DA.txt

swer gerne allez daz vernimt
daz guoten liuten wol gezimt,
der wirt es selten âne muot,
unz er der werc ein teil getuot.
swer aber den worten ist gehaz,
der ist ze den werken dicke laz.
von bisenze meister albrich,
der brâhte ein rede an mich
ûz wälscher zungen.
die hân ich des betwungen,
daz man sie in tiutschen vernimet,
swenne kurzwîle gezimet.
nieman der enschelte mich:
louc er mir, sô liuge ouch ich.
sus hebt sich diz maere.
hie wil der strickaere
mit worten ziehen sîn kunst
und haete des gerne iuwer gunst,
daz irz mit zühten hoeret
und niht mit rede zerstoeret.
zuht ist ein sô reiniu tugent,
si êret alter unde jugent.
< swer lop und êre wil bejagen,
der sol darumbe niht verzagen,
irret in etswâ daz guot.
sô man den willigen muot
an ime erkennet unde siht,
man giht im, des man dem giht
der den willen und diu werc tuot.
gar âne willigen muot
wirt selten ieman wol gelobet,
swaz er mit gebene getobet.>
des giht der künic artûs.
er gewan nie eigen hûs
den man ze ime gelîche.
er minnete groezlîche
beide milte und êre
und tugentlîche lêre.
ern begie nie lasterlîche schame.
dâvon sîn lop und sîn name
reine lebt unde wert.
swer hovelîches lebens begert,
der minne alle sîne zuht.
daz ist ein wuocherhaftiu fruht
und ist ein loblîchiu habe:
er wirdet dâ benamen abe.
der künic artûs was vollekomen.
swaz wir von künigen hân vernomen,
daz was ein wint wider im.
wan daz ich mich ungerne ane nim
ze strîtene mit den liuten,
ich kunde wol getiuten
wes er pflac in sîner jugent.
ich weiz wol, ob ich sîne tugent
mit worten gar her für züge,
man spraeche, ich tobte alder lüge.
dâvon wil ich lützel dâvon sagen
und wil es doch niht gar verdagen.
nû hoeret sîner tugende kraft:
er was sô rehte wârhaft
daz er sprach dehein wort,
ezn waere staeter denne der hort
der iemer und iemer weren mac.
nû hoeret ouch wes er mê pflac:
die ime gerne wâren undertân,
die wolde er doch ze gesellen hân.
des quâmen ime ze handen
die besten von den landen.
die wurden sîn gesellen dâ
und wâren ouch darnâch anderswâ
gelobet iemer dester baz.
darumbe tâten sie daz:
er wirt dicke dester baz vernomen
swer sich gesellet zuo dem fromen.
dô der künic artûs gesach
daz im diu werlt des lobes jach,
des fröute er sich sêre
und gelobte dur ir êre,
er wolde vasten alle tage,
unz er von sehene ald von sage
vernaeme ein niuwez maere
dâvon ze sagene waere.
daz tet er niht wan umbe daz
daz sie sich regten deste baz
und ritterschefte pflaegen
und sich dâ niht verlaegen.
er fuogte ir êre in alle wîs,
dâvon bejagte er den prîs.
sîn guot daz was gemeine,
sîn hof wart nie sô eine,
ez waere genuoc ze einer hôchzît.
sîn lop daz was von schulden wît.
sîn ingesinde was âne zal.
ein tavel stuont in sînem sal,
diu hâte die tugent und die art
daz nieman sîn geselle wart
wan den si zuo ir sitzen lie.
der ie dehein dörperheit begie,
der hâte ir hulde verlorn.
si hâte in schiere verkorn,
er getorste niemer zuo ir komen.
dâmite wurden sie ûzgenomen
die im ze gesellen tohten
und mit êren heizen mohten
die von der tavelrunde.
swaz der man kunde
ze kurzwîle ald ze spil,
des was dâ mê denne vil.
ein site was dâ gevangen,
der selten wart übergangen:
swem ein laster was beschehen,
des muoste er offenlîche jehen,
und swaz im êren geschach,
daz er des niemer verjach.
sie muosen darumb ir laster sagen
und ir frümikeit verdagen:
swer dâ lobes muote,
daz er sich vor laster huote
und vil gerne des saehe
daz ims niht mê geschaehe,
und deste tiurre waere.
diz dûhte in wandelbaere,
der des andern laster haete geseit
oder sîn selbes frümekeit.
der ûz nâch âventiure reit,
dem was ein niuwer schilt bereit.
swer den hâte genomen,
dern getorste niht wider komen,
ern braehte in gar zerhouwen,
daz man wol möhte schouwen
wes er die wîle pflaege.
ez enwas nie sô unwaege,
ezn würde von in bestanden.
des wart in allen landen
gelobet der künic artûs.
durch daz man ie von sîme hûs
ûz ze rîtene pflac,
des wart sîn êre alle tac
breiter denne si waere.
durch die selben maere
riten von allen landen dar
die besten ritter alle gar.
ouch hâte der künic artûs
durch ein wunder in sînem hûs
den schalkhaftesten man
der ritters namen ie gewan.
der was geheizen keiî
und was aber dâ bî
der aller küeneste man
den der hof ie gewan.
der was an die heide
durch sîn ougenweide
nâch âventiure geriten
mit hôchvertigen siten.
er was ein klaffaere:
ern wolde dehein boese maere
von im selber sagen;
haete er einen erslagen,
er haete gesaget, ir waeren drî.
nû sach der herre keiî
einen ritter rîten dort her,
gegen dem kêrte er.
der was daniel genant
der blüejende tal was sîn lant.
der hôrte sagen maere,
swie from ein ritter waere,
suochte er den künic artûs,
ern fünde noch tiurren dâ ze hûs.
vil manlîche begunde er
durch daz selbe wunder
gegen hern keiî gâhen.
dô si begunden nâhen,
dô begunde ern ansprechen,
ob er iht wolde stechen.
her keiî sprach zehant:< jâ.
ir möhtet aber anderswâ
groezern prîs bejagen.
ich mahte sie alle ze zagen
die mich ie geriten an.
mich bestuont nie kein man,
ichn bereite in mit einem valle.
darumb schiuhent sie mich alle
die mich noch ie erkanten.
die aber an mich genanten,
den geschach als iu muoz geschehen.
ich wil iuch schiere lâzen sehen
ein siten den ich gelernet hân.>
dô liezen si zesamen gân.
sie neigten diu sper ûf die brust.
daz was ietweders gelust
daz er den andern valte.
mit solichem gewalte
begunden sie zesamen komen.
dô wart her keiî genomen
an der ritterschefte
und wart mit grôzer krefte
gestochen âne sînen danc,
daz er wol eines spers lanc
von dem rosse nider viel.
dô wolde im her daniel
niht mê tuon, dô daz ergie,
wan daz er daz ors gevie,
und rette im höveschlîche mite:
< ritter, ist diz iuwer site
den ir dâ gelernet hât,
sô möhtet ir lîhte haben rât
ob ir des sites vergaezet
und ûf iuwerm orse saezet.
bereitet ir sie alle
mit einem solhen valle?
der site ist gar ân êre:
gerüemet ez iuch niemer mêre.>
keiî sprach niht dâ widere,
er lac ie noch dâ nidere
wand er vil unsanfte viel.
dô sprach herre daniel:
< nemt iuwer ors, ob irs sô gert,
daz ir den site gar verbert,
und vallet niht mê, ezn tuo iu nôt.>
her keiî tet daz er gebôt,
er nam sîn ors widere.
er viel sît dicke nidere,
daz was im aber harte leit.
er saz ûf unde reit
ze karidôl in daz hûs.
dô frâgte der künic artûs
waz im waere geschehen.
dô enwolde er nihtes verjehen,
wan daz er zornlîche sprach:
< mir ist geschehen daz mir geschach.>
nû bekanten sie wol sîn bejagen,
und bâten in niht mêre sagen.
dô rief dirre unde der:
< harnasch unde ors her!>
und wolden alle besehen
waz hern keiî waere geschehen.
die dâ niht lenger biten
und ûz durch ruom ze velde riten,
dern weste nieman dehein zal.
daniele von dem blüenden tal
sâhens ûf der heide haben
und begunden gegen im traben.
der êrste der in ane reit,
daz was troiman du gereit.
den stach er nider al zehant.
darnâ quam herre gressamant.
den warf er an daz selbe mâl.
gengemôr und linvâl,
alom und schaitîs,
pribandrôn und belamîs
- waz töhten sie alle genant? -
sie gevielen gar von sîner hant,
des enkunden sie sich niht bewarn.
ze jungeste quam dâ zuo gefarn
herre gâwein und iwein.
ich waene der sunne nie beschein
zwêne bezzer ritter denne sie.
dô sprach her gâwein:< waz ist hie?>
sîn gesellen sprâchen alle:
< mit einem grôzen valle
ist manclîch hie enpfangen.
alsô ist ez uns ergangen.>
dô sprach her gâwein:
< ritter, welt ir mit uns zwein
stechen durch iuwer hövescheit?>
des was daniel bereit.
dô sie des wurden enein,
daniel und her gâwein,
besunder riten sie zehant.
diu ors wurden gewant,
darnâch wart in gehenget
und wurden mit grimme ersprenget.
dô wart mit nîde gespilt.
durch des andern schilt
stach ietweder sîn sper
mit sô manlîcher ger
daz ez zerbrast und zerspranc.
ir ietweders lop dâ niht enhanc:
sie gesâzen beide, als sie wolden
und ouch guote ritter solden.
darnâch hiesch in her iwein.
des wart aber von in zwein
sô sêre gestochen und geriten
daz sie vil kûme vermiten
beide sament daz vallen.
doch gesaz er vor in allen
âne lasterlîchiu mâl.
ze jungste quam her parzivâl
der begunde ouch stechens begern.
daz wart aber zwein spern
an ir ende gewant:
diu zerbrâchen sie zehant
und gesâzen beide vaste.
diu êre diu dem gaste
von den drîn rittern geschach,
daz in der dehein nider stach,
des wâren die andern harte frô:
die dûhten sich deste tiurre dô,
wand er ouch disen vor gesaz.
warumbe tuot diu werlt daz?
swem ein bôsheit geschiht,
der hoert ez gerne unde siht
daz ez ander liuten sam ergê.
in dunket sînes heils deste mê.
dô her daniel gereit
und er die schande alsô vermeit,
daz in dâ nieman niderstach
und man sîn frümekeit gesach,
dô haeten sie in gerne mit in hein,
her gâwein und herre iwein
und der edel ritter parzivâl,
die wâren gar âne valschiu mâl.
daz wart wol schîn under in:
sie riten alle drî hin
und sprâchen:< sît uns wilkomen,
wir hân gesehen und vernomen
daz ir ein guot ritter sît,
daz suln wir lâzen âne nît.
nû ensult ir niht stillen
durch unser aller willen
iuwern gewerp noch iuwern namen.
irn dürfet iuch vor uns niht schamen.
iu ist durch iuwer frümikeit
unser aller dienest vil bereit.>
daniel sprach:< den verbert.
waere ich sô biderbe und sô wert
daz ich volbringen möhte
den dienest der iu töhte,
dâ wolde ich niemer an verzagen.
ich sol iu dienen unde sagen
swes ir von mir geruochet.
daz ich hie hân gesuochet,
des bin ich wol ze ende komen.
ich hân dicke vernomen
tugent unde grôze kraft
von des künigs artûs geselschaft.
daz selbe wolde ouch ich besehen.
ich wil der wârheite jehen,
ich quam umb anders niht her
wan daz ich iuwer hulde ger.
ich bin daniel genant,
der blüejende tal daz ist mîn lant.
daz erbte mich mîn vater an,
der heizet der künic mandogran.>
des wâren die herren alle frô.
danielen enpfiengen sie dô
mit triuwen in ir geselschaft.
diu hâte alsô grôze kraft
daz sie deheiner slahte nôt
gescheiden kunde wan der tôt.
sie riten froelîche dan.
sie hâten funden einen man
von dem der hof was gêret
und ir geselschaft gemêret.
sie quâmen mit fröuden ze hûs.
dô sprach der künic artûs
waz diu rede waere.
dô sagte im diz maere
sîn neve herre gâwein:
< hie komet der besten ritter ein
von dem wir ie gehôrten sagen.
ez was ein saeligez jagen
daz wir hiute tâten.
uns hât got wol berâten.
wir erhuoben mit im unser spil.
des genuzzen wir niht vil:
swie guot unser wille was,
er warf uns al ûf jenez gras.
ich bin den er ouch nider warf.
unser enheiner der endarf
dem andern verwîzen,
ern welle denn sich liugens flîzen.>
daz sprach herre gâwein umbe daz,
möht er in noch gêren baz,
daz haete er gerne getân.
ouch wolde er bezzer lop niht hân
wan als ander sîn gesellen.
ern wolde sich niht zellen
tiurre denne ir dehein,
der edle ritter gâwein.
dô disiu selbe rede ergienc,
der künic artûs enpfienc
danielen alsô wol
sô man vil lieben friunt sol,
dâ man sîn schône enpflegen wil.
sîner fröuden der was vil
daz er dâ wolde belîben.
er hiez den helt schrîben
zehant in sîne geselschaft.
sîn tugent diu hâte grôze kraft
und sîn leben gar ze prîse,
er was aller tugende wîse.
in bevilte keiner geste,
des beleip sîn êre veste.
darnâch in kurzer stunde,
dô die von der tavelrunde
grôze kurzwîle triben,
der sie vil selten âne beliben
sie wâren zallen zîten frô,
eines tages gefuogte ez sich sô
daz man dâ gerne enbizzen waere.
dô was dehein fremde maere
dannoch für den künic komen,
als ir ê hât vernomen,
daz er dâ hoeren solde
ê denn er ezzen wolde.
der beit er harte schône.
dô vil nâch unz ze nône
dur daz selbe was gebiten,
dô quam ûf den hof geriten
ein rise starc unde grôz.
der was gewaefenes blôz,
ern fuorte helm noch halsberc.
daz aller spaeheste werc
daz ieman wirken solde
von sîden und von golde,
daz was des risen gewant.
einen schaft fuorte er an der hant
groezer denn ein wiseboum.
swem er quaeme in sînen troum,
er müese es vorhte enpfâhen.
dô sie in komen sâhen,
des erschrac manic helt vil snelle.
er was sô rehte ungetelle
daz sie sîn schiere hâte bevilt.
ern fuorte ouch deheinen schilt,
er reit mit blôzen henden
ûf einer grôzen olbenden,
diu getruoc in doch vil kûme.
in einem grôzen rûme
reit er durch daz gesinde.
im was diu hût niht linde,
si was herter denn ein horn.
waere im rehte worden zorn,
er haete sie alle wol erslagen.
er erbeizte und begunde sagen
dem künige ein solhez maere
daz sie alle dûhte swaere.
er sprach ze dem künic artûse:
< der künic matûr von clûse
hat mich her ze dir gesant
und haete gerne erkant
wie getân dîn leben waere.
er hât manic edel maere
von dînen tugenden vernomen.
dû bist sô gar vollekomen
alles des diu werlt gert
daz dû in wol dunkes wert
daz dû im dîn lant gebest
und dâ wider niht enstrebest
dû ergebest dich im ze manne
und habest dîn lant danne
von im ze lêhene iemer mê.
die êre gebôt er selten ê
deheinem künige denne dir.
dû solt wol gelouben mir,
mînes herren dinc stât alsô
daz er mac iemer wesen frô
swes er ze manne ruochet
und ez an in gesuochet,
als er hât an dich getân.
daz enwaere niht ergân,
wan daz im ist geseit
vil von dîner frümekeit.
rîcher künige ist harte vil,
der er ze manne niht enwil
und sie es alle hânt gegert.
ir deheiner dunket in des wert
daz er in lâze in sîn lant.
nû hât er mich ze dir gesant
und lât dich sîn lant sehen,
wilt dû sîn ze herren jehen
und habe von im dîn êre.
nû ensûme mich niht mêre:
swes sô dû bedenkest dich,
daz lâ schiere hoeren mich.>
dô sprach der künic artûs:
< mir enquam nie mê ze hûs
dehein seltsaener maere.
weste er daz ich waere
alsô frum sô dû hâst gejehen,
sô möhte er sich wol versehen
daz ich mich dran niht kêrte.
ich wânde, mich baz êrte
daz ich waere alsus frî
und mîn lant mîn eigen sî,
denne ich ez haete von deheinem man.
die wîle daz mirs got gan
von dem hân ich ez ze lêhen,
ich wil es anders nieman flêhen.
geschiht mir nôt deheiner were,
mir bringet ein kreftigez here
mîn bete unde mîn gebot.
friunt, sage mir durch got
von dînes herren lebene
und sage mir ouch vil ebene
von dem lande und von den liuten:
dû solt mir allez tiuten,
swie mir der site gevalle.
sint alsô grôz alle
in dem lande sô dû bist,
sô spriche ich anders, wizze krist,
denne ich noch geredet habe.>
dô sprach der ungefüege knabe:
< ezn getruoc nie künic krône
der alsô rehte schône
lebte sô mîn herre tuot.
sîn lant ist dâvor wol behuot,
im enschadet niht dîn hervart.
daz hât gebirge bewart,
daz gât umbe sîn lant.
ez ist nieman erkant
daz iht lebendez dar über müge
wan ein vogel der dâ flüge.
ein strâze gât durch den berc in,
dâ ich herûz komen bin,
sô man die wil besliezen,
sô lât man nider schiezen
ein grôzen stein dâ füre.
daz ist ein sô getâniu türe,
die hebe ich eine dannen.
mit allen dînen mannen
liezest dû sie stille stân.
diu strâze stât ûf getân
sît ich her ûz geriten bin
unz daz ich kome wider in.
daz lant ist grôz unde wît
und ouch grüene zaller zît.
ich sage niht von den frouwen,
dû solt sie dâ selbe schouwen.
sie sint sô rehte zimelich
daz anders nieman noch ich
ir schoene möhte zende komen.
eines dinges ist dâ war genomen:
daz wirsest getâne wîp
der ist dâ ze lande ir lîp
vil wol den rôsen gelîch.
die frouwen sind sô wunneclîch
und alsô gar geschoenet
daz er wol ist gekroenet
von vrôn saelden gewalt,
er sî junc oder alt,
der sie dâ schouwen getar.
dâ ist der wunsch alsô gar
an dem lîbe und an den siten
daz dâ niht ist vermiten.
ez gewunnen nie wîp
sô gar ûzerwelten lîp.
sie sint baz denne wol getân.
ein vogel heizet babiân,
der hânt die frouwen dâ vil
und swer sie haben wil
dâ enist niht widere,
er hât ein solich gevidere,
ich hoere die frouwen jehen
daz sie sich drinne besehen
als in einem spiegel oder baz.
noch danne sô geniezent sie sîn daz:
ze swelher zît die frouwen
daz wetter wellent schouwen,
sô swebent die vogel ob in.
die hânt die kunst und den sin
daz sie sie vor dem sunnen
vil wol beschirmen kunnen.
nahtes sô man slâfen gât,
swâ der selbe vogel stât
in der kemenâten,
sô ist man des berâten:
man gesiht von ime dar inne
sam ein kerze dâ brinne,
und singet danne schône
in eim sô süezen dône
beidiu naht unde tac
daz man in gerne hoeren mac.
mîn herre ist manges gêret:
swâ er sô hin kêret,
swie grôze tageweide er rite,
sîn hûs gât im alles mite.
die êre hât dehein künic mê
daz sîn hûs mit im gê.
diz dunket dich lîhte spaehe,
wand dû ez nie niht gesaehe.
ez geschiht âne grôzen list,
und sage dir rehte wie ez ist:
ein tier daz heizet helfant,
daz enist dir niht wol erkant,
des kraft ist sô staete,
swer kunde mit geraete
einen berc darûf geladen,
daz enmöhte im niht geschaden,
ezn würde niemer müede.
swie vil man darûf lüede,
ez gebüeget niemer sîniu bein.
ez ist der groesten tier ein
daz diu erde ie getruoc.
von sîner huf unz an den buoc
ist zwelf klâfter unde mê.
ez getuot im niemer wê
swie vil man darûf geladen mac.
ez stât naht unde tac.
daz trîbet man swâ man hin wil.
sîner krefte ist alsô vil,
ez enstirbet von keiner slahte nôt,
man enwelle im gerne tuon den tôt.
nû sint meister in dem lande
sie heizent der helfande
zwên zesamen füeren,
daz sie sich niht mugen berüeren.
sie heizent den walt vellen
und machent vil staete swellen
und füegent die daruf
zwischen den bûch und die huf.
swaz ir dâ geligen mac,
daz wert êwigen tac,
sie bindent ez sô vaste
daz ez von deheiner laste
niemer mac gewîchen,
dem kunde niht gelîchen,
der site ist dâ der beste
und setzent darûf veste
beidiu von marmelstein
und ouch von helfenbein.
sie legent daran wunder,
von golde dar under
mangen list waehe.
ezn wart nie werc sô spaehe
von voglen und von tieren,
strîten und turnieren,
tanzen unde schouwen,
höveschen zuo den frouwen:
daz ist daran ergraben,
getiutet mit den buochstaben.
der hûse hât mîn herre vil,
der volget im swelhez er wil.
ezn wart nie künic sô rîche
der alsô wunneclîche
haete allen sînen gewalt.
sîn kurzwîle ist manicvalt:
dâ ist alle tage hôchzît.
daz lant ist grôz unde wît.
die daz hânt besezzen,
er hât sich des vermezzen,
die rûmen im daz rîche
ob sie im vil vorhtlîche
niht welnt dienen unde flêhen.
er hât in gelihen lêhen
daz ir dienest sî bewant.
er hât allez sîn lant
geteilt an siben schar.
der muoz teglîch einiu dar
rîten und turnieren.
dâ siht man walopieren
mangen ritter waehe.
dâ wirt mit grôzer spaehe
beidiu gebâret und geriten.
man siht mit ritterlîchen siten
mangen strîten nâch lobe
in der wîse sam er tobe.
man hoert dâ swert erklingen
und siht die helde dringen
nâch werltlîchem lône.
sien hânt deheine schône,
sie erfollent den muot nâch ir staten.
desn kan sie nieman gesaten.
diz müezen ouch dâ schouwen
fünf hundert juncfrouwen
an einem anger grüene.
daz machet die ritter küene.
die frouwen sitzen oder stân,
ob ieclîcher swebt ein babiân
und machet ir grôzen schate.
daz ist ze fröude guotiu state
und aller werlt wunne vil.
sô diz ritterlîche spil
eine wîle gewert,
âne sper und âne swert
wirt ein kurzewîle nâch.
von den orsen wirt in gâch,
schiere entwâfent sie sich.
sô gâhet maneclich,
sie legent ir hovekleider an
und gânt mit fröuden von dan
höveschen zuo den frouwen.
dâ mac man fröude schouwen,
dâ wirt tanzen unde singen
und an vil mangen dingen
ein wunneclîchez hôchzît.
man gît fröude widerstrît.
dâ vindet ieclîch man
swelher kurzwîl er kan.
darnâch in kurzen zîten
hebt sich aber daz strîten,
justieren unde stechen.
man siht dâ schefte brechen
durch der frouwen êre,
mit guotem vlîze sêre
nâch ir hulden strîten.
sô gelît aber daz rîten,
sie beginnent swes der man wil.
daz rîten und daz hovespil
ist dâ drî stunt an dem tage
dâ liget prîs an ir bejage,
wand ir muot ze fröuden stât,
unz der âbent ane gât,
sô scheidet sich diu ritterschaft.
morgen kumt mit grôzer kraft
ein alsô hêrlîchiu dar
und vertrîbent aber den tac gar
in dem selben schalle.
sus koment die wochen alle
ie des tages ein niuwiu schar.
sô bringent aber die êrsten dar
vil manic edel zimier,
beidiu vogel unde tier,
von golde und von gesteine.
dem lande al gemeine
ist ein gebot gegeben
über guot unde leben
daz nieman sol beschouwen
deheine juncfrouwen
in ir vater gewalt:
sô si wirt aht jâr alt,
sô muoz er sie ze hove geben
daz si diz minneclîche leben
helfe volbringen.
an sô getânen dingen
stât al mînes herren leben:
dâ wil er ieclîcher geben
ze swem si sich gesellet,
der ir aller bast gevellet.
mîn herre hât grôze herschaft,
sîn tugent und sîn lîbes kraft
ist allen künigen tiure.
die noch nâch âventiure
in daz lant ie geriten
und mînes herren gebiten,
den was ir tôt dô beschert.
dâ ist bevangen ein wert
mit einer linden ziere.
gelîch eime grimmen tiere
stât ein golt dar under,
daz hât durch ein wunder
in sînem munt ein banier.
ein wazzer fliuzet durch daz tier
daz ein list darzuo betwinget
daz ez wint dar in bringet.
dâ lît an grôz meisterschaft.
ez hât von listen soliche kraft,
swer sich selber sô betrüge
daz er die banier ûz züge,
dem waere ez an den lîp gewant:
sô hüebe daz tier al zehant
und schriuwe mit grimme
ein alsô grôze stimme
daz er von dem orse viele zetal.
darzuo betwinget in der schal.
darnâch komet mîn herre.
waere er danne merre
denne ein berc, er waere verlorn,
sô grimme ist mînes herren zorn.
der meister der daz tier gôz,
der hât mich gemachet sus grôz
und einen bruoder den ich hân.
darumbe hât erz getân,
wir sint beidiu sîniu kint.
wand die triuwe grôz sint
der er uns beiden schuldic ist,
darumbe hât uns sîn list
gemachet beidiu alsô hart
daz unser ietweder nie wunt wart.
er hât mir selbe gezalt
er sî wol hundert jâr alt,
und ist noch alsô snel,
swaz ie fleisch oder vel
ûf erde ie gewan,
dazn möhte dem selben man
entloufen noch entrinnen.
ich bin wol worden innen,
swie alt er wider mir sî
und swie kleine dâ bî,
daz er sterker denne ich ist
und kan mangen guoten list.
daz ist an sînen kinden schîn.
beidiu ich und der bruoder mîn,
wir hân dicke gestriten
und wurden nie versniten
von stichen noch von slegen.
dû gihst, dû mügest wol erwegen
mangen ritter umbez mere:
nû enger ich deheiner were
wan mîner hende alsô blôz.
waere dîn her alsô grôz
daz dû sîn niht möhtest über sehen,
in müese der tôt von mir geschehen.
von diu lâ gar dû dîn dröuwen.
dû maht dich balde fröuwen
daz dû mînen herren sehen muost.
ob dû ez niht vil gerne tuost,
dû verliusest dîn êre gar:
ich vâch dich und füere dich dar
und rihte über dich zehant
und gibe danne dîn lant
einem anderen man,
swem es mîn herre wol gan.
nû enhân ich niht verdaget,
ich hân dirz allez gesaget
beidiu übel unde guot.
nû sage mir schiere dînen muot.
ichn kome niht von dir,
dû muost dâ hin mit mir.>
dô nam der künic artûs
die wîsen alle dâ ze hûs
und gienc mit den ze râte.
ungefrâget sprâchen drâte
die tumben jungelinge:
< swie uns daran gelinge,
dirre ungefüege vâlant
geseit ez niemer in sîn lant
daz er hiute vor iu stât
und sô gewalteclîche hât
geworben und gesprochen:
daz wirt hie zehant gerochen,
ez envolget im niht dar hein.>
dô sprach der herre gâwein:
< disiu rede und diser rât
den ir nû getân hât,
der mac uns niht ze êre komen.
ir hât doch alle wol vernomen
daz in nieman mac erlegen
weder mit stiche oder mit slegen,
mit schuzzen noch mit würfen.
entriuwen wir bedürfen
vil guotes râtes darzuo.
ich râte daz mîn herre tuo
als er der rede frô sî,
und bedenke dâ bî
wie wir diz leit gerechen.
mîn herre der sol sprechen,
er welle dar gerne rîten,
und sol in des biten bîten
niht wan dise wochen,
unz er daz habe gesprochen;
sô biten wir in alle
daz er uns des niht enpfalle,
mîn herre habe geselleschaft.
die hân an triuwen grôze kraft,
nach den sul er senden
daz sie mit im genenden.
sie hân ein ander gesworn,
ez sî êre oder zorn,
oder swaz er welle angên,
daz sie daz alle bestên.
die sul er mit füeren dar:
diu êre die im dâ wider var,
die müezen sie alle angân.
diz waere uns laster getân
ob wir ein boten slüegen.
kunden wirz wol gefüegen
daz wir im naemen daz leben,
sô wolde ich doch dâ wider streben.
zwâre waere er iezuo erslagen,
daz wolde ich iemer gote klagen,
sô wîste uns nieman in daz lant.
ir sult des alle sîn gemant,
ob wir daz lant beschouwen,
mugen wir in niht verhouwen,
sô râmen wir im der ougen.
wir machen im tougen
beidiu daz lieht und den tac,
weder im stich oder slac
rehte drin wirt gegeben.
mugen wir im daz leben
niht vol abgeziehen,
sô sullen wir von im fliehen.
ern mac uns niht vil geschaden
ob er der ougen wirt entladen.
sô sullen wir niht erwinden,
wir heben uns zuo der linden
und sullen daz tier erschreigen
und ouch vil rehte seigen.
und kome sîn geselle dar,
wir nemen im ouch der ougen war.
werdent sie beidiu dâvon erlôst,
ez benimt dem künige gar den trôst.>
daz her gâwein dô geriet,
daz dûhte den künic und die diet
ritterlîch unde guot.
sie hâten alle den muot
daz sie dâ ruom erwürben
oder nâch êren stürben.
der künic an sînem stuole saz,
er sprach:< mir geviel nie niht baz
denne daz dû hâst gesprochen.
nû beite eht dise wochen.
ich und mîn geselleschaft
wir hân triuwen grôze kraft.
die muoz ich zesemen bringen
daz ich an disen dingen
mîne triuwe bewar,
swaz êren mir dâwider var,
daz ouch in diu müeze geschehen.
sie sullen ez alle ansehen
swenne ich lîp unde lant
gibe in dînes herren hant,
daz sie sîn man werden als ich.
ritter guot, nû bite ich dich
daz dû hie belîbest siben naht,
wand dû daz wol wizzen maht:
swenne ich nû braeche mînen eit,
mîn triuwe und mîn wârheit,
die ich mînen gesellen hân gelobt,
sô haete ich harte getobt.
waz töhte ich ze manne
deheinem herren danne,
sô ich mîn triuwe verlüre
und mîne gesellen verküre?
ich wolde mich iemer schamen,
sît er erkennet mînen namen
und sô vil hât von mir vernomen,
saehe er mich sô swache komen.
sît ich dunke in sô frome,
nû geschaffe ich gerne daz ich sô kome
daz er der wârheit müeze jehen.
sît mir diu êre dâ sol geschehen,
nû wil ich alsô dar draben
daz er ouch mîn müge êre haben.
ez enzimt mir niht wol
daz ich dise pfingsten sol
âne hôchzît belîben:
daz sol er mir vertrîben
mit sîner grôzen wirdekeit.
ez was ie mîn gewonheit,
nû wil ich ez lân durch in.
ich rîte gerne dâ hin,
ich bin der rede harte frô.>
des bâten die ritter alle dô
daz er siben naht wolde bîten,
sô wolden sie mit im rîten.
sô lange enpflâgen sie der bete
unz er nâch ir willen tete
und sprach, als ich iu sage:
< ich wil hie belîben siben tage,
sît ez dir sô liep ist.
swaz dû in der selben frist
ritter maht gewinnen,
die füere mit dir hinnen.
daz ist mînes herren spil.
dû gewinnest ir nie sô vil
sien müezen sich ergeben
oder verliesen ir leben.
desn mugen sie niht gewenken.
dû endarft des niht gedenken
daz dich iemer dehein were
vor mînem herren genere.
erhebt er deheinen zorn,
sô sît ir alle verlorn.>
dô der rise diz gesprach
und in des allen verjach
er wolde die wochen belîben,
der künic hiez briefe schrîben,
die wurden schiere gesant.
über allez sîn lant
beidiu er bat und enbôt,
er suochte friunde, im waere nôt
hilfe unde grôzer kraft.
swer deheine geselleschaft
wider in gelobet haete,
solde des wesen staete,
daz müeze er nû machen niuwe.
er wolde ir aller triuwe
suochen und besehen,
im waere alsô beschehen
daz er bedörfte guoter were.
sus gewan der künic artûs ein here,
daz nie künic mê gewan
sô mangen ûzerwelten man.
doch dûhte in daz ein unheil:
sîner gesellen was ein teil
nâch âventiure geriten,
der haete er gerne gebiten
oder nâch in gesant.
dô wâren sie gewant
mangen unkunden wec,
lanzelet und erec
unde noch der genuoc,
die ir muot nâch êren truoc.
dô der künic artûs
den grôzen risen dâ ze hûs
ein wochen haben solde
ê er mit im rîten wolde,
nû hâte er ein gesellen
den sîn baldez ellen
sô sêre der verte twanc
daz in diu woche dûhte ze lanc
und im daz twelen niht wol geviel.
daz was der ritter daniel
von dem blüejenden tal.
ûz dem hove er sich stal
unz hin für daz bürgetor:
dô kêrte er ûf daz spor
dâ er des risen slac sach.
in sînem herzen er jach:
< ichn wil niht erwinden,
kum ich hin zuo der linden,
ich enziehe ûz die banier
und schreie daz tier.
kumt der künic matûr,
ez werde süeze oder sûr,
er wirt von mir bestanden.
ich wil von sînen handen
dulden schaden oder fromen
und wil des ze einem ende komen
ob er des landes wert sî.
ich versuoche dâ bî
ob ich mînem herren müge sagen
daz er im sul vertragen
sus getâne hôchvart.>
des âbendes dô ez naht wart
und er der slâ niht mêre sach,
des muose er schaffen sîn gemach.
daz gemach leit er âne danc,
in gedûhte nie kein naht sô lanc.
des morgens vil fruo
reit er sîner slâ zuo
und reit dem huofslage nâch.
im was zuo der verte gâch
unz ez aber naht wart.
des muoste er lengen sîn vart
unz an den dritten morgen.
dô wart im unverborgen
ein vil grôziu arbeit.
gegen einem berge er dô reit,
der was stechel unde hôch.
wan daz der wec dar durch zôch,
ez enwürde niemer maere
waz landes innerhalp waere.
nû sach er her unde dar
und wart schiere gewar
daz er durch den berc solde,
ob er in daz lant wolde,
dâ er daz tier solde sehen.
im was vil liebe geschehen
daz im daz lant sô nâhet.
mit vlîze er für sich gâhet,
er entsaz kein ungemach,
unz daz er daz loch gesach.
dô sach er dâ sitzen
den er wol mohte entsitzen,
ein vil micheln risen.
dô gedâhte er an disen
des vart er dâ hinnâch jagte,
der vor dem künic sagte
daz er einen bruoder haete
dem nieman niht entaete
mit keinem gesmîde.
er dâhte:< ob ich vermîde
daz ich nicht vol rîte
und mit dem risen strîte,
sô verliuse ich niht mêre
wan mîn arbeit und mîn êre.
swenn ich hernâch selbe sage
daz ich vor vorhten sus verzage
und niht tar geschouwen
ob in ieman mac verhouwen -
swenn ich daz niht kan gesagen,
sô hât man mich für einen zagen.
rîte ich nû durch daz dar
daz ich die wârheit ervar,
wil in daz swert niht snîden,
sô muoz ich von im lîden
beidiu laster und den tôt:
mir waere guotes râtes nôt.>
sus gewan er mangen gedanc,
als in diu nôt darzuo twanc.
dô vienc er eines lewen muot:
< ezn ist ze nihte guot
daz ich erschricke als ein wîp.
ich wil gerner mînen lîp
frümeclîche komen abe
denn ich in mit schanden iemer habe:
ich enkunde niemer mîn leben
an die wâge gegeben
ûf groezern prîs.
mich troestet wol in zwei wîs
mînes herzen lêre:
ich hân es iemer êre
ist daz mir gelinget.
ob er mich betwinget,
dâ ist mîn laster kleine bî.
swie grôz mîn schade danne sî,
daz muoz allez beschehen.
ich würde gerne gesehen
an dem schaden und in êren
ê ich hinnen welle kêren
sunder strît und âne schaden,
darzuo mit schanden dâ beladen.
ich valle oder ich wil in vellen.
waeren mîn gesellen
alle sament komen her,
sô wolde ich doch wesen der
der des strîtes begunde
ob ichz gefüegen kunde.
waere ich danne darzuo guot,
sô hân ich nû den selben muot
und hân ouch die selben kraft.
wirde ich nû niht sigehaft
und scheidet er nû von mir gesunt,
dôn kunde er doch niht werden wunt
von al des küniges artûs her.
ich wil sehen wie er sich wer.>
er erbeizte und er gurte dem orse baz
und gebârte, dô er ûf saz,
solde er al die werlt bestanden hân,
er haete wol dem gelîch getân.
die gebaerde sach ein frouwe gar
und nam ir vil rehte war.
diu stuont bî einem boume
und hafte mit dem zoume
ir pfert ze einem aste.
dô gâhte si vaste
dâ si danielen sach.
si gruozte in. dô si daz gesprach,
nû viel si im ze fuoze.
< waz tiutent soliche gruoze?>
sprach der ritter gemeit.
im was daz harte leit
daz si im ze fuoz gevallen was.
er erbeizte nider an daz gras
und wolde ir ûf geholfen hân.
dô hâte schiere er sich entstân
daz ir ein herzeleit war.
si wart mit alle tôtvar,
daz si ensach noch sprach.
si lac daz er sich versach
daz si niht lenger möhte leben
und sich des lîbes haete ergeben.
daz si niht mohte sprechen,
des wânde sîn herze brechen.
er wolde balde sîn geriten
und mit dem risen hân gestriten.
den wolde er gerne hân gezemet.
sîn muot was vaste ûf in ergremet.
er dâhte in sînem sinnen:
< ich scheide mit schanden hinnen
swenn ich niht kan gesagen
ob disiu frouwe welle klagen
oder waz ir werre,
sît si sich hât sô verre
gediemüetiget gegen mir.
ich sihe wol an ir,
si hât grôzen gewalt
unde leit manicvalt.
daz hât si hie bescheinet.
sône weiz ich waz si meinet.
weste aber ichz nû vil wol,
sît ich mit dem risen strîten sol,
wirt mir dâ der lîp genomen,
sôn kunde ich ir niht ze trôste komen.
ich wil zem êrsten besehen
waz mir dâ müge beschehen.
gelît er vor mir tôt
âne mînes lîbes nôt,
sô wil ich danne rîten her
und hoeren wes si ger.
sô waere ich der swachest man
der ritters namen ie gewan,
sît ein frouwe geruochet
daz si gnâde suochet
sô jaemerlîche zuo mir,
gerite ich iemer von ir,
ichn gehôrte doch ir ungemach.
mîn êre ist noch danne swach,
sô ich gehoere wes si gert,
wirt si es niht von mir gewert.>
sus saz er zuo der erden
und wolde innen werden
waz der frouwen waere.
sîner angestlîchen gebaere
hâte er sich dô geloubet.
er nam der frouwen houbet
und leite ez ûf sîne schôz.
ir ungehabe was grôz,
unz er ein wîle gesaz,
dô wart ir ein wênic baz.
si rihte sich ûf unde sprach:
< herre, umbe diz gemach
friste iu got êre und lîp.
ez enwart nie kein armez wîp
gnâde alsô gar benomen,
und bin an iuwer gnâde komen.
irn möhtet dehein wîs
iuwer saelde und iuwern prîs
baz gemêren denne an mir,
wand ich aller gnâde gar enbir.>
er sprach:< frouwe, daz ist mir leit,
und sage iu mit der wârheit,
ich hân unmuoze vil genomen.
mac aber ich iu ze trôste komen,
daz enwil ich niht nider legen
unz ich ein âder mac geregen.>
des gnâdet si im vil verre,
si sprach:< mîn kumber und mîn werre,
der ist sô ungefüege
daz ich es iu niht gewüege,
wan daz ich gewar wart
daz ir woldet eine vart
dâ iuch nieman haete ernert:
iu müeste der tôt sîn beschert.
verlieset ir durch mich daz leben,
sît ir ez haetet hin gegeben,
mîn sünde sol dester minder wesen.
irn möhtet hie niht sîn genesen.
des risen hût ist sô hart,
swaz er ie geschozzen wart,
geslagen oder gestochen,
daz si nie enwart zerbrochen
gegen einem hâre.
swie harte man es vâre,
in bestât nieman sô frome
der lebendic von im kome.
vernemet, lieber herre,
durch got waz mir werre,
wie grôz mîn ungenâde sint.
ich bin des herzogen kint
von dem trüeben berge
und bin von einem getwerge
komen in sô grôze nôt
daz mir tûsent stunt der tôt
lieber waere denn daz leben.
wolde mir den got geben,
sô taete er, lieber her, wol,
sît ich diz laster dulden sol.
daz getwerc begunde mîn gern.
desn wolde ez mîn vater niht wern.
er begunde mit haz dar wider streben
und wolde mich mînem gnôzen geben.
er enhâte niht kindes mêre.
ich möhte an grôze êre
mit staten sîn bekomen.
daz ist nû mir benomen.
dô ez der bete vil begie
und ez daz aber niht verfie,
des wart sîn drô harte grôz
unz mînen vater des bedrôz.
der klagte ez den sînen
und liez ouch selber schînen
daz er unverzagt was:
er reit zuo im an daz gras.
den hât mir daz getwerc erslagen,
daz wil ich iemer gote klagen.
die in dâ rechen wolden,
als sie von rehte solden,
die gelâgen alle dâ tôt.
dô mîn muoter dise nôt
an der zinne gesach,
von jâmer ir daz herze brach
und starp von dem leide.
alsô verlôs ich sie beide.
dô mir diz grôz ungemach
von dem twerge geschach
und ez noch danne umb mich warp,
daz ich vor leit niht enstarp,
desn wirt mîn herze niemer frô.
von dem zorne tet ich dô
in diu lant maere:
swer sô saelic waere
daz er daz twerc erslüege
und daz houpt für mich trüege,
swie swache er waere geborn,
der würde ze herren erkorn
über mich und über mîn lant.
dô man daz maere bevant,
dô quam manic fromer man.
swer ie nâch êren muot gewan
und ez vernam, der quam dar.
dar wart ein sô grôziu var
daz ichz iu niemer kan gesagen.
diu wurden alle sô gar erslagen
daz ir deheiner genas.
der sô unverzagt was
an dem lîbe und an der frümikeit
daz er daz twerc nie vermeit,
die sint des tôdes gewert.
daz twerge hât ein solh swert
dâ nieman vor genesen kan.
swer wâfente einen man
in zwelf halsperge,
der enmöhte von dem twerge
eines slages niht gestân.
daz twerc heizet jurân.
nû bin ich durch daz her komen
ich hân dicke vernomen
daz nie nieman her quam
wan der sîn ende hie nam
ob ich den hie kunde erwerben
der dort wolde sterben
ein wênic gerner denne hie.
nû half doch got den rehten ie:
daz würde villîhte sîn gewin,
sît ich sus sô gar unschuldic bin.
swen got des siges dâ gewert,
dem wirt ein sô getânez swert
dâmit er wol erslüege
dise risen ungefüege,
die alliu wâfen hânt vermiten
daz sie nie wurden versniten.
ez enwart nie stein sô herte,
der sich dem swerte erwerte,
ezn zersnite in als ein holz.
des ist daz twerc vil stolz
daz ez giht, helfe im sîn lîp,
ich müeze werden sîn wîp.
sît ichz sô ungerne tuo,
ez welle mich twingen darzuo
daz ich ze jungste müeze
vallen für sîne füeze.
swenne ez mich darzuo getrîbe,
sôn welle ez mîn niht ze wîbe
wan zwô naht oder drî.
mîn burc und swaz darûf sî,
daz müeze ich verloren hân
und nackent darabe gân,
und swert mir grôze eide,
swenne ich sô dannen scheide,
daz sol ich vil gewis hân,
sô welle ez mich anegân
mit birkînen ruoten
unz ich beginne bluoten;
swaz ich iendert hûte habe,
die slahe ez mir gar abe
über allen mînen lîp
ich vil unsaelic wîp,
wie sol ich daz erlîden!;
ez welle mir abesnîden
beidiu nasen unde munt;
ez schende mich unz an die stunt
daz mich nieman gerne sehe,
ezn sî daz im geschehe
in kurzen zîten etwaz
daz ich getroestet werde baz,
ich tuo mir selber ê den tôt
ê ich gebeite solicher nôt.>
dô her daniel vernam
diu maere alsô freissam
daz der rise sô hart was
daz nieman vor im genas,
und daz twerc ein swert truoc
dâmit ez alle die ersluoc
die im quâmen ze slage,
und ouch hôrte an ir klage
daz si sô was überladen
mit herzeleit und mit schaden,
er dâhte in sînem muote:
< kunde ich nû lêre guote,
daz waere mir ein saelikeit.
ich waene darnâch ich ûz reit,
des wil mir volliu hant komen.
ich hân beidiu wol vernomen,
ich endarf hie niht strîten
noch mit der frouwen rîten.
ez enmuoz ein grôz heil wesen,
sol ich vor den genesen
die sô getânen mort tuont
daz sie nieman bestuont,
wan der den tôt hât erliten.
ich bin ze fruo ûz geriten.
owê! waere ich dâ heime noch!
ich enquam nie in leider loch,
daz wizze got der rîche.
nû denke ich boeslîche:
swie lange ich stille laege
und mînes gemaches pflaege,
sô kunde niht von mir geschehen
daz man mir möhte gejehen
deheiner frümekeite.
waz ob ich gearbeite
ze disen zîten sô wol
daz ez mich iemer helfen sol!
mac aber des niht ergân,
sô ist mir bezzer getân,
als ez mir nû gewant ist
daz ich den lîp in kurzer frist
frümeclîche ûf gebe
denn ich mit schanden iemer lebe.>
des lîbes er sich bewac und sprach:
< frouwe, iuwer ungemach
müejet mich und iuwer nôt.
ich wil gewisselîche tôt
durch iuwer unschulde ligen
oder dem twerc angesigen.
rîtet für und wîset mich.
ezn ist nie sô angestlich
ichn welle ez gerne bestân,
sît ez iu sus leide hât getân.>
diu frouwe gnâdet im aber dô
und was des trôstes harte frô.
doch weinte si ir ungemach
und ouch daz si sich versach
daz si an im muoste sehen
daz in allen was geschehen
die daz twerc ie ersluoc.
sus hâte si leides gnuoc.
dô wart lenger niht gebiten,
si sâzen ûf unde riten.
die frouwen twanc ir herzeleit
daz si vil trûrenclîche reit.
daz was danielen ungemach.
er wolde sie troesten unde sprach:
< frouwe, getrûwet ez gote
daz ich mit sînem gebote
überwinde daz twerc.
got minnet sô sêre rehtiu werc
daz ir gewis muget wesen,
wir sullen wol vor im genesen.>
die frouwen trôste daz.
si gehabte sich ein wênic baz
denne ir ze muote waere.
ir herze was vil swaere,
sô sêre rou sie sîn tôt.
ouch erbarmete in ir nôt.
sus was ir deweders muot
ze fröuden dehein guot
und fröuten sich beidiu über maht.
sie riten den tac unz an die naht.
dô quâmen sie dar sie wolden
und ouch von rehte solden,
ze der frouwen heimüete.
mit vil grôzer güete
wurden sie beide enpfangen.
gegen in quam gegangen
wol sehzic juncfrouwen.
ouch mac man dâ wunder schouwen,
vil ritter unde knehte,
die enpfiengen nâch ir rehte
beide die frouwen und den gast.
wan daz dâ fröude gebrast,
dâ was anders al diu êre
die dehein man mêre
ûf dem deheines hûse gesach.
nû wart ir aller ungemach
aber groezer denne ê:
in tet ir herze alsô wê
dô sie den ritter sâhen,
daz sie des alle jâhen,
würde er dâ erslagen,
sie wolden in iemer klagen.
des was ir jâmer alsô grôz
daz nie dehein sîn genôz
lebende baz wart geklaget.
sie wâren daran verzaget
daz er behielte den lîp.
der frouwen liebsten wîp,
die ir wol getorsten râten,
mit flîze sie sie dô bâten:
der ritter waere sô wol getân,
si solde in des gerne erlân
daz er den lîp dâ niht verlüre,
daz si in ir ze einem herren erküre
er gezaeme wol ir êren
und in niemer lieze kêren
für die herberge.
sie getrûten von dem twerge
die burc iemer wol bewarn.
den schaden müesten sie lân varn
den ez in dâ ûzen taete.
daz si in hinnen bî ir haete,
si verklagte wol ir ungemach.
diu frouwe froelîche sprach:
< daz naeme ich vil gerne alsô
und waere der rede iemer frô,
möhten wirs in überkomen.
nû hât er den strît genomen
alsô sêre in sînen muot
daz ers leider niht entuot.>
dô man ezzen solde gân,
dô wart ein dienest getân
den er wol nemen mohte.
swaz ze wirtschefte tohte,
des wart wunder für getragen.
ich mac iu lîhte sagen,
dô in an der state niht gebrast
und in ouch allen der gast
alsô rehte liep was,
daz er des nahtes wol genas.
sie zeigten im willigen muot,
darzuo werc alsô guot
daz er sich schiere bewac,
gelebte er iemer den tac,
er gediente die herberge
oder er stürbe von dem twerge.
des nahtes hâte er guot gemach
unz er den morgen ersach.
ein messe hôrte er fruo
und bereite sich darzuo,
er wolde kempfen an daz twerc
und ouch vil ritterlîchiu werc
des tages lâzen schouwen.
dô sprach er zuo der frouwen
von dem trüeben berge:
< enbietet dem twerge
daz ez kume, ir welt ez gesehen.
swes ir mich danne hoeret jehen,
des sult ir alles sîn gereit.
dem man ist dicke diu wîsheit
ze mangen dingen harte guot,
daz er mit sterke niht entuot.>
nâch dem twerge wart gesant.
dô gie daniel zehant
mit der frouwen an die zinnen
und wolde werden innen
ob er mit deheinen listen
sîn leben kunde gefristen.
daz twerge sach er dort her gân,
daz was geheizen jurân.
ez gie zuo dem bürgetor,
dâ begunde ez frâgen vor
waz sîn frouwe wolde,
ob ez iemer solde
ir hulde gewinnen.
< jâ,> sprach von der zinnen
her daniel zehant,
< mîner frouwen lîp und lant
ist allez iuwer eigen
ob ir wellet zeigen
dehein iuwer frümekeit.
iu ist ir minne bereit:
lâzet ir die sie sehen,
sô wil sie iuwer ze herren jehen.>
daz twerc antwurt im alsô:
< der rede waere ich iemer frô,
kunde ich mîner schulde
komen an ir hulde.
swaz si mir für gelegen kan,
dâmit iemer dehein man
frümekeit erzeigen sol,
daz tuon ich gerne unde wol.>
daniel sprach fürbaz:
< mîn frouwe hât gelobet daz,
si lâze disen zorn sîn
darumbe daz ir tuot schîn
ob ir sît der êren wert.
leget von iu iuwer swert
und nemt daz beste daz hie sî,
und bestât danne dâ bî
den aller swachesten man
den mîn frouwe geleisten kan.
muget ir an dem gesigen,
mîn frouwe lât den strît ligen
und tuot allez des ir gert.
man zîhet es nieman denn daz swert
swaz ir mordes hât getân,
dâ enkunde niht vor gestân.
nû lât mîne frouwen
und ouch ir gesinde schouwen
ob ir âne daz swert
einen man des tôdes wert.
swaz ir dan welt, daz si getân.>
dô sprach daz twerc jurân:
< hân ich dan ir hulde wol
ob ich den sic an im erhol?>
diu frouwe sprach iesâ
harte froelîche:< jâ!
gewinnet ir im den lîp abe,
sô gebietet über allez daz ich habe.>
dô sprach daz twerc jurân:
< sô wil ich gerne bestân
iuwern aller tiursten helt.
swen ir darzuo hât erwelt,
dem muoz der tôt geschehen.
ich wil iuch lâzen sehen
daz dehein mîn frümekeit
an daz swert ist geleit,
daz ichz an mînem lîp hân.
heizet ir mich daz swert ligen lân
und nemen einen stecken,
des enwolde ich niht erschrecken,
noch dan getrûwete ich mîner kraft,
ich würde an im wol sigehaft.
waere er sterker denne samsôn,
ich bestüenden umbe solichen lôn.>
hie erzeigte frou minne
daz er vil starker sinne
in einem staeten muote hât
den si des niht über gât
daz er diene nâch ir lône.
daz si mit salomône
harte wol erziugen kan:
der was der witzigeste man
von dem ich ie gesagen hôrte,
unz daz si im zerstôrte
die wîsheit und die sinne.
daz selp hat frô minne
vil mangem werden man getân.
es endarf iuch niht wunder hân
daz si hie wart sigehaft.
an swen si leget ir kraft,
der muoz ir sîn undertân.
daz selbe tet her jurân,
er gap sich in ir gebot.
in dûhte daz unser her got
deheinen engel möhte hân
alsô rehte wol getân
sam die frouwen die er dâ sach.
daz wort er lachende sprach:
< ich tuon gerne des ir gert.>
abe strickte er sîn swert
und truoc ez verre hin dan,
daz sie ez alle sâhen an,
und leite ez zuo der erden:
< ich wil des innen werden,>
sprach daz twerc jurân,
< wer mich turre bestân.
ez diuhte mich ein senftiu nôt,>
daz si sprach, swenne er den tôt
einem man getaete,
daz er ir hulde haete.
er gie her zuo dem burctor,
dâ machete er einen kreiz vor
darinne sie vehten solden,
ob sie zesemen wolden.
die porte sach man ûf getân.
dô sach er zuo im gân
danielen von dem blüenden tal.
er gap im zweier swerte wal.
er nam daz im dâ baz geviel,
daz ander nam her daniel.
sie trâten beide in den rinc.
dô wart gelobt ein dinc:
man beslôz daz burctor
und liez dâ nieman dâvor
wan danielen und daz twerc.
die begunden manlîchiu werc
beidiu sament wîsen.
sie wolden daz îsen
mit den schilden fristen.
dô gienc ez ûz den listen.
ir slege wâren sô grôz
daz sie der schilte wurden blôz
in einer wêniger zît.
dô wart ein sô getâner strît
daz sie des alle jâhen
die ez hôrten unde sâhen,
ir deweder möhte genesen,
ez müeste ir beider tôt wesen.
mit grimme bûten sie den kreiz.
ir ietweder sich vaste fleiz
ûf des anderen tôt.
daz fiur lieht unde rôt
sach man von den helmen springen
dô diu swert begunden klingen
diu sie in den henden truogen
und ûf die helme sluogen
und ûf die halsperge.
sie wunschten dem twerge
des valles alle gelîche.
sie bâten got vil minneclîche
durch sîne hêren namen drî
daz er dem rehten stüende bî,
und ez got enden wolde,
als er von rehte solde.
dô sprach der twerc jurân:
< frouwe, diz sî durch dich getân!>
danielen ez sluoc
ûf den helm den er truoc,
daz im sîn swert enzwei brast.
dar under gap ouch im der gast
einen freislîchen slac,
daz ez ûf der erden glac.
und ez daz swert niht ensneit,
daz was danielen leit.
daz twerc was grimme unde karc
und was ouch âne mâzen starc.
dô ez sich des slages erholde
und wider ûf wolde,
dô sluoc ez aber daniel
daz ez wider ûf diu knie viel,
und gap im harte schiere
grôzer slege wol viere.
diz was wunders gnuoc:
swie vil er ûf ez gesluoc,
er versneit weder helm noch halsperc.
ûf spranc aber daz twerc,
ez vergaz sîner zuht,
balde huop ez die fluht
gegen sînem swerte,
wande ez des lîbes gerte.
des wart daniel gewar,
er huop sich gâhende dar.
sie wâren beide an der vart.
hei! welh ein loufen wart!
nû enwart nie wille sô guot
den man âne state tuot,
diu state enhelfe verre baz
ist der wille niht ze laz.
sie liefen vaste für sich.
ir beider wille was gelich:
dâ was einhalp diu state,
des was der ander ein schate,
der âne helfe dâ ranc.
swaz er sich selbe getwanc,
ern mohte niht wider zwein,
als ez an danielen schein:
im wâren diu bein alsô lanc
daz er daz twerc für spranc
und im daz selbe swert wart.
dô wart ez lenger niht gespart,
als im diu êre geschach,
er zuckte ez ûz unde sprach:
< wiltû iht lenger leben,
sô muost dû dich gevangen geben
in mîner frouwen gewalt.>
nû was daz twerc alsô balt
daz ez den tôt niht entsaz
und gar vor leide vergaz
aller sîner sinne
durch des swertes minne.
ez weste sich sô manhaft
daz ez im mit sîner kraft
daz swert wolde hân genomen.
dôn liez erz niht nâher komen.
er spranc von im drî stunt
und tet im allez dicke kunt,
er naeme im daz leben
wolde ez sich niht gevangen geben.
desn nam ez dehein war
und lief ie swîgende dar.
unz erz gnuoc versuochte,
daz ez niht geruochte
lenger ze lebene,
dô geruochte er im ze gebene
mit dem swerte einen swanc
daz im daz houbet dâ hin spranc
und nie wort mê gesprach.
dô daz diu frouwe gesach,
si neic tiefe ze gote
und gnâdete sînem gebote
mit herzen und mit worten.
dô entslôz man ûf die porten.
diu frouwe nam ir gesinde gar,
daz was ein hêrlîchiu schar,
und quam gegen im gegangen.
er wart vil wol enpfangen.
ir herze wart enbunden.
sie hâten überwunden
beide den kumber und ir nôt.
diu êre die man im erbôt,
der was vil unde gnuoc.
dô er daz houbet für sie truoc,
dô mohte man dienest schouwen
von dem gesinde und von der frouwen.
sie gâben sich ze sînem gebote,
sie dankten im unde gote
der êren die in dâ was geschehen.
ir mohtet hoeren unde sehen,
haete er nâch lône deheinen muot,
wolde er lîp unde guot,
daz ez ir fröude waere.
sie begunden im die gebaere
zuo den werken zeigen,
waere diu werlt ir eigen,
der dûhte er sie wol wert.
wolde er ir lîbes hân begert,
als diu âventiure giht,
sien haeten es im verseit niht.
nû begunde er urloubs begern.
die rede bâtens in verbern
und sprâchen, in waere iemer leit
solde er sîner arbeit
ungelônet rîten.
si bat in doch bîten
unz er geruowete nâch der nôt.
swaz si des gebat oder gebôt,
des beleip si alles ungewert.
er was frô daz er daz swert
an dem twerge hâte gewunnen,
und wolde rehte erkunnen
ob ez den risen möhte snîden.
dazn wolde er niht vermîden,
er saz ûf unde reit.
daz was der frouwen harte leit
und dem gesinde über al.
dô daniel von dem blüejenden tal
die frouwen von dem trüeben berge
erlôste von dem twerge
und urloup genomen hâte,
er kêrte dannen drâte.
als er von der burc begunde traben,
dô sach er vor im haben
wol vierzic juncfrouwen.
dô in die begunden schouwen,
sie erbeizten nider an daz gras.
diu ir aller frouwe was,
der giengen sie alle sament nâch.
gegen danielen wart in gâch.
sie klagten unde weinten.
er sach daz sie in meinten.
er erbeizte ouch nider an den sant
und zôch sîn ors an der hant,
unz er sô nâhe bequam
daz er ir grüezen vernam.
dô vielen sie im alle
mit einem glîchen valle
sament für sîne füeze.
sîn wille der was süeze,
daz wart schiere schîn getân.
er hiez sie balde ûf stân
und frâgte sie der maere,
waz diu rede waere.
ir aller frouwe diu sprach:
< herre, dâ ist mîn ungemach
und mîn nôt die ich dulde
alles leides übergulde.
ich was ein rîchiu graevîn,
der gewalt was aller mîn
dâ zuo dem liehten brunnen.
nû ist er ab gewunnen
gar und al mîn êre.
ich enwürde niemer mêre
weder gefröut noch getrôst,
ich enwerde mit iu von leit erlôst.
ich hâte verzwîflet daran
daz mir iemer dehein man
ze keiner state möhte komen.
sît ir dirre frouwen hât benomen
den grôzen kumber den si leit,
nû weiz ich mit der wârheit:
sol mir iht saelden wider varn,
der muoz mich got mit iu bewarn.
er hât sô manic hundert
von der werlte gesundert
an dem ir hât gesiget,
daz ouch der trôst an iu liget
dâmite ich mîne swaere
ob ich sô saelic waere,
diu mir zuo gênde ist
unde kumt in kurzer frist,
- daz ich ez an iu fünde! -
mit fröuden überwünde.
ich swere wol des einen eit,
und ist ein rehtiu wârheit:
wirde ich mit iu niht erlôst,
sô wirde ich niemer getrôst.>
er sprach:< frouwe, daz ist mir leit.
ich hân an grôze arbeit
gekêret und genendet.
daz hân ich niht volendet,
dâ muoz ich hin kêren.
ich bin von mînen êren
gar gescheiden unde komen
des ich mich hân an genomen,
ob ich ez niht volende.>
diu frouwe want ir hende,
si sprach:< lât die rede sîn.
ich nim ez ûf die sêle mîn,
irn muget niemer mêre
iuwer saelde und iuwer êre
baz gemêren denne hie.
irn komet niemer noch quâmet nie
dâ iuwer gnâde noeter sî.
ir muget erwerben dâ bî
gotes hulde und den prîs.
iuwer êre gât in alle wîs
iemer mêre für sich.
erbarmet iuch, herre, über mich
durch got und durch iuwer hövescheit,
sô geschiht iu niemer dehein leit
an êren noch an lîbe.
helft mir armen wîbe
von mînem herzesêre:
got hilfet iu iemer mêre.>
er sprach:< frouwe, nû sagt
waz ez sî daz ir klagt.
mac ich, ich mache es iu buoz.>
si gnâdete im an sînen fuoz.
des twanc si grôz ungemach.
sie weinte sêre unde sprach:
< herre, daz vergelt iu got.
ich lîde schaden unde spot
von einem tîfelsman
dem niht geschaden kan.
er ist des tîfels genôz.
im ist daz houbet sô grôz,
ez trüegen kûme zwên man.
er treit niht gewandes an,
er ist allenthalben rûch
und ist gar âne bûch,
er hât ouch niht darme:
im ist bein und arme
gewahsen an daz houbet.
herre, daz geloubet,
im gât daz kinne an diu knie.
zwei groezer ougen enwurden nie
denne an sîme kopfe stât.
einen munt den er hât,
der ist wîter denn ein eln.
der iemer und iemer solde weln,
ern fünde sô ungehiure
deheine krêatiure.
ich bin des âne zwîfel,
in habe der leidige tîfel
ûz der helle gesant.
er nimt ein houbet an die hant
swenn er die liute toeten wil.
der sî lützel oder vil,
die ez under ougen sehent an,
der kumt niemer deheiner dan.
sie ligent dâ zehant tôt.
daz ist diu groeste nôt:
sô er den mannen nimet den lîp,
sô toetet er kint unde wîp.
er füeret ein here freislîch,
die sint im alle gelîch.
sie sint komen von dem mere,
sie strîtent allez ân were.
in enist deheiner were nôt,
swer daz houbet siht, der lît tôt.
swem er den tôt getuot,
dem sûgent sie ûz daz bluot.
daz habent sie in ir munde
eine kurzen stunde
und lânt ez wider ûz vallen.
alsô lebent sie mit in allen.
anders pflegent sie keiner spîse.
in der selben wîse
hât er verwuostet mîn lant
âne roup und âne brant,
âne stich und âne slac.
den schaden den ich des haben mac,
der dûhte mich als ein wint.
ich hâte sehs fromiu kint,
diu ligent von sînen schulden tôt.
doch verklagete ich die nôt.
ich hâte mîn hûs unz gestern fruo
und vil gesindes darzuo
und einen ritterlîchen man,
bî dem ich mîniu kint gewan.
gestern dô wir gâzen
und in unruowen sâzen
umb unsern schaden den wir hân,
dô quam der tîfel gegân
und tôte allez daz dâ was.
ich selbe kûme genas,
ich verstal mich abe als ein mûs
hinden abe von dem hûs,
ich und ander mîniu wîp
diu hie bî mir hânt den lîp.
dô wart mînem herren zorn,
der flôch ûf den hôhen torn
und beslôz sich dar inne.
den enweiz ich wie ich gewinne.
wirt im der lîp benomen,
sô wil ich dar wider komen
daz ich daz houbet gesehe
und ouch mir der tôt geschehe
daz ich nâch mînem herren var.
ich verklage mînen schaden gar
und dunke mich vil rîche,
gewert ir mir gewaerlîche.
ob mîn herre sî tôt,
sô wil ich komen von der nôt
und ouch mich toeten lâzen.>
< nû rîtet für an den strâzen,>
sprach daniel ze der frouwen,
< unz wir daz hûs beschouwen.
sô lât mich dar rîten.
ir geseht in kurzen zîten
ob ich iu iht gehelfen kan.
ich gewinne iu wider iuwern man,
oder ich verliuse den lîp.>
diu frouwe und ir wîp
genâdeten im fil sêre
und biten dâ niht mêre
und riten dannen schiere
über langer mîle viere,
unz sie begunden nâhen
daz sie daz hûs sâhen.
daniel sprach wider sie:
< frouwe, bîtet ir mîn hie
unz daz ich versuoche
ob daz got geruoche
daz iu gnâde sul geschehen.
sol ich iuch iemer mêr gesehen,
daz muoz harte an got stân.
swie diu nôt waere getân
die ich getörste schouwen,
dar lieze ich mir wol zouwen
durch iuwer angeste gebot.
ich enweiz, wizze got,
wie ich âne diu ougen getuo,
sît sie mir schade sint darzuo.
hât ir deheinen spiegel dâ?>
diu frouwe sprach zehant:< jâ!
ir ist hie vil, waz welt ir der?>
er sprach:< dâ gebt mir einen her!>
als daniel daz gejach,
zuo ir wîben si sprach:
< tuot her die spiegel alle,
swelher im gevalle,
daz lât in selber gesehen!>
daz was schiere beschehen.
der spiegel man im dar truoc,
unz er sprach:< er ist genuoc.>
nû nam her daniel
der im aller bast geviel.
in sînen buosen er in stiez.
der frouwen er für wâr gehiez,
er braehte liebiu maere,
ezen erwanten solichiu swaere
darumb erz müeste mîden
und grôzen kumber lîden.
dannen wart im vil gâch.
die frouwen sprâchen im nâch
swaz sie guotes kunden.
die trehen in begunden
von den ougen vallen,
der frouwen und in allen.
er gâhte zuo der veste
und vant die leiden geste
in der burc beslozzen.
nû reit er unverdrozzen
und erbeizte an daz bürgetor.
dâ ruorte er den rinc vor
und ruofte vil lûte hin,
daz man in lieze dâ in.
sus antwurte im zehant
der bûchlôse vâlant
mit zornlîchen worten:
< wer ist dâ vor der porten?>
daniel sprach:< daz bin ich.>
diu rede dûhte in wunderlich
daz er sich niht ennante
und er in niht erkante.
er sprach im zornlîche zuo:
< dir kumt dîn unheil ze fruo
wiltû alsô darnâch streben.
ich enlâze dich niht lenger leben
dûn sagst mir dîn gewerp zehant
und wie dû selber sîst genant
und dîn geslahte dâ bî,
als liep dir dan dîn leben sî.>
diu rede was danielen ein spot,
er sprach:< ich leiste dîn gebot
an disen dingen michels ê
denne ez mir an daz leben gê.
hoere, ich sage dir mînen namen,
ich wil michs niemer geschamen:
ich heize sam mich der phaffe hiez
dô er mich in den touf stiez.
mîn geslahte ich dir wol gesagen kan:
mîn vater was mîner muoter man,
der zweier sun bin ouch ich.
dâ bî erkenne dû mich.>
dô sprach der bûchlôse:
< ich vernam nie rede sô lôse
als ich dich hoere sprechen.
daz wil ich selber rechen.
dû endunkest dich nie sô frome,
erbeitest dû unz ich dar ûz kome,
waere al der werlte frümekeit
in dich einen geleit,
ichn lieze dich niht genesen.
daz muoz dir gewislîch wesen,
dû solt den gewissen tôt hân,
desn maht mir niht engân.>
diu unsaelde in betwanc
daz er vil zornlîche ûf spranc.
daz houbet er an die hant gevienc,
gegen der porten er gienc
mit grôzen drôworten.
daz hôrte er vor der porten
und warp als die wîsen tuont.
ein linde vor der burge stuont
an einem anger her dane,
dâ hafte er sîn ors ane.
eines listes er sich under want:
er nam den spiegel in die hant,
als in sîn wîsheit lêrte,
sînen rücken er kêrte
rehte gegen dem bürgetor.
dâ stuont er unlange vor
unz ez wart ûf getân.
dô begunde er dort her ûz gân
der die liute âne wâfen sluoc.
daz houbet er in der hant truoc
dâvon in der tôt geschach.
daniel in dem spiegel sach
wie er sîn dinc ane vienc,
und wâ er dort her gienc,
wie er daz houbet für sich bôt.
er waere selbe dâvon tôt
haete erz vornen gesehen an,
nû truoc erz vor im dan
und wolde den tiurlîchen helt
mit dem tôde hân gekelt.
daz sach er in dem spiegel wol.
des was sîn herze fröuden vol,
daz dûhte in harte saeleclich,
und gienc vil balde hinder sich
unz er dar quam gegangen
daz er in trûte erlangen.
er wart des tôdes gewert.
daniel zuckte daz swert,
daz er ze dem trüeben berge
vor dem küenen twerge
alsô manlîche erspranc,
und tet hinder sich einen swanc.
er schancte im eine minne
und sluoc im under dem kinne
diu bein sament enzwei.
des viel er nider unde schrei
mit michelem grimme
ein freislîche stimme.
er begunde ruofende sagen
den sînen, er waere ze tôt erslagen,
daz sie balde quaemen
und daz houbet naemen.
dô er diu wort gesprach,
daniel in dem spiegel sach
wâ er dâ lac mit ungehabe,
und sluoc im ouch die hant abe
dâ er daz houbet inne hâte.
daz huop er ûf vil drâte.
er huop ez vornen hindan
und sach niht wan hinden dran.
daz erz houbet gewan,
des was er ein frô man.
er sprach ze im dô er lac:
< dû hâst diz houbet mangen tac
allez hinden an gesehen.
dû solt ez ouch undern ougen spehen,
wie ez dâ sî getân.
desn wil ich dich niht erlân.>
daz houbet er im dar bôt
unz erz gesach, dô lac er tôt.
die bûchlôsen geste,
wie sie her ûz der veste
gâhten unde drungen
und hâten zuo getwungen
alle sament diu ougen
in was dâ niht tougen,
derz houbet gesaehe vorne,
er waere der verlorne,
im was liebe geschehen
daz er wol torste gesehen.
sie liefen alsô blinden
und wolden daz houbet vinden.
der êrste der den herren vant,
der suochte im daz houbet in der hant.
dô was si im abgeslagen.
daz begunde er in allen sagen.
darnâch ersuochten sie daz gras,
als wîte sô ez umb in was,
sô sie gâhest kunden
unz daz sie niht enfunden.
des begunden sie alle jehen,
sie wolden umbe sich sehen.
daz wart ouch ir ungewin.
daniel stuont dâ vor in
und huop in daz houbet dar
unz daz sie es wurden gewar.
dâvon vielen sie alle
mit einem gelîchem valle
tôt nider in daz gras,
daz ir nie keiner genas.
als daniel daz ersach,
wider sich selber er sprach:
< wer kunde mir des widerstân
sît ich diz houbet hân?
ez müezen die risen schouwen
die dâ nieman mac verhouwen.
sie müezen hie von tôt ligen.
ich mac wol dâmit gesigen
in dem lande ze clûse
und helfen dem künic artûse
von dem künic matûre.
ez wirt in allen ze sûre
die uns dô wellent wider stân:
ich wil sie diz houbet sehen lân.
des haete ich aber schande
swenne ich in dem lande
begienge einen grôzen mort.
ich haete dester boeser wort.
man weste wol, ein armez wîp
naeme al der werlte wol den lîp
swenn si diz houbet trüege
und alle die liute dâmit slüege.
man jaehe, ich waere ein tîfel
und trüege ez durch den zwîfel
ich getörste nieman bestân,
und begunden mich für einen zagen hân.
die liute schülten alle mich
und würden mir unheimlich.
ouch kunde ich des niht engân,
solde ich ez dehein wîle hân,
ich würde es lîhte unfrô.
ez quaeme eteswenn alsô
daz ich ez vornen saehe
und mir der tôt geschaehe.
dû hâst sô mangem den lîp benomen,
dû bist von dem tîfel komen,
der müeze dîn ouch walten:
ich wil dich niht behalten.>
iesâ warf erz in den sê.
er sprach:< niemer wirdestû mê
deheinem guoten man kunt,>
und liez ez sinken an den grunt.
dô er daz houbet gewarf hin,
dô îlete er zuo der burc in
balde gegen dem torne.
dâ ruofte der wolgeborne
dem wirte ob er noch lebte,
daz er sich wol gehebte,
im waere benomen sîn ungemach.
daz vernam der wirt und sprach:
< wolde got, waere daz geschehen!>
< jâ lâze ich iuch die wârheit sehen,>
sprach daniel von dem blüenden tal,
< sich hât verendert ir schal.
sie hât der tîfel erslagen
den sie lange hânt getragen.>
dô entslôz der grâve die türe
und gienc mit vorhten dâfüre.
er hâte dannoch niht vernomen
wie ez darumbe was komen.
er hiez in wilkomen sîn,
er bat in durch unsern trehtîn
daz er im sagte maere
wie er genesen waere
und warumbe er waere komen dar.
her daniel sagte im gar
daz sîn frouwe und ir wîp
noch alle haeten den lîp,
daz er dar quaeme durch ir bete,
daz si sô jaemerlîche tete,
und seite im wie er den ersluoc
der daz houbet dâ truoc,
und sie alle ertoetet hâte.
dô giengen sie vil drâte
beidiu durch daz bürgetor.
dâ sach ers alle tôt vor.
dô wart ez im geloubet.
< owê! wâ ist daz houbet?>
sprach des hûses herre,
< ich gewan nie leit merre
denne mich dâvon ist an komen.
haete ez der tîfel hin genomen,
sô wolde ich iemer wesen frô.>
daniel sprach aber dô:
< ir dürfet darumb niht sorgen,
ich hân ez sô verborgen
daz ez niht geschaden kan
weder iu noch deheinem man.>
er sprach:< daz vergelte iu got!>
und bôt gar in sîn gebot
beidiu guot unde lîp.
er sprach:< wîset mich, wâ ist mîn wîp?
sô hât ir wol ze mir getân.
muoz ich mînen lîp hân,
daz gediene ich swie ich sol,
michn gehandelte nie kein man sô wol.>
sie sâzen ûf beide
und riten über die heide.
sie quâmen in kurzen stunden
dâ sie die frouwen funden.
dô diu frouwe sie an sach,
vil froelîche si sprach:
< sît got wilkomen beide!>
ir swaere und ir leide
vergaz si unde wart frô.
der herre wart ouch alsô
daz er die frouwen hâte,
und sagte ir vil drâte,
ir vîende laegen alle tôt,
in haete geholfen ûzer nôt
der herre der dâ mit im rite,
und sagte ir dâmite,
ir schadte daz houbet niht mê,
ez waere geworfen in den sê.
diu frouwe sagte im zehant
wie er der frouwen ir lant
dâ ze dem trüeben berge
haete erlôst von dem twerge.
er waere biderbe unde wîs,
daz bejagte im den prîs.
swie grôz ir schade was gewesen
daz sie noch wâren genesen,
des dûhten sie sich rîche.
harte williclîche
sprach er danielen an:
< edler ritter, nû woldan!
ir sult mit uns dar hein,
und werdet selbe enein
waz ir ze lône wellet hân,
daz ist allez getân.
ich wil des hiute gote jehen,
mir ist ein liep von iu geschehen,
daz groeste daz mir ie geschach.>
daniel dâ wider sprach:
< herre, nû enwelle got.
ez ist mîn bete und mîn gebot
daz ir die rede gar verbert.
was lônes waere ich darumbe wert
daz iuwere vîende ligent tôt?
diz ist mir selber alsô nôt
als iu und iuwern liuten.
haete er iuch ertoetet hiuten,
sô toete er mich morgen.
nû sint wir in den sorgen
gnaediclîche getrôst.
uns hât got dâvon erlôst.
des sullet ir im gnâde sagen.
ich muoz einer verte nâch jagen
der ich verre nâch gevolget hân.
daz ich die sô lange hân verlân,
daz ist mir ungemach.>
der grâve aber dô sprach
von dem liehten brunnen:
< ir hât mir wider gewunnen
beidiu hûs unde lîp
und darzuo êre unde wîp.
nû ist daz ouch mîn reht
daz ich iuwer ritter und iuwer kneht
iemer darumbe sî.
ez sî verre oder bî,
swem ir dâ nâch hât gejagt,
ich sol iu helfen unverzagt.
welt ir niht lenger bîten,
sô wil ich mit iu rîten.
swâ ir welt, dar rîtet ir,
ich hilfe iu gerne, ir hulfet mir.>
dô sprach zehant diu graevîn:
< er sol des gewis sîn,
möhte ich im ze hilfe komen,
als er mir sorge hât benomen
alsô benaeme ich im die swaere,
swelher hande si waere.>
sie nâmen urloup beide.
mit fröuden und mit leide
schiet diu frouwe und ir man.
zwên gedanke si dô gewan.
si dâhte:< der ritter ist sô frome,
ich vorhte daz er etswar kome
durch sîn grôze frümekeit
dâ mir geschehe ein herzeleit,
daz mir mîn herre werde erslagen.
o wie möhte ich im versagen?>
dô dâhte si aber zehant:
< sît er disen tîfel überwant,
er überwindet wol swaz er wil.
sîniu wîsheit der ist vil.>
diu frouwe reit wider hein
unde wart des enein
mit den die noch lebten
daz sie sich wol gehebten,
sie haeten noch dan daz got wolde,
und sprâchen, sie solde
alles des genüegen
daz in got wolde füegen.
sie mohtenz anders niht hân
wan als in got wolde lân.
daniel und sîn geverte,
den er ûz dem turne nerte,
die riten für sich balde
und quâmen ze einem walde
wol nâch mittem tage.
dô volgten sie einem huofslage,
unz der tac ein ende nam
und ein sô vinster naht quam
daz ir deweder den andern sach.
nû gâhten sie durch ir gemach
beide samet dester mê.
in tet diu müede harte wê
und waeren ouch wol dar komen
dâ si in waere benomen.
daz was dem grâven wol kunt.
nû verkêrte ez sich zestunt
daz geschuof ir gâhen
und daz sie ouch niht gesâhen
daz sie den burcwec verluren
und einen andern erkuren.
dem volgten sie die naht,
sô sie mit aller ir maht
iemer baldest kunden.
dô sie nie niht enfunden
wan alles walt unde walt,
sus riten die helde balt
unz sie belûhte der tac.
nû sach er wâ der berc lac
dâ er den risen vor vant.
zuo dem grâven sprach er zehant:
< unser dinc daz vert wol.
hie ist der berc dâ ich hin sol.>
dô sie des berges wurden gewar,
dannoch hâten sie dar
zwô vil grôze mîle.
in einer kurzen wîle
quâmen sie an ein velt.
dâ was geslagen ein zelt
vor dem berc an einem grase.
dâ was der schoeneste wase
den ieman kunde finden.
ûf einer grüenen linden
was dâ schoener vogelgesanc.
dar under ein schoener brunne enspranc,
lûter und ouch reine.
ein troc von marmelsteine
gezieret ûz der mâzen wol
der stuont dar under des wazzers vol.
dô sie begunden nâhen
daz sie ez wol gesâhen,
daniel zuo dem grâven sprach:
< hie hânt diu ors guot gemach,
der in state lât geschehen.
ich wil gewisselîche sehen
waz in dem gezelte sî.>
schiere erbeizte er dâ bî
sîn ors er an die linden bant.
in daz gezelt gie er zehant
und vant dar inne wîp noch man.
swaz man aber genennen kan
des man ezzen und trinken sol,
des stuont ein tavel dâ vol.
her daniel sach umbe sich.
daz gezelt was sô wunneclich
gemâlt und geschriben
daz er dâ gerne waere beliben
unz er enbizzen waere.
nû vorhte er daz ein maere
vil lîhte erwante sîn vart,
sam er dâvor erwendet wart.
ouch tet im diu vorhte wê
ob der künic artûs ê
in daz lant ze clûse gerite
und âne in mit den risen strite,
daz er den lîp dâ verlüre.
wand er hâte ez dâ füre
daz er mit sînem swerte
des tôdes dâ gewerte
die risen und etslîche mê.
sus was im beidenthalben wê:
er waere gerne enbizzen
möhte er rehte wizzen
daz er iht lenger törste bîten.
nû sach der grâve rîten
einen ritter über jenez velt.
sâ sprach er under daz gezelt,
daniele sagte er:
< ich sihe einen ritter dort her
freislîche gâhen,
der beginnet uns vaste nâhen,
ich enweiz waz er welle.>
unz daniel sîn geselle
ûz dem gezelte gegie,
dô rante er für sie
und fuorte einen man gefangen.
den mohte der zîte belangen,
durch daz er vor im lac
über daz ros als ein sac.
herre daniel der gruozte in.
nû sach er für sich und reit hin.
daz er alsô stille sweic
und weder sprach noch neic,
daz was in beiden ungemach.
der grâve zornlîche sprach
von dem liehten brunnen:
< dês wâr, ich wil erkunnen
waz den ritter dâ zuo trage
daz er uns sînen gruoz versage.>
er nam daz ros mit sporn
und jagte in, ime was zorn.
in den berc gie ein strâze
niht zweier manne mâze,
dâ reit der ritter hin.
der grâve jagte in
mit einem erzogenen slage.
er flôch vor im als ein zage.
dô daniel ûf daz ros geschreit,
nâch dem grâven er dô reit,
swaz er mohte gevarn.
er wolde des weges niht sparn.
doch reit in der ritter vor
unz er quam an daz tor
dâmite man den berc beslôz,
daz was ein stein harte grôz.
nû kêrte er sich widere
und lie den stein niht nidere.
dô der grâve hin in gereit,
der stein was dicke unde breit,
den ruorte er daz er nider viel.
des beleip der ritter daniel
leider alters eine
hie ûze vor dem steine.
daz was im leit und ungemach.
swaz sînem gesellen dô geschach,
des mohte er niht zerstoeren.
hie muget ir wunder hoeren
wie kûme daniel genas,
sô nâhe im doch der tôt was.
dô der stein nider schôz,
dô sach man einen bach sô grôz
rinnen ûz dem steine
daz der berc al gemeine
von dem wazzer wart vol,
swaz sîn iendert was hol.
ein sê was in den berc gegraben.
swenne der stein wart ûf gehaben,
sô gie daz wazzer in den sê.
er friesch nie niht wunders mê.
alsô was der selbe stein
gefüeget zuo den dingen zwein:
swenn er ûf gehaben wart,
sô was daz wazzer bespart.
sît er nider wart verlâzen,
sô beslôz er die strâzen
und flôz daz wazzer her füre:
dâmite besluzzen sie die türe.
nû mugen wir wol gelouben,
wir enwellen in rehte rouben,
danielen von dem blüenden tal,
daz im sîn herze vor zorne kal
daz im sô leide nie geschach,
und in mê nieman gesach
fliehen durch dehein nôt.
stüende ez sô daz er den tôt
mit êren möhte hân geholt,
den haete er gerner gedolt
denne er sich hüebe an die fluht:
waere er durch die unzuht
wider ûz niht geriten
und haete des tôdes dâ gebiten,
daz zalte man im ze tôrheit
mê denne ze frümekeit.
daz der wâc ob im zesamen flôz,
des wart sîn angest harte grôz,
er vorhte sêre den tôt.
iedoch gewant er in der nôt
daz ros herwider umbe.
swie gerne erz dâ begunde,
ern mohte niht über daz wazzer.
iedoch gesaz er,
daz er von satel niht enquam
unz ez gevlôz und geswam
herûz an die wîten.
nû muose er wider rîten
dâ er die linden gesach.
alsus schuof er sîn gemach:
sîn ros er dar an bant.
abe zôch er sîn gewant,
daz spreite er an die sunnen
und nam wazzer zuo dem brunnen
und gie in daz gezelt enbîzen.
dazn dorfte im nieman wîzen:
er was ungâz geriten
sît er mit dem getwerge hâte gestriten
daz er mit sîn selbes swerte sluoc.
nû vant er spîse genuoc
ûf der tavel an dem gezelte.
daz lobte er niht ze gelte
umb den grâfen den er dâ verlôs.
er was vil gar fröudelôs
daz er im was benomen.
möhte er nâ im sîn komen,
er haete in gewunnen widere,
oder er laege dâ tôt nidere.
dô er getranc unde gaz
und darnâch in unmuote saz
daz im sô leide dâ geschach,
wider sich selben er sprach:
< haete ich disen ritter nie gesehen,
sô waere mir verre baz geschehen.
man mohte an sîner frouwen
sô grôzen jâmer schouwen
dô er lebende in sînem turne lac,
daz ich für wâr wizzen mac,
freischet si sînen tôt,
sô mac man jâmer unde nôt
aller êrst schouwen an ir.
owê! sô ist si von mir
ir fröuden gar entsetzet!
ich hân sie mit leide ergetzet
des liebes des ir von mir geschach:
daz ist mîn êwic ungemach.
dir ist hie geschehen sô leide
daz ich noch niht hinnen scheide.
ich wil hie lenger bîten.
suln sie herûz iht rîten,
sô müezen ouch mich besehen lân
wiez in dem berge sî getân.
lât mir got sô wol beschehen
daz ich sie drinne sol gesehen,
sie müezen mir mînen gesellen geben.
hânt sie im aber benomen daz leben,
ich enwirde niemer vrô
ê daz ich in geriche sô
daz man ez iemer sagen mac.>
sus huote er allen den tac
unz ez nahten began.
dô sach er vier junge man
gegen dem gezelte komen.
die hâten ûf sich genomen
fleisch, brôt unde wîn.
swaz spîse solde sîn
der einen künic genuogte,
ob ez sich sô gefuogte
daz er dâ ezzen solde,
swes er danne wolde,
des brâhten sie mit in ein teil.
ern weste weder im ein heil
nâhete oder ein ungemach
dô er sie her komen sach.
ze sînem rosse er hin gie,
sînen zoum er gevie,
den hâte er schiere daran geleit,
und reit an sîne gewarheit.
unz sie im sô nâhe quâmen
daz sie ez wol vernâmen,
er gruozte sie alle viere.
sie tâten im vil schiere
gezogenlîche widergelt
und giengen in daz gezelt.
nû sie darin quâmen,
die spîse sie alle nâmen
von der tavelen gar
unde sazten dise dar
die sie dar brâhten mit in.
die andern truogen sie hin
die sie dâ hâten genomen.
dâ sie her wâren komen,
dâ wolden sie hin wider gân.
daniel bat sie stille stân.
< waz werbet ir hie?> sprach er.
< dâ tragen wir dise spîse her.> -
< wer sol sie aber ezzen hie?> -
< swer sie suochet,> sprâchen sie.
< wer hât sie danne her gesant?> -
< der herre ist über diz lant.> -
< kumt er selbe her iht?> -
< lîhte kumt er, lîhte niht.
niht anders troesten wir iuch darzuo.
wir komen aber morgen fruo
und bringen ander spîse her.>
< sô helfe iu got,> sprach er,
< saget mir die rede gar
unde wîset mich dar
dâ ich iuwern herren gesehe,
daz iu iemer wol geschehe.
ich sihe in gerne in kurzer frist,
sît er sô rehte hövesch ist.>
sie sprâchen:< lieber herre,
nû frâget uns niht verre.
wir wizzen darumbe niht ein hâr.
er ist gewesen diz jâr
daz er uns nie zuo gesprach.
swelhen unser er gesach,
möhte er den ergriffen hân,
er haete im den tôt getân.
wir enwizzen waz im wirret.
er ist alsô verirret
daz er nieman gesiht
wan dem ze sterbene geschiht,
ob erz iemer geahten kan.
er was ie ein hövesch man,
wan diz jâr ist er gewesen
daz er nieman gerne lât genesen.
welt ir in über daz gesehen,
daz mac anders niht geschehen
wan an dirre selben stat.>
daniel in got bat
lônen der maere,
und wâren im iedoch swaere.
sie giengen dannen drâte.
nû was ez alsô spâte
daz er kûme gesach.
er hâte grôz ungemach
wol von vier leiden:
daz er was gescheiden
von sînem gesellen sô gar.
daz ander, daz im ouch war,
daz er niht wizzen kunde
ob er an sînem gesunde
iht geletzet waere.
sô was ouch diz sîn swaere
daz ers niht kunde ervarn.
ouch wester niht wier sich bewarn
solde an dem künige artûse,
daz er den ze clûse
von dem risen niht verlüre.
sus dâhte er wider unde füre.
ein wîle wolde er rîten
und aber danne bîten.
er waere gerne anderswâ,
doch gelac er dâ
vil nâch eine wochen
und haete gerne gerochen
den grâven von dem liehten brunnen
oder er haete in wider gewunnen,
wan daz nieman herûz reit,
unz er an den tac gebeit
daz mit dem künige artûse
in daz lant ze clûse
ein kreftic her quam geriten.
er dâhte:< ich hân nû gebiten
unz ich niht lenger belîben mac.
hiute ist der selbe tac
daz mîn herre kumet in daz lant
und hât den tôt an der hant.
swie gerne er sich werte,
sô sint die risen sô herte
daz er in des lîbes niht ennimt,
sô tuont sie im swes sie zimt.
ich endarf niht lenger bîten,
ich muoz hinnen rîten,
ob ich im ze hilfe komen sol.
ich getriuwe disem swerte wol
daz mir ze dem trüeben berge wart.
die risen die sint nie sô hart,
ich versnîde sie mite sô sêre
daz sie deheinen künic mêre
twingent daz er sîn lant ûfgebe
und dâ nâch in ir gebote lebe.
sît ich vare nû hinnen,
wie sol ich danne wider gewinnen
den grâven der mir hie ist benomen?
sol ich sîn einic hinnen komen,
daz müejet mich iemer mê.
nû tuot mir jenez alsô wê:
wirt mîn herre dort erslagen,
den mac ich niemer verklagen.
ez ist bezzer daz ich rîte,
swenn ich dort gestrîte,
daz ich wider her komen.
mîn ligen ist hie dehein fromen.
belîbe ich lenger umb ein hâr,
sô weiz ich wol für wâr,
ich versûme mich dort und hie!>
ze sînem rosse er dô gie
und huop sich balde an die fart.
vil zorn im was unde wart.
dêr ân den grâven dannen reit,
daz was im gar ein herzeleit.
dicke er hinder sich sach,
wider sich selber er sprach:
< geselle, nû beware dich got!
sîn gnâde und sîn gebot
sende uns in vil kurzer stunt
zuo ein ander gesunt.>
er gâhte für sich drâte.
wande er hin ze dem berge hâte
kurzer mîle niht wan zwô,
dar quam er vil schiere dô.
nû saz der rise aber dort.
diz was sîn êrste wort,
dô daniel begunde nâhen,
war er sô wolde gâhen.
daniel sprach zehant:
< durch den port in daz lant.>
der rise sprach:< dû bist ein kint.
habe stille und erwint.
rîtest einen fuoz fürbaz,
für wâr sô sage ich dir daz,
ich zerbriche dich als ein huon.>
< swaz dû nû mügest getuon,>
sprach daniel,< daz lâ sehen.
hie enmac widerkêrens niht geschehen.>
der rise spranc ûf ze berge.
vil ungelîch einem getwerge
was sîn lîp überal.
daniel von dem blüenden tal
gelangete im kûme unz an diu knie.
nû enwart der rise nie
von deheinem wâfen wunt.
von diu was im niht kunt
ob er sich solde hüeten.
er begunde vor zorne wüeten,
er gedâhte niht an sînen val.
daniel von dem blüejenden tal,
der quam gegen im geriten.
dô quam der rise dort her geschriten,
die fûst er zornlîche truoc,
gegen daniel er sluoc.
des nam er vil guote war
und habte daz swert dar.
daz was dem risen unwert.
mit grimme sluoc er an daz swert,
daz ez ein wênic erklanc
und im diu hant dorthin spranc
und des armes wol der dritte teil.
daz was daz êrste unheil
daz im von swerte ie beschach.
daniel schimpflîche sprach:
< sage mir ze tiute,
hâstû iht vil liute
alsô erworfen mit der hant?
ich quam nie in dehein lant
dâ man sô wunderlîche strite.
inâ! waz ob ich selbe zwelfte rite,
die dich alle wolden bestân?
sô müesestû vil fiuste hân
ê dû uns alle erwürfest.
ich waene dû bedürfest
vil guoter arzâte.
sien kumen aber drâte,
dû wirfest niht mêr mit der hant.
des sî mîn triuwe dîn pfant.>
nû was daz dem risen leit.
ze einem grôzen steine er schreit
und wolde in mit geworfen hân.
dô lie daniel dar gân
und sluoc im abe daz bein.
dannoch zôch er den stein
und warf daniele ûf den schilt,
daz in vil nâch haete bevilt
daz sîn ros under im nider saz.
noch wolde er sich rechen baz
und greif aber nâch einem steine.
dô mohte er ûf einem beine
niht lenger gestân.
er begunde sich nider lân
und wolde sich sitzende wern.
dô geruochte in got niht nern.
des muoste er wesen unfrô.
daz ros erholte sich dô
dâ daniel ûfe saz.
er sprancte dar nâher baz
und sluoc im den andern arm abe.
nû viel der ungefüege knabe
ûf den rücke alein
und hâte niht wan ein bein.
des gewan er grôze unsite.
daz ros stiez er dâmite
sô sêre an die sîten
daz ez sich in kurzen zîten
überwarf wol drî stunt.
daniel was ungesunt
vil nâch worden dâvon.
er was der stürze niht gewon.
des wart er vil zornvar
und huop sich ze fuoze dar
und sluoc im daz houbet abe.
er sprach:< ich waene ich dir habe
wol vergolten den stôz.
nû sîst nie sô herte noch sô grôz,
an dir gesiget nû wol swer dich bestât,
dû habest denne guoten arzât.>
dô er mit dem risen hâte gestriten,
dô quam der künic artûs geriten
und manic ritter gemeit
der wol ze strîte was bereit.
nû wâren sîner gesellen drî
zuo geriten alsô bî
daz sie sâhen den slac,
und der rise dannoch lebende lac.
daz was herre gâwein,
parzivâl und her iwein.
die kanten danielen dô
und wâren des risen tôdes frô,
und daz daniel was genesen.
sie wolden vil gewis wesen,
daz er waere anderswâ,
daz in missegienge dâ.
daniel bat sie alle drî
daz si erbeizten dâ bî
und ir swert versuochten umbe daz
daz sie westen dester baz
ob sie sînen gesellen
mit slegen möhten ervellen.
sie erbeizten vil drâte,
durch daz sie wunder hâte
ob er waere alsô hart
sam von im geseit wart,
ob ez waere wâr oder gelogen.
ir swert dô wurden ûzgezogen,
diu sluogen sie ûf den tôten
und kunden sîn nie verschrôten
alsô grôz sô ein hâr.
sie sprâchen alle:< daz ist wâr
des wir sînen bruoder hôrten jehen.
lât uns iuwer swert sehen,
unseriu sint nihtes wert.>
daniel zeigete sîn swert,
er sprach:< ez ist hie nâhe bî,
swelhem iuwer ez liep sî,
dem gan ichs alsô wol sô mir.>
sie sprâchen:< jâ sult ir
selbe füeren iuwer swert.
ir sît es michels baz wert
denne unser aller dehein.>
dô sprach her gâwein:
< wir mugen niht mê gebîten,
wir suln für uns rîten.>
sie sâzen ûf alle viere
und wâren harte schiere
durch den berc hin geriten.
niht lenger sie biten,
sie begunden vaste gâhen
dâ sie die linden sâhen
und ouch daz guldîn tier.
dem zugen sie die banier
ûzer sînem munde.
sâ huop ez und begunde
ein stimme schrîen sô grôz
und machete einen solichen dôz
daz nieman den andren vernam.
unz der künic artûs quam
durch den berc in daz lant,
dô gehôrte er ouch zehant
die stimme von dem tiere.
sie kêrten dar schiere,
er und manic ritter guot,
die alle hâten den muot
daz sie dâ wolden gesigen
oder sigelôs geligen.
der rise der sie dar leite,
vor dem berge er dâ beite,
unz sie alle quâmen darin.
daz tet er durch den sin,
er wolde den berc besliezen
unz sie wâr geliezen
daz der künic matûr wolde.
dô er nâch in rîten solde
ze hinderst an der schare,
aller êrst wart er geware
daz sîn bruoder was erslagen.
den begunde er groezlîche klagen.
einen segen tet er für sich,
er sprach:< owê! wie hân ich dich
sus wunderlîche verlorn?
dû waere doch herter denn ein horn.
haete ez der tîfel niht getân,
sô kunde ez niemer sîn ergân.
nû müezen sie mir ir leben
alle sament darumbe begeben.
der künic artûs und die sîn,
sie engeltent alle sament dîn.
ir kumt niemer deheiner wider.>
den stein liez er sliezen nider
und reit dem here vaste nâch,
dô was im zorn unde gâch.
dô sich bî dem tiere
gesamneten sô schiere
der künic artûs und die sîn,
nû wart ez wol an in schîn
daz sie von dem tiere hôrten sagen:
sam sie waeren erslagen
alsô vielen sie von den rossen nider.
ir gehabte nie deheiner wider
ê er ûf der erde lac.
ez wart nie kein donerslac
ze hoeren alsô freislich.
dô erholte der edel ritter sich,
daniel von dem blüenden tal.
der geleite den schal,
er stiez dem tier an der stunt
die banier wider in den munt.
dâ waere anders nieman genesen.
swer dâ bî solde wesen,
der kunde ez niemer bewarn,
im waere daz houbet gar zervarn.
nû bereite sich ze were
des küniges artûses here.
in was von sagene kunt
daz dar quaeme in kurzer stunt
der künic matûr geriten.
dô begunde der êrsten juste biten
manic ritter unervorht
der wolde hân geworht
wunder mit dem swerte.
dô es sô manger gerte,
dô sprach der künic artûs:
< die dâ heime in mînem hûs
hôrten waz der rise sprach,
die wizzen wol daz er jach,
dehein künic sî sô frome
daz er iemer in daz lant kome,
wan daz ich sô saelic bin
daz er mich verlâzen hât herin.
nû wil ich versuochen dâ bî
ob ich vollen saelic sî
und in der êren dunke wert
daz er geruoche sîn swert
ûz ze ziehene gegen mir.
ir herren, daz sult ir
alle lâzen âne zorn.
sît er mich darzuo hât erkorn
daz er mîn geruochet ze man
und mir der grôzen êre gan,
die er mangem künige hât verseit,
nû dunket mich daz ein saelikeit
geruochet er ze stechene wider mich.>
diz dûhte sie alle ritterlich
daz er sichz selbe hâte angenomen.
zehant sâhen sie komen
den künic matûr geriten.
der hâte ein ros über schriten,
daz in nâch sînem willen truoc.
er was gezieret genuoc,
als ein künic solde,
der ouch des waenen wolde
daz im nieman waere gelich.
den schilt bôt er für sich,
daran stuont ein babiân,
dâvon ich iu ê gesaget hân,
der was gezieret genuoc.
daz sper er under den arm sluoc,
daz ros er mit den sporn nam
unz er in die rehten mâze quam.
dô ersprancte der künic artûs,
daz man hôrte den sûs
als ein weter dâhin gevarn.
einen gekroenten arn
fuorte er an sînem schilte.
sîn herze vor fröuden spilte
daz er in versuochen solde
der in ze manne wolde
und sînes landes hâte gegert.
ob er der êren waere wert,
daz wolde er dâ zehant erfarn.
sie kunden beide wol bewarn
daz in die stiche niht enlogen.
sie quâmen alsô dar geflogen,
dô sie ûf ein ander stâchen,
daz die setel beide brâchen.
des entweich in diu habe
und fuoren beide hinden abe
und gestuonden ûf der erden.
dô liezen sie schîn werden
wes sie beide gerten.
sie huoben mit den swerten
den aller groesten strît
den man bî ir zît
von zwein mannen ie gesach.
wie man slac mit slage rach!
sie wâren beide manhaft.
sie zeigten kunst unde kraft
mit dem lîbe und mit den swerten.
die wîle die schilte werten,
dâmite kunden sie sich wol bewarn.
sie mohten aber niht gesparn,
sien würden ir schiere alsô blôz
daz in niht beleip eines hâres grôz.
sît der schilte ein ende wart,
sô wart dâ lenger niht gespart
weder helm noch halsperc.
daz erwelte stahelwerc
gerieten sie dô schrôten
und begunden ein ander nôten
ein vil lange stunde,
daz nieman wizzen kunde
weder ir dâ haete daz bezzer teil.
nû geviel dem künic artûse ein heil,
daz er den künic matûr sluoc
durch einen helm den er truoc,
daz ez im ûf der swarten widerwant.
dâ wider gap er im zehant
einen freisen slac,
der sô sêre nider wac
daz er quam ûf sîniu knie.
daz geschach dem künige artûs nie.
von diu wânders iemer sîn geschant
und spranc ûf al zehant.
er brâhte ez im ze sûre
und gap dem künige matûre
ein slac des er sîn ende nam,
als ez von ungelücke quam,
dâ sich nieman vor behüeten mac.
er traf in in den êrren slac
und versneit in dâ sô harte
daz sich daz houbet zarte
und tôt viel ûf daz gras.
der künic artûs genas,
der künic matûr was erslagen.
nû sâhen sie darnâch jagen
ein küneclîche schar,
zwei tûsent ritter wol gar,
die des tages solden
und turnieren wolden,
als in der künic matûr gebôt.
daz sie den gesâhen ligen tôt,
des wart ir zorn manicfalt.
sie gâhten für sich mit gewalt
und nâmen des küniges artûs war.
dô ersprancten die guoten ritter gar
von der tavelrunde.
in einer kurzen stunde
zerbrâchen sie mê denn tûsent sper.
ez waere dirre oder der
der dâ geviel, er was verlorn.
dâ wart der groeste zorn
des tages zesamen getragen
dâvon ir ie gehôrtet sagen.
nû zerhiuwen sie mit nîde
die schilte und daz gesmîde
daz ez zerstoup sam ein melm.
dâ wart manic herter helm
mit den swerten zerslagen.
iu kunde nieman gesagen
wie daz fiur darûz spranc,
dâ ein stahel durch den andern dranc.
der sô gewâfent was
daz er ie vor slegen wol genas,
der was dâ nackent unde blôz.
swer sîn selbes genôz,
der hâte saelde unde heil;
ez muose aber ein michel teil
komen von sîner frümekeit.
swaz uns von strîte ist geseit,
daz was hie wider ein wint.
dâ wâren sô getâniu kint
beidenthalben zesamen komen,
als ir ê hât vernomen,
die wol kunden strîten.
ez was zallen zîten
ein unmuoze der sie pflâgen.
von diu kunden sie wol gelâgen,
daz ir kraft ze staten quam,
des maniger dâ sîn ende nam.
sie zerschrieten swaz sie trâfen.
sie fuorten sô scharpfiu wâfen
daz man ez niht gelouben kan.
sie fuogten daz der stahel bran
rehte als ez holz waere.
daz wart ein spil sô swaere
daz sie die wunder worhten,
daz sie des alle vorhten
daz der suontac wolde werden
und über al die erden
daz himelfiur waere komen.
in was diu vorhte benomen
dô daz fiur gegen den luften bran.
dô wart manic fromer man
von der hitze zwîfelhaft.
sie hâten beidenthalp die kraft,
sie haeten ez iemer wol getriben,
ir dewedern waeren beliben
sigelôs in dem wal
wan daniel von dem blüenden tal:
mit dem swerte, daz des getwerges was,
dâmit valte er ûf daz gras
manigen ritter wol gar.
er reit enmitten durch die schar
mê denne drî stunt.
dâ wart des tages maniger wunt
der des gewis wolde wesen
daz er vor swerten waere genesen.
der bleip von daniele tôt.
dô der strît und diu nôt
volliclîche was erhaben,
dô sâhen sie dort her traben
den risen, der den berc beslôz.
dem was âne mâzen grôz
beidiu der lîp und der zorn.
er gâhte vaste mit den sporn,
sît er des strîtes wart gewar,
und waere gerne balde dar.
nû was sîn ros alsô laz,
in dûhte im lünge ze fuoze baz,
im wâren diu bein unmâzen lanc.
er erbeizte drabe unde spranc
gegen dem here mangen grôzen sprunc.
sâ begunde ouch manic helt junc
vil balde gegen im îlen
mit bogen und mit pfîlen,
der hâten sie sich gewarnet dar,
und nâmen im der ougen war.
sie schuzzen zallen mâlen
beidiu pfîle und strâlen
mê denne hundert.
sie hâten in gesundert
schiere von den ougen.
diu rede ist âne lougen.
dô wart im freislîche zorn.
swen er traf, der was verlorn.
mit grimme zôch er den schaft
und sluoc mit sô grôzer kraft
swen er mohte erlangen,
daz sîn leben was ergangen.
daz was in freislîche zorn
den ellenden rittern wolgeborn,
des künic artûs gesellen.
die twanc ir baldez ellen
daz sie gerne waeren sigehaft.
sie zeigten an im grôze kraft
mit den guoten swerten.
swie harte sie des gerten
daz sie im den tôt wolden geben,
dô muosten sie in doch lâzen leben.
des engulten sie genuoc.
dô er den schaft gar zersluoc
daz im niht bleip in der hant,
swen er danne ouch vor im vant,
den zerbrach er als ein huon.
swem er des niht wolde tuon,
den nam er bî dem beine,
er waere grôz oder kleine,
und sluoc die andern dâmite.
swie gerne man in dô versnite,
dô was ez nihtes wert.
man versuochte an im manic swert,
daz im niht leides dâvon geschach.
swie vil man sper ûf in gestach,
swie vil man pfîle ûf in geschôz,
man kunde in nie alsô grôz
sô ein hâr verwunden.
dô sie daz rehte erfunden,
dô fluhen sie balde
von dem risen alle.
des wart im zorn unde gâch.
nû lief er in alles nâch,
swâ er daz gedrenge vernam.
swer im zehanden quam,
der muoste daz leben verwandeln.
er begunde in alsô handeln
daz man in in stucken mohte ûflesen.
wie kunde er danne sîn genesen?
dô dirre blinde valant
sô mangen gesehenden überwant,
waz welt ir daz er haete getân
ob er sîn ougen möhte hân?
sô waere ez gewesen ir aller tôt.
er brâhte sie sus in soliche nôt
daz im nieman getorste nâhen.
sie begunden von im gâhen,
durch daz in sô misselanc.
dô er sie alsus ze der fluhte twanc,
dô quam her keiî dar.
der wart des risen ouch gewar.
ern hâte dannoch niht gesehen
waz in dâvon was geschehen.
er zeigte aber sîn alten wort.
ez was sîner fröuden hort
sô er einen biderben man beschalt.
er was ze den worten sô balt,
weste er ob er sîn leben
durch boese rede solde geben,
er haete sie doch niht verswigen.
swie er niht möhte gesigen,
er schalt sie zallen stunden
die niht gesigen kunden.
er sprach:< wie nû, künic artûs?
saezet ir dâ heime in iuwerm hûs,
sô haetet ir frome gesellen
die wol ritter kunden vellen,
sô man in vaste schancte
und sie zefromen trancte;
dâ slüegen sie und staechen,
unz sie allez daz geraechen
daz iuwerm vater ie geschach.
wie sint sie aber hie sô swach?
ich sihe doch wol, der man ist blint.
in möhte ein wênigez kint
mit deheinen êren bestân.
sie sullen es iemer schande hân
daz sie sich alsus lâzent jagen.
lât iuwer tavel dise zagen
iemer ze ir gesitzen,
die ein blinde von ir witzen
alsus trîbet âne swert,
sô ist si niht einer slêhen wert.
ez ist wol daz ich lebe,
wand ich nâch den êren strebe.
waz danne, enwellent sie mirs niht jehen?
nû wil ich iuch selbe lâzen sehen
daz ich in wol eine getar bestân
den sie dort alle lâzent gân.>
mit den selben worten ersprancte er
und zestach vil wol sîn sper
ûf des risen brust enzwei.
des enahte er niht ein ei.
der rise zornlîche schreit
dâ er hôrte daz gereit.
er ergreif in bî dem beine,
des wart sîn vehten kleine.
er truoc in rehte als einen stoc.
daz halsperc und der wâfenroc
diu vielen im über daz houbet.
er wart alsô betoubet,
er hâtes vil nâch iemer genuoc.
der rise umbe sich sluoc,
im tâten sîn ouggruoben wê,
und wolde der ritter mê
mit hern keiîn hân erslagen.
iu kunde nieman gesagen
wie freislîche er swancte.
daz liut im hindan wancte,
daz der slac nieman ruorte
und im der swanc enpfuorte
keiîn ûz der hende.
daz er ouch sîn ende
von dem valle niht ennam,
daz sage ich iu wie daz quam:
ez was bî einer linden,
dâ keiî dem blinden
ûz der hant entwischte.
sîn saelde sich dâ mischte,
daz er niht viel daz er zerbrast.
er quam rehte ûf einen ast
der oben an der linden was.
der half im daz er genas,
und viel dô vil vaste
von aste nider ze aste,
unz er ze jungest gelac
ûf der erde als ein sac.
nû muget ir gerne hoeren sagen
wie sie keiîn begunden klagen,
die von der tavelrunde.
sie sprâchen mit einem munde:
< der tîfel neme die linden
und neme ouch disen blinden,
daz er in ûz der hant verlie.
nû hôrten wir doch sagen ie,
blinden hebten vaste sêre.
verliesen muoz er sîn êre.
warumbe liez ern im entvarn?
wolde in der vâlant niht bewarn,
er waere anderswar
alsô lîhte komen als dar.>
swie leit sie in ez dô liezen wesen,
dô was her keiî doch genesen.
ez wart im doch alsô sûr
daz er des bettes nâchgebûr
mê denne zwelf wochen was
ê er des valles gnas.
der rise sluoc und zerbrach,
sîniu ougen er rach
an des küniges artûses mannen.
die gerne waeren dannen,
die enmohten vor der enge:
dâ was ein solh gedrenge
daz nieman kunde entwîchen.
der rise lie dar strîchen,
er fröute sich daz dâ nieman flôch.
dôn was dehein ros sô hôch,
er hüebe den fuoz noch ûf baz.
daz ros und swer darûfe saz,
die trat er daz er gar zerbrast.
ouch was sîn fuoz ein solicher last,
swer in ein wîle solde tragen,
der was es iemer erslagen.
ich sage iu rehte wie er wac:
ûf swem er sô lange lac
unz ein brâ ze der andern sluoc,
der hâte es iemer alsô genuoc,
er waere starc oder swach,
daz im der rücke enzwei brach.
dâvon sluoc er ûz der were
dem künige artûs allez sîn here
âne daniel von dem blüenden tal.
der was dort anderthalp in dem wal
under des küniges matrûs mannen.
die enliezen sîn niht dannen.
swie grôzen schaden er in tete,
doch muoste er leisten ir bete.
diu bete was alsô getân,
er müeze dâ under in stân
daz sie in niht von in liezen.
mit gêren und mit spiezen
stâchen sie und schuzzen,
des sie niht vil genuzzen.
er sluoc sie nider als ein hagel.
dô verlôs vil manger sîner nagel
dâ er den schilt an fuorte.
swâ er den man beruorte,
daz muoste wesen sîn tôt.
sîn swert half im ûz der nôt,
daz er fuorte an sînen handen.
er wart vil sêre bestanden
von al des küniges matrûs here,
des bedorfte er wol guoter were.
sîn gebaerde wâren freissam.
er zerhiu sie rehte als einen swam,
den lîp und swaz dâvor was.
swer der wunden genas
die daniel dâ sluoc,
der hâte saelden genuoc.
ouch leit er nôt harte vil.
ez was gar ein gewâget spil
daz er die belde ie gewan
daz er durch zwei tûsent man
alsô verre gebrach
daz in dehein sîn geselle sach,
der im ze hilfe waere komen.
sie haeten im nâch den lîp benomen,
sô sêre sazten sie sich ze were,
wan des küniges artûses here,
dô daz rehte besach
daz im der rise sô gar zerbrach
swaz er ir mohte bestrîchen,
des begunden sie im entwîchen.
sie fluhen von sînen handen
hin gegen den vîanden
und begunden sich darunder mischen.
dâmit wolden sie im entwischen.
unz der rise hin dar quam,
swen er in die hende dô nam
und in wolde zerbrechen,
der begunde zehant sprechen
sô in die nôt an gie:
< lâ stân, ich bin doch mit dir hie.>
sô wânder waerez und liez in leben.
die rede begunden sie im alle geben,
der ein und der ander.
durch die rede erwander
daz er dâ nieman zerbrach,
wand er der wârheit niht ensach
und geloubte sich des gar.
und dô lie des küniges artûs schar
an die vîande gân:
alsô wart ouch in getân.
sie zeigten beide grôzen nît.
aller êrst huop sich der strît.
dô ruofte jener unde dise.
dô enweste der rise
an wen er sîn ougen solde rechen.
er hôrte sie alle sprechen:
< lâ stân, waz wîzestû mir?
nû bin ich doch hie mit dir.>
sô liez er in sô drâte.
swer dâ gelogen hâte,
den erkante er niht, er was blint.
der êrste strît was ein wint,
sie begunden aller êrst houwen.
dâ mohte man strîten schouwen
dô sie diu swert twungen
daz sie durch die helme drungen
und durch die stahelringe.
sie wâren jungelinge
gar des lîbes unverzagt.
dô wart der krefte niht versagt;
swaz ir ein man brâhte dar,
die liez er alle sehen gar,
daz er nie kein teil verbarc.
dâ was nieman sô starc,
in endiuhte doch, er waere ze swach.
vil mangen man dâ toben sach
der doch vil rehte sinnic was.
swer dâ gerne genas,
der muoste wunder stellen.
des küniges artûs gesellen
die worhten mit den swerten
wunder, wand sie gerten
daz sie verkouften daz leben.
des hâten sie sich ergeben.
sie drungen hin mit grôzen slegen,
sie begunden mangen tôt legen
den sie âne wunden valten
und im sô starke erschalten
durch den helm daz houbet,
daz er wart betoubet
und tôt viel ûf daz gras.
der wol gewâfent was,
den dûhte doch er waere blôz.
diu nôt was freislîche grôz
die sie beidenthalben hâten.
swaz sie dâ leides tâten
des küniges artûses mannen,
daz envolgte in niht dannen,
sie vergulten in ez vil tiure.
dô getorste vor dem fiure
nieman volleclîche gesehen.
ir deheiner mohte jehen
daz im daz houbet tohte
und vor den slegen mohte
iht lenger genesen.
sie wolden gewis wesen
daz sie in waeren enzwei.
manger vor zorne schrei
sô er daz swert niht mohte betwingen,
daz ez für sich wolde dringen
durch die stahelhüete.
sie hâten alle ungemüete:
der dâ heime was wol gezogen,
an dem was man dâ betrogen.
darzuo twanc sie diu nôt.
swaz einer dem andern verbôt,
des hiez er drî gelten.
man gewinnet vil selten
diu verlornen spil.
ez engalt dâ lützel noch vil
wan beide lîp und êre.
er engalt ez alsô sêre
swer die zwei verspilte.
durch daz sie des bevilte,
sôn wolden sie ez niht lâzen.
sie begunden vaste grâzen,
dise hin und jene her,
von der ritterlîchen ger
die sie zesamen hâten.
swaz eine den andern tâten,
sien mohten sie niht verjagen:
dem hundert wunden wâren geslagen,
wâren sie sô kleine
daz er sîn gebeine
dannoch ganz haete,
ern wolde ûz sîner draete
darumbe niht getreten.
dâ wart nieman gebeten
daz er sîn vehten wolde lân,
im enwürde allr êrst getân
mit den swerten sô wê
daz er einen slac niht mê
mohte geslân her wider.
sô er von dem rosse viel dâ nider,
dannoch werte er sich ze fuoz.
dâ wart beidiu antwurt und gruoz
mit den swerten gegeben.
daz gie mangem an daz leben.
der strît stuont sô lange
unz von hitze und von gedrange
manegem sô wê wart
daz er vorhte daz er ein vart
mit dem tôde müeste tuon.
er wart swach alsam ein huon
und vaht doch als ein wildez swîn.
der künic artûs und die sîn
die begunden für sich brechen
und mit grimme rechen
daz leit daz in dâ was geschehen.
dâ mohte man hoeren unde sehen
michel brogen unde gelten.
dâ enwas dehein schelten.
swie lützel man dâ vertruoc,
diz was dô wunders genuoc,
swaz einer des andern engalt,
daz ern mit worten niht enschalt;
er schalt in aber mit dem swerte
unz daz er in gewerte
ein teil sînes willen.
ez kunde nieman gestillen.
der künic artûs dranc hin
mit den besten rittern drin.
daz was sîn neve her gâwein
und der edel ritter iwein,
darzuo der helt parzivâl.
sie entwurfen seltsaeniu mâl:
swer ir einez enpfie,
dem ez niht anders vergie
wan daz er den lîp verlôs,
oder aber den tôt dâvon kôs,
als er niht lenger genas.
swelhez der drîer daz beste was,
daz wart im vil schiere.
sie wâren alle viere
tiurlîche schrîbaere.
ir griffel wâren swaere,
sie schriben soliche buochstabe
daz sie niemer nieman abe
mohte gewaschen noch geschaben.
sie begunden mangen laben,
unz er daz wîze für kêrte.
swen der künic versêrte,
dem was niht arzâtes nôt.
unz er geviel, sô lac er tôt.
nû sach er verre durch daz wal
danielen von dem blüenden tal.
der habte in einem ringe wît
und hâte einen grôzen hamît
umbe sich gevellet
und hâte dâ gestellet
mit dem swerte solhe getât
daz diu werlt alsô zergât,
daz ez dehein man mê tuot
ob er joch haete ein swert sô guot.
er hâte der tôten
umbe sich zetal verschrôten
hôhe als ein burcgrabe
unde werte sich herabe
rehte als ein dietdegen.
ouch begunden sie sîn pflegen
als guote ritter solden,
unz sie den tôt erholden.
dô der künic artûs gesach
hern danieles ungemach,
daz wart im freislîche zorn.
mit dem swerte und mit den sporn
begunde er dar gâhen.
alle die dan sâhen
waz der künic artûs begie,
sie sprâchen, ez enwürde nie
ein man ze der werlte geborn
dem ie sîn kraft und sîn zorn
sînen willen sô wol volbraehte.
sie sagent uns daz er vaehte,
daz man in sêre vorhte.
er begienc unde worhte
mit slegen solichiu wunder,
daz sie sprâchen al besunder:
< des enist dehein zwîvel,
diz ist der leidige tîfel.
wir hân alle gar den lîp verlorn.>
sie haeten alle wol gesworn
daz in nieman möhte betouben.
er brâhte sie in den gelouben
daz man die vorhte vor im gewan,
daz sie noch baz tûsent man
getörsten hân bestanden.
er sluoc ze beiden handen,
der edel künic artûs.
von sînem swerte gienc ein sûs,
der durch die helme wâte,
daz daz bluot darnâch schrâte
und der man dâvon tôt lac.
im gehalf manic grôz slac
daz er gehiuw ein phat
durch daz her an ein stat,
daz ez im wol tûsent werten.
dâ sach man in beherten
durch die vîende ein fart
diu mangem man ze sûre wart.
dô her daniel wart gewar
daz der künic artûs durch die schar
gegen im sô gewalteclîche brach,
und er daz rehte gesach,
des wart er starc unde frô.
gegen im huop er sich dô.
dô tet daniel wol schîn
daz er den lieben herren sîn
vil gerne hôrte unde sach.
swem sô tumplîche geschach
daz er den schilt gegen im bôt,
dô was gereit der tôt.
daniel was gar ein helt,
ouch was sîn swert ûzerwelt.
daz sluoc er, daz ez für sich wuot
und weder ringe noch huot
den man mohte gefriden.
er begunde freislîche smiden.
er smidete als ich iu sage:
im quam dehein helm ze slage
er machte drûz zwêne âne gluot,
und wâren beide niht sô guot
sô ê was der eine.
nû merket waz ich meine:
er sluoc in enmitten enzwei.
swen er traf, der schrei
nâch hilfe nihte mêre.
er versneit in sô sêre
daz ers wart innen,
er dorfte niht sinnen
daz er iemer würde erlôst.
daz was ein michel untrôst.
sie sluoc der ritter daniel,
daz in diu zuoversiht enpfiel
diu zuo dem lebene gezôch,
und daz diu sêle hin flôch.
rehte als ein jegere
ob eines hasen legere
ûf den busch drischet
und der hase hin wischet:
alsô sluoc er ûf den man,
daz diu sêle kûme entran.
hei! wie daz swert erklanc
sô her daniel dranc
durch die ritter dâ ze clûse
gegen dem künige artûse!
mit vlîze er durch die helme swanc.
er schancte einer hande tranc
dâ was der twalm zuo getân.
er wart es niemer erlân
der es enbeiz, er müeze slâfen.
daz tranc was sîn wâfen,
der twalm was der tôt,
der slâf daz was diu grôze nôt
diu in dâ ze ligenne twanc
dâ er âne sînen danc
des suontages muose bîten.
er hiuw einen pfat sô wîten
daz er durch sie âne ir danc brach.
swer sîne gebaerde ersach,
der entweich im unde rûmde.
swer aber sich versûmde,
dem gap er ein kleinôte,
daz er mit grôzer nôte
zuo der erde bequam
und under wegen ende nam.
dô daniel schriet unde sluoc
durch swaz der man ane truoc
reht als durch ein wazzer,
sîn swert was niht lazzer
swem ez durch den stahel brach,
wan als ez füere durch einen bach.
er sluoc man unde man.
daz fiur nâch sînem swerte bran
als ez von himel waere ein blick.
sie enpfiengen alle einen schrick,
alsô dicke sô er sluoc,
und segenten sich genuoc.
sô starke grôz wart der glast
daz der herte stahel brast
und alsô swinde enzwei fuor.
er zimberte wol âne snuor.
ezn was niht waeher zimberman:
swâ er traf, dâ sluoc er an
mit grimme sîne barten.
durch sîne widerwarten
reit er als er wolde,
daz er niht leides dolde
und maniger von im schaden nam,
unz er zuo dem künige artûs quam.
der tet im guoten willen schîn
und hiez in willekomen sîn
und sîn gesellen alle.
swie kûme er vor dem schalle
und vor der unmuoze
gehôrte ir aller gruoze,
doch tâtens im mit worten kunt
daz er in liep was gesunt.
sie wâren sîn inneclîche frô.
der künic klagte im dô
von dem risen grôze nôt:
< unser lît dâ vil tôt,
wir enmugen im niht ze schaden komen,
wan diu ougen hân wir im benomen.
sît er diu hât verlorn,
des hât er sô grôzen zorn
dâ wider ûf uns gewunnen,
daz wir im kûme sîn entrunnen.>
noch dô hôrte der künic niht sagen
wer den risen haete erslagen
den er vor dem berge tôt vant.
er erfuor ez aber dâ zehant
mit einem worte daz er sprach:
< wir sîn im alle ze swach.
in kan nieman gefellen,
ezn taete der sînen gesellen
vor dem berge dâ sluoc,
wand er benamen ein swert truoc
dâmit er ouch disen wol slüege.
waere ieman nû sô gefüege
wir verliesen anders daz leben,
dem wolde ich lîhen unde geben
und wolde in mit mir füeren hein.>
dô sprach der herre gâwein:
< her daniel sluoc jenen risen,
alsô haete er ouch disen,
waere er bî uns gewesen.
er möhte niht vor im genesen,
im hülfe sîn herte niht ein hâr.>
dô sprach der künic:< ist daz wâr,
sô bin ich gar wol sorgen frî.>
die ritter sprâchen alle drî:
< geloubet daz erz getân habe,
wir sâhen daz er im daz houbet abe
schône zeinem slage swanc
und er noch mit dem tôde ranc
dô wir erbeizten über in.
ez ist nû gar sîn ungewin,
sît her daniel noch wert.
im hât sîn frümikeit ein swert
erworben sît er ûzreit
daz den risen als ein wazzer sneit.>
der künic wart fröuden rîche,
er sprach froelîche:
< wol dan, daniel, ziere helt!
der mir mit dem tôde hât gekelt
hiute mangen guoten kneht,
nû hilf daz im geschehe sîn reht.>
dô habten sie sich zesamene.
dô gienc ez ûz dem gamene
und kêrten wider durch die schar.
er was nie sô wol gar,
swer in dâ wolde widerstân,
er muoste den lîp verlorn hân.
dâ sach man vallen tôten
und ungefüege schrôten
helm unde halsperc.
man sach dâ manlîchiu werc
an manger tiefer wunden.
sie ougten daz sie kunden
ritterlîche gebâren
und mit den swerten vâren
grôzer slege unde tief.
manger weinende rief:
< owê! daz ich ie geborn wart!>
dô wart ein strît alsô hart
daz dâ nieman triuwete genesen.
sie wolden gewis wesen
daz die tîvele dâ riten
und alsô freislîche striten.
daniel ersach den risen,
sâ sprach er ze disen
die dâ mit im riten:
< hie wirt niht mê gebiten.
weiz got, ich sihe in dort stân
der uns den schaden hât getân.>
daz ros liez er dar springen
und ouch daz swert klingen
durch menic stehelîn gewant.
swen er vor im vant,
der was drâte erbeizet.
er wart sô gereizet,
dô er den risen stân sach,
daz dehein stehelîn dach
daz houbet kunde bewarn.
er liez daz swert dâ durch varn,
daz es einer niht genas.
swie der man bewart was,
daz half im rehte als ein tou.
owê! wie sêre es in gerou
der sîner slege erbeite!
wande er in des bereite,
dâ mit er iemer was gewert.
hern danieles swert,
des site was sô fremde,
ein klein flähsîn hemde
was dâvor ein alsô guot werc
als ein helm und ein halsperc.
weder îsen noch leder
der enschirmde deweder
dâvor niht anders denn ein loup.
swaz er traf, daz zerstoup,
sam ez vol stoubes waere.
sus reit der helt maere
unz er hin zuo dem risen quam.
mit beiden henden er nam
daz guote swert daz er truoc.
dem risen er zeinem slage sluoc
abe beidiu sîniu bein.
des viel er nider als ein stein,
er schrei unde wuote,
daz in sô starke muote,
daz erz im niht vertruoc
und im ouch daz houbet absluoc.
nû was der künic und die drî
dar komen alsô bî
daz sie sâhen des risen val
und ouch hôrten den schal
den er machte mit der stimme,
und sâhen wie in dâ mit grimme
her daniel gesweigte.
der künic sich dar neigte
und sagte im gnâde unde danc.
sît was diu wîle niht lanc
ê sie wider kêrten in daz wal.
dâ wart vil manges mannes val.
daz der rise was erslagen,
daz begunde in sô wol behagen
daz in nieman widerreit
sie erliezen in der arbeit.
sie hulfen im zuo der erde
und vazten in vil werde,
wand sie in niht entsâzen,
dâ wâren sie ûz verlâzen,
sie umbehabten die vîende gar.
der künic hiez ir nemen war,
daz ir niemer deheiner entrünne.
des wart ir schar sô dünne
daz sie des wurden innen
sie mohten in niht entrinnen
und mohten ouch niht gefehten.
sie hâten sich guoten knehten
des tages griulîche gewert.
nû sie sô sêre wâren behert
daz ez in den tôt galt,
in des küniges gewalt
begunden sie sich alle ergeben.
alsô behielten sie daz leben.
daz was an der vesperzît,
daz der angestlîche strît
aller êrst ein ende hâte.
dô gie der künic ze râte,
weder in bezzer waere daz sie biten
oder für sich in daz lant riten.
dô sie daz bedâhten überal,
dô sprach daniel von dem blüenden tal:
< ez ist bezzer daz wir bîten.
swenne wir hie gestrîten,
sô hân wirz lant gewunnen.
ir sult dem liute gunnen
daz ez tâlanc habe sîn gemach.
ir hôrtet wol daz er sprach,
dis landes sint siben schar,
der kome ie tages einiu har,
unde sîn gelêhent darzuo.
von diu weiz ich wol, her kumt fruo
ein alsô grôze geriten
sô diu mit der wir hiute striten.
sô ruofen wir mit dem tiere,
daz bringet sie her vil schiere.
die wîle ruowen doch wir.
ich weiz doch vil wol an mir,
in ist allen ruowenes nôt.
ez waere gewisselîche unser tôt
riten wir für uns in daz lant.
daz befünde man zehant
und würden unser gewar:
sô besamneten sich die sehs schar
und bestüenden uns al gemeine.
dô uns hiute disiu eine
sô lange vor gestanden ist,
sô lebten wir unlange frist.>
den rât lobten sie dô
und wâren alle sament frô
daz in ze ruowene geschach,
unde schuofen ir gemach.
sie sluogen ûf daz velt
manic hêrlîch gezelt.
sie hâten spîse wunder brâht,
sie hâten des alles vor gedâht
daz in lîhte würde nôt.
sie hâten wîn unde brôt,
fleisch unde vische,
dürre unde frische,
môraz unde lûtertranc.
sie sagten im alle danc
daniele, der die risen sluoc
und sie des leides übertruoc
des in dâvon waere geschehen.
sie müesten tôt sîn gesehen,
haete er die risen niht erslagen.
des begunden sie im gnâde sagen,
sie lobten alle daz heil.
daniel fröute sich ouch ein teil,
sam der sînen kumber hilt
und lachet sô daz herze kilt.
ern wolde niemer werden frô
ez engefuogte sich alsô
daz er nâch dem grâfen möhte komen,
der im vor dem berge was benomen,
dâ in daz wazzer widertreip.
dô er bî dem her beleip
wol unz umbe mitternaht,
er dâhte, als im was geslaht,
er wolde hin ze dem berge traben,
ob der stein waere ûf gehaben,
daz er rite nâch sînem gesellen,
der durch sîn baldez ellen
dâ von im gescheiden wart;
waere aber diu strâze noch bespart,
daz er her wider rite.
swenne er den morgen hie gestrite,
daz er aber des selben naeme war
und alsô iemer rite dar
unz er den berc fünde ûfgetân
und man in dar in lieze gân.
nû saz er ûf unde reit.
daz was ein grôz gefuocheit
daz er sich sô verhal
und sich von den liuten stal,
daz dâ nieman inne wart
sîner tougenlîchen vart.
er mante daz ros dester baz.
daz tet er niht wan umbe daz:
ob er dort niht endete,
daz er her wider wendete
ê daz ez ieman würde kunt.
nû quam er in kurzer stunt
dâ er niht fürbaz mohte komen.
im was diu strâze benomen.
daz hâte der rise getân,
der hâte für den wec verlân
einen vil micheln stein.
daz enweste ir dehein,
unz ez daniel gesach.
daz was im zorn unde sprach:
< ich hân niht heiles zuo der fart.
daz der grâve mîn geselle wart,
daz hilfet in harte kleine.
der unsaeligen steine
der stât sô vil an mînem wege
daz ir der tîfel iemer pflege!
daz ich niht wizzen kan
wie ich alder dehein man
im ze hilfe komen sol.
ich haete den willen harte wol,
ich quaeme im gerne, möhte ez sîn.
owê! trûtgeselle mîn!
sol ich dich iemer mê gesehen,
sô wil ich hiute gote jehen
daz ich alle fröude wil ûfgeben.
mir ist iemer mîn leben
unwert und unmaere,
ichn gereche dise swaere
an dem der uns gescheiden hât.
er weiz noch niht wiez im ergât.>
daniel erbeizte,
als in sîn manheit reizte,
und wolde den stein ûf hân gehaben,
daz er darûz möhte traben.
daz enhaeten sîn hundert niht getân.
nû muoste er in lâzen stân.
daz wart im zorn und unwert,
mit grimme zuckte er daz swert
und begunde den stein houwen,
wand er die juncfrouwen
von dem trüeben berge hôrte sagen,
swarûf daz swert würde geslagen,
daz ez daz snite
und rehte niht vermite.
des wolde er werden gewar.
er sluoc ez freislîche dar.
er hâte saelde in alle wîs:
er hiuw den stein als ein îs.
als diz daniel gesach
daz im an dem swerte niht geschach,
nû begunde er balde zouwen
und hâte schiere gehouwen
ein loch sô breit und sô hôch
daz er daz ros dâ durch zôch.
diz dûhte in ein saelikeit,
er saz ûf unde reit
und gâhte für sich vaste.
dar was ein kleiniu raste
dar er dô rîten solde.
dô ez êrste tagen wolde,
dô was er ûf dem velde
bî dem schoenen gezelde
dâ er inne enbizzen was
dô er vor dem wazzer genas.
ê daz er quaeme dar,
dô wart er gewar
daz daz wazzer niht herûz flôz
dâmite man den berc beslôz.
unz er begunde nâhen,
dô sach er in her gâhen
der in von sînem gesellen schiet.
sîn manheit im dô geriet
daz er in vaste rante an.
daz selbe tet im jener man.
sie neigten beide diu sper,
daniel hin und jener her.
sie nâmen ein ander der brust war
und stâchen alsô vaste dar
daz diu sper niht lenger werten.
sâ griffen sie zuo den swerten,
sie zerhiuwen die schilte zehant,
darnâch daz stehelîn gewant.
ez gienc nâch an daz leben.
ir ietweder begunde dem andern geben
grôzer slege alsô vil,
unz sie erhuoben ein spil,
daz ir deweder nie gewan
sô grôze nôt von einem man.
der wider daniel vaht,
der hâte rîche maht,
daz tet er mit slegen schîn.
under dem halsperge sîn
truoc jener ein guote hût,
diu was im liep unde trût.
si was einem merwîbe
gesniten von ir lîbe.
diu half im daz er genas,
wande sie gebeizet was
in eines wurmes bluote,
daz er in frîem muote
vaht mit swem er wolde
und doch niht wunden dolde.
dô daniel wart innen
daz er sîn niht gewinnen
mit dem swerte kunde,
des vorhte er daz diu stunde
verenden wolde sîn leben.
er begunde im solich slege geben
die wol des tôdes knehte
mohten sîn mit rehte,
wan daz er in niht versneit.
ouch galt er im die arbeit
mit sô rîcher gülte
daz er niht enschülte,
lepten sie noch beide.
haeten sie mit eide
die selben arbeit gelobet,
sie endörften hân getobet
herter denn sie tâten.
die stegereife sie trâten,
dô sie gegen ein andern sturnden
die zwêne wunder zurnden!,
diu swert sie hôhe ûfzugen,
nâch den swerten sie sich bugen
sêre mit des herzen kraft:
sie wâren beide manhaft.
dô sluoc der ritter daniel,
daz sînem kampfgenôze enpfiel
der halsperc und der helm
in stucken nider in den melm.
doch hâte er sîne hût an
und was ein wol behuot man.
sie quâmen ze fuoz, daz tet in nôt,
diu ros gelâgen beidiu tôt.
sie hâten willen beide,
ir ietweder tet ze leide
dem andern swaz er mohte,
unz ez niht lenger tohte
und daniel den tôt entsaz.
des werte er sich dester baz,
wande er des lîbes gerte.
er gap im mit dem swerte
ûf daz houbet einen slac
dâvon er sô sêre erschrac
daz er für sîn füeze viel.
dô vienc in her daniel
und hiez in balde sagen
ob er den grâven haete erslagen
oder waz im waere geschehen.
nû enwolde er nihtes verjehen
unde was doch niht wunt,
durch daz er zuo der stunt
gesweic unde niht ensprach.
diz was daniele ungemach,
daz er âne nôt was geswigen.
er gie hin und liez in ligen.
er sprach:< ich wil dich leben lân.
waz dû mînem gesellen hâst getân,
daz wil ich iesâ besehen.
daz muoz ouch dir beschehen.
daz gelobe ich triulîche dir,
oder dû entrinnest mir.>
er folgte der strâze in den berc,
dâ in daz wunderlîche werc
von sînem gesellen nam.
unz er hin darzuo quam,
er ersach an dem steine,
er erhüebe in vil wol eine.
den liez er nider schiezen,
daz wazzer herûz fliezen
anders niht wan umbe daz,
sô dem ritter würde baz,
daz er im niht möhte gefolgen.
er was vil sêre erbolgen
umb den grâven, der im dâ was benomen,
und was ouch alsô dar komen
daz er in dâ niht wolde lân.
er begunde für sich gân
unz des berges ende wart.
nû was diu strâze bespart
mit einem wunderlîchen tor.
dâ stuont ein kleinez netze vor,
daz was mit listen sô gemacht,
ez waere tac oder naht,
daz ez nieman ensach.
swem sô tumplîche geschach
daz er ân urloup dâhin
wolde ûz oder in,
der viel nider und verwar
sich darin alsô gar,
der in an ein fiur haete geleget,
ern kunde hân gereget
weder fuoz noch hende.
ez was ein solich gebende,
ern mohte hin noch her.
in lôste alrêrst etswer
der ouch des netzes kunde pflegen,
er waere anders iemer dâ gelegen.
daniel quam an die stat:
dô er in daz netze getrat,
owê! wie sêre er dô erschrac!
er viel nider unde lac
und was in kurzen stunden
sô sêre mite gebunden
daz er niht triuwete genesen.
er wolde vil gewis wesen
daz in der tîfel hebete.
mit der hant er strebete,
und wolde sich gesegnet hân.
daz muoste er under wegen lân.
er mohte einen vinger niht geregen,
er mohte niht mê geregen,
wan diu ougen und die zungen,
dô er sô wart betwungen.
dis wart ein juncfrouwe gewar,
diu hâte daz netze gesetzet dar,
sît der ritter ûzreit.
dô si von dem netze schreit,
dô viel her daniel darin.
nû sach diu juncfrouwe hin.
dô si in drin vallen sach,
si lief dar unde sprach:
< ritter, ir hât den lîp verlorn,
irn kundet niemer hân erkorn
ein unsaeliger vart.
ir hât iuch übele bewart.
owê! waz welt ir her?>
< hêriu frouwe,> sprach er,
< sagt mir ê wie mir sî,
daz ich sus lige als ein blî,
und waz mich mîner krefte letze.>
< ir liget in einem netze,>
sprach diu juncfrouwe dô.
er sprach:< wie ist dem netze sô,
oder wie ist mir sô geschehen
daz ich des niht mac gesehen?>
si sprach:< des sît ir wol erlân.
möhtet irz wol gesehen hân,
sôn waeret ir drin gevallen niht.
wande ez nieman ensiht,
des ist ez manges mannes val.>
dô sprach der von dem blüenden tal:
< nû helfet mir ûz dem netze
umb ein pfant daz ich iu setze
mit ritterlîchen triuwen,
daz ich gerne âne riuwen
iuwer gevangen wesen wil.
ez sî wênic oder vil
swaz ir mich heizet lîden,
daz ich des niht wil vermîden.
und sult mich einer gâbe wern,
der wil ich an iuwer gnâde gern
und suoche es gerne iuwern fuoz:
ob ich den tôt lîden muoz,
sô gebt mir êrste ein gebe,
ob ieman in der werlte lebe
der iu iht leides habe getân,
daz ir mich daz wellet rechen lân,
daz ich frümeclîche verkoufe mînen lîp
und niht enstirbe als ein wîp.>
des was diu juncfrouwe gereit.
si nam des sîne sicherheit,
swaz si in tuon hieze,
daz er daz niht enlieze.
ûz dem netze si in want
unde nam in bî der hant,
si fuorten in einen holn stein,
der stuont dâ nâhe bî in zwein.
dâ was inne guot gemach,
wan daz er nieman ensach
wan die juncfrouwen unde sich.
ez dûhte in harte wunderlich,
unz erz sît ervant.
diu frouwe hiez in zehant
über ein tavelen sitzen gân,
die sach er dâ gerihte stân.
haete er daz versprochen,
sô haete er zerbrochen
sîn triuwe und sîn wârheit,
wand er swuor ir einen eit,
er taete swaz si in hieze,
unz si in ledic lieze.
dâ was spîse genuoc.
als aber in sîn wille truoc,
er haete nihtes enbizzen,
daz er möhte wizzen
waz im dâ künftic waere,
und haete gerne ein maere
von sînem gesellen vernomen,
nâch dem er dar was komen,
weder er noch lebete
oder wie er sich gehebete.
dâ nâch was sîn angest grôz,
daz in des ezzenes bedrôz.
dô diu juncfrouwe gesach
daz im dehein liep dâvon geschach,
nû wolde si lenger niht gedagen,
si sprach:< herre, ich wil dir klagen
wie ez hie ze lande stât,
wie sich unser herzeleit hât
gebreitet und gemêret
und wie sich hât verkêret
unser fröude in diseme jâre.
ir vernâmet ze wâre
groezer herzeleit nie.
mîn vater der was herre hie.
der was ein sô hövesch man
daz er nie sô liebes niht gewan
âne mîn muoter, sîn wîp,
und âne sîn selbes lîp,
swer es haete gegert,
er haete es in zehant gewert.
er hiez machen daz gezelt
für den berc an daz velt
und lêhende die darzuo
die beidiu spâte unde fruo
ein tavele dar inne ze prîse
berihtent mit der spîse
diu danne hoeret zuo dem tage.
swen sîn wec dâ für trage,
ob er ezzen geruochte,
daz er ez dâ suochte
und ez ouch dâ vinde gereit.
ez ist alsô ûfgeleit,
swelh spîse den tac dâ inne stât,
unz diu naht ane gât,
die nimet man danne alle gar
unde treit ander dar.
diu stât dâ unz ez wil tagen:
sô wirt ander dar getragen.
dô sô manic hövescheit
von mînem vater wart geseit,
des quam dâher ein merwîp.
der was aller ir lîp
als ein rôse getân.
mit der sach man rîten unde gân
ein vil wunderlîchez here.
si was küniginne in dem mere
über diu merwunder,
diu dienten ir alle besunder.
diu was hie rehte vier tage
unz si von sehene und von sage
allez mîns vater dinc erfuor.
bî ir lîbe si swuor,
ez waere allez sament wâr
daz ir nû manic jâr
von im gesaget waere,
si haete wol die maere
mit der wârheit vernomen,
sin gesaehe nie man baz vollekomen
âne den künic artûs,
dem enkunde mit dem hûs
nieman sich gelîchen,
dem müesen sie alle entwîchen.
dô si schiet von hinnen,
dô gâp sî im ze minnen
eine hût alsô guot,
dâ under er ist wol behuot
daz in dehein wâfen
mit wunden niht mac gestrâfen,
und gap im ouch diz netze
daz ich für dise strâze setze.
ez enwart nie tier sô freissam,
ez waere wilt oder zam,
daz iemer dâ für gefüere,
swenne ez sich drin gewürre.
ez enwart nie dehein swert
sô guot noch sô wert
dâmite man daz netze snite.
dannoch gap si im dâmite
ein salben sô reine,
swer ir ein vil kleine
strîchet an sîn ougen,
dem ist daz niht tougen,
er gesaehe des nahtes alsô wol
sô man des tages gesehen sol.
der mac ouch diz netze sehen.
dannoch ist im baz geschehen:
im würden sîn ougen sô klâr
daz er wol ein kleinez hâr
in niuniu kunde gespalten.
die salben hân ich gehalten.
nû vernemet durch got
wie der tîfel sînen spot
in disem lande hât gemacht.
unser tac ist worden ze einer naht.
ez ist rehte hiute ein jâr
dô sante uns leider, daz ist wâr,
der leidige tîfel sînen boten.
der hât uns fröude verboten
und hât uns herzeleit gegeben,
dâ müezen wir iemer inne leben.
uns enhaete nieman niht getân
der uns bestanden wolde hân
mit swerten und mit here.
diz lant lît einhalp an dem mere,
und ist dâ engegen alsô guot
daz uns nieman niht entuot:
anderhalp stât dirre berc dâvor.
swenne wir besliezen daz tor,
sô entaete uns nieman kein leit.
diz lant ist zweier mîle breit
und hiez ze der grüenen ouwe.
hie hât manic edel frouwe
in disem jâr ir man verlorn.
haete al diu werlt über uns gesworn,
wir waeren wol hinnen vor in genesen.
nû solden wir niht lenger wesen
mit fröuden und mit êren.
dô begunde her kêren
der tîfel al sîne kraft
und ist hie worden sigehaft.
hie ligent tôt zewâre
alle die man in disem jâre
die in disem lande solden sîn,
die knehte und die knebelîn.
swaz hie knaben wirt geborn,
die hânt zehant den lîp verlorn.
sie sîen junc oder alt,
in hât des tîfels gewalt
genomen allen den lîp.
hie lebent niht wan diu wîp.
die man sint sô gar verswant,
ersuochet ir al diz lant,
irn fündet niht vollen drîzic man.
der sîn leben ie gewan,
er gesach nie sô grôze nôt.
die selben müezen ligen tôt
ê denne dirre tac ergê.
als ich iu sagete ê,
ez wirt rehte hiute ein jâr
dannoch war uns niht ein hâr,
daz was des tîveles nît,
dô hâte mîn vater hochgezît,
die groesten die er ie gewan.
dô quam gegangen ein man,
der was kal unde rôt.
swaz er den liuten gebôt,
daz muose allez für sich gân.
swie harte ez waere missetân,
sin getorsten ez niht lâzen.
dô sie ob den tischen sâzen
mit fröuden bevangen,
nû quam er zuo gegangen
und sprach daz sie niht enbiten
und hein giengen unde riten
und im al gemeine
grôz unde kleine
die liute braehten für sich.
dô huop sich menclich.
sie begunden ûf wischen
vil balde von den tischen
unde îlten vil drâte,
als er geboten hâte,
und brâhten im al gelîche,
arm unde rîche.
die dâ siech wâren,
die machte man ûf ros bâren.
sus quâmen im die liute dar
alle sament als gar
daz man über diz lant
einen menschen niht envant
ern quaeme dar, als er gesprach.
unz er sie alliu gesach,
nû sagte er in für wâr,
er wolde hie wesen diz jâr,
er haete ein siechtuom sô getân
daz er ein bat müese hân
in der wochen zeiner stunt
und würde harte wol gesunt
swenne er daz ein jâr getaete.
swaz mannes namen hie haete,
die solden in alle tage gesehen,
des müese allez geschehen.
an der stat tôte er hundert man
und alsô vil unz er gewan
bluotes eine bütene vol,
ez geviele in übel oder wol.
dar inne wolde er sich baden.
im kunde nieman niht geschaden,
des begie er michel mort.
swer gehôrte sîniu wort,
der wart tumber denne ein huon,
und mohte im niemer dehein leit getuon
mit werken noch mit râte.
den er vil drâte
in daz fiur hieze gân,
der möhte des niht verlân,
swen er stille heizet stân,
der mac dannen niht gegân.
wil er in gar zersnîden,
des muoz er allez lîden.
swie schiere ein woche was ergân,
sô wolde er aber ein bat hân
und hât daz getriben
unz hie niht ist beliben,
wan die er noch hiute toeten wil.
der enist aber borvil.
dô er allrêrste her quam
und man sîniu wort vernam,
dô lac ich dâ vil nâch tôt
und wart iedoch, dô erz gebôt,
alsô siech für in getragen.
nû was mir diu nôt geslagen
für diu ôren sô gar
daz ich nie wart gewar
ob er ie kein wort gesprach.
dô ich sît genas und gesach
daz sie sô gar vertôrten
die sîn rede gehôrten,
dô verstal ich mich eine
her ze disem steine
und bin ie sît hie inne.
swenne ich mich versinne,
dô gehôrte ich sîn rede nie.
in hôrten aber alle die
die in disem lande sint:
des sint sie tumber denne kint.
er gebôt ouch mînem vater daz
daz er gewâfent ûf saz
und zallen zîten ûz reit.
swem er den sic abgestreit,
des bluot muose ouch in daz bat.
sô stât ein netze ouch an der stat,
swen mîn vater dar inne ervert,
dem ist daz selbe beschert.
ez sint hiute siben tage
daz er nâch solhem bejage
des morgens dâ hin für reit
und einen ritter an gestreit.
den sic er an ime vienc.
dô ez im harte wol ergienc
und herin wolde traben,
dô sach er zwêne man haben,
die wâren ze dem gezelte komen
und wolden im gerne hân benomen
beidiu den lîp und den man,
wan daz er in kûme entran
her in den berc ze dem steine.
nû beit er unz der eine
für den stein her in quam.
dem andern er sîn vart benam
und lie den stein nider varn.
ern kundes niht bewarn,
waeren sie beide her in komen,
sie haeten im den lîp benomen.
daz bescheinde wol der eine.
der bestuont in bî dem steine
und brâhte in in sô grôze nôt
daz er nie mê den tôt
alsô kûme vermeit.
swaz mîn vater ê gestreit,
daz was allez ein wint.
sie wâren allesament kint
mit den er ie dâvor gevaht.
den langen tac unz zuo der naht
sach ich sie sament ringen
mit sô freislîchen dingen
daz ichz iu niemer kan gesagen.
ir ros diu wurden beidiu erslagen.
mîn vater enpfie sô mangen slac
daz er vier tage ze bette lac,
und waere doch tôt gelegen,
solde ers iht lenger hân gepflegen.
ez was dâ bî des berges tür,
dâ flôch mîn vater her für
und lief bî dem netze hin.
dô viel der ritter darin.
dô gewan er im den sic an
und fuorte in für den siechen man,
daz er sîniu wort vernam.
des wart er bloede unde zam.>
daniel frâgen began:
< frouwe, lept der selbe man?
daz lât mich wizzen durch got!>
si sprach:< ich sage iu âne spot,
sîn leben ist boese, als ich iu sage.
sîn bluot müeste an dem selben tage
zuo dem bade sîn getân,
möhte er in überwunden hân,
ê daz bat waere gemacht.
dô vâhten sie unz an die naht.
aller êrst wart er gefangen,
dô was daz bat ergangen.
von den schulden lebt er noch.
sîn bluot muoz aber iedoch
hiute des tages zuo dem bade.
hiute geschiht mir ouch ein schade
des ich niemer vergezzen mac.
got helfe mir daz ich disen tac
niemer müeze überleben.
die gnâde müeze mir got geben.
mîner brüeder lebent noch viere.
sô kumt mîn vater schiere:
der ist dâhin ûz geriten.
sô wirt niht lenger gebiten,
er entuo in allen den tôt.
wie solde ich danne dirre nôt
iemer vergezzen?
nû hât ir iuch vermezzen,
ir stât in mînem gebote
und hât gesworn bî gote,
desn dunke iuch niht ze vil.
nû wil ich iu teilen ein spil:
tuot dem siechen man den tôt
oder lîdet dise nôt,
die maniger hie geliten habe,
oder slahet mir daz houbet abe,
daz ich die nôt niht gelebe
und den lîp mit in ûfgebe.
dirre dinge sint driu,
herre, dar under welet iu.
swelhez ir der tuot,
sô sît ir biderbe unde guot
und rîtet iuwer strâzen,
sô wil ich iuch ledic lâzen.>
daniel sprach als ein helt:
< ich hân vil schiere erwelt,
ich riche iuch an dem siechen man.
ob aber ich daz niht getuon kan,
sô muoz mîn bluot zuo dem bade
ê ich iu ze dem lîbe iht schade.
ir sît iemer von mir unerslagen.
frouwe, kunnet ir mir gesagen,
mac ich dem siechen zuo komen?
ich hân mich schiere des benomen
daz er mit mir niht enschaffet,
swie vil er geklaffet,
daz ich des niht darf vertôren.
ich schiube für mîn ôren
ein vil wolgebertez wahs.
sô hân ich ein guot sahs,
mac ich im genâhen,
er muoz den schaden gevâhen.
ich hân ein swert alsô guot
und hân ouch alsô guoten muot
daz ichn wol verhouwe.>
dô sprach diu juncfrouwe:
< ir muget zuo im komen niht.
swenn er iuch aller êrst siht,
an der stat müezet ir stille stân,
ern heize iuch denn dar nâher gân,
oder er gât iu aber zuo.>
er sprach:< sô râtet mir swaz ich tuo.
im ist der lîp unbenomen
ichn müge im dar nâher komen.>
diu frouwe sprach:< ich sage iu gar,
komet ir alsô toup dar,
sô frâget er iuch harte vil
alles des er danne wil.
schiebet ir dan für diu ôren iht,
sôn muget ir gehoeren niht
waz ir im ze antwurte sult geben.
sô lât er iuch niht lenger leben.
er ist sô unreine,
er heizt iuch zeinem steine
werden vil schiere
oder zeinem tiere
oder swâ zuo er wil.
sînes gewaltes ist sô vil
den er von tîfeln hât
daz ez niht anders vergât,
wan daz er iuch verfluochet.
daz hân ich wol versuochet
und sage iu wâran.
ich vienc ouch einen man,
des sint wol zwelf wochen,
der wolde mich hân gerochen,
daz er ouch sîn ôren verschoup.
des wart er leider alsô toup
daz er niht hôrte waz er sprach.
als der sieche daz gesach
daz er sîn wort niht vernam,
des wart er im alsô gram
daz er im begunde fluochen.
der iemer solde suochen,
der fünde kein marteraere
der dem gelîch waere
als er in dô stalte
mit des tîfels gewalte.
er hiez in vallen zuo der erden
und hiez in balde werden
beidiu toup unde tump,
darzuo blint unde krump.
diz geschach im allez gar.
dô was ich geslichen dar,
daz ich sîn gebaerde wol sach.
ich enhôrte niht waz er sprach.
ich verschoup ouch mîn ôren,
daz ich niht dörfte vertôren.>
daniel sprach:< sô hoere ich wol,
swer vor im genesen sol,
der muoz verre von im wesen,
bî im kan nieman genesen.
saget doch wâ der sieche sî.>
si sprach:< er ist hie nâhe bî.>
er sprach:< nû saget mir rehte,
wâ sint nû die guoten knehte
den er hiute den tôt tuot?
wâ gegen hât er sie behuot?
ald wenne sol ir ende ergân?>
dô sprach diu frouwe wolgetân:
< sie sint dâ er geboten hât,
bî dem hûse daz dâ stât
in einem boumgarten.
wan daz er wolde warten
ob mîn vater ieman erwürbe
der mit den andern stürbe,
unde sîn dâ beitet,
daz bat waere nû bereitet,
sie haeten alle den tôt erkorn,
und hânt ouch lîhte den lîp verlorn.
sît mîn vater niht wil komen,
im ist ouch lîhte der lîp benomen,
und gonde ich im des alles wol
sô er doch noch hiute sterben sol.>
daniel vorhte sêre
daz er beidiu lîp und êre
und ouch den grâven verlüre.
er kunde keinen rât dâ füre
noch enweste wâ er den solde suochen
der im von des mannes fluochen
deheinen fride möhte geben.
ez enstuont im niht wan umb daz leben.
er sprach:< frouwe, ich wil gân,
mich mit den andern toeten lân
und lâze in mit mînem bluote baden.
ich getriuwen dem man niht geschaden.
sît er mit fluochen strîten kan,
sô ist er vor mir ein frî man.
ich leiste sus iuwer gebot.>
si sprach:< mîn herre, durch got,
ir hât ein ritterlîchen lîp,
sô bin ich ein vil armez wîp
und hân alle die verlorn
von den ich ie wart geborn,
die mir guot solden wesen.
ich lâze iuch gerne genesen
darumb daz ir mir tuot den tôt,
daz ich die jaemerlîchen nôt
niht dürfe geleben.
warumbe woldet ir iuwern lîp geben?
iuwer leben ist nützer denn daz mîn
die wîle ir lebende muget sîn.
sô lât iu niemer des gezemen
daz ir iuwern lîp lâzet nemen
âne aller slahte nôt.
lîdet ir nû durch mich den tôt,
ir gevallet mir niemer dester baz.
swenn ich nû gesihe daz
daz ich einic muoz sîn
der brüeder und des vater mîn,
sô wil ich mich selber toeten.>
si begunde in vaste noeten
daz er sie naeme von den tagen.
daz begunde er ir versagen.
dô sprach diu frouwe:< dês wâr,
sô wil ich kürzen mîniu hâr
und wil mannes gewant
über mich sloufen zehant.
sô waenet er dâ bî
daz ouch ich ein man sî.
und wil mit iu dar gân,
sô wirt ouch mir der tôt getân
mit mînen brüedern und mit mînem vater.>
harte minneclîche bat er
die juncfrouwen daz verbern,
des enwolde si in niht wern.
< iuwer hâr ist lieht unde val,>
sprach daniel von dem blüenden tal,
< daz sult ir niht absnîden.
welt irz durch mich vermîden,
ich wil iu güetlîche sagen,
ê ich noch hiute wirde erslagen,
ich versuoche allez daz ich kan.
ich waere niht gerne ein tôt man,
ich genise vil gerne, mac ez sîn,
tuot ez durch den willen mîn,
stêt verborgen dâ bî
dâ dîsiu nôt hiute sî,
unz ir ersehet wiez uns ergê.
waz sol nû lange rede mê?
ich wil gerne dâ streben
daz wir behalten daz leben.>
diu frouwe was des trôstes frô
unde lobte im alsô,
si wolde tuon des er sie bat,
und stân verholn an einer stat
unz si daz gesaehe
waz im dâ geschaehe.
danielen wîste si zehant
dâ er den boumgarten vant.
er gie mit fuoge darin
unde quam zehant hin
dâ er die guoten ritter sach
die daz grôze ungemach
des tages solden lîden.
nû wolde er niht vermîden,
er naeme sînes gesellen war.
er besach die guoten ritter gar
unz daz er den grâven vant,
und hâte in vil schiere erkant.
dô er quam dar gegangen,
er wart dâ niht enpfangen,
weder sie sprâchen noch nigen.
durch daz sie sô stille swigen,
sô sweic er unde sprach niht,
er vorhte des, und spraeche er iht,
daz der sieche lîhte dâ
sô nâhe waere etswâ
daz er die rede gehôrte
und im sîn gewerp zerstôrte.
als daniel gesach
daz im dâ nieman zuo sprach,
dâmite wart er innen
daz sie von ir sinnen
gar gescheiden wâren,
und begunde ouch gebâren
vil rehte alse sie.
sîn ouge im allez umbe gie
und begunde vil eben lâgen
alles des sie pflâgen.
der selben gebaerde pflac ouch er.
nû gie der sieche dort her,
der wolde niht lenger beiten,
er wolde sîn bat bereiten.
ze einer bütenen gie er stân
und hiez sie alle dar gân.
dô liefen sie balde hin.
dô lief enmitten under in
daniel vom blüenden tal.
mit listen er sich vaste hal,
doch tet erz mit sorgen.
sîn swert truoc er verborgen
under sînem gewande alsô bar.
vil schiere quâmen sie dar.
nû ergreif der sieche zwâre
den naehsten bî dem hâre
und zôch im abe sîn gewant
unz er wart blôz als ein hant:
der muose der êrste sîn.
den begunde er stechen als ein swîn.
über die bütenen er in huop,
gegen dem herzen er im gruop
mit einem mezzer unsuoze.
in der selben unmuoze
sleich daniel hinder im zuo,
weder ze spâte noch ze fruo,
und sluoc im ab daz houbet.
dô haete er sich vil schiere geloubet
daz er nieman mê stach
noch der worte niht ensprach
die ieman quaemen ze schaden.
sus was verendet sîn baden.
die dâ stuonden umbe in,
die gewunnen wider ir sin
und sprâchen:< wie ist uns beschehen?>
swie sie ez haeten gesehen
vor in allez daz jâr,
doch enwesten sie für wâr
rehte waz diu rede was,
wan sît daniel genas
und er den siechen hâte erslagen.
sâ begunde er in sagen,
dô er aller êrst dar quam,
wie er in die sinne benam,
waz er in haete geschadet
und wie er haete gebadet
mit ir bluote daz jâr.
dô sprâchens alle:< dêst wâr.
wir sâhenz vor uns iemer sît
und gedâhten nie ze keiner zît
daz wir im entrünnen
oder den muot gewünnen
daz wir uns haeten gewert.
uns müeste der tôt hie sîn beschert,
des enkunde nieman bewarn,
haetet irz sus niht undervarn.>
unz hâte er sich versunnen
der grâve von dem liehten brunnen,
er sprach:< sît wilkomen gote,
ir sît benamen sîn bote,
er hât iuch her gesant.
mich lôste ouch iuwer hant
dâ heime ûz mînem torne.
ich waere der verlorne
dort alsô wol sô hie.
mir wider fuor nie
von einem man sô grôz êre.
ich engeren nihtes mêre,
wan gefuogte sich daz
daz ich dâ wider etswaz
müeste tuon, sô waere ich frô.>
daniel sprach aber dô:
< ich bringe iuch schiere an ein spil,
haete ich drî stunt alsô vil
getân gegen iuwern hulden,
ir möhtet ez wol verschulden.>
der grâve sprach:< nû wol hin!
ich hân lîp unde sin
von iu, des wil ich iemer jehen.
tuot ez durch got und lât mich sehen
wâ ich diz verdienen müge,
und seht ob ich ze man iht tüge.>
die ritter sprâchen alle dô:
< er hât uns gemachet frô,
wir suln alle mit im dar
und sehen vil gerne wiez dâ gefar,
sît wir den lîp von ime hân.>
diu juncfrouwe wolgetân,
diu in dâ hâte gevangen,
diu quam dô zuo gegangen
und enpfienc in an der stunt,
sô mir nie mê wart kunt
ob ieman wart enpfangen baz.
ir ougen wurden vor fröuden naz.
si gie dâ si ir muoter vant
und sagte ez ir, diu quam zehant.
diu enpfienc in unde bat ir sagen
ob ir herre waere erslagen,
oder waz im anders waere geschehen.
er begunde der wârheit verjehen,
er sprach:< ich sach in hiute fruo,
dô quam ich im geriten zuo.
an dem êrsten gruoze
sazte er mich ze fuoze
und haete mich nider nâch geleit,
wan daz mich mîn saelikeit
von sînen handen gewan,
daz ich vil kûme von im entran
her in den berc zuo dem tor.
dâ beslôz ich in vor,
er haete mich anders erslagen.>
dô wolde er niht rehte sagen
wiez was ergangen.
sîn herze was bevangen
mit fröuden, der hâte er genuoc,
daz er in niht ze tôde ersluoc
und in noch lebendic weste,
daz was im daz beste.
er ist noch ein saelic man
der sînen muot gehaben kan,
daz er sîn niht enlât
sô in zorn ane gât.
haete er den man erslagen ê,
daz taete nû sînem herzen wê.
ritter unde frouwen
die giengen alle schouwen
für den berc an daz velt.
nû was er komen in daz gezelt
beidiu sinnic und gesunt.
dô zeigten sie im an der stunt
hern danieln ir trôst.
si sprach:< er hât uns erlôst,
dem danket daz ich sinnic bin.
wir sîn alle âne sin
diz lange jâr gewesen.
hie enist niht manne mê genesen
wan ir unde iuwer kint
und die ritter die hie sint.
daz ir noch den lîp hât,
des danket dem ritter der hie stât.>
er sprach und neic vil tiefe dar:
< herre, wîset mich, wie oder war
dâ ich verdiene mîn leben
umb iuch, daz ir mir hât gegeben.
mîn unsin hâte mich vertragen
daz ich iuch wolde hân erslagen.
herre, dô gesigtet ir
harte lobelîche an mir
unz ich mich des lîbes hâte ergeben.
got lône iu, dô liezet ir mich leben
und hulfet daz ich vor dem genas
der des vil gewis was
daz ich den tôt müeste hân erkorn.
ich was mit alle verlorn,
nû hât ir mich wider gewunnen.
dâvon sult ir mir gunnen
daz ich daz gedienen müeze.
mîn wille der ist süeze,
daz ichz verschulde, swie ich sol.
des gunnet mir, sô tuot ir wol.>
daniel sprach:< nû wol dan!
ir redet als ein from man.
heizet uns ros gewinnen.
wellet ir mit mir von hinnen,
ich bringe iuch schiere an ein stat
dâ ich muoz lîden ein bat
ob ich michs niht erwern kan,
daz nie man ergerz gewan.
ezn ist niht anders wan der tôt.
dâ ist mir iuwer hilfe nôt.>
< nurâ,> sprach er,< ros her!
daz ist ein dinc des ich ger,
daz ich in ze hilfe müeze komen,
sît er mir daz hât benomen
daz ich mîn ende hiute niht ennime.
mac ichz getuon, ich hilfe ouch ime.>
dô wart ein michel gâhen
nâch rossen, dô sie sâhen
daz ir herre wolde rîten.
in vil kurzen zîten
wâren diu ros komen.
dô wart dâ urloup genomen.
dô nam diu frouwe
von der grüenen ouwe
danielen bî der hant.
si sprach:< haete mîn lant
alsô vil ritter zwâre
als ir was vor einem jâre,
die müesten alle mit iu dar.
got selbe sî der iuch bewar.>
nû reit daniel dannen
mit sehs und zweinzic mannen
die im alsô wol tohten,
swaz sie volbringen mohten,
als sîn gebornen mâge.
sie sazten an die wâge
beidiu lîp unde guot.
swer daz beste gerne tuot,
dem sol man danken swâ man kan,
sô geliebet im daran.
dô sie zuo dem berge riten,
nû lac der rise dâ versniten
den herre daniel dâ sluoc.
des wunderte sie genuoc
und sprâchen sîn gesellen:
< swer disen mohte gefellen,
der was ein helt zuo den handen.
vor dem waere niht bestanden.>
daniel versweic daz.
nû quâmen sie fürbaz
in den berc zuo dem steine
und sprâchen al gemeine:
< owî! welhez swert der truoc
der diz loch hie durch sluoc!>
herre daniel trôste sie:
< der diz loch hie durch hie,
der tuot swaz ich gebiute,
und hilfet uns noch hiute
vil manlîche in unser schar.>
dô sprâchen sîn gesellen gar:
< sô kan uns nieman widerstân,
er muoz den lîp verlorn hân.>
diz was ein michel frümekeit
daz daniel von dem künige reit
rehte umbe mittenaht
wande er nâch sînem gesellen vaht,
dem grâfen von dem liehten brunnen,
den hâte er wider gewunnen
und quam dar wider alsô fruo
dem künige artûse zuo
ê sich hüebe der strît.
ez was aber an der zît
daz sie aber komen solden
die dâ turnieren wolden.
dô sie durch den berc quâmen,
sâ hôrtens und vernâmen
daz tier schrîen starke,
als über al die marke
ein abgründe solde werden
und der himel zuo der erden
brechen wolde an der stat.
des wâren sie zehant sat
die dâ wâren umb daz tier.
sie stiezen im die banier
schiere wider in den munt.
nû quam geriten wol gesunt
daniel mit den sînen,
die er gerne lieze schînen,
swâ sie ez bescheinen kunden,
daz sie im vil guotes gunden.
dô sie der künic komen sach,
des nam in wunder unde sprach:
< wenne reit daniel hin?>
nû was dô nieman umb in
der des weste dehein wârheit,
wand er verholne dannen reit.
er tet im guoten willen schîn
und hiez in wilkomen sîn.
nâch dem gruoze
wart im niht diu muoze
daz er die maere haete vernomen,
und sâhen dort gâhende komen
zwei tûsent ritter wol gar.
dô sie der wurden gewar,
sît wart dâ niht getwelt.
dô fuor manic küen helt
in den satel âne stegereif
und erbeite kûme unz er begreif
beidiu sper und schilt.
ez wart lenger niht gestilt,
sie huoben sich als ein wint hin.
ouch quam dar menger gegen in
der sie lützel entsaz.
dô dûhte sie manic ros ze laz,
sie waeren alle gerne dar
zaller vorderst an der schar,
des begunden die mit vlîze gern.
dô wart ein bresten von den spern,
sam ein walt dâ braeste zetal.
darnâch huop sich ein schal
mit den swerten ûf die lide,
sam ez allez waeren smide
und slüegen ûf ir anbôz.
ahî! wie mangen slac grôz
der künic artûs dâ sluoc!
er was des andern pfluoc,
er brach vornen hin durch
und machte ein alsô wîte furch
daz sie alle nâch im riten.
er begunde nider witen
ros unde liute.
sam der machet ein geriute
und kêret sînen vlîz daran
und houwet allez daz har dar
daz im dehein schaden birt
unz daz der acker from wirt,
alsô sluoc erz nider allez gar
swaz im deheinen schaden bar,
ez waere ros oder man,
unz er umbe sich gewan
ein wîte harte guote:
er vaht mit stolzem muote.
sîner swester sun her gâwein
der was der aller besten ein,
daz bescheinte er dicke anderswâ
und ouch des selben tages dâ:
er was ein tiurlîcher degen.
er kunde einen solichen segen,
swer den segen dâ zim erwarp,
der viel nider unde starp:
ez wâren slege alsô starc
die durch bein und durch marc
swinde fuoren als ein wint.
er stilte dâ diu kint,
daz sie niemer wurden lût.
er gap in ûf ir hût,
daz sie ir weinen liezen sîn.
er tet des tages dicke schîn
daz er wol justen kunde
und ouch niht êrst begunde.
her iwein sîn geselle,
der machte ein solh gevelle
dô er durch die vîende brach,
swie verre in der man gesach,
den dûhte, er waere im ze bî,
und haete der andern drî
gerner bestanden.
swer im quam ze handen,
hinden oder vorne,
der was der verlorne,
swâ er quam in sîn umbesweif
sô nâhe daz in sîn swert ergreif.
der küene helt parzivâl
er sluoc diu schoenen goltmâl
diu ûf den helmen lâgen,
daz diu houbet diu ir pflâgen
zerbresten muosten und zerspalten.
swen er traf, der muoste erkalten,
er was dâvor nie sô warm.
er muoste werden alsô ein arm
daz er verlôs sîn bluot,
darzuo lîp unde guot
und allez daz im got ie verlêch,
unz daz er dâ zuo gedêch,
rehte als er nie enwürde.
ez was ein swaeriu bürde
die parzivâl der helt guot
ûf manges mannes rücke luot.
danieln von dem blüenden tal
den sach man rîten durch daz wal
daz aller hêrste phat
daz dehein man ie getrat.
neben im an sîner sîten
sach man den herren rîten
von der grüenen ouwe.
der enbôt dehein drouwe
wan daz der tôt nâ quam.
wie rehte froelîche gezam
daz er gedienen solde
daz daniel durch in dolde
dô er in lôste von dem bade!
daz wart des tages manges schade.
er vaht in der gebaere
sam er ein lewe waere
sîn süne alle viere,
die wâren ouch helde ziere,
sie vâhten, daz daniel sprach:
< wol mich daz ich iuch ie gesach!>
und ander sîn geverten,
wie manlîche sich die werten!
der grâve von dem liehten brunnen
der hâte wider gewunnen,
daz er solde zeigen
ob er deheinen veigen
des tages gemachen möhte
und ob er zeinem manne töhte.
swaz man dem biderben tuot,
ez sî übel oder guot,
daz gilt er gerne zwîvalt.
der grâve galt unde galt,
er leiste des er sich vermaz,
er gelobte daniel daz,
er diente im gerne, quaeme ez sô.
nû was er inneclîche frô
daz ez alsô komen was.
er versneit in daz er niht genas,
swen er lebendigen traf.
er sluoc, daz daz rôte saf
fuor ûz den stahelhüeten.
sien kunden sich niht behüeten
die im bequâmen wol gesunt,
er machte sie siech in kurzer stunt.
nû hoeret ein spaehe maere:
swie vil der liute waere,
dâ was ein griezwarte
der in allen sament gewarte.
swer den andern überwant,
die zwêne schiet er zehant,
sam die grieswarten tuont.
wol zwêne er under stuont,
die schieden sich same harte.
der selbe griezwarte
was geheizen der tôt.
sie muosen sich scheiden durch nôt.
sô sie dâhin wânden wischen,
der tôt begunde sie mischen.
hei! wie man dâ lebte!
wie ieclîcher strebte
daz er dâ ruom erwürbe.
ich waene dâ manger stürbe
der sich es vil lützel versach.
waz dâ ze sagene geschach
daz ê was vil unkunt!
dâ wart manger ungesunt,
dâ wart manger erslagen,
dâ wart manger zeinem zagen,
manger küene als ein swîn,
dâ tet manger sînen zorn schîn.
sie zeigten ieclîches muot,
daz was ze vehtene guot.
sie wâren einmüetic,
des was ir werc spüetic
und zeigte vil deste baz,
ir ieclîcher was gehaz
sînen vîanden
und haete sie mit sînen handen
gerne alle sament geleit.
der mit schalle dar reit,
der haete gerne genomen
waere er ze fuoz dannen komen,
wan im des selben niht enwart.
dâ was hart wider hart,
dâ was starc wider starc,
dâ was karc wider karc.
die wîle der man tohte,
swaz er volbringen mohte,
des wart im allez gestatet.
sie wurden alle gesatet
in der wirtschefte.
dâ wart mit grôzer krefte
geleit und gegâhet.
er waere dâ gar versmâhet
der sich senfter gebaerde haete angenomen
und waere im doch lîhte ze schaden komen.
dô die guoten knehte
mit solhem nôtrehte
ein ander dâ twungen,
unz sie zesamene getrungen
daz sie wol gemischet wâren,
dô begunden sie gebâren
vil manger mit dem swerte
als er anders niht engerte
wan daz ers alle erslüege
und an sîme lîbe trüege
mê denne zwelf manne kraft.
dô wart nieman sigehaft
wan der ie baz und ie baz vaht
über state und über maht.
die langer herten kunden,
die von der tavelrunden,
des küniges artûs geverten,
die sach man für sich herten,
die buten vaste den tôt.
dâ was allez nôt über nôt.
dô sie vil lange gestriten,
dô quam zesemen geriten
enalmitten in daz wal
daniel von dem blüejenden tal
und der künic artûs
und die ritter gerwe in sînem hûs.
daz wâren unverzagte knaben,
sie begunden sich zuo ein ander haben
und kêrten zesemen alle
durch daz her mit schalle
und buozten mangem sîne nôt.
ir arzât was der tôt,
dâmit sie büezen kunden
swen sie vor in funden.
die des tages wâren gezalt,
er waere junc oder alt,
er waere swach oder starc,
er waere milte oder karc,
er waere gewâfent oder blôz,
er waere wênic oder grôz,
er waere kurz oder lanc,
er waere swarz oder blanc,
er waere tump oder wîs,
er haete laster oder prîs,
er waere lugenaere oder wârhaft,
küene oder zaghaft,
er waere snel oder laz,
ez wart ir keinem erboten baz,
er waere herre oder kneht,
wan daz sie daz selbe reht
allesament enpfiengen
und des niht engiengen,
sie müesten den tôt erkunnen:
unz ir schar begunde dunnen,
daz sie den tôt entsâzen,
des muosten sie lâzen
beidiu sic unde strît
und ergâben sich, des was zît,
in des küniges artûses hende.
dô hâte der strît ein ende.
nû schuofen sie den nahtrât,
als ir ê vernomen hât,
sie wolden dâ wesen siben naht,
wand der künic matûr hâte gemacht
in sînem lande siben schar,
die quâmen sunderlîche dar.
sie triuweten niht hân gestriten,
waeren sie sament dar geriten.
dâvon quam daz sie sich hâlen,
wand sie noch ze fünf mâlen
mit in wânden strîten.
sô wolden sie für sich rîten.
dô sie entwâfenten sich,
sie wurden harte gemelich
durch daz in was gelungen.
sie lachten unde sungen,
sie wâren frô unde geil.
unz sie geruoweten ein teil,
daz sie diu müede hâte verlâzen,
dô stuonden sie und sâzen
vor dem künige artûse
und sprâchen daz ze clûse
haete her daniel den prîs.
der waere biderbe unde wîs,
er haete den sic erworben.
sie waeren alle erstorben
haete er die risen niht geleit.
ez waere von sîner frümekeit
swaz in dâ êren was geschehen.
des begunden sie dô alle jehen,
er waere in gar ein nützer man.
der künic dô frâgen began
danielen der maere
war er des nahtes waere
alsô eine geriten,
und begunde ouch sîne gesellen biten
daz sie des niht verdageten
und im vil rehte sageten
wâ sie sîn kunde haeten gewunnen.
der grâve von dem liehten brunnen,
er sagte von dem getwerge,
wie daz ze dem trüeben berge
von hern daniele starp,
wie er daz swert an im erwarp
und im dô quam ze trôste
und in ûz dem turne lôste
vor jenem der daz houbet truoc,
und wie er ouch disen sluoc
der mit ir bluote wolde baden,
und sagte im allen den schaden
den der herre und diu frouwe
von der grüenen ouwe
von sînem badene hâten,
und wie rehte unberâten
ir zweier lant dâvon was,
daz dâ niht manne mê genas
wan als ir dâ mit in gefarn quam.
dô der künic daz vernam,
daz dûhte in harte wunderlîch
und iedoch harte frümeclîch
und ouch ein michel wîsheit
daz er die hâte geleit
den nieman kunde widerstân.
er sprach:< swaz ich vernomen hân
von manlîchen dingen,
ich gehôrte nie volbringen
sô lîhte ein sô grôze tât
sô her daniel dâ hât.>
dô sprâchen die helde guote
mit froelîchem muote:
< daniel, dich bewar der rîche krist.
allez daz an im ist,
daz ist biderbe unde frome,
ez ist reht daz ez im nâch êren kome.
er kan darnâch geringen
mit allen den dingen
als ein from ritter sol.
ez ist reht unde wol
daz im niemer misse gê.
ez endorfte sît noch ê
nie ritter werden sô frô.>
ez stuont dâ ze hove alsô,
swaz einem ze êren geschach,
daz er es selbe niht verjach.
es war darumbe niht verdaget:
sô man ez bevant, ez wart gesaget
vil wol nâch sînen êren.
swer dâ kunde gemêren
des andern lop unde prîs,
des flizzen sie sich in alle wîs.
die herre daniel brâhte dar,
die begunden frâgen alle gar
wer daz swert trüege
dâmite er die risen slüege
und daz grôze loch durch den stein.
dô sprach her gâwein:
< swaz hie wunders ist begân,
daz hât her daniel getân,
der iuch dâ lôste ûzer nôt.
wir haeten alle den tôt
vil gewisselîche erliten,
haete er die risen niht versniten.
der hât ouch durch den stein geslagen,
daz lât iu nieman wider sagen.>
dô sie den tac alsus vertriben
und ouch die naht mit fröuden bliben
unz sie den andern tac ersâhen,
und diu zît begunde nâhen
daz sie komen solden,
die dâ turnieren wolden,
nû riefen sie mit dem tiere dar.
dâ nâch sâhen sie die schar
vil balde gegen in gâhen.
die îlten sie enpfâhen
mit solhem antvange
und mit solhem gedrange
mit einer solher juste
daz mangen des geluste
daz er behielte daz leben.
ir ietweder begunde dem andern geben
ein scharpfez widergelt,
daz sie bestrouweten daz velt
mit den tôten überal.
dâ viel manger zetal
der niemer wider ûf gestuont.
sie tâten als die tuont
die dâ wellent zeigen ir zorn.
dâ wart gewunnen und verlorn,
dâ verlôs aber nieman sô vil,
ez waere allez ein kindes spil
wider den der den tôt erkôs.
daz was der dâ gar verlôs.
daniele von dem blüenden tal
dem sach man volgen dur daz wal
den grâven von dem liehten brunnen
und die er hâte gewunnen
in dem lande zuo der grüenen ouwe,
dâ in diu juncfrouwe
in dem netze gevienc;
mit den er dâ ze bade gienc,
die riten hie durch sîne êre
und vâhten alsô sêre
daz manz mit êren mohte sehen,
unz die vîende muosten alle jehen
dem künige artûs der êren
und mohten sich niht behêren.
die lenger wolden leben,
sie muosten sich ergeben
in sîn gewalt gevangen:
dô was der strît ergangen.
dô schuofen sie aber ir gemach.
unz diz grôze leit geschach
den ritern von dem lande
daz sie schaden unde schande
von gewalde alsus liten
und drîe strîte alsus gestriten,
sô was diz maere al ûz komen
daz man ez hâte vernomen
über allez diz lant.
dô bereite sich zehant
allez daz rîten mohte
und daz zuo dem swerte tohte.
dô sie für wâr hôrten sagen
daz der künic was erslagen,
des vorhten sie vil sêre
daz sie beidiu lant und êre
müesen verliesen
und den tôt kiesen,
und îlten unz sie quâmen
ze hove und dâ vernâmen
der küniginne grôze klage.
diz was an dem selben tage
dô der dritte strît zergie.
harte kûme erbiten sie
unz an den vierden morgen fruo.
dô riten dem künge artûse zuo
alle die daz lant wolden wern
und begunden des vil tiure swern,
sie wolden ir künic rechen
oder daz lant versprechen
nâch dem iemer mêre.
sie fröuten sich vil sêre
sît der künic artûs
sô schedlîche in quam ze hûs,
daz sie in dannoch funden dâ,
daz sie doch rehte westen wâ
sie ir leit solden anden.
dô wart er bestanden
mit einem herten nîtspile.
ir was vier stunt alsô vile
die dô sament dar riten
sô der mit den sie ê striten.
nû wurden ouch sie bestanden
mit den küensten wîganden
die ros ie über schriten.
nû quam der künic artûs geriten
an der vierden schar
und fuorte manlîche dar
vil manic sper unde swert.
swer des tôdes dâ haete gegert,
der waere sîn vil schiere bekomen.
dâ wart mangem der lîp benomen
der des gerne haete enborn.
diu ros wurden mit den sporn
beidenthalp genomen.
dô sach man sie zesamen komen
dô sie ûf ein ander gestâchen,
unz daz diu sper zerbrâchen.
nû wurden diu swert ûz verlân,
daz muose über die schilde gân.
des küniges artûses man
die huoben ez manlîche an.
sie begunden sich regen
mit sô grôzen swertslegen
gegen den vîanden
daz in vor den handen
die schilde in stucken sprungen.
sie hiuwen unde rungen,
sie sluogen unde vâhten,
unz sie mangen dâ zuo brâhten
daz er des tages anderswâ
michels gerner waere denne dâ.
sie liezen allen spot sîn
und tâten ernestlîche schîn
waz sie dar wolden
und daz sie niht gerne dolden
gewalt unde schande.
alsô tâten ouch die vîande,
des selben hâten ouch sie gedâht.
dô wart ein strît volbrâht
der gar was âne mâze.
dô wart diu walstrâze
mit den tôten vol.
dâ wart niht geruowet wol,
sie sluogen unde sluogen.
wie lützel sie vertruogen
daz sie iemer mohten geanden!
sie begunden ez in enblanden
alle gelîche
und begunden sich freislîche
nâch den slegen bucken
und begunden diu swert rucken
durch stahel und durch îsen.
dâ sach man nider rîsen
beidiu ros unde man.
daz bluot überal ran.
dô wart von hitze ein michel nôt.
von dem lebene in den tôt
tet vil maniger einen sprunc.
dâ was nieman ze junc,
er muoste vil schiere alten
solde er der fröude walten
deheine wîle der man dâ pflac.
ez was ein unsenfter tac.
dâ wart niht vil geklaffet,
ez wart allez mit slegen geschaffet
und mit kurzen worten.
vil sêre vor den orten
die halsperge risen,
des erschrickten die wisen.
die ez mohten wizzen,
sie hâten sich geflizzen
an starkiu swert, diu wol sniten
unde niht des vermiten
swaz der man an haete,
ê daz er im den tôt taete.
dâvon wart under in beiden
des tages ein michel scheiden
zwischen den lîchamen und den geisten.
dâ muose maniger leisten
daz im sîn vîant gebôt.
er muose kiesen den tôt,
daz was ein swaerez gebot.
âne schimpf und âne spot,
âne fröude und âne lachen
begunde man dâ machen
die kurzewîle âne zuht.
laege ein man an der suht,
in haete niemer gezomen
daz er in den strît waere komen.
daniel von dem blüenden tal,
daz was der dâ niht verhal
dehein sîn frümekeit.
dô er durch die vîande reit,
dô machte er ein gevelle.
er waere denn in der helle,
sô quam nieman in groezer nôt
sô der dem er sîn swert bôt.
er bôt ez mit einem solichen slage
daz er vergaz an dem tage
alles des im ie geschach,
ez waere gemach oder ungemach.
er sluoc sie ûz den sinnen
und brâhte sie wol innen
waz er in der hant truoc.
swarûf er daz swert sluoc,
dar durch fuor ez als ein donerslac.
ich sage iu wes ez sô verre wac:
daz swert daz sneit unmâzen wol.
dô was er grôzer krefte vol
und was ouch künste rîche
und sluoc ez dô willeclîche.
dâvon begunde ez für sich gân,
daz im niht kunde widerstân.
er gap ein unsenften zins,
die helme herte als ein vlins
die mohten niht vor im gewern.
swer des lîbes wolde gern,
dern dorfte im niht zehanden komen,
er haete im schiere den lîp benomen.
dem grâven von dem liehten brunnen
dem was sîn swert berunnen
mit bluote unz an sîne hant.
swen er vor im vant,
der muose umb den tôt geben
beidiu lîp unde leben.
daz was ein kouf âne fromen.
er begunde nider dromen
ros unde liute.
er sluoc sie durch die hiute
swelhe im dâ wider riten,
daz sie beidiu vermiten
daz sie sich niht enrâchen
und niemer kein wort gesprâchen.
des künic artûs gesellen
die twanc ir baldez ellen
daz sie nâch ir herren drungen
und manigen des betwungen
daz er des strîtes vergaz.
dâ was nît unde haz,
dâ was nôt und arbeit,
dâ was unfröude unde leit,
dâ was unmâze und vîentschaft,
unruowe unde grôziu kraft,
ungemach, grimme unde zorn.
dâ wart manic ding verlorn
daz niemer wart funden.
die dâ mohten unde kunden
vehten, den was wol geschehen.
des mohte man wunder sehen
an dem künige artûse.
des engulten die von clûse,
den wart manic satel laere.
sîn fromen helfaere
die bescheinten wol ir frümekeit.
sie volgten im swâ er hin reit.
dâ wart manic heln schart.
dâ was einheines zagen vart.
swer die vîende entsaz,
der waere anderswâ baz.
sie gâben soliche ritterschaft
und wâren alsô manhaft,
swer sie bestân wolde,
daz erz beherten solde
mit werken und mit muote.
sie riten in dem bluote,
daz gie den rossen an diu knie,
dar inne ertrunken alle die
die dâ nider wurden geslagen.
desn wolde nieman verzagen:
in was zesamene sô nôt,
der wunt was unz an den tôt,
der wolde ez doch niht wizzen,
durch daz sie sich sâ flizzen
des siges beidenthalben.
der künic fuorte ein salben
an beiden sînen handen
gegen den vîanden,
an swem er sie gestreich,
daz si im durch den lîp weich
und im die sêle dâ ûz treip
daz si niht lenger dâ inne beleip:
daz was ein swert daz er truoc
und ez mit grôzen kreften sluoc.
des bleip dâ manic helt tôt.
in eine groezer nôt
quam nie dehein lebendiger man.
sie hiuwen, daz ez allez bran
daz sie umb und ane fuorten.
swaz diu swert beruorten
daz wart brinnende als ein strô.
da waere ze jungest manger frô,
waere er komen von der nôt
eintweder lebende oder tôt.
daz was ein starker mannes muot:
swie vil ir viel in daz bluot,
die andern wolden niht verzagen.
man dorfte dâ niemanne jagen,
ir dewedern entwichen ein fuoz.
den aller hertesten gruoz
den ie dehein man mê gebôt,
den gap man, daz was der tôt.
der was dâ wol feile.
ez muose an sînem heile
vil harte stân der dâ genas.
die helme lûter als ein glas
die wurden alle bluotvar.
die der künic artûs brâhte dar,
daz wâren helde guote
und vâhten mit einem muote.
man muose in manic pfant geben.
daz eine gienc an daz leben,
daz wâren doch vil swaeriu pfant.
dâ wart manger geschant
daz er dâ nider wart geslagen.
die schande hôrte in nieman klagen,
er klagte nieman den schaden
sô er in dem bluote muoste baden
unz an die stunde daz er ertranc.
den heizen tac alsô lanc
vâhten sie sament unz an die naht,
daz in diu müede die maht
sô gar hâte benomen
daz ir dewedern mohten volkomen
daz sie sich haeten gerochen.
dô wart ein fride gesprochen
unz an den andern tac.
des twanc sie vil manic grôz slac
daz sie ez beide gerne taeten
und des nahtes ruowe haeten.
dô der fride wart gemacht
beidenthalp unz zuo der naht,
dô wolden des matrûs man
durch daz niht rîten dan.
sie erbeizten bî in ûf daz velt
dâ sie des küniges artûses gezelt
alliu gereitiu sâhen.
wande sie des alles jâhen,
gewünnen sie wider ir kraft,
sie würden an in wol sigehaft.
sus lâgen die von clûse
bî dem künic artûse.
sie wahten die naht gar
und nâmen sîn vil wol war,
daz er in niht entrünne
ê er den schaden gewünne.
sie dorften sîn niht hân gehuot
dâvon, er hâte den muot,
haeten sie in gerne vertriben,
sô wolde er doch dâ sîn beliben
eintweder unz er verdürbe
oder aber den sic erwürbe.
des nahtes vil spâte
gie der künic artûs ze râte
waz in daz beste waere.
dô sprach der helt maere,
daniel von dem blüenden tal:
< welt ir mir volgen überal,
swenne der wirt volle brâht,
sô hân ich einen list erdâht,
daz wir an den gesigen
und unser vîande geligen
sigelôs vor unsern füezen.
ich gerâte wol daz sie müezen
des siges ungestriten jehen.
sô ist uns beiden wol geschehen,
sô kiuset ir deheiner mê den tôt,
sô lîden ouch wir niht lenger nôt.
wir erslahen mangen biderben man
dem ich des tôdes erban.
die behaltent sus daz leben
unde müezen iu geben
beidiu lîp unde guot.
nû vernemt, ich sage iu mînen muot,
wie iu diu rede gevalle.
wir suln diu ôren alle
verschieben morne ê tage.
sô man den fride wider sage,
daz wir danne stille haben
und lân die vîende her traben;
sô sie danne ûf uns seigen,
daz wir daz tier erschreigen.
daz enschadet uns niht eins hâres grôz,
sô vert aber in der dôz
sô starke durch daz houbet
daz sie werden beroubet
der krefte und der sinne.
daz kumt uns zuo gewinne,
sie vallent zuo der erden
und müezen sigelôs werden:
sô wirt uns liut unde lant.>
die herren sprâchen al zehant,
er haete wol gerâten.
sie îlten unde tâten
als daniel dô sprach.
unz der tac ûfbrach,
dô wâren sie alle gereit
und wart der fride wider seit.
des küniges matûrs man
riten den künic artûs an.
dô erschreiten sie daz tier
und zugen im die banier
ûzer dem munde.
sâ huop ez, als ez kunde,
ein schrei sô freislîche grôz
daz er in durch daz houbet schôz,
allen die ez vernâmen,
daz sie ze der erde quâmen
von den rossen nider gevallen.
diu nôt geschach in allen,
des küniges matrûs mannen.
ir deheiner mohte dannen
noch sich lenger niht gewern.
die sich dâ wolden genern,
die muosten ir swert ûfgeben
und muosten biten umb daz leben.
dirre strît alsô zergie
daz man beidiu sament enpfie
ir swert und ir sicherheit,
ez waere in liep oder leit.
sie wurden alle sigelôs,
daz nieman dâ den tôt erkôs.
sie stiezen wider die banier
unde sweigten daz tier.
dô giengen die von clûse
zuo dem künige artûse,
sie gâben im lant unde lîp
dâ zuo kint unde wîp,
und enpfiengen ez wider ze lêhen.
sus begunden sie in flêhen,
sie swuoren des sînen hulden
daz sie mit ir schulden
des niht wolden begân
des er deweder möhte hân
schaden oder schande.
sus wurden die vîande
ze guoten friunden gemacht
und schuofen dannoch vor naht
daz man den künic ûf huop
und in wol mit êren begruop
und die andern tôten gar.
vil schiere gewunnen sie dar
ein michel teil guoter pfaffen
die ez in allen hulfen schaffen
wol nâch gotes êren.
der künic begunde kêren
alle sîne sinne
daz der unminne
zwischen in und der künigîn
schiere ein ende müeze sîn.
dô man die tôten begruop
und die wunden ûf gehuop
den gewunnen sie vil drâte
guote arzâte
die ir vil schône enpflâgen.
die dâ tôt lâgen,
die hâten den groesten schaden.
nû begunde der künic für sich laden
die ritter von dem lande,
die sîne vîande
dâvor gewesen wâren.
die begunden sô gebâren
vil friuntlîche wider in.
sie hâten die tugent und den sin,
dô sie sîne frümekeit
sô wol mit der wârheit
hâten erfunden und gesehen,
daz sie alle begunden jehen:
< dirre künic ist ein biderman!>
nû er sie für sich gewan,
dô sprach der künic artûs:
< warumbe rûmete ich mîn hûs?
daz wil ich iu allen klagen
und wil ez iu darumbe sagen
daz ir des habet deheinen wân
daz ichz dur hôchvart habe getân.
ich weste niht umb diz lant
ê mir der rise wart gesant,
der hie ze tôde lît erslagen.
der begunde mir ein botschaft sagen
die mir iuwer herre enbôt,
der ouch hie ist gelegen tôt,
ich solde her rîten zehant
und solde lîp unde lant
dem künige matûre geben
und solde in sînem gebote leben.
daz ich dâ wider iht sprach,
daz was dem risen sô ungemach
daz er mich har fuorte gevangen.
nû ist ez hier ergangen
als ir alle hât gesehen.
ich wil der wârheite jehen,
ich waere gerne dâ heime beliben
und wart undankes her getriben.
nû ist mir diu künigîn gehaz.
ich hân ir niht gedienet baz,
von diu mac ich irz niht gewîzen.
nû sult ir iuch vlîzen
daz ich gewinne ir hulde.
saget ir mîne unschulde,
daz ich gevangen her reit.
wirt disiu unminne hingeleit,
die mir des helfende sint,
die wil ich als mîniu kint
iemer mê behalten,
sol ich des lîbes walten
und der sinne die ich hân.
swaz ich iu ze leide hân getân,
des wil ich iuch ergetzen
und wil iuch sô frô gesetzen
daz ir alle müezet jehen
daz iu so wol sî geschehen.>
diu rede geviel in harte wol,
sie sprâchen:< entriuwen daz sol
harte schiere sîn getân.
si muoz den zorn varn lân.>
die herren riten dannen sâ.
der künic artûs beleip dâ,
daz tet er durch gewonheit:
swer einen volcwîc dô streit,
quam ez sô daz er den sic ervaht,
sô muose er drî tage und drî naht
dâ nâch an der stat ligen,
solde er lobelîche gesigen.
swer sich sô versûmde
daz er ez ê dâ rûmde,
der haete daz daran gewunnen,
man sprach, er waere entrunnen.
durch daz beleip er an der stat.
die ritter er allesament bat
daz sie ir tugent taeten schîn
und sîn vor der künigîn
ze guote gedaehten
und in ze hulden braehten.
nû riten sie hin ze der künigîn.
desn mohte niht anders rât gesîn,
sie funden die frouwen hêre
in grôzem herzesêre,
si hâte jâmer unde nôt
umb ir lieben herren tôt.
ir klage und ir arbeit
und ir grimmez herzeleit
diu haeten ir nâch den lîp benomen.
sît ir daz maere was komen
daz ir herre erslagen lac,
sît hâte si naht unde tac
vil jaemerlîche gelegen
und hâte niht anders gepflegen
wan daz si klagte und weinde,
in vil mange wîs bescheinde
daz nie wîbe leider geschach.
swer hôrte unde sach
ir wort und ir gebaerde,
der jach daz solich beswaerde
nie gewünne dehein wîp.
nieman sprach daz si den lîp
iemer braehte von der nôt.
si müeste vor leide ligen tôt.
ir liebsten râtgeben,
die ir allez ir leben
rieten ir êre,
die vlizzen sich sêre
daz sie ir frouwen getrôsten
und sie von leide erlôsten.
in etslîchen enden
sie begunden vaste wenden
mit vlîze ir sinne daran.
ir aller liepsten man,
die ir wol getorsten râten,
durch got sie sie bâten
daz si sich wol gehepte,
und sprâchen, die wîle si lebte,
sie waeren ir gerne undertân
und wolden ir niemer abegegân
mit lîbe noch mit guote.
sie sprâchen mit einem muote:
< ez ist unser aller wille,
frouwe, daz ir swîget stille.
ir hât vil und genuoc geklagt,
und biten iuch daz irs gedagt.
ist daz ir uns gewert
und iuwer weinen verbert,
sô wellen wir uns iemer mêre
vlîzen daz iuwer êre
und iuwer wille für sich gê;
und wellen iu dâ sagen mê,
wellet ir uns niht folgen,
wir werden iu erbolgen.>
diu frouwe weinende sprach:
< getar ich mîn ungemach
vor iu herren niht geklagen,
irn wellet mir versagen
iuwern dienest und iuwer hulde?
die verliese ich âne schulde.
ich mac wol hoeren unde sehen,
mir ist zwei wîse übel geschehen,
daz ich mînes herren darben muoz
und ir mir darzuo iuwern gruoz
alsô schiere sult versagen.
daz wil ich iemer gote klagen.
des waere ich alles wol erlân,
und solde ich mînen herren hân.
sol mir daz wol gevallen
daz ich hoere von iu allen
ein sô tumplîchez dröuwen,
welle ich mich niht fröuwen,
sôn habe ich iuwer hulde niht?
der minre leides geschiht,
diu mac wol weinen unde klagen:
mir ist der tiurste herre erslagen
den diu werlt ie gewan.
ez gewan nie wîp von einem man
alsô grôze êre.
des enwil ich niemer mêre
ein froelîchen muot gewinnen.
kundet ir iuch versinnen,
ir enwizet mir niht mîn weinen.
ich wil im bescheinen
daz ich sîn niht vergezzen mac,
und wil weinen unz an den tac
daz ich niht lenger leben sol.
ir gevallet mir niemer wol
daz iu mîn leide niht nâhe gât
und mir sô schiere widerstât.>
dô sprach ein ir dienestman
der sich der rede wol versan:
< nû geloubet daz mit der wârheit
daz uns ein alsô grôz leit
nie geschach noch niemer tuot.
wâ zuo waere uns daz guot
ob wir von leide erstürben
und niht dâmite erwürben?
von diu nemet unser rede war,
oder ir verlieset alsô gar
iuwer liute und iuwer lant,
daz ez niemer in iuwer hant
eines hâres werde gestât.
von diu solt ir iu unsern rât
sô gar niht lân versmâhen.
ir welt ze balde gâhen,
ir mugt iuch wol versûmen,
daz ir müeset rûmen
iuwer lant und iuwer hûs.
wie was der künic artûs
unserm herren sô reht
daz er würde sîn kneht?
alle die künige die nû sint,
die sint wider in ein wint.
wir fuorten an unser schare
aht tûsent ritter dare
und muosten sigelôs geligen:
wie welt ir nû an im gesigen?
welt ir zwêne ander schaden
ze disem einen ûf iuch laden,
sô geriuwet ez iuch ze spâte.
ir sult ûz unserm râte
sô harte niht brechen.
ir hôrtet ie sprechen,
dem nieman gerâten müge,
daz im ouch niemans hilfe tüge.
ez hât mangem sîn zorn
alle sîne saelde verlorn.
frouwe, daran gedenket
ir sît es ungekrenket:
volget ir unser lêre,
ir hât es frome und êre.
ir zürnet wider uns âne nôt:
daz uns mîn herre gebôt,
dâ gestuonden wir nie sô harte nâch,
uns ensî des nû als gâch
des sich iuwer êre
breite unde mêre.
daz uns alle dunket guot,
daz nemt ouch ir in iuwern muot.
sô ist iemer unser wille
offenbâr und stille
ze tuone swaz ir gebietet.>
< ob ir mich nû verrietet,>
alsô sprach diu künigîn,
< nû wil ich iu gevolgic sîn
und tuon swaz ir mir râtet,
darumbe daz ir tâtet
noch ie daz beste gegen mir.
got gebiete iu allen daz ir
iuwer triuwe an mir behaltet
und niht dâvon enspaltet,
ir sît mir mit ganzen triuwen bî.
nû sprechet waz iu liep sî,
des muoz ich iuch gewern:
ich mac iuwer hulde niht enbern.>
dô sprâchen alle ir dienestman:
< frouwe, dâ verlieset ir niht an.
haete unser herre alsô getân,
sô möhte er sînen lîp hân.
er wolde deheiner witze pflegen,
darumbe ist er tôt gelegen.
wie was im des sô nôt
daz er dem künige artûse enbôt
daz er nicht lenger bite
und mit dem risen her rite
und im gaebe zehant
beidiu lîp unde lant?
daz versprach der künic artûs,
des vienc er in in sînem hûs
under allen sînen mannen
und fuorte in gevangen dannen.
nû hât er wol erzeiget hie
wie grôze frümekeit wir ie
von sîner tugende hôrten sagen.
er hât unsern herren erslagen,
darzuo mangen guoten kneht.
der künic artûs hât reht,
darumbe ist im gelungen.
nû hât er uns betwungen,
die ze lebene hâten keinen muot,
daz wir lîp unde guot
in sîne gewalt muosen geben,
daz wir behielten daz leben,
und hân ez von im enpfangen.
daz wir hân angegangen,
daz sult ouch ir anegân.
sît wir den sic verlorn hân,
nû mugen wir frô wesen
daz er uns lât genesen
und uns darzuo lât unser guot.
ir sît vil wol mit im behuot,
er ist aller tugende volkomen.
wir hân daz wol an im vernomen,
er wil iuch mit triuwen
ergetzen iuwer riuwen,
welt ir dis schaden vergezzen.
von diu hân wir uns vermezzen,
wir gewinnen im iuwer hulde.
nû sult ouch ir die schulde
durch unsern willen lâzen varn
und sult des niht lenger sparn,
als liep wir iu alle sîn.>
dô sprach diu künigîn:
< swaz ir râtet unde tuot
und iuch alle dunket guot,
des volge ich iu, swie ich sol.
ich getriuwe iu des wol
daz ir mich ze jungest niht enlât.
der künic artûs der hât
mir vil leide getân:
sît ich iu sô wol hân
gedienet allen dâmite,
sô wil ich vâhen niuwe site
und durch iuch verkiesen
daz ich drumbe niht verliesen
mîn lant und iuwer hulde.
ez ist triuwen ein übergulde
daz ir mir niht entwîchet,
noch darumbe niht geswîchet
daz mir sus übel geschehen ist.
ist iuwer rede âne valschen list
daz ich lâze disen haz,
sô müezet ir mir geloben daz
allesament vil drâte
daz ir mit werken und mit râte
iemer in mînem gebote stât
und niemer mê des niht begât
daz mir sus missevalle.>
des swuoren sie ir alle.
dô sprach diu künigîn:
< swaz ir nû tuot, daz lâze ich sîn.>
dô riten die von clûse
zuo dem künige artûse
und seiten im liebiu maere
daz ir frouwe waere
mit guote übergangen.
des wurden sie wol enpfangen
von im und sînen mannen.
nû reit er mit in dannen
mit grôzen fröuden ze hûs,
der edel künic artûs.
unz in diu frouwe komen sach,
dô stuont si ûf unde sprach
daz er willekomen waere.
dô twanc sie iedoch ir swaere
daz si niht vergezzen kunde,
daz si weinen begunde.
nû ervolleten im diu ougen
vor jâmer alsô tougen.
er sprach:< nû gehabt iuch wol.
dês wâr, ob ich leben sol,
ich erzeige iu mit der wârheit
daz mir allez iuwer leit
wol nâhe mînem herzen gât.
wan daz mich iuwer herre hât
getwungen ûf sînen tôt,
ich enhaete im nie kein nôt
getân in sînem lande.
nû dûhte mich diz ein schande
ob ich mich ze manne haete ergeben
sô ich frîlîche möhte leben.
mich erbarmet iuwer riuwe.
nû lât ez an mîne triuwe
und vergebet mir mîne schulde.
ich wil iuwer hulde
gewinnen nâch iuwern êren.
ich wil daran kêren
alle die sinne die ich ie gewan,
daz ich iuwern schaden und iuwern man
nâch iuwern saelden erstaten.
in der unfröuden schaten
muoz mîn herze sitzen
unz ich iuch mit mînen witzen
von herzen frô gemachet hân.
swaz ich iu ze leide hân getân,
daz müejet mich und tuot mir wê.
ich getet nie keiner frouwen mê
weder leit noch ungemach.
nû weiz got wol daz diz geschach,
daz ich ez niemer kunde hân
mit mînen êren verlân.
nû muose ez sîn, ez ist geschehen.
dês wâr, welt irz übersehen
daz iu zuo mir wirret,
ich bin des unverirret
ich enbüeze iu daz iu werre.
ich wil alsô verre
komen in iuwer hulde
daz ir sprechet zuo der schulde
daz mir got iemer lône,
oder ich wil mîne krône
niemer mê getragen.
nû sult ir niht an mir verzagen,
ez sol iu benamen wol ergân.>
< diz wil ich an iuwer gnâde lân,>
sprach diu küniginne dô.
si wart des trôstes sô frô
dô si vernam daz in diu nôt
twanc ûf ir herren tôt
und er ir sô wol gehiez
daz si den zorn varn liez.
si kusten an sînen munt.
nû hoeret, ich wil iu tuon kunt,
waz fröuden dô quam
dô disiu unfröude ein ende nam.
der künic artûs gie ze râte
mit allen die er hâte
von britanîe dar brâht.
er sprach:< des ich hân gedâht,
daz wil ich iu allen künden.
nû helfet mirz ergründen
mit getriuwes herzen lêre
und râtet mir wie ich mîn êre
an dirre frouwen getuo.
gedenket alle darzuo
und sprechet wer der man sî
der sie von sorgen mache frî,
und seht daz ir niht entobet.
swen ir allesament lobet,
dem wil ich geben in sîn hant
beidiu die frouwen und daz lant.
der mac wol froelîche leben.>
< den rât wil ich selbe geben,>
sprach sîn neve her gâwein,
< der manne lebt hiute dehein
der disem lande gezaeme
und den si mit mînem râte naeme
wan danieln von dem blüenden tal.
welt ir des volgen überal,
sô ist si niene baz bewant.
haete er mit sîner hant
die risen beide niht erslagen,
wir dörften niemer gesagen
dâ heime daz maere
waz hie geschehen waere.
nû suln wir in geniezen lân
daz wir den lîp von ime hân,
und sult hie mite
tuon allez des ich iuch bite
und sprechet er sî es wol wert.
unser enheiner haete daz swert
an dem getwerge alsô gewunnen
noch den von dem liehten brunnen
noch die von der grüenen ouwe.
diz lant und disiu frouwe
ist wol mit im berâten.>
den künic sie dô bâten
gemeinlîche überal
daz er daniele von dem blüenden tal
daz lant gebe und die frouwen.
sie wolden gerne schouwen
daz er des lôn enpfienge
des er mit in begienge.
der künic lopte den rât,
er sprach:< daz ir gerâten hât,
daz wolde ich selber hân getân.
sît ich nû vernomen hân
daz ir des allesament gert,
nû sult ir es werden gewert.
ir hât mir liebe daran getân.
mîn lîp und allez daz ich hân,
daz wil ich iemer mêre
durch iuwer aller êre
teilen unde wâgen.>
danielen begunde er frâgen
ob er des landes gerte:
er haete mit dem swerte
die êre dâ gewunnen,
daz ers im wol solde gunnen.
im waere nieman lieber dâ.
daniel sprach froelîche:< jâ!
got selber der lône iu allen
daz mir einic sol fallen
daz wir alle ervohten hân.
des ist grôziu triuwe an iu getân:
ich verdiene ez iemer, sol ich leben.>
nû wart nie manne baz gegeben.
des fröuten sie sich alle.
mit minneclîchem schalle
gie der künic und die sîn
hin wider ze der künigîn.
dô sprach der künec artûs:
< frouwe, ez suochent mîn hûs
die besten von allen landen:
der tiurste der mir ze handen
und ze hûs ie bequam
oder von dem ich ie vernam
dehein manlîche getât,
daz ist daniel, der hie stât.
den wil ich iu ze süene geben.
âne daz himelsche leben
sô kunde iu niemer baz geschehen,
daz sult ir mir noch selber jehen.
wir waeren nie von dem strîte komen,
haete er den sic niht genomen
an iuwern grôzen risen zwein,
die herte wâren als ein stein.
er haete wol alters eine
iuwer here algemeine
überwunden und erslagen.>
dô begunde der künic artûs sagen
von dem trüeben berge,
wie er von dem getwerge
die frouwen erlôste,
und wie er die getrôste
von dem liehten brunnen,
wie er die haete gewunnen
von der grüenen ouwe.
< nû sagt mir,> sprach diu frouwe,
< sol mir diu schande iht werren
daz ir mich mînen herren
sô schiere heizet verklagen?
daz sult ir mir zaller êrste sagen.>
der künic sprach dô:
< wie kunde sich daz gefüegen sô
daz ir des lasters haetet?
sô ez iu allez daz raetet
daz iu deheines guotes gan,
iuwer mâge und iuwer man,
sie sîn eigen oder frî,
waz lasters waere dâ bî?
sô râte ouch ich ez und die mîn.
ir sult des gewis sîn,
ich erkenne mangen biderben man,
daz ich nie kunde gewan
deheines ritters sô guot.
dâvon hât einen froelîchen muot.
ir muget wol sagen von heile.
iu wirt hie ze teile
der beste ritter der hiute lebt.>
< sô wirt dâ wider niht gestrebt,>
alsô sprach diu künigîn,
< wolde got, geruochte er mîn,
sît er iu sô wol gevellet!
ich bin gerne ze im gesellet,
ist ez daz er mich wil.>
dâ was pfaffen harte vil,
die gâben sie im mit der ê
und gâben im ouch darzuo mê:
daz künicrîch und die krône.
daz wart im dô ze lône.
dô dirre hêrliche schal
daniele von dem blüenden tal
nâch solhen êren ergie
daz man in ze herren enpfie
über daz lant ze clûse,
mit dem künige artûse
gienc er hin besunder
und besande darunder
sîne andern gesellen gar.
schiere quâmen sie dar.
er sprach mit guotem willen:
< ich wil ez niht lenger stillen,
ich welle hôchzît hân,
sît ez mir nâch fröuden ist ergân,
daz ich bin worden herre hie.
nû wil ich fröuwen alle die
die ich zesamene bringen kan,
ez sî wîp oder man.
ob got wil, nû sult ir
nâch iuwern êren helfen mir
volbringen mîne hôchgezît.
daz ir mir ze liebe worden sît
und mich hie ze herren hât erkorn,
daz hât ir allez sament verlorn
irn helfet mir fürbaz darzuo
daz ich vollen wol getuo.
mîn frouwe hât ir swaere
vergezzen durch diu maere
diu ie von mînem herren vlugen.
nû zeiget daz sie niht enlugen
die daz von im hânt gesaget
daz er nâch den êren jaget.
dô der künic matûr dis landes pflac,
dô hâte er hôchgezît allen tac.
von diu sint sie hôchgezît wol gewon.
kêren wir nû den muot dâvon,
wand ir alle hie sament sît,
daz nû unser hôchgezît
sô lobelîche niht ergât
sô man biz her gewonet hât,
sô hân wirs iemer schande.
ouch enwirde ich in disem lande
niemer geêret noch gelopt.
swaz wir biz her hân getobt
nâch werltlîchem lône,
daz verliesen wir alsô schône
daz man uns niemer danc gesagt
und iemer dester mê klagt
des küniges matûres tôt.
von diu ist mir an den êren nôt
daz ir mir helfet umb den prîs.
ir wâret ie biderbe unde wîs,
des hât man vil von iu vernomen.
nû lât die wârheit fürkomen.
ir hât diz lant alle erstriten
und hât nôt vil erliten
unz ir ez hât erhouwen.
nû hân ich juncfrouwen,
fünf hundert sint mir undertân.
swaz wir von ir schoene hân
und von ir tugenden vernomen,
des sint sie alle vollekomen,
wande sie hânt reine site
und rehte gebaerde dâmite:
die vernam ich nie von wîben.
swelher iuwer hie wil belîben,
die lâze ich dar under welen.
sô kunde iu nieman gezelen
die witwen die hie worden sint,
die ouch sint wolgetâniu kint.
swelhe iuwer deheiner wil,
der neme des landes alsô vil
daz ir hie vil gerne sît,
sô ist disiu hôchgezît
iuwer alsô wol sô mîn.
und lât iu alle bevolhen sîn
daz ez iu alsô ergê
daz ez an unsern êren gestê.
ir sît zuo den tiursten erkorn
die ie wurden geborn
und sît dâ für vermaeret:
nû seht wie irz bewaeret!>
des begunden sie alle lachen,
sie sprâchen:< wir suln machen
gerne daz sich iuwer êre
nâch iuwerm willen mêre,
swâ wir mugen und kunnen.>
den grâven von dem liehten brunnen
und den von der grüenen ouwe
und ander die sîn vrouwe
mit im ûz hâte gesant,
die begunde daniel zehant
durch friuntlîchen dienest biten
daz sie vil balde hein riten
und die frouwen mit in braehten
und der triuwen daran gedaehten
die er mit in begangen haete
und ouch noch vil gerne taete.
er getriuwete wol ir frouwen
daz sie gerne wolden schouwen
sîn fröude und sîn hôchgezît
und in des liezen âne nît
swaz er dâ haete gewunnen.
den grâven von dem liehten brunnen
dem bevalh er an die triuwe sîn
daz er braehte die herzogîn
von dem trüeben berge,
die er lôste von dem getwerge.
daz gelobete er im vil sêre.
nû biten sie dâ niht mêre,
urloup sie nâmen.
sie riten unz sie quâmen
des andern tages umb mitten tac.
ich waene ez nieman wizzen mac
wie sie wurden enpfangen.
dô was ez liebe ergangen
daniele von dem blüenden tal.
er hâte ouch die wîle überal
sîn lantliute alle besant:
diu hôchzît huop sich zehant.
dô dise frouwen alle drî
der küniginne gesâzen bî,
und ir von dem getwerge
diu von dem trüeben berge
die grôzen nôt begunde klagen
waz ez der werlte haete erslagen
unz daz sie daniel gerach,
unde ouch diu verjach,
diu frouwe von dem liehten brunnen,
waz si schaden haete gewunnen
von jenem der daz houbet truoc
unz in daniel ersluoc -
dô sagte ir ouch diu frouwe
von der grüenen ouwe
waz ir jener schadete
der in dem bluote badete
unz in daniel überwant -
dô wurden der küniginne zehant
vor jâmer diu ougen naz,
sô sêre erbarmete sie daz
daz in geschehen was diz leit.
ir herze was aber vil gemeit
daz ir der man ze teile wart
der die risen alsô hart
beide sament hâte erslagen,
und alsô vil hôrte sagen
daz man sîn sô wol genôz.
des wart ir fröude alsô grôz
daz si des küniges vergaz.
dô si baz unde baz
danielen hôrte loben,
si enwolde denne toben,
er muose ir wol gevallen.
daz erzeigte er mit in allen.
dô daniel wart gewar
daz die liute alle gar
von sînem lande wâren komen,
als er diz hâte vernomen,
dô wart ûf ein schoenez velt
manic hêrlîch gezelt
mit grôzem vlîze geslagen.
dar brâhten helfande getragen
rehte vier und zweinzic hûs,
daz der künic artûs
noch dehein manne nie gesach
der gezierde gemach.
dâ was ein grüener anger,
breiter unde langer
wol ein mîle oder mê,
dâ niht wan bluomen unde clê
zallen zîten ane was
und daz schoenste gras
daz diu erde ie getruoc.
diu zît was schoene genuoc.
dis hôchgezît dâvon ich iu sage,
diu huop sich an dem pfingsttage.
die von der tafelrunde
die hâten sich von grunde
gekleit nâch ir lantsite.
man hâte in gefüeret mite
daz aller beste gewant
daz man iendert in der werlte vant.
an dem pfingesttage fruo
die lantherren zugen zuo.
dô huop sich fröude âne zal.
daniel von dem blüenden tal
wart des tages gekroenet.
des wâren sie ungehoenet
über die er herre solde sîn.
man sach dô bî der künigîn
fünf hundert juncfrouwen stân.
diu dâ aller wirste was getân,
diu was mit schoene sô beladen,
ez müese vênuse schaden,
waere si bî ir gesehen,
vênus müese ir der schoene jehen.
dô man die messe vernam,
dô was in wilde unde zam
bereit zuo der spîse
in aller der wîse
dâvon man ie gehoeret sagen.
des wart dô wunder für getragen.
der dienest wart sô rîche
daz man sie al gelîche
alsô wol gewerte
daz nieman baz engerte.
dô man des pfingsttages enbeiz,
vil schône daz gereite gleiz,
daz man dâ rîten solde,
von sîden und von golde
und von edelm gesteine.
dô huop sich gemeine
manger kurzewîle vil.
dô wart allez daz spil
des man ie begunde.
die von der tavelrunde
die begunden nâch lobe îlen
und begunden kurzewîlen,
als hövesche ritter solden.
sie tâten swaz sie wolden,
ir kunst schein ze wunsche gar.
des nâmen sie mit vlîze war,
die edeln juncfrouwen.
der die dâ solde schouwen,
der mac von fröuden iemer sagen.
man sach sie kleider an tragen,
der iemer und iemer daehte,
daz er niht zesamene braehte
mê wunders denne daran lac.
sie lûhten nahtes als den tac.
scharlachen und brûnât
daz waere dâ ein swachiu wât.
pfeller unde plîât,
saben unde ciclât
daz was diu lîhteste dâ.
hermîn, bunt unde grâ
daz dûhte sie alle ze swach.
in dem gewande man sie sach,
daz ist uns harte vremede:
wîziu sîdîniu hemede
truogens al gemeine.
man sach dâ niene deheine
die man pfeller baete tragen,
si wânde iemer sîn erslagen
si entrüege sîn zwên söcke.
ir mentel und ir röcke
die stuonden von golde.
smaragden und krisolde
die wâren drin geleit mit listen.
jôchande und ametisten,
berlen stuonden ouch dâ bî,
jaspis und topâzî,
sarmihel und saphirus,
calcedonius und onichilus,
manic rubîn und almedîn.
die vedere wâren zöblîn,
bibrîn wâren die lîsten.
mit den vingern sie alle wîsten
ûf disen und ûf den.
dâ zeigte ieclîchiu wen
si dâ gerne wolde,
ob ez alsô wesen solde.
ob ieclîcher swebte ein babiân
dâ sie diu sunne an wolde gân,
dem allez sîn gevider was
lûter als ein spiegelglas.
dô daniel ûf daz ros gesaz,
dô zeigte er sîner frouwen daz
und andern die dâ wâren
daz er wol kunde gebâren
als ein rehter künic sol.
ezn tet dâ nieman alsô wol,
des begunden sie im alle jehen.
dô liez er sîne kunst sehen
in sô manger ahte,
unz er daz gemachte
daz im diu küniginne gap den prîs
und sprach, ir haete in alle wîs
got vergolten ir wirt.
ich waene niemer kein künic wirt
der alsô wol gevalle.
diu liute sprâchen alle,
beidiu man unde wîp:
< got hât geleit an sînen lîp
swaz ein ritter haben sol.
nû geschach nie wîbe sô wol
sô unserer frouwen ist geschehen.>
des begunden sie alle jehen,
si möhte wol von saelden sagen
daz si in sô kurzen tagen
ir leides waere ergetzet
und alsô frô gesetzet.
dô ruowenes zît was,
sie erbeizten nider an daz gras,
des küniges artûses man,
und quâmen allesament dan
mit fröuden gegangen.
dô wurden sie wol enpfangen
von den juncfrouwen.
dâ mohte man schouwen
suoze lachen unde sehen
und harte minneclîche spehen,
beidiu gebaerde unde site,
und iedoch merken dâmite
beidiu wort unde muot,
unz sie ez gewunnen alsô guot
daz man sie gerne werte.
swelher ir deheiner gerte,
si waere witwe oder magt,
dem was ir lîp unversagt,
unz der frouwen vier hundert
wurden ûz gesundert,
die alle die ritter nâmen
die von britanîe quâmen
mit dem künige artûse.
die wolden dâ ze clûse
bî hern daniele sîn.
von dem trüeben berge diu herzogîn
diu erwelte ir einen herzogen,
an dem was si unbetrogen.
der was geheizen belamîs,
der hâte allen den prîs
den ein ritter ie gewan.
der wart ir ein vil lieber man,
er getet ir nie deheinen wanc.
des vant er vil guoten danc.
der herre und diu frouwe
von der grüenen ouwe.
die hâten süne viere,
die erwelten in vil schiere
ir ieclîcher ein wîp
diu im leben unde lîp
vil wol gelieben kunde.
von rehtes herzen grunde
gienc ir fröude âne nît,
daz diu selbe hôchgezît
nâch küniclîchen êren stuont.
die geschuof er als die tuont,
daniel von dem blüenden tal,
die ein dinc überal
ze tugenden wellent kêren
nâch sô ganzen êren
daz in diu saelde ungewert
bescheidenlîcher hulde swert
mit aller ir geselleschaft:
sô varent sie hin mit lobes kraft.
der wirde jagte er vaste nâch,
im was zallen zîten gâch.
nû vernemt ein michel wunder:
von den liuten besunder
fuorte er die frouwen überal,
daniel von dem blüenden tal,
und sprach als ein vil hövesch man
dô er sie alle dar gewan:
< den ir man hie sint erslagen,
den wil ich gar widersagen
mîne hulde und mînen gruoz,
daz si ir iemer darben muoz,
diu hie ein andern niht erwelt.
hie ist manger fromer helt
die mîn trûtgesellen sint.
si ist mir als mîn kint
diu hie einen mac behaben.
daz iuwer herren sint begraben
in disen siben nahten,
dar ûf sult ir niht ahten.
diu schande diu sî alliu mîn.
sehet an diu künigîn,
diu sich dâvon niht enschiet
dô man ir daz selbe riet.
ez ist iu saeliclîche komen:
die iu die man hânt benomen,
die lât iu guoten wandel geben,
daz ir lîp und ir leben
dâ wider iuwer eigen sî.
sît der angeste frî,
swelhiu ir einen kiuset,
daz si niht verliuset.
der boeste den wir brâhten her,
der ist tiurer denne der
der über diz lant
ze dem aller tiursten was erkant.
ich wil iu gelten iuwer man,
sûmet iuch niht daran.
swelher hie ist âne wîp,
niht versprechet sînen lîp.
swes ein wîp ze der werlte gert,
des sît ir wol an in gewert.
liezet irz durch schande
und riten sie ze lande,
sô geschaehe iu niemer mêre
dehein sô grôziu êre
als iu nû geschehen kan.
durch daz nemet alle man,
daz ir hie vil belîbe.
mit guote und mit lîbe
wil ichz umb iuch verschulden.
si sî ûz mînen hulden
swelhiu daz verspraeche
und mîn gebote zerbraeche.
doch gebiute ich alsame
daz iuwer deheiniu sich schame,
daz ez iemer âne schande stê
swaz an den dingen hiute ergê.
swelhiu des nû volvert,
der ist mîn hulde wol beschert.>
swâ ê was fröude in getân,
diu wart nû gar ûz verlân.
dô waere grimme getobet,
wan daz er hâte gelobet,
swaz sie des tages taeten,
daz sie des kein laster haeten.
dâvon begiengen sie dâ
daz vil selten anderswâ
sît oder ê geschach:
diu frouwe zuo dem ritter sprach,
ob er noch ze staete
deheine frouwen haete.
sprach er danne:< nein ich>,
< herre, welt ir mich?>
sprach diu frouwe zehant.
alsô wart er gepfant
des herzen und der sinne,
daz si im ir minne
alsô willeclîche bôt
der er unz an sînen tôt
niht getörste hân gegert,
wand er endûhte sich des wert.
unz diz gebot erschal
in dem hof überal
daz ieclîch ritter solde
nemen swelhe er wolde,
aller êrst wart in gegeben
gar ein fröuderîchez leben,
daz ir herzen sanfte tete.
ir versagen und ir bete
an dem saeligen tage
daz was rehte als ich iu sage:
der ritter zuo der frouwen gie
und sprach, sô er sie umbe vie:
< frouwe, welt ir mich?>
< jâ, herre, got den lobe ich
darumbe ob ir geruochet mîn.>
< jâ, frouwe, ir sult gewis sîn,
ich minne iuch gerner denn ir mich.>
iesâ kusten sie sich,
daz dâ niht lasters an lac.
wâ wart ie kein tac
alsô fröudenrîche?
ich waene ouch, sîn gelîche
iemer sider ûfkome.
er was hövesch unde frome
der dâ herre solde sîn,
daz was an manigen dingen schîn.
dô im der rittere zerran
und er den frouwen ir man
niht gar vergolten hâte,
daz buozte er in vil drâte.
er nam sehs hundert knehte
er wolde ir willen rehte
nâch ir hulden vâren,
der vetere alle wâren
des küniges artûs gesellen
er wolde ez alsô stellen
daz er bereite sîn lant,
die machte er ritter zehant
und gap in sô getân gewant,
als er dâ guote state vant,
daz alsô schône lûhte
daz sie des alle dûhte
die ez vor in sâhen,
und offenlîche jâhen,
kleite got sîn engel sô,
sie möhten iemer wesen frô.
er hiez in solhiu ros geben,
swer ie miltes herzen leben
deheinen willen gewan
er sî wîp oder man,
der sol in darumbe prîsen.
swaz holz oder îsen
an dem gereite solde sîn,
daz was gar silberîn.
dâ was geworht inne
von mangem tiefen sinne
swaz man erdenken kunde.
die von der tavelrunde
die schouweten ez für ein wunder
und sprâchen al besunder,
swaz sie in deheinem lande
von gereite und von gewande
gezierde haeten gesehen
dâ man an solde spehen
houbethafte meisterschaft,
daz waere hie wider âne kraft.
dô sprach manic zunge,
dô die ritter junge
sament ûf den hof riten,
ez waere allenthalp vermiten
daz man ie gesaehe
sô rîche und sô spaehe
kleider sô sie fuorten.
dô sie diu ros ruorten,
dô glizzen sie vaste
von dem widerglaste
den sie gâben von der sunnen.
sô glizzen sie und brunnen,
daz sie ez kûme dolden
die in warten wolden.
in niuwem lebene
begunden sie ze gebene
gebaerde sô genuoge
an kunst und an fuoge,
unz ez nieman gesach
wan der in des jach
des der wunsch gebiutet.
des wurden sie getriutet
von den lantfrouwen.
dô sie begunden schouwen
daz in nihtes gebrast,
dô wart manic hövesch gast
zeinem wirte enpfangen:
ez was in liebe ergangen,
den mannen und den wîben,
daz sie sament solden belîben.
dô dise berâten
wurden den sie hâten
ir herren erslagen,
und in allez ir klagen
mit guotem werde was gestoeret,
dô wart gesehen und gehoeret
kurzewîle unde spil.
dô wart alles des vil
des man ze hôchgezîte gert.
dô wart vröude gewert
ir willen in manger wîs.
si hâte daz lop und den prîs,
si truoc dâ die krône,
si hâte sie alle schône
brâht in ir gehôrsame.
dô wart ir tugentlîcher name
ze vollem werde geêret.
sie wâren an sie gekêret
alle gelîche.
si was dô sô rîche
daz si niht wolde leben baz
und in ir hôhen wirde saz.
dô wart si unschône
geslagen, daz ir diu krône
von dem houbete spranc,
und ouch si selbe âne ir danc
nider sturzte für den stuol
und viel in einen phuol,
und saz unvröude an ir stat,
doch sie es nieman bat,
und trat die fröude under sich.
diz was harte unbillich,
si wart sô unmaere gar
daz man ir vil gerne enbar
und nieman ruochte wâ si lac.
diz was ein freislîcher slac
der ir die wirdekeit benam.
nû hoert, ich sagen wie daz quam
daz ir diz ungemach geschach:
dô man die liute alle sach
mit fröuden bevangen,
dô quam darzuo gegangen
ein vil wunderlîch man,
der truoc ein sîdîn hemde an,
des selben ein nider wât.
swaz anders ieman ane hât,
des gienc er alles sament blôz.
er was ze wênic noch ze grôz.
sîn varwe was harte clâr,
er truoc ein wol stêndez hâr,
grâ, wîz unde reit.
als er ûf den hof schreit,
ein stap er in der hant truoc,
die liute er von im sluoc
und hiez im einen wec geben.
die in sô für sich sâhen streben,
und er umbe sich gap
mit grôzen slegen disen stap,
des begunden im entwîchen
die armen und die rîchen,
unz er für daz gestüele quam.
er rief, daz manz vil wol vernam,
und hiez die liute gedagen.
darnâch bat er im sagen
wer dâ waere der hêrste.
her gâwein wart der êrste,
der winkte im mit der hant dar
und hiez in nemen war
dâ der künic artûs saz,
der waere der hêrste âne haz.
dô sprach der wunderlîch man:
< nû entwîchet al hindan,
ich wil iuch ein spil lâzen sehen,
daz ir alle müezet jehen,
ez sî iu seltsaene.
wande ich mich wol verwaene
daz nie kein man gesaehe
ein spil sô rehte waehe.>
diz dûhte sie vil gemelich
und entwichen balde hinder sich.
er sprach:< ich muoz daz velt sehen,
ez mac anders niht geschehen.>
nû rûmten sie ein strâze
rehte nâch der mâze
als er selbe vor sprach.
nû hoeret waz in dô geschach:
zuo dem künic artûs er gie,
mit dem arme er in umbe vie
und zuckte in ûf als einen schoup
diz was ein wunderlîch roup,
den truoc er ze ir gesihte hin.
dô was nieman under in
der in errîten kunde,
swie manger ez begunde,
sô balde lief er dannen.
des küniges artûs mannen,
den was daz spil unmaere
und darzuo harte swaere.
daniel unde gâwein
parzivâl und iwein
die begunden nâchgâhen,
wande sie ez ungerne sâhen.
mit geneigten spern
si begunden vaste gern,
ob sie in möhten gewern,
daz er des lîbes müeze enbern,
darnâch begunde ir herze swern.
diu ros mohten niht enbern
sie entrouften daz bluot.
dô begunde manic helt guot
mit grimmem muote nâch jagen.
dô was fröude geslagen,
daz nieman ruochte war si quam,
und ir dehein war nam,
daz sie den alsus verlurn
den sie darzuo erkurn
daz er ein krône der fröuden was
und aller tugende ein spiegelglas.
sie riefen alle:< owê!
wir gesehen den künic niemer mê!>
jener der in dâ hin truoc,
der lief sêre genuoc,
er fuorte den künic als ein wint.
die risen wâren sîniu kint
die dâ wâren erslagen,
der sie einen hôrten sagen,
sîn vater liefe sêre
und kunde ouch liste mêre
denne in der werlte dehein man.
swaz die zwei ie gewan,
beidiu fleisch unde geist,
daz was ân die volleist
daz ez in möhte hân erzogen.
ein vogel enhaete in niht ervlogen.
doch liezen sie im nâch gân
sie hâten des vil guoten wân,
sô sie zuo dem berge waeren komen,
daz sie ime haeten benomen
daz er niht möhte fürbaz.
vil schiere sâhen sie daz
daz er in den berc ûf truoc.
dô wart jâmers genuoc
daz sie in dar sâhen tragen
dâ sie hin niht mohten jagen.
von den rossen wart in gâch
und wolden hân gestigen nâch,
daz endorfte in nieman wern.
die sich dâ wolden genern,
die muosten selbe daz verbern.
es endorfte nieman gern
wan der sich wolde ervallen.
dô wart von in allen
ein riuwec nâch kaffen.
ez waere einem affen
ze stîgen angestlîch genuoc
dâ er den künic hin truoc.
waere ez gewesen nütze,
dâ was manic schütze
der in wol haete erschozzen.
des waere dâ niht genozzen,
sie haeten sich beide ervallen.
von diu was in lieber allen
daz er in hin trüege
denne man sie beide erslüege.
dô er den berc ûf geflôch
vil nâch eines schuzzes hôch,
dô sazte er in an ein stat,
dâ wart er angeste sat,
dâ mohte er ûf noch nider,
weder für noch wider.
waere er von der stat komen,
sô haete er einen val genomen,
waere er stehelîn gewesen,
daz er niht möhte genesen.
diz sâhen sie alle sament an.
des wart wîp unde man
riuwic âne mâze.
die angestlîchen strâze
gie der alte her wider,
unz er quam sô nâ her nider
daz sie wol hôrten waz er sprach.
hoeret, wes er dô verjach.
er hiez sie alle swîgen
und ir rede vermîden.
sie swigen al gemeine.
ir nôt diu was niht kleine
wie der künic herabe quaeme
und warumbe er in naeme.
dô sprach der alte:
< unz ich der sinne walte
die mir got hât gegeben,
ez gât iu allen an daz leben,
die daran schuldic sint
daz ich mîniu liebe kint
alsô sihe zerhouwen.
des sol mir zouwen
unz ichz an iu geriche
und ouch iu zerbriche
iuwer fröude als ir mir.
daz ich mîner kinde enbir,
des sult ir niht geniezen.>
nû wolden sie in schiezen,
wan daz ez wider riet
daniel der tumben diet,
diu haete im den lîp benomen.
< der künic der ist dar komen,>
sprach er zuo in allen,
< dannen er sich muoz ervallen,
wir enmöhten denn mit minnen
disem an gewinnen
daz er uns in trüege her abe.
swer deheine sinne habe,
der enschieze sîn niht.
swaz ouch uns dâvon geschiht,
die wîle unz er den künic hât,
sô râte ich daz ir in leben lât.>
daniel sprach zuo dem alten:
< dû maht wol wider uns walten
swelher rede sô dû wilt
sît eht dichs ie niht bevilt
daz dir doch nieman niht entuot.
dîn halsperc ist sô guot,
die wîle der künic dort sitzen sol,
daz dû vor uns genisest wol.
möhten aber wir in gewinnen,
dû müestest uns bringen innen
wes dir dîn tugent jehe,
ê man dich dâ zuo ersehe,
daz dû sô stâst âne were
und eine dröuwest einem here.
wes triuwest dû in benoeten,
oder wie wilt dû uns toeten?>
er sprach:< daz wil ich dir sagen:
ich wil sie an disen berc tragen
und setze iuwer ieclîchen dâ,
daz ir alle würdet grâ
ê ieman gedaehte
wie man in dannen braehte.
dâ suln sie hungers sterben.
alsô müezet ir verderben,
swaz ich iuwer gevâhe,
darnâch ich gerne gâhe,
daz ir vil werde.
dês wâr, sît diu erde
mit mîner kinde bluote
nâch iuwer aller muote
alsô wol ist gelabet,
die ir mir erslagen habet,
die mir dâ beschert sint,
die muoz aber dirre wint
an disem berge verderren.
ich wil in vor besperren
allez daz sie ie gewunnen,
dâ sie des niht geniezen kunnen
eines halben eies wert,
unz sie des hungers swert
geschendet, daz sie ligent tôt.
daz ist noch ein groezer nôt
denne ob ich sie gewerte
mit spere oder mit swerte.
ist iuwer deheiner sô getân
daz er her geturre gân
âne swerte und eine
sô nâhe zuo dem steine
daz ich in ergrîfe bî der hant,
daz im dâmite werde erkant,
ob er mich ziech hin abe
oder ich die kraft habe
daz ich in dâ hin ziehe
dâ im alliu gnâde enphliehe -
ist iuwer deheiner sô frome
der durch versuochen her kome?>
der vant er vil mangen dâ,
mê denne tûsent sprâchen:< jâ.
ich wil dar, ich wil dar.>
alsô sprâchen sie gar.
dâvon mohte ez niht geschehen:
ir deheiner wolde sehen
einen andern dar gân,
und muosen ez alle lân.
dô der alte daz gesach,
er hiez sie swîgen unde sprach:
< ir sît sorgen alle frî.
nû saget mir wâ der beste sî
mit wârheit under iu allen,
dem sol der prîs gevallen
den er hie bejagen kan.>
dôn was dehein man
der sich es annaeme,
durch daz ez missezaeme,
swer dâ spraeche:< daz bin ich.>
ouch bedâhten sie sich
daz er missetaete
swer einen andern haete
der selben schulden bejehen.
würde er danne dâ gesehen
durch des ruomes willen tôt
oder sus in grôzer nôt,
swie er in mit êrte,
daz man imz doch verkêrte
unde spraeche lîhte daz,
er taete ez niht wan umb den haz,
daz er den lîp dâ verlüre.
sus wart dâ manges mundes türe
guote wîle zuo getân
durch den hovelîchen wân,
wande er sîn lop zerbraeche
swer offenlîche spraeche:
< ich quam der aller beste her.>
spraeche er aber:< ez ist der,>
müese er darumbe tôt geligen,
dâ waere er schuldic an gezigen.
sus wolde nieman sprechen.
die zuht begunde brechen
parzivâl der helt guot
durch den manlîchen muot,
daz er den künic ungerne lie,
er sprach:< ich bin der tiurste hie,
ob ich dran niht enliuge.
ich hân es niht geziuge,
doch wil ich mich selben loben.
zelt man mir daz für ein toben,
daz wil ich gerne alsô hân,
daz ich dich müeze bestân.>
sîn swert er hinder im lie,
vil unvermezzenlîche er gie
in sînem halsperge dar.
des wart der alte dô gewar
und îlte ouch balde dar wert.
dô wart ein strît âne swert,
der was aber unlanc.
der alte von dem steine spranc,
parzivâlen er gevie
mit einem arme unde gie
hinûf dâ er her quam.
gebaerde alsô freissam,
die vernâmet ir nie
als parzivâl dâ begie.
daz er im muoste volgen,
des wart er sêre erbolgen.
tobelîche werte er sich,
sîn gebaerde wart sô freislich
daz nie kein tîvel wart,
er möhte im ein solhe fart
mit den siten hân erwert.
des wart im ungemach beschert.
sîn widerstreben wart sô grôz
daz es den alten bedrôz,
unde stiez in an den stein,
daz er in der varwe schein
sam er gar waere tôt.
im was von des stôzes nôt
daz herze vil nâch enzwei.
dô wart ein michel geschrei
under dem steine,
wan daniel alters eine
sie hiezen in alle schiezen.
wes sie in leben liezen?
der bat sie daz sie ez vermiten
und sîn an der stat biten,
er wolde in holn einen trôst
dâvon sie würden erlôst.
er kêrte schiere von dan,
wande er sich des versan
daz er in frides erbaete,
ob er daz netze haete
dâ in diu juncfrouwe
zuo der grüenen ouwe
alsô gebunden inne vant.
des endes kêrte er zehant.
im was ernest unde gâch
darumbe unde dar nâch.
in begunde sêre belangen
daz der künic gevangen
alsô jaemerlîche saz
und parzivâl lützel baz.
zwô mîle wâren dar,
die lief daz ros alsô gar
daz ez nie anders getrat
wan als er mit den sporn des bat.
swenne ez dem fromen nôt tuot,
sône spart er lîp noch guot.
swer guot lasterlîche spart,
der hât sich alsô bewart,
möhte ich die volge hân,
ichn lieze in niemer gestân
an deheines mannes stat,
ich seite im schâch unde mat
aller sîner êren.
ich wolde ûf in kêren
aller wirdekeite ban.
er ist ein unvertic man,
ob mirs joch nieman gestât,
swer guot âne êre hât.
daz ros was im gehôrsam,
in kurzen zîten er quam
hin zuo der grüenen ouwe.
in gesach diu juncfrouwe
dô er zuo dem hûse reit.
dô wart er mit der wârheit
vil wirdeclîche enpfangen.
geloufen, niht gegangen
quam si gegen im zehant
und hâte in vil schiere erkant.
unz er getrat ze der erde,
dô hâte si in vil werde
zwischen die arme genomen.
si sprach:< sît gote willekomen!>
lieplîche si in kuste,
si druckte in an ir bruste,
si sprach:< ich wil gote klagen
daz mir nieman kan gesagen
noch ich mich selbe niht kan enstân
den dienest den ir mir hât getân,
wie ich den verschulde,
daz ich in iuwer hulde
ze solher mâze quaeme
daz ich iu sô gezaeme
würde als ir sît mir.
ob ich dâ ihtes enbir,
sô geschach mir leider nie.
ich diente iu gerne, und weste ich wie.>
dô sprach der ritter daniel:
< ob iu mîn dienest wol geviel,
des bringet mich innen.
ir muget nû gewinnen
sô verre mîn hulde
daz ez ein übergulde
alles dienestes ist
den ir nû in kurzer frist
muget tuon, ob ir welt.
mîn fröude ist iemer verselt
in den êwigen tôt,
irn helfet mir von dirre nôt
diu mich nû hât bevangen.>
si sprach:< wie ist ez ergangen?
ist mîn vater noch gesunt?>
er sprach:< an dirre stunt
liez ich in âne swaere.>
nû sagte er ir diz maere
wie in der wunderlîche man
den künic artûs an gewan
und parzivâlen darnâch.
er sprach:< nû lât iu wesen gâch
und rîtet mit mir dâ hin.
daz ist ein sô getân gewin
daz ich ez gegen iuwern hulden
niemer triuwe verschulden
vollen unz an mînen tôt.
iu wart min nie sô nôt,
ich bedürfe iuwer nû baz.
ich weiz wol gewaerlîche daz,
füert ir iuwer netze dar
rehte dâ er nider var,
ob irz dâ für setzet,
daz ir in ergetzet
ein teil sîner sprünge,
unz in doch got betwünge
daz er uns belieze daz leben
und uns die wider wolde geben
die er uns dâ hât benomen.
darnâch bin ich her komen.
nû sûmet iuch niht mêre,
mich belanget harte sêre:
ich gediene ez, swie ich sol.>
si sprach:< nû gehapt iuch wol
und lât iu niht belangen.
ich hân in iu schiere gevangen.>
dâ was niendert kein man,
dô sprach si ir megde an
daz sie vil balde gaehten
und ir ein pfert braehten.
dô sie daz bereiten solden
und îlen gerne wolden,
swie mange wîs sie ez begunden,
ir keine die enkunden
ez gesatelen noch gezoumen.
des begunde er schiere goumen
unde greif selbe dâ zuo.
des endûhte in niht ze fruo,
er beite kûme unz ez geschach.
dô diu frouwe diz gesach,
nû bereite ouch si sich deste baz.
daz liez er gerne âne haz.
daz ir ein künic rîche
alsô willeclîche
ir pfert bereite
und ir daz dar leite
sam ein williger kneht,
daz was billich unde reht:
im was ergâhenes nôt.
er dorfte niemer schamerôt
dur die swachheit gestân
die er dâ hâte getân.
got selbe ist sô gemuot,
swaz man durch rehte nôt tuot,
daz er des niht enrichet.
swer ouch danne sprichet
daz dâ laster an sî,
der ist guoter witze frî.
dô si ûf wart gehaben,
si begunde zelten, daz ein traben
lützel sneller waere.
si hâte an dem maere
sînen willen wol vernomen,
swie schiere sie dar möhten komen,
daz ez in diuhte lanc genuoc.
mit einer geisel er sluoc
daz pfert dicke deste mê.
ir tet der jâmer harte wê
und daz grôze ungemach
daz si an im hôrte unde sach
nâch dem künige artûse.
sus quâmen sie hin ze clûse
in vil kurzen stunden.
vor dem berge sie funden
allez daz in dem lande
beidiu êre und schande
ze rehte erkennen kunde,
und die von der tavelrunde.
die klagten alle den schaden
dâmit sô sêre was geladen
der edel künic artûs.
sie vorhten daz er ze hûs
ein leidez maere sante,
wande in diu nôt gepfante
der lîplîchen zuoversiht.
durch die grôzen ungeschiht
trûrten sie und ouch des
daz nieman weste wes
er geniezen möhte,
daz im zuo dem lîbe töhte.
dô sie solhe nôt liten,
dô quam daniel geriten
und mit im diu juncfrouwe
von der grüenen ouwe.
als ir vater daz gesach,
in grôzen fröuden er sprach:
< sît beidiu wol willekomen.>
des selben wart dâ vil vernomen
von rittern und von frouwen.
nû begunden siez balde zouwen.
dô si nider gehaben was
von dem rosse an daz gras,
ir netze si bereite.
daniel sie dar leite
dâ si ez setzen solde
und ouch vil gerne wolde.
ez twanc sie dienest unde bete.
nû sach dâ nieman waz si tete
âne ir muoter und âne ir vater.
die beidiu sament bater,
daniel, daz sie ez verswigen
unz man in drinnen saehe ligen.
dô parzivâl gezogen wart
ein alsô unsenfte vart,
daz ich iu ê hân gesaget,
dâvon wâren sie verzaget.
ie sît stuont der alte
und frâgte mit gewalte
ob ieman des geruochte
daz er sich dâ versuochte.
dar wolde nieman gâhen,
durch daz sie dâvor sâhen
an parzivâle solh mort.
diz was ir aller fürwort:
< hie enist nieman sô frome,
beite unz der künic kome.
der bestêt dich zehant.>
nû saz er ûf die steinwant
und beite unz er quaeme,
daz er im daz leben naeme.
diz was daniele geseit,
und sweic durch gewarheit
daz er sîn selbe niht verjach,
unz diu juncfrouwe sprach:
< ich hân daz netze wol gesat.
nû stêt ir dâ an der stat
und heizet in herabe gân:
sô muoz er iuch mit fride lân.>
daniel von dem blüenden tal
sprach dô:< sie sagent mir überal,
dû welles ziehen mit mir,
bin ich des gewis an dir?>
diz meinte er hin ze dem alten
< und wellest ouch mich behalten
in der unsaelden huote,
ist dir des noch ze muote?>
< jâ, vil vaste,> sprach er.
daniel sprach:< nû wol her!>
sîn swert hiez er von im tragen.
daz begunde dem alten wol behagen
und hiez die liute entwîchen.
dô liez er her strîchen
ûz der mâzen geswinde
und viel rehte als ein blinde
in daz netze enmitten.
er wolde den dritten
an daniele gevangen hân,
ez wart im anders kunt getân.
er verwar sich drin sô sêre
daz er niht lenger mêre
ze lebene getriuwete
und im sô starke geriuwete
daz er wâfen schrei
und tet als er daz netze enzwei
harte gerne rizze.
swie sêre er sich des vlizze,
er muoste ez ganz lâzen.
er wolde sich niht mâzen
sîner grôzen unsite
unz er sich bewant dâmite
daz er vor dem gebende
weder fuoz noch hende
niht mêre regete,
und in dâ gar gelegete.
daz er sus was gelemet,
dâvon wart sîn herze ergremet,
daz was grimme unde frisch.
er fuor springende als ein visch,
unz er in aller sîner kraft
ze jungest wart sô zagehaft
daz er lac für tôt,
dar zuo twanc in diu nôt.
swer iht guoter liste kan,
den solde wîp unde man
gerne êren dester baz.
ein man tuot mit listen daz
daz tûsent niht entaeten,
swie grôze kraft sie haeten.
daz merket an dem alten:
möhte er sich hân behalten,
er haete in dâhin getragen
dâ in unhelfelîchez klagen
niemer niht vervienge.
sô er mit listen gienge,
sô haete ir kraft ungenist.
dô was diz ein nütze list
den her daniel begie,
daz in diu juncfrouwe vie
sô sanfte in disem netze.
swer die rede letze,
den hât für einen tumben man:
der rehte guote liste kan,
ez sî from und êre.
ez hazzet manger sêre
daz man lernet guotiu dinc
und sprichet als ein snürrinc,
man müge zuo vil kunnen.
der ist niht sô versunnen
daz er habe der witze gunst.
kunde ein man alle kunst
die got ûf aller erden
geschuof und hiez werden,
waz kunde im daz geschaden?
swer mit wîsheit ist geladen,
daz ist ein lîhtiu bürde.
ich waene ie dehein last würde
den man sô sanfte trüege.
er ist grôz und doch gefüege.
swer kunst unde wîsheit
beidiu in sîn vaz leit,
der mac wol haben unde geben.
sol er tûsent jâr leben,
swaz er darûz gelernen kan,
ez wirt dâvon niemer wan.
er mac wol geben swem er wil,
und doch ie gelîche vil.
ist er rehte gemuot,
beidiu êre unde guot
erwirbet im diu fuoge,
darzuo friunde genuoge.
waere ein man sô getân
daz er wol möhte hân
die schoene absalônes,
die sterke samsônes,
waere er ein tôre dâbî,
sône möhten sîn drî
einem man gelîchen niht
den man in schoenen zühten siht.
waz sol ein sô getâner man
der weder guot noch übel kan?
ez ist bezzer des frumen muot,
kan er übel unde guot.
er lêret in die beidiu wol,
waz er mîden und tuon sol.
nû vernemet waz sie tâten
dô sie den alten hâten
in dem netze gesehen.
dâ was in liep an geschehen.
sie liefen dar mit schalle
und lopten got alle
und ouch die juncfrouwen
daz sie in solden schouwen
alsô vor in gevangen.
dô wart si baz enpfangen
tûsent stunt denne dâvor.
solden sie sie enbor
vor liebe getragen hân,
sie haeten ez vil gerne getân.
sie enwesten wie gebâren.
alle die dâ wâren
gâben sich in ir gebot.
unde waere sie ein got,
si waere geêret genuoc.
diu die krône dâ truoc,
diu küniginne danîse,
diu dankete ir ze prîse
daz si sô hövesche quam
und ir die vorhte benam
die si hâte von dem alten.
< sol ich des lîbes walten.>
alsô sprach diu künigîn,
< dirre dienest sol iu sîn
vor allen sorgen ein schilt.
ich bin diu, die es niht bevilt
unz ich wol erzeiget hân
daz ir mir liebe hât getân.>
sus quam diu juncfrouwe
von der grüenen ouwe
in ein lop alsô grôz
daz si es sît wol genôz.
dô sie dar geliefen,
die guoten ritter riefen,
daz manz vernaeme überal.
dâ was ein sô getâner schal
daz man niht wol gehôrte
unz man in sus zerstôrte:
man hiez sie lâzen den braht.
dô wart ein stille gemacht.
daniel zuo dem alten sprach:
< dû hâst uns grôz ungemach
geheizen und ouch getân.
sît wir dîn gewalt hân,
wes solden wir dich fristen?
wir suln von dînen listen
uns selbe fride machen.
dû hâst mit solhen sachen
den tôt an uns erholt
daz dû in gewis haben solt.
möhtestû unser sîn
gewaltic als wir dîn,
dû taetest uns die grôzen nôt.
darumbe muost ouch dû den tôt
in kurzen zîten lîden.
wil dich daz swert niht snîden,
sô kêre ich den knopf dar
und zerstoere dir den kopf gar
ê ich dich leben lâze.
dû hâst die unmâze
gegen uns begangen,
sît wir dich hân gevangen
daz dû benamen stirbest,
sît dû nâch tôde wirbest.>
dô sprach der alte:
< ob ich den lîp behalte
eines halbes tages lanc,
sô habet iemer undanc
ich stirbe gerner denne ich lebe.
ich enbite iuch deheiner gebe
wan des tôdes eine.
mir gêt mîn leit ze beine
und ze herzen sô sêre
daz ich niht lenger mêre
ze lebene geruoche,
wan daz ich doch versuoche
mit allen mînen sinnen
und ouch tuon, kume ich von hinnen,
mîn heil ûf iuwern schaden.
ir hât mîn herze geladen
mit êwiger swaere.
mir ist der lîp unmaere.
ir sult mir niht frist geben
darumbe ir hât mir daz leben
sô sêre geleidet.
swie schiere ir mich scheidet
dâvon, daz sihe ich gerne.
ez entouc iu niht zenberne:
lât ir mich genesen,
ez muoz iuwer tôt wesen.>
dô sprach aber her daniel,
wand im diu rede niht wol geviel:
< nû bistû doch ein witzic man.
waz meinet ez daz dir iemer kan
ein solh tumpheit geschehen?
wie getarstû des jehen
daz man dich balde toete?
dû strebest nâch einer noete
darnâch nieman gâhen sol.
dem wîsen man zimet wol
daz er wizze waz er sage.
spraeche er vier und zweinzic tage
daz beste daz ie man gesprach,
waere ein wort dar under swach,
daz gemarkte man baz
tûsent stunt denn allez daz
daz er ze rehte spraeche,
daz man im mite braeche
sîn lop und sîn êre.
ich enban dir harte sêre,
sît dû sô wîse bist,
daz dû den swachen list
dînem künige geriete
durch liebe oder durch miete
daz er sich heiles pfante
und dînen sun sante
dem künige artûse
und in in sînem hûse
lasterlîche vâhen liez
und im darzuo gehiez,
er benaeme im daz leben,
wolde er sich im niht ergeben
mit lîbe und mit guote.
in dem übermuote
huop sich dîn sun dar
und ervollete gar
dînes herren gebot.
weder die liute noch got
kunden uns dâvor bewarn,
wir müesen mit im varn.
unz wir her quâmen
und rehte vernâmen
daz er uns twingen wolde
anders denne er solde,
daz versprâchen wir zehant.
darumbe hât er uns gepfant
des lîbes vil nâch alle.
mit dem selben valle
haben wir im gelônet.
haeten wir sîn geschônet
dô er unser âhte,
swâmit er gedâhte,
daz waere uns des tôdes boten.
widerslac wart nie verboten
einem zornigen man,
swenne er niht genesen kan,
er muoz sich wern.
ob er den lîp wil genern,
sô sleht er gerne widere
ê er gelige dâ nidere.
rehte alsô tâten wir.
uns ist niht als dir,
sît dû hin wilt geben
mit dînem willen dîn leben.
dô uns dîne süne sluogen
und sie den lîp genuogen
durch ir gewalt benâmen,
daz wir sie dô überquâmen,
des was uns groezlîche nôt.
dô man uns den tôt bôt,
daz wir den versprâchen
und anders niht enrâchen
wan daz wir uns mit nôtwere
kûme erwerten einem here -
ich wil der wârheit jehen,
ezn waere doch niht geschehen
wan daz sie ir unreht ersluoc
und in daz niht vertruoc
daz sie uns durch ir übermuot
beidiu lîp unde guot
an gewinnen wolden.
daz hât in got vergolden.
swer uns dester wirs hât,
daz ist ein unwîser rât.
nû sage mir dâ bî,
als liep sô dir got sî
und alle die dir liep sîn,
was der selbe rât dîn,
daz der künic matûr ie
dise unmâze an uns begie?>
dô sprach der alte:
< hânt sie mit dem gewalte
ir unheil an iu erholt,
swaz sie danne hânt gedolt,
daz suln sie ze rehte hân.
ez ist âne mich getân.
haete mirs mîn herre gedâht iht
dô engedâhte er mirs niht,
ich enhaete ez niht verhenget.
ich haete ez ê gelenget,
möhte ich ez niht erwenden,
ê denne ich ez hülfe enden.
ist ez als ir mir saget,
daz sie iuch hânt gejaget,
betwungen sie iuch ûf ir tôt,
sô tet iu allez daz nôt
daz ir dâ wider tâtet
dô irs niht rât enhâtet.
sît ez sô ergangen ist,
sô wil ich mîn genist
noch vil gerne behaben.
sît er mir mîne knaben
in den tôt hât gegeben
und darzuo sîn selbes leben
und mangen helt küenen,
wil eht dûz nû süenen,
ez wirt niht von mir gespart.
ich wânde, iuch iuwer hôchvart
dâ her haete gejaget.
ezn wart mir leider niht gesaget,
ich weste niht daz ez geschach
ê ich mîniu kint tôt sach.
ich wil lâzen mînen zorn
sît ich die süne hân verlorn
von mînes herren schulden.
gunnet iuwern hulden
daz sie mir gnaedic sîn,
und tuot iuwer tugent an mir schîn,
daz ir michs ergetzet.
ir habet mich geletzet
an mînen fröuden sêre.
ir hât es iemer êre
daz ir mich habet dester baz
swenne ich lâze disen haz.
ouch kan ich ez gedienen wol,
mit swelhen dingen ich sol.
swenne iu râtes nôt ist,
sô kan ich in kurzer frist
wol finden einen rât
der iu nâch êren ergât.>
des was daniel frô,
die juncfrouwen bat er dô
daz si in balde enbünde
und in ûz dem netze wünde.
daz wart lenger niht gespart.
er sprach, dô er ledic wart:
< hêriu frouwe, waz ist daz?
daz sult ir mir bescheiden baz.>
si sprach:< ez ist ein netze.
für swen ich ez setze,
er sî starke oder swach,
dem geschiht als iu geschach.>
er sprach:< mugt irz gesehen?>
< ja, wie solde ez geschehen
daz ich dâmite iht taete,
ich ensaehe waz ich haete?>
er sprach:< wie bin ich sô blint?
sehentz alle die hie sint,
des frâge ich iu?>
< unser sint hie niht wan driu
die ez kunnen gesehen.>
< möhte ez iemer geschehen,>
sprach der alte aber dô,
< des waere ich baz denne frô,
ob mir sô wol geschaehe
daz ich daz netze saehe.>
si sprach:< hilfet iuch daz iht,
des wil ich iu versagen niht.
ich hân eine salben hie,
weder ich noch ir gesâhen nie
bezzer deheine.
swenn ich iu der ein kleine
an diu ougen gestrîche,
ir werdet sô rîche,
swie trüebe ein naht wesen mac,
si ist iu als ein sumertac
daran daz man sehen sol
und schouwen ouch daz netze wol.>
dô sprach der alte:
< daz selbe des ich walte,
goldes mê denn tûsent marc,
des willen waere ich niht karc,
ich woldes alles âne sîn,
daz sie beidiu waeren mîn,
daz netze und ouch diu salbe.
haete ich die werlt halbe,
waere ez darumbe veile,
ez würde mir ze teile.>
dô sprach diu juncfrouwe
von der grüenen ouwe:
< habt iuwer habe
und holt uns herabe
die ir dâ hât gevangen.
swie schiere daz ist ergangen,
sô wil ichs iu beidiu geben,
daz wir alliu müesen leben
in iuwer friuntschefte
mit solicher triuwe krefte
diu iemer êwiclîche were,
und nieman iuwer hulde enbere.>
als der alte diz vernam
daz in sô nâhe ane quam
daz er in sîner ahte
dâvor sô tiure machte,
durch den helferîchen gruoz
neic er ir unz an den fuoz
und spranc hin als ein rêch.
den er dâvor gar verzêch
gnâde unde êren,
an die begunde er kêren
ze guote allen sînen vlîz.
alsus wart sîn itewîz
ein friuntschaft triuwenrîche.
harte willeclîche
truoc er den künic dort her nider.
balde gâhte er hin wider
und brâhte ouch parzivâlen.
daz sie von den kâlen
erloeset wâren alsô,
des was dô nieman unfrô.
der künic artûs der sprach:
< swaz mir ze liebe ie geschach,
daz was allez ein bast.
ich was ie fröuden ein gast.
ich bin nû gefröuwet sô
daz ich wil iemer wesen frô.
ez ist ein himelrîche
daz ich sus gnaedeclîche
von dem berge komen bin.
ich hân lîp unde sin
vil kûme behalten.>
dô sprach er zuo dem alten:
< daz dû mich her nider hâst getragen,
des wil ich gote gnâde sagen
und wil es gerne lônen dir.
ouch wizze daz dû von mir
deheine wîs gescheides,
ê ich dich dînes leides
nâch dînem muote ergetze.>
die salben und daz netze
gap im diu frouwe zehant.
< nû hât irz alsô wol bewant,>
sprach der herre daniel,
< daz nie kein dienest mê geviel
eines halben hâres baz.
mac ich, ich zeige iu daz.>
dô wart lenger niht gebiten,
sie giengen wider unde riten
dâ daz gestüele was.
swer fröude ie gelas,
swer fröude ie gesach,
swer ie gehôrte daz man sprach
von volekomenen fröuden iht,
der vernam nie sô getânes niht
sô sie dâ begiengen.
die fröude sie enpfiengen
aber baz denne dâ vor
unde sazten sie enbor
in ir hôhen wirdekeit.
dô wart ir gewalt sô breit
daz anders nieman niht entete
wan ir gebot âne bete.
daniel, der dâ wirt was,
der schuof daz man dâ wol genas,
er lie dâ nieman sîn unfrô:
er gedâhte des alsô
daz im nihtes gebrast.
er hâte mangen lieben gast.
diu fröude dûhte in ze swach,
vil gezogenlîche er sprach
zuo dem künige artûse:
< ir habet hie ze clûse
grôze êre an mir begangen,
daz man mich hât enpfangen
ze herren hie ze lande.
nû helfet mir die schande
ze disen zîten verjagen.
sô mac ich iu gnâde sagen
von schulden iemer mêre:
sô hân ich guot und êre.>
der künic artûs sprach dô:
< des waere ich groezlîche frô
und hülfe es gerne sêre
daz ir iuwer êre
nû sô wol bestaetet,
ob ir sô her nâch ir taetet
daz anders waere denne guot,
daz lîhte ein man unsanfte tuot,
daz es nieman war naeme.
swaz iu rehte gezaeme,
daz waere mir liep volbrâht.
lât hoeren, wes hât ir gedâht?>
< daz ich und die gesellen mîn
müesen nâch der künigîn
ze britanîe rîten,
daz si ze disen zîten
mîne fröude müeze sehen.
dâmite sô ist mir sô wol geschehen
daz mich iemer allez daz
hie ze lande deste baz
êret daz mich êren sol.
sô stêt mîn dinc mit alle wol.>
der künic sprach:< ich bin iu holt.
ob ir gesteine unde golt
unde sîdîne wât
hie niht vil genuoc hât,
sô râte ich daz iu gefrumet:
swenne ir ze britanîe kumet,
daz kan mir niht geschaden,
sô heizet iu ûf laden
vier und zweinzic soumêre,
daz ir niht guotes lêre
iuwer lant hie dürfet machen.>
daniel begunde lachen:
< habet ir gnâde,> sprach er,
< ich endarf darumbe her
füeren golt noch wât.
ich hân sô grôzen rât,
swes ein man zer werlte gert,
daz ich es alles bin gewert.>
daniel bat alzehant
swaz er sîner gesellen vant
die niht wîbe hâten,
daz sie doch gerne tâten
daz sie mit ime riten.
des mohte er sie lîhte erbiten,
sie tâten swaz er gerne sach.
daniel zuo dem künige sprach:
< lât iu wol bevolhen sîn
daz sie niht vermissen mîn
an nihte des man haben sol.>
er sprach:< daz bewar ich wol.>
nû hoeret wie vil ir was
dô sie daniel ûz gelas:
sehs hundert ir wart.
mit den reit er an die vart.
er lie die alle belîben
die sich mit wîben
in sînem lande hâten
sô niuwenes berâten.
daz tet er durch deheinen nît,
wan daz sîn diu hôchgezît
mit ganzen fröuden erbite
biz er herwider gerite.
er kunde wol der êren pflegen.
dise bat er underwegen
vil verre durch den dienest sîn
daz sie mit der künigîn
ir frouwen liezen rîten.
âne wider strîten
gelobten sie daz alle.
sus quâmen sie mit schalle
ze britanîe geriten.
niht lenger sie dâ biten,
sie gâhten wider an den wec.
lanzelet und herre erec
die wâren dâ ze hûs
und die der künic artûs
dâ heime muose lâzen
durch daz sie manige strâzen
nâch âventiure wâren.
die begunden gebâren
klagelîche umbe daz
daz ir diu saelde sô vergaz
daz sie ez niht hâten vernomen.
ouch was dar ze hûse komen
ein helt biderbe genuoc,
den allez sîn gemüete truoc
nâch der êren lône.
er was herzoge in zône
und was darumbe dar komen,
er hâte dicke vernomen
swer ze britanîe quaeme,
der würde sô genaeme,
swâ er darnâch hin rite,
daz in diu schande vermite.
des mohte er niht vergezzen
und hâte sich vermezzen
dâ heime dicke in sînem hûs,
der rîche künic artûs
müeze in ze ritter machen.
nâch den selben sachen
was er komen in daz lant.
er hiez beladigant.
als in daniel gesach,
er frâgte in unz er im verjach
waz er warp und wer er was,
und daz er gerne genas
mit manlîchen êren
und ouch die gerne mêren
dâ ze hove wolde.
swaz er dâwider solde
tuon des was er gereit
ob der künic die hövescheit
gegen im begienge
daz er in enpfienge
in sîne geselleschaft.
er sprach:< mir ist grôz kraft
von sînen tugenden gesagt.
darnâch hân ich her gejagt
und dinge sîn geniezen.>
< nû lât iuch niht verdriezen,>
sprach her daniel zehant,
< daz ir habet iuwer lant
ûf solichiu dinc gerûmet.
ir hât iuch niht versûmet,
ir komet an der rehten zît.
sît ir ûz geriten sît
nâch lône und nâch êren,
des wil ich ûf mich kêren
unz es iu genüegen sol.>
er sprach:< ir troestet mich wol,
herre, daz vergelte iu got.
ouch verdiene ichz gerne âne spot.>
alse daniel wart gewar
daz sîn gesellen alle dar
ir frouwen gar hâten brâht
in sô getâner andâht
daz sie mit im solden
und ouch vil gerne wolden,
dô huoben sie sich an die vart.
froelîche ûf gehaben wart
diu küniginne gynovêre
ez gewan nie wîp tugende mêre
mit ahtzic juncfrouwen.
dô mohte man schouwen
ein hêrlîche reise,
sie quâmen âne vreise
froelîche hin gên clûse.
dem künige artûse
geschach dô michel êre.
sie begunden alle sêre
gegen den frouwen gâhen
und îlten sie enpfâhen,
als ez ir êren wol gezam.
man sach vil gerne daz si quam.
dô huop sich diu hôchgezît,
si wart michels bezzer sît
denne si waere gewesen.
daniel was genesen
darnâch an den êren gar
daz diu küniginne dar
durch sînen willen was komen.
des wart sîn saelde vernomen,
wande dem gelinget
der sô nâch êren ringet
daz er niemer wil verzagen.
des sol man gnâde sagen
gote und ouch ime danc
daz sô schône gelanc
dem künige artûse,
daz er dâ ze clûse
die selben hôchgezît begie
die er ze britanîe ie
dâvor begangen hâte.
daz sol mit mînem râte
iuch alle guot dunken.
swâ sîn êre hunken,
daz möhte iu wol wesen leit.
sô sêre er ie darnâch streit.
alsô schiere er daz bevant
daz herre beladigant
swertleite gerte,
gerne er in gewerte.
er machte in ritter zehant.
hie wart herre beladigant
des küniges artûs geselle.
dô huop sich ein geschelle,
gîgen unde swegelen,
in allen den regelen
die guote sint gesetzet.
sô beliben sie ungeletzet
daz ieman sô schône lebe
des herze in den fröuden swebe
als in ze clûse geschach.
man hôrte wunder unde sach
daz lanc ze sagene waere.
doch sult irs âne swaere
der kurzewîle hoeren ein teil.
ez ist benamen sîn heil
swer ez wol gemerken kan,
und wil iu sagen waran:
swie lange erz iemer hoeret,
diu wîle ist gar zerstoeret,
daz er niht des gedenket
daz mangen versenket
swaz mit werken mac ergân,
daz hât der muot ê getân.
der gedanke ist er frî.
swie lange er sitzet dâ bî
und ez merket ebene,
er wirket niht vergebene:
den man niht gewinnen siht,
verliuset er ouch darunder niht,
sô trîbet er doch die zît hin.
ez ist niht ein ungewin,
dêr sô die wîle vertrîbet
daz er mit fröuden belîbet.
waelscher gîgaere,
wizzic unde maere,
der was dâ driu hundert.
die hân ich ûzgesundert,
daz wâren meister gar.
ichn nime der dehein war
die sô wol niht kunden gîgen.
die lât ouch mich verswîgen,
daz ich doch habe iuwer gunst.
ein man genôz ie sîner kunst,
von diu ist ez guot dêr iht kan.
sehzic tiutscher spilman
die hôrte man dâ strîchen,
den kunde niht gelîchen.
man hôrte dâ hellen
sumbere mit schellen.
manger hande pfîfen
sie liezen in entslîfen
aller hande swaere.
hundert harpfaere
die machten dâ vil süezen dôn.
darumbe wart in guot lôn.
zweinzic singaere,
die durch vertrîben swaere
von minne lieder sungen,
der keln suoze klungen,
die hôrte man dâ singen.
man sach dâ verre springen,
man sach dâ schefte schiezen.
wen kunde dô verdriezen?
dâ liefen knappen umb daz guot.
dâ was nieman ungemuot.
waelsch lâsen sie dâ vil.
behendekeit ist ouch ein spil:
des sach man dâ genuoc,
daz einer ûf der hant truoc
eine burc unmâzen grôz.
den des ze sehene bedrôz,
der sach dâ liute die flogen.
armbrust unde bogen
die hulfen kurzewîlen
mit pölzen und mit pfîlen.
man sach dâ schefte brechen
und ritterlîche stechen.
diu ros mit sprüngen liefen,
die garzûne riefen,
der was dâ harte vil
und aller hande zabelspil,
valken und sperwaere.
man sagte in schoeniu maere
von rittern die sich sluogen,
von bluomen die sie truogen,
manic schapel unde kranz.
dâ was der wîteste tanz
dâvon ich in mînen tagen
ie hôrte gesagen.
man mohte darab schouwen
ritter unde frouwen
mê denne zweinzic hundert.
dô wart fröude ermundert,
daz si lützel geslief.
mangen seltsaenen brief
lâsen sie von listen.
swer sorge wolde fristen,
des vant er dâ guote state.
die frouwen hâten alle schate
von den babiânen,
den vil wol getânen.
die swebten alles ob in.
man treip dâ her unde hin
die grôzen helfande,
die in dem lande
die hiuser ûf in truogen.
dâ hôrte man dôz genuogen
von manger bûsûnen.
dô mohte ein man wol rûnen
eim andern in daz ôre,
ern waere denn ein tôre,
daz ez nieman mê vernam.
swer ie ze hôchgezîten quam,
ob ir den gehôrtet jehen
daz er dehein habe gesehen
diu bezzer waere denne diu,
sicherlîche er liuget iu
oder er was ze himelrîche.
ich waene ir gelîche
iemer werden kunne.
dâ was michel wunne.
hie wart her beladigant
an der ritterschefte erkant,
daz der künic artûs sprach,
dô er in sô rîten sach,
und her daniel dâmite,
er haete rehte mannes site.
daz sach diu menge überal.
alsus quam er in den schal
daz er der besten einer hiez
und in des nieman verstiez.
der künic besante in zehant.
dô quam herre beladigant
vil schiere dâ sie wâren.
unlange sie verbâren,
ir rede wurde friuntlich.
sie satzten in enzwischen sich.
dô sprach der künic artûs:
< herre, hât ir dâ ze hûs
deheine frouwen ze iuwer ê?>
er sprach:< nein.> -< sô saget mir mê,>
sprach der künic aber dô,
< stêt iuwer wille alsô
daz es ger iuwer lîp,
ich gibe iu guot und ein wîp
und darzuo fröude alsô vil,
ob iuch iemer ihtes wil
genüegen des iu werden kan,
daz ir iuch ein rîcher man
selber müezet dunken.>
er sprach:< mîn saelde sî ertrunken
in einem unsinne,
verspraeche ich solh minne.
ich bin es gerne gereit,
ich swere iu, welt ir, einen eit
daz ez mich allez dunket guot
swaz ir mir ze liebe tuot.
ez ist eht wâr des man giht,
er missevert niht
der iuch gesuochet durch guot.
ir hât eines herren muot.
des hôrte ich iu ie jehen.
wol mich daz ich ez besehen
sus wol nâch mînen êren hân!>
dô hiez der künic artûs gân
nâch der juncfrouwen,
er wolde sie beschouwen,
daz si balde quaeme
und ir miete vernaeme
daz si im sîn leben
wider hâte gegeben
und mit ir netze gekoufet
dô er sô verre was besoufet
in grôzem untrôste
unz daz si in erlôste.
dô quam diu juncfrouwe
von der grüenen ouwe,
diu hiez sandinôse.
rehte alsam ein rôse,
getemperet mit vlîze
die roete zuo der wîze,
alsô was si getân.
der ein kint solde hân
mit dem wunsche volbrâht,
ern haete niht erdâht
in tûsent jâren ein wîp
der er iemer den lîp
mit tugenden baz gekroente
und alsô wol geschoente.
dô sie der künic ansach,
zuo dem ritter er sprach:
< wie gevellet iu daz kint?>
er sprach:< wol, ich waere blint
an mînen sinnen allen,
solde ich ir des enpfallen.>
< frouwe, wie gevallet er iu?>
< vil wol, herre,> sprach siu.
des was der künic artûs frô.
zesamen gap er sie dô
beidiu mit sîn selbes hant
und hiez in über diz lant
ze clûse herzoge sîn.
dâmite tet er ir schîn
daz er wol kunde lônen.
er solde tûsent krônen
ze sînem muote hân gewalt.
sîn tugende was sô manicfalt,
ob im der lîp ie erstarp,
daz doch sîn lop nie verdarp
und iemer in den êren swebet
die wîle eht iemen fromer lebet.
er was ie den fromen holt
und gap in darumbe solt
daz sie daz beste taeten
und saelde und êre haeten.
dô er der frouwen gemeit
ir netze und ir arbeit
sô wol vergolten hâte,
dô sprach er vil drâte
wâ der alte waere,
daz man niht verbaere,
man hieze in ime dar gân.
diz was schiere getân.
als ez der alte vernam,
schiere er dar zuo im quam.
er sprach:< waz welt ir mîn?>
rehte an die sîten sîn
hiez in der künic sitzen
und frâgete in mit witzen
von allem sînem guote.
< wes ist dir ze muote,>
sprach der künic artûs,
< wilt dû mit mir ze hûs?
dû solt von der sîten mîn
iemer ungescheiden sîn.
ob daz dîn wille niht ensî,
ez sî mir verre oder bî,
swaz dû wilt und ich hân,
daz ist allez getân,
swaz mir darumbe geschiht.
ichn enlône dir des niht
daz dû mich den berc ûf trüege,
daz dûhte mich ungefüege
und hâte es grôze ungehabe.
daz dû mich trüege herabe,
des wil ich gerne lônen dir.
nû sprich waz dû wilt von mir.>
er sprach:< ich wil niht daz ir hât
wan daz ir mir daz lât
daz mir der künic matûr lêch,
der mir nie friuntschaft verzêch.
er was mir holt unde guot.
haete er sich daran behuot
daz er mir mîniu kint verriet
und ûz mîner lêre schiet!
er versprach mînen rât nie
wan nû, daz im missegie.
über den berc lît ein lant,
daz lêch er mir mit sîner hant,
daz ist einer mîle breit
und ist mit bergen umbeleit.
die sint sô stechel und sô hôch,
swaz ich dar in ie gezôch,
ez waere wilde oder zam,
daz ez darûz niht enquam.
dâ mac ouch niht komen in,
wan daz ich sô künstic bin
daz ich wol ûz und in gân.
swaz ich dar inne gerne hân
ze kurzewîle und ze spil,
des hân ich drin getragen vil.
daz lêch mir der herre mîn.
nû tuot iuwer tugende schîn,
sît ez an iuch gevallen ist,
und lîhet mirz an dirre frist.
ich diene iu gerne dâvon,
als ich unz her bin gewon.>
der künic artûs sprach zehant:
< versagte ich dir daz selbe lant,
sô waere ich ein unsaelic man,
dâ nieman ûz noch in kan
komen wan dû eine.
vernim dû waz ich meine:
mir waere lieber ein ei
denne der selben lande zwei
dâ nieman ûz noch in mac.
enpfâch dû mînen hantslac
daz ez dîn eigen iemer sî,
und bis des dienestes frî
den dû biz her hâst getân.
daz solt dû ze lône hân
daz dû mich braehte in den tôt
und daz dû mir ouch hülfe ûzer nôt.>
hie was der alte rîche.
vil gezogenlîche
neic er im unz an den fuoz.
er sprach:< nû ist mir sorgen buoz,>
und dankete im vlîzeclîche.
artûs der künic rîche
der kunde rehte werben.
wie solde danne verderben
sîn lop und sîn êre,
ez enwerte doch iemer mêre
und waere von rehten schulden wît.
alsô stuont diu hôchgezît
rehte vier wochen.
inne waere niht gebrochen,
haeten sie ez ein jâr getân,
swes sie darzuo solden hân:
daz lant was sô rîche.
sie schieden sich minneclîche
und riten mit fröuden dannen.
dô wart den spilmannen
des guotes alsô vil gegeben,
solden sie iemer mêre leben,
sie waeren dâvon rîche.
ai! sus lobelîche
gelanc dem künic artûse!
diu künigîn dâ ze clûse
diu umbe vienc in an der stat
und sprach dô er urloubes bat:
< gotes segen müeze mit iu sîn.
waere allez ertrîche mîn
und haete ich ze mîner jugent
aller wîbe schoene und tugent,
ichn haete niht bezzers mannes gegert.
ez wart nie wîp baz gewert
denne ir mich gewert hât.
mîn lîp und swaz ir hie lât,
daz stât in iuwerm gebote.>
nû bevalch er sie gote
und reit froelîche dan.
sîner vil lieben man
die mit im dar quâmen
und ze clûse frouwen nâmen,
der beleip dâ zwelf hundert.
eines dinges mich iemer wundert,
daz nû die herren sint sô karc
und er an gebene was sô starc.
daz er ein sô rîchez lant
sô lîhte gap ûz sîner hant,
ern tet niht misse daran:
er gap ez einem solhem man
der allen sînen willen tete,
den er deheiner bete
niemer dorfte gebiten,
wand sie vil dicke sament riten.
swâ ez dem künige nôt tete,
dâ was her daniel âne bete.
von diu gap erz niht ûz sîner hant:
er behielt den man und ouch daz lant.
daniel hâte fröude sît
alle tage mit hôchgezît
ze clûse in sînem lande.
sîn leben stuont âne schande.
die in dâ solden vlêhen,
den lêch er die selben lêhen
die in der künic lêch der dâ lac,
daz sie turnierten allen tac.
darzuo lêch er in mê,
daz sie ez baz taeten denne ê.
dâ behielten sie sînen willen an.
ezn wart nie kein man
dem got haete gegeben
ze dirre werlte ein bezzer leben
als er unz an sîn ende
âne alle missewende
mit êren vollebrâhte.
dâvon man sîn gedâhte
ze den besten dô und iemer sît.
dâvon wart sîn lop sô wît.
nû muoz ich der rede gedagen.
daz ich dâvon hôrte sagen,
daz hât ir allez vernomen.
got lâze uns in sîn rîche komen.
âmen.