DFB.txt

ez iach ein triegære,
daz er gar blint wære,
und gesach iedoch niemen baz.
also lange tet er daz,
untz man des wande, ez wær war.
dar nach wol uber ein iar
nam er sich warsagen an.
daz hal er wip und man;
er begundes mit den kinden.
er sprach:< welt ir bevinden
die gnade, die ich von got han?
daz wirt iu schir chunt getan.>
< ia, gern,> sprachen diu kint.
er sprach:< alle, die hie sint,
die suln ez iemer verdagen.
ich chan vil wol warsagen.
nu versuchet, ob ez war si!
hebet uf vier vinger oder dri
ode swie manigen ir welt!
die han ich schire gecelt.>
swelich kint die hant uf rakte,
swie manigen vinger ez strakte,
daz sach er und riet ez ouch.
sus macht er manigen iungen gouch.
diu kint vragten in gar,
wie ir roke wærn gevar.
daz sagt er in vil rehte.
iunge diern und iunge chnehte,
die braht er alle an den wan,
daz si gewis wolden han,
er wær ein rehter warsage.
dannoch bi dem selben tage
wart er den iungen wiben chunt;
daz douhte si ein sælden funt.
die westen wol, er was blint.
si taten also diu kint:
si versusten in in kindes wis.
da von gewan er solhen pris,
daz er fur wise wart erchorn.
si heten alle wol gesworn,
er weste, swaz er wolde.
si sprachen alle, er solde
ir miete nemen etewaz,
daz er in sagte deste baz,
waz in noch chunftich wære.
do wart ein michel mære
in die gegent getragen,
er chunde vil wol warsagen.
do chom der liut ein wnder dar.
do wart der wis man gewar,
daz er niht wan torn suhte
und anders niht enruhte.
do rou in, daz er dar quam.
er wart dem triegære so gram,
daz er im diu ougen uz brach
und im zornchlichen zu sprach:
< sit daz du torn hast gegert,
so hat dich got eines gewert,
der sich niht scheidet von dir.
chanst du nu gesagen mir,
wie maniger dirrer vinger sî,
da muge wir uns gerihten bî,
ob du die warheit furest
und die luge niender rurest.>
do wolt er niht mere wissagen.
er begunde siniu ougen chlagen.
do begunden diu liute alle iehen:
< nu en mohte er doch niht e gesehen;
des ist diu chlage ein ungelimph.>
der triegære sprach:< ez was schimph.
daz ich der blintheit iach.
ob iemen baz denne gesach,
daz was vil gar ane not.
mir wære lieber der tot,
denne ich miniu ougen han verlorn.>
daz was den liuten so zorn.
daz si sprachen alle geliche:
< nu lon iu got der riche,
sit ir uns habt geaffet,
derz also hat geschaffet,
sit ir uns allen habt gelogen,
daz ir ouch selbe sit betrogen!>
dem hat ein man gelichen mut,
der sin selbes varende gut
got und den liuten verseit.
swie vil der gutes beieit,
ern giht, ern habe niht,
untz ein wnder da geschiht,
daz ez dem diebe wirt beschert
oder mit dem roubære hin vert
oder ertrinchet oder verbrinnet,
oder swer imz ane gewinnet.
so swert er grozliche,
er wære grozlich riche.
so ist er riche ane gut.
ê was er arm und ungemut,
die wile unz er des gutes phlach.
do ne geiach er nie deheinen tach.
daz er ie gut gwnne.
swer also werben chunne.
der muzze sin gut verliesen.
alreht mag manz chiesen,
ez wære anders iemer tougen.
des guot und ienes ougen,
die wil ich lutzel chlagen.
ich wil des got danch sagen,
swenne er gutes ane stat,
des er gar verlougent hat
und sin iemer lougen wolte,
ob erz behalten solte.