waszer an den stad.
beyde vf einen breiden pfad
der heyden sie da hielten,
da sie vil wol wielten
behender dùcke.
kunst vnd glùcke,
gedùrstikeit vnd mannes mút,
dis sint dem manne gewisse huot.
die waren nur gaweinen mit.
war vmb wöllent ir, das er bit,
er enliesz lauffen von sporn
sin rosz vnd das sper vorn
neygen gein dem rand?
zuo sammen vf dem sand
da ir iglicher rand.
sin sper vnder die arm slùg
gawein, das was starck gnùg,
des sin geselle wol enpfant,
wann er da von vf den sant
wart geworffen vil snell.
die magt maneypicelle,
die also was geheiszen,
da sie gawein sah erbeiszen,
an jne sie vil snell lief.
den recken sie anrief,
das er jne genesen liesz
vnd yme schweren hiesz
truwe vnd sicherheit.
da hiesz gawein disen eit
sinen wirt von yme enpfahen,
wann er was vil nahe
dot von dem vall.
sin rosz vnd jn mit all
gawein fùr sich nam
vnd fuorte jne vber wassers stram.
des bleib die magt sorgsam.
nuo was ergangen der strijt.
auch was es ymbszzijt
vnd was darzù gar bereit.
gawein nit lenger beit:
den wirt er siner gelùbde mant,
das er nach ymbsz zu hant
mit yme vf das husz ritt
vnd dar nach nit lenger bitt,
als er yme am abend da vor verhiesz.
der edel wirt das nit enliesz;
er volgete siner bed daran.
riche cleyder er gewan
gawein dem vil richen tegen,
die hiesz er jne an legen,
vnd ein pfert, das was guot
vnd gar rot als ein blut,
mit einem gezûge, der vil kostlich was.
also hies jne karradas
rijten gein dem palas.
nit lenger sie beyde biten,
den weg sie gein dem huse riten.
schier kamen sie zü dem burgtor,
da sasz ein steltzer vor,
der hatt ein steltze silberin.
an yme was vil lùtzel schin
dheiner hand armut:
beyde rich vnd guot
was alles das, das er an trúg.
das bùrgtor er gering zu sluog,
als er sie hinzuo rijten sah.
darzuo er gar zorniclich sprach:
< varent fùr! was sùchent ir?
solcher geste ich wol enbir!
auch enbirt ir min frauw wol.
welcher tùrppel ist schanden vol,
von der porten ich den trijben sal.>
hett er den wirt niht bekant,
er were an gawein zuo hant
gelauffen mit einem stab,
den er mit groszer vngehab
gein yme vil dick swanck.
doch kam er one sinen danck
mit sinem wirtt zue der porten jn.
gein einem palas kerte er hin,
zue einem cluogen marstal
bi einem wonneclichen sal.
da lieszen sie die pferd staen
byeinander. dise zwene
die burg vmbgingen,
das sie nye dar jnne verfingen
kein wip nach keinen man;
wann zú leste kamen her gegan
zwen knapen vnd ein schone meit,
rijlichen wol gecleidt,
die yme des gastes gnade seit.
also muosten sie da beyde
mit dirre schönen meide
geen vf einen palas,
da das wùnderlich bett was
vf gewirckt mit listen,
da vor sich gefristen
nieman moht wenn der ein,
der sich vor allem meyn
von kintheit her hett behùt.
gewan er nye valschen mut
zù keiner hand schanden,
vnd sich auch nye gewande
zuo eincherhand werck, daz yme were
vmb icht lasterbere,
so mohte er wol dar uf ligen.
anders wart yme verzigen
zü der ruowe sin langes leben,
wann so zu hant wart yme gegeben
da von der gewisz dot:
das was ein senliche not,
das kunst den list ie gebot.
daruff verdrieben sie den tag,
da ir dise magt pflag,
bisz es an den abent kam.
vier knappen sie zü ir nam
vnd diente yme zú dem essen wol,
als man lieben gesten sal
tun von miltem muot.
dar an sich wol huot
dise vil reine magt.
das man von druchseszen sagt:
das sie da dick rates jehen,
das sie michelen mangel sehen;
der rede hie nit geschah.
die magt da nihts vbersah,
es were grosz ader swah.
als nú der tisch erhaben was,
hern gawein batt karadas,
das er ritte vnd bite
vnd morgens aber widder ritte,
wolte er es basz schauwen,
vnd dar zü der jumpfrauwen
vrlaubs von dannan bat -
das waren sine rete -
vnd sinen lip nit wagt.
der rede jne betragt,
vnd sprach mit zùchten schon:
< got ùch von himel lon
des rates vnd der trùwe!
so mùste mich nymmer rùwen
das bett, das ich hie sieh,
dem ich groszer tùre gieh,
solt ich nit ligen daran,
dwijle mir es dise magt gan,
daran nie ritter ruowe gewan.>
< des entùnt nit, lieber gast!
wann manigem vor daran gebrast,
der sich des selben auch vermasz;
vnd hett yme selbs michel basz
getan, hette er es laszen uaren,
wann nyeman kan das bewarn,
er muosz den lip verliesen,
wil er yme ruowe kiesen
an dem wùnderlichen bett.
jch gedorste wol zù wett
den lip dar vmb setzen,
das es beginnet letzen
nach hynnaht alle vwer tag,
glaubent ir nit miner sag.
des tröste ich ùch zu bejag.>
< herre vnd lieber frùnt min,
nü lant solche rede sin!
vnd sal ich verderben,
so müsz ich doch sterben
eins todes vnd keins mer.
dwijle ich sin mit stetikeit beger
vnd sin nit wil enbern,
dorch got so lant mich sin gewern!
ja weisz ich ein red wol:
das ich doch sterben sal,
zuo welcher zijt es erge.
ez stirbet vor sins todes ee
je dheyner slaht man;
so mag das selb mir ergan.
geschah es aber nyeman ie,
so mag ich wol genesen hie,
wann heyl den kunen nye verlie.>
alle sine bet was verlorn.
mit leid vnd mit groszem zorn
karadas von dem castel schied.
gawein das sin muot riet,
das er sich an das bett leyt.
mit truoben augen gie die meyt
von yme vnd sparte zu den sal,
da sie die frauwen vber al
mit jamer byeinander vant
vmb disen kùnen wijgant.
den wanden sie geligen dot,
wann vor yme maniger den dot
von disem bett hat erlitten.
mit disen jemerlichen sitten
des tags sie vil kaume erbitten.
lùtzel slieff sie die selbe naht.
daruff hatt vil klein aht
gawein, wie es yme ergie.
ee jne der slaff gefie
das bett began sich rüren
vnd die schellen alle fùren,
das sie luten vil hell.
darnach also snell
die venster zù slugen.
manigen schusz vngefugen
die armbrust vnd die bogen,
die vor waren vff gezogen,
die taden an der wijlen:
ströle, bletten vnd pfijle,
wol funffhundert an der zale,
jn das bette vber al
mit krefften sie lieszen.
da múst er des genieszen,
das yme da von niht gewar,
wann er aller schanden bar
was gewesen bisz dar.
als nuo der schal wart vernomen,
der von den schellen was komen
vnd von den scharffen strolen,
da begunden sunder qualen
die frauwen hart weinen
vnd michel truwe bescheinen
vmb disen tugentrichen gast,
der sich in des todes last
von sinem mút hett gesalt.
des leides clage manigfalt
her gawein vil wol vernam,
vnd was dem kumber mit yme gram,
vnd west doch nit, was jne war,
wann daz sie mit leide gar
waren alle befangen.
des begùnd jne verlangen,
wanne die rede were ergangen.
hie mit er zú hant entslieff.
darnach vil snelle rieff
der wechter an der zynne.
nach der auentùre gewynne
verslieff er den morgen.
so begunden aber sorgen
die vil reynen wijb
vmb des edeln recken lib.
als es nuo tagend began,
vier jumpfrauwen wolgetan
vnd vier knapen mit jn,
die gingen vf den palas hin
vnd wolten disen recken haben
vnder jn taugenlichen begraben.
sie wanden jne dot wesen,
wann nye keiner was vor genesen
vor yme, der daruff lag.
er mùst lijden den slag
des sitten, des das bett pflag.
als sie nu gingen vf den palas,
da was sin wirt karadas
widder vf das husz geritten.
der hatt des tags vil kaume erbitten:
wie es yme ergangen were?
sin not was klagebere
vmb sinen gast gawein.
michel trùwe an yme schein
vmb einen so fremden man,
wann das ich vernomen han,
das gar fremder sache
trùwen schulde das gemache,
das man ir holdes hertz trage.
deswar, nach der selben sage -
wie er sin niht enweste -
doch was sin truwe veste.
das er sin hette michel reht -
trùwe geliehen gelt specht -,
des weste doch nit der guot kneht.
dje knapen vnd die meide,
die nach disem leide
vf den sale gegangen waren,
der hertze starcken sweren
von disen senlichen sachen.
die schlichent gar mit lijsen tritten
fùr das bette, da er jnn lag.
nuo scheyn vber jne der liehte tag,
darvnder schlieff er vast.
vil nahe zù dem gast
sie miteinander gingen.
die schùsze alle hingen
oben in dem couertùre
vnd hatten jne so tùre
als vmb ein hare beruret niht.
als sie nuo gesahent dise geschiht,
vil gern sie das sahen.
vf gein dem haubt nahen
begunden sie sich wenden.
gawein, den ellenden,
an den selben stunden
lebendig vnd gesunden
mit al sie da erfunden.
als sie jne funden fùr war
lebendig vnd gesunt gar,
sich began ir freude meren,
vnd gar stille widder keren
an der stat sie begunden,
vnd gingen, da sie funden
ygern, ir frauwen,
vnd sprachen:< wöllen ir schauwen,
frauw, ein vil michel wonder?
der gast lijt gesunder
an dem bette vf dem palas,
den vns braht karadas,
vnd slaffet vil sere.
got hat michel ere
zuo sinem libe getan.
dis wonder wib vnd man
mögent gern sehen an.>
ein michel freude sie gefing.
ygern mit iren frauwen ging
dorch des wonders willen vf den sal.
nú hette dirre freuden schal
karadas vnd die mere
vernomen in der swere,
die er vmb sinen gast hat.
nach trurikeit dick ergat,
das man freude gewynnet dar nach.
vff den sal wart yme gach
vmb sinen gast, hern gawein.
nuo waren die frauwen gemein
mit ygern fùr das bett komen
vnd hatten des war genomen,
das er vil gar was gesunt.
des lobten sie wol tusent stunt
gott vnd sine magenkrafft.
darzu kam der tugenthafft
karadas gelauffen.
sin hare began er rauffen
vnd grosz trurikeit kauffen.
er wande den recken wesen dot.
jn dem slaffe dirre clagenden not
her gawein vil wol vernam,
da von er so hart erkam,
das er nackent usz dem sloffe sprang
fùr das bett vf ein bangk
vnder dise tugentriche schare,
das er ir nam gar wenig ware -
von dem slaffe das geschah -,
bisz yme ygern ein riches dah
warff fùr des libes scham,
das sie ab dem bette nam.
da begund er erst vmb sehen,
das yme die schand was geschehen.
das was yme vil hart leit,
jn sinem hertzen er es cleit.
ygern da nit lenger beit.
mit freuden sie von dannan gie,
karadas sie by yme lie.
der braht yme ein ysin gewant
vnd hiesz yne dar jn zù hant
sich wapenen; das solte sin.
ein helm luter stahelin
vnd ein sper er yme braht.
der schilt wart nit vberdaht,
den braht yme vil gedrate
karadas vnd sprach:< nach minem rate
sollent ir alwegen varn
vnd sollent ùch nymmer sparn
an disem strijd, edeler tegen.
dwijle ir an dem bette sint gelegen,
so müszen ir vehten einen strijt,
ob ir nit gewarnet sijt,
der ùch vil licht den dot git.
mögent ir an dem strijd gesigen,
so muosz ùch dienen dis gedigen,
was hie in dem land ist;
auch wùrt ùch zuo der selben frist
die vil schöne magt gegeben.
got behuete ùch lip vnd leben,
wann es ùch sorglichen stat,
wann der lewe michel krafft hat,
den ir múszent besteen.
weren uwer drij ader zwen,
jr gewùnnen sin doch arbeit.
das han ich ùch dar vmb geseit,
das ir ùch huetent deste basz.
sint snell vnd nit lasz,
so mag ùch nit gewerren!
got hat ùch mir zuo herren,
ob er geruochet, her gesant,
vnd sal lùte vnd lant
bliben in vwer hant!>
uil kaum liez er die mere,
das dirre steltzere
mit zorn vf den sal gie,
der jne zuo dem thore jn lie
da vor an der brùcke.
einen slegel der was eistlich
vnd herttem stahel glich,
den hergreiff er in beide hend
vnd an des sales wend
sluog er da mit vf ein thuere.
darusz sprang ein lewe her fùr,
der was gros vnd starck.
sinen zorn er da nit verbarg:
er schrey vnd luet.
vil hart es jne muet,
das er gaweynen vor jme sah.
die erde er kratzte vnd brah
vnd hatt grosz vngemah.
gawein yme den zorn vergalt
vnd den groszen gewalt,
den er widder jne beging.
sinen schilt er zuo schirme fing
vnd das swert in die hant.
als ein tùrer wijgant
ging er gein dem tier
vnd sluog yme vil schier
nach ein ander vier slege
vnd bot darvnder alwege
dem lewen sinen schilt zú schirme dar,
bisz der lewe so gar
erzörnt vnd grymmig wart,
wann sin gawein nit enspart,
das er an jn sprang mit zorn
vnd sine fuosze beyde vorn
gaweinen in sinen schilt slug
vnd den rant mit den zenen nùg.
den zorn er dem lewen nit vertrùg.
als er sine klawen vil scharff
mit zorn in den schilt gewarff
vnd wolte jne yme genomen han,
gawein bewarnte sich daran,
daz der red nit ergie.
den schilt er vor zorn nidder hie
vnd slug darnach einen slag,
der so kreffticlichen vberwag
an disem tier wild,
das die fuesze in dem schild
vorn beyde blieben
vnd er da von kam gedrieben
dot zú dem pflaster.
also hatt one laster
gawein verendet den strijt
jn einer vil kurtzen zijt.
das kam yme zu staden sit.
als nuo der strijt ergangen was,
der steltzer vnd karadas
die huoben an zue singen einen loblichen gesang
vnd seiten da mit groszen dang
siner salden sigenunfft,
vnd siner heilsamen zukunfft
begunden sie wol prijsen
mit vil súszen wijsen.
darnach begunden hellen
an dem bette die schellen
von wol suoszem tone,
vnd lieszen vil schone
die armbrust ire senwen ab.
von geschùsze die riche hab
viel nidder an der stund.
grosze freude sich begund
veben in dem castel:
da waren sie alle snell,
man horte manig stymm hell.
hje von wuhsz vil groszer schall.
das husz vf vnd zu tal
wart da mit gar gefangen.
darnach kam gegangen
ygern vnd morchades,
die mit rehten truwen des
sich frauweten, vnd clarisanz,
das so stete vnd so gantz
der tùgend wunsch an ym lag,
wann sie dirre freuden tag
vil gern alle sahen.
als sie yme kamen nahen,
gein jne er ab dem bette sprang.
einen herlichen antfang
sie butten hern gawein.
dennoch weste ir kein,
das es von michelem reht geschah.
gawein sie vil gern sah,
als er sitt vil dick jah.
sje kuszten jne bisonder.
den suoszen gruosz kund er
vil höuelichen nemen;
auch moht es yme vil wol gezemen.
deszhalb moht es auch wol sin,
wann es kein schand vnderfie,
er hett in vil wol geholt.
also werlde richen solt
hett er erworben da
vnd manig end anderswa
nach diesem antfang.
darnoch vil vnlang
kam nach jne gegangen dar
ein vil zier riche schar
von funffhundert meiden,
an niht vnderscheiden
der cleyder nach der schone.
lobes gliche krone
gab jne die nature zu lone.
sie neigten yme vil lijse.
nach jne von hohem prijse
also manig ritter kam gegan,
die auch glich kleider an
truogent, vnd enpfingen jne,
vnd gingen al damit hin
jn das palas sitzen.
dar nach von groszen witzen
gingen alt herren her fùr.
nach den drungent in die thuer
schöner knapen funff hundert.
hern gawan wondert,
von wannan sie al gingen.
als sie jne enpfingen,
vnd alle gesaszen da mit
mit gar freudenrichem sitt.
jch wene, ygern nit lenger bit;
uff stunt sie vnd sprach:
< alles vnser vngemach,
jr herren vnd ir frauwen,
das wolt got beschauwen
mit siner gnaden hantgedat,
als er wol erzeuget hat
vch hùt an disem tage.
lant vnmuot vnd klage!
sint fro vnd wol gemuet,
wann ùch lip vnd güt
dirre helt hat erlost.
zue dem sollen ir haben trost.
er sal vwer herre sin.
clarisanz, die niftel min,
die kunigin von orcanij,
die sal sin amy
sin, ader jr mútter orcades.
ritter gút, nue frauwent ùch des,
das ùch got so hat geert.
habent ir leit, das ist verkert,
vnd richer freuden hort gemert.
ritter, enpfahent sie alle zue man,
die ir vor ùch sehent stan,
darzuo bùrge vnd lant.
das wil ich in vwer hant
beyde befelhen vnd geben,
vnd wil nach vwerm willen leben.
das hant ir erworben wol,
das es also wesen sal.
dar vnder wil ich an ùch begern,
des ir mich gern mùgent gewern,
wann es one schaden ist.
nemment dirre rede einen frist,
das ir vns sagent, wer ir sijt.
wann da von wuehsz ein groszer nijt,
so wir ùch nit enkennten,
vnd ùch nit also nennten,
als wir von reht solten.
dar vmb wir gern wolten
vwern rechten namen erkunnen.
des sollent ir vns gùnnen,
so han wir wol gewonnen.>
vnkund git fryen gedang,
wann er vil gar one gezwang
wadelt hin vnd her
die wijle gar, vnz ob er
die warheit erfindet.
vil licht er widder windet
dann an gewissem end,
so er dem gebend
muosz wesen vndertan.
also geschah hier an,
wann die bluome ygern,
die hett vil vngern,
hette sie gawein gekant,
jn solcher wijse das lant
vnd was da were jnne
zuo siner swester mynne
yme gebotten zú gewynne.
sie enkant sin nit, das ist war.
vnder diser tugentricher schar
gawein mit zùchten vf stunt
vnd sprach:< was vnbedoht tùnt
die lùte, da get schade nach.
lant ùch, frauw, nit zu gach
sin mit diser red zuo mir.
getar ich es begern vnd wöllent ir,
so gebent mir frist zú zwölff tagen,
vnd lant ùch denn ein end sagen.
vnd beradent ùch auch hinn das
vmb vnser beyder sachen basz.
das ist vns beydenthalben guot.
vnd herfarent vwer lùte muot,
was jne an der rede behage,
vnd ende es an dem zwölfften tage
beydenthalb nach vnser sage.>
die rede wart also gelaszen.
vnlang sie gesaszen
nach der red vf dem palas,
dar nach yme dar komen was
mancipicelle, die meit,
von der ich vor han geseit,
die yme der ritter bracht dar
da vor an das vberfar,
mit dem er auch hatt gestritten.
als sie fùr den sal kamen geritten,
sie erbeiszte da vor so zú hant.
das pfert sie an einen nagel bant
vnd gie vil snell vf den sal.
ein houeliches< gruoszal>
bot sie mit zùchten vberal.
dar nach sprach sie zue gawein:
< helt, vor allem valschen mein
behúte uns an disem tage.
ob ich getar ader mag
mit bet sprechen, was ich wil,
das es ùch nit dùncke sin zu uil,
so sprech ich gern fùrbasz.
jch mag nit glauben das,
als ich doch höre sagen,
das ir ie möhtent bejagen
dise grosze auentùre.
an valscher mere stùre -
so ob mir ist gelogen niht -
dorch liebe man maniges dinges giht,
das vil licht doch nye geschah.
dar an ist vwer lob zú swah;
man möge der warheit jehen.
vnd ist es also geschehen,
das sal ich nach basz besehen.
hie by ein schoner anger stat,
dar vmb ein luter waszer gat,
das ist wedder zu tieff nach zu breit,
vnd ist der anger gekleit
mit bluomen maniger hand farwen:
rot, wijsz, bla begarbe,
gel, brun, weitfar.
vnder dirre bluomen schar
stent ander bluomen vier,
die bisonder ein riuier
vmbzuhet vnd beslùszt,
die sich nit wijte engùszt.
sie ist clar vnd smal.
von yme mögen die bluomen val
nymer werden zù keinen zijten,
wann sie den anger wijten
al tage ùbervert.
da von sie der dùrre wert,
des ist der anger vnbehert.
maht vnder den bluomen allen
miner frauwen gefallen
der bluomen zü einem schappel.
weren sie rot ader gel,
wijsz, brun ader bla;
weren sie ot genomen da,
ader was varbe es wer,
das wer ir also mer;
dar zu der vierer ein,
das sie der gesmag rein
noch widder jung gemacht;
wann sie hat geswacht
das alter an ir jugent,
vnd jugent suesze tugent
hat es ir vil gar benomen.
vf vwer gnade bin ich komen,
ritter, vmb die rede her,
das ir sin sit min gewer,
was ich sin mit steter ger.
jst, das die red geschiht,
so enzwijfel ich dar an nicht
fùrbasz keinen tag,
jr habent der auentùre bejag
hie herworben mit manheit.
ob ir mir der bet verseit,
so hette mich die mere bedrogen,
das da von ist gelogen
mit valschem vrkùnd.
des ich ùch niht engùnd,
das dirre mere wer also.
jch wolte sin wesen vnfro
dorch ùch bisz in minen dot.
als es ùch min frauw enbot,
also han ich die botschafft
vch gesagt, ritter tugenthafft.
jch enweisz, ob sie hab krafft.>
gawein sprach:< jumpfrauw,
gotte ich vil wol getruwe,
das ich uwer bett leiste,
vnd ist mir das meiste,
das mich dar bringt.
sit ir das gedingent,
das ich es moge gewynnen,
mit allen minen synnen
wil ich dar nach werben.
vnd solt ich deshalb verderben,
jch gewynne ùch der bluomen;
vnd hette sie in sinem guomen
der tùfel besloszen,
jch were sin vnuerdroszen,
zu gewynnen uwer frauwen;
vnd mag ich es erhauwen,
das lasz ich wol schauwen.>
der red sie yme gnade seit,
vnd was der vert snelliclich bereit,
das sie yme dar zeugte,
dwijle sie jne hatt geneigt
so gar nach irem mút.
des hatt sie jne mit hut,
des er sin nit widderkem.
sie vorcht, das jne nem
von der rede ettwer.
des was ir zuo der reise ger.
sie mohte wol enborn han
dirre vorchten dar an,
wann er flohe ie solche sitt,
da er sich vnwert mit
ymer moht gemachen.
er wolt sich nit swechen
mit icht, das er verhiesz,
vnd es nit war liesz.
da sich valsch vnderstiesz.
als nuo beyder rede was ergan,
vnd frauw ygern dar an
beyder ernst gar ersah,
zuo gawein sie mit gúte sprach:
< ritter, wollent ir volgen mir,
so wil ich ùch raten, das ir
dirre reisen dorch mich enbert,
der die magt an ùch begert,
wann sie ùch zü vnstaten komt,
vnd ùch doch dar vnder niht frommt
zue hohes prises wirdikeit,
nuwen, daz ùch dise meyt
wolte gern verleiten
zu den groszen arbeiten,
die sie dar von freise weisz.
disen vppigen antheisz
sùllent ir laszen vnderwegen,
wellent ir mins rates pflegen
dar an, vnuerzagter tegen.
vnd wil ùch mer da von sagen:
sie hat jn allen iren tagen
dirre verratung gepflegen,
das sie selbs mere seit,
wa sie irgent einen recken vant,
der dorch auentùre die lant
sùchte, als noch vil maniger tuot,
bisz sie mit al sinen mùt
mit ir valschen bet braht
dar hin, als sie denn hatt gedaht.
so braht sie in an die stat,
als sie jne der rede erbat,
da er des libs one wart.
also hat sie ùch dise vart
zuo vwers libes verlust gespart.
irem hertzen tuet vil we der nijt,
das ir ie genesen sijt
von dirre starcken auentùre,
wann manig ritter tùre
hie den lip verlorn hat,
der vil licht in siner sarwat
an dem bett ein wijle gelag.
dwijle ùch vnglucks slag
hat an dirre auentùre vermitten,
darvmb ist sie her geritten,
das sie an ùch den prijsz
wolte jn ettlicher wijse
gemynnern vnd geringen.
da hin sie ùch wolt bringen,
das ist mir so wol kunt,
das sie vwern lip so gesunt
gern wolt fellen in des todes grunt.>
als sie die rede hat verendet,
mit bett wart gewendet
an yne vil michel flehe.
die taugte alle nit vmb ein slehe.
was sie alle gebaten,
vnd sie es doch daten
mit flijsze one twale
mit ir zu dem selben male,
gawein von dem huse reit.
das wart gar senlichen gekleit,
doch moht sin nit werden rat,
wann wa dem mann sin muot hin stat,
das ist yme dick vnerwert,
da er so gar noch eren vert,
vnd ist die reise wol an gewert.
von dannan wolt sich nit scheiden
karadas von jne beyden.
der reyt mit jne beyden von dan.
gawein sin rosz gewann
vnd darzuo geringes reysegewant,
als jne dise magt mant,
die jne vor hett geseit
von einem wasser, das were breit,
dar ùber er swymmen sold.
darvmb er enwold
wapens nit fueren mer
denn schilt, swert vnd sper,
wann er die freise widdersasz,
vnd besorgte, das sin rosz lasz
von wapen schier wùrd,
sitt es ein swere bùrd
yme were in der fluot zú tragen,
vnd möchte da von verzagen,
der es vorhin hatt vberslagen.
gawein reit vil vnuerzagt.
sin wirt vnd dise magt
mit yme vf die strasze ritten.
des enhatt er doch nit erlitten,
wann das yme was vnerkant
dirre weg vnd das lant.
des muoste er jn gonnen wol.
sie hatten nit geritten vol
des weges vier mijlen,
bisz das sie an der wijlen
das wasser ersahen
vor jne da vil nahen.
da muostent sie widder keren,
vnd began auch er meren
sin reyse vil harte dar.
schier kam er an das vberfare.
das was nun brùck vnd newen bar.
das rosz er mit den sporn nam.
das waszer tieff vnd freiszam
kerte er one sorgen
vnd began yme lùtzel borgen
von keiner hand sache,
das yme moht zu gemache
vmb icht komen daran.
vil lang er swam vnd ran,
e er kam an den stad.
hett er nit fonden einen pfad,
der mit steynen beschutt was,
wie kaum er doch sust genasz.
er were anders nit genesen,
solt er icht lang sin gewesen
jn dirre groszen arbeit,
lenger, denn ich da von han geseit,
wenn das rosz was verzeit.
als er nù den staden gefie,
sin rosz er hertropfen lie,
vnd began es auch wol herstrijchen,
da von yme began entwijchen
sin múde vber al.
an dem waszer reit er zu tal,
bisz er vant einen steck,
der einen wonneclichen weg
jn den clugen anger trúg,
der sleht was vnd eben gnuog.
anders moht dar jnn nit sin,
denn der schönen bluomen liehter schin,
der began da geyn jne glijszen
von roten vnd von wijszen
vnd ander varbe maniger hand.
eins gesmacks er auch enpfand,
da von sin vngemach verswand.
als nuo der gesmack gein ym brah,
ein michel wonder da geschah.
gaweynen ein seliger slaff begreiff,
da von yme sin krafft entsleiff
gar von sinen glidden allen,
vnd was nydder gefallen
von dem rosz an der stund.
so hart yne begund
der hart slaff zwingen,
vnd solche mùwe zwingen,
das er sich nit moht erholen.
sust must er jne dolen,
bisz er jne des bezwang,
das er zuo der erden sprang,
vnd band sin rosz an einen ast.
dennoch wolt jne des sloffes last
nit laszen, da von yme gebrast.
sin muede was hart grosz.
von schloffe er vf die erde schosz,
das er sich nit moht enthaben.
als er nuo kam vber den graben
vnd wolt die bluomen han geholt -
den kumber er so lang dolt,
das er vil nahe entslaffen was,
wann er gefallen was uf das grasz
wol zu drijszig malen vor -,
vf sprang er von dem sloffe enbor
mit zorn vnd gefie sin sper.
wann yme zu dem sloffe also ger
was, das wolt er rechen,
vnd began zü hant stechen
das sper dorch sin selbs fusz.
da wart yme des sloffes busz
vnd vermeit yne sin arger grusz.
mit dirre red was er snell
vnd mahte yme zwey schappel
von bluomen, als die magt bat,
vnd gie suochen die stat
dar noch also schier,
da die bluomen alle vier
stunden, die er gering vand.
der brach er mit siner hand
zwa, zwa liesz er sten.
mit der red huob er sich von dan.
da er widder vber was gewaten,
auch da er sin rosz an der maten
da vor hett gebonden,
vil gering hatt er es fonden,
da er es hatt gelaszen e,
da es bluomen vnd cle
asz, vnd das tett yme nit we.
uf sin rosz er widder sasz,
vnd was yme worden vil basz,
denn yme da vor were.
slaffe vnd alle swere
hatt jne verlaszen vil gar.
nuo nam er des steges war,
den er dar in was geritten.
vnlang hatt er da gebitten
vf dirre wegscheide,
bisz er enneher die heide
einen ritter geyn yme rijten sah,
der vast usz dem wege brah
vnd reit in der aht,
als jne vil gar bedaht
grymmer mùt vnd zorn.
die beyde hatten yme gesworn,
das hett man wol an ym gekorn.
er was zú harnasch wol.
zuo yme was er nit komen vol,
das er yme fride widder bot,
vnd vil zorniclichen drot.
gawein das in schimpff vf nam,
vnd hort doch wol, daz er yme gram
was, als er selber jah.
darzú er es an yme sah,
wann er vnsteticlichen für,
vnd manigen eyt mit stete swúr,
er were des todes eigen.
das wolt er yme erzeigen,
e er jne von yme liesz.
wie vbel er yme gehiesz,
wie wenig es gawein widdersasz,
wann da hasz widder hasz
hatt besessen zwey fasz.
vil rede muost gawein enpfahen,
e denn er yme kam so nahen,
das er sich reht moht versten.
vnder des kamen dise zwen
zuesammen vf der heyde
mit tiostùre beyde,
die doch was vngeteilet.
vil dick hart veilet
sinen lip min herr gawein.
doch so wart die tiost vnder jne zwein
jne beyden vnschadhafft,
nùwen das der spere krafft
mit all da verswonden,
vnd wurden da erfunden
jn swachem werde vf der erden ligen,
aller wirdikeit verzigen,
vnd waren zuo spielen gedigen.
als der tiost was ergan,
jr ieglicher sin swert gewan
mit vil hertziclichem zorn.
da von waren verlorn
vil schier die schild,
wann sie der slege mild
beyde da einander waren;
vnd wolten das bewaren,
das sie niht dar an verlùren,
vnd beyde dar an kuren
beyder lib salig geworheit,
das es uszer maszen kleit
der ander icht mit rùwen.
des muosten sich nuwen
mit den swertten hertte strijd,
sitt sich hasz vnd nijd
entzund vnd wert die zijd.
als nuo die schild wurdent zerslagen,
wann jne lutzel wart verdragen,
vnd also da gelagen,
da múst es sere wagen
gawein widder den recken,
wann er moht bedecken
vor yme sinen lip mit niht.
die auentùre yme des giht,
das er vor dem tegen jung
nam manigen snellen sprung,
da von er manigen slag verlosz,
den er vil gar trostlosz
von gawein her widderzoh,
dem er mit listen entfloh,
vnd jne vf das swert gefie.
den strit ir neweder da verlie,
bisz sie ein muode vmb gie.
den strijt ir iglicher liesz.
gyremelantz der recke hiesz,
der widder gawein streit.
nuo er jne vant vnuerzeit,
wie wol er were wapensz bar,
das duhte jne ein wonder gar,
vnd sprach widder jne zú hant:
< jr sint ein tùrer wijgant,
das han ich wol an uch ersehen.
ritter, wie ist ùch so geschehen,
daz ir wapens also blosz
zú keiner freise, die so grosz
jst, also dise ist,
vch waget vf heyles genist?
das tuot nùwen tumber mut,
der guoter synne ist vnbehuot,
vnd nit verstet vbel vnd guot.
vch möht vil licht missegan,
wollen ir ùch dick verlan
an glùckes helff in solcher not.
das mohte ùch bringen den dot,
als ir tuont widder mich.
wiszent ir nit, daz gluock sich
vnderwijlent verkeret,
vnd danne den man vneret,
der sich so an es verlat,
wann es manig vnstete hat?
des haben die dick befonden,
die sich da vor enkunden
mit ir frauel behueten,
wann es beginnet wüten,
da man sich sin nit versieht.
auch mag es ùch gewegen niht,
so ùch so hart missegeschiht.
so ir auentùre suchent
vnd ùch so nit berùchet,
als es zymmt ritters art,
so möhten ir gerner die vart,
werent ir witzig, enbern,
jr wöltent ir denne also gern,
daz ir ùch bewarn möhten
vor schaden, als es dohte
vnd gezame zú rehte
eime also guten knehte,
als mich dùnckt, das ir sint.
nuo muosz ich laszen den strijt,
wie wol ir mir schaden habent getan,
den ich so groszen nye gewan
von keinem manne, der huot lebt,
vnd doch nach dem dem tode strebt
dar vnder, vnd mich nit begebt.>
< wer dem andern widder sagt,
er ist ni so gar verzagt,
er enfliehe, ader er muosze vehten.
das ist vnder guten knehten,>
sprach gawein,< das wissent ir wol.
dar vmb ein fromm ritter sal
den andern nit verswachen.
er sal es ime machen
glich, wa er ymmer mag.
anders ist es ein slag,
der jne swachet an dem lob,
ob er yme geligt, ob
er wolle fliehen als ein zage.
dem selben ich dann widder sage
aller vorderiger tiostùre,
vnd wùrt yme vil tùre
hoher prijs vnd auentùre.>
er sprach:< ritter, ir sagent war.
sit ir sint also bar,
möht ich ùch wol gesigen an.
so sal ich doch den strijt lan.
den lasz ich mit geding,
so das ich in volbring,
vnd ir des sint min gewer,
so ich sin an ùch ger,
vber dise zwolff tage.
dar vnder ger ich einer sage,
der ich dorch got frage,
das ich ùch des nit betrage,
jr sagent mir gütlichen die.
das wil ich mit trùwen hie
dienen vnd anderswa.>
die bedt gehiesz er yme da.
da sprach gyremelantz sa:
< ritter, wie sint ir genant?
wer mir das reht bekant,
des wölt ich ymmer fro sin.
dwijle ir mir es, lieber frùnt min,
verheiszen habent, so sollen ir sagen,
wann ich ie in mynen tagen
nie gesah uwers glichen.
des musz ich mich rijchen
an miner freuden sere wol,
das ich ùch erkennen sal.
des wissent wol die warheit:
jch hett ùch so ferre nit geieit,
hett ich es dar vmb nit getan,
das ich mit strijte dar nach besan,
das ich erfùre vwern nam.
des mich hart wol gezam,
dwijle ich den prijsz von ùch vernam.>
er sprach:< des sal ùch nit sin verziegen.
min nam was ie vnuerswiegen,
vnd ist noch vil vnuerborgen.
wedder dorch vorchten nach dorch sorgen
sage ich jne nymmer keinem man,
vnd ni her getan han.
wer sust wolt nennen
mit mynnen vnd mich wolt erkennen,
als ir sin begerent an mich,
deswar, ritter, den sal ich
dar an als einen frùnt gewern,
wil er sin nit enbern.
ritter, also sal ich ùch tún.
kunig artus swester sún
bin ich, vnd heisz gawein.
des ist zwijfel kein.
also nennen mich die lùte gemein.>
< sitt ir es, gawein, sijt,>
sprach er,< so sullent ir one nijt
ein red von mir vernemen,
die ùch nit missezemen
sal an keinen dingen,
vnd sùllent mir sie bringen
der reynen clarisanzen,
die sich an tùgenden gantzen
her one valsch hat behuot.
dis vingerlin vil gút
zu einem wortzeichen bringent ir,
vnd sagent ir da by von mir,
da ich sie zu nehst sahe,
das sie widder mich jahe,
sie truoge das vil geringer,
e mir an einem vinger
jcht gewùrre vmb ein har,
das gawein, ir bruoder, gar
lege in todes banden,
ader an fueszen ader an handen
bestùmmelt were,
wie hart jne das swere.
salig waren ir mere.>
< des mag ich nit getruwen,
das ie von jumpfrauwen
alsolche rede entsprùng,
die man nit bezwùng
zú der vnguete mit gewalt,
wann sie were gar zú balt,
solt sie es von ir gesprochen han.
darvmb wil ich ùch wetten an
den kampff, das es nie geschah,
noch wijbes gúte nie zerbrah
so groszes vnbild.
mit spere und mit schild
wil ich das bewaern,
vnd wil zü disen meren
manigen frommen ritter bringen,
vnd wil den tag dingen
mit gelùbde an dem selben tag,
an dem der vorder strijt gelag.
dar ùber wil ich iedoch
die botschafft bringen noch
der jumpfrauwen, vnd mag ich.
wes sie daran bewijset mich,
das han ich fùr ein warheit.
jr enwirt auch nymmer geseit
min nam, ader wer ich sij,
bisz ich dem kampff nahen hie by -
jst es, das wir beyde han
gelobt vf solchen wan -,
das ich ùch da zú recht bestee,
als wir es beyde gelobten e,
vnd ir mir das selb tuot,
es sij mir vbel ader guot.>
der strijt wart also gelaszen.
vf ire rosz sie gesaszen
vnd kerten gein dem castel.
die bluomen vnd die schappel
her gawein zù yme nam.
vber diese heyde lobsam
was der ritter sin gereise.
an aller slahte freise
braht er jne zuo sinem wege
mit wol höfelicher pflege.
da bleib er vnd reit er hin.
er fuort disen richen gewyn
mit yme gein dem huse.
reht vor an die cluse
mancipicelle reit
gein yme, die vil vbel meit,
vnd was aller freuden bar,
wann sie hatt verraten dar,
das yme da niht gewarr.
das sie doch vil heimlich verhal
vnd maht einen groszen schal
von lob mit valschem muot:
< west wilkom zù guot
mir,> sprach sie,< vil edeler tegen!
jr habent erworben vnderwegen,
des ir iemer geprijset sijt,
wann nie ritter bi vnser zijt
der bluomen keine brach,
dar zú nie keinen gemach
ye kein ritter vf dem bett gewan.
nu hat ùch beydenthalb dar an
got vil wol geert
vnd hat úch gemert
lobes hohen prijs da mit.
mit wol freudenhafftem sitt
der eren ich ùch bitt:
gebent mir ein bluome her.
darzü ich zú mynnen ger,
das ir mir ein schappel gebent
vnd iemer frölich lebent
vor mir one alle arbeit;
vnd sij ùch darzü geseit:
jch wolt ùch han verraten.
des mich zwen ritter baten,
die beyde sint bekant vil.
jre nammen ich ùch nennen wil:
lohenis von rahas
vnd ansgy taden das.
jch enweisz aber der rede niht,
von welcher hand vngeschiht
sie ùch disen hasz tragen.
sie wolten ùch han erslagen,
das kan ich ùch fùr war gesagen.>
gawein dirre megde bet
vil gar williclichen tet
vnd ahtet lùtzel vf ir sage.
mit der bluomen bejage
kerte er gein madarb
vf das husz vnd warb
dem ritter sin botschafft.
ygern die tugenthafft
da muost wesen da by
vnd orcades, also sie dry.
als er ir by yme enbott,
da von wart clarisantz rot,
darzu die muotter vnd die an.
als er diser rede began,
er gab das wortzeichen.
da begunde sie bleichen
von vorchten alle vnder jne,
vnd kerten dar an wijbes sin,
der da snelle ein ding hat verdaht,
wie er von der red wùrt braht,
das es noch eren were,
wann es was jne swere;
des velscheten sie die mere.
von der rede sie jn leiten
vnd yme gar widderseiten,
das es were gar ein niht,
vnd westen doch nit vmb icht,
wie es hin zu ime gezoh,
wann es jne noch vor floh
vnd was sie verholen gar.
sie wanden das fùr war,
das er da herre wesen solt,
wann er es da wol hette geholt
mit vil groszer mannheit;
vnd wolten, daz er die meit
clarisantzen hett genomen -
do muoste es alles anders komen -,
wann sie wol hetten gesworn.
an yme was das gar verlorn,
das sie jne so hatten erkorn.
die rede hie mit verendet was.
schier kam sin wirt karadas
vnd frauwete sich vil sere,
das yme so grosz ere
an der reise was geschehen,
als er die bluomen hatt gesehen
vnd das schappel glantz,
das sin swester clarisantz
truog vf irem haubt,
da mit er hett beraubt
den mynneclichen anger zu colurmein.
das gesind mit yme gemeyn
frauweten sich alle des,
als es ygern vnd orcades
vil willeclichen hortten,
die es nit zerstorten,
wann sie es schuoffent also.
auch waren sie selbs fro
vnd vorchten kein trurikeit drö.
ime was da gar vndertan
beyde wijb vnd man,
ritter vnd frauwen.
des mögent ir wol trowen,
sit yme da was gelungen.
die alten mit den jungen,
knapen mit den megden,
vil gar vngescheyden
waren sie von yme des mùtes,
libes vnd des gutes
one alles zwifels missedat.
helff, freude vnd rat
hattent sie an jne gewant.
beyde bùrg vnd lant
stunt gar in siner hant.
als es des nehsten morgens tagt,
sinem wirte er ein mere sagt,
das er jne hart verhelen batt.
her nydder reit er in die stat
vnd hiesz yme da sùchen
einen knapen vnd berúchen
mit rosz vnd mit gewand,
als er jne von dem land
zuom nehsten wolt senden.
einen knapen behenden
gewann er yme vf der stet
jn der statt, nach siner bet
wol geritten vnd gecleidt.
die botschafft er yme heimlich seit
zúschent yme vnd sinem wirt;
nit me er jne irrete.
da mit hies er jne rijten
( vnd nit lenger bijten),
so er snellest kund,
wa er artusen fùnd,
vnd die bottschafft wùrbe wol.
zü brytanyen zu karidol
hiesz er jne zúm ersten keren,
vnd began jne da lern
den weg, als er jne dar wijszte,
das er yme was der beste,
da jne jrte kein gebrest.
mit dirre rede reit er von dan
berge, velt vnd tan,
bisz er kam in das lant,
da er kùnig artusen vant
vnd by yme die kunden.
er hatt sie aber funden
one alle kurtzwijle gar,
vnd was der hoff aller geste bar -
das vil selten ie geschah -,
wan jn an freude brah,
vnd jne dise clage gebot
mins hern gaweins dot.
des hetten sie wol gesworn,
das er den lip hette verlorn,
sit jne das haubt braht wart
vnd von siner widdervart
jnen sither nit was geseit.
das was ein gemeynes leit,
das der hoff mit jamer kleit.
zuo karidol dis was,
das er vff sinem palas
mit jemerlicher clage sasz.
gynouer auch niht vergasz,
sie clagete jne mit truwen wol,
wann man das von reht tuon sol
einem frommen man.
da gedoht sie vil wol an
vnd jre frauwen al,
wann sie ein jamers kall
hett gar vbergangen
vnd endlich gefangen
jre freude in ir netze,
vnd nuo, an der letze,
ted sie jne also nùwe
den jamer vnd die rùwe
als an dem angenge.
sie dauret an der lenge,
vnd wart ir boy vil enge.
als sie nu alle saszen so
vnd gantz vnd gar vnfro
dorch gaweins dods willen waren
vnd frölich gebaren
jr keiner niht enkund,
nement war, an der selben stund
der knappe an den hoff reit,
da ich von han geseit,
ein pfert, das was apfelgra,
vnd erbeiszte an dem hofe sa.
hie mit gie er vf den sal.
die edeln ritter vber al
gein yme mit zùchten gingen;
den knappen sie enpfingen
vil höuelichen vnder jne
vnd fuorten jne fùr den kùnig hin:
das wart ir aller gewyn.
als er nù was gestanden,
er sprach:< von disen landen
edeler kùnig her,
got geb ùch alle die ere,
die ùch vwer neue gan,
von dem ich her braht han
die botschafft vnd den gruosz,
den ich sal vnd músz
vch nuo zuo stunt nennen,
das ir jne mùgent bekennen:
es ist der edel gawein,
an dem aller schand nye kein
noch laster wart fonden,
den ich vil gesunden
liesz vnd alles leides frij
zuo einem castel hie by,
jch wene, daz es hùt ein woche sij.
by mir er ùch enbotten hat -
des möge wesen kein rat -,
jr müszent yme zú hofe komen.
er hat einen kampf vf genomen
widder einen recken tùren -
dorch zweyer hand auentùren
dise rede geschehen ist -,
den muosz er in kurtzer frist
one widderrede vehten.
disen alten gúten knehten
hiesz er das selb sagen
vnd bittet, daz sie niht verzagen
vnd yme kumment zü helffe dar,
wann es zu sinen eren gar
steet, das wissent fùr war.
auch wissent, daz er einen man
zu dem selben kampf müsz bestan,
der ie widder ùch streid
vnd al zijt vff vwern schaden reit,
wa er mit iht kund
mit wercken vnd mit gund.
gyremelantz ist er genant.
vnd wil ich des wesen pfant,
das ùch vnd dem gesind
kein ritter ie so geswind
der eren geuarte
vnd ie so vil beswerte,
als er al zijt tuot.
da von, kùnig, ist es gut,
das ir es nit lenger spart,
jr leistent yme die vart,
wann es yme nie so dùrfftig wart.
er hat die selbe mere
vnd al solche swere
gynouern enbotten by mir,
vnd das sie nem zue ir
jr frauwen vnd ir meyde,
vnd mit ir ire augenweyde
yme kom da zu stunt.
so möhte sie yme hùre
nach zü keynen zijten fùrbasz,
ob sie yme leistet das,
keinen groszern dienst erbieten,
da mit sie jne gemieten
zuo ewigem gelte mohte,
das yme so wol töhte
nach sines hertzen steter ger.
dise bottschafft enbot er
vch vnd miner frauwen her.>
die rede der bott nit vollen gesprach:
der kunig sie ab brach.
von dem stul er von freuden sprang,
disen knapen gar sunder dang
kuszte er me wann driszig stunt
vnd ted yme grosze freude kunt.
also tett das gesind vber al.
dar vnder hub sich ein schal,
da cluoge freude wonete mit.
dise freuden richen sitt
hatt ersehen ein magt,
die in gynouern sagt
mit vil frölichem mut.
sie sprach:< frauwe, zu gut
han ich ein ding gesehen,
ob ich sin sal jehen,
da von freude ist geschehen.
eynen botten ich ersehen han
vor artus, dem kùnige, stan,
jch wene, er liebe mere seyt,
wann jne mit groszer wirdikeit
der kùnig vnd das gesind empfie,
vnd e denn sin sage gar ergie,
da sah ich in freuden schijnen
den kùnig vnd alle die sinen.
als ich mich rehtest versieh,
der warheit ich ùch gih:
sie halszten vnd kuszten
vnd dick zuo iren brùsten
sie mynneclichen drùckten
vnd jne vnder jn zuckten
hin vnd her nach den meren.
jch wil das beweren,
das sie freuden varen.
jch horte auch ùch nennen da,
wann ich jne alles vf der sla
was hinden nach geslichen,
bisz sie mir entwichen
jn den sal von der tùre:
da kamen sie mir verre fùr.
da von ich nit mer vernam,
wann das jne nach freuden zam
dise botschafft wol,
vnd das man gawein sal -
jch weisz nit, wa - zu staten komen.
so vil han ich der mere vernomen,
vnd daz er fùr war lebt.
dar vmb wil ich, daz ir mir gebt
wilkomens richen solt.
jch wil weder silber noch golt,
wenn daz ir mir sient der meren halb holt.>
von den meren in dem werckgaden
hub sich ein vil süszer kradem
vnder den frauwen so zú hant.
golt vnd guot gewant
wart gesuchet widder zú wege,
das vor truren vsz ir pflege
hett geworffen vnd sorgen,
wann sich von jne verborgen
die freude hette lang zijt,
als es an in vnfreude nit
mit ir vntruwe schüff,
vnd gab yne solchen iamers wùff,
der bisz vff die zijt an jne werte.
der sluog nuo der freuden swert
vil manige tieffe wonden,
das sie in hett funden
zu huse vnder jren kunden.
freude jren wert da widder gewan,
wann ir wib vnd man
began also da vor pflegen,
vnd lieszent gar vnder wegen
sorgen vnd truren,
vnd begunden basz duren,
denn sie vor ie getaten,
daran mit groszen staten
dorch dirre lieben mere sage.
das wart schin an dem tage
vnd darnach ymmer mere sit
one alle widderstrijt,
vnd was das wol von schulden:
sich hatt zu der welt hulden
so gaweynen zu dienst braht,
das sin mit guoter andaht
ye zù dem besten wart gedoht.
jne gab michel hochfart,
die jn was verspart,
die freude von der mere.
des wene ich, das da were
vil groszes zymmieren
von kostlichen gezieren,
von gold vnd von gesteine,
der die frauwen al gemeyne
dorch hohen muot pflagen,
die vor verworffen lagen,
das man ir zuo niht pflag,
sit der clageber tag
mit truren erschein,
dar an man hern gawein
jnen da dot hatt geseit.
die selb sage die freude enzwey sneit,
so daz sie mit jne verzeit.
uor sahe man har rauffen,
nuo moht man wol ab strauffen
sehen swache gebende;
vor sahe man die hende
vil jemerlichen winden,
nuo sahe man vff binden
manig köstlich schappel;
vor was ir varbe bleich vnd gel,
nuo wart sie lieht vnd clar;
vor was ir schönes har
verworren vnd zerbrochen,
nuo was es aber belochen
mit maniger wimpel cleinen;
vor was da groszes weynen,
nuo was da froliches lachen;
vor bitters hertzkrachen,
nuo wart man vns freude machen.
nuo was da riliches strijchen.
vor muost freude wijchen,
nuo gesasz aber freude da;
vor waren gerùht die bra,
dar nach wurden sie smale vnd sleht;
vor flosz das ende boses reht,
das was roh vnd hoch,
das nuo ein ebene vber zoch;
vor waren die mùnder bleich,
nuo der röte sie da entweich;
vor kosz man der augen niht,
nuo waren sie schon vnd lieht;
vor betzwang die hùffel manig trehen,
nuo muostent sie pigment ab zwahen;
vor wurden die brùste zerslagen,
nuo muostent sie die nüschel tragen;
vor waren die hend sal,
nuo wijsz, lang vnd smal;
vor waren die nagel vorn
von dem staube nit verborn,
nuo waren sie lere da vor;
vor stunt das gewant enbor,
nuo lag es von valten vol;
vor was es swartz als ein kol,
nu was es aller schöne vol.
was vor sweig, das erhuob sich nuo.
die videler, die richten zuo
zuo iren vil sùszen leichen
vnd begunden aber weichen
zuo freuden vil manigen mut.
manige suesze note vnd guot
von der harpfen zuo hant erklang.
auch erhub sich schon ir gesang
die rotte mit rijlichem tone.
das galt ir vil schone
die susze symphonie.
die fleute vnd die clye,
die lùre vnd die pusin,
die enwolten da nit sin
vnder den andern verholn;
man moht sie vil gern doln,
wann sie frölichen hullen.
darzu noch freuden schullen
mit den andern an dem drum
manochorde vnd psalterium,
der holer mit der gygen.
es enwolt auch nit swijgen
organisten vnd tambure.
ein selig nachgebaure
was frauw musica
mit allem irem gesinde da,
die vorhin was anderswa.
fabel vnd mere
die fabelierere
begunden sa zu hant sagen.
auch wurden vf den sal getragen
schochzabel vnd spielbrett,
vnd wurden so zuo der stet
gehangen zu den wenden
die schilte, vnd in den grenden
die sarwat gereynet,
vnd die helme beleynet
mit rijlichen zymieren.
tyostùren vnd turnieren
wart da zuo hant vf geleit.
gewùschet vnd wol gepfeit
der pferde vnd der rosze wart.
daran wart nihts gespart,
des sie zù freuden solten haben.
nu muoste trurikeit dannan schaben,
von dirre groszen freuden ligen.
sust kan freude wol gesigen,
da sie glùck heiszet digen.
kay pruefet dise freude gar
vnder aller dirre schar
dorch gaweins fruntschafft,
wann jne der selig krafft
an gawein mit gewalt bant,
das er guot vnd lant,
herren, sele vnd lip,
mage, kint vnd wip
ee alles hette verlaszen,
mit al verwaszen,
e yme icht leydes were geschehen.
daran mogent ir wol sehen,
das sin spott nit von nijde ging.
die besten er mynnet ie
vnd was den bösen zuo male gram;
je doch er nyeman usz nam:
so er spotten began,
nieman was des tadels an.
anders was er ein fromm man.
trost ist da dick funden,
da vor was gebonden
mit leid maniger hand ding.
also hatt dirre jungeling
mit diser lieben mere
jr clage vnd ir swere
vil gar vnderfangen,
die sie hett vbergangen
von der vordern geschiht.
wie wol die mere wer ein wieht,
so bedorfften sie doch trostes wol.
die rede ich hie laszen sal,
wann sie ist sùmung fol.
nach dirre sueszen bottschafft
wart heres ein vil grosze krafft
vil geringe zu sammen braht,
( das zu siner helff was gedoht,
als er mit dem botten batt),
wann es da von stat zu statt,
von bùrgen zü villen
mit vnverdrossenem willen
von kay snelle gebotten wart.
also wart die herfart
gekroijret in das lant.
alles, das jne an want,
das was vf al zuo hant.
mit kostlichem gereit
zu dirre arbeit
was dar bereit das her,
an allen dingen gar wol zu wehr,
als es zuo einer solchen reise taug,
wann vngern sich bedraug
dar an ir iglicher.
schoner vnd richer
wart nye herfart gefarn.
wes solt ich mich nu lenger sparn?
jch enfúder ire muot dar an.
jch sal sie schier rijten lan,
sitt ich es zü hofe braht han.
nach muosz ich ùch vor sagen -
wann ich sin nit mag verdagen -
was gynouer ted.
die warb auch mit stete
nach frauwen vnd nach meyden,
vnd hiesz sie da cleyden
mit kleydern so rijlichen,
das man sie moht glichen
den schönen göttinnen
an zúchten vnd an synnen,
an schöne vnd an richeit,
die die nature an sie geleit
hett, als die fabel seit.
jr was vil one zal.
dar vnder sich doch nyeman hal.
amurfina vnd sgoydamur,
der ietwedere also fuor,
das sie da von zú loben was.
nuo was burg vnd palas,
lauben vnd gadem
von disem süszen kradem,
deswar, allenthalben vol,
wann jne ted die reise wol,
da sie alle solten hin.
kùnig vnd kùnigin
enpfingen da von freuden gewin.
hie von wùrt ùch nit mer gesagt,
wann als es des morgens tagt,
da waren sie alle vf dem wege.
das her fuort in siner pflege
her kay, das was sin recht.
da moht man manigen guoten kneht
sehen vnd manig gezelt,
da mit der weg vnd das velt
mit al was bestrewt,
der sich ir iglicher frauwt
als ein lewe vf das wal.
darvnder wol mit freuden schal
die busune, vnd die fleute hal.
ob ich ùch nuo wolte pfrengen
vnd dise rede lengen
von adelichen sprùchen, als ich kan,
so wùrd mir villicht daran
von ettlichem vndanck
gesagt, ob ich ùch zü lang
die rede von niht mechte
vnd min kunst swachte,
die zuo iglichem ist bereit,
das sie von kurtzen meren seit
ein lang rede vnd gantzen sin,
vnd luter machet als ein zin,
wie lang ein auentùre schin.
darvmb ich es bliben la,
wann ich da vor anderswa
han gesagt von vil ritterschafft.
des hett min kunst klein krafft,
ob ich es aber avert nuo.
an dem sùbenden tag vil fruo
kam das her in das lant,
das madarp was genant,
fùr das castel zu salye.
kay gebot der maszenye
die herberge zu vahen
vor dem castel so nahen,
das sie wol dar uff sahen.
schier wart vf dem veld
von manigerhand gezeld
herbergarij vf geslagen,
vnd wart da mit gar betragen
der anger an dem flume,
das man da by vil kume
etwas des veldes blosz kos,
vnd sin reht so gar verlosz
der anger vnd die selb stat,
als es were gewesen ein trat
von angenge eyme her.
des was gawein gewer,
vnd was dem her darzü ger.
als nuo ygern die geste sah
vnd was von jnen da geschah,
des gewan sie trurigen mùt,
als ein frauwe dick tuot,
die ires landes sorge hat.
nú suchte sie der rede rat
zuo gawein mit sorgen,
wann es ir was verborgen,
wie es dar vmb was ergan.
da hiesz sie gawein die sorge lan
vnd sagde ir, das es were
artus, ir sun, der mere.
des frauwete sie sich vil sere.
jedoch sie dar vnder nam
vil manigen wang vor der scham,
wann er sich dar zú nant,
das er wol wart bekant
der muotter, swester vnd der an.
mit diser rede reit er dan
mit einem gesellen herab
vnd liesz in richer freuden hab
ygern vnd dise zwa.
auch was er des selber fro,
das er sie erfunden hett,
wann es kinden so zú mutter stet,
die es von liebe an get.
gawein by ein ander vant
jn einem gezelt alda zu hant
den kùnig vnd die kùnigin.
als sie beyde ersahen jne,
gein yme sie vf sprungen.
dar zuo nach yme drungen
die von der tauelrund:
mit hertzen vnd mit gunde
wart er von jnen enpfangen wol.
das man vil wol glauben sal.
sie mynneten jne alle
vnd verbar jnen haszes galle.
des enpfingen sie jne mit schalle.
nach disem antfange
gesaszen sie vnlange,
das gawein dem kùnige seit
von dirre groszen richeit,
die vf dem castel were.
auch sagde er yme die mere
von siner muotter ygern.
des horte er vil gern,
wann er sie nye hette gesehen.
es múste aber schier geschehen,
dwijle er was so nahe by ir.
des swúr die auentûre mir,
dar zú hatt artus ein gros begir.
darnach bewijset er jne des,
das sin swester orcades
were auch by ir mutter da.
dar zú seite er yme sa
von der megde clarisantze
vnd von gyremelentze,
mit dem er solte vehten.
das gefiel den guoten knehten
wol vnd artusen da mit,
ob er wölte, das er stritt,
dwijle es gelobt were also.
der mere wart das her fro.
also bleib die rede da.
nach disen meren vf das husz
gynouer vnd kùnig artus
mit gawein zu hant ritten,
das sie nit lenger biten,
vnd der ritter vil mit jne.
gawein einen botten hin
sante vf das husz den frauwen,
der jne seyte, das sie schauwen
artus wolte vnd sehen.
dar an was jne lieb geschehen,
wann sie sich wol cleidten
vnd einen antfang bereiten
beyde einen langen vnd breiten.
hie nam liebe lieben anblick,
wann sie gantzer truwen strick,
als es docht zú recht, bant.
sust was es darvmb gewant,
das es ieman mohte entbinden,
wann das reht wil den kinden
die mùtter alwegen geben.
auch nit enwissen die kind leben
nach der mùtter von truwen.
daran kan sie nùwen
rechter nature art,
das selten ie verkert wart,
es enwere bi schaden hochfart.
die rede ist jne allen kunt,
das vrsprung vnd grunt
aller truwen an jne beyden ist.
der kùnig jnner kurtzen frist
was vf das castel komen.
da wart vf beyder sijten vernomen
ein vil sùszer antfang,
der ùch zú sagen were zü lang.
jr mögent aber selber wiszen wol,
das er was richer freuden vol,
one alles valsches argen won,
wann artus vnd ygern gewan
vf beyder sijten freude dar an.
als nuo der antfang erging,
ygern artus gefing,
jren lieben sun, by der hant.
beyde bùrge vnd lant
began sie yme da zeugen
vnd wolt yme zuo eigen
allessampt han gegeben
alda zuo hant by irem leben.
do wolt es artus nit enpfahen.
vil gar sie yme verjahen,
wie sie dar waren komen.
sust was die freudenriche schar
den tag in der wonne gar.
da artus ir wesen gar erfuor
nach also richer tugend fúr,
des was er von hertzen fro.
by ir vf dem castel da
er vnd gynouer bleip.
die zijt er da vil wol vertreip,
des gezam sinem gesinde wol.
volliclichen, als man sal,
wart gedienet allen den sinen.
daran muoste schynen
jr muot vnd ir richtuom.
es was aber gar sunder ruom,
daruf maniger ist frum.
uil kurtzewijle begunden,
als sie vil wol kunden,
ygern vnd ire geste,
wann nye kein gebreste
an keinen dingen widder rang,
der ir freuden ted gedrang,
nùwen dirre kampff allein,
das zum nehsten min herr gawein
mit gyremelantz vehten solt.
so vil so in das geholt
vmb iht freuden dar an,
des man doch cleyn sorge gewan,
wann sie bekanten wol den man.
des andern tags was die zijt,
dar an wesen solt der strijt
vnder jne beyden.
da wart also gescheyden
von artusen gewalt,
das man clarisanzen solt
mit elicher heyrat,
als es nach der sitt jnn hat,
jn gyremelantzen hant,
darzu madarp, das rich lant,
vnd was darzú gehort.
ygern es nit zerstort,
wann sie es gern hort,
vnd doch mit dem geding:
wenn sich wolten zú ring
haben vf die ritterschafft,
das es mit solcher eyde krafft
so wùrde gebonden,
das entweder wùrde fonden
an keinerhand lùgen meile.
von ietwederm teile
wart der eyt also genomen.
das wart aber wol vnderkomen,
das sin icht geschehe.
ob das bùch icht anders jehe,
das seite ich ùch sunder wehe.
jch getare ùch das wol sagen,
das sie beyde fùr zagen
daran nyeman dorffe han,
wann sich als ein from man
jr ietweder da hett bereit.
auch was jne von hertzen leit
der gewalt, der an in erging,
nùwan das es vnderfing
clarisanz vnder jne:
die gie beydenthalben hin
vnd batt sie laszen den strijt.
also zerfuorte sie den nijt:
wijbes gúte vil guotes gijt.
als nuo die rede bestetigt wart,
da wart vmb die heymfart
darnach zu hant geahtet
vnd wart das bedrahtet,
das gyremelantz vnd die magt,
als es des morgens tagt,
mit yme gein karidol rijten.
darvmb wart nit vil gestrijten,
wann er wolt sin nit enbern.
da wolt er sin nit entwern,
wann er des lang hatt begert,
das er gesehe der tùgend hert,
da von man sagt so groszen wert.
snell wurden sie bereit,
kostlich geritten vnd gekleit,
vnd ir gesind vber al,
dem ich gib kein zal,
wann sin was vszermaszen vil.
da mit ich es laszen wil
vnd wil die mere fùr mich sagen.
als es morgens began tagen,
artus vrlaub von jne nam.
clarisanz tet alsam
vnd gyremelanz, ir amijs.
das wart gelaszen in keyne wijse,
vnd kerten gein yanphis.
gynouer sich vnderwant
clarisantzen zù hant,
gyremelantzen amyen.
also tett sinem geschwyen
der edel reck gawein.
vsz dem land schieden sie gemein
fùr janphisen, die riche stat:
gyremelantz der rede bat,
wann das lant was sin eigen.
das wolt er dar vmb zeugen,
das man jne hette deste basz.
auch leistet yme mit willen das
kùnig artus, der eren vasz.
mit freudenrichen sitten
den weg sie gein irem lande ritten.
yedoch wart kay fùr gesant,
der die fùrsten in dem land
ladet zuo den hochzijten.
die bereit er vil wijten
vnd sammelte ir zü male vil dar,
ee kùnig artus vnd sin schar
widder heim kummen waren,
wann sie von den meren
wurden zuo male fro alle.
mit vil groszem schalle
kamen sie gein cornoalle.
von dannan kerten sie gein karidol
vnd waren nit erbeiszet vol,
bisz das auch kùnig artus kam.
da wurden sie vil ersam
beydenthalben wol enpfangen.
des endorffte sie nit verlangen,
sie hatten freude vber vil.
vnd hùb sich der ritter spil,
das sie heiszen buhurdieren:
da sah man tiostieren
vor frauwen manigen recken,
als es wol kund wecken
gynouers sitt vnd ir hoher muot,
der yetweders gern tuot,
das die lùte duncket guot.
vil kurtzwijle da geschah,
wann es der wùrt gern sah.
dem volgete auch das gesind mit,
wann es ie in disem sit
also was gewahszen her.
des was yme dar nach ger,
wann wes der man ist gewon,
da mag er vbel kummen von.
ob sin dar zuo die nature begert,
so muosz er endlich sin gewert,
wann es sin nit enbirt.
also stunt es vmb disen wirt
vnd vmb das gesinde.
da von ich nit vinde,
daran sin lob swinde.
dje hochzijt was zuo male grosz:
der gast vnd der huszgenösz
vergeben rosz vnd gewand.
da was manig gebend hand
dem kùnige zu eren.
das kund er wol geleren,
wann er da von niht gezoh.
manig rosz schon vnd hoh,
silber, cleider vnd golt,
das wol heiszet richer solt,
gab er da der varnden diet,
als yme sin milte riet,
da von er sich nye geschiet.
vor eren wart da niht gespart:
mit vil groszen eren wart
die hochzijt fùr gekert
vnd wurden rijlich geert,
was dar gesindes was komen,
e ein end hatt genomen
der hoff vnd die brutlaufft.
des wart salig ere gekaufft,
der sich nit mohte gelichen.
den recken tugentrichen
sie zu huszgenoszen enpfingen:
sinen schilt sie hingen
vnder ire schilde voreste
von der stat, da die geste
alle ire schild hingen hin.
sie gaben yme auch vnder jne
ein stat zu der tauelrund
mit gemeinlichem gund
an der selben stund.
also bleib er by yme da.
dise auentùre ich hie la
von disen recken vnd sage
aber von gaweins beiage
vnd von siner arbeit,
als ich da vor han geseit,
wie es yme nuo ergie.
e denn sich der hoff zerlie,
er gedohte siner gelûbde wol,
als ein ritter tuon sal,
der siner truwe nye vergasz.
er gie, da der kùnig sasz
vnd die maszenije al,
von siner swester in den sal
fùr sinen ôheim stan.
einer rede er da began,
die er nit wolte lan.
er sprach:< kùnig, vernement von mir!
dwijle dise fùrsten vnd auch ir
hie zuo sammen kommen sijt
zuo dirre freuden hochzijt,
so mag ich des enbern niht,
jch muosz ùch min vngeschiht
kunden vnd sagen.
jch wolt auentùre bejagen,
als ùch wol kunt ist.
da wart ich ùch in dirre frist
dot her zuo houe braht.
ein ritter sich dar an verdoht,
den ich vor sinen fyenden nert,
die jne des libes hetten behert,
hett ich es nit vnderstanden.
von schaden vnd von schanden
dorch ritters ere ich jne nam.
des wart er mir mit al gram.
der red ich mich fùr jne scham.
jr wiszent wol, wie es geschah:
truren des houes freude brah
vmb mynen clagebern dot,
vnd was das gar one not,
als ir selbs an mir seht.
es ist auentûre reht,
das man dar an enbind
die warheit vnd erfind
mit warem vrkund.
wen man an lùgen find,
des wert sal verworffen sin
dorch den lùgenhafften schin,
da man guete ritter prijset
vnd zü hohem lob wijset
vmb iren herworbenen gantzen wert.
wes des mannes mút begert,
des sal man yme wesen by,
ob es so redbar sij,
das man sin gefolgen moge.
mannheit begert salden pflege,
der guoten freude ist arger ege.
min rede wil ich nit lengen,
nach ùch dar an pfrengen,
wie wol ich vil zuo reden hab.
so ich ymmer snellest dar ab
vch mag berihten, das wil ich.
einen weg, der wijset mich
nehste, als ich von ùch reit
vnd nach auentùre jeit,
jn ein vnkundes lant,
dar jnn ich vil groszer auentùre vant,
die ich vbel gesagen mohte,
ob mir dar zu dohte
von múszikeit die zijt nuo,
der ich lùtzel han darzü,
wann ich anders han zú sagen.
das mich der weg hett getragen
dar, das gerauw mich sitt,
wann ich da vnglichen strijt
vand vnd vil vbeler zijt.
jch hett vor manigen jarn,
da wir gesammelt waren
dorch richer auentùre beiag
zú babilonie vnd zü baldac
vf einem groszen turnoy,
den angsir von slaloy
vnd gamur, der sarratzin,
von fyrus bahandin
widder ùch, herre, hett genomen.
dar zú manig ritter komen
was von barbarij
gein vnser maszenij.
zú dem selben turnoy was
von garafin angeras
vnd sin bruoder dahamorht,
den ich mit ritters tat entworht.
leyder da mir missegie,
wann ich yme die coyfe nidder hie
vnder den wapenrock zu tal.
das wart vnser beyder val,
das ich gotte clagen wil.
es wart sins libes zil,
ee denn sich schied das spil.
sunder schuld was ich dar an.
vil lùtzel ich mich versan -
wann die rede geschah,
e ich reht versahe -,
das er sich vbel hatt bewart.
sin dot mich harter beswert
danne er ieman an in.
vmb den ritter ich nu bin
komen in michele not.
also gelten ich sinen dot,
deswar, one min schulde gar.
jch wil es kùnden offembar,
wie angeras an mir zerbrach
ritters reht, das nye geschach.
des muos ich liden vngemach.
von vnglùck es mir erging,
da ich den selben weg gefing.
nuo mag sin nit werden rat:
sit es mir also stat,
jch solte es ùch vil stille sagen.
der selb weg began mich tragen
jn das lant zuo garaphij.
jch wande, er solte mir wesen frij,
als er mir ie gewesen was,
wie wol mir effeydas,
herre, vwer base, hett geseit,
da ich dorch auelan reit,
das ich arbeit erlitt,
ob ich den weg nit vermitt.
des wolt ich ir glauben niht,
bisz ich selbs die geschiht
mit groszer arbeit erfant,
da ich kam in sin lant.
da bant mich harttes kumbers bant.
ich vant vf einer heyde
angeras mit gejeide
bi einem rotwilde;
vnd by yme vf dem gefilde
knappen vnd ritter vil
lagen vnd pflagen hunds spil
mit vil groszem schall.
sie waren mir aber all
vnbekant, das ist war.
vnder sie kerte ich dar.
jch wart da wol enpfangen:
sie begunden mir anhangen
alle mit gemeyner bed,
das ich bliebe. des ich nit ted,
wann ich fùrbasz wold
vnd dannoch nit ensold
herberge vahen.
als sie das ersahen,
sie lieszen es vnderwegen
vnd ergaben mich dem gottes segen,
das er min solte pflegen.
von dannan reit ich min strasze
basz denn die reht masze,
wann es was dem abend by.
schier kam ich gein karamphi.
da nam ich nahtselde.
angaras, dem helde,
kam geringe fùr die mere,
das es gawein were,
der die strasze fùr jne ritte.
mit vnritterlichem sitte
began er mir nach jagen
vnd wolt mich han erslagen,
wa er mich hett funden.
nuo was ich an den stunden
erbeiszet an min gemach,
der mir volliclich geschach.
jn sinem huse das was.
schier hatt angaras
an dem wege her vernomen,
daz ich yme zuo huse was komen.
des liesz er mich genyeszen niht,
das doch selten geschiht,
als die welt alle giht.
man git dem huse groszes recht.
das wolt dirre gut kneht
an mir han gebrochen
vnd den bruoder gerochen
gar widder sin ere.
vnd hett mich so sere
sin selbs vur niht gewert,
jch were gewesen vnhernert,
wann ich was wapens blosz.
des mich sin swester soreydos
nach miner kunfft niht erliesz,
die mich so entwapen hiesz.
das aber sie dorch gút tett,
vnd spielte mit mir vf dem brett
dorch beyder kurtzwijle gir,
das zue vnstaten mir
da, deswar, was komen nah.
da yme vf mich was so gah
vnd ich was vngewarnet,
jch hatt nah herarnet
dise spise vnd vergolten,
so das er sin bescholten
vor aller der welte múste sin.
daran kam es, herre min,
das ich doch zú lest
mit eyden, die vil vest
waren vnd gewere,
muoste sweren, daz ich were
aber da jnnerhalb iars frist
mit aller der mitwist,
die gefangens ritters reht ist.
auch begert er, das ich swuere
manigen eyt, daz ich herfúre
mit alle gar bisonder
das manigfalt wonder
von dem wunderlichen gral,
vnd daz ich nymmer wochen mal
jn uwerm hofe bliebe me,
fùr das dirre hoff zergee.
der rede muoste ich aller sweren,
mich enwolt sin der dot beheren,
das ich es alles ted.
auch muosz es wesen sted,
ob mir got des lebens gan.
jch bitt ùch, herre, daz daran
vwer wille wese gút,
vnd das dorch minen dienst tuot:
vrlaubs begere ich vnd bitt,
vnd daz ir mich stùwrent da mit,
das es ùch nit beswere,
wann e ich es verbere,
diewijle ich mag das leben haben,
jch wolt mich e lan begraben.
des wil ich einen eyt staben.>
als er nuo hatt wol gesprochen,
die still wart vnderbrochen
mit vil groszem schall.
artus vnd sie all
von der rede erquamen.
als sie reht vernamen,
was er jne da hett endacht,
deswar, in tet sin andaht
gar hertziclichen leit,
wann dise hart arbeit
nieman volbringen kund.
dar vmb in hart enbund
die massenye der reyse
dorch die bekante freise,
die sie daran westen.
wie gar sie notvesten
jne ie doch bekanten,
so muosten sie es anden,
wann an yme allein lag,
was man do freuden pflag;
der was er aller orthab.
nuo gawein ir vngehab
vmb jne gemeinlichen sah,
yme was leit, das es geschah.
mit zùchten er aber sprah:
< herre, hörent, was ich ùch sag:
jr sollent dar vmb keiner clag
gedencken, ob ich vrlaubs ger;
jr sollent sin gern min gewer
sin. des habent ir michel reht.
deswar, es sal ein guet kneht
e alle freise vbersehen,
e denn man yme mùge iehen
vntruwen ader zagheit.
sit aber ich vil manigen eit
vmb die reise han gesworn,
so were ich wol verlorn.
jch weisz auch wol fùr war,
das nyeman vnder dirre schar
jst, der es widderrate mir.
auch weisz ich wol, das ir
mir vwer huld e widdersagt,
ob ich daran wer verzagt,
e ir mir es widderrietent.
jch wil, daz ir es gebietent
mir by uwern hulden.
das tunt ir von schulden.
was töht ich dirre ritterschafft,
were ich also zagehafft,
das ich es nit dorste besteen?
hie wil ich dise red lan,
e wann ich me zuo reden han.
ein red ich ùch noch sagen sal,
der mögent ir ùch frauwen wol,
der ich ùch wares vrkùnde
bringe an diser stunde
vil richer auentùre bejag,
der an der selben reise lag,
da ich dise rede vand.
mich trúg der weg in das land,
da die salde jnn gehuset ist
zú ordohort by sianist,
gar sunder minen dang.
daran mir seliclichen gelang,
das ich den weg ie gereit,
wann ich miner arbeit
vor freuden da gar vergasz,
als sie in ir wirde sasz
vnd gar in ir magenkrafft
mit vil groszer herschafft
vf einem richen palas,
da ir wesen vff was;
vnd mit ir ir kint, das heil,
mit gar glichem erbteil,
des wart da freud vil wolfeil.
wann sie dorch minen willen
liesz allen kummber stillen
vinsterthalben an dem rad,
des wart ir kùmberlicher schade
verwandelt zù heil.
die an dem zeswen teil
worden auch basz gefreuwt:
aller ir kumber wart gesteuwt
von frauw salden dorch mich.
sus gnediclichen wart ich
da enpfangen von ir.
von ir hend gab sie mir
ein heilhafftes vingerlin.
herre, das sal vwer sin,
das hat sie ùch by mir gesant.
darvmb ist es so gewant:
die wijle ir das behaltent,
das ir iemer waltent
richeit vnd gantzer eren,
wa hin ir es wellent keren,
zu gutes salden ader zu sig.
das an dem vingerlin lig
jr ietweders, das ist war.
das sagt sie mir offembar.
auch gab sie mir ires wunsches segen,
das min der iemer solte pflegen
zù allen arbeiten.
jch enwolt nit beiten:
vrlaub nam ich sa
vnd lie mich widder vf die sla,
die mich widder bringen solt
mit dem sighafften gold,
das sie ùch gesant hat.
darvmb, herre, es also stat,
als ich ùch han gesagt.
jch wil nit, das ir clagent
dar an dhein min not,
sit uoch salde also enbot
mit seligem wortzeichen,
das ich mag gereichen
vnd gezeigen offentlichen
armen vnd richen,
die es gern wöllen sehen.
was daran ist geschehen,
des kan ich ùch gar verjehen.>
hie mit gab er das vingerlin.
das gab so liehten schin
von gold vnd von gestein,
das die ritter gemein,
die da by artusen
saszen in dem huse,
begunde nemen wonder,
vnd baten alle bisonder,
das sie es mohten schauwen.
schier kam es den frauwen
vnd gynouern zuo meren,
das in dem sale were
ein selig auentùre,
die rich vnd tùre
were an allen enden.
da hin baten sie senden
einen botten die kùnigin:
die sante ein magt da hin,
daz sie die rede erfure da.
die magt sagt die mere sa,
was gawein hett braht.
der hoff was daran verdaht:
die rede von ritter zü ritter gaht.
als nú der kùnig hat vernömen
vnd alle, die dar warent komen,
war er die rede kert,
vnd wie jne hette geert
frauw selde in irem land,
daz sie by yme sand
artusen dis cleynot
vnd yme heyles wunsch enbot;
des waren sie alle fro
vnd satzten sin lob so ho
dar an, das es in beswert ni,
was er kumbers da von ie
erleit ader salt erlijden noh,
wie gar siner nöte ioh
noh an der reyse lag,
die yme gar vnwag
was an allen sachen,
wann freudenriches lachen
daran guot verwijszen wart,
e dise angstliche vart
von yme geleistet wùrd.
ob kay dise bùrd
flùhe, das were wonder niht,
dem sollich zagheit giht
vnd manigerhand vnfuor
die auentùre mir swuor,
das des icht geschehe.
sie seyte mir: als er sehe
der richen auentùre wert
vnd das er vrlaubs gert
vnd der reyse nit wolt enbern,
er begund an dem kùnige begern
vrlaubs. das selb tet
mit yme da her lantzelet.
artus schuoff vf ir aller bett.
das selb bat auch kalocreant.
des andern morgens so zu hant
wart dise rede so grosz.
den kùnig es sere verdrosz
dorch sinen neuen gawein.
also taden sie al gemein,
beyde man vnd wijp,
dorch sinen tugentrichen lip,
also frùnde frùnden tuont,
wann nie kein ritter bestunt
die freise, er were dot.
das was die gemeyne not,
die vmb gawein was,
von jne allen vf dem palas.
da enmoht sin nit rat wesen.
solte gawein nyemer genesen,
er wolt sin nit laszen.
als sie nuo in der rede saszen
vf einem palas enbor,
da erbeiszte vor dem burgthor
ein vil wonnecliche magt,
wol geziert vnd wol gekleyt
von richer zimiere.
die mere was vil schiere
zue houe braht von ywanet.
die magt gie so vf der stet
zuo artusen vf den sal,
da die maszenij al
mit leid was befangen.
als sie zuo kam gegangen,
die ritter vff sprungen;
von alten vnd von jungen
wart gein ir vast gedrungen.
fùr den kùnig sie die magt beleiten.
sie wolt auch nit lenger beyten,
sie neige siner magenkrafft.
sie warb ir botschafft
gein siner werden kron
mit zùchten vil schon
liesz sie ir nit wesen gah.
vil muosziclichen dar nah
jr red sie began.
sie sprach:< kùnig, sal ich han
nach vrlaub miner sage,
das ùch daran icht missehage,
ob ich ir e beginne,
e die frauwen alle hie jnne
vnd die kùnigin kummen darzü?
was ir wollent, daz ich nuo
tuo, das sollent ir sagen mir.
jch wil aber, herre, daz ir
die kùnigin besendent.
die rede mag nit wol verendet
werden one sie.
dar vmb so muosz sie wesen da by.>
nach den frauwen ging her kay.
gynouer mit den frauwen,
nach wijbes reht erbuwen,
da in den sal gingen.
die magt sie enpfingen
mynneclichen vnd wol.
sie waren nit gesessen vol,
e dise herkomende magt,
von der ich vor han gesagt,
jr botschafft an fie.
wie ich verswiegen hab, wie
sie gezimiert were:
es were doch redebere,
das ich es zue reht seit,
wann das mich fùrbasz ieit
dirre auentùre geschiht.
anders solt ich sin niht
verswijgen, wann in frantzoys
jr meister, cristion von troys,
sie hart mit lob prijset.
vnmuosz mich abwijset,
vnd daz ich vil wol weisz,
wer sich an tùgenden ie gefleisz,
dem ist das vil wol bekant:
wer in ein so fremdes lant
so werde botten sand,
das er jne sunder schand
des werdes kan bringen,
bewart an allen dingen -
des wolt ich mirs ringen.
die magt vor dem kùnige stunt,
als die botten alle tunt,
die in den zùhten betagen,
bisz sie ire botschafft gesagen.
sie sprach:< kùnig artus,
vwer hoff vnd uwer hus
jst bekant vil wijte.
es lebt by disen zijten
nieman, der ùch sy genosz.
vwer lob ist allenthalben grosz
von gantzer tùgende werde.
es wart vf der erden
nie man basz bekant
vber alle welsche lant,
deswar, herr, dann ir sint.
so ist auch gar sunder strijt
dise tugentriche geselleschafft
sunder schantlichen hafft,
da von ir hart sint geert
vnd vwer riches lob gemert
vil gar vnerworden.
es wolt an ùch horden
frauw salde alles heyles hort:
beyde werck vnd wort,
des habent ir alles bekort.
ir sollent mich gern vernemen,
vnd mag ùch das wol gezemen,
wann es ùch zuo staten kumt
vnd ùch an allen sachen frummt.
ein botschafft ich bring
mit solchem geding,
deswar, das gut zuo nemen ist.
vch hat her von syanist
gesant myn frauw gyramphile
einen hentschuoch, der ir gefiele
von frauw salden zuo teil
vnd von irem kind, dem heil.
vmb den ist es so gewant:
wer jne hat an siner hant,
der schijnet nit wann halber da,
vnd ist der lip anderswa
gar volliclichen gesehen.
wie das ymmer mag geschehen,
das wil ich ùch sehen lan,
so ich vol gesagt han,
wie es dar vmb sal gesteen.
der hentschuoh sint zwen:
wer disen an legen mag,
den ich vf auentùre bejag
han braht zú houe her,
deswar, des wil ich sin gewer
sin, das yme den andern git
darzú frauw salde sunder strijt.
der bejag aber zuo hohem prise lijt.
jch sage ùch, wie es darvmb stat:
wer ein valsches hertz hat,
es sij man ader wijp,
jst yme mit icht der lip
gefelschet mit schanden mal,
das es nit gar als ein stal
jst an allen sachen -
also vnstete machen
an manigem hertzen kan -,
das wùrt offen daran,
wil er das cleynot tragen.
das wil ich ùch fùr war sagen.
es kan aber vnder beyden,
wijben vnd meyden,
bescheyden sunderlichen krang -
an meyden rede vnd gedang,
werck vnd gedang an wijben -
an iglichem libe
darnach, vnd es ist an ime.
die ritter ich darzu nym:
der tugend vnd mannheit,
vnzucht vnd zagheit
erzeigt er mit al
mit miszlichem val.
auch hat er ein sunder reht,
das er an frauwen speht,
des ich nit verswijgen sal:
welches wijp getrùwlich wol
kan vnd mit steten
nach gantzes hertzen reten
pflegen heimlicher amijs,
die sie dorch stiller freuden prijs
nach hertzen rat hat erwelt;
ob sie der e ist gesellt,
vnd ob sie sunder ruwe
niht zwischelt ir truwe,
sit sie in gnaden hat gewert,
vnd valscher mynne nit begert
an jne dorch valschen list;
ob er ir niht also ist
dorch dheynen vnsteten mùt;
hat er sich widder sie behuot,
als er ir was in der bet,
vnd da sie sinen willen tet;
des wirt er ir vnuerseit gar.
hat aber sie icht vmb ein har
dhein valsch widder jne,
so hat die schand an ir gewynn.
der red ich gar sicher bin.>
hje mit die jumpfrauw nam
das cleynot vil lobsam
vnd bote es dem kùnige dar.
sie sprach:< herre, nemment war,
wie ùch das cleynot behag
vnd min rede, die ich sag,
vnd sagent, was vwer will sij.
jch muosze wesen da by,
ob ir des wellent berùchen,
das ir es lant versuochen
an rittern vnd an frauwen,
deswar, ir moht schauwen
dar an michel wonder.
sal er werden bisonder
von den frauwen an gestrichen,
man sieht gar erblichen
manig roserot varbe,
der schin nature begarbe
mit glantz hat vbergoszen.
auch beliben vngenoszen
sin die ritter niht,
an den kein miszgeschiht
hie schinet mit iht.
doch sal ich vor jne allen e,
ob ich vngewert niht beste
miner bet vnd min frauwe,
zuo offenlicher schauwe
disen hentschuch legen an,
das ir sehent, ob ich han
die warheit dar an geseit.
vnd bin ich des vil bald bereit,
das ich mich des nit ensaume,
wann ich, herre, kaume
erbeite der widderkere.
nuo sehent, was uwer ere
dar an sij! das lant geschehen,
das ich das müsze gesehen
vnd dise maszenije,
wie iglichs amije
vnd iglicher amijs
stetes hertzen hohen prijs
ein ander haben getragen.
auch sal man schauwen valsche zagen;
den kan er wol gezeigen.
schand vnd tugend seigen
kan er mit glicher woge.
wen miner rede betrage,
der sal mir nit wesen gram.>
hie mit den hentschuch nam
artus, wann es yme wol gezam.
e denn ich icht sage fùrbasz,
jch sal ùch basz bescheyden das,
war vmb dar dise magt,
da von ich han gesagt,
was gesant vnd von wem,
das ùch dar an icht benem
min vnmuosz der fabeln sag
vnd ùch der warheit entrag,
vnd das ir ùch basz verstat,
das sie vil groszen nijt hat
dar braht; vnd sage ùch, wie
sich dirre nijt an fie:
finbeus ein ritter hiesz
von sgardin angys,
an allen dingen volkomen.
den hatt ir zu amijs genomen
ein schöne göttin,
die yme ir suesze mynn
sin tag hatt gegeben.
mit hohem prijse werdes leben
sie von einander truogen,
als von mynne genuogen
noch von liebe widdervert.
die göttin hatt yme erwert,
das er ni auentùre
dorch keins lobes stùwre
mer gedorste versùchen,
bisz sie jne so beruochen
mohte, das sie were
sicher aller swere
an yme; das sagt die mere.
da hiesz sie yme mit listen -
da mit sie jne wolt fristen
vor aller freise anfart -
einen gùrttel wircken. der wart
mit solcher krafft geworcht,
das er vil gar one vorcht
was, dwijle er jne truog.
an der tugend was gnuog
an yme, als ich sagen wil,
der ich ùch keine hil:
er duhte hùbsch vnd gut,
wol gezogen vnd fruot,
schon usz der masze.
was ich lobes lasze,
da ich jne nit in nym,
des dauht gar zú uil an ym.
der da mit begùrttet was,
vor aller freise er genasz,
als ich es in frantzoisz lasz.
das kam von der stein krafft
vnd von groszer meisterschafft,
die dar an was geleit.
kunst vnd wunsch was bereit
jr, die jn wircken liesz
vnd jne so selig wesen hiesz.
der selben swester gyramphiel
das was, wann ir hertz wiel
vf dises ritters mynne.
nuo mit so richem synne
vnd mit solcher kunst
nach frauw salden gunst
der gùrttel gewircket wart.
finbeus sin alte vart
vf auentùre aber ieit,
als es sin gewonheit
ye gewesen was bisz her.
des was gyramphiel gewer,
wann sie sin nú vorchte niht.
von auentùre geschiht
kam er gein karidol.
da wart er enpfangen wol,
als man einen recken sal.
man bot yme da richen wert.
dwijle dirre hoff wert,
was finbeus da by jn
vff auentùre gewynn,
die yme völlichen geschah,
wann alles, das jne an sah,
das marckte jne zue wonder.
eins tags dar vnder
gynouer nach yme sand,
aber gar one wibes schand
vnd one allen valschen mut,
wann daz er hùbsch vnd fruot
sie dauhte vnd wol gezogen -
deswar, des was sie vnbedrogen -,
vnd das es ie was ir sitt,
das sie die geste da mit
liebte, wa sie mohte,
als es iren eren tohte.
hart wol er ir behagte.
als ich vor han gesagt,
das kam von dem gurttel gar.
der red wart sie wol gewar
vnd bat jr jne zeugen dar.
den gùrttel er ir snelle bot
vnd bat, daz sie jn ir zuo cleynot
von yme haben solt.
des sie nit tuon wolt:
sie wolt jne nuwen schauwen,
jach sie, vnd den frauwen
jne zeugen vber al.
der beyder gab er ir die wal.
da mit schied er von ir.
es swuor die auentùre mir,
sie gurte den gùrttel zü hant
vber ir öberstes gewant
vnd gie in dem palas
widder vnd fùr, da gesammelt was
der frauwen maszenij
jn richer companij.
nuo was sie so verwandelt gar,
das dise tugentriche schar
jr dorch wonder namen war.
dis verwonderte sie gemein,
das sie so verwandelt schein
mit so groszer beszerung.
alt vnd jung
des fragen begunden,
was ir in so kurtzen stunden
die beszerung hette braht.
nieman was dar an verdoht,
das es von dem gùrttel were.
dis was ir aller swere.
des frauwete sie sich sere.
dise selde vnd die ere
erhuob ir hertz vnd iren muot,
als es denn in groszer lieb tuot,
vnd wart sin von hertzen fro.
jn seliclichem bild was sie da,
dwijle sie den gùrttel truog.
jr gedang was wild gnuog,
wa sie es hin mohte gekeren,
das sie jne mit eren
gar mohte gewynnen.
sie wolte jne nit mynnen
nach jne zuo cleynot nemen,
wann ir das missezemen
kund vnd ir ere lemmen.
garzuo male wild was ir gedang,
wann gar mit ir einer rang
die kunden vnd die gest.
jr muot kam nye zuo rest:
wie sie es daruff gedrieb,
das ir der gùrttel blieb
also, daz es were
nit gar lasterbere?
sie enwolte jne so haben niht,
als er in vf mynne pfliht
jr hette verlan.
solt sie sin auch nit han,
das war ir von hertzen leit.
der gedang ir hertz ieit
jn wandelberer wijse,
das sie von groszem prijse
ymer solt gefallen,
den sie vor jne allen
von dem gùrttel hett gewonnen.
darvf was sie versonnen,
wolt ir sin heil gonnen.
jr muot den willen vnderschied,
das sie sich zuo jùngst beried,
das sie jne widder sand,
e sich der hoff swand.
da mit schied der ritter von dan.
vil groszen rùwen sie gewan,
das ir der gùrttel nit bleib.
der rùwe sie darzù treib,
das sie beschickte gawein
vnd gie mit yme allein,
das sie yme die rede sagd
vnd yme auch iren kumber clagd
vnd begert rates an jn.
auch batt sie, daz er nach yme hin
ymer dorch ires dienstes willen ritt
vnd mit yme vmb den gùrttel stritt,
das er des nit lenger bitt.
die red er vngern ted,
doch muost er volgen ir bed,
wann er an ir clage sah,
das sie gros vngemah
hett mit harttem leid.
hie schieden sie sich beid
mit diser red so zu hant.
sin rosz vnd sin ysin gewant
er yme bringen gebot.
deswar, da leit er michel not,
e yme der gùrttel wùrd.
ein vil swere bùrd
truog er an der ritterschafft.
das kam von des gùrttels krafft,
doch gewan er yme den gùrttel mit strijd an.
wie er jne yme an gewan,
das han ich da vor geseit.
da von wer es ein dumbheit,
ob ich es aber seit hie,
wie es alles ergie.
jch wene, es lobte nyman.
sicherheit vnd riemen
er beyde fuorte von dannan.
wer, wijbe ader manne,
gawein das zü raub zalt,
der ted yme michelen gewalt,
wann es gynouer betwang
mit bed gar sunder dang.
das were zú sagen gar lang.
dise magt hatt dirre nijt
da hin zuo der hochzijt
nuo von ir frauwen braht,
da sie des lasters gedoht,
das ir amijsen geschehen was,
vnd auch das gawein genasz,
da sie jne zu huse baten
vnd jne hatten verraten
widder einen worm freiszam,
dem er auch den lip genam
vnd von yme leit michel not.
das er doch nit bleib dot,
das kam von dem stein,
den der gùrttel allein
mit siner krafft gar beslosz.
des gawein dick genosz
hie vnd auch anderswa.
hie ich dise mere la
vnd sage jhenes aber sa.
artus ted der megde bet:
den hentschuoch gab er zuo sted
jr vnd sprach, er wolt sehen,
was von yme wonders geschehen
möhte. das sie jne an leite,
die magt nit lenger beite
vnd zohe jne an ir rehte hant.
zu hant ir der lip verswant
zu der rehten sijten also gar,
das man ir nit als vmb ein har
libes nach gewandes sah.
artus vnd iglicher sprah,
sie gesahen nye sollich wonder.
kay sprach dar vnder
mit spott nach gewonem sitten:
< dorch gott, sehent disen schritt!
wer gesahe ie magt schrijden
einen schritt so wijte,
als dise magt hat getan?
ob sich zwölff snelle man
zu pfliht setzten gein ir,
so wolt ich sie eine mir
widder sie schrijten laszen.
wer möhte sich ir gemaszen?
jch sieh einen fuesz hie.
jch enweisz aber, wa ader wie
jch den andern fuosz vind.
er ist vil hart geswind.
sprechent ir: wa gerumet?
sie hat sich nit versumet,
ob mir reht sij getreumet.>
kay mit der rede macht,
das artus selber lacht
vnd die andern alle.
mit vil groszem schalle
vbete er sich vf der frauwen val.
sie gie vmb in dem sal,
das dis wonder schauwen
ritter vnd frauwen
solten, das da geschah.
kay aber offentlichen sprah:
< jr frauwen, merckent disen tritt,
das ir ùch prijsent da mit!
so ir zuo hoher hochzijt
her zuo hofe geladen sijt,
das ùch vil manig fùrst sieht,
so enbeitet man so lang niht,
jr kumment gegangen fur.
ob ich die warheit spùr,
deswar, so ist sie niht erlammt.
das sie sich zuo der rehten sijten schammt
vnd sich da nit sehen lat,
das kommet von uwer missedat,
die sie vil wol weisz an ùch.
das sehent ir wol, vmb die
jst ir schamm also grosz.
selb ist sie schanden blosz,
einhalb aller tugend genosz.>
jch mohte ùch wol michel wonder sagen
von heimlichem sùfftzen vnd clagen,
das von den frauwen ergie.
was töhte das, wann das hie
da von wùrde gelenget
die rede? des nit enhenget
dirre auentùre lang sage
vnd das ich die selb clage
vnd das gemein frauwen leit
da vor e han geseit
an dem kopff vnd an dem mandel.
des han ich sin wol wandel.
da die magt in dem palas
vmb vnd vmb gegangen was,
das sie alle bisonder
hersahen dis wonder,
sie gie fùr den kùnig stan
vnd sprach:< herre, ich han getan,
als ich verhiesz. nuo tuont ir sam!>
den hentschuoch sie ab nam
vnd gab jne artusen dar.
da schein sie beydenthalben gar
als da vor offenbar.
nuo stunden dem kùnige by
gawein, ywein vnd kay,
den der kùnig das gebot,
das sie dis cleynot
den frauwen hin truegen,
vnd liesz es da ruegen
zwijfels hertzen allen krang,
stille werck vnd gedang,
vnd das gynouer were
die erste an der mere
vnd die andern darnach.
vf wijbes hasz wart al zu gach
nach disem hentschuoch vor disen zwein
kay; des muost er besteen
die buosz, die yme we tet.
es was auch wol der frauwen bet,
das er solt der erst sin,
an dem die schande wùrd schin,
ob da von noch sin bitter spott
gelege, sit er sin bott
mit disen sin solt.
der bott das selb wolt,
den er da hatt sunder not
bespottet. als er dar bot,
zuhant jne gewerte daz cleinot.
als nue kay das cleynot nam in sin hant,
dar vmb es sich snell want
vszen vnd jnne
mit solcher vnminne,
des er nit truwete zu genesen,
solt es icht ein clein zijt wesen.
so sere es brant vnd zwang,
das er da gar sunder dang
muoste rùgen sin missedat,
e yme sins kumbers wùrd rat
die er dick hett begangen.
sust stunt er gefangen,
bisz er sich selbs beschalt
vmb den micheln gewalt,
den er mit spott begie
alle sin tage ie,
vnd vil manige misseschiht,
die er versuchte vnd niht
dar an wann laster gewan.
da er das alles hatt getan,
da began er jne laszen.
alle, die da saszen,
den ted wol vnd auch we,
das er so iemerlichen schre.
das geschah aber vil taugen:
jr keiner sich eugen
getorste vor siner zungen.
die alten vnd die jungen
vorchten jne vil sere,
wann er an ir ere
vil dick vnuerschult sprah.
kalocreant sich da rah
an kay vnd spottet sin.
er sprach:< hie ist wonders schin
an disem bichtiger,
das er ist so gewer,
das er niht antlaszes tuot,
e yme der man sinen mùt
endlichen entdecket.
ware rùwe er erwecket.
avert er niht die schuld,
so habent ir die gottes huld.
des han ich mich wol erfarn.
jr sint als ein westerbarn,
aller schand mag man ùch getarn.>
kay die red versweig.
sin haubt er nidder neig.
er gedohte es aber zu uergelten
mit einem widderschelten,
ob es an yme wùrd stat.
artus dise zwen batt,
gawein vnd ywein,
das sie vnder ine zwein
disen hentschuoch solten
tragen vnd wolten
jne den frauwen geben hin.
min herr gawein nam jn
von kay da zú hant fùr sich.
die auentùre bewijset mich,
daz ime niht da von gewar.
vnd dirre frauwen schar
trüg er disen hentschuoch.
des wart ir vil maniger fluoch,
die jne dar hatt gesant.
er gab jne so zuo hant
gynouern, als er was gemant.
den hentschüch gynouer nam,
der ir an niht missezam,
vnd zoh jne an ire rehte hant.
an ir er vil wol bekant,
das sunder meil was ir lip,
als ein rein lebend wijp,
die da von taug der welt wol.
sitt ich müs vnd sal
nihts laszen der warheit,
so sal ùch werden geseit,
wie wol er ir zame,
e denn sie jne ab nam.
er was ir aller ding gereht,
vmb die hant eben sleht,
vnd verbarg sie einhalp gar,
wann das ir munt rosefar
an dem rechten teil schein,
vnd an dem selben teil allein.
die sijte was ir bleich:
die varbe ir da von entweich,
das man sie doch vil kaume kos.
des wart gynouer freudelos,
wann sie ir hart widdersasz
daran, vnd mahte kay das,
der nyeman vngespottet lie,
als er nuo auch für war hie
es in keine wijse vbergie.
er sprach:< jr herren, sehent her!
miner frauwen ist zü kùszen ger!
jr munt ist ir also rot,
er stet noch, als sie jne bot
minem herren dise naht.
wiszent ir, wanne er hat die aht,
das er so geteilt ist,
rot vnd bleich zü einer frist?
das wil ich ùch zerlosen.
sehent ir den teil bösen
vnd bleichen an dem mund?
das geschah, da sie enbund
des kuszes hern gaswein,
da sie miteinander ein
waren in dem wald,
da ir gawein vil bald
sin helff braht widder jn,
das er sie nit fürt hin,
wann es geschah sunder dang,
das er sie kuszte vnd mit ir rang.
jr stund auch der mandel wol;
wie der kopff were vol,
sie begosz sich da mit niht.
man endarff kein miszgeschiht
da sùchen, der sie prüfen wil.
sie ist aller frauwen trùwen zil,
trùwe hat sie me denn vil.>
hie mit ted sie jne ab.
her gawein dise riche hab
clarisantzen, siner swester, trúg.
des frauwte sich her kay gnüg,
wann er gern an ir sah,
wie sie der hentschuoch versprach
an stetikeit vnd an muot.
clarisantz, die vil guot,
den hentschuoch an leit.
da von was ir vnuerseit,
sie verswant einhalb gar,
wann das hertz da ir bar
beleip, vnd ein teil der hant.
kay sprach:< mir ist wol bekant,
was dise sach meynt,
das der hentschuch bescheynnt
an dirre jumpfrauwen:
jr hertz kan wol schauwen
fùrbasz denn ir amijs.
so grijffet ir hant nach hohem prijsz.
des mag sich gyremelantz,
jr amijs, frauwen wol!
sie ist aller stete gantz.
die bluome er ir heyen sal,
da von sie ymmer jùnge.
ob yme nuo miszelunge
an ir mit todes geschiht,
das möhte er vbel mit icht
an trùwen vberwinden.
wer möht die trùwe vinden
an alten ader an kinden?>
dis horte sie vil vngern.
der hentschuoch wart ygern,
artuses mutter, gegeben.
den streich sie an ir hant vil eben
vnd zam ir, als ich ùch sage,
das ich ùch daran nit entrage.
nach der auentùre zale
zü der rehten sijten vber al
er sie volliclichen bedackt,
daz icht mer an ir entblaeckt
wann das auge vnd das ore da.
da sprach mit spott herr kay sa:
< herre, schauwent vwer mutter!
wie wol ir gansgùter
an sinem viddeln gefiel,
da sie nach siner mynne wiel!
wie frölich ir auge sah,
da sie jne sahe, vnd was man sprah,
wie gern ir ore horte das!
deswar, ich trage ir alter hasz;
wann were sie noch wenig jung,
sie ted nach den freuden einen sprung,
der mannes hertz tet fro,
enbor vber ires amijs ho.
jst des nü niht, so was es da.>
das er sie also swachet,
vil maniger da erlachet,
dem es doch nit zü mut was.
siner mutter orcades
gab den hentschüch her gawein,
an der er schand kein
mit niht erzeigen moht -
so wol er e ir toht -,
wann daz ir blackte die brust.
da sprach mit groszer akust
kay:< sehent das wonder!
dise brust saug bisonder
her gawein in der ersten frist.
nú túnt war, wie küne sie ist.
sie wil sich nit verbergen lan,
als an den andern ist getan.
ob ich es reht mercke,
so hat gawein sin stercke
vnd mannheit dar usz gesogen.
han aber ich daran gelogen,
so gab sie griffe suosze,
die nach der mynne grüsze
geziehent vnd steent
vnd in des hertzen grunt geent.
der ist eins ader beyde war.
sie erbùtet sich dem griffe gar,
wie es halt vmb disen var.>
zü nehst sasz by ir da
die vil süsze amurfina.
der gab man den hentschuch.
darvmb hatt sie cleinen ruh:
sie nam jne vnd leit in an,
das ires vnglùcks ban
daran lùtzel schad wart,
wann daz ir wart vnuerspart
ein teil des libs zü hant.
da das am rehten teil verswant,
da schein ir das end.
kay dise missewend
mit spotte vnderfing.
er sprach:< das sie vberging
jren eyt an der heyrat,
das ist dise missedat,
die an ir schynet hie,
dar vmb sie gawein lie
bi blanck luthors beliben niht,
den sie mit strijtes geschiht
so wolt han verderbet,
das mit al hett geerbet
das wilt alles sin lant,
ob er jne nit hett gesant
jr by ir meyde.
jr magtüm ted ir leid,
als ich an ir bescheid.>
gawein gab jne sgoydamur,
an der er auch mit al erfuor
mút vnd hertzen stet.
vnd ob sie ie getet
jcht widder wibes güte
von liebe vnd vngemùte,
das er das erzeigte
vnd glich an ir seigt
missedat vnd tugent!
sgoydamur, die reyne jugent,
den hentschuch an streich,
der ir also wol gleich,
das ir dar an niht gebrast,
wann vil cleines males last
an dem verswinden sie twang.
da ir hart wol gelang,
da schein ir des gùrttels vang.
kay marckte dis mal.
er sprach:< vest als ein stal
jst dirre jumpfrauwen muot!
sie hat al wegen güt
gedocht vnd getan.
des mag wol freude han
jr süszer amijs gasowein,
hette sie niwan das allein
jn ir kintheit verseszen,
das sie sich liesz meszen
vndewendig des gùrttels so dick,
als hie schijnet zú blicke.
was mag aber gewerren das,
ob man sie zü der gùrttel masz?
das was cleiner schanden meil.
sie ist snell vmb das nidder teil
vnd lasz vmb das haubt.
wirt sie nydder wol betaubt,
so wirt sie vmb das haubt snell -
vnd habend es nit fùr ein spell -,
so getar weren wol ir vell.>
was er sprach, das muost sin.
nach ir wart frauw laudin
dirre hentschuch getragen.
wie er ir stunt, das wil ich sagen.
er zam ir wol vnd doch nit gar,
wann zü der rehten sijten bleip ir bar,
was die schulter befie.
nú was kay aber hie,
der jne niht vbersahe,
er enruogt ie, was geschah,
es were gros ader clein.
< nü sehent, was dis meyne>,
sprach er,< ir herren al,
vnd wie es ùch gefall,
das dise frauw ist so karg,
das sie ie so heimlich verbarg,
wa sie nach wijbes gùte tet.
das schijnet hie nu zü stet.
wie tùre es sij verborgen,
villicht morgen ader vbermorgen
so zùhet sie es her fùr.
des gewynne wirt grosz gefúr
an vnsern amyen:
die müszen sich gar fryen
vnfuor vnd ir bild,
vnd werden schanden wild
vnd aller stetikeit mild.>
nach ir frauwen enyten,
die ir sasz by sijten,
gab man den hentschuch hin.
mit wijbes zùchten nam sie jn
vnd leit jne an vngenöt,
vnd wart sie eins teils schammrot.
das geschah von keiner vnfúr.
die auentùre mir des swuor,
das er ir wol zame,
wann daz sih usz name,
das sie gar was bedeckt
jres libes: der ir blecket,
das was die huff vnd der fusz.
kay sprach:< dwijle ich muosz
dise missedat eugen,
so ist des vnlaugen:
jr fuosz were wol bereit,
da mynne wer ir geleid,
da man sie vinden sold.
die huff das selb wold:
sie gab geleid an den weg.
jr kom min herr ereg,
deswar, an der zijt.
sie muoste disen mynnenstrijt
verenden e alsam sit.>
nach frauw enyten da sasz
ein frauw, der man nit vergasz.
die mute min herr parcifal.
die was die nùnde an der zal,
an der er auch vbete,
das sie mit al bedrúbte.
da sie jne leite an ir hant,
er tett jne allen bekant,
wie sie was gewesen bisz her.
das rehte teil verswand ir,
das es da nit mer schein,
wann vorn das reht bein
mit al bisz an den nabbel heruff.
kay sprach:< solchen kauff
möchte ieman vbel laszen,
der also gar zü maszen
nach groszer wirdikeit kumt.
dirre jumpfrauwen hat gefrumt,
das ir parcifal entslug,
wann sie vil kume das vertrug,
das er sie so lang wert.
sehent, wes der mynne heimlich begert,
das sie sich so bùtet fúr!
das selb ich an dem bein spùr:
das hebt sie vngenot enbor.
sie wolt, das ir burgthor
were alwegen entsloszen.
sie ist des gar verdroszen,
das sie vor nit hett genoszen.>
bi ir sasz zù nehst da
min frauw calaida,
die hern kayn amye was,
von syandrie leymas,
der hertzogin swester.
an der sin spott vester
wart dann an jne allen,
die da waren gefallen
vnder dirre frauwen schar.
den hentschuch gab man ir dar,
das entweders wol verdolt.
da er sie aber swenden solt,
da gebrast yme an siner krafft,
vnd verlor an ir sin meisterschafft,
wann sie blosz sunder laugen
bleib, wann die augen,
die waren vns blindenbare.
wie vil des andern were,
das was offenlichen zu sehen.
kay sprach:< nú wil ich jehen,
das man vnder disen frauwen
nieman mag so wol getruwen
als miner frùndin.
er hett nit guter synn,
der sie velschet an ir mynn.
sehent ir das, wie schemmig sie ist?
sie getar die augen kein frist
vf getün vor groszer schamm.
wie reht sie usz den andern nam
disen hentschuch an state!
wie vngern sie tete
widder mich an keinen sachen!
wie vngern sie sich swachen
an keiner bed liesz,
das sie es nit gehiez
zu hant an der stund!
e sie es mit dem mund
verheiszt, so ist es getan.
fùr den kuonig nach minem wan
hat sie mit milte getreden.
sie git iren lip vngebeden,
wie jne der man sùchet.
sie wùrt selten verfluchet
vmb vfschub ader versagen.
sie kan an tiost niht versagen.
wie man es zü veld bringt,
jr mút nach tiost ringt.
wie man sie versùchen mag,
beyde stich vnd slag
nymmet sie hinden vnd vor,
bi sijts, vnden vnd enbor,
das nyeman trittet in ir spor.
wol mir, daz ich ùch ie gesah!
wann wa mir ie miszegeschah
ader schand ie widder fúr,
das hat vwer tugend fúr
an mir gar verdeckt.
ob noch an mir iht weckt
nuwe schult alte missedat,
des wùrt aber vil gút rat.
so decke es nü als e,
sit beider lob an ùch stee,
das vwer vnd das min.
jr sollent hinfùr also sin,
als ir bisz her gewesen sijt!
so mögent ir vwer zijt
von trùwen wesen wibes nit.>
sit kay des nit vergasz,
so daz er sine amyen bespottet vil basz
dann die andern all
an ir stete valle -
des sal man yme auch vertragen,
höret man jne an den andern sagen,
das ùch bedùnckt missezemen.
er wolt niemen usz nemen
an schimpfe vnd an solchem spotte.
gawein vnd dirre bott
den hentschüch, das múst sin,
gaben flursensephin,
wann sie was die nehste da.
der verswant der lip halber sa
an dem rechten teil.
nuwan von vnheil
bleib ir des libes
zú sehen, da man wijbes
nit offenlichen zü sehen begert,
vnd da müs mit gewert
sin, das man lonen sal.
was ich mein, das wiszent ir wol,
wann sie ist der recht schol.
hie seit cristion von troys,
das dise frauw luoykoys
hette dar des tages braht
gawein zü liebe - wann er gedoht,
das er jne da fúnd -
mit solchem vrkúnd,
das yme da lob were;
vnd dorch die valsche mere,
die von sinem tode flog
vnd vil manigen bedrog,
vnd das er auch zü hofe seit,
mit wie groszer manheit
von ritters tat er bejagt
dise, da sie was ein magt,
vnd yme sin recht gab dar an,
das ir amys vnd ir man
er were an siner stat.
auch begerte die frauw vnd bat,
das sie den hoff müste sehen,
da von sie solcher tugende iehen
horte. das was geschehen.
nu keren wir zú vnser rede hin.
die begirde was ir vngewin,
wann sie wol bewart wart.
kay sprach:< die hochfart
jst geschehen selten e!
sehent, was ir von dem lib ge
vnd enbor also hoh streb
vnd sich mit solchem vollen geb!
wer es besteen getar,
es ist sunder vale gar.
sie zùgen wol einen stein
des ist zwifel kein.
der lon ir vil vorder lit,
den frauw mynne zü lon git,
kan ich es zü recht spürn.
küner denn ein einhurn
jst sie, das sie es erzeugt,
wann sie sich hat geneigt
zu hurten mit zorn.
sie ist vil küne hie vorn;
hinden darff sie nit sporn.>
dis lachte die maszenij.
den hentschuch nam parkij
vnd bewarte sich da mit.
er tet nach gewonem sitt:
zü der rehten siten er sie barg
vnd wart ir doch ein wenig arg,
wie milt er ir were.
jr bleib schinbere
vszgenomenlich das nidder teil.
kay sprach:< das was vnheil,
das der stefft so geriet,
das er sie so gar vnderschiet
vnd wolt nye herwinden,
bisz er ir hinden
gehafft, als ir selber seht.
hett ich die wonden zü reht
gepfahtet, solt sie genesen;
das west ich wol, solt es wesen.
jr ist aber uszen der zar
so wit; ich wan, vil vngewar
er jne tieff gehefftet hat.
her lucanus, sint ir ir artzat,
so ergrùndent vns die wonden,
das ir schad werd fonden
vnd sie zü reht gebonden.>
von diser red wart michel schal
gemeinlich in dem sal.
des verdrosze die frauwen sere.
auch hatten die vnere
die ritter gern gedacht,
were kay gewesen in der acht,
das er es hett verdolt.
des enwas niht, wann er kolt
mit spott, wen er moht.
jch enspreche nit, wa es toht.
nieman yme dar zü getùwret.
jne hette so wol vngehùret
dar an alle gewonheit,
das er es an nyeman vermeit.
des muost man es lyden,
wann es nyeman vermijden
mit keiner tùgend kund.
yme selbs er nihts gund,
das er vnbespottet blieb.
das er das al sin tage trieb,
des jehent alle auentùre,
vnd schwerent vil tùre,
das es ware sij vnwendig.
wen ie bestrickte sin strick,
daran vant er spottes sigk.
als kay dise red getett,
gawein vnd lanzelett
gaben jne da fùrbasz
einer frauwen, die da sasz:
des herren lanzelett amyen,
der schönen jamphyen.
der tett er michelen gewalt.
jch enweisz, wes sie da engalt,
das er sie nit swand,
wann sie keiner schand
vor nye wart gezigen.
sie muost hie aber vnderligen
gemeiner frauwen swere.
were ir der richtere
an lanzelet so wege niht
gewesen, ir vngeschiht
hett er gerueget dort als hie.
das des da niht ergie,
das liesz er dorch iren amijs,
dem also hohen ritters prijs
das buoch an der mere verjah,
vnd sin arbeit swah
ein teil daran must sin,
ob er keins tadels schin
gabe siner frùndinne
an vnstetter mynne.
des muost er auch haben wart.
wie doch an wijbes miszefart
der man clein schuld hab,
er wùrd besprochen villicht darab
von argen bizungen,
die mit waren zu sprungen,
wa man der rede gewuoge.
des was es vil gefúge,
das er sie usz neme,
wie ir doch missezeme
der mandel vil sere.
her widder ich kere
zú der auentùre lere.
ianfit tet den hentschuch an.
ob sie des kumber gewan,
das was kein vnbild,
wann vnmeszig vnd wild
was kay siner zungen.
wie ir joh misselùnge,
das wil ich ùch verkùnden.
glich wilden vnden
jr lip sich ir gar usz nam
vorn, hinden niht alsam;
da was sie bedecket wol.
die vnde ich bescheiden sal,
wie sie an ir flùszen,
vnd wa sie sich vnderschuszen
verborgen vnd offenlichen.
eine lie er vberstrijchen
oben vber das end.
vber brust vnd ùber hend
die ander mit gewalt schosz.
da zwùschent bleip mit al blosz
dorchsiehtig vnd kùnt
das reht auge vnd der munt.
ein ander vnder sich da wal
bisz vf den nabel zuo tal.
blosz bleib die stat in der mitten,
da mit mynne wùrt gestritten,
gar zuo tale vf das knye.
nidderthalb ein vnde gie
vber die beine vf den fusz.
sitt man es sagen muosz,
so bot ir kay spottes grusz.
< her lanzelett>, sprach er,
< jch bin vwer frauwen gewer,
das sie sich wol hat behút.
was betùdet dise wild fluot
wann gantz tugent steter lip,
die ein reht tundes wijp
hat vnbesprochen ir tag?
man möhte sie von valscher sag
beliegen, der es tet.
seht, welhe des meres stet
hie ist, also ist die ir.
jr gar wandeliche gir
musz manig wip enprijsen:
jch mein, an ir amysen
tuot sie yme vil dick schah,
den ire augen sehent nach.
der ir hertz heimlich begert,
der mynen brifel muosz sin gewert
vf frauw mynnen gejeide.
sehent, wie ir fuosze beyde
sich furten, wa sie kunnen!
jch wil des nyeman gùnnen,
dem er so groszer stetikeit jah,
was joh hin fùr gescheh.
nuo sehent, ob sie ieman sehe!>
ein frauwen man by ir vant,
die hatt her calocreant
yme zù einer frùndin erkorn.
die swand hinden noch vorn
der hentschuoh vmb niht.
ob aber sin swand icht,
deswar, das was vil clein:
die waden an dem beyn
von dem fuosz bisz vf die bùg.
kay sprach:< ob ich nu lùg,
was solt mich des not an geen?
her calocreant vnd ich, wir zwen
waren ie mit geselleschafft
an einander mit solcher krafft,
das wir vngescheiden warn.
des wolten auch varn
vnser beyder frùndinne,
das sie der selben mynne
dorch vnser liebe willen wielten
vnd vnerwert behielten.
wie möht vns basz geschehen sin?
es ist an jnen beyden schin
groszer tugend glich wage.
jn endarff nyeman lage
an vnstete setzen.
sie kùnnen beyde hetzen
alle mann an die vart,
da ir lip nit wùrt gespart.
das wir sie haben, wol vns wart.>
frauwen und ritter lachten des.
nuo muosz min kales
an siner amyen sehen,
das an den andern was geschehen.
sie was geheiszen filleduch.
die leite an den hentschuoch,
der sie zuor rechten sijten enzwey
glich vnd recht teilte als ein ey.
von dem gùrttel vf zü dem haubt
was sie des gar beraubt,
das sie ieman sah da.
nidderthalb anderswa
sahe man sie mit al.
kay mit groszem schal
jr spotten began.
er sprach:< kales, sehent heran,
wie vwer frùndinne
vch bestetiget ir mynne
von dem gùrttel hin vff.
sie hat aber gemeynen kauff
nidderthalb vf geslagen.
deswar, das sollent ir ir vertragen!
vch besteet des niddern teils niht.
was dem obern teil geschiht,
das sollent ir ùch an nemen.
vch mag des vil wol gezemen,
das ir sie vil liep habt
vnd uwerr hertz in sie grabt,
wann sie manigen mit ir mynne labt!>
nach ir wart er vf stett
getragen frauwen acclamet.
die mynnte aumagwin.
die leite jne an, vnd das muost sin:
der schein zuo der rechten sijten usz
des libes niht vmb ein grusz,
wann der halsz mit dem hare.
kay sprach mit vare:
< wolt ich nuo vbel sprechen,
was sold ich dann rechen
an diser jumpfrauwen?
jr mögen ir wol getruwen,
herr aumagwin, aller eren.
bittent sie die frauwen leren,
so sie ir hare richten,
das sie es also slihten
vnd zü freuden stellent ire nack.
wann sie halt dar an lag,
so ist er doch hart slecht.
sie hat doch heimlicher striche reht
nach mynne geschickt, wol bekant,
das der nack vnd das gewant
nach mynne muosz enpfahen.
sie sal jne nit versmahen.
sie kan, was daruf stat.
ob sie es genoszen, hin geet
sie, graset dick vnd cleit.>
hje mit wil ich bliben lan
da mit, vnd ich gesagt han
von frauwen vnd von meyden,
wann ich nit wol bescheyden
vnd wol erkennen kund
nach in vil maniger stund
das manigfalt wonder,
das der hentschuch bisonder
an iglicher da beging,
vnd wie er ire vnstete gefing
jn vil manigerhand wijse,
vnd kay mit vnprijse
sie bespottet vnd rúgte;
wann es sich nit fuogte,
das ich von wijben also vil
spreche vber hertzen zil,
wann mich sin nye gezam,
das ich ir schand vnd ir scham
ymer solte vben.
nieman kan bedrüben
basz wijber hertzeleit,
wann es min lip mit jne treit
vnd ist ir salde min freude gar.
des súchen ich gnade dar,
das ich icht werd besprochen,
ob ich habe zerbrochen
dar an mynen hantheisz,
wann daz wijbes güte weisz,
das nyeman mag erkennen
guot, man enbor nennen
vbel vnd arges da by.
das eins dem andern widder sij,
das ist der welt kunt.
wa ich vf der tùgent grunt
wijbes lob stete vesten,
da wil ich den besten
ymer han gedienet mit.
deswar, das was ie min sitt
vnd wil da mit bliben.
was da von allen wijben
lobes mag gefallen,
des gan ich wol jne allen
dorch der besten willen.
wa ich nit mag gestillen
wiplich missedat
nach wiplicher brode rat:
das nyeman doh zü laster zelt,
wann der yme schand hat erwelt
von sinem akusten müt,
wann ein wip niht wann gütes tut.
dorch der auentùre sage,
ob ich icht anders bejage
daran wann ir huld,
das ist sunder schuld
mynenthalben ymer.
von jnen wil ich nymmer
mit mynem dienst wenden.
hie mit wil ich enden,
mine tage niht swenden.
ob ich nuo dorch vnmasze
die prüfung lasze,
die an den rittern geschah -
das wùrd villicht vngemah
wijbes süszer güte.
wie wol ich mich nü hüte,
man mag mich doch besprechen,
wil man an mir zerbrechen
nach der welt lones wert.
des doch min dienst begert,
wann ich mich des min tage
je gefleisz vnd den willen trage
ymmer sunder wandelung.
hertz vnd zung
jst ir erber dienst gar.
man weisz auch das fùr war:
wer dheiner ding arbeit
an der welt kurtzwijle leit,
das tüt er gar one wijbes grüsz.
jch enweisz noch, wedder ich müsz
swijgen ader sagen.
mich heiszet vnmasze tagen,
so tùt mich sprechen wijbes nam
vnd die auentùre sam.
den zwein wil ich volgen.
jst mir ieman erbolgen,
deswar, das musz also stan.
mag ich der besten hulde han,
so clage denn der arge ban.
hje wil ich von den rittern sagen:
der hentschuch wart widder getragen
fúr den kùnig, da der sasz,
der jne so gar sunder hasz
leite an sine rechte hant,
da von er halber verswant,
das sin vmb niht schein.
da sprach min herr gawein:
< ritter, ir sollent fro wesen!
jr sint ledig vnd genesen
vor dem hentschuch, dwijle jne hat
min herr sonder missedat
gewonnen an allem recht,
als ir vnd der bott seht,
wann es des botten bed was.>
da sprach kay li seneschas:
< der bött erlat es nyeman!
jr müszent es vmb den riemen,
herr gawein, sten zü buosz,
den ir mit valschem grusz
fimbeusen mit straszen raube
von der kùnigin vrlaub.
ob ir nuo das herarnet?
nù sint des gewarnet!
wir müszen es an sehen.
kan er hertzen state spehen,
so mag es hie wol geschehen.
deswar, min herr gawein,
dorch dise rede allein,
die ir nü habent getan,
solt ir jne nymmer an
mit keiner sicherheit legen.
wöllent ir die ritter vnderwegen
laszen an ir missedat,
sit man vor die frauwen hat
da mit alle bewart?
ob ir jne holt wert,
jr soltent die rede han verswiegen.
wùrd dirre bott des bezigen
vnd sin frauw dar zü,
das sie den hentschüch nü
vf wibes hasz sande
her von jrem lande,
was möhten ir des genieszen?
ob sin die ritter lieszen
der kùnig vnd der bott,
so möhten die frauwen clagen gott,
das wir an jne prùfeten spott.
wenent ir, das der kùnig hab
mit diser rede die riche hab,
ob er gijtig ist, gewonnen,
wann er nyeman wil gùnnen
wan yme keiner eren?
er kan es wol keren
alles an sinen frum!
dis ist das haubt vnd das drumm,
das die welt an ym hat, vnd ist
vertoret siner tage frist.
die jne den milten nennet,
vil ùbel sie bekennet,
das er ist also arg
vnd in allen dingen so karg.
das er es gar zú yme nymt,
nymmer es yme wol gezymmt.
er solt doch laszen ettwas
von der hant, das stùnd basz,
dann das er es alles wil befahen.
ja, was ime genuec nahen
her calocreant ader ich,
das er des nit verdehte sich,
das er vns jne hett gelaszen
ader den andern, die da saszen!
dem kopff er das selb ted.
er kan wol verzijhen die bed,
dar an er selber from hat.
her gawein, sitt es also stat,
so legt in an, des ist nit rat.>
gawein tett sin gebott,
wann er gar wenig sinen spott
an dem hentschüch entsasz.
deswar, er enzam yme basz
denn artusen; er zam nit wirsz,
als die auentùre mirs
swuor sonder laugen.
kay sprach:< wie taugen
das vor vns ist ergan,
das er den hentschuch an
mit losen hat gewonnen,
das er yme sin sal gùnnen!
wie wol er kan kosen!
einer katzen spise losen
erlost er wol one die musz,
so sie hundertwerb ein husz
darnach het erlauffen.
sust kan er erkauffen
mit losen, was er haben wil.
es hilfft jne hie nit züuil,
wie vil er kùnne losen.
sin blidecliches kosen
vnd sin wiplicher sitt,
da verfahet er nü wenig mit.
wie gar frantzoys er nú sij,
er müsz sin doch nuo wesen frij,
wann vns der kùnig nú nihts erlat,
der yne vor yme gewonnen hat,
wie es halt dar nach ergat.
die gelùbde muosz wesen gantz.>
den hentschuch gyremelantz
an leite vneruorcht,
an dem er auch wonder worcht.
er swand jne aber nit gar:
augen, munt, hals vnd har,
das schein wol zu gesiht.
kay sprach:< ich beriht
vch der rede wol, ir herren.
er müsz heim verren
siner augen blicke
vber die heyde dicke
geyn colurmein, da er hute
der bluomen, die so güt
fùr das leidig alter sint.
were er da gewesen blint,
sie waren worden so veil,
das ein iglicher sin teil
hette genomen, der sie wolt.
der munt dar zü solt,
vnd was auch das gezeme,
das man jne wol verneme,
so er die heyde vmb swiff
vnd sinen schaden berieff.
wann wer dar jn kam, der entslieff.>
do nam jne her gaswein.
an dem auch das selb schein:
er wolt nit gar swinden.
bisz uf den gùrttel hinden
von dem haubt er blackte.
den munt auch nit bedackte
der hentschüch vorn.
das ander teil was verlorn,
also daz es nyeman sah.
kay aber mit spott sprah:
< ob ich es zü reht sagen sal,
der munt stunt deshalb wol
so, rider, ùch vmb niht,
so ir kein misseschiht
frauwen wolt reden nach.
darnach ist vns hart gach,
vnd ist der warheit schin
an der lieben frauwen min.
deswar, ich wane sùnden,
das ir sie in kurtzen stunden
besprachent an ir mynne.
es ensint nit güte synne,
der sich senet nach dem gewynne.>
nach yme nam in lanzelet,
dem er auch das selb tet.
doch scheyn tadels swache male:
die wintbra sich nit enhale,
die sahe man offentlichen da.
die öber vnd die nidder bra
hal sich niht, die sah man,
vnd was das auge zugetan.
das ander was verborgen.
kay sprach:< mit sorgen,
her lanzelet, fürent ir,
da milianz ùch vnd mir
die rosz an dem nachjagen
slùg, vnd ir vf einen wagen
muostent sitzen dorch die not,
die ùch die müde gebot,
vnd ich wonder wart hin
gefüret mit der kùnigin.
deswar, da was nit leiders an.
hant ir anders nit getan,
so tùt er ùch vnrecht.
er hat das vil reht erspeht,
das ir die göttinne
verkuoret an ir mynne,
die ùch zoh in dem se.
wölte ich, ich seite wol me.
jr wissent wol, war die rede gee.>
den hentschüch nam her ywein,
an dem er tadels male clein
erzeiget vnd doch ettwas:
an yme er nit mer vergasz
wann des fuoszes vnd der hant.
kay sprach:< sehent den wigant,
wie recht gern er strijtet
vnd wie er darnach gijtet!
heil vns das glùck herwarb,
das yme sin lewe erstarb,
wann solt er nach mit yme wesen,
so enliesz er nyeman genesen.
wie vns nú des sij worden búsz,
sehent, wie sin hant vnd sin fúsz
nach mordes werck girdet!
der syn reht jnnen wirdet,
der gesagt nymmer das widerspel,
vnd uch der warheit hel.>
wenig in sollich spott bewag.
erec fil de roy lac
nach yme nü bewart wart.
an dem er auch niht enspart,
was er des tadels begreiff.
vber die brust als ein reiff
ein bloze vmb vnd vmb gie,
die jne völliclichen befie.
nyeman sah jne anderswa.
nuo was kay aber da
vnd sprach:< lieber frùnt min,
es ist an ùch vil wol schin,
das nach frauwe enyten
vwer hertz begunde strijten
so sere vnd ringen,
des wolt ùch bezwingen
jr schöne vnd frauw mynne,
als ich mich versynne;
das ist sitt nit behalten.
jr enwellent mit ir gewalten,
so hat sie verdienet das,
daz an ùch mynne vnd der hasz
nymer sich geparrieret;
wann sie so corrieret
vwer rosz mit solchen truwen,
das vwer freude nùwen
wol von schulden mohte,
wann es ùch niht endohte,
das ir von frauwen enpfingen
den dienst vnd vbergingen
dar nach frauwn mynnen gebot
vnd ernst kertet zü spott.
lant ùch nit ruwen, so ùch got!>
her lucanus, der schenck,
ob ich sin reht gedenck,
der müst jne nü an legen,
wann jn kay vnderwegen
vil vngern liesz,
der ine an tün hiesz.
one widderrede das geschah.
niht mer er an yme zerbrah
als an den andern sin reht:
zü der rehten sijten oben sleht
mit al er jne swand,
das jne des niht enwand,
wann die hant vnd das kny.
kay die red vnderfie
mit spott vnd sprach:< wie milt er ist!
er schencket knyende alle frist.
er sal ein frauwenschenck sin!
got gesegen mir die min
vnd mach sie des turstes fry,
das er icht dick fúr sie
dorch turstes willen knyen müsze!
er mechte es ir anders so süsze,
das sie es gern nùsze,
keme es ir icht zü schusze.>
parcifal nam jne da.
des wart kay sere fro
dar vmb, daz er sehe,
wes er yme da jehe.
er swand jne vnd doch nit gar.
yme bleib da des libes bar
obenherab zü tale wol ein strasze,
wol breit in der masze,
als zwen finger sint.
kay sprach:< da er ein kint
was, dis er erwarp,
wann yme sither nye verdarp
an keynerhand sachen sin prijsz.
jne hat sither manig wijse
die tugend so gerijchet,
das er das nit gelichet
zú kintlicher missedat,
die doch zü cleynem schaden stat;
das ist ein wunderlicher sitt.
ader wane da ieman da mit,
das er von siner müter fuor
als ein tore vnd in der fur
nach ritterschafft zü hofe kam?
da er ein vingerlin nam
einer frauwen vnd sie kuszte,
also dick jne geluste,
wie sie darvmb weynet,
wann sie was vereynet
an dem bett in dem paulolin!
des müst die rede also sin,
als es denn wart an ir schin.>
calocreant jne da nam,
dem er eins teils missezam
als den andern da vor:
von dem füsz vf enbor
vnd vorn zü bisz an das haubt
wart er des beraubt,
das sin da icht schein.
hinden vf die füsz hin
sah man jne da vber al.
kay sprach:< das ist der val,
den er von dem rosz viel
jn dem wald, da der bronn wiel,
den frauwen laudin man
mit einem tiost hett getan,
als er den stein da begosz.
siner mannheit er da genosz,
das er da zinset die stat
mit rosz vnd mit sarwat
vnd von dannan müst zü fusz geen.
des müst er auch hie besteen,
bisz das es yme geschah -
die rede er vns selber verjah -,
das er jne also nidder stah.>
was solt ich des sagen me?
nach yme bruner sempite
disen hentschuoch an leite -
da von wart nit me geseit -,
vnd alle, die da waren.
der began mit spotte varn
dar nach kay, vnd er ie
an iglichem male verfie,
wie sie es vngern sahen.
vil manigen spott wahen
er von iglichem,
armen vnd rijchen,
prüfet vnd machet,
wann er daruff wachet
vnd fleisz sich, wa er kund.
mit sin selbs mund
bespottet er dick selber sich.
warvmb solt es denn mich
besweren, was er sin getreib,
dwijle er yme selbs niht entleib,
weder frùnden nach magen?
der began sinen spott iagen.
des enwold jne nit betragen.
als nü dise rede was ergan,
kayn sprach die massenij an,
das er das selb auch tede.
da swür er mit stede,
er enkeme yme nymmer an sin hant;
es were darvmb so gewant
niht, daz er yme zeme.
wer sich des an neme,
das er yne tragen wöld,
wie gern er dem söld
sinen teil dar an laszen!
yme keme wol zü maszen
zwene güt schebling,
die er vmb die pfenning
keuffte in einem krome,
vnd geb ein brame
niht vmb dirre hundert.
die rede den botten wùndert.
uff stunt da die magt.
artusen sie gnade sagt,
das sie so wol was gewert,
des sie an jne hatt begert
von ir frauwen wegen, die sie sante dar.
darzü sie neigte der schare
vnd begerte vrlaubs widder.
als sie nü den sale wolte nidder
geen zü jrem pferde da,
ein ander auentùre sa
kam artusen, die sie entwalt,
die ein vnfreude galt.
sie enbeitet ir aber zü ende niht,
wann die selbe geschiht
jr frauwe hatt an getragen.
die auentùre wil ich sagen,
vnd wil ein teil sagen e,
das man deste basz verstee,
warvmb ich also groszen ruch
leit an disen hentschuch
vnd an sin auentùre.
sie ist ir aller stùre,
die ich noch zü sagen han.
hett ich die einen verlan,
jch müste die andern han verswiegen,
vnd were min rede gar verziegen
endes vnd ze spelle gediegen.
dise auentùre nùwe
hatt gyramphils vntrùwe
geprüfet vnd erdocht.
der rùwe sie darzú braht,
den sie dorch des gùrttels verlust
hette. mit der akust
hatt sie die botten beyde,
einen ritter nach der meyde,
als ir vernemment, dar gesant,
vnd als ir wol werdent hermant,
vnd wie die rede end nam.
dirre ritter, der dar kam,
kam nit gar nach ritters art
vnd nach eins gewonten ritters vart:
einen steinbock der ritter reit,
der kein vngefert meit,
beyde stein vnd stock.
der ritter mit dem bock,
die auentùre nant jne mir.
sin ander nam, der was ir,
als sie jah, niht anders kund.
harmin gar vnd bund
kostlicher pfellor was sin wat,
als sie nach groszer zier stat.
deswar, an yme schein michel rat.
an sinem bock nihts gebrast
alles des gezierdes last,
der eins roszes recht ist.
das vnderfie kein list
wann gar gantze warheit.
auch was der bock in der heit
als ein vil hoher castelan.
bock vnd er sunder wan
waren beyder ires libes gar
blang vnd swartz, agleistervar.
der ritter was anderswa,
beyde hie vnd da,
geschicket als ein ritter wol.
er was nit erbeitzet vol,
bisz die ritter vberal
geyn yme drungen von dem sal.
mit flijsz sie jne enpfingen.
da mit sie widder gingen
mit yme vf den palas,
da artus vnd die magt was
noch vnd die frauwen alle.
mit vil groszem schalle
wart der bott fur braht.
da enwart nit vberdoht,
was man von werdes sold
einem botten bieten sold.
artus das selb wold.
als er nü für den kùnig gie,
mit eren er jne wol enpfie,
dar nach dise frauwen,
vnd wart ein michel schauwen
an sinem wol gestaltem lib,
vnd ted das man vnd wib,
vnd nam sie michel wonder
siner varben dar vnder,
die blang was vnd swartz
als ein harm vnd ein hartz,
glich geparriert,
vnd in so wol geziert
des libes feytùre;
wann sollich auentùre
was selten gesehen e.
er enwolt nit lenger beiten me.
sin bottschafft warb er.
darzü hatt er grosze ger.
auch was sin artus gewer.
er sprach also in frantzoys:
< artus, vir, gentil roys> -
das spricht< edeler kùnig her> -,
< hörent mich, des habent ir ere,
wann ich vil zü werben han,
das mir nit mer wùrt versagt
miner bet denn dirre magt,
die ir wol habent gewert.
das was wol der bedt wert -
wann sie ùch ere bringt -,
das ir doch noch vingt,
deswar, zü groszem frumm.
es ist wol kunigs richtum
das vil edel cleynot,
das uch broht dirre bott,
vnd ùch ist bestanden.
des ist in allen landen
deste basz bekannt vwer nam,
vnd haben doch do mit alsam
den andern hentschüch darzù,
den ich ùch bringe nú,
mit jhenem gewonnen.
des wil ùch wol gönnen
salde, die jne ùch by mir
da her uff sante, das ir
jne mit disem behielten
vnd da mit wonsches wielten.
deswar, des gan sie nyeman basz,
sit vwer reyne tugend das
fùr alle die welt verdienet hat
sonder alle missedat
mit freuden vnd mit helffe rat.>
als er die rede hatt geseit,
diese magt nit lenger beit;
vrlaub sie zü dem kùnige nam
vnd tett von jne allen sam.
mit diser rede sie von dannan schied.
jre strasze sie hin ritte,
die sie dar was geritten.
der ritter began aber bitten
mit velschelichen listen,
das man solte fristen
sine rede bisz morgen.
er hette noch verborgen
andere rede so vil,
der er ymer endes ziel
mohte gegeben bi dem tage.
da müste man gefristen die sage
dorch jne an dem andern tage.
des jne vil lùtzel bewage.
hie mit dise rede gelage.
an dem andern morgen frü
da greiff der bott zuo,
das er sin rede vol endet.
da wurden besendet
die kunden vnd die geste,
das gantz kein gebreste
an rittern vnd an frauwen was
widdervmb vf dem palas,
das man vernemen sold,
was er da reden wold.
da das alles was ergan,
sin rede hüb er an
vnd sprach:< kùnig artus,
jch bin nuo in vwer husz
her dorch uwern frommen kommen.
als die rede wùrt vernomen,
so wissent ir die warheit.
auch endarff es nit wesen leit
dem herren gawein, der hie stat,
wann yme daran helffe rat
zü siner not niht vergat.
jch weisz auch die rede wol,
was gawein leisten sal,
des er mit al hat gesworn.
der eyt were gar verlorn,
hette mich frauw salde niht gesant
dorch sinen willen her in dis lant,
das ich yme helff brehte
vnd jne von der ahte
der groszen freise löste
mit als solchem troste,
als ich jme bringe von ir.
das er deste basz glaubte mir,
so sal das das wortzeichen sin,
das sie ein gùldin vingerlin
vch by yme sante, her,
von ordohorht her verre,
das ùch an salden sachen
sal iemer ewig machen
vnd nymmer lat geswachen.
ob dise rede war sij?
sage ich iht anders da by,
das sollent ir mir glauben
vnd e doch erlauben,
das ich vol ende min sage.
wann es ist der salden clage,
das es yme beschaffen was,
das er muoste sweren angaras
die engstliche reyse.
auch mag er von der freyse
sich nymmer entrijden:
er müsz dar an lijden
angst vnd michel not,
deswar, vnd der gewisz dot,
den hat er an der hant,
hette mich frauw salde niht gesant
her, als ùch wùrt bekant.
jch weisz auch wol, das gawein
hat groszen trost von dem stein,
der usz dem rincken vorn sprang,
da er finbeusen bezwang
vnd yme den selben gùrttel nam,
darvmb yme gyramphiel gram
jst hart vnd fijnt ist,
die der salden swester ist,
wann er yme da sin helff was,
als er vor dem worm genasz,
da sie jne hin verraten hat.
vmb den grale es nit so stat,
das er yme icht gehelffen möge
dheiner freise vf dem wege,
wann als ich jne muosz leren,
wie er darzü keren
sùlle sine liste,
das jne der stein friste
vnd darzuo das vingerlin -
das muosz sin gereise sin
vnd die hentschuoch beyde,
sal er von dem leyde
widder heim kummen gesunt -,
vnd das yme gar werd kunt
die auentùre vf den grunt.
herre, ist das uwer will,
so enmag die rede still
niht noch heimlichen geschehen.
man muosz es öffenlichen sehen.
die rede anders nihts enfromt.
darvmb es also kommt,
das des nit mag wesen rat.
wie uwer müt darvmb stat,
ader was ùch dar an behag,
das wil ich mit kurtzer sage
hören, wann ich nymmer han
zu sagen. wùrt die rede getan,
ader wùrt verzigen dar an?>
artus widder den ritter sprach:
< so geschehe mir, das nye geschah,
solt ich vwer bed verzijhen!
geben vnd verlijhen
wil ich alle vwer bet,
als ich min tage tett
je, her frùnt min.
es enkund niht so tùwre sin,
das ich ùch wolt versagen,
wie groszen schaden ich sin tragen
yemer kund an dem guot.
jch bin in solchem müt
je bisz her gewesen stete.
vil hart ich missetete,
ob ich an ùch breche.
wer mich da bespreche,
der hette des vil groszes reht,
so ich ùch, her gut kneht,
zü der versmehung erspeht.>
der ritter muost gewert sin.
die hentschüch vnd das vingerlin
bracht man gar gering dar
fùr dise tugentriche schar.
auch gab den sighafften stein
dar min herr gawein,
alsdenn der ritter hatt begert.
als er nü des alles was gewert,
er sprach:< kùnig, jch wil bitten,
das mit höuelichen sitten
ritter vnd frauwen,
die dis wonder wöllen schauwen,
was ich da mit bega,
vnd wie ich die rede la,
vnd nyeman verdriesz des,
wie ich da mit ader wes
hie vor ùch begynne.
vnd merckent myne synne,
so werden ir wonders jnne.>
artus yme die bedt gehiesz,
die er yme auch war liesz.
er gebot vnd batt,
das nyeman da von siner stat
komme dorch kein geschiht,
ob er des vrlaubs niht
hette von disem botten.
das mohte jne lihte sin verbotten,
wann sie es gern alle gemeine
taten wann kay al eine:
der leistet im companye.
dorch gantz cortosye
ted er es niht, wann dorch spott.
es hett aber vil lieber der bott
gehabt, deswar, des an jne begert,
wölt er es jne han gewert,
das er gesessen were,
wann er sin wol enbere
zü einem gesellen an der mere.
da das alles was geschehen,
er lie sie das alle sehen,
das er das vingerlin leit
an sinen vinger vnd seit,
das gawein also solt tün.
so fùnd er allenthalben sün
vnd gelege der hasz nidder.
da mit greift er widder
vnd nam den sighafften stein
vnd sprach:< sehent, her gawein,
das ùch die rede werd kunt.
jr sollent jne legen in den munt,
so werdent ir leydes sicher
vnd gebent niht ein kicher
vmb aller der welt fijntschafft.
also grosz ist sin krafft,
sehent, herre, vnd túnt ir so.>
er leit in in den munt da.
des wart der hoff sith vnfro.
dise mere ich ein wijle la.
dennoch lagen vor jme da
dise hentschüh beyde.
hie hörent von einer meyde,
die was zü male clein.
darvmb müste sie ein
bliben, das sie niht enwas
mit den frauwen in dem palas,
wie wol sie were eins kùnigs kint.
die vnderwait ein starcker wint,
da sie in einer kammern sasz,
vnd also, das sie vergasz
jr selbs selber so gar,
das sie nit vmb ein hare
weste, wer sie were.
dis was ein fremde mere.
der wint began sich vf tragen.
darvnder sie ein wissagin,
jch enweisz wanne, befie.
dirre wint sie nie verlie
mit also groszem gewalt,
bisz er sie fuor den kùnig stalt.
nü hörent, was die rede galt.
alle, die da saszen,
die began des vnmaszen
wondern vil grosz
von disem wintgestosz,
das die magt trüg enbor,
die sie in der kammern vor
lieszent dorch ir wenikeit;
wann ein so cleine meit,
die solt noch nit zu houe gan.
darvmb was sie verlan,
deswar, vnd vmb anders niht.
dise wonderlich geschiht
brach jnen allen die zucht,
vnd wart da michel schalles frucht,
runen vnd winckelsehen,
wann man kaume an ir spehen
mohte gewonlich bekantung
von solcher wandelung.
des jahe gemeyne zung.
kay an der stund
des nit verswigen kund
vnd sprach vil spöttlichen:
< also salten frauwen slichen,
so sie zü houe gingen
fùr die geste vnd die enpfingen,
als dise cleine magt,
der ir miteinander hett versagt
dises hentschühs gewin.
sie wil sie doch beyde hin
tragen sonder uwern dang.
sitt ùch allen miszgelang,
jr muosz dar an gelingen.
sie hat solchen gedingen
vf disen wonders bejag,
das sie die füsze nit enmag
verlaszen zu der erde.
jr hatten sie von dem werde
verstoszen zü dem herde.>
dirre wintsprùtzig wint
verlie nach dis kint
niht: er habte es enbor
so hoh, das die füszspor
nieman moht verfahen,
vnd waren doch so nahen
der erden, das sie vndersneit
kaume dryer finger breit.
sust stunt sie vnlang da,
bisz sie der wint aber sa
so strenglichen begund rúren,
sùchen vnd fúren,
also zü dryen malen,
das er nye entwalen
wolte dar an.
zúm dritten male sie began
sprechen:< kùnig, hörent mich!
einer rede, der sal ich
vch warnen.> da mit sie stunt
zü der erden, vnd gesweig ir munt,
das sie yme tett nymmer kunt.
aber schunden sie begund
der wint an der stund
vnd tett ir so grosze not,
das man sie wande wesen dot:
so sere hub er sie vff.
des wart ein michel zulauff,
vnd wanden des, das sie were
dot von der swere.
da kam sie widder alsam e.
ein wort sie vil lute schre:
< her kùnig, ir sint verraten!>
die ritter widder traten
alle hinder sich.
sie sprach aber:< nü sal ich,
herre, nit mere sagen,
wann das ir kumber müszent tragen,
ob ir es nit vor fùrsehent,
vnd mit ùch manig güt kneht,
frauwen vnd meyde.
niht mer ich ùch bescheyde.
jch wil von dem leyde.>
mit diser rede sie gesweig.
vil schon sie dem kùnige neig
vnd wolt widder zü dem sal.
der wint lie sich nit zü tal,
er brehte sie denn als dar.
nuo wart vnder diser schar
rates vnd rede vil,
wie sie kamen an das ziel
der rede, die dise magt
vor jnen allen wijssagt.
da wart vil vnder,
offen vnd bisonder,
gerett vnd geraten.
wie sie da mit taten,
das wart jne alles kleiner fromm,
wann sie nye an das drumm
der rede komen kunden.
sust waren sie gebonden,
das sie das end niht enfunden.
kay sich zü lest bedoht,
ob dar disen ritter braht
hette eincherhand fijntschafft,
das er mit diser lùgen krafft
wölte jne an icht schad sin.
des doch an yme nit war schin.
anders nùst kund er herdencken.
nü wolt er auch niht krencken
jne dorch des houes ere;
vnd das ein hertzensere
were gewesen artusen,
ob er in sinem huse
einchen gast hette enteret,
hett er es nit in einen schimpff gekert.
des was man an yme gewon.
wa aber kam laster von,
das múst er vermijden,
wann es nit wolt lijden
artus, das er es tate.
deswar, das behielt er stete,
er ted es denn in einem schimpff
mit houelichem glimpff.
anders er es gar verbar.
ein red sprach er offembar,
der lachte artus vnd auch die schar.
er sprach:< kùnig, herre min!
sal es in vwern hulden sin
vnd dirre massenij,
das ich sij miner rede frij,
vnd das sie doch nach eren
geziehe, vnd müsze sich meren
vnser freude, die vns got
hie prüfet vnd der salden bot,
so wil ich sprechen ein teil:
wir haben al zü groszem heil
zü disem houe gehabt hie -
das doch nie me ergie -,
das vns zü keiner hochgezijt
so maniger auentùre strijt
zü hofe kam als nü.
jch sprich vmb das niht darzú,
das mich die rede beswere;
ob ir noch tusent weren,
des wolt ich mich sere frauwen.
jch wil miner freude strauwen,
jch möhte ir nie gemachen.
nú sehent zü disen sachen,
das es icht kom usz dem lachen.
merckent die auentùre reht,
die ùch dirre güt kneht
wil zeygen von siner kunst
vnd auch frauw salden gunst!
das dùncket mich nit missefarn.
man mag vns vnd jne bewarn
mit dirre auentùre sa,
das wir beydenthalb fro
der auentùre bliben.
was man zuuil triben
wil, das verdrùszet.
vil maniger des genùszet,
des er engelten sold,
ob glùck also wold
vnd jne sin salden lieszen.
des maniger sold genieszen,
des engiltet er, so salde wil.
dis ist alles ir spiel,
das sie vns so verwirret
vnd maniger dinge jrret,
des wir doch nit getruwen.
wie maniger si erbuwen
hab mit wunsches heil,
er wart doch zü teil -
wie er mir were veste -,
ob sie wolde, zü leste
dem vinstern teil am rad.
noch groszem fromm kompt dick schad,
nach groszem worff ein cleiner kumt.
was hat der grosz denn gefrummt?
so hat er me verlorn daran,
denn er da mit vor ie gewan,
wann jne vil sere ruwet,
das jne vervntrùwet
so hat der vorder val,
vnd verswiget sinen groszen schal,
den er treib vmb den gewyn.
frauw salde sante niht her jn
vmb sust die cleine magt,
die groszen schaden hat gewissagt.
dem widdersteent, e ir jne claget!>
manigem gefellt wol sin rat.
so bedùnckt es manigen sin ein missedat,
das er die rede hett getan.
nieman jne doch daran
lobt vnd besprach.
was da von red geschach,
die was heimlich vnder jn.
da wart doch iglichs sin
herreckt, vnd gesagt,
was jne an der rede behagt.
des was der sal mit al vol.
artus marckte die red wol
vnd sprach zü jne allen:
< nieman sal miszfallen,
was kay hab gesprochen.
vmb das wùrt nit zerbrochen,
was dirre ritter hab gebetten.
wolt ich die bett vndertretten,
deswar, so miszeted ich.
man hat sein e selten mich
bezigen, daz ich iemen betrùge
an siner bete vnd yme lùge.
was ich yme ie verhiesz -
jch engelte es ader geniesze -,
des sal ich jne gar gewern.
wann töhte anders sin gern
vnd min warlichs geheisz,
was ich nit han vnd weisz,
min lon wùrt da ageleisz.>
< her ritter>, aber sprach er,
< geent her - ich bin uwer gewer -,
vnd tünt gar, was ùch behag.
achtent nit, was er ùch sage.
sit ich ùch wol gönne,
jch wene, das sin enbönne
vch ieman, der hie jnne sij.
alle reden, die sint frij,
da die werck nit nach gant
vnd ledig frijlich bestant.
des mer denn zü uil geschiht.
jch ensehen nit, daz ùch icht
jrre, was ir tün wellt.
vwerm willen sij gesellt,
was ir wellent, tùrer helt.>
gnade er dem kùnige seit.
darnach er nit lenger beit.
er enwolt es nit seinen.
der hentschüch einen
streich er an sine hant.
da von sin lip halber swant
an dem rechten teil,
das von keinem meil
niht dar an ime gebrast.
den andern nam auch der gast
vnd leite jne nach disem an.
mit diser rede gie er von dan
vnd stunt mitten in den sal.
da schein sin gantz nihts vber al.
dise ritter da begunden
zü den selben stunden
yme mit al nach sehen,
ob sie jne möhten gespehen
jcht an den füsztritten.
das were alles güt vermitten.
als ob sie gar vmb sust stritten!
das was des gastes will.
nú sweig er vil still,
das er nye wort gesprach.
jr aller dat er da sach,
jne sah aber nyeman.
auch hett er sich ieman
vil vngern sehen lan.
kay began yme nach gan,
ob er jne möhte hören.
den liesz er sich betören,
wann es yme vil wenig war.
so er wande zü yme dar
schlijchen, so gie er fùr.
nuo gedohte kay, wie er die tür
dorch gewarheit befinge,
daz er darusz icht ginge.
wie wenig jne das verfing!
wann der bott als vor kay ging
dorch die türe den sal hinab
vnd trúg dise riche vnhab.
vf sinen bock er gesasz -
des was er vil lutzel lasz -
vnd reit fùr den palas.
der kùnig des gewisz was,
das er da by yme were,
vnd was yme das swere,
das er sich da so lang hal.
des wanden sie vber al
vnd hatten es fùr ein torperheit,
das er also lang beit
vnd sich nit sehen liesz,
als er jne allen verhiesz,
da er dise bet batt,
der man yme gab güt stat.
sie traug siner truwen schat.
hie mit gehabt er vor dem sal.
das gesind oben vber al
dennoch sasz, one kay alleine.
groszer zùchte hort da schein,
wann es jne verbotten was,
das nyeman vf dem palas
von siner stat vff stunt vmb icht,
bisz das dirre auentùre geschiht
vol endet hat dirre bott.
das was kùnig artus gebott
vnd auch dises botten bet.
da nyeman vf stunt von siner stet
vnd dirre auentùre bijten
mit gar zùchtigen sitten
also gar ein lang stund,
artusen des begund
verdrieszen vil sere,
wann es an sin ere
vnd vnuergolten schaden gie.
er was der erst, der nü hie
die werck fùr vbel verfie.
er stunt vf von siner stat.
disen botten er mit zùhten batt,
das er sich sehen liesze,
als er yme verhiesze -
wie er jne enhort nach enspeht -,
vnd sprah, es solt gut kneht
dorch gvt nymmer miszefarn;
das solt man den argen sparn;
vnd das er sin zu gabe gert,
deswar, er wùrde sin gewert,
ob es noch gröszer were.
so were vnlasterbere
dar an sin rich bejage.
die red frommes lùtzel wag,
wann er was nyrgent da.
nach siner rede húb sich da
von jnen allen michel vngehab.
die vernam er wol her ab.
vil clein er es ahtet,
was iglicher betrahtet,
wann jn der zauber bedachte.
wol wart das berüchet,
das er allenthalben wart gesuocht
jn dem palas hin vnd her.
diser, jhener vnd der
schlichent hin vnd her vil lijse:
jglicher in sunder wijse
an sùchen vnd an fluchen pflag.
jr aller flijsz dar an lag,
wie lùtzel es verfing
jr iglichen, der da ging
sùchend widder vnd fùr,
jn den winckeln dar affter vnd vor der tür,
vnder vnd uf den tischen, auch vnder den bencken.
wes soltent sie gedencken,
er was dannoch vnder jn?
daran bedrog sie ir syn:
er was da nit, er was hin.
nach was es gar ein gemeiner spott.
sie wanden, das dirre bott
were vnder der frauwen schar.
sie gingen miteinander dar
vnd hersuchtent igliche
bisonder alle gliche.
das was ein verlorn arbeit.
hie nidden er noch alles beit,
bisz er allenthalben hersüchet wart.
nü wolte er siner widdervart
nit lenger sparn fùrbasz.
als er nü vf sinem bock sasz
vnd da nidden vor dem sal hielt
vnd diser cleynode wielt -
da von jne doch nyeman sah -,
er rieff hinuff vnd sprah:
< artus, lieber herr min,
nuo lant uwer sùchen sin!
jch bin hie, hörent mich!
nieman sal vermeszen sich,
das er mir an gewynne
den raub anders dann mit mynne.
jch bin noch by ùch hie jnne!
jch sage ùch, wie es darvmb stat:
hùtt gelten ich die myssedat,
vnd wil die schuld nùwen,
die gawein mit vntrùwen
an fimbeusen ergie.
des jne gynouer nit erlie,
das er yme dorch raubes sach
reit usz disem houe nach
vnd wolt jne han erslagen
gar one widdersagen,
als er yme wol bescheinet,
was er da mit meynet.
er bestunt yne vmb sin eigen güt,
das nyeman dem andern tüt
wann diebe vnd raubere.
die red ich ùch bewere,
wann ich hie by mir han
so vil des raubs, das dar an
gar scheinet die warheit.
das ich von yme han gecleit,
das ist der stein, den er beieit.
auch sij vwer eigen min lip,
so hat gynouer, vwer wip,
den gùrttel, den er yme nam.
artus, nement war, wie das zam
ader ioch vwern eren zeme!
ob ich ùch da widder neme
dis cleynod zü gelte,
dar vmb nyeman schelte
daran min truwe,
wann die schuld, die ist nùwe
alwegen, die vngerochen ist,
da ensy sonne ader tages frist
e daran gesprochen.
wùrt vnder die gerochen
mit glichem gelte die geschiht,
also der wijsen sage giht,
so mag man jne besprechen niht.
herre kùnig, ich wil ùch sagen,
was ir kumbers müszent tragen
von disem verlust, den ir tùnt.
jch sage es ùch nit dorch gút,
wenn das vwer ruwe deste me
sij vnd tü vwerm hertzen we,
vnd wùrt ùch doch dar an geseit
nihts anders wann die warheit.
vwer hoff müsz zergeen.
der mag nit lenger gesteen,
der iemer ewig were gewesen.
auch mag gawein niht genesen,
wil er nach dem grale varn.
das enmag er nymmer bewarn,
wann er hat sin gesworn.
dwijle er nù den stein hat verlorn,
die hentschuh vnd das vingerlin,
das sin behelff solte sin
vnd jne solte haben widderbraht -
das ist nuo gar widderdoht -,
er müsz bliben vnderwegen.
auch müszent ir freude hin legen
vnd jamers vwer tage pflegen.
hie mit wil ich scheyden hin,
sit ich gar gewert bin,
dar vmb ich was komen her.
vrlaubs ich da mit ger
von ùch vnd dem gesinde,
vnd weisz wol, daz vil geswinde
wùrt gemeyne clage nach mir,
die das gesinde vnd auch ir
tunt, so ir ùch verstet,
war an dirre schade ergeet,
vnd erfindet, als ich ùch sage,
vnd michel mere uwer tage.
noch in vil kurtzen zijten
beginnet man vil wijten
vernemen dise mere.
vnuertregliche swere
wehszet ùch sunder ende,
erwurbent gaweins hende.>
man hort wol, was er sprach,
anders denn das jne nyeman sach,
wie wol man sin tate war.
nu was kay vnd die schar
her ab vf den hoff gegan,
da er die rede hatt getan,
vnd hatt yme kay da erdoht
einen list, den er auch volbraht,
der jne doch wenig verfing.
zü der porten er heimlich ging
vnd verslosz die vil vast.
da mit wolt er dem gast
gantz vnd gar sin uszvart
han herwehrt vnd verspart.
da mit ging er widder
zü den rittern, die hernidder
mit yme gegangen warn,
vnd wolden sin varn;
sitt er jne niht moht gesehen -
ob er jne doch kunde spehen
mit icht an des bockes spor,
so er yme wölt wijchen vor?
was halff jne das? er swebt enbor!
gar wenig kay dar an gewan,
das er sich da vbersan,
wann er sah, was er tett,
vnd weich dennoch von stett zü stet,
wa hin yme aller bast behagt.
so lang er sich von yme entsagt,
das kay stracks an jn lieff
vnd sie alle nach hùlff an rieff,
das er icht keme hin;
vnd iah, er hett fùr war jn
jn der bùrge da besloszen.
des waren vnuerdroszen
die ritter mit yme alle.
mit vil groszem schalle
wart er vmb gejeit.
dhein blosz man vermeit,
die man kund erdencken,
da man jne wande wencken.
vor, hin vnd her
beyde swert vnd sper
fürt vff jne gemeyne ger.
die rede was gar verlorn.
den bock nam der bott mit den sporn
vnd liesz sich von jne allen sehen.
mit einem wonderlichen schehen
dorch sie er da sprangte.
sin bock yme das verhangte,
daz er vor ir aller angesiht
yme selbs nam ein richt
oben ùber die mure
als ein vberschure
ader ein hagel, dar ùber wat,
den ein winds brut blat.
sust reit er hin sine wege
von jne, scheuelir a bege.
da mit man jne zü lest sah.
vil groszes leit da geschah
artusen vnd den sinen.
das began an yme schinen,
wann sich sin freude wehselt da
mit jamer vnd mit clage sa.
hie mit ich von dem botten la.
artus vnd das gesind
klagend wart vil geswind
vmb disen vngefugen schaden,
da mit sie waren beladen
sunder trost vnd rat.
wie es vmb grosze clage stat,
des han ich vil vor gesagt.
darvmb si es hie verdeit;
wann so vil ich ùch sage,
das dise hertzecliche clage
wert bisz an den dritten tag,
das sie nye gelag,
gar one allen trost.
ein rat sie da von erlost,
den gawein jne allen bot:
der sie braht usz der not.
des was auch vil michel zijt,
wann ez was uff geleit,
das sich der hoff wolt zerlan,
vnd solten alle vrlaub han
des morgens vnd scheyden von dan.
als nü in disem leid
ritter, frauwen vnd meid
gantz vnd gar waren befangen,
vnd ir freud was zergangen
vnd gar solt ein end
von dirre missewend
des selben morgens han genomen,
gawein was fùr den kùnig komen,
da er nù mit den fùrsten sasz
vnd an freuden so krang was,
vnd auch das gesind.
er wold die clage swind,
wa er kund, an jne stauwen
vnd sie mit siner rede frauwen,
wann sie yme hart missehagt.
er sprach:< herre, daz ir clagt,
das ist gar one not.
es ist vf mines einigen dot
dise auentùre erdocht.
dar vmb wart ùch her bracht
dise grosze auentùre.
klagent ùch niht so tùre,
got ist noch ein freuden stùre.
was ist es, das ich bin verlorn?
jch bin darvmb niht geborn,
das ich ewiclich leben sold,
wann bisz es got wold.
das sal nú ein end sin.
artus, lieber herre min,
nement an ùch mannes müt!
jr hant noch ere vnd gút,
lip, lùte vnd lant,
vnd sint der tùgend bekant,
das ùch nymmer mag missefarn,
da ir es selber wöllent bewarn.
jr mùgent min enbern wol:
one mich ist uwer hoff vol
fùrsten vnd recken,
die wol mùgent wecken
freude vnd auch vben.
lant ùch niht bedrüben
so hart mins lebens val,
das ir vnd der hoff al
vch freuden verzihet.
ob mir got glùck verlihet,
das ich wol widder kum?
wie es mir dick sij frum
gewesen, das ich hatt den stein,
jch bin es nach gawein,
als ich auch vor hin was,
der vor maniger freise genasz;
das auch noch geschehen mag.
jr gesehent nach manigen frölichen tag.
niht clagent disen slag!
jch wil geben güten rat,
dwijle die rede also stat,
das die also geschehen ist.
wir mögent in kurtzer frist
der rede an ein end komen.
jr hant alle wol vernomen,
das vns die vil cleine magt
den schaden vor hat gewissagt,
als wir in haben erfùnden.
leider don enkunden
wir vns der rede nit verstan,
hett es her kay nit getan.
was verfing denn die manung?
darvmb, daz sin zung
manig ernsthafftige rede verbert
vnd schimpff vnd spott lert
vnd dick da zü rates zijt
helffebaren rat git,
des wart sin rat helffelosz,
wann jne zü ernst nyeman kosz.
zü schimpff er verfangen wart.
das kam von der hochfart,
das vns der auentùre spiel
brach daran freuden ziel.
der rede ich hie swijgen wil.
jch wil aber offenlichen
hie armen vnd richen
daran sagen minen synn.
der red ich gewisz bin
vnd weisz sie wol fùr war:
sal vns mit rate ieman dar
bringen, das tüt die magt,
die vns die rede wissagt.
herre, die besendet!
so wirt gar vol endet
vnser red hin vnd her.
des rates ich volge ger,
ob ùch der rate gefall.>
das sprachen sie all:
< er hat wol geraten.>
mit yme sie jne baten,
das er die magt besand,
das jne des ieman wand,
vnd erfüre das end an ir,
sitt es was ir aller gir.
so wart die magt besant
vnd dar braht so zuhant.
der rat sie von der klage entbant.
gawein das niht vberdoht:
die magt er selbs broht
fùr den kùnig in den sal.
da wart ein freude vber al,
als sie ersahen das kint,
wann sie als vor ein starcker wint
hüb die böre von der erden,
da sie mit groszem werde
stunt vor artusen.
der wint sie in dem huse
vmb vnd vmb fürte.
dar vnder er sie rürte
mit also mechtiger krafft,
das die frauwen vnd die ritterschafft
hatten harttes leid
vmb diese edele meyd:
sie wanden sie bliben dot,
wann ir der wint so grosz not
mit schùtten vnd mit fúren det
jn dem huse von stet zü stett.
als der wint das lang getreib,
die magt da bleib
vor dem kùnige an ir stat,
da sie nit von getrat.
gawein einer stille bat.
sin bet da nyeman zerbrach.
die magt stunt vnd sprach:
< hettent ir mir, kùnig, geglaubt,
so werent ir niht beraubt
riches vnd eren,
vnd hetten so groszen seren
da von niht herworben.
jr müssent sin verdorben,
wùrt es niht widder gewonnen.
wil ùch das heil gönnen,
das es iemer sal ergan,
das músz nach hohen freisen stan,
vnd ob ùch hett holde
gansguoter von micholde,
der husz hat zü madarp,
der ie nach hohem prijse warp
vnd solcher ding kunst hat;
wil ùch der bieten rat,
so wùrt es alles widder tan.
vnd weren aber alle man
vnd ir stercke vnd ir krafft
mit kunst vnd mit ritterschafft
an einen man gewendet,
e es werd vol endet,
er hett mit al gnüg zü tún,
wann er nyrgent vindet sún
anders denn alzijt gewissen strijt.
er mag gewynnen vbel zijt,
vf dem dis gewerb lijt.>
hie mit sie die red lie.
dem kùnige sie neig vnd gie
zü dem werckgadem vsz dem sal.
das gesinde da vber al
frauwete sich der mere,
wie wol es doch noch vnuerendet were
vnd mit so groszer arbeit,
alsdenn die magt hatt geseit,
muoste man der sachen zü end komen.
nü hatt ygern vernomen
von gansgutern, irem amijs,
das disen raup in dheine wijse
yeman widder gewynnen kund
wann von sinem gunde.
deswar, des wart sie hart fro.
zü dem kùnige ging sie da
vnd batt jne hart fro zü sin.
sie sprach:< sún vnd herre min,
des mús nach alles werden rat,
dwijle alles din gewerb stat
an gansgüter, minem mann.
nieman ich der eren basz gan.
wir sollen alles truren lan.>
also vor erhuob sich nuo
hie freud. des morgens fruo
wart artus des zü rat,
das er icht zü spat
dis gewerb begund.
das gesind an der stund
wart gar fùr jne gesammelt dar.
vnder diser tugentricher schar
stunt er vf vnd sprah:
< jr herren, was mir ie geschah
leydes, das was ein niht
widder dise schedlich geschiht,
die mir nú ist geschehen,
als ir alle habent gesehen;
vnd clage so gar nit den schaden,
dann das da mit ùberladen
gawein an kumber ist
leyder nü zü dirre frist
vmb den sighafften stein.
dirre schad wag mich clein,
das selb mich ymer tate,
vnd hatt nihts zü stete
gaweyn dise red gesworn,
da maniger von hat verlorn
den lip ader die arbeit,
der sie dorch sin mannheit
bestunt vnd da kumber leit.
nu mús die rede also sin.
manne vnd frùnde min,
jch bitt ùch, das ùch allen
min rede müsze gefallen,
die ich hie tün wil.
vnd dùncke sie nyeman zuuil,
wann es mir also stet:
wie es gawein ergeet,
also mús es mir ergeen.
jch wil die reyse besteen
mit gawein, des ist niht rat.
vnser ietweder den andern lat
jn keyner hand not beliben,
die er mag verdriben,
vnd da yme helffbere
der ander were
ader iemer sin möhte.
ob es yme also tohte,
das were gar vnwendig.
git glùck vns beyden sig,
deswar, das ist sunder nijt.
welchem einem es jne git,
des hat der ander cleynen hasz.
was töhte zwein gesellen basz?
welcher aber in der not
bestat, so ist der ander dot,
wie ferre er were von yme.
darvmb ich mir die reise nim.
jch enwil nymmer one jne
freuden pflegen, ob ich bin.
sitt er dar sal, ich müsz da hin.>
alt vnd jung
mit gar gemeiner zung
die rede widder sprachen.
die stille sie zerbrachen
mit vil groszem schall.
gawein batt sie all,
das sie swijgen solten,
ob sie vernemmen wolten,
was sin rede were.
were sie sagebere
vnd jne wol behagte,
als er sie gesagte,
des were er mit al fro.
were aber des nit also,
das dann ein ander da
seite sin rede sa,
bisz man ein end fùnde,
da mit man sie entbùnde
vsz des kumbers vngemach.
gawein vor jne allen sprach:
< artus, kùnig vnd herre!
wie habent ir so verre
vergessen uwer ere,
das ir nú woltent meren
vwerm land vnd nùwen
nach so groszen rùwen
trurikeit vnd leid -
als ich ùch bescheid -,
das ir woltent sùchen die land,
als ein scheuelir errand -
das spricht: als ein recke -,
den selten iemer huses decke
mit gemach hat bedeckt,
vnd den sin müt wecket
núwan vff ritters prijsz,
vnd ist der freise amijs,
wann er nit anders begert
vnd ist da mit wol gewert?
er hat sich gelaszen daran.
wöllent ir die rede reht versteen,
so werent ùbel bewart
vwer lant der vil maniger vart,
darzü mann vnd mage.
jr wöllent vns vf die wage
dorch vwern müt setzen
vnd libes ergetzen
vnd leit vf den rùck legen.
lant solcher arbeit pflegen,
die vwern hoff prisent
vnd ùch zü lob wijsent,
vnd die auch prijsent uwern nam,
vnd uwerm hoff túnt alsam!
der hie ist one zal:
das ist ywein vnd parcifal,
lantzeleth vnd erec.
die haben dises bejags weg
vil dick hart wol bekant;
segremors vnd calocreant,
jch vnd min frùnt, her kay,
auch maniger, der hie sitzet by.
jch wene, die rede weger sy.>
die rede duhte sie al güt,
vnd wart da mit des kùnigs mút
gar ab geleitet.
gawein sich arbeitet
dar vmb vil sere,
das sich nyeman mere
da dirre maszenije
dorch ritters banchenije
an nam dise arbeit.
das was yme jnneclichen leit,
wann er sie hett gesprochen an,
das wart darvmb niht getan,
das er sie schunde dar zü,
nùwan daz er sie dem kùnige nú
da mit hette geleitet ab,
vnd daz er eyne die hab
gern wolt erwerben
ader eine darvmb ersterben.
deswar, das was sin andaht.
da hatt er es darzü braht,
das des niht mohte sin,
als nü wart an jne schin:
sie vorchten auch gar wenig dise pijn.
dem sie glich taten,
wann sie einen strijt haten
alle vrlaubs halber vnder jne.
gawein wante sinen sin
daran, das er es erwante,
das sie von dem land
yrgent mit yme kerten.
jre bet sie ie merten
je lenger ie basz ie basz.
gawein das widdersasz
vnd liesz sie werben ir bed,
die mit groszem willen ted
da ir iglicher.
es enwart nye bet glicher
an mút vnd an willen,
wann sie nyeman gestillen
mit keinerhand rede kunde,
wan yme des prises gunde
der kund vnd der vnkunde.
nach igliches begirde
mit sprùchen vnwirde
her kay iglichem bot.
des ist gar vnnot,
das ich die hie alle sage,
wann ich zú dem end jage
hie diser auentùre.
wie iglicher tùre
da batt, er wart entwert.
dennoch vrlaubs begert
vil hart min her parcifal,
da die andern vber al
sich der bed ab taden,
die auch des selben baden.
kay treib dar usz michelen spot.
< her parcifal, so ùch got!
leszt die bed vnderstan,>,
sprach er,< das ist recht getan!
besehent vor, ob her gawein
das vingerlin vnd den stein
vnd die hentschüh da mit
also vor noh erstrit;
so wùrd es ùch geware,
ob halt danne by ùch were
goorz von goromant,
vch müsze werden bekant,
wie es stùnd vmb den gral,
wie er ùch frage alle mal
verbùte dorch werde zùcht,
da er so richer male frucht
von ritterschafft an uch leit,
der ir auch mit synne pheit.
das tet zucht vnd nit zagheit.>
hie mit er die rede lie.
gawein fùr den kùnig gie:
vrlaubs er der reise bat.
her kay von der selben stat
mit keinerhand rede wolt komen,
bisz er von yme hett genomen
vrlaub, vnd her lantzelet.
calocreant das selb tet.
das kund jne nyeman herwehrn,
wann sie gemeinclich sweren
begunden, das sie lagen dot,
e denn sie jne in dheinerhand not
dorch keine sache lieszen.
jr gezoh sie jne hieszen
des morgens vil fruo
bereiten dar zuo.
als sie denn wolten scheyden,
von frauwen vnd von meyden
her kay vrlaub nam.
von den rittern tet er sam.
da prüfte er lachen vnd scham.
er stunt mitten in den sal
vnd sprach:< vernement vber al,
was ich rede welle!
jch bin hie geselle
gewesen her min tage,
das ich mit heiles bejage
vnd mit minem dienst erwarp,
das mir an gunst nye verdarb
vwer aller wille zugüt,
wenn ich nach uwerm müt
mit al so kund geleben,
das ich minen dienst wolde geben
dem mynnsten vnd dem meisten.
ja, möht ichs wol geleisten!
auch tet ich es vil bereit.
das was mir vnuerseit;
das selb sal ich noch sin.
jch weisz wol, ir mögent min
vbel vnd vnsanfft enbern.
jr sollent mich vrlaubs gewern
vnd wil doch das dingen e,
das es vwern hertzen we
jcht tuo, das ich sin bitt,
wie es sij frùndes sitt,
das er frùnde clagen mùsz.
so man an frùndes buosz
sieht vnd gedencket,
ein hertz liht wencket,
das liebe so bekrencket,
als ich das uwer han getan.
des bin ich ein selig man,
das ich die liebe von úch weisz.
jch wil haben vwern geheisz,
das ir ùch gehabent wol.
bisz ich min rede vol
vch gesage, als ich willen hab,
entwijchent vwere vngehab!
da mit sollent ir mich mieten.
jch enmag ùch niht verbieten,
jr múszent mich clagen hinnach.
vch sal aber niht sin zugach,
das ir sin nü begynnent
darvmb, ob ir mich mynnent
vnd mir sint von hertzen holt,
das ich vil lang han geholt,
wann ich ùch ie versprach
vnd was vwer schammen tach.
das mein ich hin zu frauwen
vnd wil auch des wol getruwen,
man músz sie trurig schauwen.
nü müsz mich iemer rùwen,
das sie so hart zerblùwen
jre brúste müszen nach mir
dorch die frùntliche gir,
die sie gewinnent leyder.
auch ruwent mich die cleider,
die sie nach mir zerrijszent,
vnd die roten munde zerwijszent
vnd da die trehen erreichent,
das da von erbleichent
die hùffe vnd die wangen,
das sie von jrem getwange
müszent also sere salben
vnd manigen zopff valben,
den sie gar zerbrechen
vnd das daran rechen,
das sie min nit gehaben mùgent.
ach, wie manigen güten segen
sie mir herwerbent von gott,
das mich sin schirm vnd sin gebott
nymmer herwidder gesende
her heim von dem ellende,
noch schier widder bringe!
so ist ir freude geringe,
vnd gebent güten willekomen.
er wirt aber selten genomen
von mannen vnd von wiben.
jch kom widder, ader ich blibe.
jch wil ùch doch alle bitten,
das ir mit wibes guten sitten
vwer grosze clage maszent
vnd mich ein wijle laszent
vsz, ob ich icht bejage.
wann got müsze vwer clage
vernemen so zü hant!
vmb ùch ist es so gewant,
das vwere süsze augen
dem manne vil taugen
gar verstelent ab den mút.
so das ein cleiner blick tút,
was ted denn gemeine bet,
die man emszeclichen het?
auch so bin ich so frech niht,
vnd vind ich kein miszgeschiht,
jch iage liht die widderfart.
so wol ùch denn ymmer wart,
das ich widder kommen bin.
min amye, die ist hin,
die músz vor leid sterben.
wa sal ich danne erwerben
mir ein so getruwes wip,
die mit truwen minen lip
so mynne, so sie hat getan?
das mús ich usz dem muot lan,
vnd musz sie mich ruwen.
es enkom von ir truwen,
sie ist gewiszlichen dot.>
die frauwen wurden alle rot,
da er in solchen spot bot.
hie mit er die rede lie.
fùr gynouern er hin gie,
da die frauwen saszen,
vnd batt sie weynen laszen
vnd truren, das sie waren fro.
gynouer muost lachen da
vnd mit ir die frauwen.
er batt die ritter schauwen
dis vngefúge weinen,
vnd wie enzit sie bescheinen
yme ir truwe wolden.
des müsten sie in hulden
haben, ob er solte leben.
manig spott wart in geben,
e denn er schied von dannan.
von wijben vnd von mannen
wart er wenig geclagt.
als es des morgens anders tagt,
gawein huob sich vf die vart -
nit lenger es gespart wart -,
vnd mit ymme dise drij:
lantzelet vnd kay
vnd auch her calocreant.
vil maniger segen wart da zü hant
zuo irem heil von jne gewant.
gawein mit disen drijn
kerte sin strasze da hyn,
da er bekante die rehte spor -
sin gezùg fúr alles vor -,
gein madarp den rehten strich,
als er aller bast sich
des rechten wegs versan.
sust reit er zwölff tage von dan,
das er al stund
streich, was er kund,
geyn madarp zü dem huse.
da muoste er ein cluse
zü notstreb erfehten
mit disen guten knehten,
da sie groszen kumber litten.
jnen wart da hart mit gestritten:
des enpfing ein wunde
her kay an den stunden,
wann er erst zú rosz kam.
ein tiost er genam
widder einen tùren helt,
den ym kay hatt uszerwelt,
der des wirttes brüder was.
von dem rosz vf das grasz
warff er in mit dem sper.
darzü was yme also ger,
das er bleib vnbedacht
des haubtes, das da mit al blacht
die coyphe, die was vngestrichet.
dargeyn hatt sich geschicket
jhener vnd nam jn da.
er müste dot sin gewesen sa,
hett er jne herreicht vol.
susz gab her kay da den zol.
des lant jn ùch gefallen wol.
der ritter was gefangen.
es was aber dennoch vnzergangen
dirre hefftige strijt:
sich erhub vor dem hamit
ein krefftige tiostùre,
da mynne wart vil tùre,
deswar, von den gesten.
sie müsten sich vesten,
wann ir was ein cleines her,
vnd satzten sich doch zü wehr,
wann man ir hart vort.
der kumber sie beswert.
des sie wol tadent schin.
gawein vnd die gesellen sin
vil manigen da valten.
nu hatt sich enthalten
nach in dem hamit der wirt
mit leyde, als da einem der kumber swirt
vmb den brúder vnd die sinen.
jnn zorniclichem schijn
vsz dem hamit er rand.
als jne nuo gawein erkand,
sin sper er an yme swand.
da kamen sie zü den swerten,
wann sie des beyde begerten.
des vnderslúgent sie sich,
das beyde slag vnd stich
mit kunst wart an gewert.
entweder wart des bekert.
gawein wehrte sich mit mannes mút,
bisz er yme den stahelhút
mit einem slage an gewan.
da mit er ymme gesigte an,
das er jme sicherung iah.
dannoch slúg vnd stah
dort gaweins geselleschafft,
wann der bùrger krafft
hatt sie da bestanden,
das sie mit al swanden
beyde krafft vnd maht.
gefengnisz vnd slaht
was von jne worden da.
der frid múst wesen sa.
hie mit ich den strijt la.
als nú der frid gegeben wart,
mit micheler hochfart
wurden dise geste jn braht.
daran wart wenig gedoht,
was von jne schadens was geschehen,
vnd wurden also wol fùrsehen,
das jne da nihts gebrast.
gawein was wirt vnd nit gast
vnd sine gesellen da mit.
das er da zwölff tage bit,
tet mir die auentùre kunt,
bisz her kay wart gesunt
vnd alles dinges wol bereit.
gawein da nit lenger beit.
er wart die strasze da von dan gelert.
da hin er mit sinen gesellen kert
zü dem land gein micholde,
da er vinden solde
gansgútern da zü madarp,
da er die bottschafft warp
vmb dise cleynote.
dar nach yme was mit truwen not,
wann es yme also gezoh.
vber ein berg, der was hoh,
muoste er mit al stijgen,
gein einem wast sigen,
der vinster was vnd kalt.
den vmbzoh ein groszer walt,
der was nach freise gestalt.
jn dem wald leid er michel not.
sie wanden alle wesen dot:
von solchem vngeuert
jr leben was da hert,
die wijle sie da músten sin.
es enhatt nye sonnen schin
vberschinen disen tan.
freysam vnd vngetan
vnd vnferttig was er.
gawein nam ein ker,
die jne die beste duhte da.
sie was aber gar sonder sla
vnd one weges bild,
wann rauh vnd gar wild.
die truog jne gein einem hol,
das was als wit wol,
das man dar dorch gereit.
anderswa gar dorch sneit
den walt ein so hoher berg,
das nye kein antwerg
möhte vber ziehen.
auch enmoht niht entfliehen
disem hole kein man,
der den weg wolt han,
er wölte widder keren
vnd sich so vneren.
dennoch wart er nit vermitten,
es wùrd da mit yme gestritten.
das weste gawein mit siner geselleschafft niht,
bisz jne dise vngeschiht
jn dem berge widderfúr.
nú was es in siner kúr
zú tuon vnd zú laszen.
vil wenig sie sich daran maszten,
wann sie es niht widdersaszen.
dorch das hole sie alle ritten,
vnd auch da nit lenger biten,
jn einen berg, der was grosz.
nach jne der berg nydder schosz
vnd beslosz sie mit al.
zú hant nach dem vall,
da sie der berg vmbswiff,
ein stymme hart lute rieff:
< wol uff, sie sint gefangen!>
der rede múste belangen
wol dise helde,
wann sie die nahtselde
vil tùre músten gelten.
draben vnd zelten
hatt dar jnn ein ende.
nùwan die steynwende,
sie weder griffent nach ensahen
wijte, verre ader nahen
anders niht fùr war.
hier müste die gefangen schar
sich da verengsten gar.
als sie erbeiszet waren
vnd wolten gefaren,
ob sie icht mohten vinden,
sie griffent als die blinden.
mit henden suchten sie die stat,
mit füszen ir iglicher trat
hin vnd her vil lise.
jn al solcher wijse
vil lange sie gingen.
da mit sie nihts verfingen
wann múdikeit vnd manigen stosz,
denn die vinstere was gar grosz,
die das hol gar bedackte
als ein gar vinstere nahte.
sie enwesten, was sie taten:
sie slichent vnd traten
jn dem hol an so manigen enden.
sie enmohten es niht gewenden,
wann des muost es wesen.
sie genasen, solten sie genesen.
daran múst es doch ergeen,
vnd gar an glùck steen.
hie gingen zwen, dort lagent zwen.
die rosz sie von jne trieben.
hie by einander blieben
gawein vnd dise drij.
nuo hörent, was in ir aht sij:
sie wolten sich entwaffen,
wann sie so gar zü slaffen
dise grosze vinstere treip,
das ir keiner bleip,
er sig nydder vf die erd.
hie muoste von sinem werd
hern gawein ein teil
gefallen von vnheil.
das er sich an die lihte lie,
das was yme geschehen nye,
vnd vnbewart were
widder so grosze swere,
als yme dar an lag,
die niht wann den lip wag.
das was ein schedlicher slag.
als sie nü ytzú solten
sich entwapen vnd wolten
slaffen, als jne was gedoht,
sie wurden in die not braht,
das sie wanden wesen dot.
der berg jne den kumber bot:
er gab so eiszlichen schal,
das yme gar mit erhal
beyde tale vnd walt,
als ob es hagels gewalt
alles wolt zerfüren.
sus began er sich rüren
vil wol hart zehen stunt,
als ob er bresten in den grunt
wolte da so zü hant.
also dise not verswant,
ein stymme rieff dar nach:
< hörent vf, ùch ist zugah!
ja, sint sie doch alle verlorn!>
dise hetten wol gesworn,
das der berg aller were
gefallen vnd die mere
wolt ine dise stymme sagen.
sie begerten, das es wolte tagen,
wann sie hatten es dar fùr,
das jne verfiel des holes tür,
das es were worden naht,
sit man niht kiesen maht
eincherhand lieht in dem hol.
die red behagt jne niht zü wol.
sie entslieffent dar vnder
nach disem groszen wunder
also in ire sarwat.
des enmoht nit wesen rat
von der vinstere vnd der müde.
wer nah vberlüde
einen risen mit disen sachen,
er möhte wenig gewachen,
ader einen lewen, ob ir welt,
der solchem kumber were zugesellt.
also slieffen sie drij tage,
das sie nye worden enwage
bisz an den vierden morgen.
jn disen groszen sorgen
herwachte min herr gawein
vnder sinen gesellen allein
vnd began sich selbs an sehen,
wie yme so were geschehen,
vnd hette sin vergeszen gar,
wie er were komen dar.
er weste auch nit vmb die dry,
die yme lagent nahen by.
nü luchte die sonne zü male lieht
jn dem berge. das enmohte er niht
versteen, was die rede was.
glich sleht als ein glasz
was das hole vnd wijte,
vnd zü der rehten sijten
flosze in dem berge ein breiter flùme,
das man zü tale vil hart kume
mohte ersehen sinen flusz,
vnd vil glich eben schusz.
gawein erfant die rede wol,
das ein flume dorch das hol
vnder yme flosz,
der also süsze dosz,
das jne zü sehen zame.
jne duhte, wie er verneme
ein geköse da von lùten.
was das solte betùten,
das wolte er erfinden.
mit tritten vil linden
schleich er zü dem waszer hin,
als jne leitet sin synn.
vil heimlich er hin ab sah -
so das sin stet was sin dah -,
ob er ieman da erfùnd.
des wolt er also kund
mit disem liste gewynnen
vnd endlich ersynnen,
ob er niht were bedrogen.
da was die rede niht gelogen:
er sah in einer barcken
einen schönen ritter starcke,
von richer kost gar gecleit.
der hatt sich in die schosz geleit
einer schonen jumpfrauwen,
die auch was erbowen
mit kostlicher gezierde.
mit mynnen gantzer begirde
sie ein ander pflagen
mit gar glichen wagen.
des hiesz sie mynne lagen.
ein truwe die zwey einet:
sie hatt sich geleynet
vber jne, da er lag.
mit kùszen sie des recken pflag
vnd er ir sunder twale.
es was nit zü einem male,
ja, es was wol tusent stunt.
da von iglichs munt
wart erhitzet vnd erfùchtet
vnd beyder hertzen erlùhtet
von mynne gereisz. der wonne
wer reynem wijbe verbonne,
das ir niht geschehe alsam,
den tüt got salden lam.
wie tete er, das nye so geschah!
jch wene, er niht ab brach
des kùszens, so er es ir bot,
vnd ir reyner süszer munt rot
es von sinem mund enpfie.
jr iglichs niht gahes lie,
so ein munt den andern dackte
vnd eins des andern atem smackte.
sie mohten nit sin verspart
ein teil, so offen wart.
die hitze erquickend was ein druck
da sanffter vnd ein widderzuck,
der doch die mùnde nit enschied;
ob ein vahen darzú geried
lindes mit der rehten hant,
das die kynne zü sammen bant,
vnd diese hant gurtt iren lip.
auch so was das rein süsze wip
vber haubt ein teil geneigt,
vnd wart nidden erzeigt
an sinen lip ein druck von ir;
vnd ir hende von süszer gir
sinen lip vmbfingen;
vnd vngescheiden hingen
sie vnder yme vnd er enbor;
vnd wiche sie yme ein lùtzel vor,
das er ir múste volgen nach
vberhaubt vnd liesz ir niht zugach
sin, das sie es niht züfurt;
vnd eins das ander spurt
glich mit den augen,
gar offen vnd niht taugen
jn einander gehafft.
da múste das kùszen haben krafft.
was da ein wandelung by -
wie niht da enzwischent si
wann dise zwen mùnde -,
sie müstent haben kunde
eins zugs, ader es was krang,
der sie vf einander zwang.
des müst die zunge warbel sin.
geschah das, so wart da schein,
das sich die hertzen entsluszen
vnd die libe vnderguszen
mit fùchter hitze süsze,
die den lip von dem füsze
vf vil gar entzund.
dis ist von mynnen gund,
das man frauwen also pflege.
er vert vast von dem wege,
der kùssens reht anders git,
die banchenij gar vor dem strijt,
da man von mynnen dot lijt.
wa han ich hin gegriffen?
jch wene, mir was entsliffen -
jch enweisz wanne - der sinn,
das ich also frabel bin,
das ich des getare gedencken.
wie mynne heiszet schencken
dem, der ir gewalt bestat,
vnd den sie geladen hat
zü freudenricher wirtschafft,
es hette anders kein krafft,
wùrd ir vor geschencket niht.
alle riht sint enwiht,
die man so gahes iszet,
vnd da man an vergiszet,
das sie süsz solte machen.
es wùrt von disen sachen
manig gast verseret,
den man wenet haben geeret.
hie wùrt nit me geleret.
dirre barchen ein swan pflag,
dem von rotem golde lag
an dem halse ein starcke kett.
da mit er von stett zü stett
den ritter vnd die frauwen zoh.
er was auch grosz vnd hoh,
wol als ein strausz vnd me.
dirre dienst ted yme niht we:
er hatt michel freud dar zuo.
das schein wol an yme nü,
wann er sich in die stùre vor
hatt gestellt hoh enbor
vnd streich sin gefidder.
nu gawein hin nidder
also heimlichen sah,
der ritter zü der frauwen sprah:
< süsze amy, kùsze mich,
vnd lasz das erbarmen dich,
das ich dir wil sagen!
morn werden hie vier erslagen,
vier ritter, die man wol músz clagen.>
< herre, süszer lip, amijsz>,
sprach sie da,< jnn welhe wijse
sal das geschehen? sage es mir!>
< süsze amy, das sage ich dir:
dis bergs hat gewalt
bayngranz von aynsgalt,
dem gawein sinen brúder erslúg.
der die berge vber ein ander trug,
das was der starck valant,
der so betwang alle lant,
das sie yme zinsz músten geben.
nieman liesz er anders leben,
der yme so geseszen was,
das er ader galaas
jne mohte herreichen mit her.
da er floysen in dem mere
dorch den selben zinsz besasz
vnd gawein vernam das,
da nerte er vor yme disen
vnd erslúg den riesen.
nü ist er her jn komen.
das hat bayngransz vernomen,
des ist er von hertzen fro.
were das nit, so steet es so
doch: wer her jn komet,
das den kein krafft frommet,
er müsz bliben hie jnne,
wann jne mit vnmynne
er ader ein ritter bestat.
der rede mag nit wesen rat.
man sleht jne aber zü tode niht,
fùr das er sicherung giht.
er músz aber gefangen wesen.
dise mögen aber niht genesen.
das komt nu von gawein.
man bestat sie morgens gemein
mit sunderlichem vechten:
mit dryen guten knehten
müszen vechten dise drij.
vnd wùrden sie alle frij
vnd auch mit al sighafft,
geswichet ir eyme sin krafft,
so sint sie alle siglosz.
der hie jnne keiner nye verlosz
sinen prijsz nach von ritter kunst.
so hat krafft vnd gunst
an sie gehordet das heil.
so músz gawein zú teil
da werden bayngransz.
das wirt yme gar vngantz,
wann siner zwolff slúge er wol,
das ich ymmer clagen sal.
es ist ein ritter tugent vol.
vnd nam er doch sinen eyt,
darzú gantze sicherheit,
das er jne genesen liesz
vnd jne wesen hiesz
gefangen als die andern da,
das tut er gaweinen nit: er sleht yme sa
das haubt ab vnd tüt alsam
den dryen ist er gram
nùwan vf gaweins hasz.
süsze amye, clage das,
das er hie sal ligen dot,
wann er dir sinen dienst enbot
an dinem bruoder, den er nert
vnd jne von dem zauber wert,
da von er rijtende bran;
das dorch mynne hett getan
die wilde lanfye.
liebe, süsze amye,
das ist der, der das tet,
vnd der auch manigs kumbers gewet
jst gewesen dorch wijbes grúsz.
daz der hie sterben müsz,
des wùrt mir selten klage büsz.>
hje mit der ritter gar gesweig.
die jumpfrauw nydder seig
mit mynne süszer gelust
vnd truckte jne an ir brust
vnd kùste jne vil süsze
mit alsolcher müsze,
das es múste freuden bern.
das empfing er vil hart gern
von ir vnd galt es wol.
sie sprach:< súszer, ob ich sol
dich, herre, fragen vnd getar,
so wolt ich dirre red gar
komen gern an ein end.
möhte dirre ellend
mit icht werden ernert,
den also hat behert
vnd auch sin geselleschafft
also kumberlicher hafft?
ob dir darvmb icht sij kunt?>
er kùszte sie an iren süszen munt
vnd druckte sie an sinen lip.
er sprach:< liebs, seligs wijb,
warvmb hastu das gefragt?
wes vnglúck lagt,
dem músz vngeholffen sin,
als an yme wurt schin,
hertz vnd sele min.
vnuerendet ist der hasz.
doch wil ich dir sagen das:
weste gawein einen list,
der in dem berg ist,
vnd solt er ymmer genesen,
das müste da von wesen.
das hùlff jne doch cleine,
wann gesigt er alleine:
da mit mohte er niht wesen frij,
es were denn, daz ir drij
gesigten so wol als er.
des were ich vngern gewer,
das es geschehen möhte.
siehe, was denn töhte,
ob ich dir fùrbasz seite?
darzü ist ir arbeit
hút gewesen der vierd tag,
daz ir keiner nye gepflag
wedder zü trincken nach zü eszen.
das ted sie vergeszen
der slaff, als sie ligent noch.
dise rede sage ich dir doch,
als du mich gefraget hast,
sitt du mich des nit erlast:
ein slùszel lijt in dem hol,
damit man den berg wol
entslieszen mag, wer jne hat.
ein bronne vor dem berge stat,
des ein wilder trach pfligt,
der vnslaffend ligt
vnd hutet sin al wege
mit so gewisser pflege:
wer den berg entslüsze
vnd des bronnen genüsze,
dem möhte zauber niht geschaden,
da mit sie müszen vberladen
sin, die nú strijten müszen
zú rosze ader zü fuoszen.
min sage ist gar on not:
es legent wol hundert ritter dot,
e denn verderbet wùrd der track,
wann sin wijter kynnback
verslùnd wol zwölff man,
keme er sie miteinander an.
vil gar ich dir es gesagt han.>
< nü sage mir me, herre min,
vnd mins hertzen freudenschin:
wa lijt der slùszel, von dem du seist,
vnd, als du es recht weist,
an welchem end stat die tür?
vnd sage mir, ob sie hin fùr
kemen usz disem hol,
mohten sie den sweren zol
mit icht vmbrijden,
das sie niht müsten strijden?>
< niht frauwe>, sprach er,
< sie varen hin ader her,
es wùrt in keynerhand wijse vermitten,
es wùrt mit jne allen gestritten,
sitt sie her komen sint.
alle hùlff ist ein wint.
sie sint vngenesen gar.
das weisz ich endlich fùr war.
auch wùrt hie jnne mit jn
niht gestritten, des ich sicher bin:
sie múszen hinusz an das lant.
ob jne in der steinwant
dirre selb slúszel lijt,
so stet die tùre dissijte
reht da engegen.
got müsze jne ir selen pflegen!
jr libe han ich mich herwegen.>
als nü der ritter dise rede liesz,
den swan er fùr varen hiesz.
der liesz sich in das waszer sa.
niht lenger waren sie da.
jch enweisz, wa sie kerten hin.
dis marckte gaweins synn
vnd gie zu der steinen want,
da er disen slùszel vant,
vnd lie dise slaffen.
er began sin rosz waffen,
das sin da nyeman wart gewar.
er kerte gein der türe dar.
die hatt er gar gering fonden
vnd in vil kurtzen stunden
gar heimlich vff gesloszen.
vil gar vnuerdroszen
er vf sin eigen rosz sprang.
ein wol ritterlicher gedang
was usz dem hol sin geleit.
niht lenger er da beit:
gein dem bronnen er da kert.
sin reise er vast mert,
als jne sin hertz lert.
nieman er sah ader hort
anders dann den volant dort,
den tracken by dem bronnen.
der hatt sich gein der sonnen
vmb den bronnen so gestreckt
vnd hatt jne gantz bedeckt
mit dem zagel al ein,
das sin vmb niht schein,
als er jne vmb vnd vmb beslosz.
auch was er selbs wol so grosz
als ein groszer stalbaum.
dar wand er rosz vnd zaum
vil gar one twale
vnd ramte sin mit dem stale
an des speres ort vorn.
auch wart das rosz mit den sporn
vil hart daran gemant.
mit zorn er vf den trachen rant
vnd nam jne zü der brùst in:
das sper bisz an die hant hin
gawein dorch sin hertz stach.
der trach das gar gering rach
vnd slúg da mit dem zagel
als ein fùwrwilder hagel
gaweinen sin rosz nydder,
das es nymmer mer widder
kam, wann es dot gelag;
vnd slüg aber einen slag
nach gaweinen vnd wolt jne han
erslagen, wann daz er entran
des slages als ein geringer man.
das sper liesz er stecken.
der drack disen recken
vil sere begunde mùwen:
er liesz jne wenig ruowen,
wa er es mohte zü bringen.
nü müste yme vorspringen
gawein mit listen,
da mit er sich gefristen
muoste da vnd sin pflegen
vnd varen, wie er an gelegen
einen slag dar vnder mohte,
der yme zü helffe töhte,
ob es yme mohte werden stat.
vil dick er yme nahe trat
vnd doch sinen slag verlosz.
gawein yme dar vnder kosz
by dem bronnen einen graben,
da sich der trach hin erhaben
hatt vnd wolte dar ùber sin.
da hatt her gawein des schin,
das zagheit yne nie betzwang.
zú tale er in den graben sprang
vnd wehrte yme die vberfart.
da mit yme ein stich wart
von gawein dorch die droszen,
das er kom geschoszen
jn den graben hin zú tal,
das yme der stich vnd der val
den lip endlich benam.
also starb der worm freisam.
das gawein zü hùlff kam.
wann solt gawein icht lenger wijle
mit al solcher yle
von dem trachen sin vmb gedrieben,
so mùste er sin da blieben,
wann jne die müde vnd der gestanck
also kùmberlichen zwang,
das er nit trùwete genesen;
er müste dot gewesen
sin. an das waszer
er múder vnd laszer
gie an füszen vnd an henden,
so er es yme enblanden
da mochte aller bast.
er enwas nit so vest
des libs vnd der krefft
von dirre ritterschefft,
das er moht gegeen:
er enmohte nit vff gesteen.
des múste er tún, als yme was:
zú dem bronnen er hin kras
vnd schöpffte sin hant vol.
da mit wuosch er sich wol
vnd tranck des bronnen yme gnúg.
vil kreffticlichen jne das vbertrùg
an diser starcken vnkrafft,
wann yme entweich der swere hafft,
das er ringen begunde
vnd an der selben stunde
mohte gesteen vnd gegeen kunde.
als sich nü gawein der rede versan,
das er so vil kreffte gewan,
sinen helm er ab bant
vnd fullte jne da so zu hant
mit bronnen vnd trúg jn
zü sinen gesellen in das hol hin,
die dannoch alle slieffen da.
vil hartt die wackte er da.
nü waren sie so beklieben,
dorch das sie waren blieben
vier tage vnd vier naht
vngeszen, das ir aller maht
so gar was verswonden,
das sie sich kunden
vil kume vff gemachen.
als sie begunden wachen
vnd wurden versonnen,
zü trincken des bronnen
gab er jne usz dem staelhút
vnd sprach:< wol uff, es ist güt!
jr hant zú lang gesloffen.
lant vwere rosz waffen
vnd ùch selbs, wann es tüt not.
hie wijget die mere widder lot
vnd widder leben gewisser dot.>
darnach er jne vil lang seit
alle sin arbeit,
die er des tags hatt erlitten,
vnd wie er hett gestritten,
vnd wann das were geschehen,
auch was er hett gehört vnd gesehen
von einem recken,
vnd das er sie nit wecken
wolt, bisz er gar befant
die warheit vnd bekant.
der rede sie sere verdrosz,
wann ir clage, die was grosz,
da gawein so geschah.
niht vol er sin red gesprah,
vnd sie zú den roszen kamen,
das sie da vor vernamen
grosz geköse vnd schal
beyde vf dem berge vnd jm tal,
ob jne vnd vor dem hol,
vnd was in der aht wol,
als ob es ein lantvolk were,
vnd doch in der gebere,
als ob es freude wolt beginnen.
man mohte von vnmynnen
one jne sich nit versynnen.
fùr das hol das volk zohe:
manigerhand carme, hubsch vnd hoh,
sie vor dem hole sungen.
mit freuden sie sich drungen
vor dem hole jn manige wijse
vnd gaben gaweinen hohen prijsz
an dem strijd mit lob.
vf dem berge darob
begunden vast croyriren
vier garzunen den vieren,
die gawein vnd die sinen
mit ritterlichem schijne
da besteen solten,
sitt sie es also wolten
vnd sin niht rat was.
ob dise vnd kay genasz,
des müst heil hart pflegen!
das volk hatt das hol verlegen.
sie lobten gawein, den tegen.
war vmb sie dis túnt,
vnd wie es vmb das volk stunt,
des wil ich nit vergeszen.
das volk was geseszen
mit gedringe in dem land.
vor disem voland
getorst es nyrgent usz komen,
wann er sine tage hett genomen
jn dem land sin weyde.
walt vnd heyde
hatt er alles behert.
nihts was vor yme ernert,
was er moht erstrijchen.
des múst yme entwijchen
dis volk vber den flume
jn einen starcken wusten rume,
da sie vor yme genaren
vnd gar sicher waren.
vnd was das doch so nahe,
das sie das wol sahen,
das jne gawein hett erslagen.
da von gelag ir leides clagen,
vnd begunden yme gnade sagen.
die rede was yme helfesam,
wann jne das volk an sich nam
zú einem endlichen trost,
wann er sie da hatt erlost.
des geschah yme gewaltes niht,
also doch dick geschicht,
dem man also fijnt ist.
gawein hatt kein frist
gelebt nach sine gesellen,
hett er mit ritters ellen
disen prijsz niht erworben.
nú waren hart verdorben
die rosz vnd dise vier.
je doch also schier
man ir zú der ritterschafft begert.
sie lieszen niht vngewert
die ritter, die ir biten.
sie kamen fùr das hol geritten
vf dise auentùre
vnd wolten tiostùre
geben vnd nemen,
vnd wes jhene wold gezemen,
die vor dem hole hielten
vnd sich in die schuld vielten
vnd michels gewaltes wielten.
gawein ein pfert reit,
wann yme die vorder arbeit
sin rosz hatt benomen.
nuo was bayngransz komen
gein gawein vnd vordert jne.
gawein sprach:< sit ich bin
vch gefallen, ritter gút,
jch wil, daz ir ein ding tút,
das ùch ritterlichen zymmt
vnd alle schand benymmt,
deswar, an diser ritterschafft.
jr sint wol so mannhafft,
mit wem ir ùch verwerret,
das ir wol getùrret
mit gar glichem gezùge
vf ritters vrlùge
besteen. das ist auch reht.
jch wene, ir selber wol seht,
das ich min rosz han verlorn.
so ist min pfert gar versporn,
zü dirre ritterschafft zù lasz.
jr mögent getún nymmer basz,
wöllent ir mir ein rosz geben,
so wúrd beyder strijt eben.
das nym ich, mag es sin.
jch enlasze dise gesellen min
niht doch, wie es komt.>
< da mit hett ich ùch gefromt>,
antwort bayngransz,< ob ich das ted.
das werent toren rete,
ob ich den solte volgen.
jch bin ùch erbolgen
vnd wolt ùch nü han erslagen.
solt ich ùch danne vbertragen
vnd mich selbs vberladen,
sitt ir mir so groszen schaden
nü zü zwein malen habent getan?
mins brüders bin ich one,
her ritter, den erslügent ir.
darzü hant ir hùtt mir
erslagen minen serpant,
davon ich lùte vnd lant
mit alle verlùse.
an úch, ritter, ich kiese,
das ir gar verzagt sint.
hergebent ùch vnd lant den strijt,
wann der dot vf ùch lijt!>
gawein sprach zü bayngransz da:
< deswar, ich mag von dirre dra
vmb die rede ersterben niht.
vil manigem recken geschiht,
der manig freyse muosz sehen,
als mir nú ist geschehen,
der vmb das wol geniset,
ob er schon niht verzagt ist.
deswar, ich bin noch vnuerzagt.
was darvmb, ob ir versagt
mir habt ein rosz, des ich wol
bedarff? sit des niht ensal
wesen, das lasz ich sin.
so sint die gesellen min
vnbezwongen: die wehrent sich.
jch músz mit mynem pferd mich
behelffen, so ich nú best mag.
vch wùrt, ritter, stich nach slag
von mir nymmer verseit.
auch so sint die andern bereit:
die enwerden auch niht verzigen.
wir müszen siglosz ligen,
ader ir von vnsern handen.>
hie mit sie sich wanten,
als ob sie zü sammen ranten.
vnder ire arme sluogen sie die sper,
wann jne was zú sammen ger.
da wart erhaben ein strijt,
des weder vor nach sijt
nie kein herter wart.
vnder jne wart wenig gespart
der lip vnd auch der mút,
als man vf solchem nijd tüt.
jn zorn ir aller hertz wiel.
je einer dem andern gefiel.
des was es vnder jne glich,
wann so uil, daz ir iglich
der geste was hart krang
vnd ire rosz, wann sie zwang,
das sie vngetruncken vnd vngasz
vier tage der zadel besasz.
tede sie das krang, wer schùlte das?
jglicher den sinen nam,
als es vil wol rittern zam.
da müstent rosz springen,
des sie die sporn zwingen
wol kunden zù den sijten,
vnd auch die ringe wijten,
darvmb daz dar jnne
vf dirre vnmynne
mit kunst vnd mit vare
die stiche fùr ware
wol wurdent an gewert.
nieman das sin hertz wehrt,
er engedoht im des selben da.
die rosz uf einander sa
dise echte da truogen.
mit stichen vngefugen
sie einander suchten,
die sie also berüchten,
das sie glich wagen,
wann sie alle gelagen
hinder den roszen vf der erden;
vsz genomen kay mit ritters werde
vnder jne allen eyne gesasz.
jch engunde es zware nyeman basz,
darvmb daz vf ritters getat
jne maniger gescholten hat,
der sin wol hett gehabt rat.
vil gering sie vf sprungen.
vfeinander sie da drungen
vil gahes mit den swertten,
da mit sie sich wehrten
hertter slege zü male vil.
disem strijte múste ein zil
der dot ader sicherung geben.
da wag leben widder leben
vnd dot widder dot.
dise hart werende not
werte zú male lang vnder jne.
dise triebent her, jhene hin;
dirre stach, jener slúg;
der mit dem schilt vbertruog
beyde slag vnd stich.
jn dirre wijse noten sich
dise vnder einem múte.
wer sich da mit hüte
jn disem ernste niht bewarte,
des hette vnselde da gevarte,
der múst dot bliben,
sitt sie es also driben
wolten vnuerlaszen
vnd nit daran maszen,
wann gar gewin ader verlust
mit gantzer akust
hatt beseszen ir aller brust.
bayngransz gaweinen tet
einen slag vber des schiltes brett,
da von er kam vf die knye
vnd groszen kumber gefie.
wa bayngransz hett gewölt vf jne
gefallen sin, vf den sin,
er hette jne erdrùcket.
sust gawein vil gering hinder sich rùckte
von der stat von dan hin,
wann sin krafft was so clein -
so hatt er sich vbernomen -,
das er nit wol vf komen
also snelle kunde.
bayngransz an der stunde
hatt sich am lesten gelaszen nydder.
des mohte er nit gahes widder
komen, wann er swere was.
da von gawein genasz:
wie wol er was zü male krang,
von der erden er vf sprang,
e denn widder vf kam der riesz.
er mahte yme die rede gewisz.
er kerte hin, da er lag,
vnd slüg yme einen solchen slag,
der nahe zù dem tod wag.
da bote sicherung
mit henden vnd mit zung
gaweynen sa bayngransz.
dennoch was der sturm gantz
vnder sinen gesellen vnd disen.
also empfing er den riesen
vnd liesz jne genesen.
auch muost die rede dennoch wesen
vnder disen vnuerendet.
an gawein was gewendet
dennoch michel vnkrafft.
disen zwein an ir ritterschafft
gelang wol so zú hant,
lantzeleten vnd calocreant,
den wart sicherung gesworn.
vnder disen dryen uszerkorn
hatt nú kayn der beste.
des was dennoch veste
vnd vnuerendet ir strijt,
vnd gewann hartt vbel zijt
jr iglicher an dem vehten.
beyde wehen vnd slehten
manigen slag sie slugen.
gar wenig sie einander verdrúgen,
wa sie es mohten vergelten.
es wart da vil selten
jr keinem kein schlag verdragen.
doch hatt so gar vberslagen
her kay sinen kampffgenosz,
das sin arbeit was hart grosz,
vnd yme mit listen vor weich,
vnd sich her kay so vberstreich,
das jne ein müde gefie,
vnd disen vil gar verlie
die müde, die er e trüg,
wann er listiclichen gnúg
yme dar an hatt geborget.
gawein dar vmb sorget
vnd vorchte vil sere,
das kay an der kere
müste werden sigelosz,
wann er harte verlosz
beyde krafft vnd maht,
dwijle jne die müde bedacht.
das kam von der groszen ger,
die hin zú yme hat er,
das er so was erwegen.
nü nötigte jne dirre tegen
vil hart, wann er was vnerlegen.
er gie doch mit schirme vor
disem, wann er trúg als enbor
den schilt dorch schirmes not;
den er yme alwegen bot
vnd liesz hern kay slahen dar.
auch nam kay dar vnder war,
ob es ymme also töhte,
daz er mit icht möchte
bestaten einen varslag,
davon sin lester tag
zü hant da mohte wesen,
vnd sin niht möhte genesen.
als er gedoht, das geschah:
her kay yme einen stich stah
gein dem gùrttel zú dem slitz hin jn,
das er da von dot hin
viel in dem ringe
one alles gedinge.
das trúg er vil geringe!
auch brach an der stund
kay sin alte wund
von dirre arbeit vff,
die sere hart flosz vnd truff,
die er da bi der clusen erwarp,
da von sin krafft gar verdarp,
wann er wart blode vnd krang.
gein yme dis volk trang
mit michelem gedrang.
sie namen jne mit gesang
vnd fuorten jne zü gawein.
freude grosz wart gemein
von disen lantlùten,
die sich des gesigs freuwten.
da widder freude benam
bayngransz, daz er gram
was dorch des ritters dot.
darvmb er doch nit mynner bot
hern gaweinen der eren:
er hiesz darnoch keren,
das yme ere solte meren.
vil rijliche handelung
alt vnd jung
an gawein sie kerten.
vil gröszlichen sie jne erten
mit allerhande sachen.
man began jme usz machen
sinen gezùg gar nùwe.
gar gantze trùwe
erbutten sie yme alle.
one vntrùwen galle
auch wart da besüchet,
da mit wol berüchet
hern kay wart sin wonde,
so man von warem gonde
ymer beste kunde.
gawein von dannan schied.
bayngransz dise diet
müste ymmer laszen frij.
mit dienste waren sie yme by,
bisz er kam von dem land.
vf sin strasze er sich wand
vil slehts gein micholde,
da er hin solde.
dem land was er nahen.
einen weg er gefahen
da began zü der winstern hant,
der jne braht in das lant.
dar jnne er einen monad reit
vnd leit vil groszer arbeit,
wann das lant was wild.
walt vnd gefild
was vbel vnd hert,
vnd vil grosz vngefert
müsten sie erstrijchen,
dem sie niht entwichen
mit keiner hande dingen kunden.
sie sücheten, das sie zulest funden
madarp, das castell.
wol gefùrdert vnd snell
wart darvf ir reyse.
sie entwalt dhein freise,
auch keinen kumber wedder grosz noch clein.
sust streich hin her gawein
vnd sine gesellen gemein.
sin arbeit yme niht verdarp:
schier kam er gein madarp,
das er das castell an sah,
da von yme lieb geschah,
wann er sin mit willen begert.
auch wart er da gewert
mit einem antfang,
da von ich vil lang,
deswar, hett zü sagen.
des mag die fabel niht verdragen,
wann es zü lang were.
als ein ritter erbere,
edel vnd gewiszen,
vnd der sich gefliszen
hatt an allen tùgend
bisz in das alter von der jugend,
vnd der sin hatt gút stat,
von dem castel ein eben pfat
gansguter mit gesellen gie.
gaweynen er gar mynneclichen empfie,
den er an der brùcken vant,
vnd kuszte jne, als er jne bekant.
vff stund karte sich gansgüter von yme hin
zü den andern drijn
vnd enpfing sie mit guot
auch in dem selben mút,
als er gaweinen hatt getan,
vnd hiesz sie fùr sich gan
zü dem castel zür brùcke,
vnd gingen so berúck
jne nach gawein vnd gansguter.
groszer freuden gewer
was in dirre süsze wirt.
freuden kunst freude birt,
wann sie es kan gemachen.
da widder müsz swachen
vnwiszenheit vnd vnkunst
gar aller freuden gunst,
als es dick geschiht.
des geschah aber hie niht:
jne wart gedienet hart wol
vnd wirdiclichen, als man sal,
an allen dingen,
als er es wol bringen
mohte vnd es auch gern tet.
sin gewerb mit frùndes bet
seyte er yme des nahtes gar,
vnd das jne artus dar
gesant hette fùr war.
darnach gawein auch endlichen seit
alle sine arbeit
vnd die grosze auentùre,
vnd batt jne rates stùre,
auch helffe nach frùndes sitt.
die freude hie wonete mit
von artusen vnd ygern.
gansgüter tet vil gern,
was jne gawein an der rede batt,
so yme sin aller beste stat
ymmer werden kund.
nu gawein in dem gund
vnd willen gansgutern vant,
sin kumber endlich verswant,
vnd wart hertzeclichen fro.
hie mit gingen sie slaffen da.
gawein tet die red kunt
sinen gesellen an der stunt
vnd seyte jne sin antwort,
das er jne jren kumber gar zerfúrt
vnd freuden liebe an jne rúrt.
an dem andern morgen
gawein gar vnuerborgen
die rede offenberlichen sagt.
darzü er die vntruwe clagt,
die da begangen hett gyramphiel.
die rede jne allen miszfiel,
vnd begunden alle sprechen,
das sie ir hertze rechen
solten. das were michel recht.
vnd jah da manig gut kneht,
das er dar vmb wolt
gern wogen, ob er solt,
den lip darvmb da mit jne.
vil hart groszen vngewyn
vnd freise sie da seyten
von den groszen arbeiten,
die man da müst vinden,
da von man sich entbinden
nit enmöhte nach entrijden.
das müste alles liden,
der es da wil versuchen.
so müste jne heil berüchen,
solte er ymmer von dannan komen,
das yme da nit wúrd genomen
von solcher freise sin leben.
die rede taden sie vergeben:
jnen enmoht nyeman vntrost gegeben.
jr gewerb wart volendet,
vnd wart dar nach gewendet,
das gansguter wart bereit,
wann er mit jne die arbeit
muoste liden vnd tragen.
warvmb das was, wil ich sagen:
er hatt an sin selbs lant
so groszen zauber gewant
mit alsolchen listen,
da vor sich gefristen
nymmer mohte dhein man,
ob er des hette wan,
das er dar dorch wölte varn.
das er dorch des tùfels barn
tún, die yme warn
gesessen vnd wolten varn
sin zu allen zijten.
den enmohte er niht gestrijten,
wann sie hatten mit ir krafft
gar bezwongen die lantschafft
von zehen kùnigen richen
also garlichen,
das jnen da nihts gebrasst.
disen vnuerwendelichen last
hatt zerstöret sin grosze kunst,
das yme der riesen vrbunst
niht geschaden kunde
bisz an die stunde,
das sie gawein erslug,
das er mit groszen freuden trüg.
hie mit sij der rede gnüg.
gansguter gab jne allen zü hant
geruogete rosz vnd ysin gewant
vnd darzú vil veste swert.
auch wart gawein gewert
einer solcher sarwat,
daran groszer tùgende rat
mit groszen listen wart gestalt:
die sarwat hatt den gewalt,
wer sie trúg, das er nit was
vberwonden vnd genasz
vor allem zauber. vnd ob er
yeman bestùnd, des gewer
er müste sin an ritterschafft.
ob er von dheines zaubers krafft
sighafft müste wesen,
der möhte da von niht genesen,
es enwere an siner manheit.
wann dise krafft vbersneit
jhene krafft also gar,
das ietwedere bleib bar
der krafft, die der zauber braht,
vnd musten beide bedaht
sin an ir selbs müt.
beyder krafft was jne niht güt,
wann als es muosz sten an jn.
beyde verlust vnd gewyn
müsze an ir mannheit ligen.
welcher vnder jn solt gesigen,
dem wart zaubers helff verzigen.
ein swert gab er yme dar zuo.
da mit dise rede nuo
zü madarp verendet wart.
gansguter es nit lenger spart:
siner gesellen nam er dry
vnd gezùg, der da by
solte sin, vnd reit von dan
von der bùrg dorch einen tan
mit disen vf dise strasze.
von diser bùrge ich lasze,
wie die erbuwen were,
wann es ein lange mere
wùrde sin, solt ich es sagen.
dirre weg hatt sie getragen
schier hin dorch den walt.
ein gebirge was dar fùr gestalt,
das hoch was vnd gros.
ein rùtsche vber den weg schosz,
die jne mit al beslosz.
gawein, der tùre tegen,
kerte vaste dar gegen,
da er die port offen vant,
vnd wante da dorch so zü hant
mit gantzem frieden rijten.
als er vf von der lijten
den berg wolte stijgen,
von ietwederm sigen
vnd oben von dem huse
zü tale gegen der clusen
vernam er vil michelen schal,
als da ritter sich zü wal
vf wolten machen.
brasteln vnd krachen
horte er vil vor yme da.
darvnder entzundte sich da
ein zü male groszes fùwre.
das bran so vngehùwre,
das es mit al vmb vie
die cluse vnd die burg hie
vnd bran in einem lauge.
hern gaweins auge
ted dirre rede war,
vnd kerte doch den weg dar,
das er sin basz neme war.
als er sich nuo gein der clusen kerte,
das fùwre vnd der schall sich gar sere merte
vnd wart zü male vest.
< woluf, hie sint gest!>,
rief eins darvnder.
nach disem groszen wunder
ein horn hart lute clang.
darnoch usz dem fùwre drang
von rittern ein presze -
die bronnen als ein esze,
die ein schmidt erblosen hat -
gar nach ritterlicher dat,
alle mit geneigtem sper,
als ob sie tiost wolten begern,
mit zornigen gebaren.
von disen starcken meren
dise geste da erquamen:
wie wol sie usz namen,
das sie so sere brunnen,
vnd doch erbunnen
sich nye an dem mút,
der nach strijd wút
so gar mit vngút.
auch namen sie vil wol war:
so sich gawein gein jne kerte dar,
so kerten sie yme engegen.
susz waren sie vnerwegen,
dwijle er so geyn jne hielte.
welcher tùcke er da wielte,
der waren sie auch bereit.
gawein von siner manheit
sin spere zü hant neigte
vnd hatt geyn jne geseigt,
als ob er sie eins tiosts wolt gewern.
gansgúter hiesz jne das enbern
vnd seit im, er were dot.
sit es yme gansguter verbot,
so múst er es laszen.
vil hart widder saszen
sine gesellen dise geschiht.
gansguter mer entwalt niht:
er kerte den berg vf gein jne.
vor yme wichent sie alle hin
gemeinclich hinder sich
jn das husz den rehten strich
vnd enbutten yme wedder slag noch stich.
also wichen sie yme alles vor,
bisz er mit jne in das tor
kam vnd sie widder treip.
jr keiner me da bleip.
war sie kamen, das ist mir vnbekant.
auch verlasch das fùwre zü hant,
vnd wart stille alsam e,
daz sie niht da sahent me,
danne sie da vor hatten getan,
e dis wonder wer ergan.
also bald sich das wonder geliesz,
nach yme er sie rijten hiesz
one alle angst dorch die cluse
gein einem schönen huse,
da sie des nahtes blieben.
dar jne wart die zijt verdrieben
mit handelung vil gúter,
als jne das gansguter
schuoff mit groszem flijsz.
des morgens nach jmbisz
vf ire strasze sie widder ritten,
das sie da niht lenger bitten,
wie sere er sie es begund bitten.
gansguter von dannan mit jne reit.
von disem land er jne seit,
das es sin eigen were,
vnd hette es so gewere
vnd sicher gemaht,
das er vngeswacht
were vor aller welt dar an.
hie mit ritten sie von dan
ein gevild, das was lang.
daran ein gebirge drang,
zü male hoh vnd grosz,
das ein walt vmb slosz,
dick vnd vinster.
vf gein der winster
dis gebirges rùcke
gein einer hohen brùcke
müsten sie keren den weg
zü einem gar smalen stege,
daruf ein rosz kaum geging,
der bisz an die brùcke ving
vnd mit groszer freise hing.
der steg sie an die brùcke trüg,
da sie wonders gnúg
funden vnd ersahen.
schier kamen sie ir nahen.
nú reit gawein aber vor
vnd die andern nah yme vf ein spor
vf disem stege gemein.
da nuo an die brùck gawein
vor den andern gereit,
yme wart mit ernst verseit
an der brùcken die vberfart,
wann sich die port verspart
mit einem vesten schosztor.
auch mahte sich vber die brücke vor
ein more zwölf elen lang,
der vber sinen rùck swang
einen sweren slegel von ysin.
den began er also wijsen,
daz er jne zü beyden handen fie
vnd sich da mit nidder lie
jn das waszer zu tale.
zú hant sich das waszer wale
vf gein der brùcken vber al.
die brùcke es gar vbergie
von grund uff vnd befie
darzü bisz an gawein hin.
da was nyeman vnder jn,
er wande da wesen dot.
vnd das tet jne nit vnnot,
wann sie wüchs das waszer an
so sere, daz es jne an gewan
die brùck vnd den steg.
sie mohten auch nit den weg
widder vmb keren hinder sich.
auch was es ir rehter strich
gein sardin in das lant,
da hin ir reyse was gewant,
die gar vnwendig müst sin.
gawein ted des nirgent schin,
als ob er verzagt were
jn diser groszen swere,
als mir verjah die mere.
als nü die brùck was besloszen
vnd so gar vbergoszen
von disem groszen flúme,
das man da vil kume
mohte gekiesen das thor,
da sie nach hielten vor,
vnd yme das niht entohte,
das er dar dorch mohte,
wann es von zwein sachen wart
jne mit al verspart,
von dem waszer vnd von dem schosztor;
er wolt einhalp vor
vber das waszer hin keren
vnd wolt da mit eren
e dot verliben,
e jne widder triben
ymmer keinerhand not solde.
als er ytzo wolde
da vor jne allen
an das waszer sin gefallen,
gansgüter rieff jne vast an
vnd batt jne die rede lan:
es müste anders sin ergan.
damit gawein die rede liesz,
als jne gansgüter hiesz,
vnd gehabt als vor da.
gansgüter kerte fùr jne sa
gein der brùcken dorch den wag.
das schusztor er vf wag -
das hatt er gering getan -
vnd hiesz sie nah yme dar jn
one alle vorcht rijten.
gar one widderstrijten
sie jne der rede gewerten,
wann sie des selben gerten.
als sie nü kamen dorch das tor,
da jne gansgùter vor
die brùck in dem wasser swam,
dise freise ein end nam
vnd liesz sich das waszer zú tal.
darnach kam ein groszer schal,
der hal als ein tonreslag,
da von die brùck belag
gantz vnd gar nydder geslagen,
vnd wurden dise getragen
mit der brùcken an den grunt
vnd blieben doch alle gesunt,
so das jne niht gewar
an allen enden vmb ein har,
wedder an roszen noch an jne.
dirre salden gewynn
brahte sie von gansgütern hin.
dis tett alles der mor,
der von der brùcken vor
jn das wasser gefallen was.
das dis gesind da genasz,
von gansgütern das kam,
der sie von dem kumber nam
mit siner wol groszen kúnst.
doch músten sie des waszers runst
swemmen usz dem grunde.
vil wol er sie kunde,
deswar, daran bewarn.
schier si usz kummen warn
mit gewarsamkeit an den stat.
gawein gansgutern bat,
das er yme seyte die mere,
was die auentùre were.
da sagd er yme, es were das lant,
das sardin were genant;
vnd dise auentùre
were so vngehùwre,
das sie vor getorst e
nie kein man besteen me.
auch sagd er yme die mere darzú,
das er sie hett versúchet nú;
hette er es dorch jne niht getan,
so lebte nyrgent kein man,
dorch den es were geschehen.
auch began er yme darzú verjehen,
daz die brùck vnd die flút
were des lands huot,
vnd das sie kein man nie
wedder gereit noch gegie.
so stunt es hervmb sie ie.
darzú er yme me seit,
wie gar grosz arbeit
an die brùck were gewant,
darvmb das sie das lant
vor aller freise solde
behalten, ob es wolde
yeman an verren
vnd mit icht verwerren
dorch keinerhand gewalt ader von zorn.
das were aber nü gar verlorn,
sit das antwerck zerbrochen
were vnd belochen
jn dem waszer mit al,
als er an dem vall
selber hatt gesehen,
vnd yme nymmer moht geschehen
leyder, dann daran.
es enmöhte auch nyeman han getan,
wann der den list kund
vnd den synn darzü gund
auch sin manheit vnd sin krafft;
vnd jah, wie hart schadhafft
were dar an worden gyramphiel
vnd fimbeus, vnd was gefiel
jne da von groszen schaden,
da mit er nymmer mer geladen
müste mit groszer rùwe sin,
vnd ir beyder lant sardin
müsz dulden kumber vnd pijn.
auch sagd er, daz er were
aller siner swere
gerochen an jne beyden,
wann er sie geleiden
an keinen dingen kunde basz;
vnd beschied yme also das,
das ir landes veste
mit alle die best,
die es vor aller freise beslosz,
die were fùrbasz ymmer me blosz,
was von zauber gehort,
sit sie nü were zerstört,
vnd möhte nymmer kommen widder,
vnd mús iemer ligen nidder.
des müszen auch iemer mere
sie beyde vnd ir ere
valben vnd swachen
nùwan von disen sachen:
nieman mag sie widder gemachen.
als nü gawein dis alles vnderrichtet wart,
aber vf die alte vart
er vnd sine mittgesellen kerten.
jr reise sie merten,
wa sie iemer kunden.
jn vil kurtzen stunden
ein schöne burg sie sahen.
der waren sie vil nahen,
deswar, kummen schier.
gansguter vnd die vier
sich da schieden zü hant.
er tet yme aber vor gar bekant
gaweinen, wie er solte varn
vnd sich an allen sachen bewarn.
er gab yme ein cleynot.
dar zú er batt vnd gebot,
das er des hüte wol.
fruntlichen, als man sol,
sagt er yme, wie er da mit
tún solte nach dem sitt,
das es yme were helffesam.
gawein es vil gern nam,
wann es ymme zú staten kam.
als nú die rede geendet wart,
gawein kerte gein gahart,
gansguter gein micholde.
dar ietweder solde,
dar kerte er zü hant hin,
da die schiedung vnder jn
múste so gar vngewendt sin.
gansguter groszer truwen schin
gaweinen vnd sinen gesellen tet.
auch huote gebottes vnd bet
gawein mit gewisser pflege.
beydenthalben vf dem wege
sparten sie sich klein:
sie enstrichen niht sein.
vil sere sie gahten.
also sie nú der brùcken nahten,
sie funden an der brùcken stan
finbeusen vnd sine mann,
die zühant gein jne gingen,
deswar, vnd sie enpfingen
mit vil groszer hochfart.
da mit wart die port entspart
vnd geoffenet die jnfart.
sie erbeiszten zú der erden.
mit michelem werde
wurden die rosze gestalt.
das tet des wirttes gewalt.
auch wurden dise helde
zü gewiszer nahtselde,
deswar, wol mit eren braht,
das da niht wart vberdaht.
jnen was dannoch niht bekant,
warvmb dise in das lant
ader wa kommen weren,
ader wie disen meren
weren, wann sie niht
getruweten diser vngeschiht.
auch enwesten sie vmb ein har
niht, das gawein vnd sin schar
jnen dar weren zu schaden komen,
wie er dem wirt hette genomen
da vor den sighaften stein.
das er es were, gawein,
des enwesten sie nit vber al.
hochfart vnd freuden schal
prúfften sie den gesten,
jr schaden also vesten.
als es nuo gyramphieln wart geseit,
sie sante her ab die meit,
die sie da vor hatt gesant
geyn brytanien in das lant
mit dem hentschúh gein karidol -
als ir habent vernomen wol -,
das sie ir solte herfarn,
wer die geste wern.
die red auch also geschah.
das sie die jumpfrauw sah,
sie kante die vier ritter an der stund.
von den rittern sie begund
widder vmb zü ir frauwen ylen.
sie enwolte sich niht verwijlen,
deswar, vmb iht vnderwegen.
da sie kante die vier tegen,
sie sagde ir frauwen die mere,
wie es gawein were.
die mere was ir niht swere.
gyramphiel frauwete sich des vil sere.
gaweinen, dem wart michel ere
des nahtes da erzeigt.
die freude sich dar zü neigt,
das sie den sighafften stein
so hetten von gawein
widder gewonnen mit der valscheit,
vnd das sie alles leit
an yme wolt rechen
vnd ir truwe gar zerbrechen.
das solte nuo des morgens frùw wesen.
fimbeus gehoffte auch niht, daz er genesen
vor yme iemer kund,
die wijle er von salden gund
den stein widder gewonnen hett.
da was der krafft sin gewett
das vil rich kostlich ysin gewant,
dar an die krafft was gewant,
wer es zú eynichem strijd trúg,
das den bezwang noch enslug
kein zauber anders wann des mannes krafft.
anders was es vnsighafft.
des enwesten aber dise niht.
vil dick siner vngeschiht
frauwet sich vnwissend der man,
der dar an hat freuden wan.
also müst es fimbeusen ergan.
als sie nu des nahtes saszen
ob dem tisch vnd aszen,
gawein vil wol gedoht,
was jne dar hette braht,
vnd was yme gansguter hett geseit,
da er des abents von yme reit
vnd yme gab das cleynot.
was er yme darzü gebot,
das was yme niht vergeszen.
da sie nú alle waren geseszen
vnd wol halb hatten gasz,
gawein nam dis vasz
vnd ging fùr fimbeusen stan.
vil höuelichen er began
zü sagen sin rede vnd sprah,
das er dar an niht vbersah:
< ritter, ob ich sprechen sal,
das ir mir es gönnent wol
vnd ùch nit dùncket vnfug,
so han ich zü sagen gnug,
als es ùch zü dirre frist
bi mir her enbotten ist.
so ist es darvmb gewant.
darzú hat man ùch gesant
ein riches cleynot by mir.
edeler ritter, das sollent ir
enphahen mit werder gir.
das hat kùnig artus getan,
wann er es nyeman basz gan
dann ùch dorch die wirdikeit,
die yme von ùch ist geseit.
des haben ir genoszen.
auch sollent ir vnuerdroszen
hören beyde vnd sehen,
was da von mag geschehen.
wenne ir wöllent, das sal ich sagen,
vnd sal es darnach vmbtragen,
das ir die warheit seht.
wöllent ir mir geben botten reht,
so das ir mir niht versaget,
nach min bet ùch niht miszehaget,
die dar an müsz ligen,
so enwùrt sie ùch niht verswigen.
jch swijge aber, wùrt mir verzigen.>
fjmbeus gaweinen gewert
alles des, das er hatt begert.
loblich vnd ersam
gawein das cleynot nam
vnd zeugte es jne allen.
da müst es wol gefallen
allen den, die es sahen.
des sie yme gemeine jahen.
was das cleynat were?
e ich fúrbasz die mere
sage, das músz ich sagen,
wann solt ich uch das vertagen,
das wùrd der auentùre schade.
es was von gold ein clein lade,
dar jnne ein sollich bild lag,
das einer auentùre pflag:
wer es nuwan ansahe,
das dem zü slaffen not geschahe,
deswar, das must vnwendig sin,
als jne da múste werden schin.
das befand auch fimbeus von sardin.
als nú gawein gewert wart,
die rede er nit lenger spart.
er sprach:< sitt ich nú gewert bin,
so wil ich list vnd synn
vch sagen vnd zeugen,
vnd wil ùch dann fúr eigen
das cleynot laszen hie.
ritter, nú vernemment, wie
es vmb das cleinot stat;
des mag wesen kein rat:
wer es jnnen zü an sieht,
der mag des gewegen niht,
er müsz slaffen zü hant.
das sal ùch werden bekant,
ob ich die warheit sage,
so ich das cleynot vmb trage,
als ir mich hieszent vnd ich bat.
nü wil ich sin haben stat.
besendent uwer gesind,
das ich es alles vind
bi einander, wip vnd man!
so sehent ir, ob ich war han.>
sin bet was gar gering getan.
als nü das gesind vber al
nidder gesasz in dem sal
nach gaweins bet,
die lade nam er zü stet
vnd tet sie vf vil gar.
er trüg sie fùr die schar,
da sie alle saszen.
jr selbs sie vergaszen,
als sie das bilde ersahen.
zü der erden vil nahen
sie von slaffe alle sigen.
da mit liesz er die ligen
vnd tet den andern alsam.
nieman er da usz nam,
den er in dem sal vant,
nùwan das jne an want
vnd den wirt vnd ander drij,
die ime der tauel saszent by,
vnd sin amye gyramphiel.
dem wirtt die red wol gefiel,
vnd hatt es fùr einen spott.
< ymmer müsze yme lonen got>,
sprach er,< der es sante her!
auch müsze mit selden leben er,
der sie her bracht hab!
deswar, es ist ein riche hab,
da man nymmt das wonder ab.>
hie mit sperrete er die lad zü
vnd sprach:< ritter, sehent ir nú,
das ich war han geseit?
sitt ùch das cleinot beheit,
so müsz ich ùch sagen me,
wie es vmb das cleinot ste,
wann ich min sage daran
niht gar volendet han.
jr wiszent wol, wie es geschah,
das sin trùwe gar zerbrah
an minem herren, kùnig artus,
dirre herre, der in sin husz
kam vnd einer bet batt,
der yme min herre güt stat
tett vnd das gesind.
da lonete er vns vil geswinde,
als die argen alzijt taten.
wer yme sollichs hette geraten,
deswar, das ist yme vnkunt,
wann so vil, das nü zü stunt
jch mir da von gedencke,
das ùch daran krencke,
das ich jne bi ùch sieh.
ob ichs ùch des rates gieh,
dar an so miszfare ich niht.
wann was man an sieht,
das lùget niht, ob er es gieht.
was aber nü sij dar an:
er fùrt minem herren von dan
sin cleynot mit vntrùwen.
das müs mich ymmer rùwen,
das es, ritter, ie solte geschehen,
das man so offenlichen iehen
yme músze solcher jnziht,
da von er an truwen ein wiht
yemer mer müsz sin,
als her an ist worden schin.
nu mag es sin nit rat wesen.
sal ich sterben ader genesen,
also bin ich her komen:
das minem herren ist genomen,
das wil ich, als ein ritter sal,
vordern. auch sehent ir wol:
es ist vf beyder sijten glich,
wann uwer gesellen iglich
mag haben wol den sinen.
so lant auch ir schinen
gantzen heldes mút an mir.
vnser ist niht mer, wann ich vnd ir.
sin ist zijt: nü strijten wir!>
fjmbeus sprach mit hochfart:
< deswar, ùch sal dise vart
gerùwen, ob gott wil.
mich duhte sin eine niht zuuil,
solt ich mit ùch vieren
strijten ader tiostieren;
jch widdersesze es clein.
jch sprich niht, daz ich allein
mit ùch solte vehten.
jch gan den guten knehten,
deswar, ires gemaches wol.
jch eyne dise rede sal,
her gawein, mit ùch enden.
wa hin ir es wöllent wenden,
des wil ich alles volgen mit!>
< der rede ich keinen wandel bitt>,
sprach gawein,< nú sint bereit!>
die rede was yme vnuerseit:
die tauel er von yme stiesz,
harnasch er yme bringen hiesz,
rosz, schilt vnd sper.
das brahten dise drij her,
wann nyeman mer da wachet.
gawein sich vf machet
vnd sine geselleschafft
an die strenge ritterschafft,
die nye noch was da vor.
dise ehte fùr das burgtor
bereit mit einander ritten.
da selbst müste werden gestritten.
es wart auch nit lenger gebitten.
al eine bleip gyramphiel.
jglichem der sin gefiel
vf dirre tiostùre:
zwene helde wol tùre,
der namen sint mir vnbekant,
lantzeleth vnd calocreant;
kay gefiel dem agleister var.
hie mischete sich die clein schar
vnd verwarre sich mit einander da,
jglicher den synen so,
so er ymmer best kund,
mit vare zü aller stund.
die spere waren schier vertan,
vnd muost gering an die swert gan.
die wurdent gar bald gezogen,
und wart keiner des bedrogen,
er wùrde von sinem gesellen
wol mit ritters ellen
genötigt vnd hersùcht
vnd mit slegen berúcht,
so das jne daran nihts gebrast,
sonder disen dötlichen last
muosten sie von einander tragen.
beyde gestochen vnd geslagen
wart da mit nijde wol.
da was schol widder schol,
gantzer nijt widder nijt.
also werte dirre strijt
mit gemeynem mút vnder jn,
das an jne weder verlust nach gewin
von keinem vnder jn schein.
sus was in noch gar gemein
glùckes helff sonder mein.
mit slegen wol hertten
sich dise helde wehrten.
so ritten dise zu var.
jn manige wijse fùr war
wart dirre strijt hernùwet.
sich hatt dar vertrùwet
ein gar werender hasz,
der ir aller hertz besasz.
des músten sie engelten.
sie gerúgeten vil selten
mit dem libe vnd mit dem mùt.
zü lage vnd zü huote
glich ir aller mút stunt,
als ninder ire vijnde tùnt.
des sah man da manigen wang,
da einre vf den andern trang
mit nijde vnd mit zorn.
hinden vnd vorn
sahe man der flammen blick
von den helmen vil dick
fliegen von den swerten slegen.
also muosten dise tegen
solcher arbeit pflegen.
des enmoht niht wesen rat:
jr ettliches sarwat
wùrd von bluote wol begoszen,
das er vil vngenoszen
doch wande des strijtes sin.
fimbeus von sgardin,
hern gaweins kampffgenosz,
der was gar des schiltes blosz
von gawein bestanden
vnd hatt von sinen handen
enpfangen zwa wonden,
da von yme gar verswonden
krafft, maht vnd die lit,
vnd streit yme nach alles mit,
deswar, vf des steines trost,
der jne dick hett erlost
vor freise, die zü dem tode wag,
da er siner krafft pflag.
der was er nü besessen.
gawein, der vermessen,
jne an noch sicherung sprach -
wann er wol an yme sah,
das er niht lenger mohte gewern -,
wann er slüg jne vngern,
ob er sin wolt enbern.
gyramphiel der rede verdrosz,
des fimbeus, ir frùnt, genosz.
das dirre streit so lang wert,
der rede sie zuo wissend begert,
was dar an were.
es was ir hart swere,
das er jne niht zú hant slüg.
jr müt sie dar zuo truog,
das sie vff die brùcke gie
vnd besahe reht, wie
es stund vmb ir amijs.
sie wande, das er ritters prijsz
an gawein hett bejagt.
jr wan ir hartt missagt -
sie wande jn han vberwonden -,
da von ir hertz gebonden
was mit groszem leid.
sie kerte zú jne vf die heid,
da sie aller meist stritten,
vnd er mit leszlichen sitten
vor gawein schirmes pflag.
vnderwijlen kaum einen slag
mohte er zuo reht an gelegen.
so gar hett jne erwegen
die arbeit vnd der tegen.
nü sie sah, daz er so gar
der krafft was blieben bar,
sie zaugte sich yme vnd sprah:
< ritter, ob dir ie geschah
liebe von miner mynne,
des lasz mich werden jnne
vnd verzage niht! du gesigest!
ob du nü in kumber wigest,
das la dir vnmere wesen.
er muosz sterben vnd du genesen,
ob du dich niht bekrenckest,
vnd gar zü recht bedenckest,
was muotes wijbes güte git,
der zü dem höhsten prijse lijt,
den ieman mag herreichen.
ja, kunde sie herweichen
einen stein ader einen hertten stael;
das sie jne erblichte zú einem male,
da müste er haben vnd tragen.
auch enmoht sich des niht entsagen:
von ir müst hertten weiches bly.
sitt das an wijbes güte sij,
lieb amijs, so la an dir
dir das geschehen vnd mir,
das als vor vns frauwen wir.>
uon dirre manung
huob sich ein wandelung
so an sinem lib.
von wibes güte vnd von wijb
yme die wandelung kam,
die yme mit al benam
alle sine zagheit,
vnd wart des libes so bereit,
als er sin erst begunde,
vnd niht an yme enpfund
wann gesuntheit, wie wol er were wunt.
wijbes güte mahte jne gesunt.
ahy, wijbes süsze,
wie gern ich dich grüsze
vnd fúrder din lobes prijs
mit gantzen trùwen in alle wijse,
wa ich mag ader kan!
jch bin ie din dienstman
gewesen vnd wil ymmer sin,
dwijle mich die tage min
werent, die ich leben sal;
wann es tüt minem hertzen wol,
so ich vor dir sprechen muosz.
din freuden bringender gruosz
minem libe sanfft tüt,
wann du erhöhest minen mút.
so dùht ich mich ein weltgot.
nü lebe ich doch in dinem gebott
je mit gantzer stete.
tü mir, als du tete
den, die dir hant gedienet bisz her!
wisz mir freuden gewer,
als ich mit truwen beger!
die krafft gab disem recken maht,
die an yme hatt bedaht
gawein vnd kumbers not.
als yme din gewalt gebot,
das er vnuerzagt were,
da wart siner swere
zü hant da vergeszen.
sust hatt gar beseszen,
was dir taug, din gewalt.
hie genosz einer vnd engalt
der ander vil hart din.
fimbeus von sgardin
vff gawein kerte vast
vnd tett disem gast
grosze not an dem vehten.
vnder disen güten knehten
wart der strijt vil hert:
fimbeusen gefert
gawein vil kaume erleit,
wann er mit solcher arbeit
jne an dem strijte bezwang,
das er jne nah also krang
hett getan siner krafft,
das yme dirre swere hafft
den lip nahe hatt verstolen.
das trúg gawein verholen.
nu ersahe er, daz es so gie,
vff jne er sich slahen lie,
was er des wolt tún.
auch liesz er sin selten sún
wesen, wa er mohte
vnd siner kreffte tohte.
das enpfing er mitt listen;
nu began sich alles gefristen
mit sichern vnd mit wijchen.
so liesz er nach strijchen
mit slahen vnd mit stoszen
widder sinen kampffgenoszen,
was er des moht bringen,
wann er sahe jne ringen
mit der múde so sere,
das er in an der kere
wande gar vberwonden han.
mit disen listen widder gewan
sin gantz krafft gawein,
also da zü hant schein,
wan er yme mit willen galt,
was er hatt vff jne gestalt
an der vordern geschiht.
er liesz jne gerúgen niht,
bisz er jne so vberslúg,
das jne die vnmaht trúg
von dem rosz vf den sant,
vnd alle sin krafft verswant.
also wart es vmb jne gewant.
als nü dis ersah gyramphiel,
vor leid sie vf die erde viel
jn vnmaht wol zehen stunt,
wann ir was dennoch vnkunt,
ob er lebte ader were dot.
gawein ir sin helff bot:
vil gering er von dem rosz sprang,
sinen schilt er von yme swang
vnd kerte, da die frauwe lag.
vf von der erden er sie wag
vnd hiesz sie fro wesen:
jr amijs möhte wol genesen.
des trostes wart die frauw fro.
gein fimbeusen kerte er da.
der swúr yme da sicherheit.
gyramphiel boit auch den eit
vnd swür by dem eyd,
das sie die hentschúh beyd,
das vingerlin vnd den stein
widder geb hern gawein,
das er jne genesen liesz
vnd sin gefangen hiesz
ymer mere fúrbasz,
vnd das were one hasz.
hie mit was verendet das.
nach was gar dissijt
vnder disen sehszen der strijt,
deswar, vnerwendet:
entweder müszen gesigen,
ader da siglosz geligen.
das gar gering dar nah geschah.
der geste heil fùrbrah
an des wirttes gesellen.
es wolte sie da vellen,
als es dem wirtt hette getan.
kay was der erst man,
der da gesigte vnder den dryn.
der selben sigenunfft gewynn
gefiel den zwein darzü.
hie mit kerten sie nú
vf das husz zü den stunden,
die geste mit den kunden.
auch wart der wirtt daruff getragen.
hie wil ich niht mer sagen,
wann das yme gar widder wart
das cleynot, vnd sin vart
gawein fùrdert zü hant:
so bald die selb naht verswant,
vf die reise er sich widder maht
vnd schüff, daz erwacht
das volk, e er von dannan ritte.
mit gar freudenrichem sitte
kerte er von dannan sonder bitte.
vf ein strasze er kerte,
die jne der weg lerte,
da er hin solde
gein dem land, da hin er wolde.
der was hart wol getrieben.
sie entwelten wenig vnd blieben,
deswar, nyndert vnder wegen.
jr múste das gevilde pflegen,
walt vnd wilde hab,
vnd das sie einchen tritt darab
jn dheine wijse wolten komen,
dwijle sie hatten genomen
gaweinen zú einem wijsere,
wie wol er vngewisz were,
wann es nach wane was geschehen,
das sie jne hatten ersehen
zú alsolcher gewiszenheit.
die geselleschafft die strasze reit
also wol zwölff tage,
das sie wedder mere noch sage
nie da von vernamen,
bisz sie zü jùngst kamen
gein einer habe wild,
darhin sie das gevild
trúg vnd die strasze
mit gar glicher masze,
die ein se vmb gie.
keynen weg man da verfie
bi dem se vber al,
wedder vf nach zú tal,
wann den, der sie trúg an den se.
man sah auch da niht vares me,
denn ob nye mensch dar keme e.
als sie nü niht enfunden
bi dem se noch enkunden
keinerhand vberfart vinden,
sie wolten dennoch niht erwinden,
dwijle sie der weg dar getragen
hett kaume in zwölff tagen.
wie es sich an gefinge
vnd jne daran erginge,
so enmöht es niht wesen rat:
helm vnd sarwat
geringe vf die seumere
sie lüdent, das geware
da von were ir vberfart.
als nú das alles bereit wart,
sie slúgent die seumer an.
nach iglichem ein iglich man
swammte den seumern nach.
jne was vf die reyse gach,
des satzten sie jne selbs wenig fùr.
wedder vnfùr nach gefür
jne da von widderfùr.
also swammen sie vf dem se,
das jne geschah hartte we
den langen tag vnd die naht,
das jne krafft vnd maht
vnd den roszen entweich,
da von jne mit al entweich
der trost an dem leben,
vnd hatten sich ergeben:
sie wandent sich wesen dot.
da halff jne usz der not
ein vnde, die sie usz slüg
vnd sie da mit an den staden trüg.
die helff an der zijt was,
das dise geselleschafft genasz
von disem vngemach.
sie begunden vmb ire sach
ahten dirre reyse
vnd hatten ir freise
vergeszen also gar,
als ob sie niht vmb ein hare
hetten kumbers da erlitten.
bi dem se sie niht lang biten:
sie bereiteten sich, das sie ritten.
sie ritten vnferre von dan,
das sie gingen vier weg an,
dar uff sie ir strasze braht.
vnder jne wart vil gedaht,
welhen weg sie darusz nemen,
da mit sie eben kemen
etswar in das lant,
da jne wùrd bekant
doch ettliche mere,
das jne behùlfflich were
an iren arbeiten.
nü enmohten sie bereiten
sich mit niht zú den wegen.
da riete gawein, der tegen,
das sie sich alle schieden da,
vnd iglicher vf sin sla
vnd sinen weg neme fùr sich.
kay sprach:< das lob ich!>,
vnd die andern da by.
die dry namen der wege dry,
gawein den vierden gefie.
dise vier schieden sich hie,
wa sie sich gesammelten ader wie.
jglicher sinen weg streich,
das er dem nye entweich,
vnd volgete yme nach mit sinem zock
vber stein vnd stock,
waszer vnd gevild
dorch dise habe wild,
das sie groszen kumber litten
vnd es doch nit vermitten,
wie we es jne tete.
sie waren so stete,
das sie da von kein not
moht gescheyden, usz genomen der dot.
also ritten sie bisonder.
gawein hatt dar vnder,
deswar, manigen gedang,
da mit er also rang
als eynig vf dem weg
vnd mit emszlicher pflege,
anders niht, wann das er des gedaht.
vsz sinen gedencken jne braht
ein grosze auentùre:
vmb jne bran ein fùwre,
e denne er es icht weste,
vmb vnd vmb so veste,
das es jne so gar vmb zoh.
war er kerte ader flohe,
er mohte yme niht entrynnen.
ye basz vnd basz enbrennen
zú einem ringe es began,
vnd bran jne so nahe an,
das es jne gantz vmb ging
vnd enmitten in sich gefing.
jn michelem kumber er da ging.
mit yme zohe es jn hin jn
mit gewalt dorch die erde hin
gantz, als er da reit,
das es dar an niht vermeit.
da mit das fùwre verswant.
es hatt auch gawein niht verbrant
vmb jht, nach berürt,
wann daz es jne hatt gefürt
jn ein lant, das vil schon was,
dar jnne er vil wol genasz.
die frauwe, die da was dar jnne,
die was ein göttinne.
von der gewalt es geschah.
einen kostlichen palas er da sah,
deswar, wol erbuwen,
daruff wol tusent frauwen
an den venstern vmb saszen,
die ire augenweyde maszen
herab vf die heyde,
mit also maniger meyde.
die waren gecleidt so wol,
daz ich enmag nach ensal
vch da von geprüfen niht:
min sage were dar an ein wiht,
als es die auentùre giht.
gawein gein dem sale kert.
da wart er zü male wol geert
von frauwen vnd von meyden
vil gar vngescheyden
mit irem rijlichen antfang.
darnach vil vnlang
wart yme zü der frauwen gebotten
von zwein wol werden botten:
zwa jumpfrauwen es waren,
die so kunden gebaren,
als es an ir libe schein,
wann dirre frauwen kein
duhte widder sie zü niht
kleider schon geschiht.
mit den er vil gern gie.
miner frauwen neig er hie
vnd kerte mit den jumpfrauwen von dan.
sie hieszen jne vor jn geen
gein einem rijlichen palas,
da die göttin jnne was
selb vierd geseszen.
gawein was niht vergeszen
von ir siner wirdikeit.
des recken sie niht erbeit,
bisz er keme nahen.
sie wold jne basz enphahen
vnd stunt vf mit disen drijn
von ir stat vnd gie hin,
da gawein gein ir ging.
mit groszem werd sie jne enpfing:
sie kùste jne zú wilkomen.
darnach wart der grüsz genomen
von disen jumpfrauwen sam.
das er mit willen alles nam,
wann es yme von hertzen zam.
hie mit sie sasz vnd auch er.
richer freuden gewer
was sie yme, das ist war.
darnach kam die rijlich schar
vsz dem palas gegangen,
die jne vor hatt enpfangen,
vnd sasz auch by jne da.
die lange rede ich hie la,
welcher hand kurtzwijle da were.
nùwan die gantze mere,
anders niht, ich hie sage.
sie fragde jne von sinem bejage
vnd bewiese jne aller ding dar an,
das er des kund gewan,
wie er da mit solte varn,
vnd das er sich solte bewarn
vor slaffen aller meist.
ob er das alles leiste,
so verlüre er niht sin arbeit.
darzü sij yme mer geseit,
das er vfmerckung hett vf die megde drij,
die yme vnd ir saszent by,
vnd die zwa, die si sande,
das er sie wol bekande
an libe vnd an gewande
vnd sie selben marckte mit jn.
er leite dar an sinen sin,
das das also geschehe.
wa er sie sahe ader sehe,
da solte er fragen von dem grale.
versesze er aber das ein male,
das sie usz gingen,
vnd jne widder fingen
slaffe vnd die müde,
vnd dragheit vff sich lüde
so hart, das jne betraget,
das er da von niht fraget,
ader wie er es vergesze,
das er vngefraget sesze;
so were gantz vnd gar verlorn
die arbeit, die er hette erkorn,
vnd sin reise da mitt.
sie seite yme auch, ob er ritt
vmb vnd vmb die welt gar,
es töhte niht vmb ein har
fùr das male fùr war.
sie sagde yme, ob er wölde
sich hüten, er ensolde
jn dheyne wijse niht trincken,
anders er wùrd yme sincken
jn so tieffen slaffe sinen mút,
das er sin were vnbehút,
er müste slaffen zü hant.
so wer es darvmb gewant.
dar zú tet sie yme kunt
die auentùre vf den grunt,
vnd das gansgüter were
jr brüder. die mere
gawein gern vernam.
von siner amyen alsam
sagde sie, das sie were ir base.
als nü das alles geret was,
dennoch rette sie fùrbasz:
gyramphiel hiet alter hasz
vmb ir amys darzü bracht,
das sie des hett gedaht,
das sie jne wolt heiszen sagen
zú hofe dot vnd erslagen
mit solchem orkùnd,
den nyeman wol kund
der warheit verzijhen;
vnd batt jr verlijhen
einer bett hern gawein.
< des were zwijfel kein:
keme der bott zü houe e>,
seyte sie,< es geschehe so we
dem gesinde von groszer clage,
die so endlich die tage,
die er usz were, wert,
das nyeman da freuden gert,
ob man es nit vnderfinge,
vnd das da von zerginge
der hoff vnd nymmer mere
widder keme an sin ere.>
die rede stauwete jne sere.
< das des icht mùge ergeen,
des mögen wir wol vndersteen>,
sprach sie,< mit dem cleynot.
das widderseit vwern dot.
die hentschúh vnd das vingerlin,
das müsz bisz morgen da sin.
sie hat gesant an den weg
einen ritter, der heiszet gygameg,
der dar braht das haubt,
des er úch salt beraubt
haben, als er selben jah,
da von die grosze clage geschah.
den stein sullen ir by ùch tragen.
nach musz ich ùch me sagen,
wie es vmb vwer gesellen stat,
vnd wie es jne allen ergat
an dirre starcken reise.
sie gewynnen alle freise,
do sie doch vor genesen,
wie hart sie bekùmbert wesen;
wann kay wùrt gefangen
vnd músz den kumber lange
sin tage tragen, bisz her
nùwen ritter mit sinem sper
one twale bezwinget,
die yme ein magt bringet.
das enmag aber nymmer geschehen,
wùrt er vor zauber niht fùrsehen
vnd endlich wol bewart,
wann man sin mit zauber vart.
wùrd aber er wol behuot,
so enwart nye ritter so gút.
yme möhte wol miszlingen,
ob er sie solt bezwingen
mit alsolchem vehten,
ob dirre güten knehte
yeman gesigt einer,
das jhener denn keiner
sin gefangen were,
vnd er den kerckere
yemer müste buwen da.
yedoch ich das nit enla:
jch wil ùch geben den rat,
der die aller beste helffe hat,
ob er dannan komen sal,
wie das mag ergeen wol
vnd anders, deswar, mit niht:
jr müszent yme dorch die geschiht,
wöllent ir anders behalten den man,
vwern halsperg laszen;
so geniset er, sal er kumen von dan.>
als sie es yme alles geseit,
dwijle was das essen bereit.
die nahtselde mit senfte wart.
die huszfrauwe niht enspart,
was zü freuden gezoh;
das gesind es auch niht enfloh,
es halff ir wol mit eren,
als es wol geleren
sie ir frauwe kund.
es wart auch an der stund
mit disem cleynot gesant
gein brytanien in das lant,
deswar, ein vil schöne magt,
die dise botschafft sagt,
die manbur enbot,
vnd brahte dar das cleynot.
jch sage ùch wol, es was not.
gawein bleib niht lenger hie:
sin alt reise er gefie,
als yme wart gezeiget.
den weg er geneiget
nie einen fúsz dar ab.
gein illes zú der richen hab
kerte er da sonder twale,
da yme der vil edel grale
gezeiget was zü vinden.
er wolt auch niht erwinden,
wedder sich nach den weg gesparn.
also muost er sehs tage varn,
das er sich vil kaume ernert,
wann das lant was verhert,
vnd was weyde also túre,
reht als ob es ein fùwre
hett gar vber gangen.
des müst jne belangen.
daran er sich doch wenig stiesz
vnd auch dar vmb niht enliesz
sinen weg dorch den gebresten.
jn einen walt vesten
kam er, da er wonder sah,
das vor yme da geschah:
er sah einen roten man,
des lip gar mit al bran,
mit einer geysel trijben
von den schönsten wijben,
deswar, ein grosze schar,
die allerhande cleyder bar
vnd nackent warn,
als sie ir mùtter gebarn,
die got zü der welt ie geschüff.
die úbeten solchen jamers wüff,
der vbel were zü sagen,
wann von jrem jamers clagen
möhte gawein sin verzaget.
dar began gawein gahen.
als er jne nü kam so nahen,
jren sweren wuff sie lieszen.
zü sammen sie sich stieszen
vnd flahten zu einem huffen.
auch began gein yme lauffen
der man mit dem fùwre
vnd kuszte jme vil tùwre
beyde beyne vnd fuosze.
mit geberden boit er ime den gruosz,
vnd began dar nach lachen.
auch begunden sich machen
her fùr dise süszen wijbe
vnd dackten vor hin alle ir libe
mit henden vnd gruoszten jne.
da mit gingen sie widder hin
vnd haufften sich widder als e.
keyner hand rede wart da me,
wann daz der man gaweinen neig
vnd widder gie vnd gesweig,
da die schar vor yme hin seig.
mit dirre rede er fùr reit,
wann yme nyeman da von seit,
was dis wonder meinte,
wann das sin hertz weinte
der gotsüszer wijbe not,
vnd da von fùwres flammen rot
dirre man so hart bran.
vnd verre reit er in den tan,
bisz er ein grosz wonder vand:
ein ritter snelles fùr jne rand,
vnd welcher nach helff rieff,
den mit den armen vmb swieff
ein wonneclich schöne magt.
dem ritter nieman nach jagt,
wann ein wijp vil alt,
die mit michelem gewalt
alles hinden nach streich,
das sie nye entweich,
vnd fürt in der hend ein glasz.
da ytzo nah komen was
der ritter usz dem wald,
da ylete sie vil bald
vnd warff es vf einen baum.
da mit wande sie den zaum
widder vnd kerte von dan.
da von diser walt brann
von der stat zü end usz,
das sin niht vmb ein grusz
bleip, vnd verbrant gar,
e denn er sin wart gewar,
den ritter vnd dise meit.
die grosz hertzenleit
gawein vil tùre cleit.
als er wol marckte das,
hie mit reit er fùrbasz,
so er beste kund.
jn vil kurtzer stund
widderfuor yme grosz wonder:
er sah ein vnkunder
mit einer starcken ketten,
da mit es nuo was geweten
zú einem rijse, das es nüg.
das selb vnkunder trúg
einen altherren grijsen,
den man wol moht prijsen
von schöne vnd geziere.
auch was er zú dem tier
mit gùldin banden
an fuoszen vnd handen
vil hart gebonden
oben vnd vnden.
er hatt in der rehten hant
von einem roten jochant
ein vil schön munsiol.
das was einer materien vol,
die mir die auentùre nit enseite,
wann das siner arbeit
mit al gawein vergasz,
als er sahe dis vasz
vnd darzü den geruch smackt.
er gab yme ein alsolche maht,
das alle gebresten an ym daht.
gawein sie lang an sah:
jr ietweders nihts zú ym sprach,
vnd lebten doch, das sah er wol.
er tett, als ein man tuon sal:
er neigte yme vnd reit fùr.
nü kam er vf ein gespùr,
als ob yme ritter ritten vor.
er satzte sich vf die spùr:
er wolt niht herwinden,
ob er möhte vinden,
wer dise ritter weren,
ob er icht von meren
kùnd herfarn von jn.
also reit er alles hin
mit ylen fùr sich vf dem wege,
vnd duhte jne, wie er hvfslege
vil nahe horte by yme da.
nie kam er ab der sla,
bisz sie jne brahte fùr den walt.
sin arbeit die reise galt:
er wart die ritter an sehen,
die vast strichent vor jm schehent
gein einem huse, das da lag,
vnd wol groszer schöne pflag,
wann zü dem abend neig der tag.
gein dem selben huse er kert.
sin reyse er auch mert
dorch gewisze nahtselde,
vnd das er die helde
alle sehe, die vor yme ritten.
des wolt er niht bitten,
wann er sie gern hette herritten.
sie enfúren niht in den sitten,
das es möht geschehen:
er mohte sie nicht wann an sehen.
niht neher moht er jn komen,
also hatten sie sich fùr genomen,
wann ir gevert was snell.
vor yme in das castell
sah er sie rijten al
mit michelem schall.
deswar, des was er hart fro.
gein dem huse kerte er da.
dahin kam er nach jn also.
das husz er offen vant.
dar jnne erbeiszte er zü hant
vnd schuoff yme sin gemach.
nú hort er nyeman nach ensach,
des wonderte jne vil sere.
alle dise huses kere
ersüchte er vil ang.
also ging er vil lang,
das er nyemans wart gewar,
wann ein tauel vant er gar
von der aller besten spise,
die in keyner wijse
yeman kund erdencken.
wer yme wolt schencken,
des vant er allen rat.
auch was kein miszedat
an zweheln nach an tischlachen,
das ieman moht geswachen,
wie gern er es wolt.
zwey beckin von gold
waren mit wasser bereit.
da enwas kein ander arbeit,
wann das man zù dem tisch sasz
vnd alle wirtschafft asz
vnd tranck, ob er es nit vergasz.
dis vand er alles vf dem sal.
also ted er in dem marstal.
aller eren gnúg,
der die erde ie getrúg,
von korn vnd von heuw
vnd von weicher streuw,
auch von luter súszer trencke -
wie vil ein man gedencke
gemaches, des was mer da.
gawein ging vf den sal sa
vnd tett der ritter aber war:
den vand er blosz vnd bar,
als er vor hatt getan.
da er nyeman vand, da was sin wan,
sie hetten sich zü gemach gelan.
nú vant er ein türe verspert,
des er hart fro wart,
vnd wande, sie weren dar jnne.
vil lijse mit synne,
das er sie icht zerstörte,
ob er ieman da hörte
jn der kammern ader fùnd,
zú lustern er begund
ein vil lange wijle an der türe.
da enhorte er widder vnd fùr
nyman, des er moht versteen.
da von wolt er niht von dannan geen,
bisz er die warheit vant:
die thüre stiesz er mit der hant
vff vnd gie dar jn.
er süchte her vnd hin.
da enfant er wedder wijp noch man,
anders wann ein bett vant er stan
mit so rijlicher vedderwat,
das die welt niht beszers hat,
vnd an kultern groszen rat.
grosz wonder jn des nam,
das es alles so ersam
was, was in dem huse was,
beyde kammer vnd palas,
vnd was dar jnne werdes lag,
vnd des alles nyeman pflag,
wanne die rede were geschehen,
vnd das er doch hette gesehen
ritter, die vor yme ritten
vnd des huses niht vermitten,
wa hin die weren komen,
das er des niht hette vernomen,
wann er sie dar jn rijten sah.
manigerhand gedoht er vnd sprah
nach disem groszen wonder.
nú gefie jne dar vnder
ein hunger, der jne von dannan treip,
das er nit lenger da bleip
vnd gie widder in den sal,
da er von eszen michelen schal,
deswar, vnd von trincken vant.
sinen staelhuot er ab bant
vnd zwüg sine hend.
der tauel an ein end
sasz er vf einem tapeiz,
der aller von gold gleisz.
daruff ein kùssin was bereit.
sin swert er vf die tauel leit
fùr sich vnd sinen staelhuot.
das was gewer vnd duhte jne güt,
wann alzijt nach strijte stunt yme sin mut.
er asz sere vnd tranck
vnd hatt manigen gedang
darvnder iedoch,
wann er meinte, das noch
die ritter widder kement
vnd sich des an nement
zü laster, das er ir niht beite.
vmb sust hatt er die arbeit,
da mit er was befangen.
wolt ir darvmb belangen,
das er da eyne müsz sin?
deswar, das múste da werden schin.
schier hatt er gnúg gasz:
niht lenger er da sasz.
die tauel er gerihtet lie.
er stunt vf vnd gie
herab fùr das burgtor
vnd stunt da vil lange vor,
ob er verre ader nahe
da ieman möhte verfahen,
der gein dem huse wold.
ob er ymmer da sold
steen, er sah da niht.
was yme da nü geschiht,
das músz er tragen, wie er mag.
hie mit endte sich der tag,
wann yme die naht ob lag.
jn das husz gie er widder
vnd leite sich slaffen nydder
jn die kammer so zü hant,
da er vor hin das bette vant,
deswar, sonder sorgen
vnd slieff bisz an den morgen,
das er da erst erwachet.
gering er sich da vf machet
vnd gie in den palas.
die tauel aber gerihtet was
als e vnd nach vil basz.
gaweinen wonderte, wer das
so geringe hett bereit dar.
von dannen gie er vnd nam war,
ob er noch ieman sehe,
dorch den das geschehe.
er sahe nyeman vber al.
nü gie er in den marstal,
vmb daz er versúchte,
wie sin rosz were berúchet.
da vant er sin rosz also sat,
das er sin niht wandels bat.
da bereitet er es an der stat.
da mit gie er widder von dan
vf den sal, da er verlan
hett disen richen ymbisz.
daran lag micheler flijsz.
er sasz darzú vnd anbeisz
vber vff jenen tapeisz,
da er vor was geseszen.
gering nach dem eszen
bereitet er sich vf die vart.
vil gering er bereitet wart.
da mit er von dannan reit
vnd auch niht lenger beit.
vnd als er der brùcke
kaume hatt gekert den rùck,
die brùck sich vf swieff.
nach yme mit süszer stymme rieff
ein magt, die mit zùchten sprach:
< her gawein, waere uwer gemach
hie gewesen vil güt,
jr hetten synn, willen vnd mút
funden an der huszfrauwen.
das sùllent ir jr getrùwen
vnd an dem gesind alsam.>
als er nü die rede vernam,
er wolt gesehen han die magt,
die yme dise rede sagt.
da was sie hin, das er clagt.
uff den weg er sich wande
vnd reit in dem lande
einen gar gantzen monad,
das er nye wart one
kumber vnd gebresten.
hatte jne so notvesten
mannheit niht gemaht,
jne hette so verswachet
der gebrest vnd die arbeit,
das er müste sin verzeit.
doch krenckte es jne gnúg.
dirre weg jne in ein lande trüg,
das groszer richeit pflag,
vnd so erbuwen alles lag,
das da nihts gebrast,
was da haben solt der erden mast
von korn, baumen vnd reben,
vnd wes die welt solte geleben
an allerhand richtúm.
das wart gawein hart frumm;
er was verdorben hartt.
reht als ein baumgart
was dis lant vber al:
es was grün vnd niht val
vnd was gúts gesmacks vol in alle wijse.
ein irdisches paradise
möhte das lant wesen wol.
es was aller wonne vol,
die ein mensch iemer haben sal.
e denn er kam in das lant,
ein schöne auentùre er vant,
der er zü sehen sere begert:
er sah ein fùwrin swert,
breit uszer maszen.
es huote der straszen
gein einer vesten cluse,
die vor einem huse
stund, das vil clug was,
vnd was sin muwre als ein glasz
dorchsiehtig vnd lieht:
sich mohte dar jnn verhelen niht,
man hett es uszwendig gesehen.
jch enweisz, wann es were geschehen,
es were mit al lere.
gaweinen duhte die mere
fremde sin vnd seltzame.
als ich mich wol verwane,
das was kein vnbild,
wann die geschiht was gnüg wild.
hie liesz er das gevild.
jn dem lande fùr er.
da vant er alle sin ger,
wes yme zü dem libe gezam,
bisz vil gar widder zü genam
sin krafft, vnd er sich widder erholt
des kumbers, den er hatt gedolt.
nü began jne usz dem wald tragen
der weg jnner zwölff tagen
von dannan in ein ander lant,
da er sine gesellen vant,
calocreant vnd lantzelet,
das yme von hertzen wol tet.
die zwen warent jrre worden gar:
er hette ir niht vmb ein har
gekennt, wann dorch das waffen.
nuo vant er sie slaffen
vnder einem baume dorch gemach,
da yme zü rijten not hin geschach.
die selb freude ire slaffe brach.
kay was gein illes komen
vnd hatt von dem grale vernomen
da so vil der mere,
das ein auentùre were
jn einer cappel, in der hab,
wer dar kam, der mohte dar ab
der rede kummen zu end
von dem grale vnd von gebend
losen vil manigen lip,
beyde man vnd wijp,
die mit not waren gefangen.
da was yme miszegangen
von vnglùck, das ist war.
jn die cappel kam er dar.
dar jnn vand er anders niht
wann ein bild vnd ein geschiht,
das nach einem menschen was gestalt.
reht als ein ritter alt
dis bild befie,
vnd was yme dorch beyde knye
gestochen ein scharffes sper.
als er das vant, das brach er
vnd suochte dar jnne das bluot.
das riet yme sin freueler mùt.
es wer yme gewesen güt, hette er es behüt.
hie mit er sich selber vie,
wann es stunt also hie:
von wem die auentùre gescheh,
das er das bild zerbreh,
der múste da ymmer sin tage
mit iamer vnd in iamers clage
jn der gefengnisz leben,
er möhte ir ein end geben
mit uszgenomener manheit,
die mir die auentùre seit:
hette er also grosze krafft
vnd were dar zü so mannhafft,
das er getörste strijten
sunderlichen zü nùwen zijten,
zü iglichem male
gar one vndertwale,
mit nùwen recken vnervorcht,
der nye keiner wart entworcht,
deswar, nach mit ritters tat,
vnd doch ir iglicher hat
es sin tage versúchet
vnd sich also berüchet
von zauberlichen dingen,
das sie niht mag bezwingen:
jme kan niht misselingen.
nü ist kay miszgangen,
so das er ist gefangen,
vnd moht nymmer widder komen,
hetten jne die frauwen niht genomen
jn ire gebett hin zuo gott.
ob er ie geprüfet spott,
des múst er nú zü buosze stan.
nü lant yme nit miszegan,
süsze selige reyne wijb!
was hùlff es ùch, ob er den lip
nùwen dorch den schimpff verlüre
vnd man an vwer gnade kúr
also gar grosze vngúte?
nu wendent vwer gemúte
zü welchem teil ir wellent!
wellent ir, er vervellet;
wellent ir, er ist genesen.
die wale muosz an ùch wesen.
wes aber ir nit wellent enbern,
des wil er von ùch begern
yemer mer in sinen tagen,
vnd wil es mit freuden tragen,
ob er anders kummet von dan.
des sùllent ir gnade han!
deswar, an ùch möht sin niht
geschehen, als er selber giht.
jst es, das er widder kumt,
an zwein dingen ùch das frummt:
eins ist, das er iemer ist
vwer schirm, sit er genist,
wann das von yme geschehen muosz.
auch enmag uwer gnaden grúsz
verwircken kein missedat,
dwijle jne vwer gnade begnadet hat.
das ist vwerm lob güt.
doch wùrt nach verrückt huot,
ob jne glùck ledig tüt.
dise rede ich hie lasze.
sust vant vf der strasze
her gawein dise zwene.
da müste freude ergeen.
als sie nuo einander ersahen,
gaweinen sie beyde verjahen
vil kumbers vnd arbeit,
der iglicher sunderlichen leit
vnd auch miteinander liten,
sit sie mit ein ander geriten.
auch sagde jne gawein sin geschiht.
sie entwelten da lenger niht,
wann es was worden spate.
von dannan ritten sie vil gedrate,
vnd ir gezùg ging jne vor.
gegen jne her das selb spor
vast ein güt kneht drabt
mit yle, der nicht vf gehabt
vnd wolt den weg niht begeben,
bisz er jne kam eneben.
er tet wol frùndes schin:
vil grosz wilkom sin
hiesz er den herren gawein
vnd sine gesellen gemein
yme vnd sinem herren vnd gott.
deswar, das meint er sunder spott,
das er wol bescheinte
sitt, wie er es meinte:
von sines herren wegen er sie bat,
das sie yme des tedent stat,
das er sie in sinem lande -
das were yme sunder schand -
solte mit dienst eren,
vnd wolten mit yme keren
zü huse. es were nahe da,
vnd weren vf der rehten sla.
des antworte yme gawein sa:
< gnade hab vwer herre vnd ir>,
sprach er,< vnd wissent, daz wir
vil gern zü sinem huse kumen,
es sij denn, daz vns werd benomen
der weg mit swerttes slegen.>
da widder sprach dirre tegen:
< des wil ich ùch sicher sagen,
vch sal dirre weg tragen
recht vf das husz hin.
sitt ich von ùch gewert bin,
so wil ich widder gahen -
es ist hie by vil nahen -,
vnd rijtent ir, wie sanfft ir wölt.>
hie mit gahet von jne der helt
vnd was jne vil snell entritten.
nú wisze auch, das sie nit biten
vf dem wege nach yme lang,
wann von hungers getzwang
litten kumber dise zwen.
gar schier sahen sie vor jne sten
ein husz, das was wonneclich
vnd allem rate glich,
als es uszen an was zü sehen.
ob dem huse sahe er schehen,
deswar, ein geuilde ritter vil,
vnd vbeten gewönlichen ritters spil
ein wijle da von ziel zü ziel,
aber one sper vnd one schild.
ritterlich vf dem geuilde
sie loysirten dorch banchenye.
dirre werden maszenij
waren sie komen so nahen,
das sie die recken sahen.
des wart ir spiel gelaszen.
vber das geuilde sie maszen
gein dem wege ein rihte
recht disen zü gesiecht,
als ob sie dar kemen geflogen.
gar gering hatten sie es erzogen
vnd enpfingen sie vil suosze
mit mynneclichem grúsz,
der wol nach liebe was gewant.
da jnn ires herren lant
hieszen sie sie wilkomen
sin. da mit wurden sie genomen
jn ir geleit da von jne
den weg bisz vff die burg hin.
gawein vant da freuden gewin.
das husz was wol erbuwen.
von rittern vnd von frauwen
was das husz alles vol,
den mit freuden hart wol
was, die jne zam.
gawein des wol war nam,
vnd began yme gefallen.
er wart auch von jne allen,
deswar, also enpfangen,
das es jne niht belangen
bedorfft, das er was dar komen
vnder dise schar,
wann sie jne vil gern sah.
aller sachen richen gemach
schüff man jme mit vollen da.
mit disen zwein ging er sa,
lantzeleth vnd calocreant,
da er des huses herren vant,
als er jne gezeiget was,
vff dem schönsten palas,
der ie wart erzüget,
ob die fabel niht entrùget,
von der meisten richeit,
da ie von wart geseit,
ader ieman kùnd erdencken.
auch moht niht gekrencken
den wirt kein armüt;
dar an was er wol behüt.
gezogen was er vnd güt.
er was aber güter witze.
yme was fùr die hitze
von rosen gar der sal gestreut,
der gesmack jne wol hart erfreut.
sine cleider waren wijsz -
dar an lag michel flijsz -,
von einem dyasper gesnitten.
deswar, da was niht vermitten
was daran flijszes solde ligen.
mit golde waren dorchrigen
die nete vnd genate mit al.
mit freudenrichem schall
zwei schöne juncherren,
von den er sich niht ferren
wolte, saszen ime eneben
vnd begunden mit zùchten geben
einander wehe zabelwort,
die gar waren vngehort.
der wort vant man milten
von iglichem, wann sie spielten
vor sinem bett schachzabel.
vnd hatt er sich vber tabel
von dem bette geleinet zü jn
vf das schohzabel hin,
das er das spiel an sah
dorch freude vnd auch darzü sprah.
das was yme ein güt gemah.
als nù gawein vf den sale ging,
dirre wirt jne enpfing
vnd dise zwen hart wol.
das hatt niht getan vol,
das er sie da mit sitzen batt,
vnd gab gawein stat
zü yme vf das bett dar.
vff einen kulter rosenvar
saszen dise zwen zü dem spil.
hie wart kurtzwijle vil,
deswar, von frage vnd von sage,
darzü von ritters bejage,
das der wirt vnd gawein tet.
so hatten dise by dem brett
schimpff vnd zabelwort gnúg.
die kurtzwile sie hin trug,
das es was worden naht.
da wordent die tisch gedacht,
als man solt eszen.
des wart niht vergessen.
dise waren gnuog geseszen.
vff stunden dise zwen.
auch wolt gawein geen.
dirre wirt sie alle nant,
wann er sie alle wol kant.
by yme er sie sitzen hiesz,
das ir keiner verliesz.
vnder die kam michel krafft
von frauwen vnd von ritterschafft
vf den palas gesigen,
die disem altherren nigen
schon wol nach wijbes sit
vnd saszen alle da mitt.
dirre wijte sale vnd lang
wart vol von jne vber al,
vnd die tisch befangen.
nach den selben kamen gegangen
wol zwentzig kamerere,
juncherren erbere,
mit michelen gefúgen,
die alle vor jne trügen
zweheln vnd becken.
das marckte dirre recke.
nach den kam ein michel schal,
die kertzen vnd kertzstal
truogen vil one zal.
das mahte den sale also lieht,
das man mohte verfahen niht,
ob es tag ader naht were.
wol driszig videlere
nach disen hin drungen
vnd andere, die sungen
vil manige süsze wijse.
freude nach hohem prijse
was jne allen gemein.
disen zwein vnd gawein
wart die siddel gegeben
dem wirte, deswar, eneben,
gawein oben, dise vnden,
disen mit ein ander vnd yme bisonder.
der wirt sasz vnder den drin.
den sal vmb vnd vmb vmb jne
die andern besaszen.
miteinander da aszen
ein ritter vnd ein frauw ie.
zü jùngst in den sal gie,
da sie waren gesessen
vnd ytzo wolten eszen,
ein wol schöner jungling,
deswar, dem alles sin ding
nach prijse schein wol gnúg.
ein swert er vor yme truog,
das was schon vnd breit.
fùr disen wirt er das leit,
das er das niht vermeit.
gawein dise mere,
vnd was die geschiht were,
began mit al bedencken.
nach disem kamen schencken
gegangen dar in den sal
vnd schanckten den e vber al,
die da waren geseszen,
e man jne brahte eszen.
vor jne allen wart gawein
geschenckt vnd disen zwein.
der wirt vnder disen sasz
vngetruncken vnd vngasz.
gawein auch niht entranck.
der durst dise zwen zwang
vnd tet jne so hart we -
wie wol er es jne verbotten e
hett, das sie niht trùncken -,
vnd da von so suncken
jn tieffen slaffe sie beyde.
da von geschah vil leyde
gawein, da er das ersah.
der wirt zü gawein sprah
vil dick, daz er vast
trùncke, als man dem gast
zü wirtschafft gern tút.
da stunt anders sin müt:
es wart von yme wol behuot.
hie mit kamen gegangen
jn einem ring lange,
deswar, die truchseszen fùr
so vil: bi der tùr
der jùngst nach was,
da was dirre palas
beseszen gar vnd betragen.
hie wil ich niht mer sagen.
es were vngefüge,
wann e man fùr trüge
die jungste rihte,
zü ir aller gesiehte
kam dar in den sal gegan
zwa jumpfrauwen wol getan,
die trügen zwey kertzestal.
dorchslagen gar vber al
waren sie auch beyde.
nach iglicher meyde
zwen juncherren gingen,
die vnder jne befingen,
deswar, ein vil clug sper.
nach den gingen aber her
zwa ander jumpfrauwen,
die waren wol erbuwen
an libe vnd an gewand
sunder alle schand
mit richer gezier.
von golde ein toblire
vnd von edelem gesteine
truogen sie gemeine
vor jne in einem siglad.
nach disen vil lise trad
die schönste frauw,
die nach der welt schauw
got ie geschúff zü wibe:
an cleidern vnd an libe
was sie gar volkomen.
die hatt fùr sich genomen
jn einem tùren plialt
ein cleinat, das was gestalt
als ein rost von golde rot.
daruff ein ander cleinot
was gestalt vnd gemaht,
deswar, das niht swaht:
gestein was es vnd goldes rich.
einer clepffzen was es glich,
die vf einem altar stet.
die frauwe vf dem haubt het
ein gùldin krone.
nach ir ging vil schone
ein vil wonnecliche magt,
die heimlichen weinte und clagte.
die andern vil stille swiegen.
gein disem wirtt sie siegen.
mit zúchten sie yme alle niegen.
hje mit stunden sie vmb jne.
gaweinen bedrog niht sin synn:
vil wol er sie kante.
sin hertz jne des mante,
das es die frauwe were,
die yme vor hin die mere
von dem grale hatt gesagt
vnd ermant, daz er were bereit
der frage, wa das geschehe,
das er sie ersehe,
vnd dise fùnff mit ir.
darzü hatt er grosz begir;
das auch wart volbraht.
da er des also gedoht,
dar gingen dise vier
mit dem spere vnd dem toblier,
die knapen mit den meyden
vil gar vngescheyden,
vnd stalten vf den tisch das sper -
des was der alt gewer -,
den toblier dar vnder.
da geschah ein michel wonder
vor gaweins augen:
das sper von gottes taugen
wart groszer tropfen bluts drij
jn dem toblire, der yme by
stunt. die nam der alt dar ab.
die frauwe mit der richen hab,
der wichent dise vnd ging sie zú,
von der ich han gesagt nú,
vnd jhene magt da mit.
von der kafftzen nam sie das litt
vnd stalte es vf die tauel dar.
des nam gawein alles war.
eine brosem er dar jnn sah,
der dirre alt ab brah
das dritteil vnd asz das.
gawein niht lenger versasz
die frage vnd sprach zü hant:
< tunt mir das dorch got bekant,
herre, vnd dorch sin magenkrafft,
was dise grosz herschafft
vnd das wonder betùte.>
nach der frage dise lùte,
ritter vnd frauwen, alle
mit michelem schalle
sprungen von tischen vber al,
die da saszen vber al,
vnd hùb sich groszer freuden schal.
der wirt gebot vnd bat,
das iglicher an sin stat
widder sesze alsam e,
vnd das sie keinen schal me
vbten, bisz er geseit.
das geschehen was vil bald bereit.
dirre schalle das machet,
das die zwene waren erwachett,
calocreant vnd lantzeleth,
den das trincken das tett,
das sie slieffent sunder dang.
als sie nú ersahen dis gedrang
vmb den tisch von den frauwen
vnd auch begundent schauwen
das wonder, das sie hatten vor jn,
vor slaffe suncken sie aber hin.
wol funff stund das geschah,
das jne der slaffe die wahte brah.
da zùschent der alt sprah:
< dis gottes wonder, gawein,
mag niht werden gemein,
es müsz wesen taugen.
doch sal ich dir niht laugen,
sit du sin gefraget hast,
süszer neue vnd lieber gast.
es ist der grale, den du siehest.
vmb die arbeit du geschiehest
aller der welt zú prijsen,
das dich ie geturst gewijsen
din manlich müt dar an,
das getorstestu bestan
dise freisenriche arbeit.
von dem grale wùrt dir nit me gesagt,
wann als du hast gesehen,
vnd so vil, das geschehen
von der frage grosze freude müsz,
den ires kumbers wùrt büsz,
den sie lang zijt haben erlitten,
vnd vil kaume hant erbitten,
das sie da von sint erlost.
sie hatten alle güten trost
vnd gedinge zu parcifaln,
das er solte von dem grale
herfarn die heimliche sage.
da schied er von dan als ein zage,
das er sin niht fraget
vnd sich sicher niht enwaget,
da er dar an missefür,
das er sin da niht erfuor,
das er es sicher hette erfarn.
so hette er manig mutterbarn
da mit erlöset von groszer not,
die beyde lebent vnd auch sint dot.
wann dise jamers not geschach
von sinem vettern, den er stach,
sin bruder, dorch sin eigen lant.
dorch dise vntruwe hett gewant
got sinen hertten zorn,
das es mit al was verlorn,
vber jne vnd das kùnne al.
das was wol ein iemerlicher val:
was sin lebte, das wart verdrieben;
die aber dot blieben,
die fuorent doch in lebens schin -
das músz ir aller wise sin -
vnd litten grosze not da mitt.
doch hatten sie trost vnd bit
von gotte vnd gnaden so vil,
das sie funden kumbers zil,
als ich dir nú sagen wil.
ob des geslehtes ieman were,
der jne dise swere
da mit enden wölte,
das er herfaren solte
dise grosze auentùre:
das were liebes stùwre,
die sie leides ergetzet,
vnd würden gesetzet
jn gar gewone freude widder.
beide, die dot ligen nidder,
vnd auch die, die noch lebent,
die got vnd dir gnade gebent,
wann sie von dir sint erlost.
dis spere vnd dirre trost,
das neret mich, vnd anders niht,
wann ich an der geschiht
vil gar vnschuldig was.
darvmb ich vor gotte genasz.
jch bin dot, wie wol ich niht dot schijne,
vnd das gesind min,
das ist auch dot mit mir.
wie das sij, so haben wir
doch kein witze vber al,
vnd haben aller ding wal,
die nach freuden zihent
vnd jamers not fliehent.
wann dise frauwen sint niht dot.
sje hant auch kein ander not,
wann das sie sint, da ich bin.
von gott ist befolhen jn
dorch mich das gottes taugen,
das sie vor dinen augen
hie vf diser tafeln haben,
da mit mich got vnd sie labent
nùwan zü einem male in dem jar.
vnd wisze das fùr war,
was du auentùre hast gesehen,
das sie von dem grale sint geschehen.
der kumber ist volendet
vnd mit al verswendet:
din arbeit ist wol gewendet.>
da mit gab er yme das swert
vnd seite yme, er were gewert
vil gar frùntlich damit;
vnd wie vil er da mit gestritt,
da von gebrast es nymmer,
vnd gebott, daz er es iemer
one wurde sine tage.
vnd also endete er sin sage,
wann das er so vil mere seite,
das er liesze die arbeit,
der er yme hette gedoht;
es wùrd auch snelle volbraht
mit angaraz von karamphi:
er fùnde jne an dem wege da by
morgens, so er ritte hin.
darzü bewisete er auch jne,
das es morgen were ein iar,
das er were komen dar
vnd yme disen eyt swúre,
vnd yme gantz erfüre
von dem grale die wilde mere,
ader widder komen were
jn sinen kerkenere.
uon disen frauwen er auch seit,
das dorch ire reine wiplicheit
hette jne das verlùhen got;
vnd were gar von sinem gebott
vnd niht von eincherhand missedat,
das dirre gottes taugen rat
were an nyeman anders denn an jne.
das were auch nù alles hin.
sie weren trurig worden,
das were von gottes orden;
vnd seyte yme, daz er wesse war,
das ymmer mere so offenbar
der grale wùrd gesehen,
sitt das were geschehen,
das er es hette herfarn,
vnd nyeman getörste erbarn
von dem grale von gottes vorchten;
dorch die er gar verworchte
das götlich taugen.
wann was man mit den augen
dar an ersehen kunde,
das were von gottes gunde;
aber sin bezeichenung,
die nye getorst kein zung
vor gotte fùrbasz gesagen.
dise sage hette yme die naht entragen,
das es began darunder tagen.
nach diser rede so zü hant
dirre altherre so verswant
vor sinen augen vnd dem grale
vnd mit yme zü dem selben male
dis gesinde vber al,
das vor yme was vf dem sal,
wanne die frauwe vnd ir meide.
das tett gawein leid
dorch disen altherren da.
er wart sin aber sitther fro,
da ime die frauw geseit,
das er alle sin arbeit
so gar hette volbraht,
als er ir hatt gedoht,
an dem richen grale fùr war.
dise tugentriche schar,
als ich ùch geseit han,
die göttinne wol getan
vnd die funff jumpfrauwen
vnd er da gingen schauwen
das husz vnd den palas,
das alles so kostlich was,
jn einem sale richen
vnd gar wonneclichen,
vnd ander frauwen mit ir.
da wart volendet sin gir.
so seit die auentùre mir.
sje empfing in hart wol,
also man frùnden tún sal,
als sie auch hatten getan.
sie enwolt jne des niht erlan,
er múst den tag bliben
bi ir vnd vertriben
mit frage vnd mit sage.
sie seyte yme an dem tage,
das das lant ir were
vnd die burg erbere,
vnd das nyrgent anderswa
jn keinem lande nuwen da
der grale gesehen wùrd;
vnd sie müste die bùrd
von gotte bisz dar tragen.
darzuo began sie yme sagen,
das were gar zerstort:
got hatte sie erhört,
das er dar kummen were,
das er des jamers mere
also hette verswendt
vnd da mit lùte vnd lant
hat erlöset also vil,
der nyeman end nach zil
vbel iemer kund geben.
beyde, den verzigen was das leben,
vnd die lebendig nach waren
von allen jren sweren,
erfrauwent sich von den meren.
den tag bleib her gawein
alda by ir mit disen zwein,
den dise meren taden wol.
jr herze was aber jamers vol,
das sie der slaffe da von nam,
da der grale fùr kam,
das sie es niht recht sahen,
als sie selbs jahen.
hart wol man ir pflag.
als nú morgens kam der tag,
sie musten von dannan scheiden.
von frauwen vnd von meyden
wart gawein manig wonsch gegeben,
das er mit heil solte leben.
mit gantzen trùwen sie des baten.
das sie darvmb taten,
das er sie also erlöst hette.
vmb sollich rede es also stet:
ein güt suchet ander guot,
das es wol billichen tuot.
was taug die red? es ist bekant.
von dannan strichen sie dorch das lant
gein illes zü der hab,
da sie mit groszer vngehab
jn einer capellen funden
hern kay: der was gebunden
mit alsolchen banden,
die zü fuoszen nach zú handen
nieman kiesen mohte,
vnd yme doch niht entohte -
wie frij er der banden were
vnd alles gezwangs lere,
das man gesehen kund -,
das yme die capelle gund
des, das er ging fùr die türe
vil kaume nach siner cúre,
wan dar jnne widder vnd fùr.
vnderwegen da vil nahe hin by
angaras von karamphi
jne vf dem wege engegen reit -
als yme der alt hatt geseit -,
der auch vf auentùre wan
aleyne was gestrichen von dan
von karamphi in das lant.
schier hatten sie sich gekant.
da loste er sin trùwe.
ein geselleschafft nùwe
hùb sich da vnder jne zwein,
sit angaras mit gawein
auch mit andern sinen gesellen geyn illes kert,
da mit er gawein erte:
sinen weg liesz er dorch jne.
also kamen dise vier hin,
als sie nuo in der cappel funden
kay gefangen vnd gebunden
vnd das bild, das er brach,
da von yme der kumber geschach,
als man sah vnd er selber jach.
vil gern er die helde sach.
dis vnerwent vngemach
klageten sie vil tùre,
vnd dise auentùre
wolt iglicher, möhte es sin,
fùr jne lyden, möhte es sin,
mit glichem kumbers falle.
des swuoren sie da alle.
auch hatt er da selbs ein cleinen trost,
das er ymmer wùrd erlost.
michel gnade er jne sagt.
als es nú des andern morgens tagt,
gawein yme sinen halsperg liesz,
als es jne die göttinne hiesz,
vnd tett er den sinen an.
von kay al vier von dan
einen weg sie vil schier
yleten die viere
geyn dem lande,
den gawein wol kande.
jr gezog ging jne alles mitt.
was iglicher kumbers litt
von arbeit, das wissent ir wol.
als es in reisen wesen sal,
der was ir geverte vol.
nicht sunders erlitten dise dry,
da von ùch icht zü sagen sy.
nach gawein, fùr war,
jn einem halben jare
dorchstrichen sie vil kaume die land,
wie wol jne der weg was bekand,
der sie wijsete gein karidol.
das hetten sie vernomen,
dwijle jne das kleynot was komen.
das was ware, es was da.
da engegen kerte gawein sa
vast ylend mit disen drin.
vil schier kamen sie da hin,
das sie dem huse so nahe
kamen, das sie sahen
das husz vnd was da geschah,
vnd das man sie auch ersah
her rijten vber das gevild,
vnd kanten die schild
von den wapen dar an.
da von grosz freud gewan
der hoff vber al.
schier was der freuden schal
fùr artus kummen in den sal.
dje freude trúg sie alle enbor.
nü was fùr das bùrgtor
vnder die gawein geritten.
vnlang sie jnnerthalb bitten,
der kùnig vnd die kùnigin
vnd beyder gesinde mit jn,
herab sie gein jne gingen.
mit freuden sie die enpfingen.
jr merckent wol, das freude da was.
sie kerten vff den palas.
da wart jne endlich gesagt
sùnderlich alle ir arbeit,
vnd wie es were ergangen,
vnd kay were gefangen,
vnd wie er müste lösen sich.
hie bewijset die auentùre mich,
das er sere wùrd geclagt,
das beyde frauwe vnd magt,
deswar, vnd ritter taten,
vnd gott vil tùre baten,
das er jne widder sande
gesunt vnd frisch zü lande
von dem sorglichen bande.
auch wart jne angaras genant,
das er jne wùrd gekant,
vnd geseit, das es were
der selb held mere,
dem gawein den eit hatt gesworn.
vnd das das icht wùrd verlorn,
man tet yme das selb recht,
das da ein iglich güt kneht
zü reht gehabt het bisz her,
da von siner tùgend ger
vnd auch des kùnigs gund
die stat zü der tauelrund
hett ader haben sold;
vnd seit, das er wold
sie haben vnd das gesind sin.
groszer eren wart da schin:
zu hant ein hoff gebotten wart,
der mit micheler hochfart,
deswar, wart fùr gekert.
angaras wart da geert
vnd enpfangen da mit,
wann das was des kùnigs sitt,
so er einen gesellen enpfie,
das er das nymmer verlie.
also erte er sie ie.
vber zwölff tage was bereit
der hoff, als ùch ist geseit,
mit vil groszen eren.
darnach hiesz keren
artus, wa er kund,
mit wercken vnd mit gund.
da was des gesindes zumale vil.
es übete auch manigerhand spil,
das yme michel freude braht.
an kay wart vil dick gedoht,
vnd wart geclagt vil tùre.
vil grosz auentùre
hatt kay uszen erfohten,
die nùwen ritter enmohten
yme jn dheine wijse angesigen.
sie muosten alle nùwen geligen
siglosz von sinen handen.
da mit er von den banden
sich loste, das muoste wesen.
anders mohte er niht genesen,
wann er muoste mit yne vechten.
mit disen guten knehten
kerte er usz der hab von dan
vnd wolt sie des niht erlan:
sie muostent mit yme rijten.
wann der sitt was zú den zijten:
was ein man mit truwen swúr,
das er daran niht miszefúr.
aber ytzo taugt niht sollich fuor.
nu streich kay gaweinen alles nach
mit disen - wann yme was vil gach:
er hette jne gern herritten;
des wart gar wenig entwelt nach gebitten -,
deswar, vf der strasze
jn vil groszer masze.
des hett er vil wol gewant,
wann er den hoff gantz vant,
vnd was das an dem ersten tag,
da vmb jne was michel clag,
vnd der kùnig ob dem tisch sasz
vnd noch weder getruncken vnd gasz
dennoch hett vmb ein har.
vber die brùcke was er dar
niden komen fùr den sal,
das sin nyeman vber al
des gesindes jnnen worden was.
mit disen vf den palas
er also gewapent trang
vnd sprach:< der wirt hab dang,
das er min gebiten hab!>
gein yme das gestüle her ab
die ritter drungen al
mit vil groszem schall
vnd wurden siner zukunfft fro.
grosz freude huob sich da,
das er gesigen hatt also.
djse ritter wurden enpfangen wol.
deswar, es wart zü karidol
nie kein groszer hochzijt
weder vor nach sitt.
dorch drù ding das geschah,
die man da alle sah:
das ein was, das gawein
vnd sine gesellen gemein
die mere brahten von dem gral;
das ander, das von ritters mal
zü der tauelrund wol was
jr geselle, herr angaras;
das dritt was, das her kay
was mit solchen eren frij
von der gefengnisz worden.
die ding múste orden
groszer freuden vberkrafft.
jch han von dirre geselleschafft
an der krone niht mere zü sagen,
wann das nach zölff tagen
der hoff sich zerlie.
die kunden blieben hie,
die geste schiedent hin.
nü ist gawein komen widder jn.
des müste er mit heil wesen!
lant auch dorch gott kay genesen!
er hat sich wol erhauwen.
nuo frauwen sich die frauwen,
das got ir bed hat vernomen,
das er jne ist widder komen,
wann er wil nuo ir kempff sin.
jch nym sin niht vf die truwe min,
das die rede also geschehe.
jch vörchte, das man noch sehe
vnd höre, das man spottes pflege.
die schult ich vf jne selbs lege,
tritt er irgent uszer dem wege.
sje blieben bi ein ander da.
die auentùre ich hie la.
ob ich halt hette zü sagen,
das wolt ich darvmb vertagen,
das alle auentùre
von gaweins tùre
sagent. wie vil sin sij,
was töhte denn swaches bly
so wol gesmidter krone,
die edel gestein vil schone
jn golde gezieret hat,
als es kunst vnd witze rat
an dem adel bekennen kan?
wùrt vermischet ettwa dar an
ein blúme ader ein bild,
das es tumben lùten wild
jst zü bedrahten vnd zuo sehen -
das villicht mag geschehen,
ob es zü tieff ergraben was -,
vnd wil fùr swaches glasz
jr edele gesteine kiesen:
was mag sie daran verliesen,
ader der meister, der sie hat gesmiedt?
da wùrt niht wan jhener mit
bedrogen, den sie kostet.
das golt niht enrostet,
wie lang es verborgen lijt.
wann jme denn kommet die zijt,
das es dem meister zü kumt,
zuo werd es jne beyden frummt,
wann sie ein ander beyde
sint süsze augenweyde
vnd erkennent sich zü reht wol.
darvmb ich ùch sagen sal
ein vil cleines bispel,
vnd wil dar an wesen snel,
sit ich sin begunnen han:
jch vant vf einer misten einen han,
da er suochte sin spijse
noch siner gewonlicher wijse.
einen vil gar edeln stein,
als er usz dem miste schein,
er tratt darvff vnd sprach:
< das dirre funt niht geschach
ettwie eyme, dem du werest frumm -
wann ich zü húlff niht enkum
dir an icht nach du mir!
darvmb so müszen wir
vns von einander scheyden.
es frummt niht vns beyden,
das wir by einander sin.
mir mag din vil liehter schin
minen hunger niht benemen;
des muostu mir miszzemen!>
hie mit er jne vnder trat.
sin möhte dem sin worden stat,
den sin schin hett gemaht satt.
hje mit hat ein end
die krone, die mine hend
nach dem besten gesmidt hant,
als sie min synn vor yme vant
vsz einem exemplar.
vnd wissent das fùr ware:
sie enmùgent niht wol vff getragen
zwispel hertzen, valsche zagen,
wann sie ist jne zü enge.
sie tragent aber wol die lenge
die gúten vnd die reynen.
mit so gúten steynen
jst sie vber al beleit,
das sie wol ir wirdikeit
zü reht trug vnd zimmt.
wer sie fùr sich zú schauwend nymmt,
wil er sie zú reht schauwen gar,
so mag er wol werden da gewar
vil maniges fremdes bilde,
beyde zam vnd wilde,
des glichen er vor nye gesah,
ob er sie vor niht machet swah
von vnkunst ader von nijt.
mit diser krone gekrönet sijt
jr frauwen, die nach werde lebent,
wann vwere grüsze der welt gebent
freude vnd hohen muot!
das ist das öberste gút,
das der welt mag geschehen.
dirre arbeit wil ich ùch jehen,
wann ich ir dorch ùch began,
wie wenig ich noch daran
nach dienste han gewonnen.
jr sollent mir nicht enbunnen,
vwere gnaden gruosze gönnen.
der dis búchs herre ist,
der sal leben lange frist.
mit freuden vnd mit gnaden
müsze er werden vberladen!
des helff yme vnd mir, du reyner got!
wann er behaltet din gebot
gern an allen dingen.
des müsze vns nymmer misselingen
an eren vnd an guot.
des wùnschet vns der wol gemuot
heinrich wolgemuot,
der vngern des verbere.
er wùnschet yme des besten
bi kunden vnd bi gesten
mit truwen an aller stat,
wann er das búch geschrieben hat,
als der edele selb schuoff.
herre, vernim mynen rúff
vnd mines hertzen bet,
vnd behüte vns an aller stet
vnd gib vns auch zü erkennen,
das wir ettwenne,
so es mùge sin,
gedencken der altfordern sin!
er weisz wol selber, wie.
auch bin ich armer hie
vil tieff vf sine gnade.
sin hùlff mich entlade
miner sorgen bùrde.
wie frölich ich denn wùrde,
sal mir gnade widderfarn!
min wip von achtzig jarn,
die wil got zú lang sparn:
der ich gern enbere,
ob es gottes wille were,
vnd so, das sie zü hymmelrich
were von ewen ewiclich,
ader, ob sie lenger leben wöld,
das sie einen swaben haben sold,
vnd ich fùr sie zü hymel were.
das weren mir vil süsze meren.
amen.